☆24/7☆ - 28 By Dingdi Pachuau

 ☆24/7☆ - 28 By Dingdi Pachuau

Zawh tùr ka va ngah tak!

"I thil tawn tawh chu min hrilh duh ang em?" beisei ru zet si, ka beiseina tilang ngam meuh bawk si lo chuan ka ti a.

"Sawi chhuah tlâk pawh a ni lo. Thu ngaihthlâk nuam lam lah a ni dâwn si lo," a lo ti ve thung a.

A duh lo chung chu sawi chhuahtîr kher ka tum lo; mahse, amah chauh hian hre rùn lo se, a sawi chhuah ngai loh avànga a thinlung tâwt țûn hi paih thàwltîr ka duh si a ni.

"Ka bulah chuan zêp nei lovin i rilrua thil awmte kha paih chhuak țhen tal la; mahse, ngai i tih lêm loh chuan a pawi chuang lo a nia," ka ti a, a rûk tak erawh chuan sawi chhuak țhen se, inpaih thâwl se ka ti.

A ngawi vung vung a, kei pawh ka ngawi ve tho. A rilru a insual a nih ka ring, a chanchin ka hriat loh tam tak hi tlêm tlêm tala hriat chhoh hlek hlek ka duh, a chanchin ka hriat tam loh êm hi.

"Ka țhian kawmte chu i hre hlawm tawh a, nangni anga mi fel tak tak leh biak in ngainaa inkhâwm țhìn kan awm ve lo; mahse, an rilru chhûngril hi keimah aia sual lo vek an ni tih erawh chu ka hria."

"Zu an in a, damdawi an khawih a, pâwn lamah chuan mi sual an ni; mahse, an rilru chhûngril hi a țha asin, an inhmangaih tlâng êm êm a, hei tak hi an bula awm nuam ka tih chhan a ni. Mi sual, zu in leh damdawi tih chîng, chu mai a la ni lo, thil rûk chîng pawh maw le," tiin a nui deuh hawk a; mahse, a nuih a zat vàng a ni lo tih ka hre chiang khawp mai.

"Chu chu min hmuh dàn leh sawi dàn a ni; mahse, mi min sawi dàn tùr lam ka ngaihtuah ngai lo a, keimahin țha leh dik ka tih chu ka ti mai țhìn. "

"Zan khat chu an zu in tùr leinaah ka tel ve a, Enkawlate țhianho pawh kha an lo awm ve a, kan inhmuh ngun tawh avàngin kan inhre ve viau tawh a ni."

A ngawi leh rih a, kei lah ka lo hre châk tawh lutuk chu, nawr sek lo tùr leh zawhna lo zâwt miah lo tùrin ka lo insûm ngar ngar, ka hmui ka lo hup thùl.

"Mahse, khami zàn kha a fuh zân lo a ni, ka kalpuipa khân a hmel hriat a hmuh fuh avàngin min kalsan lawk a, khatih lai tak khân a nih ka ring, Enkawlate țhianho kha ka bulah an rawn kal a, ka jumper hâk lukhumah damdawi kha an lo dah hman a ni chêk ang chu, police an rawn lang deuh thut a, min rawn rêk nghâl chat mai bawk a," a ti sup sup a.

"Chuan, i tâng ta a," ka lo ti pek a, lo țawng ve ka châk tawh êm asin.

"Aw... Enkawla ngei mai khân police hnênah chuan damdawi chu mi pakhat kut ațangin ka dawng tih thu a lo sawi bawk a, ka tán insawi fiah ngaihna a vâng viau a ni, ka lukhumah ngei an hmu bawk si a," a ti leh a.

"I tâ a ni lo a, thu dik i țan tlat bawk a, chu chu thil țha a ni. I tâng rei em?" ka tih leh chuan," Rei ve bawk e," ti chauhin min chhâng a.

"Damdawi i ti ngai em?"

Ka zawhna vàng chuan ka lam a rawn hawi a.

"I ring em?"  Zawhna zâwt ila, zawhna vêk hi chhànna ka hmuh a ni fo.

"Ring nâng aw..."

"Dâwt a sawi duh mai kha mak ka ti viau a ni, mi fel leh țha ni miah lo mah ila dâwt sawi hi chu țha ka ti lo," a ti leh bauh a.

"Ka tân chuan mi fel leh țha ber i ni," tiin ka hnaih sauh a, ka kuah pah a. A rilru lo nat tawhnate chu kuah damsak vek thei ila, theihnghilh vek thei se ka ti.

"Enkawla chuan i hnek sawk chu a ba ve hrim hrim a nih chu tiraw? Ka thiam lo miah lo che a nia, țhil țha ber erawh a ni ka ti lo thung a," ka ti sar sar a.

"I va duhawm reuh tak! Nu reuh viau si, duh rorum ru riau bawk si," tiin a nui hawk a.

A hmai, tlêma la vûng deuh chùlsak pah chuan," I hmel țha tak kha a tihhmelhem ka phal hleinem, a la na viau em?" ka ti sap a.

"I chûl dam vek tawhin ka hria."

Sawi tùr tam tak nei mah ila hun a kal chak lutuk! Dârkâr khat deuhthaw kan lo awm dùn tawh reng a! Kan ințhen dâwn chuan inthlahel takin kan han inmuah leh vawng vawng a, thlah chu harsa ka ti viau mai.

He pa thil sawi rêng rêng hi ka âwih duak duak mai si a, a zùna ka uai lutuk tawh vàng hi a ni thei ang em? A thu a kàwi a ngîlin ka ei duak duak ni berin ka hria, dâwt min hrilh ka ring lo.

Rose-i hnênah pawh chuan thil awmzia dik tak chu ka hrilh ve leh a, a chhan chu tu emaw talin thu dik hi sawi chhuak ve se tih hi ka duh chu a ni. Miin an hmuh dàn a dik lo laklawh tawh a, a tân chuan mi hmuh dika awm tùr chuan hun a duh rei dâwn lutuk si a. 

"Nang hi i țan vàng a ni lo maw? Eng emaw dik lo hi chu a awm ngei ka ring  asin, dik na na na chu tu mahin dik lo an ti lo ang, an insual chungchâng thu-ah kher lo a nia ka tih ni," a ti a.

"A dikna chen chu a awm ve maithei; mahse, kei chuan ka ring thlap. A inkhâwm ngai lo a ni maithei; mahse, mi sual a ni lo, miin an rin anga sual hi a ni lo," ka ti ve tlat a.

"Inkhâwm ngai lo zawng zawng hi mi sual an ni vek kher hleinem, inkhâwm țhìnte zíngah pawh rilru tengkherh pui pui pu, chapo leh inla tuavawn fe fe an kat nuk a nia, khawvêl a ni miau mai si a, hetiang mi pawh hi chu la awm zél tùr kan ni," a ti ve leh a.

"A inkhâwm ngai loh avàng leh a dikna a sawi lan ve ngai lêm loh avàngin mi sualah an ngai vek ni maiin ka hria," lungawi vak lo chuan ka ti a.

*******

"Bawihte, Thlamuana kha mi fel tak a ni tiraw? A mitmeng leh chezia ațang khân a duh viau che tih ka lo chhiar ve thei a, nang hian a chungah eng rilru nge i put ve le?" tiin ka pa chuan min zâwt hlawl mai a.

Hetiang lam hi sawi chhuah nuam lêm lo mah se, min zâwt miau si a, thu dik taka chhàn mai  țha.

"Pa, ngaihzâwng ka nei ka tih kha, Thlamuana hi mi fel tak a ni, hna thawh țha tak pawh a nei; mahse, ka ngaizâwng ve lo," ka ti a.

"Chuti a nih chuan, kan mâkpa tùr chu rawn zintîr ve tawh la, fahrah i tih kha em ni?" ka pa chuan a ti a.

"Aw, a ni ber ang chu," ka ti a.

"Hmuh pawh a châkawm ve alawm, i pasal neih tùr a khaihlak ațang khân tih tak taka mipa i kawm theih hi ka ring lo a; mahse, chutia i duh i hmu chu a țha ka tihpui khawp mai che, hausain neinung kher lo mah se,  ngaihțha taka kan thlah liam theih nân che kohhran bèl mí erawh ni hrâm rawh se. Zu in mi emaw ruih theih thil tih chîng, chàwmhlàwm ang chi hi chu neih loh tum a țha," a ti leh charh charh a.

Nia, ka chhûngte hian min ngaihtuah vàng leh min hmangaih êm vàngin ka retheih an hlau a, ka hmalamah hun duhawm lo tak ka neih an hlauh vàngin ka tâna țha tùr min ngaihtuahpui tih ka hre ve tho, a àwm chiah rêng a ni. An fanu hi min ngaihtuah lohte chuan, pasal țha tak neih hi chu tu nu leh pate pawhin an fanute tân an duhthusàm a ni ang chu.

Ka dem rêng rêng lo.

Taitea nupui Teruati pawh a rai lian ve tawh viau a, nakkum kum tìr lama nei tùr mah ni se, a rai lian viau tawh a ni. A la naupan deuh avàngin min u mai a, pawi ka ti lo, aaiin ka upa miau a.

"Naute in neih hunah chuan ka duat sual chiang ngawt ang," chaw kan ei lai chuan ka ti a.

"I fate chuan kan fate chu an ngam dâwn lo hle a ni," nui sûng chung chuan Taitea chuan a ti a.

"A pawi lo, ngam lo tih mai mai, a ho êm mai a," ka lo ti hlak a.

"Ani zawngin a nei har viau ang, a fate pa tùr pawh a la hre lo a nia, kan zawnsak mai dâwn em niang? Kei chuan Thlamuana ka duh sa reng mai a," Taitea bawk a ti leh a.

"I duh chuan nei mai la?"

A ngei leh khawp ang chu.

*******

"Naktûk zàn chu inhmu leh ila?"

Ka sam ka benga rawn zeh țhat pah chuan," Naktûk chu Aizâwla ka phei a ngai a," a ti sup a.

"A ni maw?!! Eng nge i va tih dáwn? Zâwt lo che ila chuan min hrilh pawh i tum lo a ni maw?" Ka lungawi zân lo tih chu a hre ve khawp ang chu.

"Ka patea ka va hmu lawk dâwn a, ka rawn lêt leh nghâl deuhthaw mai dâwn avàngin hrilh kher che ngai pawh ka lo ti hleinem," a lo ti thung a.

"Chu pawh ni se, min hrilh zêl tho la? Nuam ka ti dâwn asin," ka lo ti a.

"Aizawla ka phei tur chu maw nuam i tih dâwn?" a lo ti vut a.

"Ni lo, thil ho tê tê nia i ngaih min hrilh khân nuam ka lo ti ve dâwn a, țûl lo nia i ngaih thleng pawh khân min hrilh vek thei ang," ka lo ti a.

Min en vang vangin,"Țûl lo nia ka ngaihte thlenga ka hrilh vek che chuan hunin min daih lo ang, hun kan nei rei ngai si lo," a ti leh a.

"Phone-ah tal pawh," ka lo ti țâlh a.

"Eng nge ka lo hawn ang che?" a ti daih thung a.

"Nangmah."

"I duhawm thei!" a tih chuan ka lâwm hle a; lâwm hle e ti lo chuan ka zak deuh tho bawk a.

"I patea chu va hmu thuai la, dam takin lo haw thuai ang che, ka ngai dâwn si che a," ka ti a.

"Lo kal ve ta che, kan in hlui ni ţhìn pawh ka hmuh ang che," a ti leh a.

Ka châk ru kher asin, ani bulah kher hi chuan khawi hmun pawh ni se ka kal châk ve zêl tho ka ring, hremhmun tiam lohin.

"Nang chu i sual e, ka kal thei lo tih hre reng chungin min sâwm ve a, min tichâk ting tang a," ka ti nang nang a.

"Anih, lo chãk suh aw, ka rawn haw vat ang."

Aizawla a awm chhûng chuan ka be thei lo, min be duh lo a nih loh chuan, recharge a ngai tawh a ni ngei ang chu.

Ka ngai roh mang e. A chanchin tam tak zawh tùr ka la nei a, a lo hawa kan inhmuh hunah chuan," Min hrechang lo hle mai,"ka ti chiang ngawt ang.

Lo haw thuai tùrin a insawi kha a ni a; mahse, kâr khat a ral dáwn ta mai, dâwt min hrilh a niang. Nge a patea chu a lo buai viau? nge a lo damlo a damdawi inah a awmpui zâwk? Chiang tak khân a patea chanchin ka hre miah lo a nih kha, ka zâwt zui tlat lo a.

Ka ngai, ka ngai lutuk. Chhùn lamah chuan school naupangte bulah hun ka hmang a, chawhnu dâr 3 bànah gate bulah min lo nghãk țhìn si a, min lo nghah leh ringin ka hawi kual nasa thei asin; mahse, ka hmu ngai lo.

Biak theih tal se țha tùr hi a nia. Nge ani hian min va theihnghilh hmin dèr zâwk? Nuam a va ti lutuk ang a, nula dang hmuin min hrechang tawh lo a ni zâwk ang.

Bsa pawh a rawn lêng ve leh ta; mahse, keima lam dik loh vàng a ni ang, ka hmu tuitang thei ta tlat lo.  Kohhrana inhmang leh mawhphurhna hial chelh si, khati khãn Rose-i nèn an awm dùn thei a, thil sual  ti miah lo ang maiin an awm leh thei a nia, engtin nge an tih bîk ni? An rilruah inthiam loh rûkna an nei ang em? Nge, Pathian hi an hlau lo tak tak zâwk?

A rawn lèn zàn ber kherah chuan," Kârleh Inrinni zàn inkhâwmnaah 'Thianghlimna' tih thupui hmangin thu ka sawi dâwn a, ka huphurh ru zêk asin," a tih chuan,"Thianghlimna," ka lo ti sap a.

Ka mihring rilru a lo chhuak.  Ani hian Thianghlimna a sawi ang, ngaihnawm ti taka ei fe fe chuan awm leh bawk ang, rilru erawh a va vâk kual nasa tak.

"Zük leh hmuam chungchâng lamah i her kual daih ang a," Rose-in a tih chuan," Nungchang lamah pawh ti tho la, chuan, nungchang leh nun dàn lamah pawh thianghlim taka nun a pawimawhnate sawi bawk la, a, a tam thei viau ang," ka lo ti ve a.

"Umm, a huam zau thei khawp ang. Sawi tùr lam ai mah chuan nunpui lêm loh thu țha tak tak hi kan sawi țhìn a, ka zak deuh hlek maw le," Bsa chuan a ti a.

"Nia; mahse, nunpui lëm lo deuh vek alawm kan nih le. Mi sualna hi chu kan hmu thei lutuk, mahni kan indah țha larh a, mi erawh kan teh tling  ngai si lo," Rose-i chuan a ti a.

*******

"I lo haw har si! Ka ngaihzia che chu a..." pangchang tak chuan ka ti sap sap a.

"Kei pawhin ka ngai che asin," a sawi ni àwm lo taķ chuan a ti a.

"I patea i ngai fê zâwkin ka ring, i va awm rei êm mai," ka tih chuan a nui hawk a.

A nui ri hriat hi nuam ka ti, a nui khât lutuk a, nui nui ve tùrin ka duh.

"I patea chu a dam țha maw?" tia ka zawh chuan," Ka phei khân a lo damlo niin, ka buai ta hrep a nih kha," a ti a.

"A nih chu, a va zia lo tak aw...! I lo phei leh tawh sia, a va ngai dâwn che ve ...a dam chiang tawh em ni?" ka ti leh a.

"Ka thlen ațanga ni hnih hnuah a boral ta a nih kha," a ti sup a.

A kut chu ka vuan ringawt! Zâwt fuh lo ka inti si, ka zâwt laklawh tawh bawk si nèn, nuam lo ka ti ve ngawih ngawih mai.

"A chhúngte chuan an ngai ngawt ang che," ka ti leh ringawt a.

"Chhûngte a nei lo, keimahni bâk," a tih leh chuan ka dang dêr tawh!

"Thil sawi tùr tam tak a awm; mahse, ka'n kuah vawng vawng phawt teh ang che, ka ngai si che a," a ti a, min kuah vang vang a.

"Eng chu nge min rawn hawn tâk?" ka tih chuan," E, keimah. Eng nge ka lo hawn ang che ka tih khân 'Nangmah' i ti a ni lo'm ni?" a  ti a.

Nia, a dik chiah. Amah dam takin a lo haw a, kan inhmu leh thei a, thinlung pawh a dam sawng sawng tawh alawm.

*******

"Bawihte, ka natna hi i hria tiraw?"

Mittui tling pamin ka pa chu ka en a, a chanchin ka hriat tirha ka mittui tlâk nasatzia kha.

"Pa, chutiang chu sawi lo teh, chemo i khai ang a, i zia chho vat mai dâwn alawm," tiin ka hnèm a.

"Hei vàng hian alawm ka nawr sek che. Ka dam lai ngei hian pasal țha tak nei la tih ka duh a, ka duatzia che i hria tiraw? Ka fanu rangkachak hian rilru hlim takin mual min liamtîr theih ka beisei tlat a ni," a ti leh sap sap a.

Khawvêl natnaa ka duh loh ber mai cancer natna nunrâwng chuan ka pa 

taksa, a kawchhûng chu a ei chhe mêk a ni si a, a natnatihdam theih nân hian tih theih neih ka va châk tak!

"Ka dam țhat lai hian i bialpa chu rawn hruai rawh aw, min hmuh a hreh pawhin ka dinhmun hi i sawi chian a hre thiam ve lutuk ang," a ti leh a.

Hrehawm ka va ti tak!

*HARSATNA HMUNAH ȚHIAN ȚHA, MIN HMANGAIH TAK TAKTU A LO LANG ȚHIN*