☆24/7☆ - 32 By Dingdi Pachuau

 

☆24/7☆ - 32 By Dingdi Pachuau

Khawngaih rilru tak hian a kut chu ka hmer ngawt ngawt a, chutih hun lai chuan lo intihlum ta se, a pa hi a dam chhuak kher ang em? Tuna dam taka hun an hmang dùn ang hian an hmang dùn dáwn hauh lo, a pa hian engtin nge hun a hman chhoh ang le?

"Pathian hnênah làwmthu awm rawh se!" ka ti chhuak hliai a. Hei hi ka rilru tak tak pawh a ni, hun hrehawm tak ka tawh hnua hlimna min pe leh theitu a ni a, min ring ngamtu, min hmangaihtu a ni bawk a, phatsan ka tum hauh lo.

"Kan intawng dâwn hauh lo asin, ka remti teuh lo mai!" ka ti leh a.

"Ka tum tawh lo. Ka pa vàng pawh hian ka tum chhin tawh lo, nang ka tawn hnu phei hi chuan ngaihtuah chhuah pawh ka duh tawh lo hrim hrim," a ti nghat nghat a.

"Thingpui kha in zo rawh, ka in zo tawh a nia," ka tih chuan no chu a ban ve mai bawk a.

"Aizawla ka phei chuan eng nge ka lo hawn ang che?" a ti leh a.

"Nangmah," tiin en chhoin ka nuih sak a.

"Kei chu loh theih loh thil a nia, thil dang, bengbeh i duh ang em?" a tih chuan ka nuih a za khawp mai.

"A ngai lo, a ngai lo. Dam takin va kal la, dam tak vêkin lo haw leh la, chu chu ka duh ber," ti tak zet hian ka ti a.

Kan haw har lutuk lo. Haw har lutuk pawh chhûngte lakah inthlahrun a nâ, Rinfela chungah an duh lohna an tilang miah lo a, hun fâl min la pe zâwk a nia, an zahna thlentu nih ka duh lo.

Zàn mutnaah kan in-text leh tho; mahse, amah ka ngaihtuah avàngin rei tak erawh ka duh lo, naktûkah a haw ang a, hna a thawk leh nghâl emaw a ni ang a, a mut tam loh chuan a taksa a chau lutuk palh ang.

A haw thla a, a tûk inkhâwm bànah  Rose-i leh Thlamuana an rawn lang ve leh hlawl bawk a! Min rawn hrilh lâwk hauh lo, min țhâwng viau; mahse, a țha lamin a ni thung. An fel ve êm asin, min hmangaiha min ngainatute an ni a, ka pa an rawn kan vang vang a ni. Thlamuana pawh hi ka haw hauh lo, a fel ka ti, kei akâr min ngaina ve a nia. Ka chhûngte pawhin an lo chiau-au țha khawp mai, lo ti huam pawh an ni chuang lo. Ka pa ei duh zâwng tùr nia an rin ei tùr țha leh hrisêl tih hriat ngawih ngawih an rawn leisak țeuh a, an insêng ve nual ngei dâwn tih a hriat.

"In insêng nasa àwm mang e! A làwmawm a, chutih rualin a zahthlâk  deuh tho bawk. Rawn leisak țeuh kher a ngai lo asin le," ka nu chuan a ti dap dap a.

"Nia, in rawn kan vang vang a, petrol leh hun in rawn hmang  tawh a, ei tùr lam kher hi chu a țûl ber lo asin, kan lâwm lutuk a; mahse, in insêng țeuh si a, rilru in tinuam lo," ka lo ti ve a.

"Chutiang sawi dyah lo chuan thingpui tui tâwk min siam la, a tâwk mai," Thlamuana chuan a lo ti zauh a.

Thingpui siam tùra thawh nghâl pahin,"Engati nge Tma bike-ah i rawn chuan ve mai loh a? Petrol a hek mai mai alawm le,"Rose-i en paha ka tih chuan Thlamuana chuan,"An pa a hlauhawm êm alawm," nui chung hian a lo ti vat a.

"Bsa'n a phal lo a," zawi deuh sap hian Rose-i chuan a ti phawt a, chutah," Min rawn thlah thlap, mipa dang lakah hian a hàm strict tawp a," a ti leh a.

"A țha alawm, inhauh phahna a thlen dâwn ai chuan mahni lìrtheia rawn chuan mai kha a fel mai," ka ti a, thingpui chu ka siam nghâl a.

Ka nu zochhangban kan nèn chuan thingpui chu ka pe a, kei pawh chuan ka ei ve leh a.

"Inkhâwm lovin in rawn kal tihna nge, in inkhâwm bâng in rawn kal?" ka tih chuan Rose-i chuan," Khâwm nâng, kan hmanhmawh duh lêm lo a. Inkhâwm bàna rawn kal tum kan ni lo ve hrim hrim a, inkhâwm tum ni ta ila, kan inkhâwm ve hman reng maw le," a lo ti a.

"Chu, inkhâwm țhulh țhakin in rawn kal tihna a ni a, in rawn ngai pawimawh a, a làwmawm ka ti takzet a ni," ka ti a.

"Pathianni hi kan hun âwl neih chhun a ni miau si a, rawn kal ngei kan duh bawk si nèn, inkhâwm hun chu kan la ngah alawm kan ti ta ringawt a nih kha," Thlamuana chuan a lo ti vat a.

"In fel ngawt mai," ka ti leh a.

Tlaia haw leh thuai an tum avàngin Taitea chuan broiler âr kan vulh chu a talh a, ka pain zanriah hma deuh taka ei a, chumi hnua haw chauh tùr chuan a ti bur mai si a, anni pawhin an hnial ngam bîk lo.

Zanriah chu hma takah kan ei a, ei khamah chuan anni pawh țhu muang tawh lovin, lo kal leh vat intiamin an haw ta nghâl a.

Zàn ka inkhâwm chu Mazuali'n min lo hmuh veleh min chhuahchhàl nghâl mawlh mawlh a.

"Rinfela nei reng siin mipa dang inlêng i nei leh tho si, 'A chhe lo lutuk' an ti lehnghâl a, i kawp êm chu ka ring si lo. Insawi fiah nghâl rawh," tiin.

Thil awmzia chu ka hrilh nghâl a, ani lah pek chuan," Awii, chutiangte chu min rawn hrilh ve tùr che alawm! Ka hmu ve duh a nia, chhe lo lutuk tak mai chu ka mit hian engtiklai pawhin a hmu châk reng tih lo hre ve tawh ang che," a ti nghâl a.

"Aw le, ka lo hre tawh dâwn nia," tiin ka nui a," An la rawn kal leh dâwn alawm, ka hrilh ngei ngei tawh ang che," ka tih chuan a nui hak a.

"A zah theih loh thlâk e tiraw? Ka râwp hmel tawp," a lo ti leh lawi a, a thil sawi chuan ka nuih a tihzat êm avàng chuan kan nui leh rih a.

*******

Rinfela Aizawl va kal chu ka rin aiin a va awm rei ta daih mai! Rawn phei leh thuai kha a tum sia, rin aiin tih tùr a va ngah ta a ni ngei mai.

Ka chhûngte pawhin sawi chhuak dawt tawh lo mah se Rinfela chu thlah tùrin min duh tih chu ka hre ru reng a, a rûk chuan hrehawm ka ti ve tho. An duh loh zâwng tak bialpa neih hi ka duh dàn a ni bîk lo; mahse, hmangaihnaah hian duh kan thlang thei em ni?

"Kan duh loh zâwng a ni ngei ang tih chu in inngaihzàwn hmain i hre àwm tho sia, inthiar fihlìmsan hrâm tùr che a nia," Taitea chuan a ti teh ngawt a!

Huanah kan pahnihin kan kal a, chawhmeh tùr eng eng emaw lain ka kal ve a, ani chuan min kalpui pahin hlo a vai mai mai thung q.

"A chanchin in hriat zawng zawng hi a dik tho a, a dik tluantling vek chuang lo, jail a tàn chhante kha a thil tihsual vàng a ni lo, mi thang kamah a âwk a nih kha," ka lo ti vat a.

"Mi thang kama âwk chut chut hmel chu a put si loh kha le, mi pângngai ve tak a niin ka hre sia," a tih chuan ka va melh hrãwk a.

"A pângngai bawk aw. A hun kal tawh zawng zawng hriat phei chuan a nun hman dàn hi a àwm ka tihpui asin, kei ni ve ta ila, ka thi daih tawh ang!" tiin ka chhâng a.

"Dik tak chuan mâkpa atân chuan a îtawm loh ve ém alawm le! A nunhlui kha chu thuhran ni se, khawtlâng leh kohhran lamahte inhmang ve deuh tal se, ka pa pawhin a hre thiam thei deuh mai tùr hi a nia, a thlahthlam lutuk a! Kan hausa a nih pawhin kohhran bèl ila, kan rethei viau a nih pawhin kohhran bèl tho ila, mi min hmuh dàn pawh hi a dik zaih mai țhin a ni," a ti duah a.

"Nia, a dik alawm. Ka thiam loh tak pawh a niin ka hria, inkhâwm ve tùr hian ka la sâwm chhin miah lo a, ka inthiam lo ru viau a ni," ka lo ti sap a.

"A chanchin dik tak a hriat zàn phei chuan ka pa kha kan be țawng thei mang hleinem. A thin a rim a, a zak a, țah erawh a tap chhuak lo chuan ka hria, a rilru kha a na lutuk a ni; mahse, tih ngaihna a awm si lo, a fanu duat, a chhuan êm êm bialpa chu rûk hmang, jail tâng zauh zauh, kohhran bèl ngai lo leh fahrah, rethei ve tê mai a ni si a," a ti duah a.

Ka pa rilru tùr chu ka hre thiam ve deuh hlek. A rilru chu a na dâwn tih ka hriat sa tho a nih laiin Taitea kâ ațanga hriat chuan min den dàn a dang leh deuh.

"Mahse, Taite, ka hmangaih êm asin. Mi sawisèlna ka hriat tam poh leh ka khawngaih a, amah ka hmangaihna hi a zual zêl niin ka hria.  Min duhpui lo ang tih chu ka hre reng, kei pawhin ka duh bîk lo asin; mahse, hmangaihna chu tuin nge dang thei ang? Hetiang mi hi ka hmangaih a ni ang tih ka ngaihtuah ngai bîk lo," ka ti ve duah a.

Kan ngawi dùn vang vang a.

"I hlim em?" a rawn ti ta thut a.

"Aw, min tihlim alawm. Kan inhmangaih dùn miau a," tiin zah duh bîk lovin, dik takin ka chhâng mai a.

"Kei chuan i hlimna a nih phawt chuan ka dâl hlur lo ang che, ka nau i ni a, țha ber chu ka duhpui tho che rualin puitling i ni tawh a, i tâna țha hre rual i ni, țha i tiha i duh chu ka hnualsuat lo ang ; mahse, i tih tùr chu i hriat tawh ka ring," a ti ta a.

A thil sawi chu ka hre dik lo emaw ka ti hial mai!

"Rinfela chu min pawmpui tihna a ni em?" phûr zeta ka tih chuan,"I hlimna a nih phawt chuan," a lo ti leh a.

"Taite, ka lâwm lutuk! Ka pa lamah i țang emaw ka ti char char a! Rinfela hi mi sual a ni miah lo a, a țhian kawmte hi kan ngaiha mi sual ni mah se, chhûngril lamah hian an sual vek kher lo a nia. Biak in an rap kher lo a ni thei, khawtlângah an inhmang chhuak tehchiam lo pawh a ni thei; mahse, kan ngaih ang êma sual hi an ni lo," duhthawh zet chuan ka ti a.

"Chutia fak kher an ngai chuang lo. Khawtlângin an sawisep tawh chin hi chu eng emaw hi chu a awm ve țhin a ni tih hriat tùr. Rinfela kha mi sual tak a nih chu ka ring bîk lo; mahse, ka pa ngaihngamna tùr leh lungsi taka a pawm theihna tùr chu...i hriat tawh kha," a ti leh a.

Taitea'n min duhpui lo lêm lo tih ka hriat chuan ka zâng deuh huai mai. Ka nu pawh hi a rilru a dam a, ka duh tlat chuan min hnial vak lo ang tih chu ka ring a, ka pa ber hi a ni harsa tùr chu, natna nei mêk a ni bawk si a, a rîlrem loh zâwnga ka awm chuan a taksa bâkah a nunna thlengin a tuar thei ngei dâwn si a.

"Taite, ka pa bulah chuan min sawipui ve la?" inthlahrung ru tak, beisei ru deuh tho bawk si a ka tih chuan," Awmzia a awm tam lo ang tih ka hlauhpui che, nangmahin hneh tum la a țha ber," a lo ti thung a.

"A huphurhawm ve êm asin," ka tih chuan," Hmangaih ber tân eng mah huphurhawm a awm lo, harsa deuh mah se hmangaihna chuan engkim a hneh vek thei," a ti leh a.

A tidik leh viau mai. Nia, kei pawh hi ka beiseina ka timit hma lutuk ve bawk a ni. Beih ahmain ka beidawng deuh ringawt a, ka nêp deuh chu a ni.

*******

Taitea chu ka ngaina zual sawtin ka hria. Rilru hrehawm leh ipik deuh ang khân ka awm nêp phah sawt a, ka ngaihzâwng min pawmpui theitu unaupa ka nei a ni tih hriat chu nuam deuh mai asin.

Rinfela Aizawl phei lawk chu a awm rei ngar ngar ka ti tawh khawp mai. Zan tin chu min rawn biain thil thleng eng eng emaw min hrilh ve țhìn mah se kan inkâr hla lutuk chu ka ning, Lungleia a awm kha chuan inhlat ve tho mah ila kan inhlat vak lo a, tunah erawh chuan a hla lutuk a, min ngaihna a reh phah vek ang tih ka hlau.

"Sangbawih, ka lâwm asin aw!! Ka patea khân engkim ka tân a lo dah vek a, in mai bâkah motor leh in luah man zawng zawngte pawh ka hmingin a lo dah vek a ni! A làwmawm êm a, ka hrilh lo thei lo che,"a rawn ti a.

"Ka va lawmpui tehréng che êm! I bula awma lawmpui nân che kuah vawng vawng che ka châk kher mai," ka ti a, ka hlim avàng chuan zawi tê tê pawhin ka ţawng thei lo.

"Eng pawh ni se, naktûk hian rawn haw phei phawt chu ka tum tawh a ni. Lunglei thlena hmuh che erawh ka châk khawp mai," a tih chuan," Kei pawh," ka lo ti ve a.

"Buai chung chung pawh hian, ka ngai reng tho che a, kan inkâr a hlat poh leh ka ngaihna che a zual a, ka hmangaihna che a tipung bawkin ka hria!" a rawn ti sup sup a.

"Kâr hla lutuk hi ka ning!" ka ti sap a. A ni alawm, hetiang thu hi a sawi chhuak a ni a, hlim leh lâwm taka kuah vawng vawng ka duh tehlul nèn, kan awm dàn hian lung a tiawi thlâwt lo.

"Kan kâr a hlat poh leh kan inhmangaihna hi zualin i hre ve lo maw?" a rawn tih chuan," Ka lung a tiawi lo, ka lung a tilêng, ka ngai che alawm," ka lo ti thung a.

"Ka rawn haw dâwn, i thil tùr pawh ka dah țha zân tawh a nia," tiin a nui hak a.

"Eng nge ni min rawn hawn tùr chu?" tia ka zawh chuan," Naupang hriat chi loh, i hmuh hunah i hre mai ang," a ti a.

"Ka hre châk tawh!" ka tih țâlh pawh chuan,"I hmuh hunah chauh," a ti leh deuh tlat!

Pawi hleinem. Ka hmu dáwn tho a, lo hriat láwk pawh kha a țûl ber lêm lo, amah dam takin rawn haw se chu chu a țha ber.

*******

Zan khat chu zilhna ka dawng leh ta; mahse, zanin chu inkhâwm zàn a ni lo a, Taitea leh Teruati pawh an awm ve hek lo.  An room-ah, ka nu nèn chauh kan awm, ka pa a inthiar thung.

"Bawihte, i pa thu sawi kha i la hre reng ang tiraw? I pa chu i hriat kha, pa țha tak ni mah se, a duh lohna lamah chuan pa luhlul tak a ni a, a duh loh pawh a hrilh tawh che kha. A rilru hi a sawhsawnin a thlâk ve mai mai ngai lo a, ngun taka i inngaihtuah a ngai a ni," ka nu chuan a ti sar sar a.

"Nu, ka hmangaih ém asin, ani pawhin min hmangaih a, ka țhen chuan a rilru ka tihchhiatsak vek dâwn tihna a ni asin," ka lo ti a.

"Bawihte, hriat thiam tum hrâm teh. I pa chu hun tam nei tawh lo tùr a nih hi, a dam lai hi chuan a rilru hi tihahin tihrehawm lo hrâm teh ang. A rilru hah vàng hi a ni ang, amah pawh hi a chak lo sâwt riauin ka hria," a ti leh sar sar a.

"Nu, ka hre thiam alawm; mahse, Rinfela hi ka țhen theiin ka ring lo a ni, min ring ëm êm a, min rinna tihchhiatsak hi ka thei lo ang, țhen ai chuan ka pa rilru hneh hi ka tum dâwn a ni," ka ti charh charh a.

Nia, ka sawi mai mai lo. Rinfela ka țhen thei lo. Ka pa rilru tihhrehawm ka duh lo bawk, chuvàngin, ka pain ka tân a pawm ngei theih nân țan ka la ang, ka theih dàn dánin.

"Bawihte, kei ngei pawh hian ka duhpui viau lo che asin. Mi hawihhâwm leh fel tak tak, nangmah beiseitu mi dang pawh an awm ve ngei àwm si a, ani ber kher i hmangaih tlat hi hriat thiam a har deuh chu a ni. I duhna kha hmangaihna emaw i ti a ni thei tho asin,"ka nu chuan a ti leh a.

Ka ngaih pawlh lo. Ka chiang, ka duh a, ka hmangaih bawk, nasa takin.

"Nu, ka thiam loh vek a ni. In duh zâwng a ni lo ang tih chu ka hre lâwk a, biak in lam hawia ke pên tùr hian ka la sâwm ngai miah lo, chu chu ka tih tùr ni àwm tak, ka la tih miah si loh a ni. Keimah chauha biak ina kal kha ka duh tâwk ringawt a, ka tân ka rawngbàwlna tùrin Pathianin min pêk ngei a nih ka ring ta tlat," ka ti a.

"I la sâwm chhin lo maw?" a tih chuan," Aw, mahni hma ka sial viauin ka hre ta mai, ka inkhâwm khân țha ka inti tâwk ve tawp a, mi dang ka lo ngaihtuah thleng pha lo a lo ni, hmangaih inti viauin ani pawh ka lo ngaihtuah thleng miah lo tihna a ni a!" ka ti leh vang vang a.

*HMANGAIHNA DIK HI CHATUAN DAIH THIL A NI A, A LAN CHHUAH DÀN A DANG A NI THEI; MAHSE, A LAIRIL TAK ERAWH A PÂNGNGAI  RENG THUNG*

https://chat.whatsapp.com/DXMsyQQZ3Lp2ASRh50UCed

😊😊😊Join leh sap sap ang aw🙏