☆24/7☆ - 44 By Dingdi Pachuau

 ☆24/7☆ - 44 By Dingdi Pachuau

Pasal ka han nei ve ta mai chu a nia,  ka mumang a ni mai em aw tih ka ngaihtuah a, ka han khap sak sak a, chutah, min kuah chialtu Rinfela chu ka han en leh a, tui taka muhìl tih hriat tak hian a thaw sâk sâk a, ka mumang chu a lo ni lo ngei a nih chiah hi.

Tihharh hlau ru tak chuan a hmel chiang taka hmu thei tùrin ka lu chu ka chêt sawn a, ka thlîr ta vang vang mai.

A mithmul dum chhah angreng tak hi a inhmeh ka ti a, a luhlul thawkhat ang tih pawh a hriat theih hliah hliah. Luhlul viau mah se, ka duhna  a kiam phah lo mai ni lovin, a nasa sauh záwkin ka hria.  Tunah phei chuan ka pasal a ni tawh lehnghál a, a țha lamah hi chuan luhlul hle mai se  tih hi ka duh bur zâwk hial a ni.  Kan inhmangaih a, ka thianghlimna, ka pasal tùr tân chauh tia ka lo vawn him ve char char kha amah, ka pasal tân ngei hian ka hlàn ta bawk a, ka làwm a kim hliah hliah tawh a ni.

"Min en reng hian nuam ka ti țhin tih ka hrilh tawh che em kha?"

He pa hi, a lo harh reng tawh a ni chiang mai. Ka en ulukin ka en rei bawk si a, engtia rei nge a lo harh tawh ang ni?

"Ka en reng lo che, hmun dang pawh ka en ve tho aw."

Meng chuang lo chuan a nui hawk a.

"Ka nupui hian dâwt sawi pawh a thiam lo. A pawi lo, hmun dang en tawh lovin i duh táwkin min en thei ang," a ti leh a, a aw chu a la mut chhuak aw ruih mai a, a thatchhiat hmel bawk sia, a sexy ruih maiin ka hria!

"Tho tawh záwk ang, a tlai tawh," ka ti a.

Ka kâwnga min rawn kuah ngheh sauh pah hian," A la hma, thawh a la hun rih lo,"tiin ka âwmah chuan a hmai a la rawn phûm tak sauh sauh a.

"Chutin ti ringawt suh, mut chu a nuam-"

"Nuam deuh asin," tiin ka țawng lai chu min lo pawt chat a, chutah,"Ka nupui tê hian min hnial a châk a ni maw? Min hnial miah lohna tùr tih tùr țha deuh ka hre ràn a nia aw," a ti leh zat a.

A thil sawi chuan min la tizak thei tho! Kan inneihna pawh kâr khat chuang zet a ni ve tawh a nia, a țawngkam eng emaw tê hian zahna min la thlen thei tho.

"Tlai lamah em ni  Rose-ite ina chaw kan ei dáwn kha?" tiin thil dang daih chu ka záwt ta a.

"Chaw ei pawh a lang lo, hetia mut hi a nuam," a lo tih chuan," A mak thei!" ka ti sap a.

"Min duat tal la?"

Naupangchhia sia maw. Mahse, hriat thiamna thui tak ka nei, a nuin a kalsan ațang khân pangchanna tùr a nei tlat lo. A pa lakah a pangchang thei lo, enkawl ngai zâwk a ni si a, pangchan châk ve țhìn mah se, a thei lo, kei chauh hi a pangchan ve theihna chu ka ni.

"Ka duat che alawm, ka duat lutuk che," tiin ka kuah a.

"Engtin?" a tih leh chuan," Nang bâk duat tur ka nei lo, ka pasal duh tak leh ka hmangaih ber kha i ni miau a," ka ti lët ve a.

"Nih, tho rih lo ang," a tih leh chuan," I duh dàn dán le," ka ti leh a.

"Duat takin min kuah leh la?"

A sawi ang zêl chuan ka ti. Thil hrehawm a ni hleinem, a thu ka áwih hian ka duatzia ka lantîr a ni ve pakhat bawk a, ani pawhin ka thu a âwih ve tho bawk.

Kan thawh chhuah meuh chuan dâr 7:20 a ni vah tawh! Khua a vâwt a, tih tùr pawimawh kan nei lêm lo bawk nèn, thawh tlai pawh kha pawi ka ti tehchiam bîk lo a ni.

Kan pahnih chuan eirawng kan báwl dùn a, ka sîrah min si chêta a rawn din loh leh ka hnungah dingin ka kokiah a khabe a rawn nghat a, a chángin ka ngháwngah leh ka biangah a fâwp thùl, chutiang rêng rêng chuan hun a hmang a; mahse, ka sawisêl lo, nuam ka ti ve tho tlat a ni. Heti reng hian kan dam chhûng zawngin, kan inthlahlelin hun kan hmang dùn reng kher lo ang, kan inthlâkhlelh zual lai hun a la ni ve a, ka sawisël lo ang. Kum hnih thum a vei hunah meuh chuan ani pawh hian a peih tawh kher náng.

"Honeymoon hman i duh em?"

"Hei, kan hmang reng chu a ni lo'm ni?" nui chung hian ka ti a.

"Hmun dangah a nia ka tih," a tih chuan," A, ngai pawh ka ti lêm lo, hmun danga kal lo pawh hian nuam kan tih viau tho hi maw," ka ti leh a.

"I awmna hmun a nih phawt chuan khawilai hmun pawh hi nuam ka ti ang," ka kokia a khabe rawn nghah leh pah chuan a ti sup sup a.

"Chuti a nih chuan, hmun dangah zin kher lovin kan inah hian honeymoon chu hmang mai ang aw," ka ti a, hmun danga kal chuan pawisa a hek bâkah chêtsualna a thleng thei, kan fihlim theihna ber chu zin chhuah loh mai hi a ni.  Motor-a kan chuan loh na na na chuan motor chêtsualnaah kan thi kher lo ang tih hi ka ngaih dàn a ni.

"I thu vek alawm, Ka lalnu."

Nilêngin inah kan awm a, Aizawl lam ațangin dàwr chungchângah phone call a chhâng a, a patea lo kalpui țhin dàn zûlzuiin a kalpui vek tho, manager ang deuh pakhat awmin chu chuan engkim a buaipui a ni mai, a va phei chângin a pui ve zauh bawk a.

Tlai dâr 3 vêlah pateate inah chuan kan chho a, nutei leh patea an lo awm a, Rose-i erawh a lo la haw lo. Nutei remti lo chungin eirawng ka bàwlpui leh dàwr dáwr a, patea leh Rinfela erawh mipa an nia, an lo titi thung a.

Rose-i rawn haw hnuah erawh kan ri ta chûl a, ei tùr eng eng emaw a rawn lei haw țeuh bawk nèn, chaw ei hmain kan han ei dun leh hlak kha! Mi eitîr dàn hi a thiam a nia, ka hnar thei lo țhìn, a ei tuam tuam a, a tui hmel thei si a, ka ei leh nge nge țhìn.

"Nangni pahnih hi, rei deuh innei ang che u, eng emaw hleka inhauh thinrima inhnial vànga lungawi loh leh tlàn tih vêlah khân buai miah lo ang che u, ka peih miah lo a nia," chaw kan ei lai chuan a ti sârh sârh a.

"Rei deuh chauh maw? Kan inneih thutiamah khân 'Thihnain min țhen hma loh zawng' kha kan ti bawk sia?" ka lo ti a.

"Thu țha ka hrilh cheah ngai mai rawh, tuna in inthlâkhlelh reng ang hian in awm dáwn lo, inthlâkhlelh tâwk loh hun a lo la thleng ngei ngei ang, chutih hunah chuan ka thu sawi hi hre reng ang che u," a ti leh a.

"Ni e, hriat rengsak ang che u," ka patea pawh chuan a lo ti a, ka va en a, a lo nuih deuh avàng chuan kei pawh chu ka nui ve a.

"Rosangpui, nui miah suh, thu țha ka hrilh che a nih hi aw, Chuan, lo rai miah suh ang che, Favàng lama ka pasal neihnaah min dinpui ka ngai dâwn a nia, a rai theih loh aw," thupe aw deuh tak hian a ti leh țhat a.

Ka nutei chu a lo inrawlh ta vat a.

"Chutin ti ringawt mah ta che, a rai leh rai loh chu Pathian thu thu a niang chu! I țawng malsâwm lo țhin ém mai," a lo ti kauh a.

"Nu, fa an neih nghâl ringawt chuan an induhna leh an inthlâkhlelhna hi a reh vat ang tih ka hlauhpui alawm, an la upa êm êm chuang lo a, an hmanhmawh chûk ka hlau a," ani chuan a lo ti leh a.

"Buai lohna tùrah i lo buai mai mai a nih kha, Bawihte. An inkâr a nia, fa neih thuai pawh an lo duh thei a," ka patea chuan a lo ti charh charh a.

"Nia, a niang; mahse, ani a rai puar pum si chuan kan inneih ve hunah kan mawi lo zo vek dâwn asin, pasal ka neih ve hma chu lo insûm hrâm hrâm mai teh u," a tih chuan ka nuih a za khawp mai.

"A lo rai ta hlauh a nih chuan kawr lian zet, puk deuh in ha mai ang a?" Rinfela'n a lo tih ve tâkah chuan kan nui zo ta vek a.

"Kan mawi àwm chhawng chhawng teh e," tiin a nui ring ber berah chuan a țang thei ta a.

Chaw ei kham hnuah chuan Rose-i chuan," In spot hlui kha in ngai lo'm ni? In haw hmain tlawh ngei ngei ang che u," a ti leh pek a.

"Ni dáwn tak, kan kal dâwn nia, kan kal khât tawh êm mai," tiin Rinfela chu ka en phei a.

Kan kal tak tak! Zanin phei chu thla a êng lo lehnghâl a, a thim khawp mai; mahse, a ngaihawm ve hrim hrim.

Ka hnungah dingin min kuah a, kan kut chu kan inchelh belhbawm chial a. A kut lum zet mai hi deh nuam ka tia, kei lah ka kut hmáwr a váwt thei ropui mai si a.

"A lunglènthlâk tiraw? Helaia kan inhmuh țhinna khân rah țha a chhuah tawh si a," ka ti sap a.

"Khatih lai kha chuan ka nupui i nih hi ka ring pha miah lo," tiin a rawn inpuang ta a.

"A ni maw?! Engati nge i rin loh?" ka lo ti vat a; mahse, kei pawhin ka ngaihtuah ngai lêm lo nain ka pasal a nih ka ring vak bîk chuang lo.

"Ka tân i sâng êm a ni. Ka awm dàn zawng zawng leh kan chhûngkhur, nunzia hre vektu i ni a, a châng phei chuan nang ka nei che hi ka mumang a niang ka ti rum rum țhìn," a ti leh a, ka bengah chuan a rawn fâwp zoh a.

Chutah, sawi zawm lehin," Mahse, kaltîr che kha chu ka tum lo bur. Ka duh che a, nang ka neih theihna tùr che a nih phawt chuan ka tih theih apiang tih zéla ka bula awmtîr tlat che kha ka tum bur a ni," a ti leh a.

Amah hmachhawn thei tùr chuan ka inher a," Ka tân chuan khawvêla mipa sexy ber i ni," ka ti ta sap a, ka en chho rân bawk a.

"Eng...maw?!"

Thutak deuh hian,"Chutiang mipa chu alawm sexy chu ni. A hmeichhe hmangaih tâna engkim huam ngam țhin mipa ngei chu," tiin a nghâwnga kuahin dingdihlîp hian a hmuiah chuan ka han fâwp a.

Kan țawng ta lo.

A hnu daihah chuan,"Nih, thil dang daih, ka pa khân engtin nge i nu chu a lo hriat daih theih?" ka ti ta a, hriat ka chãk a ni a, zawh ka la tum ve fan fan a ni.

"Ka hre bík lo, min hrilh lo a, ka zâwt ngam bawk si lo a," a ti sup a.

"I pà viau emaw ka ti?" nui hak chunga ka tih chuan,"Natna khirh tak tuar i pa bulah kha chuan pà khân awmzia a nei vak lo, nangmah vàng hian ka zah êm ém bawk si a," a ti leh a.

"Ka hmangaih bur che."

Ka pa khân kan pahniha inngaihzàwn kha min lo phalsak ta viau se, tûn dinhmun hi kan phâk ang em tih ka ngaihtuah a.

"Haw tawh ka duh!" a rawn ti chhuak hawk a.

"I ning deuh tawh a ni maw?" ka tih chuan," Ka nin lohzia che inah a taka lantîr ka duh a ni," ka beng bul chêta rawn kûn hniamin a ti sup a, ka beng pawh chu a tháwk khum lum ham ham thei hial.

"Aw le, Boss."

*******

Indanna ka ei miah lo a nia; mahse, ka la raichuang miah lo! A bulah ka sawi chhuak lo nain ka ngaih țhat loh a hlau a niang," Pathianin hun a la ti lo a niang," a ti ve mai țhìn a, nuam lo ka ti lek lek zâwk hial a ni.

Kan khuaah vawi khat chu kan han zin leh tawh a, kan zin chuan khua a lo lum leh viau tawh mai a, hrehawm a ti viau ang tih ka hlau khawp mai. Kan chàm chhûng chuan chaw eia min sâwmtu pawh an awm ve nial a, a làwmawm khawp mai. Kan innei dáwn tih an hriat ațanga min sawichhe char chartu Pi Mani kha a dam țha lo a, a chàu thut thut țhìn ni àwm tak a ni, Aizawl lama phurh phei ngai ang hial deuhin an lo sawi bawk a.

"Kan kan ve ang chu tiraw?" tiin Mazualite ina chaw kan ei kham kan ţhut khawmuan lai chuan Rinfela chu ka râwn a. Nizàn khân ka nu pawh a lêng a, a rawn haw har lutuk lo nghe nghe, a muhìl thei ni àwm tak a ni. 

"A țha alawm," a lo ti mai a.

"Mahni sualna chu lo dah țha ila, Pi Mani hian inhmuh chhuah nân hmang se ka ti ngawt mai. Mihring siam țhat nán khawdur a ngai an tih țhin pawh hi hei hi a ni ngei ang," Mazuali chuan a  lo ti sap a.

"A dikna chen a awm ve alawm, a țawng ve thei deuh e tih a ni mai lo'm ni? Chutin a sual viau hran hleinem," a nuin a lo tih chuan,"Sual ve e a, a rilru pawh a sual alawm. Kei chu ka zah dêr lo, dâwt tih hriat lutuk a sawi pawh hian dâwt a nihzia ka sawi khum hmiah zêl, aia upa niin nute rual zet mah ni se, in inneih dâwna a thil sawi duh dàn-" a tih lai mêk chuan ka lo ti tàwp vat a.

"Mazual, han insiam la, lêng ve ang u, damlo leh mangangte inlènpui hian lènpuite tân a thlamuanthlâk duh a nia, chini kg 1 min lo pûktîr rih bawk la?" ka lo ti vat. Ka pa damloh ațang khân inlènpui tel tel lo thlamuanthlâkzia ka hre chiang tawh viau a ni.

A thil sawi tùr erawh kha chu Rinfela hian hre ve lo se ka duh, bâkah hun kal tawh a nia, sawi chhuah kha a țûl ber lêm lo, sâwtna a nei lo bawk.

Lêng pawh an lo awm ve a; mahse, upa lam deuh an ni. Lo titi ve mah se, an țawng ring lo viau mai, bengchheng a ngai thei lo a ni maithei.

A fanu naupang ber chuan thingpui min lo pe vat reuh a, inlêng dangte hnênah chuan Pi Mani dinhmun chu Mazuali chuan a han záwt ru sar sar a, nichîn deuh khân a muhìl a rawn harh a, a rawn harh hnuah a chau leh deuh a ni àwm e.

"Aizawlah chuan engtikah nge pheipui an tum àwm deuh le, ka pu?" tiin Pu Siamliana, an țhenawm hnaivai tak chu ka zâwt zauh a.

"Motor hire tawp hi chu chàwi a sâng dâwn sia, remchâng an melh ve deuh ni àwm a ni. Lunglei lama an inentîrna lamah an insêng ve nual tawh bawk sia, a natna tak an hre chhuak thei mai bawk si lo a," a ti duah a.

Titi tak tak theih pawh a ni hran lo a, kan țhu deuh tlawk tlawk a ni mai. Mazuali'n min rawn bekbàwr leh zauh zâwk a, chuti ni lo phei se chuan a reh ngawt ang!

Zàna mu tùra khum ka làwn chuan khuma țhuin a en ngai a lo en rùn rún a, eng emaw ngaihtuah mûk deuh nei a ang, kuah pawh min lo kuah miah lo a nia!

"Eng thilin nge i ngaihtuahna tibuai a?" tiin ka kuah hmasa ta zâwk a.

Min rawn en nghãlin,"Zanina kan lènna damlo kha ka ngaihtuah tlat, Aizawl kan phei veleh phur phei ve ila tiraw? Motor chuan phei man an châwi lo tùr pawh an tân chuan sum save-na țha tak a ni thei ang a, bâkah, kan motor-ah chuan mi dang  mitmei vèn a ngai lo ang a, hrehawm ti vak lovin an thleng thei ang  tih ka lo ngaihtuah a," a ti sup sup a.

Ka pasal hi, mi sual a ni lo ka tih tawh kha, a rilru pawh hi a țha asin.

"I tih dàn dán a ni mai, ka pawmpui thlap che," tiin a khabeah chuan ka fawhsak zoh a, fawh hi a phû hliah hliah a ni.

"A fate tân khân a hrehawm duh dâwn êm mai, a rang thei ang bera phei tum ila, Lungleia kan chhuk leh lawk hlànin ka nu emaw Taitea emaw lêngin thil awmzia va hrilh se tiraw? Anni pawhin an hnial ka ring miah lo," a ti leh a.

Ka nu hi a ko hreh thei asin! A ko hreh lutuk hi a koh ngei ngeina tùrin ka nu bulah thil lam tùrin ka tîr țhìn hial, chuti chung pawh chuan a ko ri ka la hre miah lo!

Mahse, tunah khân 'Ka nu' a ti ve ta tlat!

"Mi felpa! Ka pasal i ni hi chu Pathian hnênah làwmthu awm mawlh teh se!" ka ti chhuak. A ngaihtuah ang hi ka lo ngaihtuah pha hauh hleinem!

A chala ka chal zàwi têa rawn tauhtîr zauh pah chuan," I țhatna hian min hmet zawr hneh êm a ni. Hmeichhia engah mah ngai tawh lo kha hmeichhe hmangaihna ropuizia  leh hlutzia min hmuhtîr a, thîr hipthei ang maiin min hîp bet tlat a, mite sawisèl leh thinhrik kha mi ang pângngaiah min chhuah bawk a," a ti duah a.

"Phû lo viau mah ila, i sawi a nih vàngin ka ring thlap, chuan, ka lâwm bawk. I mize duhawm zet, thup tlat nia i inhriat kha ka hmu ru khiau alawm," nuih sak chung hian ka ti a.

"Mize duhawm..." a ti sup phawt a, chutah," Chutiang ka lo nei a nih ngai chuan mize țha chungchuang nei, miin 'Mi sual ber, thil rûk chîng, Jail tàn hrât' tia an sawi pawh a țhatna lai hmuhsak tum tlat mi  nupuiah ka nei che a, chutiang mize duhawm neih ngei tum chuan ka bei zêl ang," a ti ve leh a.

Lungleiah kan chhukthla leh a, ka nu pawhin Pi Manite chu a lo be fel tawh a, Aizawla kan phei rualin an phei ve dâwn a ni. Kan khaw lamah kan tlân kual dáwn tihna a nih chu.

Kalkawngah kan tlân chak lo a, a nuam thei tùr ang berin kan chuantîr bawk. Din a duh hunah inthlahrung lo tùrin Rinfela chuan a hrilh thlap a, a fanu tê ber khân a kalpui a, a țawng tam lêm lo nain a fel reuh khawp. A nula ve tawh a, an unauah lehkha zir sâng ve ber, hawi zau ber a ni bawk a, an tîr niin ka ring. A nui ve sak sak nain a thaw leh hak țhìn, a rilru a hah viau a nih ka ring.

"I rilru tihah miah suh, engkimah ka buaipui vek ang che u, damna hi a hlu ber a nia," Rinfela chuan a ti sauh sauh a.

"Ni e, rilru hahna tùr a awm miah lo. Damdawi ina admit in nih loh pawhin kan inah in innghat ang a, kan in ațangin engkim kan buaipui vek dâwn nia," tiin ka lo țawng thlamuan ve bawk a.

Kan tlàn muan avàngin kan thleng har ta phian a, kan thlen chuan kan inah kan lût phawt a, thingpui kan in hnuah eirawng bàwl ka ngaih avàngin kei chu ka chhuak ve thei ta lo, Rinfela'n a tlàn chhuahpui leh nghál a, ka ngaihtuah lo, engkim a tihfelpui vek thei ang tih ka hria a ni.

A rawn haw tlai deuh hlek. Amah chauh a nih vàngin an lo admit a nih ka ring nghâl bawk.

"I hah em? I ril a țâm tawh àwm mang e?" ka lo ti vat a.

"I ril a lo țâm tawh ngawt zâwk lo maw? Ka intleuh zawk ang a, kan ei dâwn nia aw," a ti a.

Chaw kan ineisan ngai lo a, ka lo ei bîk lo ang tih chu a hre chiang ve ngang a ni.

Chaw ei laiin thil awm dàn chu zawh ngai lovin a sawi nghâl a, engkim fel taka a tihpui thei chu ka chhuang takzet a ni.

"I va fel tak aw! Kan khaw mâkpa fel ber leh hmelțha ber i ni chiang," ka tih chuan a nui hawk a.

"A neitunuin a zir êm alawm," a lo ti fiamthu ve a.

"Ka tifiam lo aw, i fel ber a, i hmelțha ber bawk. Mi dang chu an lo fel a nih pawhin an hmel a țha tel ve tlat lo a," ka ti leh a.

"Mi tihphùr dàn hi thiam viau suh aw!" a ti hlak a.

"Ka bâwl che emaw i ti a ni maw? Ka pasal hi ka bâwl phal hleinem che, thu dik tak alawm ka sawi, i fel ber," uar zet hian ka ti leh a.

"Um..ka tlâwm, chaw kha tam deuhin ei rawh le," a ti ta daih a.

Chaw hi ka ei tam lo țhìn khawp a, ei tlêm min ti thei lutuk a, ei tam tùrin min hrilh fo a ni.

"Thau deuh hlek tùrin min duh a ni maw?" ka ti leh a.

"Ni lo, chak deuh deuh i mamawh alawm, fa kan neih hunah phei chuan... Chuan, fa nei tùr chuan kan pahniha țan lâk a ngai bawk a," a ti a.

Zànah chuan motor kan chuan thui vàng a ni ang, kan mu hmain ka mut a tui khawp mai. Min rawn kuaha ka chal a rawn fawh pawh ka hre riai ruai chauh a ni!

A tûk lamah chuan uluk ve deuh taka incheiin inhmeh min tih ang rawng ngei kawr ka ha a; mahse, a chungah kawr bántlâwn dang ka ha leh a, dàwr kal hmain Pi Mani chu kan nupain kan tlawh a, a thisente test-in a result a țhat thu chu a fanu Lawmtei chuan min lo hrilh a, Pi Mani pawh a lo harh țha, nizàn lamah pawh buai lovin an mu țha thei bawk a, min hmuh veleh chuan làwmthu a lo sawi nghál mawlh mawlh mai.

Damdawi lei ngai leh thil țûl chu Rinfela chuan Lawmtei chu a záwt a, ani pawh chuan a lei tawh damdawite chu hmuhin a la lei loh damdawi inziahna lehkha erawh chu Rinfela chuan a lâksak a, a chhuak a, rei vak lo hnuah chuan a damdawi lei keng chuan a rawn lût leh thuai a.

Rei vak lo hnuah chuan kan chhuahsan ta a, thil țûl leh pawimawh a awm chuan Lawmtei hnênah chuan min phone mai tùrin ka hrilh a, phone number chu kan inpe nghâl bawk a.

"Nupui fel tak hi chu i va ni ém!" tiin min fak ve ngei a.

"Pasal fel tak i ni záwk!" ka lo ti a, ka rilru erawh a hlim vàngin a nui var var thung.

Dàwr kan thlen dâwn chuan," Engtikah nge ka pa thlàn kan tlawh theih ang?" tiin ka zâwt a.

"I tih hun hun a ni mai, engati nge? I duh chuan chawhnu lamah pawh hian kan tlawh hman ang chu," tiin min rawn en zoh a.

"Pangpâr ka la lei si lo a," ka lo ti a.

"Pangpâr a ngai hleinem, i ngaihtuahna leh i ngaihsakna kha a hlu ber," a lo ti thung a.

"Kut lâwng ringawtin ka pa ka hmu duh hleinem," ka ti tlat thung a.

"Kan lei dâwn nia," a lo tih chuan nui sen sen chung hian ka en a.

"Mi felpa, ka hmangaih che," ka ti sap a.

"Ka hmangaih nasa daih záwk che, ni tin, dârkâr tin, minute tin leh second tina ka lungphu pawh hi i tân vek a phû," a ti duah a.

Motor a dintîr hnuah pawh chuan chhuk ta mai lo chuan," Kei pawh ka thisen luang zawng zawng hi i tân vek an luang," ka ti lêt ve a, lum deuh ka tih avàngin ka kawr hâk chung zàwk chu ka hlïp bawk a.

Min rawn en vang vang a, chutah, rawn âwn pheiin," I kawr hâk nèna i lan duhawmzia kha! Ina tlàn haw lehnghâl hial a nia ka duh ni," a rawn ti sup a.

*I THINRIM VIAU LAIIN ȚAWNGKAM CHHE DEUH DEUH HMANG LO TÙRIN INSÛM HRÂM HRÂM ȚHIN ANG CHE, NANG CHUAN I THEIHNGHILH THUAI THEI A NI MAITHEI; MAHSE, A LO DAWNGTU TÂN CHUAN DAM CHHÛNG A DAIH THEI TLAT, THIN A UR VIAU PAWHIN NGAWIH TLAT THEIH HI A FINTHLÂK*