☆24/7☆ - 18 By Dingdi Pachuau

 ☆24/7☆ - 18 By Dingdi Pachuau

Zàn mut a va har tehlul êm! Ka ngaihtuah lo thei si lo, chu chuan mut chhuak rawn kal tùr a hnawt țiau vek mai a, zîng lam dâr 2-ah pawh nghate rèp ang kar ka la ni.

Zû mawlh chu. A in ve lo ni khân ka ring deuh ringawt kha a ni a, in ve miah lo ni ta se, eng vàngin nge zû vàng chuan an man si ang le? A in ve țhìn a ni ngei ang, a kuta mi an mansak ang a...mahse, zû an mansak avànga han tàn ringawt pawh chu, an mansak tam viau a nih ngawt loh chuan...

Ka muhìl lo tluk a ni. A hmaa ka hlim tehlul nèn khân Rose-i thil sawi khân min tidik lo zo vek a, zàn pawh ka mut theih loh phah hial a nih hi. Thil kal tawh ka ngaihtuah vak vak a, a sâwt dèr si lo. Thil sâwt lo ngaihtuah vak vak ka chìn hi sim ka va duh tak êm!

School-a thawhpuite nèn kan han inhmu khâwm leh dial chu, rilru rit pawh tlêmin a zia deuh. Krismas leh Kumthar hman dànte inzâwtin kan titi mam mam a, kei pawhin thil dang ka ngaihtuah hman bîk lo, țhiante bula awm hi damdawi pakhat chu a lo nih ve dâwn hi.

Chawhnu bànah chuan gate bulah dingin ka hawi kual deuh ruai mai, min lo nghah leh kha ka ring deuh ringawt a! Mahse, hmuh tùr a awm hauh lo, engah nge kei hian min lo nghâk leh tùra ka beisei ngawt ni? Helamah hna a thawk kher tawh nâng.

Lunghnûr ru zet chuan ka pên hnak hnak a, ka rilru a hlim lêm lo a ni. Nizàn lam ka mu țha lo bawk nèn, ka hmel hmuh pawh a nuam fahran lo ang chu, ka lang hlauhawm ngawt ang.

Rinfela nèna kan 'spot' pakhat zâwk step kha ka thlen chuan ka ding vang vang phawt a, huphurh rilru deuh chuan step tàwp lang thla raih mai chu ka thlîr thla a. Khati chen kha mahniin ka lo kal ngat ngat tawh a, kâr hnih thum emaw vêl lek kan kal dùn a, tunah hian a tel lo chuan huphurh tak têin ka han huphurh nghâl ringawt mai chu a ni si a.

Ka va zuau sâwt tak!

Muangchânga pên thla chhat chhat pah chuan kan inhmuh leh hun tùr ka ngaihtuah a. Engtin nge a bulah thil thleng chu hre lo angin ka awm theih ang? Ka inthup thiam lo hle si a, eng nge ka sawipui ang a, engtin nge hlim takin, thil thleng awm lo ang maiin ka biak theih ang tih chu ka ngaihtuah rauh rauh a.

Dingin thlang lam chu ka en thla vang vang a. Tu nge ka hmuh tâk hi?!!!

Ani ve thung chu step-ah chuan rawn chhovin a rawn pên zau khawp mai. Makti rilru takin, ding reng chung chuan ka lo thlîr reng a, ani pawh chuan min rawn hmu chiang ve mai.

Ka bul a rawn thlen chuan dingin thâwk a la ham ham phawt a, kei pawhin lo biak buai chu ka tum rih lo, hahdam deuh phawt rawh se.

A hnu deuh, a hahdam deuh tawha ka rin hnuah chuan,"Khawiah nge i kal dâwn a?" tiin ka zâwt ta a.

"I bulah."

Ka melh chho a, min rawn en chhuk ve ràn a.

"I meng rei a ni maw?" a rawn tih chuan hawi sawnin ka inkuangkuah a.

"Nia, rei angreng," ka ti ve mai. 'Rei lo'' pawh ti ila, a âwih chuang lo ang, ka hmel ațangin a chiang êm mai.

"A țha lo asin."

Ve ngei chuan.

"Muthilh a chhuah tlat lohte chuan," ka lo ti leh a.

"Khawi, i kut kha min pe teh," a rawn tih chuan ka en chho leh vat a, ani erawh chuan a kut dinglam a rawn phar chhuak thung a.

"I kut chu?"

Ka veilam chu ka pe ve mai a, a kut lum thar thara min han chelh leh chuan nuam ka tiru leh veng veng ta.

"Helai hi hei, ka tih ang hian i nuai țhìn dáwn nia," tiin ka kutzungte invuahna bul chu dìm deuh tak hian a nuai nak nak a.

"Chuan, ka mut a chhuak dâwn tihna maw?"

"Um..."

"Chhuak thei chuang lo ta se...?"

Ka kut chu hmer deuh salhin,"Kal tawh ang le," a ti leh daih.

Muangchânga pênin min kai a, kei pawhin ka zui lo thei lo.

"Ka mut chu chhuak chuang si lo ta se?" ka ti leh a.

"Nangmah tal i chhuak mai a niang chu."

He pa hi, fiamthu a thawh ve ngei a nia. A nui chuang miah lo nain a hmui awm dàn ațang chuan a hriat theih mai.

"Zanlaiah pâwna chhuak tùr chuan min beisei lo ang chu tiraw?" ka ti leh a. A mak ka ti, ka thil sawi tùr chu a rawn indawt chho zut mai, ka ngaihtuah chiang hman miah lo.

"I hlau 'mi?"

"Hlau e, ramhuai ka hmu ang asin!"

A rawn nui chhuak ta hawk hawk mai. Rang zetin ka en chho vat a, chutianga a nui chu ka la hmu ngai lo tlat a, bâkah, chutianga a nui hawk hawk ri chu ka la hre ngai lo bawk. A ngaihnawm ka ti, ka benga châm reng atân ka duh.

"Min nuihzat a ni maw?" ka ti leh a, lungàwi loh vànga zâwt erawh ka ni lo.

Ding meuhin min en phawt a, nui hmel pawh pu tawh chuang lo chuan,"Hmeichhia min tinui hmasa bertu i ni," a ti ta a.

"A ni maw?!!"

"Aw."

Kan ințhen dâwn chuan,"Zanlaiah pâwnah chuan chhuak miah suh ang che," a ti sup a.

"Chhuak tùrin min tih si kha?" ka tih chuan," Ramhuai kha," a lo ti mai a.

"Min tihțhaih a ni maw?"

"Kal tawh rawh, ka lo thlîr ang che."

Keimaha ka kal hnu chuan nichîn khân nizàna Rose-i thil min hrilh kha ka theihnghilh deuhthaw a ni tih ka hre chhuak a, mak ka ti rilru kher mai. Rilrua helhkam nei deuh țúna ka biak ka rin tehlul nèn, a ni miah lo. A hmel ka hmuh rual khân a bo vek a ni ngei ngei ang.

Zànah rin loh deuhin Ațana'n min rawn be leh ta. Biak loh ka tum zet a; mahse, tunah chuan a chunga thinrima biak duh loh hian awmzia a nei lêm lo tih ka hre tawh a, bâkah, mi dang duh tak ka nei tawh bawk a, țha taka mangțhana hunah hmang ila a țha ang.

"Sangbawih, mipa nêp tak chu ka ni tiraw? Hmeichhiain a be peih lo tih hre reng chunga biak tum tlat mipa han nih chu, a tlàwmthlâk chu ka ti ve reng; mahse, a tisualtu ka ni miau si a, ka tlâwm vawng vawng mai chu a nih hi," a rawn ti a.

Sawi mai tùr ka hre lo.

"Thlah che hi ka tum, tihrehawmtu che ka ni tih ka inhriat vàngin. Theihnghilh chea hmalam pan ka tum ve nasa lutuk; mahse, a har ka ti a ni, ka theihnghilh thei lo che. Hloh che hi ka duh lo, a chhan chu hmeichhe fel tak i ni si a, nang ang hi ka tawng tawh ngai dâwn si lo, min haw êm êm ang tih chu ka ring; mahse, i tilang ngai chuang lo, min huain min ngei viau chung pawhin țha takin min be thei tho a, i tân ka rinawm zo lo chung pawhin, mi puitling tak chu i ni," a rawn ti leh duah a.

"Ațan, huat che hi ka duh lo va, khâkna leh thinrimna thinlung put pawh ka duh tawh lo. Kan inkâra thil thleng kha chu a thleng vek tawh a, kan pahnih tân hian nunhlui kan ni ve ve tawh, hmalam pan tùr kan ni. Theihnghilh tum lovin pawm tum mai rawh, chu chu i tân a țha ber. Intheihnghilh tum kher lovin kan hun tawn hi pawm thiam tum ang," ka ti ve ta a.

"Engtin? Theihnghilh che ka thei lo, ka phal lo bawk," a rawn ti a.

"Kan ințhen tawh a ni tih kha pawm rawh, nunhlui ramah chêng tawh suh, nunhlui tihthar leh pawh a ngai lo, awmzia a awm hek lo," ka ti ve ta khauh a.

"I tel lo chuan-"

"I thei tih ka hria. Thei lo angah i inngai a nih kha, pawm thiam rawh. I thinlung khân i thei a ni tih pawm la, i thei mai ang. Min rawn biak min rawn biak pawh hi tum tawh suh, thil țûl loa inham buaina mai a ni. Țha taka inmangțha hi ka duh a nia," ka ti leh a.

"Bialpa dang i nei tawh a ni maw?" a rawn tih chuan," Chu chu a pawimawh ber lo, a pawimawh ber i fa kha ngaihsak hlê ang che, nang ni lo pa dang a nei ngai dâwn si lo," ka ti ta daih a.

"Mangțha che hi har ka ti a ni, ka mangțha che a nih chuan kan inmangțha hlen dâwn tih ka hre chiang si a," a tih chuan a sawi dik êm avàng chuan sawi mai tùr hre lo chuan ka ngawi rih a. Ni e, kei chuan ka mangțha hlen daih tawh, amah hian a la pawm ve lo mai a ni si a.

A fa chu ngaihsak viau se, a tân pa nih tling se a țha a ni mai. A țha berah phei chuan a fa nu chu nupuiah nei nghe nghe se; mahse, chu kher chu ka lo sawi ve tùr pawh a awm lo.

Mak ka tih rûk deuh chu Bsa leh Rose-i chungchâng a ni. Khatiang thil țha lo kha an ti chung pawhin kohhranah an tîm pahin an inthlahrun phah miah lo va, tìm chu sawi loh, a phusa ber berah an la țang ngam chu a ni. Kei ni ta ila chuan țhalaia ka nihna chanvo zawng zawng pawh ka kalsan ngei ang a, ka inthlahrung ngawt bawk ang. An tih ang suala tlûk luh loh erawh ka tum viau a, chutiang thlèmnaa lût lo tùra ka fîmkhur viau a ngai bawk ang. Miin thlèmna an tawha an tlûk palh hian nuihsawh mai lova chutiang thlèmna kan chunga lo thleng ve thei laka kan lo inzir fin hi a pawimawh a, kan lo invèn fïmkhura kan kawng ngun taka en chunga kal hi a paeimaeh hlê rêng a ni.

Mahse, mihring chu kan lo inang lo thei êm a lo ni, Pathian kan hmuh dàn leh kan hlauh dàn pawh a inchen lo va, kohhrana kan inhman dàn, kan rawngbàwlpuite kan hmuh dàn pawh a inang hek lo. A țhen chuan rilru tak takin Pathian an hlau a, Amah țih tak chungin A rawng an bâwl a, a țhente erawh chuan a lang  chauhin rawng an bâwl a, an chhûngrilah erawh takna rêng a awm lo. Mite hmuhah țha ber berin an awm a, chhûngril lam erawh belhchian tlâk awm hauh si lovin.

*******

"Phone nei ve tawh la?"

"Eng atân?"

"Kan inhmuh theih remchàn loh lai pawhin kan inbe thei dâwn alawm, a remchâng i ti ve lo'm ni? Phone i neih chuan engtik lai pawhin kan inbe thei tawh ang a, a nuam ngawt ang!" tiin uar deuh tak chuan ka han sawi a.

Ka dàwr kal haw kan inhmu fuh leh a ni. Kan hmun ngai tê, țhenawmte veranda-ah bawk. An rawn luah thei țêp tawh lehnghâl a, an rawn luah hunah phei chuan kan inhmuh chu a rem tawh lo chiang ngawt ang chu!

"Kan inhmuh theih tho hi," a ti leh a.

"Kan inhmu fuh palh a nih hi, țhenawmte'n an rawn luah hunah phei chuan..." ka ti a, ka ngawi leh deuh dat a, chutah, thil ngaihtuah chhuakin," Engtik nge i birthday?" ka ti ta thut a.

"Eng atân maw?" a lo ti sup a.

"Sawi ve mai la," ka ti nang nang .

"A pèl tawh, january ni 2 kha," a lo ti ve mai bawk a.

A țhat hlauh chu. A birthday ka hre ta a, ka duh chu ka ti thei tho ang.

"I pian thla a va țha ve, tiraw?" ka tih chuan," Eng nge a țhatna?" a lo ti leh a.

"Aw...thla hmasa ber a nia, chutah, ni 2-ah a la ni zui, a țha lutuk tingawt!" ka ti leh a.

Thu ho mai mai a nia ka sawipui leh ni. A bulah hian thinrim deuh ang leh ka rilrua ka vei deuh, ka zâwt ang ka tih ve pawh hi a bo duak zêl a,  thil eng eng emaw mai mai hi ka sawi leh țeuh ziah.

"Jail ka tàn thu kha i hria tiraw?"

Ka thin chu a rawn phu rang nghâl dut dut mai. Ka ke ka tiche sek pawk chu ka tàwp chiang khawp, amah chu ka en chho hau mai a.

"Eng...maw?" Makti àwm deuh, la hre lo ang deuh tak hmêl leh aw ang thei tùr chuan ka ti vêl a.

"I hre tawh tih ka hria a nia."

Engtin nge a hriat ni?! Hriat chhuah hi ka awl takzet ani ngei ang.

"Aw,..hria..e," ka ti bah deuh nak a.

"I inchhîr viau tawh ang chu?" a ti leh a.

Engah chuan nge ka inchhìr ang le? A bula ka awmin ka hlim a, ka ngai a, hmuh hlàn ka nghâkhlel hle si a, engtin nge ka inchhìr theih tehlul ang?

"Ka inchhîr-" ka sawi zawh hma chuan," Min chhàn kher a ngai lo," a lo ti leh vut a, chutah,"Mi sual tân chuan jail hi kan in pakhat ang a nia," a ti leh a.

"I tàn chhan min hrilh thei ang em?" ka ti ta khauh a.

Min en vang vang phawt a, chutah, hawi sawnin," A țangkai lêm lo," a ti ta nghut a.

"Ka hriat ve a țangkai lo maw?" tlêm chuan ka rilru a na țan.

"Awmzia a awm chuang lo va," a lo ti leh mai a.

"Min hrilh duh loh chuan a pawi chuang lo; mahse, engati nge itàn thu chu min hrilh si a?" ka ti sap a, ka hawi sawn nghâl bawk a.

"Zēp ka tum a; mahse..." a ti a, a ngawi leh rih a.

Ka țawng duh tawh bîk rih lo, ka ngawi ve ta kar a.

Kan ngawih vang vang hnuah chuan,"I inchhìr ka duh lo," a ti leh ringawt a.

Inchhîra inchhîr lo tùr pawhin ka rilru ka pe nasa lutuk tawh a, ka lêt thei tawh lo.

"Ka inchhîr lo," ka ti a.

Min en tih ka hria; mahse, ka en duh lo lui tlat.

"Ka tâng leh tawh miah lo ang," a rawn tih chhuah tâkah erawh ka en lo thei lo. Ka thinlung chu hlimna hian a rawn tuam hlawp hlawp ni maiin ka hria, a thu sawi chu rinhlelhna pakhat mah ka nei lo bawk.

Rei vak lo chu kan inmelh tawn ràn a, chutah,"Ka pui ang che, i tâng tawh miah lo ang," ka ti ve ta a.

"Ka tàn chhan-"

"Eng pawh ni rawh se, pawi ka ti lo, thil kal tawh vek a ni; mahse, i tâng nawn thei tawh lo. I tàn ka remti tawh miah lo ang," rilru chhûngril ber ațang chuan ka ti chhuak a.

Muangchânga min rawn hnaihin min rawn kuah a, kei pawhin nghet zetin ka lo kuah a, ka mittui a lo hnai tih ka hriat chuan ka duh lo kher mai.

"Angel thla nei lonu."

Ka nui hak a, ka hlimna chuan ka lung a tichhe tel tlat, chutah, min rawn pawm kâng lawp zui a.

"Ka țah a chhuak a nia," ka tih chuan ka mittui chu a tla tak tak!

"I țah ka phal lo," a lo ti thung a; mahse, ka mittui a tla tawh tho tho.

Kan ințhen dâwnah chuan ka mittui chu duat taka min tuai hulsak pah chuan,"A tla tawh ngai miah lo ang," tiin ka mittui luanna chu a rawn fâwp a.

"Ka hlim vàng alawm," ka lo ti a.

Chumi zàn chu ka hlim lutuk a, ka muhìl thei lo lehpek țêp a ni; mahse, a thil min hrilh kha ka hre chhuak a, ka kutzungte  invuahna bul chu ka tuai ka tuai a, ka hriat loh kârin ka lo muhìl ve ta mai a, mumang bo țhakin ka mu lehnghâl.

Jail-ah a tâng tawh dàwn lo. A sawi tawh a, ka ring hmiah. A thil tih tawh chu siam țhat theih a ni tawh lo, hunin a liampui tawh; mahse, hmalam hun a la nei, hmingchhiat nân a hmang tawh lo ang, ka pui duh.

A birthday ka zawh chhan kha chu a birthday-ah surprise ka duh a. Ni 2 chu liam tawh mah se ka duh duh hunah ka surprise thei tho alawm, ka surprise-na tùr chu a lo duh kher ang em le? 

*THIL LUNGKHAM NEI RÛN ȚHIN SUH. I HMALAM HUNA HARSATNA AWM A SUTKIAN PHAH LOH BÂKAH NUN A TIHAHDAM LO*