☆24/7☆ - 20 By Dingdi Pachuau

 ☆24/7☆ - 20 By Dingdi Pachuau

"Hmeichhe bulah a awm ngai si lo va, a zei pawh ka ring tehchiam lo ve a!" a ti leh a.

"A ho e, zei kher a ngai hleinem, bâkah zei deuh chu an hlauhawm duh," ka lo ti thung a.

"A zei vak lo tihna a ni maw? Rinawmlova vàng khân i tuar na si a, ani i han duh leh thuai theih mai dànah hian zei tak a nih ka'n ring deuh ngawt maw le," a ti leh a.

"Ka lêrh i ti tihna a ni maw?" ka tih chuan," Ti lo ve, i lêrh lohzia chu ka hre reng alawm, a țha; mahse, ka nuin a hre hlauh ang e, fîmkhur hlê rawh," a ti a.

"A nih, min duhpui lo hran lo tihna a ni thei em?" ka ti leh hrâm a.

"I duh phawt te chuan, keiin lo sawi ve tùr ka nei hleinem, a dinhmun ka en hniamin ka hmusit lo va; mahse, a awm dàn leh nungphung erawh hrilh i ngai tawh lo mai ni lovin i hre vek tawh ang, kei ai pawhin i hre chiang tawh hial zâwk ang chu. Mi dang ngaih dàn tùr erawh i ngaihtuah phâk ka ring tho a, chuvàng erawh chuan țhen tùrin ka ti lo che, hruai pawh i hruai țha thei hial maithei asin," a lo ti duah a.

Mi dang tân chuan mi suala ngaih a ni, jail tâng zauh zauh chu mi fel taka ngaih a ni thei lo hrim hrim tih chu ka hre ve bawk e; mahse, hei hi kei chuan ka hmuh kân daih tawh, mi suala an ngaih hi ka bialpa a ni tawh. Ka bialpa a nih hma khân a țhat riauna ka hmu chhuak tawh tlat si a, chu chu amah ka duhna chhan pawh hi a ni rêng a ni. Mi hmuhah chuan mi fel chu a ni lo ngêi rêng alawm; mahse, kei chuan țanpui, hmangaih leh duat ngawih ngawih ngai niin ka hre ve tlat thung. A chanchin hi ka la hre tam lutuk lo; mahse, kalsan thei lo tùr tâwk chuan ka hre tawh ka ti.

Damdawi kha a țha viau a ni, a dam hlen ta hmak tih min rawn hrilh chuan ka lâwm kher mai. Ei leh ina fîmkhur zual tùr khân ka hrilh ve ngial kha a ni a, a tân chuan a har viau ang tih chu ka hre reng, a hna thawhnate'n an hlui ang apiang kha a ei mai a ngai bawk si a, fîmkhur reng sèn a ni kher lo ang.

Zan khat chu Thlamuana rawn lèn laiin ka nuin min rawn bia a, zàn lama kan inbiak ngai lêm loh avàng chuan mak ka tiru deuh viau mai. Vawiin chawhma lam khân kan inbia a, an dam țhat leh țhat lohte pawh ka zawh luam nghe nghe kha. Tûn kâr tàwpah hian haw chhoh ve lawk ka duh thu ka hrilh a, ka pa phei chu a lo lãwm nasa a nih kha. Ka haw chho khât ve deuh tawh a, min ngai ve leh tawh a ni chiang mai.

Room-ah chuan lûtin," Aw, nu, eng nge ni ta?" ka ti nghâl a.

"E, naktûkah Aizawl lamah phei kan tum thut sia, kan awm dàn azirin i rawn haw chhoh hunah pawh hian kan rawn haw hman lo ang tih ka hlau deuh a," a ti a.

"Engati nge a? Eng nge ni tih in va tum deuh thut a?" ka tih chuan," A, i ute nupa Aizawla an awm lai a nih bâkah i pa hi va entîr pah kan duh deuh a," a ti mai a.

"Ka pa chu engtin nge a awm a?" ka tih leh chuan," Engtin awm lo ve, a pum lam hi a sawisêl ve deuh hlek a, hmunpui lam deuh nge nge chu kan han ti deuh a nia, lo ngaihtuah miah suh," a rawn ti dam leh diam a. 

Ka pa nèn pawh chuan kan inbia a, a pum chu a sawisêl ve deuh mai mai a niang, a awka chhuak pawh a la pângngai reng, a la ring fiah țha khawp mai.

"Tluang deuhin in va kal ang a, doctor țha ber berah va inentîr la, in lo haw leh thuai dâwn nia, lo haw chhoh ve ka tum tehlul nèn!" ka ti a.

"Nia, i ute awm lai a lo ni ve bawk sia, a remchâng êm mai a kan ti maw le, min lo ngaihtuah lutuk ang e, ka țha reng a nia," ka pa chuan a ti a.

Kan inbiak zawh hnua ka va phei chuan Thlamuana chuan," A pawimawh àwm hle mai maw," tiin nui chung hian min lo fiam a, kei pawh chuan," Chhûngte tluka pawimawh a  awm hleinem," nui chung vêk hian ka lo ti a.

"Pawimawh hi an tam thei a nia, chhûngte tluk zeta pawimawhte..." Rose-i pawh chuan a lo ti ve a, ani hi chuan Rinfela a nih a ring ngei ang chu, a ni dèr mai si lo.

Chutia ka chhûngte Aizawl an kal dâwn si chuan haw chhohna chhan tùr ka nei ta lo, Rinfela ka hmu zing leh thei deuh dâwn tihna. 

*******

Amah hmuh tumin chhuanlam ka siam a, dàwr têa kal tùr ang chuan ka chhuak leh a; mahse, Rose-i'n," Ka lo kal ve lawk teh ang," a rawn ti ta tlat mai!

Hnial chi ni ringawt hek lo, kan pahnih chuan kan kal dùn a, eng eng emaw kan lei hnu chuan awm reng theih ni hek lo, kan haw leh ta a.

Ka chhuah chhan hrilh ka hreh deuh si, a rûka inhmu tùr liau liau kan ni ve bawk si a, ka rilru a tihah. Ina kan luh hnuah chhuah lehna hun a awm tawh dâwn si lo. Rinfela innghah thlawntîr tawp lah chu thih hrehin ka hreh bur bawk si.

"Rose, inhmuh kan tum a," ka ti chhuak ta sap a.

"Eng...Khawiah maw?!" a rawn ti hâ a.

"Țhenawmte veranda-ah,"nuam ti vak lo chuan ka ti phawt a, chutah," Kan chhuak dùn sia, i haw hmà bîk chuan-" ka tih lai chuan min lo țawng khalh vat a.

"Lungngai suh, pènna tùr ka hre mai ang, haw i duh hunah min lo call mai dâwn nia," tiin rem a ruat nghâl zat a, ka rin loh lam daih a nia, ka huphurh tehlul nèn, ka làwmzia mai chuh!

"Ka lãwm e aw," ka tih chuan," Ho mai mai, inah a rawn lêng ngam dâwn lo tih ka hria alawm; mahse, invêng fîmkhur la aw," tiin a nui hak a, a pènna tùr lamah chuan a pêng ta nghâl a.

Ka thaw huai mai. Ka dinhmun min hriat thiamsak avàng chuan ka lâwm hle a ni.

Fîmkhur taka kalin kan inhmuhna tùr hmun ka thlen chuan a lo awm reng tawh a, thil awm dàn chu ka hrilh ve zawk zawk a.

"Ka hmu reng che u."

"A ni maw?! In ațanga kan chhuah lai khân hetah hian i lo awm reng tawh maw?!" ka ti a.

"Aw."

"I va rang ve!"

"Ka phûr lutuk pawh a ni mahna!" a lo ti duh chauh a.

"A, kei pawh ka phûr ve tho aw. Tlai lamah kan inhmu thei tawh si lo va, zanin pawh hi ka nghakhlel viau asin," ka lo ti ve a.

Kan ngawi deuh vang vang a, chutah," Rawn lêng țhìn kha a va rawn lêng ngawrh ve a?" a rawn ti chhuak sup a.

"Tu...Thlamuana maw?"

"A hming chu ka hre ve hauh lo mai," a ti sup a.

"Rose-ite thawhpui a nia, a lo lêng ve mai mai a nih kha."   Rose-i'n min sawipui deuh tih kha chu ka hrilh tel duh teuh lo mai, ka ngaizâwng lêt chuang lo va, hrilh kher a țùlna ka hre lo.

"Ani chuan bialpa a nei reng a ni lo'm ni?"

Engtin nge a lo hriat theih ni? Rose-i leh Bsa hi an inzui tam vak si lo va, a lo hre ve tlat mai chu mak ka ti ru viau mai.

"Nei e, a duh teuh lo mai," ka lo ti a.

""Chuan...?"

Rinfela chu ka en vat a, ani pawh chuan min lo en ngar reng a.

"Min beiseiin a lo lêng lo ang, i ngaih tițha lo duh suh, kei pawhin bialpa ka nei tawh reng che alawm," ka ti a.

Hnai zetah min rawn en a, thu dik ka sawi leh sawi loh hriat a tum a ni ngei ang.

Ka mit pahnihah chuan min en tawn chhên phawt a, chutah," Ka ring che," a ti ta sup a.

"Nang ka nei tawh che a, mi dang ka mamawh hleinem," ka lo ti vat a.

Ka rilru tak tak a ni ka sawi ni. Ani lo mipa dang ka mamawh lo, ani hi ka duh ber chu a ni.

"Ka ring tlat che hi mak ka inti asin, hmeichhe danglam tak chu i ni ngei mai," a tih chuan ka hlim rilru vang vang chiang asin.

"Ka lâwm e, min duh ve hi kei pawhin mak ka ti," ka ti ve a.

"Hmeichhe duhawm tàwp i ni alawm."

Zanina a thil sawiin min tihhlimzia hi, min fak der mai mai a nih chu ka ring bîk lo, min tih der mai mai ka ring phal lo bawk.

"Ka lâwm leh e aw," tiin dingdihlîp meuh chuan làwmthu sawi nân a hmuiah chuan ka han fawhsak zauh a. Ka zak chu ka sen ap ap ang, a lum ka ti up up mai.

Kan awm dùn rei thei si lo, Rose-i lakah inthlahrun a ná, kan ințhen dâwn chuan kan inkuah vang vang a.

"Kha pa kha a lo lèn leh hunah a bul hnaiah țhu miah suh aw, a lam hawi zâwng pawhin nui lo la. Nang chu ka tâ, ka bialnu i nih tawh kha."

Ka nui hak a, a thîkzia a tihlan ve dàn chu ka làwm a, min han hauh ve hlar mai chuan min tihlim riau bawk.

"I thu vek alawm."

*******

Ka pate chu an va rei fahran lo va, ni tin chanchin ka va zâwt ziah. A pumpui hnûn a lo lâwng nasa niin, damdawi pawh a rawn hawn nual hmel. A natna dik tak an va hre thei chu ka lâwm viau mai, damdawiin a tidam thei a, regular taka a ei chuan a dam leh thuai mai dâwn asin.

An rawn haw phei hnuah chuan kâr tàwpah ka han chho ve ta a, ka pa chu a lo chêr ve deuhin ka hria, ka khawngaih roh, min lo ngai nasa mai bawk si a.

"Ka fanu hi ka lo ngai ber mai a lo nih hi, tunah chuan pumna pawh ka nei tawh lo, amah ka hmuh chiah khân ka dam nghâl vek," a lo ti a.

"Pa, kei pawh ka hmuh chiah che khân ka hahna zawng zawng a reh vek mai," ka ti ve a.

"Engah nge i hah viau a?" a tih chuan," Scooty-a ka rawn tlàn chhûng zawng khân ka rilruin ka ngaihtuah char char che a, a chàwl miah si lo va, a hah ve lutuk alawm," ka tih chuan ka nu chu a lo nui hak hak a.

"Zanin chu i rawn haw lawm nân arpui tui lai ngei mai i uin a talh a, a thau sia, buh nèn chhùmin anthûr hnah ka thlâk a, a tui khawp ang!" a lo ti a.

"I sawi zâwng ringawt pawhin ka chil a tipût thei hialin ka hria! Anthûr hnah tak chu," ka tih chuan Taitea rawn haw ve chiah chuan," A, ka âwih kher kher lo êm mai, anthûr hnah chiah i ei ang," a rawn ti lût a.

"Pa, Krismas laia Taitea nuam tihzia kha, mikhual nula kha a țhutpui ve nasa asin," ka tih chuan," Ngawi mai mai teh!" a rawn ti țhat a, a zak hmel avàng chuan ka lo nui uar uar thung a.

"I senior ve tawh, a zahthlâk loh lutuk! Nupui atân neihsak che ila a țha ang," ka ti leh a.

Ka pa pawh chuan," Nia, an sawi tak asin, ka lo hre hlawm lo va, chu nula chuan a lo duh ve a nih ngai chuan neih ngei tùr a nih chu," a lo ti ve a.

"Kan țhut dun avàngin kan inngaizâwng tihna a ni ngawt lo," Taitea vêk chuan a ti leh a.

"A nih loh tal pawhin, mikhual lo kal zînga lâm ve ngai lo ber kha, nula naupang ber kha-" ka tih lai phei chuan a zak chhe nasa a ni tih a hmel ațang chuan a hriat theih vek.

"I țawng tam lutuk aw," tih pahin a room lam pan chuan a kal nghâl ta daih a.

Zanriah sa chu ka ei tui ngei mai. Chaw ei pah chuan Taitea chu ka fiam zauh zauh a, thu dik deuh chu a awm a nih ka ring, a zak thei êm mai. Chaw pawh a ei rei lo, a kham thuai nghe nghe, ka fiam fuh vak lo deuh chu a ni.

Mazuali nèn kan han inhmuh leh meuh chuan sawi tùr hlîrin kan khat a, sawi hmasa nih kan inchuh a, chhum lo chat lovin kan țawng  a ni ber mai. 

Chutih lai chuan ka phone chu a rawn rì a, Thlamuana a nih ka ring deuh ngawt a, Rinfela a nih ka ring ngam lo, phone call hian min be ngai lo va, ka be hmasa a nih ngawt loh chuan. 

A hming ka hmuh chuan ka au vak lo chauh a ni! Min rawn call ve tlat a nih hi!

"Hello?" ka tih chuan a thaw deuh hak ri chu ka hriat hmasak ber a ni.

"Kan inhmuhna țhinah khân ka awm a," a rawn ti sap a.

Mazuali hnênah chuan," Freezer-ah khân Dhoi a awm ang, kan pahniha ei tùr lo va la la," ka ti sap a, ani pawh chu a kal ve nghâl mai a.

"Ka haw daih alawm, ka hrilh che kha," tiin Rinfela chu ka be leh a.

"Ka hria alawm," a rawn ti bawk sia, min tihrilhhai țêp. Ka awm lo tih a hre reng bawk si a, eng nge chutah chuan a tih ni?

"I awm lo tih hre reng chungin ka nghâk tho che chu a nih hi, in in lam ka thlîr reng a."

Ka va khawngaih reuh tak!

"A va țûl lo mai mai tak! Haw-"

"Ka ngai che a ni," a rawn tih sup tâkah chuan ka țawng tàwp chiang lutuk ringawt! Min ngaih avàngin chutah chuan a kal a ni ngei ang.

"I awm lo tih hre reng chungin hnaih theih che inbeiseinain, ka kein helai hmun hi min hruai thleng miau mai a; mahse, in ațanga i rawn chhuah ka beisei tlat tho a nih chu," a rawn ti duah a.

"Ka rawn chhuk leh thuai dâwn alawm, ni hnih hnuah chuan ka awm tawh ngei ang a, in ațanga nangmah hmu tùra ka rawn chhuak lai min hmu leh ngei bawk ang," ka ti ve sap a, ka ngaihtuah a, ka khawngaih a, ka ngai sauh bawk.

"I pa chu a lo țha maw?"

Keimah mai ni lo ka pa a lo ngaihtuah tel ve leh zêl chuan min tilâwm, a ngaihtuah kim ka ti, ka duhna a zual sawtin ka hria.

"Um, țha e, min ngai ve lutuk a," ka tih chuan," Kan inang a ni maw?" tiin a nui hul hak a.

A nui ri chuan engtin emaw ni tak min awmtîr chiaiin ka hria.Min ngai a ni tih han hriat chu nuam ka ti a, chutih rualin kei pawhin ka ngai a, ka khawngaih bawk. Ka awm lo tih hre reng chung pawhin kan inhmuh dunna țhinah a lo han kal hrâm hrâm chu a ni tak si a.

"Eng nge ka lo hawn ang che?" tiin thil dang ka sawipui ta zâwk, khatiang lam a sawi kha chuan ka lungno a kai chhuak ang tih ka hlau. Ani ang, țawng tam lo lutuk leh hmeichhia ngaina lo lutyk tak maiin min ngaih thu a han sawi a, min phone ngai miah lovin min han phone  ve hial a nia.

"Nangmah."

Min chhâng rang lutuk chuan ka nuih a tiza a, ka nui chhuak hak hak a.

"Ka ti tak tak aw," a la rawn ti zui a.

"Okay, ka hria e, nang pawh ka lo haw hma chu nula dang lo melh miah suh ang che," ka ti lët ve a.

"Ka angel thla nei lo bâk ka ngaihtuah lo ve," a ti deuh hmak a.

A sawi chu a dik ka ring thlap; mahse," Tak tak?" ka han ti ve leh rih a.

"Beiseina min petu i nia, ka rin leh hmasak ber i ni bawk."

Hriat nuam ka ti lutuk, nuam ka ti veng veng mai.

Kan inbe zo ka han hawi chhuak chuan Mazuali chu ka hmu thut a, ka lo hrechang tawh hauh lo tih ka hriat chuan ka inthiam lo hnuhnawh, bâkah, ka țawng zawng zawng kha a lo hre ve vek ngei ang, engtia rei nge a lo țhut tawh ang?

"Char char mai a! Zan khatna chauh a la nia..." a lo ti nang nang a.

"Khawi, ei tùr chu," ka tih chuan dawhkàn chu a kâwk a.

"A takah ka hmu châk ngawt mai, engtiang taka zùn ngah nge a nih ka hre châk a ni," a tih chuan," Zùn zawng zawng neitu a ni mai," ka lo ti a, dhoi chu ka ban pah nghâl bawk a.

"Over êm mai a!" a lo ti hlak a.

"Eng nge, sawi dik loh ka nei hleinem," ka lo ti thung a.

Zàn mutnaah chuan kan in-text a, a thla ka lâksak chu ka en pah reng bawk a. Kan inmangțha hnuah pawh chuan a thlalâk chu ka en chhunzawm zêl a, ka muthilh lai pawh ka hre lo, ka țhangharh pawhin ka phone chu ka lo la chelh reng niin!

Inrinniah chuan chaw ei khamah thawmhnaw ka su a, in ka tifel pah bawk a, han tihfel tehchiam tùr awm lo mah se han sîksàwi vêl hi a nuam ve hrim hrim ka ti.

"Sangbawihite in a ni em?" tih ri-ah  chuan ka hawi chhuak vat a.

"E, i lo kal maw?!!" ka ti chûl mai. Ka rin loh lutuka Thlamuana ka hmu hlawl mai chu mak ka ti a, helaiah, kan khuaah hian hmuh ka inring hlawl lo a ni ber!

"Lo kal e, i haw daih sia," a rawn ti a.

"Lo lût rawh, lo lût rawh, engtin nge kan in awmna i hriat a? Motor ri pawh ka lo hre miah hleinem," ka ti leh zung zung a.

Țhutnaa țhut pah chuan," Khulai deuhah khuan ka dah a, in in awmna chu mi ka rawn zâwt a, ka rawn hre chat mai a ni," nui chung hian a ti a.

"Khawnge i kal? I rawn kal ve hrim hrim chu a ni lo tiraw?" ka ti leh a.

"Aw, Aizawlah ka kal lawk a, helamah hian ka rawn kual a nih hi, i awm tih ka hria a," a rawn tih chuan," I ti țha hle mai, min rawn kual chhan vang vang a," ka ti a.

Chutih lai chuan room ațangin ka pa a rawn chhuak a, ka pa hnênah chuan Thlamuana chu ka hmel hriattîr nghâl a, a Aizawl kal kan khaw lama a rawn kual vang vang thu chu ka hrilh pah bawk a.

"A ni maw? I fel hle mai," ka pa pawh chuan a ti a.

"I zia zêl em? Aizawlah inentîrin i kal tihte ka lo hria a," Thlamuana chuan a ti a.

"Aw, zia e, ka țha lutuk. Pumpui hnûn lâwng a nia, a reh thusi mai ang. Bawihtei hi ka ngai êm a, chu chuan a lo tizual mai mai a," a tih chuan ka lo khap vat a.

"Pa, thutak ve deuh la?" ka tih chuan Thlamuana chuan,"A awm tawh sia, i dam hawk dâwn chu," a lo ti ve a.

"Dam tawh lutuk! Damdawi ei ei pawh a ngai tawh lo," tiin ka pa pawh chuan a lo fiamthu ve zat a, kan nui țhâ hlawm a.

"Bawihte, thingpuite kha han ti la, hei, i țhianpa pawh a ril a țâm viau ang chu. A rawn tlawh vang vang che a nia, lo duat hle ta che," ka pain a tih chuan ka harh chhuak zawk.

"A va màwl theih ve aw! Ka'n chhuang nghâl ang e, hmanhmawh suh aw, in i thleng thuai tawh dâwn tho a," tiin Thlamuana chu ka en a.

"Hmanhmawh lo ve, nula hmelțha bulah hi chuan hmanhmawh a ngai lo," a lo ti ve ngei! A zei loh tehlul nèn, a inla zei ve tawh lutuk!

*THLÈMNA KAN TAWH HI A INANG VEK KHER LO VA; MAHSE, KAN CHÂK ZÂWNG LEH KAN CHAK LOHNA, KAN PANNA LAI ZÂWNAH TAK HIAN THLÈM KAN NI ȚHÌN*