☆24/7☆ - 35 By Dingdi Pachuau

 ☆24/7☆ - 35 By Dingdi Pachuau

~~~Kum khat leh a chanve hnuah chuan~~~

"Nu, chaw ka chhuan kha suan a hun tawh ang."

Mamuantea ka pawm a, kea kal duh ve viau mah se, ruah sûr vàngin kawng a huh deuh a, ka kaltîr phal lo. Kan țhenawmte in kawta sumo ding chu kâwkin a thiam dàn dánin a râk ve nawk nawk a, lìrthei hi hmuhnawm a ti a, ka enpui ziah.

Taitea fapa hian min tihlimin ka nun khawhar tùr pawh min chhâwktu ber a ni, ka nu nèn kan inchuh țhìn, a nu ber pawhin a pawm chang hman meuh lo chu a ni. A sèntêt lai ațangin ka nu nèn hian kan buaipui nasa a, chhùn lama ka hman loh chuan aniin a buaipui a, tlai leh zànah, a muthilh hma zawng chu keiin ka chang deuh thung.

"Nangni nîvah hi chu aw...! A nu pawm pawh hi ka hmuh àwm ka la hre lo, in inpawm deuh reng maiin ka hria," tiin țhenawmnu U Saitei chuan min lo fiam a.

"Fa pawm tùr la neih ve si loh chuan," tiin ka nui a, Mamuantea chu enin,"Drun drun-ah i chuang châk em? Chuang ang aw," ka ti a, sumo bang chu ka khawihtîr a, ani lah chu a lo phúr nasa,  awrâwl chhuah meuhin a bân chu pharin, a hlim chu a au rai rai a.

"Fa i neih ve hunah pawh tûn ai hian i duat bîk ka ring miah lo," U Saitei chuan a ti leh a.

"Ka hre lo le, ka lo duat viau em ni a? Ka duat viau pawhin ka lo hre hleinem,"ka ti a.

"Teruati hi chu a vànnei ngawt mai ka lo ti ka lo ti țhìn. Heti khawp hian in àwlin a fa in duatpui a nia, kei ve kha, sawi pawh ka sawi peih lo, theihnghilh daih ka duh," U Saitei bawk chuan a ti leh bawrh bawrh a.

U Saitei hi mi sual tak chu a ni lo. A pasal neih chhûngte hi an fuh vak bîk lo a, a pasal nu leh a farnute nèn an inhrawn fuh tehchiam lo a, kum khat chuang chu a pasalte inah hian an awm. Miin an sawi ka hre ve zauh zauh, nau a neih khân a inhliam nasain chêt pawh a che țha thei lo a ni a; mahse, naute bual leh a thawmhnaw sûkah takngial pawh an àwl thei lo niin an sawi a, mak ka lo tiru thei viau rêng a ni. U Saitei pasal U Hminga nu leh a farnute hi mi sual tiin an sawi ngai hauh lo, mi zîngah phei chuan fiamthu thawh an peihin an nui duh viau țhin nghe nghe a; mahse, mi sawi dànin an in chhûngah an lal lutuk an ti țhin. An in chhûngah mipa an lal lo a, U Hminga nu phei chuan a pasal a be thiam si a, a fak thiamin a tilâwm thiam a, a pasal chu a thu thuin a dah thei an ti țhìn a ni.

U Saitei sawi pawh chu a dik ka ring tho; mahse, mi chungchânga inrawlh hi ka duh ve tehchiam lo. A pasala chhûngte an ni a, fak lo viau mah se a chhûngte an ni tawh tho tho. Ani chuan a duh duh dànin sawi mah se, a chhûngte an nia, a sawi thiang vekah ka ngaihsak, sawipui ka tum lo.

"Mamuantea hi chu duat loh theih pawh a ni lo, min duh ve êm a ni. Min ngèn lawm lawmtu na na na hi chu ngainat loh pawh tum mah ila a theih loh tluk a ni," ka ti ve a, Mamuantea chuan sumo bang  chu a lo la chûl hoh hoh reng a.

"In duatpui êm a, a duh lo thei lo che u a ni. Bawiha(a fapa) sèn laite kha ngaihawm viau mah se ka hun tawn kha, ka ngai mang hauh lo. A nîte kha a ngèn ve nasa țhìn a, chuti chung chuan pawm leh puak pawh kha a hlawh ngai mang lo kha a ni a, ka han ngaihtuah lêt hi chuan ka thin hi a rim thar leh țhìn. Thil kal tawh leh thil sâwt lo a ni a, theihnghilh pawh ka duh țhìn; mahse, ka hriat chhuah hun hi a  lo awm lo thei lo dâwn chu a nih hi. Kum  sarih zet a vei hnu pawh hian nimin ang mai kha niin ka hre țhìn," a ti leh bawrh bawrh a.

"Mo nih hi a lo hrehawm dâwn a nih hi maw, pasal nei tawhho hian an sawi deuh ziah," nui chunga ka tih chuan," Hrehawm vak lo ve, pasala chhûngte an fel phawt chuan a hrehawm hran lo ang. Nang chu i fel a, pasal țha tak i nei ang a, nang anga mi fel chungah chuan tu mah an sual thei tak tak lo ang. Kei chu ka kawlh ve deuh a, ka duh lohnaah min tilui thei bîk si lo nèn, inngur renga awm ai chuan tiin ințhen mai kha ka duh a, Hminga ngai ngam lo khân in ațang chhuah mai kha a rawt ta a, khângte kha Hminga ka rawttîr angah a nu leh a farnute'n min lo sawi tih ka hre leh vek tho; mahse, ka tih a ni chuang lo a, ka ngawi ta mai mai a ni," a ti leh bawrh bawrh a. A luang liam ve ngang a ni e, han insawi thâwl mawlh teh se.

"Kan chhuakte kha, bungbêl pawh kan nei lo a, min theh chhuah duh bawk si lo nèn, ka pazawnte ka pùr ta ringawt a. Mutpuan erawh ka chhawm ve nasa tiin ka chhawm zawng zawng ka la chhuak vek. Rizai pakhat erawh an sin lai a nih vangin ka chhuhsak duh ta êm lo a ni, kan inneiha kan thil dawn vete pawh pakhat mah ka la chhuak lo, lâk tuma ka kalin an lo dah thukru bo vek niin, râpthlâk ka ti lutuk a, an inah pawh ka kal duh tawh lo char char a; mahse, ka pa damloh khán kan nupain zan khat chu kan kan ve a, țha tak chuan kan inbe tho. Min biak țhat chuan ka be țha thei vek a, min biak duh loh leh ka be peih bîk chuang lo a," tiin a nui a.

"Mahse, tunah chuan hunte a lo ral tam ve tawh a, Bawihtea pi leh pu leh nîte an ni bawk a, an ina kal ka phal lo ngai lo. A lo lian ve deuh tawhin, buaipui hrep a ngai tawh lo bawk a, a va kal châng hian an lo duat ve tawh a niang, nuam a ti țhìn êm mai," a ti leh a.

Zanin tlai chu U Saitei luan liamna ka ngaithla char char a ni mai e.

Ina ka haw chuan a la tlai chhe lutuk lo a, Teruati chuan min lo hmuh chuan,"Bawihtea hi chuan a tihah țhìn ngawt mai che, nilêngin sikulah naupang bulah i awm a, inah lah Bawihtea awm leh bawk i ngai țhin si a," a lo ti a.

"Awm tùr a lo awm hi chu a tihzia ngawt alawm. Awm lo ta se kan khawhar dàn tùrzia hi," uar fahran chuan ka lo ti a.

Ka uar a, a dik bawk. kKa uar lo thei lo.  Ani hi awm lo se, kan chhûngkhur khawhar dàn tùrzia hi, ka ngaihtuah thiam lo záwk! Ka pa khân a hmu hman ve ngei a; mahse, a làwm ve tak tak thei tawh lo a, pawm pawh a pawm thei tawh lo, a bulah vawi khat erawh chu rei lo tê an mut ve zawk. A hming Lalmuanthanga tih pawh hi chu a phuah liau liau a ni, a hming a phuah tê tê a, rei pawh a dampui hman ta si lo.

Ka pa boral kha chu ka nu nèn kan tuar thlâwt a, Mamuantea hi lo awm lo phei se chuan hlimnî kan hmu har ngawt ang! Ani hian min tihlim ta êm a, a pu vànga kan mittui tla pawh a tihul thuai ta rêng a ni.

"A rit ve bawk si a, i pawm reng a, kal tamtîr teh," a tih leh chuan," A ho mai mai, nakin lawkah chuan pawm luih pawh tum mah ila a duh lo thuai dâwn, pawm theih lai hi chuan pawm char char ka duh," ka lo ti leh tlat a.

"Ka nu nèn hian in duat khawlo tak tak ang ka ti!" a ti leh a.

"A fel lutuk a, duat khawloh theih pawh a ni lo ang. Pasal ka neih hma hi chu min duattîr phal mai mai teh, chutih hunah chuan ka rawn duat thei tawh dâwn miah lo a nia," nui chung hian ka ti a. 

"Nang hi chuan engtikah tak pasal nei ve ang che maw?" Taitea lo lút chuan a rawn ti lût nghâl a.

"In khawhar ka hlauh vàng mai mai a nih hi," tiin ka lo chhâng a, a pa a hmuh chuan Mamuantea chuan a lo ban vat a.

Pawm pah chuan,"Ànî nèn khawiah nge in lèn a?" tiin a zâwt nghâl a, ani pawh chuan U Saiteiite in lam chu a kâwk ve mai bawk a, țawng thiam rih lo mah se, kan țawng awmzia hi chu a man thiam ve lutuk.

"Drun drun kha tuin nge khalh kha?" ka tih chuan a kut chu motor khalh ang deuha her kualin "vun ..vun.." tiin a hmui chu a tipawrh kual vêl a, hei tak hi kan làwm țhin a ni. Kum khat leh thla 5 thuak a ni ve tawh a, țawng a zir nasain a lawmawm rual a ni a, kan be nasa thei viau a ni.

Chaw ei khamah chuan inkhâwm turin ka nu nèn chuan kan insiam a, khua a nuam lo êm a, Teruatite nufa chu inah an lo awm ang.

Inkhâwm bànah chuan Mazualite inah kan group kan inhmu khâwm nghâl a, kan kohhran țhalai hi group hrang hrangah kan ințhen a, sum tuak leh infiam hlim nikhua atân hetia kan ințhen hi a țha khawp mai. Pawisa pawh kan thawk chhuak nasa záwk, a chhan chu group tinte'n group thawk chhuak tlêm ber nih kan duh lo vek a, kan inel nasa thei viau a ni. Zanin pawh sum tuak dàn kan rêl dâwn a ni, sawi rîk deuh chu kan nei tawh a; mahse, thutlûkna mumal kan la nei lo.

Sawi ve tùr ka hre lo a, an sawi chhuah apiang chu țha ka lo ti thei viau a ni. Mite'n an rilru an lo hman nasatzia an thil rawn sawi chhuah ațang chuan ka lo ngaihtuah a, nêp ka intiru khawp mai.

Kan group hian leipui ang deuh kan siam a, thlai kan chîng ve nual a, rin aiin a țhain a rah nasa ve bawk. Chuta thlai kan thar chhuah ve chu Lunglei lama kalpuia in tina zawrh chu an rawt deuh a, chutiang kan ti thei a nih chuan tlêma man man deuhin kan hralh thei dáwn a ni; mahse, ka lo huphurh ru sa tawp. Thil zawrh hi ka tih ngai loh a nih vàng leh mi ina va lûta va zawrh kher chu ka thlâwp lo khawp mai a; mahse, an rilru tihhnual ka hlauh vàngin ka sawi chhuak lo thung.

"Sangbawihi Lungleiah a awm reng tawh a, ani hian hmel hriat a ngah tawh viau ang, min kalpui thei se," Zami'n a tih chuan," Ka nei tho a; mahse, ka ngah tehchiam lo," ka lo ti a.

"Bazàr lohnîin kan kal ang a, țhalai ang zâwna kan zawrh chuan mi pawhin min lo khawngaih thei deuh ang a, kan hralh zo thuai theiin ka ring," kan leader U Vala chuan a ti a.

Nilaithawhțannîah thlai chu kan lo ang a, Zirtàwpníah kan kalpui ang. U Vala Lunglei kal a ngai tho a, a motor-ah chuan kan phur ve ang a, zuar tùr pawh kan kal nual dáwn. Kei hi ka hman ve lo maithei, sikul kal a ngai awm si a; mahse, min phût ru khawp mai tih ka hria.

Ka kal ve thei a nih chuan ka kal ve poh a niang chu. Ka nu ai ka kal tâk char char vàng hian Lunglei pawh ka kal khát asin, khatia Rinfela a reh tâk vang vang hnu phei kha chuan kan khua hi ka chhuahsan khât lutuk a, ka pa awm lo, naute kan nei leh ka nu khawhar buaipui a ngai bawk nèn, ka chhuak thei lo a ni e. Bâkah, ka peih lo a, ka phûr lo bawk.

Lunglei chu ka kal hman ve ta tlat. Zirtàwpnî ber kherah chuan class room chhuat khawk tawhte plaster țhat an rêl a, chu chu U Valtea'n hriain kan head hnênah ka kal loh a lo dîl pek a, a lo phal ve mai bawk sia, Lunglei chu ka kal dâwn ta a ni.

Zànah kan zawrh tùr chu polythêne tê deuhah kan dah sa vek a, bag kan ahna tùr leh èm kan phurhna tùr pawh kan ngaihtuah sa vek bawk a, kal thei kan awm nial dâwn a, a tihzia ka ti khawp mai; mahse, Rinfela nèna kan țuanna mual hlui ka zu fang leh dâwn ta chu a ni si a, tlêm tlêm chuan ka huphurh ve deuh.

Chaw ei kham hma takah kan chhuak a, ka pateate inah ka innghahpui leh ta phawt. Chu lo hmun dang pan mai tùr an lo hre bîk bawk si lo a ni, anni lah chuan min lo làwm der êm êm a,'Naktûkah bazàr a ngai dâwn lo tihna a ni mai' tiin kan thil zawrh pawh chu min leisak nual nghâl bawk a.

Kan thil zawrh tùr chu kan insem a, kan kalna lam tùrte chu inhrilhin inhralh zo hmasa sa chu pateate in lam pan hmasak tiin kan ințhen a. Ka kalpuite nèn chuan ka pateate in thlang lam chu kan pan a, țhenawmte erawh chu ka nutei'n a lo zawrh thung dáwn a nì awm e, min lo zawrhsak dâwn a nih ber chu.

Ka rin aiin kan hralh thei. Thingtlâng lam ațangin kohhran țhalai sum tuakna a ni tih kan sawi pah zêl vàng chu a ni mahna, min lo leisak zêl a, bazâra an lei țhin aiin a lo tlâwmin a thar țha bawk nèn, kan hralh zo thuai, ka huphurh rûk tehlul nèn.

U Valtea'n a motor chuan kan zawrh leh tùr chu min rawn pe a, in tinah chuan kan lût leh zak zak mai. A țhen chuan min lo la hria a, min lo la hretute phei chuan min dàwr țeuh hlawm, an fel hi ka tia, nizàn leh tukin lama ka țawngțaina chhànna a ni ka ti lo thei lo.

Kan țhiante chu ka be chhin a, anni pawh chuan an lo hralh zo ve duak tawh a, motor-a hralh tùr la awm pawh chu a tam vak tawh lo.

Rinfelate in lam pawh chu kan zu thleng dâwrh dâwrh mai a, lung hlui a lêngin nunhlui pawh thinlungah a rawn thar vawng vawng mai. An in erawh páwn lamah tala lian angreng takin a lo inkalh bâm mai a, hmâna ka hmuh ang tho kha a la ni. Hmânah kha chuan hlim takin he in chhûngah ngei hian ka léng țhìn a nih kha, mitthla suangtuahnaah chuan tum loh deuhin hun kal tawh chu a rawn inlâr zut zut mai.

"Sangbawih, nang, lo khawsa silawng deuh tawhah, sawlai inah sâwn lût hmasa leh la?" Mali'n a tih chuan ka inthing harh a, Rinfelate in piahah chuan building lian vak lo, fel rèn rawn hi a lo ding reng tawh niin, ka lo hmu miah lo. Sak thar a ni tih a lan dàn ațang chuan a chiang khawp mai, rawng hnawih pawh a la thar e.

Min nawr ve deuh țhin avàngin ka hmasa leh nge nge țhìn. Tuna mi phei hi chu ka hriat ngai an nih bîk ka ring lo, tlêm chuan ka zak thar ve leh deuh a; mahse, zak ang tak chuan ka awm duh bîk lo a.

In luh dâwna step lo awmah chuan kan pên chho a, step chho kal hi ka nin avàngin he step pawh hi a rûk tak chuan ka haw deuh tawp, a hahthlâk êm alawm, thâ a heh bîk.

Doorbell hmeh kher a ngai lo, kawngka a lo inhawng huau sa a, nu pakhat la naupan ve hmel deuh hian nau a lo àwi dârh dârh a, a piah deuhah chuan nula tleirâwl lek lek tawh hian lehkha a lo zir bawk a, chu chu an in kan luh hmain kan hmu thei vek, an veranda a zau reuh êm a.

"In awm maw, ka pi? Chawhmeh kan zuar a, in mamawh zâwngte a awm em, en ve ula?" nui sâng chung hian ka ti a.

Chu nu pawh chu a rawn hawi nghâl vat a, a hmelţha reuh phian, a la naupan hmel tak tak a nih hi.

"Eng chawhmeh nge ni a?"

A han en dan dan a, a en chhûng chuan an in chu ka en kual a, an luahna chu a la rei lutuk lo ang, an bungrua leh in chhûngkhur thil chu a la  thar hlawm riau, a changkâng hlawm riau bawk.

"Naktûkah bazàr vak a ngai dâwn lo a nih hi, a tihzia hle mai," tiin a leina man chu min pe a, a lei tam khawp mai.

"Kan lâwm lutuk e," ka ti a, kan bag a thàwl phah hawk si a, kan ah zàn theih phah mai bâkah min dàwr tam angreng si a, kan hláwk ta phian a nih hi.

Kan chhuah dâwn chuan," A nih, kan lâwm lutuk e, min dàwr țeuh a," tiin ka han thlah leh hrâm a.

Kawngkaah kan chhuak hman tawh tihah chuan," Lo ding leh lawk teh u," tia min betu aw ka hriat chuan ka ding chat mai!

He aw hi, ka hriat lohna a va rei tawh êm! Amah ngei a ni, min kalsantupa aw ngei mai chu.

Mi dang chu an inher vek tawh a, kei erawh chu ka din ngaiin ka la ding reng. 

He inah hian eng nge a tih? Tuna mite kha a nupui fanaute em ni an nih? Chuti a nih chuan, hei hi a in sak thar a ni ngei ang chu.

"A vaiin ka lo leisak ang che u."

Țhiante thaw hak leh lâwm phun sap ri chu ka hre reng; mahse, kei chu ka lâwm em ka hre lo, he pa hi kum khat leh a chanve vêl zet chu a hmel ka hmu tawh lo a, a hmel hmuh chu sawi loh, a aw ri takngial pawh ka hre lo.

Mahse, tunah ka hre leh ta, a lo la ngai reng a nih hi.

Mahse, hmana mi kha chu a ni thei tawh lo, tuna mi hi chu 'mi dang' aw a ni tawh. Hmâna mi kha chu min hmangaihtu aw, ka hmangaih aw a ni țhìn, tuna mi erawh chu mi dang aw, 'bumtu' aw chauh a ni tawh!

Ka inher ve ta nge nge.

A hmel chu a lo țhat belh ta sawtin ka hria! Ka va duh lo ve! A sam pawh fai tih hriat takin a tle sar a, a mithmul buk leh dum zet pawh kha a la ngai reng, tlëm têin hmuihmul erawh a lo nei tawh thung!

Min rawn en ve reng a, mit khap lo lêkin kei pawhin ka lo en ve a.

"A vaiin maw i lák ang?" U Valtea'n a tih chuan a mit pawh la sawn chuang lo chuan," Aw," a lo ti mai a.

Mi dang an chêt tâk sang sangah chuan kei pawhin ah ka la nei nual a ni tih ka hre chhuak thut a, inngaihtuah harhin ka mit pawh chu ka la sawn ta nghâl vat a.

Ka en nawn tawh lo.

A patea motor a rochun ngei maiah khân a leiho chu kan dah luhsak a, eng atân zozai nge a tih ang aw ka ti rilru a, a ei vek tùr a ni dâwn lo tih a chiang nasa bawk si a. Khawiah emaw a phur chhuak dâwn tih chu a hriat reng mai a, khawiah tak ni ang maw?

Lo ngaihtuahpui chiam a ngai hleinem le. A duh duhin a ti ang chu, duh leh mi a pe ang a, a lei tawh ber ahnu, a duh leh a paih thei alawm.

A thil leina man an inpêk fel hnu chuan mi dang chuan làwmthu an sawi tliar tliar a, kei erawh chu ka lo ding màwl tawp thung. 

Tunah zawng ani chu ka biak theih leh ka biak phâk pawh a ni tawh lo a, inhria anga lan pawh a duh tawh lo ang. Kei chu thingtlânga awm, hna thawh pawh nei tawh lo ka ni a, ani zawng vànneihnain a ûm a, nupui fanau nei tawhin in thar țha tak a nei tawh bawk a, hmel hriat hlui leh inhria anga inbiak kher pawh ka phût lo e, chubâkah, min biak pawh a châk lêm lo  bawk ang a, kei pawhin ka be châk hran lo e.

U Valtea motor dahna thleng chu kein kan kal a, ka kal chak bawk a, ka hah viau mai. Thaw deuh hlap hlapa Mali'n," Eng i hria chu ni maw? Min kal chakpui lutuk a, ka dang a ro huam huam mai," a tih chuan ka hawi lêt vat a, mi dang pawh chu an hmel ațangin an hah ve tho tih a hriat khawp mai.

"Sangbawihi chu, i lo infit hle mai ka ti," U Valtea'n nui chunga a tih chuan ka țhen sak a.

Tui an in tliar tliar hnu chuan ka in ve a, U Valtea'n țhiante a biak chuan anni pawhin an lo hralh zo ve tawh tho a lo ni a, rilru a nuam duh khawp mai. Kan chaawhmeh ken kha a tam ve êm asin, kan hlawh țeuh thei dâwn e.

Motor-a kan luha kan tlàn chhuah hnu chuan," In ril a țâm tawh hlawm em? Kan chàwl dâwn nia, kan inhralh țha bawk a, puar tâwkin kan ei vek ang " phûr tak hian U Valtea chuan a ti a, kei erawh chu ka awm dàn tihdanglamin a awm leh ta si a, ka ngawi ràn rán  reng mai.

Țhiante nèn kan inhmu khâwm leh ta vek a, pateate tihbuai an duh loh vàngin kan chhuak hma leh ta a, restaurant pãngngai ve takah chuan ka luhpui a, a neitunu chu U Valtea nèn an lo inhre pek a, an titi luam mai.

A tihzia e, kan thil ei man pawh min discount ngeiin ka ring.

Ka ei zawh hnu, mi dang la ei zawh ve si loh lai chuan kan piaha damdawi dàwrah chuan ka va lût rih a, ka nu damdawi tùr ka va leisak lawk a ni.

"I lo dam țhìn maw?"

Kan inhmachhawn chiang lutuk, kal sawn ngaihna a awm lo va, biak loh tum pawhin biak loh theih pawh a ni ta lo.

"Min zui ru a ni maw?"

Ka va polite lo kher em! Kum khat leh a chanve zet inhmuh loh hnua inbiak lehna hmasa ber țawngkam atân chuan a fuh lo mah mah chu a ni. 

Mahse, ka sawi zo vek tawh! A phû ve tho alawm, chhan leh vàng sawi hauh lova min kalsantu kha a ni miau a.

*HMÊLMA NEIH I DUH CHUAN I ȚHIANTE KHÛM LA, ȚHIAN NEIH I DUH ERAWH CHUAN I ȚHIANTE PHA LO RAWH*