☆24/7☆ - 19 By Dingdi Pachuau

 ☆24/7☆ - 19 By Dingdi Pachuau

Ka hman hmasak berah phone man to tak ni lêm lo ka lei a, sim card nèn, pawisa a nei tho ang tih chu ka ring a; mahse, a lei hun ka nghah chuan a la rei dâwn lutuk, a chhan chu phone neih kha țûl a ti lo miau mai si a. Thilthlàwnpêk ang pawhin pe mah ila a lo pawm duh lo tlur ang tih chu ka hlau angreng.

Kan inhmuh hmasak berah chuan a pa ei tùr ka leisakte nèn polythene dumin ka pe a, a chhûng en pawh tum lêm lo mah se, "En miah suh aw, In i thlen hunah chauh en ang che, chuti lo chu i ei zo vek palh ang," ka ti tlat a.

"Ka vir hmel viau mi?"

"Aih...mahse, en chuang suh," ka tih leh chuan a nui suk a.

"Inah pawh ka pa hrilh lovin ka ei zo vek thei tho alawm le," a tih chuan," Chutin ti miah suh aw, ka lo lèn hun hunah i pa ka zâwt leh mai dâwn alawm," ti fuh inti tak chuan ka ti a.

"Ka en lo ang, inah pawh ka en lo ang," a tih chuan," Inah i pa nèn en ka phal alawm," ka ti a.

"Ka pa i ngaizâwng."

Ka nuih a za lutuk. A hnunglam ațanga kuah pah hian," A fapa zâwk hi le," ka ti a, ka nui kar kar a.

A number ka hriat sa vek avàngin in a thlen àwm vêlah ka call ta a, mak chu a ti ve viauin ka ring a ni.

A rawn 'Hello' chuan," I birthday ka lo hre lo va, min hre thiam dâwn n. Chuan, thinrim suh aw, i lei hun ka nghah dâwn chuan ka nghâk rei dâwn si che a, inbiak theih thuai ka duh si a," ka ti zung zung a.

"Țûl ka ti ber lo asin," a rawn ti. Nia, a rilru dik tak a ni a, ka hre tawh a ni; mahse, ka nghâk thei lo. Inbe zung zung thei lova awm hi hrehawm ka ti a ni, kan inhmu zut thei bawk si lo. Bâkah, inhmuh chhunah pawh thlâ a muang lo, miin min hre chhuak ang tih hlau rêng rêngin kan awm a, a hrehawm.

"Biak fo che ka duh alawm, i duh ve lo em ni?" ka ti a.

"A to em? A man zât min hrilh teh," a tih chuan," Birthday present a nih kha, chuan, a man sawi kher a ngai lo, hmang ve mai rawh," ka ti leh a.

"Hei kher hi chu-"

"A nih, ka hman lai hi i duh zâwk em ni? Inthleng i duh em? I duh zãwk chuan kan inhmuh hunah kan i thleng dâwn nia aw," ka ti leh zung zung a.

A ngawi ta vang vang mai.

A rúk tak chuan nuam lo ka ti, a thin a rim a ni ngei ang, a thin a rim kha chu ka ring sa tho; mahse, biak ka duh țhìn tho si a, tunah thinrim mah se nakinah a reh leh mai ang chu maw.

Ka beisei.

"I thin a rim a ni tiraw? Thinrim suh aw ka tih ve reng kha," hlauthâwng ru angreng deuh chuan ka ti dêk dêk a.

A rawn thaw hawk ringawt.

"Khawngaihin, i thin a rim chuan nuam ka ti miah lo a nia. Birthday present liau liau a nih kha, khatiangah an thinrim ngai lo," ka ti leh a.

"Ka thin i tirim lo."

Tlêmin ka rilru a nuam deuh a; mahse, nuam lo chu ka la ti tho.

"Pawisa i nei lo ang ka tihna a ni lo a nia aw, i lei hun ka nghah chuan ka nghâk rei dâwn êm a, biak zung zung theih che ka duh tawh vàng a nia," a hriat thiam beisei tak chuan ka ti leh a.

"A țha alawm," a ti ve ta a.

Hun a kal a, hman chu a hmang ve ngei a; mahse, a hmang khât a ni. A hna thawhnaah a keng ngai lo bawk a niang, chhùn lamah hi chuan ka message chhàn lêt a ni ngai lo, inhmuh duh ve pawh ni ila, a ngaihna a awm lo; mahse, zàn lamah kan in-text thei tal a, a zia ka ti tawh tho tho e.

School bàna in chhûng ka tihfel hnuah chuan zai rât rât pahin ka inbual a, ka hlim a, zàn hun lo thleng tùr hi ka nghâkhlel thei viau a ni.

Ka inbual zo ka chhuah chuan Rose-i a lo haw ve tawh niin, min lo en hâ pah hian," Riff-a tih khân a rawn call che a..." a lo tih chuan ka lo meng hrâ mai! An lo inbe hman em? Ka thin a phu rang zaih zaih kher mai!

"Mahse, ka chhâng hman lo chiah chiah a, a rawn tinawn leh ta bawk si lo va," a tih chuan ka thaw ta huai huai!

"A pawimawh vak lo a nih dâwn chu!" ka lo ti satliah; mahse, a rûka ka hlauhthàwnzia kha a hre hman tho chuan ka ring.

"Tu nge ni a? Hming a nei mak si," a tih chuan nui chung hian,"School lama kan thawhpui a nia," ka ti ta ringawt.

Dâwt sawi ka va awlsam tak!

Engtiziaa min rawn call ve teh tlat nge maw a nih le? A hnên ațanga phone call ka vawi khat dawnna a ni. A pawimawh viau em ni ang?

In chungah thawmhnaw pho pahin ka call a; mahse, min chhâng leh thei tawh miah lo. Min lo call hun chu ka en a, vawi hnih lai mai a lo ni nghe nghe, minute 15 vêl chauh a la liam a, a rei loh nèn, eng nge maw a lo tih hman ni?

A pawimawh viau chuan min rawn call leh mai ang chu maw; mahse, text message ka hnutchhiah tho. Pawimawh viau lo pawh a ni ve thei tho, bâkah, a lo hmet sual palh pawh a ni ve thei tho bawk.

Mahse, vawi hnih lai a ni si a.

Zànah Thlamuana a lo lêng a, phone call chu ka châng ru deuh reng tho. Min rawn biak loh pawhin nakinah mut dâwnah ka message kha min rawn chhâng mai ang chu a.

"Thlamuana hi ti ve mai teh, ani pawh hian a huat loh tawp che hi, ka bulah a sawi deuh reng tawh che a nia," mutnaah chuan Rose-i chuan a ti a.

"Ka phú lo êm mai, bâkah, min duh tak tak teuh lo mai! A ti ve mai mai a nih hi," ka lo ti a.

"Bialpa i neih chuan loh hi," a tih chuan," Ka nei alawm," ka lo ti mai a.

"I nei lo tih ka hria alawm, Thlamuana chu duh ve mai rawh," a ti leh a.

"Ka nei alawm, a rûkin a nia," nui deuh chung hian ka ti a.

"Daw lo mai teh, Thlamuana hi chu a țha asin, in inhmeh dâwn si, a châwm zo dâwn bawk si che a, hna i thawh ve pawh a ngai tawh dâwn lo asin, ani nei hi chu mi vànnei tak an ni mai, mi vànnei chu ni tùrin ka duh che a ni," a ti leh sauh sauh a. 

"Ni zâwk mai rawh, ka kian ang che," ka ti lêt a.

Mi ang pângngai chin, ni leh lo, mi ang pângngai lutuk lo chin pawhin Rinfela ai chuan Thlamuana hi thlannahawm an ti vek ang; mahse, ka ti ve lo, Rinfela hi ka duh fê zâwk, mi â ka ni a nih ka ring, hemi kawngah kher hi chuan.

Ka text chu min la rawn chhâng chuang lo, engtizia nge ni? Zan dang  anga min chhàn hun a ni tawh asin. A la lêng reng em ni zâwk le? Ninawm, a țhiante mai mai hi, an țhu khâwm leh mai mai tho àwm si a.

Ka huaisenna sâwm khâwmin ka text țha leh a, hmm, a hmu e.

Min rawn chhâng lêt chuang lo.

He pa hi a thin a rim em ni le? Min rawn call lai khân ka lo chhâng si lo va, kha vàng kha em ni ang? Hrehawm ka va ti tak! Ka message lah hmu rengin min chhâng si lo. Han call êm chu, zàn a rei ve deuh tawh si.

Ka duh lutuk hi min hnê ta a niang.

Rilru nuam lo zetin ka mu a, ngaihtuah loh tùr tùr ka ngaihtuah kual leh ta, muthilh a va har tak! Mahse, a thil min hrilh ang khân ka ti leh a, ka muhìl ve leh thei ta mai.

Phûr vak lovin school kal tùrin ka insiam a, Rose-i chuan," I tho fuh meuh nange?" tiin min fiam zauh nghe nghe a, ka chhâng tuitam lêm lo.

Vawi khat ka phone leh ang, message min chhàn loh tal pawhin phone call hi chu a chhâng duh maithei asin.

School gate bula dingin a number chu ka hmet chhuak a.

A ring ral țêp tihah chuan min rawn chhâng ta hrâm e.

"Min ngaidam rawh,"ka ti phawt a, chutah," Eng thil nge ni ta? I țha em? Thil thleng a awm em ni?" ka ti leh ta a.

"I school em?"

"Aw, hei gate ka thleng tawh a, eng nge ni ta?" ka ti leh a.

"Ka rawn call châk-" a sawi zawh hman hma chuan a uak țhat ri chu ka hre zawm nghâl a, ka meng phâwk chiang khawp mai!

He pa hi zîng țhang țhangah a rui em ni? A luak chiang alawm, engtizia nge? 

Rilru na ru zet chuan ka ding reng a, nizàn pawh khân a ruih vàng a ni ngei ang min chhàn theih loh kha. 

"Thil ei sual ka nei a nih ka ring," a rawn ti ta sup.

Chutah chiah chuan ka rilrua ka lo suangtuah thil chu paih bo vatin hlauthâwng ru zet hian," Eng nge i ei a?" ka lo ti vat a.

"Nimin hna thawhnaa an ei tùr siam kha a nih ka ring," tiin a uak leh țhat țhat chu ka hre chhunzawm leh nghâl vat a, kan inbiak lai reng pawhin a thup zi lo chu a ni si a, a luak nasa tawh àwm mang e!

Inher thutin," Inah i awm tiraw?" ka ti a, hmanhmawh zet chuan ka pên pâwk pâwk a.

Damdawi dàwr ka hmuh hmasak berah lûtin a ei tùr damdawi ka lei a, hmanhmawh zetin an in lam pan chuan ka kal leh dàwr dáwr. Step-ah pawh chuan ka zuang dâwrh dâwrh lo chauh a ni.

An in bul ka thleng har lo, thil ka ngaihtuah chhuak leh thut a, school-a thawhpuite ka phone ta vat a, pumna ka chhuanlam leh ta ringawt.

Dâwt ka sawi leh ta; mahse, hun tawnin zir lo miau hek le.

In chu a lo inkhâr țhiap a, kik pawh kik duh lo chuan ka hawng tawp ringawt. Kik mah ila, a pa khân a hre àwm chuang si lo va, ka peih vêl lo.

A pa chu țhutthlêngseiah a lo ţhu a, min hmuh chuan mak a tih ve hmel viau a ni, eng mah phei chu a lo sawi chuang lo, damdawi ni àwm tak hi a lo inchhawp nual a. Kei pawh chuan be ta'ng e ti lo chuan ka hawi kual a, a bulah Rinfela ka hmuh miau loh avàngin room lamah a awm a nih ringin ka lût tlang leh nghâl pawp mai.

Khumah chuan a lo țhu-mu deuh a, plastic chawhtawlhah tui a lo inchhawp ve ràn mai, a luak dawhna tùr a nih chiah hi.

A mitmengah chuan mak tihna leh làwmna inpawlh nawk chu ka hmu thiam ve mai a; mahse, a rawn țawng chhuak chu a dang daih thung.

"Eng nge i rawn tih?"

A aw chhuak chu a thâm lek lek mai. A chau tawh khawp a nih chiah hi, khawngaih zet chuan a bulah chuan ka țhu thla a.

"Damdawi ka rawn lei a, ei nghâl rawh aw," tiin ka phawrh nghâl vat a.

"Engati nge i rawn kal a?"

A chala thlanfîm bawl țek țek chu en pah hian," A țha a nia, kha, tui nèn hian ei rawh," tiin tui bottle, a khum kianga a chhawp chu hawngin ka pe nghâl a.

Ani pawh chuan a lo ban ve mai, ka làwmzia chu a.

A ei zawh chuan bottle chu ka lâksak leh vat a, țhut a tum chu khumah chuan ka nem mu ta nghâl bawk a.

"Țhut a ngai lo, mu rawh."

A mitmeng lang val deuh kulh leh dul raih mai ațang chuan a tuar nâ a nih ka ring a, ka khawngaih kher mai. Chauh pawh a chau tawh ngawt ang, a lang reng alawm.

"I lo kal-"

"Shhh...." tiin a hmui chu ka hupsak vat a, hnai zetah chuan kan inmelh ta ràn mai.

"Țawng tawh suh, mu vang vang la, i damdawi ei khân a rawn thawk thuai mai ang," ka ti sap a.

Ka thu a âwih ve tlat. Țawng a tum ta miah lo, a meng khup deuh lap maiin ka hria, ka khawngaih roh mang e!

Chutih lai chuan a pa chu a rawn lût a, kan bulah chuan rawn kalin,"Kan nei tawh lo a nih dâwn kha, ka hmu tawh miah lo," a rawn ti bul bul a.

"Eng nge ni a?" ka lo ti vat a.

"Damdawi maw le, ei sual damdawi a nia."

"Ka pu, a ngai tawh rih lo e, hei, a ei zo chiah a, a rawn zia thuai tawh mai ang," ka lo ti sawk sawk  a.

"Damdawi chu i hmu maw?" a rawn tih chuan ka lu chu bu nghatin Rinfela damdawi ka pêk zawh chiah ang chu ka kâwk a.

"A țhat hlauh chu, nimin a rawn haw ațangin eng mah a ei thei tawh lo va, ka buai rilru khawp asin," a ti leh chuar chuar a.

"A țha thuai dâwn alawm," ka lo ti vat a. Nia, a țha thuai ngei ang, hetia a awm reng hi ka phal teuh lo mai.

A pa chhuah hnuah chuan a bulah țhu hnai sauh sauhin, a chala thlan bawl țiam țiam chu duat takin ka hrûksak a, ani pawh chuan eng mah sawi lovin a mitmeng dul raih chuan min lo en kual ve mai mai a.

"I zia thuai dâwn a nia, tuar hrâm hrâm rawh aw," ka ti sap sap a.

"Engati nge-"

"Shhh..." țawng tùrin ka duh rih lo, a dam har phah palh ang, kei pawh ka țawng tawh lo ang.

A kut chu chelhsakin a bulah chuan ka țhu ta reng a, kan țawng lo va, a chânga a pa khuh leh zauh zauh chu thâwm awmchhun a ni mai.

"Lo mu ve la?"

Ka châk viau rualin a pa ka zah, bâkah, ani dam țha lo bula ka mut chu a pum ka tawk palh ang a, a nat belhchhah palh ang.

Nuih sak pahin," I pum chu a la na viau em?" ka ti ta zâwk a.

"A reh țan."

A làwmawm lutuk. Reh thuai thuai teh se, nimin tlai ațangin eng mah a ei tawh lo va, ei tùr ngaihtuahsak a ngai ngei ang, pumna luak pah bawk chu a hrehawm dâwn lutuk si a.

"A reh fel hunah ei tùr ka siam dâwn che nia," ka ti a.

Kan ngawih vang vang hnuah chuan," Engati nge i tuar tlawk tlawk ringawt a?" ka ti chhuak ta phawng a.

"Ka tuar chhuak ziah alawm."

"Chutiangin ti ringawt tawh suh," ka ti a, damdawi in lama kal chu ka sawi chhuak duh ta lo, tuin nge kalpui ang? A lo tuar tlawk tlawk ţhin tih a hriat reng mai si a. Chutiang ka ngaihtuah phei chuan  ka khawngaih takzet, ka lung a tichhia.

"I hlauthâwng mai mai a nih kha. Ka țha chhuak ziah alawm. A zia lo ngawt mai, School lah chu i chawlh phah ringawt mai si a," a ti duah a.

"I damna a pawimawh ber," tiin a chal leh a nghâwnga thlan chu ka hrûksak leh a.

Ka kut a lo man ta chat mai.

"Angel dik tak chu i ni."

Duh aiin kan țawng tam leh ta. 

"Ka ngawi tawh ang, nang pawh aw, i dam thuai thuai hi a pawimawh," tiin  ka țhutnaah chuan ka țhu thla leh a. Ka kut erawh a thlah chuang lo, kei pawhin tàl chhuah ka tum chuang lo.

A luak tawh lo va, a pum nâ pawh a zia ta zêl a niang, khumah chuan a rawn țhu chhuak a.

"Mu rih rawh, a dam chian bal thlengin," tiin nem mut ka tum a.

"A dam tawh," a lo ti a.

"Chu pawh ni se, țhut ai chuan mut kha a la țha zâwk tho tho," ka ti leh a.

Ka rin loh deuh chuan a mu ve leh mai a, thu âwih taka a mu chu nuih sak pah hian," Ka thu han âwih lo na lang chuan  e, ka hawsan daih ang che," ka ti a.

"Ka phal hleinem."

Ka rawmawl chu tui chuan ka leih huh a, sâwr lehin a hmai chu duat tak hian ka hrûksak a.

"Ka bulah awm reng thei la ka ti," a rawn tih chuan a mitah tak chuan enin," I duh tak tak maw?" ka lo ti a.

"Ka têt lai ațang tawha chhiarin ka damlo min enkawltu ka neih awm chhun i ni."

Ka thil tih lai chàwl meuh chuan ka en ta reng mai! 

"Enkawltu ka nei ngai lo, ka pa hmuhah  phei chuan ka damloh pawhin damlo angin ka awm ngai lo, a chhan chu a rilru ka tihah mai mai dâwn tih ka hria a ni, ka tuar a, ka tuar chhuak ve mai zêl bawk. Tuna i kut dam takin duat taka min hrûk te kha ka tân chuan vàna rah ang a ni țhìn," a ti leh charh charh a.

"Nuam i ti em? Ka hru leh ang che aw," ka tih chuan,"I hah palh ang," a lo ti daih a.

Nilêngin ka awmpui a, a dam chian hnuah chuan ei tùr ka siam a, kan pathuma ei tùrin. A pa kha chuan damdawi chu a lo pe ve ngei mai a; mahse, chu chuan a lo chhâwk thei lo a lo ni, damdawi ka pêk kha a ngeih êm kher a, a làwmawm tak tak a ni.

Tlaia ka haw, thui pawh ka la kal hma chuan scooty hi a rawn tlân chho a, kawng ka lo kian mai a; mahse, a rawn ding ta tlat mai.

"Eng nge helai laiah hian i tih a?!!"

Rose-i a ni tlat mai!

Ka chhâng thei lawk lo, chhuanlam siam tùr ka ngaihtuah kual nasa.

"Ka school bâng ka lêng kual mai mai," ka ti ta ringawt a.

"Dâwt i sawi chiang!"

He nu hi chu aw...!!!

"Lo țhu rawh, haw ang."

Kawngah chuan kan țawng lo, in kan thlen hnuah erawh Rose-i chuan chîk zet hian min en reng a, ka inthlâk zo room ațanga ka chhuak tùr chu ka bânah chuan pawtin," Min hrilh țha ve mai la?" a ti leh a.

"Ka lêng kual ka tih chu."

Ka en duh tlat lo va, dâwt ka sawi tih a hre kher lo maithei.

"Khawiah?" a ti leh a.

"Țhiante inah," ka tih chuan," Țhian i nei lo. Rinfelate inah i kal em ni?" a rawn ti ta chiah mai!

"Aih..." ka chhâng rang mah mah, a âwihawm lo zo vek ang chu.

"Nang hi, eng thil nge thleng a?" a rawn tih leh chuan," A damlo a, ka kan a nih kha," ka ti ta nge nge.

Zêp reng hi ka ning, min zâwt chîk peih si, tikhân Thlamuana pawh min dem peih tawh lo ang a, a țha zâwk!

"In ni...!! Rinfela nèn maw?!!!"

A aw ațang chuan mak a tihzia a hriat theih mai.

"Aw, nangman min dem min dem a nih kha," ka ti sap a.

"Lalpa leh!! Engtin nge...a va mak tak!! Tuin nge...a, thil mak tak chu a ni!!" a ti leh ringawt a.

"Khatin țawng vak vak suh," tiin ka lo khap a.

"Riff-a kha amah a lo ni maw? In nihna a rei tawh em? I va inzêp thei tak! A zei viau lo maw?" 

Chutiang lam bawk maw?

*KAWR PHELH ZÁWNGA I MIPA HNEH I TUM A NIH NGAI CHUAN I TLÂWM ȚAN RENG TAWH TIHNA, HNEHTU I NI NGAI LO ANG*