☆24/7☆ - 37 By Dingdi Pachuau

 ☆24/7☆  - 37 By Dingdi Pachuau

Ngawi vang vangin min en reng phawt a, a dâwt sawi dàn tùr a ngaihtuah rih pawh a ni mahna. 'Dâwt tel lo' kha kati kher bawk si a, ngaihtuah nasat a ngai ve dâwn ém asin, âwihawm taka sawi thiam a la ngai dáwn zui.

"A ngai leh lo. Min hrilh duh suh, thil thleng tùr a thleng vek tawh a, hriat kher a țùlna pawh a awm lo. I insawi fiahna chuan thil kal tawh kha siam țha leh vek thei se chu thu dang a nia, awmzia a awm tawh dâwn chuang si lo," ka lo tih khalh a.

Tunah tak hi chuan ka rilru hi a kha takzet a ni, ka țawngkam chhuak ngei pawh chu kei pawhin mak ka inti ve tho; mahse, ka insûm thei si lo.

"Insawi fiahna...!" a lo ti sup a, mit khap lo lêk chuan min melh ngur bawk a.

"Insawi fiah ngaia i awm a nih chuan thil dik lo i ti tihna a ni mai, mipa insawi fiah zut zut mi dik tak an awm ngai lo," ka ti leh a nih chu!

Min tina ve êm a, na ve rawh se. Ka pa nèn khân eng thil pawh sawi se, min hrilh ve tùr khân ka ti a, min hrilh duh lovin a ngawi hmak a, amah pawh hmu thei lo leh a chanchin pawh hre thei lovin min dah a nih kha, nupui hial pawh min neihsan a nia.

Tuna ka țawng khum dànte kha chu a nihna dik tak a nia, nâ ti tùr a ni hleinem.

"Pangpâr vàngin làwmthu ka sawi e; mahse, lo dah duh tawh suh. E, chuan, kan inhmuh tawh loh ka beisei," ka ti a, inher nghatin ka kalsan ta nghâl a.

A duh tak tak a nihte chuan tuna ka kal pawh hi min tidingin thil awmzia chu min hrilh vek thei alawm; mahse, a ti hauh lo a nih si hi. 

In ka thlen hnuah erawh ka țawng khum dàn kha ka inchhîr leh deuh. Hmeichhe râpthlâk tak hmuhin min hmu ngei tawh ang chu, engati nge khati teh hrepa ka lo țawng ni? Lo insûm ve deuh hlek ni ila țha tùr a nia aw...

Zîng țawngțainaa kal țhin, inkhâwm pelh ngai lo leh nula fel tia fak der ve țhin  țawng hmanah chuan a mak deuh mah mah chu a ni, hetiang hi ka ni ngai tawp si lo. A thil sawi tùr kha lo ngaithla ta mai mai ila...

Awmzia a awm tawh lo. "Thlarau rah zînga mi insùm theihna i tlachham a nih kha, țawngțaia dìl chiam chiam lam a ni lo, nangmahin tum ve bawk ta che, a hun taka i insùm leh si loh chuan eng nge awmzia awm?" tiin ka rilruin ka inhau mawlh mawlh a.

Mazuali hnênah thil thleng chu ka hrilh ve a, ani pawh chuan," Amah maw lo ni a?!! A va mak êm êm!!" a ti phawt a, chutah,"Engah nge maw chutia i lo tih aw? I pa nèn khân eng emaw thurúk an nei pawh a ni thei a,  sawitîr ve phawt tùr che alawm. Engati nge keimah ang maia i chêt? I awm dàn leh i tih dàn țhin a ni si lo," tiin min zilh nghâl mawlh mawlh a.

"Amah ka hmuh khân ka thin a rim tlat alawm, ka insûm thei lo. Amah vànga ka natna zawng zawng kha a lo lêt leh tlat a ni," ka ti ve thung a.

"Ummm...ka hre thiam tho mai che; mahse, sawitîr ve phawt tùr a nia, eng emaw tak vàng a ni ngei ngei ang tih hi ka chiang a ni," a lo ti leh a.

"A ni tih chu sawi ngai lovin a chiang reng alawm. A, theihnghilh teh ang, ka buai peih tawh lo, kan inhmu tawh dâwn chuang lo," ka bek hmet nauh nauh pah chuan ka ti a, ka mamichhîng pah bawk a.

"Chutiang sawi ringawt suh, kan Mizoram hi chu a zîm êm asin," a lo ti leh a.

"Min hmu duh tawh bîk lo ang, bâkah, inhmuhna chhan tùr a awm lo bawk. Nupui nei tawh biak theiha awm awm pawh ka tum lo hrim hrim," ka ti leh țâlh a.

"Nupui a nei ngei tih pawh i chian loh kha."

"A inah hmeichhe la naupan hmel takin naute a pua ka hmu ngei a, kha bâka chiang kha a ngai hleinem," ka ti leh a. 

"Kei, nupui a neih ka ring thei miah lo nia, a inlêng tu emaw pawh a  lo ni thei tho a," a ti leh a.

"I hmuh loh vàng mai mai a nih kha," ka tih chuan bân rawn pharin," Aw le, ka tlâwm chiang e. A nih, nupui a neihsan che ni rawh se," a ti chùl a.

'Nupui neihsan' tia a sawi chuan ka rilru a tina thar leh deuh tlat. Nupui min neihsan, aw, ni e, min kalsanin nupui min neihsan a, kum khat leh a chanve hnu vêlah ka hmu a, ka àn khum ve ta a ni mai, ka lo up rei ve tawh a, cheziaa min tihnatna kha keiin țawngkamin ka rùl veah ngai mai ang.

Kan ințha-țhen thei tawhah ngai ang.

*******

Ka thil hrilh erawh chuan kawngro a su lêm lo, zawm a hlawh lêm lo a ni. Ka pa thlànah chuan pangpâr a lo la dah ziah tho a, Nilainiah zêl tho a dah a nih ka ring, Inrinnia thlàn kan kalin a lo awm hman ziah.

"Pa, Rinfela hnênah khân eng thil nge i hrilh? Engtin nge hetiang hian kan inkâr hi a awm tâk daih? A chhan i hre ber ang, min han hrilh teh," tiin a ngai têin ka pa thlànlung nghèng chuan ka pa thlarau chu ka be leh mawlh mawlh a.

He thu hi ka va zâwt zing tawh tak êm! Ka kal azât deuhthawin ka zâwt ang chu, chhànna lah a awm thei si lo, a reh vung vung zêl mai si. 

"Pa, min hmu reng tiraw? Ka zawhna che hi khawngaihin, min chhâng tawh teh, i ngawi rei tawh êm mai. Ka hlimna i duh ber țhin kha, ka hlimna duh ber si chuan Rinfela hnênah khân min țhen tùrin i ti lul lo ang tiraw?" tiin ka phun leh mawlh mawlh a.

Rei mawi tâwk tak ka awm hnu chuan muangchânga thoin ka pa thlànlung nghènga dah pangpâr tharlâm zet chu ka en leh vang vang a, haw tùrin ka inher ve ta nghâl a.

In ka thlen dâwn chuan Mamuantea kawta lo awm chuan min lo hmu a, ka lam panin a rawn tlân vat a, a phûr lutuk avàng chuan a tlànna a en chiang lo a, a tlu ta hlauh mai.

Ka tlán phei a, ka pawm tho vat a, ani erawh chu uar zetin a țap ta nghâl a.

"Dam dam, tu nge bah bah lo ti a? Khu khuan maw? Bah bah, mai mai, Mamuantea lo bah bah tawh miah suh," ka ti pah mawlh mawlh a.

Ani pawh chuan țap deuh chung hian," Bah bah," tiin a tlûkna lai chu a lo hau ve bawk a, a na lutuk hran lo bawk a, a țap bâng har lo ve.

Veranda-a ka mi hmuh avàng chuan ka pên lai chu ka ding chawt a. He pa hian eng nge a lo tih? A va zak lo ve! Min lo la en reng zui, Mamuantea ka thlèm țantirh lai vêl pawh kha min lo en reng ang ka ti!

"Nau țap thlèm i thiam hle mai," tiin a lo nui suk a.

"Eng nge i lo tih?" 

Leh hmak mai a. "Thina, insûm teh, insûm teh, mawi pawh a mawi lo e, i inhmeh lo a nia," tiin ka inzilh leh rih a.

"Ka hmu khât êm mai che a."

Hmm, ani pawh hi a ngeiawm khat tlat ve tho alawm, ka inrùl tâwk chiah a nih hi.

In chhûngah chuan ka nu leh Teruati lo awmin chawhmeh an lo siam a, Teruati chuan," A tlu a nih ka ring rêng a, a tlân chak thei lutuk a," a lo ti a.

"Min rawn hmu kha a phûr lutuk a, a tlu na lo hlauh," ka ti a.

Ka hnunga min rawn zui luh loh avàng chuan hmui phun hian,"Eng nge a lo tih a?" tiin Teruati chu biain kawngkhàr lam chu ka melh zauh bawk a.

A lu a lo thing ringawt. 

A hnuah in chhûngah chuan a rawn lût a, ka biak loh avàngin ka nu chuan a lo bia a.

"Tuilum a awm asin, inbual la?" tiin.

Ani chuan," A ngai lo, ka rawn kal dâwnah ka inbual a, ka rawn hrilh lâwk lo che u a, ka tibuai vek che u a nih hi," a ti duah a.

"Tibuai lo e, pakhat chauh phei chu ni tin zan tin hian kan chhum kêpin kan siam kêp ziah ang a ni, Taitea pa khân khamkhawp táwk chiaha chaw leh chawhmeh siam kha a remti ngai lo. 'Mi tu emaw rilțâm tak a rawn kal thut thei' a ti țhìn a, ngãiah kan nei tawh a ni," ka nu pawh chuan a lo ti ve duah bawk a.

Ka ril a țàm deuh avàngin Mamuantea chu chhuata nghatin thingpui no ka la a, flask ațang chuan thingpui chu ka thli chhuak nghâl a.

"I ril a țâm tawh em? Bawihte, thingpui kha siam ve la?" ka nu chuan a rawn ti a.

"Ka in tawh kha, a țâm lo ve," a lo tih chuan ka nu chuan," A hâng chauh a nih kha, a rei leh deuh tawh alawm. A thlumin i in dáwn nia," a ti leh țâlh a, ka ngei reuh tak tak a ni.

Thingpui chu ka siamsak a, ka va pêk lai chuan phone a lo khawih a, thlalâk a lo en ni ngeiin ka hria.

"Hei aw."

Inneih thlalâk a lo en chiang alawm, ka thlêk ve a, ka hmu tih chu a hre kher lo maithei. A nupui ngei kha, ina ka hmuhnu ngei thlalâk kha, chu pawh inneih kawr vâr haa a ding lai ngei a ni.

A chiang ta viau e. Ka rilru ka thlâk, ka hmuh theih ngei tùrin a lo tilang zâwk a ni ngei ang, a ni ngei ngei ang, a loh theih loh. A ngeiawm ve asin.

"Eng chu maw i lo tih dâwn a?" tiin polite takin ka záwt leh ta zawk, ka nu leh Teruati hriat laia thinrim khum leh țawng khum chu ka tum teuh lo.

"I pa a rawn râl vang vang a nih kha. Zanin a riak ang a, naktûk lah Pathianni a lo ni leh bawk si a, a riak tlang leh bawk ang a, Thawhțanni lamah a haw chauh ang," tiin ka nuin min lo chhâng daih.

Pâwnah khân," Ka hmu khât êm mai che a," ti khân min chhâng a nih kha. He pa han dâwt theihzia hi, min ngainêp hle a ni. A la châm rei hle dáwn zui! Hei ha!

"I va ti țha ve!" a mawiah ka ti ve, ka rilru chhûngril lamah erawh chuan thinurna a rawn so leh barh barh țan tawh!

Zanriah ei khamah chuan inkhâwm tùrin ka insiam sawk sawk a, ka hmanhmawh chhuanlamin ka chhuak thuai. Hmuh tam loh ka duh, in khata awmpui phei chu ka duh lo, chhûngte hriat laia insùm theih loh ka duh lo bur, ka insûm thei lo ang tih ka hlau a ni.

Ka inkhâwm hi chu aw, ka va hláwk lo thei tak! Ka țhu ve tawp a ni ber mai, rilru tak tak a thleng phâk lo, hei hi a hming maia inkhâwm an tih ang ngei kha a nih ka ring.

Kan inkhâwm bâng kan chhuak chiah chu Mazuali chuan," Mikhual in nei em?" tiin min záwt nghâl vat a.

"Nei mai mai lo," tiin ka chhâng zui vat bawk a. Engtin nge maw a lo hriat hman ni?

"A lo inkhâwm ve kha, i hmu em?"

"Daw lo mai teh!" Khawvêlah ka âwih lo ber àwm e. A inkhâwm ngai lo a, a țawngțai ngai hek lo, ka pa duh loh chhan pawh hei ngei hi a ni. A inthlâk thut lo ang tih ka hria alawm. Min tihder chu tum lo mai teh se.

"Ka daw lo. Nulaho an inkheuh sep sep a, hnunglam an hawi zauh zauh kha, i hmu ve pek nange? I lo ngaihtuah ngut ngut leh tawh a ni maw? A àwm tho mai," a ti leh a.

"Ka ning, sawi tawh lo teh ang. Ina haw ka hreh phah a nia, ka pa râl tùr ni àwm takin a insawi a, ka nute bula han sawisèlsak ringawt kha a tihchi mang si loh a, a nawm lohzia hi a!" ka ti bal bal a.

"Lo lêng daih la, a nih loh pawhin lo riak daih la?"

Kan pahnih chuan kan in lam panin kan inzui leh ta nge nge a.

In kan luh chuan Taitea tih loh chu an lo awm kim țhap a, Mamuantea pawh a lo la meng!

"Kan tlangvâla chu, i la mu nange a?" tiin Mazuali chuan a chhaih nghâl a, kei erawh chu inthlâk tùrin room ka pan nghâl a.

Pângngai thei ang bera ka awm a ngai. Hetia thinrim khum leh titau deuh anga ka biak țhat duh loh tlat chuan ka duh lutuk angah a ngai ang, chuvàngin, engah mah ka ngai lo a ni tih lantír a ngai. Zãng vah leh hmel hlim taka ka hmachhawnin ka tifuh zâwk ang.

Hei hi a dik ang. Min zuam thei lo bawk ang.

Ka va chhuah chuan an lo titi mam mam tawh a, Mazuali pawh a lo nui leh nasa tawh, ani hi zawng a hlim thei a, a thil nuihpui lah hi a ho thei si.

"Thingpui duh ve in awm em?" tiin ka han zâwt kual a.

"Han thlî la; mahse, kei chuan ka duh lo aw, vawiina ka ni sa tuarna khán min tichau deuh tlat, mut mai ka duh," ka nu chuan a lo ti a.

Teruati pawh chuan," Bawihtea pawh a mut a hun tawh, ka'n mutpui ang e," a lo ti ve bawk a.

"A la hma e, a mut pawh a la chhuah loh kha," ka ti a.

"A mut loh chuan a meng leh vak mai ang, a mut a hun tawh hrim hrim bawk," a lo ti leh a.

Thingpui chu no thum ka thlî a, kan pathum chuan kan țhu ta ràn mai.

"Zanin khân i rawn inkhâwm ve tiraw? Ka hmu tlat chein ka hria," tiin Mazuali chuan Rinfela chu a bia a.

"Aw..."

A inkhâwm ve maw?!! Dâwt a sawi a niang, inkhâwm tùra ka chhuah lai pawhin TV bulah a țhut reng kha.

"Chuan, engtikah nge haw i tum ang?" tiin a zâwt leh a, kei erawh chuan ngawi rengin  thingpui chu ka dút hlak hlak a.

"Thawhțanni zïngah a niang, han awm rei viau pawh in lam an ngaihtuahawm ve si a," a ti a.

In lamah chuan a nupui fanaute awm miau hek le. Ka pa râl tùra rawn kal hi a țúl lutuk lo asin le, a rawn ngai pawimawh mai mai a ni.

"I reh ta vang vang sia, i bo ta daih emaw ka ti a," Mazuali'n a tih chuan ka nuih a za deuh viau nain a thil zawh chu zawh àwm tak niin ka hre leh lawi a.

"Nia, tum aiin Aizawl lamah ka va tâl rei ta deuh alawm le," tiin a lo chhâng mai a.

"A nih chuan, nupui i nei tawh ang chu tiraw?" Hei zet chuh, ka thil hrilh chhànna tùr atân a zawh a ni ngei ang.

"Engah maw?" a lo ti mai a.

"A, i neih ka'n ring deuh ringawt a, i nei lo em ni?" Mazuali chuan a ti leh a.

"Pasal atân min duh an awm lo a niang," tiin a lo nui suk a.

"Nupui nei tawh ni àwmin an sawi che a," a ti ta! Ka lo îp zawr mai! Ani chuan a țawng sual tih a inhre tawp nâng. Kan inkàwm ngeih a, ka hnên ațanga hria a nih loh chuan chutiang ngaih dàn chu miin an nei lo tawp ang tih a ring thiam ngei ang.

"An ti mai mai a nih chu."

Nupui nei lo se kha nu kha tu nge ni ang? A nupui ni lovin a hmei emaw, a rûk emaw, a chènpui emaw tal a ni ngei ang. Dàn angin an la innei lo ang a, nupui angin a sawi lo mai a ni ngei ang.

Thingpui no chu ka tleuh a, Mazuali chuan,"Thingpui kan in zo chiah nain ka va phei tawh teh ang, i lo riak dâwn ta em?" tiin min rawn en a.

"A, naktúk zànah ti zâwk ila?" min hriat thiam beisei tak chuan ka ti a, ka riah chhuahsan daih chuan tunah ka nute an mu tawh lehnghâl si a, a fuh vak lo ang.

"Nia, i tih dàn dán le."

Mazuali haw hnu chuan," I mut a chhuak tawh em? Mutna tùr chu i hriat tawh tho ka ring," ka ti a.

"I mut a chhuak tawh em?" a rawn ti ve ta thung a.

"Chhuak hran lo, i duh hun hunah i mu thei a nia, kei chu-"

"Biak che ka duh," a rawn ti ta sup mai. Ka țawng laklawh lai laiin, eng thil nge sawi a duh? A insawi fiah ang maw?

"Sawi a ngai lo, sawi tùr ka nei lo," ka tih chuan," Sawi tùr ka nei," a lo ti tlat thung a.

Ka țawng ring ngam lo, tuna kan țhutna room hi TV kan dahna a ni a, ka nute room a hnaih ber a, kan țawng tu mahin hre lo se ka duh.

"I insawi fiah dâwn tihna a ni maw?" ka tih chuan a thaw deuh hak a.

"Insawi fiah ka tum lo, thil awmzia sawi ka tum mai a ni," a lo ti leh a.

Engah mah ngaih loh hmel zet hian," A țha alawm, sawi ta poh che," ka ti liam puat a.

"Ka kalsan ngai lo che a, ka țhen ngai bawk lo che-"

Ka lo nui hawk a, a thil sawi ka âwih loh lutuk vàng a ni pakhat a, chubâkah, chutia dâwt chiang lutuk hmaichhana min han hrilh duh mai chu ka inkhawngaih a ni!

"A lo ni maw? Ka lo hre hleinem," ngeiawm zet hian ka ti leh a.

"Sawi tùr i nei lo ni khân ka hre si a, ka hre dik em?" a rawn ti ta khauh mai.

Ka dang ve lek lek a ni.

Chutia ka ngawi ta hlauh chu ani chuan renchângah lain," Ka tum loh tawp dànin ka awm a ni, Aizawla ka phei kha ka pa ka hruai phei ve nghâl a..." tiin a ngawi zui ta daih a.

A pa kha, a pa chanchin rêng réng ka lo ngaihven lo. A dam țha em? Ani khân min ngaina der ve a, hetia a fapa nèn kan han awm hrang ta daih mai hi engtiangin nge a ngaih ve ang aw?

"A dam țha maw?" ka lo ti sap a.

Min rawn en vang vang a, min chhâng dâwn ta lo emaw ka tih hnuah chuan zàwi sap hian,"A kal tawh," a ti ta a.

A kal tawh. Eng nge a awmzia? A thi tawh tihna em ni? Ni lo, ka hmui ka hup vat a.

A ni thei lo!

"Ka hre sual tiraw?!!" ka tih chuan meng dul raih hian," I hre sual lo, a thi tawh a ni," a rawn ti chhuak leh sup a.

Lalpa leh! 

"A pawi ka ti hle mai, a pawi ka ti takzet a ni," ka ti chhuak sep sep a. Ka mitthlaah chuan Lungleia an ina kan titi dun laite chu a rawn lang zut zut a, ka pa a boral tawh a, ani leh zêl a han boral chu, Rinfela tân hian a va na dâwn êm! Kei chuan mi dang, Taiteate nupa leh ka nu ka la nei a,ani erawh chuan mi dang a nei ve tawh hauh si lo.

"Ka pa chuan a sawi a sawi țhin che asin. A thâwk tàwp dáwn thleng pawhin i hming hi a la lam fan a ni," a tih chuan ka mittui a rawn tling leh kawl kawl tawh! Min lo la hre ve reng maw?! A tháwk tàwp dáwn thleng pawhin min lo la ngaihtuah ve tihna a ni si a.

"A pawi ka ti tih bâk sawi tùr ka hre lo."

A pa ka khawngaih a, Rinfela ka khawngaih bawk. A pa hnukchah dáwn ruai thlengin a bulah a awm ni ngeiin a lang bawk si a, hrehawm a tih dàn tùr leh a mangan dàn tùr chu, ka ngaihtuah thiam lo záwk!

"Vàn ram hi a awm takzet a nih chuan i pa nèn an inhmu tawh ngei ang a, kan pahniha chanchin pawh hi an sawi dùn ngeiin ka ring. I ring ve em?" a ti sup a.

"Nia, an inhmu ngei ang," ka ti ve ringawt a.

Chutah, min rawn enin," I pa nèn khán thu kan thlung asin, a boral hma chu ka sawi chhuah a thiang lo a, vànduaithlâk takin a boral hnuah helamah ka rawn phei thei ta bawk si lo a, engkim hi a buai ta vek a ni," a ti charh charh a.

Eng thu nge an thlun le? Engati nge min hrilh ve mai loh? Ni leh lo, ka pa boral hma chuan sawi chhuah a thiang leh si lo.

"I pasal tùr, i neih tâk loh Ațana chanchin pawh kha min hrilh a, nang chuan min hrilh hauh lo a nih kha tiraw?" tiin ngun zetin min rawn en pah a.

"Thil kal tawh, theihnghilh daih tùr thil a nih kha," ka lo ti a.

"I nat tawh avàngin i pa chuan i nat leh a phal tawh lo a, thu kan thlung ta chiah a, kalsan ngai lo tùr chein min ti bawk a ni. Ka rilru hian ka kalsan ngai lo che a; mahse, Aizawla ka va phei kha harsatna leh vanduaina chi hrang hrang ka va tâwk ta si a," sehchilh deuh nak hian a ti a.

Chutah," Chumi hma chuan, i pa boral hmaa ka sawi chhuah miah loh tùra ka tiam chu maw, ka nu kha i pa hian a lo hria asin," a rawn ti chhuak ta!

Makti zet hian ka en ta hau mai!

*BUAI TAKA I AWMA TIH TÙR I NEIH RENG PHAWT CHUAN MI RÈL NÂN LEH SAWICHHIAT NÂN HUN RÊNG I NEI THEI NGAI LO ANG*