☆SILVER ZUNGBUN☆ - 29 - 33(LAST)

☆SILVER ZUNGBUN☆ - 29 By Dingdi Pachuau




Kâr khat hnuah an rawn phei dâwn tak tak! Helicopter-in an rawn phei ang, a enkawltu doctor-in a la phal lutuk lo nain ka puin rawn haw a duh tawh a.



A rawn phei dâwn tih ka hriatin a mutbu leh parda, engkim a room-a awm chu ka tifai a ni mai. Dàwr pawh ka kal lo, ni khat tawp chu a room tihfaina hunah ka hmang.



A rawn phei thei tùr chu ka rilruin ka țawngțai a, làwmthu ka sawi mawlh mawlh. Thi lova a rawn thleng thei tùr hi ka lâwm a ni tawp, a taksa nâ chu la dam lo mah se, ka enkawl thei tawh ang a, ka duat thei tawh bawk dâwn asin.



Mahse, mitmei vèn tùr ka nei. Mi dang hian kan induhtawn tih hre tho mah se, nupa pawh kan ni lo va, a room-a kal kal chu a tihchi miah lo ang, min ko a nih ngawt loh chuan.



An rawn thleng a, a hmel bui deuh anga lang pawh kha a zia tawh a, a hmai kual vêl erawh a lo hmul leh nasa tawh. Ka hmuh țantirha ka pu kha a lo ang leh tawh a, a tuar chu na viau mah se, nâ ti àwm hmel a pu hauh lo. Mittui parawl kuangin ka thlîr ngawih ngawih a, dama a hmel a tak taka ka hmu leh thei hi ka lâwm.



A lo thlen zànah chuan a chau deuh a, motor-a a insawh deuh vàng a ni ang, kan dàwr bula nurse senior tawh tak chu Âtei'n a va ko, in bul lawkah pawh nurse chu a awm ve tho; mahse, a hliam dàn hi țhenawm khawvêngte hriat an duh lo.



Silai mu chuan a dàr dinglam a fuh a lo ni a, a lo intuam bár mai a, a kut dinglam pawh a che țha thei lo. A khawsik a awm leh țhìn bawk a, damdawi pêk a ngai țhìn.



A muthilh hnuah chuan Âtei chuan," Novi, mu rawh, a ngaihtuahawm loh ang. Zîngah hmel thar ser sawr nèn i awmpui zâwk dâwn nia, ngaihtuahawm a nih tawh loh hi," a ti a, pu ber pawh chuan Âtei thil sawi chu a lo 'amen' thlap a.



Awmpui ka duh tehlul nèn, ka hmuh lohna a rei tawh a, bâkah, hliam tuarin a dam lo zui. Enkawl ka duh asin le, an hriatah ka sawi lang ngam si lo.



Room-ah chuan ka vei ka vei a, heta a rawn haw phei hian rilru a hrehawm daih zâwk a nih hi. Building khatah, in khatah awm mah ila a bulah ka awm thei si lo, ngaihtuah a na daih zâwk.



Zîngah hma zetah ka harh a, ka tho nghal. Ka inphih fai hnuah chuan dâr zât ka en a, dâr 4:45 chauh a la ni, ka pu room-ah kal ka duh; mahse, mi dang tumah an la tho lo a niang, a la reh țhap mai.



Khumah ka țhu reng a, ka pu chu a harh tawh ang em? A hliam kha nâ a la ti viau reng ang em? A bula awma a kut vawnsak mai mai pawh ka duh asin le, 'mai mai' ka ti tak na a, ka tân chuan thil mai mai a ni hauh lo ang, a kut vuana mutthlûk pawh ka duh, ka khuma amah ngaihtuah renga mut ai chuan.



Ka room ațang chuan chhuakin tuilum ka on a, pu ber pawh a lo tho ve deuh nghal mai.



"Morning, Novi. I mu țha thei nange?" a rawn ti a.



"Morning, ka pu," ka ti phawt a, chutah," Mu țha thei e, ka pu hi a mu țha thei em le?" ka ti nghal a.



"Aw, mu țha thei e, damdawiin a chhâwk țha a, a khawsik pawh a reh tawh kha."



A làwmawm hle mai. A bulah chuan awm ila ka hre ve ngei àwm si a, nakin zàn chu a bulah ka awm tlat tawh ang, ka zak duh tawh lo ang.



Ka pu room ka hawn a ka va en dâk dâk chuan a lo la muhìl tih ka va hmu thei a, a tân hian mut tam a țha a ni. A khawsik a awm tawh loh phei chuan a mut tam poh leh a taksa a țha chak ang a, a hliam pawhin a dam chak phah dâwn a ni.



Chaw ei khamah dàwr ka kal lo, kal ka tum lo sa ve tawp. Âtei'n Nautei school kal tùr a thlah a, kei chu ka tàwi hret hret a, a tàwpah ka pu room-ah chuan ka lût ta nge nge a.



A lo harh reng a, ka lût min lo hmuh chuan," Nizànah ka bulah pawh i awm duh lo va," a lo ti sup a, a țawng ring lo va; mahse, chiang takin ka hre tho.



A khum bula plastic chair-ah chuan țhu pahin," Ka duh reng a, Âteite'n mu tùrin min tia, ka hnial hreh alawm," ka lo ti thung a, a biang vela hmul țo suar mai en pah chuan," A la nâ em? Khawi lai nge nâ ber?" tiin ka zâwt a. Hetia natna nei chunga khuma a mu ta bâm hmuh hi nuam ka ti hauh lo, ka khawngaih a, duat takin min kuah leh se ka duh a ni.



"Ka na vek, a na lutuk ringawt."



A nâ ang, a na viau ang, tawrhsak țhen ve thei ila aw...



"Ka tifiam, i hmêl kha , khatiang khân awm lo la. Ka dam tawh, ka bulah i awm tawh a, ka dam sawt sawt alawm," tiin ngun zet hian min rawn melh chho a.



Ka mittui tling kuau chu kìrtîr tumin ka khap sak sak a," Natna i tawrh laiin i bulah ka awm ve duh a, i kut vuana thlamuan che pawh ka duh a," ka ti sep sep a," Mahse, ka pu leh Nautei awmpui an ngai bawk sia, ka rilru hrehawmzia kha, i thi mai ang tih ka hlau lutuk a," ka ti leh a, ka hrawk a rawn tâwt a, ka țawng chhunzawm thei ta lo va.



"Lo hnai teh le."



Ka che duh lawk lo va, a kut veilam a rawn phar chhuah tâkah chuan ka lo dawm ta vat a, a bula țhu thei tùr chuan min pawt zêl a.



"Ka thi dâwn hlei nem-"



"I hre miah lo, tumahin kan thih hun tùr kan hre lo," ka lo ti țuau a, ka mittui chu a far ta zâwih a, ka zak peih tawh lo.



"Hrehawm i lo ti hle mai maw? A pawi ka ti hle mai."



A bân na lo lama min kuah chuan insûm miah lo chuan ka inhnît ta hlawp hlawp a, hetia min kuah leh thei ringawt pawh hi ka lâwm ém ém a ni.



Dam lo zâwk hnem ngaiin ka awm a nia, a tihchi loh hle mai; mahse, ka lo insûm rei ve tawh a, hetia awm pawh hi a ţha zâwk maithei asin.



Ka țah chhûng chuan duat takin ka sam chu a chûl a, ka insùm theih deuh hnuah chuan," Ka țahbelh i ti em?" ka ti tak hé háw a.



A nui suk a," Keimah vàng a ni tih ka hria alawm, i duhawm ka ti che," a lo ti daih a.



"Tu nge țaha duhawm ngai? I ti mak ém mai a."



"Nangmah maw le."



Ka țhut sawn a phal loh vàng chuan khumah chuan a kut vuan reng chuan ka bawk ve ta a, min en rùn reng avàng chuan ka zak deuh lek lek a.



"Dàwrah i kal dâwn lo'm ni?"



"Aih..."



Mitko sàn âkin," I bâng tawh tihna?" a ti sup a, kei chuan," Ka awm duh che a, chawlh ka la," ka ti a, a nuih a zâ tih ka hre mai.



"Nula hausa kha i ni hrim hrim a."



"U Melo-i'n a awmpui rei tawh che a, awm ve che ka duh alawm," ka ti salh a.



"Chu chu tu nge?"



Awi, ka ngei lutuk! A hai der thiam tawp.



"A awmpui che tih ka hre reng a nia aw. Hre lo der miah suh, kha vàng kha a ni em phone-ah pawh min lo biak țhat duh miah loh?"



"Ka rawn biak che kha."



A mit pawha en ngam lo chuan a hmai chu ka chûl kual a, hmul lo țo suar tawh chu khawih nuam ka ti leh tlat.



"Hetia chùl leh theih che hi ka ring pha tawh miah lo asin, i tân ka țawngțai a; mahse, ka ring zo chuang lo..."



"Chuan, zànah pawh ka mu thei lo va, room-ah ka vei chhén a, chuan... ka țap bawk a."



Ka sam chu a lo chûl hliau hliau a, a kutin ka bek a chùl lai chuan a kut lum ham ham deh ka duh avàng chuan ka lo thle ve deuh a, ka mittui chu a kutah chuan a luangthla a, ka biangah a kut chu a nghat vang vang a.



"Ka lo tirethei hle mai che maw? Ka sual tiraw?"



"Aih."



A nui hawk a," Sual min tih kha," a ti leh a.



"Khatih lai tak kha chuan i sual a."



"Ka naute lian zâwk tak hi chu aw. Rilru hrehawma i awm tùr hi ka duh loh vàng a nia engmah ka hrilh loh che, ka chhûngte pawh ka hrilh ngai hek lo. Hrehawm taka min thlah ka duh lo va," a ti sup sup a.



"A nih, keimah hian ka tihrehawm ve che em? Ka țahbelh bawk sia?"



"...lek lek."



"Hetiang hian U Melo-i a awm ve ngai em?"



"Ngai lo."



"A nih chuan țahbelh loh ka tum ve tawh ang," tiin ka mittui chu ka hru hul phawt a," I chau em? Ka țawngtîr nasa mah mah chein ka hria," ka ti leh a.



"A pawi lo, ka bulah awm reng rawh."



Amah si chêt chuan ka țhu a, a kut chu ka vawnsak a. Hetia vawnsak hi alawm ka châk kha, ka hnem ve theih dàn tùr ber a niin ka hre tlat a.



"Muhìl tawh la?"



"Ka bulah i awm reng ang tiraw?"



"Tehréng mai."



"Ka muthilh hmain min fâwp phawt la? Tui takin ka muhìl thei ang a."



Dìm têin ka fâwp a, ani pawh chuan min lo fâwp lêt nghal vat. A dàr a nat belh ka hlauh avàng chuan ka fâwp rei ngam lo, ka duhthawh ngam lo bawk.



A bulah ka awm ve ta reng a, a muthilh hnuah chuan kei pawh ka mut chu a rawn chhuak ve selh selh a, ka hriat loh kârin a kut vuan chialin ka lo muhil ve a.



Ka harh chuan ka awmna chu ka hre thiam lo lek lek a, ka han hawi kual a, ka pu lo muhìl bâm hmel ka hmuh chuan ka hre chhuak leh chiah.



Ka tho ta rih. Ka muthilh hma kha chuan inah tumah an awm lo va, pu ber chhuakin Âtei'n Nautei school-ah a hruai a, an la rawn lêt lo a ni maithei.



Chhùn hmeh tùr ka siam a ngai ang chu. A dam thuai thuaia a chak thuai theih nân ei tùr țha a ei mawlh mawlh a ngai a ni.



Ka pu room ațanga ka chhuah chuan pu ber chu a lo haw tawh niin, ka chhuak chu," Eng nge a an? A muhìl em ni?" a lo ti vat a.



"Aw, i lo lêtna a rei tawh em?"



"Rei lo ve, a muthilh theih chuan a zia hlauh chu," a ti leh a.



Ei tùr ka siam zawh țêpah chuan pu ber chu rawn kalin," A ko che a," a rawn ti a, ka ei siam kan tùr chu dah rihin a room lam chu ka pan vat a.



"Min ko em ni? Eng nge i duh? I harhna a rei tawh em?"



"Ka bulah i awm reng ang tih i sawi kha," a lo ti hmuk a.



"Chhùn ei tùr ka siam lawk a."



"Ka bulah awm rawh."



A inla thu vêl tawp; mahse, nuam ka ti daih zâwk. Ka laka a han pangchang ve hi nuam ka ti, pà deuh leh ngêng tak pawh hi a châng chuan an lo pangchang ve thei tho a nih hi.



Ka thil ngaihtuah avàng chuan ka nui sak a.



"Eng nge i nuih a?"



"Nangmah kha, i lawmawm lutuk a."



A bulah chuan ka awm ta reng, kal sawn a phal ta mang si lo va. Ei tùr ka lâk chhûng chauh ka kal sawn a phal a, a kut vuanin ka țhu ràn mai.



Zànah pawh ka kalsan chuang lo, amahin ka kal sawn a phal tlat lo va. Ka làwmah a tla a, mut hunah erawh ka room-a kal tawh tùrin min ti a; mahse, ka lo hnial vat thung.



"I bulah ka awm duh alawm."



"Ngaihtuah ka ngaih loh hi, ka mu thei lutuk ang," a ti a.



"Ka riahpui duh che alawm," ka la ti fan a.



"Mutna a hrehawm i ti lo ang maw?"



"I bul chu khawi lai pawh ni se, a nuam vek ang tih ka hria."





*INHMANGAIHTE INKÂRAH  CHUAN LÀWMNA PAWH HO TÊ, THINRIMNA PAWH HO TÊ A NI FO, I HMANGAIH KHA I HMANGAIH A NI TIH LANTÎR HREH SUH, A TÂN THIL HLU BER A NI SI A*






☆SILVER ZUNGBUN☆ - 30 By Dingdi Pachuau



A rilru tihrehawm tùr zâwng leh a natna tibelh tùr zâwngin ka awm duh ta lo, a bulah ka mittui pawh ka titla duh tawh lo. A tla dâwn a nih chuan toilet-ah ka kal daih zêl, U Melo-i kha ka awm ang khân a awm ngai lo tih ka hriat hnu kha chuan engkimah a aia țha nih ka tum ta char char. Ka pu tân a țha ber nih ka duh.



Ni tin nurse kha a lo kal a, a hliam chu a rawn sil fai ziah, a sil laiin room-a ka awm ve an phal ngai lo. A hliam chu a nasa deuh a ni maithei, ka râp an ring a niang, nia, hmuh chu a nuam ka ti miah lo ang.



A ni tèlin ka pu pawh a țha chho ve zêl. A chanchin hria an awm lo bawk a, rawn kan an awm lo. A thawhpuite erawh chuan an rawn phone țhìn, ka awm lai chuan a be vak lo, ka hriat a duh lo a ni ngei ang.



Kâr khat hnuah chuan dàwr ka kal ve leh ta. Țhiante pawh an lo ngaihawm ve tawh viau mai, kan inhmuh khâwm leh țhâm țhâm tâkah chuan kan bengchheng leh pek khawp a, Feli chuan min fiam chùl mai.



"I tawm theih ém ém dàn hi, Senior-a inah a awm țhìn a nih ka ring."



"Chhûngkua kan buai ve a, mimal lamah pawh harsatna ka nei ve thei tho alawm," ka lo ti thung a.



"I hmel hi buaina nei hmel a ni lo, hmangaihnaa tlu lût hmel i pu mah zâwkin ka hria," Feli vêk chuan a ti leh a.



"Inah in inlàwm țhìn a niang?"



Râpthlâk ti hmel zet hian Mary chu ka melh a, ani lah chu a lo nui kar kar a.



"Feli hian thil a hre ber mai! A rilru hi a chak a nia," a lo ti a.



"Nia, lehkha hi zir leh zâwk ta se..." ka lo ti vat a.



Ani lah chuan," Lehkha lamah ni lovin hetiang lamah hian alawm a chak. Ka sawi dik fú zêl a nia," a la ti fan a.



Ka pu chauh ka lo ngaihtuah atalângin LMa pa chanchin pawh ka lo ngaihven leh tawh miah lo va, ina ka awm chhûng khân phone ka khawih mang lo tlat a, a bengvàr loh theih khawp mai.



Mahse, a zia e. A la tlangvâl rih khawp a, ei tùr tuirîl lam chu a ei ve thei rih zêl a, a la ngaihtuahawm lutuk rih lo a ni àwm e.



Tukin ka kal lam rickshaw-in ka kal a, haw lamah pawh rickshaw ka hmang leh mai. Âtei a lo buai ve tho nèn, ka inthlahrung a, hruai ka ngaih loh thu ka sawi tlat a, min rawn hruai ta lo rêng.



Zànah ka pu room-ah chuan ka lehkhabu ka la lût sauh sauh a, assignment chu ka ziak ta mawlh mawlh a.



"Tihpui i ngai em?"



Nuih sakin," I dam loh chhûng chu ka hre thiam mai ang che," ka ti a.



"Phone chuan ka lo zawnpui thei tho ang che."



"A ngai lo, mu hahdam mai mai rawh, i dam thuai a țha zâwk," ka ti tlat a.



Ngawi vung vungin min en rùn a," I rilru puitling thar ta thut mai hi eng vàng nge? I țap ka hmu ngai tawh bawk si lo," a ti ta sup a.



"Țah ka duh tawh hlei nem."



A mitko a lo sàn ãk a," A va țha ve! Hriat reng tùr a nih chu," a ti phawt a, chutah, sawi zawm lehin," Vawiin lamah dàwrah hmuh țha i hmu a ni lo maw?" a ti leh a.



"I lo țawng zêl chuan ka ziak chak thei dâwn miah lo a nia."



"Ok, ka ngawi nghal e, ka lo thlîr char char mai ang che," a ti ta sup a.



Ka nuih sak a.



Assignment ka tih chhûng chuan kan țawng ta lo. Ka ziak char char a, ka kut a kham deuh hnuah ka chàwl a, ka va en chuan min lo la en char char a niang, a lo nui suk a.



"A kham har ka ti rêng a."



"A kham lutuk pawh a ni lo, ka chàwl ve hrim hrim a nih hi. Enkawl pah che hian tihian ka ti bek bek ang a, ka zo thut mai ang, ka ziak tam tawh asin," intithei fé hian ka ti a.



"A va làwmawm ve! Ka puihna tel miah lovin i zo thei dâwn tihna a nia, min mamawh tawh lo ang tih chu a hlauhawm viau mai a," a lo ti a.



"A teuh lo!!" uar zet hian ka lo ti a.



A nui suk suk a," I chawlh pahin ka bulah hian lo mu ve teh," a ti a, kei pawh chuan thu awih takin, a bula mut thlâk chu ka rual nghal a.



Ka kut chu a vuan a, engmah phei chu kan sawi lo, kan thinlung chu a inhmu dùn hle si a, ngawi renga kan awm a kan inen hian thu kan sawi nasa daih zâwk a ni.



"Zanin chu ka bulah riak leh la aw?"



"Ka puin mak min ti ang, a hmaa ka riah pawh khân ka zîng tho kha min en duh riauva."



A ni tak tak, min en duh thar ta riauin ka hria a, ka riahpui ngam ta lo va.



"Ka khawih che a ring a niang chu."



"Khawih ve bawk ang chu maw le. Kei pawhin i  biangte chùlsakin, i kut vuana mut pawh ka duh ve bawk a," ka lo ti a.



"Ka sawi awmzia i man lo."



Ka en vang vang, a mitmeng awmze nei zet ka hmuh tâkah chuan râpthlâk ti zet hian ka melh a," Awi, a zahthlâk! Thil ni lo lo i pa ngaihtuahtîr teh suh," ka ti a, ka sen țâwn țâwn hialin ka ring.



"Thil ni thei lo a ni hlei nem."



Ner nâng hian khumah chuan ka țhu a, a dàr nâ kâwk pah chuan," Chêt pawh i chêt țhat theih loh tawp kha," ka ti a.



"Kan tichhin dâwn em ni?"



"Ngawi mai teh! Ka hlau mai tùr che asin."



"Hlau teh nâng! I zawngchhang ang."



"A, i ngaihtuahna a thianghlim lo tlat, ka riahpui dâwn lo che," tiin ka tho ta tharh a, ka lehkhabu chu ka seng fel nghal a.



"Mangțha nân fawh pawh ka hlawh dâwn lo maw?" vui hmui pû zet hian a ti sup a.



"Dâwn e," ka ti a, kal hnaiin a hmai bula zu kun hniamin a chalah ka fâwp phawt a, a hmuiah ka fâwp ta chauh.



"Mut tui le, ka hmangaih," ka ti sap a.



A nui hawk a," Eng maw?! Han sawi leh teh," a ti a.



"I hriat reng kha. Min nuih zui, ka sawi tawh dâwn lo," amah pawh en ngam tawh lo chuan ka lehkhabu chu ka la a, a room ațang chuan zak bîng mum mum chuan ka chhuak ta a.



Room ka thlen veleh lehkhabu chu dahin ka biang ka dawm vang vang. A va zahthlâk tak! Lo sawi mâk lék tùr a nia, ka sawi zo vek tawh si, ka zak. Min nuih kher lo se chuan ka zak lutuk lo mahna.



A tûk ațang chuan a bula awm châk viau mah ila, ka hêl ta deuh char char. A zahthlâk ém alawm, ka cheziaah ka duhzia chu a hre vek tawh tho a, amah koh nân 'Ka hmangaih' han tih deuh kalh kha a ngai lêm lo asin, ka hmui ka lo vêng zo lo kha a pawi, a zahthlâk bawk si.



Ka ngaihtuah lêt a, ka zak telh telh maiin ka hria. Min nuih kher lehnghal, a zahthlâk cheuh cheuh.



Kâr khat a ral leh meuh chuan a dam ve tawh hle a, a kut erawh a la hmang ngam lutuk lo va, in chhûngah pawh a vei a vei thei ve ta; mahse, chêt tam loh a tân a țha tih a hre ve tho va, exer a mamawh vàng chauha chê a ni.



LMa pa pawh kan kan leh tawh a, a hma ai chuan a tla hniam hret tawh tih ka hmu thei. Mi hlim thei tak a ni chung pawhin a natna chu a na ve tâwk tih a hriat theih, a chêr sawt tih ka hre bawk a, ka khawngaih tak zet. He cancer hi ka haw ngawih ngawih, tu mah hian he natna hi tâwk lo se, tuar lo se ka duh.



Assignment ka ti zo a, ka pu hrilh tawh lovin keimahin ka submit. Zîng leh tlaiah min hruai thei rih lo ta bawk a,  Âtei pawhin, min ngaihtuah tawh lo tùra ka hrilh hnuah chuan min thlah lo ve ta. Hlauhawm a awm tawh lo bawk a, zalèn taka vahvêl pawh nuam ka ti ve alawm.



Ka pu chuan ka hêl ngar ngar tih a hre ve tho chuan ka ring. Ka zak tih pawh a hre ve tho va, min be luiin min fiam bîk lo.



Ka pu rawn phei ațanga kâr thum a ral meuh chuan a dam viau tawh, a chhûngril lam chu ka hriatpui lo nain a dam ve viau tawh tih a cheziaah a hriat; mahse, a la indìm viau tho.



Zan khat chu LMa leh U Melo-i an rawn lang leh nawlh mai. Sitting room-ah kan lo țhu khâwm hiai a, LMa chuan min rawn hmuh veleh min nuih nghal var var a.



U Melo-i ka hmuh chuan mak ka ti, a pa vàngin a rawn haw a ni àwm sia, hetah a rawn lêng leh daih bawk si nèn, mak ka ti a ni.



Mi dang chuan an lo be nghâl vat a, ka pu pawh chuan a lo be ve tho. A hma khân a duh lovin an ina kal pawh kha a duh lo a ni sia, tunah chuan hma a lo sâwn ta hle mai!



Thingpui lum tùra ka thawh tâk daih avàng chuan an țawng ka hre thei ta rih lo va, LMa pawhin min rawn pawh har lo.



"I thingpui siam in pawh a khât ta, zanin chu ka vànnei hle mai," nui pah hian a rawn ti a.



"Lo lêng duh hek lo che," ka ti phawt a, thutak deuh zâwk hian," Zaninah i pain thil a ei peih em?" tiin ka zâwt nghal a.



"Aw, ka uin a ei duhzâwng tak a rawn lei haw a, thil tuirîl lam mah ni se, a ei ve țeuh mai," a ti a.



"A làwmawm nasa a nih chu, tiraw?"



"Nia, mi hi an fel a, a ei duhzâwng tùr hi an rawn ken liam liam țhìn a, an rawn tlawh peih viau bawk a, a làwmawm țhin tak tak a ni," a ti leh barh barh a.



Thingpui chu amah ka pe hmasa  phawt a, no dang chu sitting room lamah chuan ka va chawi phei a. U Melo-i chu ka pu bul hnaiah a lo țhu a, an inhnaih lutuk lo nain ka mit a tikham pha deuh tho. Bâkah, thîkna rilru a rawn tho nghal bawk.



"A va tui dâwn ve!" a lo ti sup a, nui lui deuh hian ka melh a, ka thîkna chu tihlan loh hrâm chu ka tum.



"Novi maw kha? Kan inah hian i hming hi a ri nasa thei a nia," tiin min lo fiam a.



"Chu, kam chhe tleuh nân LMa chuan ka hming chu a lo hmang țhìn a ni maw?" ka ti ve a.



"Ni nâng aw, kan hlimpui thei khawp mai."



LMa hnêna ka va phei chuan," Ka hming hi kam chhe tleuh nân lo hmang tawh miah suh," nui chung hian ka ti a.



"Kam chhe tleuh nân ka phal teuh lo mai! Kam țha atân chauh ka hmang țhìn," a lo ti thung a.



"Ka awih lo!"



Min en chunga chek hlak  pah chuan," Ka țhiante hi kam chhe tleuh nân mai mai ka hmang phal lo che u, țhian vàn nâklaia," a lo ti thung a.



Kan ngawih vang vang hnuah chuan," U Melo-i hi engtikin nge a lo phei a?" tiin ka hriat châk ém avâng chuan ka zâwt a.



"Niminah maw le, ka pa rawn kanin chawlh a lo la zawk. Âtei rawn hmuh a duh a, kei lahin rawn lènna chance-ah ngaiin ka rawn zui hmiah mai," tiin min chhâng a.



"I over e, i lo lêng reng reng thei alawm."



"A zahthlâk ve alawm le!"



Kan titi tak tak hmain no ka seng fel a, sitting room-a ka ve phei chuan ka pu chu a room-ah a lût tawh a niang, ka hmu miah lo. U Melo-i pawh chu ka pu room ațangin a lo chhuak chiah, ka khawng awtin ka hria. Heti khawp hian an lo inhnaih a, a room-ah hial a lût ngam a nih si chuan kei hi...



Pu ber chuan," A dam țha tawh viau asin, i rawn ngaihtuah a i rawn tlawh leh hrim hrim hi i tilàwmawm tak tak a ni," a lo ti a.



U Melo-i chuan," Nia, ka rilruah a awm reng a, hun remchâng a lo awm hlauh nèn, ka rawn kal thei ta a ni. Ka pa rawn kan pahin, hetia a lo țhat tâk viauah chuan ngaih pawh a țha sawt alawm," a lo ti ve a.



"I fel lutuk, hun chêp tak kârah i rawn kan hrâm hrâm a."



"Âtei hmuhna a lo rei ve tawh bawk sia, hmuh pawh ka châk phah tho a," tiin Âtei chu nui sâng hian a melh a, a hmel hi chu a țha thlâwt a ni.



"Chuan, engtikah nge i phei leh ang?"



"Naktûk chawhnu lamah a niang, motor remchâng a awm dâwn hlauh a," a lo ti leh a.



Hm, naktûkah a phei leh nghal dâwn e, pawi miah lo. Heta a awm ve reng chuan thikna avàngin ka awm a nuam thei lo ang.



No chu ka sil a, a dahnaa ka dah hnu chuan LMa chuan," Lehkha i zir nasa tawh em?" tiin min zâwt a.



"Eng lehkha maw?"



"IGNOU office-a i kal kha ka hmu che alawm, ka rawn ko duh lo che a, i ti a nih ka ring nghal mai a ni," a ti leh a.



"I va hre thei!"



An haw har vak lo. An haw hnuah chuan LMa thil sawi kha ka hre chhuak a, lehkha ka zir a ngai, ka inbuatsaih a ngai a ni. Ka zir hma leh ka tân a țha, nakinah zir vak a ngai lo deuh ang a.



Ka phone a rawn ri țêt a, ka en peih lawk lo va. A hnu lawkah a ri lehnghal zat, ka ban ve ta țãwk.



*Zanin chu lo riak la?* tih leh,



*Ka khawih i hlau em ni?* tih hi a lo ni a.



Ka chhãng lo ang, a room-ah u Melo-i a luhtîr tlat. Ka thîk hle țhìn tih pawh a hria ang, mi ang pângngai tân chuan a hai theih loh chiang alawm.



Beep beep



Ka'n en leh a, *Induhnu* tih tê chauh a lo ni a.



Ka nui sak. Ka induh vàng pawh a ni bawk si lo va, ka titàu ve a ni zâwk sia, a man lo ve chiang.



*Nuam chu i tichiang alawm zanin kha* tiin ka reply a.



*A chhan chu?* tih hi min rawn thawn leh a.



*I hre zâwk ang chu* tiin ka reply.



*Ka hre miah lo, i room kawngka lo hawng rawh*


Het, a teuh lo, ka hawng lo ang. Zaninah hlauh phei chuan a hmui bawlhhlawha min fawh pawh ka duh hauh lo, min tawk tùr pawhin ka duh lo, a inbuala a insil fài loh chuan. U Melo-i sùlhnu ka chhui duh teuh lo.



*Lo hawng teh*



He pa hi, a ti tak tak thei lo ang!!





*TAKNA TAK TAK NEI LO LEH THINLUNG AȚANGA CHHUAK NI LÊM LO, HRAWK ACHIN CHUNGLAM AȚANG CHAUHA CHHUAK CHAWIMAWINA LEH FAKNA TU HNÊNAH MAH PE NGAI SUH, FAK DERTU I LO NI PALH ANG E*





☆SILVER ZUNGBUN☆ - 31 By Dingdi Pachuau



Ka hawn lo ang, zanin chu a zauthau tlat, a dik tlat lo. A rawn dam țha chho dêk dêk a, indim a ngaih tehlul nèn, U Melo-i lo lèn vàng vek. Eng power nge maw a lo hman ni? Hetiang hian a awm ngai si lo.



*Ka hawng dâwn lo, mu rawh* tiin ka reply.



*Please?* a la rawn ti fan. Khawngaih min rawn dîl maw? Ni lo, ka pu kâ ațanga khawngaih dìlna chhuak tùr hian ka la suangtuah chhin lo.



*Ka hawng dâwn lo, mu mai teh* ka ti leh a.



Kawngka a rawn ti ri ta. Ka phu zawk mai, mi dangin an hria ang tih ka hlau, a tiharh ngei ngei ang.


 He pa khawsazia hi chu aw. Mi dan chêp dàn hi chu a hre teh e.



"Lo hawng mai teh," zàwi tê hian a rawn ti thûm dût dût a.


 Ka va hawng nge nge.



"I room hi a ngaihawm vawng vawngin ka hria, ka room chu ka hnê."



"Hetah mu la, i room-ah ka mu ve thung ang chu?"



"A tihchi viau ang," tih leh ka khuma mut chu a rual nghal a.



"Ka ti mai mai a nih kha."



"Lo mu ve rawh," te chu a la ti zaw mah a, ka khum a ni zâwk reng sia.



"A thuhrimah, engati nge min hêl char char? A chhan ka hre duh, natna țha lo ka vei niàwm takin min țih a," a ti leh a.



A lo hre ve chiang tak zet a nih hi, a chhan pawh a hre tho ang.



"Theihnghilh daih rawh."



"Ni lo ve, lo mu la, sawi chiang teh ang," tiin a mutna bul chu a bêng thuk thuk a, mu ve tùrin min duh tihna.



Ka mut ve hnuah chuan kan ngawi vang vang a.



"I thil sawi kha i ti tak tak em?"



Ka hre nghal, sawi chhuah ka duh tawh lo asin le.



"Aw."



"Min duh avàng maiin khatiang thil kha sawi tawh miah suh, min hmangaih thu sawi tùrin min hriatna a la rei lo lutuk," a ti ta daih a.



"Inhriatna a rei kher a ngai lo," ka ti ve thung.



"I la naupan ém hi, kum hnih kum thum hnuah, ni lo, kum sàwm hnu vêlah chuan i hre chiang mahna. Min duhna hi hmangaihna emaw ti suh," tiin ka kut chu a hûm vang vang a.



"Chuti, min hmangaih ve nange?" Ka rilru a tina.



"Ka duh che tih ka phâ lo, i nat pawh ka phal hek lo," a ti leh a.



Min hmangaih ve lo tihna. Min duh tal alawm, ka inhnemna chu a va ho ve!



"Min lo kawp mai mai a ni maw?"



Nghet zeta ka bâna chelhin amah en thei tùr chuan min kuai her bawk a, thu tak zet hian," Ka kawp lo che, ka duhzia che i hre bawk. Kan tún hun zêl hi ka ngai hlû a, hlim reng pawh ka duh," a ti a, ka hmuiah chuan dîm tê hian min rawn fâwp a.



Ka tawlh sawn ta  vat, ka hmui chu hupin," I hmui kha sil fai phawt rawh, U Melo-i sùlhnu ka chhui duh lo," ka ti ta a.



"Eng maw?!"



"I room ațanga a lo chhuak kha ka hmu reng alawm."



"Chuan..?"



"A rawn kan che avàngin ka sawisêl lo; mahse, room-ah in awm dùn kher a," ka ti sap a.



"Ka naute lian zâwk tak hi chuh, i ngaihtuahna i lo sêng nasa mah mah a nih kha. Ka tawk hauh lo, ka bialnu a ni hlei nem."



'Ka tawk hauh lo.' Chu thu chuan min va tihlim leh sî ém! A fâwp emaw ka ti a, nia, ka lo suangtuah thui mah mah a ni.



"I fâwp a nih ka ring a."



Room ațanga a chhuah hnu chuan ka nui var var, ka hmui chu ka'n khawih a, a thîp lek lek, kan duhthawh ve ém atin ni. Tihian, lungawi lo titau kha min han tihlim leh hle chu a ni sia, a mak ve ngawt mai.


*******


Zanriah kan ei laiin a phone a rawn rì a, chaw ei laia phone call lo kal hi a chhâng ngai lo; mahse, tuna mi hi chu  caller a en hnuah a chháng ta vat a, a tho zui nghal bawk. Makti deuh hian a tho chhuak ta daih chu ka en zui vang vang a.



"A thawhpuite an niang," Âtei chuan a lo ti sap.



"Kal a tum leh tawh tihna maw?" tiin ka zâwt vat a.



"Hre nâng aw, engmah a sawi ngai loh hi," a ti leh sap.



A kal leh chuan eng thil nge thleng leh ang? Hliam a va tuar leh ngei ang, a nunna tân pawh a hlauhawm ngei tawh ang, kan inhmu leh ang em? Dam hian a rawn kîr leh ang em? Bànsan tùrin thlêm ta ila?



Zàna ka room-a a rawn luh lai pawh ka lo hre lo, ka lo ngaihtuah mûk lutuk a. Ka kut a rawn vawn chuan ka phu zawk, a inthiam lo hmel hmuh tùr erawh a awm miah lo.



"Thil țûl lo a lo ngaihtuah leh ta!"



"Kal leh i tum em?" en vang vang chung chuan ka lo zâwt thung.



"Kal ang."



Hm, a kal dâwn a nih chu, kal lo tùrin ngèn ta ila, min hnial ngei ang; mahse, ka ngèn tho ang.



"I kal lo thei ang em? I la dam țha lo sia?"



"Țhat lohna ka nei tawh lo."



"A nih, i va kalnaah chuan hliam va tuar leh ta la? Min ngaihtuah ve miah lo em ni? Hrehawm ka tihzia kha..."



"A țha lo zâwngin i ngaihtuah a nih kha. Thil țha lo zâwk thleng tùrah ngai kher lo la."



"Min ngaihtuah lo hle mai."



"A harsa zâwngin awm tum lo hrâm teh."



Nuam a tihzâwngah chuan min ngaihtuah lo tak zet a ni, kei hlauthâwng rengin ka lo awm ang a, amah ngaihtuah rêng rêngin, a hliam ang em, a thi ang em, nge a che fuh zâwk ang tih ngaihtuahin hun ka lo hmang dâwn asin.



"Ka rilru i tina tak zet a ni," ti sapin ka insût hraih a.



"Chan chhe tùrah min dah kher lo la, bâkah kan thil tih lai hi a laklawh lutuk a ni, ka tel lovin an ti zo thei lo ang," a ti leh a.



"A nih, hemi zawhah hian i bànsan ang tih tal min hrilh la?"



"Tleirâwl ngaihzàwn hi chu a va buaithlâk tak!" a ti hluk a, ka rilru a tihnatzia hria se chuan he thu hi a sawi kherin ka ring lo.



"Ka rilru tihnat dàn i thiam hle mai." Ka țawng ring ngam tawh lo, ka rilru nat dàn chu na tak a ni.



"Kalsan harsa tùrin awm suh."



Kan ngawih vang vang hnuah chuan," Kal rawh, tluang takin i tih tùr chu i ti dâwn nia," ka ti sap a.



"Chutiang tùr chu a ni," ti supin ka țhutna bulah chuan rawn kalin ka hmaah tak chuan a rawn țhu a.



"Naktûkah ka kal dâwn sia, i hlim hmél min hmuhtîr la?"



Naktûk maiah a liam leh tawh dâwn maw? A la dam țhat loh nèn, a chhûngte pawhin an hnialin an ui bet thei lo a ni ngei ang.



"Ka hlim hlei nem."



"Thil ngaihtuah vak vak suh ka tih țhin kha, thil țha lo ka chungah a thleng dâwn lo, ka lo haw thuai dâwn alawm," tiin ka kut chu lain zawi muang hian a la kâng a, dìm tê hian a fâwp zauh a.



"Nui rawh le."



Za lo zet hian ka nui lui a; mahse, ka mitmengah chuan ka nui lo chiang tih a hmu thiam ngei ang.



Zàn ka mu țha lo, zîng lamah ka mu thei ve chauh, ka thawh tlai phah. Ka thawh ve meuh chuan ka pu hmuh tùr a lo awm tawh lo, a kal hma viau niin pu berin a sawi.



Nizàn khân inthlah nân min fâwp  lo va, min mangțha hek lo. Ka ngaihtuah ngun poh leh ka rilru a tina zual, ka khawvêl hi a ngui ruaiin ka hria.



Nilêngin ka awm a nuam lo va, ka hlim thei hek lo. Nuih dera customer lo chhawn chu harsa ka ti lutuk, thil țûl lo ngaihtuah lo tùr khân min ti a; mahse, kei aia a hna a ngaihsak leh a thlang zâwk hi mak ka ti, min lo duh tâwk lo niah ka ngai hmiah. Hmangaih thu phei chu sawi pawh a sawi duh miah loh kha.



Mahse, a rilru ang chu ka pu ve thei si lo. Ka hmangaih a, ka duh a, ka rilru min tihnatsak mah se ani bâk duh ka nei lo, ka nei hek lo ang.



Ni tin chuan a call leh a message ka châng; mahse, a reh vang vang. Ka beisei sâng lutuk em ni? Nia, a dik a ni, ka beisei sâng a ni. A buai pawh a ni ve ang chu, Princess-i pawh a rawn call ngai miah loh hi, a buai hle a ni ngei ang.



Mahse, tlai leh chhùn lamah pawh a rawn call a ni maithei asin, ka lakah erawh thehhmeh ang mai a ni, a chungah thil țha lo a thlen tawh loh hrâm ka beisei, țawngțainaah ka thlen ziah, ka tih theih tâwk a ni tlat.



Ka rilru kal ding lutuk vèn nân zànah lehkha ka zir ta tluk tluk a, phone pawh ka khawih ngai lo. TV pawh ka thlîr ngai hek lo, nakin lawkah exam a ngai dâwn si a, hetia ka lo zir char char hi a țha ber.



Dàwrah chuan Mary leh Feli chuan customer awm loh kârah chuan nizàn lam chanchin thar chu an sawi dùn barh barh a. Kei erawh chuan ka hriat ve miau loh avàngin ka ngaihven lêm lo va.



"Pawisa lem tiraw an man țeuh kha? An tenawm tak tak a ni," Feli chuan a ti bawrh bawrh a.



"Tûn hnaia an tih țan chu a lo nih loh tawp kha, an lo hausa thûr thûr pawh hi a lo mak lo ve," Mary chuan a lo ti ve a.



"An lo tenawm chhûngkua e, an hausakna hi a lem ațang vekin a lo ni sia, an man chhuak hi a làwmawm ka ti. An thil tih dàn hi a runawmin Mizo min timualpho bawk si  a, hetiang mi hi chu chhui chhuak hmiah hmiah se ka ti,  a chhui chhuaktute hi an fakawm ka ti thlâwt a ni," a ti leh bawrh bawrh a.



"Eng chungchâng nge in sawi?" tiin Mary chu ka bekbàwr a.



"A mak! I phone kha hmang țangkai ve teh."



"Senior-a chauh ngaihtuah lo hian news hi hre ve teh, zoram khawvêlin an buaipui luih luih laia lo bengngawn bîk tlat chuh! Police-in pawisa lema inla-milian an man chhuak," Feli chuan a ti ta kalh kalh a.



Customer an rawn luh avàngin ka zâwt chhunzawm thei lo.



A hnuah ka zâwt fiah leh a.



"Aizawla Hotel lár tak Unique Hotel neitu Pu Vanmawia'n pawisa lem a lo buaipui a, Delhi-a vai pakhat, hetiang lama mi thiam tak nèn țang dùnin pawisa tak angin an hmang țhìn, an hotel bâkah dàwr lian pui pui an neihte pawh hi hetiang an tih ațanga bul țan vek hi an lo nia, chu chu nimin lamah, ni lo, chumi hma daihin police lamin an lo chhui tawh a, nimin lamah an man chhuak ta a. Tichuan, i hre tawh em?"



"A lo nih chu."



Pawisa lem. Pu ber thil min hrilh ka hre chhuak zawk mai. Ka pu thil chhui mék kha pawisa lem hmanga sumdàwnna lam ni khân a sawi kha. Hei hi a ni thei ang em? A ni ngei ngei ang, polce lam nèn tang rualin an chhui tihna a niang maw? Hm, tunah chuan an chhui chhuak ta bawk a,  an chhui chhuah tawh ber chuan a lo haw vat thei tawh ang chu.



Thil țha lo thlen thu an sawi mang si lo va, ka pu chu a him tùrah ka ngai. A him loh chuan pu ber emaw Âtei emaw an rawn hrilh leh ngei àwm si a.



Zànah news ka thlîr ve ta. Chipchiar zâwkin an rawn sawi a; mahse, ka pute hming, hnathawh chu an rawn sawi lang lo, police lam chiah an lang. News puangtu chuan mi dang lo tel ve leh inhnamhnawih police lamin an chhui mêk thu sawiin Hotel neitu Pu Vanmawia chu tuna kan Education minister u chiah a nih thu a sawi.



Âtei ka melh vat, a lo meng phâwk nasa. Heti a nih chuan Minister leh mi dang dang pawh an inrawlh maithei a ni, rin aiin a khirh ru zêk maithei. An hausa hlawm àwm sia, an chhui chhuak thei kher ang em le?



"An tel ve kher nâng," ka ti ringawt. Âtei țhianpa Danny-a kha tuna Education minister fapa hi a ni bawk sia, an hming a chhe tel pha ve thei tlat. Âtei rilru pawh a phâwklèk phah rêng hi.



"An hming chu a chhe pha ve tho tho tawh alawm, Danny-a chu a zak ngawt ang chu."



Kei chuan," An lâr tlat a, mi chuan an hre rang lo thei lo; mahse, an inhnamhnawih chuang nâng, a pa unaupa a nih vàng ringawtin ani nghawng pha lo hrâm se," ka lo ti a.



Lehkha ka zir hlek nain ka rilruah a lût hlawl lo. Ka pu mawlh chu, an thil chhui bulpui ber an chhui chhuak tawh a, min rawn call ve tal tùr a nia, he pa hi chuh, min ngaihtuah lo ve ngawt mai.



Sunday-ah kan inkhâwm vek a, chawhnuah LMa pa kan va kan leh a, a hma aiin a lo chêr leh tawh. Ka khawngaih tak tak a ni, a aw pawh a thâm deuh tawh bawk.



Zànah ka inkhâwm ve teh tlat. Zànah hian ka inkhâwm zen zen lo, thla khatah vawi hnih chu ka inkhâwm ve maithei tih chauh a ni. Zanin erawh kan kohhran upa zînga ka duh deuhin thu a sawi tlat a, ka hmaih phal lo a ni. Thu sawi a thiam bâkah a nunpui tlat a, hei tak hian a thu sawi ngaihthlâk a tinuamin a thu sawi hi a nung hliah hliah bîk ka ti.



Ka pum a nawm loh deuh avàng erawh chuan ka che deuh sek, thu sawi pawh ka ngaithla țha thei lo. Ka pum hi a na ngai si lo va, mak ka ti, eng ka ei nge niang aw tih ka ngaihtuah a, ka hre chhuak mai lo. A rei deuh hnuah pawh a reh loh avàngin haw mai ka rilrûk.



Inthiam lo zet chuan ka chhuak a, kawngah pawh ka hmanhmawh teh chiam lo, ka pum a na tlat sia, ka kal chak thei lo.



Kan in bul ka thlen chuan ka pum nâ avàng chuan ka'n ding leh vang vang a, ka kûn deuh bawk. Ka kal țan leh chiah tihah chuan ka hnung lamah thâwm ka hria a, ka en lêt hma chuan kut chak deuh hian luan hnâwng deuhi  hlek hian  ka hmui a rawn hup hmak, ka au thei lo.



Ka bag ken ka thlauh nghal a, ka thâwk țhat theih loh vàng leh ka pum nâ avàng chuan ka țang rei thei lo kher mai, ka âwn riai riai a, ka thil hriat chu ka mang hriat ta ruai mai.



Chutah, ka thil hmuh phêin ka hriatna a chàwl ta țhup, a thim ta vek!




*RIM TAKIN HNA THAWK LA, RINAWMNA ÛM ZÊLIN, I PHÂK TÂWK LEH THEIH TÂWKAH THATCHHE SUH, HNUNG LAMA MI NUIHZAT I LO NI HLAUH DAH ANG E*

☆SILVER ZUNGBUN☆ - 32 By Dingdi Pachuau

Ka harh chhuah meuh chuan room pakhat chêp zetah hian ka lo awm tawh, a eng fahran lo, a êng ruai ringawt. Ka awmna chu ka ngaihtuah chhuak thiam lo lek lek a; mahse, rei ka ngaihtuah lo. Tu nge hetia min mana min khungtu hi ni ta ang? Rin tùr ka hre miah lo.

E, Rin-misuala kha a ni thei ang em? Police khân an man ve rih lo ni khân ka hria a, ka hre chiang tlat lo, ka ngaihtuah lo lutuk a.

Eng vàng nge niang? Pawisa vàng ti ila ka nei tam si lo. Ka tui a hâl huam huam mai ka ti, ka han hawi kual a, room chhûng chu a fai loh hmel kher mai, room luah ngai loh rim a nam. Chhuat pawh a paw deuh thûr alawm, ka mutna erawh a balh leh balh loh ka hre lo, khum lian lo tak niin dâp a inphah a, puan pakhat mah a awm lo.

Ka puan ven chuan ka intuam țha deuha, tho chhuakin ka pheikhawk flat chu inthawlhin ka vei chhin a, chhuat chu thingphel chhuat a lo ni miah lo.

Ka awmna hi khawi lai nge ni ang? Min mantu kha khawiah nge a awm?  Eng nge a duh? Eng vànga min man nge a nih ang? A rawn kal țêp tawh ang em? Engtia min tih nge a tum ang?

Êng chu ventilation sâng zet ațangin a lo lût a, kawngkhàr pakhat chauh a awm. Chu chu ka han nam chhin a, ka pawt chhin leh bawk; mahse, a nghet churh mai, a che àwm pawhin ka hre lo.

Khumah chuan ka lêt leh a, ka tui a hâl a ni. Room-ah lah chuan ka mutna khum leh keimah bâk thil dang awm a awm lo rêng rêng, tihian min ngaihsak lova min thihtîr a tum em ni ang? Tuihãl dangchârin ka thi dâwn a nih àwm hi.

Dârkâr eng emaw zât(a nih ka ring) hnuah chuan kawngka chu a rawn ri rak rak a, a rawn inhawng ta. Khumah chuan ka țhu thuai a, puan chuan ka inkhuh țha sauh sauh, min mantu hi a hlauhawm leh hlauhawm loh ka hre si lo va.

Rawn lût tharpa chuan bottle hian tui ni àwm tak hi a rawn keng lût a, ngun deuhin min en tih rêng ka hre lo. A bottle ken mawlh chuan ka mit a la a ni, a chhûnga mi saw tui a nih ka beisei bawk.

"Min hria em?"

Ka hre lo hrim hrim. Ka vawi khat hmuhna a ni hialin ka ring!

"Khawiah nge ka awm?"

Nèlawm lo zet hian a nui hawk a," Hei, inah i awm hi, a nuam i ti bawk em?" a ti a.

"Engati nge min man a?"

"Phubâ a nih hi."

Phubâ. Eng phubâ nge ni ang? Tu phubâ nge ka chungah lâk a tum ve ngawt?

"Tu nge i nih?"

"Ngun deuh khân min en rawh, min hriat chhuah tum bawk la, ka phuba lâk tum chhan chu i hre thei ang. Chuan, i thih hma hian kei bâk mihring hmêl i hmu tawh dâwn lo a nia," a ti leh a.

Min thah a tum tihna a ni ang em? Hriamhrei a rawn keng bawk si lo, min rêkhlum dâwn a ni ngei ang, nge min sual phawt ang a, chumi hnu lamah?

"Min that dâwn maw?!" Ka hlauhna ka thup hrâm hrâm.

"Dâwn e; mahse, nuamsa taka thihtîr che ka tum hauh lo. Rilțâmin i awm phawt ang, rilțàm hrehawmzia i tem ve ang. Chu chu i pu vànga kan tawrh a nia, i pu tawrh ai chu nang, a tunu hian i tuar dâwn ta a nih hi," a ti leh bul bul a.

Ka pu maw?!!! Tu ka pu nge? Lâna hi em ni a sawi le? Ka man thiam chiah lo.

"Tu chungchâng nge i sawi?"

Thinrim tih hriat zet hian min melh khui mai a, ka hlau rilru khawp mai. A chhan chu a mitmengah chuan a ti mai mai lo tih a hriat reng mai si a, min thah duh mai pawh ka ring tak tak a ni.

"I pu, i nu pa kha maw le. Champhaia a in hmun khi ka pu tâ a ni tih hre rawh, a neitu dik tak chu ka pu a ni. I pu hian dik lo takin a neihsak a, neih engmah nei lovin a awm phah. Ramtuileilo a ni a, ka pu kha rilțàm vàngin a thi asin, i pu vàng vek a ni," a ti chhuak ta phiar phiar a. A țawng a ring bawk a, ka beng a khâwk rum rumin ka hria.

"I pu kha thah tlâk a ni asin, ka pu ramtuileilo lehnghal, engmah nei nei lova a awmtîr duh kha a nunràwnthlâk tak zet a ni, a tawrh ai chu i tuar dâwn ta a nih hi, rilțâmin i thi ve dâwn!"

Chutiang chu thil awm dàn a ni tak tak em? Ka pu chu ka hre ve hman lo a niang, chutiang mi dik lo chu a lo ni rêng em ni le?

"A pawi ka ti-"

"Pawi lo ve, hei a tuar ai i tuar dâwn alawm, i thi lai chu nuamti takin ka lo thlîr ang," tiin tui bottle chu khumah chuan a rawn dah a, kei ve thung chu hlauvin ka lo tawm chãwih thung.

"Min hlau suh, ka khawih duh hlek lo che. I pu tunu i nih chhûng chuan ka hmêlma lian ber i ni a, ka ît che i ring lo bawk ang chu. Tui hi ka dah ang, ei tùr dang erawh beisei suh, tui hi i in zawh hunah i thi mai ang, i thi tùr en hian ka lo kal leh țhìn ang," a ti leh a.

"Ka u Jail-a thawntu kha i ni bawk a, i pu i lo chhùn hle a nih hi. Kan chhûngkaw tân chuan vànduaina in lo ni tak zet. Ka u angin in hmun khi ka dîl lêt ve lo ang che, i thi lai ka hmuh hunah chauh ka lungawi ang," a ti leh nghut nghut a.

A u Jail-ah ka thaen maw?! Chuan, in hmun min dîl lêt ve dâwn lo. Chuti, he pa hi tu nge?! Ka pahrawn nau a ni tihna!!

E khai! A u phuba leh a pu phuba lâk kawp a tum maw? A sawi tâkah chuan ka pahrawn nèn an inang deuh; mahse, ka va hmu ve ngai lo si ve!

A chhuah hnuah chuan beidawng zetin khumah chuan ka țhu át a, ka tuihâl pawh a reh vekin ka hria. A thil sawi kha thil thleng tak tak a ni ang em le? Zawh tùr tumah ka hre bawk si lo, zâwt thei tùr leh thu dik tak a ni em tih hre tùr pawhin ka dam chhuak ang em?

Kawng a hawn khân pâwn êng deuh uar kha hmuin thing lian pui pui ka hmu bawk. Ka awmna hi ramhnuai a ni ngei ang, a nih loh pawhin mi huan a ni tal ang. Chuti a nih chuan ka awmna hi a reh ngawih ngawih dâwn a nih chu, tuin nge ka awm a ni tih rawn hre tehlul ang? Au ta vak ila min lo hria an awm ang em le?

Tui bottle chu ka ban ta nge nge, sual viau mah se tui in tùr ka la nei tal a, a sual pawh a ni chiah em le? A pu phuba lâk a duh ve a ni mai a, a rilru chhûngrila thinrimna kha a inup rei tawh viau a nih kha, thiam loh chantîr viau dâwn ila ka pu chuan a lo thiam lo a nih tak tak chuan...

Ventilation ațanga êng lo lût chu a nêp telh telh avàng chuan khua a thim țan a nih ka ring. Hetah hian keimah chauhin ka awm a ni àwm si a, ka hlau...tùr a ni lo. Hlauhawm pawh lo kal se, pâwn ațangin kawngka kalh hnan ka nih hi.

Khua a thim hnuah chuan zànlama rannung hrâm chiho an hrâm chuah chuah a, khumah ngawi rengin ka țhu. Thâwm ka ngaithla kar, thâwm ka neih chuan ramhuai a lo kal ang tih ka hlau, ka thaw ngam țâwk a ni.

Ka chhûngte khan ka awm loh thu hi an hre ngei tawh ang a, an buai ve viau ang le. Ka pu a lo la haw phei hman dâwn si lo, police-ah mi bo angin min report ang em? Ka phone tal kha kawl ni ila...

Ka piah lawka sihal ni àwm tak û rî chuan min tiphu chiang lutuk, bangah ka lu ka tauh dawt. Ka hmulthî a ding sung sung bawk, hlauh avàngin ka thi țêp hialin ka ring.

Ka hlauh lutuk vàng chuan ka zun a chhuak lutuk, zung tùrin toilet a awm bawk si lo. Ka îp țàng țáng a, a hnuah erawh ka îp thei ngang lo, bangah indap chawpin ka kal sawn deuh hlek a, chhuatah ka zung ta ringawt. Tihngaihna awm hek lo, tuna ka awm dàn hi suangtuahna pawhin a chhin tal pawhin ka la suangtuah chhin miah lo, ka nu ka ngai vawng vawng.

Ka nu ka ngaihtuah chhuah tâkah chuan ka nu ka lo theihnghilh tawhzia ka hre chhuak uar uar a, ka pu hian ka rilru a lo luah nasa tawh ém a lo ni.

Ka kut țang ka khawih zauh a, ka nu silver zungbun kha ka lo bun miah lo! Khawiah nge le? Min mantu hian nikhua ka hriat loh lai khân a lo la em ni?

Ka ngaihtuah lêt a, ka room-a bathroom-ah khân ka dahin ka hria. Sunday zîngah ka inbual ngei a, a dik ngei, bathroom-a chhuarah ka dah chiang, ka nu ka hlat sawtin ka hria.

"Nu, min en teh, i fanu hian ka va ngai tak che ém! Eng thil nge ka chunga thleng hi? Ka hre thiam lo tak zet. Nu, hetiang tuar tùr hian em ni min lo hrin? Ka tuar tam tawh i ti ve lo em ni? Nu, thih ka la duh lo asin, hlim taka hun hman chhoh pawh ka la duh ve a," tiin ka nu thlarau chu ka rilruin ka be mawlh mawlh a, ka mittui a luang tih rêng ka lo hre lo.

Ka lo muhìl a, ka nghâwng kham lutuk vangin ka harh a, a la thim vek avàngin ka mu thla a, ka puan chu ka sin, a vawt lutuk lo ve.

Ka mumangah ka pu ka lo hmu a, kan pahnih chauhin a room-ah chuan kan lo awm a, kan lo innei tawh nghe nghe a.

"Ka nupui te reuh tê hi, i va chhe lo tak ém!"

Nui sâng hian," I chhe lo daih zâwk! Bâkah, i fel bawk, ka mamawh lai chein ka kiangah i awm reng bawk si," ka ti a.

"Mkn mamawh țhin vàng alawm ka kalsan loh che!"

Kawngka chu a rawn inhawng a, U Melo-i chu sam lêng suau suau hian police pahnih nèn an rawn lang a.

"Kha nu kha man rawh u, a pu mi sual tualthattu a nia, a tunu pawh hi chutiang chiah chu a ni," a lo ti țhat ţhat a.

"Ni lo, ka ni lo, min man s'u, khawngaihin?" tiin ka lo ngèn lawm lawm a; mahse, police chuan min rawn man. Min chhan beisei zet hian ka pu chu ka en a, ani lah chu U Melo-i kuah chung chuan min lo nuih vur vur a, rilru na zet hian ka lo țap a.

Ka țap chhuak a, ka harh nghal. Ka harh hnuah pawh ka la inhnît tho. Ka mumang mai mai mah ni se ka rilru a tinuam lo kher mai.

Khua a lo êng țan tawh a niang, êng a lo lût tlat. Sava pawh an chiar deuh nawk nawkin ka hria. Khua chu a êng fahran lo nain zîng khua a vâr tawh a, hlauhawm thâwm a awm tawh dâwn rih lo tih hriat ringawt pawh a nuam rih.

Ka tho lo, ka mu leh ta reng. Tih tùr ka nei bawk si lo va, ka mut tam hian tui ka mamawh lo ang a, zun pawh a tlêm ang chu.

Ka lo muhìl leh sek a ni, mumang ka lo nei leh hman. Ka nu ka lo hmu a, hmun hrehawm takah hian ka lo awm a, hna ka lo thawk nasa; mahse, ka bulah ka nu chu a lo awm ve tlat a, hrehawm viau mah se ka nu ka hmu thei chu ka lâwm.

"Nu, hna ka thawk sauh sauh ang a, he hmun hrehawm zet ațang hian ka la chhuak ang che. Hrehawm i tawrh ve hi ka phal miah lo a nia, rei i tuar lo ang," tiin ka bula ka nu min thlîr rengtu chu ka be mawlh mawlh a.

A țawng lo va, min nuih ringawt.

"Nu, i ril a țâm tawh em? Inah lût tawh ila?" tiin ka hmanraw ken chu ka dah a, ka nu chu in chhûngah ka kai lût a, dawhkàna ei tùr tui hmel zet zet lo inhûng țeuh chu ka kawhhmuh a.

"Ei țeuh rawh, ka siam vek a nih hi."

Zochhangban kan chu ka la a, ka ei dâwn chiah tihah chuan ka harh ta daih, ka ui lutuk. Ka pum ri raih raih chu ka hre chhunzawm nghal.

Muthilh reng theih ni lo chu ka harh ta reng mai. Ka rilțâm pum ri raih raih reng chu tihreh ka duh ngawt mai, tui in leh ringawt lah chu zun a tam duh si.

Tihian, engtikah nge rilțàm tuar lo hian ka thih ang le? Chu chu ka thih dàn tùr kha a ni a, rilțàm vànga thih hrehawm tùrzia ka tem chho țan chu a nih tâk hi.

Thâwm hriat tùr a awm lo va, a reh vawng vawng. Chhùn lama rannung leh sava hram thei chiho an hrâm a, pâwna chhuah ve chu ka châk tak zet. Hetia min khung reng chuan ka â mai ang, ka thih hmain ka â ngei ngei ang.

Au vak vak ta ila ka thâwm lo hria an awm ang em? Hetia ngawih tlawk tlawk mai chuh, a hrehawm ém mai. Ka au miin an lo hriat hlauh chuan a làwmawm dâwn ém asin.

"Min pui r'u, he inah hian kalhhnan ka nia, tu emaw ka au ri hria in awm em?"

 Chutiang chuan ka au vak vak a, ka au nasat hnuah phei chuan ka chàu mai dâwn. Ka thâ ka khék a ngai, tunah thih ka duh nghal a nih loh chuan. Ka pu pawhin min lo chhan maithei asin.

A khât tãwk chauhin ka au ta. Ka chakna ka hman nasat chuan ei tùr ka nei si lo va, ka chau chhe thuai ang tih a hlauhawm.

Kawngka a rawn ri a, rang zetin khum kilah ka tawlh nghal. Min mantupa kha thinrim meng sen rûmin a rawn lût a.

"Au au duh suh, tumahin an hre dâwn lo che. Tihian, i thi dâwn, i au leh dâwn nge ka that nghal dâwn che?" tiin  a kawr hnung ațang chuan chemtê a rawn phawrh a, min rawn tin ta teu mai. (Zu rim ka hria, a in a ni ngei ang)

Ka thinphu a ri nghal dawt dawt.

Ka hlau lutuk, chemtê kher hi chu ka râp ngawih ngawih. Na takin min hliam ang a, thi nghal si lovin min kalsan phei chuan na tuar rengin, tumahin min pui si lovin ka awm reng ang a...

"Au tawh suh ang che!"

Ka hlauh ém avàngin ka che ngam lo va, ka țawng ngam hek lo. Ka thaw țâwk țâwk a ni mai, ka hlauh lutuk vàngin ka khawng vek bawkin ka hria.

"I au leh dâwn em? I au leh dâwn em?" tiin a au chhuak țhawt a, ka hlau lutuk a, ka thi dang mai dâwnin ka hria.

"I pu tuar ai chu lâwm takin tuar mai ta che, phunnawi thei i ni hek lo," a ti tuar tuar a, che ngam lovin ka awm ngaiin ka awm reng.

"He chemtê hi a hriam țha tâwk asin, mihring taksaa lût tùrin a hriam țha ve tâwk."

A thil sawi chuan min râp ngawih ngawih, ka khùr zawih zawih tawh bawk.

"I zalèn dâwn lo, i thi dâwn. A țùl chuan kan pahnih hian kan thi mai ang; mahse, ka thih hmain i thi hmasa phawt ang."

A au tuar tuar reng a, in chhûng chu a zìm êm avàngin ka tân chuan tlàn chhuah tumin awmzia a nei lo ang, tum ta ila, a thin ka tirim zual ngei ang.

"I tlân chhuak thei lo, han tum chiah la, ka that nghal ang che. Thah che hi ka hreh emaw i ti ngawt ang e, thisen chhuah châk hian ka tui hãl a nia."

Pâwnah a tawlh chhuak a, kawng min khàr hnan tùr chu," Khatah khãn eng nge i tih a?" tih ri ka hre ta tlat.

"In hriat a ngai lo, ka duh duh ka ti ang," a ti tuar a.

Ka harh chhuak zawk. Ka hlauh lutuk vànga ka ke khawng a la reh loh vàngin ka che dâwn a, ka thei lo.

"Min pui r'u, in chhûngah hian min khung a nia," tiin ka theih anga ringin ka au chhuak ta a.

Thil thleng a ran êm avàng leh ka chét theih miau loh avàngin ka mang hriat ruai mai; mahse, hneh zeta min rawn pawm bet leh ka dula a chemte hriam zet rawn lût hrawih avàng chuan ka țê hman lo, nâ pawh ka hre lo. Ka hriat tàwp ber chu kawngkaa mipa pahnih rawn dâk chu a ni, a phê ruai a, ka thi ta a nih ngei ka ring.

*MITE TÂN MALSÀWMNA I NI THEI LO A NIH PAWHIN VÀNDUAINA THLENTU NIH TUM LO HRÂM ANG CHE*

Ka fb group join duh tân

https://www.facebook.com/groups/389869478234571/

☆SILVER ZUNGBUN☆ - 33 By Dingdi Pachuau

A na ngut ngut a, a kher ngut ngutin ka hria. Hei hi hremhmun nge vàn ram? Ka thi tawh tihna em ni? Vàn ramah chuan nâ a awm tawh lo tih ni khân ka hre bawk si, hremhmun a nih ka ring ta ber.

A nat dàn chu tawrh hrehawm tak a ni. Hetiang reng hian ka tuar a nih chuan a va hrehawm dâwn tak! Eng vàngin nge hetiang hian ka awm le?

Ka pum chhûngril a ni berin ka hria. A nat dàn chu, a na kher ngut ngut a ni ber, a thim vek bawk si, ka hah ngawih ngawih. A châng zeuhin a thîp leh vawr vawr a, chu phei chu thil tawrh hrehawm tak a ni leh zual.

Chutiang chu dârkâr tam tak ka tuar a, ka țawng thei si lo. Biak tùr lah an awm si lo, a hnu deuhah erawh vawilehkhatah ka nâ chu lâk bo ang hlauh a ni, ka chau lutuk chu ka muhìl nghal siai siai.

Mumang a ni nge ka hre thiam lo, hmun thim hrehawm zetah hian ka lo awm a, hrehawm ka ti lutuk chu ka lo au vak vak a. Ka hming hriat theih zawng zawng ka ko kim vekin ka hria, ka nu ka koh leh tuar tuar lai chuan chunglam ațangin kut hi a rawn lang a, ka en chian chuan ka nu kut ngei a ni tih ka hria, ka lo vuan vat a.

Min pawt chho nawlh a, ka awmna hmunah chuan thim hle mah se ka zuk inhmu leh tho nia. Zangthal zâwngin khawng ât hian ka mu a, ka thî a ni chiang.

"Nu, ka thî tihna em ni!! Khawiah nge min hruai dâwn?" tiin min kaitu ka nu chu ka zâwt a.

"Aw, hrehawm i tuar tam tawh si a, ka bulah hruai che ka duh tawh a ni."

Hlim zet hian ka nui var var a, kan thlâwk nge kan kal pawh ka hre thiam lo, ka zâng hai mai a, a nuam ka ti tak zet.

"Novi? Novi? Noviiiiiii....?"

Min ko vak vaktu lam chu ka en thla a, ka pu chuan ka taksa thi tawh chu kuahin a lo au vak vak mai a.

"Novi, min kalsan suh, khawngaihin? Novi, ka hmangaih lutuk che, i kal ka phal thei lo. Mawh, harh teh, hetiang hian awm suh, i inhmeh lo a nia."

Ka pu țap ka hmuh chuan ka kal sawn thei ta hauh lo, ka khawngaih lutuk. Ka mittui chu a rawn tling nghal puai puai a, ka nu lam en chuan," Nu, ka pu khu ka khawngaih ém mai, a bulah ka kal rih thei ang em?" ka ti sap a, ka pute lam chu ka hawi leh nghal a.

"I duh i thlang thei alawm, ka hmangaih che tih i hriat kha. I pu hnênah chuan kal rawh, hlim takin siam i tum dâwn nia aw, ka lo thlîr reng țhìn ang che," tiin ka kut chu a chûl hauh hauh phawt a, chutah muang chângin min thlah ta riai riai a.

Chutia min thlah tâkah chuan ka kut chu ka phar chhuak vat, ka tla mai dâwn asin.

"Novi! I harh em? Novi, i harh tiraw? Novi?? Novi?"

Ka mit chu ka meng der der phawt, a èn ém avàngin ka chhîng leh rih. A hnuah ka meng chhuak chiang ta deuh a, phê ruaiin ka hmu tho.

"Novi?" Ka kut chu a lo hûm reng a, zàwi muangin ka mit chu ka khap leh a, ka hmu fiah ta deuh.

Ka pu ka hmu!

Ka hmai bul chêtah ka hmu a, ka mit ka khap leh hnuah chiang deuh zâwkin ka hmu thei ta.

"Novi, ka lâwm é! I lo harh leh ang tih ka ring rêng a ni. Ka tân i lo kîr leh a. Lalpa, ka lâwm e!"

Ka pu mittui tla ka hmuh chuan mak ka ti kher mai! Mahse, kei chu ka țawng ve thei lo. Ka hmui ka chêt thei miah lo, ka pu chu biak ka tum a; mahse, ka hlawhchham țhak, ka en reng ringawt.

A biang chu a lo hmul leh nasa tawh mai a, a mit hnuai a val phei kulh bawk, a meng rim viau a niang. Bâkah, a sam pawh a lo buk leh tawh, a lang bawrchhawr leh viau tawh; mahse, hei hi ka pu dik tak kha a ni tlat, hmuh nuam ka ti ber tho tho.

"I bulah ka awm reng a nia aw, hlauh tùr pakhat mah i nei lo. Nâ i nei em?"

Ka heh ro lutuk chu lapaw tui chiah hian a rawn tihuh a, chutah chiah  chuan ka hnârah pipe vuahin thisen chaw min pe tih ka hre ve chauh.

"I țha a nia, i țha lutuk tawh."

"Ka pu...ka thi..lo tiraw?" Ka țawng thei ta e. Ka aw erawh kei ngei pawhin ka hre thei chè ché a ni; mahse, ka pu chuan a lo hre tho nia.

"Thi nâng, i thih ka phal rêng rêng lo. I chau deuh mai a nih kha, i dam vat dâwn."

Room-ah chuan doctor leh nurse ni àwm tak an rawn lût a, min rawn hmuh chuan," E he! I lo harh tawh maw?!! Nâ i nei em?" a rawn ti a, a mitmeng ațang chuan mak a tih hmel riauin ka hria.

"Aih."

Ka kut chu lain ka marphûte chu a'n check a, nui var var hian," I țha tawh lutuk, thil mak a thleng a ni ringawt alawm. A làwmawm hle mai, nâ i nei lo bawk nèn; mahse, țawng vak rih lo la," a ti barh barh a.

Doctor leh nurse chhuah hnuah ka pu chuan," Kha doctor kha thiam hle lo se chuan ka hnek chawrh ang," nui suk chung hian a ti a.

Ka en reng tih a hmuh chuan," Ka phalna tel lova i kut a lo vuan ve ringawt kha, ka insûm hrâm hrâm," a ti sup a.

Ka nui sak, ka chhâng lo.

"I mut a chhuah chuan muhìl daih rawh, i men chuan biak che ka tum reng dâwn si, chu chu i tân a țha lo."

"Ka lo...ngaithla thei...alawm."

Duat zeta ka kut chûl pah chuan," Ni lo ve, i mut tam leh i țha chak dâwn. I mut hlànin ka kalsan dâwn lo che, i bulah i kut vuanin ka awm reng dâwn alawm," a ti leh a.

Ka ngawi vang vang a, tunah hian nâ ka nei miah si lo va, engati nge ka mut reng ni? Ka ngaihtuah kual lai chuan," Ngaihtuahna sêng rih lo la aw, tunah tak hi chuan muhìl tùrin ka duh che, dam thuai thuai tùrin ka duh si che a," a lo ti a.

"Pakhat chauh, engtia.. rei nge hetiang.. hian ka awm tawh?" tiin ka zâwt hrâm.

"A rei vak lo, ni thum chiah chiah a ni e. Ngaihtuahna sèn awih loh aw," tiin a rawn kûn hniam a, ka chalah a rawn fâwp zauh a.

"Muhìl rawh le."

*******

Damdawi in ațanga ka chhuahna pawh kâr khat zet a ni ta. Ka pum chemtêa vihna chu ka la chêtpui vak thei lo va, damdawi in ka nin lutuk tawh vànga chhuah dîl ka ni.

Ka pu chuan min kalsan lo khawp mai. Ka bulah, ka kut vuanin a awm deuh reng, Champhaiah kan awm rih a. A chhûngte hnênah kan awm, hotel leh lodge kha chu motor chuanna a thui deuh a, motor chuan min phalsak vak lo bawk nèn, ka hnial ngam lo, enkawl ngai zâwk ka ni si a.

Ka hriat lêm lohte pawhin min rawn kan zut, damdawi inah pawh khân a ni tho. Damdawi inah khân Kimate țhianhovin min rawn kan âwl lo, ka lo chhàwn vak thei lo va, ka puin a lo be lûmlâm țhìn. Pu berin min rawn kan ve bawk! Damdawi ina ka hmu thut mai chu, mak ka ti lutuk ringawt! Âteite erawh Princess-i school kal a ngaih vàngin an rawn kal thei lo, ei tùr min rawn thawn țeuh thung.

A hnua ka hriat dànin khatia min mana in pakhata min rawn kal chilha mipa pahnih an rawn kal khân, min mantu ka pahrawn nau khân min vit ta kha a ni a. Mipa pahnih chauh ka hmu a ni mai a, panga vêl lai an lo ni a, min vittu kha an man bet a, kei kha min bâwihsâwm nghalin phone-in mi dang an hrilh kual a, min chhan hman hrâm hrâm a lo ni.

"Min kalsan ka ring thei lo va, ni lo, ka phal lo a ni zâwk. Doctor kha chu a beidawng tih ka hria a, kei chuan ka tân i rawn dam ang tih ka ring tlat a, ka ring tlur a ni tawp. I dam chhuak lo ang tih ngaihtuah kha ka duh lo bur a ni mai."

Ka bulah chuan dìm zet hian a rawn inthawlh ve a, min tihchêt erawh a hlauh hmel khawp.

"A nih, engtin nge ka bulah i lo awm daih theih? Aizawl lamah i awm nì khân ka hre sia?" ka ti a.

A thaw hawk phawt a, ka kut khàl neuh neuh pah chuan," Sunday zàn dâr 11 vêlah Âtei'n min rawn phone a, i hre tho tawh chuan ka ring a, pawisa lêm chungchâng kan chhui chhuah lai a nih kha; mahse, mi dang inhnamhnawih chhui a la ngaih vàngin ka rawn haw phei lo va."

"Ka hriat veleh thil awm dàn ka țhiante ka hrilh nghal vat a, ka rawn phei chûk chûk. Hming chhiatthlâk angin lang thei mah se, police ka phone nghal vat bawk. A chhan chu i țhiante inah i kal lo va, i chanchin tumahin an lo hriat miau loh avàngin rûk bo i nih ka ring a; mahse, ka bo map. Tu nge rin tùr ka hre mai tlat lo, Champhaiah Kima awm lai a nih vàngin phone-in Rina lo thlithlai tùrin ka ti nghal a, ani lo chu rin tùr ka hre mai lo a ni."

"Lunglei lama ka zawn kual hnuah che Champhai lamah ka rawn chho a, rilru fîm put har ka ti ém ém. Ka hmuh hman loh hian i lo awm ang tih ka hlau ber a, Kima'n min rawn phone ta a. Hmeichhe pakhat, in pakhata khung, a khungtupain a vih chungchâng an țhenawmpa sawi a lo hria a, damdawi inah kan rawn zawng ta che a, chutih lai chuan operation theatre-ah i awm tawh. I nih ka ring sa thlap, ka hlauthâwng bawk. Thisen i hloh hnem avàngin unit 5 pêk i ni nghe nghe. Nangmah vittu che kha i pahrawn nau a ni tih ka hriat hnuah phei chuan nangmah ngei i ni tih ka hria a, chuta țang chuan ka awm ta char char," a ti duah a.

"A rilru a chiang chiah lo deuh tiraw?" tiin ka zâwt a.

"A nih deuh kha, an man hnuah pawh mi dang bulah a awm ve lo, a hranin an dah, a hlauhawm deuh a niang."

Ceiling thlîr vang vang pah chuan," Engtin nge ka awmnaah khân miho kha an rawn kal chat theih le?" ka ti leh a. Ka vànneihzia ka ngaihtuah lo thei lo, rawn kal lo ta se...ka ngaihtuah zui ngam lo.

"Lawmsiama nau kha, a man hnu che khân a rilru kha a buai zual a ni maithei, zu a in a, chutah chuan thah tùr a neih thu sawi chhuak reng pahin chemtê a vilik reng mai a. A nu mangang hlauthâwngin an țhenawmpa a lo hrilh a, chhui ru a zui ru tùrin a pun a nih chu. An țhenawmpa chuan a țhiante a pun ve leh a, a chhuak an rawn zui ta a ni."

A ngawi ta vung vung, kan ngawi dùn reng, kan rilrua awm a inang ang em le?

"I lakah hian ngaihdam dìl  che ka duh a," a ti sup.

"Eng thilah maw?"

"Manganna i tawh laia i bula ka awm loh vàngin. Min hua la, min ngei rawh, ka tuar chhuak vek ang; mahse, ka kalsan dâwn tawh lo che," a ti ta.

A thil sawi chuan min tihlim viau a ni tih a hria ang em? A țawngkam ho tê nia lang hian min tihlim thei viau a, min tina thei viau bawk.

 "Ka haw lo che. Min ngaihsak ém hi, engtik lai mahin ka haw ngai lo che, ka hmangaih che alawm," ka ti ve sap sap a.

Rawn inbeng kângin ka hmuiah a rawn fâwp  vawng vawng phawt a, chutah," Dam thuai thuai teh, nupui neih ka duh tawh a nia," a ti ta daih.

Mit khap hauh lo hian ka en a, mak ka ti lutuk!!

"Nupui...i nei dâwn maw!!!"

"Aw, i dam veleh. Chu chu ka tiam tlat a ni."

U Melo-i a ni ang maw?  Ka rilru nat dàn tùr pawh a ngaihtuah miah lo tihna a ni a, hliam ka tuarna nâ ai pawhin ka rilru chu thil chuan a tina zâwk.

"Ka lawmpui che u. Ka dam nghah kher a ngai hlei nem, ka țha tawh teh a nia," ka rilru natna thup hrâm hrâm chuan ka ti sap a.

"Mo tùr ber i dam chian loh chuan a fuh nâng, hunserh hman laia damdawi ina luh rawk rawk a ngaih chuan a tihchi vak loh ang," a ti leh a.

"Eng...maw!!!?"

Nui suk hian," Vawiina ka pa nèn kan inbiak khân ka hrilh daih tawh. I dam chian veleh kan innei ang, kohhran dan tih vel hi ka buaipui ve vak lo, nang nèn thianghlim taka inneih ka duh a ni mai," a ti leh duah a.

Nia, vawiin khân video-call-in kan inbiak hlawm tak kha, inneih an sawi lai chu ka hre miah lo.

Ka puin inneih a duh! A mak e, ka tân chuan a mak asin! Hmeichhe rinna tlachham zet khân min neih a duh ta a nia! Ka hlimzia hi, engmah hian a khûm thei lo ang. Thu hian a sawi fiah phâk lo, ka hlim lutuk thinlung chu a puak keh mai ang tih a hlauhawm zâwk.

"Ka phalna la hmasa ve phawt la?" Ka nui duh miah lo, ka hlimzia chu ka mitmeng ațangin a hria ang tih ka hlauh vàngin ka en duh lo lui tlat a.

A tho  ta țham țham a, ani hi ka tilungawi lo a ni ngei ang. Eng vànga khatiang sawi kher kha nge ka nih le? Ka duh ém ém si a, ka chân mai thei asin le, mâwl lutuk!! Ka inhau mawlh mawlh mai.

"Zonunmawi, ka hmangaih che. Min nei duh ang em? Khawngaihin... 'aw' ti hrâm la?"

Ka rei! Ka khum bul chhuatah a lo țhingțhi niin. A aw lah chu hriat theih khawpin a khùr dar dar nia! He pa hi, engtin nge ka tih dâwn?!

A chêt dàn chuan min țhâwng lutuk a, a sweet bawk si, ka mittui a lo tling leh kuau nghal.

"Aw...ka nei ang che."

Ka nu silver zungbun kha min buntîr a," He zungbun hi i tân a hlû tih ka hria, kei pawhin ka hlutpui hle che a ni. Inneih zungbun ka buntîr hma che chu, zungbun dang bun lovin hei hi bun rih rawh aw, i tân a hlut tluk zetin ka tân i hlu si a," a ti sup sup a.

Hemi zàn hian ka bulah muin a riak a. Zan dangah pawh ka awmna room-ah riak tho mah se, khumah erawh a mu ve ngai lo. Chhuatah, ka khum si chêtin mutna a siam a, ka kut vuan chungin a mu ziah.

A tûkah chanchin làwmawm chu a chhûngte (tuna kan awmna) chu chaw ei laiin a hrilh a, nuam duh tak a ni, tlêm têin ka zak deuh e tih mai loh chu.

Pitar pakhat a rawn lêng a, min hmuh  duh thu min hrilh chuan mak ka ti, ka hre ngai si lo va.

Ka pahrawn Lawmsiama nu a lo nia, a fate aiawhin thupha a rawn chawi mawlh mawlh!

"Ka zak ngawih ngawih, sual hlein thil sual ti mah se, ka fate an ni tho si, nu tân chuan na tak a ni, thil ka ngaihtuah thui phah viau bawk. Ka theuhtâwpa țha leh dik chuan ka enkawl ve asin; mahse, heti hi kan ni zo ta si."

"Ngaidam rawh ka ti lo, ngaihdam tlâk an ni lo tih ka hria. I chunga an thil tih hi a rápthlâk ka ti lutuk a, tuna an awmna hi an chan táwk chiah a ni. An thil tih ngaihtuah phei chuan hrehawm tàwpkhâwk tuar tùr an la ni zâwk, a hrehawm ka ti ngawih ngawih a, rawn hmuh che hi zahthlâkin rawn hmu ngam tùr che pawh ni lo mah ila ka ti lo thei lo a ni, an aiawhin thupha ka rawn chawi mawlh mawlh, hei bâk hi an tân tih theih ka nei si lo," a ti kerh kerh reuh a.

Ka khawngaih reuh tawp.

Ka pu nî (tuna kan awmna in neitunu ber) pawh chuan a lo khawngaih ve a ni ang, kan bul hnaia awm ve reng, a țawng lo ngaithla ve reng a nia, a kal sawn ta daih.

A haw hnuah chuan ka nî chuan," A khawngaihthlâk reuh mang tak e! A fate lah heti mai hi an ni si a," a ti sap sap a.

"Ka nî, Champhaia in awmna hi a rei tawh em?" ka ti ta daih a.

"Rei ve viau tawh e."

"Kan in hmun saw, ka pu ta tak tak a ni em?"

Ka pu chuan ngun zeta min en pahin," Eng thil nge thleng?" a lo ti vat a. Thil awmzia ka sawi hnuah chuan an ngawi dùn vang vang phawt a, ka ni chuan," Ka hre chiang hauh lo mai, ngawi teh, hre chiang tùr an awm ang, kan la zâwt dâwn nia," a lo ti a.

Ka puin dik lo taka a lo nei a nih chuan rochun pawh ka duh miah lo, a zahthlâk dâwn em asin. Kha vàng khân ka nunna pawh ka chàn phah lo chauh a ni si a, a neitu dik takin a nei mai tùr niah ka ngai. Hêng thil avànga buai hi ka duh tawh lo, buaina a tam tâwk tawh ka ti.

Ka pahrawn Lawmsiamate unau chunga rilru put dàn tùr ka hre thiam lo. An nu erawh ka khawngaih reuh khawp, tih theih ka nei lo. Dàn a awm a, dànin ro a rêl mai ang chu. Kei erawhin in hmun chungchângah thu dik ka hre chhuak duh ber, kan awm chhûng hian hre chhuak thei ila.

Ka puin min ngaihsak em ém reng a, ka bulah a tâp chawt reng. Ka bula a awm loh lai chu bathroom-a ka luhin a ni deuh mai. Kimate an lo lang zut bawk a, min fiam nasa thei khawp mai. Inneih kan tum tih ka puin a hrilh hnuah phei chuan min fiam nasa zual a, ka nui nasa thei si lo. Ka pum dawmin ka mittui a tla phung ziah.

Ka ni chuan kan in hmun chungchâng chu a lo zâwt chhuak a, kan in hmun chu a lo ni ngei, ka pahrawn Lawmsiama pu khân a lo awt țhìn viau a, leiah pawh a lo dîl nasa a ni àwm e. Tuna an in hmun nèn, pawisa pêk belha leiah pawh a lo dîl a lo dîl; mahse, ka pu khân a pa hnên ațanga a lo chhawm chhoh a nih vàngin a phal bîk lo. Chu chu engtin emaw thu inhlan chhàwn fuh lo a awm ta a niang, ka pu in hmun ngei chu a lo ni.

"Buaipui fel thuai rawh, mi luahtîr la, dàwr atân lah a remchâng si. Pawisa i la lût zung zung mai dâwn alawm," ka nî chuan a ti a.

Ka nî pasal Pa Mawia chuan," Ni e, hetia luah lova awmtîr reng chu a fuh lo. Miin luah atân an ît ém ém a, nangmahin i luah duh loh pawhin luah duh luahtîr rawh," a lo ti ve a.

"Kei chuan buaipui ngaihna ka hre lo, ani kutah hian ka hlàn fel hmak. Hetiang boruak a nih hnuah phei hi chuan luah châkna pawh ka nei lo, a tih tihin ti rawh se," tiin ka pu chu ka melh ralh a.

Ani chuan," Siam danglam kha i la duh tho em?" a ti sup a.

"Aw."

"Chuti, in luah lai bîk kha siam danglam ila, a dang chu a ngaiin kal se, kaw khat erawh Champhai zin chânga luah theih tùrin ruahman ila?"

"A țha ngawt ang," ka lo ti thuai a.

Ka nî chuan," E he! Rina kha an man a nih hi!" a phone en mulh mulh chung chuan a rawn ti hluai a.

"Tu Rina? Rin-police-a maw?" Pa Mawia chuan a lo ti vat a.

"Aw, a car-ah damdawi no.4 an man țeuh a nih chu!"

Ka pu chu ka melh vat a, ani pawh chuan min lo en ve reng.

Mi sual tàwpna chu heti mai hi a lo ni țhìn a ni. A tìrah tluang viau țhìn angin lang mah se, an tàwpna hi a chhe thei viau. An awhawm thlâwt loh.

*******

Ka pu nèn kan inneih hmain ka nu lung kan han phun phawt. Chhûngkhat ka nei lêm lo va, ka nîte leh Kimate puihnain kan phun a, tlailamah chawhlui kan kîlho. Anni bâk hi țhenrual țha ka nei miah lo, anni hi Pathian min pêk an ni.

Ka pu nèn chuan Biak inah kan innei lo! A chhan chu an inah ka awm sia, dàn thianghlim tlin theiah min ngai lo a lo ni! Ka pu chu a thinrim khawp mai; mahse, eng vak a sawi chhuak lo.

Biak in kan hman theih tâk lohah chuan Heritage Hall a hire a, sàwm bîk tak tak chauhte hmaah kan innei ta. A thil tih leh ruahmanna pakhat mah ka sawisêl lo, a duh dàna kaltîr vek ka duh.

Mary leh Feli'n min dinpui a, ani pawh Kimate țhian dùnin an dinpui bawk. Princess-i a phûrin a hlim hle a, a inthuamna pawh a nalh. Kan nalh tlâng hlawm a ni e.

Honeymoon hman ka duh leh duh loh min zâwt lo, hmang lo mah ila ka bulah awmin, kei a bula ka awm chuan a tâwk. Ka hlim a, chu chu engmahin a tidanglam thei lo.

Lawițhat zàn chu a room-ah kan hmang. Nupa chauhin an chen țhìn nupa nun chu dìm leh duat takin min chenpui a, hlauhna pakhat mah ka nei lo. Hlauh ahnêkin atân chuan ka lo inhawng ém ém, duhthawh leh âm takin kan chèn a, he hun hlu tak hi ka theihnghilh phal tawh lo ang.

"Ânu i ni tawh tak tak tiraw?"

Honeymoon hmangin kâr khat kan zin bo va, in kan thlen tûkah, tûkțhuan kîl laiin min zâwt. Ka bul sêtah a țhu a, min en vang vang reng bawk.

Nui chung hian," Ânu atân chuan min duh tak tak em?" ka ti lêt a, ani lah chuan thu tak zet hian," Tehrêng mai, nu chu ka duh alawm," a lo ti vat a.

"Chuti, 'Ânu' tiin i ko thei tawh ang," Pu ber chuan a lo ti a.

Princess-i hian kan inneih hnuah min la ko miah lo, min zah thar deuh tlat a, 'Au No' tiin min ko ziah kha a ni a, a pa nèn kan inneih hnu kha chuan min ko leh ta miah lo.

"Ânu, Âpa nèn vawiin chu school-ah min thlah ula, chuan ka țhiante pawh Ânu chu hmuhtîr ve ka duh a."

Ka pu chu ka en zawk a," Aw le, tehrêng mai, Âpa nèn kan thlah ang che," ka ti a, Princess-i chu en lehin ka nuih sâng a.

"Yes, ka châk tawh lutuk!"

IGNOU hnuaia BA ka zir ve pawh ka exam ta lo. Ka la dam țhat loh lai kha a ni a, ka puin exam lo mai tùrin min ti a, ka hnial bîk lo. Hun a la tam tiin min hnèm a, ka pawm hmiah mai.

LMa pa pawh a boral ta. Kan chhûngin kan kal vek, ka țhianpa pa a ni a, Âtei țhiannu pa a ni bawk sia, ka pa(ka pu pa) pawhin a ngai pawimawh hle bawk, LMa nu a khawngaihthlâk khawp mai.

"Thil ka zâwt ang che aw, thu dik takin min chhâng la?" tiin a lam chu ka hawi a.

"Sawi la."

"U Melo-i nèn hian engati nge in ințhen?"

"Ka țhen loh te'n, ka tawng nâng che."

"Naaa, i va sual tak! Thu dik takin min chhâng rawh ka tih kha," ka ti nang nang a.

"Mipa dang nèn min kawp a."

Thu dik a nih ka ring. A lama tawlh hnai sauhin," Pawi lo tawp, ka neih phah daih che," ka ti sap a.

"Chimawm duhawm!"

Nui hak hian," Chimawm bâkah ka zei ve viau bawk aw," ka ti sap a, a nghâwngah chuan ka fawhsak zauh bawk a.

"Wow!!" A nui hawk.

"I hre chhawm zêl ang," tiin ka kut chu a taksa pêng hrangah chuan ka'n thlahdah kual dan dan a, a nui tàwp chiang kher mai.

"Chimawm, duhawm, zei, sexy bawk!"

Bathlàrah chuan dingin pâwn lam chu ka thlîr vang vang a, thla a êng viau mai.

Ka nu silver zungbun min pêk, ka țhi locket atâna ka hman tâk chu ka tuai nauh nauh a, vàn lam chu thlîrin," Nu, ka làwm e. Min lo thlìr reng avàngin leh ka pu tân liau liau min kìrtîr leh avàngin. Kan hlimzia hi i hmu tiraw? Nu, ka hlim asin, i fanu hi ka hlim lutuk," tiin ka nu thlarau chu ka be mawlh mawlh a.

"A vâwt i ti lo em ni?" tiin ka hnungah ka taksa thlâwp zaih chuan a rawn ding a, ka dul puar lang ve țan tawh chu a rawn chûl zai zai pah a.

A rim fai sar rim chuan ka hnâr a verh kher mai, hîp vang vangin," Ka hlim lutuk a, vawt pawh ka lo hre lo," ka lo ti a.

"Ka nupui duh tak hi a hlim loh ka phal hlei nem."

Nui sakin," Ka hlim tak zet a ni, ka nu pawhin min lawmpuiin a hlim ve ngei ka ring a, ka lo bia a," ka ti leh a.

"Hlim viau ang, tu țha tak a nei dâwn bawk si a."

Silver zungbun tuai nauh nauh pah chuan," Mipa nge ni se i duh hmeichhia?" tiin ka zâwt a.

"Ka duh ve ve nàngin mipa ka duh."

Kan nui hak hak a.

*HLIMNA CHU TUARNA PUMPELHAH NI LOVIN, TUAR CHHUAHNAAH HIAN A NI A AWM ZÂWK NI*

             ...A TÀWP TA...

(Chhiartu zawng zawngte, làwmthu ka sawi tak meuh meuh e. Nangni tel lo chuan engmah ka ni lo tih ka hming ka hriat chian tluk zetin ka hria e, chhiar nuam lo lai leh phuailuai zual lai pawh a awm țhìn ngei mai; mahse, min lo chhiarsak zêl a, ka lâwm e.

Story thar nèn lo lét vat ka tum ang, chumi hma chuan lo inenkawl țha ula, in mitte kha lo duat ula, inhmuh vat kan tum dâwn u nia.

A tâwp nân KA LÂWM E. LOVE YOU ALL)