☆24/7☆ - 17 By Dingdi Pachuau

 ☆24/7☆ - 17 By Dingdi Pachuau

"Chumi-ah chuan eng nge tihsual i neih? Min zâwt chu maw?" tih pah chuan chiang zet hian min rawn en  a.

"Aw...a, thil sawi nuam a ni dâwn lo va," ka lo tih sap chuan,"Eng angin nge i ngaih?" a ti leh sup a.

Amah chu ka en ràn a, a zawhna erawh hriat thiam har ka ti kher mai. A nuin a pa nèn a uiresan chu engtiangin nge ka ngaih tih min zawhna a ni ang chu maw.

Fîmkhur ru angreng deuh hian," A, khawvêl a ni miau mai a, thil thleng lo tùra kan duh pawh hi a lo thleng mai zêl chu a nih hi. Thlèmna lah hi kan duh zâwng thilah chuan do zawh hi a har țhìn a, a țha lo a ni tih pawh hi kan ngaihtuah chang tawh lo țhìn a ni," ka ti duah a, a zawhna tak ka chhâng pawhin ka hre lo.

A ngawi vang vang a, chutah," Eng angin nge min ngaih?" a rawn ti țha leh ta a, a duh angin a zawhna kha ka chhâng zân lo a ni ngei mai.

"Tlangvâl chhel tak niin mi taima tak i ni tih a lang reng a, i nuin mi dang a neihsan avàng che u hian ka hmuh dàn che a dang lo, i fel ka tih tawh kha," ka lo ti a.

A nui hawk a, a zat vànga nui erawh a ni lo tih ka hria.

"Amah avànga hmeichhia rin harsa ka tihzia hi i hre thiam phâk lo ang," a rawn ti chhuak hrawih a.

Ngawi teh, a hma pawh khân hmeichhia chu rin harsa a tih thu kha a sawi tawh tak em kha? A sawi ngeiin ka hria, kha kha a nu vàng  maw lo ni a?

"Mihring rilru a inang vek lo ang bawkin hmeichhia zawng zawng pawh kan rilru a inang chuang hleinem," ka lo ti a.

"Ze thup thiam ber in ni," a ti leh ta a.

A dik ang, hmeichhia kher ni lovin mipa pawh an ni ve tho alawm. Hei hi chu ka ngaih dàn ve tho a nia, hnialna ka nei lo. Huat enah pawh ka en lo.

"I thin a ka tirim em?" 

"Engah chuan nge maw a rim ngawt ang le?" ka lo ti thung a.

A ngawi leh vung vung a, chutah,"Ka nuin mipa dang hnêna min kalsan hma kum 1 hmalam zawng kha chuan khawvêla nu țha ber, sawisèlna tùr awm lo leh ka pa tân pawh nupui fel a ni. Kohhran mi, inkhâwm pelh ngai lo leh zíng tin zan tin țawngțai țhìn mi a ni; mahse, eng thil nge thleng ta? Chuti khawpa kohhran mi chuan thil tenawm ber a ti asin," a melh ngai melh reng chung chuan a ti leh a.

Lo sawi ve tùr rêng ka hre lo. A chanchin lungchhiatthlâk, sawi hrehawm tak tùr a sawi lo ngaihthlâk mai chu ka tih theih chhun ni maiin ka hria.

"Engah maw nge thil kal tawh, țenghneng zet chu ka hrilh reng che ni? Thil thleng chhuanawm tak a la ni lo zui," tiin a ţhutna ațang chuan a tho a, "Chhùnah eng nge ei i duh ang?" a ti ta daih a.

"I siam dâwn 'mi?" ka lo ti vat a.

"Siam mai ang chu!" a lo ti mai a.

Hlim zet hian," Yess...!!" ka ti phawt a, chutah,"I siam a nih phawt chuan eng pawh ka duh ang, keiin coffee ka lo siam ang a," ka ti a.

"Coffee kan nei lo," a tih chuan," Ka rawn lei alawm, tui deuhin ka siam dâwn nia," ka ti a.

A nu chanchin lam chu a sawi chhuak tawh miah lo, kei pawhin ka zâwt tawh hek lo. Kan inkâr boruak tinuam lotu a ni ang tih ka hlau a, a chanchin hriat belh zêl erawh ka châk viau, ka la hre chhawm zêl ang chu.

Ka haw dâwn chuan ka kawrlum fual, kawngka bul maia ka khai chu min lâksakin min hâktîr a, a chêt dàn tê chuan min tihlim ru ver ver mai.

"In in bul thleng ka thlah che i duh em?"

Ka duh lutuk ringawt; mahse, ka thei lo. 

"Keimahin ka lo kal a, keimah bawkin haw leh ka duh, a pawi lo ang tiraw?" ka ti ringawt. A ngai hua ang tih erawh ka hlau khawp mai, ka zahpui angah a ngai ang tih thlengin.

Ka hlauhthàwn ang erawh a thleng lo.

"Ka rin dàn sa tho a nia."

Ka hmu har leh tawh dâwn si a, ka ngai lâwk, kumin chhûngin ka hmu leh tawh kher lo ang, chuvàngin, kuah ka duh. Bâkah, a nu avàng khân sawi chhuak duh lo mah se a nâ a ni tih ka hria, chuvàng chuan duat taka kuah hi a phû bawk. A hnung lam ațang chuan ka kuah thut a, ani pawh a che lai a tàwp ve chiang khawp mai.

"Tihian, awm rih ang," ka ti sap a, a hnungah chuan ka bei hlè hlé a.

Che lova rei fê ka kuah hnu chuan ka kut a âwm zâwna chùl pahin,"A vawi khat nân, helai hi lo dam vawng vawng rawh se. A vawi hnih nân, lo dam leh rawh se, a vawi thum nân, lo na ngai tawh suh se," ka ti sap sap a.

A âwm zâwn ka chùlna kut chu a kut lum thar thar chuan a rawn bawh thuah a, rei deuh fê chu atu ve ve mah kan țawng lo.

"Ka beisei a ni," a rawn ti chhuak ta sup a.

An veranda ațang chuan min thlîr reng a, vawi khat chu ka hawi lêt ngei. Chutah pawh chuan, a tih dàn ngai chiahin, ngawi rengin, che hauh lo chuan min lo thlîr leh. 

Ka va ruak huai huai tak êm!

*******

Krismas nuam tak chu a ni lo maw le. Mazuali hlim taka a nui hawr hawrte chu ka awt ru ta riau, hlim ang takin awm mah ila rilru a pangkhing hû mai a, Rinfela ngaihtuah loh hrâm ka tum pawhin ka ngaihtuahna luah bertu a ni si a, a theih loh hulhual.

"Ngaihtuah ngut ngut mah ta che!" Mazuali'n rawn tih pah chuan ka dàrah a rawn chelh thut a, ka lo phu zawk bawk.

"He nu hi, tenawm suh!"

"Min tiphu ziah suh!" ka lo ti ve thung a.

"Engah nge i ngaihtuah ngut ngut ziah ni, biak pawh i hre thei ngai lo a nia," a ti nang nang a.

"Ka tum ve alawm; mahse, a har ve êm asin."

Mazuali hi kan chanchin zawng zawng ka hrilh vek. Chutia Ațana ni lo, mipa dang ka hmu leh thuai thei chu min lawmpui a, mak a tih thu erawh a sawi zauh. Kei pawhin mak chu ka inti ve tho, chuta kârah ka duhin ka la vei êm êm zui!

"A timak ve e, tûn ang laia phone neih miah loh chu! A buaithlâk duh àwm hi ka tia, amahin țûl a ti vak lo a nih pawhin a bialnuin biak te pawh  a duh ve ang tih ngaihtuah tùr a nia," a ti leh bawrh bawrh a.

"Țûl lo a tih chuan neih thu chu a awm lo alawm," tiin a thlavãng chu ka lo hauh thung a.

"Țan nghâl ringawt suh, tunah pawh i ngai a, i biak theih loh hi," ani chuan a lo ti bak deuh hlak a.

"Kum tharah ka hmu leh mai dâwn alawm," ka ti leh. Nia, ka ngai a, biak theih chu ka duh. A dinhmun anga ding, inhlawh chawpa nung ve hrâm hrâmte pawhin tûnlaiah chuan smartphone an hûm ve vek tawh asin; mahse, ani chuan a nei ve lo miau a, tih vak ngaihna a awm lo.

Nuam ti fahran lovin zan tin chu ka zaikhâwm ve a, zài a tui a, an lâm mup mup nain kei erawh chu ka tui ve thei lo. Ka thinlung takin ka zai ve thei tlat lo, ka rilru a bulah a awm tlat a. A nih loh pawhin, zanin angah hian khawiah nge a awm ang, a țhiante ruih peih deuh ho kha a kàwm leh ang em, nge, inah a pa nèn an awm ang tih te ka ngaihtuah kual vak ziah.

Ka ring chiah lo, a pa bulah chuan a awm ka ring lo. Zàn khaw vâwt leh  thim hnuaiah, țhu khâwm mai mai tùrin a chhuak leh ngei ang chu. Hunpui laite a ni a,a țhian kawmte kha ruih vàngin buainaah an tlûk luh loh hrâm ka beisei, ani phei chu buaina tâwk tùrin ka duh lo va, ka ring phal thei hek lo ang.

Kan khuaah hmun dang ațanga  Krismas rawn hmang țhalai an awm ve nual mai a, zai khâwmna lamah an tițhain an lâm peih viau bawk a, mi pawhin an fak khawp mai. Kei ngei pawhin an tițha ka ti, hmun dangah Krismas hmang ve ta ila ka lâm thei dâwn lo tih ka hre chiang si a.

Mazuali lehpek chuan,"An làm dàn hi ka ei lo, làm zeia lam nalh an tum lutuk! Pakhat a làm chuan làm ngèi ngèi tùrah an ngai lehnghâl  a, an vêngah chuan hetianga an khawsak hi ka ring miah lo, nu leh paho lah hian an han fak êm êm a, kan vêng tlangvâlho lah hi mikhual nula, hmel kêu ve deuh hlek hi chu an lo pâk huam huam ziah," a ti barh barh a.

"An tițha ngawt alawm le! Kan làm peih ve miah loh hi," ka lo ti a.

"Zak mawlh hek lo maw le! Keini chu kan zak tlat alawm. Anni ang hian zak lo ve ila chuan..." a ti nang nang a.

"An lâm peih hi an fakawm ve hrim hrim," tiin ka lo țan thung a.

"A tlangvâl bera kha i lo hmu tài a ni lo maw? Kan vêng nulaho lah hian an star hlawm êm êm lehnghâl a," ei loh hmèl zet hian a ti leh bài bái a.

Nui var var chung hian,"Ka pe ang che, kei chu ka nei țha alawm," ka tih chuan,"Nula dang ka kian ang e, an duh hlawm bawk a," nui chung chuan a ti ve ta a.

Kum thar a lo her chhuak a, beisei taka khaw thiang êng mawi leh hun nuam tak ni tùr kan lo nghah chu khaw chhiain bul a rawn țan ta tlat mai, khua a vâwtin pâwn chhuah pawh huphurhawm tak a ni, kei phei chu ka khùr nasa, inkhâwm pawh peihawm lo tak a ni ringawt.

Phúr lo zet chuan ka insiam a, Mazuali'n min rawn biak chuan ani pawh a phûr fahran lo tih ka hre mai.

"A nuam lo e tiraw? Kum thar nuam lo tak chu a ni, hetiang chuan ruai țheh pawh a peihawm loh, a vâwt si," a rawn ti dar dar a.

"Thuneitu kan ni lo miau si a le, peih lo chung chung pawhin kan ti hrâm hrâm a ni ang chu," ka lo ti a, a rilru tihhnual belh zâwnga țawng lo cheh ka duh lo a ni.

"Nia...sen zet khân i hmui rawn hnawih la, thla kan la dâwn nia. Mai mai a, thla kan la țeuh ang a, a nawm hmel mai ang," a rawn tih leh chuan ka nuih a tiza lutuk.

Ka rin aiin inkhâwm kan tam, biak in pawh kan khat tho. Ruah súr kârah a ni lehnghâl a, mi lo tihțhatzia leh inpêkzia ka hriat thar phah.

Inkhâwmnaah chuan Rinfela ka ngaihtuah chhuak a, ka țawngțaina pawh chuan ka hlàn tel ve ta thlap. A tân tih theih nei tam lo mah ila ka țawngțaipui phawt chuan engkim a fel a ni mai.

Thla kan la chuai chuai mai. Kan phùr loh tehrêng nèn, kan hlim ta phian. Zàn lama hla kan neih tùr kan en nawn a, kan thiam sa a nih vàngin a harsa lo, hmun dang dang ațang haw khâwm kan tam ve bawk a, zaipawl pawh kan țhahnem viau.

Ruai țheh hunah meuh chuan ruah pawh a sûr tawh bîk lo, a vâwt êm êm ringawt mai a ni. Ka inthuam lum hle a, mawza lum pawh pahnih lai ka bun alawm.

"En nghâl miah suh aw, Taitea leh mikhual nula an țhu dùn a nia," Mazuali'n ka beng bula a rawn tih sar sar chuan ka hmu châk lutuk chu ka za nghâl zek zek mai.

"Ka en dâwn-

Ka hmai rawn nawr sawn nghâlin," En nghâl suh tih mawlh mawlh a! An rawn hawi rih alawm, i la hmu êm êm ang," a ti a.

Chutah,"Mo lâm peih deuh in nei dâwn a nih hmel," nuihza insûm hmel tak hian a ti leh a.

Ka en ta nge nge. Inhnaih deuh tak hian an lo țhu a, chu nu chuan eng emaw a zâwt a niang, Taitea lam chu a hawi a.

"Mahse, a țha daih zâwk alawm, âng peih deuh ai chuan lâm peuh deuh chu hrawn an nuam zâwk ang chu," a lo ti leh sap a.

"An inbiaka an țhut dun avàng ringawtin kan mo tùr tihna a ni dâwn em ni?" kalo ti thung a; mahse, mak ka ti ve deuh tho. Taitea hian hetiang lam hi a ngaihtuah lo ve si a.

"Nia, ka ti ve mai mai, kan la hria ang chu," a lo ti ve mai a.

*******

Lungleia ka chhuk zànah Thlamuana kha a lo lêng chat mai a, Rose-i'n ka chhuk dâwn tih a lo hrilh a ni ngei ang, ani lo hi tu emaw rawn lêng zâwk ta se, nuam ka ti àwm mang e!

Krismas leh kumthar kan hman dànte chu kan sawi liam liam a, dam taka kan hmang thei chu a làwmawm a, kan hlim viau emaw hlim viau lêm lo pawh ni ila, kan dam thleng chu a làwmawm hrim hrim.

He pa hi tlangvâl ngainatawm tak chu a ni ngei mai, a titi leh a chêtphung hrim hrim hi a puitlingin a fel tih a hriat ngawih ngawih, zei lo viau pawh ni se heti chen mai nupui a nei lo hi mak ka ti ta zãwk. Hmeichhe zei leh zak lo thei takin an la bàwr lo a ni ngei ang, a la tawng fuh lo mai a ni.

Rinfela nèn kan inhmuh fàl hmasak berah chuan kan inkuah vawng vawng a, ka ngai a, ani pawhin min ngai ve tho a nih ka ring.

"Engtin nge hetah rawn kal nachâng i hriat a?" ka ti sap sap a.

"Ka rawn kal ziah alawm," a lo ti mai a.

"Eng nge i rawn  kal ziah chhan?" ka ti leh, ka dîlchhût khawp mai.

"I lo haw hun ka lo châng che maw le."

Kan țhenawmte veranda-ah a nia kan awm dun lehpek ni. A fâl reuh a, êngin a rawn chhun vak bawk si lo a, a nuam reuh asin, thli a ûp reuh bawk si.

Dàwr têah chuan kal lo ila kan inhmu thei miah lo ang maw le. 

"Krismas te, in hmang nuam em? I pa a dam țha maw?"a kut lum thar thar hùmsak rauh rauh pah chuan ka ti a.

"Aw, dam e."

 

A rawn țawng chhuah zâwnga a thaw khu laih laih chu a inhmeh ka ti, eng emaw ti hian a tipà tlat ka ti lehpek.

"Krismas-ah i inkhâwm em?" Ka ring lo nain ka zâwt ve hrim hrim.

"Khâwm lo."

"A nih, kum tharah?"

A lu a thing. Ka rin dàn tho a nia, ka zâwt ve hrim hrim a ni.

"I inchhîr em?" a rawn ti ta daih.

"Engah chuan?" ka lo ti ve a.

"Kei min tawng hi." Ka kut a hmeh neuh neuh chu a titàwp ta rih a, ka chhànna a nghah vàng niin ka hria.

"I ring em?" ka tih chuan," Ka zâwt che a," a lo ti thung a.

"I inkhâwm ngai loh vàngin maw?" ka tih leh chuan min chhâng lovin min en ngur ringawt a.

"Inkhâwm ngai lo hi an sual vek lo va, inkhâwm țhìn pawh hi kan țha vek chuang lo. Thinlung hi a pawimawh zâwk," tiin ka thiam tâwk chuan ka chhâng a.

"I inchhîr lo tihna?"

"Ka la inchhîr lo chu a nia," tiin ka nuih sak a. Nia, ka inchhîr lo, ka inchhîr lo ang, inchhìr loh ka tum zêl bawk ang.

Duat zet hian min kuah ta hle hle a, kei pawhin ka lo kuah lêt ve a, kan kawr hâk chhana kan lungphu inchhàwn dat dat ri chiah chu thâwm hriat tùr awm chhun a ni.

"Ka kal tawh ang," ka tih sap chuan a hma aia nghetin min kuah a, ka kal chu a la phal rih lo a ni ang ka ti rilru a, min ngai ve viau a nih dâwn hi tiin ka hlim veng veng mai.

Chutah, duhthawh takin min fâwp leh vawng vawng a, chumi hnuah chuan ka kal ta chauh. Hlim ru veng vengin inah chuan ka lût ta a, ka thil lei chu phawrhin Rose-i chu ka pe ve a.

"I va rei!"

En duh miah lo hian,"I lo nghahhlelh vàng mai mai a nih chu," ka ti a, min man chhuah loh hrâm ka beisei.

"Tlangvâl tu emaw nèn in lo tawm dùn a ni ang ka ti a," nui hak hak pah chuan a lo ti leh a.

"Teuh lo e!" ka ti tak nain ka thin a phu nasa kher mai, min man chhuak hman ta emaw ka ti țêp a ni.

"Ka ti mai mai a nih kha. Chutia tu emaw sawi chhuah tâkah chuan, mak ti viau kher lo la, Urlâwk zàn khân an man asin, nimin piah nge, a piah leh zâwk khân a rawn chhuak ve chauh ang an tia, rawn chhuak tawh tak maw?"

Makti zet hian ka melh ta reng ringawt. Nichin lawk khân ka hmu a, a rawn chhuak chu a ni chiang alawm, chutiang thil eng mah thleng àwm pawhin ka hre si lo. Kan inkuah a, inngai takin kan awm dùn a nih kha.

"Engati nge an man a?" pangngai thei ang bera țawng chhuah chu ka tum a, ka thei hrâm chuan ka hria. Ka thinlung erawh a na nghâl ngawih ngawih.

"Duty lamin an man a, zu vàng an tiin ka hria, damdawi lamchu ni se chuan a rawn chhuah tjeih lawk loh hmel sia, a dik a niang. A tàn khàt ve tawh nèn, a pângngai viau tawhin ka hre nghe nghe a," a ti leh a.

Ka thil hriat avàng chuan ngawi rengun ka ding a, ka thinlung erawh sawi fiah thiam lohin a tina takzet a ni. Krismas leh Kumthar chu a pa bulah hmang lovin tàn inah a hmang a ni si a. A rilru tùr leh a pa rilru tùr ka ngaihtuah kawp a, a hrehawm dâwn êm asin. A pa chu tuin nge lo awmpui ang? A fapa chu a ngaihtuah ve viau ang chu, Tàn inah a tâng tihte a hre ve ang em? 

A thil min zawh 'I inchhîr em?' tih pawh kha, chutia a lo awm vànga min zâwt chu em ni a nih? Ka lo hriat vek tawh a ring tihna em ni?

*I HLUTNA PUNTÎR TUAL TUAL I DUH EM? MAHNI TÂN CHAUHA NUNG LOVIN MI DANG TÂN HAN LUANG CHHUAK CHHIN TEH, I HLU TIAL TIAL ANG A, I INCHHÎR LO TIAL TIAL BAWK ANG*