☆13TH MAY☆ - 17 - 24 By Dingdi Pachuau

 ☆13TH MAY☆ - 17 By Dingdi Pachuau

Ka mut hmunah chuan zanin kan hun hman tâk kha ka ngaihtuah lêt a, ka ngaihtuah zawng ringawt pawhin ka hmai a la sa hut hut mai, ka va insûm thei lo tak!

Liansanga bulah hian engati nge ka insùm theih loh țhin le? Tàwp hmasa tùr zawk ka nih țhin nèn, ka dik lo zo vek tawh, amah mamawh lutuka min siam dàn a thiam tlat, zanin ang te kha...

A hnute hmùr te reuh tê chu ka hmehsak niap niap a, ka kâwng achin chung lamah chuan thawmhnaw hmuh tùr a awm tawh lo, ani pawh a kut a chàwl bîk lo, khawih lai tùr a hre chat chat khawp mai. Hah vàng leh hrehawm tih vàng ni hauh lovin ka thaw sek sek a, ka hnâr hmangin ka thàw pawhin ka hre lo.

Ka âwmbâwr khàlin a tuai nak nak reng a, a châng leh a fâwp thùl. Ka la tawn ngai loh a nih vàngin nuamti zet hian ka dawh hârh hârh reng a, a samah ka lo țhâm ve nar nar a. A fawh paha na lo tê a a'n seh deuh nar nar phei chuan ka țê țhat ţhat a, insùm chu khawilam, hmabâk lehzel thlen châknain min bual khat vek.

Kei pawhin a taksa ka tawh theih lai lai chu tawkin ka chûl ruai a, a dul sek deuh țang chu chûl thlain a aia hnuai chùl thlâk ka tum lai tak chuan ka kut a man ta chat a...

"Chetsual i duh loh chuan tàwp nghal rawh!"

Ka puan sin lai chuan ka inlukhup a, ka zak lutuk chuan ka lei ka chhuah vak vak ringawt, a sâwt dér si lo. A va hahthlâk țhìn tak! Chetsual ka duh loh thu ka hrilh a;mahse, insùm ka tum miah si lo. Ka thianghlimna vawn him ka duh a; mahse, a vawng him tùr zawngin ka khawsa miah si lo. Ka thianghlimna lo hloh ta ila, dem tùr tunge? Keimah. A vawng himtu tùr chu keimah, ka vawn him loh chuan dem tùr pawh keimah tho.

Engtin nge min hmuh ang aw? A rûk tak chuan min hmu nikhua lo ngawtin ka ring deuh. Min duh thu min hrilh ațangin zan hnihna chauh a la ni a, vawi hnih lai ka insùm thei lo leh hman tawh a nia, a zahthlâk lutuk ringawt. 'Mipa an insûm thei lo' ka ti ve ringawt a, keimah hmeichhia ngei zawk hi a ni insûm thei lo chu. Ani kha rawn țawng chhuak lo phei se chuan... Hmuh pawh a huphurhawm tawh zawk alawm le.

Zînga min rawn biak pawhin ka be huphurh zo vek, hrehawm ti ru țûnin ka bia a, Assembly-ah pawh ka melh țha ngam lo. Ka awm dàn kha a zahthlâk ve ém asin, ka âwmbâwr zawng zawng hnai zetah a hmu vek tawh bawk si, chutah, khap ngai khawpin ka la mamawh ém ém zui.

Tlaiah ka zui haw tawh lo, ka zak tawh. Hun fâl neih dun tam vak loh hi a ziain ka ring, min tawh hlekin ka danglam zel si.

Zanriah ka ei hma deuhin Angaihi'n min rawn phone a, ka biak khàtzia ka ngaihtuah chhuak a, ka inthiam lo lek lek mai.

"Induhnu..." a rawn ti ta chiah a.

"Nang pawh i induh ve tho."

"Chutia bialpa thar nei tih vàng maia inlâk reh viau chu, a fuh àwm cher cher hle mai ka ti!" tiin a rawn nui hak hak a.

Ka meng phar âk a, Liansanga nèn kan inzui tih hi a lo hria a ni ngei ang, engtin nge a hriat le?!

"Tu chu maw?!!" ka'n ti ve ngial a.

"Bangalore lamah khiang min awihsan zawngin a reh ngawt ang!"

Chhantea a ni maw min dem hi. A va màwl theih tak! Chhantea ka lo hre chhuak lo rêng rêng nia. Liansanga emaw min sawi chhan ka lo ti ve char char a, fuh lo thei e.

"Min la be lo hrim hrim."

"A buai lutuk a, nichîn deuh khân min rawn bia a, i number min dîl alawm, i number a neih kha a lo dik lo va."

"A nih mai mai chu a." Sawi tùr ka vàn.

"A bêm che chuan duh ngei ngei rawh aw."

Leh ringawt. Bialpa ka nei tawh reng alawm, kawp ka duh lo. Liansanga hi ka duhna a rei tawh a, min duh ve hnu phei hi chuan ani aia thlan tùr ka hre teuh lo, ka duh bur.

"Zanin chu lo lêng la? Thil hrilh tùr che ka nei a nia." Liansanga a lo lêng ang em? Lêng maithei, chuti an inhmu dùn ve tawh mai ang chu.

"Sawi tlâi thei é, prigramme ka nei tawh. Naktûk zànah ti mai ila?"

"A pawi chuang lo, i hre har deuh dáwn a ni mai a."

"Tihian, sawi mai la, ka hre châkkkk."

"Châk kha a tâwk."

"I va sual tak!"

"Nang i fel thung alawm."

A nui awr awr a," Naktûk zànah a siruk làin ka lo thawk chhuak ang," a ti a, kan duhtâwk ta rih a.

Zanriah ei khamah chuan Liansanga  a lo lèn ka ring deuh a nia, a lo lêng miah lo. Ka nghâk ru deuh reng a, ka phone a rawn rîk pawh chuan phûr ru hle mah ila ka titau rilru deuh a; mahse, number chauh a ni.

"Hello?"

"Tete, Chhantea ka nia, i dam maw?"

Kan inbe rei ta hrep mai. Fiamthu thawhin a rawn nui leh hak hak a, min bêm tum leh min duh tùr ang hawi zawng pawhin min be lo, țhian kan bia ang chiah hian min bia.

Kan inbe rei lutuk a, ka battery a low vêl.  Kan inbe tàwp deuh chiah tihah ka phone chu a thi ta daih a, ka charge ta chûk chûk a, ka nuih a tiza mai mai, a hnuah naupang test paper ka check ta vêl mai mai.

Dâr 8:30 vêlah ka kawngka a rawn ri karh karh a, makti rilru deuhin," Lo lût rawh," ka ti, tu tak ni ang maw? Rinawma a nih loh hrâm ka beisei.

"Engati nge ka phone tlang theih loh che?"

Nghâl tâwng mai a.

Min rawn en ngar  mai a, a sam chu a thur siang bawk nèn, a lang hlauhawm thei lek lek dáwn alawm le.

"Hei, a low lutuk a, a thi daih alawm," tiin phone chu ka melh zauh a.

"Phone ka tum lai che chuan 'busy' a tih si?"

"Mi dang min rawn phone lai kha a nih dáwn chu."

"Tuin nge rawn phone che?"

Va dîlchhût mai mai tak!

"Chhantea maw le."

"Chu chu?"

"Țhian mai mai."

"Tak tak?"

"Aw."

"Min tingaihțha lo hman alawm."

"Engati maw?"

"A busy hnuah switch-off a ti leh daih a, min be duh lo a niang ka ti. Vawiinah pawh min en țha duh tawh lo va, eng nge a chhan le?" tiin min hmachhawn chiah chuan dawhkàn chungah chuan a rawn țhu a.

"Chutiang engmah a awm lo." Nizàn lam thil vàng vek.

"Awm chu a awm alawm. Sawi la."

"A awm lo."

"A awm ka tih chu!"

A rawn kûn hniam a, ka lo che sawn deuh, chuti lo chu min rawn tawk dáwn chiang sia.

"Engati nge hetia i awm?" hriat thiam loh hmel deuh hian a ti nghut a, min melh char char bawk a.

"Engtin mah ka awm lo."

"Ka hriat chian tawh che hi maw. Eng thil nge thleng? Tukin ka rawn call che pawh khân i dik tawh lo."

A va hre thei pek ve.

"Keimah hi a nia," ka ti niah niah a.

"Eng maw? Sawi chiang teh."

Melh ngam lo chuan," I bula ka awm dàn hi ka zahpuiawm thei sia, min tawh hlekin ka insûm ve thei ngai si lo va, ka zak a ni," ka ti ta tawp a.

A ngawi vang vang a, min en reng tih ka hre tho; mahse, ka en ve ngam lo.

"Puii, min en teh."

Ka en nghal mai lo, a kuta ka khabea rawn vuanin amah en thei tùr chuan min kuai dâk a.

"Min en rawh le."

Ka melh chho ta a, ani pawhin min rawn en chhuk ve reng a.

"Puii, ka duh che, ka duh che a, ka mamawh bawk che. Nang pawhin min duh a, kan induh tawn a nih chuan kan inkârah inhìp tawnna a awm țhìn. Chu chu thil nih dàn phung ve rêng a ni a, zahna tùr a awm hlei nem, kan inhîp tawn lo vang tih a hlauhawm zâwk a ni."

"Mahse, kei chu ka insûm ve thei țhìn si lo va."

Ka chalah a fâwp zoh a," Kei pawh ka ni tho alawm, kan inmamawh tawn thei ém a ni. A tàwp thlenpui mai che ka duh laiin i thil sawi kha ka hre chhuak zawk zêl a, chu chuan min dang leh hrâm țhìn a ni. I la dai tlêm ém a, ka hre thiam che a ni," a ti sup sup a.

"Nizànte kha...a zahthlâk e."

"Zahthlâk lo ve, mi ang pangngai kan ni alawm."

"Nang chu i insûm thei zel a."

"I duh loh thu i sawi miau a, chu chuan min tàwptîr thei hrâm ka tih tawh kha."

"I fel bîk e."

A nui hawk a.

"I va duhawm tak ém!  Ka seh nawk nawk dáwn che emaw ni le," tiin ka biangah chuan a piai nawk nawk a.

"A naaaa!!!"

"Duhawm lutuk mai!"

Kan innghèng leh chial tawh. Intawk lova awm ka duh rih thu ka sawi ve tak nain engah mah a ngai duh lo, min kuah nghet sauh sauh zawk.

"A ho, keiin kuah reng che ka duh a nia."

Nui sak chungin a bengah ka pawhsak a, tunah chuan ka zahna leh hmuh ka hrehna kha a reh leh ta a, ka rilru pawh a zâng leh ta.

"I rawn luh țantirh khân i thinrim hmel ka ti," a khabe hmul chu ka tuaisak nauh nauh a.

"Thinrim ai mah chuan ka ngaih a țha lo zawk a, min duh leh ta lo thut a niang ka ti."

"Teuh lo!!" uar zet hian ka lo ti a.

"A nih chuan, țha deuhin min en tawh ang che. Min en țhat duh loh leh chuan i hming ka phuahsak che khân  staff zîngah ka ko tawh ang che."

"Tihchi nâng."

"Ka tâ i nih hi!"

"Ni e, nangmah pawh ka tâ i ni ve tho."

Kan inmuah leh vang vang a, rei lo tê emaw ka tih lai chuan dâr 10 a lo ri leh tawh dáwn mai.

"Ka haw tawh ang aw."

"I ngaihawm é!"

"Ka riak ve mai dáwn em niang?"

"Tihchi loh!"

A nui huk a.

"Uikawm ve siah!"

"I fel é!!"

"Ka riak ve dáwn!"

Ka nuih var var a.

"Le, haw tawh rawh le, i fel kha!"

"Ka va peih lo tak! Riah chu phal ve mai la?"

"I fel kha!"

"Khati khân min ti ziah suh."

"I fel tho tho!"

Min kuah bet a, min fâwp leh țâwk a, ka hmui hnuai lam a seh lehnghal a, nghal reuh tak a ni.

"Riah i phal loh man a nih kha!"

"A thì vaih."

"Thî lo tâwk chiah seh ka thiam alawm."

"Inla zei vêl a nih chu a!"

"Ka zei alawm!"

Confi bawk siah. A sawi dik chiah, a zei, a fel, a dik vêl vek.

"Car bul thleng min thlah la?"

"Ummm.."

"Ka ti mai mai, pâwna i lo chhuah ka phal lo, kawngka bul thleng chiah hi ka phal."

Kan inmuah leh vawng vawng phawt a, a chhuak ta nghal. Ka ruak nghal huai mai, ka khua a har nghal veng veng. A tel lova nun hman phei chu rei lo tê chauh pawh la inzui mah ila, hrehawm ka tih tùrzia ka hre thei nghal.

Mut dáwn tak takah min lo call leh a.

"Lalduhawm, min ngaihtuah chungin muhìl rawh aw."

"Loh theih nâng, Mr. Chocos."

"I kawr hâk kha hei, ka bulah ka dah a."

"Hahah, ka thîk mai ang aw..."

A nui ve hawk mai.

*MIIN AN HMUH DÀNAH CHE BUAI SUH, I NIHNA DIK TAK KHA LAN CHHUAHPUI HREH NGAI SUH*

☆13TH MAY☆ - 18 By Dingdi Pachuau

"Min hrilh daih tawh àwm che!" tiin Angaihi chuan min chhuahchhàl khar khar a.

"Kâr khat ém pawh a la ni hlei nem maw."

"Ka hmu châk, a chhe lo em? Rinawmlova nge chhe lo ang Mr. Chocos chu?"

"Ka tehkhin peih lo!"

Kan nui dùn kar kar a, a bula a hi chu a hahdam thei a nia, rilru hahna deuh neih pawhin a bula ka awm chuan a reh sawt zel.

"Zaninah a lo lêng ang em?"

"Hre lo le!"

"Hmmmmm, lo lêng se..."

"A hlau ang che!"

"Ngeiawm viau suh! Phone teh, lo lêng teh se."

Leh ringawt zel hian.

*******

LIANSANGA

~~~~~~~~~~

Aizawlah ka phei a ngai, Kima'n nupui a nei tawh dáwn. Hun lo tak a ni, naupang exam a hnai, Puii hi a lo phei ve thei pawhin ka ring lo.

Hun an sawn hma thut, A chhan chu Kima nupui tùr pa hi phaiah inentîr a ngai dáwn, a kal hma ngeia innei tùrin a ti, chutiang vel chu a nia, an ti chûk chûk a ni àwm e.

Tlaiah Puii ka hruai haw a, chanchin chu ka hrilh. Ka rin ang ngeiin, phei ve tùra ka sàwm chuan min hnial ta.

"A châkawm hle mai; mahse, duh ang angin ka awm thei lo ang. Chu, kâr khat deuhthaw hun a duh dáwn a nia, naupangho an ngaihtuahawm bâkah thawhpuite an zahawm dáwn lutuk."

"I tel lova phei chu ka hreh hle mai."

"Hreh lo ve, nang phei chu i pawimawh lutuk. Kima kawng engkimah i buaipui a ngai dáwn asin, ka rawn be țhìn dáwn che alawm."

"Kâr khat tlawng mai ka han hmu lo dáwn che a nia," tiin a kut sîn deuh reuh chu ka khalhsak nap nap a.

"Kei pawh, ka hmu lo rei dáwn che e!"

"Lo kal ve mai rawh."

"Ka thei lo tih a hre chiang bertu i ni alawm, chawlh lai chu ni se ka kal thei tùr a nia."

A tidik chiah, mi mitmei a vêng nasa thei bawk si a, school chàwl meuha kâr khat lai zin chu a duh lo chiang tih ka hria.

"Naktûkah maw phei i tum?"

"Um."

"Ka țhiannuin a hmu ve châk che asin le, i lo haw hunah a ni mai."

"Kan chanchin i hrilh maw?"

"Aw, ka hrilh har a tia, a lung a awi lo lek lek zawk maw le."

Ka nui suk a, hmeichhia hi chuan țhian an neih hian an hrilh ve zel a lo nih dáwn hi. Thurûk, mahni chauha vawn hi an nei ve ngai pawhin ka ring lo ve. An lungngaih pawhin țhiante an ngai a, an hlim pawhin țhiante tho. A nawm hmel phian ka ti.

Țhian tia sawi tùr kei chuan ka nei ve hauh lo. Ka college kalpuite chu hnam dang an nia, hostel-a ka awmpuite pawh hnam dang bawk. Cindy hlîr mai kha ka kàwm țhìn a, ani bâk mamawhin ka inhre ngai lo bawk, ka engkim a ni a, ani kha ka kawm ber leh engkim ka sawipui ve țhin ber a ni.

"Zanin chu hetah riak ve mai la, naktûk school kal ni a ni chuang si lo va."

"Min thlêm lo teh, min thlèm loh pawhin ka âwn sa a nia, min hriat chian tawh ém kha."

A sam chûl neuh neuh pah chuan," Naktûk tûn ang hunah chuan tuna ka khawih ang hian ka khawih pha tawh dáwn lo che a nia, min khawngaih ve lo em ni?" ka ti sap sap a.

""Kei pawh i bulah ka țhu pha tawh dáwn lo," tiin a nui a.

"Lo phei ve mai la țha mai tùr!" tiin ka thlêm leh a, a nuam ve hranpa rêng rêng.

"LS..?!!"

"'Nge?"

"I naupangchhia!"

Ka nui hawk a. Nia, dik tak chuan a bulah hian ka pangchang tlat zel, a nuam ka ti. Ka têt lai pawhin ka nu bulah ka pangchang ngai lo, ka bialnute pawh ka duat thei ve khawp; mahse, Puii bulah hi chuan pangchanna rilru ka nei tlat zel.

Haw ka phal lo va, zànah pawh ka thlah haw tlai. Ani pawhin min ngaih tùr thu a sawi ve sep sep a, kei pawhin ka ngai khawp ang. Phei loh tak ka nâp; mahse, phei ngei ka ngai.

*******

Social media lam hi ka ngaihven vak lo va, Fb leh whatsApp hi ka khawih a  ni deuh mai. Angaihi erawh hi chuan a khawih nasa, IG a ti, Twitter a ti, eng eng emaw a khawih dûm, fashion lam pawh a hria, tûnlai ber ber thlengin a hre vek ni maiin ka hria.

Liansanga awm loh chhûng chuan zànah ka mu hma thei khawp mai a, Angaihi a lo lèn erawh chuan kan meng rei leh thung. A rawn lèn chuan ka lunglèn pawh a zia, eng eng emaw sawia nuih a peih miau avàngin rilru a ti thawveng deuh.

Liansanga pawh a buai ve tak tak a niang, kan inbe zing thei lo. Zànah a hman meuh chuan kei ka lo muhìl daih tawh țhìn a; mahse, phone rîin min tiharh ziah. A buai a, ka hre thiam khawp mai. A chau thei ngawt ang chu.

"Tete, en teh, țhenawmnu chhiat lohzia hi!"

A phone chu min entîr a, hmeichhe inchei nalh zet mai thlalâk a ni.

"Tu țhenawmnu maw?"

"Aw, an pa Forest RO ka tih kha."

Cindy. Umm, Cindy a nih hi, a chhe lo leh pek hle mai, a sam rawng a tihdanglam vàngin ka lo hai pek a nih hi. Chhe lo tak a ni ringawt.

"Engtin nge a thlalâk i neih theih a?"

"Hei, Ft_Renthlei hi designer a nia, a la tharlâm deuh a, i hre lo ang. IG lamah ka follow a, țhenawmnu thawmhnaw hâk hi a design a nih hi, a thiam reuh asin."

Cindy chu a chhe lo bawk a, model atân pawh an lo hmang zuai zuai a nih dáwn hi

"Ngawi lawk aw, hei inneihnaah an kal a nih hi, hmeichhe lam thawmhnaw hi Ft_Renthlei kut chhuak a nih àwm hi maw."

"A design mawi reuh kha, bâkah model -te'n an zir bawk a, an inhmeh bâkah a changkâng reuh khawp mai."

"A, țhenawmnu chuan account a lo nei ve a nih hi, check ang aw. Cindy. A hming pawh a mawi reuh hi," tiin a phone chu a hmet zeuh zeuh reng a.

"Hei en teh, a bialpa rawn lam ve ziahtu kha a nih hi, an chhiat lohzia hi, an inhmeh tawp. An pa rilru a na duh àwm mang tak e."

Ka thinlung chu chemtea vih ang maiin a na nghal ngut ngut. Thlalâk chu ka en reng; mahse, engmah ka sawi lo, ka en tlawk tlawk ringawt mai a ni.  Cindy chuan a kokiah vuanin ani'n a kâwngah a kuah thung. Inneihnaah a lo va kal ve a nih hi, Liansanga'n a sâwm ve em ni le? A ni ngei ngei ang. A rûkin an lo la inkawp reng a nih dáwn hi.

"An chhe lo tiraw?"

"Um."

"Mahse, dik tak chuan pasal nei reng chunga ngaihzawng neih hi a fuh vak lo, a mipa pawh hian pasal nei tih a hre reng àwm sia; mahse, a chhe lo ém a, a nêp phal lo a niang."

Ka rilru hre miah lo chuan a titi char char a, kei ve thung chu ka rilru a tâwt țûn mai. Min sàwm lai khân lo yes mai ila, țha mai tùr.

"En teh, followers a ngah tawp. A chhe lo ém bawk a ni, tuna pic ka hmuh che kha likers 3000 chuang an awm a nia, a thlalâk dang ka'n check zel ang e."

Phone-a kan inbiak pawhin boruak danglam deuh engmah thleng angin a awm lo asin le. Thla an la dùn mai mai a niang, a bialnu alawm ka nih. Ka hriat lohin min kawp dáwn em ni?

"Chhe lo tak an ni, en la?"

En loh ka duh a, ka en châk zel bawk si.

A caption-ah chuan

'A nuam kan ti'

#somewhereinIndia

#withmylonglostbf

#happytimetogether

tiin. An thlalâkah chuan mi dang an lang ve miah lo, Cindy chu camera lam a lo hawi a, a nui sâng. Liansanga erawh camera lam hawi lovin sîr lam a hawi, an pahnih chauhin an nih hmèl, khawiah emaw an lêng a niang.

"A nawm hmel e!"

Vawiin tlai dâr 3:30-a a post a ni. Nimin kha inneih ni a ni a, vawiin lamah chuan...ka hre tawh lo le.

Nizànah min rawn call lo, zîng lamah erawh min rawn call zawk. A buai dáwn tih ka hre ve tho va, ka hre thiam lutuk; mahse, a buaina hi thil dangah a nih duh hmel tlat.

Min rawn phone chuan ka lo muhìl sek tawh, dâr 11:30 lai a ni tawh a, a àwm hliah hliah a nih hi.

"I aw ațang chuan i mu tawh tih ka hre mai."

"Aw, phone rîin min tiharh a."

"Kei chu ka intleuh dáwn chiah!"

"In va buai àwm ve?"

"Um, ka relhru zâwk a."

"A nih tak chu."

"Ka lo phei châk tawh."

"A nuam bawk maw?"

"Nuam ve mai, a chauhthlâk a ni."

"Nia, chàu ang."

Ka biak dàn ngai rengin ka bia, ka rilru erawh a na vawng vawng. Hriattîr kher erawh ka tum lo.

An thlalâk ka hmuh vàng mai khân ka ring chhe ringawt tùr em ni? Inneihna a nia, an inhmu fuh ve a ni mai a, thla an la dùn a ni ve mai.

Mahse, ka rilru a na tlat si a nih hi. Engtin nge ka tih ang? Ka ringhlel țan deuh chu a ni ringawt ta mai si a, inrinhlelhna a awm chuan inlaichìnna hi a nghet thei tak tak lo.

School-ah ka ngawichawi deuh nge, Zara chuan," I cool riaua ka hriat chu le, thil thleng a awm em ni?" a rawn ti sar sar a.

"Awm lo ve, thil ka ngaihtuah kual deuh mai mai."

"Tak tak maw?"

"Aw, tak tak e, engmah thil țha lo a awm lo."

"I cool deuh tlat a!"

Ka nuih sak a," Min ngaihtuah tih hriat hi a nuam e," ka ti sap a, ani chuan," Nangte chu ka naute i ni alawm," a lo ti a.

"Het, Rahsivenga mi khân a hre reu reu ang e."

"Ani chu ka bialnu a nia."

"In la țha zel maw?"

"Aw, țha e. A naupanna hi a lang leh deuh țhìn a, chutih lohah chuan buaina kan nei lo rih e."

"Hlim zêl rawh u."

"Ka lawm e."

Inrinniah Sangpuia a rawn chhuk a, ka lâwm kher mai. Min hrilh lâwk miah lo va, ka hmu thut phei chu ka zuang tar tar mai.

Sunday-ah kan inkhâwm a, inkhâwm bànah inah kan awm dùn char char a, ei tùr ka siam. A awm chhûng chuan lènsan ka tum lo, ei tùr tui tak tak hlui ka duh  bawk. Hna a thawk nasa si a, ka khawngaih. A lo kal hi ka lâwm tak tak, ka rilru hrehawm lai tak a nia, ka rilru kalding tùr min vènsak a ni.

Angaihi a rawn kal a, a hman hun laia damdawi ina an chhûngte (hla deuh hlek tawh) chu kan a duh a, kalpui atân min rawn sâwm a ni. Sangpuia nèn chuan an inbe bawrh bawrh mai. Angaihi hi zawng, nèl loh theih pawh a ni lo, a țawng duh ve bawrh bawrh ém a ni.

Angaihi nèn damdawi inah chuan kan han lût a, Sangpuia erawh inbual a duh vàngin inah a lo awm. Kalsan chu ka duh vak lo nain kan han awm rei dáwn chuang lo va, a bulah pawh ka sawi tho.

Kan damlo kan chu a lo harh țha a, a lo țawng barh barh, a zia viau e, rei pawh kan awm lo. Angaihi erawh mi biak tùr a neih vàngin ka kalsan a, a chhan chu Sangpuia ka ngaihtuah deuh a ni, a rawn kal ve ém ém a, ka chhuahsan daih sia, nuam ka ti lo.

Ina ka zu luh a ka thil hmuh chuan min țhâwng chiang hle mai!! Sangpuia leh Liansanga an lo inhmachhawn ràn mai!! An insàn hleih hle a; mahse, Sangpuia chuan rum mangkhènin a melh chho ve rán a!!

*DUH TAK LEH HMANGAIH TAK LAKAH HIAN A NI, THUNUN THEIH LOH KHAWPA THÎKTHU CHHIATNA A RAWN PIAN CHHUAH ȚHIN NI*

☆13TH MAY☆ - 19 By Dingdi Pachuau

Eng thil nge thleng hi?

"LS...?!!"

"Ka awm loh chhûng rei lo tê pawh i lo tuar thei lo a ni maw!"

A mit sen râm maiah chuan thinrimna leh rilru natna a inpawlh nawk, rum zeta Sangpuia chu melhin ten hmèl deuh hian min rawn en leh a.

"Hlim ang che," ti hlukin a inher vut a, min rawn kal pèl thuak a, step-ah chuan ving zetin a chho ta daih. Thil thlen dàn chu a rang teh thut lutuk a, engmah ka sawi hman hlei nem. A thleng thut a, a zo dèr. A zawh meuh chuan hmuh tùr a awm tawh lo, a ngaihna ka hre lo tak zet.

"Tu nge kha pa kha?"

"Liansanga. Eng nge thil awmzia? A ngaihna ka hre dér lo mai!"

A kâwng dawmin thâwk a la hawk hawk a, a sam chu a tuai leh puat a, a awm dàn chu thinrim insûm nasa deuh a ang ka ti.

"Sangpui?"

"Eng thil nge a hriat ka hre hrep lo ve!"

"Sangpui, i țawng dàn kha, a mawi lo a nia, in insual lo tiraw? Nge, in intithinrim em ni? Eng thilah nge?" tiin ka zâwt duah a.

"I bialpa a ni em? A awm dàn kha a mak hle a ni."

"Engtin nge a tih che?"

"Mi pangngai a nih chuan a inchhîr ve khawp ang."

Ka rilru a tibuai map mai. Engtin chiah nge an intih ka hre bawk si lo, Sangpuia thinrim dànah hian eng emaw tak chu a sawi deuh a nih ka ring.

"A va ngai lêrh che ve!! A chhuah dáwna a thu sawite kha. A ngaihnêp theih tùrin i lo khawsa tawh em ni?"

"Sangpui, ni lo, chutiang engmah a awm lo."

Boxer nèn chauh a ding bawk sia, Liansanga ang éma sâng chu a ni lo nàngin a thinrim hmel chu hmuh nuam tak a ni lo. Ka nau mah ni se ka chhuang țhìn asin, a zaidam teh lul nèn, Liansanga chuan engtin tak țawngkhum ang maw?

"I bialpa emaw min ti a nih kha!"

Lalpa leh!!! Chu vàng a lo nih chiah chu, umm, ka hre thiam deuh ta uar uar. A lo phei tawh tih pawh ka hre miah lo, min hrilh miah lo, min rawn țhàwn thut a tum ve a ni ngei ang, kei lah ka lo awm si lo, a va fuh lo tak!

"Khatiang bialpa thîkthu chhia kha chu ka ni ve lo tawp ang!"

Thinrim ve deuh mah ila ka nuih a za tho. A chhan chu Sangpuia ka bialpa emaw a tih vàngin a thîk a, a thinrimin min chhuahsan ta daih a ni a, ka nau a ni tih a hriat chhuah hunah engtin tak awm ang maw? Sangpuia tih dàn takah 'Mi pangngai' a nih chuan a inchhîr ve ngeiin ka ring, min duh tak tak a nih chuan.

Angaihi a rawn thlen thlâk hnu chuan kan boruak a zia leh ta deuh. A rawn nui leh huah huah a, Sangpuia hlim lo hmel pawh nui hmelin a thlâk leh ta e. Kei erawh chuan Liansanga inchhîr tùr leh ngaihdam a dîl dàn tùr ka ngaihtuah a, ka rilru a la pêng deuh hlek.

Call ka tum deuh ûk ûk a; mahse, ka țhulh leh. Ani erawh a reh hmak thung. Naktûk lamah chuan kan insawi fiah thei tùrah ngai ang, ani pawhin ka rilru a tina ve tho.

Sangpuia chuan Liansanga lam hawi rêng rêng min sawipui miah lo. Phone-ah furniture design chi hrang hrang min enpui a, siam harsa deuh leh harsa lo deuh te, simple mawi tak si te leh an siam dàn Youtube lama mi chu min enpui a, ka duhzawngte min zâwt a.

"Dressing table min siamsak ve la?"

"A ngai em ni? Tuna i hman dawhkàn saw a tâwk viau saw," nui chung hian a ti a. A ni lah tak a, ka dawhkán te reuh têah chuan makeup ka neih veho chu ka dah ve thliah a, a tam lo bawk a, a leng khawp mai.

"I hman hunah aw, mawi tak pawh a ngai chuang lo va, i hmanraw hman bâng mai maiin i siam dáwn nia."

"Ka lo ngaihtuah mai mai a, nangin i hlawh i khâwl ve hlek hlek leh ka thil siamna pawisa hian kan in khi extend hlek hlek ila ka tia, eng nge i ngaih dàn? Ka nu ințhuina leh huan thlai khi kan ei khawp tho sia?"

Ka nau hi ka lo tluk lo hle mai tih ka hre chhuak. A rilru a lo puitling tawh reuh bawk sia, kei aiin a ngaihtuah thui daih bawk si.

"Țha i tih dàn apiang kha țha ka ti mai. Hna thawktu ber i nia, pawisa la lûttu ber i ni bawk a, chhûngkaw pa ber i ni bawk nèn, i thu thu."

"E taka, ka nuin pangpâr chî lo ngaihtuah tùrin a ti che, a tui thar a, pangpâr khàwina tùr siam tùrin min ti ziah a, panga lai chu ka siamsak tawh. Mawi lo tê tê a khawi ve a, a la duat ve ém ém zui," tiin a nui hak hak a.

"Sawisèlsak miah suh aw, nuam a tihzawng a nih chuan a țha alawm. Mawi tak tak ka lo zawnsak ang e, tuna ka in luah hian zir se chuan kei pawhin ka khawi țeuh ang."

"Pangpâr hi mawi tak ka la hmu lo a niang, ka hmuh chhunho lah hi mawi ka la tichhin lo rêng rêng."

"I la hmu tlêm a nih chu!"

"A niang."

Zànah min rawn phone lo va, min rawn text hek lo. Engtiangin nge hun a hman ang tih chu ka ngaihtuah angreng hle mai a, mut dáwnah chuan ka text ta hrâm a.

*Eng nge thil awmzia hi?*

Min reply pawh ka ring chuang lo nàngin ka thawn hrâm.

*******

LIANSANGA

~~~~~~~~~~

Ning takin ka zo ve ta hrâm e. Hetiang tak hian khawvêl nun hi a lo ninawm thei tih ka hre lo. Kima lah nupui nei thar niin a hlim hle a, hlim hmel ka pu lui mai mai a ni.

Cindy ka hmu thut chu mak ka ti khawp mai. Ka sâwm lo va, a lo kal dáwn tih ka hre hek lo. Inneih thlalâknaah ka hmu thut a, a chhiat loh ngaiin a la chhe lo reng, mi mit pawh a la chiang e; mahse, ka rilruah hian 'mahse' a awm tlat tawh.

Ka nin avàng ringawtin kan hun hman hi ka tlànchhiatsan thei chuang lo. Kima nupui nèn Cindy chu an lo in-cousin niin, khawvel hi a lo va zîm teh lul ém! Thla pawh kan la ve zuai zuai a, mi zîngah ka ninzia chu tihlan chi a ni miah si lo.

Ka nuin Puii pheikhawk tùr min thawn a, thlen hlàn ka nghâkhlel lutuk tawh chu ka phî cheng mai. Ka phei tùr thu pawh ka hrilh duh lo, surprise ka tum a ni.

Thawhțanni zînga phei tum ka ni nain Sunday zîng hma lutuk tak maiah ka inkhalh phei, Puii ka ngai tawh a, hmuh hlan ka nghâkhlel tawh ém a ni. Ka nu erawh chuan Thawhțanni zînga phei tùrin min ti, ka chauhzia a hria; mahse, ka taksa leh rilru chauh pawh ka ngaihtuah thei tawh lo, hmuh thuaia kuah vawng vawng ka duh, chu chu ka taksa leh rilru tân damdawi țha ber a ni tih ka hre si a.

In ka thlen veleh ka inbual a, ei tùr eng eng emaw ka inhnawh puar hnuah hmu tùrin ka chhuak, ka phone dáwn ûk ûk a; mahse, surprise tum na na na, ka phone leh si chuan...

Ka nu pheikhawk min thawn erawh ka keng tel lo, inah rawn lam ve rawh se, min hmuh huna mak a ti tùr hmelte chu ka mitthla chhin a, ka nui suk suk mai.

In chu a inkalh lo ve, a awm ang tih ka hria a ni. Thâwk ka'n la hawk phawt a, ka kik ta karh karh a. Min chhâng miah lo!

"Puii?" tih pahin kawngka chu ka pawt chhin a, chhûng lamah a inkalh! Engati nge a inkalh le? A muhìl em ni? Thâwm ka'n ngaithla deuh a, mipa țawng thâwm ka hria!

Chhe hiau! Mipa nèn a inah, chhùnah an inkalh khum maw?!!

Thîkna nasa tak, thinrimna, lungawi lohnain min rawn bàwm nghal. Tu pawh chu awmpui rawh se, ka hre khawp ang. Ka kik lui leh ngat a.

Ka kik uar leh sauh, ka chùm deuh bur bur tawh. Insùm theihna ka nei tawh lo, ka thinlungah thinrimna leh thîknain hmun a luah nasa tawh lutuk tlat.

A hnuah mipa chêr lam deuh, sâng ve deuh hian kawngka chu a rawn hawng, ngun zet hian ka melh nghal rùn mai. A inbual zo chiah a nih hmel, boxer hain towel a nghâwngah a bât a, a sam pawh a la hru hul hman lo a niang.

"Eng thil nge ni ta?"

"Khawnge Puii?"

"Tu nge chu chu?"

"Hre lo der khanglang suh!"

"Tu nge i nih a?"

"I hriat a ngai lo, khawiah nge Puii chu? Puii, rawn chhuak rawh, i bialpa chauh hi em ni ka hmachhawn dáwn? Sawi fel nghal teh ang."

Thil àwm leh mawi ka hre tawh lo, ka thin a rim tawh lutuk tlat. He pa hi a bialpa a ni ngei ang, a rûkin min lo kawp tih hriat reng. Tenawm lutuk. Tunah pawh hian khum an kai dùn zo deuh chiah a nih hi, he pa awm dan ațang hian a hriat mai.

"Rawn chhuak rawh!"

Thîkna namen lo leh thinrimnain min khuh hneh lutuk tawh vàngin ka insûm thei tawh lo, ka tum bawk hek lo.

"A awm lo!"

"Ngawi chîpcham rawh!"

"Chhuak rawh!"

A intihuai ve hle mai ka ti. Tunah tak phei hi chuan hlauh pakhat mah ka nei lo, thinrimna hlîrin ka khat.

"Ngawi rawh!"

Kan indinchilh ta rân mai, kei ai pawha hniam lehnghal, ka hlauh lohzia chu, pui tak a ni!

"Inthiar fihlîm ang che."

"Ka thu thu!"

Ka hnek lohna chu bete bawk ang vél a ni, a chhan chu pâwn lam step-a thâwm ka hriat vàngin. Rum eltiangin ka melh chhuk a, ani pawh kei ang tho, min hlauh hauh lo.

"LS...?!!"

Chu pa la melh chhuk reng chung chuan," Ka awm loh chhûng rei lo tê pawh i lo tuar thei lo a ni maw!" ka ti sup, ka rilru a tina; mahse, a hre tùr a ni lo.

Puii hmela makti hmel chu ka hmu reng, hetianga ka awm hi a la hmu ngai si lo va, a mak hran lo. Nunrâwng thei tak ka ni tih a la hre lo a ni. Mahse, hetianga ka awm loh hlàna mipa a lo awmpui duh ka hmuh hian ka rilru a nat bâkah ka ten, ka ten hluah hluah. Ka bulah chetsual a duh loh thu te kha min hrilh ziah lehnghal. Mai mai hian a!

"Hlim ang che" tiin ka inher vat a, in ațanga a hla thei ang bera chhuah ka duh a ni tawp. Hlim taka hmuh hlàn ka nghahhlelh teh lul nèn, a tàwp vek ta! A hma aiin ka chàu, ka rilru a nâ, ka chàu tak zet.

Hmeichhia vàngin vawi thum ka rilru a na ta. A vawi khatna chu ka dan theih loh thihna vàng a ni a, a vawi hnihna chu keimah ngeiin ka tum vàng liau liaua ka kalsan vàng a ni a, a vawi thumna chu hmeichhe min bum vàng a ni, a tàwp ber hi ka tân a zahthlâk bákah a rilru natthlâk ka ti, ka tlâwm ngawih ngawih.

Pan tùr ka hriat loh vàngin inah ka inkhalh haw leh ta ringawt. Ka va malin ka va khawngaihthlâk ém! Hmeichhe pakhat thlahlel lutukin ka nu thu pawh zàwm zo lovin ka pheisan a ni a; mahse, heti mai hi a ni si. Kan hma hun hi kan va hre lo ém! Hmeichhe rilru ka lo hre lo lutuk a ni.

Che lo châng lovin khumah ka mu reng a, muthilh ka duh. Ka taksa a chàu, ka rilru chauvin min tichau belh a; mahse, ka muhìl thei chuang lo, ka mu chawrh chawrh. Ka phone ka en chhên nain a hnên ațangin call leh text ka dawng lo, dawn ka ring deuh ringawt asin le.

Chaw pawh ka ei lo, zàn dâr 10:30 vêlah message a rawn thleng, ka en vat. A hnên ațangin a ni nghe nghe a nih hi.

*Eng nge thil awmzia hi?*

Huh, a hre lo der a nih hi. A hre chiang lutuk, kei ai pawhin a hre chiang ang chu!

Chhàn ka tum lo. A duh dàn dánin ngai rawh se. A bialpa kha a hmel ka hre chiang a, ka hmu leh a nih phawt chuan ka la hnek khawp ang vawi khat na reng reng chu.

Mumal lo zetin ka muhìl ve a, zînga ka harh chuan ka mit a kham țhûm mai. Ka rin ai chuan ka mu thei zâwk a, ka taksa a lo chau hle a lo nih hi.

Ka phûr zar lo khawp mai; mahse, ka tilang lo ang. Hmeichhe pakhat vàng maiin ka buai lo ang, mi pawhin an lo tuar ve fo alawm, ka tuar theih lohna tùr a awm lo. Mipa ka ni alawm.

*******

Assembly-ah chuan ka en ru deuh reng nain min melh eih lo, ka lam pawh a rawn hawi hek lo. A lang cool ruih mai a, a lang nèlawm loh chiang a ni; mahse, a chhiat loh ngai rengin a chhe lo. A sam thur lek lek chu a inhmeh ngawih ngawih a, a nèlawm loh poh leh a pà ka ti.

Nuamti taka hun va hmang a ni a, a bialnu hlui, a duh leh hmangaih ngawih ngawih, a duh rêng vàng ni lova a nu a ngaihtuah vàng liau liaua a kalsan tâk nèn hun an va hmang a ni a, hrehawm ti tùr a ni lo. An buai avàng erawh chuan a chau ang; mahse, rilru a hlim chuan taksa chau mai mai chu engmah a ni hlei nem.

Min be lo va, min text bawk hek lo. A thil hriat sual hi ka hrilh a ngai a ni. Hrilh hriat hi ka bat a ni, ka hrilh ang a, a hre thiam duh lo a nih chuan a thu. Kei pawh rilru na lo ka ni bîk lo, ani aiin ka rilru a na hmasa zâwk ang chu tih tak takah chuan.

Ka tlâwm hmasa phawt ang, inlaichìnna siam țha tùr chuan pakhat zâwk zâwk a tlàwm a ngai țhìn si a. Induhna leh chapona rilru put ve ve chuan a dik thei lo.

*Inbia ang* tiin ka va text a.

*Office-ah min hmu thei ang*

Hmm, ka pan phawt mai ang, ka tlâwm leh rih e.

Mi dang bàn hnuah ka tàwi hret hret a, office ațangin ka chhuak hmasa ber a, gate pâwn dàwr têah ka lût phawt, a hnuah office chu ka pan chauh.

Lehkha eng emaw hi a lo en a, ka luh pawh chuan min lo melh eih lo, ka thinlung a na zawk mai. Ka chhuak leh nghal dáwn em niang? Ka va tlâwm ngawih ngawih em! Ka tihsual ni miah lohah ka be hmasa zâwk a, chutah, melh pawh min melh duh lo a nia.

"I thil hriat sual kha ka sawi fiah duh a."

A ngawih reng avàng leh a rawn hawi chhuah chuan loh avàng chuan ka sawi zawm a.

"I rawn hmuh kha ka bialpa ni lovin ka nau Sangpuia a nih kha. Engtin tak nge in lo inchhàn ka hre lo va, thil a tisual a nih chuan ngaihdam ka dìlsak nghal e. Ka rinawm lohsan lo che, chutiang mi ka ni lo."

Min chhâng lo va, a lehkha en erawh a en tawh lo. Min en lo nain ka thil sawi chu a hria tih ka hria, a tâwk viau e. Ka sawi fiah tawh a, ka tih tùr ka zo, ka kal thei tawh.

Kal tùra ka inher chiah tih chuan," Kal suh!" a rawn ti sup a, maimichhîng vang vangin ka kal ang nge kal lo vang tih ka inbùk a, ka ding ta dat a, ka hawi lêt lo thung.

*HMANGAIHNA DIK TAK HI A KAWNG A TLUANG PURH NGAI LO, HARSATNA TAM TAK PALTLANG A NGAI ȚHÌN*

☆13TH MAY☆ - 20 By Dingdi Pachuau

LIANSANGA

~~~~~~~~~~

Eng thil nge a sawi hi?!!! Kha pa kha a nau maw! Engtin nge a nih theih? A lo kal tih pawh min hrilh miah lo, kan insual teuh hle a nih kha. A nau a nih chuan.. E khai! Thil ka tibuai hle mai. A nau a lo nih chu, a nau. Amah vànga pawisa a pûk, ka bialnu lem chang tùr hiala ka thlèm phahna kha. Eng thil nge ka tih kha!!

"Puii?"

A che sawn lo va, a rawn inher hek lo. Ka thil hriat sual, ni lo, ka ngaihruat sualna khân thil pawi tak min tihtîr a, a rilru pawh ka lo tina hle a lo nih dáwn hi. Ani bâkah a nau rilru pawh, ka vawi khat hmuhnaah sualpui ka tum ut ut a ni si, a va màwl theih ém! Ngaihruatna dik lo vànga thinrimna leh thîkthu chhiatna khân min insùmtîr thei lo va, ka mit a tidel tlat a ni.

"Ka tihpalh!"

He ngaihdam dìlna țawngkam, tlàwmna țawngkam hi ka ka ațang hian a chhuak khât asin, mi bulah ka sawi ang tih ka ring pha ngai lo; mahse, ngaihdam ka dìl loh chuan ka chân mai ang! Chàn ka phal lo. Ka hmaah, a tihsual ni miah lovah a rawn tlâwm a, kan inkâr thil dik lo, ni lo, ka ngaihruatna dik lo vànga kan inkâra bang chhah tak ka pin tâk chu a rawn țhiat a, kei hian ka lo ping zel thei lo ang. Ka thiam loh liau liau a ni si a.

"Puii, insawi thiamna tùr ka nei miah lo!"

A rawn hawi a, chiang zeta min en kal pahin," Cindy nèn in inhmu tih ka lo hre miah lo va, in thlalâkte ka lo hmu a, in hlim hle tih pawh ka hria a," a ti sap a.

Makti zetin ka en reng ringawt. Khawi ațangin nge a lo hriat? Thlalâk chu khawi ațangin nge a hmuh ang? Cindy nèn khân thla chu kan la dùn ngei mai; mahse, mi dang pawh an awm țeuh a, bâkah, Puii duh loh zâwng leh a thîk theihna tùrin ka awmpui hek lo. Ka ning ém ém zawk a nih kha, min beisei tih ka hre reng nain Puii laka rinawm loh ka duh tawh lo.

"Hmangaih berte chu theihnghilh an har țhìn a ni tiraw? Mahse, LS, pasal nei lai kawp tùr hian ka dah hniam phal lo che a ni."

Sawi tùr ka nei țeuh; mahse, engmah ka sawi thei lo, a thil sawi chu mak ka ti lutuk a, ka rilru a tihnatzia a hre phâk lo tawp ang. A bialpa hlui kha a lo hmangaihin theihnghilh har a lo ti hle a nih dáwn hi. Kei lahin ka rilru zawng zawng ka pe tawh ang a ni si a, a bialpa theihnghilh theih nân, thlâk nân chauh min lo hmang tihna a ni mai lo maw?

"Ka sawi phâk a ni lo nàngin kawng dang dap rawh u, mi hmuha mawi leh țha pawh hi zawn a ngai ve țhìn a nia, a pasal țhen hun emaw tal nghâk hrâm rawh."

Ka en reng ringawt. Cindy hi ka la duh viau leh ka la beisei viau niin a la ngai hmiah a nia, min lo la hre chiang lo hle mai. A tisa ang zawng chuan min hîp a ni maithei; mahse, Cindy laka inhnamhnawih hi ka duh tawh lo hulhual. Amah ka tawna ka bialnu ni tùra ka sàwm ațang kha chuan hmeichhe dang hi ka melh lo asin.

A mitmenga rilru natna lang chu ka hmu khiau. Thinrimin min au khum lo va, min vìn hek lo. A dam thlap mai a, hetiang hmeichhia hi an luhlul duh viau a nia, hna hautak tak ka hmachhawn mêk a ni. Nimahsela, ka chân dáwn lo, ka phal lo hi a ni tawp mai.

A chhuak chu ka thlîr reng, tùn atân chuan ka kaltîr ang, a rilru ka tina rih si a. Thup tum viau mah se, a mitah chiang takin a hmuh theih, chak tak anga lan a tum; mahse, hmeichhia a nia, chak tak angin lang mah se, a thinlung chhûngril chu a nêmin a derthâwng tih ka hre tho.

Tûn atân chauh ka kaltîr tak tak, a chhan chu inngaihtuah ka duh. Tunah khân ka chelh a nih chuan ani kha a thin a rim belh ang tih ka hlau, kumkhua atân ka chân thei zâwk a ni.

Engtin nge, khawi ațangin nge Cindy nèna kan thlalâk chu a hmuh le? Thla kha kan la dùn ngei mai a, chu pawh vawi khat chiah, inneih nîah khân a nia. A hnuah phei chuan ka bula awm a tum deuh pawhin ka kalsawn zel a nih kha.

Hmm, ka insawi fiah ang, ka insawi fiah thei ngei ang. Tunah erawh chuan inngaihtuahna hun kan mamawh ve ve, a rilru ka tihnatsak miau avàngin a rilru nain thinrim mah se, a àwm ngawih ngawih. Kei pawh a nau, a bialpa emaw tiin ka thinrim khum a nia. A nau tih ka hriat hmaa ka rilru ang chiah kha a pu ve dáwn tho, ka hre thiam hle tùr a ni; mahse, Cindy nèn kan awm dun lohzia erawh ka hrilh fiah ngei ang. Chu erawh, muangchângin. Chuan, a nau Sangpuia hnêna ngaihdam dìl pawh ka tih tùr dik tak a ni.

*******

Engmah sawi tùr a hre thlâwt lo rêng a ni. Thu dikin min den chuan insawi fiahna hi a vâng țhìn a, thu dik tak ni lo se a insawi fiah ngei ang. Cindy kha inneihna hmang tùrin a sâwm ve tih hriat reng, mipa hi an lo inang vek a nih hi. Kawp atân chauh min duh, kawp mai mai tùr chuan ka inphal tawh bîk lo ve.

A hma ai khân ka rilru a na zâwk. A chhan chu hmaichhana kan inhmuha thil awmzia ka sawi khân ani pawhin Cindy nèn an awm dun lohziate sawiin min hrilh fiah ve ka ring a nia, ka beisei hle bawk; mahse, ka beiseina chu engmah lo mai a ni, boruakah a thâmral ta.

In ka thlen chuan Sangpuia a lo la haw lo va, eirawng ka bâwl thuai thuai. A chhan chu Sangpuia hian thil dang eng vak a ei ngai lo va, hunbi thlap thlapah chaw ei a duh țhìn. Zîng lamah dâr 8, tlai lamah dâr 6. Țhâl leh thlasikah erawh dârkâr khatin a tihmain a titlai țhìn.

Liansanga chu ka ngaihtuah vang vang a, hun rei kan la inzui lo; mahse, ka rilrua hmun a luah dàn chu nasa tak a ni. Rinawma'n min țhen khân ka la na viau a, tuna hetia Liansanga'n a bialnu hlui nèn min han kawp leh ta hi a nâ ka ti zâwkin ka hria. A chhan chu Liansanga hi chu kan inhmu ngun a, rei lo tê mah ni se, kan inchûlnêl ém a ni. Ka phâ lo, rei lo tê chauh la inzui mah ila ka thianghlimna ka hloh țêpna kha a ni a, ani aia ka taksa hmu chiang leh hre chiang an awm hauh lo ang.

Chêtsual ka duh loh thu ka hrilh zel vàng kha em niang Cindy a kawp leh chhan hi? Ani nèn chuan inkawp reng tawh, duh leh duh loh thleng pawha inhre tawn tawh leh inzui rei an ni a, an inthlah thei tak tak tawh lo a niang. Cindy phei chu chhe lo tak leh engkima chungnung zak a ni a, mipa tu tân pawh thlanawm hliah hliah a ni.

Zanriah ei lai chuan Sangpuia chuan," I bialpa khân ngaihdam a dîl tawh che em? A rawn phone tawh che em?" tiin min zâwt khauh a.

"Ka hnêna ngaihdam dìlna tùr a nei hlei nem, nangma hnêna dîl tùr a ni alawm."

"In inkâr a țha lo hle àwm sia, in sawi fel tawh lo em ni?"

"Vawiin tlai khân ngaihdam min dîl a."

"Chuan?"

"Chuti zawng chu. Hetia awm hi a țha zâwk ang."

"Ngaihdam a dìl tawh che chu!"

"Nia, thil dang pawh a la awm a; mahse... sawi tawh lo ang. Naktûk chu i la chám ang tiraw?" tiin topic dang ka vawrh ta daih a.

"Ka tum deuh nain awmpui che ka duh leh rih zâwk."

"Awhaw, a va țha dáwn ve! I duh ber chawhmeh kan lei dáwn nia."

"A ngai kher hlei nem, tuna kan hmehho pawh hi tui ka ti ém ém vek alawm."

Lesson plan vawiinah ka siam tawh avàngin ka âwl viau, kan titi lai chuan in chung nuin min rawn ko va.

"Lo chho lawk teh, kawr hi lo en ve chhin la, ka titlâwm viau a nia."

"Aw le." Ka ti tak nain ka mamawh lêm lo va, chhoh ka tum hran lo.

Mahse, Sangpuia chuan," Han chho rawh, a duhsak ve che a, a lo țha phian thei asin," tiin min tur a.

"I khua a lo har hman palh ang."

"Han chho rawh, i han rei tawp nâng!"

Ka chho ve ta a, kawrlum lam a nia, lum lo pawh a awm tho, a lo țha hlawm phian.

"Tûn ang hunah engtin nge a lum lamte i neih theih zâwk?"

"Nia, ka vànnei asin, ka tito lo bawk a, la ve ngei ngei rawh. Bazar lama ka pêk chuan an tito ngei dáwn sia."

A nalhin a țha hlawm khawp mai. Ka nu hâk tùr ka en pah a, ka hâk tùr pawh ka en tho.

"En teh, hei hi nalh i tihzawng a ni em? Nalh ka tia; mahse, a nula ka ti sia," nui chung hian a ti a.

A ni lah tak a, nu hâk atân chuan a nula mah mah. A dum a nia, kawrlum pawh a ni chiah lo, engtik hunah pawh a hâk theih ang chu.

Ka duh aiin ka rei ta phian. A titi ve nasa a, an pa lahin," I lo lêng khât sia, thingpui i in ve ngei ngei tùr a ni," a ti tlat a, ka hnial ngam lo, ka lêng khât ve bawk sia.

Kawr pahnih keng thlain ka chhuk a, kawngka hawn pahin," Ka tum aiin ka rei ta. I khua a lo har..." Liansanga nèn inhmachhawn ràna an lo țhu ka hmuh chuan ka thu sawi lai chu ka tàwp hmak. An lo hawi ve ve bawk sia, ka lai tawp, ka melh tawn ve ve a. Anni pahnih hi an lo inhmu thiam lo leh em ni le? Mahse, inhmu thiam lo hmel pawh an pu si lo.

"I kawr lâk chu han ha chhin la?"

"Hâk chhin chi pawh a ni lo."

Awm dàn tùr pawh ka hre thiam lo. Biak dàn tùr ka hriat loh bâkah an boruak chu ka hre bawk si lo.

"Thingpui in in tawh em?"

"In tawh e."

"Nula zàn leng rei!" a lo ti sup a.

Dâr zât ka en vat a, dâr 8:30 zet a lo ni tawh! Mahse, a țûl a ni ve mai a, zan dangah ka lêng țhìn pawh ni hlei lo. Eng ti tùra rawn lêng nge a nih le?

"Thingpui chu i in ve duh em? A la awm kha."

"Ka lènnaah ka in tawh a," tiin a lumna chu ka va en tho a, a lo paw nalh khawp mai.

"A paw hângin em ni i siam a?"

"Aw."

Ka rei! LSa hian thingpui sen bâk a in ngai si lo, a in ve tawp tihna em ni le? Hm, lo in ve tawh mai teh se, tihngaihna awm hek lo le.

Sangpuia leh Liansanga chu an titi bawrh bawrh a, an inhaw tawh miah lo a lo nih hi. Engtin nge an inmil leh mai theih le? Ka awm loh chhûng khân an lo sawi fel a ni ngei ngei ang. Liansanga chuan min be hran chuang lo, kan inkâr dik lo ang pawhin a awm lo, mak ka ti tawp. Ka awm dàn min tilai vek, min biak loh chuan ka be lo vang, chuan, ka be hmasa bawk lo ang.

A haw har lo, a awm chhûngin Sangpuia deuh char char a bia, kei chu min ngaihsak țha duh vak miah lo. Pawi dêr lo.

Kan mut hnuah chuan Chhantea'n min rawn call hlawl mai. Rei vak lo chu kan inbia a, a titi ngaihthlâk a hahdam lehpek e. Rilru nuam lo leh tâwt pawh a rawn tizia hawk mai, mi fel nge nge.

"Tunge a?"

"Ka țhianpa Chhantea maw le."

"Țhianpa hi i ngah reuh viau ang ka ti."

Ka nui hawk hawk a," Ka bum thei viau maithei che a ni," ka ti phawt a, chutah," Tak tak chuan, college kan kalpui țhìn a nia, tunah Bangalore-ah University-ah Asst. Professor a ni mêk, kan inthlau teh e tiraw?" ka ti sar sar a.

"A nih tak chu; mahse, nang pawh i nép miah lo a nia aw, i indah hniam ringawt ang e."

"Dah hniam lo ve, kan inthlau ka ti mai a nia."

"In line a inang lo a ni mai. Kan chhûngkaw tân i thawh nasatzia ngaihtuah chuan khîtah i awm, ka tân hlauh phei chuan ka u i nih mai bâkah ka nunna chelh dingtu i ni."

"Sangpui, chutiang sawi ri lo teh."

"Nia, ka sawi tawh lo ang, ka u ka hmangaih ém ém i ni. Hlim takin hun hmang la ka duh ber, kei chuan engmah ka sawi lo ang; puitling engkim hre thiam tawh i ni a, i tâna țha tùr thlang thiam i ni tawh. Thil hi a lan dàn ringawtah judge lo la, rilru fîm takin, thu tlûkna dik tak i siam dáwn nia."

Ka ngaihtuah rauh rauh mai. Eng lam a sawina nge? Liansanga hi ring tùrin nge ring lo tùrin min duh? Ka ngaihtuah rei poh leh min tibuai.

A tûka school ka thlen chuan a car a lo awm leh vang tawh. Min lo thlîr ru leh reng tawh ang em? Ni lo, thlîr lo tawp ang, kei hi chu bum ka nuam a, a thil sawi ka awih ringawt a nih kha, tunah chuan ka awih mai mai tawh dáwn lo. Cindy nèna an thlalâk ka hmu chiang a, kha kha evidence țha lutuk a ni, a inphatmar theih miah loh kha. Bum mai mai theih ka ni tawh dáwn lo.

Mi dang an rawn thlen hmain games ka khèl leh zawk, message a lo thleng, Mr. Chocos...Hmmm, min bum leh dáwn a nih hi.

*Zàn lêng reinu, vawiin tlai chu ka inah i thil tùr lo lam la*

A va zak lo tak! A inah ka thil engmah lam tùr ka nei lo. Min bum a tum a nih hi, a dâwt thu sawi ka awih tawh dáwn lo, ka chhâng dáwn teuh lo.

Ka phone chu ka switch-off daih. Message min rawn thawn thei tawh lo ang a, min rawn call thei hek lo ang.

Tlaiah Zara rualin ka chhuak a, a chhan chu min lo ko ang tih ka hlau, gate pâwnah te hian min lo châng reu reu palh ang.

Ka hmu reng, gate pâwnah a lo awm tak tak a! Zara bike-a ka chuang chu ka tifuh tak zet.

Inah chuan Sangpuia a lo awm lo va, a la hma ve deuh bawk a, a bungraw lei tum kha a la zawng hmu lo a ni maithei a ni.

Rawng ka bàwl rak rak lai chuan kawngka a rawn ri karh karh a, nui chung hian," Sangpui, rawn lût mai mai teh," ka ti vat a.

Kawngka a rawn inhawng a, Liansanga hmel ka hmuh chuan ka nui hmel chu a reh chiang kher mai.

"Sangpuia ka ni lo a nia!"

"Eng nge i lo tih dáwn?"

"Ka rawn lêng."

Tûn ang hunah a rawn lêng ngai lo. Eng thil nge a hriat ni?

"Lèn hun pawh a ni lo," ka ti sap a.

"Hun lo tak tak a awm em ni? A țùlnain a urthlu ve bawk a ni."

"A țùlna ka va hre lo ve!"

"Țûl tak a ni."

A'n sawi kual vel dàn hi a va ngeiawm tak! A confi hmel ropui si. A duh chu sawi rawh se, ka țawng ve lo ang, ka awihsak bawk hek lo ang.

"Cindy chungchang kha... Ka sâwm lo va, a lo kal dáwn tih ka hre hek lo."

A sâwm emaw sâwm lo emaw a kal ve tho a, thla pawh an la dun ngei alawm, ka hmu chiang ém!

Ka ngawih reng avàng chuan a sawi zawm leh a.

"Thla kan la dùn ngei tih ka phâ lo; mahse, thlalâk dun bâk eng thil mah a thleng lo."

Eng thil nge thleng tih pawh ka zâwt miah si lo va, insawi fiah a ngai a nih chuan thil awm a awm tihna. An inhmu a, thla pawh an la dùn a, thla lâk dun kher lo pawh an eng emaw an ti dùn thei tho, ka hre ve miah lo.

"Ani kha chu thîk a ngai miah lo."

Ka thîk tih thu ka sawi hauh lo, thîk angah min ngai a ni maw? Teuh lo mai, ka thîk awkawng lo, an duh duhin an awm thei, ka buai lo ve.

"Eng emaw tak sawi ve teh."

Sawi tùr ka nei lo, ka țawng dáwn lo.

"Puii, eng thil mah a awm lo. Cindy hi ka hnaih tawh hauh lo. Nang ka nei tawh che a, ani hnaihna chhan tùr ka nei lo. I nau chungchang erawh kha chu, a pawi ka ti tak zet. Ngaihdam ka dîl mawlh mawlh, ka tihsual liau liau a ni."

Ni chiang e, a tihsual liau liau a ni, nizan pawh khân ka awm loh hlàn khân ngaihdam a lo dîl a ni ngei ngei ang, an titi bawrh bawrh thei sia.

"I lung a la awi thei rih lo a ni maw? Mahse, min biak duh loh poh leh tlàwm ka ngai a nia, ka luhlul ve theihna zawng tak a ni ve tho. I lung a awi hma chu i lungawi theihna tùrin ka bei ang."

Hm, a lo nih tak chu.

"Ka nuin thil a rawn thawn che a, eng tikah nge i rawn lam ang?"

Min bum a tumna hmanrua bawk. A ina kal pawh ka duh tawh bawk lo, ka hriat loh hlànin a bialnu hlui, ni lo, a kawpnu nèn khân an awm dùn reng tho ang. Ka lam lo ang.

"Puii, eng emaw tal chu sawi ve teh, khawngaihin, min hua emaw min ring lo emaw tih tal pawh?"

*INLAICHÌNNA ȚHA NEI TÙR CHUAN INRINTAWNNA A AWM A NGAI*

☆13TH MAY☆ - 21 By Dingdi Pachuau

He nu han luhlulzia hi! A luhlul chu ka ring sa tho nain hetiang ém hi chu a nih ka ring miah lo asin; mahse, tu nge luhlul zâwk test a duh a nih chuan a hre khawp ang. Min chhàn hma chu ka zâwt peihin ka dawhthei teh a nia, a la hre lo a nih dáwn hi.

Ka text a chhâng duh lo hi ka hre thiam, min chhàn ka rin vànga text ka ni hek lo. A lo chhiar a, a hmu a, a țha. A han thinrim a, min han biak duh loh poh hian ka duhna a zual, a chhan chu Cindy nèn kan awm dùn emaw a tih vàng a nia, min duh vàng a ni. Min duh lo se, thîkthu a pe chhe tawp nâng, chu chu ka ngaih dàn a ni.

Min melh duh lo va, ka thil sawiah a lo inrawlh ve hek lo. A va luhlul reuh tak! A thluak bûrah hian luhlulna hlîr a awm a niang.

"Eng emaw tal sawi teh?"

A la ngawi reng tho, a thil tih chu a tih chhunzawm reng a, min chhâng lo.

A nau Sangpuia a rawn haw a, a lo lûtin min hmuh chuan a mitko a sàn ãk a, nizàn lamah ngaihdam dîlin ka titipui tawh avàng leh kan chanchan engkim a hriat tawh vàngin min hre thiamin ka ring. Eng vak chu a sawi lo nain a u hlimna chu a duh ber tih a sawi, kei pawhin ka duh alawm. Eng emaw hriat dik loh leh rinhlelhna, thîkna vàngin kan la buai rih mai a ni.

Rei ka awm lo, ka hawsan a. Ka beidawngah a ngai maithei a ni; mahse, ka la țan ém hlei nem, ka rahna tùr rahbî ka la tuk chauh a ni.

Naktûkah Sangpuia a haw ang a, a haw hnuah ka tih tùr ka ti țan ve chiah ang. A luhlul dàn hi ka duhzawng tak mai a nia, chhuah ka tum lo hrim hrim.

*******

Ka rin ai takin a haw a tum har. Sangpuia lo thlen hnuah chuan ka thaw huai mai, a duh duha bum theih ka nih bîk lohzia chu a hre chiang ve khawp ang chu. A beidawng ta a niang, a haw ve ta. Thaw huai mah ila ka rilru a hlim chuang miah lo, min kalsan se ka ti tak tak em? Kan inkâr hi tàwp se ka ti em? Ka ti a nih chuan tùn hi hun țha a ni; mahse, tàwptîr ka phal chiah em le?

Ka phal lo, ka phal miah lo. A chhan chu he pa hi ka duh mai bâkah ka hmangaih tawh a ni. Ni e, ka hmangaih tawh, Cindy ka thîk ém ém chhan pawh hi ka duh lutuk tawh vàng a ni. Ka be duh lovin ka chhâng duh lo vêl si a, tlâwm ta lutukah a inngai a ni ngei ang, a hrehawm ti zâwk tùr chu keimah ngei hi ka ni asin.

Mut hmunah chuan ka ngaihtuah kual vak vak a. Mipa chuan ngaihdam hi an dîl khât viau asin, tlàwm nawn hi an hreh châwk, an duh reng lakah pawh. A nih chuan, Liansanga hi a tlàwm duh tawh loh chuan, tu nge tuar tùr zâwk? Mahse, kei pawh ka tlàwm ve tho kha, kan inang chiah. Vawi khat ve ve kan tlâwm, chuti, engati nge kan inkâr a la dik chuan si loh le? Ka induh lutuk a ni thei ang em? Engmah ni si lo hi ka lo chapo deuh zâwk em ni? Cindy nèn an awm dùn lo tih a sawi mawlh mawlh a, ka awih duh tlat lo va.

A dawhtheihnain a tlin ta lo a niang, min kalsan tawh. Keimah chauhin, ka induhtâwkna vàngin kalsanin ka awm. Ni e, ka induhtâwk ve a ni, ka luhlul bawk a, ka chan tùr chu hetiang hi a ni rêng a ni. Min rawn text lo va, min rawn call hek lo. Zaninah pawh a rawn lèn miah loh kha, kan inkâr chu a tàwp ta, a titàwptu pawh keimah ka ni.

Tûkțhuan kan ei laiin Sangpuia chuan," In la sawi fel nange?" a ti sup a, ka awm dàn ațangin a hre thei a ni ngei ngei ang.

"Ka awihsak duh lo va."

"Thil thleng chu a sawi fiah tawh si a maw?"

"Aw; mahse, engmah ka sawi ve lo."

"Eng chungchângah nge in buai a?"

Sangpuia hian eng thil mah min zâwt ngai lo, inngaihzàwnna chungchâng hlauh phei chu. Tukin chu min zâwt ve tlat, a rilruah a awm ve ngang a niang.

Thil awmzia chu ka hrilh thuak thuak a, ngun deuhin a lo ngaihthla a. Ka sawi zawh chuan a tlângkàwm nân," Min kalsan tawh. Ka tâna țha tùr zâwk pawh a niang, ani hi chu ka phû lo ém a, a sâng mah mah a ni," ka ti a.

"Inngaihzàwnnaah phû leh phû lo a awm thei dáwn em ni? 'Hmangaihnain rethei leh hausa a thliar lo' an tih fo kha. Induha inngaizâwng tùrin hausak kher a ngai lo, thinlung lam a ni zâwk."

"A thuhrimah, thla an lâk dun vàng ringawt chuan an awm dùn tihna a ni kher lo va, a hmeichhia zâwkin an pic a post a, a caption-ah pawh a duh duh a ziak thei ang chu. Thu dik lo pawh an ziak ve fo alawm. A hrilh fiah tawh che a, i awihsak miau loh chuan i thu thu le. I ti lutuk maithei a ni."

"Sangpui, a bialnu hlui mai ni lo, a hmangaih leh a duh ber, inhmuh thiam loh vàng ni miah lova harsa ti taka a țhen a ni asin. A la duh lutuk a ni," ka ti ve thung a.

Ani chuan," A țhen tawh, chu chu hre reng rawh. Inhmuh thiam loh vàng pawh ni lovin amah zâwkin a țhen a ni a, a la kawp reng i ring thei maw?" min ti ta hé háw a.

"Ka hre lo, ka rilru i tibuai vek."

"I ngaihtuah țha leh dáwn nia, i hlim lo hmel hmuh hi hrehawm ka ti, hlim tùrin ka duh che. Ngun takin i ngaihtuah ang a, i thinlung chhûngril ber ațang chauhin thu tlûkna chu i siam dáwn nia. Thil rêng rêngah, a țha lamah chuan tlàwm ngam hi zahah lâk miah loh tùr. Tlâwm ngam apiangte hi an entawntlâk a nia," tiin min zilh deuh reuh ta zêk a.

Phûr lo deuh chuan ka insiam a, nau zâwk zilh ngaia ka'n awm mai mai chu! Ka thu tlûkna tùr chu ka hre sa reng; mahse, min biak hmasak loh chuan ka be dáwn lo, kan inkâr thil sawi chhuah hmasak hlauh phei chu, 'nai tak' a ni ringawt.

Mi dang zîngah rilru nuam lo deuhin ka awm a, fiamthu an thawh pawhin ka nui ve pek lo.

Zara chuan," I rilru kam deuhtu a awm em ni?" a rawn ti sar sar a.

"Awm lo ve, engati nge a?"

"A awm chiang!"

"Ka nau a lo zin a, vawiinah a haw dáwn a, ka ngaihtuah deuh mai mai," ka ti ve zaih a.

"A nih tak chu. Eng nge a lo tih a?"

"Min rawn tlawh maw le. Thil mamawhte a rawn lei pah bawk a."

"Ngaihtuah duh suh, tluang takin a thleng ngei ang."

Liansanga chu Assembly-ah hmu mah ila min en lo, biak phei chu khawi lam a ni ringawt; mahse, ka lunghnûr tùr a ni lo, ka luhlulnain a cho chhuah a nih hi, lungawi taka awm tùr ka ni;.mahse, a va har si ém!!

Tlaiah Zara ka inphurhtîr tawh lo, a țûl tawh lo. Min lo chànna chhan tùr a awm tawh lo bawk a, min lo châng lo rêng bawk. Kein zawi zetin ka haw hnang hnang, nidangah pawh ke thovin alawm ka haw ziah le.

In ka thlen veleh ka intleuh zawk a, eirawng bàwl nân a la hma deuh si a, lehkhabu ka la chhuak. Sangpuia ka phone leh rih, ani pawh motor-ah a la chuang a, an la thleng lo.

Kawngka a rawn rì a, lût tùra ka hrilh hnuah chuan Liansanga a rawn pên lût, rucksack a rawn ak lût bawk.

Makti zet hian ka lo en a, khawia kal tum chu ni maw ka ti rilru a.

Ka be hmasa lo ang ka ti zet nain biak loh theih a ni lo.

"Khawnge i kal dáwn?"

"Ka bialnu ka luhkhung dáwn."

Hm, a nih chu. Zu luhkhung rawh se, heta lo pèn kher pawh a ngai lo, min elsèn vêl a ni maw. Tehchai hian.

Ka be tawh lo, eng vangin nge a lo pèn kher ni? Min hrilh hriat kher pawh a ngai lo, mi deusawh leh mi thîktîr chu a thiam viau hi.

"I bialpa hlui kha a lo la lêng ngai em?"

A hriat kher a ngai lo. Ani anga bial hlui kawp leh chîng ka ni lo ve. Min duh lo tawha min kalsan tawh na na na, ka kawp lehna chhan tùr ka hre lo.

"In la inbia em?"

"Nang ang ka ni lo." Ka thil sawi chu a hriat thiam ngei ka ring.

A lo hre thiam teh meuh mai, a nui hawk a.

"I va lawmawm tak! Hei vàng hian alawm ka thlah duh loh che."

A zak lo chiang e. A bialnu hlui a kawp leh thup nân min hmang mai mai a ni sia, daw peih lutuk mai.

Ka be lo va, ani pawhin min be tawh lo. Țhutthlêngah ka țhu a, ani chair-ah a țhu thung. Ngun zeta min en reng avàngin ka lai ru hle a, lesson plan ka siam pawh ka rilruah a awm thei lo.

"Kal tawh rawh!"

"Khawiah maw?"

"I kalna tùrah."

"Hei, ka awm tawh reng alawm."

"Daw peih!" ka ti sap a.

"Khawngaihin, thingpui lum teh, ka ril a țâm a nia."

Ka lumsak thuai, in zo thuai se, kal thuai se ka duh, ka chêt min tikhawr.

Thingpui sen hâng leh a hmeh tùr ka chhawp a, ka kalsawn tùr chiah chu ka banrêkah a man ta chat.

"Puii, hre thiam lo lui tlat lo la?"

Ka hre thiam lo lui tlat a ni lo, thlalâk ka hmu a, a chiang ve ém a ni, mi dang pawh an lan ve miah loh kha.

"In thlalâk ka hmu chiang si a ni."

"Vawi khat chiah kan la dùn, khatah kha chuan mi pawh an awm ve țeuh a. A rêng rêngin, nang ka nei tawh che a, tumah ka mamawh hlei nem."

"Inneihna lovah pawh thla in la dùn chiang lutuk! Ka hmu reng alawm."

"Eng tik laiin maw? Chu chu khawi laiah nge i hmuh?"

"A IG lamah a post reng alawm. A caption nèn lam ka sawi dáwn em ni?"

Min thlahin a phone a phawrh a, a khawih nap nap a.

"Engtin nge a indah?"

"Ka hre lo."

A hnu deuhah chuan," Hei hi i hmu a ni maw?" tiin thlalâk chu min hmuh a, Angaihi min entîr tawh tho kha a ni, a caption pawh a la ngai vek.

"Ni e, vawi khat chauh chu in la dùn lo chu a nih kha."

"Hei hi en teh."

Thlalâk pangngai min hmuhtîr a, an bulah mi dang pawh an awm țeuh. Cindy IG lama post nèn chuan min en tawntîr a, Cindy'n an pahnih chauha lang thei tùrin a lo hmet a ni ngei ang, an bulah pawh mi dang an lo awm țeuh, hmun khata lâk chu a ni ngei mai.

"Kan la dùn lo tih chu i hre thiam tawh em? Kan pahnihin kan awm dùn lo bawk, mi dang pawh an awm țeuh. Puii, dâwt ka hrilh lo che. Cindy hi ka țhen tawh hnu a ni a, neih kîr leh ka tum lo. Ka duh chu nangmah hi i ni."

Ka rilru a buai leh ta. A thu sawi hi a dik a nih chuan Cindy hian dâwt a sawi tihna em ni? Mahse, dâwt chu a ni kher nang, nuam a tih thu a sawi ve a ni mai a.

"Dâwt min hrilh lo tak tak maw?"

"Hrilh lo, ka hrilh phal lo che, chàn che hi ka phal lo hrim hrim."

"Chuti si, Cindy luhkhung i tum tho bawk si?"

"Chutiang ka sawi lo!"

"Nichînah i sawi reng kha. 'Ka bialnu ka luhkhung dáwn' i tih kha."

"Ani ka bialnu ni hek lo, nangmah hi alawm luhkhung che ka tum."

Makti zet hian ka melh ringawt a. A sawi lai khân Cindy a sawinaah ka lo ngai char char asin, keimah hi maw luhkhung a lo tum chu?

"I ti tak tak lo!"

"Tak tak e, rucksack-ah khân ka thawmhnaw a awm. En la?"

Awih lo zet hian ka en a, a lo awm tak tak! Tootbrush, towel, T-shirt... He pa hian a ti tak tak thei lo ang.

"Eirawng pawh min bàwl kêp rawh, hetah chaw ka ei ang a, ka riak dáwn bawk!"

Ni lo, a theih loh!

"LS, i ti tak tak lo tiraw?"

"Kan hria ang chu!

Min timangang leh ta zâwk! A riak duh tak tak ang, a ni thei lo. Thil țha a ni lo, thil mawi pawh a ni lo, a tihchi loh bawn tawp a ni mai.

"LS..."

"Ka bulah hian lo kal teh!"

A thu anga ka awm loh chuan riah a tum mai ang. Ka pan hnai a, ka kutah chelhin a lo ding a, min en vang vang a.

"Puii, kan inkâr hi khatiang thlalâk pahnih khat maiin a tihchhiat ka phal ngai lo ang, Cindy nèn kan inkârah engmah a awm lo. Ka tân chuan nang chauh hi i ni, nangmah chauh."

A mitmeng ka en chho a, a ti tak tak a nih ka ring. A thu tak a, min en chiang hle bawk.

"LS... Cindy kha ka...thîk ém a ni," ka ti chhuak ta nge nge a, ka thâwl deuh huaiin ka hria.

Min kuah pahin," Thîk a ngai miah lo, ani chu mi nupui a ni tawh a, ka farnu ni chiah lo mah se, ka farnu ang tho a ni. Nangmah hi ka duh ber chu i ni," a ti sar sar a, nghet zetin min kuah bet ta nghal a. Kei pawhin ka kuah lêt ve ta, kan inhmuh loh chhûng a rei a, kan inhmuh theih hnuah lah kan buai leh ta bawk si a, a nghet thei ang berin ka kuah, ka rilru a nuam sawng sawng thei.

"Kan buai tawh lo tiraw?"

"Aw."

"Chuti, ka fâwp thei tawh ang che tiraw?"

"Teh rêng mai!"

Ka fâwp hmasa nge min fâwp hmada pawh ka hre lo, kan infâwp lo rei tawh bawk nèn, kan duhthawh hrep a, kan tàwp hlei thei lo.

Rei tâwk fang kan indùt hnu chuan," Ka lo ngaihzia che leh ka lo mamawhzia che ka hre thar leh uai uai mai," a ti sup a.

Ka nui hak a.

"I hre chhuak har e a."

"I luhlulzia hi!"

"Bum ka ni tawh a."

"Aw, ka hria e. Eirawng bâwl tawh ila?"

"Hetah riah chu i tum tak tak lo tiraw?"

"Tum e. Luhkhung che ka tum tak tak."

Ni lo, ni lul suh se.

Eirawng bâwl pah chuan a ninhlei thei khawp mai, a chângin min kuah a, a chângin min fâwp thùl. Min dek lo chuan a awm mang lo tih theih a ni, kei lahin nuam ka lo ti ve tho bawk si.

"Kan thil siam chu a tui ngawt ang."

"Eng vàng ngawtin maw?"

"Mi pahnih induh tawn takte siam a nia."

"Tui viau ang!"

Ka in luaha a che ve ruk ruk chuan min tihlim a, ka nuih a tiza bawk. A inhmeh lo ka ti a, a inhmeh ka ti tho bawk si.

"Min en reng hian a nuam ka ti."

Ka lo en leh reng tawh! He pa lak ațanga mit lâk sawn hi har ka ti țhìn. A che vêl zei thlup hian min hîp a, tih hreh a nei miah lo hian min hîp zual.

"Mut hun ka nghâkhlel tawh!"

*MI FING CHUAN MI HNIAM BERA KAN NGAIHTE HNÊN AȚANG PAWH HIAN ENG EMAW TAK ZIR TÙR A HRE ZÊL ȚHÌN*

☆13TH MAY☆ - 22 By Dingdi Pachuau

Ka sawipui duh lo.

Zanriah chu kan ei lawk lo, kan peih chiah lo va, ril a țàm deuh hnápah kan ti.

Inngheng chialin țhutthlèngah kan țhu a, a bân veilamin ka kokiah min kuah a, a kut dinglam erawh chuan ka kut a khàl neuh neuh thung.

"Kut zia ka en thiam asin."

Ka nui hak a, ka awih lo lutuk ringawt!

"Nui ringawt lo la? I kut pahnih kha pharh la."

Awih lo deuh, nui chungin ka kut chu ka pharh a, a en vang vang a.

"I pawisa thawh chhuah hi i hmang ral mai mai lo va, i khâwl thei zék a nih hi. I sum hmuhna pawh a țha, a thianghlim bawk. Mahni thu duh tak i ni lo va, țhian ngaina leh țhian kawm thiam tak i ni."

"A ni teuh lo!"

"A ni alawm, i kut ziaah a lang vek. Chuan, fa pathum i nei dáwn a nih hi."

"A va tlêm ve! Panga paruk lai ka duh dáwn asin le."

"Kei chuan football team daih ka duh!"

Awii, râpthlâk hian! A nupui chuan nâ a va tuar hnem dáwn ve leh!!

"I nupui tùr a khawngaihthlâk ém mai a!"

A nui suk a," I puar deuh reng dáwn tihna a nih chu," a ti sup a.

Keimah maw?!! A nupui tùrin maw min lo suangtuah a!! Ani hi ka pasal tùr angin ka la suangtuah ngai miah lo.

Chaw chu muangchângin kan ei a, kan ei lai chuan," Eng tikah nge ka nu thil lo thawn che lamin ka inah kan kal ang?" a ti a.

"Eng nge min lo thawn a?"

"Ka hre lo, parcel-ah a nia, ka en bîk lo."

Eng tak min lo thawn ang maw? A hma khân ka awih lo vêl a, min lo thawn tak tak chu a ni ngei ang.

"Eng tak chu niang maw? Chuan, zanin chu riah i tum tak tak lo ang tiraw?"

"Tum e, ka rawn luhkhung che alawm."

"A theih loh!"

"Hei, a theih reng hi!"

Ni lo, chaw ei khamah sawipui leh zâwk ang.

"Ka nu hnênah pawh ka sawi vek tawh!"

"Eng?!!"

"Ka rawn luhkhung dáwn che tih maw le! Kawng ka hriat chhun a ni miau a."

Hmmm, khua a va vâr lo tak ém!!

Haw a tum miah lo tak tak. Engtin nge ka tih ang? Heta zàn a riah chuan engtin nge niang? In chungte'n an hre ngei ang a, school kan kal tlàn hlauh phei chuan...Ni lo, a ni thei lo.

"Hawh, mu vat vat teh ang."

"LS, khawngaihin, i riak thei lo ang!"

"Ka luhkhung tawh che."

"Min chhuahsan leh thei tho alawm."

"Ka tum lo!"

A tum lo tak tak. Kan riak dùn a nih hlauh chuan kan inkár thil thleng tùr ka hmu lâwk thiam nghal vek, pasal neih hmaa chêtsual ka duh lo.

"LS, ka ngèn tak zet che, khawngaihin haw hrâm rawh," tiin ka ngèn ta ringawt a.

"Ka luhkhung che ka tih kha."

"Khawngaihin, LS?"

"Kan chesual kher dáwn tihna a ni lo."

Ni lo, mi hian thil ni lo pui pui hi an sawi țhìn, an suangtuah zui a, a tak ni miah lo hi a tak angin an sawi mai țhìn a ni.

"Haw la, naktûk tlaiah ka rawn kal ve zâwk ang e."

Ngun zeta min enin," I riak nghal ang a?" a ti sup a.

"Nula tlangval riah dun a țha lo."

"Chuti, ka haw dáwn lo."

Leh mauh mai a.

"LS, thil a harsa zâwngin kalpui tum lo la?"

"A harsat loh chu. Heta riah i phal loh chuan i lo riak ang, khawi nge i duh zawk?"

A tum lah hi a sawh sawn loh hmel si a, a in fâl deuh taka va riah dun ai chuan hetah riak mai se a țha zawkin ka ring.

"A nih chuan hetah riak mai rawh."

"A țha!" tiin a tlak karh a, "I hlauthawng mai mai a nih kha, fel deuhin ka awm dáwn alawm," a ti zui a, a mit a siai sak bawk a. Hm, he pa hi fel takin a awm dáwn lo chiang tih ka hming ka hriat chian tluk zetin ka hre chiang.

"I rilru tihah lo la."

Ka taksa chu a hahdam thei miah lo, a țang țùng mai. A mitmeng enin rilru hahdam takin ka mu thei ngût lo ang, mahni invêng ràna mut a ngai ngei ang. Mi 'turn on' dàn a thiam si.

"Khawiah nge i mut ang?"

"Khawiah vak nge niang?"

"Țhutthlêngah aw? A nuam vak lo ang."

"I bulah!"

"A mak thei!"

"I bulah lo chuan ka mu dáwn lo, ka chàu a nia, inhnial tawh lo teh ang."

Khuma a mut hma chuan," Helai chen hi i mutna tùr, rawn pèl miah suh," tiin kan indaidanna tùr chu blanket-in ka siam a, ka khum a lian vak bawk si lo va, kan chêp khawp ang.

"A țha alawm!"

A pawm mai chu mak ka ti zâwk. A puan sin tùr ka dah a, ka puan sin tùr ka dah ve bawk a.

"Puan tal chu insin țâwm ila?"

"A țha lo."

Kan mu a, a taksa ka va dek palh ang tih hlau zetin a sîr kilah chuan ka tawlh vak a, ani erawh chu ka lam hawiin fel âtin a mu thung.

"Lo tawlh deuh rawh, i intihrehawm mai mai a nih kha."

"A hrehawm lo."

"He thil hi," tiin kan inkâra daidanna tùra ka siam blanket chu a khawih a," Khum a tê bawk sia, dah daih ang," tiin a la sawn ta daih a.

"Hmm, a zau ta sawt, i lo tawlh deuh thei tawh ang."

Ka tawlh ve hret.

"Engati nge min hlauh a?"

"Ka hlau lo che."

"Min hlauh loh chuan ka lo kuah teh ang che," tia rawn tawlhin min rawn kuah nghal a, ka lo dang ve a.

"I fel dáwn kha."

"Sawisêl lovin le. Ka chau ka tih kha, engmah ka ti peih lo."

Ka sawisêl ta lo.

Min kuah a, kei pawhin ka kuah ve dè dé. A chàu tak tak a nih ka ring, min kuah chial chungin a muhìl har lo. Kei pawh a muthilh hnu chuan thlamuang takin ka muhìl ve ta a.

Ka hmaia min khawih neuh neuhtu an awm vàngin ka harh a, ka meng uau uau a, a la hma deuh tlat. Mut leh rih ka la duh, ka mut a la chhuak.

"Hey, min muthilhsan tawh suh."

Liansanga aw a ni. Engtin nge a nih theih?

"Ka mut...a..la...chhuakkk..."

"A nih leh, muhìl leh rawh le, rei vak lo chu." Ka chalah a rawn fâwp zoh a, a âwm nghèngin min kuah leh sauh sauh a, kei pawhin ka hnial lo.

Ka harh chuan khua a lo êng ut tawh a, ka mit chu ka khap sak sak a, ka zi ar ar a.

"Morning, lo tho tawh la?"

Ka harh chiang lehzual kher mai!

"Nge ka lo mu ve leh dáwn zawk?"

"Aih, ka lo tho dáwn." Ka tho nghal.

"Riah i phal lo ve ém ém a, ka fel i ti ngawt lo maw? Thingpui ka lumsak che a, hei eirawng ka bâwl diam tawh bawk."

Makti zetin ka hawi kual a, a lo ti vek tawh tak tak. Dâr zât ka en a, dâr 7:00 a lo pèl tawh niin, a va mut rei theih ngai ve aw!!

"Min kaih thawh ve tùr alawm le!"

"I tho thei lo a nih kha."

Thingpui min siamsak thlap. Zàn lamah lah ka duh loh danin a awm miah lo lehnghal a, tui takin ka mu thei bawk.

"I muhìl țha thei em?"

"Lutuk zâwk."

"I tho hma sia?"

"Ka chau a reh tawh a, tunah chuan ka pangngai vek tawh."

*INNGAIHLU SUH LA, INNGAITLÂWM ZÂWK RAWH*

☆13TH MAY☆ - 23 By Dingdi Pachuau

"A țha hle mai. A nih, eng tikah nge i haw dáwn?"

"Ka haw dáwn lo, ka luhkhung che ka tih kha."

"LS...?!!!"

"Zîng kâr ațang chuan inhnial lo phawt teh ang, thingpui kha in teh."

Ka hàwtîr ngei ngei a ngai, inluhkhung chu a tihin a tihchi loh hulhual a ni tawp mai.

"Thingpui i in chhûngin ka lo intleuh hmasa ang aw?"

Ni vêl mai mai rih teh se a.

Tûkțhuan ei lai chuan," A nuam dáwn e, vawiin ațang chuan school kan kal rual thei tawh dáwn si a," a ti a, a khi sak sak reng a.

Kei chu ka la ngawi rih, chaw ei khamah ka sawi ve thung ang.

"Ka thawmhnaw erawh school bànah ka la zêl thei tho va, a hmanhmawhthlâk loh. Ka pheikhawk leh hmul ziahna erawh lâk tam deuh a ngaih duh hmèl, pheikhawk hi a ngai bun nawn chu ka thiam mang miah lo va, zir ve deuh țan erawh a pawi ka ti chuang lo."

A sawi ve nasa sia, ka nuih a tiza ru angreng.

Chaw ei khamah kan insiam a, kan chhuak dùn erawh mi tute emaw chuan min lo hmu ngei dáwn e, ngaih dàn țha lo an lo siam loh hrâm ka beisei.

Ni dang aia hmain school ka thleng ta. A office-ah zui lûtin țhut pawh a țhut hma chuan," Sir, khawngaihin, min luhkhung lo hrâm rawh aw, ka ngèn tak meuh che a ni," ka ti nghal a.

Min melh ta ràn a.

"Ka ti tak tak a ni."

"Kan pahniha kan awm lai chuan 'sir' tiin min ko tawh suh."

"Aw le, si...LS."

"Zanina ka ina kan riah chuan...ka luhkhung tawhna che kha ka sût ang."

"Mahse,... a va fair lo ve!"

"I thu thu!"

"A fair lo!"

"Fair tak a ni! Duhthlan tùr ka siamsak che a nia."

"I ina riah leh kher chu, a chi loh."

"Nizànah i inah kan riak a, eng thil pawi nge kan tih? Engmah. Pathian duh loh zawng kan ti em? Ti lo, i duh loh zawng kan ti bawk hek lo. Engati nge riah dun chu i hreh ém ém?"

"Sawi zàwi deuh teh."

"I bula awm ka duh reng lai hian engati nge i duh ve loh?"

Thil hi a hre thiam tak si lo va, nge a hre thiam lo lui zawk le? A bula awm tam loh ka duh chhan zawng, hrilh chi a ni lul lo mai.

"Ka duh a, ka awm reng hi."

"Tu bike-ah mah chuang tawh suh ang che."

Ka kalsan, a sawi thui lutuk tawh. Kei pawhin a tih loh tùr pakhat mah ka hrilh bîk lo, mi dangin min hmu reu reu ang e.

Chhùn chawlh neih laiin staff office-ah a rawn lût a, mak an lo ti deuh a niang, an lo en há a, kei pawhin mak ka ti ru tho; mahse, ka lo melh țha duh lo va.

Mipaho chuan an lo bia a, an titipui nghal bawrh bawrh a, hmeichhe lam erawh chuan cosmetics lam kan buaipui thung a.

Nail polish sen lâr hlar ka hmuh chuan Liansanga cousin birthday lawmnaa kan kal zàn kha ka hre chhuak zawk. Khami zàn atân liau liau khân a sen lâr kha ka inhnawih ve a, ka inhmeh ve phian a nih kha.

"Hei hi ka lo la ang e."

Miss June chuan," I inhnawih ve țhìn elo? I inhnawih ka la hmu ngai miah lo che, i va lêrh ve tawh ém ém!" nui ar ar chung hian a ti a.

"Țan a ngai alawm, kan senior mai dáwn."

Kan nui dar dar a, mi dang pawh chuan an la ve tho. Cosmetics chi hrang hrang an rawn keng țhìn a, hlawh neite an ni hlawm bawk a, an lei nasa țhìn viau.

Tlaiah a inah ka zui haw leh nge nge. A in ka hmuh loh chhûngin a pangpâr chu an lo pâr leh nasa tawh mai, Sangpuia thu sawi kha ka hre chhuak leh zawk mai.

"I pangpâr chu a va mawi leh tawh ve! A thar pawh i lo nei leh tawh a ni maw?"

"Ka nu min ken pheitîr a nih kha, i duh chuan nei ve la?"

"Tak tak?!!"

"I ta vek an nih kha, i duh duh kha hàwn rawh."

A inah hi chuan a thu ve chiang a nia, min duat thiam ve viau bawk. Ei tùr amahin a siam a, țhu mai mai tùrin min ti ve tlat zêl.

"Lo va intleuh ta che, thawmhnaw chu a awmna i hriat kha."

Pawi lo, a thawmhnaw hâk pawh a nuam alawm.

Ka intleuh chhûng chuan chawhmeh tùr a lo buaipui vek niin, ka chhuah chuan siam mai theih tùrin a lo peih tawh hlawm a.

"Ka intleuh ve zawk ang a, eirawng kan bâwl dáwn nia."

A intleuh hlànin pâwna pangpâr chu ka en chiang a, a mawi hlawmin ka hmuh ngai loh deuh deuhte an ni hlawm a, a nu chuan a chi a chahte an ni ngei ang.

"Khâng pangpâr ai khân i mawi daih zâwk!"

He pa inlâkzei theihzia hi chu aw.

"E taka, ka nu thil lo thawn che kha, en tawh la?"

In chhûngah lûtin a room ațangin parcel lian lutuk lo chu a rawn chawi chhuak a, phûr rilru zet hian ka en a.

"Kha le, han hawng teh," tiin ka hmaa dawhkànah chuan a rawn dah a.

Pheikhawk sâng, mawi zet, nude colour ngei mai ka han hmu chu, ka țê chùl mai.

"A va mawi tak ém!!!"

"Han bun chhin la?"

Ka bun chhin chuan ka tâwk chiah, a sâng viau nain bun a nuam reuh phian, Liansanga nu hian thil mawi leh țha chu a hre tak zet a ni.

"Ka lâwm hle mai."

"Ka nu hnênah làwmthu i sawi dáwn nia, ka nu thawn che a nia."

"I chungah pawh ka lâwm ve tho alawm, rawn keng pheitu i nia."

"Làwmthu sawi nân chuan hei hi a țha mai," tiin min fâwp vang vang a.

A remti lo chung eirawng ka bàwlpui a, soup, arsa kan leh salad tui tâwk leh anțam kan siam a, a tui ngawt ang.

Ka puar khawp mai, a soup siam chu ka hâwp tam khawp mai. Chaw ei khamah grape leh apple tlêm kan ei a, ka va puar tak ém!

Chaw ei khamah chuan," Zanin chu i rilruah thil dang, lesson plan leh zirlai mawlh ngaihtuah lovin, i hun min pe rawh aw," a ti sup sup a.

"A țha alawm, zirlaibu pawh ka rawn ken loh hi."

"A țha, movie en i duh em?"

"I tih dàn dán a ni mai."

Sofa-ah chuan insi riala țhuin movie chu kan en a, kei chuan ka en ve peih vak lo, amah si riala țhut hian ka thla a muang a, nuam ka ti ém ém.

"I mut a chhuak elo?" tiin ka samah chuan a fâwp zoh a.

"Chhuak lo ve, hetia nghen che hi nuam ka ti a," tiin ka nghèng țha sauh sauh a.

"Duhawm lutuk mai!"

"A tàwp dáwn tawh em?"

"Mut i duh tawh chiang mai."

"Teuh lo!"

A nui hawk a," Kei chu ka duh tawh asin, kuah che ka châk tawh bawk a," a ti sup a.

Ha ka nâwt a, hmai ka phih zawhah ani pawh a lût ve a. A luh hlàn chuan khumah chuan ka lo mu a, puan ka lo sin thân a.

"Min lo mutsan elo?"

Ka chhâng lo, sîr zawnga muin ka muhìl der tlat a.

Ka puan sin lai rawn pawtin a rawn inthawlh ve sat sat a, ka kâwngah min rawn kuah nghal a.

"Duhtak, i muhìl der tih ka hria a nia."

Ka la chhâng ta chuang lo.

"Het sala!"

A kut lian thlurh chuan ka âwmbâwr a rawn hup ta chat mai, muhìl der fuh lo tak chu ka ni.

"Ninhlei suh."

"I muhìl a ni lo'm ni? Muhìl chhunzawm zêl rawh."

"I kut hi la sawn phawt la?"

Lâk sawn a tum chuang lo, a hma aia ngheta min kuahin min hnaih bawk a.

"Zanin chu hetia muthilh hi ka duh a ni."

A kut chu phelhsak ka tum ve a, kan kut chu a insual fat fat mai.

"Puii, duhtâwk teh, a hek lo ém mai."

"A na a nia!"

"Lo hawi teh!"

A lam hawi chuan ka inlet a, a kut pawh a la sawn ta.

Ka chala fâwpin," Duhawm lutuk mai," a ti sup a, a kuta ka khabea vuanin amah en chho thei tùr chuan min kuai dâk a.

Kan inmelh ta ràn mai.

"I duhawmzia hi i inhre ve em?"

A rawn kûn hniam a, ka hmuiah a rawn fâwp a. Kei pawhin ka lo fâwp lêt vat a, a nui hawk.

"Duhawm reuh lutuk!"

Duhthawh zetin min rawn fâwp ta vawng vawng a, kei pawhin chin tâwk nei lêk lovin ka lo fãwp lêt a. Ka ngaihtuah loh kârin ka kawr chhûngah a kut a lo zen lût leh hman tawh!

"Khawizu ang maia thlum tui i ni."

Ka nui sak a, a țawngkam thlum zet zet hi hriat nuam ka ti, min tihlim veng veng.

"Ka làwm e."

Ka taksa chu a chûl kual ruai a, a mita min mamawhna lang chu ka hmu thei reng mai.

"Puii, ka mamawh che a ni."

A kut ka taksa a chùl kual ruaina chu chelhsakin," Het sala!" zawi tê hian ka ti a, a nui leh hawk a.

"Lalduhawm, ka mamawh tho tho che!"

"Kei pawhin ka mamawh che; mahse, kan chesual thei lo tih i hriat kha," ka ti sap a.

"Engati maw?" A aw ri chhuak chuan khawngaihthlâ a la tawp.

"Pasal neih hma chu chêtsual ka duh lo, ka thianghlimna hi chhuang takin ka pasal hnênah lawițhat zàna hlan ka duh a ni."

"I la thianghlim maw?"

"Aw, tinge min ring lo em ni?"

Ka hmuiah min fâwp leh vawng vawng phawt a.

"Ring teh rêng mai, i lo la thianghlim reng chu ka lâwm tak zet a ni."

Inkuah chialin kan mu a, ka hnungah min chûl hliau hliau a, ka mut pawh a tichhuak selh selh mai, ka muthilh lai tak pawh ka hre chiang lo. Țhangharh miah lovin ka muhìl ta chiah chiah a.

Zîngah ka tho har leh phian mai. Ka harh chuan a lo tho leh tawh, dâr zât ka en vat a, dar 7:oo a ni.

Țawng rî ka hria a, inbe thâwm a ni. Ka nui sak a, Liansanga chuan a nu a be leh tawh a niang, ka riak tih hi a hrilh ngei ngei ang chu; mahse, kan mu dùn ringawt a, engmah thil pawi kan ti chuang hlei nem.

Bathroom-a lûta ka intihfai hnu chuan room ațang chuan ka chhuak a, nui sâng hian," Morning, min kaitho ve lo va," ka ti chhuak a, ka mi hmuh avàng erawh chuan ka nui hmêl chu a reh nghal raih raihin ka ring!

Cindy chu sofa-ah engthâwl zet hian a lo țhu diai a, Liansanga erawh dawhkan bulah a lo ding thung. An lo hawi ve ve a, Cindy chuan," Wow!! Awih a va har ve!" nui chung hian a lo ti a.

"Morning, honey."

"Ka ring thei lo! In chêng dùn tawh elo?!" tiin chîk zet hian ka kawr leh kekawr hâk chu a rawn melh a, nuam lo ka ti kher mai.

*NGAIHDAM I DÎL AVÀNG KHÂN NANGMAH KHA I DIK LO EMAW MI DANG KHA AN DIK EMAW TIHNA A NI LO, IN INLAICHÌNNA I HLUT ÉM VÀNG A NI ZÂWK*

☆13TH MAY☆ - 24 By Dingdi Pachuau

"Honey, bawnghnute nge tui lum i in ang?"

"Tui lum ka lo in ang e."

Cindy chuan," Eng tik ațangin nge in chèn dun țan a?" tiin Liansanga chu a en a.

"Kan chêng dùn lo."

"Zêp a ngai hlei nem. Hei, ka rawn hmu reng che u a."

Tui lum min thlit chu ka ban vat a, nuam ka ti miah lo. Eng nge a lo tih reng reng ni zîng kârah lehnghal? A inthuam dàn ațang chuan morning walk a nei a ni ngei ang, heti chung pawh hian a chhe lo ém ém tho.

Ka riak tih a rawn hria chu pawi ka ti tehchiam lo. A chhan chu Liansanga nèn hian an ințhen tawh tih hria se, zar reng lo se ka duh. Ani lo bialnu dang a nei tawh tih hre teh se.

"Inneihna hun hman kha video-in i nei em? I neih chuan ka duh ve aw."

"Nei lo, min la rawn thawn lo va."

"A nuam ve ngawt mai tiraw? Ka hmu thut che kha chu mak ka ti tak tak a ni."

"Ka buai lutuk a, nuam pawh ka ti lo."

"A nuam ka ti, mo kha ka first cousin a nia."

Kei chu awm ve lo ang mai ka ni, sawi tùr ka hre ve lo va, min biakna chhan tùr lah a awm hek lo. No keng chung chuan pâwnah ka chhuak ta daih a, ka kal chhuak thui lo, an thâwm hre pha lova awm ka duh lo.

Cindy chu a nui har har reng a, an thil sawi ka hre thei lo. He nu hian a la rawn tlawhin a la rawn pan țhìn a ni chiang mai, zîng kârah pawh a la rawn hmu hrâm hrâm a nia, a pasal a awm lo leh tawh tihna em ni ang?

Liansanga mitmei a hmu a ni ngei ang, duh loa hawisan tlat chu ni se a rawn beisei ngam tawh lul lo ang, nge Liansanga hian dãwt min hrilh le? Kei pawh Rinawma ka duh tawh lo va, a lo lêng ngai tawh lo va, hetiang hi engati nge an inkârah a awm ve loh? Ințhen an ni tawh sia.

Pangpâr ka en dan dan lai chuan Cindy chu a rawn chhuak a, haw a tum tawh a ni maithei. Engati nge Liansanga hian a rawn thlah chhuah loh le? Nge ka mitmei a vèn vàng niang?

Chhiat hi chu a chhe lo thlâwt a ni, a taksaah hian a lian lai tùr a lian nalh ém ém a, sawisèlna tùr ka hre lo.

"Zîng kârah hian hmangaihna chen hi a duh dàn niin nilênga a mood tifuhtu a ni țhìn. Chuan, thil pakhat, nuam in chen laiin nawr ve viau suh, ka hrilhru che a nih chu."

Nui sâng hian," I lo hre reng dáwn nia aw, harsatna i neih chuan min zâwt hreh lo la, helam hi chu ka hriat ve zawng tak a nia," a ti sar sar a.

"Ka lâwm e; mahse, hrilh ka ngai lo ve."

"A duhthawh thiam a nia. Tuna a hmel lan dànah hi chuan khamkhawp i hlui lo em ni aw ka ti, a lungawina zân a hmuh loh chuan hmun dang a pansan mai dáwn che asin."

Chhàn pawh ka chhâng tawh lo, thil a intihre lutuk leh Liansanga duhzawng leh duh dàn a intihre lutuk hi ka ngei deuh tlat, lo hre viau pawh ni se min hrilh kher a ngai lo, ka hriat dàn dánin ka hre ve mai ang.

Scooty a lo kêng a nih hi, ka lo hmu miah lo. A tlàn liam hnu chuan thaw hawkin in chhûngah ka lût ve nghal a.

"A lo kal dáwn tih ka hre sa miah lo a nia."

"Eng nge a lo tih a?"

"Ka hre lo."

"Tiang khân surprise visit a rawn nei țhìn che em??"

"Țhìn lo."

Ngun deuh hian ka en a, ani erawh chuan min en hran lo.

"Ngaihțha lo duh suh, a lo kal ve mai mai a nih kha."

"A rawn tlawh che hi ka duh lo, a bialpa pawh i ni tawh lo."

"I thîk tihna a ni em?" A khi suk a, ka va ngei tak!

"Thîk lo, thil țha a ni lo alawm."

"Ani kha chu dah țha tawh ang, hei dâr 8 a ri dáwn, insiam a hun mai dáwn asin."

Lungawi lo ru viau mah ila tih vak ngaihna ka hre bawk si lo, ngawi reng chuan bathroom-ah ka lût ta nghal a.

A hnu lamah pawh ka ngawih deuh reng avàngin lungawi lovah min ngai a niang, car-a kan chuan lai chuan," Kha nu kha eng atân mah ka ti lo, a lo kal leh kal loh khân ka tân awmzia a nei lo, nang ka neih chhûng che chuan tumah ka mamawh lo," a ti sup sup a.

"Kha nu kha i inah, zîng kârah lehnghal a rawn kal ngam a nia. I ina a rawn kal hi ka duh lo!"

"Kei pawh ka duh bîk lo."

"A lo kal tho si?"

"Hmeichhe luhlul zet a nia."

"Kei pawh ka ni ve tho." Zàwi sap hian ka lo ti a.

"Cindy chu fing phakar thiam deuh mai a ni bawk a, a duh phawt chuan a sual thiam ém ém a ni. Nang lahin i lo thîk tumhrang bawk si a."

"Ka thîk awkawng lo, i ina a lo kal ka duh lo mai a ni."

"Ka duh leh mamawh ber chu i hriat tawh kha."

Ni e, min hrilh alawm, làwm pawh ka lâwm viau; mahse, Cindy ka hmuh hian ka dinhmun hi a nghîngin ka hre tlat a, ka thîk lo thei lo.

"Han nui teh, tukin chu i nui ka hmu miah lo a nia."

Za lo zet hian ka nuih a, ka kut chu a rawn vuan a, a nuai nauh nauh a.

"Khawvêl hmeichhia zawng zawng zînga ka duh ber i ni."

"Het.. sala, ka awih ém ém lo e!"

"Engati maw?"

"Khawvêl hmeichhia zawng zawng i ti kher a, Mizoram te ti ve tal zâwk la?"

Za zet hian a nui hawk a, kei pawh ka nuih a za ve tho.

School kan thlen chuan Zara bike a lo ding reng tawh. He pa hi eng nge a hriat a a va kal hma ve le? Car ațanga ka chhuak chu min hmuh loh hrâm ka beisei.

"Vawiin hun hman nuam le, Lalduhawm."

"Ka lâwm e, nang pawh Mr. Chocos."

Office ka luh chuan Zara chuan min lo en zawk a, a thil ziaka bûr leh nghalin," Morning," a lo ti a.

"Morning, va buai àwm ve a?"

"Um, ka thil tih dik loh ka tițha leh a."

"A va zia lo ve aw!"

Class lâk leh meuh chuan Cindy chungchâng ka theihnghilh leh vek tawh. Naupang bula hun hman hi nuam ka tia, ka rilru zawng zawng ka pe țhìn.

Ka theihnghilh ka hre chhuak, Liansanga nu pheikhawk min lo thawn kha ka hàwn miah lo, bâkah pangpâr pawh.

Zànah Angaihi a rawn lang hlawl mai, he nu lah hi min hrilh lâwk lo hian a rawn lang leh thut țhìn.

"Kan inhmu khât sia, ka ngai che a."

"I ngaihawm lutuk, eng nge dàwr lamte?"

"Buai ngaiin kan la buai."

"I fel ve e, i lo lêng țhìn a."

"Lo lêng ve duh hek lo che maw le!"

Ka nui a," Nia, ke ka nei ve bawk si lo va," ka ti zaih a.

"Chhuanlam dawrâwm a nih chu!"

Kan nui ve ve a, a duh ber chi thingpui paw tak ngeih ngawihin ka lumsak a, a in leh khulh khulh tawh.

"I bialpa nèn chuan in la ni reng em?"

"Ni ve ang chu maw le!"

"Ka hmu châk tawh e!"

"I la hmu ang chu!"

Kan țawng barh barh lai chuan kawngka a rawn ri a, Liansanga a rawn lût a, pheikhawk parcel kha a rawn pawm lût a.

"I hawn theihnghilh a."

"Nia, min lo kensak vàngin ka lâwm e. LS, hei hi ka ţhiannu Angaihi a nih hi, Angaihi, LSa a nia."

Angaihi mitko sàn âk chu ka hmu reng, a chhan chu LSa hi a hmu tawh țhìn miau si a, zawhna a va ngah dáwn tak ém!

Mahse, ka țhiannu hi chu a fel ve a, a titipui bawrh bawrh mai. A lo hmu tawh țhìn tih a sawi lang duh miah lo, a â lo a nia. Liansanga chu thingpui sen hâng ka thlit a, a tum loh deuhin ka ţhiannu a lo awm ve si a, mak a ti ngawt ang chu. Thingpui no ka pekna ka kut chu a kut chuan a lo vuan lui deuh hlek a.

"Het sala!" nui suk hian a lo ti sup a.

"Eng maw?" ka ti lui kher a.

"Ka lâwm e."

A lêng rei vak lo, a awm chhûng chuan kuah chu sawi loh, deh pawh kan indek lo reng reng. Angaihi a awm ve si a, a vawi khat hmuhna a ni bawk si nèn, hit lo chu a ti ve khawp ang.

A haw dáwn pawhin kan inmangțha tawp a, Angaihi min en loh zawk lai erawh chuan ka kut chu a rawn vuan hman hrâm, ka khawngaih zâwk.

"A mak tawp! Kha pa kha, oh, LSa kha, țhenawmnu rawn hruai chhuak țhìntu kha a ni sia! Engkim i sawi fiah a ngai ang aw?" a ti nghal ta réng a.

"Aw le, aw le, riak ve la?"

"Riah pawh ka tum lo asin le;.mahse, a pawi lo, engkim min hrilh i bâ a nia."

Mut hmunah chuan ka lam hawiin a rawn saisîr a.

"A bul țan nân, engtia intawng nawlh nge in nih le?"

"Kan school principal a nia."

"Ahh, a ni maw?!!! Wow!! Principal leh staff, hmm, a țha e. Țhenawmnu bialpa a ni tih i hre tho a, in ni tho a?"

"An ințhen daih tawh alawm."

"Eng tikah maw?"

"A rei tawh." An țhenawmnuin a la rawn tlawh țhìn tih erawh ka sawi lang kher lo.

"A tibuai mai lo ang che u maw?"

"An ințhen tawh a, pasal a nei tawh bawk a."

"Pasal nei tawh tih kha chu sawi lang lo teh, a pasal neih leh neih lohvin a duh a tihna leh tih lohna a tibuai lo."

Liansanga ka mitthla rauh rauh a, nia, he nu hi a zeiin a duh dan engkim lo hre em emtu a ni a, a kuai lunglêng thei leh mai ang tih chu ka hlau ve tho.

"A mak ka la ti tho."

A tìr tê ațanga a bialnu lem ka chan dànte chu ka hrilh ta vek a, mak a ti leh zual.

"A mak e, thawnthu a ang ka ti."

"Nia, a châng chuan ka ti ve tho."

"LSa hi i duh viau ang chu tiraw? Nge Rinawm thlâktu atân emaw runluihna atân i kawp mai mai zâwk?"

"Ka duh lutuk zâwk, ani pawh hian min duh ve viau chuan ka hria."

"A țha alawm, ka lawmpui che; mahse, fîmkhur tho la."

"Engti kawng zawngin maw?"

"Hmeichhiaah le."

"Ka ringhlel dáwn tihna maw?"

"Ringhlel tùrin ka tih loh che chu, fîmkhur tluk a awm lo ve ka ti mai a nia."

Message a rawn thleng, LSa bâk va ni suh.

A lo ni tak tak a!

*Zanin zet chuh, ka va khawngaihthlâk tak!*

Ka nui sak a, nia, Angaihi a lo lêng dáwn tih ka hre lâwk bîk tlat lo a ni.

*Hei, hugs & kisses ka rawn thawn țeuh che* tiin ka reply ve a.

*A tak ngei ka duh*

Ka nuih a tiza tawp, ka nui kar kar a.

"A thu a thlum deuh a niang maw?" Angaihi chuan a rawn ti a, ka lo theihnghilh hmin dèr alawm le!

"Thlum vàng a ni lo, a nuihzatthlâk a."

"Ka awm ve avàngin in inmuah thei si lo va, a vui a ni maw?"

"Teuh lo mai!"

"A nih kha a."

*I BÂN PHAR SÂNG LUTUK SUH, I TAWM THEI LO PALH ANG*