☆TLUANGI☆ By Dingdi Pachuau

 ☆TLUANGI☆ - By Dingdi Pachuau

A dàr chen lekin a sam chu a tan rual hmarh a, a ngíl siau bawk. A mit meng fiah kâk mai chuan a mitmu uk kharh mai chu a tilang chiang hle a; a hnar ngul sâng vah mai te, a khabe phir tai mai leh a hmui fawh châkawm tâwk leka chhah tap mai te chuan ka mit a la-in ka lo en leh veng veng thin a, a hmui chung chiaha khuavang te reuh tê, dum fiah zet mai pawh ka hmuh hmaih ngai lo. Kan mit a intawng a, a nui saih a; lài zetin ka hawi sawn vat a, a bulah chuan mipa hi a lo va pà lo țhìn tak ém!!!

"Uii.!! Ka theihnghilh tep! Hei en teh, Singam, ka thil dawn hi, ka va'n lãwm tak! Khawvela present zawng zawnga ka duh ber a nih hi," phûr zeta țawng pahin ka lamah a rawn zuang phei tawr tawr a; a Bible dawn chu chhuang zetin a lek vá vá a, a hmelah chuan a hlim tak zet tih ka hmu. Mize thawveng zet a nei a, kawng tam takah ka aia a rilru a puitlin rualin a naupan chhiatna erawh a lang leh fo țhìn.

"A va'n țha ve," ka ti tãwi tak a.

"Țha e. Ka bialpa hi chuan thil min pek tur hi chu a hria asin aw, ti raw?" Min en chuang loin a Bible ken chu lungawi tih hriat zetin a en vawng vawng a ; a nui hmêl pawh a la reh lo. Kei, mipa pawha inla pà ve tâwk tak hi min va'n titlâwm vawng vawng tak ém!

Kum 30 chuang zeta upa tlangval inring tâwk zet ka ni a, țhenrual ngaina mi tak ka ni.Ka pualin sumdawnna Hyundai Car showroom ka nei a, ka buai ve thei viau. Kohhran leh khawtlangah pawh a mawi tâwkin ka tel ve thin. Unau pathum kan ni a, u mipa leh nau hmeichhia ka nei a; a mi lai ka ni. Ka nu hian cancer avangin min boralsan tawh a, ka pa hian min la dampui a, ka u nèn kan chhungkaw sumdawnna an enkawl thung.

Ka hmuh hmasak berna chu kan Biak Inah a ni. Crop top dum leh vara țial a ha a, puan orange colour a bih a; pheikhawk sâng zet a bun bawk. Nula tê tak a ni lo a, ria chum bat a tih theih ang. A ngo viau lo a, hàng tia sawi tur pawh a ni chuang lo; ngaihno bei zet a ni tawp mai, a zuna uai a nat ka'n ring nghal ngawt pek a! Kâr khat pawh a ral lo, ngaihven zawng tak chanchin chu ka hre fai leh kelh. Lunglei khua an ni a, a naute pahnih nèn kan vêngah mi in hnuai luahin an rawn awm thar a; a naute lehkha zir enkawlin amahin puan a țhui a, ka mi ngaih sàn zâwng tak a ni leh mauh mai.

"Lo lut rawh u," titu aw chu amah a ni. Ka thiante pahnih nèn kan leng lût ve rãwih a. Lût tùrin min sâwm a, an sitting room zîm zetah chuan țhutna min kawh hmuh bawk. A phone a khàl niap niap a,a zah hmèl hle bawk. Kan titi a, a mawi tawkin min zawm ve zeuh zeuh, a țawng tam vak lo a nih hmèl. Kan fiamthu thawhte chu a nuihpui ve a, a mawi tâwk lekin. A nui sen sen hmel kha a va'n duhawm tehreng em! Nitina a hmel hmuh loh chuan kei tlangvala pumpa hi ka za zek zel a,zan tin kan lêng lut tehreng a nih kha. Thla a ral meuh chuan rei tak lo inkawm tawh țhin ang maiin kan zingah khan a awm thiam ve a, a duhawmna erawh a la ngai reng.

"'Hruaia chuan a vêng rùn a, mi dang tân a kawm ve theih loh' an ti a nia," kan KTP hnatlánnaah kan hruaitu pakhat chuan mei nei zetin a ti pek a. Ka bulah a țhu ve kar a, ani chu a nui leh mai.

"Nah. A awihawm loh," ka lo ti vat.

"A ni deuh a ni ang, in inzui nasa em mai," a la ti ta deuh deuh. Tlangval zak lo thei deuh kha amah avângin ka zak ru leh chem chem pek. Dâwt chu ni se, ka zak viau paw'n ka inring lo, thu dik a ni miau sia. He nula kum 22 mi lek, ka aia kum 8 zeta naupang hi tlangval dangin min neih khalh ka hlau em a, a bula awm reng mai ka duh reng a. Inkhâwm leh hnatlangte, khawhar in kalna thleng khan a tel ve dawn chuan peih lo tak chung pawn ka phûr leh viau a, ka zui leh láwp láwp țhin. A zùna ka uai nasatzia hi mi zawng zawngin an hre hial ang, amah tih loh hi chuan!

'Zanin chu ka hrilh tawh ngei ngei ang' tia inngaihtuah chungin an in lam ka pan leh a. An kawngka ka kik dawn chuan thawk ka la kawk kawk a, 'Zam suh, mipa i nih kha' tiin ka infuih mawlh mawlh bawk. Ka tleirawl țha leh ni maiin ka inhria, innuihzat zet chungin kawngka chu ka kik kharh kharh a; amah ngeiin kawngka min hawn a, a khêk leh raih a.

"Singam, lo lut vat teh. Inhmelhriattir tùr che ka nei," phûr zetin a ti a. In chhûngah ka zui lut a, mipa pakhat keimah ang rual vel tur hi an țhutthlengah a lo thu a. "Mam, hei ka thianpa Hruaia; chuan Hruaia, hei ka bialpa Mama," a nui var var a.

Lài zetin ka ding a, ka kuhva ei lai ka hâk a, balcony-ah ka chhuak vat. Hmanhmawh zetin min zui chhuak a,ka hnung a chùm hrep zui. Aw... mipa hi ka va'n lo nêp tak em! Ka hmai ka tuai puat a, in chhungah ka lut leh a; a bialpa chu ka be khawmawi ve a, rei awmna chi nia ka hriat loh avangin ka chhuak leh vat. Tlâwmna leh thikna leh thinrimna inchawhpawlh nasa lutuk avangin ka car chhunga ka luh velah a steering chu ka chum pawp pawp a, chak zetin khaw pâwnah ka inkhalh chhuak nghal.Zu hmanga ka thinrim hrikthlak ka duh viau naa, ka ti leh lo. Ka tawngtai tawp, ka tã a nih ngei theih nan ka dil a, Pathian ka vau pawh a ni mah zawk.

"T.Shirt thar ka nei a," tih caption-a hmanga ka t.shirt, an ina lèn chhuanlama hman nana ka siamtir hain kan țhianho whatsapp group-ah a thlalak a lo post pek a. Ka phu deuh zuk a, ka nui var var. A inhmehzia mai chu!! A hnutein a do pãwng lah mai te kha hmuh a va'n nuam tak. Ka en nawn deuh chhên.

"I va'n zak lo tak! Tui lumin sù ang che," te chu ka'n ti ve a. A su tak tak ang tih erawh ka hlau. Keimah paw'n ka su mai mai lo tawp ang. A rim tui chêk mai kha ka kawrah khan nam chem chem se tiin duhthu ka lo sãm daih pek a.

"Ka thawmhnaw hi min sûk ve zawk teh. Ka buai em hi," a la rawn ti deuh deuh.Thawmhnaw su hman lo khawpin a che fel lo lem lo tih ka hria. A che fel mah mah zawk. An bungbel neih ang ang fai takin a enkawl a, a inluah pawh fai takin a enkawl. Sawiselna lai tur ka hmu ngai lo. A nihna takah chuan ni tin a thawmhnaw sûksak pawh pawi ka ti lo khawp ang. Chuti ang mizia chu a pu si lo.

"Mahni thawmhnaw pawh ka su țâwk a," ka rilru lo puiin ka chhâng leh ta hrãm a.

Thla ruk lai a liam leh tawh, a bialpa pawh ka hmu leh ta ngai lo a; a chanchin a sawi pawh ka hre leh tawh lo hrim hrim zawk. Amahah chuan thil danglam thleng awmin ka hmu lo, a hlim ngaiin a hlim reng a, phûr takin engkim a ti vek a, a mit khur erawh a tla ve deuh.

"Tluangi hospitalah a awm a," kan inkhawm bâng a țhiannuin a lo ti vat a. Hmanhmawh zetin hospitalah kan tlân a, a mit meng a phelh phang a, ka hlauhthawn ang ai chuan a zia phian a; hlim hmel deuhin kan bulah chuan a awm leh mai.

Kâr a liam a, hospital ațangin a chhuak tawh a. Thla a liam a, inah a khumah a mu reng a; a tho chhuak ngai lo. A taksa chu a dâng bel a, ni lo, mitthi tùr ang maiin a duk vek zawk. Thil ei țha lo tih hriat zetin a chêr kuam a, a țawng țha peih lo a; a nui tawh ngai hek lo. Tu mah min be țha peih lo a, amaha awm a duh thu a sawi fo țhin. Pawh ngam loh khawp khan a țhiante lakah a inkhãr a, a duh zawng a nih chuan tiin kei Vallungmawla hian harsa ti zetin ka thlahthlam a.A dam theih nâna Pathian ka dil nasatzia chu ka hun tawn tawh zawng zawnga ka țawngțai nasat ber a ni hial ang.

"Hruaia, ka lo lêng dawn nia." A message ka dawng hlawl. Makti zetin ka en a, ka en nawn leh thin. Lêng tùrin ka sâwm fo a, a duh ngai lo; kan inbiak lohna pawh thla tam fe a liam leh tawh.

"Aw, ka lo hruai ang che," phûr fein ka reply nghal vat.

Ka room-ah kan awm a, hna hmanhmawhthlak ka neih avangin ka khumah laptop hmangin hna ka thawk a. Ani chu ka hnathawhna dawhkana a ke hlângin, chair-ah a thu a; ka phone hmangin a lo in-selfie char char.

"Singam?"

"Tikhan min ti ve ziah suh."

"I inhmeh em alawm," a nui har har a. "Hruai-singam," a ti leh ngat.

"Nang pawh i ni ve tho, Tluang-singam."

"Hruai, en teh, ka chèr tawhzia hi, ka há te hi kuh vek, ka dum vek bawk si," a ti niah niah a.

"I țha chho leh mai ang," ka ti liam puat. Ka rilru chuan 'ka tan chuan i la țha ber reng asin' ka ti mawlh mawlh a.

"Ka ning tawh ee..haw ka duh tawh," a ti leh niah niah a. Ka hna laklawh lutuk avangin ka la kal chhuak thei lo. Bâkah, ka bulah ka room-ah la awm se ka duh. In hnuaiah chhukin ei tur ka laksak a; dawhkanah chuan ka chhawp a, ka hna ka chhun zawm mawlh mawlh.

"Ka mut a chhuak e..ka haw duh tawh," a ti leh a.

"Khumah hian lo mu lawk la, tah khan ka lo awm ang," ka ti leh hram.

"Mi ina muthilh ka duh lo," a ti leh mauh mai. Ka tho a, a țhutna revolving chair chu banin ka room kil khata desktop computer lamah ka nawr a, movie en tur ka hmeh chhuahsak a. Ka hnathawhna lamah ka kal sawn leh vat.

"Singam, ka haw duh," naupang chhia zetin minute sawm pawh ral lovah a ti leh a. Chhaih kawlh ka châk riau pek a, ka guitar chu lain ngai pawimawh lo zetin ka perh a, "All of me" ka sak zawm zat. A maimitchhing diar diar a, vawilehkhatah a beng a hup a, " Khatiang hla kha ka ngai thla duh lo," a ti vin țhak. Makti zetin ka en hú a, chutah, a insiam rem ta vat a, "Ka thiam ve lo a, kan zài dawn chuan Kristian hlabua mi kha sa ang." A nui leh var var tawh.

"Eng hla?"

"Kha...englo kha..lãr deuh kha?"

" Hla lãr a tam e,"

"150-na kha..ih..ih..ka theihnghilh lawk"

"Khawvel hi bo mahse,"

"Aw.. chu chu..,"a bân a phar leh hliai a.Uluk zetin ka zai a, ka zai min rawn zawm ve chu a zai lài lutuk a, ka guitar play titawp vat pahin, beidawng zet hian ka en a.

"A key mil te'n zai ve la,"

"A mil lo mi?" tiin a nui uar uar a, a hnuah,"Min ning tawh em?" a ti leh  nghâl zat a.

"Ka sawi chuan i lo leng duh tawh lo ang," ka ti leh kher pek a! A tûm ta hmuk mai. "Ka haw dawn," tih leh a țhutna ațanga thawh a rual a, ka room kawngkhàr inkhãr ri burin a zui nghâl bawk.

Ka passenger seat-ah a țhu tûm bûr a,a thinrim paw'n a lo hmelțha tho mai. A lungawi loh avânga a hmui pawrh târhah chuan fawh ka châk tak zet. Ti lo turin ka insûm hrãm hrãm a ni ber.

"Tluangi,"

Min chhâng lo.

"Ka fiamthu a nih kha,ka tihpalh,"

Min chhâng chuang lo. An kawt kan thleng a, rang zetin a chhuk a, ring zetin ka car kawgkhar chu a khãr ri bur a, a nui ver ver a," Ka titau der a nih kha,"an in lam panin rang zetin a tlãn thla nghal a. Rilru mangang leh hrehawm zetin min siam te te a, chimawm lutuk mai.

Zan khat chu a scooty khalh zir turin kan inphur chhuak a. Țhian kawm thiam tak a ni a, a țhian țhenkhatte'n an lo zirtir tawh a, a khalh ve thei sawlh sawlh tawh. A hnungah ka țhu zân a, muang theihtàwpin a tlãn ta emaw tih mai turin a khalh muang pek a, minute 20 vel leka ka tlàn theihna turah darkar khat dawn kan tlan a. Hun rei tak ni mah se, ka tân khan a va rei lo em! A hnunga kuah mai lo tura ka insum nasatzia kha! Ka rilru hre ve lo niàwm takin a țawng leh par par a, a nui leh har har tawh bawk.

"Thil sawipui che ka duh a," a ti thut a, a aw-ah chuan a thu tak hle tih ka hria, ka thin a phu dup dup leh pek. "Tinge mi rilru nâa i siam?" A scooty-ah a țhu a; a hmaah ka ding a, a mit meng lian kel kawl tak mai chuan min melh kal bawk.

" Ka va hrethiam lo." Nuam ka ti lo tak zet, leh lam ka hawi ta daih a.

"I duh leh tak tak loh tur chu beiseina siam loh tur che alawm, ka hre vek. Ka hre lo der a nih kha, vawikhatmah tikhan awm tawh suh," a ti hmarh hmarh a. A thinrim tih a hmelah ka hmu, lai zetin ka ding a, ka nui put put a. Engmah lah a hre der si lo. Amah avanga a kuma kum dawn hmeichhia dang ka biak tawh lohzia te hi. Amah avanga a țhian pakhat ka kawm thin nen kan inbia kan lo kal thui deuh pek a, a lo hria a ni awm e. Hmeichhia tak hi chu aw!!

" A serious a nia,i thil tih sual chu siam țha leh rawh,"a ti hmuk a, chutah, "Haw ang" a tih zawm leh zat bawk. Biak leh chakawm loh khawp chuan a thinrim a,a thiannu a țan vang a ni tih ka hria. Chuvang ringawt chuan a țhiannu chu biak țhat leh ka tum hauh lo, rilru nâ inthawi dam nan kan inbia tih kan pahnih khan kan hre ve ve. A bialpa nena an ințhen lai a nih vang leh amah zit zet hian ngaihzawng a neih avangin. Rilru kan intihnatsak thui hmaa kalsan kha ka tum a, a serious pawh ka la ring chuang lo.

Tluangi nèn chuan thla tam kan inbe leh tawh lo. Min be duh lo miau a, biak luih ka tum bik lo, a thin ka tihrim lehzual ka hlau a ni. A duh lohnaa nawr luih chi a ni miau lo a. A thinrim reh hunah min be leh mai dawn tih ka hria. Tun țum zet chu ka rin phak bakin a thinrim rei reuh a. A tawp a tawpah a message ka dawng ta hlawl mai.

" Ka lo râl ang che. Coins ka ngah mai."

Ka nui hak a. Ka hre thiam, a țhiannu kha an ru daih tak alawm maw le! Min biak leh tak avanga ka phurzia chuh!

"Ka lo phei dawn." Ka reply vat a. An in lam panin ka inkhalh chhuak nghal.

" I rilru a na em?" a ti sep a. Lainat hmel zetin min en pek a, ka na hauh si lo, ka hlim veng veng zawk a ni si. Min biak leh theih nana thil eng emaw tal ti tura Pathianin ka țawngțai a chhànna niin ka ngai daih thung

"Ka tlàn tauhna a nih kha," ka nui sak a. " Eng mah i hre thiam si lo a, ka thinrimin ka tlan tau a nih kha,"

" Enge a awmzia?"a ti hu lehpek.

"I mãwl em alawm. Ngaihsak ve deuh rawh tih mai hi i chakawm thin. Ka duh țhinzia che kha i hria em, Eki?" ka ti chhuak ve hrãwk a.

" I sawi si lo a," a'n ti leh hrãm a.

" Khum betin bialpa i țhen a, i ngaihsak ta si lo alawm," ka lo ti thung a, ka ngawi leh daih.

"Chuan, tunah pawh min la hrilh dawn chuang lo maw?" Beidawn hmel zeta ka mita en kalh chungin a ti a. Ka harh chhuak thut.

" I duhawmzia hi," a biangah ka piai a.

"Chu chauh chu maw?" A hmui a tipawrh leh tarh tawh.

"Tluangi, ka hmangaih che," ka ti ta sup a. A nui a, rang zeta thoin, ka mal chungah a rawn țhu a,a mal pahnih chuan min rawn kâr cheh ta, ka hmuiah a hmui a rawn chuk tuah a, min fâwp ta vawng vawng.

"Hmela, i sawi har ka tih tawhzia hi, nêp lutuk mai!" a ti sep a, a nui ver ver pah bawk a. A khabe phîr țhâihah chuan ka dawm a, duhthawh zetin a hmuiah ka fâwp ta vawng vawng a.

Kum 34 ka tlin meuh chuan ka lài chhe ta em em lo e. Ani erawh tleirawl thar ang mai a ni thung a; a lài ta em em zel a, a sen țâwn țâwn zel mai. Kum 4 hnuah zet chuan ka țawngțai chhànna chu ka hmu ts. Dawhtheihna hi a lo va pawimawh em!!

A.N : Vawiin 22nd June 2018 (Friday) hi țhian kawm nuam leh hlim thei, engtiklai pawha nuih inpeih reng mai, hmelțha, khal leh duhawmnaa khat, luck em em bawk V.ZIRHRUAITLUANGI (Matluangi) birthday a ni a, a birthday lawmpui nan he short story hi ka hlân e. MATLUANG, i birthday ka lawmpui che a, hlim deuhin hmang ang che. Ngal fimin dam la, i hmalam hun atán duhsakna țha ber ka hlân a che. HAPPY BIRTHDAY & STAY BLESSED..LOVE YOU