☆24/7☆ - 8 By Dingdi Pachuau

☆24/7☆ - 8 By Dingdi Pachuau

Ațana chuan min rawn be hmasa leh ta a, thil awmzia chu a rawn sawi nghál vek. A u hnênah chuan kan chanchin chu a lo hrilh vek tawh a, nupuia min neih a duh thlengin a hrilh vek a ni àwm e. A sawi dànin a u chuan a nu leh pate a lo hrilh ang a, inneihna pawh nakin nakin lam ti lova a hma thei ang bera buatsaih țha a tih thu a hrilh bawk a ni àwm e.

"Chutiang chu kan sawi dàn a nia; mahse, nangmah ber hian min lo hnial khauh ang tih ka hlau ru deuh a, ka vêngthãwng che a nih ber chu. Kei chuan kan sawi angin inneih thuai ka duh ber a, a hma thei ang berin," a rawn ti chhunzawm zat a.

Ka hlim lutuk chu ka nui var var mai. Heti khawpa min thlahlel ve ngawih ngawihtu hi kei pawhin ka thlahlel a, a duh ang tihpuitlinsak pawh ka duh. Ka duhthusàmah erawh chuan hna nghet han neih ve phawt a, chumi hnu lama pasal neih chu ka lo ngaihtuah ve dàn a ni, chuan, ka pasal tùr chhûngte tân pawh iaiawm tak ka ni lo ve deuh ang a...

Mahse, kan inzui rei ve tawh a, ani hi chuan amahin hlawh a nei tawh a, keiin hna thawh leh kher chu ngai a ti lêm lo nain ka duhna chu min  sawisêl chuang lo. Tunah a duh ang thil a rawn sawi chhuak leh ta a, hnial a hlau viau nain hnial ka tum hran bîk lo, pasal neih pawh a châkawm ve tawh tho alawm le.

"Ka chhànna tùr chu i hre sa vek alawm, ka hnial lo ang che tih i hria. Kum khat min nghâk tawh a, innghahtîr reng che pawh hi mahni hmasial chan ka chang deuh tlata inhriatna ka nei tawh a, nuam ka ti bîk lo. Engtik hun ang vêl nge i lo tinzáwn hrim hrim a?" ka ti a.

"A hma thei ang berin!" a lo ti vat a.

"Naktûkah ti ila?" nui chunga ka tih chuan phùr hmel zet hian,"Ka lo phei nghâl ang," a rawn ti zat a.

A hma thei ang bera palai tirh kan titlu ta. Ka rilru a hlim veng veng mai a, engkim mai hi a thar sar vek maiin ka hria. Kan tum dàn anga kan kala ka pate'n an phal a nih chuan pasal ka neih vat ka ring, ka nulât chhûng a rei tawh dâwn lo tihna a nih chu.

Rose-i hnênah pawh chuan ka hrilh ve a, ka khuma mu pah chuan kan sawi dùn sap sap a.

"I vànnei dâwn lutuk! Ti ila, ani pawh a vànnei ve dâwn tho a nih chu. Awi, a ni lo thleng thuai se ka ti! Mawi taka inchei ka châk tawh!"nui pâwt pâwt chung chuan a ti a.

"Palai tirh hma hawt a!" ka lo ti thung a.

"A, in induh tawn a, a rawn tîr thuai dâwn bawk a, i chhúngte'n an lo hnial àwm bawk si lo. Ațana lahin a hma thei ang ber a duh bawk si a, i va nula rei dáwn tawh lo tak!" a ti leh a.

"Nia...rem thei tùrah chuan lo ngai ta ila, nang hna nghet neiah thil țha tâwk min lei ang che," nui chung hian ka ti a.

"Tehrêng mai! Lutuk!" a tih chuan," Kei pawhin in inneih hunah thil țha deuh ka lei ve ang che," nui chung hian ka ti a.

Chutiang vêl mai mai chu kan sawi a, a chângin kan nui kar kar a, kan hmalam hun tùr chu phûr zetin kan lo sêprawtui ve a ni.

Ka thil tih engkim mai chu a zãngkhai haih tawh vek mai. Ka tân chuan damdawi țha tak chu a lo nih dâwn hi, ka rilru a hlim tlat avàngin țhenawmte in sa Rinfela ka hmuh fuh châng pawhin thinrim hmelin ka en tawh lo, ka en liam ve mai mai tawh, rilruah thil dang a lian tawh tlat si a ni.

Palai chu an kal ta ngei a. Mi tih dàn angin ka pate chuan chhûng leh khatte an lo inràwm kháwm tùr thu an lo hrilh ngei ang chu, kei pawh min rawn be ngei ang,  a zahthlâk ve duh reuh ngawt ang chu.

Min rawn be ta ngei; mahse, induh sa leh inrâwn sa lovin Ațana hian ama thuin palai a tîr lo ang tih an hre ve tho dâwn, min rawn hrilh ve hrim hrim a ni. Chuan, kâr tàwpa haw chho zawk tùrin min rawn hrilh bawk a, a chhan chu ka hre sa ruak tho e.

Ațana nèn pawh kan inbe reng reng tho a, chanchin pawh kan inhre pawh zêl e. Ka haw tùr thu pawh chu ka hrilh ve tho, ka phùrna leh ka huphurhna a inzâtin ka hria, a chhan chu kan khuaa mite'n palai ka neih chungchâng chu an lo hre ve leh nual tawhin ka ring si a.

Ka haw zawk tak tak a ni, Taitea lah chuan chaw kan ei laiin Ațana chanchin chu min han zâwt chîk khawp mai a, ka nu leh pate hriatah ngaihzâwng chanchin ka la sawi ngai bîk lo nèn, nuam chu ka ti vak bîk lo; mahse, hun tàwp a ni tawh a, kan chanchin chu ka hrilh vek.

Ka pa chuan," In induha in inhmangaih tawn chuan a țha, inneih hial in duh a nih phei chuan fate duh na na na chu hnial ka tum lo; mahse, in hriat reng tùr chu in thlan fuh loh chuan tu thiam loh mah ni lovin nangmahni a ni ang, in inneih tawh chuan ințhen lam kha rilruah a awm tùr a ni lo. Thu in tiam tawh a nih chuan a nuamah emaw a hrehawmah emaw pawh in kawppuite chu in vuan tlat ang, thihna êm in inkârah a thleng a nih loh chuan," a ti charh charh a.

"Pa, i sawi thui e," ka tih chuan," Sawi thui a ngai alawm, inneihna hi chu vawi khat chauh niin dam chhûng daih a ni tùr a ni a, chuvàng chuan kawppui thlan dâwn hian fîmkhur a ngai viau asin," a ti leh a.

Ka nu chuan,"I pa sawi chu a dik chiah, mi pângngai in ni a, in hmangaih leh nangmahni hmangaihtu, in hriat chian ngei kha a țha. Bawihtei pawh, in inzui rei ve tawh a, in inhre chiang tawh bawk a, tlangvâl fel tak a ni ngeiin ka ring bawk," a lo ti ve a.

Mazuali a rawn lang a, ani pawh hian kan inkâr engkim a hre vek a, tuna Ațana palai rawn kal chungchângah pawh hian min lawmpui viau nghe nghe a ni.

"I châk tawh àwm mang e! Țhian khatna ka chang pha ve ang chu maw?" a rawn ti ngei, ngeiawm thiam reuh lutuk! A lèn chhûng chuan min fiam char char, fiamthu hlîr maiin kan râk a, kan hlimin kan nui nasa viau a ni.

Lungleia ka chhuk thlâk hma zànah chuan phone call danglam tak ka dawng ta tlat mai!

Kan inkhâwm bàn hnuah Mazualite inah ka pêng kawi leh lawk a, rei pawh ka awm lo, ka haw chu min thlah a, in ka lût tùr chu ka phone a rawn ri tâkah chuan lût ta mai lo chuan veranda-ah chuan ka ding leh rih a.

Number ringawt.

"Sangbawihi i ni tiraw?" hmeichhe awin a rawn tih chuan," Aw, ni e, eng nge ni ta?" ka ti a.

"Sangbawih, Lawmsangi ka nia..." tiin a tàwp leh rih a, chutih chhûng chuan ka hmel hriat zîngah Lawmsangi tih hming pu ka lo ngaihtuah char char thung.

Ka hre chhuak chuang hauh lo.

"Ka va hre mai lo che ve aw...eng thil nge ni ta?" ka ti leh a.

"Ih, englo a nia, tunah hian Ațana fa ka pai mêk a," a rawn tih tâkah chuan ka meng phâwk chiang khawp mai!

"Eng...eng maw?!!" Ka hre sual a ni ngei ang.

"A pawi ka ti. A bialnu i ni tih ka hria asin; mahse, engtin nge ka tih tâk ang? Ka fa ka pai mêk hi fahrah ni mai tùra lo piang tùr chuan...kei a nu ang maia fahraha a lo piang tùr hi..." tiin sawi zo lo chuan a ngawi ta daih a.

A thil sawi avàng chuan sawi tùr ka hre lo, ka en ngai ka en ngat ngat a, ka hmu chuang hauh lo. Min țhâwng takzet a ni.

"Ka thiam loh vek a ni," a rawn ti leh sap a.

Mumal lo zetin ka room-ah ka lût a, ka awm dàn chu mumang ang vek ni maiin ka hria. Ka hlimna zawng zawng kha vawilehkhatah len bo vek a ni si a, ka thinlung zâwn hi a na ngawt ngawt maiin ka hria.

Ka maimichhîng a, Ațana hlîr ka hmu, ani hian min lo bum reng tihna a ni si a, khâng hun chhûng zawng khân. Engtin nge a tih theih? Tunah eng mah hre lo zêl ni ta ila, naute pa ni mai tùr chu ka pasal a ni ngei dâwn asin, ka tâna rinawm zo lo chu ka pasal a ni ngei ang.

A number chu ka hmet chhuak a, min lo chhâng rang kher mai, min lo beisei reng zâwk pawh a ni maithei a ni.

"Engtin nge i tih theih?" ka ti tâwng a.

"Sangbawih, ka thiam loh vek a ni; mahse, min kalsan suh aw, ka fa pawh a ni tak tak lo ang! Min puh mai mai a ni," a rawn ti nghâl a.

Sawi kual duah ngai lovin a lo hre sa a, a țha e.

"Ațan, rin harsa ka ti takzet a ni; mahse, a dik ngei si. Engtin nge i tih theih? Ka rin tehlul che nèn..." ka ti leh a, ka rilru chu a nâ a, ka thil hriat chu awih loh ka duh viau nain thu dik a ni tih Ațana thil sawi ațang chuan a hriat vek bawk si.

Mumang  mai mai ni se, harh rualin reh leh vek se ka va ti tak!

"Sangbawih, khawngaihin, ka insawi fiah thei ang," a rawn tih chuan," Insawi fiaha chin fel theih thil ni se ka ti takzet; mahse, he thil hi chu țawngkama chin fel theih a ni lo," ka ti leh a, chutih pah chuan ka âwm chu na zetin ka dawm a.

Nizàn leh zan hmasa lamahte kan hlim tehlul nèn, tunah chuan boruakah an thâm ral zo ta.

Thaw hawk hawkin ka âwm chu ka dawm a, ka mittui erawh a tla hauh lo. Ka rilru a tâwt a, Ațana'n min bum tih ringawt mai chu ka  thinlungah chuan a ri tluk tluk mai.

A tûkah pawh Lungleiah ka chhuk ta lo. School lamah pawh chawlh ka la ringawt, ka room-ah ka inkhung ngawt ngawt a, Mazuali a rawn kal zut a, ani pawhin min hnem vak dàn a hre lo, inhnem theih thil a ni lo miau si a ni.

Mumal lo takin kâr khat chhûng chu kan in chhûngah chuan ka hmang, ka hlim thei lo va, ka rilru a na êm êm ringawt mai a ni. Ațana ka dem a, hmeichhia Lawmsangi chu ka dem bawk. An duh an ti a, tunah hian an thil tih rah chu an hmu mêk a ni mai, engah nge kei hian ka lo tawrh ve viau? Lawmsangi a rai avàngin kei hi ka mualpho dâwn hleinem, thil tisualtu pawh ka ni lo bawk a.

Ka inhnemna ve chu eng mah lo a ni, anni pahnih dem chungin ka inhnèm a; mahse, awmzia a awm chuang si lo. Ka rilru nâ a reh phah lo va, tlêm tê pawhin min chhâwk hek lo.

Palai pawh an lo kal ta lo law law. Kan tàwp tawp mai, chhunzawm zêl theih ni lo le.

*******

Lungleia ka chhuk hnu chuan ka pângngai deuh ta. Ka pain min ngaihtuah viau mah se kan ina awm reng thei kha ka ni lo, hna nei, tih tùr nei ka la ni tlat. Mi zînga ka awm chuan ka awm dàn pawh a zia deuh mahna, thil pakhat chiah ka ngaihtuah ngut ngut lo deuh ang chu.

Thil ka ei thei lo va, a langah hlim hmel pu lui hrâm hrâm mah ila, chhûngril lam hi chu a rûm tlawk tlawk a ni ber. Ka lan chhuahtîr chuan mi chak lo ber ka ni dâwn si, chau ngawih ngawih țhìn mah ila, ka tih tùr chu ka ti ve hrâm hrâm a ni.

Rose-ite pawhin an hre vek a, min tihhlim chu an tum ve khawp mai. Min ngaihtuah tih ka hriat vàngin an bulah chuan hmel pângngai tak put ka tim hrâm țhìn, an hlim lohna thlentu nih ka duh lo.

School ka kal a, naupang leh thawhpuite bulah pângngai thei ang berin ka awm, naupang bulah phei chuan hlim hmel ka chhuah nasa thei lutuk, ka hlim lohna ka tihlan a thiang lo.

Ațana pawhin min rawn call țhìn. Ka chhâng ngai lo, message pawh min rawn thawn, ka chhiar ngai lo bawk. A number delete ka duh viau nain ka delete ta êm rih lo. Ka delete si chuan min rawn call-in amah tih hre lovin ka lo chhâng nulh ang tih ka hlau a ni.

Lawmsangi kha Ațana thawhpui a lo nia, Ațana u hmeichhia khân min rawn hrilh a. Anni pawhin a rai tih chu ka hriat zànah tho khân an hre ve chauh a ni àwm e, Ațana pawhin mak a ti lutuk a, Lawmsangi hnênah chuan a hma daiha a rai thu a lo hrilh lo chu a hau ringawt a ni awm e.

A zak lo e. An thil tih țha lo a rawn lang chhuak a, a lan chhuah hma chu an zëp thei a, zêp theih rual a nih tâk lohah chuan kan lo hre ta a ni mai a, hre lo phei ila inthiam lohna nei hauh lovin a awm chhunzawm zêl ang a, inneih pawh kan innei hial ang chu!

Thil ka ei theih loh avàng leh zàn ka mut theih loh vàng chuan ka chêr ta dâwk mai. Ka hmel a tla deuh kiam a, a thû that a, ka mitmeng dul zet mai chu dârthlalangah pawh ka en rei ngai lo. Zànah hian mu thei tal ila chuan aw...

Ka pain min ngaihtuah êm avàngin ka nu nèn min rawn tlawh vang vang a, zan khat an rawn riak. Ka hmel tla ta deuh leh chêr dâk min hmuh chuan ka pa chuan hna chu chawlhsan mai tùrin min hrilh a, ka nu ve thung chuan eng mah a sawi chhuak ve lo, min en ngawih ngawih ringawt.

Patea chuan," Bànsan ringawt chu a fuh ber dáwn em ni le? Hetia mi zïnga a awm hian a inngaihtuah ngut ngut tùrte a vêng a, bâkah, mi zînga awm tam hi a țha. Mahni chauha awma inngaihtuah ngut ngut hian thil țha lam aiin thil țha lo lam a hring chhuak duh châwk a nia," a lo ti a.

"Min ngaihtuahnaah ka lâwm lutuk e. Min ngaihtuah lutuk suh u, ka țha a nia, thil ka ei thei lo leh zàna ka muhìl thei lo hi a ni ber a, bâkah, hetiang hian ka awm reng dâwn hleinem," ka lo ti ve a.

"A țha, tunah chuan theihnghilh rup rup theih pawh a ni lo ang a, a harsat hun lai ber tùr a ni nghe nghe. I lungchhia ang a, hrehawm ti pawhin i țap ang; mahse, hei hi a tàwpna a ni lo, hei hi i pal tlang zawh hnuah chuan i chak sawt tawh mai ang," nutei chuan a lo ti a.

Zirtîrtu hna chu ka bànsan ta êm lo ve.

Zan khat chu number ringawt ațangin call ka dawng a, tlêm chuan ka tîm deuh nain school naupang  nu leh pa, tu emaw ber pawh a lo ni thei a, number ringawt han țih viau chu a fuh ber lo tlat.

"Sangbawih, naktûk hian rawn phei ka tum, sawi fel ka duh, ka hmu châk bawk che a," Ațana ngei mai chuan a rawn ti a.

"Duh tâwk ang, eng thil mah sawi fel tùr a awm tawh hleinem, a chiang kêk kâwk viau ka lo ti mai  a," ka tih chuan," Ni lo, Sangbawih. A fel thei ang, ka rawn sawi fel dâwn alawm," a rawn ti leh a.

"Sawi fel a ngai lo. Naute, pawisawi lo leh thil sual ti miah lo tawrhtîr suh ang che. Thil țha lo i ti a nih chuan a lêt i tuar ngam tùr a ni, mipa i nih ngai chuan," ka ti a.

"Vawi khat tal hmuh che ka-"

"Ni lo ve, rawn phei buangbâr duh suh, tunah tak phei hi chuan inhmuh pawh ka châk lo," ka ti leh khawl a.

Ka duhnaah hi chuan ka ngeiawm thiam ve a nia, ka nun pawh a ràwn theih êm kha, Rinfela khân a hre chiang khawp ang.

"Min hmu duh lo a nih pawhin hmu tùr tal chein ka rawn kal ang,"a  rawn ti leh a.

A duh phawt chuan lo kal rawh se. Hlim hmel leh lo lãwm hmel a hmuh loh pawhin a vui thei lo ang. A chhan chu ka chhûngte hian an lo làwm tehchiam lo ang tih ka hre ve tho; mahse, mi pângngai an nia, pângngai takin an lo be tho ang.

Ka lu a hai deuh miai miai a, chair-ah chuan ka țhu deuh vang vang phawt a, chumi hnuah chuan in chhûng chu ka phiat a, veranda ka phiat tel bawk a.

Ka lu hai a rawn zual, a hmaa ka lu ka tauhna ban ngei kha ka vuan chat a, chuti lo chu ka tlu thei mai dâwn tlat.

Ka maimichhîng a, ka hriat dàn chuan ka awmna bul vêl chu a vir muai muai mai, nghet thei ang berin ban chu ka vuan a, ka tlûk hlauh chuan ka lu ka tauh thei tlat a ni.

Rose-i'n min rawn ko ri ka hriat chuan ka meng deuh uau a; mahse, ka chhîng leh vat. Vawiin chu ni dang aiin a rawn haw hmain ka hriat chu le.

"Engati nge a-"

In chhûnga luh thuaia mut rih mai ka duh ta, heti hrim chuan a reh thei lawk lo ang.

Ka âwn ta ruai ruai mai a, Rose-i țê ri pawh chu ka hria. Men ka tum a; mahse, ka thei lo, ka awmna vêl chu a vir nasa lutuk a, ka luak thei mai dâwn.

Leiah chuan ka mu ta, a zìa deuh hlek alawm le, chutah, ka kãng deuh lawpin ka hre leh a, țawng ka tum a, men pawh ka tum, ka thei ta hauh lo.

Ka thih loh hrâm ka beisei. Ka thi thei lo, school-ah hna ka thawh a la ngai, naupangho zirtîr an ngai alawm.

Buai deuh nuai hian ka muin ka hria. A hnu deuhah erawh ka taksa chu a rawn nuam siai siai a, men pawh ka tum buai peih tawh lo, muthilh vang vang ka châk, ka mit deuh sulh sulh a, eng mah hre lo chuan ka awm ta, ka muhìl a ni ngei ang.

*THIL TÊ THAMA LÀWMNA CHÂNG I HRIAT HUNAH HLIMNA TAK TAK CHU I HMU THIAM ANG*

https://chat.whatsapp.com/F5M6GiQvBic4qATfXaGwBc

Thil man tlâwm leh țha zawrhna, lo bèl chiang ve chhin teh le.