☆24/7☆ - 14 By Dingdi Pachuau

☆24/7☆ - 14 By Dingdi Pachuau





Mut hmuna ka inngaihtuah nasat tâkzia chuh! Engati nge ka inthunun zawh miah loh ni? Hlatsan ka tumin ngaihtuah loh pawh ka tum rilru tawh kha a ni a; mahse, a bul hnaia han awma hmuh theiha a rawn inlàr leh meuh kha chuan, ka tlâwm hnehin dawl zawrin ka zawr lo chauh chu a nih si kha.



Ka awm dàn kha ka ngaihtuah lêt phei chuan ka zak chu rizai hnuaiah ka lei ka chhuah ka chhuah lo chauh tak tak a ni! Nula 'easy' takah min ngai ngei ang, min ngai pawh ni se ka awm dànah kha chuan a àwm ngawih ngawih asin. Kan inkârah induh tawnna thu pawh kan la sawi hauh lo a nia, chutih laiin min fâwp thei miau si, hmeichhia rêng rêng rinna nei hauh lo khân min va ring lo zual dâwn êm! Min test pawh a ni thei a, kei lah ka lo mawih suah suah mai si.



Zîngah thawh ka hai deuh lehnghâl a, ka mit a thial úrh mai nèn, a nuam fahran lo khawp mai. Thil țûl lo leh sâwt lo ngaihtuah chiam chiam rah chhuah chu hei ngei hi a ni, sim vat chi.



Nilêngin ka mit vàng chuan ka lu a na deuh bûr reng a, Ațana'n min lo text ve chhên bawk nèn, a rûkin ka thin a rim deuh hlur mai.



Tlaia eirawng ka bàwl laiin Rose-i chu a rawn haw a, kan inang lo khawp mai. A mood a fuh tih hi a hriat veng veng mai a, nizàn lama chance ka pêk vàng kha a ni ngei ang, kei lahin chance ka pêk kha ka tuar ta thung a, inang lo tak chu kan ni.



"Thil ka lo hàwn a, mut dâwnah kan ti dâwn nia," a rawn tih chuan khap sak saka lo enin," Eng chu maw?" ka lo ti a.



"Sawi chi loh, nakinah," a lo ti deuh tlat a, a la nui țhaw zui a. Ani hi eng emaw tui deuh a rawn hàwn leh a ni ang, a nu leh pate awm loh chhûng hian a duh duh a lei pawp pawp mai a; mahse, ka sawisèlsak lêm lo, ei tùr lam a lo ni hlauh zêl a, ka puar phah viau țhin zâwk. Ani ei duh zâwngte hi chu a tui țha țha leh a man pawh to deuh tak chin hlîr a ni bawk si a.



Zanriah ei lai chuan," Zaninah a lo lêng leh dâwn em?" tiin nui chung hian ka zâwt a.



"A hman lo, hna lamah a buai a, ka ngei a nia, hun lo țeuh țuh lutuk mai!" ner deuh sak hian a ti a.



"Engtikah nge in inneih ang aw?" ka lo ti daih a.



A nui deuh sak a.



"Engati maw?" a tih chuan,"Mawi taka inchei ka châk tawh alawm," ka tih chuan a nui ta hak hak a.



"E taka, vawiinah puanthân ka duh deuh chi ang a lo thleng thar a, kan țhuitîr dâwn em niang? A to deuh hlek nain a țha chi a nia, a puan man ka tumsak ang che," a ti a.



Rose-i hian min duhsakin ka tân hian ui a nei khât khawp mai a, ani anga duh duh lei ve pawp pawp tùrin ka thawh chhuah hi a la beitham hle si a, ka inthlahrung ru viau țhìn.



"A ngai lo, nangma tân lei la, a tâwk. Ka ngah tawh alawm," ka lo ti a.



"I ho êm mai, naktûkah ka lo en haw leh dâwn nia," a ti phawt a, chutah, chiang zeta min enin,"Ka phal lai hian lei che ka duh alawm, pawisa chu hman tùrin kan thawk chhuak a, duh zâwng kan lei lohin duh loh zâwng lei nân kan hmang dâwn em ni? Teuh lo mai! Mahni tâ tùr kan inlei theih lai hian lei char char tùr, pasal kan neih hunah chuan fate tân hlîr a nia kan lei tawh dâwn ni," a ti duah a.



A tidik leh chiah bawk si, chhâng lo chuan ka nui ringawt a.



Chaw kan ei kham chuan rawn lêng tùr an awm lêm lo bawk a, țhu mai mai pahin phone kan khawih a, a hnuah phei chuan room lamah kan lût ta daih a.



"Hei hi a nia ka tih chu," tiin beer bûr chu a rawn lek ta vâ mai!



"Eng atân?" Màwlthlâk thei! In atân bâk eng atân  nge ni ang?



"Ka period ka tai a nuam lo êm a, ka in mai dâwn. I duh ve ang tiraw? I in tawh ngai em?" a ti barh barh a, bûr khat chu hawngin a in pah nghâl bawk a.



"Ka in ngai lo," ka lo ti a.



"In zeuh zeuh a țha asin, zun a titam a, bâkah, period lai phei chuan  min tidam ve deuh bawk a," a ti leh a.



A ni lah tak a, vawi khat chu a 'taste' hriat ve nân hrim hrim ka tem ve tawh, a tuina ka hre lo, zu dik takah ka ngai tho. Kei, têt tê ațanga zu hi sual a ni ti tlat hian ka tem leh duh tawh bau lo, țhiante'n an in a nih pawhin kei chuan ka tem chhin ngai tawh lo bawk. Sual nia ka hriat ka tih ve tlat si chuan keimah ngei hi ka inring thei lo ang a, 'mi sual' nia ka hriatte ang tho kha ka ni ve dâwn tihna asin.



"I duh chuan in rawh, kei chuan ka duh lo ve," ka ti a.



"Eng nge, sualah i ngai deuh tlat em ni?" a rawn ti a.



"Ka in atân chuan ka duh lo mai a nia," nui deuh chung hian ka ti a.



"Sual a ni chuang hleinem. A intu rilru azir mai a nia, kei chuan damdawia hmangin ka in a, sual phah nân ka hmang lo. Chuvàngin, sual a ni lo ka ti a ni. In miah lovin a bûr chhûngah hian awm reng teh se, tu mahin 'sual' an ti miah lo ang, chu chu ka ngaih dàn a nia," a ti a.



"A dik alawm; mahse, Bible-ah pawh a țhat lohna kan hmu țeuh a, a in țhìnte hian thil țha tih phah nân an hman ka la hre ngai tlat lo, chhûngkhura buaina thlentu, hlim lohna siamtu leh nupa ințhenna thlentu-ah ka ngai, a țhatna lai hi ka la hmu ve lo a niang," ka ti ve duah, tlàwm chu ka tum bîk teuh lo.



A nui var var a.



"I va sawi țha tak! Mahse, a siamtute hian in atân an siam chhuak miau mai si a, dah mai mai atân an ti tlat lo. Kan in mai si loh chuan a siamtute an khawngaihthlâk," a ti a, a in leh khalh khalh a.



A in fo tawh țhìn a nih ka ring, a in zei êm mai. Kei chu thingtlâng lam chhuak ka nih vàng a ni ang e ka rilru hi a la kal khat deuh tlat a. Kohhrana inhman deuh phei chuan in chi-ah ka ngai lo, ka rilru a zîm deuh pawh a ni maithei; mahse, hemi kawngah kher hi chuan ka pu zâu ve thei lo.



"Ih, kohhrana inhmang deuh deuh zîngah pawh hian in țhin an awm nual asin, i rin loh deuh deuh an ni bawk ang, inkawm hlim nân leh intih- tûnlai nân an hmang tawh mai mai zâwk, a ruih theih tak tak chuang lo va," a ti leh a; mahse, ka ring vak lo. A ruih theih a nih ka rinna chu college kal lai khân țhian țhenkhatte khân an in țhìn a, an rui ve thei tlat a ni. In tam leh tam loh azir pawh a ni mahna, a intu thisen azir pawh a ni thei tho.



Khati chen kha an inah hian ka lo awm ve tawh a, a in ka la hmu ngai lovin ka hria. Tunah a nute an awm lo va, a in lang ngam ta mai zâwk pawh chu a ni maithei, ni lo thei tho bawk. A nute hriata a in êm chu ka ring lo deuh zâwk.



Nuteite lo haw hma zànah Bsa chu a rawn lêng leh a; mahse, 'chance' a sawi ri tawh lo. Kan inkàwm khâwm a, beer bawk chu Rose-i chuan a rawn la chhuak leh a, ka in ve duh lo tih a hriat tawh vàngin ka in tùr atân chuan Amul Cool min pe ve thung a!



Bsa pawhin a in ve tho a nih chu! Mak hi ka ti tàwp thei lo, khawpui mi hian an in duh deuh bîk a niang ka ti ta mai. Nia, ruih sual phah nân an va hmang lêm lo bawk a, a sual lêm lo a niang; mahse, ka duh ve chuang lo, bâkah, in a țhatna chu ka hre ve tlat lo.



"Ka nute an lo hàwn hunah chuan kan in thei tawh dâwn lo a nia, zaninah 'kuit' vek a ngai," a ti ham ham a, Bsa cigarette chu țanin a pak tak ang hlat hlat a, mak ka ti telh telh lo thei lo! A zial zu lai ka hmuh vawi khatna a ni a, a zu zei êm êm si a, a tih vawi khatna a ni lo ang tih chu a hriat ngawih ngawih.



Mutnaah chuan mihring țheuh țheuh, kan nungchang kan lo inthup theihzia ka ngaihtuah a, kei pawh hian ka thup țeuh tho. Ka nuteite ina ka awm vàngin chawhmeh ka ei duh ngai loh țhin pawh ka ei luiin duh deuh ang maiin ka awm a, ka zaidam lutuk lo nain naupang bulah chuan ka zaidam viau thung. Nuih ka heh êm êm rualin ka nèl lêm loh bulah chuan ka inti mi tak thei viau a, chutiang chuan mi tam tak pawh hi an lo inthup ve fur tho a. Rose-i pawh a nute bulah chuan fanu țha tak a ni a; mahse, a sawi duhtu tân chuan sawina tùr chu a tam ve dâwn riauin ka hre ta tlat. Fîmkhur hrâm hrâm hi a ngai a, hmeichhia phei chu kan hming chhiatna a ho thei si, thai reh lah chu a har tawh bawk si.



Nuteite lo haw chuan Rose-i nèn incheina tlâk kawr min lo hawnsak a, Rinfela'n inhmeh min tih chi rawng, a sendâng ngei mai a la ni zui, ka lâwm khawp mai. Rinfela'n inhmeh min tih vàng kher pawh kha ni chuang lovin a sendâng hi chu ka ngaina hrim hrim,min tilang inchei bîk ka ti țhin.



November thla a lo thlen chuan boruak pawh a dang țan ta. Ni tin school, ke ngata kal ţhìn ka ni bawk a, boruak awm dàn chu ka hre hneh ve viau. Rilru pawhin Bethlehem lam a hawi țan lek lek tawh a, dam hi chuan hun hi a lo kal chak êm a lo ni.



Rinfela pawh ka hmu zauh zauh; mahse, inbiak theih ang tùr chiin a ni ngai lo. Ràlkhatah, a nih loh chuan mi kârah, melh pawh ka melh ţha ngam ngai lo; mahse, hmuh ka châk thei viau thung si, ka hmuh lah hian keimahah hian zàmna eng emaw tak ka nei ziah lehnghâl a, min rawn hmu ve lo pawh ni se la, min rawn hmu ve ta emaw tih tùr hian ka lài êm êm ziah bawk.



Zîng khat chu school pana ka kal lai chuan ka hnungah min zui ve rengtu awm tlatin ka hria a, ka hawi lêt a, tu mah ka hmu mai lo. Ka kal chak sawt, rei pawh ka la kal hman lo tihah chuan ka hnung lawkah chuan Rinfela chu a lo kal ve reng tawh niin!



"Kal chak hlê mai!" a rawn ti a.



"Min lo zui ru reng a ni maw?" ka ti tâwng a.



A nui hawk mai! A nui ri ka hriat vawi khatna! A nui ngai lo emaw ka ti char char tawh asin; mahse, tunah khân a nui ve tlat!



"Eng nge nuihzatthlâk?" ka ti a, amah pawh en duh lo chuan ka kal zêl a. Ni leh lo, en duh lo a ni lo, en ngam lo a ni zâwk.



"Min hlau a nih loh chuan kal muang ve deuh teh!" a ti daih a.



"Ka hlau lo che," ka ti sap a, kal muan erawh ka tum chuang lo.



"A țha lutuk!" tiin ka pên rual zêl chuan ka sîrah a rawn pên a.



Ka ding ta thut, ani pawh a ding ve nghâl zat tho.



"Khawnge i kal dâwn?" ka ti a, ka hah deuh avàng chuan ka thaw deuh  sak sak a.



"Angel thla nei lo ka kalpui maw le!"



A thil sawi vàng chuan ka sen țâwn țâwn ang chu! A hmel pawh en duh lo chuan ka hawi sawn daih nghe nghe a, ani erawh chu a che sawn hauh lo thung.



"Duh tâwk teh! School kan thleng țêp tawh a nia, min zui tawh suh," ka zah a reh deuh hnuah chuan ka ti a, ka kal țan leh nghâl bawk a.



"Ka kalna tùrah ka kal ve ang chu maw le, he kawng hi i pa tã a nih bîk loh kha."



Min tihthinrim a tum leh tawh a niang, a thangah ka va âwk leh teuh tak êm!



"I pa tûnlai a dam țha maw?" ka ti ve daih, a thangah ka âwk tawh dâwn teuh lo mai!



"Saw, school naupang an rawn kal a nia, i din reng chuan ka hau che emaw an ti ang e," tiin kan hnung lam chu a kâwk zoh a.



An lo kal tak tak! Min rawn en deuhin ka hre nghe nghe, ani nèn hian min hmu dùn tùrin ka duh hauh lo, tlangvâl ka kalpui lai min hmu lo se ka duh. An lian ve tawh a, thil kalhmang an hre ve pha ruak tawh si a.



"Tlãi in bàn hunah, gate-ah sâwn ka lo nghâk ang che," tiin a inher a, ka ngaihtuahna rawn hre thei ang hrimin hma lamah chuan a kal ta vut a.



Nilêng maiin ka mood a fuh! Tlãi bàn ka nghâkhlel a, ka nghahhlelh rualin ka huphurh tho bawk. Min lo nghâk dâwn a, eng nge ka sawi ang? Ka țawng loh chuan ka lài chhe leh vek a ni mai.



Vawiin chu ni dang zawng aiin hun a kal muang ka ti. Chhùn chawlh chhûngte chu rei ka ti thar ta riau mai, ka phone lah ka en sek a, ka awm hle hle thei lo. Chîk taka min lo entu awm se chuan mak min ti ve ngawt ang.



Gate pâwn lamah chuan a lo ding vàng mai! School naupang an haw liam deuh vek tawh a, thawhpuite pawh lìrthei keng an awm a, keng lo pawh an in a hlat loh avàng leh kan haw kawng a inan loh avàngin a zia ka ti ta phian.



"Engati nge min lo nghah a?" ka hmuh veleh chuan ka ti leh lawi a.



"I phú alawm," a lo ti mai thung.



En țha duh lovin," Thutak ve deuh teh, min lo nghâk rei em?" ka ti leh a.



"A nghâktu tân rei duh viau mah se nghah man i awm alawm," a ti sup a.



Ka thaw halh a. Țawng lo chuan kan kal ta rih a, ka pên rual zêla pênin min rawn en pah deuh reng tih ka hria a; mahse, ka en ve duh lo.



"Nizàn khân ka rawn kal leh asin," a rawn tih chuan ka melh vat a.



"Khawiah?!"



"In țhenawmte veranda-ah khân."



Ka hawi sawn leh nghâl vat. Khami zàna kan awm dàn kha ka ngaihtuahnaah a rawn lút leh vat, ani pawh hian a ngaihtuah ve ngei ang.



Zahthlâk! Hmeichhe 'easy' takah min ngai a nih chiah chu, a rawn kal nawn leh dànah.



"Ka chhuak ngai lo, khami zàn pawh kha..." sawi zawm duh lo chuan ka ngawi ta daih, a bula insawi fiah kher a țùlna ka hre lo.



"Ka hria, hmuh leh che ka châk vàng a nia."



A thil sawi avàng chuan ka ding deuh dat a, ani pawh chuti tho. En pawh ka en ngam lo, a thil sawi hi ka hre sual a nih loh chuan a sawi sual tal a niang.



"Kan infawh avàng mai khân nula easy tak ka ni tihna a ni hauh lo," mi dang, ka thil sawi hre pha an awm hlauva hawi zak zak pahin, mahni invêng tak chuan ka la ti ve țàng țáng, ka chhûngril lam erawh zahna avàngin a su dup dup mai.



"Chutiang chuan ka ngai lo che."



Ka țawng ta lo. Step chhuk angreng tak, a pa ka hmuhna hmun kha kan thleng a, hmanhmawh vak lo chuan kan chhuk a.



"Fîmkhur rawh." A sawi zo chiah tihah chuan ka petek deuh nawk mai a, min rawn pawm kãng nghâl nawlh mai, ka hlauthâwng lutuk chu ka khùr dar dar a.



Hmawlh ka lo pal niin, engtin nge ka pal theih pawh ka hre lo, lum ila chuan ka lum thui ve khawp ang le! Ka ke erawh a him hlauh, pheikhawk pum ka bun tlat a, chuti chu ni lo se chuan thî lai chu a awm ve ngei ang.



"Ka lâwm e," ka ti sap a, min pawm bet bawk nèn, ka thinphu a ri dup dup mai, a hre pha hialin ka ring.



Min nghah hnuah chuan ka kutah erawh a la chelh tlat. Ka han țang ve deuh nain a thlah duh chuang lo va. Ka kut a chelh chu nuamti ru viau mah ila miin min lo hmu palh rêu rêu ang tih ka hlau.



"I petek leh palh ang, tu mahin min hmu chuang lo," tiin  min vuan nghet salh a, ka țang rei ta bík lo. Ka him ta riaua ka hriat chu! Nuam ka ti.



A kut chu a lum ham ham mai a, thlasikah a bula awm a nuam ngawt ang chu, min tilum hneh dâwn lutuk tlat. Ka kut leh ke hmâwr a vawt thei si a, ani hi chuan kutke hmâwr vãwt tih chu a nei lo ve khawp ang.



"Eng nge i ngaihtuah a?" Ding meuhin min lo en tawh! Step tàwp kan lo thleng tawh niin!



"Eng..chu?...Eng mah. Eng..nge a?" ka ti buh nuai ta mai a.



Min en chuan a nui leh ta suk a. He pa hian vawiin hian eng nge a hriat ni, a nui leh tawh! Vawi hnih a nui tawh tihna a nih chu.



"I lawmawm reuh ngawt mai!"



"Khatin min ti miah suh," ka ti ve thung a.' Lawmawm reuh' tih kha ka duh miah lo, naupang chhe cheibàwl ka duh lo.



"Naktûkah ka lo nghâk ang che, fîmkhur tawh la," tiin, min en vang vang hnuah chuan min kalsan ta a.



Ka ruak huai huaiin ka hria!



*******



"Sangbawih, ka rai a nia!"



Makti lutukin ka melh hrâwk a, ka âwm ka dawn nghâl chawt bawk. Ani pawh chuan hrehawm tih hmel tak hian min lo en lêt ve a; mahse, min en rei lo.



"Engtin nge a nih theih?!! Tu fa nge?" ka ti a.



"Bsa a nih lovin tu nge ni se i tih? Engtin nge ka tih tâk ang le?" a ti zuai leh raih a.



Engtik laiin nge an lo mut dun rêng rêng ni?! Ka rin loh lutuk thil a ni si a, rilru fîm put pawh a har ka ti.



"I rai tih i chiang chiah maw?" ka ti leh ringawt a.



"Mi â ka nih bîk loh hi!"



Ka thin a tirim bawk si, min la vìn deuh zui; mahse, a rilru a hah ve tihna a ni mai a, 'huat tùr a awm lo' tiin ka inhrilh mawlh mawlh a.



"Amah i hrilh tawh em?"



"Aw, titla rih mai tùrin min tia, engtin nge ka tih ang, Sangbawih?" a ti leh a, a meng phelh deuh phang bawk si a, ka khawngaih reuh mang tak e!



Bsa mai mai chuh! Kohhrana mi inhmang ve ve an ni a, a rûka an thil tihsual tunah a rah a rawn lang dâwn chiah a, dah bo tùrin a mipa zâwkin a rawn hrilh a ni si a, rilru put dàn thiam chu a har ngawt ang le.



"Eng nge i rilru? Nuteite hi kan hrilh-"



"Tihchi nâng! Min vawhlum duh ang!"



Ka thaw hawk hawk phawt a, kei pawhin tih dàn tùr ka hre mai lo. Vawilehkhatah min rawn țâwng thut a, thu tlûkna siam nghâl mai tùrin thil țha ber ka ngaihtuah thei lo., ka rilru a buai vek.



"Thil ti rum rum lovin rilru fîmin ngaihtuah țha ang," ka ti ta ringawt a.



"Kei pawhin tihtlâk mai chu ka duh a," a tih chuan râpthlâk ti deuhin ka en a; ani erawh a țhu kun deuh lap thung a, a rilru a buaiin a hah ve ngawt ang.



"Chu pawh ni se, ngaihtuahna thar hmangin ngaihtuah leh ang," ka ti leh a.



Ka rilru a va tâwt tak! Ka duh dàn hi an duh dàn a ni dâwn hauh si lo, ka hre tlang nghâl a ni. An thil tihsual chu thup bo lovin tilang tlang ngam se tih hi ka duh dàn a ni a, thil tisual tawhin Pathian pawi sawi nawn leh chu a hlauhawm ka ti a ni. Pathian phal loh thil an ti tawh a, chumi an thil tihsual thup tum nâna Pathian duh loh zâwng bawk tih leh kha a țja ka ti thei lo.



Mahse, an rilru ka hmin thei ang em? An rilrua an duh dàn lah ka hre tawh bawk si. Ka rilru a buai, ngaihtuah loh duh mah ila a theih ngawt si loh.





*I TÂNA MI DIK TAK CHUAN I TLIN TÂWK LOHNA ZAWNG ZAWNG  HRE VEK CHUNGIN A VUAN TLAT ANG CHE A, MI DIK LO ERAWH CHUAN ENGTIANG PAWHIN I ȚHATNA ZAWNG ZAWNG A CHUNGAH LANTÎR MAH LA, NANGMAH KHA A MAWHPUH THO ANG CHE*