☆247☆ - 39 By Dingdi Pachuau

 ☆24/7☆ - 39 By Dingdi Pachuau

Rinfela a rawn inrawlh ta vat.

"Inneih lam chu kan la sawi ngai miah lo a; mahse, chutia i rawn sawi chhuah tâk zârah chuan, rei tak chu a nula tawh kher lo maithei a ni," a lo ti a.

A lam ka hawi vat a, nui hmel deuh lek lek hian min lo en a.

Pa Hminga chuan," A nih tak chu, induha inhmangaih chuan rei tak innghah kher hi a țûl lêm lo maithei a ni, nula tlangvâl naupang lutuk in ni tawh chuang lo a, Rintea lah in leh lo țha tak nei sa i ni a, nupui fanau chàwmna tùr lah ngaihtuah ngai tawh miah lo i ni bawk nèn, ngaihtuah dun thuai in ngai a ni," a lo ti charh charh a.

Pa Hminga nupui Nu Thangtei pawh chuan," Ni e, kan hma hun tùr kan hre lo a, tih tùr hi chu tih vat hi a țha țhìn a ni. Rintea pawh hrehawm tam tak i tuar tawh a, hlim i mamawh ve tawh alawm, mahni chauha awm i ni lehnghâl a, mipa mahni chauha awm reng hi a țha lo a nia," a lo ti ve a.

An nupa hian ka nêl êm êm ve tawp mai, Rinfela chunga an țhat lutuk vàng leh fapa ang chiaha an hmangaih theih vàng hian ngainat loh pawh tum mah ila ka thei lo ang. Anni hi ka țawngțai chhànna ngei an ni a, Pathian thil tum tihlawhtlingtute an ni.

Rinfela patea khân dàwr lian leh lùn ve tâwk tak Zàrkawtah a lo nei a, Rinfela damloh leh theih loh chhúng zawng khán a lo tlabal hman viau a; mahse, a țhat chhuah leh ták hnuah erawh chuan a pângngai leh viau tawh a, nimin lama kan kal pawhin a lo lùn phian a, bungrua pawh a muk țha viauin ka hria.

Zàn mutnaah chuan a khum min kian zêl a, ka bula mu ve mai tùra ka tih chuan a duh ngai lo. Khum bul deuh chiaha sofa inhûngah chuan a mu ve mai a, a nuam vak lo ang tih chu ka ring a; mahse, ani chuan,"I bul a nih phawt chuan khawilai pawh ni se, nuam lo a awm thei lo," a lo ti tlat thung a.

"Thil ka záwt mai mai ang che aw?" ka tih chuan," Eng pawh min zâwt thei ang," a lo ti sup a.

"Ka pa khân min kalsan mai tùrin a hrilh lo tak tak che maw?" ka ti a.

"Hrilh lo, i pa kha mi sual a ni hleinem, ka zah êm êm zâwk a ni," tiin min chhâng a.

"A nih, Lungleia in in kha sak țhat i tum em?" ka ti leh a.

"Tum rih lo, ka pa nèna kum khati chen kan lo chènna a nih vàngin ka sa țha rih lo ang," a ti leh a.

Ka ngawi vang vang phawt a, chutah," A nih leh, Lungleia chawhmeh zuara kan rawn kala kan inhmuh thut hnu khân engati nge min hmu tùr emaw tala i lo kal loh?" ka ti leh a.

"Rawn zin ka dìl che khân,' A ngai lo' i ti a nih kha," tiin min en vang vang a, chutah," Mi dang i lo nei hman tawh a niang tih ngaihtuahna ka nei ta a, nangmah duh êm êmtu mi dang an awm ve reng a ni tih ka hre reng bawk si a, mahni inrintâwkna ka hloh a ni ber ang chu," a ti leh duah a.

"Chutiang tu mah an awm lo," ka tih chuan," Thlamuana a awm reng kha," a lo ti zuk a.

Ka nui sak a," Anite chu ka țhian alawm a nih, ka pa boral pawh khân a rawn kal vang vang asin, mi fel tak a ni," ka ti a.

"Thîk loh ka tum pawhin ka thei ngai lo," a tih sup chuan," Țûl loah intihah duh tawh suh, mipa angin ka en lo, țhian ang chauhin ka en," ka lo ti a.

Kan ngawi leh deuh vang vang a.

"Inneih chu, i ngaihtuah ngai em?" a rawn ti ta daih a.

"Ngai lêm lo," tiin dik takin ka chhâng a.

"Ngaihtuah tawh la?"

"Min la sawipui ngai bîk miah loh kha aw," ka lo ti a.

"Zanin ațangin ka sawipui che ni rawh se, lo ngaihtuah rawh aw, i duh lo chung chu ka nawr lui-"

"Ngaihtuah ve ve ang, keima lam chu min vêngthâwng suh, hun a tih hun kha a ni mai," tiin ka lo pawt chat vat a.

"Chuti, nghah rei che ka tum dâwn miah lo a nia. I chhûngte lamah rem lohna a awm thei ang em?" mahni inrintâwk hmel vak loh hian a ti a.

"Chute chu palai i lo tirh phawt lohte chuan..." ka lo ti a.

"Lungleia kan phei veleh aw."

Leh tut tut mai a! Mahse, hnial ka tum chuang lo.

Kan haw phei a, boruak a vawh ve deuh sûk tawh avàng chuan motor dârthlalang pawh ka tihniam ngam lo.

"Ka rawn tîr thuai dáwn nia, i rilru pawhin lo inbuatsaih ru ve tho rawh aw," a ti a.

"Aw le; mahse, ka chhûngte thu thu a ni thung ang aw," ka tih chuan min rawn en a, motor pawh chu a timuang zui bawk a.

"An phal lovin i ring tihna a ni em?"

"Ni lo, chutiangin ka sawi lo. An remtih loh kher chu ka ring lo a; mahse, tún hnai têa tih kha an remti kher lo maithei tih lam zâwk a ni," ka tih chuan a thaw hak a, motor chu kawng sîrah a tiding bawk a.

"Chuti, inru mai ang?"

Ka thiam tâwk chuan ka hrilh fiah a, inrûk mai finthlâk lohzia leh kum tàwp a hnaih tawh thu leh inbuatsaihna hun takngial pawh a tlèm tawhzia thu chu ka hrilh ve ngial a.

"Kumin chhûnga kan inneih an remtih loh chuan...nghah chhûng a va la rei dàwn ve!" a ti nghut a.

"A, kum khat leh a chanve chhûng zet pawh min hmu lovin i awm thei alawm, han tuar leh hret ila, ni tin zan tin kan inhmu reng thei tawh dáwn zuk nia," ka lo ti a.

"Ka lamah i ţang dâwn miah nange?" lungawi loh hmel zet hian a ti ngul ngul a.

"Țang chiang e, ka țang chiang," ka tih chuan," Chuti, nakkum lam an tih daih dáwn chuan kumin chhûng ngeia ti tùrin lo nawr ve tal la?" a ti leh nghut a.

"Aw le, ka lo ti ang e; mahse, a rem thei nang lo a nih chuan hriat thiam i tum ve thung ang a, tiraw?" ka ti a.

"Inneih ka duh bawk si chuan hriat thiam loh ringawt theih pawh a nih dàwn loh chu!" a ti sup a.

Palai pawh la tirh hma hawta inneih hun chungchânga lo intih lungawi loh deuh ringawt chuh, kan thil sawi chu ka ngaihtuah a, ka nuih a za deuh tlat, a naupan chhiatthlâk  angreng bawk si.

*******

Palai chu a rawn tîr ta chiah a, mite tih dàn angin 'Kan lo inráwn ve ang e' tiin ka chhûngte chuan an lo chhâng a.

Chhûngte inràwn kháwm a ngaih avàngin ka pateate nupa pawh an rawn kal a, ka ute chhûng erawh Mamit lam daiha an awm leh tawh avàngin kâr a hla si a, an rawn kal thei lo; mahse, thutlûkna an siam ang ang chu an pawm ang tiin an rawn sawi a.

Ka patea chuan," A neitu tùr berin a duh phawt chuan a țha a ni mai a, keini remtih loh theih rual pawh a ni lo. Kan fanu tân chuan mi țha ber kan duhpui a; mahse, mi țha ber kha a tán a lo țha ber lo thei a, pawimawh ber chu inhmangaihna a ni. An inhmangaih tawn chuan, chu chu a hlu ber a ni," a ti charh charh a.

An han sawi nak nak a, kei leh Mazuali'n room ațangin kan lo ngaithla ru reng bawk a.

Inneih chu an remti ngei; mahse, kumin chu hun a awm tawh lo tih lam an sawi ri ta ngei mai, Rinfela hlauhthàwn ang ngeiin.

"Inneih hun tùr thlengin tihfel nghâl an tum em maw ni le? Palai an rawn kal phawt ang a, remtih thu an inhrilh hnuah a hun tùr lamte chu an sawi leh chauh țhìnin ka hre sia?" Mazuali chuan a ti sar sar a.

Ka hre tawh bîk lo, an sawi ri mai mai a niang.

"Ih, inneih hunâh khân ka kawr tùr chu a dumpâwl lam ka duh ang aw, a pâwl dal lamte kha i lo melh ngawt ngawt ang e," Mazuali chuan a ti leh sar sar a.

"I sawi hma lutuk!" ka tih chuan," Kan ti nek nek ang a, a lo thleng phut ang. In innei dãwn tho tho a, lo sawi lâwk thlap hi a ţha. Chuan, pheikhawk kha, sâng ve táwk tak ka duh bawk ang," a ti leh a.

"Chapal i bun ang!" ka tih chuan," In innei lo a ni mai!" a lo ti deuh hmak a, kan inen a, kan nui chhuak ta a.

"Inneih loh i hlauh êm kha aw, chapal kha chu sawi lang tawh lo ang che. In pa tùr lah a hausa tih ka hre reng tawh mai sia e, tuna ka duh ang tak ka inleitîr loh chuan inleitîrna hun a awm tawh lo ang," a ti leh a.

"Inneih hnuah ka inhlawh char char a ngai dáwn tihna a nih chu!" ka tih chuan rum zeta min melh hian," Tenawm suh! Aizawlah awmin mi liannu i va ni dâwn a nia, pawisa chhiar leh awm àwl bâk hna i nei dáwn lo," a ti a, a sawi tàwp lamah chuan a insûm thei tawh lo a, a nui leh var var a.

"Pawisa chhiarna lamah kut a rawl vek dáwn a nih chu!"

Fiamthu hlîr kan sawi a, nuih rin viau chu a mawi lo deuh si a, kan han insûm leh rih bawk a, pum na ûrhin kan nui thei nia.

*******

Inneih hun tùr tih fel a ni a, nakkum January ni 15-ah a ni. Rinfela chu a lung a awi famkim lo a, inneih thuai a duh vàngin ka lakah a han vui ve a, ka hriat thiam avàngin ka thin ka tirim duh lo.

"A zia alawm, Aizawlah i pa thlàn kan tlawh dùn leh thei ang a, kan inneih tùr thu pawh kan hrilh hre hmasa thei dáwn tihna a ni a," ka ti a.

A ngawi reng a.

"Khawngaihin, hetia i awm hian a hrehawm ka ti a nia, nakkum January ni 15 hnu lamah chuan i nupui niin kan awm dùn char char tawh ang a, a hnu deuhah phei chuan min ning ru viau maithei a nia. Chuvàngin, hetia zalèn taka i tlangvàl hun i hman theih lai hian hlim takin, ãm takin chèn zâwk teh," tiin ka thlém leh a.

"Ka ning àwm lo che," a ti sup a.

"'Lêng suh, ka ke hi min lo hmeh teh' tih emaw 'Thawmhnaw kha lo su ve teh' emaw ka tih hunah chuan e, tûn ang hun hi i la ngai dâwn a nia," tiin ka nui var var a.

"Chutiang chuan min ti mah la, ka bula i awm reng dâwn phawt chuan ka hreh hauh lo, i chêt ka phal lo zâwk ang," a lo ti leh a.

Lungleia a awm reng hman bîk loh avàngin Aizawl lamah a phei leh rih a, Krismas bazàr nân a la hma ve deuh bawk si a, ka zui phei lo. Krismas bazâr tùra ka kal hunah a pa thlàn chu kan tlawh dùn ang chu. Rinfela nèn kan inneih tùr thu chu ka pa pawh ka hrilh daih tawh a, a remtih ngei pawh ka ring. A duh loh berna 'inkhâwm ngai lo leh ţawngțai ngai lo' nun kha a thlauhthla ve tawh si a.

Kan khuaa mite pawhin pasal ka nei tùr chu min lawmpui hlawm ve viau a, a țhenin min ui der ve viau bawk a. A bîkin kohhran țhalai lamte chuan min ui der zual a, kan khuaah ni lo, hmun dang daiha ka awm tùr chu min ui ve a ni. Kei pawhin ka ngai ve hlawm khawp ang chu, ka chhûngte mai bâkah, kan khua ngei pawh hi ka ngai ang. Lehkha zir leh hna thawka chhuahsan ang kha ka ni tawh dáwn tlat si lo a.

Nilaini zàn inkhâwm bàn chuan Mazualite inah ka pêng lawk a, a nu chuan min lo hmuh veleh," Mite thu sawi avàng khân i rilrute kha i tihrehawmin i tihnual ngawt ang e, mi thu sawi hi chu engah mah ngaih duh loh tùr," a lo ti vat a.

A ngaihna hre lo zet hian ka en a, Mazuali lam chu ka hawi leh a, ani chuan a mitmeiin a nu chu a lo khap ve mêk bawk a.

"Eng nge ni a?" tia ka zawh chuan," Eng mah a ni lo," a lo ti deuh tlat a.

Mahse, eng emaw chu a ni si a ni.

"Min hrilh țha ve mai la?" ka tih leh chuan," A ho mai mai!" a ti leh deuh tlat a.

"A nih chuan, ka hawsan daih dâwn che," nui chung hian ka ti a.

"Bawihi, a hriat a pawi chuang hleinem, a hre tho tho ang," a tih chuan Mazuali chuan," A mak thei e!  Hawh, dàwrah kal lawk ang," tiin ka bânah chuan a rawn chelh a, min pawt chhuak ta nghâl a.

"Eng nge ni min hrilh ve mai la, thil țha lo deuh a nih phei chuan..." ka tih chuan," A, Pi Mani dak chak lutuk leh mi er lutuk saw alawm, Rinfela chanchin Lunglei lama an chhûngte a lo zawt pek a ni àwm a, khaw pum a khat vek tawh hial ang chu!" a ti sap sap a.

"A, a hun kal tawh vek a ni alawm," ka tih chuan," Ni e, a dik alawm; mahse, ani hi zawng, mi chhiatna lai sawi zar zar chi a nih saw, a tâna țangkai miah lo sawi châk zek zek chi a nia, mi nunhlui chhe lai theihnghilhsak aia sawi chhuah nuam ti tlat chi hi a ni ve a," ati leh hmarh hmarh a.

A pawi ka ti viau mai, a rûk tak chuan. Chutiang chuan kan khuaa mite'n an sawi a ni tih hre ta se, a inkiltawih phah zual ngawt ang chu! Ka chhûngte lakah a inthlahrun ve tawh nèn, miin a nunhlui a kalsan tawh, a hnuchhawn tawh kha an rawn tharthawh a ni tih hre ta se, hrehawm a ti ve ngawt ang chu!

"Mahni nute rual chu ni lo se chuan va àn khum phiar phiar hi a nia ka duh ni! A tâna thil țangkai ni bawk si lo, mi chanchin țha lam ni bawk si lo, dak peih lutuk mai!" lungawi lo tih hriat tak chuan Mazuali chuan a ti leh bawrh bawrh a.

"A pawi lo, lo sawi ve mai mai rawh se. A nih lohna pawh a ni chuang lo a, a nunhlui a ni ve mai a, mi chanchin a țha lo lam chu kan hre chak țhin alawm," ka lo ti a.

"Ani pawhin nunhlui duhawm lo deuh deuh pawh a nei ve tho ang chu, mi zawng zawng hi an nunhlui duhawm lo takah an chêng reng lo a, an kalsan ve tawh a ni tih hre lo rual pawh a ni tawh lo!" a ti leh hlak hlak a.

"A, hre thiam mai teh, i va àn khum rêu réu ang e, mualphona a tam phah ang! Ngawi mai mai ila, an sawi rei peih teuh lo," tiin a thinur chu bengdaih ka lo tum ve a.

Ka thiani hi chu, a duh lohnaah hi chuan a kawlh ve viau a ni, min chhan ve a, ka pasal ni mai tùr Rinfela chanchin țha lo lam miin an sawi chuan min lo natpui a, heti khawpa țhian țha ka nei hi ka vànnei viau a ni.

Ka chhûngte pawhin mi sawi chu an lo hre ve ngei mai a; mahse, anni hi chuan an hre daih tawh a, an tán thil mak a ni lo.

Ka nu chuan,"Mite hi dem viau loh tùr, khawvêl a la ni miau mai si a, mi chanchin țha lam aia chhe lam sawi nuam ti tlat mihring kan ni a, mite hlawhtlinna leh a țha lama lawmpui aia sawichhiat theihna tùr zawng tlat mihring kan ni miau si a ni, pum chhûng ațanga suala pai kha kan ni vek tlat a," a ti charh charh a.

Taitea pawh chuan,"Ni e, chanchin țha lo lam sawi peih deuhte hi a tak takah chuan an khawngaihthlâk a nia, a rûk tak chuan an awm dàn hi hrehawm an ti ve țhìn thoin a nia ka rin ni, hlâwkna awm miah loah an buai a, engtin mah tih lêt ve loh hi mi puitling zia a ni tih hriat tlat tùr aw," tiin min rawn melh a.

"Engtia tih mah ka tum lo, Mazuali'n min hrilh tawh a, pawiti ru visu mah ila a nunhlui a ni miau a, thu dik a ni tlat bawk si a," ka lo ti a.

Chutih lai chuan Teruatite nufa pawh chu an lo haw ve a, Teruati chuan," Ka dàwr kal chu ka tifuh lo tak tak a ni, tu nge a hming ks theihnghilh ta, nu upa lam ve deuh kha, kha khân,' In mâkpa tùr chu a lo ropui hle mai,' min lo tih khum kher a, mi an awm ve nual bawk si a, a zahthlâkin a thinrimthlâk ka ti bawk sia, ka ngawi tawp," a rawn ti lût barh barh a.

Ka thaw hawk mai. Chutia mi bul bula sawi leh ka u nupui ngei bul pawha a sawi hreh loh chuan mi zawng zawngin an hre vek tawh dâwn tihna a nih chu!

"Hlâwkna nei dâwnin a inhria a niang," nui deuh chung hian ka lo ti a.

"Nutling ve pui si, a buaina a ho ka ti khawp mai a," Teruati chuan a ti leh a, Mamuantea'n min rawn pan avàng chuan ka lo pawm a.

"Chutiangah chuan buai ve miah suh ang che u," Taitea chuan a lo ti a.

"A pawi ka ti, in tân zahna ka thlensak che u a-" ka tih lsi chuan Taitea chu a lo inrawlh vat a.

"Theihnghilh hmiah rawh. A nunhlui țha lo chu a kalsan tawh a, a insiam țha tawh a ni. Keini pawhin nunhlui țha lo kan nei ve vek ang, chutiangah chuan tu mah kan chêng tawh bïk lo, hetiang lam buaipui tlat țhìn mi hi țawngțaipui an ngai nasa a ni. Huat loh tùr, min tichaktuah hmang daih ila, mi fing kan ni mai," a ti leh malh malh a.

Mi min sawina chu hmaichhanah hre ve dawt lêm lo mah ila, nuam ka ti hran lo khawp mai. Dàwr kal pawh ka hreh phah deuh a, inkhâwm erawh ka la inkhâwm zar zar, Taitea sawi ang deuhin ka țawngțai tam phah a, mi min sawichhiatnate chu chakna hmanrua atân hman ka tum a ni.

"Ka tuar thei tawh thlâwt lo! Niminah dàwra ka awm ve lai ngeiin,' A pasal tùr pawh chutiang mi a nih chuan amah pawh hian felhlelhna  chin a nei a niang, hetah țha àwm takin a awm a, chhûngte hmuh phâk lohah hian a lo tãl hiar viau a nih ka ring ta,' a ti leh kher pek a, i chanchin a ni tih hai rual a ni lo. A bulah kalin,' Ka pi, thu chiang taka i hria a i hmu a nih loh chuan i rin thu thutak sawi hmiah hmiah tawh suh,' ka tih khum kha, a inhre ve rauh rauh ang chu!" sehchilh deuh nak hian Mazuali chuan a ti a.

A va buaithlâk țhìn tak êm!

"Ngaidam rawh, chutia i ti chu a lawmawm, min țan vàng a ni tih ka hria e; mahse, thu dik a nih chuan loh chuan a pawi hleinem. Engtin pawhin min lo ring chhiain min lo sawi mah se, a sawi leh rin angin ka awm chuang lo a, a hah thlàwn mai mai a ni," ka lo ti a.

"Pitar ve tawh si, a mak lulai êm a ni. A dáwt sawi pawh hi amah hian a âwih zëlin a nia ka rin ni! Kan chhûngte a ni ang tih ka hlau ngawih ngawih," a ti leh a.

"A hlimna a ni veah ngaihsak mai mai ang, hetianga kan inham buai ve zêl zawngin buaina tùr kan ngah lutuk palh ang!" ka ti leh a.

*BIBLE I CHHIAR A, I INKHÂWM ȚHÌN A, I TI ȚHA LUTUK E; MAHSE, CHUTIANG I TIH ȚHIN AVÀNGA TI VE NGAI LOTE DIRIAM ZÂWNG LEH AN PÀWL THEIH LOHA I AWM ZAWNGIN I FELNA LEH I THIL TIH ȚHAT CHU A ZIKTLUAK BÎK LO TIH HRIA ANG CHE*