☆24/7☆ - 38 By Dingdi Pachuau

 ☆24/7☆ - 38 By Dingdi Pachuau

A va mak dâwn ve!! Engtin nge an lo inhriat le? Ka pa bialnu hlui te hi a lo ni ang e? A mak ngawt ang!

Mahse, tunah hi chuan engtin nge an inhriat tih lam ka ngaihven hran lo, a pawimawh ber chu engati nge ka pa nèn an inbiak hnua min kalsan tâk daih tih lam kha a ni zâwk.

"Min kalsan tâk chhan kha ka hre duh ber," ka ti ta nge nge a.

A ngawi deuh vang vang a, min enin a mit chu a khap deuh sak a, chutah,"Ka kalsan lo che asin, i pa thil min hrilh kha mak ka ti lutuk a, kha thil vàng khân min biakna pawh kha ka chhâng țha lo che tih chu ka hria. Ka zak êm a ni, theihnghilh ka duh êm êm min kalsantu ka nu chanchin zawng zawng  i pa chuan a lo hre vek a ni si a, engtiang takin nge a hriat chian tih pawh ka zâwt ngam lo. Chutiang mi fapa chuan a fanu duat êm êm, keh thei dawma a dawm kha ka han duh ta mai che a nia, kan dinhmun kha ka hre inthlau ta lutuk a," tiin a chàwl dat a, sawi zawm lehin," Khatih hunlai kha chuan zah avàng khân khûk ral theih se chuan ka khu ral chak khawpin ka ring! Chutah, i pasal ni mai tùr Ațana chanchin ka han hre leh a," tiin thâwk a la halh a.

"I zah avàng chuan min kalsan duhna rilru i pu a, ka biakpawh theih lohin awm i tum bawk a," ka lo ti hmanhmawh a.

"Chu chu ka rilrua ka ngaihtuah hmasak ber a ni, ka zêp lo; mahse, ka hmangaih che a, ka kalsan thei lo che tih ka hre chiang ngang mai; mahse, i pa ka zahna khân nangmah hi min hlattîr duhna kha min siamsak tlat a, rilru hrehawm takin ka inkhâp reng a, a tàwpah ka rilru hrehawm tireh tùrin Aizawlah ka phei ta ngei a," a ti leh a.

"Aizawlah i phei a, ka be pawp thei lo ta che a. Chuan, kum khat leh a chanve chuang zet i reh ta vang vang bawk a," ka lo ti ve thung a, ka awki leh sawi dàn chu a man thiam maiin ka ring.

A thil sawi chu ka la hre thiam chuang lo. Ka pa a zah avàng chuan Aizawlah min pheisan a, ka be pawp thei lo a, min rawn be miah lo bawk.

"Engkim kha ka tihsual vek a ni. Ka pa remti vak lo chung ka hruai phei a, kawng laka kan chawlhnaah ka phone ka tibo ta phawt a, kan motor ding lai chu motor dang rawn tlân brake fail-in a rawn su leh bawk. Chu mai a la ni lo, vànduainain min la ûm zêl, ka pa a dam thei lo a, damdawi inah ka awmpui zak zak a. Chutih laiin kei ngei pawh chu enkawl ngaiin ka awm leh bawk a, Krismas leh kumthar pawh Damdawi inah kan hmang a nih kha," a ti leh charh charh a.

A sawi hi thil thleng tak tak a nih chuan, a va buai dáwn tehlul êm!

"Biak che duh mah ila biak ngaihna che a awm lo. Lungleia rawn phei pawh ka duh alawm; mahse, ka pa a chak chhuak thei lo a, ka kalsan thei bawk si lo. Thih daih ka châk asin; min ngaih dàn tùr ka ngaihtuah a, ka chanchin eng mah i hre dâwn lo a, kan inhmuh tàwp bera ka awm dàn leh țawng dàn lah kha a fuh fahran bawk si lo; mahse, min hmangaih ve a ni tih ngaihtuahin ka inhnèm hrâm hrâm a, chu chuan chakna min pe leh țhìn," a ti leh a.

Ka rilru a nêm takzet tawh tih ka hria.

"Ka pa a chak chhuak thei lo a, damdawi in ațangin chhuak mah se, in lamah enkawl ngai rengin a awm a, ka kalsan thei lo. I hming a lam fo a, a ngai che a, hmuh che a châk thu a sawi fo bawk. Chu chuan ka rilru a tina thar ziah a, inthiam lohna rilru ka nei thar ziah bawk a," a ti leh a.

Ka lo inrawlh duh lo, sawi char char se, lo ngaithla ila tih ka duh zâwk.

"Ka pa chungah ka inthiam thei lo a, chutah, nangma chungah ngei pawh. Inthiam lohnain ka khat a, keimah vàngin ka pa enkawl ngaiin a awm a, chutih laiin kei ngei pawh enkawl ka ngai bawk a, Pathian ànchhia ka chungah a tla a nih ka ring țhin. Kei chu engtin pawh lo awm mah ila ka tuar thei mai ang a, thi dâwn pawh ni ila ka thi mai ang; mahse, ka pain a tuar ve zêl chu hrehawm ka tih ber a ni. Ka chanchin  hrilh thei lo chein ka awm a, i chanchin lah ka hre hek lo, mipa ka ni tih chu ka hria; mahse, khatih laia ka rilru manganzia leh hrehawm ka tihzia kha, Pathian chauhin a hre thiam ang! Ka pa a han boral a, ka inthiam lohna a zual sauh a, nun kha a hrehawm asin. Hun ka neih veleh Lunglei lama rawn phei ka tum a, motor -in ka chesual leh ta zui a,"a ti leh a.

Vànduaina hlîr maiin a lo zui a nih tak chu. Amah ka huata ka ngei êm êm lai khân ani chuan hrehawm tak tak a lo tuar reng si a.

"Ka na viau a ni, ka dam chhuah theih kha an ring tawh lo a ni àwm e; mahse, doctor fel tak ka tawng ta hlauh mai a, ani chuan engkim huamin min buaipui ta vek a. Mizoramah min enkawl theih loh avàngin hmunpui lamah phurhthlâk ka ni a, ka harh chhuak har asin. Ka harh chhuah hnuah pawh che thei lovin ka awm reng a, ka rilru erawh a harh fîm vek thung. Kum chanve deuhthaw enkawl ka ni a, ka zia deuh hnuah Mizoramah rawn chhohpui ka ni leh a. Thi mai tùr, ka thih loh nâna engkim huamtu leh ka nunna ngaihlu êm êmtu doctor ka han hmu chu, ka mittui a tla zawih zawih mai a ni," tiin a chàwl leh rih phawt a, chutah, sawi zawm lehin," Ka chanchin min zâwt a, chuta țang phei chuan a fapa ang chiahin min en a, kea ka kal leh theih nân min buaipui zui leh char char bawk. Khatiang mihring an awm thei kha mak ka ti asin, an inah min awmtîr tlat a, a hnuah a fapa chanchin min hrilh ve ta a, keimah ang chiaha accident tâwk ve tho a lo nia; mahse, ani erawh vànduaithlâk takin a enkawltu doctor a beidawng a, a boral phah ta a ni àwm e, chu chuan a thinlung a tina lutuk a, a fapa anga accident tuar ve a kuta a rawn tlûk luh phawt chuan a theihtâwpa enkawl a lo intiam a, kei hian ka vànneih phah ta a ni," a ti leh sup sup a.

Ngaihnawm ti lutukin ka lo ngaithla a, a cháng chuan ka lo thaw țha ngam lo niin ka hria. Chutiang teh hrep chu a lo tuar a, eng mah ka hre lo mai ni lovin ka thin a lo rim êm êm zui a.

Chutih lai chuan Taitea'n kawngka a rawn hawng ri khap a, a lènna ațangin a lo haw tawh tihna a ni. Keini pahnih hi hun ngaihtuah miah lovin kan lo titi a, mut a hun tawh viau ngei ang chu.

Sana ka thlëk zauh a, dâr 10: 45 a lo kâwk vah tawh! A thil sawi ka lo ngaithla tui êm a, hun ka lo hrechang tawh lo a nih chiah hi.

"I mut a chhuak tawh em?" ka ti ta hliai a.

"Nangmah kha a chhuak tawh a ni maw? A țha alawm, hunte chu a la awm tho ang chu," a lo ti ve mai a.

"Nia..."

Țhutna ațangin kan tho a, intihfai nân bathroom ka kian phawt a, kei chu ka nute room lamah ka intifai mai ang chu.

A hnung lam ațangin a kal chu ka en zui ru a, a kal dàn chu a dikhlel deuhin ka hria. A kal lui nge, ka en ru tih hriain chutiang chuan a kal der mai mai zâwk?

Ka han mu tak nain ka rilru a harh tulh tulh mai. A thu sawi kha ka ngaihtuah lêt leh char char a, thu dik tak a sawi a nih ngai chuan kei hian lo inchhuan khumna tùr ka nei hauh lo.

A tûkah chuan mak deuh maiin a inkhâwm ve mai nia! Mak ka ti lo thei lo alawm, inkhâwm tùrin ka sàwm hauh lo, chhûngte pawhin an sâwm chuang lo, a inkhâqm ngai lo tih kha an hre ve tho miau alawm.

Mahse, a inkhâwm ve tlat. Inkháwm thawmhnaw pawhin a inthuam ve thlap, a la inhmeh êm êm zui a! Ka lo en reng a ni chêk ang chu, Mazuali pekin min rawn sik sawk a!

"En reng teh suh, i duhzia i mitmeng ațangin a chhiar theih vek a nia," a ti sar sar a.

"Inkhâwm thuama a inthuam ka hmuh vawi khatna a nia, a inhmeh ëm alawm. Bâkah, a inkháwm ve ta a nia, a làwmawm êm a ni, ka țawngțainain rah a rawn chhuah ve ta niin ka hria " ka lo ti a.

"I zïng țawngțai inkhâwm chhan kha a ni lo'm ni?" a tih chuan," Ni e, kha khán a lo véng him zêl a ni àwm si a," keima hriat tàwk lek chuan ka ti sap a.

"Nupui țha tak i ni ngei ang!"

"Eng thil nge maw i rawn sawi le? Țawng zàwi deuh teh," tiin ka khap vat a.

"Engkim sawi fel vek ang che u, tunah hi chuan thil ka záwt vak dáwn rih lo che. Ťha takin sawi felin inrem leh ula, chu chu ka duh ber chu a ni mai," a ti leh a.

Chhùnah thingpui in tùrin Mazuali a rawn péng a, ani a awm hian boruak hi a tiziaawm ve a, boruak uap churh tùr pawh a véng ve tlat a ni.

A titi bawrh bawrh reng a, Rinfela pawh a țawng zauh zauh, kei erawh chu ka lo inhmuam ûp deuh a, ka țawng ve mang lo.

"Ngawi reng lo khân sawi fel r'u, ka haw dáwn. Sawi fel vek ang che u, in inkârah eng nge thleng dik tak ka hre lo; mahse, hlim taka awm dùn tùrin ka duh che u, chuan, in inhmeh dùn ka ti viau bawk a ni," tiin a nui har har a, chutah, ding uaihin,"Buaina siam suh ang che u, sawi fel ula, tláwm tùr tlâwm ngam ula, sawi fel theih reng buai luih tlat tum loh tùr," tiin min rawn melh kher a.

"La haw suh, a la hma," ka lo ti vat a.

"In sawi fel hma leh in hlim hma a ni mai, in hlim loh chuan hrehawm ka tihzia kha hre reng la?" tiin min rawn melh zauh a, a kal sawn ta nghál a.

A haw hnu pawh chuan veranda thlang lamah chuan kan la awm reng a, țawng chhuak hmasa nih ka hreh avàng chuan ka la ngawi reng a.

"Min hua ang tih ka hria, i awm pawh ka tinuam lo viau ang; mahse, ka chunga thil thleng kha ka duh vàng leh ka tum vànga thlentîr ka ni lo," a rawn ti chhuak ta sup a.

"Ka hria alawm," ka lo ti mai a.

"I pa khân a fanu tân min duh lo tih ka hria a, kohhran lam ka belhbul loh vàng a ni. Nang pawhin i hriat kha, inkhâwm leh țawngțai ka ti ngai lo; mahse, natna khuma ka pa a mut lai, a hnuk a chah țêp lai khân ka mangang lutuk kha ka țawngțai ve tawp asin; mahse, min chhâng miah lo," a ti leh duah a.

"Kan duh dàn hi a hnênah kan thlen țhìn a, ani ve thung chuan a duh dànin min chhâng thung a," ka lo ti a.

"Chutiang a nih vàng tak chuan min chhâng lo, ka pa pawh a thi ta tho; mahse, mangangin ka țawngțai ve a, min chhâng duh chuang si lo a, ka tàwpsan leh ta a; mahse, Doctor Hmingate nupa khân ka tân bâng lovin min lo țawngțaisak țhin a, anni vàng liau liaua dam leh thei ka ni. An awm dàn leh khawsaziaah hian Pathian ringtu dik tak an ni tih ka hmu thei tlat a, anni khân inkhàwm lo thei lo leh țawngțai lo thei lovin min siam a ni," a ti charh charh a.

Ka țawngțaina pawh chhànin a awm ve tho asin. A tãn hian ka țawngțai ziah a, ka rin loh lam daihin Dr. Hmingate nupa kal tlangin a nun tihdanglam a ni ta a, ka țawngțaipui tih hrilh kher pawh a ngai lo, Pathianin a chhiahhlawh Dr. Hminga

hmangin a nu a tidanglam mêk a ni si a, accident kher lo ta se, tún dinhmun ang hi a ni pha ang em? A inkhâwm ve tawh tho ang em? Vànduaina pawh malsàwmnaa chantîr thei Pathian kha a ni miau a,  a rûkin a hnênah làwmthu ka sawi mawlh mawlh a.

"I accident vàngin i la insawisêl em? I dam chiang vâk tawh em?" tiin ka zâwt a.

"Ka țha tawh khawp mai, ka pãngngai ti ila ka ke erawh pângngai tùr chuan hun a la duh tam deuh ang, exer lâk zauh zauh hi a la ngai a," tiin a mal chu a hmet nauh nauh a.

"Engtin nge a awm a?" ka tih chuan,"Hmun hnihah a tliak a, khua a vawh deuh hian a hrehawm ve deuh hlek; mshse, ka dam chhuak a, engah vak ka ngai lo, nunna hi alawm hlu ber le tiin ka inhnèm țhìn," a ti leh duah a.

Thil tam tak ka záwt duh lém lo. Zawhna tam tak zawh aiin a thil sawi lo ngaihthlâk hi ka duh, amah ang lo takin a țawng ve duah țhìn si a.

"Min la hmangaih reng em?"a rawn ti ta phut mai!

Ka lo en hau ringawt.

"Chutin a reh nghâl hmak lo tawp ang, kei pawhin ka ngaihtuah reng zêl che a, ka hmangaihna che lah a reh thei hek lo, min hmangaih thuin ka inhnèm țhin ka tih kha," a ti leh a.

Ni e, a reh lo. A reh lo mai ni lovin tunah phei chuan a hma aia a lêt sàwmin ka hmangaih belhin ka hria, a thil lo paltlang zawng zawng nèn phei chuan a lêt 30 zeta hmamgaih thar leh zual tùr a ni.

"Sangbawih, min hmangaih ve takzet tih ka hria asin. Khatia rethei leh harsa tak, nunhlui țha lo tak nei ka nih lai pawha min dawm tlattu i ni a, ka chhiat lai ber pawha min nghèng tlattu hian min hawisan ka ring lo, ka la ring chhin miah lo," a ti leh a.

A tidik alawm, ka hmangaih a nia, min kalsan loh chuan ka kalsan ngai lo ang.

Mahse," In in bul building thara nu, la naupang ve deuh nau pawm kha tu nge ?" tiin ka zàwt ta a.

"Ènpuii kha maw?" a tih chuan," Ka hre lo a, ka zâwt che alawm, kha kha i nupui a ni lo takzet maw?" ka ti leh a.

"Nupui ka la nei chhin miah lo," a lo ti mai a.

"Chuti, engati nge an inah khân i awm ve?" ka tih chuan," Ka awm lo, ka léng a ni zâwk. In ka nei ve reng a, engah nge an inah ka awm ang," a lo ti a.

"Kha building thar kha i sak a ni lo'm ni?" ka tih leh chuan," Ni nâng aw, țhenawmte sak kha a nih kha, Ènpuii kha țhenawmte  mo a nia, an invawm luhna pawh a la rei vak lo ni tùr a ni," a lo ti a.

"I nupui emaw ka ti alawm," ka tih leh chuan a nui sak a.

"Nupui chu pakhat bâk neih ka tum lo asin," a ti ve a, fiamthu angin lang mah se a sawi dik ngeiin ka ring.

Kan inkár a fel tâk hnu chuan ka pa thlàna min hmuha ka țawngksm hmante chu a rawn sawi chhuak a. Kei pek chuan," Ka thin a rim ve êm alawm, a chhan sawi hauh lovin i bo vang vang a, i reh vang vang a, ka ngai chein ka pa boral lai phei chuan ka nu buaipui ngai ve tho bawk nèn, i sawi ang chiah khân thih daih mai pawh ka chãk ve rum rum a," ka ti a.

"Ka rawn ngaihtuah reng țhìn. Ka theih hnua Lungleia ka rawn phei hian ka inngaihtuah nasa asin, hmuh che ka inrin lohnaah ka hmu thut che a, i mitmeng ațangin thil dik lo a awm tih ka hre thei bawk. In khuaa rawn kala rawn hmuh chea thil thleng hrilh vek che ka duh a; mahse, ka biak chea min chhàn dàn ațang khân mi dang an lo awm tawh a nih ka ring a, khatih laia nã ka tihzia kha! Ka ngaihtuah ka ngaihtuah a, min hmangaih țhìn a ni tih kha ka ngaihtuah chhuak leh a, chu chuan tlëmin beiseina min siamsak leh thei ta a," a ti leh sup sup a.

*******

Tunah chuan ka rilru a hlim leh thei ta. Kan inkâr a țhat bãkah ka pa duh ang ngeiin a inkháwm ve tawh a, a va hlim lua lo a ni maithei; mahse, a hmasâwnna hi a làwmawm hrim hrim. Zawi têin a kal bek bek ang a, fîmkhur leh kawng en ràna a kal chuan a tlu lo ang a, him takin a tum ram chu a thleng mai dáwn a ni.

A pa thlàn hmuh ve ngei ka duh vàng in Aizawlah ka phei ve vang vang a, a inah ka innghat ve hmiah. A lo zau nuam khawp mai a, a pa room pawh a lo la awm thlap, a tidanglam phal lo a ni àwm e.

A pa thlàn kan tlawh chuan ka mittui ka dang zo lo leh a. Min hmu châk em êm chungin mual a liam tih kha ka ngaihtuah chhuak leh a, kei ve mai min ngaia min hmu châkin a thâwk tawp thlengin ka hming a lam tih hriat chu a nuamin kawng lehlamah chuan a hrehawm ém asin.

"Ka pu, ka lo kal asin, min hmu em? Min hmuh châk thu i sawi tiraw? Hei, Rinfela'n min rawn hruai tawh a, min ngai a ni lo'm ni? Kei paehin ka ngai che asin, hei ka lo kal vang vang a nia," tiin a thlànlung chu ka be mawlh mawlh a.

"Ka pa, Sangbawihi chu ka rawn hruai tawh a nia."

Kan rilru chu a inhmu chiang a ni. Ani pawhin ka ngaihtuah ang a lo ngaihtuah ve tho a, a pa, a hmangaih leh a neih chhun hi a ngai êm êm ang tih ka ring bawk a ni.

"Kan hlim tawh a nia aw, min lo ngaihtuah miah suh ang che; mahse, min hmu châk êm êm chunga min hmu hman lova min kalsan hi chu hrehawm ka ti, tunah i awmna hmun ațang khân min lo thlîr em? Ka pa nèn in awm dùn ang tiraw? Ka pa hnênah khân a duh ang takin Rinfela pawh a inkháwm tawh tih thu hi lo hrilh theihnghilh suh aw," tiin ka phun leh sap sap a.

Dr. Hmingate chuan chaw eiah min sâwm a, an nèlawm dùnin ngainat loh theih an ni lo. Rinfela'n anni pahnih a lo tawng hi chu a vànnei takzet a lo nih chiah hi, an bulah chuan nun a nuamin rilru a hlim lo thei lo ang. Làwmthu ka hrillh mawlh mawlh lo thei lo. 

"Engtikah nge in inneih theih ang?" tiin Pa Hminga chuan min zâwt ta thut mai!

Hei chu kan la sawi dùn ngai miah lo. Chhàn ngaihna hre lo chuan ka en reng ringawt a!

*I RUAHMANNA CHU A ȚHAIN A FEL VIAU A NI THEI, I BEISEINA PAWH A SÂNG VIAU A NI THEI E; MAHSE, THAWHRIMNAIN A ZUI SI LOH CHUAN  MUMANG ANG CHAUHA ROPUI A NI ANG*