☆24/7☆ - 31 By Dingdi Pachuau

 ☆24/7☆ - 31 By Dingdi Pachuau

Ka ngawi reng ringawt a, ka chaw ei châkna a tàwp chawpchilh nghâl vek. Mi dang ka melh kual ngam loh avàngin ka pa thu sawiin anmahniah nghawng a neih dàn ka hre lo, an lo sawi lâwk vek tawh pawh a ni maithei.

Ka pa vêk chuan," A fel lo ka ti pawh a ni lo, thu khuh leh zêp nei mi ni pawhin ka hre lo; mahse, Bawihte, han ngaihtuah ve la, inkhâwm leh țawngțai ngai miah lova nun han hman mai chuh! Ngaihtuahna a tithui i ti ve lo maw? A nunhlui chu lo dah țha ta ila, tuna a hun hman mêk hi a pawimawh ber chu a ni a," a ti leh charh charh a.

Sawi tùr ka nei chuang lo. Ka pa sawi hi a dik miau mai si a, ka lo rin lâwk thil a ni tho a, a hnial zâwnga lo țawng ka tum chuang lo.

Mahse, Rinfela chanchin engkim ka hriat hnu hian ka phatsan thei lo bur tih erawh ka hre chiang.

"In lo induh viau a nih pawhin, Bawihte, thil thui takin ngaihtuah la, kan duhsakna che hi hriat thiam i tum hrâm dâwn nia," a ti leh a, thil dang a sawi belh tawh lo.

Taitea chuan," Chaw kha ei rawh, eng tham mah i la ei lo a nia," a rawn ti zauh a.

Chhûngte hmaizahna avàng chuan ei luih ka tum ve ngial a; mahse, ka hlawhchham. Ka chawk let ka chawk let ringawt a, a hnua ka nu a kham tâkah chuan ka zui ve nghâl daih.

Inkhâwm tùra ka room-a ka insiam lai chuan Taitea a rawn lút a.

"Khatiang hmel kha pu nghâl ngawt teh suh, ka pa thil sawi kha ngun takin ngaihtuah la, dik lo i hre miah lo ang," a rawn ti a.

"Nupui i neih hma khân ka pain i bialnu a duh loh thu sawi ve ta se, i hlim thei bîk dâwn em ni?" ka lo ti ve thung a.

"I ho mai mai e a!" a tih chuan,"Ka ho bîk ngawt lo aw, ka rilru a nâin a hrehawm ve thei tho tih hria la," ka ti nang nang a.

"Ka hria e, ka hria e. Han insiam zo phawt mai teh le, kan la sawi leh dâwn nia," tia bân pharin, room ațang chuan a chhuak ta nghâl a.

Ka inkhâwm ve tak nain ka rilru erawh chu hmun dang daihah a awm.  Rinfela nèn kan inhmuhna hmun Rose-ite in bul, kan school hlui kawng leh Rinfelate in chu ka mitthlaah an rawn inlan chhâwk zut zut mai a, a tàwpah erawh an inah chuan a châmbâng ta a.

"Kan chhûngkua kan kim lai chuan nuam ka ti thei asin, ka nu leh pain min duat a, patea pawhin min duat țhin. Ka pu erawh kha chu ka hre hman vuai a ni ber, a thih khân ka la tê lehzual a, ka nu khân țap chungin min pua niin ka hria. Ka pu thih hnu ațang khân patea chu kan in ațang chuan a chhuak bo deuh reng a, ka ngai thei a nia aw, min kàwm hlim peih ber si a."

"School ka kal ve a, ka nuin min hruai țhìn a, ka pa erawh chuan workshop a nei a, furniture workshop ang hi a nia, school bànah ka kal ve țhìn.  Ka nu erawh chuan a remti lutuk lo, kawngpui bul mai a ni a, motor a tam thei si a, min chìl a hlau țhin."

"Ka nu min chhuahsan khân ka hre thiam lo a, a zin emaw ka ti tlat a, ka pa hnênah ka nu lo haw hun tùr ka zâwt țhìn. Ka pa chuan thu dik tak min hrilh mai a, ka hre thiam vak lo nain pasal dang a nei daih mai chu mak ka ti a nia aw. Hun a rei telh telh a, ka hre thiam chho ve ta thuai a, school kal pawh nuam ka ti thei tawh lo, ka pa bulah, a hna thawhna hmunah chuan awm ve ka châk ber țhìn. A hnuah phei chuan ka bâng ta daih nghe nghe a, ka pa bulah ka thawk ve mai mai a nih chu. Ka nu awm loh hnu ațang khân ka pa hlim hmel hmuh tùr a vâng ta a, amah lah upa lama nupui nei a nih vàng a ni ang, a tuar thu sawi ngai lo mah se, ka nu awm loh ațang chuan a lang upa sawtin ka hria. A chângin a țhu ngawi reng a, min hmu miah lovin min lo en leh char char țhìn bawk a, a â ta emaw ni ka ti hial țhin."

"Kan in chu a zauin a lian si a, ka nu a awm lo a, patea lah a awm khât nèn, ka pa nèn chauh chuan a reh thei lutuk! Mi an lo lêng ngai lo a, ka pa a damloh pawhin ka enkawl ve mai țhìn a, damdawi ina kal a duh ngai si lo nèn, ka mangang thei a nia aw. Kan țhenawmte an awm khât si, patea a lo haw khât bawk si, kan in chu chhuahsan vang vang ka châk țhin. 

"Patea kan ina a rawn luh leh hmasak ber chuan nupui a rawn hruai haw a, motor a rawn hàwn tel bawk. A nupui chu a hmelțha ka ti lutuk! Min duat a, chutia chhûngkua kan pung leh ta chu hlim pawh ka hlim hle a ni, hun âwl ka neih veleh patea chuan motor khalh chu min zirtîr ve a, ka thiam thuai ta nghe nghe a, kum ka tlin ve tawh avàngin driving license pawh patea nèn chuan kan buaipui a, license ka neih tirh phei kha chuan ka hlim lutuk a, zànah pawh ka mu thei lo, ka duh duhnaah motor ka khalh chhuak ve thei tawh dâwn si a."

"Mahse, ka pa erawh chu ka hlim ang chuan a hlim lovin ka hria, ka nu min kalsan ațang khân a țawng tlêm êm êm a, pateate nupa pawh chu a be ngai mang lo, kei nèna kan awm dun țhin lai pawh khân a țawng zen zen lo. Patea nupui chu a țawng duh a, ka nu ang maia țawng duh leh nèlawm a ni; mahse, ka pa chuan a țawng chu a ning țhìn niin ka hre ber, ka nu kha a hre chhuak lo thei dâwn si lo a, a hlim thei lo pawh chu ka hre thiam ve ruak tho chuan ka hria."

"Kum khat țha hnuah chuan zan khat chu ka pain in danga insawn chhuah a rawt ta tlat mai a, ka hre thiam lo teh asin! Mahse, a tilui tlat si a, ka pateate nupa pawh chuan an phal lo a; mahse, ka pa thu chu hnial rual a ni lo, kan chhuak ta a, mi in hnuai zau vak lo kan luah ve ta a, chuta țang chuan ka pa chu a hna thawhnaah chuan a kal a, kei chuan taxi khalh tùr ka zawng ve ta a ni..."

Mazuali'n min rawn nghawk salh tâkah chuan ka ngaihtuahna ațang chuan ka harh chhuak ta hlawl mai, bànna hla sa tùrin an lo ding vek tawh niin, kei lah ka ngaihtuahna ramah ka lo chêng veng veng mai si a!

Inkhâwm bànah pawh chuan inah ka haw nghâl peih lo a, Mazualite inah ka pêng kawi rih. Inah ka chhûngte hriatah Rinfela biak ka inthlahrung dâwn si a, hetah hian biak mai ka duh.

"Engtikah nge tlawh tùr che chuan ka lo kal ang? I pa pawh kha kan a ngai hrim hrim a," a rawn tih chuan ka hlim kher mai.

"Lo kal i tum tak tak maw?!" ka ti leh ngat a.

"Aw, ka intiam tawh kha, kârleh khian a țha mai ang em? Inrinniah rawn kal ta ila, a nih loh pawhin Zirtàwpni tlaiah rawn riak chho ila, Inrinni zînga chhukthla leh ta ila?" a rawn ti duah a.

"I hman hun hun kha a țha ber mai, zaninah i chhuak leh em?" ka ti daih a.

"Umm..."

"A ngaiah khân maw?" 

"Aw, hei, i room ni țhìn pawh kha a êng reng mai, tukverh hawnga i rawn hawi chhuah ka ring deuh tlat a nih chu, i awm lo tih ka hre reng tho si a," a rawn tih chuan khawngaihna rilru bawk khân thinglungah hna a rawn thawk leh ta.

"Kal tawh suh, ka rawn chhuk hunah kan pahnihin kan kal dùn zâwk dáwn nia, nangmah chauh chuan kal tawh suh aw, i țhiante zînga i awm loh pawhin i pa bulah awm daih la?" ka ti a.

"Kan pahnihin kan luahlum thei tawh rih si lo a, kei talin ka luahlum loh chuan a lo khawhar lutuk ang tih ka hlau alawm, bâkah, hmun dang ai chuan helai hmun hi ka ngaina hrim hrim tawh a, ka maimichhìn phei chuan ka bula awm ang rengin ka ngai che a," a ti leh sup sup a.

A thil sawi chuan ka mittui bawk chu a rawn kai harh leh ta. Ka khawngaih rualin keimah pawh ka inkhawngaih tel tho, ka pa thu sawi kha hre ve tehréng phei se chuan aw...

Chulam chu ka ngaihtuah chhunzawm duh lo.

"I lo kal hun tùr mawlh chu, ka nghâkhlel tawh! Ka hmu châk tawh che," ka ti ta daih a.

"Ka rawn kal hunah chuan ka haw lamah, ka hruai tel ve daih maithei che a ni," tiin a rawn nui hak a.

"I remti lo chung chung ka zui haw zâwk mai ang che aw? Chutin ti miah suh, i buai hlê záwk mai tùr a nia," tiin ka nui ve a.

Nuih luih ve pawh a ngai alawm, rilru tâwt a tithâwl ve deuh ang chu! A dera han nuih luih pawh hian țhatna a nei ve thoin ka ring.

Ina ka haw chuan ka pa chu a lo mu tawh a, ka nute chu an lo la mu lo thung a.

Filter-a tui chu in phawtin, dawhkàn chunga bowl lo inchhìn chu ka hawng nghâl zat a.

"Yess..." ka ti chhuak hliai a.

"Nichín khân an rawn zuar a, tui i ti ve thei si a, i pain a lei a nih kha. Naktûk chhùn thingpui hmeh atân kan kang sawr sawr dâwn nia," ka nu chuan a lo ti a.

Zochhangban hi ka ngaisáng ve a, keimahni hi chuan nei ve ngai lo mah ila, an rawn zawrh hi chuan kan lo lei ziah, mi dang pawh hian tui chu an ti ve tho, ka nu hian a kang thiam bawk a, a tui thei viau a ni.

Tûkțhuan kîl chu ka huphurh ru viau a nia; mahse, eng mah an sawi lo, ka pa pawhin thil dang daih a sawi a. Ka lâwm ru angreng, a chhan chu an sawi chhuah chuan ka inkhâwm tui lo leh vek dâwn si a.

Chhùn lamah inlêng kan nei ve nual a, Teruati a rài len ve tawh avàngin a hah ka hlau a, àwl theihna angah chuan ka àwl ve zêl a, ani lah a lo inthlahrung ve țhìn bawk nèn, tih tùr kan inchuh leh rawk rawk châng pawh a awm. Ka unaunu neih chhun ang a ni a, ka en hrang miah lo. Kei aiin upa lo mah se, ka u nupui a nihnaah chuan u angin ka zah der ve țhìn, amah hi a fel reuh a, țawng tam luam lo mah se a nèlawm ka ti viau bawk.

Tlaiah eirawng bâwl pahin Teruati chu Rinfela a hmuh dàn chu ka zâwt ve chhin mai mai a, ani leh Mazuali tih loh chu Rinfela chanchin sawipui ngam pawh ka nei lo. Ka pain min duhpui meuh bawk si lo a, ka nu pawhin a duh ka ring chuang lo, Taitea pawhin ka pa a țan tlat kha.

"A fel reng ka ti, a țawng tam lêm lo nain kan bulah khân a theihtâwp a chhuah ve niin ka hria," a ti sap sap a.

"A țawng tam lêm lo; mahse, ka bulah chuan an chanchin zawng zawng min hrilh ve asin, a thil lo paltlang tawh zawng zawngte hriat phei chuan phatsan leh ngam tùr hi ka ni miah lo, min ring ngam a, min rin avàng tak hian ka kalsan thei lo ang," ka ti ve a.

"Ka pain a duh loh chhan chu a inkhâwm ngai lo kha a ni ber a. Ani lah khân a zêp hauh si lo a, dik tak chuan ka pa tân pawh rin ngam chu a har ve dâwn êm asin, a nunhlui zawng zawng a hre ve vek bawk si a. Ka pa rilru tùr han ngaihtuah ve la, a fanu, a duat êm êm i ni a, i tâna chuan a țha ber a duh ngei ang a, Rinfela hi a țha ber ang em tih chu a ngaihtuah nasa viau ang," a ti leh dap dap a.

Teruati thil sawi chu dik ka ti lutuk. A dik vek; mahse, 'mahse' a awm tlat tho. Ka pain min duhpui loh vàng hian ka hmangaihna leh ka duhna kha a tàwp thei ringawt si lo, amah ka khawngaihna a zual sauh a, ka lainat a, ka inthiam lo pah deuh tho bawk. A chhan chu khati chen kan inkawp ve tawh a, engati nge Biak in lam hawi tùra ka lo sàwm ngai loh le tih ka ngaihtuah a ni, hei hi chu ka mawhphurhna liau liau a ni si a. 

Ka chhûngte'n an duh loh kha ka ring sa reng tho kha a ni a, engati nge ring sa reng tho si khân ka chhûngte'n an duh ve theihna dàn tùra ka lo buaipui loh ni? Inkhâwm loh aia inkhâwm țhatnate kha lo hrilhin lo lantîr ila, țawngțai ngai miah lo aia țawngțai țhatna leh thil tihtheihziate kha lo hrilh hre ve ta ila, heti reng hi a ni bîk ang em?

Ngaihtuahna min va neih thuitîr êm!

********

Ka nu bulah chuan inthlahrung ru angreng tak hian Rinfela'n lo chhoh a tum thu, ka pa lo kan a tum thu chu ka hrilh a, min hmu tùra rawn kal a tum thu erawh ka sawi tel lo.

"A țha alawm, a țhiannu pa a ni ve a, lo kan pawh chu thil àwm tak a ni," a lo ti fel êt a.

Ka rin loh lam daihin min chháng!

"Nu, ka pa hi a thin a rim ang em?" tiin ka zâwt pah nghâl a.

"Engah nge a thinrim ang? Amah rawn kan tùra rawn kal ve na na na, lo thinrim khum thu va awm suh," a lo ti leh mai a.

"Min duhpui lo sia?" ka ti leh țâlh a.

"I pa hi mi â a ni bîk hleinem. Hlauthâwng suh, ka lo hrilh dâwn nia; mahse, Bawihte, i pa duh chu i hria a tiraw? Natna khirh tak nei lai a ni a, a rilru tihaha tihhrehawm zâwng chuan awm lo hrâm rawh aw. Nang pawhin i pa natna chungchâng chu i hriat chian tawh kha, hlim taka a awm hian a nunna kan chelh rei thei ber ang tih kan hriat kha," a ti dap dap a.

Hei tak hi, a buaithlâk ka ti. Ka pa hi ka hmangaih êm êm  a, rei tak min dampui tùrin ka duh, chutih rualin a duh dàn zàwma ka hmangaih êm êm Rinfela țhen chu ka thei dáwn si lo. Ka pa tihnat ka duh lo a, Rinfela tihnat ka duh lo bawk. Ka awm dàn hi a buaithlâk, an pahnihah duh ka thlang thei lo, an pahnihin ka duh, ka hmangaih ve ve si a.

Rinfela chu a rawn kal ta ngei e. Ka chhûngte ka fak thlâwt, an lo be țha hûrh lo nain an lo be nêl hle a, a tân mitmei hmuh hrehawm ka hmu lo a, țawng hriat nuam lo lah an cheh hek lo. Ka pa pawhin a lo be țha, amah rawn kan a ni ve bawk a, a lo duat thiam khawpin ka hria. 

Mahse, ka tehkhin deuh tlat chu, vawk, talh tùr a ruahman diam, talh hma kâr hnih khat vêla duat taka enkawl hi a ni. Min duhpui miah si lo a; mahse, an tilang miah si lo, over miah si lovin an lo duat thiam êm êm zâwk a; mahse, Rinfela hi ka khawngaih.

Hun âwl a neih lohzia leh in chhuahsan reng theih a nih lohzia hre chiangtu ka ni a, rei awm tùr pawhin ka beisei ngam lo. Zirtàwpni tlaiah a rawn chho a, zàn a riak ang a, naktúkah a chhuk leh ang. Hun rei lo tê tak tak chauh ni mah se, a thutiam a rawn tihlawhtling a, ka lâwm êm êm a ni.

Ka rin loh deuhin zànah chuan ka nu chuan," Hetah chuan inlëng kan nei leh nual àwm si a, Mazualite in lamah va lènpui la," a ti a.

"Nu, ka pain a remti dâwn em ni? A mawi lo viau lo'ng maw?" ka tih chuan," Naktûk zîngah a chhuk leh nghâl mai dâwn si a, inkawm pawh induh ang chu," a lo ti leh mai a.

Ka nu hian min duhpui leh deuh si tihna em ni le? Nge, kan inhmuh tàwpna tùrah a ngai zâwk niang le? Chu pawh lo ni ta se, kan inkawm  chu a khap hauh si lo, min khawngaih ve deuh q niang. Nute hi chu aw, nute an lo ni nge nge e.

Mazualite veranda thlang lamah chuan țhuin kan innghèng rial a, ka kuah thùl. Kan inah kha chuan ka melh ngam țâwk a ni a, tunah chuan ka kuah ngam ta e.

Mazuali chuan thingpui hâng no hnih min rawn pe a, kal sawn leh pah chuan," Hun in neih tlèm êm kha, ngawi lo khân sawi zung zung rawh u, in sawi tam hman lo ang," a ti a.

"Sawi kher lo pawh hian kan inhre tawn vek thei alawm," Rinfela chuan a lo ti ve khauh a, chutianga a chhâng lêt ve chu mak ka ti viau zâwk a ni.

"Kârleh khian Aizawla phei leh lawk ka tum a," a tih chuan," Eng nge i tih dáwn? A hla si, ka ngai leh dâwn che asin," ka lo ti hmanhmawh a.

Ka bân chûl hoh hoh chung hian,"Ka thil hrilh tùr che hi hrilh che ka châk tawh asin aw, hmaichhan ngeia hrilh che ka duh si a, phone-ah pawh khân ka hrilh duh lo che a," a ti a.

"Eng? A ni maw?! A làwmawm lam a ni chiang, a nuam dâwn lutuk!" ka lo ti vat a, ka bân a chùl lohna lam kut chu ka hmer vang vang a.

"Um, a làwmawm a ni ber ang chu. Aizawla kan in kha kan nei lêt leh tawh dâwn a, a hmain ka hrilh tawh che kha, ka pa nèn kan chhuahsan hnu khân patea'n a tidanglam nual a, sak belhin miin an luah ve a, patea ber a thih tâkah chuan nei tùr awm tawh hek lo, ka kutah a tla a nih tâk chu," a ti hul hak a.

"A va làwmawm tehlul êm! Mahse... Aizawlah chuan min awm pheisan daih lo ang tiraw?" ka ti leh zat a.

"San lo tawp ang!" tia min enin a nui suk a, chutah,"Nimin khân ka pain min hrilh ve chiah a, kan in kan chhuahsan chhan kha, ka patea nupui khân a rûkin ka patea hnênah kan pafaa min chhuahtîr tùrin a lo ti a, ka pa chuan an țawng a lo hre ru a, inngeih lova chènho ai leh a hnua mualpho taka inchhuahtîr ai  chuan tiin a hma thei ang bera chhuah kha a thutlûkna chu a lo ni àwm e," a ti sup sup a.

"A nih tak chu, a hun laiin hrehawm tàwp ni mah se, in in nei lêt leh tho ta a, a làwmawm hle thoah ngai ang," ka lo ti a.

"A dik alawm. Kan in, kan chhûngkuaa hlim taka kan lo chènhona țhin in ngei kha kan in a lo ni leh dâwn ta a; mahse, ka pa hi chu a lût duh tawh kherin ka ring lo. A hun lai khân hrehawm a lo ti dâwn êm asin, kei lahin eng mah ka lo hre ve dèr si lo a, ka nutei duhàmzia kha lo hre ve phei ila chuan ka thin a rim ngawt ang! Min duat viau si a, mak ka ti ngawt mai," a ti leh a.

"Lan dàna țha duam ringawt hi an lo țha tak tak ĺo a lo nih dâwn hi, an rilru a ngêt tlat si chuan," ka lo ti a.

"Duhàmna hi a huatthlala ngawt mai! Ka nutei pawh kha duhâm lo se chuan chhûngkhat kan ințhen darh àwm tawp si lo a," a ti charh charh a.

"I nutei chu khawiah nge a awm tâk a?"ka tih chuan," Patea nèn khân an inngeih zui lutuk lo a ni chêk ang; mahse, an innei rei ve phian a. Fa an nei si lo a, nutei khân a chhuahsan leh ta ni àwm a ni, a awmna chin tak chu ka hre lo," a lo ti a.

"I hausa tawh àwm mang e! Aizawl phei chu in luah man a to thei si," tiin ka fiam hlak a.

"Pawisa hi thil țangkai tak a nih rualin nun a tichhe thei viau asin. Ka pa nèna kan mamawh tâwk ka thawh chhuah theih chhûng hi chuan tam tak ka mamawh lo a, ka hlim tâwk viau tho a ni; mahse, pawisa neih miah loh erawh a hrehawmzia ka tem tawh a, khatiang kha chu tawng nawn leh tawh lo ila ka ti khawp mai," a ti a.

Beisei nei deuh hian ka en chho hâ a, min rawn en chhuk ve a. Min en vang vang hnuah chuan thâwk la huaiin," Ka pain accident a tawh khán damdawi ina amah enkawlna sènso kha a ngai tam lutuk a, keiin hna ka thawk thei si lo, a furniture workshop kha ka hralh phah ringawt a. A enkawl man a sâng si, workshop ka hralh chung pawh khân a hnuah phei chuan pawisa naiasen pawh ka kawl tawh lo, ka pa a la dam bawk si lo, khatih laia ka manganzia kha, nun loh mai kha ka tân a țha berin ka hria a, mahni intihhlum ka tum ta nghe nghe a," a tih chuan a kut chu ka lo hmer ngawt ngawt a.

"I pateate i pùr ve mai lo'm ni?" ka tih chuan,"Ka mangan tàwpah kan in hluiah chuan ka va kal ve ngei a; mahse, an lo awm lo, bâkah, a hmain ka pain kan in hluia lêt leh tawh lo tùrin  min ti a, a chhan lam kha chu ka nute nèna kan chènhona hmun a nih vànga ka ngaih tlat vàng khân zawh enah ka en miah lo a. Pateate an lo awm bawk si lo nèn, ka kal nawn ta lo a ni," a ti leh a.

"Dam thlâkhlelhna ka nei lo a, ka nun hman ve tawh chu zahna, manganna leh buaina hlîr mai niin ka hria a, ka thih chuan chutiang chu ka tâwk lo ang a, ka chàwl ve tawh ang ka ti a ni; mahse, hruihruala ka lu ka rawlh luh laiin ka pa ka mitthlaah chiang takin a lo lang a, kei ka thih chuan ka pa chuan enkawltu tu mah a nei dâwn lo tih ka ngaihtuah chhuak a, a fapa, a innghahna neihchhun takmeuh ka ni a, kei chauh hi a dam chhan chu ka ni tih ka thinlungah hian chiang zet hian a rawn lang a, ka pa vàng chauhin thihna chu ka pumpelh ta hrâm a ni," a ti leh malh malh a.

*Thil kal tawh chu kal liamtîr mai la, i tih tawh pawh tih tawhin; tih tùr hmabâk erawh i la nei, hnunglam hawi lêt lova kal zêl a ni*