☆24/7☆ - 7 By Dingdi Pachuau

☆24/7☆ - 7 By Dingdi Pachuau





Nilêngin ka thinrim deuh țún ringawt nia! A ui ka hlauh avànga pawisa min pêk a tum ringawt kha ka hre thiam thei deuh hlek a, a ngaih dànin țûl a ti a ni ve mai; mahse, a țawngkam chhuak ngeiawm lehpek zet kha chu, ka hre thiam hlawl lo, ni lo, ka hre thiam lo pawh a ni lo, ka thin a tirim a ni zâwk. Ka ngaihtuah lêt leh pawhin ka thin a la rim zêl, engtin nge khatiang khán min țawng khum theih ni? Ni leh lo, engtin nge min țawng khum ngam zâwk?



Mi sual tak, țawngkam chhe tak, thil rûk hrât, zu ruih chîng leh mi nuihzat chîng a lo nih dâwn chiah hi. A țawngkam a chhiat chuan a rilru pawh a chhe tel sa, a ngeiawm thiam bawk si, mi pawi chu a sawi nasa ve țhìn khawp dâwn a lo nih hi. Tlangvâl chu ni ila chuan ka hnek châk tùr chi tak a ni, a inlâk ngèn hmel bawk si.



Hmm, ngaihtuah loh tum tawh teh ang, ka rilru a tihrisêl lo dâwn tlat. Zàwi muangin ka boruak ka hîp lût vang vang a, muangchâng bawkin ka thaw chhuak leh a, chutianga ka tih hnu chuan ka zia ta deuh e.



Naupangin exam an zo ta, tunah chuan ka rilru pawh ka tithawveng ve thei tawh alawm. Aizawlah ka phei ang a, Ngeiawma min țawng khum dàn zawng zawng theihnghilh țhakin nun va chèn teh ang.



In ka thlen chuan mak tak maiin Rose-i a lo awm tawh, min thlen khalh ve tihna a nih chu. Pateate erawh an lo awm lo thung, thil mak a thleng a ni hawt alawm le!



"Engtizia nge a?" ka ti ringawt nghe nghe a.



"Chawhnu lam chu inneihna lama kal tùr a nia; mahse, ka peih ve ta lo va, chhuanlam ka siam ta mai," a lo ti mai a.



"A nih tak chu," tiin room-ah ka luhsan a, thawmhnawte thlâka ka inphih fai hnuah ka chhuak ta chauh.



"Hei, i ta tùr," tiin chêng 500 hi a rawn phawrh chhuak a.



"Eww...! Ka va luck! Khawia mi nge a? A thlawna pawisa dawn chu a va nuam dâwn ve!" tiin nui chung hian ka en a.



"Rinfela'n lo pe tùr chein min chah a, ka hre thiam bîk chiah lo. I pawisa i lo pûktîr em ni a?" a ti ta heu mai!



Chu pa han over-zia chuh!!



"Teuh lo mai!" ka ti phawt a, chutah, ngaihtuah chhuah neiin," Khawi maw," tiin pawisa chu ka lâksak a, in ațang chuan ka tlân chhuak ta nghâl a.



Țhenawmte in saknaah chuan ka va lût a, a lo awm ngei e. Bang a lo plaster mawlh mawlh a, mi dang awm vete pawh ngaihven lo chuan ka va pan nghâl chat a.



"Kha," tiin pawisa chu a kawr hma ipteah chuan ka va dah lût nghâl a, ani lah chu, chutia ka va che thut chu a lo hamhaih deuh nge ni, chechàng lo chuan a ding ringawt a.



Chutah, rawn inherin min rawn en ta a. Kei pawhin lo en vein," Ka duh lo ka tih kha, rawn ti tawh suh ang che," tiin ka inher nghat a, ka chhuahsan leh ta nghâl a.



Mak chu min ti ve maithei a ni. Ka râpthlâk hmel viau ang em? Mi dang kha ka lo ngaihven hlawm miah lo mai a, min lo hmu hlawm a nih chuan thil an hre thiam lo ve hlawm ngawt ang chu.



Amah rêng rêng pawh, khatia a hamhaih ve kha ka tân chuan a tihchi thlâwt. Min nuihzat lo va, min vìn hek lo a nih kha, ka tihamhaih ve miau alawm le.



Ka nui hmãn hmãn a.



"Eng thil nge i va tih a?!!"



Rose-i chuan chîk zetin min lo en reng niin, a kut chu a kuangkuah thân mai a, a tak rama ka chèn tâkah chuan ka nui hmel pawh a reh ta riai riai a.



"Pawisa ka pe lêt maw le," ka ti mai a.



"Nangni pahnih hi," tiin a hma aia chîk lehzual hian min en a, chutah, lu thing deuh nakin," A nih loh hrâm ka beisei," a ti leh a.



"Eng maw?" ka lo ti a.



"In inkârah hian eng emaw a awm a ni lo maw?" a tih chiah chuan ring zet hian ka nui chhuak hawk a.



"Eng a?!! Ani nèn..." tiin awih lo zet hian ka nui hak phawt l a," Teuh lo râpthlâk lutuk! Ka huat mah nâklaia! Sawi tawh rêng rêng suh," ka ti nghâl hmawk hmawk a.



"Ni lo, eng emaw chu a awm ang. Ani, hmeichhia tawh phawt be ngai lo leh mi țawng tlêm lutukin heti tak hian a tithinrim thei che a nih chuan a duh ru che a ni chiang ang," a ti leh a.



"Khai, Lalpa, ngaidam teh!" tiin ka kut chu ka phar a,"Awmzia a awm lo, sawi tawh lo teh ang," fiah kêk kâwk hian ka ti leh a, chu pawh duh tâwk lo chuan muang ban deuh charh, fiah thei tùr ang ber hian,"Ani nèn hian inzàwlna pakhat mah ka nei lo, a chanchin pawh hi sawi ka duh tawh lo," ka ti leh hmak a.



Ani pawh chuan zaizir hian a hmui chu 'Ka sawi tawh lo ang' tih nân a kut chuan a zip phei ta nghâl a.



Mut hmunah erawh ka ngaihtuah lêt chuan ka chêt dàn kha ka inchhîr leh hnuhnawh deuh. Ani kha chu a chêt dàn ang ang pawh khân lo che mah se, keimah zâwk kha insûma ka awm dàn tidanglam miah lo tùr ka ni asin le. Engati nge ka insùm theih loh ziah ni? Nula pângngai ve tak ka nihna kha ka hloh ziah. Engati nge he pa bulah kher hian pângngai takin ka awm theih loh? Min tithinrim hma thei hle a, insùm theihna ka nei dêr bawk si lo. Ka awm dàn chu ka chhûngte'n hre phei se, mak min ti àwm mang e.



Zilh lo fa ang mai ka ni, khatiang khân ka lo râpthlâk thei ang tih zaninah chauh hian ka ngaihtuah chhuak thei nia. A dik lo, ka tidik lo a ni, dawh hrâm hrâma zaidam taka chhâng tùr ka ni asin, hei hi ka tân fiahna a ni lo ang tih tuin nge hria?



Ka rilru chuan ka infuih ta mawlh mawlh. Ka sim tawh ang, ka ti tawh hauh tùr a ni lo. Fiahna tam tak hmachhawn tùr hi kan nei țhìn rêng asin, chu chu engtik hunah nge kan tawn ang tih kan hre si lo.



Mahse, ani rêng rêng pawh kha, hmeichhia be khât ti viau si, engah nge min biak tlat țhin si le? Min biak apiangin min la tithinrim ziah zui. Rose-i sawi ang deuh khân min lo duh ru reng em ni zâwk?



Ka lu ka thing nasa lutuk. Ni hlawl lo ve, thil àwm lo lutuk leh thil ni ngai lo tùr hi ka ngaihtuah lo ang, nuihzatthlâk lutuk!


*******



Naupang paper ka en zo diam tawh a, an tițha thawkhat viau e. Kan inhrual nasain kan en nawn zing a, kan test zing bawk nèn, tiţha tùr chu an ni hlawm rêng a ni.



Naupang result chhuahni chuan Aizawl pheina tùr sumo ticket ka la nghâl a, ka duh lai tak seat pawh ka chang var var e. Ka ruih ve zauh țhin avàngin YMA seat hi chu ka duh thei ngai lo, chhuk ve ngai miah lova țhut chawrh chawrh theihna, a hnung ber seat hi ka duh țhìn.



Ka haw lam step-a ka kal lai chuan a hmaa ka hmuh tawh putar bawk kha ka hmu leh a, ka hriat theihna chhan pawh a thawmhnaw ngai kha a lo ha leh a, a sam țuak vâr tawh pawh a lo la ngai vek, tûn țuma a thil khai erawh ka hre thei ta thung. Alu kg 3 vêl tùr leh damdawi búr hi polythene-ah a khai a, fîmkhur zet chuan step-ah chuan a chhuk thla chhut chhut a.



A bul ka thlen rual chuan ka khaisak leh a, ani pawh a nui ve var var tawh. Min hriat vàng a nih kher chu ka ring lo va, khai chhâwk a nih vàng a nih ka ring ber.



Kan inbe lêm lo, a beng kha a ngawng ve tawh si a, ka titipui peih lo a ni. A țawng hriat a har ve pah tho bawk si a, titi paha kan kal zawngin kan kal rei lutuk palh ang.



An in bulah chuan ka thil khai chu ka pe a, nui var var hian," Ka lâwm lutuk. Lo lût ve rih la, thingpui lo in ta che,"tiin min sâwm ve ta.



Nuih lêt pah chuan a mi taka enin," Ka in tlukin ka lâwm e, ka kal leh zâwk mai ang," tiin a hriat theih ngei tùra hmui phun uluk chuan ka ti sap a.



"Nula fel tak i ni tiraw? Fel zual zêl rawh, i nu lrh pate'n an chhusng ngawt ang che," a rawn ti leh boh a.



Min fakna avàng chuan ka hlim ru viau mai, sawisèlna ai chuan fakna thu hriat hi chuan thinlung chu a lo hneh zâwk deuh chu a ni.



Kal tùra ka inher tùr chiah tihah chuan kawngka a rawn inhawng a, mi an awm lo emaw ka tih, chutia a rawn inhawng ta chu ka hawi lêt a.



Rinfela nèn chuan kan inen ta ràn mai.



Hei hi an in tihna a ni ngei ang, chuan, putar hi a pa a ni bawk ang a, chuti a nih chuan Pu Sawma, Rose-i'n a sawi ve ziah kha a nih dâwn hi.



"Lo lût rih la, thingpui chu in la?"



Pu Sawma țawng chuan min tiharh zawk mai. En vatin ka nuih pah sak a.



"Ni dangah le, tunah chuan a tlai tawh êm mai," ka ti leh a.



"A nih leh le, nula fel tak i ni, chaw ei tui le," tiin a rawn țawng chhuak leh a.



"Chaw ei tui ule," tiin ka inher ve ta nghâl a.



Vawiin chu țhenawmte inah a rawn thawk lo tihna a ni phawt mai, eng vàng tak ni ang maw? A damlo deuh te hi a ni lo maw?A pa pawhin damdawi a khai haw tel kha. Rose-i thil sawi ka ngaihtuah chhuak zawk mai.



"Nangni pahnih hi..."



Ni lul lo ve! Teuh lo lutuk. 'Nahiiii' a ni mai. Ka ngaihtuahnaa ka thil ngaihtuah țhin hi ka va duh lo thei tak!


*******


Aizawl boruak ka han hîp leh thei chu nuam ka ti kher mai. Ka awm rei ve êm a, nuamti tùr leh a zùna uai tùr khawp zeta reiin ka va awm ve tlat tawh miau a ni.



Ațana nèn pawh kan boruak a țha. Ka thil pêk tùr ka ken phei chu hlim takin ka pe a, ani pawhin min pêk tùra a lo lei diam chu min pe ve bawk. Min ngai a, kei pawhin ka ngai a, thil thar tehchiam a awm lo. A hman hunah kan inzui chhuak a, ka duhna hmun min zâwtin kan lêng kual țhin. Ka tân hi chuan mipa țha tàwp chu a ni, min zah der thiam a, chutin kei pawhin ka dah sâng a, eng emaw a duh zâwng a sawi chuan  kei pawhin a duh ang chu ka tihpui mai a, thil țha lo lamah ni lovin. Ka hlim a, ani pawh a hlim chuan ka hria, hlim lo se chuan a hmel leh chezia ațangin a hriat ngei ang chu. Ngeiawma pawh ka va hre chhuak miah lo, hrechhuak lo tùr khawpin min tihlim tihna a ningei ang.



Ka haw tùr pawh min thlah leh thlap. Mipa fel dik tak hi chu a ni, hei ai bâka fel dàn tùr hi a awm chuang ka ti lo.



Ka haw chu Lungleiah zan khat ka riak a, a tûkah ka haw nghâl. Ka chhûngte pawhin min lo làwm thiam leh khawp mai, ka pa hmel hmuh a nuam zual ber.



Ka haw zànah chhûngte an rawn lêng khâwm ve țak țak a, nutei pawh naute nèn an rawn lêng. Naute pawh a lo lian tawh lutuk  ringawt, hmuh loh kârin a lo țhang chak khawp mai.



Ațana ka va text a, min rawn chhâng lo. A buai lehpek rih a niang, a buai lai a nih hi chuan ka inthlahrung țhìn, nakinah, naktúkah emaw min rawn chhâng mai ang.



Ka mumangah Rinfela ka lo hmu a, a hmel erawh a lo dang daih! A lu buk lek lek kha a lo mêt fai viau mai a, a thawmhnaw hrim hrim pawh a dangin a hnathawh thawmhnaw ang ngawt kha chu a lo ha bîk lo. Chutah, kan hmuh reng lai chuan Ațana-ah a rawn chang ta daih mai a, makti deuhin ka en reng a.



Min rawn nuih var var pahin," Inneihna hmunah lo hruai che ka tum tawh asin, i hman tawh chuan kal ila?" a rawn ti a.



"Tute inneihnaah maw?" ka ti há a.



"I hre tawh nange? Kan inneih dáwn kha, i inthuamna kha han en la?" hlim hmel zet hian a ti leh a.



Ka han inen chuan mo thuam dik tak ka lo inbel reng niin, ka thawmhnaw lah chu, a mawi dàn ka sawi thiam lo,  ka lo inhmeh êm êm zui.



"I mawi takzet! Mo hmelțha ber leh mawi ber i ni, kal tawh ang le."



A hlim hmel chu hmuh a nuam takzet. Ka kutah rawn chelhin min kai a, inneihna hmun lam chu hlim nui var var chungin kan pan dùn a.



Ka harh chhuah thleng pawhin ka lo la nui nia maw le! Ka va kham lo tak êm! Khatiang mumang hlimawm kha chu zan tin mang reng ila ka ti mang e!



Ka tidik tak tak, zînga ka thawha ka phone ka en chuan message a lo awm vàng tawh. Min 'good morning'-na leh nizan lama hna lama an buai deuh thu min rawn thawn a lo ni.



Fel thlap thlap asin, ka ngaihtuah tih a hriat avàngin min rawn ngaihtuah lêt ta țhìn a, a rawn insawi fiah thlap zêl. Rinhlelh lam ni lovin thu dik a rawn thlen thlap zél.



Thla khat zén záwn kan khuaa ka awm hnu chuan Lunglei lamah ka chhuk leh ta. School kan țan leh mai dâwn, ka duh duhnaah ka kal leh thei dâwn tawh lo tihna.



Mahse, ka hna thawh hi ka ning lutuk hran miah lo nia. Naupangte hnêna thiamna pêk chhuah chu nuam ka ti ve tlat, naupang sual leh tihmawh tak ka la hrawn loh vàng pawh a ni mahna le.



Zan khat Ațana ka va bia chu, hmeichhiain min lo chhâng hmasa ta zâwk a.



Makti deuh tak hian," Ațana ka be duh a, a biak theih ang em?" ka ti a.



"Aw, ka'n ko ang e," a ti a, a reh deuh ta vang vang.



Tu nge ni ang? A u a ni thei mai ang em? U hmeichhia, senior ve deuh tawh chu a neih ngei kha, a nih loh pawhin tu emaw a țhian hnai pawh a ni maithei, chutia a phone lo chhànsak nalh theitu chu a lamhnai tu emaw tak a niang.



A reh rei angreng si a, ani hi a lo buai lai a ni thei mai lo'ng maw? Nichina hmeichhia pawh kha a thawhpuinu a ni ngei ngei ang.


Va fuh lo tak!



"Hello?"



Ka thaw huai.



"I buai lai a ni em? Nge ka rawn tibuai che?" inthiam lo rilru deuh tak chuan ka ti a.



"Buai hran lo ve."



"I reh rei sia, i buai lai a nih ka ring a. A nih leh, nichina min lo chhângtu kha i u kha em ni?" ka tih chuan,"A nih kha, bathroom-a ka luh lawk hlàn a nia," a rawn ti leh a, a rawn thaw ham ham a.



"In buai lai a nih loh chuan ațha a nih chu," ka ti a.



"Thil sawi fel tùr a awm a, nakinah ka hrilh ang che."



Chutih lai tak chuan,"Inbe zo thuai teh u, thil sawi fel..." hmeichhe aw ri ngei chuan a tih chu ka hria a, a sawi erawh ka hre chhunzawm thei lo.



"Ka tibuai rih che u niin ka hria, nakinah ka rawn be țha zâwk ang che."



Ka dah ta vat. An chhûngkua pawh an buai lai tak a lo ni ve thei a, thil sawi fel tùr an nei a ni ngei ang.



Hman zàna ka mumang kha ka ngaihtuah chhuak zawk a, thil min hrilh tùr a la nei zui. Khalam chanchin kha a ni thei mai ang em?



Ni hlauh se aw...



A tûka in chunga ka thawmhnaw sûk han zâr chhuak chuan Rinfela'n țhenawmte tukverh ațanga min lo thlîr reng chu ka zuk hmu fuh ta thut a.



Hnai tê ni lo mah se kan inhmu chiang khawp tho mai. Rose-i thil sawi kha ka hre chhuak leh zawk a, rang takin ka hawi sawn ta nghâl.



A ni thei teuh lo. Kei pawhin ngaihzâwng ka nei ve reng alawm, bâkah, tlangval a nia, nula ka nia, tlangvalin nula a thlîr a ni mai a, thil 'eng emaw' a awm hauh lo.



Keima lamah pawh a awm lo. Huat loh hrâm hrâm ka tum tawh zâwk a nih hi.






*INLAICHÌNNAIN  MI ȚHA ZÂWKAH A SIAM LO CHE A NIH CHUAN,  KAWPPUI  DIK LO I KAWP TIHNA*




Thil man tlâwm, țha si, mawi si i duh chuan


https://chat.whatsapp.com/DXMsyQQZ3Lp2ASRh50UCed

hi lo join teh, i inchhîrin ka ring lo🤗