☆24/7☆ - 6 By Dingdi Pachuau

☆24/7☆ - 6 By Dingdi Pachuau






Ina awm chânga țhenawmte veranda-a ui bauh ri ka hriat ringawt pawh chuan ka thin a rim deuh tlat zêl. A neitupa ngeiawm zet kha ka mitthlaah a lo lang nghál zêl bawk a, ka ner sawk ziah. A neitupa ngeiawm vàng hrim hrimin lung lian tâwka va vawm beleu țhawt ka châk! Kha pa kha ka tlu tùr min țanpuitu chu a ni; mahse, a awm dàn, țawngkam leh nungchang kha ka mil chi a ni thlâwt lo, ka hua, ka ngaihtuah chet chet hian ka haw nget nget.



Class kan kal țha a, kan zirlai pawh kan zir zo vek tawh a, en nawn char char a ni tawh. Promotion exam hmachhawn tùr kan ni a, question lah kan tifel vek tawh zui, naupangho thiam leh thiam loh hi ni tin kan test a ni deuh tawh mai.



Valentine's day hi ngaihzâwng nei ni mah ila engah vak ka ngai ve lo va, ni pângngai ang thoah ka ngai. Ațana erawhin a ngai thutak thei a, eng eng emaw min pe ziah a, Aizawla ka awm lai phei kha chuan chhùn lama a hman loh châng pawhin zàn lamah tal hun hman dun a phût țhìn, kumin pawh hi engtin tak hmang ang maw? A rawn hmang phei thei àwm si lo va, a buai ve khawp ang chu.



Kha maw, ka ring dik chiah. Min rawn call a, Ni 14 chungchâng chu a rawn sawi țan ta, kâr khat hun a la awm a, kei chuan tihngaihna ka hre lo. Hun hmang tùrin a bulah ka phei thei lo va, ani a rawn phei a nih ngawt loh chuan. Bâkah, ho ka ti viau mai si a, hna țhulh nâna hman chu ka duh bau lo bawk.



"Ngai thutak ve deuh la?" a rawn tih chuan," Ngaih thutak dàn vak ka hre lo a ni, ni tin mai hi ka tân chuan Valentine's day a ni asin, i tâna ka hmangaihnate hi ni tin a thar zêl a, ka ngaihlu êm êm bawk a ni. Ni tinin ka Valentine i ni alawm," ka ti duah a.



"Ka rawn phei dâwn em niang?" a tih chuan,"Hna i nei a, ho mai maia chàwl mai mai tùrin ka duh lo che tih pawh i hriat kha,kan inhmuh leh theih hmasak berah Valentine's day chu kan hmang zâwk dâwn nia, aw?" tiin ka thlêm ta zâwk. Rawn phei mah se, pateate an zahawm. Kan in tak tak chu ni se chuan a zia deuh ang a, an hriata tlangvâl chhuahpui chu ka duh fahran hauh lo.



"Ka ngaih ang che hian min ngai ve lo a ni tiraw?" a rawn ti leh a.



"Ngai lutuk che. Exam zawh hnu lamah rawn zin phei pawh ka tum alawm, ka ngaih vàng chein," tiin ka thlêm a.



Mahse, ka tum rilru tak tak alawm.



"Kan la sawi țha leh dâwn nia, inhnial nâna hman chu ka duh rih lo," a rawn ti leh a.



Ka ngaih dàn hi a țhing viau pawh a ni maithei. February ni 14 kher hi inhmangaihni kher atân chuan ka ui a, chu ai chuan ni tin mai hi inhmangaihni atân chuan hmang ila tih hi ka duh dàn a ni. Tûnlaiah chuan kan ngai urhsùn leh lutuk a, bialnu bialpate nèn hun hman dun ngei ngei tumin kan phe buai a, hun hman dun nân fianrial kan duh a, chu chuan thil țha tih lam aiin thil țhalo lamah kan rilru leh taksa a thunun a, a tàwpah mualphona, kan ngaihtuah duh loh buainaah min hnûk lût țhìn. Inngaizawng pahnih hian fianrial an ngainat lutuk chuan Pathian duh dàn aiin mihring duh dàn hi an zàwm zâwk fo a, vawi khat tihsualin vawi hnih a hring a, vawi hnih chuan vawi tam tak. Rilrua inthiam lohna a bo țhak thlengin fianrial an lo ngaina thei ta țhìn a ni.



Hetiang hi ka duh ve lo. Ka nu leh pate timualphotu nih ka hlau a, kei ka mualpho phawt chuan anni chu ka lei pathiante an nih miau avàngin an mualpho dâwn chiang sa a, mi fel tak ni lo mah ila an rilru tihahtuleh mualphona thlentu nih ka tum lo ve tawp mai.



Kan inbiak apiangin a rawn sawi chhuak zêl a, keiin Lungleia rawn phei tùrin ka duh si lo, ani lahin a rawn phei loh chuan kei Aizawla phei tùrin min ti ve bawk a, kan thu a inhmu thei meuh lo chu a ni.



A tàwpah chuan ka hnial hneh ta lo, amah rawn phei a tum ta a nih chu. A țha mai, inhnial reng ai chuan a hlimna a nih chuan a țha, kei pawhin ka hmu châk ve tho alawm.



A fuh lo ve êm bawk a ni, kumin chu Nilaini a ni țût a, chawlh theih loh zâwngin; mahse, amahin a huam miau a, a țha mai.



Mahse, mihring remruatna hi chu eng mah lo mai hi a lo nia, a hman dâwn ta lo, a hna lamah a ni àwm e. A lung a awi lo khawp mai a, ka khawngaih zâwk. Ka han hnèm ve ngial a, ani lah chuan," I duhthusàm a lo thleng a nih hi tiraw?" a rawn ti a.



"A, ni bîk lo ve. I rawn phei theih tâk lohah chuan thil ka pêk tùr che pawh ka rawn zin hunah ka rawn kensak mai ang che," ka ti a.



"Eng thil nge a?" a rawn tih chuan," A chi nâng, ka rawn zin hunah le," ka ti tlat a.



Ka mal ta viau mai. Rose-i erawh a nu leh pa hriatpuina thlapin Bsa'n a hruai chhuak ve! Mak ka ti zâwk a, a chhan chu pâwn lamah an va che khawlo ang chu ka ti miah lo, kohhranah an inhmang dùn si a, mi hmuh tam theih lohna lamah hun hmang se ka ti, chhuak dùn kher lo se, chhûngte hriatpui an ni tho si a te ka lo ti ve mai mai, hmingchhiatna hi ho tê a ni țhìn si a.



Patea chuan,"Hmun danga mi ngaihzâwng neih chu tûn ang hunah hian rualawh a na duh ngawt ang ka ti, Sangbawih," tiin min fiam a.



"Na êm êm chuang lo ve," tiin ka nui a, chutah," Rawn phei chu a tum ve a; mahse, an hna lamah an buai thut a, a rawn phei thei ta lo a ni," ka ti leh a.



"A fel khawp kha, hna nghet a nei tawh lehnghâl si a, pasal atân pawh a țha khawp ang," nutei chuan a lo ti ve a.



Room-a ka awm hnu chuan Ațana chu biak ka tum a; mahse, min chhâng thei lo, a ring ral țhak. Ka ti nawn leh a; mahse, a ngai tê tho.  Chutiang chuan vawi thum ka fail ta, ani hi a buai viau a niang, an buai tùr thu pawh a sawi kha. A phone a silent daih pawh a ni thei tho, a silent fo a nih kha. Tukin zîngah message min hnutchhiah tho kha maw, a buai viau a nih hi.



Tui vak lo chuan ka mu a, ka mumangah Rinfela ka lo hmu a, kan lo la inhau chiam zui, fuh lo lutuk! Ani ber kher kha chu mumanga hmuh pawh ka duh lo, a ngeiawm ropui mai si.



Chhùnah Ațana chuan min rawn bia a, nimin lam zan rei thlenga an buai thute chu a rawn sawi nghâl a. A aw chhuak pawh chu a dik chiah lovin ka hria, a chau viau a ni ngei ang.



Ka rin dàn a dik chiah a nih chu. Ka hre thiam lutuk, chutianga an buai rei lutuk erawh chu ka khawngaih khawp mai, inhmuh kan tum  ve tehlul nèn!



"Ka va khawngaih tak che! Ka bulah awm la chuan aw..." ka ti vang vang a.



"I aw ka hria a, ka zia tawh khawp mai. Rawn zin thuai thuai la ka ti hle a ni," a rawn ti a.



"Lo nghâk hrâm hrâm rawh. Thla khat bâk a ngai tawh lo a nia," ka ti ve a.



"Ka chàr bet nghal ang che, i haw tawh miah lo ang," a tih leh chuan ka nui var var a.



Min duh ve tak tak a ni. Vànnei hi ka inti alawm, mipa fel tak, hna țha tak neiin min han duh ve bur mai a ni si a, a hmel lah a vàntlâng pâwl ni phâk a la ni zui, vànnei tak ka ni.



Kawt lama ui bauh țhat țhat ri ka hriat chuan ka insehruh nasa mai. He ui hi ka haw hran lo, a neitupa hi a ngeiawm êm a ni. Rose-i țawng ri ka hre nghâl a, kawngkaah chuan ka va chhuak ve vat a.



Rose-i chuan ui chu a lo kai a, ui neitupa Ngeiawma chuan eng emaw ni hi chemkawmin a lo vaw chât chât a, ka va en hnaih deuh chuan tît lian zet hi a lo ni a.



"I ui chu a fing hle mai, ani chuan hmu lo se chuan in chhûngah a rawn lût maithei si a," tiin Rose-i chuan Rinfela ui chu a fak zauh a.



"Hmeichhia emaw a ti a niang," tiin min rawn en a, a hmela nuihzatna lo lang chu ka hmuh hmaih hauh lo, tuna a thil sawi pawh kha, ka melh rum leh țan tawh!



Maktih hmel deuh hian Rose-i chuan Rinfela chu a en a, chutah, ui chu en lehin," Khiangawia tih rêng rêng, i tikhawngaihthlâk e, hming mawi deuh tak phuahsak ve tùr a nia, a fel tehlul nèn," tiin Rose-i chuan ui chu a en vang vang a.



A chhâng ta lo.



In chhûnga kan luh hnu chuan Rose-i chuan,"Khiangawia han tih chuh, ani lah chuan lâwm deuhin, hming mawi lo deuh a phuahsak tih hre hauh lovin a mei lah chu a la vei tak ang tar tar a! A hmelțhat tehlul nèn, a tikhawngaihthlâk e, a fel si a," a ti leh a.



"Ka ngaina ve lo, vawi khat min bauh tawh a," ka lo ti thung a.



"Engtikah maw?"



Sawi chhuak miah lo tùr hi ka ni asin le.



Thil thleng kha ka hrilh ve thuak thuak a, ani chuan," A nih tak chu, a hlauhawm duh ngawt ang; mahse, a thlung tlat a, a hlauhawm dâwn hleinem," a ti a.



"Ngainat loh nâklaiin, keimah min bauh alawm, ka phu nasa êm êm lehnghâl! A neitupa lahin hmeichhia chu bauh zêl tùrin a la ti zui a, ka thin a tisa zak mai maw le, ka insûm hrâm hrâm zâwk a ni," ka ti a.



"A țawng ve kha mak ka lo ti zâwk asin, a țawng duh lo ve ropui mai si a," Rose-i'n a tih chuan," Chimawm leh ngeiawm taka țawng a thiam ëm mai. Vawi khat pawh ka tlu tùr min rawn țanpui a, làwmthu ka hrilh țumin min vìn lêt nia maw le, he pa hi chu ka ngaina lo ve chiang a ni," ka ti bal bal a.



"E, chutiang chuan in lo awm tawh a ni maw?" ti hluaiin min rawn en a, min en chîk lutuk chuan min ti-awm nuam lo.



"Làwmthu ka sawi ka inchhìr ber țum a ni hial ang chu!"



Inrinniah ka chhuak lawk a, Pateate pawh damdawi inah mi  kanin an chhuak a, Rose-i erawh inah a awm ve thung.



Ka nute'n thil min rawn thawn ka lam hnu chuan chhùna thingpui hmeh tùr leiin ka pêng leh lawk a, chumi hnuah chuan ka haw ve ta nghâl a.



In bul ka thlen chuan Rose-i chuan Khiangawia kha a lo infiampui niin, an lo inûm kawi nasa mai a, ka bulah pawh an rawn tlân. Hmel thar na na na chu ui chuan chîk deuh nghur nghurin min rawn zuan ta.



Uiin min rawn zuan chuan ka țê leh tuarh mai a, ka mawng sawh dawtin ka la tlu zui, ka hlau bawk si, ani lahin min kiansan ahnêkin min la rawn liak zui, ka hlau lutuk chu ka  țê ruai ruai mai.



Ui chu tuin emaw ni a rawn man bet a, eng emaw a sawi pah bawk. Ka maimichhîng tlat a, ka hmu thei lo, ka khùr nasa, ka mittui pawh atla hialin ka hria.



Rose-i'n min rawn kai tho a, ka bag ah a rawn chhar bawk a.



"Ka thiam loh a ni, i lamah karawn tlânpui kher a," tiin ngaihdam chu min dîl nghâl mawlh mawlh a.



Eng mah sawi lovin inah chuan hmanhmawh zetin  ka lût a, ka thawmhnaw pawh ka bêng fai lo. Ka thâ chu a la khùr nasa mai a, chair lo awm hmasa berah chuan ka țhu hnawk a.



A hnu daihah chuan Rose-i chu a rawn lût ve a, inthiam loh hmel deuh hian,"Tihpalh lutuk. Rinfela pawhin Khiangawia chu a rawn hruai tawh loh tùr thu a sawi a," a rawn ti lût malh malh a.



"Ka hlauhzia kha, min seh dâwn ta emaw ka ti hman alawm," chhûngril lama la khùr dar dar chung chuan ka ti a.



Ka mawng ka sawh na lutuk lo hlauh e. A na lam ai mah chuan ka hlauhna kha tawrh a hrehawm zâwk ka ti, Rinfela chuan a thu sawi chu hlen ngei teh se, ui hi zawng, an ngainatawm loh êm mai.



Tlai khat school ațanga ka haw chu ka hnung lamah hian min zuitu an awm tlata hriatna ka nei a, ka hawi lêt a, ka hnunga kal chu an awm ngei alawm; mahse, min enthla rengtu awm angin ka ngai tlat a, nuam lo tihna ka nei tlat a nih chu.



A hnua ka hawi lêt leh chuan Rinfela  ka hmu ta, hei hi a lo nih chiah dâwn hi, min zuitu awm ang tlata ka hriatna kha. Vawiin chu hna a thawk lo a ni ngei ang, hna thawh kawr a ha lo tlat.



Chak zetin ka kal a, ka pên rang khawp mai. Kan inkâr chu ka teh ru deuh reng a, min rawn ûm pha tùrin ka duh lo, ka kal chak lutuk avàng chuan thlan tla hluamin inah ka lût a, in ka thlen hnua ka ngaihtuah lêt chuan ka nuih a za deuh tlat a nih chu.



Engati nge min rawn ûm phâk ka hlauh êm êm ni? Min nuihzat ka hlau em ni? Nge min biak ka hlau zâwk? Nge a mit meng, mi hìpna ngah zeta min en kha ka duh lo?



Ka thil ngaihtuah ho zet avàng chuan lu thing mãt mãtin bathroom-ah chuan ka lût ta nghâl a.



Naupangho pawh an exam zo dâwn ta, ni khat chiah a ngai tawh e. Ațana ka hmu thuai thei tawh dâwn e.



Min rawn be khât ta deuh tih ka ngaihtuah chhuak thut. Kei chu ka buai ve lutuk a, naupangho answer paper check uluk ngai nèn, tûnlai tak hian ka be khât, ani pawhin chutiang bawkin.



Ka phone chu tuai nauh nauhin a number chu ka hmet chhuak ta nge nge.



A aw chu dang deuha ka hriat avàngin thil awmzia ka zâwt a, ani chuan a nawmsam loh thuin min chhâng a, engtikah nge Aizawl ka phei dâwn tih min zâwt pah bawk a.



"A va pawi ve aw...Chuvàng a nih chu i reh ka tih, kei lah answer paper check-in ka buai ve êm êm a. Ka rawn phei thuai ang, ka rawn phei theih hma chu ka rawn be hmasa ziah tawh ang che," ka ti a.



"Rawn phei thuai thuai rawh aw, hmuh che ka châk tawh a nia," a rawn ti a.



A nuamsam si lo va, min thlahlel tawh ngawt ang chu. Phei thuai min tinghâkhlel zo vek ka ti, ka phei theih meuh chuan ani pawh a lo dam țha hman tawh ang a, hlim takin tu dang ngai lovin kan inawm thei tawh ang chu.



*******



"Hmeichhia an nih kha, hmeichhia tawh phawt chu an inang vek. Eng mah an ni lo."



Chu thu sawitu chu ka en nghâl vat a, mi dang pawh chuan maktih hmel tak hian an en ve tho.



"I țawng ve thei elo?" tiin an zînga pakhat chuan nui chung hian a pan phei a.



Kan fellowship kal tùr chu a hmaa an lo awmna ngaiah bawk khân an lo awm a, Rose-i nèna kan kal chu min lo bia a, țha taka chhângin fellowship ve tùr chuan kan sâwm leh a, chutih lai chuan he pa hi a rawn țawng chhuak a ni.



"Engti tiha chu thu chu rawn sawi chhuak nawlh nge i nih a?" tiin an zînga fel ber ka ti mai, min lo be bertu chuan a ti a.



Ani lah chu a ngawi leh tlat tawh. Hmun dang daih a en zui. A rui a ni maithei; mahse, ruih nei hmel chu an pu chuan ka hre lo.



"A țawng ngai lo ber lah chuan a rawn sawi dik phian mai lehnghâl a," tiin pakhat chu a nui leh vur vur a.



"Kan hnungah lo kal leh mai r'u aw, kan han kal hmasa ang e," tiin Rose-i chuan a han melh kual a, chutah, min rawn enin kan kal țan ta nghâl a.



"Aw le, kan lo zui ang che u," an la rawn ti zui ve hrâm. Hrâm hrâm tak chuan, min rawn zui dâwn lo tih lah kan hre chiang mai si a, țhenkhat hi chu an țawngkam hi a țha teh tak e, țhian inkàwm țheuh țheuh, an inang lo thei hlawm khawp mai.



A tûka school ka kal tùr in ațanga ka chhuak chiah chu,"Lo ding teh," tia min bia an awm avàng chuan ka ding chat a.



"Khiangawia khân a tihlau si che a," tiin pawisa hi a rawn phawrh chhuak a, ka lama a rawn ban phei chu makti rilru tak hian ka lo en ringawt a!



"Kha," tiin ka kutah chuan a rawn hmeh bel a.



Ka kut chu ka la sawn vat a, ka ding sawn nghâl bawk.



"Eng atân nge min pêk i tum a?" ka tih chuan,"La rawh," a ti leh sup ringawt a.



"Ka duh lo."



"Țang der lo mai rawh," a rawn tih chuan chiang zeta a mita enin," Mi pawisa a thlàwna lâksak ka chîng lo ve," ka ti ve ngat mai a, a rawn țawng dàn kher kher kha ka ngei lutuk, ka thinrim loh nân a rûkin thâwk ka la ham ham.



"Lemchan kher a ngai lo."



Min tithinrim leh tak tak dâwn ta.



"I pawisa kha ka mamawh lo ve!" He pa hian min va tithinrim thei tak! A thil sawi ho tê pawh hian min tithinrim êm êm zêl chu a nih hi.



"I thinchhe reuh ngawt mai! Mi bulah chuan țha ber leh zaidam ber angin i lang a, ringtu țha ber angin, i lemchanna vek a nih kha. Lemchan thiam lutuk mai!" min ti leh ta nek mai a nih chu.



Rum zet hian ka melh phawt a, chhàn tuma ka àn zuau lai chuan,"Hmeichhia phei hi chu rinna chhe tê mah ka nei lo che u, a der mai in nih hi, a der vek!" a lo ti leh a.



Ka chhâng ta lo, min tithinrim hneh lutuk a, ka chhàn lêt zawngin, katân a zahthlâk, mi dangin an lo hriat palh phei chuan ...







* MI I TEH I TEH A, I TEHNA A SÂNG SI, I TEH TLING THEI LO. MI DANG PAWHIN I TEHNA NGAI BAWK HMANG KHÂN AN RAWN TEH VE CHE, AN TEH TLING BÍK CHEIN I RING EM? 🤔