☆24/7☆ Bonus Chapter By Dingdi Pachuau

 ☆24/7☆ - By Dingdi Pachuau

Aizawla kan la awm rei loh tehlul nèn, Pa Hmingate chuan chaw eiah vawi hnih lai min sâwm leh hman tawh! Anni hi chhûngte kan neih chhun an nih vàng leh Rinfela tân nu leh pa ang chiah an nih avàngin kei pawhin ka ngaina takzet, an fel bawk si. Thu țha tinrêng min hrilhin min zilh bawk a, nupa awm dàn tùr leh inngaihsak tawn a țulzia leh nupa inkâra thil zêp neih a țhat lohziate chu min hrilh dap dap ţhìn.

Pi Mani pawh a natna dik tak an hre chhuak tawh a, damdawi a ei țha bawk nèn, a zia viau tawh a ni. Anni pawhin Aizawlah chhûngte an nei lêm lo a, Rinfela nèn kan kan zut a, a ei theih tùr ei tùr eng eng emaw kan kensak fo a, ka remchàn loh pawhin amahin a han kan zawk zawk a, Lawmtei phei chu kan lakah  a inthlahrung lutuk tawh tlat.

"Inthlahrunna tùr a awm lo, kan lo awm remchâng hlauh a, in tân pawh vànneihna a ni ve mai," Rinfela chuan a ti mai a.

Kan haw hnua eirawng ka bàwl laiin Lawmtei chuan min rawn phone a.

"U Sangbawih, in chungah hian làwmthu sawi dàn pawh ka thiam lo. Ka nuin in chungchâng a sawi dàn zawng zawng kha in hre ve vek àwm si a, chuti chung chung chuan min huatna emaw thinrimna emaw lantîr miah lovin kan mangan ber lai pawhin min la țanpui duh a nia. Ka zak a, ka lâwm bawk si, Pathianin a lêt tam takin malsàwmnain a vûr mawlh mawlh ang che u tih hi ka țawngțaina a ni," a rawn ti keuh keuh reuh a!

"Kan lâwm e aw, Lawmte. Pathianin mal min sàwm a, nangni ngei pawh țanpui thei tùrin mal min sàwm a, a làwmawm lamah ngai ang," ka ti ve a.

"U Sangbawih, ka nu pawh a lâwm ngang a ni, a sawi reng mai che u a. A thil sual tih man hmuhtîr lova țhatna zâwka in rùlh lêt avàng hian a rilru pawh a danglam ngeiin ka ring a, in nun dàn ațang hian ringtu dik tak nun ka hmu a, ka lâwm takzet zet a ni, kan chunga in thiltih hi engtikah mah kan theihnghilh tawh ngai lo ang," a rawn ti leh a.

Lawmtei thil sawi chuan ka ngaihtuahna a tikal thui khawp mai.  Ani tê hi a kum a la tlèm ang aiin a rilru a puitling daih mai, a ute ka rualpui leh u deuhte ai pawhin a puitling zâwkin ka ring ta. A thil sawi dàn leh a rilru sûkthlêk hrim hrim pawh hi a puitling reuh tlat.

Keini nupa ve mai chutianga min lo hmu țha chu ka láwm takzet bawk. Nia, kei ngei pawh, ka rin dàn aiin Rinfela hian a ngaihsak a, kan khaw mi an nih vàng a nih ngei ka ring, a chungchâng Pi Mani'n a sawi dàn kha hre ve ta se, hetiang hian a țanpui tho ang em le?

Zanriah kan ei lai chuan min en leh vung vung țhìn a, eng thil nge maw a hriat ni? Mi en vung vung hi chu a hrât khawp a, min thlâkhlelh vàngah ka ngai mai țhìn.

"I țha tiraw?" 

En hâ hian," Um, engati nge ka țhat loh ang?" tiin ka zâwt lêt vat a.

"Engtiklai pawhin i  țha reng tak alawm," a ti leh mai a.

Min fakna vàng chuan ka nui sak a, chutah," Lawmtei'n min rawn bia a, làwmthu a rawn sawi a," ka ti ta a.

"I fel êm alawm," a lo ti sup thung  a!

"Engati maw?! Eng nge ka felna? Nangmah a nih kha," ka ti vat a.

"I fel. Kan inneih hma thil ngaihtuah mai rawh," a lo ti leh mai a.

Min sawina kha a lo hre ve em ni? Engtin nge a hriat ang? Tuin nge hrilh? Ka âwih chiah lo, engtin mah a hre thei lo. Makti ru deuh hian ka en a.

"Eng nge kan inneih hma thil...min hrilh ve mai la?" tiin a keah chuan ka va tlawhsak zauh a.

"Ngaihtuah lo mai rawh, i felna leh țhatnain min hneh vàng a ni mai," a lo ti leh tlat a.

"Ka hriat thiam theih tùrin sawi ve mai la?" ka ti nang nang a.

"Mi felnu kha i ni tlat mai a, i sawi chhuak duh tawp nâng," tiin a tho ta daih a.

He pa hian a hre ve chiang a ni. Khawi ațangin nge maw a lo hriat ni? Ka chhûngte chuan an hrilh dáwn lo chiang mai si a, Mazuali'n a lo hrilh pek em ni? Ani tak hi chu aw...țûl lo thei mang e!

Chaw ei khamah chuan thei ei pahin TV kan en mai mai a, chanchin thar a en pah a, kei erawh chuan Mazuali ka va text pek, Rinfela a lo hrilh thawt thawt vàngin ka hau dâwn bawk.

Mahse, a rawn țang nasa.

*Eng mah ka hrilh lo, engah nge ka hrilh ngawt ang le? Thil kal tawh a nih bâkah theihnghilh daih duh nâklaiin, engtin emaw an ti leh che u em ni?*  a rawn ti!

Mazuali hnên ațang chuan a hre lo a nih hi. Tu hnên ațangin nge ni ta ang? Ka ngaihtuah tlut tlut avàng chuan hriat chhuah ka duh.

A bul chêta țhut hnaih pah chuan," Duhtak, thil ka lo zâwt che aw?" ka ti sap a.

"Duhtak!" ti supin a rawn inher nghâl vut a, inhnaih zet chuan kan inen dùn ta ràn mai.

"Nichîna inneih hma thil chungchâng i tih kha, eng nge ni? Tuin nge hrilh che a?" ka ti ta a.

Min en vang vang hnuah chuan ka sam ka benga rawn zeh pah chuan," Vawiin chawhnu khân Pi Mani'n min hrilh a ni, ka bulah chuan eng mah i sawi duh miah lo a, ka hriat miah lohin rilru natna leh sawichhiatna tinrêng i lo tuar reng si a," a ti sup sup a.

"A hrilh che maw?!!"  Mak ka ti lutuk ringawt! Eng rilru puin nge a lo hrilh le?

"Aw, engkim min hrilh vek. Hun kal tawh mah ni se, nangmah chauha i lo tuar kha ka khawngaih lutuk che a," ti supin  a kut pahnih chuan ka bek tawn tawnah a rawn dawm a.

 

"Khatiang kha chu theihnghilh vek ang, ka theihnghilh tawh alawm," ka lo ti sap a.

"Mi felnu, nang ang mi fel nupuia ka nei che hi chu mipa vànnei ber ka lo ni e tiraw? Ka nun thlâkthleng-" a hmui chu ka hupsak ta vat a.

"Ka lâwm e, Pathianin nang pasal atâna min pe hi ka lâwm ngawih ngawih, mi fel tak, min hmangaih êm êmtu leh ka hmangaih êm êm i ni si a," ka ti lêt ve a.

Mutnaah chuan min kuahna bân kham chung chuan," Ti ta daih ila, ka nu, nangmah hringtu che kha hmu leh ta la, i la hria ang em?" tiin ka zâwt chhin a.

"Hria ang; mahse, ka hre kher lo ang," a ti sup a.

A thil sawi awmzia chu ka man rang lutuk. A nu chu a la hre ngei ang; mahse, hria angin a awm duh kher lo ang tihna a ni.

A âwm ruak kâng chùlsak pah chuan," Ka hre thiam e, nangmah hringtu che a nih vàng hrim hrim pawhin hmuh ve chhin ka châk ngawt mai, nu hmelțha tak a ni dàwn bawk si a, " ka ti sap a.

"Hmelțha mah se, a hmel a țha thei lo," a ti leh a.

"I la haw reng a ni tiraw?" tiin ka kuah a.

Min chhàn duh lohna chuan a la huatzia min hrilh chiang khawpin ka hria. A rilru hi a luhlul ve bawk si a, ka thiam lo hran chuang lo. A tawrh ang leh a hringnun lo paltlang tawh zawng zawng kha ka paltlang ve tlat si lo va, 'Ngaidam la, haw tawh suh' tih chiam pawh awmzia a awm lo ang,; amaherawhchu, ka puih viau chu a ngai niin ka hria. Mihring thinlunga huatna awm reng zawng, 'A pawi tak tak lo ang' pawh ti țhìn mah ila, kha huatna bu khuar reng khán thinlung țha laiah ram a lo zauh hlek hlek thei tlat. A hlauhawm a ni, huatna pai tùrin ka duh lo bawk.

Pi Manite nufa chu an inthlahrung tawh deuh nge ni, damdawi in ațanga an chhuah hnuah chuan sumo-in an haw phei ta daih. Dik tak chuan anmahni vàngin Aizawlah pawh kan awm rei phah ve deuh a, ni danga kan kal chuan ni hnih thum bâk kan châm ngai lo; mahse, a țha vek mai e,  kan khuaa kan zin leh hunah kan la tlawh ve leh ang chu.

*******

Ka rai!

Rai leh rai loh test-na chu ka en ràn a, ka inringhlel ru deuh hlek tawh rêng a ni, phûr tha khùr deuh dar darin ka en chiang țha leh a; mahse, rìn lang chu a ngai reng.

Rinfela chu a lâwm ve ngawt ang!

Bathroom ațang chuan ka chhuak ta vat a, ruah sûr chuan bàn mai zai rêl lo mah se ka rilru hlimna avàng chuan rimawi tak ni maiin ka hre tawh hial! Pâwna va tlàn chhuaha va au vak vak hial a nia ka duh ni.Kan inneihna a rei ve tawh a, indang hauh si lovin ka la rai mai thei si lo a, min hnèm țhìn mah se hrehawm ka ti ru viau tawh a nih hi; mahse, tunah chuan...

Zanin tlai chu surprise teh ang.

A chawhmeh duh zâwng hlîr ka siam a, ka theih táwpin ka siam uluk bawk. Tui takin, puar takin chaw ei se, a ei khamah chanchin hlimawm hi ka hrilh bawk ang.

Ina a rawn luh chuan ruah pawh a bâng tawh a, parcel lian vak lo hi a rawn khai lût bawk a.

"I tluang maw? I ril a țâm tawh em?" ka lo ti vat a.

"Tluang meuh lo, dàwrah buaina a awm deuh lehnghâl a," a tih chuan ka khawngaih roh hnûp hnûp asin.

"A zia lo hle mai; mahse, harsa tak a nih loh ka beisei," ka lo ti a, a parcel khai chu ka lo ban a.

"Um, ngaihtuah ve duh suh, a fel thuai ang," tiin parcel chu min pe lo chuan dawhkànah chuan nghatin a hawng ta nghâl a.

Chini, chi leh chhûngkhur mamawh eng eng emaw a ni hlawm. A lâk chhuah apiang chu lo lain a dahna tùrah ka lo dah zêl a.

"I inbual dâwn em? Tuilum pawh a awm a," ka ti leh a.

"Nakinah mut dáwnah le. Nghah kan neih loh chuan chaw ei nghâl mai ka duh, vawiinah eng mah ka ei lo va," a tih chuan ka lo chek tlak a.

"Ti tawh miah suh, i taksa kha ngaihtuah hmasak phawt tùr aw, rilțâmin awm tawh miah suh, ka remti miah lo a nia," ka ti hlak hlak a.

"I inhmeh reuh lutuk!"

Chaw ei tura dawhkàn kan kîl dun chuan," Wow! Ka duh chi hlîr! A va tui dâwn êm!" tia nui chung hian min rawn en a.

"Ei țeuh rawh, i ril țàm kha. Chuan, ka suah chhuahho hi chu ei zawh vek tùr aw, chaw ei khamah eng emaw hrilh tùr che ka nei a nia," ka lo ti a.

"I thû ber alawm, mi felnu," a ti phawt a, min rawn en țha lehin," Eng lam nge ni min hrilh tùr chu?" a ti leh a.

"Ei zo vek phawt rawh," ka lo ti thung a.

"Ahhh, mi felnu chu a va phakar thiam reuh tak!" tiin a nui hawk a.

Chaw ei khama kan chaw eina min tihfelpui vek hnu pawha ka la sawi loh avàng chuan kal sawn lovin ka bulah a awm zêl a.

"Min hrilh tawh la?"

Ti tak zeta a mit taka en chung chuan," Tu mah hrilh miah lo tùrin min tiam phawt rawh," ka ti phawt a.

"Eng thil nge ni?! Thil pawi i ti em? Ni lo, a theih loh! Han sawi phawt teh, min tihlauthâwng ru deuh tlat a nia," a ti nawk nawk a.

Ka insûm hrâm hrâm a ni.

"Min tiam phawt rawh," ka ti leh rih, ka ngeiawm thiam mai mai asin.

"Min tihlauthâwng lo teh, min hrilh la?" a lo ti thung a, a ngaih chu a țhat hmel tehchiam tawh loh a ni.

Ka en leh vang vang hnuah chuan zàwi sap hian,"Ka rai!" ka ti ta sap a.

Chechàng lovin, mit pawh khap hauh lo chuan min en reng rùn reng a, a thil hriat chuan a țhâwng viau a ni mahna!

"Ka rai ka tih chu, i lâwm lo em ni?" ka tih leh chuan rang zeta min rawn pawm kâng lawpin," Tak tak maw?!!! Lalpa, ka lâwm e, ka lâwm takzet a ni, ka lâwm..." sawi zawm lo chuan ka âwmah chuan a hmai chu a phûm ta tlat a.

"Chawhma lam khân ka hre ve chiah a, surprise che ka duh vàngin phone-ah pawh ka rawn hrilh duh lo che a nih kha, i lâwm ve dâwn tih ka hre reng a," ka ti sap sap a.

A taksa khùr deuh datah chuan a țap emaw ka ti hial, a țah erawh ka ring ngam chiah si lo. Ani ang mipa hi chu an țap mai mai lo ang tih ka hre si a.

"Ka lâwm e aw, fa min pêk avàngin."

A rawn hawi chhuah hnuah chuan a mittui a tla a ni tih ka hre ta chiah, nichina a khùr deuh dat dat pawh kha a țah vàng a lo nih chiah hi.

"Ka hmangaih lutuk che," tiin min fáwp vang vang a, a mittui tlâkna avàng chuan a mit bul vêl chu a hnáwng chap thei nghe nghe a.

Kan inthlah hnu chuan duat takin a mittui pherh ve niai chu ka hrûksak a, ka mipa hmangaih ber mai chu ka rai ve tâk avàngin a lâwm lutuk a mittui hial a tla a nia.

"A hlimawm tiraw? Naute, kan pahniha fa ngei ka han pai ve ta a nia," hlim avànga nui sâng hian ka han ti a.

"Làwmawm lutuk! Chanchin ropui tak a ni, min tihhlimzia hi i hre phâk lo záwk ang," ka chal fáwp zauh chung chuan a ti a.

Mutnaah ka pum chu a chûl hoh hoh reng a, min chêtpui tum àwm pawhin a awm lo.

"Rose-i pasal neihnaah pawh i dinpui thei dâwn lo ta a nih hi," a ti sup a.

"Engati maw? Thlaleh mai a nia, ka pum a la puar dâwn hleinem," ka lo ti a.

"A rem lo ang, kawr tight i hâk a ngai ang a, pheikhawk sâng nèn, ni lo, dinpui lo mai rawh, nautein a tuar phah ang," a ti ta tlat mai!

"Tuar phah dâwn em ni? A la insiam-" ka tih lai chuan min rawn fâwp zoh a, ka țawng pawh a tawp chat bawk.

"Keimahin ka hrilh mai ang, a hre thiam ve lutuk ang che," a ti leh tlat a. Ka hnial zawm duh rih lo, a ngaih dàn ang hi zàwm rih phawt mai ang.

Ka rai lawm nân leh Pathian hnêna làwmthu sawina ni pah fâwmin inah țhenrual a neihte sâwm khâwmin ruai angreng deuh kan buatsaih a, a tlangvàl laia a kawm țhìn, zan tin deuhthawa thim hnuaia a zui țhinte pawh kha a sâwm vek. Anni pawh chuan an nunhlui chu an lo kalsan ve hlawm nual tawh a, pahnih khat erawh chuan an la thlah hlei thei bîk lo, anni zawng zu ngawlvei dik tak an ni tawh a, in lama an in tùr leina tùr pawh Rinfela chuan a pe hial a ni.

Chu mai a la ni lo, addict enkawlna hmun hrang hrangah tam lutuk lovin  pawisa a pe bawk. Nia, a țhian kawm ţhinte kha addict leh mite thinhrik kha an ni hlawm nual mai si a, a rilruah a thar leh țhin ve bawk a ni ang, țha chhuak tùrin a duhsak ve hlawm êm asin.

*******

Rose-i chu ka dinpui ta tho. A remti lo viau nain Rose-i chuan doctor a biaktîr thlap a, doctor-in ka naupai tân a hlauhawm loh thu a hrilh hnuah pawh pheikhawk sâng chu a la phal thei chuang lo, ka tlûk palh a hlau tlat, tlêm tê chauha sâng hlek tak tak ka bun ta ringawt a ni.

Thlamuana pawh a rawn inla nalh khawp mai. Rose-i chuan hmel hriat a ngah bawk a, inneih inkhâwmah pawh an tam khawp mai, a zahthlâk ve lek lek.

An inneih dàn hi ka duhpui dàn leh rilrem zâwng chu a ni hauh lo, chesual dùnin fa hial a pai tawh a nih kha; mahse, an inpuang chuang bawk si lo a, khalai kâra lo inrawlh kha chu ka duh bîk chuang lo. Pathian chu a zahawm ka ti thlâwt, phuba rawn la lovin ngaidam lul teh se.

Rinfela'n min vil reng, ka tlu palh ang tih a hlau a niang, ka hlatah a awm lo hrim hrim bawk. Ka bodyguard rinawm lutuk a ni mai.

Ka rai a lan chian hnuah phei chuan min duat hlum lo chauh a ni, ina a awm ve phei chuan chêt a phal miah lo a, ka ei duh zâwng leh ka ei châk apiang a lei zêl bawk. Damdawi ni se a țha țha a lei a, 'Naute hrisêl tak nei tùr chuan a nu a hrisêl a ngai' a ti tlat a, a ti dik bawk si nèn, ka ei țûn țûn a ni ber.

Ka pum puar nghèng chuan a beng a dawh a, a chângin a fâwp a, a be bawk a, nuih a tiza țhìnin a tihlimawm phian bawk a, tu dang kan ngai lêm lo. Ka nu pawhin min rawn tlawh ve fo, ka zin chhuah a phal meuh si lo a, ka nuin a tawrh phah ta deuh a ni. Motor ka chuan remti lo miau hek le, min ngaihtuah vàng a ni tih hriain ka hnial duh bîk lo a ni.

"Fa pawh kan nei ve țêp tawh sia, tunah hian nangmah hringtunu kha hmu leh thut ta ang la, i la haw reng ang em?" tiin ka zâwt zauh zauh.

Ani lah chuan ka zawh apiangin," Kan fa lo piang tùr hriatah thil țha lo ka sawi duh lo, a lo ngaithla ve reng dâwn asin," a ti ziah.

"A hmelțha dâwn si a, lo chhuak thuai thuai se ka ti ngawt mai. Ka duat nasa dâwn bawk si," tiin ka pum chu a chûl a.

"Naute, Bawihte, lo chhuak thuai rawh aw, âpa leh ânu hian kan nghâkhlel tawh teh che a nia, i pa hian ka duat dâwn lutuk che, țha deuhin ânu tina vak lovin lo pian i tum dâwn nia," tiin ka pum chhûnga naute chu a be zui ziah bawk. Thlaleh lehpekah ka nei dâwn a, a puan tùr leh a mamawh tùrah pawh kan inbuatsaih țha viau tawh a ni.

Aizawl lamah dàwr chungchâng leh in luah tùr chungchângah thil sawi fel tùr a awm avàngin a remti vak lo chung chuan kan inphur phei a, motor pawh a khalh chak lo khawp mai, min dìm leh lutuk chuan ka nuih a tiza zâwk.

Kan in hnuai luahtute an chhuah avàngin luah tùr duh mi dangin min rawn be dâwn a, chhuah a remchàn loh avangin ani pawh chu ka bulah a țhu ve reng a, ka ke vûng deuh ûl chu min hmehsak nauh nauh a. Motor ka chuan vàng a ni pakhat a, ka chuan loh kha chuan a vûng mang lo.

Kawngkhàr a rawn ri karh karh a. Min rawn betu tùrte an ni ngei tawh ang chu.

"Lo lût rawh u," tiin ka lo chhàwn vat a.

Nutling ve tawh tak, hmelchhe lo deuh leh a fapa ni ngei tùr hi an rawn lût a, an hmêl en pawhin hna an thawk nasa ang tih a hriat thiam theih ruak mai.

"Lo țhu r'u, in luah tùr chungchâng vànga rawn kal tùr kha in ni ang chu tiraw?" tiin ka lo be sawk sawk a.

Țhutnaa țhu ta mai lo chuan Chu nu chuan Rinfela chu a en tlawk tlawk a, Rinfela lahin chuti tho. Che map lo leh mitkhap lêk lovin a nia a en ni.

"Duhtak..." zàwi deuh tak hian ka ti sà sá a.

"Ka nu...!" a ti chhuak sup a.

*KAN CHUNG THLA KHI A LIAN TELH TELH A NIH LOH CHUAN A TÊ TELH TELH THIN. HMANGAIHNA NÈN HIAN A INANG DEUH REUH A, HMANGAIHNA PAWH HI A PUNG DEUH DEUH A NIH LOH CHUAN A ZUIH TELH TELH A, A ZUIH RAL MAI ȚHIN*

(A tàwp ta e🥰   24/7 chhiara min lo hlutsaktute, in chungah ka làwm takzet zet e😘 Comments-tute zawng zawng, ka hmangaih tláwrh tláwrh che u❤ in fel lutuk.

LO DAM ULA, LO INENKAWL ȚHA ULA, Story thar nèn inhmuh leh vat kan tum dáwn u nia, LOVE YOU ALL😘)