☆24/7☆ - 30 By Dingdi Pachuau

 ☆24/7☆ - 30 By Dingdi Pachuau

Ni khat chauh hun ka nei ta. Vawiin hi ka school kài tàwp ber nî a ni dâwn ta, he school kawngah hian ka kal ngai tawh dâwn lo tih ka ngaihtuah ringawt pawh chuan ka lung a lêng lâwk a, ka rilru chu min hriatpui ve ni àwm fahranin ni lah chu a êng dul ve ruih bawk a.

Ka chhuak hma ve deuh bawk a, muangchângin ka kal a, ni tina ka kal țhinna hi theihnghilh loh ka duh, ka mitthlaah châm reng se, chu chuan ka lunglènna pawh min chhâwk dâwn asin. 

Ka phone chu ka phawrh a, thla ka la ta chiam mai, nakinah ka en lêt leh duh ngei ang a, lunglèn pawh min hnèm thei deuh mahna!

Chawhma 3rd period thleng chu class pângngaiin kan kal a, 4th period-ah erawh min thlahna hun an lo buatsaih dâwn chu niin, a rûk vekin an lo ti si a, ka lâwm bawk si, ka lungchhe bawk si chu ka mittui a tla pûr mai. 

Naupang lam leh zirtîrtu lamin min thlahna thu sawiin thlahna thilpêk min pe a, lungchhe țûnin ka lo ngaithla a, ka pa tân damna țha zâwk min duhsak thu an sawi phei chuan ka lâwmin ka lung a chhe zual a, min lo ngainat ve hlawmzia ka hriat thar phah hle a ni. Eng mah ka lei ve loh avàngin pawisa tam vak lo chu Principal hnênah ka hlàn ve bawk a, a rûka inthlahrun erawh a awl khawp mai. Hun tàwpah chuan min chibai chhuak vek a, mittui ka dang zo ta lo, mi dangho pawh ka tikhawlo zo vek mai.

Mit sen ûrhin thil min pêk chu ka pawm haw a, tûnah chuan a tàwp tak tak ta, he kawng hi ka zawh ngai tawh dâwn lo, ka thawhpuite leh ka naupangte pawh ka hmu khât tawh khawp ang, a țhente phei chu ka hmu tawh ngai lo hial maithei a ni.

"Min hmu lo a ni maw?"

Ka ngaihtuahna hlîr mai ka kawm avàng chuan țawng ri ka hriat chuan ka phu zawk mai nghe nghe a, Rinfela nèn chuan kan inen ta ràn mai.

"Hetia i awm hi ka ring a," a ti sup a, min en reng chung chuan ka thil pawm lai chu min rawn chhuhsak a.

"Eng nge i lo tih?" te chu ka ti tak hê hâw a.

"Haw ila?"

"Haw pawh ka châk lo," ka ti sap a, ka mit, ka țahna avànga bui deuh châr chu ka khap sak sak a.

"Kalna tùr ka hria," tiin a kut lehlam chuan min kai a, muangchâng tho chuan min kalpui a,  min hruaina tùr hmun pawh chu min hrilh chuang lo a, ka zâwt bawk lo, ani hi chuan khawi hmunah pawh min hruai se, ka zui zêl ang.

Kan school kawng(a ni țhìn; mahse, tun ațang chuan a ni tawh dâwn lo) ațang chuan pêngin step-ah kan kal chho deuh a, thui lo tê kan kal hnuah chuan mi pahnih țhut theihna  lo awmah chuan kan țhu ta a, ka hawi kual vêl a, helai hmun hi ka la kal ngai miah lo. A thengthaw nuamin hmun hrang hrang a thlìr zàu theih viau a, ni a sa hran bawk si lo nèn, a nuam ka ti.

"I kal tawh țhìn a ni maw?" ka tih chuan," Vawi hnih chauh," a lo ti a.

Maimichhîng vang vangin boruak thianghlim tak chu ka hîp vang vang a, hun hi kal thei tawh lo se, tihian ding reng mai se.

Ka kut a rawn vawn chuan ka meng zawk a; mahse," Tihian, ka vuan ang che, maimichhîng leh rawh," a tih avàng chuan ka maimichhîng leh ta a.

"Hun hi ding reng se tiraw?" ka ti sap a.

Nghet lehzualin ka kut chu a rawn vuan a, min chhàn a tum lo a niang, a țawng tlat lo.

"Kan va ințhen teuh tawh tak!" ka ti chhuak hap a.

"Kan ințhen dâwn lo!" a lo ti sup a.

Mengin ka en vat a, ani pawh chuan ka en tih a hria a niang, a rawn meng chhuak ve nghâl a.

"Vawiin leh zanin chauh hun kan nei tawh!" ka ti a.

"Kan ințhen ngai dâwn lo, kan taksa hmun hranah a awm rih mai dâwn a ni," a ti mai a.

"Taksa hmun hrana awma hmu thei lo chea awm kha ka huphurh alawm!" lungchhe aw lek lek chuan ka ti deuh țiau a.

"Lo hnai teh!" ti mah se, ka hnaih hma hma chuan amah zâwk chuan min rawn kuah ta thlawp a, ka hnung chu a chûl nghâl a.

"Hetianga i awm chuan hrehawm ka ti dâwn a nia, i mittui tla leh țap hmêl ka hmuh phei chuan rilru pângngai ka pu thei lo, ka hmangaih che tih i hria tiraw?" a ti dap dap a.

A âwmah chuan ka bei a, țap lo tùr chuan ka insûm ve hrâm hrâm a ni, insûma hlim hmel tak pua thlah tùr zâwk ka nih tehlul nèn, vawiina ka hun hman hmasak khân rilru a tihnîm ruih tawh sa a, hlim loh sa nèn, hlim hmel put luih a har êm a ni.

"Umm..."

"Kan inhmu ngai tawh dâwn lo a ni lo a, rei lo tê chhûng chauh kan inhmu lo zawk mai dâwn a ni, kan inhmuh leh hun a nghahhlelhawm sauh dâwn tihna a nih chu," a ti leh sup sup a.

"Kan inhmu khât dâwn asin! Ka nu ai school ka kal ang a, nang lah i rawn zin ngai àwm si lo," ka ti thung a.

Ani ve thung chuan,"Kan dam chuan kan inhmu leh thuai ang tih ring la, kan inhmuh leh hunah meuh chuan kan inhmangaihna pawh a lo pung sawt ngei ang, tam takin," a ti a.

Ka ngawih reng avàng chuan,"I pa pawh a dam leh thuai ang a, nang pawhin hetah i hna ngai i rawn zawm leh thuai mai ang, kei pawhin hna ka lo thawk char char ang a, nakîna kan pahniha tân vek a la ni dâwn si a," a ti leh a.

Kan inhnèm hlei thei meuh lo chu a ni, ani'n a theih tâwpin min hnem a tum a, a êng lam min thlìrtîr a tum ve țàng țáng a ; kei erawhin a thim zâwngin ka thlîr lui tlat a, chutiang lam thu chu ka chhâk chhuak char char bawk. Thinchhe tak chu ni se chuan 'Ninawm' tia min kalsan daih a duh ngei ang chu! 

Tlai ve deuh hlekah ka haw a, chhûngte lakah ka inthlahrung deuh viau nain eng vak mah min zâwt lo a,'I va tlai ve' pawh min ti lo, hmel pângngai takin thingpui ka duh leh duh loh min lo zâwt mai a, an mitmeng leh awm dànah ringhlel hmel an tihlan loh avàngin ka awm chu a nuam deuh sawt.

Zanriah ei lai chuan ka nutei chuan," Zanin chu, inthlahna kan siam dâwn em niang? Naktúkah i haw tawh dâwn si a?" a ti a.

Rose-i chuan," Ho mai mai! A rawn kal tawh ngai dâwn lo pawh a ni lo a, a la rawn kal reng reng dâwn. Inthlah tih hi chu inhmu tawh ngai lo tùr țawngkam deuh hi a nia, ka duh miah lo," a lo ti tlat thung a.

"A, in duh tâkin ka ti mai a nia, tûnlaiah hi chuan in uar riauin ka hria a," ka nutei'n a tih leh chuan,"Sangbawih, kan tûnlai ve lo a niang tiraw? Kei ka peih chi zu ni hauh lo a! Bâkah lèn lawk ka duh a, hruai ka duh nghe nghe asin," Rose-i chuan a ti leh zat zat a.

"Haw dâwn zàna han lènpui daih pawh chu, in lêng a nih pawhin rei lutuk lo ula, nula zàna lèn hi chu a mawi tehchiam lo a nia," ka patea pawh chuan a lo ti ve a.

Chaw eina kan seng fel hnu chuan room-ah lûtin zàwi deuh sap hian," Insiam rawh, in tân hun tàwp zàn a nih hi, ka rawn call hunah che kan haw chauh dâwn nia," a ti sar sar a.

Chaw ei laia a nu thil sawi a hnial tlat chhan kha ka hre thiam ta uar uar e.

Rinfela nèn kan inhmuh leh chuan eng mah ka sawi tawh lo, nghet takin ka kuah vawng vawng tawp. Ka ngai dâwn si a, ka kuah khât tawh dâwn bawk si, ãm takin, kuah theih chhûng chu kuah reng ka duh.

"I pa kan tùr leh, nangmah hmu tùr chein ka rawn kal ang," a tih chuan," Lo kal ngei ngei ang che," ka ti a, chu chu ka țawng chhuah hmasak ber a ni. A pa lam ka ngaihtuah thei rih lo a, tunah tak hi chuan keimah hi ka inhmu lian lùr mai a ni. Mahni hma ka sial pawh a ni maithei, nia, ka ngai dâwn êm êm si a, ani hi ka tân awm reng se, hmu reng thei ila tih hi ka duh  a ni miau mai si a.

"Ka rawn be ziah ang che, i hna chu țha takin i han thawk ang a, i pa pawh duat takin, i nu chu i enkawlpui dâwn nia," a ti sup sup a, chutah," A fanu duat i ni a, a thlâkhlelhzia che kha hria la, lâwm takin enkawl i tum dâwn nia, thlahlel êm êmtu che nu leh pa i nei a, hlim viau ang che," a ti leh a.

A thil sawi chuan thil dang min ngaihtuahtîr daih mai. Ani chu a nuin thlahlel lovin a pa nèn a kalsan a ni a, nu thlahlel rual leh ngai rual a nih laiin a kalsan a ni, nu leh pa, amah thlahlel ve ngawih ngawihtu chu neih a châk ve tih a chiang viauin ka hria.

"Ka lo hre reng dâwn nia," ka ti sap a.

"Min ngaihtuah lo la, chutia ka tih avàng chuan i rilru ațangin min paih chhuak rawh ka tihna chu a ni lo. Min ngai a nih pawhin ka ngai ve tho ang che tih ngaihtuah la, ka hmangaihna chuan engtiklai pawhin a chènchilh reng dâwn che tih theihnghilh miah suh ang che," a ti leh duah a.

"Aw le."

Thil sawi tùr tam tak nei mah ila, sawi vak ai chuan kuah hi ka duh mai a, ka sawi pawhin a hriat hnu tho kha ka sawi leh dâwn a, chuvàngin, zanin hi chuan sawi tam lova kuah tam ka duh zâwk a ni. Phone-ah kan inbe reng thei dâwn; mahse, inbe reng thei mah ila ka kuah thei tawh dâwn si lo a ni.

Kan ințhen dâwnah chuan kal hmasa zâwk nih ka duh lo a, ani lahin a lo duh lo bawk a. Pên khat tê têin kan chhiar a, chutiang chuan kan inhlatsan hret hret a, ka mittui tling pam chu a rawn hmu thei tawh kher lo ang, pên sawmhnih kan pên ve ve hnuah phei chuan ka mittui a tla zawih zawih tawh a, tûn hi ka hmuh tàwpna a ni tawh dâwn asin.

Khumah chuan ka tlaivâr a ni mai, chutiang bawkin ani pawh. Kan in-text reng a, titàwptu nih kan duh lo ve ve leh zêl a, kan ințhen hun hnai zêl chuan mangțhatîr min tichâk hlawl lo.

A tûkah chuan ka insiam char char a, Taitea a rawn kal a, ka bungrua a tam ve si a, hnutchhiah rih ringawt kha ka duh bîk si lo a ni. Rose-i room ka țâwmpui ringawt kha a ni a, hnawk a lo ti palh ang.

Tih tùr vak a nei si lo a, hma takah kan haw a, kan chhuah dâwnah chuan text-in kan chhuah tùr thu chu ka hrilh ve a. Rose-ite in kan tlàn pelh dâwn chuan zàna kan inhmuhna țhin lam chu ka melh țâwk țâwk a, khulaiah khuan engtikah nge kan in hmuh leh theih ang le? 

Taitea a țawng zauh zauh a, kei chu ka ngawi reng mai. Țawng ka châk lo a, maimichhìn vang vanga Rinfela awmna ka chhuahsan mêk a ni tih hre hauh lova muthilh daih ka châk.

Nizàn lam ka mu mang lo bawk a, ka lo muhìl tak tak a! Kan khua kan thlena kan in bula a din fel hnuah chauh min kai tho! Ka lo mu tui viau a ni.

Ka pa chuan hlim takin min lo làwm a, kei pawh intiharhin, hlim hmel pu luiin ka pa chu ka kuah vang vang a. A lo tlangvâl khawp mai, mut pawh mu lovin țhutthlèngah a lo țhu luau a, damlo a ni tih pawh a hriat loh.

Rose-ite pawh phone-in in kan thlen tawh thu chu  ka hrilh a, Rinfela pawh ka text zat. A message pawh a lo awm reng tawh niin!

*In chhuak tùr kha ka hmu reng che u a*  a rawn ti! He pa hi min lo enthla ru reng a ni ngei ang, rawn inlan ve tùr hi a nia.

Mazuali pawh a rawn lang leh vat.

Ani hian țhian nih a tlin ber mai ka ti, ka haw apiangin a lo lang vat thei zêl a, min ngai pawimawh tih a hriat a, hetiang țhian ka nei hi ka lâwm takzet a ni.

Chhûngkhat țhenrual țhate pawh an rawn lang sap sap a, min chibai der lâwp lâwp lah bo lo, ka rilru hnîm ruih pawh chu a zia ta khawp mai.

Mazuali'n ka thawmhnaw min rem felpui a, zanriah chaw ei ve nghâl tùrin ka ti bawk a, ani pawhin a lo hnial lo, a nuam thei a nia.

Zanriah ei kham hnu deuha Mazuali ka thlah laiin Rinfela chuan min rawn phone ta a, ka ring ngam chiah lo deuh kha a ni a, phone call tak hi chu ka beisei ngam lutuk lo a ni.

Ding datin, "Min ngai em?" ka ti nghâl tâwng a.

"Ngai a niang, nizàna kan awmnaah khân keimah chauhin ka awm," a rawn ti cool ruih a.

Ka va khawngaih tak! Amah chauhin, min beisei ngam hauh lo leh nghah chhuah tùr awm hauh lovin min nghâk a ni ang a...

"Awm suh, haw rawh..." ka ti sap a, ka mittui pawh a rawn tla nghâl zat a.

"Tihian, ka hnaih deuh thei chein ka ring a," a tih phei chuan ka inhnît chhuak hraih a, Mazuali'n min rawn hnaih nghâl vat bawk a.

"Aih, ni lo, nangmah chauh chuan awm suh, i khua a har dâwn asin," ka ti a, ka mittui chu a rawn tla zung zung bawk a, hrûk pawh ka tum lo. A phû êm asin!

"I țaha hrehawm ti taka awm țhìn i hria em? Min han hrilh teh," a rawn tih leh chuan ka insûm deuh hlek a," Ka țap hleinem," ka ti ve hrâm, ka aw aţangin a hriat vek theih tho si a.

"Nia, i țap miah lo, nang chu ka angel duhawm tak kha a ni a, angel chu an țap ve ngai si lo a," a rawn ti leh a.

"Angel nih ka duh lo, an țah ngai si loh chuan," ka ti ve thung a.

A nui hawk a.

"Nang chu angel 'cial' alawm i nih, angel 'cial' leh duhawm, Pathian pawhin a duhsak bîk leh a enthlâk bîk," a ti a.

"Chutiang pawh chu ka duh lo," ka ti leh a.

"A nih leh, keimah chauhina ka duat tùr leh ka hmangaih awm chhun tùr Angel 'cial' thla nei lo i ni," a rawn ti leh a.

Kan thil sawi naupan chhiatzia chu ka ngaihtuah chhuak a, ka nui ve hawk a.

"A naupan chhiatthlâk!" ka ti a.

"I nui tawh a, a țha tho tho tawh e," a rawn ti zat a.

*******

A thil sawi chu a bawhchhe lo khawp mai, zànah a hun pângngai angah min rawn call zat zat a, ngaiin lunglêngin, va hmuin kuah thei lo mah ila a aw ka hre thei a, kan inbe thei a, hei pawh hi a làwmawm viau; mahse, kan inbiak zawh veleh hian hmaichhana hmuh ka châk zauh ziah.

Rose-i'n a chhûngte'n Rinfela nèn kan inngaizâwng tih chu an hre vek tawh tih min hrilh chuan mak kati kher mai.

"Hria angin an awm si lo a," ka tih chuan," Awmzia a awm tawh loh thu ka hrilh alawm. Ka nu phei chuan a duh lo khawp mai a; mahse, i haw thuai dâwn tawh a, ani lo duh loh kha awmzia a neih loh thu hrilhin i hlimna tihchhiatsak lo tùr chein ka ngèn a," a ti duah a.

Rose-i lo felzia chu aw...Ka nuteite nupa pawh chuan rei lo te chhûnga kahlimna min tihchhiatsak duh lovin min en liam ve mai mai a, an zahawm ka ti ngawih ngawih. Hmuh leh pawh ka huphurh tawh ngawt ang chu.

Kan khuaa ka awmna kâr hnihna chiah, Inrinni zàna zanriah kan kîl laiin ka pa chuan dam duai hian," Bawihte, Rinfela kha chu a țha ka ti lovin ka duhpui lo che a ni," a rawn ti chhuak ta a.

Ka hlauh ang ngeiin maw!

*HLAWHCHHAMNA HI THIL ZAWNG ZAWNG TÀWPNA NI LOVIN, ZIRLAI PAWIMAWH TAK INȚANNA NIIN, HLAWHTLIN TUMA BEI MÊKTE BEIDAWNTÎR TUMTU HMANRAW  PAKHAT VE MAI A NI*