☆ONE-SIDED-LOVE☆ - By Dingdi Pachuau

 ☆ONE-SIDED-LOVE☆

By Dingdi Pachuau

      

Hun hi a va kal chak tak êm!! Mahse, nimina thil thleng ang maiin a la chiang êm êm vek si. Engtikah tak nghilhni awm ve ang che i maw...😔 He thu ka type mawlh mawlh lai ngei pawh hian ka suangtuah chein ka  mitthlaah khâng hun liam tawh zawng zawng kha nimin lawk ang maiin a la chiang asin. Engtin nge ka mitthlaa i hmel hi ka nawh reh theih tehlul ang??? Ni lo, nawh reh che hi ka duh ngai lo ang.

    

Kan inhriat țan dàn kha...Cl- xii zir tùrin hmunpui lam ka țhiannu nèn kan rawn pan a, khatih lai khân ka nun leh ka khawvel  min her danglamsaktu tùr ka tawng ang che tih rêng ka hre lo. Class țan ni kha chuan ka la hre lo che, a chhan chu hmeichhe zakzum tak ka ni tih i hriat kha...ka hawi sawn ngam lo tlat a. Sir David-a'n introduction min neihtir ațang khan ka țhiannu nèn chauh hmel thar kan ni tih erawh ka hre thei. Midangho kha chu in lo inhre sa vek a, class khat kha țhianzaho ang maiin in lo awm a ni.

Uniform kameez  vâr leh kekawr dum leh i bag dum, i ngainat êm êm nèn class-a i lo lut ka hmuh hmasak ber țum che khân...khatih laia ka awm dan kha tûn hnua ka ngaihtuah pawh hian ka inhre thiam lo. Ka thinlung kawngka hi i rawn hawng chiang êm êm a ni tih erawh ka hre nghâl..Story hrang hrang, novel, a...engkim mai lehkhabuah  ka lo chhiarin TV lamah pawh Romantic films pawh ka lo en ve nasa tawh. M&B lehkhabua mipate pawh ka lo dream ve nasa țhin; mahse, anni lakah chuan i dang hlak! Ka duhthusàm ka lo suangtuah ve țhin ang lah i ni hek lo. Ka duhthusàm ka lo suangtuah ve țhin mipa ni ngai lo tân ka thinlung chu a inhawng nghâl si chu a nih kha.

    

I mitmeng thûk deuh raih mai, fiah zet leh mawi zet maia min rawn en lêt  zet kha chu...ka awm dàn zawng zawng ka theihnghilh vek a nih kha. Mipa hi ka melh khât khawp asin, ngaihzâwng lek phei chu ka nei ngai lo. Ka duh lo a, mamawh lah ka inti hek lo. Mizo mipaah hian duh ka neih theih pawh ka ring ngai miah lo bawk; mahse, ka rinna lo dik lohzia chu nangmah ngei khân min hriattîr chiang ta ngang mai!

     

Ka en rei ngam lo che. Chhûngrilah ka khùr, ka thin a phu nasa lutuk bawk. Ka awm dàn ang khân tûn hnu hian ka awm leh tawh ngai lo. Khata țang khan ka vei țan che a, ka rilru ngaihtuahnaah hian bu i khuar nghâl chat a ni. Ka duh ngai loh leh ka suangtuah chhin ngai loh chu ka chungah a lo thleng ta si, vei neih hi ka duh ngai lo, vei ka nei a nih chuan eng dang mah ka ngaihtuahnaah a leng ngai lo, ka vei ngut ngut țhìn. Ngaihzâwng neih ka duh lohna chhan pawh hei vàng hi a ni, ka vei che a nih chuan ka zirlaiah ka tlâkchhiat phah dâwn tih ka hre sa vek.

Mahse, engtin nge ka tih chuan ang?

   

Nangmah vàngin Class kal kha nuam ka ti a, ka hreh bawk. Hmuh reng che ka châk asin; mahse, hmuh che ka châk rualin ka huphurh bawk. Ka rilru leh ngaihtuahna zawng zawng  hi chu i nei vek chiang alawm;mahse,  i hre miah lo tiraw? Ka hmuh apiang chea ka thinphu danglam ziah leh ena hmuh duh êm êm chung chea ka en ngam miah loh țhin che pawh kha i hre loin ka ring.

   

Kan section 'E' kha zirlai 70 chuang kan awm avàng khân țhutna in-rotate a ngaih țhin kha i la hria em? Kan țhutna a inhnaih hun kha chuan nuam ka ti thei țhin asin aw..!A rei ve deuh hnuah phei kha chuan nang pawhin min biain min fiam ve zoh zoh tawh a; mahse, ka rilru chu i hre chuang lo tiraw? Min hre chhuak ang tih ka hlauh theihzia tak kha...

   

Break laiin classroom-ah i rawn lut a, ka hma chiaha țhu Nuni note copy lai i rawn tibuai a. En miah lo che mah ila, ka hmu vek che. Zàwi tê têa biain i rawn tibuai a nih kha. In inkàwm ngeihin in innêl êm êm a, i tihbuai luih tlat avàng khân ani thinrim chuan a vìn che a, nang i lo nui mai mai thung a. Chutah ka lam rawn hawiin,"Matluang, hei Thanpuia hian a duh che a nih chu. 'Min lo biak rawh' a ti," a ti a nih kha. Kei lah ka lo zak a, lài êm êmin ka lo nui ringawt a! Chutah, ka rawn en che a, nang pawhin thutak zetin min lo en ve reng a, i nui miah lo. Khatih laia ka thinlung hlim sizia leh laih sizia kha! Chutah, chana mûm pack ngei mai kha dawhkàn chunga dahin i chhuak ta daih a, khata țang khân chana mûm hi ka ngaina ta hlauh.

   

I bag ngainat êm êmah rawng vârin, i band ngainat êm êm hming 'PETRA'  i ziak a nih kha. Petra chu tute nge, eng nge an nih tih pawh ka hre lo; mahse, nangmah vàngin ka hre ve ta chauh, ka ngainat phah ve ringawt bawk.

   

Hawklak rual i ni a, mahse chtiang chuan i awm ngai miah si lo. Harhvâng tak chu i ni, i pa i chhùn a, che vat vat țhin i ni bawk. Chuan, i nu i chhùn a, i ngo fai vang bawk. I sam buang thar, nĕl thap, gel hmanga duh taka i siam sa khawihsak i huat theihziate kha, ka la theihnghilh lo asin.

  

Kan sport lai mawlh kha, kha hun kha ka tân a hlut êm avàngin ka theihnghilh thei tawh lo vang. Red house kan ni a, football -ah final kan lût a,nisa hnuaiah kan house țanin ka au nasa a nih kha tiraw? Țhiante kâr ațangin min lo en reng tih ka hmuh kha chuan ka au kha, lài zetin ka tàwp ta chawt a nih kha. A hnuah ka hnung lam ațangin min rawn kuah a, ka kokia i khabe nghatin inkhèl kha i thlir ta a, kei chuan inkhèl kha ka ngaihtuah thei tawh lo, ka bulah ka taksa nghèngin i rawn ding miau si. Ka thin phu nasa lutuk leh ka hlim bawk si, chhûngril lam țang țùng erawh kha chu i hriat loh hrãm ka beisei. I hre lo tiraw?

   

Engkim kha chiang takin ka la hre vek a ni. Min haw lo tih chu ka hria. Mi â nilêng lo tân chuan min haw bîk lotute hi chu a hriat ve theih asin, țawngkain sawi miah lo mah la, i awm dàn leh mitmeng ațang khân ka hre ve thei tlat a ni.Ka awm dàn ațang khân ka rilru i hriat ka ring țhìn a; mahse, hriat a lo har deuh pawh a ni maithei, ka țhiannu  ber pawh khân min hriatpui lo tlat! Mahse, dik tak chuan, ka inthup nasa ve êm bawk a ni.

   

Ka hmu châk thei che a nia aw..!! Mahse, hmuh che ka hlau tho bawk si. In dàwr ka kal pelh dâwn apiangin i lo awm ka hlau lutuk hi ka țang țùng ziah, hmu châk êm êm chein, huphurh si, helhhawlh, phûr tak siin ka awm țhin. Kum tàwp lamah erawh kan class-a mi Ruatsangi  nèn in lo inkawp reng a ni tih Mami'n min hrilh ta a. Khatih laia ka rilru natzia leh keimah ka inkhawngaihzia kha, exam pawh ka tichhe ta rêng a, ka pass chang chang chauh a ni. Ka lo vei ve ringawt che kha keima thiam loh liau liau a nia, ka mawhpuh ngai hauh lo che aw.

     

College kan luh hnuah pawh keimaha i thawh dàn chu a ngai reng zêl a ni. Bialnu dang i nei leh tawh a, Zemabawk lam mi a nih nghe nghe kha. Rilru na takin, i thlah tùr bus-a i vai liam ţhìn kha ka thlîr ru țhin che asin. I bialnu bialpa ,US-a awm  birthday present tur pawh in thawn dùn nghe nghe tih ka hria, engtin nge ka hriat tih min zâwt suh, i chanchin engkim kha ka lo hre ve vek zel a ni. I bialnu, bialpa nei lai ngei mai pawh i hnâwl phal lo kha, ka khawngaih lutuk che. I khawvelah khân pàr vulsak thei che ila ka duh takzet țhìn; mahse, kei chu,  i mamawh ber ka ni lo tih ka inhre ve reng bawk si .Mittui tla zawih zawih chunga i tân ka țawngțai nasat theihzia pawh kha i hre kher lo ang.

    

I thlalâk ka la kawl ve ràn asin. Ka en ka en țhin, tûn hnu thleng pawh hian. T-shirt vâr leh half pants dum hain Chapal dum i bun a, i țhianpa Jeffrey-a nèn in lâk dunna a ni nghe nghe; mahse, Jeffrey-a thlâ chu ka chep thla daih, ka album-ah i thlalâk chu ka la zep ve reng aw.

   

Tûn hnua ka hmuh châng che pawh hian ka thinlung, ka lungphu leh ka thisen kal dàn hi a la normal thei lo asin, hmuh châk êm êm chein hmu ngam si lo chein ka awm, ka awm dàn hi i hria ang tih ka la hlau fan țhìn.

    

Nupui atân i hmangaih leh nangmah hmangaih êm êmtu nei turin ka duhsak che a, i nei ta rêng bawk tih fb ațangin ka hria a, in thlalâkte pawh ka lo hmu e. I nupui kha hmeichhe vànnei tak a ni, keiin ka hmuha ka khawih phâk loh chu a neiin dam chhûng atân a vuan ta si che a, nupa hlim tak, chhûngkaw hlim tak ni ang che u. I birthday 25th September lo thlen apiangin i tân liau liau ka țawngțai țhìn. Engkimah, a țha lam ka duhsak vek che a, hrisêl taka dam reng tùrin ka duhsak êm êm che a ni.

   

Ka theihnghilh ngai lo ang che. A chhan chu ka hmangaih leh duh hmasak ber kha i ni  tlat. Ka thinlung kawngkhàr hi tu tân mah ka hawng leh thei tawh lo, tûn thleng hian. He khawvêl dam chhûnga chhàn lêt ve ngai loh tùr ka hmangaihna che hi kei chuan ka la lungàwipui zêl mai zawng a nih hi.

    

A tàwp  ber atân, Ka hmangaih che. I tân pâr vul lo mah ila, ka theihnghilh ngai lo ang che, ka thinlungah i hming hi nem kai a nih tlat tawh avàngin. Ni 2 mi-a ka lo piang erawh ka tân vànduaina a lo ni e.😔

*HLIMNA LEH LUNGAWINA HI KAN THIL NEIHAH A LO AWM HAUH LO, KAN THINLUNGAH DAIH A LO AWM!*

(A va rei ve tawh tak! Ka ziah hmasak ber kha a ni ve a, a pawr deuh lai nia ka hriat ka rawn chûl mâm ve deuh bawk😊)