☆24/7☆ - 9 By Dingdi Pachuau

☆24/7☆ - 9 By Dingdi Pachuau





Ka taksa a chau tawngkhawng viau a lo ni. Zànah ka muhìl thei si lo va, ka taksa chakna tùrin eng tham mah ka kaah a lút thei lo bawk nèn, ka taksa chuan a tuar lo thei lo a ni.



Rose-i au țhawt ri hriain țhenawmte in saa thawkte chu an rawn tlân phei a, min rawn pawmin in chhûngah min pawm lût, min pawm lûttu pawh Rinfela a lo nia. Hei hi ka țhat deuh hnua ka hriat a ni. Rose-i'n min ngaihtuah êm êm a, ka ei theih tùr leh ei tùr țha deuh deuh min leisak a, min fuih reng bawk, a laka ka inthlahrun vàng hrim hrimin ka ei lui ve hrâm hrâm a ni, chuti chung pawh chuan ka ei tam lo kher mai.



Engati nge ka nêp êm êm le? Mipa pakhat ve mai vàngin hetiang hian ka awm thei a ni si a, ka chunga rinawm lo zo lo na na na, engati nge amah vànga hetianga ka nat duh? Ka tawn ang hi mi pawhin an tawng ve tawh tho ang a, kei ang hi an ni ve tho ang em?



"Ka nêp tiraw?" tiin Rose-i chu ka en a.



"Nêp lo ve. A sârhu lai a nih vàng a nih hi, nakînah chuan amah avànga tuna i awm dàn ang hian awm pawh tum leh mah la, i thei tawh miah lo ang. Hun hian mi a hnèm țhin a, Ațana hun pawh a her liampui thuai mai ang, i nêp vàng a ni lo, mihring i nih vàng a nih kha," a lo ti thung a.



A na ve êm bawk a ni. Palai hial a rawn tîr tawh a nia, kei lahin kan inneih loh rêng rêng ka ring lo a nih kha. Vawi khat lek chêtsual pawh hian pawi hi a lo va khawih nasa thei tak êm!



Dam na na na chuan hun chu a lo ral ve zêl a, tunah chuan ka pângngai ve ta viau, kan khuaah erawh ka haw ta rih lo. Ka pate pawhin min rawn ngaihtuah ve viau țhin a, ani phei chuan vawi thum lai min rawn kan leh tawh a ni, min ngaihtuah ve thei êm asin.



Ațana chuan ngaihdam min rawn dîl țhin a, kei erawh chuan ka chhâng ngai lêm lo va. A chhan chu a fa paitu Lawmsangi kha nei se ka ti, kan innei thei lo ta sa sa, innei se, an fa lo piang tùr pawh a fahrah lo ang.



Chutiang chuan phone-a a u hmeichhiain min rawn biakin ka hrilh ve hmiah. Ka lo inrawlhna tùr chu a awm miah lo, lo sawi ve tùr lah ka ni hek lo; mahse, an fa lo piang tùr chu fahrah ni lo se ka tihpui ve tawp.



Ațana lah chuan neih a tum lo nasa a ni àwm e. Vawi khat chauh  a mutpui a nia, a fa pai mah se, a hmangaih loh miau avàngin neih a tum lo ni àwm a ni.



Mipa, mahni thil tihsuala mawhphurhna pawh la duh lo khawpa dâwihzep maw a lo nih a? Hm, a duh duh dànin a awm thei alawm, a nun a nia, ka nun a ni lo ve.



*******



"I țha zêl em?"



Min rawn betu chu hriat tumin ka en chho  a, chutah, hawi sawn leh nghâlin," Aw, țha e," ka ti sap ringawt a.



A ngawi leh ta daih si a, biak dàn tùr ka hre mai lo. Làwmthu hrilh lah kha a duh lo ropui bawk si a, hrilh leh tum pawh chu ka ngam tawh rih lo, a zahthlâk duh êm mai. Làwmthu sawi e ti lovin thin a rim leh țún palh ang.



"Làwmthu hrilh che ka tum lo ting tang mai ang e," ka ti a.



"A țha," a lo ti sup ringawt a.



Chutah, en chho lehin," I pa eng nge a an?" ka ti leh a, min rawn en vat a.



Min chhâng lawk lo chuan min en deuh reng a, tlêmin ka ngaih a tițha lo deuh hman. A pa kha a tar ve deuh tawh si a, ani hi a lo damlo reng pawh a ni thei si a, ka lo zâwt kher chu ka inchhîr hman hial a ni.



"A țha," a ti leh sup a, chutah,"I chhúngte an awm em?" a rawn tih zawm zat a.



"Aw, lo kal rawh," tiin ka țhutna ațang chuan ka tho a, in chhúngah chuan ka lût ta nghâl a.



Patea'n a lo lût a lo hmuh chuan a lo beisei tawh reng zâwk a ni ngei ang," E, i lo kal thei maw? Lo kal la, en chhin nghâl mai la tiraw? Sangbawih, nang nula felah, thingpui hâng no hnih kha min lo thlitsak la aw?" a ti zat a. Kan in thlang lama kawngkaah chuan an inzui chhuak ta nghâl a.



Thingpui chu flask ațang chuan ka thli chhuak a, chutih pah chuan ami chhàn dàn bung zet zet kha ka ngaihtuah leh a, tunah hi chuan amah ngei deuhna rilru kha ka pu ta rih lo, chutiang rilru pu tùrin ka la chak tâwk lo a ni mahna, ka ngaithla liam ve mai mai rih chu a nih àwm hi.



An rawn luh har phian avàng chuan an awmna hmunah chuan ka va kal chilh a, lung rem tùrin an lo insâwm a ni ngei ang, an lo thlêk dùn nasa ngang mai.



"Pate, thingpui chu?"



An rawn hawi rual a, patea chuan," A ni tak! Kan lo sawi tui deuh a ni maw?" nui chung hian a lo ti a.



"In rawn lût mai dâwn emaw ka lo ti a," ka tih chuan patea chuan," Nia, ka lo țawng tui deuh a ni," tiin Rinfela lam hawi pah hian," In chhûngah in ang aw, pâwna in chu a hahdam lo êm mai," a ti leh a.



Eirawng bâwlin alu kan tùr ka chan malh malh a, choka lam hi room hran a nih vàngin an thu sawi ka hre pha lo va, ka hmu thei hek lo.



Kawngka a rawn ri rak a, Rose-i a lo ni a.



"Eng nge a rawn tih a?" a rawn tih sar sar chuan," Tu maw?" ka lo ti hû a.



"Rinfela maw le, a rawn lèn chhan àwm ka rin hriat ruak nain-" tiin sawi zawm duh lo chuan a nui a.



"Lung rem turin patea khân a ruai dâwn a niang," ka lo ti mai a.



"Tak tak?"



"I duh leh va zâwt la, ka ngaihven hran lo," ka ti leh a.



"Ka va zâwt tak tak teh ang, i chanchin ngaichanga lo kal a nih ka la ring tel tho ania," tiin a mit chu a siai sak a, a chhuak zui ta nghâl a.



Nichîna ka țha zêl em tih min zawh chhan kha chu ka tlu, in chhûnga min pawm lûttu  a nih vàng mai a ni. Eng thil dang mah a awm lo, mi ang pângngai a ni ve a, min zâwt ve satliah mai a ni. Engah nge ka chanchin ngaihven tùrin a lo kal ngawt ang? Inhre țha pawh kan ni lo, kan inhmuh apiang deuhthawin kan la inchhâng deuh ziah zui.



Zànah Ațana'n min rawn text a; mahse, ka chhiar lo, ka chhiarsak ngai mang lo.  A number hi ka block mai dâwn em niang tih chu ka ngaihtuah rum rum a, ka tum deuh thut thut bawk a.



Mahse, han block êm chu ni theiin ka hre si lo, a sualthlâk ka ti ve deuh bawk nèn, ka ti lo leh nge nge. Ka hua pawh a ni tawh lo; mahse, biak loh tawp mai hi ka duh a ni, ani pawh hian min rawn be lo se.



Ka routine ngai pêt pêt chu ka thlâk ta deuh a. School bànah nutei inah a lo awm tlangpui a, puih tam ka duh avàngin chêtna tùr ka dap thar a, rilrua thil ngaihtuah chet chet loh dàn tùr leh ka phone khawih tam lova hun hman ka duh. Ka chêt tam chuan ka taksa a chak ang a, ka ril pawh a țâm ve ang a, thil ei châkna pawh ka nei ve mahna.



Lung chu an rawn rem ta ngei, țhian pakhat thawhpui tùr a rawn hruai tel a, a țhianpa lah chu zu heh hmel zet mai hi a la ni zui. An va inhmeh ber tak! Hetiang lam hlîr mai hi a kàwm chu a nih dâwn hi, duh zâwng inang lo chu a inkawm ngeih theih hleinem.



Zirtawpni a ni a, ni dang ai chuan school kan bâng hma deuh hlek. Muangchângin ka haw hnak hnak a, tûnlai ka school kal ka phùr loh theihzia chu ka ngaihtuah a, naupang leh thawhpuite hmaah hmel hlim takin awm țhìn mah ila, chhûngril a hlim tak tak si lo va, hmuh hrehawm ka nih loh hrâm ka beisei tak zet a ni.



Ka hma chiaha rawn ding thut an awm avàng chuan ka phu zawk mai a, ka ding ve chawt bawk.



"Sangbawih..."



Ka melh ta ngat ngat mai. He pa vàng hian hrehawm ti takin hun ka hmang a, tunah pawh ngai ka la awh thei meuh rih lo a ni a, hetia ka han hmu leh thut mai hi, ka lo ngai viau a ni tih hre mah ila ka tilang lo ang, bâkah, ka thinlung ațang hian paih chhuah ka duh ber bawk.



"Eng nge i lo tih?" ka hmelah eng mah tilang chhuak lo tùrin ka insûm nasa, bâkah, ka aw pawh ka thunun nasa a ni.



"Rawn hmu tùr chein ka lo kal a."



"Hei, min hmu tawh a, a tâwk mai em?"



Ka hmaa a din tlat avàng chuan a sîr lama hêl deuh pah chuan,"Ka hmanhmawh deuh hlek a," tiin ka kal țan leh ta mai a.



"Inbia ang,"tiin ka bulah chuan a rawn kal ve a, din pawh tum chuang lo chuan," Hei, kan inbe reng alawm," ka ti leh a.



"Sangbawih...ka thiam loh vek a ni ka tih tawh kha, hetiang hian awm lo teh, nang bâk hmangaih ka nei lo a nia," tiin min rawn zui ve zêl a.



"Khalam kha chu sawi tawh lo teh ang," ka ti a, amah pawh en lovin ka kal zêl a, ani pawh chu ka sîrah a rawn kal ve zêl tho a.



Thinrima dàwr ka tum hran lo. Bâkah, kawngah kan kal a, miin kan țawngte an lo hre rêu rêu ang, mualphona hi kan hnaih têah a awm reng si a.



"Ka bànsan thei lo che. Ka hmangaih che a, ka nupui atân pawha ka duh ber i ni. Ani kha ka duh lo, nupui atân phei chuan..." a tih lai chuan," Mipa chuan mawhphurhna lâk ngam tùr asin," ka lo ti zauh a.




"Engah nge a rai tih pawh min hrilh duh lawk loh ni? Palai ka rawn tirh veleh min tihbuai tumin a rai thu a rawn sawi chauh a, nang nèn min pawh țhen a tum vàng a ni," a ti leh a.



Kawnga mite'n min en duh viau tih ka hriat chuan ka chhâng tawh lo. Bâkah, chhàn tamin buaina a tikiang dâwn chuang lo tih ks hria, thil thleng tùr chu a thleng vek tawh.



"In kan thleng teuh tawh si a, min kalsan tawh mai dâwn em niang?" ka tih chuan,"Kalsan che ka la tum chhin miah lo," a lo ti mai a.



Inbiakna hun kan nei dâwn chuang lo va, duh leh rawn lût ve mai mai teh se, amahah hian beiseina neih ka tum tawh lo. Ka ring êm êm a, ka rin ang lo taka a awm hian amah ka rin êm ëmna kha a tichhe zo tawh a,  a hmaa a chunga ka rilru ang kha ka pu thei tawh ngai dâwn si lo. Mi hi an lo felin an thei hi ka tia, an bialnu/ bialpate'n an inkawp lai renga mi dang laka eng emaw petek zeuhna an neih hian theihnghilhsakin an lo pawm leh thei mai zêl a, khatiang rilru kha ka pu ve thei dâwn lo, bâkah, tunah hi chuan nunna nei, min râwn miah lova mi dang nèn an siam chu kârah a awm tawh tlat.



Inah chuan nutei a lo awm a, Ațana nèn kan inzui min lo hmuh chuan mak a ti tih ka hre thei mai a; mahse, a sawi chhuak chuang lo. Hlim hmel takin min lo be nghâl vat a, Ațana pawh a hmuh tawh hnu a nih avàngin a lo hre chat rêng a ni.



"Ațan, inhmuh a va khât ve! Lo țhu rawh," tiin a be sawk sawk a.



Ka inthlâk a, ka va chhuah leh chuan an lo titi dùn bawrh bawrh a, han zum deuhna emaw han țit deuhna emaw pawh a awm lêm lo a nih hmel.



Thingpui ka siam a, nutei chuan,"Sangbawih, hna thawkte pawh han siam kêp nghâl mai teh aw, an in a lo hun reng tawh alawm le," a lo ti a.



Chhâng lo chuan ka siam mawp mawp a, no khat chu Ațana chu ka pe a, no hnih dang chu tray-ah ka dah nghál a.



"Pâwnah ka pe mai dâwn em niang?" ka tih chuan," Aw, an lo lût duhin ka ring chuang lo ve a," a lo ti a.



Patea'n a lo vil ve rùn niin," Pate, ka rawn ken kêp lo che asin," ka tih chuan," A, ka in châk hran lo, nichin khân tui ka in țeuh a," a lo ti a.



An lo la thawk mawlh mawlh a, min lo ûksàk lêm lo. An lung rem chu ka han thlîr ve zawk a, an rem chak khawpin ka hria. Ka mistiri lo ve viau mai a, lung rem hi engtianga harsa leh hahthlâk nge a nih tih pawh ka hre thiam lo, kâwng erawh chu a kham ve duh khawpin ka ring ve ringawt.



"Helai hi a zâwl phei ang a, tah chuan pangpâr emaw thlai hnah emaw pot-ah in dah duhin ka ring a," Patea chuan a ti a.



"A remchâng khawp ang chu!" ka lo ti mai a.



"Chàwl teh u, hei thingpui hi han in ula, in hna pawh a laklawh loh lai tak a niin ka hria,"patea chuan a ti a. Kei pawh chuan in chhûngah ka luhsan ve ta a.



Ațana chu a lêng ve reng a; mahse, kan titi dùn tawh lo, nutei nèn chuan an titi ta záwk. Ka hman tlat lo alawm, bâkah, ani pawh hian ka awm dàn ațangin a hriat thiam ve tho ka ring, mi ã a ni bík lo va.



Mahse, he pa hi mak ka ti. A tûk Inrinniah pawh chuan a rawn lêng leh a nih chu, Rose-i leh nutei rei lo te an chhuak lawk a, patea pawhin hna thawkte a vil leh a. Nuteite chhuah hlànin Ațana chu ka lo kàwm lo thei lo a nih tâk ber chu.



Amah hlîr a țawng deuh char char a, ka lo ngaithla a ni ber. A inthiam lo va, ngaihdam min dìl mai bâkah amah chu kalsan lo hrâm tùrin min ngèn a, a thiam loh vek a nih thu chu a sawi uar deuh ber.



"I tel lo chuan ka awm thei lo ang, khawngaihin, vawi khat chiah thil ka tisual a, a thleng nawn tawh miah lo ang, ka tiam ngam che a ni," a ti mawlh mawlh  a.



"Vawi khat thil tih sual hian inrin tawnna a tichhe vek thei tih i hre nange?" ka lo ti khauh a.



"Hre tho e; mahse, vawi khat chauh hun min pe leh hrâm rawh, ka ngèn takmeuh che a ni. Sangbawih, i tel lo chuan eng mah ka ni lo tih ka hria alawm, kan chunga thil thleng hi theihnghilhin a bul ațangin țan țha leh ang, khawngaihin, chu chauh chu ka ngèn duh che," a ti leh mawlh mawlh a.



Chutih lai chuan pâwn lamah thãwm a rawn awm a, ka țawng ve ta lo. Rose-ite nufa chu an rawn lût ta nghâl a.



"I lo lêng a ni maw?" tiin nutei chuan Ațana chu a be nghâl vat a. Rose-i erawh chuan Ațana hmuh theih loh tùr chuan min rawn enin a ner deuh sak a, kei pawh ka nui sak. Rose-i hian Ațana hi keimah vàng hian a ngei ve êm êm ringawt a, hetia a la rawn lêng ngam pawh hi zak lo a ti dâwn lutuk.



Chhùn thingpui hna thawkte ka pe chu min zui chhuak ve a, an lung rem chu a thlêk ve nasa, thiam ve ni àwm fahranin. Patea chuan a lo titipui ve leh mai bawk a, ani lah a țawng duh bawk a, thil hre ve tùr tâwkin khawpuiahte a lo awm ve bawk nèn, a titipui theih viau zêl a ni.



A haw hnuah erawh Rose-i chuan a rêl zui nasa. A hahchhiau haw nasa ngawtin ka ring.



"Zak lo ve chiang e, tikhân mi rinawm ber angin a la rawn hmu ngam che a nia, engtin nge maw a huaisen theih bîk ni? Khawi ațanga zah theih lohna nge a neih bîk ni?" a ti làng láng a.



"A, sawi thui lo teh, a ho mai mai. I sawi i sawi chuan mi rèl hrât i ni ringawt dáwn asin," nui deuh chunga ka tih chuan,"I ngaidam leh ringawt ang e aw, țawngkam a thiam hmelin mi hneh theihna a neih țhat hmel si, a lam a i lêt leh a nih ngat chuan ka ngei khawp ang che," a ti leh tàn tán a.



Zànah kan inkhâwm a, kan inkhâwm hlàna a lo lèn loh hrâm ka beisei. A ngai te sawi leh țhin hi ka ning a, ka rilru lah ka sawh sawn dâwn bawk si lo nèn, duh tâwk tawh se ka ti a ni.



Vànneihthlâk takin a rawn lêng lo hlauh. A tûkah pawh a rawn lang lo, ani hi a haw phei ta daih pawh a ni maithei a ni, haw phei se ka ti takzet.



Zànah chuan thla a êng deuh ruai a, Rose-i nèn kan inkhâwm a, pateate erawh chu patea a nawmsam loh avàngin an inkhâwm lo, nizàn pawh khân an inkhâwm tawh lo, tukinah erawh an inkhâwm ve hrâm thung.



Inkhâwm bànah Rose-i chu a țhu hnufual zîngah a tel ve leh ta, an rei dâwn lova a rin vàngin ka lo nghâk a; mahse, an rei ta phian. A hnu deuhah phei chuan text-in ka hawsan dâwn thu chu ka hrilh ta ringawt.



Mahnia han kal ngauh ngauh chu a nuam lêm lo. Kan in awmna hi mi kàwmkâr deuha kal chuan hnai ve deuhin a thlen theih mai a; mahse, mi kàwmkâra kal hi ka hreh lutuk, bâkah, ui neite an lo awm phei chuan, ka dâwih si a, kawngpui lama kual mai hi ka duh mai țhìn.



Tlangvâl rual khat, lo țawng deuh bual bual awmna chu ka pal tlang a ngai dâwn. Helai tak hi chu a reh deuh hlek a, hla deuh hleka high mast êng chuan a rawn èn phâk ruai nain a fiah lêm lo khawp. Inkhâwm bàn kha chuan haw nghâl ni ila chuan hawpui tùr an awm ve nual asin le.



Ka pên rî chu an rawn hre ngei ang, thinphu deuh dèp dépin ka kal zêl a, an la țawng deuh bul bul tho avàngin min rawn en lêm lo a niang.



Ka pèl dâwn tihah chuan pakhat chuan rùi tih hriat fahran hian,"Nula, lo chàwl ve rih rawh," a rawn ti țèng chhuai mai a.



Ka phu deuh dâwrh, ka puan tlâng vuanin ka pên chak sauh.



Mahse, a rawn che rang ta tlat, kual lai a nih vàng leh ka hmanhmawh lutukna lama ka inchhuih deuh khut avàngin ka petek dâwrh lehnghâl a, chu chu min rawn nangchîng a ni.



"Min hlau mah ta che, kan inkàwm ringawt dâwn alawm," a rawn ti chhur chhur, a aw ațang chuan a ruih hmel tehrêng nèn, a chezia chu a rui hauh lo.



"Min...thlah... rawh!" tha khùr dar dar hian ka ti țial ruai mai. Chutiang chuan ka lo khùr nasa a ni tih ka aw ațang chuan ka hre thar leh chiah. A bân chuan nghet zet hian ka hnunglam ațangin min rawn kuah a, zu rim a nam deuh huam mai, min kuahna duh lo chuan  kei ka lo tãl nasa, ka bag ken ka thlauh lai pawh ka lo hre miah lo.



"Min hlau suh, ka kuah ang ang khân awm-" a sawi zawh hma chiah chuan pakhat hian a rawn pawt sawn dâwrh a, chutah, a nam leh dâwrh bawk a, chupa chu a petek uan uan a, kawng sîra hnim zîngah chuan a tlu sawp ta nûih a.



"Lo buaipui teh u."



Ka kutah rawn manin min kalpui ta vat. Kei pawhin tha khùr hlawk hlawkin ka zui ve a, a awka chhuak ațang khân tu nge tih ka hre chiang khawp bawk.



Ka thâ a khurh nasat êm avàng chuan ka thâin a tlin ta lo, ka țhu tlu deuh hnawk tùr chu rang zet hian min rawn kuah a, amah nghèng chuan ka tlu lo thei ta hrâm e.



Țawng ka tum a, ka kha a chih a, ka țawng thei mai lo. Hlauh lutuk hian a lo țawng chhuah theih dâwn miah loh  a nih hi tih ka hriat phah.



"A pawi ka ti hle mai," a ti sup a, țang deuh țùng chung hian min la kuah reng tho a.



Ka zia deuh hnuah erawh min thlah a, ka kutah erawh min la chelh tho. Kan in bul thleng chu ngawi rengin min kalpui a, pàngngai tumin kei pawhin thâwk ka la vang vang reng a.



"Làwmthu hrilh duh lo viau mah la, ka lâwm e," la khùr ru dar dar chuan ka ti a, ka ding dat bawk a. Țawng chhuah pawh chuan aw a la pângngai hlei thei lo.



"Tu mahin an tina hauh lo ang che, ka tiam a che," ti supin ka bag ngei chu min pe nghâl a.



Ka bag ka thlauh tih pawh ka lo hriat hauh loh chu le! Ka hlau lutukkhân eng thil mah min ngaihtuahtîr thei lo a ni.



"Ka lâwm e," ka ti nawn leh sap. Bag min pêk vànga làwmthu sawi nge ka nih a, a thil sawi vànga làwmthu sawi ka nih pawh ka hre teh nuai lo ve.



"Thil thleng kha theihnghilh hmiah ang che, a thleng nawn tawh lo ang," ti leh supin kan kalna hnu lamah chuan chak zet hian a lêt leh ta nghâl a.



A rui ve miah lo a nih kha.






*DAWHTHEI TAKIN NGHÂK RAWH, DAWHTHEIHNA HI HNEHNA HMANRAW ȚHA BER ZÎNGA MI A NI*