☆24/7☆ - 5 By Dingdi Pachuau

☆24/7☆ - 5 By Dingdi Pachuau





Kan khua kan thlen chuan khua a thim lek lek tawh a, ka nu leh pate chuan min lo làwm thiam khawp mai. Kan inhmuh lohna a lo rei ve leh ta deuh a, ka pa phei chuan ka kutah a chelh vang vang a.



"Bawihte, hmun danga i awm hi țha ka ti chiah tawh lo a ni. Tunah chuan ka hna ațangin ka lo chàwl ve tawh bawk si a, min kàwm hlim tùr an awm tawh lo va," a tih chuan," Ka nu leh Taitea an awm reng alawm," ka lo ti vat a.



"I nu chu ni tin a chhuak a, Taitea lah tlangvâl a ni bawk si a, ka kawm theihin a awm lo a ni," ka pa chuan a ti leh a.



"E, lungngai suh, hei Krismas leh Kumthar chhúng chu ka awm tawh dâwn alawm, kan inkàwm char char dâwn nia," nui chung hian ka ti a.



Rose-i biain in kan thlen chiah thu chu ka hrilh ve a, ani pawh chuan," A va làwmawm ve! Mahse, i awm lo va, in a reh ruih mai," a ti phawt a, sawi zawm leh nghâlin,"I nu leh pate an lo lãwm àwm teh e, an ngai tawh àwm che sia" a rawn ti lar lar a.



"Hei, an lãwm lutuk a, ka pa phei chu a mittui a tla lo chauh maw le," tiin ka nui a, ani pawh chu a nui ve hawk hawk a.



Mahni in chhúng ngei maia han awm leh theih chu hah a dam siai siai mai, min duat êm êmtute bula awm hi a nuam ber mai a lo nih hi. Ka thil hawnsakte chu ka phawrh a, an lãwm thiam khawp mai, rilru an tinuam veng veng.



Zànah ka inkhâwm hman hrâm a, inkhâwm bànah Mazuali a rawn lêng a, a tân liau liaua ka leisak perfume chu pein mawza lum, ka tâna ka lei pawh chu ka pe tel a, a lãwm lutuk chu a au chèl chúl mai a.



"Ka va lãwm tak! Khawvêlah hian i țha ber mai," tiin min kuah chûk chûk a, ka thaw thei lo lek lek hial a ni!



"I lãwm hmel khân engkim a sawi fiah vek e, i lãwm tih sawi kher a ngai tawh lo ve,"nui chung hian ka ti a.



Min rawn phone hmain Ațana ka va phone hmasa a, kan in ka thlen tawh thute chu ka hrilh ve a.



"Rilru nuam deuhin i awm tawh dâwn a ni maw? Ka call pawh i chhâng țha duh tawh lo ang a?" tiin min rawn fiam a.



"Hei ka rawn call hmasak zâwk che hi aw...," ka ti phawt a, chutah,"Nia, mahni in ngeiah chuan rilru chu a hahdam khawp mai, Lungleia pateate pawh an fel lutuk, sawisèlna ka hre chuang lo; mahse, mahni in ngei chu a lo dang deuh chu a ni," ka ti leh a.



"A niang, min rawn call hmasa tlat a," a rawn ti leh a.



"Ka rawn call hmasa ve fo che alawm, theihnghilh bîk lo la?" ka ti a.



"Okay, ka tlâwm e," tiin a rawn nui hak hak a, ngaihthlâk nuam ka ti kher mai.



Hunpui lo thleng tùr a ni bawk a, hmun danga awmte leh lehkha zira awmte pawh an rawn haw khâwm ve țak țak a, țhalai kan tam leh tawh viau a, a nuam leh hle tawh a ni.



Kumin chu fatu lamah ka ãwl ve ta, Mazuali erawh Kumthar ruaiah a fatu dâwn thung; mahse, zàikhâwmna lamah thingpui ka lum nasa dâwn a nih àwm chu. Kum dangah chuan Krismas ruaițhehnaa ka fatu loh leh Kumthar ruaiah chuan ka tel ve ziah a nia, kumin chu  engthâwl takin ka zaikhâwm ve thei dâwn e.



Țhalai lo awm sate'n Biak in an lo chei nual tawh a, hmun dang ațanga haw tharte'n kan chei ve leh bawk a, kan țang rual bawk nèn, kan chhuah mawi ve khawp mai.



Krismas tûkah țhalaiin hla an nei a, kei chu ka tel ve ta lo. Min sâwm ve nasa a; mahse, ka thiam loh tak  mai hla a lo ni si a, ka tel ngam ta lo a ni. An tam tham ve bawk a, an thiam khawp mai.



Kan inkhâwm a, kan zaikhâwm reng bawk. Kan khuaa ka awm hi chuan inkhâwm hi ka thlahthlam mai mai ngai lo ka tih tawh kha, Krismas leh Kumthar inkâr chu ni tin zan tin kan zaikhâwm a ni mai, kan zai tui bawk a, mihlim che chhuak an tam bawk a, làmtual pawh a ãwl hman meuh lo.



Kumthar a lo thleng a, zaikhâwm lam kan tui êm avàngin ruai nawnna tùrin Upa Dara'n pawisa a thawh a, chu chuan mi dang kàng kaiin an thawh belh ta nual a, vawksain kan han nawn leh sak a, boruak pawh a nuam khawp mai.



Ruai țheh zawh chuan inah ka haw a, ka nu leh pate pawh an lo awm daih tawh niin, kan vêng tlangvâl senior, nula tlangvâl zawng zawng 'U Huna' chu ina ka luh lai tak chuan a țawngka chhuak ațanga rui tih hriat tak hian a lo țawng lar lar a.



"Upa Dara'n 'Pawisa ka thawh e' a ti a, a pawisa hmuh kha khawia mi nge tih kan chhût hauh lo. Thing a zaitîr a, thing zaia a chhawrte hlawh a pêk zawh duh loh pawisa a nih kha. Kei chuan khatiang pawisa bawlhhlawh hmanga kohhrante a hrãi kha ka dem a, ruai pawh ka țheh duh lo rëng ani. Upa a ni a, țha deuh tùrah in ngai mai mai, a rilru chhûngril saw a tuiêk a ni. Rilru tuiêk, tenawm lutuk!" a lo ti bawrh bawrh a.



Ka nuih chu a za angreng khawp mai a, ka nu leh pa chu ka melh ralh a, anni erawh chuan an lo ngaithla uluk khawp mai, mak ka ti hial zâwk a ni.



"U Hun, tute nge thing zai atâna a chhawrte chu?" tiin ka zâwt a.



Min rawn en a, men duar duar pah chuan,"Mûnga leh Kunga an nia, an zai țantirh khân pawisa an neih loh avàngin ka khawngaih khän ka pawisa chêng 3000 ka pûktîr a, kan nute khua an nih avàngin kan inah pawh an rawn innghat nghe nghe a."



"Mahse, an haw dâwn khân  Upa Dara hian an hlawh kha a pe kim duh tlat lo mai a, a bula an sawi lahin,'In zak lo'm ni? In thing zai chhuah a chhiat êm khu, hralh pawh ka hralh thei dâwn em ni? Ka hloh duai dâwn tih hre ta che u,' a lo ti hrep a ni àwm a, ka hnênah an lungawi loh thu an sawi ve nang nang a, an dîl ngam tawh bawk si lo. Khitiang Upa, rinawmna nei rêng rêng lo thu sawi pawh hi ka ngaithla peih tawh hleinem, ka rin lohzia chu pui...tak a ni, pui tak," a ti bâih bâih a.



"A ni tak tak maw? Eng zât vêl nge a pêk duh loh a?" ka ti leh a, a sawi tui si a, a thil sawi dàn ațang chuan Upa Dara chu a rin loh hmèl bawk si nèn, a țawng uar dàn vêl chu a ngaihnawm tlat!



"Chêng 5000 a chuang hlek ang, ni tin inhlawh ta ila chuan thawh chhuah chu a har ve khawp ang, pa mal tân chuan. Sawrkâr hnathawk, nangni tân chuan eng tham a ni hauh lo ang; mahse, kâwla ni chhuak chhiara ni sena hnuaia hna thawk tân chuan hlawh chhuah har deuh mai a nia," a ti leh par par a.



"A va zia lo ve tiraw?"



A vaihlo zial pak khu laih laih pah chuan," Khata țang khân ka ring leh thei tawh lo, kohhran tân chuan a lo țha viau pawh a ni maithei; mahse, mi tê ber chung pawha  sum leh pai lama a rinawm loh chuan a rinawm thei ngai lo ang tih hi ka ring tlat a ni, tunah pawh a pawisa tùr ni miah lo hmangin ruai a țheh a, a la lâm tak ang dûrh dûrh a, bâk thlâwk te pawh a ang hi ka tia. Lâm eng ang mah se, mi dang chunga sum leh paia a rinawm lohna kha a sim si loh chuan eng anga upa sawmsarih pawh ni mah se, kei aia a țhatna leh vàn ram a kaina chhan tùr ka hre hauh lo ang," a ti leh bawrh bawrh a.



A thil sawi chuan thil tam tak min ngaihtuahtír. Sum leh paia rinawm a lo ngaihzia leh kan awm dàn leh kan chezia miin min thlìr reng ziate, min ring êm êmtute chunga rinawm loh theihna tùr thil pakhat lek awmah pawh kan rinawm lohna an hmu a nih chuan min rinna an lo hloh theih tùr ziate chu ka ngaihtuah chhuak a, fîmkhur lo ngaihzia chu ka hre chhuak thar uar uar mai. U Huna lo lêng chuan zirlai țha tak min zirtîr chhuakin ka hria.



Zan khat chu ka thawmhnaw pakhat hâk ka tum chuan ka hmu zo tlat lo, ka hàwn lo em ni le? Nge Aizâwlah ka theihnghilh le? Nia, Aizawlah khân ka keng ngei mai a, ka haw hnuah ka ha lehtawh miah lo, tunah hâk ka tum a, ka hmu zo lo. Rose-i ka phone chhin ta ringawt.



"Rose, ka thawmhnaw kha min lo haisak teh, ka kawrlum senduk a awm em?" tiin.



"Sangbawih, hei damlo kanin hmun dangah ka awm daih a, ina ka haw hunah aw," a rawn ti sar sar a.



"Oh! A ni maw?! Tihpalh lutuk! Tu nge damlo a?" tiin ka zâwt leh rih a.



"Pu Sawma, Rinfela pa kha? Rinfela kha i hria tiraw?" a rawn ti leh a.



Hrechiang e. Hre lutuk! Ka làwmthu sawi pawh ngaithla țha duh lova min vìntu ngei kha. Thinchhe zet kha.



Ka hre lutuk!



"Eng nâ nge a?" ka ti leh a.



"A, a pum lam hi a chiang lo ve a, tunah chuan a zia viau tawh e. Nakinah haw hunah ka rawn phone chiang mai ang che aw," a tih chuan," Aw le, a hmanhmawhthlâk loh e," tiin kan inbiakna chu kan titàwp ta a.



Rinfela. Rinfela ka lo ngaihtuah tam lo hle mai maw. Ani kha a dam țha ang chu maw? Dam ang, tlangvâl țhalai alawm a nih le. Tunah a pa a damlo a, ina a awm ve deuh reng a ngai a nih àwm chu. A țha, ruih theih thil pawh a ti lo ve deuh ang chu, a thinchhe lutuk pawh kha a pa bulah chuan a zia ngei ka beisei. A hringtupa a ni a, țha takin enkawl teh se, ruih theih thil ngawt buaipui lovin.



Engah nge chutiang ka ngaihtuah mai mai? A duh duh dànin a awm thei alawm le, ka lo ngaihtuah a ngai lo ve chiang êm mai.



Mahse, a mitmeng mi hîp thei zet kha, a mitmeng kha chu a mawi alawm. Tlangvâl pângngai tak leh awmthei deuh chu ni se chuan bialnu chhe lo tak tak nei thei tùr a ni, a hmel pawh a chhiat miah loh kha. A mit phei kha chu mi dang pawhin mawi an tih ngei ka ring, mi a hìp theih piah lamah.



Ka thil ngaihtuah mai mai chuh!



A tûkah chaw ei khamah Rose-i chuan min rawn phone ta a.



"Nizàn khân kan haw tlai sia, ka rawn tibuai duh tingtang lo che a nih kha," a rawn ti a.



"A pawi lo, hei min rawn be tho alawm," ka tih chuan," Nia, a hmanhmawhthlâk viauin ka ring chuang lo va. Bâkah, Pu Sawma kha a rawn zual leh deuh thut a, kan meng rei ta zêk sia, ka thawhna pawh a la rei lo," te chu a rawn la ti tak deuh deuh a.



"A nih tak chu, a zia lo hle mai. In hawsan lai chuan eng nge a an a?"tiin ka zâwt a.



"A zia, an chiu a, a muhìl a. A zia zêl mai ang, tunah ka pa a lêng ve thung a," a tih chuan," A va ti țha ve aw! In ti țha lutuk!" tiin ka fak luam a.



"Krismas ni hma chiah, urlâwk zàna Rinfela thil rù kha a tuar deuh a niang," a tih leh chuan," Ah, thil a ru leh tawh elo?" mak ti rilru deuh chuan ka ti a.



"Umm; mahse, a ru lai chu an phâwk chuang lo nàngin a thil rûk chu an in hnuaiah an hmu tlat bawk sia, bâkah, a hming a lo chhe ve tawh sa bawk nèn, rinhlelh loh theih pawh a ni lo, a buaithlâk êm mai," a ti nang nang a.



"Mahse, a ru lai an hmuh lohte chuan...?" ka tih ve chuan,"A ûmtute'n a jacket rawng ațangin an chhinchhiah a, chu jacket rawng chiah chu Rinfelate veranda-ah a inzâr miau si a, bâkah,a thil rûk ber lah in hnuaiah an hmu bawk a," a rawn ti leh a.



A rûk ngei a ni ang.



"Ka kawr chu i hmu ta em?" tiin min rawn biak chhan tak chu ka zâwt ta daih a.



"Aw, hetah a awm e. I hàwn emaw i ti a nih kha, i lukhamah inthlep sa thlapin a awm e."



Chutia a tih tâkah chuan ka ngaihtuah chhuak chiah e. Bag-a hawn tùrin ka la chhuak a, ka thlep țha thlap bawk; mahse, thawmhnaw dang dah hmasak tùr ka khung khân ka lo khung theihnghilh tih ka hre ta chiah, haihawt leh lutuk hi chu aw!!



Lungleia chhuk pawh a hun leh dâwn ta. Ka châk viau rualin mahni in chhûnga awm leh rih chu ka la thlahlel viau tho, ka pa lahin min la thlahlel ve si.



"Kan khuaah hian thawhna tur awm se aw," a ti vang vang a.



"Pa, tih dàn ka hria, Taitea hian nupui nei se, ani chuan ka ai awhin fate an neih hunah phei chuan kei hi min ngai tawh miah lo ang," tiin Taitea chu ka melh ralh a.



"A hmu zo lo a nih ber hi a, i u ve hi chuan tu hmel pawh min hmuhtîr thei dâwn lo a nih hi," ka pain a tih chuan Taitea chuan,"A la hma alawm, tlangvàl kham hnâp hunah chauh nupui chu ka nei ang, ka kham loh chuan ka nupui kha ngaihzâwng dang ka neihsan thut thut thei asin," a lo ti thung a.



"Awi, zak teh!" ka lo ti țhat a.



"A la hma i tih zêl te chuan keini i nu nèn kan upa tawlh tawlh a, rei tak kan dampui hman loh che u phei chuan tu hmel hmu lovin kan liam daih mai dâwn asin," ka pa chuan a ti leh a.



"Ka pa, in dam reng ang chu, thih tum hma lutuk mah ta che u. Bawihtei pasal neih, fanu fapa duhawm tak tak a neih hunah pawh in pawm nasa ang chu, tiraw?" tiin min rawn siai a.



"Dik chiah. Chumi hmain Taitea'n nupui neiin fa duhawm tak tak a nei phawt ang a," ka tih chuan kan nui ta dar dar a.



Taitea hi zawng, ngaihzâwng bulfûk hi a nei ngai pawhin ka hre lo. Kan han dem ve a, an inngaizâwng emaw kan tih hian an lo inngaizâwng ngai si lo va, bialnu a nei lo nia kan hriat hian biak chu a nei ve țhìn tho bawk sia, hriat thiam a har.



School țan dâwn tĕah chauh ka chhuk. Motor ka rui deuh lehnghâl a, ka lu a ni lûk mai. Nizàn ka men rei deuh vàng a ni ngei ang, Mazualite'n min thlah a, mut hnuah lah ka phone ka bih rei mah mah bawk a.



Rinfela pawh ka hmu leh ta. Țhenawmte inah chuan a lo la thawk reng; mahse, a hmuh lai chuan hmu angin ka awm ngai lo, in chunga thaemhnaw pho seng pawh ka hreh ta hlur mai, min hmuh pawh ka duh tawh lo a ni ber.



Mahse, tlai khat chu nutei a hman loh avàng leh Rose-i a lo la haw loh bawk si avàngin in chungah chuan thawmhnaw pho chu ka han seng leh a, thenawmte in lama rawmawl vâr inpho chu ka titla palh ta hlauh mai.



Țhenawmte veranda bul chêtah a va tla zui. Va chhar ka va huphurh tak!



Ka va chhar ta poh. Min hmuh hlau taka ka va chhar dân dân lai chuan khawi lam ațanga ui nge ni, a rawn bauh thut mai a, ka phu nasa lutuk chu ka au tuarh mai!



Ka che sawn ngam tawh miah lo! Ka tha lah chu, a khùr zawih zawih mai.



In chhûng ațang chuan an rawn tlân chhuak ta nghál a, ui chu thlun sa a lo ni a, rawmawl chhara ka kún kha eng emaw thil tirù-ah min ngai a niang.



A neitupa ni ngei tùr chuan," A pawi ka ti hle mai, a hmuh ngai loh chu a bauh mai țhìn a, nula hmelțha tak pawh a lo bauh țhat duh mai ang tih kan lo hre lo a ni," nui deuh chung hian a ti a.



Ka tha khùr a la reh thei lo.



"Khiangawi..?" tiin Rinfela ngei mai chu a rawn țawng chhuak a, mak ti rilru deuh, tiril la khùr deuh dar dar chuan ka lo en a, ani lah chuan ui chauh chu a en a, ui lah chuan làwm tih hriat tak hian a mei a lo vai lauh lauh thung a.



Chu ui hming chu Khiangawia a ni maw? Tehrêng chuan leh! Ka nuih a tiza angreng khawp mai a, ka nui hak lo chauh tak tak a ni!



Ka kal sawn țan chiah tihah chuan," Hmeichheho chu bauh hrep hrep mah la, a pawi hauh lo aw," a la ti zui, ka hlauhzia kha hria se chuan chutiang chuan a ti hauh lo ang maw le!



Ka thin a tirim deuh thut.



Hawi lêtin," Ui fingin mi an bauh tuar tuar ngai ka hre lo, i la khawi fing lo deuh a nih kha, hmeichhia ni lovin mi sual bauh turin zirtîr țha leh rawh," ka va ti a.



Min rawn en ta chiah.



Kei pawhin ka lo melh khai mai a, chutah, inher hmakin kan inah chuan ka luhsan ta nghâl a.



Manner hre lo lutuk êm mai! Min vìnin min tizak hrep a, kei pawhin phubâ ka'n la ve hlak a nih kha. A inhre chhuak ram ram ang chu.



Zàna Ațana'n min rawn biak pawh ka lo hrilh ve a, mipa ngeiawm lutuk ni ve lo tùr chuan ka hrilh nghâl bawk a.



A nui hak hak a.



"A nih tak chu, ka vaawm ve châk tak! Chutiang mipa polite lo lutuk chu polite han zirtîr hlak a châkawm a nih chu maw le," a lo ti ve a.



"A ngeiawm thlâwt, ka hlau tih a hre ve reng si a," ka ti leh nang nang a.



Mahse, mut hmuna ka ngaihtuah chian chuan mãwl ka inti leh hnuhnawh. Lo chhâng lêt miah lo tùr hi ka ni a, ngeiawm viau mah se ka chhàn lêt chiah khân kei ngei pawh mi mâwl ka nih phah tlat a ni, lo ngawi mai mai zâwk ila aw...Anite chu inkhâwm pawh inkhâwm ngai lo, nu leh pa chawilen loh, zilh loh a ni si a, kei chu thu țha tinrêng dawng, inkhâwm pawh țhulh ngai lo leh mi fak ka nih ve kha, khâng zawng zawng kha, mi pakhatin min han dah 'zero' ta vek mai a nia.



Zia lo thei e.







* MI ȚAWNG DUH TAK AIIN MI NGAWICHAWI DEUH HIAN MI PAWI AN SAWI KHÂTIN AN HNAWKSAK LO ZÂWK BAWK*