☆24/7☆ - 34 By Dingdi Pachuau

 

☆24/7☆  - 34 By Dingdi Pachuau

Thlamuana hi ka bialpa a ni lo a, a bialnu lah ka ni hek lo. Kâra induh tawnna leh inngaihzàwnna awm eih lo-ah chuan engtin nge inneihna a awm theih ang? Ka ngaizâwng lo a, ngaihzàwn tumna rilru lah ka nei hek lo, chutiang chu a ni kan inkâr chu.

"Pa, kan inngaizâwng hleinem, ngaihzáwng ka nei reng a, engtin nge inngaizâwng lo pui chu kan inneih ngawt ang? Ani pawh hian min ngaizâwng lo, duh pawh min duh hek lo ang, kei aia țha a hmu tam êm mai," a vawi khat nân ka ti ve ta a.

"Ngaihzâwng i nei tlat a, a sawi ngam lo tawp ang, mi pângngai a nih hi," a lo tih chuan," Nia, chu chu alawm ka sawi, mi pângngai a ni a, keiin bialpa ka nei tih a hre bawk a, i duh ang hi a puitlintîr thei lo ang. Bâkah, hetiang thila hnuh luh hi a zahthlâk dâwn lutuk asin.  Pa, min ngaihtuah lutuk a ni, i rilru kha chawlhtîr rih la, eng dang mah ngaihtuah lovin awm rih phawt teh," ka ti duah a.

"I pa ka nia, ka ngaihtuah lo thei lo che a ni, ka dam reipui dáwn lo che. Chuvàng tak chuan, thlamuang taka ka chawlh theih nân ka duh ang mipa hi nei tùrin ka ti che a ni," ka pa chuan a lo ti leh a, a thu sawi chu a țang bawk a ni ang, a sawi zawh chuan a thaw deuh hap hap a.

"Nih leh, pa, hlim taka ka awm i duh em?" tiin ka zâwt lêt ve thung. Ka pa a ni a, ka zahin ka hmangaih êm êm a. A thil duh hi tihhlawhtlinsak ta ila, ka hlim dâwn lo, ka hlim ngai lo ang. Nghawng pawh a ngah dâwn lutuk, ka ngaihtuah ngam lo zâwk.

"Duh tehrêng mai. I hlimna ka duhpui vàng chein thil țha ber tùr ka ngaihtuahpui rêng che a ni, Bawihte," ka pa chuan a lo ti leh a.

"A nih, Rinfela hi kalsan ta ila, ka hlimin i ring em? Ka hmangaih tak chu kalsanin mi dang, ka hmangaih miah loh chu nei ta ila, ka dam chhúnga inchhîr chungin ka hlim thei dâwn em ni?" ka ti leh.

A mak ka ti, ka pa bulah hetiang hi ka sawi ngam leh ka sawi theih ka ring ngai miah lo, ka tum ngai miah lo bawk; mahse, ka ti tlat si. Inneihna hi dam chhûng daih thil a nih vàngin ka dah pawimawh a, ka pa thu hi hnial ka duh hrim hrim vàng pawh a ni lo, inneihna chu a thianghlim a, mi pahnih inhmangaih takte inkâra thleng tùrah ka ngai bawk. Chutiang chu Thlamuana nèn hian kan ni ngai dáwn si lo, min duh chu a ni maithei, min hmangaih kher lo ang.

"Tuna i bialpaah hi chuan ka ngaih a ngam thei lo a ni. Eng ang mi pawh lo ni se, kohhran bèl tlat mi a ni tùr asin. Tuna a awm dàn ang hi chuan ka fanu bialpa atãn pawh ka duh lo, pasal atân lek phei chuan..." a ti a, a sawi zawm duh lo nghe nghe a.

Nia, ka hre thiam, ka hriat thiampui lutuk tlat. Hre chiang vak lotu chuan an fanu bialpa atân pawh an duh lo ngei ang, ka pa pawh hi ka dem lo. A inkhâwm ngai lohna, kohhran a belh lohna hi a hmu lian êm a, hei hian kawng engkimah, a țha zâwnga a lan chhuah vena tùr pawh a dang vek niin a lang.   

Ka pa hi ka dem rêng réng lo. Ka hmakhua min ngaihpui vàng leh min hmangaih vàng ani tih ka hria; mahse, chutih rual chuan, ka hlimna a duha ka hmakhua a ngai takzet a nih chuan ka hlimna lam ka pan chu a phal ve ngei tùrah ka ngai ve tlat.

"Pa, min hmangaih êm êmtu niin, min ngaihtuah êm vànga hetiang ngaihtuah hi i ni tih ka hria; mahse, inneihna kher hi chu, dam chhûng daih tùr a nih vàngin uluk taka ngaihtuah a țha ka ti, thutlûkna siam rum rum mai chu a fuhin ka ring thei lo a ni," ka thiam ang tâwka dam leh hriat nuam thei tùr ber țawngkam hmang chuan ka ti ve leh a.

Kan sawi zawm ta lo.

*******

Rinfela puan min lei khq ka bih chhuak phal zen zen lo, vawi khat chauh ka la bih nghe nghe. Chu pawh chu inneihnaah a nia, mi pawhin mawi an ti ve khawp chuan ka hria, an en vang vang hlawm.

Mazuali lo lêng chuan," Khawi maw, i puan thûlkhung kha, ka lo en leh lawk teh ang," a ti a, kei pawh chuan lo hnial lo chuan ka phawrh chhuak ve mai bawk a.

"Thénzâwl lamah a thlalâk hi thawn ila, an lo tah ve thiam ang em le? Hei, uikawm țûng teh suh, hetiang design chiah chiah hian tihtír ka tum lo a nia," țawng tuma ka lo âng zuau a hmuh chuan a ti a.

"Ni lo, chutiang sawi ka tum lo, engah nge an tah thiam loh ang tih ka lo tum mai a nia," ka lo ti a.

"Simple deuh anga lang si hian  a mawiin a pui ru riau ka ti," a ti leh a.

"A thlâ chu i la dâwn em? Ka khung dâwn a nia," ka tih chuan," A mak chêk chúk. Leitu intih neih țhat thlâk êm mai a!" a lo ti hlak a.

"Leitu tùr i hmuh zawh loh kha aw," ka tih chuan," Tidik leh bawk si," a ti a, kan inen a, kan nui a.

Ani nèn hian zan tin kan inhmu ti ila a dik deuhthaw ang. Chhùn lamah school ka kal vàngin kan inhmu thei lo a, zàn lamah erawh ka pa kan pah hian a rawn lang ziah. Bialpa a nei lo a, han duh deuh leh han sawi ve deuh pawh a nei chuang lo, Thlamuana erawh hmelțha a ti thung.

Inlêng an awm ve leh țhin avàngin room-a awm reng chu a mawi lo a, thingpui lum leh no seng vêlah pawh a theih hrâm chuan Teruati àwl ka duh ve a ni, a rai lian ve tawh si a, a ke a vúng deuh bawk nèn, a tân chhuat dunga vei ringawt pawh a hahthlâk ve thei mai dáwn si a, zàn lamah tal hi chuan ka àwl ve hrâm hrâm țhin.

Ka pain kohhran mite țawngțaipuina a dawng nasa a, kan khua mai ni lo, a chanchin hria chuan min lo țawngțaipui reng bawk a, hei vàng hi a niang, nâ a tuar lutuk lo. A chak țha ve viau pawh hi mak ka ti țhìn, min țawngțaipuina rah chhuah liau liau niin ka hria.

"Kumin Krismas lo thleng tùr hi ka huphurh e," Mazuali'n a tih chuan," Engati maw?" ka lo ti vat a.

"Khua a vâwt àwm sia, bâkah, chhûngkuaah natna nei an awm hian rilru a hlim kim thei țhìn lo a, zaikhâwmnaah pawh rilru tak takin zài tui a har țhin alawm," a ti a.

Ani ai hian ka huphurh ka ring asin. Ka pa a lo dam țha lo nèn, Krismas chu chhûngkaw kimin kan hmang thei ang em tih pawh ngaihtuah tham tak a ni. Ka rilruah chuan beiseina ka nei sâng tho nain cancer lam hi chu a chin sawi theih hi a har țhìn si a, an țhat viau lai hian an țha lo thut a, an țha lo tih lai hian an țha leh deuh țhìn bawk a, hriat thiam a har êm a ni.

"Kei pawh ka nghákhlel lo khawp mai. Forward daih theih se ka ti, ka pa hi dam țha se chuan a zia deuh ang a," ka lo ti ve a.

"A pawi ngawt mai, thu lah kan nei dèr mai si lo a; mahse, kan țawngțaipui reng a, eng êm a ti bîk lo ang chu a," a ti vang vang a.

Ani pawh hian ka pa chanchin hi a hre vek; mahse, beidawng záwng hian min sawipui duh bîk lo, a langah hi chuan beiseina kan nei țheuh a ang a; mahse, chhûngril lamah hi chuan beiseina kan nei chàuràu viau.

A chhe chak ém a ni. Chemo pawh kha amahin beiseina a neih vànga khai kan ni a, doctor erawh kha chuan min beiseipui lo khawp mai. Tunah hian a chemo lâk chuan a taksaah hna rawn thawkin a sam a tla kawlh vek tawh a, ani pawh hian Aizawl lama kal leh chu a sawi ri tawh lo, hetia mahni ina chhûngte bula awm hi a thlang tawh a nih ber chu.

Khua a rawn váwt a, khua a ro nèn, vun pawh a rawn ro țan ta khawp mai. Vâwt hi tuar thei lêm lo mah ila tuilum ip leh rizai lum țha tak hnuaiah chuan ka huphurh lutuk lo, bâkah, mut a tui duhin mut a nuam țhìn ka ti a; mahse, kumin chu ka pa vàng hian a dàn a dang ta daih. Zànahte hian thinthi diaiin ka mu thei tawh lo a, ka nute room-ah chuan ka insawn ve ti ila a dik ang chu. Ka nu ka khawngaih a, ani pawh  thinthiin a mu dâwn lo tih a hre chiang bertu ka ni ngei ang, ka pa hi lo boral ta chiah phei se chuan, eng tiang takin tuar ang maw ka ti țhin, ka ngaihtuah thui duh ngai lo.

Mi an bengvár a, an rawn lêng peih thei khawp mai. Sikul kan la chàwl lo a, ni tin ka la chhuak ve hnak hnak e. Zàn ka mut țhat theih loh vàngin ka mit hnuai a val deuh kalh tawh a; mahse, ka vui chuang lo. Pathian hnênah vui ka tum lo, tu pawhin vànduaina leh natna kan tâwk thei vek si a, ka pa pawh bãng bîk lovin natna chuan a man ve ta a ni mai, khawvëlah kumhlun tùr kan awm lo, he khawvêl hrehawm takah hian a châng chuan thi hmasa sa hi vànnei  ni maiin ka hre țhìn, natna leh lunngaihnate hre tawh lovin an chàwl tawh si a. A la damate bawk hi a ni ngaihtuah ngai kan la nih, natna kan la tâwk thei a, hrehawm kan la tuar thei bawk a.

Mahse, thih chu kan la hreh vek chu a nih si hi.

*******

"Ka va khawngaih reuh tak che!"

Kan in-video call a, ka hmel chu chiang takin hmu kher lo mah se ka awm dàn a hre ve vek tho a, min khawngaih pawh chu àwm ka tihpui tho! Kei pawh, ani hi ka dinhmun angah ding ta se chuan ka khawngaih tho ang.

"I bula awm ka châk ber mai," tiin a bulah chuan ka'n pangchang ve leh rih a. Dik tak chuan ka pangchanna ber țhin ka pa heti hi a ni tawh a, tu lakah mah ka pangchang ngam tawh lo. Pachang thei ang ber leh manganna, lungngaihna hmela lan chhuahtîr lo tùra insûm hrâm hrâm ka ni zâwk a; mahse, Rinfela bulah hi chuan thup reng hi ka ning ve a ni, thu dik tak a hre tho a, ka insûm duh țhin lo.

"Ka rawn kal lawk dâwn em niang?"

Pawi lo khawp ang, a peih phawt chuan. Duhthusàmah chuan zàn pawh riak ve nghe nghe se ka ti, ani a awm chuan ka thlâ pawh a muang ve thei deuh ang chu.

Zànah a châng zeuhin Mazuali a rawn riak ve țhìn a, ka pa kana rawn lêngte pawh rei tak tak an meng ngai lêm lo, a nâ a chhuahin buai chûk chûk kan la nei lêm lo a, an ngaih a țha pawh a ni mahna; mahse, kei chuan a rûk tak hi chuan țhenkhat, pahnih thum tal hi chu lêng rei ve țhìn se ka ti, chhûngkua tawpa awm ai chuan kan thlâ a timuang ka ti bawk.

A rawn kal tak tak a! Ka chhûngte tân pawh ka pa kan tuma rawn kal na na na chu lo biak chhiat thu va awm suh, an lo be țha viau. Ka pa erawh a țawng tam peih meuh lo, min duhpui lo miau a, chutah, ani damlo chàu nèn, ka vui lêm lo.

Mite hi chuan ka bialpa a ni tih an hre kher lo ang, ka țhianpa ka kawmngeih deuhah an ngaiin ka ring, pawi pawh ka ti lo, thingtlâng a ni a, min sawi vak lo tùrin ka duh a ni, hming chhiatna a ho thei si a.

Ka nu chuan," I pa i rawn kalsan tawp țhìn a ni si a, a ngaihtuahawm ka ti țhìn ngawt mai," a ti sar sar a.

"Ngaihtuahawm lo e, a dam țha alawm," a lo ti mai a.

"I sawi dànin a upa ve tawh si a, eng emaw hlekah tlûksual bahpalh pawh a awm ve thei a, ngaihtuahawm ka ti lo thei lo a ni," ka nu chuan a ti leh a.

Ka nute room-ah kan țhu khâwm a, vawiin chu inlêng dang an awm lêm lo bawk a, ka pa bulah kan țhu țaih hlawm a. Kan titi pawhin kan țawng ring lêm lo, ka pa hian bengchheng deuh hlek a ngaithei lo țhìn a, bengchheng a tih ang chuan awm loh hrâm kan tum țhìn.

"Ti ta daih ila, túnlai hian eng nge i thawh deuh ber?" tiin Taitea chuan a titipui leh a.

"Kan in kan siam țha a, châng dang ka kân thei meuh lo," tia a lo chhàn chuan ka nuih a za deuh tlat pek a! A țawngkam hman inla puitling vél lutuk chuan ka nuih a tiza a ni ber ang chu.

"A ni maw? Buai a na ve duh alawm, i pa lahin a thawhpui thei tawh àwm si lo che a," ka nuin a lo tih chuan," Tha thawh lamah chuan min  thawhpui thei lêm lo nain thil tih dàn tùr min ruahmanpui a, a țangkâi khawp mai," a lo ti a.

"In siam zo țêp tawh em? Khawi lai nge in la khawih a?" ka tih chuan," Partition kha chu kan khawih zo tawh a, bathroom kan zo țêp a, kan zawh chuan Krismas hma zawng chu kan chàwl tawh rih ang," a lo ti a.

Ka pa a rawn țawng chhuak ve ta, a thil rawn sawi chhuah lah chuan beng a verhin min tizak chem chem bawk!

"Rinfel, Bawihtei hi i duhin i hmangaih tak tak em?" tiin.

Kan ngawi ta țhap a, kan inmelh relh relh ngam chauh a ni.

A aw chu a thian kharh phawt a, chutah," Tehrêng mai, ka thinlung zawng zawngin," mahni inrin tâwk hmel fê hian a ti charh a.

A rûkin ka lo lâwm hle a, ka pa a chhànna chuan amah chu min hmangaihtîr zual sauh bawkin ka hria!

"A nih chuan, kei putar eng mah ti thei tawh lo duhthusàm hi i hria em?" a ti leh sap sap a.

"Min hrilh loh chuan ka pu, ka hre thei lo ang," Rinfela chuan a ti leh a.

"Bawihtei tân hian ngaihzâwng țha tak mai ni lovin pasal țha tak, amah hmangaih êm êmtu, a chhiat lai ber pawha a hmangaih taka dawm theitu, hlimna petu, leh hlim lai leh lungngaih lai pawha kohhran bèl tlat mi, Pathian țih mi ka duh a ni, i inkhâwm ngai em kha?" a ti leh sap sap a, a hah deuh avàng chuan a chàwl leh rih a.

Ka thinphu hi a tàwp dâwnin ka hria, hrehawm ka lo ti lutuk! Rinfela hmel chu ka en ngam lo. Engtiang takin nge a nghawng ang tih hriat pawh ka duh lo, khúk chem chema khûk ral daih ka va châk tak!

A reh vawng vawng hnuah chuan Rinfela chuan muang ban deuh cherh chawrh hian," Ka pu, ka inkhâwm ngai loh bákah, kohhran pawh ka bèl ngai lo," a lo ti sup a.

"Khawvéla kan dam chhûng hian thil dangah hlim viau țhìn mah ila, hlimna tluantling tak tak hi a awm lo. Țhalai in la nih vàngin Pathian ngai lo leh a tel lova awm theiin, chak țha tâwkin in inhria pawh a ni maithei; mahse, damlo thei, natna leh lungngaihna tâwk thei mihring vek kan ni a, a tàwpah a hnêna kan tlûk luh a ngai tho tho," ka pa chuan a ti leh a, a țawng thui deuh bawk a, a chàwl deuh vang vang a.

Chutah, ka pa vêk chuan,"Bawihtei hi i hmangaiha i duh takzet a nih chuan nakin lawka boral mai tùr thu hi min ngaihchànsak la ka ti khawp mai, intithu min ti pawh a ni maithei; mahse, a hmakhua ka ngaih vàng leh ka hmangaih êm vàng a ni,"tiin a chàwl dat a, chutah sawi zawm lehin,"Nangmah chauh khân ka be thei che ang em? Mi dang kha chuan min lo chhuahsan rih teh u," a ti leh a.

Rinfela chu ka en a, a ngawi reng a, min en ve lo. Ka pa chu a en reng a, a rilruah eng nge awm ang aw tih ka ngaihtuah lai chuan ka nu chuan,"I hreh lo ang chu tiraw?" tiin Rinfela chu a bia a, ani pawh chu a lo bu nghat a.

Eng thil tak nge ka pa chuan a sawipui ang le? Kohhran a belh loh chuan min țhen mai tùrin a ti ang nge, min kalsan tùrin a ngèn dâwn?
Thlamuana ka pasal atân a duh zàwk thute hi a lo sawipui rêu rêu ang ka ti, a fuh lo ngawt ang!

Rilru hah takin, an thil sawi hre châk zet chuan veranda-ah chuan ka țhu a, ka țhu rei thei lo, ka ding a, ka țhi leh a, chutiang chuan ka vei tawn sek.

"Mi â emaw an ti ang che, khatin vei sek suh," Taitea chuan min rawn ti a.

"An rei tawh alawm, ka pa hian eng thil nge a hrilh  pawh ka hre lo a, a duh loh zâwng tak pawh a lo hrilh thei asin," ka ti a, ka kut tin chu ka seh nauh nauh pah a.

"I kut kha, khatin seh ziah suh. I rilru a hah tih chu ka hria alawm; mahse, thil țûl lo a nih kha.  Thu țha lo leh huatthlala a hrilh bîk nâng, in tâna țha tùr hlîr bâk a hrilh lo ang," a ti leh a.

"Kan hriat laia sawi ve mai tùr kha a nia, min chhuahtîr kher a," ka ti nang nang a.

"I tâna țha tùr a ngaihtuah tih hre ta che," a tih leh chuan ka ngawi ta a; mahse, ka rilru erawh a chawlh phah chuang lo. Ka pa thil sawi tùr chu ka ngaihtuah kual a, thil țha lo leh a huat záwng tak a hrilh loh hrâm ka beisei a; mahse, ka hlauthâwng êm êm tho si.

*THIL KAN THLÌR DÀN LEH KAN PAWM DÀN HIAN KEIMAHNIAH  HIAN  HMÊLMA A NEI ȚHÌN A LO NI*

https://chat.whatsapp.com/F5M6GiQvBic4qATfXaGwBc

Hei leh aw, join leh suau suau ang u😊🙏