☆24/7☆ - 15 By Dingdi Pachuau

☆24/7☆ - 15 By Dingdi Pachuau





A tûk nilêngin ka ngaihtuahna a luah a, tunah hian kan pathum bâkin kan la hre lo chu a ni phawt mai a... ka mawhphurhna chu a va sâng si êm! Titla lo tùra an rilru ka hmin a ngai; mahse, ka va huphurh tak! Ka rilru a zîng, râi ve ang mai ka ni!



Tlai bàn hma deuhin ruah a rawn sûr leh ringawt! Ka rilru zîng mup mup rawn tihzìn belh tum ang hrimin, tûn ang hunah eng ruah nge maw sûr ngai ni? Khawvêl hi a mak vêl vek tawh a nih àwm hi.



Nihliap keng hek lo i, school-ah ka tawm rih ta ringawt. Veranda hulhliap chinah chuan ka ding reng a, țhiante khân an lìrtheiah khân chuang tùr kha chuan min sâwm ve reng; mahse, kan haw kawng  a inang mawlh si lo va, ka duh lo a ni, a sûr rei lo tùrah ngai ang. A sùr rei tâk leh rickshaw ka do haw ve mai a niang chu, ruah do pawh a khât tawh alawm.



Zaninah Rose-i chu ka titipui ang, ani tal hi ka hmin a ngai, chuan, ani berin tihtlâk a duh loh tlat chuan Bsa pawhin a tilui thei bîk nâng.



"Eng nge i ngaihtuah?"



Ka lo ngaihtuah nasa lutuk a, ka hmaah a lo ding reng tawh tih rêng ka lo hre hauh lo!



"Eng nge i lo tih?!" Leh hâ mai a.



"Thil ngaihtuah vak vak suh. Mi sual lo ni ta ila, i che hman dáwn miah lo tihna a nia," a rawn ti a.



"I ni chuang hleinem," ka lo ti mai a.



"Thil rûk hmang ka nih kha."



A hmel chu ka en chho rang kher mai; mahse, ani erawh chuan min en ve lo. Sawi mai tùr ka vàn lutuk! Ani lah a ngawi ta daih si.



"Nihliap i nei em?" tiin thil dang ka sawi ta daih a.



"Hei hi ka nei," tiin a jacket hâk chu a khawih zauh a.



"A hàn ve țêp ang chu maw, sûr nasa lo mah se do chuan kan huh ve thei dâwn tlat a," ka ti leh a.



"Ka zàwn ang che."



A hàn mai lo, a tlêm deuh hlek tihah chuan kan haw ta poh. A jacket chu kan inzàwn a, a tìrah chuan kan inkal hlat deuh ve a; mahse, huh hlaua min zàwn ta chu, a bân veilam chu ka kokiah nghatin a kutin a jacket chu a dawm kãng a, kan inhnaih lo thei ta lo. Kan kal rei hnu deuhah phei chuan kei pawhin a kâwngah ka kuah lo chauh tawh! Hna a thawk lo a ni maithei, thlan rim a nam miah lo, a rimtui chûk chuang bawk lo; mahse, mipa rim a nam ka ti!



Step chhuk thla zui mai bul kan thlen chuan," Khawi," tiin a ding a, hre thiam chiah lova ka en chhoh chuan a kut veilam chuan ka kut veilam chu a rawn vuan a, kan kut inchelh tawnin a jacket chu kan khum dùn tihna a nih chu.



"Fîmkhur la," tiin muangchângin step-ah chuan kan chhuk dùn a, min chelh nghet viau mai.



"Keimah vàngin i huh phah vek dâwn a nih kha," ka tih chuan,"Ka vànnei a nih chu," a lo ti mai a.



Step kan kal zo țêp tihah chuan ka pheikhawk chu a tleng deuh zek a, Rinfela kâwngah ka țhâm chiang lutuk ringawt! Ani pawhin nghet zetin ka nghâwngah min lo kuah ve vat bawk. Kan kut kha kan la inchelh tlat si a, ka kâwngah min kuah thei lo a niang.



"Ka va tlu teuh thei tak!" ka ti khùr ru dar dar a.



"Ka awm alawm," a lo ti vat thung.



Step tàwpa a din tâk avàng chuan ka ding ve tawp. Helaiah hian in a khât deuh a, an in panna kawng leh kan in panna kawng a ințhen hrang tawh bawk. Eng vàngin nge a din ni? Ruah lah a la sî seng seng tho si.



"In in thlengin ka thlah dâwn che em?" a tih tâkah chuan ka thaw deuh huai.



"A ngai lo ang, a tla tam tawh lo bawk a," tiin ka chhâng, a chhan chu in thlenga min thlah chuan kawngah min hmu táwk an lo awm thei si a, bâkah, ka chhûngte pawhin an hmuh palh ka duh lo.



"Nia, i duh lo tawp ang," a tih chuan en pawh ka en duh lo, ka thil ngaihtuah chu a hria ang tih ka hlau.



Ka kalsan dâwn chuan," Ka lâwm e aw, huh lovin ka haw theih phah a," ka ti a.



"Kal rawh, ka lo en liam ang che."



Min en dàn leh min biak dànah hi chuan min haw bîk lovin ka hria. A țawngkam nèlawm fahran lo leh bung deuh nghut nghut țhìn pawh hi huat leh hlauh enah pawh ka en bîk lo, a tih dàn a ni ve mai a. Mi dang bulah, a bîkin hmeichhe dang bulah a ni ve em tih phei chu ka hre hauh lo; mahse, hei hian mipa tam zâwk țha tak taka min betute ai chuan 'zùn' a neih phah niin ka hre tlat.



Ka hawi lêt ngam lo, ka kal char char ringawt. Ka tukkhum hit mem mem ațang chuan min la thlîr reng tih erawh ka hria, min ngaihsakin min duh lo ni chuan ka hre thei lo a ni.



Mahse, min la test reng pawh a ni thei tho bawk, mipate chu an duhnaah chuan an fel thei êm! An nungchang pawh an thup thei; mahse, nungchang thup tih lai takah hi chuan Rinfela hi chu a dang daih chu ka ti. A nun dàn thup a tum pawhin ka hre lo, a nih dàn ngai a lan chhuahtîr mai a, nèlawm takin a awm chuang lo, a țawngkam pawh a bung thei khawp hi maw.



Mahse, hei tak mai hian a zùnah min uaitîr chu a nih si hi.



Zanriah ei khamah chuan khua a nuam lo bawk nèn, hma takah mu tùrin khum lam ka pan a, Rose-i pawhin min rawn zui ve deuh nghâl mai a.



"I inngaihtuah chiang tawh em? Eng nge thutlûkna chu ni ta?" tiin ka zâwt vat a.



A thaw hak phawt a," A duh dàn chu i hriat tawh kha. Kei erawh chuan ka la bùk tawn char char, tihtlâk ngawt ka hreh deuh si, tihtlâk loh dâwnin..." tiin a ngawi vang vang a.



"Rose, ka duh dàn ka han sawi ve ang e aw. Thil kal tawh chu thil kal tawh a ni a, tûn hun mêk hi a pawimawh lai ber chu a ni. Kei chuan titla lovin huaisen takin pãi tlang la ka ti, tu pawhin thil chu kan tisual rem rum vek; mahse, thil tihsual thup nâna thil sual dang bawk tih leh chu a țha ka ti thei lo a ni," ka ti dap dap a.



A țawng lo va, chêt pawh a che lo.



"Bsa chu sawi țhatpui leh la,i huphurh viau em? In inhmangaihna rah chhuah tho a ni a, a lainatawm in ti ve lo em ni? In tum aia hmain in hmangaihna rah chhuah chu in hmu dâwn a ni mai a," ka ti leh a.



Ka thu sawi chu a bengrawngah thun se ka ti takzet.



A hnu deuh hlekah chuan,"Nia, ka lo sawipui leh chhin ang e, a rilru a sawh sawn phei chu ka ring hran chuang lo va," a ti sep a.



"A țha, a sawh sawn maithei asin," tiin ka bu nghat nghat a, chutah, boruak tihzângkhai nân," A thuhrimin, engtik laiin nge in lo awm dun rêng rêng a?" tiin ka zâwt zui a.



"Ho mai mai! Induhte inkârah chuan hun fâlte chu a awm thei zêl ang chu," nui deuh chung hian a ti a.



"A zei loh hmel si!" ka tih chuan a nui ta hawk hawk a.



"Ka hrilh dâwn a nia," a tih chuan,"Hrilh lo ang, a ho mai mai," ka lo ti ve a.



"Tak tak chuan, kan inhmu fâl zauh zauh alawm; mahse, invènna kan hmang ziah a. Chance min pêk zàn pawh khân invènna chu a rawn pai reng; mahse, kan hmang lo, a chhan pawh ka hre tawh bîk lo, kan hmanhmawh lutuk vàng a niang," tiin ka rin loh deuh chuan min chhâng ta a.



Ka lo zak, chutiang thleng thleng a sawi duh chu ka lo ring miah lo asin! Ani lah chu zak ve àwm pawhin a awm chuang lo, hetiang lam hi ka sawi khàt pâwl tak a ni, a dài pawh ka la dâi chhin bawk si lo va.



"Hun fâl neih tam chu thil țha lo tih a awlsam bîk asin," ka lo ti a.



"Nia, a dik alawm. I bulah bâk ka sawi chhuak miah lo a nia, kei pawh hian ka duh ngai bîk lo, vawi khat kan lêng chhuak dùn kha motor chhûngah beer kan in a, ka lo rùi deuh a niang, insùm theihna kan tlachham ta sia, kan chesual dùn ta a. Khata țang khân hun fâl kan neih chuan kan ti ta fo a, vawi khat lo tem tawh chuan a vawi hnihna chu a lo awlsam tawh a, kan tawlhthlu ta fo a nih hi. Nang chu ti ve hauh suh aw, keimah ang hi chuan awm ve miah suh," tiin min zilh ta lel a.



Ani pawh hian a awm dàn hi chu a duh bîk lêm lo chu a nih àwm hi, kohhranah an lo inhmang laklawh tawh bawk si a, han bànsan dâwnin inpuan emaw kha a han ngai ang a, thil nuam lo ber mai a ni dâwn si a, a hrehawm ve ngawt ang chu.



Bsa chu țha takin sawipui thei se ka ti, an fa lo piang tùr chu titla lo ngam hrâm se, an hmalam hunah pawh hlimna tak tak an nei thei zâwk ang a...



Mahse, Bsa rilru chu a ngai reng. Eng mah a sawipui theih loh, tihtlâk chu a duh dàn a ni tawp. Rose-i lah chuan chutia a pa tùr berin tihtlâk a duh tlat chuan tiin a rilru a lo siam ve bawk a. Ka han sawipui leh ngial nain awmzia a awm lo. Ni e, an thu a nia, ka inrawlh theihna chinah chuan ka inrawlh ve tawh a, an duh dàn a nih miau chuan le; mahse, a rûkin hrehawm ka ti, ka lo ngaihtuah leh ngut ngut zêl. Kei ni ta ila, ka pãi tlang lo ngam dâwn si lo va tihte ka ngaihtuah a, Rose-i nau tihtlâk avàng chuan thil sâwt lo ka ngaihtuah nasa khawp mai. Ka lo thlêm thiam tâwk lovin ka lo țang na thiam tâwk lo a ni ka ti thùl, keimah leh keimah ka indem deuh lek lek hial.



Ka vei ngang a niang, ka mumang thleng thlengin ka lo hmu a, Rose-i nau titla tùr chu ka lo zui ve a, naute pawh la tling lo thi hlâwm an paih chu a lo țap ngâk ngâk a, naute lian puiah a lo chang niin. Doctor chuan a lo rêk hlum a, ka hlau lutuk chu ka țhangharh hlawl mai a, zàn a vawh ve tawh nèn, ka thlan a lo tla hluam thei.



*******



"I thluak te reuh tê kha, thunun teh!" tiin ka chalah chuan a rawn pen karh a, ka phu zawk mai!



Ka school bâng min lo nghâk leh niin, kei lah chuan ka thil ngaihtuah lai chauh ka ngaihtuah avàngin ka lo hmu lo va, chuvàngin min rawn pen a lo ni!



"A nah!" tiin ka chal chu ka tuai vat vat a, a na tak tak hauh lo; mahse, na deuh anga lantîr ka duh a ni.



"Tider suh, i inhmeh lo a nia," a lo ti thung a.



Chutah,"Thil ka zâwt ang che aw, dik takin min chhâng la?" ka ti leh ta daih a. Ka ngaihtuahna luah rengtu hi min chhàn dàn ka hre châk tlat a ni.



"Han sawi la?"



Ka aw chu ka han thian phawt a,"I duh deuh mai i bialnu khân i fa pâi ta se, kohhrana inhmang tak ni ve ve bawk ula, i fa chu pãi tlang tùrin nge i duh ang titla tùrin?" ka ti ta a.



A rin loh deuh ka zâwt a ni maithei, ding datin a ngawi deuh vang vang a, ngun zetin min rawn en bawk a. Chutah,"I râi 'mi?" a rawn ti chhuak ta a.



Ka nui hawk phawt a, lu thingin," Ni lo, keimah ka ni lo. Thil thleng ni thei ka zâwt che a nih chu," ka ti leh vat a.



"Kohhranah ka inhmang lo," a rawn ti leh sup a.



"Ta se ka ti, i inhmang ka ti lo," tiin ka hawi sawn nghâl daih a.



"I thinrim 'mi?" a rawn tih chuan," Ka zawhna i chhâng țha duh lo êm mai, kal ang," tiin ka pên ta nghâl a.



"Ka duh ngawt ang chu. Palai pawh ka tîr nghâl bawk ang," ngawi renga eng emaw chen kan kal hnu chuan a rawn ti ta a.



"Dik chiah! Mi pângngai rilru tùr chu kha kha a ni, mualphona hliah khuh nâna fa tihtlâk kha thil dik a ni thei lo," ka lo ti var a.



"Mahse, tûnlaiah chuan tu mah an mualpho duh tawh lo," ti supin," Kha kha i thil ngaihtuah ngut ngut chu a lo ni maw?" a ti leh a.



"'Umm...Ka vei bur a," ka lo ti ve mai a.



"Ka ni châk hle mai!" a rawn tih chuan," Eng chu maw?" ka lo ti a.



"I vei bur nih chu."



Ka hmai a sa hat hat mai, ka beng pawh a ling vâwt vâwt ang chu; mahse, a hmu thei lo hlauh a, a zia.



Ka țawng ngam tawh rih lo, ka zak! Ka phûr viau a, chutih rualin min fiamna mai mai a nih ka ring tel bawk a.



Ngaihtuah miah lova kan kal mawp mawp chu step bul kha kan lo thleng reng tawh niin, a lam chu hawi pahin,"Kumin Krismas lo-" ka tàwp chiang lutuk! Chu pa chu ka hmu ta hauh lo mai!



Ka hawi lêt a, ani chu a lo la ding reng niin, ka zah avàng khân ka kal mawp mawp kha a ni a, ani pawh a rawn kal ve zêl emaw ka lo ti mai asin!



A lam chu hawiin ka ding reng a, ani pawh rawn kal a tum lo a niang, a la ding reng tho.



"Eng nge, dik lo a awm em ni?" tiin ka va àu a.



Min chhâng lo va, a rawn kal chuang lo bawk. Eng a hria chu ni maw? A ke a tina em maw ni le? Ka ring chiah lo deuh. Eng nge maw a awmzia le?  Ka hawi kual a, mi an awm lo hlauh a, a zia tak tak, min lo hmu ta se, inhau thinrim kan nih duh hmel si a.



"Rinfel, ka lo nghâk che a nia," tihngaihna ka hre lo lutuk chuan ka ti ta ringawt a.



A rawn kal chak khawp mai. Makti takin ka lo en ringawt a, ka bul a rawn thlen chuan eng sawi set set lo chuan nghet zet hian min rawn kuah a.



A awm dàn maksak zet avàng chuan sawi tùr ka hre lo, chêt sawn nachâng phei chu ka hre lo leh zual.



"Sangbawih, ka duh chi tak i ni," min kuah reng chung chuan a rawn ti chhuak ta!



A thil sawi chuan min țhâwng teh dawt lutuk a, min kuah avànga mak tih tawh nâklaiin, a thil sawi chuan min tibuai leh zual! Chêt sawn nachâng pawh ka hriat loh hi.



In ka thlena room-a inthlâk tùra ka lût chu zak deuh tak si, hlim tak si chuan ka nui deuh var var. Ka hmui chu ka han khawih leh ringawt a, a la lum ham hamin ka hria, nichîn khân step bulah khân min fâwp a nih kha.



Khuma țhuin ka maimichhîng a, ka han ngaihtuah lêt vang vang a.



"Hmeichhe duh neih hi ka duh hauh lo, rin pawh ka duh lo; mahse, nang hian chu chu i tichhe vek," a ti a nih kha.



Chu mai a ni lo, chhùn êngah khân min fâwpin kei pawh ka chhâng lêt ve tho a nih kha, kan induh tawnna kha țawngkain sawi chhuak kher lo mah ila chêtziain kan tilang a, kan inthlah hlei thei lo țêp a nih kha.



Tunah chuan a chiang ta deuh alawm. Min duh mai mai ang tih erawh ka hlau, kei hi chuan ka duh hle tawh si a, chhùn êngah pawh ka infawhtîr thei a nia.



Ka ngai ru nghâl dèr mai.



Ka school bâng min lo nghâk ta ziah. Helamah hian hna thawh lai chu a lo nei ngei mai a; mahse, a bâng hma deuh țhìn a lo ni. Min nghah a duh vàng nge phei chu ka hre lo, ka zâwt ngam lo deuh a.



Kan haw dùn ta ziah a, țawng tam lo mah se ka bula a awma ngawi renga min kai chunga a kal pawh chuan ka hlîm tâwk êm êm. Kei chu ka la lài deuh tlat a, sawi tùr ka dap chung țhìn.



"I fel ve ngawt mai," tiin ka nuih sak a.



"Mi fel jail-ah an tâng ngai lo," a lo ti thung.



Ka en chho a, ani pawhin min rawn en chhuk ve tho. Ngawi reng chuan kan inen dùn deuh reng a, chutah, amah zâwk chu hawi sawn hmasaah a țang ta a.



Rose-i sawi kha ka hre tawh. Jail-a a tàn tawh thu a sawi kha, rûk rûk vàng nge, ruihtheih thil vàng nge chu ka hre chiang tawh lo.



"Tâng ve tho, hriat sual palh thil vàng pawhin an tâng ve fo," ka lo ti a. Ka tidik chiah alawm, hmânah pawh thil tisual miah lo a tâng reng tawh, bâkah, film vêlah pawh kan en nasa, kan hre fo alawm.



Mit khap lo lêkin min rawn en leh a, min tizak țêp alawm le.



"I dang ve ngawt mai!" a rawn ti sup a.



"Eng ang zâwngin maw?" ka lo ti var a.



"Angel thla nei lo kha i ni tak e!" a lo ti daih thung. Kan zawhna hi a inchhâng lo thei țhìn a nia.





*MI DANGIN THIL ȚHA AN TIH VE LEH TIH VE LOHAH BUAI DUH SUH, MAHNI TÂN VEK THO A NIA, THIL ȚHA I TIH TAM CHUAN NANGMAH KHÂN NUAM I TI ANG*