☆24/7☆ - 26 By Dingdi Pachuau

 ☆24/7☆ - 26  By Dingdi Pachuau

Ka chhâng lo.  Ka kal ngaiin ka kal a, ka kal miau avàngin leh ka kut a vawn tlat avàngin a kal ve zêl lo thei lo.

"Rin che ka duh ka tih chu!"

A thu sawi a nih avànga ka rin bîkna chhan tùr a awm lo, ka rilru chu nêm nghâl mai lo tùrin ka infuih ru sauh sauh a.

Ka la ngawi reng bawk a.

"Maw, țawng teh, nula lungawi lo ka la thlêm ngai miah lo a nia," a ti leh sup sup a.

Ka insawi fiah tawh a, min ring duh lo a, ka lungawi lo a ni ve mai. Mihring ve tho ka ni a, lungawi lo thei ve tho ka ni bawk, min thlêm rawh se, a thiam ang angin min thlêm rawh se, min thlèm lungrun dàn azirin ka nêmin ka nêm lo ang.

"Min thlêm tùrin ka ti lo che," ka ti ve leh hmak a.

Chutah, a ding ta. A din tâk tlatah chuan ka ding ve lo thei lo, ka kut a chelh nghet si a.

"Engtia thlèm nge i duh?"

Mipa a ni alawm, hmeichhia chu min thlêm lungawi thiam ve tùr a ni. Kan duhnaah chuan mi tu pawh mai hian tih dàn tùr chi hrang hrang kan ngaihtuahin kan hmang chhuak țhin a ni.

"Min ben hrep i duh em?"

A va zei lo ve tak! Ka nuih a za ru ta khawp mai; mahse, a langah chuan ka nui hauh lo, ka lungawi lo miau alawm le.

"Nge min vaw hrep mai dâwn záwk?"

A lam pawh ka en duh lo, lungawi lo tak anga awm ka duh tlat. Min biak duh loh leh min rin loh laia hrehawm ka tihzia kha, khatiang kha tem ve rawh se. Thil rêng rêng hi a tuartu nih loh chuan hriat thiam a har țhìn, a tuartu han ni ve se, chuan, a hre thiam ve deuh thei ang chu!

Ka țawng duh leh tâk loh avàng chuan ka kut min vawnna chu a thlah a, eng ang hmel nge a put ka hre châk khawp mai; mahse, ka lungawi lo der laklawh tawh si a, han en leh daw daw kha ka duh lo a ni, a hmel chu en lo tùrin ka insûm hrâm hrâm a ni.

"Min àn khum chiam mai teh!"

Teh thlâwt chuan! Nula lungawi lo chu a thlêm thiam lo takzet chu a lo nih hi, a inhmeh ka ti lutuk! A rûk chuan tlëmin ka khawngaih tawh a, han lungawi deuh mai pawh ka duh deuh thut thut a; mahse, tlêm chuan han tuartîr ve ka la duh bawk si.

"Nge vawi za chuang beng pawtin ka su mai dâwn?"

Hei phei chu, a nuihzatthlâk ngawt ang chu. E, a tihchi phian maithei a ni, beng pawta a su lai tùrchu ka mitthla chhin a, ka nui sak mai.

"I nui, i nui..."

A țawng tam tawh asin, tûn dârkâr chhûng hian a hmaa ka ţawng zât zet țawngin kei ve thung hi amah ang chiahin ka ţawng tam lo ve thung, kan inthlâk thleng dâwrh a nih chu.

"Miss Sangbawihi i ni tiraw? Min lo hre thiam ula, ka lo be buai lawk mai che u?"

Ka en rang khawp mai. Kan schhool Cl-vi zirlai naupang Dinmawia, zirlai thiam thei fahran lo leh a nu ni ngei tùr hi an lo ni a, kan bulah an lo la din rei loh hrâm ka beisei.

"Aw...eng ...nge ni ta?" ka ti bah deuh nak a.

"Kan titi lawk hman ang em?" a nu chuan a ti leh a, a hmel ațang chuan a inthlahrun hmel khawp mai.

"Aw, hman e, eng thil nge ni ta?"

Lo awm ve reng chu nuam a ti lo a ni ngei ang, Dinmawia chungchâng min sawipui rei hma chuan a kal ta daih, pawi lo, tikhân rilru nuam lo deuhin awm ve rawh se.

Dinmawia subject harsa tih leh a enkawl dàn chungchâng, homework kan pëk a thiam loh dànte chu lehkhabu phawrh meuhin min zâwt a,  min tihkhawtlai avàng erawh chuan hrehawm ti hmel a pu, amah pawhin a sawi lang nghe nghe.

Ka han hrilh thuak thuak a, a hriat thiam awlsam dàn tùr ber chuan ka hrilh ve a, a hre thiam tawhin ka ring. Nimin lam khân class-ah khân a tidik lo nasa rêng a ni, a lo hre thiam fumfê chiah lo a nih chiah hi.

"Mi thil han zawh hi a hreh lutuk a, a thiam miah loh pawh hi mi zawh a hreh luatah a thiam awm mai ţhìn, a țha ka ti lo a, ka hrilh ve fo bawk. Kei lahin an zirlai hi ka hre thiam phâk ve tawh bawk si lo a, a buaithlâk thei khawp mai," a tih chuan," A dik alawm, thiam loh hi chu 'Miss, khalai kha ka la hre thiam lo' emaw 'Miss, han sawi nawn leh teh' emaw tih hi a har miah lo, Dinmawi, hre reng tawh rawh aw, min zawh avàng khân kan hau dâwn miah lo che u a, kan hrilh fiahin kan sawi nawn leh mai dâwn a ni, kan hlauhawm miah lo a nia," tiin Dinmawia chu ka en a.

"Kan hmu remchâng hlauh che chu ka lâwm hle mai, subject dangah pawh hian a hriat thiam loh a awm chuan subject teacher ka panpui mai țhìn a, nang erawh chu in lama panchilh ngai lovin helaiah kan hmu remchâng che a, a tihzia tak tak a ni; mahse, kan tikhawtlai duai che erawh a inthlahrunawm hle thung a," a ti leh a.

Kawng laka min lo chàn mai ka ring deuh a nia; mahse, ka hmu hauh lo. A țha alawm, rilru hahdam takin a awm bîk loh beisei phawt teh ang. A dam ţha a, a ngaihtuahawm loh tal a, a zia e. 

Țawngkaa min thlèm chu a bànsan ta a niang, țawng miah lovin ka school bâng chu gate pâwnah min lo nghâk ta ziah a. Kei lahin be tâ'ng e pawh ka ti chuang lo, ka bul chiahah zêl a kal a, kan pên ri chiah chu thâwm awm chhun a ni. Step tàwpah erawh ka pên ri chauh ka hriat țhin avàngin dingin min en zui leh tawh a ni tih ka hria. Chutiang chuan kâr khat chhûng zet a ti peih nia maw le! Kan inbe chhin lo rêng rêng! Tu nge luhlul zâwk ti ang hrimin, a rûk chuan hahthlâk ka ti; mahse, ka be hmasa duh bïk si lo.

A thuhrimah, hna a thawk ngai lo em ni? Tlai tin maia min lo chàn ziah mai, a hman leh lutuk! Tlangvâl teirawlai, a pain hna a thawk thei lo a, awm mai mai leh teirawlai mai mai hman a ni lo rêng rêng.

Kâr tàwpah kan khuaah ka haw chho a, fùr hunpui a nih leh tawh vàngin ruah a sûr leh duh tawh khawp mai a, raincoat ka hmang țangkai khawp mai. Scooty hi school kal nân ka hmang ve hran lo, a chhan chu exer ka la peih si lo a, ni tina school kawnga kal hian exer ka la ve-ah ka ngai mai a, hmanhmawh thilthu-ah ka keng zawk a nih loh chuan ke hlîrin ka la kal.

Inrinni zàn inkhâwm bànah chuan Mazualite inah ka pëng kawi lawk a, ka peih lo chung thingpui leh a kurtai siam kan eia kan in hnuah chuan ka haw ve ta a, chawhmeh tùr anhnah min ken hawtîr bawk a, ka hlâwk khawp mai.

In ka thlena room-a ka inthlâk zawh hnu chuan ka phone ka han en ve a, missed calls a lo awm nual mai. Rose-i leh number ringawt ațangin a ni. Number ringawt phei chuan vawi thum lai a lo call a nih hi, ka silent miau avàngin ring chhuak thei hek lo le, hriat ngaihna a awm lo.

Rose-i chuan chawhmeh min rawn chah a lo ni, message a lo hnutchhiah tho a, call back lo mai ang.

Number ringawt chu tu tak ni ang maw? A pawimawh chuan a lo call leh mai ang chu a, engah nge inkhâwm hunlaia min lo call mai mai ni?

Ka mut dâwnah chuan min rawn call leh ta, a pawimawh a ni ngei ang.

"Hello?"

"Sangbawih, i dam țha em?"

Ațana. A aw ka hriatna a lo rei ve ta hle mai. A number kha a hmang tawh lo chu a ni phawt mai, tuna min rawn biakna hi number hran a ni miau alawm.

"Aw..."

Engtiziaa min rawn be leh ta thut nge maw a nih le? Min rawn beisei leh chu a ni tawh lo ang chu maw, a number kha ka la save reng a, ka la save reng a nih ringin number dang ațangin min rawn be ta a nih ka ring.

"Ka number ngai ațanga ka rawn biak che chuan min chhàn duh loh ka ring si a," ka rilru hria ang hrimin a rawn ti phawt a, chutah, sawi zawm lehin,"I ngaihdamna ngèn tlâk leh dîl tlâk ka ni lo tih ka hria, rawn beisei tum chea rawn call che pawh ka ni lo a nia aw. Sangbawih, ka rinawm lohna leh ka thil tihsual chuan min ûm zui zêl a, min nawr chêp ta a ni. Nupui ka nei dâwn a, chu pawh ka rinawm loh san che avànga ka fa tihfahrah a nih loh nâna a nu ngei nei tùra min duh kha, a thleng dâwn ta a ni," a rawn ti duah a.

"Eng atân nge min  hrilh kher a?" ka lo ti thung a.

"Fahrah a nih i duh loh êm kha, min lawmpui ringin ka rawn hrilh che a nih hi," a rawn ti leh a.

"A țha alawm, ka lawmpui lutuk che u."

A ngawi vang vang a, chutah," I laka ka tihsual chu siam țhat theih ni tawh lo mah se Pathian laka ka tihsual chu siam țhat ka tum mêk a, ka fa ka tihfahrah loha a nu nupuia ka neih tho chuan ka tihsual chu ka tidik ve leh ta tihna a ni thei ang em? Pathian pawhin min hrem zui tawh bîk lo ang tiraw?" a rawn ti leh a.

Chutiang thu a rawn sawi chhuak chu ka rin loh lam daih a ni, lehlam takah chuan ka khawngaih phian mai. Heti khawp hian min duh a, a vawi khat petek zeuh kha kei hian ka lo hmu lian lutuk em ni zâwk tih thlengin ka ngaihtuah ta hial mai. Kha a petek zeuh kha ngaidam thei hauh lo khân kei lahin ka lo namthlu țhuai mai si a. Kei pawh hian Pathian duh loh zâwng ka lo ti ve reng tho em le? Țha inti viau si hian mi rilru hi ka lo hliam nasa viau lo'ng maw?

"Kan tihsual kan sima kan siam țhat tùr kan siam țhat chuan Pathian mai bâkah mihring pawh kan lâwm țhìn alawm. Thil tisual thei vek kan ni a, ngaihdam ngai kan ni. Ngaihdamna tel lovin tu mah kan khawsaho thei lo, kei pawhin ka ngaidam vek che, i hmalam hunah a țha ber ber hlîr ka duhsak che," ka ti ve ta.

Ka thâwl hawk mai. Hun kal tawh ni mah se Ațana kha ngaihdam ka lo hreh takzet tih leh ngaihdam theihna nun ka lo neih lohzia ka hre chhuak a, tuna ka thil sawite kha a hma daih khân lo sawi tawh ila tuna ka thâwl hawk ang hian hmânah hmânah khân ka lo thâwl vek tawh àwm si a.

"Ka lâwm e, Sangbawih. I lak ațang hi chuan ngaihdamna ka beisei lo, ka ngam tawh lo bawk a; mahse, i lo puitlinzia ka hriat belh leh ta e, ka lâwm tak tak a ni, tunah chuan ka rilru pawh a hlim ve thei tawh ang."

Kan vêng ka haw chho chu ka hlâwk takzetin ka hria. Ngaihdamna thu sawi kha a harsa lo hle si a, engati nge ka lo intihluhlul tlat ni? Ngaihdam tân nuam bawk, ngaidamtu tân nuam bawk, engati nge ka lo hriat fiah hauh loh ni?

Ka muhìl țêp tihah chuan message pakhat a rawn thleng a, ka han en leh hrâm a.

*Țhawnțan zànah ka rawn lêng dâwn tih ka lo hrilh che.* 

Ka harh chiang ta hle mai! He message min rawn thawntu hi ka hre chiang nasa mai bawk si, a number delete ringawt mah ila ka vawng hneh lutuk  tlat.

A rawn lèn chuan nutei leh patea an awm ve ngei ang a, engtin nge niang?  Nutei phei chuan min hau nasa ngawt ang, Rinfela ang chu ngaihzâwng atãn pawh neih a phal loh kha.

Ka biak duh loh avàngin min runluih nân a rawn tilui a ni chiang ang. Ina a rawn lèn ka duh lo a, amah pawhin a tum ngai lo a nih kha.

Mahse, tunah chuan...

A theih loh, a theih loh bur. Ka theih ang angin ka dang ang. Naktûkah emaw bia ila a țha ang, a rawn lêng thei lo ang.

Chawlhni chuan ka be ta ngei a. Biak hmasak chu ka duh lo viau nain lo lêng lo tùrin ka duh si a.

"Rawn lèn kha chu tum duh suh, ka awm dâwn chuang lo," ka ti teh tâwng a. Ka awm dâwn reng sia, dâwt ka sawi lawk, lènna tùr ka hre teuh lo mai.

"In khuaa i haw vàng a niang ka khua a har?"

Ve ngei bawk tak chuan! Engtin nge maw a lo hriat ni? Rose-i a lo zâwt hman a niang?

"Dâwt sawi suh!" ka ti țhat a.

"Lo haw thuai mai teh, ka khua a har tawh a nia, kan inhmuhna hmun pawh kha i tel lo chuan a khua a har viau tawh a ni," a rawn ti leh a.

"I kal ngai bîk lo," ka ti thlarawk a.

"Zan tin ka luahlum ziah alawm, i rawn kal ve duh ngai si lo," a ti leh sup sup a.

Dâwt a sawi ang em le? Zan khat kha chu ka hmu ngei chu a nih kha, ni lo, dâwt a sawi chiang lutuk! Ka kal zànah pawh a rawn kal bîk lo, keimah chauhin ka țhut kha.

"I daw-"

"I kal ve zàn pawh khân ka rawn hmu che, ka thu sawi chu âwih mai rawh, ka kal ziah!" a rawn ti leh ta.

"Ka kal zànah ka va hmu ngai si lo che!" âwih vak lo chuan ka ti leh a.

"I haw hnuah chauh ka rawn chhuak țhìn."

"I va sual tak! Ka nghâk țhìn che a," ka ti a, sawi pawh ka sawi chhunzawm duh lo.

"Thawhțan zànah in ina ka lo lèn i duh loh chuan ka lo nghâk ang che, i lo kal ngei ka beisei ang," a rawn tih leh chuan," Mi nawr chêp i thiam hle mai maw?" ka ti hmak a.

"I lo kal loh chuan...lo lèn a ni mai," ti hmukin a hmet tàwp ta daih, min tihrilhhai lek lek alawm le.

Thawhțanni nilêngin ka rilru a insual a, a duh anga han awm chu tlàwmthlâk ka tih rualin ka pateate ina a rawn lèn chu ka duh chiah bawk si lo, thutlûkna siam dàn tùr pawh ka hre thei lo, min tibuai takzet.

A chângin ' A duh leh lo lêng se, room-ah ka awm hmak ang a, ani hian ka hming a rawn lam ri lo tawp ang' ka ti a, a chângin ' A lo lèn chuan pateate'n min ringhlel ngei dâwn, Rose-i chuan bialpa a nei reng, ka chunga tla tùr tho a ni, a lo lêng thei lo' ka ti leh a, chutiang chuan ka bùk tawn reng mai.

A hun lo thleng phawt mai teh se. Gate pâwnah min lo nghâk leh maithei asin, min lo nghâk lul teh se, hmaichhanah chuan a sawi fel theih deuh ang.

Chaehnu bàna a hmel hmuh ka inrin deuh nèn, zanina rawn lèn a tum vàng a ni ngei ang, gate pâwnah pawh min lo nghâk lo. He pa tak hi chu aw, hmaichhana hmuh ka duh ber țum țuma hmuh theih loha a han awm chu le!

Zàn a lo thlena zanriah ei fel hnu chuan dàwr têa kal tùrin ka chhuak leh ta nge nge; mahse, ka va phûr fahran lo êm!

"Rei lutuk lo la," tiin min rawn au zui a.

Rose-i hian min ringhlel lo ang chu maw. Zànah ka chhuak ngai tawh si lo a, zanin chu ka chhuak leh ta sia, min rinhlelh vàng a ni thei ang em?

Eng nge ka lei pawh ka hre mumal lo, rei lo tê tak tak dàwra ka awm hnu chuan ka haw leh ta a, kan inhmuhna țhin pènna ka thlen chuan ka ding deuh vang vang a, chutah, thaw hawkin step-ah chuan ka chhuk ta, ke pên erawh a va sak țalh țalh si ve!

Tu mah ka hmu lo, thla a êng ve ruai a, zanin chu ruah a sûr har deuh dâwn a niang, chhûm a chhah lutuk lo deuh.

Ka hnung lam ațanga min rawn kuahtu avàng chuan ka au chhuak vak lo chauh a ni!  A thâwm, ke pên ri ka hre hauh si lo.

"Min hlau suh."

Ka tãl nain min kuah nghet a, ka tâl chhuak lo khawp mai.

"Duh tâwk tawh teh...khawngaihin?"

Ka tâl a sawina nge ka lungawi lo chu duh tâwk tawh tùra min tihna? 

"Tu nge lungawi lo hmasa kha?" ka ti lêt vat a.

"Sawi tawh lo ang, theihnghilh vek ka duh!"

Kan ngawi leh vang vang a, theihnghilh vek theih se ka duh ve tho. Kan inkâra inhriat thiam lohna leh lungawi lohna awm hi bo vek tawh se...

"Ka ngai lutuk che."

A awka chhuak ril raih mai ațang chuan a tider lo a ni tih ka hria. Nia, kei pawhin ka ngai, ka zêp lo, ngai tak ka ni, ka thup hrâm hrâm zâwk a.

"Jail-a ka tàn lai ai pawh ka rilru a hrehawm zâwk. Eng mah ka ei thei lo."

A mawhphurtu ka nihna chin a awm ve ta.  Keimah vàngin hrehawm a lo ti ve a, jail tàn ai pawhin hrehawm a ti a nih chuan a chunga ka lungawi lohna chuan amahah nghawng na tak a nei ve tihna a nih chu.

"Min tawng hi i inchhîr tihna a ni maw?" ka ti thung a.

"Inchhîr lo, i thil sawi ka ring duh tlat lo kha hremna pêk ka ni," a ti sup a.

"Tunah chuan min ringhlel tawh lo maw?" ka ti a.

"Keimah ka inrin ai pawhin ka ring tawh zâwk che."

Hei zet chuh, hrehawm  a tih vàng leh min ngaih vàng ringawt chuan a sawi chhuak bîk lo ang chu maw.

"Ka ring thei che ang em?"

"Pathian i rin tluk zetin le."

Chu kher kher chu a, a uar mah mah lo maw?

"A nih, kan inhmuh loh chhûng zawng leh kan inkâr a buai chhûng zawngin engtianga nasain nge min ngaih?" ka ti leh a.

A va ho thei tak! Ho a ti ve khawpin ka ring.

"Heti chen aia nasa leh a lêt thumin," tih pah chuan  min kuahna chu thlahin a lam hawiin min kuai her a, eng sawi set set lo chuan duhthawh zet hian ka hmuiah chuan a rawn fâwp nghâl siah a.

Ka lo dang miah lo, ka lo țangin ka lo hnial lo bawk.

*KAN ȚHAT LOHNA LAI HI HLIAHKHUH TUM ȚÂLH LOVA LANTÎR VE CHÂNG NEIH A ȚHA, KAN ȚHAT LOHNA ZAWNG ZAWNG HMUA, HRIAA KAN BULA AWM TLATTE HI KAN TÂNA MI HLÛ AN NI*