☆24/7☆ - 25 By Dingdi Pachuau

 ☆24/7☆ - 25 By Dingdi Pachuau

Beiseina nèn ka ding a, a lam erawh ka hawi lo. Ka hawi ngam lo, beiseina ka neih hi a dik lo lamah a inher si chuan...

"Thingpui saw, in phawt rawh."

Ka pum a ri kal raih raih a, a hre dâwn chiang lutuk si a, ka zak ve deuh hlek.

Ka in ang nge, in lo ang aw? Thil sawi tùr chu a nei ve a ni ngei ang a, chuvànga min tiding pawh a ni. Min rin loh avànga a inchhìr thu a sawi dâwn a ni ngei ang.

"Sawi phawt rawh," ka ti ve thung a, kan la ding reng bawk a.

Chutih lai tak chuan kawngka a rawn ri ta dat dat mai, hlauthâwng ru zet hian ka tang hrâ a, ka kut lehlamin ka mit chu ka nuai sawk sawk a, ani pawh chuan min chelhna chu thlah ve nghâlin," Lo lût rawh," a ti zat a, a pên sawn ta nghâl bawk a.

Kawngkaa lo ding nèn chuan kan inhmu hnai khawp mai, puitling ni se chuan ka zak ve viau maithei a ni; mahse, tleirâwl lam deuh a lo ni hlauh a, a zia deuh.

A rawn luh theih nân kawng ka kian a, a lo luh rual chuan," Inlêng i lo nei a ni maw?" a rawn ti thar thar a.

"Eng nge ?" 

Tawp mai a! A hmel hriat țha ve tak chu a ni ngei ang chu. Chutiang teh tawpa inlêng han biak chu, a inhmeh lo ka ti dâwn nge, a inhmeh hluah hluah ka ti dâwn zâwk ni.

"Ka lo lêng maw le, inlêng inti-nei chhe lo viau mah la..."

Nghal ve pângngai tak chu a nih dâwn hi. Eng thil mah kan sawi fel thei dâwn rihin a lang lo, he pa hi lèn rei a tum hmel riau, kei lah ka lêng rei tawhin zaninah inkhâwm leh ngei ka duh dâwn bawk si a.

Be lova han chhuah tawp mai chu ka hreh deuh, biak dâwnin sawi tùr lah ka hre dèr si lo.

"Thingpui saw, in phawt rawh," a rawn tih leh tâkah chuan," A ngai lo, a tlai tawh si a, ka kal tawh mai ang," tiin ka pên chhuak ta nghâl a.

Min rawn ûm zui lo, scooty ka tihnun dâwn lai tak chuan rawn lêngpain," I inlêngnu chu a chhe lo hle mai," tih paha a nui chu ka hre thei a.

Hmmm...

"Ngawi chîpcham mai rawh!"

Rinfela chhànna chuan ka nuih a tiza ru khawp mai. A lo lèn hun a fuh vak si lo va, țawngkam mawiin a daih tawh lo a niang; mahse, an inbiak dànah khân inhre sa, inpawh tak an ni ngei ang, pakhat pawh chuan a haw tawp nâng.

Duh ni se chuan min rawn thlah thei chiang alawm, inpawh leh innêĺ tak an nih phei chuan chhuanlam siam zauhin min rawn ûm zui thei reng a ni, sawi tùr nei khân a insawi ve êm êm a, a nei lo tawp a niang, a nih loh tal pawhin a pawimawh lêm lo a ni tal ang.

Duh tak tak kârah chuan zah pawh sawi thei lovin kei pawhin ka pan rawk rawk mai a, ani pawhin duh tak tak ni se, kha tleirâwl, a aia naupang daih zâwk lehnghâl kha ngaihven rih lovin min chelh thei ngei tùr a ni; mahse, a ti lo, a ti miah si lo a nih hi.

Ka tlâwm a ni, a tàwp thlengin ka tlâwm vawng vawng. 

Tunah chuan an inah hian insawi fiah tùrin ka kal tawh lo ang a, pan hmasatu ka ni tawh lo bawk ang. A duha sawi tùr nei nia a inhriat chuan min rawn pan ve ngei a ngai tawh ang. Heti khawpa ka tlâwm tawh chung pawha min hre thiam duh lotu mipa hian min phû lo, kei pawhin ka phû lo, hetiang êm êm hi chu. Kan inphú lo tawn a ni ber ang chu, ani pawh rilru dam takin a duh dàn dánin a awm thei ang a, ka be tawh lo ang, be hmasatu ka ni tawh lo ang.

In chu ka thleng tlai lutuk bîk lo, kha tleirâwl kha rawn kal lo ta se chuan tunah pawh hian Rinfelate inah khân ka la awm maithei a ni, eng thil nge a sawi ang? Kan inkâr a țha leh ang em?

Ka thaw hawk a, tunah chuan chutiang mai mai chu ka ngaihtuah tawh lo ang, engati nge 'ta se' tih mai maia ka intihbuai duh ni? 'Ta se' ti ta zêl ila chuan, hringnun hi kan her kual nasa lutuk ang asin.

Zàn inkhâwmnaa thu sawitu  thil sawi chuan ka rilru a khawih pha lo kher mai. Ka duh loh deuh hlîr mai ka lo ngaihtuah leh pek a, ka inhre chhuak a, thu sawitu ka en phei leh a; mahse, a thu sawiah chuan ka rilru ka pe thei chuang lo. 

A va hahthlâk tak! Mipa pakhat vàng maiin hetiang hian ka awm chu a ni si a, thil dik lo tàwp a ni. Biak in chhûngah lehnghâl, thu sawi pawh hre mumal thei lo chu, inkhâwm lo nèn kan inang reng, ka taksa biak in chhûngah a țhu ve lul mai chauh a ni.

Setana duh dàn chiah chiah.

Rinfel, nangmah vàng chiah chiah a nih hi. Ngaihtuah lo thei lo chein min siam a, ka thu sawi i ring duh bawk si lo, ka rilru ngaihtuahna ata hi kal bo thuai teh.

Inkhâwm bànah kawng kual lamah pawh chuan ka kal duh tawh lo. An țhianho kha an lo țhu khâwm leh ang a, ani pawh a lo awm ve leh ngei dâwn si, ka hmu duh tawh lo. Min hmuh pawh ka duh lo, ka hmuh loh phawt chuan ani pawhin min hmu bîk hauh lo ang. Hmu lo vang vang ila, rilru ațang pawhin a bo hma thei deuh ang.

Rose-i chuan," Engtizia nge ni? Hmeichhia kha a lo tel leh ang tih i hlau a ni maw? I thîk chiang mai," tiin min rawn en a.

"Engah nge ka thîk ngawt ang?" ka lo ti mai a.

"Nizànah Rinfela'n a thlah dâwn kha, a thlah ta em? I zâwt em?" a ti leh nghâl zat a.

"A ho êm mai, sawi tawh lo teh ang," ka lo ti a.

"In insawi fel thei lo a nih ka ring rêng a; mahse, lungngai mah ta che. A hre thiam duh lo che hi a la inchhîr dâwn khawp, a inchhìrna tùrin țan ka lâkpui dâwn che nia, ve mai mai hian a. I tlâwm tawh a, tlâwm theih tàwpin i dàwr a, chuti chung chung pawhin a hre thiam lo che. A chawh khawp ang!" a ti hmarh hmarh a.

"Rose, 'Chawh' tih thumal kha chu hmang lo hrâm teh," ka lo ti a. 

Țawngkam ţha ni miau hek lo le, râpthlâk ka ti a, țawng malsâwm lo tak niin ka hre țhìn bawk a, ka hmang ngai lo rêng bawk a ni.

"Eng nge, a inhmeh tâwk chiah! A chân che hi a chawh khawp ang, mahni dinhmun hre thiam pha lo lêka a han awm ve mai mai ni!" tiin a la âng bawrh bawrh a.

Min natpui vàng a ni tih ka hria, hrehawm ka tih hian hrehawm a ti ve tho a, chuvànga âng bawrh bawrh a ni. Ka hre thiam tho mai.

Mut hmunah chuan ka phone chu ka khawih rauh rauh a, he phone-ah hian a aw ka hre ngai tawh lo ang a, a message pawh ka hmu ngai tawh dâwn lo chu a ni si a.

Kan in-text-na chu ka hmet chhuak a, ka chhiar nawn leh dan dan a. Hêng hunlai hi chuan tuna kan awm dàn hi kan ngaihtuah pha hauh lo si a le, kei phei chuan kan ințhen hi ka ring chhin lo hrim hrim bawk a nih kha; mahse, hei, kan inţhen chu a lo nih ve tâk reng si hi. Hringnun dik tak chu ka tem chho leh mêk a ni, kan hmalam hun hi kan lo va hre lo tak êm! 

Message chu ka clear vek. A number pawh chu ka delete nghâl bawk a, min hnèm lêm lo ang tih chu ka hria; mahse, hei hi ka ke pên țanna tùr a ni tlat a ni. Ani nèna kan hun hman dun kha nunhlui mai an lo ni leh dâwn, nunhluia chèn reng hi ka duh lo, ka pên chhuah a ngai, ka insal bettîr reng thei lo ang. Ani nèna inkaihhnawih thil chu tibo vek ang.

Tunah chuan ka fing ve deuh tawh a, Ațana nèn kan ințhen lai anga nâa tuar kha ka tum tawh lo, nâ chu ti viau mah ila ka tlûk phah lo ang, harsa mah se ka pên lui țàng țáng ang.

A ni khatna chu țha takin ka zo thei a, thawhpuite bulah pawh hlim takin ka nui var var thei, hei hi a ni hringnun chu. Thei nia ka inngaiha chutiang rilru ka put chuan ka thei ngei ang tih ka hria.

Ka hre chhuak lo a ni bîk lo, ka hre chhuak, ka ngaihtuah; mahse, ani ngaia kùra rilru ngaihtuahna zawng zawng pêk vek kha ka tum lo mai a ni, hriat chhuah loh tum hi chu ka thei dâwn lo chiang sa a, ka tum lo law law; mahse, tlûk nân, rilru lunngaih nân hman ka tum lo mai chauh a ni.

A ni hnihna, a ni thumna, chutiangin ni chu a kal ve zêl a, ka hmu ngai lo va, ka rilru nat avàngin ka țap hek lo. Țah hian eng mah a siam țha thei si lo a, mahni intihhrehawmna mai ani. Chak lo lan chhuahna a ni si a, kei chu ka chak tawh a, mi dang tân ka kian ta mai.

Zirtàwp chawhnuah kan khuaah ka haw chho leh a, Lungleia awm rih châkna pawh ka nei tawh chuang lo. Ka pa min ngai êm êmtu leh min thlahlel ve ngawih ngawihtu awm renga Lungleia hlim lo taka Chawlhni hman ka peih lo. Min hmangaiha min ngaitu, min thlahleltute bula awm hi a lo nuam ber mai.

"Niminah Thlamuana kha a lo pêng leh a," ka pain a tih chuan makti rilru zet hian ka en a.

"A awm deuh reng a, min kan pah pawh a ni ve ang chu, a bengvâr roh khawp mai," a ti leh a.

"A nih tak chu, a va fel tak ve!" ka lo ti ve mai a.

"Mi pângngai chunglam a ni a, a àwm ve reng a nia, bâkah, fanu nula hmelțha tak  ka nei a ni tih pawh a hre ve bawk ang chu," tiin a nui zui vur vur a.

Taitea chuan," Mâkpa atân kan lo hual diam tawh mai asin, mâkpa lamhla deuha mi neih ai chuan hnai ve deuh hleka neih pawh hi kan thlahlel ve a," a lo ti ve a.

"In va ho tak aw!!! In inthurual a ni lo maw?  Mâkpa in ngaihtuah hma lutuk! Pasal neih ka la peih lo," ka lo ti ve a, fiamthu-ah lâksâk pahin dik deuh tho chuan ka chhâng a.

"Kan dam hi chuan kum hi a ral chak asin, duhthu kan lo sâm ve mai pawh a, a ngaizâwng tak tak che chuan ka hria a ni," Taitea chuan ati leh a.

"A sâng êm a, ka phâk lo," nui chung hian ka lo ti a.

"I senior hmain pasal i neih a ngai ang aw, hmeichhia phei chu in vànglai hun a rei lo, neih har hi chuan buaina a tam. Fa in pai lawk lo thut thei a, kum upat tawh lama fa paite hi a hlauhawm a nia," Taitea vêk chuan a ti leh a.

"Pasal ka neih thuai thuai pawh chu i va duh àwm ve! Ngawi tak rawh, ka chhuk leh hunah chuan ka lo chho har tawh viau ang! Heta ka awm reng chuan min tîr lui duh mai dâwnin ka hria," ka tih chuan ka nu leh pa chu an lo nui hawk hawk a.

Kan khuaa ka awm chuan rilru chu a thâwl deuh. Thlamuana han sawi chhuak zauh zauh mah se fiamthu kan thawh tam a, nuihna a tam bawk nèn, chhûngte tak tak bulah nge nge chuan ngaihtuah a tam lo deuh e.

*******

"Engati nge min pehhêl tlat a?"

Ka pehhêl thlâwt lo, hmuh loh ka duh mai a nia, a inngaihlu mah mah. Amah en lo tùr chuan ka inthunun hrâm hrâm, tûn hi luhlul chhuahna hun tak a nih hi.

"Eng atân nge ka pehhêl ngawt ang che?" ka ti ve khauh a.

"Hmuh theihin i awm hleinem."

A țha a nih chu. Ka duh dànah tak phei hi chuan hmuh theih miah loh hian awm vang vang ila ka ti asin, ani hmuh tam loh hi a him, hmu lo mah ila ka ngaihtuah reng tho si a.

"Chuti a lo ni maw?"

A chek tlak a, ka en chuang lo, ka din phah chuang lo a, ka kal ngai rengin ka kal char char.

"Hmuh tùrin i awm si lo a, thil sawi ka duh pawh kha ka sawi thei lo alawm," a tih chuan nui lui hak hian," Thil sawi duh i lo nei ve a ni maw?" ka ti leh a.

Mak chu min ti ve maithei a ni, hetiang hian tu bulah mah ka la awm ngai lo, ka țawngkam hmante pawh chu a ngeiawm tih ka hre reng, mak pawh ka inti ve deuh hial a ni.

"Nunràwn hmel deuha awm i inhmeh ve lo a nia," a rawn tih chuan ka thil sawi chuan a thawk țha a ni tih ka hre mai, a rûkin ka nui var var.

"Ka nunrâwng alawm," vei neih loh hmel zet hian ka ti liam puat a.

"Ka hre chiang ve viau tawh che."

"Chiang lo tawp a nih chu!" ka ti leh a, step bul kan thlen tawh avàngin ka ding deuh hlek a.

"Mihring hi a inhriat chian theih tak tak loh! Kan nungchang leh awm dànte chu kan thlâk zung zung mai alawm," ka ti a.

Ka duh aiin ka țawng tam hret.

"I lung ka tiawi lo nasa a ni maw?" tiin a nui hak a.

"Engvàng ngawtin nge chutiang ngaih dàn chu i neih a?" ka ti lët ve sak a, chutah, step-ah chuan ka pên thla zui nghâl bawk a.

Min rawn zui nghâlin," Ka hre thei mai a ni," a ti sup a, chutah, a aia ring deuh zâwk hian,"Engati nge i inkhâwm bâng hi ka hmuh ngai tawh loh che a?" a ti leh daih a.

Min hmu tawh nâng. Kan khuaa ka haw chhoh loh pawhin kawng dangah  kan inkhâwm bâng kan haw daih ziah tawh alawm.

"Kan thlâwk bo daih pawh a ni mahna!"

Ka chhàn dàn chu a ngaih dàn a ni lo nasa ngawt ang chu! Mi luhlul ve tâwk tak a ni a, a induh tâwkna/ a chapona a tiche ve laih ngei ang chu.

A pawi lo.

"Naupang â ber pawhin an âwih lo ang."

Ka nuih a za khawp mai; mahse, ka nui lo ang, a hriatah hian ka nui hauh lo ang.

"Zànah dàwr têah i la kal ngai em?" 

Ka hrilh àwm lo, ani hriat kher a ngai lo.

"Ka hrilh kher che a țùlna ka hre lo," ka'n tih leh pek chuh!

A rúm nghut a, ngaihven lo tak hian ka kal ngaiin ka kal  ngat ngat. A ding ta a ni ngei ang, a pën thâwm ka hre ta miah lo.

In ka thlena room-a ka inthlâk lai chuan kan inbiakna țawngkam kha ka chhui lêt a, ka biak țhat lohzia leh ka chhàn nawmnahzia kha, ka inchhîr hnuhnawh zâwk! Khatiang khân tu bulah mah ka la țawng ngai lo asin, ka nu leh pate'n hre ve phei se chuan, an fanu Sangbawihi kha ka ni lo ta emaw an ti ngei ang chu.

A hmaa tlâwm taka ka awm min ngaihsak lêt lo lutuk khân min tiluhlul zo niin ka hria. Ani pawh a luhlula a intihngèn tlat theih chuan engah nge ka theih loh bîk ang tih rilru ka pu thar tlat a, hei vàng vek hi a ni.

Zànah dàwr têah ka kal ngai tawh lo a, kan inhmuh rûkna lam phei kha chu melh pawh ka melh duh tawh lo. Kan room tukverh a inhawn pawhin chulai en lo tùr chuan ka awm rem a, ka khãr chauh țhìn.

Pachuau lunglian rilru a kai tho a ni ang e.

Khami tlai bâk kha ka hmu leh ta lo vang vang a, a chanchin pawh ka ngaihven duh lo. A rûk tak chuan hre ve châk deuh tho mah ila, a hming pawh hi ka lam ri ngai lo. A ri lamah sawi chhuak lo mah ila, thinlung lamah erawh a lian hle reng tho a; mahse, a hmaa ka tlàwm ang tluk deuhthawa ka hmaa a tlãwm a nih loh chuan a lam hi hawi mai mai ka tum lo, duh leh rilru na deuh pawhin min kalsan mai se, ti ila tunah pawh hian kan inkãrah eng nge la awm?  Eng mah a awm tawh lo a ni lo'm ni?

Thlamuana lo lêng chuan,"In khuaah khân lui nuam deuh a awm em? Lui kal ka châk e, picnic pahin kal ang u hmiang, hun remchâng hmasa berah?" a ti a.

Rose-i chuan," Ka châk zâwng tak a ni, Sangbawih, huan pawh kha in nei a ni lo'm ni? Sangha dîl pawh, ka châk tawh, a nuam ngawt ang!" a lo ti ve vat a.

"In peih tak tak lo ang," ka tih chuan Thlamuana chuan," I u Taitea khân sangha dîl chungchâng kha chu a sawi zauh tawh a, sangha pawh a awm nual a ni àwm e. Kal tak tak ang u aw, motor ka thawh ang a, thil pawimawh tùr zawng zawng nèn, rilru refresh nân pawh a țha alawm," phûr  tak hian a lo ti leh a.

Rose-i chuan," Mâkpa interview hun lai tak pawh a ni ang chu," nui chung hian a lo ti a.

Ka nuih chu a tiza vak lo nain ka țhen lui ve tho. Taiteate lahin chutiang lam bawk chuan min fiam a, Rose-i leh zêl hi chuan min dem ve lo se ka duh, ka ning.

A tûka ka school bâng chu gate bulah min lo châng a ni ang, gate-a ka chhuak chiah chu," Ka be duh che," a lo ti sup a.

School naupang hmuh tùr an la awm ve nual a, an hmuh laia inhnial ka duh loh avàng leh min hmuh dun tam loh ka duh avàng chuan ka kal deuh dàwr dáwr a.

Ka kutah a rawn man ta chat mai.

Ding deuh datin țawng ring ngam si lo hian," Min thlah teh, mi min hmuh ka duh lo a nia," ka ti sap a, ka kut chu tàl pih tumin ka pawt a.

"Engah mah ka ngai ve lo," tih nghut pah chuan nghet lehzualin ka kut chu a rawn hûm sauh a.

Naupangte pawh chu ka en ngam lo, kan hnung deuhah mai an rawn kal ve a, ka nèl êm êmte leh min nêl êm êmtute an ni bawk si a.

"Sawi duh ka nei ka tih kha. I sawi tùr i sawi zawh avàng khãn tâwk ti suh," a ti leh nghut nghut a.

"Min thlah phawt rawh," tiin ka ding deuh a.

"Hetia vawn che hi ka duh zâwk."

Min thlah chuan si loh avàng chuan ka kal leh ta a, inngeih taka invuan chu ni ila chuan a nuam ka ti ngawt ang chu!

"I sawi duh chu sawi rawh, ka lo tibuai lo ang che," ka ti  deuh hmak a.

"Min lo tibuai zeuh zeuh zâwk teh, nuam ka ti zâwk ang."

Ani ang hian ka ngeiawm thiam ve tak tak lo ang. Tunah hian a hmaa ka ngeiawmna phuba kha a rawn la lêt ve ta niin ka hria, sawi tùr lah chu ka hre mang tlat si lo.

"Ka lo ngawi hmak ang," ka ti leh a.

"Ngawi suh, țawng hi i inhmeh, a nuam bawk."

"I ngeiawm mai a nih chu!"

A nui hak a,"I rilru tak tak a nih ka ring, a pawi lo, ngawih hi i inhmeh ve lo a nia; mahse, țawngkam nèlawm lo deuh deuh kha chu i inhmeh hlawl lo," a ti leh sup sup a.

Chutah,"Rin che ka duh a ni, dâwt min hrilh pawh ka ring lo, ka thîkthu chhiatna avànga kan inkãr buai hi siam țhat ka duh," a rawn tihzawm lehnghâl zat a.

Ka thin phu a rawn su dup dup țan.

Mahse, ka nêm nghâl mai lo ang.

*CHAWIMAWI BEISEITU CHUAN CHAWIMAWI A PHÛ LO A, FAK BEISEITU PAWHIN FAK A PHÛ LO.  CHAWIMAWI TLÂK LEH FAK TLÂK CHU AN RAH CHHUAK AȚANGIN MIIN AN FAKIN AN CHAWIMAWI MAI ȚHÌN*