☆24/7☆ - 22 By Dingdi Pachuau

 ☆24/7☆ - 22 By Dingdi Pachuau

Kuah chawt pah chuan," Ka tihpalh, ka thiam loh a ni," ka ti phawt a, chutah chhunzawm lehin,"Kan inkâr tichhetu nih ka duh lo a, min rinna tihchhiat lah ka duh hek lo. Thlamuana hi ka ngaizâwng lo mai ni lovin ka rilru pawh a tiche chhin ngai lo," uar ru tak, min rin theih ngeina tùra uar chuan ka ti leh a.

A ngawih vang vang hnuah chuan," Amah avànga i hlim nui ri kha tuar hrehawm ka ti," a ti ta sup a, min rawn kuah lêt ve ta bawk a.

"Ani bula nuih ai chuan i bula hlim taka nuih nuam ka ti daih zâwk!" ka ti leh sap a, nghet leh zuala pawmin ka kuah châih châih a.

A âwma bei reng chung chuan,"A lo lèn chuan lo kawm loh theih loh a ni ve si a, chu erawh chu hre thiam hrâm la aw. Ka kawm avàng khân ka rilru a neiin ka va duh ta e tihna a ni chuang lo a nia. Tlangvâl lo lêng chu nula pângngai tân chuan lo kawm loh theih loh a ni si a," a hriat thiam beisei ru tak chuan ka ti a.

"A bulah erawh țhu lo la."

"Aw le," tiin ka nui sak a, tunah chuan a thin a rim tawh vak lo tih a hriat a, ka rilru pawh a zãng huai mai.

Dâk chhoin,"I lo haw thu min hrilh miah lo a, ka lo nghahhlelh che nen!" tiin vui ru deuh, vui lang ngam si lo chuan ka ti sap sap a.

"Rawn țhàwn thut che ka tum a."

"In thawk zo tawh tihna tiraw? I zin chhuak leh ang em?" ka tih chuan," Aw, zo; zin chhuak lo ang," a lo ti a.

"Min ngai ve tak tak em?" ka ti leh a.

"Nangmah ngaihtuah chungin ka muhìl țhin."

'Aw, ka ngai che' min tih tluk zetin a thil sawi chuan min tilâwm. Mipa a ni a, hmeichhia ang maia min ngaih thu han sawi kûr vak tùrin ka phût lo a, a sawi lah ka ring hek lo; mahse, min ngaihtuah chunga a muhìl țhìn chuan rilruah nuam tih veng vengna min siamsak thung.

"I pa a lo dam țha ang tiraw?" ka ti leh a.

"Umm..."

"A lo ngaiin a lo ngaihtuah-"

Ka sawi zawm thei ta lo, rawn kûn hniamin min rawn fâwp miau tawh si a, țawng tam min ti tawh pawh a ni ang e.

Inthlahlel takin kan infâwp a, kan inngaihna leh kan inkâr inhriat thiam lohna awm deuh, țawngkaa kan sawi fel tâk zawng zawng pawh kha tunah chuan a bo vek tawh, kan awm dùnin duh tâwkin kan inngaih thu, țawngka ni kher lovin kan inhrilh thei tawh si a.

"Hun hi ral thei lo se."

Min thlâkhlelh vànga sawi a nih ka ring a, min tilâwm viau bawk. 

"Hmeichhia hian heti tak hian ka rilru hi a luah thei ang tih ka lo ring ngai lo asin, zîng, chhùn leh zànah hian ngaihtuah chhuah loh lai che ka nei ngai lo," a tih phei chuan ka hlim lutuk a, zah pawh dâwn lovin a hmeichhia zâwk chuan a nghâwnga kuahin dingdihlîpin ka han fâwp tak ngawr ngawr a.

Hmui inkalsantîr miah lovin min lo pawm kâng lawp thung.

Nuam hi ka va ti sî êm!!! Luhai deuh chhawlhin a nia inah pawh ka luh ni, a chìn tam vak chi loh maithei a ni; mahse, rilru erawh a hlim viau thung si.

"I rawn lût hmêl kha!"kan mut dâwn chuan Rose-i chuan a ti sap a, a chek zui tlak tlak a.

"Eng nge..." ka tih chuan,"In inhmu lo rei deuh tawh a, in uar hret a nih ka ring,"tiin a nui kar kar zui a, chutah," A àwm ve tho, ka hre thiam tho mai che," a ti leh a.

Zak ru viau mah ila Rose-i, ka cousin a ni tho a, bâkah, min hre thiam a, ka zak lo awm ta mai mai.

Kâr tàwpah chuan ka haw chho ta zauh zauh. Ka pa mawlh mai chuan min ngai ve țhìn si a, a hrisèlna a lo insawisêl ve deuh bawk nèn, ka kàr tawn ta deuh reng mai.

Thu làwmawm deuh mai chu, Taitea'n ngaihzâwng a lo nei ve tak tak chu a ni. Mikhual nula, lâm ve ngai lo ngei mai kha a lo nia, ka hriat tirha ka làwmzia mai chuh! 

Krismas ațang khân an inhre chho a lo ni. Taitea, hmeichhe mi lo ve tak maiin chutia ngaihzâwng a han nei ve ta mai chu a chhûng buaiin kan buai a ni ber mai. Kan lâwm a, nupui atân nei ngei se kan ti. Mi sawi kan hriat leh zêl dànin kha nu tê kha chu a țawng tam lo nain a fel a, a lêrh lo a, eng mah sawisèl pawh nei lovin a hma tihtùr lum chu a thawk bawrh bawrh mai țhin ani àwm e.

Taitea chu ka han sawipui ve ngial a, min chhâng țha duh vak lo. Nupui atân nei mai se, a hmeichhiain a hnial loh phawt chuan. Ka nu leh pate erawh chuan chutiangin an ti ve lo, Taitea thu thu-ah an dah tawp, an sawi ve lêm lo. Kei erawh chuan ka haw chhoh azâtin ka sawi chhuak thung.

Ka rilruah a khat liam a ni ber ang chu, Rinfela bulah pawh ka sawi chhuak a, ani erawh chuan,"I nawr lutuk palh ang e," a lo ti thung a.

"Nei thuai tùrin ka duh a, ka nu leh pa dam țhat lai hian fate nei se ka duh alawm," ka ti a.

"An dam reng ang chu," a tih chuan," Hma hun kan hre hleinem, a ngaihzâwng neih ve chhun a nia, nei tawp mai se a țha alawm," ka ti leh a.

"I pa chu a țha chho zêl tiraw?"

"Aw, damdawi a ei țha a, a zia zêl ang. Ka chhoh leh hunah lo chho ve la, i lo kan pah ve pah ang a?" tiin ka han sâwm zui zat a, a duh phei chu ka ring hauh lo, a pa amah chauha lo awmtîr lah ka duh hran lo bawk.

"Châkawm khawp mai," a lo ti sup ringawt a.

"I châk tak tak lo a niang. Kan khua pawh i hmu châk ve lo'm ni? Kan in leh ka chhûngte pawh hmuin i hmêl hriat ang a, kei chuan in in ka hmu a, i pa pawh ka hre chiang tawh a," ka ti leh a.

Min chhâng lovin, ngawi rengin hma lam chu a melh vang vang ringawt a.

"I duh loh zâwng ka sawi lo tiraw?" ka inthiam lo hnuhnawh leh deuh a, kei hian ka nawr lutuk a niang ka ti.

Chutah, chiang zet hian min rawn en a, a țawng leh dâwn lo emaw ka tih hnuah chuan thâwk la hapin,"Hei hi a ni ka nu ka ngaihdam theih lohna chhan chu," a ti chhuak ta hawk a.

A bânah chuan ka lo vuan vat a.

"Ani khân min kalsan lo se hetiang hi kan ni bîk kher lo ang a, mi pawh ka ringin hmalam hun beiseina êng pawh ka nei ve thei ngêi ang; mahse, chu chu ka tân chuan thil theih loh tluk a ni," a ti leh a.

A rilru chhûngril natna zawng zawng hi phawrh fai vek se, inkiltawihna, mi rin lohna, beidawnna leh a hma huna beiseina neihtîr thei lotu thil hi paih bosak vek theih se ka ti.

"Nang ka tawn hma che hi chuan hmalam hun atân beiseina ka nei ngai lo va, neih pawh ka duh hek lo. Ka nung ve mawp mawp a, ka pa hi awm lo phei se chuan ka dam tawh kherin ka ring lo. Ka nu min chhuahsan hnu lawkah accident a tâwk a, chuta țang chuan hetiang hi a lo ni ta a ni. Ka dam chhan ve ber leh ka inngahna neih chhun hetiang a han nih hnuah phei kha chuan hruizên hi ka ngaihtuah ngun a nia aw..." a ti vang vang a.

Ka lo be buai phal lo, ka lo inrawlh duh lo. A chanchin zawng zawng chu sawi chhuak vek se, a rilrua a thil lo up zawng zawng chu puak chhuahpui vek rawh se, tichuan, a thâwl hawk ang a, thil dang, hmalam huna beiseinain a rilru chu a lo luah khat thei zâwk ang.

"Ka nu kha inkhâwm taima leh kohhrana inhmang tak a ni ka tih tawh kha, khatianga mi țha ni siin ka pa nèn min chhuahsana hmingchhe thei ang bera min kalsan hnu khân Biak ina inkhâwm hi a țangkaina leh a țhatna ka hre tawh lo. Ka nu țawngțainate khân amahah leh kan chhûngkuaah rah țha a chhuah lo mai ni lovin rah țha lo zâwk a chhuah si a, țawngțai țûlna ka hre lo a, ka țawngțai ngai tawh lo bawk. Ţawngțai ai chuan mahnia thawh chhuah mai kha a țha a, chhànna rang ber niin ka hre bawk."

Thaw dèp dépin ka lo ngaithla a, a thil sawi zawng zawng chu hriat hmaih neih ka duh lo, ngun lutukin ka lo ngaithla kar reng a.

"Ka pa nèn kan awm dun țantirha kan ina lo lêng țhin leh min țanpuitute chu miin zu ruih hmang an tih leh engah maha an ngaih loh mi vàntlâng hnuaia lêng vek an ni, ka pa nèna khawhar taka kan awm chu kohhran mite hian min rawn hnem ka ring țhin, ka la naupang ve êm a, ka lo beisei sâng lutuk a nih ka ring ta. Chutah, ka pa'n accident a han tâwk a, chutah pawh chuan kohhran mi leh upate hian min rawn kan ka la ring fan tho; mahse, mi nâwlpui hmuha mi țha lo nia kan hriatte bawk kha rawn lang zing leh min țanpuitu an ni leh ta. Kohhrana inhmang tak tak tân chuan keini pafa kha chu mi sual, ka nu thiltih sual zârzo kan ni a ni ngei ang."

A thil sawi chuan ka rilru a hneh kher mai. A rilru natna chu thup tum hle mah se a thup thei lo a ni ber, a sawi charh charh a, ni danga țawng tlêm thei zet kha zanin chu a țawng tam zâwkah a țang chiang ta khawp mai.

"Ka pa avàng chauhin ka la dam ve țàng țâng a, kan ina rawn lêng lût țhin min lainattu leh min țanpuitute chu ka tân chuan mi țha ber an ni, zu an inin an rui țhìn pawh a ni ang, damdawi an ruiin an inchiu țhin pawh a niang; mahse, anni aia kawm ngeih hi ka nei lo, mi țha leh mi felho chu keini ang mi sual tân chuan kawm phâk ni ve miau hek lo le," a ti leh a.

Chutah," Mahse, nang hian chu chu chu i rawn tidanglam ta a nih hi, min kàwm duh a, mi be ve duh a, min hmusitin min hmu hniam lo va, kan inah pawh rawn kalin ka pa pawh i țanpui a, Angel thla nei lo ang hialin ka hmu ta rêng che a ni," a ti leh a.

"Mi dang pawhin, kohhran țhalaite pawhin an rawn țanpui che u kha, i pa a damloh pawhin an rawn kan a ni lo'm ni?" ka lo ti pek a.

"Kha kha chu, hmingțhat tum vàng chauh a nih kha. Kohhranah ka pa hming hi a la awm ve si a, hmangaiha țanpui duh vàng ni lovin a langa mawi an zawn vàng mai a ni," a lo ti thung a.

A rilru sükthlêk dàn engkim hi a dik lo chho vek tawh a nih hi. A rilru hi siam dik leh tùr chuan hun a la duh ngawt ang; mahse, ka beidawng lo ang, ka thei lo, beiseina êng sêt sêt a neih tawh hi a bo leh ka phal tawh lo ang.

*******

Zan khat chu Thlamuana rawn lèn zànin, Rose-i pek chuan," Sangbawihite khuaah Sunday han hmang ve chhin ang hmiang," tiin a sâwm a.

"Engtikah?" phùr hmel zet hian a lo ti vat a.

"Tûn kâr tàwpah hian. Kâr tàwpah a haw deuh ziah alawm," a ti leh a.

"In peih ngút lo ang, thingtlâng te zawng a hrehawm asin," ka lo ti a.

"Ka châk zâwng tak a ni; mahse, tûn kãr tàwp hi chuan ka hman dâwn lo phawt mai a, a kâr lehpekah ti ila? Sangbawih, kan lo zin ve chu i phal tak tak ang maw?" Thlamuana chuan a ti leh a.

"In peih phawt chuan."

A haw hnuah chuan Rose-i chuan," A phùrzia kha, mâkpa tùr interview han neihpui lawk tùrah ka inchan," tiin a nui kar kar a.

"I ho êm mai a! I sawi hmuh mai mai a, Rinfela lahin a lo thîk ve tumhrang bawk si a, boruak a tidik lo vek palh ang tih ka hlau asin," ka lo ti a.

"A thîkthu a va chhe àwm ve ti ila a tân chuan i țha ve êm a, chàn che a hlau pawh chu a àwm ve reng a ni," a ti a.

"A tân ka țhatna a awm chuang lo, kan induh tawn chuan a țha a ni mai," ka lo ti thung a.

Mutnaah Rinfela'n min rawn text hmasa ve leh tlat mai!

*Zanin khân a bulah i țhu em?* tiin.

A lo lêng tih a lo hre reng a ni maw? Kan in bulah a rawn kal tih a ni ngei ang chu, ka khawngaih roh e a.

*Țhu nâng, a hrangin ka țhu daih*  tiin ka chhâng lêt a.

*A țha, ka tâ chauh i nih kha, hre reng ang che* a rawn ti leh.

A tâ chauh ka ni. Ka nui sak a, chutiang țawngkam a rawn nei chu ka lâwm hrim hrim, min hauh hi han tina êm êm mai se nuam ka ti ve tlat.

*Nang pawh ka tâ i nih ve tho kha aw*  ka ti leh a.

*Ka rilru, ka taksa, ka thlarau thlengin le*  a rawn ti!

Țawngkam a thiam zêk mai ka ti. Hetiang thleng thleng chuan a rawn sawi ka ring miah lo a nia, mahniin hlim zetin ka nui sak sak mai!  Min tihhlim dàn chu a thiam ve khawp mai.

Ka rin loh deuhin kâr tàwpa ka haw chhoh hunah chhoh a duh ve thu a sawi ta tlat mai! Rin loh deuh deuh hian min țhâwng a, chu pawh hlimna min thlen zâwng chiin, nuam ka va ti tak!

"Sunday-ah kan inkhâwm ziah asin, i inkhâwm ve ngei a ngai dâwn a nih chu," ka ti a.

"Engati maw?" zuai deuh raiha a tih chuan ka hre thiam khawp mai. A inkhâwm ngai si lo va, a tih ngai miah loh, a nunhlui hriat chhuahna tùr ka sawi chhuak miau si a.

"I thih phah miah lo ang, ka tân chauh ti hrâm la?" tiin ka thlêm a.

"Ka châkna a zuai vek!" a tih phei chuan ka khawngaih lutuk.

"Nuam lo i ti miah lo ang, ka u Taitea nèn khân in țhu dùn ang a."

A ngawi ta tlat mai.

Chutiang lam sawipui chu ka duh ta rih lo. Ka ruala chhoh a tum ve duhna rilru hrim hrim chu ka lâwm a, inkhâwm erawh tihluihna hmanga tih chi a ni lo.

"Ka ti ve mai mai a nih kha, i lo zin tùr hi ka phûr tawh teh a nia," ka ti ta zâwk a.

"Min bat tawh miau avàngin ka rawn zin ang, i chhûngte hmuh erawh a inthlahrunawm khawp ang," a ti ve leh a.

A pa chu ka ngaihtuahpui viau a; mahse, amah berin ngaihtuah a ngaih loh thu a sawi miau a, lo zin tùrin ka duh ve bawk si a, ka sawi thuipui lo.

Inrinni tûkțhuan ei khamah Scooty chuan ka inkhalh chhuak a, Rose-i scooty kha ka leisak a, ani erawh chuan car a nei tawh thung.

In ațang chuan keimahin ka tlân chhuak ngei a; mahse, keimah chauh chuan ka chuang rei lo khawp mai. Kan in chhak deuh lawkah min lo nghâk a, amahin a khalh nghe nghe a. Miin min hriat ka duh loh vàngin mask ka vuah a, sunglass ka vuah bawk a, ka hmel chu a lang lo kher ang chu.

Kawng lakah chuan ka chawlhpui zauh zauh a, a chhan chu tûn ang hun hi ka tawng tawh kher lo maithei a ni. Ka haw zauh zauh tho ang; mahse, ani hi a tel ve thei tawh kher àwm si lo va, chuvàngin, he hun hi ka ngaihlu a, ãm taka hman ka duh.

Thlate kan la a, ani pawh a nui ve suk suk tho. Ka hlimna hi min țâwmpuiin hlim ve se ka duh a, a nunhlui zawng zawng theihnghilh rih a, a hma hun tùr lam ngaihtuah buai lovin tûn boruakah chiah hian chêng se ka ti.

"Scooty nghèng khân țhu la, thla ka lo lâksak ang che," a tih chuan a thu chu zàwm nghâlin scooty chu ka nghèng nghâl zat a.

"Lo hawi lovin hmun dang en la?" a tih leh chuan," Nangmah en che ka duh alawm le," ka lo ti a.

A nui suk a.

"A rei dâwn hleinem," a tih leh chuan," Chu pawh ni se," ka tih leh avàng chuan a phone chu la sawn meuhin min rawn en hranpa ngat a.

"Luhlul dàn ka duh chi!" a ti sup a.

Ka nui sak a, chutah,"Thla chu min lâksak thuai thuai mai teh, ka mawng a kham a nia," ka tih chuan a insiam rem ve ta nghâl a.

Kawnga kan tlàn lai chuan motor kan tâwk tam lêm lo va, a hnungah bei chialin a kâwngah ka kuah a, ka maimichhîng vang vang a.

Nuam ka va ti tak êm!

"I muthlu ang e aw?" a rawn tih chuan ka kuah nghet sauh a.

"Ka muthlu phal teuh lo mai!" ka lo ti a, chutah, a hnungah chuan ka hmai thukruin," A nuam vawng vawng lutuk a, hun hi ral thei lo se ka ti a ni," ka ti leh a.

"Ka hnunga bei kha maw nuam i tih a?" a tih chuan," Ni chiang e, ka dam loh hunah min paw țhìn la a țha ang, i hnung hi dam sawng sawngna tham a ni tlat," ka lo ti ve a.

"I dam loh ka phal dâwn hleinem," a lo ti thung a.

Kan khaw thlen hmain kawng chhaka tui rawn khawhthla tar tarah chuan kan chàwl leh a, tui ka in lai chuan tui khawh chu rawn penin ka hmaiah chuan min rawn pen per sak sak a.

"Ninhlei suh aw."

A tàwp duh chuang lo, a naupan chhiatna a rawn langah ka ngaihsak a, a in ve hunah erawh a hre ve khawp ang.

"In rawh le," tiin ka kal sawn a.

A in țan chiah tihah chuan mau phel hmanga tui dawhna an siam chu ka dah sawn a, a bân chu khawh fuhin ka kuta tui chuan a hmaiah chuan ka theh huhsak bawk a.

"Phubâ i la mi?"

"Ka in laiin i ninhlei ve tho kha," ka ti a.

Chutah, a kut pahnihin tui chu a dawh a, min rawn theh ta. Ka lo țê tuar a, ka tlân chhe nghâl bawk a. Ani lah chuan tui chu a kut pahniha dawhin min rawn ûm leh a, țe tuar tuar chungin kei ka tlân chhia a, naupang infiam kan ang ka ti khawp mai.

Kan thawmhnaw pawh a huh nasa tawh, kan thlan lah a tla nasa a, chutia kan intihuh chu a nuam phian zâwk mai.

"A nuam tiraw?" 

Chutiang mai mai chu nuam a ti a nih chu; mahse, kei pawhin nuam ka ti ve tho, ani nèn hian ni lo ta ila nuam ka ti kher lo maithei a ni.

Ram kal haw tùr ni àwm takte kan hmuh tâkah chuan keini pawhin kal zai kan rêl ve ta a, kham lo tak chungin scooty-ah chuan kan chuang leh ta a.

"Khalh ve tawh la?"

"I ning tawh a ni maw?" ka tih chuan," Ka kuah ve châk tawh che alawm," a rawn ti a.

"Aih, ninhlei a theih loh, khua kan hnaih tawh sia, mi kan tâwk kan tâwk thei tawh tlat," ka ti tlat a.

"Ka ninhlei dâwn hleinem."

*THIL RÊNG RÊNG HI HLEN CHHUAH A NIH HMA CHUAN HARSA TAK ANGIN A LANG ȚHÌN A, TIH THEIH RUAL LOH ANG PAWHIN A LANG FO ȚHÌN*