☆24/7☆ - 29 By Dingdi Pachuau

 

☆24/7☆ - 29 By Dingdi Pachuau

Kan chhûngkua kan buai nuai a nih tâk ber chu. Ka nuin ka pa enkawl a duh a, a hnaa kal a ngai bawk si, chu tak chu a buaithlâk ta a ni. A ai chu kal tùrin min duh a, kei lah Lungleiah ka awm bawk si.

"Bawihte, i hna hi bànsan mai ta che, i hreh ang tih chu ka hria; mahse, i pa hi enkawl ka duh si a," a ti sap sap a.

"Bawihtei kan bula a awm chuan ka dam vat vatin ka ring," ka pa chuan a lo ti a. Heti êm êma min ngaia min thlahleltu pa ka nei hi vànnei ka inti, a nat chhûng hian a bula hun a tam thei ang ber hman ka duh phah zual.

A cancer tih a inhria a, a stage zât pawh a hria. Kan hre chhuak har lutuk hi a pawi ka ti ber mai, chuti chu ni lo se tûn ang hian kan thlâ a phâng lo deuh tùr hi a nia.

"A pawi lo, nu. In duh dàn angin ka awm ang, Lungleia ka inhlawh vena chu a beitham êm mai, ka chhâwk theihna che a nih phawt chuan bànsan ka hreh miah lo," ka ti a.

"Engtikah nge i hna chu i bànsan ang? Ruaibut taka han bànsantír che pawh chu a fuh chiah lo ang, in principal leh thawhpuite an zahawm dâwn êm mai," ka nu chuan a ti leh a.

"Nia, kan dinhmun ka hrilh ang a, ka aiawh tùr an hmuh veleh bànsan ta zâwk ila tiraw?" ka tih chuan a lo bu nghat a.

Lungleia ka chhuk leh chu ka rilru a hlim sârh thei tawh lo. Ka pa natna ka ngaihtuah a, ka hna, nuam ka tih êm êm ngaihtuah lehin Rinfela ka ngaihtuah kai leh a. Ka hna ka bànsan hma leh kan inhmu lo hma dâwn tihna a ni a, chu tak chu hrehawm ka tih tùr chu a ni. Hna ka bànsan dâwn tih hrilh pawh ka huphurh ngawih ngawih, chu mai a la ni lo, kan khuaah ka awm tawh dâwn bawk.

Ka pateate pawh ka pain a lo hrilh vek tawh a, anni pawh chuan an thiam ang ang chuan min hnèm ve a, hun âwl an neih veleh kan an tum ve bawk, an kan thuai loh chuan kâr tawp lamah Aizawl lamah chemo ti tùra phei an tum a, ka nu chuan ka hman theih hma chuan a thawhpuite remtihna thlapin aikal a la rih mai dâwn a ni.

Mihring chu thi tùr vek ni tho mah ila, cancer hming han hriat ngawt pawh hi a râpthlâk a, chutiang natna nei chu thi hmâ tùrah kan dah bîk a ni. Kan hmalam hun chu tu mahin kan hre hauh lo; mahse, chuti chung chung chuan tu mahin thi thuai tùrah kan indah ngai bîk lo chu a nih hi.

Ka pa pawh thi thuai tùrah chuan dah phal lo mah ila, kum upa lam a ni ve tawh a, bâkah, dik tak chuan min dampui rei a beiseiawm loh a ni, mihring lam ațanga ngaihtuah chuan; mahse, Pathian hian thil mak a thlentîr thei a, a tidam hmak thei bawk.

Rinfela nèn kan inhmuh hmasak ber zànah erawh ka insûm thei lo, a âwmah beiin ka țap hlap hlap a, mak a tiin a hrilhhai ngawt ang? a chhan chu ka pa natna ka la hrilh loh bâkah ka hna ka bànsan ang a, Lungleiah ka awm tawh dâwn lo tih ka la hrilh tlat lo a ni.

"I duh loh thil ka ti em?!!"

Ka sam chu a chûl hliau hliau a, a bân lehlamin min la kuah tlat bawk.

"Tuin nge i rilru tina? Min han hrilh teh."

Thil awmzia lah hi a hre tak si lo va aw....

Ka insùm theih hnuah pawh chuan a âwm chu ka kalsan phal lo, ka him a, ka thlâ a muang a, nuam ka ti a ni.

"Ka tihpalh aw, ka insûm thei lo thut a nih kha, ka țahbelh tiraw?" ka ti sap a, ka hnâr a la ping țha khawp mai.

"Eng thil nge thleng min han hrilh teh," tiin min kuah nghet sauh sauh a.

"Ka pa natna kan hre chhuak a," ti sapin nghet leh zualin ka pawm a, chutah," Cancer rang ber chi a nia, ka rilru a tina êm a ni," ka ti leh a.

A kuta ka sam a chùlna chu a chàwl dat a, ani pawh a shock ve tho a nih ka ring.

"A ni maw? Amahin a hria em?" a ti sup a.

"Umm, ani erawh chuan a langah chuan a tuar thiam khawp chuan ka hria; mahse, kei chuan hrehawm ka ti takzet a ni, min kalsan thuai tùr anga ka ngaihtuah phei chuan..." ka ti a, a âwmah chuan ka hmai ka phûm vang vang a.

"Khawvêl a ni miau si a, natna tâwk thei leh tuar thei kan la ni tlat si a ni," a ti ve sup sup a.

Min hnem a thiam lo, chu zawng chu a sawi; mahse, chu ringawt pawh chuan min hnèm êm êm tho. A ka ațang hian chutiang thu chu a chhuah theih pawh ka ring lo hrim hrim zâwk asin.

"Chuan...ka pa chuan ka bialpa i nih angin hmuh che a duh a."  Ka hna ka bànsan dâwn tih leh ka pain a dam lai ngeia pasal ka neih a duh thu chu ka la hrilh ngam rih lo.

"Min hmuh tawh kha."

"Kha kha chuan ka țhian angin a nia a hmuh che," ka lo ti thung a, chutah, inthiam lo leh deuhin," Khatih lai khân ka bialpa ang khân ka sawi ngam lo che a, a chhan chu bialpa ka nei tih an la hre tlat lo a," ka ti leh a.

A hreh ka rin tehlul nèn," Engtikah nge hmu tùrin ka kal theih ang?" a lo ti mai si a, mak ka ti hial zâwk a ni.

"Ka tel lova hmuh i ngam chuan-" ka tih lai mêk chuan," Hlauhawm a ni hleinem. I tel lovin a fair daih zâwk ang chu," tiin min lo țawng khalh a.

"Tak tak maw?!!" tiin ka en chho a.

"Hlauh ka nei lo," a lo ti leh mai a.

"Kei chu ka nei asin, i bula awm theih loh, hmuh theih loh che leh min kalsan daih ang tih ka hlau," ka ti duah a.

"Ka hlau ve lo, min kalsan loh chuan kalsan che ka tum dâwn si lo va,"a ti leh a.

Hei tak hi a ni ka duh êm êm chhan chu. Ka ngaihtuahna a tithui asin, kei ve mai hmeichhe pakhat lek pawh min rinawmpui thei a nih chuan a țhiante leh a chhûngte, mi chungah hian a rinawm ang tih ka ring nghet bur. A nungchang leh a khawsak dàn, jail tàn leh rûkrûk thlengin, a thil tih nia an sawi pawh hi ka âwih thei tawh hauh lo.

"Ka hmangaih che, Rinfel," ka ti chhuak ta hliai a.

A rawn kûn hniam a, duh takin kan induhna chu kan hmuiin kan lantîr a, ka thinlung hnîm ruih pawh kha amah vàng hian tunah chuan a pângngai leh deuh ta.

"Duhawm reuh lutuk mai!" tiin ka biang chu a piai hlak a.

Min ngai 'naute' erawh ka làwm lutuk lo nain min duhna a lantîr ve dàn a nia, ka sawisêl chuang lo.

*******

Thawhpuite leh Principal chuan chutia ka han chàwl ta daih tùr chu min ui der ve khawp mai a, ka pa chungchângah pawh chuan an thiam ang angin min hnèm  ve tliar tliar a.

"A dam vat ang a, i lo zawm leh thuai ang chu."

"Tûnlaiah chuan thiamna a sâng tawh alawm, i pa pawh a la upat viau loh chu, a dam thuai ang."

"Kan lo hre reng ang che u, kan țawngțaipui reng dâwn che u nia."

An fel hlawm asin, kan chhûngte ni miah lo leh kan kohhran pawh ni lo hnên ațangin țawngțaipuina kan dawng dâwn a nia, a làwmawm ngawih ngawih, țawngțaipui ngaia kan awm erawh thil làwmawm tak chu a ni hran lo nain an thil sawi chuan min tilâwm hle thung.

Kâr hnih chiah thawhna hun ka nei dâwn ta anih chu. Chuan, thla a lo thar chiah bawk ang a, lo thawk thar tùr tân pawh hlawh tùrah buaina a awm lo thei chiah ang.

Naupangte pawh ka hrilh ve a, anni pawh chuan," Miss, kan ngai ngawt ang che, lo kal leh thuai tho rawh aw," an ti a, a țhenin," Miss, i aia lo kal tùr chu a fel em? Nangmah ang hian a fel ve loh vaih," an ti a, a sîr deuha țhu  pakhat lah chuan," Miss, a hmelţhat loh chuan kan duh lo a nia, nangmah anga hmelțha kan duh," a lo ti bawk a, nuih hi an tiza thei teh a nia.

Kei pawh hian ka ngai hlawm ngawt ang.

Thlamuana pawhin kan chanchin chu a lo hre ve a, pawi min tihpuizia sawiin ka pa pawh a țhat chhoh thuai a beisei thu a sawi a, kan tùra zin chhoh vat a tum thu pawh chu a sawi bawk a.

Rinfela chuan ka tel lovin a han hmu tak tak chu niin!! Ka ring phâk hauh lo asin, ka rin aiin a huaisen daih mai ka ti!

"I țhianpa Rinfela kha a lo kal a, a hmaa i rawn zin chhohpui lai khân sawi tlang law law mai tùr a nia," tiin Taitea ber kherin min rawn hrilh a.

Zàn dâr 8 a ri tawh a, ka message kha min rawn chhâng ve mai bawk sia, tunah kan khuaah a awm tihna em ni?

"A lo kal maw?!! Engtikah?" ka ti hû a.

"Vawiin tlai sumo-ah a rawn chho a, naktûkah a rawn chhuk leh ang, a sawi dàn a nia," a ti a.

Rinfela tak chuh!

"Eng nge in lo hmuh dàn? Ka pate chuan eng angin nge an lo ngaih? Zak lo in lo ti em?"

Zawhna hlîr. An lo hmuh dàn chu thuhran, engkim chîk zet zetin an zâwt ang a, thu dik veka a chhàn ka ring si, ka rilru a tihah.

"Engtia ngaih tùr nge ka hre hleinem, pà erawh ka ti khawp mai," a rawn ti a.

Tunah tak hi chuan kan ina awm ka châk ber, an inbiakna ka hre châk.

Hlauhthàwnna rilru ka pu thut. Ka pate hian ka bialpa chungchâng chu an chîk nasa dâwn si a, Rinfela'n an chènna vêng a sawi ngei ang a, pateate hi Rinfela chanchin hriat belh duhin an rawn phone ang tih ka hlau ta thut, anni lah hian mi sual hmuhin an hmu si, an zêp dâwn hauh si lo.

Zîng ațangin phone riin ka beng a luah khat a, tu hnên aţanga an dawn nge tih hriat tumin ka ngaithla ru țan ta. A hahthlâk, engati nge ka hlauhthàwn viau? Ka zahpui em ni? A dinhmun dik tak an rawn zâwt a ni ve mai a, engah nge an thil sawi dàn tùr ka lo enghelh viau? An hriat dàn an hrilh ve dâwn a ni mai a...

Tlai bànah pawh a rúkin nuam lo ka ti deuh ringawt pek a. Ka bialpa an hre chhuakin min zilh pawh a la ni lo a, eng mah an la hre tawp si lo; mahse, hlauhthàwnna rilru chu ka paih bo thei lo.

Zànah inhmuh a rawn rawt avàngin ka chhuak leh a, kan inhmuhnaah chuan a lo awm reng tawh a.

"I kal tùr thu pawh min hrilh duh hauh lo a?" tiin lungawi lo deuh ni chiah si lo, lungawi pawh ni chuang si lo chuan ka ti a.

"Hrilh loh khân buaina a awm lo alawm," a lo ti fel thên thung a.

"Ka pa chuan thil a lo zâwt chîk leh ngawt lo che maw?" ka tih chuan," Loh theih nâng, a fanu rangkachak bialpa kha ka ni tlat a," a lo ti leh mai a.

"Min hrilh vat vat teh, engtin nge an lo hmuh che? Eng engte nge an lo zawh che?" ka ti leh a.

"Min hmuh dàn ka hre lo, anmahni chauhin an hria ang. An thil min zawh dik tak vekin ka chhâng a, chu zawng chu," a ti a.

"Kohhran lamte?" ka tih chuan," Chu pawh chu dik takin ka chhâng," a ti leh mai a.

Chutah," I hlauthâwng a nih kha, dik lo taka ka chhàn kha a hlauhawm zâwk alawm, ka nihna dik tak an hriat kha a țha," a ti leh a.

Nia, a țha alawm, dâwta chhâng tùrin ka duh bîk hleinem.

"Nuam lo i han ti viau lo maw? Ka ngaihtuah rilru khawp mai che a, i han țawng bawrh bawrh ang a, i duh aia tam hi i han sawi ang tih te ka lo hlau a," nui deuh chunga ka tih chuan ka biangah a piai hlak a.

"Nuam lo ka ti lo, nuam pawh ka ti hran lo, i pa duh ka tihhlawhtling a ni mai," a ti a, min kuah nghâl hlù hlú a.

"I fel lutuk! I tițha, ka chhuang lutuk che," ka ti sap sap a.

A tûkah pateate nupa pawh chuan ka pate Aizawl phei hma ngeia kan an duh avàngin an han chho ve leh a, Rinfela chanchin chu an sawi ngei tawh ang le. An lo zâwt ngei ang a, anni lahin an sawi ngei bawk ang.

Rose-i bulah pawh chuan ka hrilh ve a, ani pawh chuan han tih vak ngaihna a hre bîk lo, min hnem nân erawh,"Anni'n duh lo mah se, nangin i duh a, keiin ka lo țan ve bawk che ang a," a ti a, chu erawh innghahna tlâk a ni lo khawp mai.

Mahse, vànneihthlâk deuhin ka ti dâwn nge, min zâwt hauh lo. Rinfela chungchâng rêng rêng an sawi chhuak lo a, min zâwt hek lo. Ka pate chuan an lo sawipui lo em ni zâwk le?
An lo zawh ngei chu a rinawm viau asin.

Ka pate chu Zirtàwpni zîng tûkțhuan ei khamah Aizawl pan chuan an chhuak a, Taitea ni lovin putea'n kan motor chu a khalh a, Thawhlehni emaw Nilaini vêlah emaw an rawn haw phei leh ang.

Ka haw chho peih ta bîk lo. Ka pate an awm chuang si lo a, bâkah, Rinfela ka hmu khât tawh dâwn a, ka hna ka chawlhsan tùr pawh ka hrilh a la ngai, Pathianni chawhnu lamah an ina lênga hrilh ka duh. A pa pawh ka hmu khât tawh dâwn a, thlahna chibai pawh bûk ka duh ang.

Ka pate nèn pawh kan inbe pawh reng a, ka pa chu a chau ang tih ka hlauh avàngin ka nu ka be țhìn a, ka pa chu a rawn vui ziah, a hnuah ka be leh nge nge țhìn. Hlim takin min rawn be ziah a, kei ve thung chu ka pa ka biak apiangin ka mittui a lo hnai ziah, ţah khum erawh ka duh lo.

Pathianni chawhnuah an inah chuan ka inkhalh thla leh a, tunah hi chuan miin min hmu pawh ni se ka pawisa vak tawh lo. Ka kal khât tawh dâwn si a, an in pawh hi ka hmu khât tawh dâwn, mitthlaah chauh asin ka hmuh tawh dâwn ni.

A pa pawh a lo țhu chhuak a, a dam țhat lai tak a lo ni nghe nghe a, ka pa chanchin chu Rinfela'n a lo hrilh ve ngei a ni chêk ang, pawi a tih thu min hrilh ve nuap nuap a. A dam thuai a beisei thu sawi pah chuan," I pa chu a la upa lo a, a taksa a chak țhat chuan a hneh thei êm êm ang, nang pawhin chhel taka tuar tùrin i fuih sauh sauh ang a, a bulah pawh i mittui titla duh miah suh ang che, chak taka in awm chuan ani pawhin a chak phah ngei ang," tiin min fuih sauh sauh a.

Rinfela nèn kan awm hnuah chuan  ka thil sawi tùr huphurhawm tak chu ka sawi țan ta a.

"Ka hna thawh lai hi bànsanin ka khuaah ka awm tawh dâwn a, ka nu ai sikulah ka thawk ang a, ka nuin ka pa a enkawl ve thung ang a," ka ti a.

Ngawi rengin min en ringawt.

"Tûn kâr chiah hi ka thawk tawh dâwn tihna a nih chu. Inrinniah ka haw chho bawk ang, kan inhmu khât deuh tawh dâwn a, inhmu khât deuh dâwn mah ila kan inbe reng thei tho alawm tiraw?" tiin ka nuih sak a.

A ngaihtuah ka hre thei lo, ngun êm êmin khap lo lêkin min en rùn reng mai.

"I thin ka tihrim loh ka beisei, hrilh che ka hreh ve bâkah kei ngei pawh hian pawm harsa ka ti a," tiin ka mit chu ka la sawn a, ka mittui a tlâk mai loh nân ka khap deuh sak sak bawk a.

"Min en teh!"

Leh mauh mai a!

A thu ka âwih mai loh chuan. Ka en leh ta nge nge a.

"Ka hmangaih che."

Min hmangaih thu a sawi! Min hrilh a nia, ka thin chu a phu dup dup a.

"Rinfel, min hnem nân-"

"Ka hmangaih che tih chiang takin ka hre ve chiah. A hma kha chuan ka duh che tih ka pha lo; mahse, tunah chuan i laka ka rilru puthmang hi hmangaihna an tih ngei chu a ni tih ka hria, hnem nân chea sawi ka ni lo, ka thinlung tak takin ka sawi," a ti leh duah a.

Țhut hnaih sauhin," Min han hrilh nawn leh teh," ka ti sap a.

"Ka hmangaih che, Sangbawih. Ka hmangaih takzet che," a ti leh a, ka lo ngaihthlâk  dàn a dik bawk a niang, a thinlung ațanga chhuak leh tih takzeta sawi niin ka lo hre ve tlat bawk.

"Kei pawhin ka hmangaih che alawm, ka hrilh tawh che kha."

Kan inpawm rual a ni ber ang chu, nghet zetin kan inkuah a, kan thinlung chu a inhnaih takzet a ni. Ințhenna dârkâr lo hnai telh telh tawh mah se chu chu kan ngaihtuah phal lo, thinlung insuih zawm thar kan ni a, kan tân chuan he hun tluka hlû hi a awm thei tawh lo ang, kan inhmangaih ve ve si a.

"Min hrilh leh rawh."

"KA HMANGAIH CHE, ROSANGPUI. Hawrawppui ngatin a nih kha aw ka hrilh che," tiin a nui suk a.

"Ka hmingpum engtin nge i hriat?" ka tih chuan," Ka bialnu i ni alawm," a lo ti mai a.

"Kan inah khân i han hmu a ni lo maw?" ka tih leh chuan,"Rosangpuii tih hi hming nalh tak a ni, a putuin i zir bawk a," tiin ka hnâr hmâwrah chuan a fâwp zoh a.

"Min hrilh leh rawh?" ka ti leh a.

"Ka hmangaih che," tiin ka chalah a fâwp phawt a, chutah," Ka hmangaih che," tiin ka mit dinglamah, chutah veilamah. Chutiang zêlin ka biang tawn tawnah, a tàwp berah chuan chiang kêk kâwka a mitmeng mawi ka tih êm êm, min hîp thei deuhtu chuan min enin," Ka hmangaih che, ka thinlung zawng zawngin," tiin, a rawn kûn hniam a, lungchim zetin ka hmuiah chuan a rawn fâwp zui ta vawng vawng a.

*KAN CHAK LOH LAI BER HUN HI KAN CHAK TÂWK A NI TIH LANTÎRNA HUN ȚHA BER A NI*

https://chat.whatsapp.com/DXMsyQQZ3Lp2ASRh50UCed

Join leh keuh rawh aw. Thil man tlâwm, țha leh mawi bawk si zawrhna a ni e.