☆13TH MAY☆ - 25 - 32 By Dingdi Pachuau

 ☆13TH MAY☆- 25 By Dingdi Pachuau

"A zei loh hmel em mai."

A hre lo lutuk hi ka nuih a za zawk, chhâng lovin ka nuih tawp ringawt.

"Hun fâl in ngah àwm sia, nangni hi in lo mu dùn tawh reng ang ka ti!"

"Mu dùn mah ila kan chêtsual chuan loh ahnu, eng nge pawi?"

A hmui a hup a, meng phâwk zet hian," In mu dùn tawh maw? A khawih miah lo che em ni? Aih, a theih loh, mipa dik tak a nih chuan a theih loh!" lu thing nar nar chuan a ti a.

"A theih miau sia! Chuan, mipa dik tak a ni bawk aw."

"I chiang maw?"

Mipa dik tak a ni chiang alawm. Prove kher a ngai lo, a ni chiang a ni mai.

"Țhenawmnuin a hre chiang tak ang, ka zawt chhin ang."

"Sawi lo teh!"

"Eng nge? Ah, i thîk a ni maw? A ni chiang mai."

"Sawi peih vêl lo!" Ka thîk chiang, ka thîk phâk ni lo mah se, Liansanga hmuh theih loh tùr hian awm bo vang vang se ka ti.

"Chhantea ka khawngaih lâwk."

*******

Hun ka neih veleh Liansanga hnênah a nu number ka dîl a, làwmthu sawiin ka va phone. A nu lah chuan," Làwmthu sawi a ngai hlei nem, nang bâk fanu ka nei lo va, nang ka lei loh chuan lei tùr ka nei lo," a lo ti mai a, lâwm viau mah ila, nuam lo tihna ka nei. Liansanga hi ka pasal em pawh a ni lo va, ka ngaihzawngpa mai a la ni sia.

Cindy hi ka thîk viau nain a ina kal a khapsak ringawt thei bîk lo tih ka hria. A tân lo biak loh ringawt lah a naupanchhiatthlâk si a, a bialnu lo ni hrep tawh, lo inzui hrep tawh an lo ni bawk nèn, tihngaihna tak pawh ka hre lo.

Mahse, Cindy chu ka hmu nawn leh tawh lo. Dik tak chuan Liansanga hi a kuai lunglêng leh ang tih ka hlau a, a zak lo thei bawk si a, mipa tân chuan thlèmna do zawh a har dawn si. A hmeichhia zawkin a zar tlat chuan lo insûmin lo do viau mah se, âwm nêm zawk, pangti no leh tisa no zâwk hnar zawh chu a har duh ngawt ang.

Fùr a lo thleng a, ruah a rawn sûr leh ta tlek tlek mai. Zîng lama ruah a sùr loh chuan a zia viau țhìn, zîng ațanga a sùr țan chuan a buaithlâk. Heater ka lei a, thawmhnaw huh hem ro nân, fan zankhuain ka on tlaivâr mai bawk, a zia khawp.

Tlai lama ruah a sùr chuan min thlah haw țhìn, a châng chuan chaw a ei nghal bawk a, riah a tum erawh chuan ka hnial țang țang zel

September thlaah kâr khat chawlh kan nei a, ka haw dáwn. Liansanga lah chuan lo kal ve a tum tlat a, hnial pawh ka tum chuang lo. A duh phawt chuan lo kal ve rawh se, a pawi lo. Ka dinhmun dik tak a rawn hre dáwn tihna a ni mai a, a rilru dik tak ka hre thei ang,a țha phian ang.

*******

LIANSANGA

~~~~~~~~~~

Ka hna hi a hahthlâk lo; mahse, mahni chauha chèn hi ka ning ve tawh. Nupui neiha fate neih hi ka ngaihtuah ve vuai vuai țan tawh bawk, Cindy nèn kan ințhen țantirh khân a lo rai tak tak em le tih ka ngaihtuah ru fo. Ka fa emaw mi dang fa emaw pawh lo ni se, pasal a neih dáwn vangin a titla a ni ngei ang. Hmeuchhe thu dàwn takin, titla lo ta se, a lian ve tawh ngawt ang.

Tûn hnai deuh ațang khân Cindy hian rawn lèn a chîng thar a, ka duh engkim lo hre sa tawh a ni bawk a, îtawm taka awm dàn a thiam bawk si a, mipa rilru hi a buai ru map map thei hial a ni. Duhtâwka ka lo khalh hrep hnu a lo ni tawh bawk a, a taksa deh nawmzia pawh ka la hre vek. Hei tak hi ani pawh hian a hre chiang a, a taksa hi a rawn tawktarh țhìn reng a ni. Ka theih ang angin ka lo hnar țhìn; mahse, a har a ni, ka thisen zungzâm hian a lo hre hneh lutuk tawh tlat.

Ka ina a rawn kal apiangin lo kal tawh lo tùrin ka hrilh ziah, mi hmuhah a mawi loh bâkah a thil beisei hi ka hre chiang bawk si a ni; mahse, hmeichhe luhlul zet a ni a, ama hmaah chuan a fing hle bawk. Puii ka hruai haw loh tlai lah hi a hre thei phian lehnghal a, min lo châng ru țhìn emaw ka ti hial.

"I țawngkain min hnar mah la, i taksa chuan min hnar thei lo tih ka hria."

A dikna chen a awm ve tlat, chu vàng tak chuan a bulah ka awm ngai lo, a taksa tawk thei hlauh phei chuan ka awm duh lo a ni tawp.

"I bialnu ve hian i mamawh leh i khamkhawp a hlui thei lo che tih ka hria, kei chu i hriat kha, i tân ka awm reng a nia."

"Chutiangin Puii chungchâng sawi suh, ani chu nula thianghlim a la ni asin."

"Hmangaihna pawh in la chèn nange?!! E khai! Ka va khawngaih che ve leh!!" tiin a tlak karh karh a, chutah," I mamawh chu ka pe thei reng che a nia, kan hun hman dun țhin dàn lah i hre bawk a, i lungawina zânin a nih kha ka chêt țhin ni," a ti leh sep sep a.

"Sex hi inlaichìnna tihnghehna atân hian a lo pawimawh ber lo ve."

"Ni lo, ni lul lo ve, a pawimawh ber zâwk alawm."

Rinpuii nèn chuan chhim leh hmar ang hlauh an ni, ka bialnu ve ve, an va inang lo teh lul ém! Cindy hi chuan tisa takin min thlèmthlûk a tum char char a, ka chak lohna point a hre ém ém, he ka harsatna hi chinfel thuai a ngai a ni.

Rinpuii hi neih hmiah mai ka duh, ani hian ka harsatna hi a hre thiam ang. Ka duhzawng a ni a, ka nu duhzawng a ni bawk. Min duh a, kei pawhin ka duh, kan induh ve ve chuan a tâwk tùrah ka ngai; mahse, a bulah chuan ka la sawi lo. Nula fel a ni a, nupui atân ani tluk hi an awm lo ang. Kei chuan ka țhen ngai hauh lo ang, hmeichhe dang vàng hlauh phei chuan. A tisa tak pawhin ka duh a, min hîp ém ém bawk.

Kâr khat chawlh kan nei e, Puiite khuaah ka zin ang a, an chhûngkaw chanchin hriat chian ka tum ang. Pasal nei thei dinhmunah a ding tawh em tihte, a tel lo hian an che thei ang em tihte nèn lam. Chuan, a nu hnênah ka țuan tawh mai ang.

*******

Ka haw dáwn zànah chuan Rinawma a rawn lêng teh tlat!! Mak ka ti lutuk, a chhan chu kan inhmuh tawh ngai loh bâkah phone-ah pawh min be ngai tawh lo va, a lo lêng thut hi mak ka ti a ni.

"Lo lêng rawh."

Rawn lûtin," I va buai àwm ve? I dam țha em?" a rawn ti a, inthlahrun hmel zet hian a ding a.

"Buai lo ve, lo țhu rawh."

Chair-ah a țhu a, kei erawh chu ka thawmhnaw rem fel chu wardrobe-ah ka dah a, a țhen airbag-ah ka dah bawk a.

"Zin i tum em ni?"

"Aw, haw chhoh lawk ka tum a."

"A ni tak chu, School in chàwl dáwn a ni maw?"

"Aw."

Kan ngawi leh vang vang a, biak dàn ka hre lo va, biak vak lah ka duh hek lo, amah avànga ka natna kha ka theihnghilh tùr a ni lo.

"Tete, i chunga ka thil tihah khân ngaihdam ka dîl ngam lo che, a pawi ka ti tak zet a ni."

"Theihnghilh daih rawh, sawi tawh suh."

Thingpui ka thlit a, ka pe ta nghal a.

"Ka tina che tih ka hria, ka inchhîr khawp mai. Inchhîr mah ila tihngaihna a awm tawh lo. Amaherawhchu, khatia kan awm kha kan tân a lo ţha zâwk pawh a ni maithei, bialpa țha tak, kei aia țha i tawng tih ka hria a, ka lawmpui che," a ti ta duah a.

"Ka lâwm e."

"Eng vànga țhen che nge ka nih ka la hre thiam thei lo."

"Khatiang lam kha chu sawi tawh lo teh ang."

"A țha alawm. Kei pawh thla thar ațangin Champhai lamah ka awm tawh dâwn a, ka kal hma ngeia ngaihdam dìl che ka duh a."

"Ngaihdam dîl a ngai lo."

"Ngai teh reng mai. Ka inthiam thei lo a ni, sâwt tawh lo mah se, ngaihdam dìl che hi ka bâ a ni."

"Um, ka ngaidam che. Tluang takin Champhaiah chuan i han kal dáwn nia, inchhìrna rilru pu tawh suh, nun chu hetiang hi a ni alawm. A țhen an kal bo laiin a țhen an lo lang leh a, chutiang chu a ni, Pathian hian kan tân ruat a lo nei vek țhìn alawm."

Kawngkhàr a rawn ri a, Liansanga a rawn lût ve leh nawlh bawk e.

"Lo țhu rawh, thingpui ka lo thlit nghal ang che."

Thingpui ka pêk lai chuan ngun zet hian min lo en kar a, ka țhutnaa ka țhut hnuah erawh chuan Rinawma nèn min en tawn chhên thung, a mitmenga rinhlelhna lang chu ka hmu chiang khawp mai.

"I insiam zo tawh em?"

"Um, zo a ni mai."

Rinawma chuan nuam lo tih hmel deuh hian," Thingpui ka in zo ta bawk a, ka haw tawh ang e, tluang takin i haw dáwn nia, mangțha mai u," tiin a tho a.

"A la hma alawm."

"Ka chau deuh a, mut hma ka duh e."

Rinawma chhuah hnu chuan min be ta lo chuan ngawi rengin min en a, a mit pawh a khap mang lo.

"Thingpui kha in rawh, a dai ang."

"Kha pa khân eng nge a lo tih?"

"A lo lêng ve mai mai a nih kha."

"A va ngam zâwk ve!"

"Nia, a inchhîr a, ngaihdam min dîl a nih kha."

Min en rùn reng a.

"Mihring chuan thil kan tisual thei vek a, ngaihdam kan indîl a, kan inngaidam leh mai țhìn, chu chu kan nun a nia, ngaihdamna a awm loh chuan nun hi a famkim thei lo a ni."

"Chuan, i lo ngaidam leh a?" sehchilh deuh hlek hian a ti sup a.

"Tih theih dang ka nei lo!"

"Ka bialnu i nih hi!"

A hmela thinrimna lo lang chu ka hre thiam lo. Rinawma lo lèn avàngin a thinrim nge ni a ka lo ngaihdam avàngin a thinrim zâwk?

"Eng nge i thinrim chhan?"

Țawng lo chuan a ding thut a, min rawn pan a, ka țhutna chair bân rawn chelhin," Ka bialnu i ni tih theihnghilh ngai suh," a ti nghut a, min en chhuk pah rùn a.

"Ka theihnghilh miah lo."

"Mahse, kha pa kha i lo ngaidam tho a? Ka hre thiam lo che."

"Ka ngaihdam avàngin ka bialpa a ni leh dáwn tihna a ni lo, a thil tihah a inchhìr thu sawiin ngaihdam min dîl a, chu zawng chu. Hriat thiam loh tùr a awm em ni?"

"I la duh reng em?"

Ka bialpa hlui a nih vàngin a thîk a niang, kei pawhin Cindy ka thîk ang chiah khân.

"I thîk a ni maw?"

"Min chhâng rawh, i la duh reng em?"

"Duh lo."

"I chiang chiah maw?"

Ka hming ka hriat chian tluk zetin ka chiang maw le. Rinawma hi ka duh leh thei ngai tawh lo ang, a chhan chu ka duh ber ka tawng tawh miau alawm, ka kalsan thei tawh lul lo ang.

"Aw."

Ka bulah chuan a rawn țhu hnai a, ka koki fâwp zohin," Min tihlauthâwng a ni, chàn che hi ka duh lo, ka duh ngai lo ang," a ti sup a. Thaw huaiin ka sam chu a chûl a.

"Min chân dáwn lo."

"Zanin chu hetah ka riak leh ang aw."

"Het sala! A tihchi loh ang."

"Engtin mah kan awm ngai chuang hlei nem."

"I thinrim vàng mai mai a nih kha!"

"A rim a, a reh leh tawh!"

"Rinawma lo lèn vàngin maw?"

"Aw."

"I thîk chiang?"

"Thîk teh reng mai! I bul hnaia mipa awm apiang chu ka thîk vek!"

"A nih nangmah?"

Ka bâna chelhin," Min fiam suh," a ti sup a, ngun zeta min enin," Mipa dangin an hnaih che hi ka duh lo, i bialpa hlui lek phei chuan," a ti a.

"Ngaihdam min dîl ringawt, ka ti tak tak."

"Ka ring che, zan dangah erawh awm fàlpui tawh suh."

Leh ringawt. Ka awm fàlpui pawh a ni lo, intithu lutuk mai.

"Nang pawh Cindy hmu tawh suh."

"Ka duh chu nangmah hi i ni."

"Rin har ka ti țhìn!"

"Bible thu tluk zetin ring rawh!"

*ENGTIK NIAH EMAW CHUAN TU EMAWIN KUAH CHEIN I THINLUNG NÂ KEH DARH VEK TAWH KHA A RAWN REM KHÂWM LEH NGEI ANG*

☆13TH MAY☆ - 26 By Dingdi Pachuau

Innghèng rialin kan țhu a, ka kut erawh a awm mai mai lo. A khabe leh biang hmul țo țan leh deuh tawh chu ka tuai ka tuai a, hetiang khawih hi a nuam ka ti tlat zêl. A rim pà zet chu ka hîp vang vang bawk a, a rim ringawt pawh hian zùn a nei chiang alawm.

"Kan pahniha ka nuin min hmuh chuan mak a ti ngawt ang chu!"

"I haw chhoh tùr i la hrilh lo em ni?"

"Hrilh lo, țhàwn thut ka duh a."

"A nih, kan chanchin hrim hrim hi i hrilh tawh em?"

"Aih." Ka la hrilh miah lo.

"A nih, naktûkah chuan dâr eng zâtah nge kan chhuah ang?"

"Sumo hi tlai dâr 2-ah a chhuak țhìn a, chuang an tam ka rin loh vàngin ka hauh sa miah lo." Kan leng ve mai tùrah ka ngai, kâr tìr a nih vàngin mamawh lam an awm vak lo țhìn.

"Car-in kan kal ang chu!"

"A uiawm dáwn ém a, kawng a țha lutuk si lo va."

"Pawi lo, a chhiat phah lo tùrah ngai ang, tûkțhuan ei khamah, hma deuh hlekah chhuak ila?"

"I tih dàn dàn le!"

"Chuan, zanin chu ka riak ang aw."

"Tilui tlat zêl lo la?"

"Ka thlâkhlelh ang che hian min thlahlel lo tawp a nih hi!" tiin a tho ta daih a," Ka haw tawh mai ang, insiam ka la duh a," a ti leh a.

"I haw dáwn maw?"

"Um, nang pawh mu hma rawh, muttui le," tiin a chhuak ta nghal a.

A chhuak teh vut chu mak ka ti lutuk a, 'muttui' tih nachâng pawh ka hre hman hlei nem.

Țhutthlèngah chuan ka țhu a, ka va hlim lo ém! Ka mal ngawih ngawihin ka hria, dik tak chuan a haw dáwn a nih pawhin min kuah ang a, min fâwp ang a, zàwi sapin min mangțha ang a... A kuah kha ka mamawh a, a fawh pawh ka duh asin, haw mai tùrin ka la duh lo.

Ka mit ka chhîng vang vang a, tunah tak hian ka va mal tak, hetiang taka amah mamawh leh ngai hian ka la awm ngai miah lo, min kuah se, min fâwp se.

Kawngka a rawn ri a, ka meng nghal a, Liansanga chu a lo lût leh. Makti zet hian ka lo en a.

"Ka lungawi lo der a nih kha," tiin min rawn kuah a, rang zet hian ka lo kuah lêt nghal a, a hmui rilțâm zet chuan ka hmui a rawn zawng nghal bawk a. Ka duhthawh ang chiahin ani pawhin a duhthawh ve tho.

Min fawhna avàngin ka buai leh țan ta. Khawiah nge ka awm, tu nge ka nih tih lam ka ngaihtuah lo, he khawvêlah hian kei leh amah chauh kan awm. A rim pà leh rimtui zet, a lei leh a hmui pa hrât, zei zet si leh a taksa lum ham ham avàng chuan ka buai leh vek tawh.

A boruakin min chiah hneh ém avàng chuan ka khum lam kan pan tih pawh ka lo ngaihtuah lo, ka hriat ve meuh chuan ka hnungin ka khum mutphah a lo dek tawh, min mut tawh tihna a nih chu. A jacket hâk chu hmanhmawh zeta phelhin chhuatah a paih thla ta nghal a, chutih lai chuan kei pawhin khùr dar dar hian a kawr chu ka lo phelhsak ve bawk a. A kawr chu a lu lamah hmanhmawh zet hian a hlîp a, a rawn kûn hniam leh nghal zat a.

"Min chûl rawh, honey," a ti thâm sup a, a aw pawh a khùr ve dar dar mai, a chunga hetiang taka effect ka nei ve thei hi mak ka ti.

A taksa rihnain min rawn delh chuan ka lo thaw hak a, a kokiah lo chelhsakin a hmuiah ka fâwp leh phawt a, a koki ațangin a âwmah, chuta țangin a dul sek țangah ka chûl thla leh a, chuta țangin a hnunglamah ka chûl chho leh a, kan hmui erawh a inkalsan thei lo.

Tlêm chuan hlauhthawnna deuh chu ka nei nain min tihphùr ém avàngin ka hlauhna chuan min thlawh bosan leh nghal vat. Amah mamawhna leh châkna nasa tak ka nei a, tunah hian ka mamawhna chu chhàn nghal ni se tih chauh ka ngaihtuah.

"Ka duhin ka mamawh tak zet che a ni, Puii. Fawh che ka ning lo, tunah tak hian ka mamawh chein hmangaihna chenpui che ka duh a ni."

"I duh maw?" Ka thil sawi ngei pawh chu ka ngaihtuah hlei thei lo, ka vài riai mai.

Bu nghat pahin a nui suk a," Teh reng mai, fawh chhuah vek che ka duh a ni," a ti sup a.

A hmuiin min fawhna chu a dìmin a lum ham ham mai, nuam ka ti takzet, ka taksa a timûr ar ar a, ka taksa chhûngril thlengin min fan chhuak vek. A hnua ka hmuia duhthawh zeta a rawn fawh leh chuan ka tuiral vekin ka hria. A hmui hnâwng chap leh lum zet si a hman thiam dan em em te hi, damdawi chak tak ang maia ruih awlsam a ni, min hrai rùi hneh lutuk tlat.

"LS.." Ka hmui ațangin ka nghâwngah a fâwp a, chuta țangin ka bengkâwmah leh hmun dang dangah. Kei lahin nuamti zet hian," LS, aw, khalai kha...tàwp lul suh," tiin ka lo tur zêl a.

"I va rimtui tak! Puii, min tawk ve teh," tiin ka kut chu lain a âwmah a dah a, kei pawh chuan a nghâwngah, a kokiah, a âwm leh a dulte chu ka chûl kual a, nuamti zet hian a lo thaw ve hawk hawk a.

Engtik laiin nge ka kawr hâk lai chu a lo phelh hman ka hre lo reng reng, ka lace kawrhnuai nèn chauh ka awm ta, ît zet hian a thlîr a, chutah, a kut chuan ka âwmbâwr chu ka kawrhnuai chhanah chuan a rawn khawih ta, chuti chung pawh chuan a kut lum ham ham, dam thlup si chu ka feel thei tho si.

Chutah, chung lamah a hlîm chho ta, ka taksa lâwng a kuta a rawn hup tâk chatah chuan ka lo rûm hak mai, a kut chu a hmuiin a rawn zawm zat, awmngaihna rêng ka hre ta lo...

"LS...khawngaihin...ni lo...hetiang...hian...kan awm...thei lo," ka ti chhuak nawk nawk a, mumal tak pawhin ka sawi thei lo, ka taksaa a thil tih hian min nghawng nasa lutuk a ni.

A thil tih lai tàwpin min rawn en chhuk rùn a, kei pawhin ka en chho ve ràn, ka mitmeng lan dan tùr erawh ka suangtuah ngam lo, tisa châknain a khat tlat ang chu.

"I chiang chiah maw?" A aw chu a control nasa hle tih a hriat mai.

"Ka...ka...duh alawm," tiin a khabe hmul țo țan siar siar chu duat zetin ka chùlsak leh a, a hmui hnuai lam chhah lek lek pawh chu ka tuaisak nâ nâ a, zanin zet chu ka thianghlimna ka vawn țàng țáng țhin pawh hi ka vêng zo tawh lo mai ang, he pa ka duhna leh mamawhna nasa lutuk hian min tur nasa ém a ni.

"Ka tàwp dáwn em?" Min fâwp leh nghal zat a, uar zetin ka lo chhâng lêt ve leh nghal a. Chàwl datin ka kut pahniha a bianga dawmin," Tàwp tùrin ka duh lo che," ka ti ta sap a. Ka fâwp leh nghal, ka mamawhzia hi hre mawlh teh se, engmah ka pawisa tawh lo.

Ani pawh chuan min chhunzawm zat, ka hmuiah, nghâwngah leh âwmbáwrah chuan a fâwp thla zel a, kei lah nuamti lutukin ka lo rum ham ham, a hnuaiah chuan nuamti awmngaihna hre lovin ka lo tâl sek a.

Puan ka veng tawh lo tih pawh ka hre lo, a kut zei zetin ka mal leh mawngbâwr a rawn tawk tâkah chuan ka meng kâwk a, ka harh chhuak chiang kher mai.

"LS..." hnial ka tumna chu a hmui rilțâm zetin min rawn dang leh ta, châkna nasa lutuk avàngin nawmnaa len bovin ka awm leh ta, kan inkeih mawlh mawlh a, dik tak chuan he pa hi ka mamawh lutuk, zanin hian ka thianghlimna pawh hi ka ngaipawimawh thei ta lo.

A tàwp thut a, a țhu chhuak ta daih mai. Mak ka ti lutuk a, țawng nachâng pawh ka hre lo.

"Eng nge dik lo a awm em ni?" tiin ka tho chhuak ve nghal a, puan ka hmuh hmasak berin ka inkhuh nghal a, puan pawh a ni lo, ka kawr a ni zâwk.

"Puii, ka tihpalh a ni. Hetiang hi i chunga ti tùr ka ni miah lo. Nang chu nula fel leh thianghlim i ni a, ka duhna avàng ringawta nawr lui thei che ka ni lo. I vawi khatna a nih dáwn avàngin hriat reng tlâk, theihnghilh phal tawh miah loh tùra hlûa hmanpui che ka duh a ni, hetiang lo hian."

Ka bo map mai. 'Hetiang lo hian' han tih? Ka room lian lo tê leh ka khum zîm tak a sawina hi a ni thei ang em? Hmun dang, hun dangah pawh hmang ila tùn aia a nawmna tùr bîk a awm chuang dáwn em ni?

"A awmzia ka hre lo."

"Awm dùn ang," tiin a thaw hawk a, chutah," Ni lo, innei ang, min nei rawh," a ti ta sup a.

Eng thil nge a sawi hi?!!!!

"Eng maw???!!!!"

Min neih a duh maw? Inneih a duh. A va mak ve! A chiang chiah em? Nge a sawi ve mai mai zawk?

"Kan induh tawn a, kan inmil hle bawk. Inneih chu eng nge a dik lohna? Neih che ka duh a ni."

Makti leh ringhlel zet hian ka en chho há a.

"I fiamthu a ni lo maw?"

"Fiamthu lo, ka fiamthu lohzia chu Pathian pawhin a hria ang!"

"Inneih maw? Ni lo, thil theih a ni lo!"

"Eng vàngin maw? Ka duh che a, min duh bawk a, nun bul kan țan dùn thei alawm."

Ka kawr chu hain puan ka veng nghal a, khum ațanga thovin," Inneihna hi fiamthuah i ngai em ni? Damchhûng daih thil a nih hi, zan khat leka tih fel theih a ni lo," ka ti chhuak bawrh bawrh a.

"Puii, ka hre chiang tawh che alawm, ngaihtuah ve ta che."

"Kan thawk dùn rei tawh a ni maithei; mahse, kan la inzui rei lo."

"Innei tùr hian inzui rei viau kher a ngai lo, kum eng zât fakaua rei nge inzui i duh a?"

"Inneih thu sawi tùr ém chuan a la rei lo."

Rawn dingin min rawn kuah a, ka chhîpa fâwp zohin," Nang nèna awm dun hi ka duh a ni, ka thlahlelin ka ngai che a, chèn dun ka duh. I duh ve lo em ni?" a ti sup a, a mitmeng mi hìp theihna ngah zet chuan min melh chhuk ràn a, a thil sawi chu pawm se min tih hmel kher mai.

"Mawh, Puii, min neih i duh ve lo em ni? Kei chuan ka duh asin, ka thinlung, ka thlarau leh taksa hian a ngai ngawih ngawih che a, kalsan che a phal lo a ni, inneih chu i duh lo maw?"

A thu sawi chuan min tituiral. Mipa naupangin a thil duh a ngèn ngawih ngawih, phal mai tùra a dîl hi ka tehkhin ber. Ka duhna leh ka hmangaihna chuan a hnar thei lo, kei pawhin a bula chèna hun hman ka duh.

A nghâwnga kuahin a samah ka chùlsak a," Kei pawh i bula awm chu ka duh alawm; mahse,.."

"Khawngaihin, Puii, min neih chu duh mai teh. Hlim takin ka siam ang che, chhûngkua dinin fáte kan nei ang a, i duh leh mamawh apiang ka pe ang che," tiin ka hmuiah a fâwp leh zoh a," Khawngaihin, 'aw' ti hrâm rawh, ka engkim hi i tâ a ni a, i chhûngte pawh ka ngaihtuahpui vek ang che," a ti leh sup sup a.

"Ngawi lawk teh, ka nei dáwn che a nih chuan sum vàng ni lovin induh tawnna vàng ni se ka duh."

"A țha alawm, ka duh che. Fanu fel leh u fel tak i ni a, nupui fel tak i nih pawh ka ring. Puii, khawngaihin, ka enkawl che remti hrâm rawh, i bula awm a țha taka enkawl che ka duh a ni."

"Mahse, i ti thut thut deuh lo maw?"

"Ka nghâk rei tawh che ka ti zâwk. Ka kum ngaihtuah la, ka ti har zâwk khawp alawm. Nakkum, a kum leh ti ta zêl ila? Hun kan khawhral thlàwn mai mai dáwn asin. Tuna mamawh tawh lai chea nakkum la nghahte chu..."

A sawi dik ve reng. Nupui neih hi a hun tawh, a kumin a delh tawh bâkah sum a nei a, nupui fanau chàwmna a nei tawh.

Nichîn pawh khân a duh chuan ka thianghlimna kha a chèn thei chiang, kei lah khân ka hnar thei miah lo a nih kha, hnar a hnêkin ka lo pui sauh sauh zâwk a...

"LS, i ti tak tak em?"

"Puii, ka ti tak tak. Min nei rawh, ka tilungngai miah lo ang che, i tân pasal țha tak nih ka tum ngei ngei ang."

"Puii, ka hre chiang telh telh che a, ka duh tawlh tawlh che. I hmelțha a, i fel bawk. Nang nèna dam chhûng hun hman dun hi ka duh a ni."

Kei nèna dam chhûng hun hman a duh. Min va tihlim si ém!!

"Puii, min nei rawh, hlim takin ka siam ang che tih ka tiam a ni."

Liansanga, ka chhànna nghâkhlel zeta nghâktu chu ngun zetin ka en chho a, a lang țha tak zet. A hmui lang pawrh deuh lek lek chu duhthawh leh dimdawihna tel miah lova kan infawh vàng tih ka hria. He pa hi ka duh a ni, ka hmangaih ém ém bawk. Kei pawhin a bula dam chhûng hun hman ka duh, ni e, ka duhthusàm a ni.

" Aw le, LS, ka nei ang che."

*HMANGAIH CHE HI KA TUM LÂWK A NI MIAH LO; MAHSE, KA HMANGAIH CHE AVÀNG HIAN KA HLIM A NI*

☆13TH MAY☆ - 27 By Dingdi Pachuau

Kan vêng kan thlen chuan chhùn dâr 12 vêl chiah a ni, kawng a țha hran lova, kan tlân chak thei lo.

Inah chuan ka nu a lo awm a, Sangpuia pawh workshop-ah a lo awm mêk. Kawta motor ding ta chu, ka nu chu a lo chhuak a, min hmuh chuan makti zet hian," Aw Bawihte, i lo haw tùr min hrilh si lo va," a lo ti a.

"Nia, ka hrilh lâwk duh lo che a nih kha."

In chhûng kan luh chuan Liansanga chu ka hmêl hriattîr a, ka bialpa tih erawh ka hrilh chuang lo. Thingpui a lo lum mêk a, a siam zawhah Sangpuia chu a ko lût a.

Sangpuia leh Liansanga chu an titi nghal bawrh bawrh a, ka nu chuan zochhangban a lo kang bawk sia, ka ei țeuh mai. Liansanga tân a tui lo dâwn lutukin ka hria, a thingpui a thlum bawk si lo nèn, kurtai ka chhawpsak a.

"U, dressing table chu ka siam mêk a."

"A ni maw? Ka va hmu châk... Nang hi i lo hmanhmawh lutuk a ni lo maw?"

"Ka àwl lai tak a nia, naktûk ațang chuan ka hman leh tawh dáwn lo va."

Chaw ei dawhkàn leh bêlbâwm pawh chu a lo siam thar vek tawh a, a siam mawi reuh lutuk. A rawng thlan a fuh bawk a, Sangpuia siam a nih ka ring lo lek lek.

"I kut hnu a va dak nalh ve!"

Liansanga ațanga fakna dawn chu a nuam ngawt ang chu.

Sangpuia chu a nui var var a," Ka làwm e," a ti phawt a," Ka uluk ve bawk a, ka theihtàwpa uluk leh belhchiandâwl tùrin ka siam ve țhìn," a ti a.

"Chu chu a țha, mawi ringawt, belh chet dâwl lo hi a awm ve a nia."

Chawhnu lamah chuan Sangpuia hna thawhnaah chuan Liansanga chu a awm ve ta reng a, pawi lo. In chu ka tifel a, Liansanga room tùr ka singsa bawk. Ka room-ah ka awmtîr ang a, kei chu ka nu bulah ka riak mai ang.

Chawhmeh ka hàwn chho nual a, ka nu chuan," I lo hàwn duh mai mai a, i chhuk hunah i lei thar leh vek a ngai dáwn asin," a ti a.

"Pawi lo, a thar chu a țha zâwk alawm."

"I țhianpa hi engtia i țhianpa nge?" a rawn ti sar sar a.

"Ka school thawhna Principal a nih hi."

"A ni maw? E khai, a va zir sâng àwm ve a?"

"Aw, sâng ve thawkhat. Principal a nia, a school a ni bawk, Aizawl lam mi a nia."

"A va zia lo ve aw! I level-pui biakin asin ka lo biak mawp mawp le!"

"Pawi lo, nu, a duh daih zâwk ang. 'Pu' kher te kha i lo tum ang e, a ngai miah lo."

A hnuah Workshop-ah chuan ka va kal ve a, khâwl an lo hmang bawk sia, a bengchheng khawp mai.

"In va bengchheng ve!"

"Nang deuh."

Rum deuhin ka melh phawt a, Sangpuia thil siam chu ka en leh ta zâwk a.

"A va mawi dáwn ve!"

"Siam ve lêma mawi lo deuha siam chu ka duh lo va."

A siam zo țêp tawh, a tâwk reuh dáwn khawp mai. Ka duh dáwn reuh lutuk, rawng a thlang thiam țhìn bawk a, a nalh reuh khawp ang.

"Hetiang hi eng zât vêlin nge i siam țhin?"

"Ka la siam ngai lo, a man min pe dáwn tihna em ni?" nui chung hian a ti a.

"Hlawh nei zâwk a nih kha, dîl ngei ngei rawh," Liansanga chuan a lo ti zuk a.

"I chhiar dàn azir a ni ang chu!"

"Nuai hnuai vêl a niang."

"I va sual tak!"

Khaw thim hma deuh chuan a siam hrim hrim chu a peih fel mai, rawng erawh kah vek a la ngai thung.

Zanriah ei hmain an inbual a, khua a lum avàngin kei erawh chu mut dáwnah ka inbual ang.

Zanriah kîl lai chuan Sangpuia chuan," Kan vêng Primary Head hi nakkumah a pension tawh dáwn sia, tu tak rawn awm ang maw?" a ti chhuak a.

"Bawihte, dîl ve la?"

"Head hna chu maw?"

"Aw."

"Ka qualified lo, bâkah hotu ber nih hi ka tum ngai miah lo."

"A nih loh pawhin, kan vêngah hian thawh tum ve la?"

Ka ngawi ta rih.

*******

Kan khuaa kan awm chhûng chuan Sangpuia hna thawk a pui țhìn, zan khat chu chakai kan chhitpui bawk. Hna a thawk ngai àwm si lo va, a nêp ka rin teh lul nèn, a infit khawp mai.

Dâr 9 vêlah in kan thleng a, kan man tam reuh phian. A nuam ve hranpa reng reng a, vawi khat mah a la chhit ngai loh vàngin kan chhitpui a ni.

Huanah, thlai hmunah ka kalpui bawk. Thlâma kal a chawlh a châk a, ka chawlhpui bawk. Nuam a ti hle a, khua a lum avàngin a thlan erawh a luang zaih zaih, ka khawngaih roh khawp; mahse, a châk miau si a.

"Thingtlâng nun hi chu a hahthlâk asin, ni sensa hnuaiah thlantui luang zawih zawihin hna kan thawk a. Nilêngin, hah pawh sawi thei lovin hna kan thawk a, buh leh thlai a țhat loh phei chuan buaithlâk deuh mai a nia. Kan hah man hi kan têl tlêm thei teh asin," tiin ka hrilh ve malh malh a.

"Ni ngawt mai; mahse, hei hian nun dik tak a tilang chiang berin ka hria."

"Thlai thar chhuah lah khawpui bazâr nuhovin a man min fix-sak tlat chuan tih theih hi kan nei tlêm asin. A tlâwm thei ang berin min lâksak a, anni'n a man lêt thawk an han hûi țhìn hi chu, rilru a na ve duh teh a nia. Thlai hi ni sa hnuaiah, kawng chhoah kan phur țàwng țáwng a, man tlâwm têa hralh hi chu tha a na duh lutuk."

"Aw, chutiangte chu țang rual ula, pe duh lo ula?"

"A theih ringawt bîk loh. Mi rethei tê tê awm khâwm kan ni a, pe duh lo ila, a nghei tùr chu mi rethei bawk. Kan dinhmun hi a buaithlâk asin."

"Ngaihtuahna i tithui hle mai."

*******

Naupang an exam mêk a, Liansanga pawh Delhi-ah training tùrin a kal leh tawh. Kâr khat hun a hmang ang, a thang chhúngin exam an zawh dáwn avàngin kei pawh ka haw chho ang chu.

Ka nu pawhin kan inngaizawng tih a hre tawh a, min lawmpui a; mahse, kan dinhmun ngaihtuahin ka tân a sâng a ti deuh a, min kawp mai mai a hlau. Liansanga'n inneih a duh tih ka hrilh chuan tûn hnaiah chuan rem a ti lo phawt. A chhan chu fanu pakhat chauh min nei a, zahpuiawm lova min inneihtîr a duh, a theih ang anga inkhâwl ve a nakkum lama tih a ti deuh tlat, ka hnial lo.

Tlaiah Angaihi'n min rawn phone a.

"LSa awm lai a ni em?"

"Ni lo, Delhi-ah training tùrin a kal."

"Amahin maw?"

"Aw, zirtîrtu dang a hruai lo."

"Mâwli leh! Zirtîrtu ka ti lo, hmeichhia hruai a nei em?"

"Nei lo."

"Zànah ka rawn lêng ang." A titàwp hmiah. He nu hian eng a hria chu ni maw?

Ka hman veleh LSa ka phone a, a ring ve char char a, min chhâng thei lo. A hnuah phei chuan a ring thei lo, 'switch-off' a ti tlat. A buai deuh a ni maithei, training lah chu naktûkah an țan dáwn chauh bawk sia, buai viauna tùr a awm dâwn em ni le?

Chaw ei khamah Angaihi chu a lo kal a, a rawn thinrim hmel khawp mai.

"Liansangthlàwna kha ka rin a ang lo tawp mai!"

"Eng nge ni ta?"

"Țhenawmnu nèn an kal dùn chiang!"

"Engtin nge i hriat?!"

"Hei, en ta che," tiin a phone chu a rawn phawrh a, thlalâk min hmuh leh a.

Cindy IG bawk. Liansanga nèna an thlalâk a ni. Dâwt a nih ka ring lo, a chhan chu LSa sam pawh tuna a sam put dàn chiah a ni! Mi dang dangte nèna an lâk pawh a awm tho. An hlim hmel hlawm khawp mai.

"An kal dùn pawh a ni kher nâng."

Ani chuan," Cindy hi tûnlai an inah ka hmu ngai lo, an ințhen a nih ka ring. A nih loh tal pawhin, an intithiam lo a ni tal ang, LSa hi a zui ve tih a chiang lutuk," a ti leh a.

"LSa hian min bum duh àwm lo e."

"A bum duh kher nâng che, i hria tih pawh a hre lo tawp ang chu!"

Ka awih thei lo. LSa chuan nupui atân hial min neih a duh a ni a, min bum duh kher lo ang, Cindy'n a zui tih pawh chiang takin ka hre hlei nem.

"LSa hian a sâwm ve pawh a ni maithei asin."

Ka awih miah lo, engah nge a sàwm ngawt ang? Engti tùrin nge a sàwm ang?

"Ka zâwt dáwn em niang?"

"A pha tho ang."

Liansanga number chu ka hmet chhuak a, ka call a, a ring ta e.

"Puii?"

"Aw, LS, tlaiah khân ka rawn phone che a, min chhâng thei lo va."

"Ka buai lai kha a niang, ka battery a low lehnghal bawk a."

"A zia lo hle mai, mi dang hruai i nei em?"

"Nei nâng, engati nge a?"

"Ka ti mai mai, naktûkah tiraw training kha in țan dáwn?"

"Aw, vawiinah kan hostel hluite ka va fang zuai zuai a."

"Lung a lêng duh àwm mang e!"

"Nia... Ka ngai khawp mai che, he khawpui bengchheng zet hi a ninawm ka ti țan dêr mai."

"Kei pawh ka ngai che a."

"LS, eng nge kan ei ang?"hmeichhe âw a ni!! Tu nge ni ang le? Cindy. Cindy a ni ngei ang, a ni chiang.

"Tu nge a?"

"Țhian hlui, heta Delhi-a awm a nia, kan inhmu fuh a."

Ka rilru a tihnatzia chu hria se chuan dâwt min hrilh hauh lo ang maw le!

"A nih tak chu."

"Ka bulah awm la ka ti hle mai."

Zànah chuan muhìl lovin ka meng kar mai. Cindy thlalâk up chungchâng kha hrilhin ka zâwt mai dáwn em ni ang? Hetia thil chiangkuang hre lova awm reng chu a hrehawm ka ti tak zet.

*Cindy a lo kal ve em?* tih ka type a, send lovin ka delete leh a, ka type țha leh a, send ngam leh lovin ka delete leh bawk a.

Ka muthilh theih ngang loh avàngin ka call leh ta nge nge. Dâr 10 lai a ri tawh, khulam chu a la tlai chuang lo ang chu maw, thil chiangkuang taka hriat ka duh.

"Hello?"

Hei chu hmeichhe aw a ni tlat, nichina ka phone laia rawn țawng ve kha a ni, Cindy a ni chiang, a aw a tidanglam lui vêl a ni! Phone ațang pawhin an awmna chu a bengchheng pha deuh hlek a, music pawh a ri ruai ruaiin ka hria, an party a ni ngei ang!

"LSa ka be thei ang em?"

"Toilet-ah a kal lawk a nih hmel. Eng nge ni ta? Tu nge i nih?"

Min hre lo der vêl. Ka hming a save ațangin a hre reng àwm si a, a va ngeiawm tak.

"A ngai lo mai, naktûkah a ni mai."

"A bialnu maw?" tiin a rawn nui har har a.

"Aw, 'Puii' tiin i lo hrilh mai dáwn nia."

"'Bialnu ka nei lo' a ti ve sia?"

Ka dah ta daih. A va zahthlâk tak! Min rawn biak loh chuan ka be tawh hauh lo ang. Zanin zawng, ka muhìl dáwn lo chiang a nih hi. Min rawn phone a nih pawhin insawi fiahna tùr chu a ngah ve khawp ang!

*A CHÂNG CHUAN KAN DUH LEH KAN BEISEI ANG NI MIAH LO THIL HI A LO THLENG VE FO ȚHÌN*

☆13TH MAY☆ - 28 By Dingdi Pachuau

Zànah ka muhìl lo chiang, khumah ka let ka let a. Ngaihzawng vawi hnih ka nei ve tawh a, min la bum ve ve. Ka nei tawh lo chiang ngawt ang.

A tûkah chuan Zara'n min rawn sâwm teh tlat a, pawi ka ti lo khawp mai. Mahni chauh chuan thil eng eng emaw ka ngaihtuah kual vak vak a, bula titipui tùr awm chu nuam ka ti zâwk.

A titi bawrh bawrh a, a chângin ka chhâng ve zeuh zeuh. School kan thlen erawh chuan mi dang an lo awm ve nual tawh a, min lo fiam zak zak hlawm a, kan inkàwmngeih bîk tih an hriat avàngin mi an fiam duh bîk.

"Rahsivéng lama mi ai chuan a zia daih zawk alawm."

"Ti ve tawh mai r'u, in pahnihin school in rawn kal rual thei ang a."

"Kan lal ve thei dáwn asin, refreshment leader-ah ka la awm ngai si lo."

Hetiang vêl hian min lo fiam, kan nui mai mai.

Nilêngin min rawn phone lo va, kei pawhin ka phone hek lo, ka phone tawh dáwn lo. Rilru natna tibelhchhah mai mai tùra zu call ka tum lo.

Chhùnah Angaihi'n thlalâk țhenkhat min lo thawn leh a, 'nichin lawka a post' a rawn ti. Chutah chuan amah chauh a ni nain a caption ber mai chu a rawn dah pawimawh.

#Duh_berte_nèna_hun_hman_dun_tluka_nuam_a_awm_thei_lo.

#nuam_ka_va_ti_si_em!

Nia, nuam a ti ang chu, a thil sawi khi a dik vek. Duh berte nèna hun hman chu nuam teh rêng e, rilru a hlim veng veng alawm; mahse, tunah chuan kei zawng, ka vànduai a nih hi.

Thlalâk chu ka en deuh reng a, chhiat hi chu a chhe lo thlâwt. Sawisèlna tùr reng ka nei lo, mipa duh tinrêng chu a kim vekin ka ring.

Message ka dawng nawlh mai. Ka number save a ni lo, Number ringawt ațanga message dawn leh call dawn hi nuam ka ti ngai lo.

*Ka thil hrilh che kha i la hria em? LSa hi a duhkhawp pawh i hlui thei nange? Bànsan nghal rawh, mi a râwp dàn ém ém hi, a mak ka ti zâwk! Mipa i tikhawngaihthlâk lutuk. Ka lo enkawl ve tawh ang e*

Hmm, Cindy a ni chiang. A va râpthlâk ém!! Hun chu an lo hmang dùn chiang a nih dáwn hi!

Tlai bànah chuan ina haw nghal vat lovin gate pâwna dàwr têah ka pêng a, ei tùr chhang ka lei lawk a, a chhuah leh mai theih loh, a neitunu nèn chu a tawng barh barh a, ka țhu leh rih a.

"Eng tikah nge exam in zawh theih ang?"

"Kan zo har lo ang, tûn kâr tâwpah hian kan zo ang."

"A nih tak chu. A reh leh riai rih dâwn a ni maw? In school kal loh hi chuan a reh thei lutuk a."

"Nia, kan chàwl rei dáwn bawk sia, kan inhmu khât tawh hle rih dáwn a ni."

"Principal hi a awm nange?"

"Aw, a training a."

"A fel hmel ngawt mai, khawpui mi nge nge chu an lo hriat deuh bîk a lo nih hi."

Zànah dâr 9 pelhah min lo phone ta.

"Hey, min lo ngai tawh em?"

A va zak lo tak ém! Ka ngaih chu phût lul suh se.

"Nangin min ngai em?"

"Teh rêng mai, ka chau lutuk. Nilêngin kan țhu tlawk tlawk mai a, boruak lum bawk nèn. I bula awma kuah vawng vawng che ka châk a ni!"

"Cindy a lo kal ve tiraw?"

A ngawi ta deuh dat a," Aw," a ngawi deuh vang vang a, chutah," Engtin nge i hriat a?" a ti leh a.

"Ka hre tawp."

"Min lo enthla reng a ni lo maw?" tiin a nui hawk a.

"Min hrilh i tum miah lo va?"

"Ka hrilh che chuan țûl lovah i thîk leh ringawt ang a."

"LS, ka rin i lo ang lo khawp mai."

"Puii, chutiang engmah a awm lo asin. A lo kal ve ringawt chhan hi ka hre miah lo, ka sâwm miah lo a nia."

"Sâwm lo mah la, in awm dùn tho a ni lo'm ni?"

"Puii, chiang takin ka lo haw hunah ka hrilh fiah vek ang che, rinhlelhnain i khat leh tawh a nih kha."

"Rinhlelh tùrin i awm a niang chu!"

"Puii, ka chàu a nia. Ka lo haw hunah ka hrilh fiah vek ang che."

"In mu dùn em?"

"Puii!!!" a rawn ti vîn țhawt a.

Mut hmunah chuan ka mittui a tla zawih zawih mai. Hetianga min bum duh hi a nâ ka ti thlâwt, kei pawh ka rinawm a, ka duh a, a mi rinhlelh tùr ang zâwng hian ka awm duh lo a ni ve a, mi a chhàn lêt dàn hi a nâ ka ti.

Message ka dawng leh a, Cindy bawk.

*Ka va khawngaih tak che ém! Zanina kan thlalâk hi i en duh em? Ka rawn send dáwn che em ni? Nuam a ti khawp mai*

*Hei aw, bànsan hmak la, kei hian a lungawina ka hre ber, ka lo enkawl tawh ang e*

Thlalâk chu a rawn thawn tak tak. Download ka tum miah lo nain automatic-in a lo in-download hman a, ka hmu nghal.

Khumah an awm a, Liansanga chu a kâwng achin chunglam a lang a, a muhìl a nih hmèl. Kawr ha lovin a awm a, Cindy pawh chu a ruih hmel khawp mai. An rui ve ve a niang, Cindy zawng a la harh deuh zâwk a nih hmel.

*Hmu maw? I chan phâk a ni lo, i phû tâwk hre teh*

Cindy number chu ka block nghal daih. Min rawn diriam a min rawn hmusit zui zêl tùrin ka duh lo. Liansanga reng reng pawh dâwt a va ngam ve!! Hei, evidence țha lutuk ka nei tawh, a insawi fiah mawh tawh khawp ang chu. Rawn phone leh teh se, a hre khawp ang.

Ka ngaihtuah chiang cheuh cheuh a, duh lo viau mah ila, he pa hi ka thlah zalen a ngai a ni. Kei chuan ka hmangaih a, ani pawhin Cindy a hmangaih bawk a. Tunah Cindy a free tawh a, hun ka pêk an ngai. Tunah pawh an awm dùn reng tawh a, an inkârah ka inrawlh lo ang. Ka hmangaih avàngin ka thlah zalèn ang.

Naupang chu exam zo thuai thuai se ka ti khawp mai. Ka hun hman chu ka ning ngawih ngawih, Liansanga min rawn phone leh hmasak berah chuan kan inbe hlei thei tawh lo, ka thinrim a, thinrim takin ka chhuahchhàl, eng vak mah a sawi hman lo. Ka thinrim chiam loh chuan min thlêm ang a, ka rilru a tinêm palh ang.

"LS, kan inkâr hi titàwp mai ang, hetiang ringawt chu ka tuar thei tawh lo."

"Eng thil nge i lo hriat leh tâk a?"

"Engkim. Buai tak tak hmain ințhen ang."

"Ințhen i duh maw?!!!"

Duh lo mah ila, ka țhen a ngai. Ni ila, innei mah ila kan hlim chuang lo vang, inringhlel reng renga hun hman zawng a hahthlâk dáwn ém mai. A hmangaih ber a zalèn tawh, ka hmangaih ber hi ka thlah zalèn ve bawk ang.

"Aw."

"Ka lo haw hunah sawi fel teh zâwk ang." A aw ațang chuan a chauh hmèl riau ka ti, Cindy nèn hun an hmang ãm deuh ang a, a chàu a ni ngei ang chu!

"Ni lo, tunah, tunah hian ințhen ang."

"Puii, kan kâr a hla rih ém mai, thu tlûkna siam rum rum teh suh."

"Hetianga ințhen hi a țha zâwk e."

"I duh maw?"

"Aw," zawi tê hian ka ti sap a.

"I duh phawt chuan le!"

Kha maw, ințhen a duh loh thu a sawi miah loh kha, min thlêm lo, min hmangaih leh min duh thu pawh min hrilh hek lo. A chhan chu a hmangaih ka ni lo miau va, min mutpui theih loh vàng maiin min duh a ni, min ning ve tawh pawh a ni thei bawk. Bâkah, a hma kha chuan Cindy khân a pasal a la țhen tlat lo, tuna an ințhen chhan pawh hi a pasalin Liansanga nèn an chanchin hi a hre ve ta pawh a ni maithei asin.

*******

Result puan dáwnah pawh ka chhuk tawh lo, ka hna ațangin ka bâng nghal bawk. Zara bulah ka bànna lehkha ka dah a, a chhan min zâwt a, chhûngkaw lam buaina niin ka sawi tawp. Hna ațanga ka bàn thu hi ka nute pawh ka hrilh hran lo, Angaihi bulah dàwr nghah tùr min lo zawnsak ve tùrin ka ti a, ani pawh chuan Liansanga nèn kan ințhen chu pawi a ti viau nain min sawisêl lo. Nat ka tum lo viau a; mahse, ka taksa leh rilru chuan a tuar khawp mai.

Ka in luaha bungrua zawng zawng Angaihi puihna zârah ka la chhuak vek a, Angaihite in thar bulah, in hnuai te reuh tê ka luah. A tê reuh lutuk a, bungrua ka dah kim ve biai sia, a khat reuh tawp.

Ni tin Angaihi bulah dàwr ka nghâk țhìn, Liansanga hmuh ka hlau thei viau mai; mahse, a vâng khawp. Ka number ka thlâk avàngin min rawn call chu ka ring ngam lo hrim hrim, țhentu zawk ka ni bawk a, min rawn hnimhnaih leh pawh ka ring hran lo.

Thla khat ka thawk ve ta. Ka school hlui ka ngai ru vawng vawng țhìn, tunah hian school an țan chho leh mêk tawh àwm sia. Khatia bàn thut kha ka duh bîk miah lo; mahse, Liansanga ka hmu leh țhìn tùr kha ka duh lo, ka rilru a tina thar mai mai ang, ințhen chuan inhmuh loh vang vang ka duh ber.

Angaihi chuan," Mipate hi chu an tam ém mai, lungngai miah suh. Chhantea a awm alawm, ani kha kan kherh ngat ngat dáwn nia," a ti a, ka nui hak ringawt.

"Sawi teh suh, a zahthlâk. Ngaihzâwng chungchâng chu sawi tawh lo rih teh ang, ka hnê tawh rih e."

"Nia, chawlh rih pawh a pawi lo ve; mahse, chawlh hlen loh tùr, pasal tùr i la mamawh dáwn sia."

"Pathian ka dîl tawp mai."

"Dìl pawhin nghah tlawk tlawk tùr tihna a ni chuang lo, țan i lâka tha i thawh ve a ngai tho."

Zan tin deuhthaw Angaihi hi a lo kal, a riak deuh reng bawk. Tlangvâl inlêng ka nei ngai lo va, a țha ka ti phian. Inlêng neih pawh ka peih lo, mipa hrim hrim hi ka kàwm peih lo ve, an rilru a mak thei si.

Sangpuia thil siam pawh a tluang viau, a siam ațangin a hmuh pawisa a dah khâwl zel a, kei pawhin khâwl ka nei ve nual tawh bawk a, in extend an sawi ri tawh. Kei ka haw chho hman si lo va, an buai ve ngawt ang chu.

Zànah ka nuin min lo phone a.

"Bawihte, naktûk ațangin in kha kan ti țan dáwn a."

"A nih chu, in buai reuh ngawt ang a?"

"A, buai vak lo ang. Sangpuia leh mistiri pakhat an awm ang a, buaina tùr em em a awm nâng. Taka, school-ah khân i thawk tawh nange a?"

Engtin nge a lo hriat reuh ni?!!

"Aw, ka bâng daih a."

"Ngati nge a?"

"A, ka bâng mai mai. Dàwr ka nghâk a, Angaihi bulah."

"A nih leh, Liansanga nèn in ințhen a ni maw? Chu vàng chu em ni i bàn daih?"

"Aw, ni pah tho."

"Eng vàngin nge in ințhen ringawt a?"

"A, sawi tùr a tam mai. Nu, ka la hrilh vek ang che aw."

"Um, vawiinah Liansanga a lo kal a, ka hre ve chiah alawm."

Kan vêngah a han kal maw? A va zak lo tak! Tih tùr a nei mawlh si lo va, eng nge a han tih ni?

"Eng nge a lo tih a?"

"I awm a ring a nih ka ring, zanriah ei kham khân a haw a."

"Nu, ka phone number-te hi i lo hrilh mial lo maw?"

"Hrilh nâng, bâkah, in ințhen tih pawh a sawi chuang lo, school ațangin i bâng tih chiah a rawn sawi a."

Chu pa mai mai chuh!!

"Nu, ka lâwm e aw. Tunah hi chuan chawlh rih ka duh ber."

"A țha alawm. I tâna țha tùr zâwk pawh a ni maithei asin tiraw? Engkim Pathian kutah kawltîrin thlen la, mipa i tâna a ruat ngei chu i la tawng mai ang."

"Ni e."

Nu nge nge, a thu sawi chuan min hnèm dap dap e. Pathianin min ruatsak ngei chu ka la tawng ngei ang chu, mi bum hmang lo, lêrh lo leh insûm thei ka duh ta ber mai.

*HARSATNA A LO THLENIN PEHHÊLNA TÙR ZAWNG LO LA, HUAISEN TAKIN LO HMACHHAWN ZÂWK RAWH*

☆13TH MAY☆ - 29 By Dingdi Pachuau

Ka ni tin hun hman chu a hahthlâk lo kher mai. Rilru hman tehchiamna tùr a awm bawk si lo va, a châng chuan ka ning lek lek a ni. Zirtîrtu nih kha nuam ka ti zâwk, dàwr nghah chu hman deuh si, hman lo deuh siin kan awm a, a nuam ka ti fahran lo; mahse, ka hna a ni miau si a, hlawh ka hmuhna a ni tlat, ka thawh a ngai.

Mipa hi ka melh ngai tawh lo tluk a ni. Dàwra rawn kal hi chu lo ngaihven loh theih an ni lo va, ka lo bia a ni mai. Dik tak chuan he khawvêl ata hi bo vek se ka ti, Sangpuia tiam lohin. Bum hmang vek an lo ni, an insawi rinawm thei si.

"I hman lo ve thei sia, zanin chu chhuak ve ila?"

"Eng ti tùrin maw?"

"Aw..chawhmehte i lei ve ang chu, bâkah wholesale dàwr ka hre thar bawk a, thawmhnaw pawh kan en ve ang chu ka ti?"

A tidik chiah. Ka buaizia hi, dàwrah buai lo deuh, buai angreng deuhin kan awm a, in lamah kan haw har si. Zîngah dàwrah kan kal nghal a, dàwrah tûkțhuan kan ei, tlaiah dâr 5 vêlah in kan thleng leh a, insûk pawh zànah leh sunday-ah bâk ka hman ve lo.

Thla khat chuang âwrh chauh la nghâk mah ila ka ning deuh hman tho nia, kan in ka ngai vawng vawng. Ka nu ka ngai, nawmsam loh deuh phei chuan ka țah a chhuak tlat, kan khuaah zirtîrtu post ruak hlauh se ka ti.

Angaihi chuan chawhmeh khârchhâwng țhìn a lo hre țha khawp mai a, chumite in bul chiahah chuan wholesale dàwr pawh a lo awm. Chawhmeh duhzâwng kan lei zawh chuan thawmhnaw chu kan en leh a, lei pawh ka tum hran lo, ka en ve mai mai a ni.

"Hei hi, a mawi i ti em?"

"I inhmeh ngawt ang!"

"Inang nei ila?"

"A țha ngawt ang, min lei la?"

"I duh tak tak em?"

"Duh e, a mawi lutuk!"

Inangin, a rawng pawh inang kan lei. Min leisak a nih ber chu, a dum a nia, dàwra hâkah a țha viau ang.

In kan thlen chuan," Chhantea'n a lo be leh tawh che em?" a ti a, Liansanga nèn kan ințhen hnuah vawi khat chu min rawn bia, chu pawh rei lo tê tak tak.

"Be lo."

"A buai ve thei ém a ni. Mizoram lamah hian thawhna tùr hi ngaihtuah ve daih se ka tihpui ngawt mai."

"Engati maw?"

"Chance in nei thei ang chu!"

Ka nuih chiam.

"Ngawi teh, mipa hi ka ning rih, sawi tawh lo teh ang, ngaihzawng tùr atân phei chuan tumah hi ka melh peih tawh lo."

Min melh ralh a, " A țha alawm. Nih leh, Sangthlàwna'n lo be leh ta che se la?" thu tak zet hian a ti a.

"Min be tawh dáwn si lo va."

"I hre ngawt em ni?"

"Kan ințhen tawh hi, keimahin ințhen ka rawt a nia, a pride chu ka khawih che ve dat ang chu."

"Mahse?"

"'Mahse' a awm lo."

A sawi zawm tawh lo, kan ngawi ve ve. Dik tak chuan a rinawm lo hmasa zâwk ka ni lo va, a hrehawm ti zâwk pawh ka ni ngei ang. Ani chuan hrehawm a ti dáwn lo sa, a hmangaih ber a bulah a awm miau a.

Ka nu mamawh lam tùrin a rawn zin lawk a, ka in luah chu a awmna ka hrilh chiang a, a chhan chu kei chu ka haw tlai leh dáwn bawk si a, eirawng lo bâwl se ka duh bawk sia, bâkah lo awmna tùr hmun dang a hre chuang lo a ni.

Dàwrah chahbi a rawn lam a, mamawh lei tùrin a chhuak leh nghal. In ka thlen chuan a lo inpeih vek tawh a, ka inbual hmain chaw kan ei phawt a.

"Ni tin vawiin anga tlaiah khân em ni in bàn ve chauh a?"

"Aw," ngaihtuah chiang mang hlei lo chuan ka ti a.

"A țha ka ti lo tawp mai. Kan vêngah zirtîrtu hna dîl mai teh, hahchawlhna hun i nei tlêm lutuk, kha i hmel pawh a dik miah hlei nem."

"Nu, chutin hna ruak a awm ngawt nâng. Chubâkah, haw tlai mah ila dàwrah kan hah hlei nem, min ngaihtuah reng reng suh."

"Sangpuia ngaihventîr tùr a nih chu. Kan bula awm tùr hian ka duh bawk che a, Sangpuia nèn chauh chuan khua a har țhìn tlat."

"Nia, Sangpuia i lo ngaihventîr ang a," a ngaihțhat nân chuan ka ti ve a.

Zanriah ei kham lamah chuan a thawmhnaw min țhuisak chu min pe leh a, a lian hluai tawh lo va, ka taksa fit tâwk chiahin a țhui ve tawh.

Ka inhmeh reuh phian mai, dàwrah pawh a hâk theih ang chu. Nu puan țhui thiam neih chu a manhla bîk asin, țhui man engmah chawi a ngai bawk si lo.

"Bawihte, Liansanga kha a lo kal khân a chêr reuh viau asin, 'Ka damlo reng a,' a ti a."

Cindy nèn nun an chèn nasa lutuk a taksain a tawrh phah a nih dáwn chu. Taksa tlin tâwk chu hriat ve tùr asin, zu leh sa nèn an khawsa dùn emaw kha a niang a, a taksa chuan a tuar ve ang chu.

Hmm, ka rilru pawh hi a dik lo zo vek tawh. Suamgtuahna țha lo pui pui ka nei zel tawh a, ka rilru hi a hrisêl mawlh lo, amah Liansanga vàng vek.

"Mihring, damlo ve thei tho a nia."

"In inkâr chu hre lo mah ila ka khawngaih roh khawp a, a hmel kha a hlim lo bawk sia."

A tider mai mai a nih chu. A hlim lutuk a hlim lo der zâwk a niang. Angaihi tih dàn takah ' Sangthlàwna' mai mai chuh! Fîmkhur nachâng leh mahni inenkawl țhat nachâng hre rual chu a ni tawh asin, a pêl tawh lek lek zâwk maw le.

"In ințhen chhan kha min la hrilh miah lo a nia."

Zêp nei lovin ka hrilh ve vek ta a, ani pawh chuan dawhthei takin a lo ngaithla a, ka sawi rei khawp mai.

"A nih chu. Thu dik tak a nih phei chuan i thu tlûkna siam hi a dik chiah ang; mahse, ka'n ti leh hrâm ang e, i hnênah hian a insawi fiah duh a nih chuan hun i pe tho dáwn nia aw. Ințhen tawh mah ula thil dik tak hriat tawn ve ve chu a țha tho, inhaw deuha ințhen hi a țha ka ti lo va."

"Nu, ka haw hlei nem. A hmangaih tak a nei thei tawh a, ka thlah zalèn a ni. A pa fanu tak tak a ni chuang lo va, a lo hmangaih reng tawh a ni bawk nèn; kei hi chu min hmangaih lo va, min duh mai chauh a ni."

"A dik ang. Aw, va inbual phawt la, mut hmunah kan titi leh dáwn nia, tlai deuha inbual zawng a țha lo ve."

Mut hmunah chuan kan in extend chungchâng chu ka zâwt a, thlalâkah hmu tho mah ila ka nu titi hi hriat a nuam ve hranpa reng reng.

"I room kha a zîm bawk sia, kan vêngah zirtîrtu hna i hmuh hlauh phei chuan awm ngei i ngai ve tawh ang a, Sangpuia room tihlen leh mikhual room tùr a ni leh mai. Tuna mi hi kan zawh chuan room a len sawt bâkah mikhual room kan nei thei tawh ang a."

"Nia, Sangpuia'n nupui neih a duh thut a nih pawhin a room a zau tawh dáwn a," nui chungin ka ti a.

"Hm, i nau hian hmeichhe lam hi a hawi lo khawp mai a, mo kan nei har ngawt ang chu. Bialnu pawh a nei ngai lo a nih ka ring, hmeichhe betu awmchhun i nih ka ring."

"A hmanhmawhthlâk vak chuang em ni? Țha deuh a la nei mai ang."

"Ka tar tak tak hma hian in neih thuai loh chuan in fate pawh ka khawihpui thei dáwn lo che u asin."

Zîngah ka nu chu ka kalsan leh ta a, kan inhmu rei lovin kan awm dùn rei lo tehlam lutuk a, ka ngai reuh asin le.

Chawhma chhûng chu dàwr neitute pawh an lo kal ve zawk a, an nupa chuan an thau dùn kher mai. An la upa over lo, fa erawh an la nei lian lo khawp, an fel khawp mai.

Angaihi nèn dàwr nghâk hi 4 kan ni, kei hi ka la junior ber avàngin tirhkah deuh ber ka ni. Angaihi chuan kan eirawng bâwl nula tleirawl tê a pui zauh zauh, kei erawh chu ka la junior lutuk a, min la chhawr rih lo.

Kan nghah hi pheikhawk leh thawmhnaw dàwr a ni a, a lian ve a, dâwr pahnih inzawm a ni a, lùn pawh kan lùn viau.

"Ka pi, hei hi eng zât man nge?"

Ka pi!! Pitar ka la ni bîk lo asin le, ka lang upain ka lang tar viau a niang, nge min hmu upa viau?

Chu pa en zoh pah chuan,"Chêng sânghnih leh zanga a nih kha, ka pu," ka ti ve salh a.

Chu pa chuan min en reng tih ka hria, kei chuan ka en duh lo. Lu thing nar nar pahin pheikhawk dang chu ka en daih a.

"'Ka pi'tih pawh chu i duh àwm lo hle mai ka ti, ka pi."

Leh țâlh țâlh chuan aw...

"Ho viau lo ve, ka pu."

Chu pa chu a nui ta vur vur mai, a nui hmel chu a ngainatawm phian lehnghal a, Liansanga min tihre chhuak zawk mai. Ka va duh lo kher ém!

"Ka'n bun chhin ang e aw, ka pi."

Ka chhâng peih tawh lo, a langah erawh ka nui lui mai mai, chhûngril lamah chuan nui lo tak ka ni!

A bun chhin a, a'n pên chhin a, a inhmeh phian lehnghal a, a chhan chu a hleitlingin a pian a dik tlat.

"Eng zâtin nge min pêk theih ang, ka pi?"

"Chêng sânghnih zali leh sawmngain a theih, ka pu."

A nui leh vur vur tawh, a hmuihmul tlêm tê chu a inhmeh phian mai. Mipa chhe lo tak a nih dáwn hi.

Het sala!!!! Eng thil nge ka lo ngaihtuah hi!!! Mipa, mipa, mipa, ka rilru ațangin chhuak bo rawh!!

A pheikhawk duhzâwng chu kei pawhin mawi ka tih chi tak a ni, mawi a hre khawpin ka hria. Bâkah, a duhzâwng chu a hre chat chat hle, inngaihtuah nawn miah lovin a lei chat, a leina pawisaah a buai hek lo.

Kamis lam a en leh, mi dang rawn en an awm ve tho avàngin chu pa chu ka ngaihven zui lo thei si lo, ka zui zêl.

A kamis en lah chu ka mit la chi chat chat zêl a ni, hâk chhin min dîl leh a, keini dàwr nghãktute tân chuan customer a tam thei ang berin a tam thei ang ber an lei kha kan duh bâkah ngaihven zêl kha kan tih tùr a ni miau a.

A ha chhin chu a inhmeh leh thlap mai. Darthlalang lian puiah chuan a inthlêk kual ve a, pakhat chiah a ha chhin.

"Ka inhmeh ve tho em, ka pi?"

"Inhmeh lutuk, ka pu."

Nui vur vur chung hian," Eng zât man nge le?" a ti leh a, Rs 900 man a nia, Rs 850-in a pêk theih.

"Chêng zakaw man a nih kha, ka pu."

A kamis leh a pheikhawk chu ka pack-sak a, pawisa min pêk a tum chuan pawisa pêkna tùr chu ka hrilh a, a phun deuh sup nain a thil sawi ka hre thei lo, a thûm bel bul lutuk a.

Tlaia kan haw dáwn chuan Manager ber chuan Rs 150 min pêk pahin," Vawiin tips a nih kha," a ti zauh a, ka hre thiam lo kher mai.

"Tips kan dawng ngai em ni?"

"I dawng tlat a nih kha, vawiina smart shoe leh kamis leitu khân a pe che a ni, in inhria em ni?"

"Hre ngai lo."

"In inhria emaw ka ti mai asin."

Angaihi chuan haw kawngah chuan," I va luck bîk!! Tu nge ni reng reng a?" tiin min zâwt a.

"Ka hre bîk lo, ka la hmu ngai lo."

"Zêp kher lo la?"

"Ka hre lo ka tih chu, ka ngaihtuah lo ve!"

"A fuh dáwn tawp."

"Dáwn lo."

A nui hak hak a. Ka va haw reuh tak! Mipa ka ngaihtuah tawh lo tih hi hre chiang teh se, customer erawh mipa/hmeichhia ka thliar hrang thei lo, ka thu thuin ka awm thei lo miau a.

In ka luh chuan a lo reh riai mai, ka nu chuan chhuat pawh a lo nâwt fai vek mai, ka khawngaih reuh e a. Chawhmeh pawh min lo siamsak vek, chaw chauh chhum a ngai, a fel thei teh asin.

Chaw chhum ka siam nghal a, ka chhuan chhûngin ka intleuh sawk sawk. Artui ka kang a, chawhmeh dang chu ka tilum a, ka nu ka phone nghal a.

"Nu, i thleng tluang maw?"

"Aw, tluang e, chaw i ei tawh em?"

"Hei, ei țêp. I chawhmeh siam ka ei leh țeuh dáwn, in ei daih tawh ang tiraw?"

"Aw, ei daih tawh e. Sangpuia bulah pawh hna chungchâng kha ka sawipui tawh a, a ngaihven rang dáwn a ni àwm e."

"A țhat chu. I thil lei tùr i lei fel vek maw?"

"Aw, lei fel e. Chaw kha țha deuhin ei rawh aw, i chèr ém kha."

"Um, ka ei țha dáwn lutuk."

Ka in luah opposite chiahah chuan woofer an play a, Lalnunsanga zai niin 'Di hlui' tih hla, ka duh ém ém țhin kha a ni a, mu pah chuan ka ngaithla vang vang a.

*A dai hlen ta emaw ka lo ti,

Hmâna ka hmangaihna che;

A thâm ral ta emaw ka ti țhìn,

Nunhlui ngaihawm zawng pawh.

Mahse, i sakhmel ka tawn changin,

Kimte'n an lo thar leh ţhìn;

I khiangawi hnu pawh hi e D hlui,

Nghilh i lo har ka ti...*

Ka duh lai ber châng a rawn sa leh a.

*Lènlai pârtlàna kan hlim lai khân,

Ințhen leh hian kan mawi lo;

Mahse, chântâwk khuarèl ang zâwkin,

Kan lo ințhen ta maw.

Nunhlui leh nang ngaih a rûk hlîra,

Ka lo tuar dai tawh tùr hi;

Ka dàwn khâwl changin lei hringnun hi,

Kei zawng a sei ka ti.*

Ka mittui chu a rawn luang leh ngiai ngiai mai. Nia, he hla hi chu ka duh thlâwt a, a phuahtuin a phuah thiam bâkah a satu hian a sa thiam bawk si. A hla thu hi tun atân hlauh phei chuan ka duh leh zual, zanin phei chu ka ngaithla fuh leh zual. Zanin zet chu Liansanga ka hre chhuak vawng vawng, ngaihtuah tawh miah loh hi ka duh asin le.

Min ngaihtuah ve tho ang em le? Min hre chhuak ve ang em? Tlêm chuan ka ring ve tho, kei phei chuan amah hriat chhuahna tùr ka va ngah em! Tuna ka țhi awrh pawh hi min pêk kha a nia, kan ințhen tawh vàng maiin ka pe lêt kher lo.

Min phone a tum ve țhìn ang em le? Kei chuan a number kha nei tawh lo mah ila ka thluak hian a hre hneh lutuk tlat, ka â thut a nih loh chuan ka thih ni thlêmgin ka theihnghilh thei tawh àwm si lo.

Ka muhìl țêp tihah chuan DJ-i hla 'Lungdumtu' hla an rawn play leh, ka harh chiang leh ta hle mai.

*Hmangaihna dik leh rinawm ka hlàn che a,

I tân chauh tiin ka hun...

...mahse, tunah ka tawng ta e,

Ka tâna khuanu ruat ngei chu;

Tawn thar D ka tân vantirhkoh i ni si.

Hêng hun hi ka tawng ve leh ang em aw..?! Ka tawng har khawp ang, mipa reng reng hi ngaihtuah rih loh ka tum bur rih a ni tawp. Pathianin min ruatsak erawh nakinah chuan ka la tawng ve mahna..

*Ka hmangaih che, ka hmangaih che,

I sakhmel a mawi chuang e, lêng zawng zîngah;

Ka hmangaih che, ka hmangaih che,

Kumtluangin ințhen lo'ng aw...*

Kumtluanga țhen loh kan tumte pawh hi he khawvelah hi chuan kan țhen fo chu a lo nih hi, hmangaihna kan tih pawh hi lemchanna, inbumna mai a lo ni, ka tân phei chuan thil țha lo tak a niin ka hria.

Phone-a kan thlalâk dunte chu ka thlîr mai mai a, thla kan lâk laite kha chuan kan hlim asin, ințhen lam kha ka ngaihtuahnaah a awm pha miah lo. Tunah erawh zawng, inhmuh chu sawi loh, biak phei chu...hla tak a ni. Thlalâk en chiah hi ka chantâwk a ni tawh.

*I THAWH CHHUAH AIA TAM HMANG RAL SUH*

 

☆13TH MAY☆ - 30 By Dingdi Pachuau

Kâr khat chhûng chu buaina thleng lovin ni ka hmang tlingtla ve leh mai a, mihring hian kan hma hun kan hriat lohzia leh kan tum lâwk miah loh buaina hmachhawn thei reng kan nihzia chu kâr khat hnuah a rawn lang ta.

Zànah Angaihi'n min rawn phone a, an țhenawmpa, Cindy pasal kha a boral tih thu min rawn hrilh a, mak a tih thu a rawn sawi bawk. A chhan chu zîng lamah pawh a dam țha a, hmuh pawh an inhmu, an inbe bawk. A thi thut mai chu mak a ti a ni.

An in thar hi an la luah chiah lo va, luah lui duh se chuan an luah thei tawh reng; mahse, an duhtui ve a, an la luah lo mai mai a ni.

Eng vànga thi nge tih ka zawh chuan," Ka hre lo, Cindy nèn khân an lo la ințhen chiah lo a ni maithei, Cindy kha, 'Min pui r'u' tiin a au vak vak a, ka pate leh mi dang an han luh chuan a lo thi fel dèr tawh a," a ti sar sar a.

"A ni maw?!!"

Kei pawhin mak ka ti ve tho. Bp sâng thut pawh a ni thei tho mai a, zu a in ve țhìn a nih phei chuan...

"An post-mortem dáwn a, a thih chhan chu a hriat mai ang chu. Ka rin dàn mai mai chuan an nupa hi an inhau ang a, Cindy hian a àn khum ang a, ani thinrim, lung țha lo, Bp sâng bawk si chuan a zo lo a niang te ka ti mai mai."

"Nia, post-mortem result-ah a hriat ang chu, ngaih dàn leh rin dàn nei thei vek kan ni alawm," ka ti ringawt. Chhe deuha Cindy puh nghal ringawt chu ka duh bîk lo. Thil ni ve thei tho a ni a, thil ni lo thei a ni ve tho bawk.

Angaihi chu a tlaivâr ngei dáwn si a, naktûk chu a rawn off ngeiin ka ring. An țhenawm chiah a ni si a, keimah chauhin ka kal dáwn a nih hmèl, ka va peih lo lâwk sa tak.

E, Liansanga pawh a tlaivâr ve hrim hrim ang, a bialnu pasal a thi a, mi dang vakin an hre dáwn si lo. A tel lo thei lo ang, tunah chuan engkim a fel tawh dáwn asin, Cindy'n a pasal sum a nei thei ang a, nuthlawi hausa a ni tawh dáwn bawk si.

Ka mu țha thei bîk lo, mut hmunah ka meng kar mai. Angaihi'n thlalâk min rawn thawn a, Liansanga a ni. A kal ve tak tak a nih hi, kal lo thei nâng. A bialnu, a unaunu ni bawk pasal thihna a ni tlat. A bialnu ni kher lo mah se, kal chu a ba hrim hrim.

Um, a chêr deuh chu a nih hi; mahse, a chhe lo tho. Ruang bulah a țhu miah lo, a zak ve deuh a ni ngei ang. Ka en chiang leh deuh a, Liansanga piahah chuan dàwra lo kal, tips min petu kha ka hmu!! A va mak ve!! A mak leh lo, Cindy pasal hi an vênga mi a ni tihna a ni mai alawm.

Zîngah mit thial ûrhin ka tho va, ka peih lo tak tak a ni. Ka kal lo ve mai dáwn emaw ni, kal loh ringawt lah chu a dik si lo, Angaihi kal dáwn lo tùr pawh kan indaih dáwn loh teh lul nèn, peih lo zet chuan ka insiam a.

Kea ka kal tâk țauh țauh chu le! Ka thlan pawh a tla lek lek. A fuh lutuk lo.

Dàwrtu lah chu ni dang aiin kan ngah hialin ka hriat chu, ka buai zak zak khawp a, hah pawh ka hre lo zâwk hial mai.

Chau zetin in ka thleng a, țhutthlèngah ka let nghal. Eirawng pawh ka bâwl peih lo, thingpui ka in leh ringawt mai ang.

Ka nuin min rawn call a, hna ruak chu a la awm lo va; mahse, zirtîrtu indaih lohna a nasat avàngin Gov't Primary School-ah khawtlâng hruaitute'n zirtîrtu dìl belh an tum a, chumi atân chuan keimah, tualchhûng mi ngei an duh thu an sawi chu a sawi ve mial mial a.

"A țha alawm; mahse, nu, mi dang pawi kan sawi ang e?"

"Mi dang dîl tùr an awm hlei nem, nangmah chauhin i awm a, B.A., M.A chhuak chu awm ve mah se maw, TET an ti em ni, kha thil kha an nei ve lo tlat a."

"A nih tak chu, thawk thei hlauh mai ila tiraw?"

"Thawk thei ang, i thawh theih ka ring tlat nia."

Angaihi chu a reh khawp mai, a buai khawp ang chu. An țhenawm, an in hnuai chiah a ni sia, a buai ber tùr a ni tlat.

Ka chauh ém avàngin ka muhìl hma hle a, whatsapp message tone-in min tiharh, ka ngei tak tak.

*En teh, dàwra lo kal chhe lo deuh kha ka hmu asin, a chhe lo reuh lutuk! A hmel kha a chhe lo reuh lutuk a, nulaho pawhin an en duh lutuk!*

A va ho tak! Mu tawh inkaihthawh nân chuan ho ve tak chu a ni!

*A va ho, ka muhìl min tiharh.*

*Hehe, ka mu ve dáwn chiah.*

*I chau ngawt ang chu.*

*Um, chau e. Vawiinah in buai em?*

*Lutuk, ka chau hnâp.*

*Ka va khawngaih che! En teh, thil hrilh tùr che ka ngah lutuk!*

*Naktûkah aw?*

*Mi sualnu...aw le, muttui.*

Ka nui sak a.

*Mi felnu, muttui le.*

Zîngah min rawn lam kual a, țhiani hi chu a fel a nia. Petrol thunsak ka tum lahin a duh bawk si lo; mahse, vawi khat chu ka tilui tawh, a phal lo chung chungin a nia.

Min dàwrtu an awm loh kâr chuan kan titi a, nizan hmasa lam chungchâng a sawi deuh ber.

"Sangthlàwna chuan nuam a ti tawh ngawt ang chu, tlaivàr zànah khân a bula a țhut ka ring deuh a nia, a zak ve deuh pawh a ni maithei a ni."

"Post-mortem result kha i la sawi miah lo a nia."

"Hm, an sawi duh tak tak tawp nâng, a hmingchhiatthlâk ve dáwn a."

"A result chu?"

"Heart attack an ti alawm."

"A nih tak chu."

"Mahse, kei chuan Cindy ka la puh tho, a chhan chu a awm dàn hi a hre chhuak a nih ka ring tlat a."

"A hma khân an ințhen deuh reuh khân i sawi a."

"A zinsan deuh chu a ni alawm, a tihtauhsan lawk a nih loh pawhin a fawr bosan lawk a niang."

Min dàwrtu an lo kal avàngin kan titi chhunzawm thei lo, kan han buai leh nak nak a, a hnuah kan titi chhunzawm leh a.

"Liansanga chuan min hmu ve reng a, nuih pawh ka nuih duh lo, chhiahkhum hrep kha ka châk lutuk a."

Ka nui hawk hawk mai.

*******

"Ka pi, helai T-shirt hi ka en chiang thei ang em?"

Ka bul lawkah a lo ding reng tawh niin, ka lo hmu miah lo nia. Mi dang ka lo buaipui vàng a ni pakhat, a bulah Liansanga a lo ding ve reng bawk!!

Liansanga ka hmu tel thut chuan min tibuai vek! Chhàn nachâng pawh ka hre lo, Liansanga chu ka en reng ringawt!

"Ka pi? Hello???!!"

Ka harh chhuak thut a, 'Ka pu' lam chu ka hawi nghal a, nui lui sak hian," Sorry, ka pu. Eng nge i sawi kha?" ka ti ta sap a.

"Harsatna i nei em ni, ka pi?"

"Nei lo ve, eng nge i duh le?"

"T-shirt khi, eng zât man nge ni le?" tiin a duh chu a kâwk a.

"Chêng zasarih a nih kha, ha chhin la?"

"Aw le."

Liansanga chu ka en duh lo tlat, min hmu ngei tawh ang a, min be duh bîk lo a niang.

"Puii?!!"

Lalpa leh!!!

"In inhria elo?!!!" tiin 'Ka pu' chuan maktih hmêl deuh hian min melh tawn ta zak zak a.

"Hre lo."

"Hria e."

Kan chhâng rual țhawt mai.

Liansanga chu ka en lo hrim hrim, ka thawhna dàwr a rawn hmua a rawn hre chhuak chu ka duh lo tak zet a ni.

"A nih chuan, T-shirt chu ka'n ha chhin ang e."

Parda phènah chuan a lût ta daih a, Liansanga chu ka hmachhawn ngei a ngaih hmel ta.

"Eng nge i en ve dáwn le?" 'Ka pu' chu ti tel ve lo mai teh ang. Dàwra rawn lût a ni miau a, ka lo chhawn ngei ngei a ngai si a ni.

"Valtea kha ka rawn kalpui a. Puii, zawn hmuh i va har ve!!!"

Min zawng lo tawp a nih chu, ka biru lo va, zawn ka ngai hek lo.

"Ka biru hlei nem." Ka țawng ring ngam lo, mi dangin an lo hriat hlauh chuan, a tihchi dáwn lo lutuk.

'Ka pu' chu a rawn chhuak a, ka lo pan hnai vat a.

"I inhmeh lutuk tlat, ka pu."

A nui leh vur vur tawh. A hmel tê hi chu a chhe lo reuh asin, a fai vang mai lehnghal a.

"Inhmeh min ti tak tak em?"

"Teh rêng mai."

"Um, chutia inhmeh min tih bawk si chuan ka la lo phal nâng, ka la ang e, ka pi."

Liansanga erawh chu a țawng tawh miah lo, ngawi rengin a lo ding a, min en reng chu ka ring. Mak min ti ngawt ang chu, ka sual sia.

"Au LS, i en ve dáwn lo em ni?"

"Ka mamawh ve hlei nem, Valte."

"Chu pawh ni se, en ve hrim hrim la?"

An inbiakna chu ka ngaithla ru deuh reng a, thil mawi chu a ni miah lo; mahse, ka hre châk tlat sia.

"Ka pu, tips vàng khân ka lâwm lutuk a nia."

"I phû ém a ni, ka pi."

An awm chhûng chuan rilru nuamin ka awm thei lo, a rûkin ka țang țùng mai a, ka invêng ru reng mai.

An chhuah dáwna hlim hmel pua thlah pawh chu a har ka ti, nui lui tùr pawhin tih tak zet a ngai.

"Kan lâwm e, in lo kal leh țhìn dáwn nia."

"Kal leh khawp ang," tiin a nui vur vur a, Liansanga erawh ka en duh lo lui tlat.

An kal hnu chuan ka thaw hawk hawk. Angaihi'n min rawn hmu lo, ani chuan dàwr pakhat zâwk lam a ngaihven lai a ni hlauh.

Tlaia kan haw chuan ka in luah thleng min thlah leh thlap a, chhuk pah chuan," Zanin chu lo riak la?" ka ti sap a.

"Pawi miah lo; mahse, ka haw ve phawt ang aw."

Ka inbual zawk a, thingpui leh chhang ka ei leh tawp, ka nuin hria se chuan min hau hrim hrim ang.

Angaihi lo luh laiin ka ke ka lo massage hliau hliau a, rawn nui var varin," Lesson plan siam buai i ngai tawh lo ringawt pawh hi a nuam ka tihpui che," a rawn ti phar phar a.

"Kawng țhenkhatah chuan ka ngai asin."

"I thawk rei ve tawh ém a, chu vàng a nih kha."

"Vawiin khân Liansanga a lo lût ve asin."

A che lai a tàwp chawt a, ngun zeta min rawn enin," A ni maw?!! Eng nge a lo tih? I lo bia em? Ka lo hmu ve lo chuh... I lo hau em?" a ti zung zung a.

"Min dàwrtu chu ka lo biak loh nâkah."

"I lo melh rum em?"

"Ka be țha vak lo."

"Pawi lo reng reng."

"Dàwra rawn kal chhe lo i tih deuh nèn khân an lo kal a."

"Aw, i sawi tâkah chuan tlaivàr zànah khân ka hmu dùn tak asin. Ngawi teh, in anna lai tak an nei, anni hi cousin an ni mai lo ang maw?"

Ka ngaihtuah a, ka hmuh țantirha a nui hmelah Liansanga ka hre chhuak zawk a nih kha, nih pawh a lo ni maithei a ni.

"A ni maithei, 'Valtea' a ti a, Valtea thungin, 'Au LS' a tia."

"An ni ngei ang. Ti leh ta daih ila, țhenawmnute chu an buai ngei dáwn e, a pasal chhûngte kha a thurochhiahah khân a ro kha a lo pe tel ve sia, Cindy'n a phal lo an tia, eng emaw deuh laih chu a awm hmél a ni."

A va buaithlâk țhìn tak!

"Tlaivàr zàn bâk kha Liansanga hi ka hmu leh tawh miah lo, an ințhen leh tawh em ni le ka ti hial."

"Hmun dangah pawh an inhmu thei tho alawm."

"A ni tho nain țhenawmnu hi chuan mipa dang a zui chu ka hmu ka hmu si a ni. Chu pa chu a la upat hmel vak loh, a bialpa thar a niang ka ti."

"A, sawi tawh lo teh ang, mu tawh ang hmiang. Ka chau nghulh mai."

"Vawiina Sangthlàwna i hmuh vàng a nih chu a. I hmuh lai taka i awm dàn ka hmu châk!"

Min hmu ang tih ka hlau, ka hamhaihzia kha.

*PHATSAN I NIH VÀNGIN CHAUVIN TLU ȚHÌN MAH LA, TLÛK HLEN TUM NGAI SUH*

☆13TH MAY☆ - 31 By Dingdi Pachuau

LIANSANGA

~~~~~~~~~~

Vawiin chu holiday a nih vàngin kan chàwl a, Valtea'n bazarpuiah min sâwm tlat mai a, peih lo viau mah ila ka hnial duh bîk lo, ka chhuak khât ve tho alâwm le, Puii zawn leh pah a ni mai a.

Dàwra Puii ka hmu thut chu mak ka ti kher asin. A rûkin ka lo zawng ngar ngar tawh a ni a, ka hmu chu ka hlim hle a ni. Ani pawhin min hmu chu mak a ti ve tih ka hre mai. Step 1-in hma ka sáwn e.

Mahse, mahse, a lo chêr tawh viau. A damlo ve em ni le? Enkawltu a nei àwm si lo, dàwrah hian a hah thei hle a nih dáwn hi, min biak a hreh dàn ațang hian thil țha lo a lo suangtuah vak vak țhìn a ni chiang.

Be tawh lovin ka en reng ringawt. Tunah chuan ka rilru a chàwl thei rih tawh a, min biak duh lo mah se, amah ka hmu tawh. Min be dáwn, min la be dáwn chauh. Min hmangaih thu min la hrilh chàmchî dáwn, chu chu ka beng hi ka hmui a ni lo tih ka hriat chian tluk zetin ka chiang a ni.

Dàwr ațanga kan chhuah hnu, Car-a kan luh hma chuan Valtea chuan," 'Ka pi' nèn khân in lo inhre sa tawh maw? Au LS, ka hre chiang châk tawh a nia, i bialnu a ni maw?" tiin hriat châk hmel deuh hian min en há a.

"'Ka pi' a ni lo, Puii a nih kha."

"I bialnu a ni tiraw? Mahse..."

"Mahse a awm lo, a la hre dáwn alawm."

Car-a luh pah chuan," Engtin nge tih i tum?" a ti a, ka nui suk ringawt. Ka tih tùr ka hre chiang, ka ti ngei bawk ang. Ka hnêna ata hi a kal bo thei tawh ngai lo ang.

Valtea hi ka cousin a nia, an chhûngkuain Shillong-ah an awm. Shillong-a an awmna a rei tawh a, lo zin a châk thei lutuk a, rei lo tê min pui tùra rawn chho a ni. Puii subj lâk Mathematics kha a zirtîr a, a thiam viau.

"A nih leh, thlawi hausa-i hi?"

"Ka bialnu a ni lo tlat."

In kan thlen chuan," Valte, eirawng lo bâwl rawh aw, kei chu ka chhuak leh rih dáwn a nia, chaw eiah pawh min lo nghah kher a ngai lo ang," ka ti a.

Maktih hmel zet hian," Khawiah nge i kal dáwn? 'Ka pi' kha i enthla dáwn em ni? Nge thlawi hausa-i i rîm dáwn?" a ti a.

"'Ka pi' a ni teivet lo, Puii a nih kha. Ka thil tih tùr chu naupang hriat ve chi loh!"

"Naupang ka ni leu!"

"Ka tân chuan i la ni tho." Naupang tih hi a duh lo hle a, ka ti lui ve ngat.

Ka intleuh zawk, thawmhnaw ka thlâk a, en thuak pawha min hriat theih lohna tùrin baseball cap kun deuh hlekin ka khum a, glass ka vuah bawk.

Puii dàwr nghahna chu ka pan thla leh a, khua a la tlai lo va, an bâng har deuhin ka ring. An dàwr lang thei laiah ka awm rèn ráwn a; mahse, ka kal sawn leh rih.

An dàwr pana ka kal leh lai chuan an lo chhuak mêk, khua a thim tawh a, an bâng tawh dáwn a ni chiang. Ka motor light-in chiang taka a chhun vàngin ka hmu thei. Hmeichhe pakhat chuan scooty-ah a phur a, an tlân chhuak e, ka zui ve nghal zat.

Anmahni zui lo ang deuhin ka tlân a, hmu pha tâwk lekin ka tlân. Ka rin aiin an tlán rei phian. Chutah, scooty chu a ding ta, Puii chu a chhuk a, an inbe rei lo. Scooty chu a rawn tlân lêt leh nghal a, tu nge ka lo en lo, Puii chu ka mit hmuh ata a bo ang tih ka hlauh lutuk vàngin.

In hnuaiah a lût tih ka hmu thei ruai ruai. A in luah a ni ngei ang, hm, tunah chuan ka hre ta, step 2-in hma ka sáwn leh ta.

Lèn luh ka châkna chuan min tur ut ut maiin ka hria; mahse, ka insûm hrâm hrâm. A chhan chu thil ka tih rum rum chuan ka chàn phah thei tlat, mi luhlul tak a ni tih ka hre tawh. Chu a luhlulna chuan a ring a tikhawng tlat thei, kumkhua atâna ka chán hlauh chuan...

A in luah ni ngeia ka hriat chu ka bèl chiang ngat a, in hnuai te reuh tê a nih hmel, a chêp ngawt ang chu. A indah leng thei dáwn em ni le?

Ka inkhalh haw ta nghal a, tunah chuan hmasáwn tak ka ni. Ka nu ka hre chhuak nghal zat; mahse, ka hrilh dáwn rih lo, a phûr dáwn si a, thil a tisukuk vek palh ang.

Valtea chuan chaw eiah min lo nghâk tho. Ka rilru a hlim tawh miau avàngin ka phùrna pawh ka thup hlei thei tawh lo a niang.

"Hmuh țha i hmu a ni maw?"

"Um."

"Nula saruak i hmu maw?"

Ka en vat a, ani chu a lo nui vur vur a.

"Hmuh țha zawng zawng hi nula saruak an ni vek kher lo."

"Kei chu a ni ka ti."

"Nula saruak sawi rual pawh i la nih loh kha."

"Vote ka nei daih tawh!"

"MLA vawi thum ka thlang tawh!"

A nui vur vur a, kan infiamin kan inhnial țhang a, la nau viau mah se, ka ngaina hle a ni.

*******

Liansanga chu a reh vang vang, dàwrah pawh a lo kal tawh hek lo. Ka lo zawng rilru deuh țhìn, ka zawng rù tih ka inhriat chhuah apiangin ka inhau mawlh mawlh ziah. Țhentu zâwk ka ni, thiam lohna ka nei lo va, engtiziaa lo zawng ru ziah nge maw ka nih hi?

Kâr a ral a, Angaihi hnên ațang chuan Cindy chuan a pasal ro zawng zawng chu a chuh ta ngei tih ka hria. Kan sawi phâk awm hek lo, a pasal a ni miau a, a duh leh a chuh mai ang chu.

Sunday-ah ka inkhâwm a, Angaihi a lo lêng deuh reng a, chhùn ei tùr a siam a, a zai pah awr awr a.

"Bengchheng lutuk lo teh, i zai mawi lo bawk si."

A nui awr awr a," Zai thiam i hre lo a nih chu! Nakinah Mizo idol-ah ka la tel ve dáwn asin," a la ti zui a.

"Endiktute'n an sawisa palh ang che, ka țhiannu i ni ve bawk sia, ka lo zak palh ang."

"I țhiannu hian Zoram khawvêl hming ka la tițha dâwn asin."

"E khai! Tuna i tihțhat dànah hian duhtâwk teh ang."

Kan nui dùn vak vak a. Tlai lamah erawh a haw hma, a nuin eirawng a bâwl hman dáwn si lo.

A haw hnu rei vak lovah chuan kawngka a rawn ri karh karh a, nui chung hian," Lo lût mai mai teh, eirawng i bâwl tawh ang chu tih nâklaiin," ka ti a.

Lo lût ka hmuh chuan ka nui hmel chu reh chiang khawp mai. Liansanga chu a rawn pên lût zân zân mai, engtin nge ka in luah a rawn hriat chat le?!

Biak dàn tùr ka bo map mai, biak loh ringawt lah a tihchi bawk si loh.

"Eng nge i lo tih dáwn?" A va polite lohthlâk tak! A dik lo tih chu ka hre ve reng; mahse, biak dàn tùr ka hre lo a ni.

"Ka lo lêng."

"Engati nge i lo lèn?" Ka va sual tak, ka mâwl pah bawk.

"Ka lo lêng châk a."

"Engati nge i châk? Lo lêng tùrin ka duh lo che, ka țhen tawh che a, hmuh fo che hi ka duh lo," ka ti rilru mawlh mawlh a, ka sawi ri ngam teuh lo.

"Thingpui in rawh aw," tiin ka tho a, thingpui chu ka chhuang nghal a. Ka in luah a tê si a, pên hnih khatah ka kal tumna hi ka thleng hman dèr zel.

"In chu a tê nuam hle mai."

Sawisêl a duh chuan sawisêl mai se, fak pah deuh tho a duh chuan fak law law mai se.

"Ka lâwm e."

"Dàwra thawh chu nuam i ti em?"

"Aw, nuam ve reng mai."

"In hah em?"

"Hah hran lo ve."

Thingpui sen háng chu ka pe a, amah hlat thei ang berin ka țhu a.

"I nute an rawn zin tawh em?"

"Aw, ka nu chu a lo kal tawh."

Thingpui chu a lem hlek a," I thingpui lum ka in leh thei chu ka lâwm hle mai, ka lum ve thiam țhìn lo va," a ti sup a.

"A har hlei nem."

A ngawih avàngin ka ngawi ve a, tih tùr a va vâng tak! Min tilai ém ém ringawt, a hrehawm tawp a ni mai.

"Puii...?"

Ka melh zawk a, min lo en reng avàngin ka melh sawn leh nghal a.

"Thil reng reng hi i ngaihtuah kual nasain i suangtuahnain in sáng i sa nasa țhìn ngawtin ka ring."

A thu sawi awmzia ka hriat thiam loh avàngin ka en há a, ani pawh chuan min en ve rùn a.

"Eng nge a awmzia?"

"I suangtuahna kal kual vel hi a tak tak emaw i ti tlat zêl a."

"Suangtuah theih tùrin i awm tihna a nih chu." Ka tlâwm àwm bîk lo é.

Thingpui chu a dût hlak a," Thil awmzia chiang taka hre tùr hian min zâwt chiang duh ngai lo va, thu tàwp i siam nghal ringawt zêl a," a ti leh sup a.

"I phat miah loh kha."

"Dik tak chuan hmun dang ațang chuan ka rawn insawi fiah peih lo a nih kha. Ka lo haw hunah ka insawi fiah ang ka ti a, biak theih leh hmuh theihin i awm ta lo vang vang a."

"Kan ințhen tawh miau a."

"Kei chuan țhenna thu ka la sawi ve miah lo."

"Sawi tawh suh, engkim a tàwp tawh!"

A ngawi ta rih a, nia, sawi tawh lo tùrin ka ti miau alawm.

A ngawih tâk reng avàng chuan nuam lo ka ti leh si, nunràwn lutuk hi a țha lo ka ti.

"I nu a dam țha em?" tiin ka zâwt leh lawi a.

"Aw, dam țha e."

"A lo zin phei leh tawh em?"

"Zin lo, a hmu thei dáwn si lo che a."

A nu chuan kan chanchin a lo hre vek a nih chu. A fapa hi a thiam lo ve ang em le? Min kawp a, min rinawm lohsan tih hi a hria ang em? Ni lo ve, a fapa hian a hrilh thiam viau ang chu!

"Puii, thil awmzia dik takin ka sawi ang a, i ngaithla peih ang em?"

Min en rùn avàng chuan rei ka en lo, a thil sawi ngaithla mah ila awmzia a awm tawh chuang lo ang, kan ințhen tawh a, a tàwp vek tawh.

"Awmzia a awm lo, a nih tùr a ni vek tawh!"

"Ngaithla tal la, khawngaihin?"

Ka nu khân insawi fiahna kha ngaithla tùr khân min duh țhìn, eng ka nih phah chuang nâng, kan renew leh dáwn tihna pawh a ni chuang hlei nem.

"Han sawi la?"

"A hmasa berah chuan engtik lai mahin ka rinawm lohsan ngai lo che."

Dâwt chu min hrilh tawh lul suh se.

"Dâwt tel miah lovin aw!"

A thaw hawk mai, a hmui a chîp hmak a, a thin a rim a ni maithei, a insûm nasa ngawt ang chu.

"Dâwt chu ka ngaithla peih lo."

"Min ring hlawl nange?"

"Ka rinna che kha a bo zo tawh a ni maithei a ni."

"Sawi awmzia a awm lo a nih chu."

Nia, inrintawnna a bo tawh chuan awmzia hi a awm tawh lo rêng a ni.

"Nia, thil pakhat, Cindy nèn hlim takin awm dùn rawh u, kei ang chuan kawp mai mai lo la."

Ka sawi tùr a awm hran lo nain sawi ve hrim hrim ka duh.

"Cindy hi ka țhen hnu khân kawp leh tumna ka nei lo hrim hrim, kawp duh ni ila ka țhen tawp nâng!"

Hmãn rilru leh tûn rilru a dang thei alawm. Kei pawh a hma chuan Rinawma kha ka duh a, tunah ka duh tawh lo va, khatiang kha a ni mai.

"Rilru chu a danglam fo alawm."

"Kei chu ka dinna a la ngai, a danglam ve lo. Puii, i laka ka rilru hi a la danglam ve miah lo asin, kawp mai mai tùr hian ka ngaizâwng hek lo che."

"Sawi hi chu a awl, rilru hmuh theih hek lo le!"

"Ka rilru hi hmuh tum la chuan i hmu thei ngei ang; mahse, i tum tlat lo va. Puii, Cindy hi ka farnu a ni, ani min en dàn chu ka sawi lo. Kei chuan farnu ang bâkin ka en lo, nang ka nei che a, hmeichhe dang hi hmeichhia anga en ka tum ngai hek lo, a chhan chu nang ka neih che chuan hmeichhe dang ka mamawh lo tlat a ni."

*BUMTU I TAWNG A NIH PAWHIN INTICHHE DUH NGAI SUH*

☆13TH MAY☆ - 32 By Dingdi Pachuau

"Delhi-a training tùra ka kal khân ka hmu kha mak ka ti asin, ka rawn hre chhuak zawk nghe nghe che. A chhan chu a awm ve tih i hriat chuan thil ni lo lo i suangtuah kual leh ang tih ka hre tlat a ni."

"Thil ni lo lo ka suangtuah bawk lo, thil ni thlap, dik thlap a ni ka hriat ni," ka ti ve tlat a.

"Dik thlap chu tuin nge hrilh che?"

"Sava tê țha deuhin."

"I hriat duh apiang min zâwt la? Dâwt ka hrilh lo ang che. A reng rengin Cindy thlah thei miah lova min ngai hi a mak ka ti, ka țhen ațang khân ka țhen a ni, vawi hnih khat erawh chu ka pan ngei mai, ka zêp lo; mahse, chu pawh ka inthiam lo va, ka inten viau bawk."

"Chu, i pan reng chu. I hmangaih tih ka hria alawm."

"Hmânah khân hmangaih niin ka inhre țhìn; mahse, a lo ni lo tih ka hre chhuak chiang viau tawh a ni. A nih loh vêk pawhin, hmangaihna hi a lo reh vek thei tihna a ni ngei ang."

Ka sam chu ka vial ka vial a, a thu sawi chu ngaihthlâk nuam ka ti țan ta riau, ka duh lo kher mai. Dâwt a sawi lo tih ka hre miah lo, ka awih nghal ngawt tùr pawh a ni lo.

"Khatih laia hmangaihna ka tih ve kha duhna, îtna leh duatna kha a nih ka ring ta. Tunah erawh chuan khâng kha hmangaihna hi a lo ni lo tih ka hre tawh a ni."

"A nih, eng nge hmangaihna awmzia chu?"

Min en vang vang phawt a," Hmangaihnaah chuan inrintawnna a awm țhìn," a ti ta daih a.

Min sawi chhan chiang mai, rin loh tùr hian a awm zêl a nih kha. Keimahah hian mi dang thîk tùr leh min rin ngam lohna tùr a hmu ve miah lo, kei chuan ka rin bâkah mi dang ka melh hek lo.

"Min rin loh tùrin ka awm ve ngai lo," ka ti ta sap a.

"A dik alawm."

"Mipa dang pawh ka awmpui ngai lo va, thla pawh ka lâkpui ngai hek lo."

*******

Khami tlai bâk kha a lo lêng leh tawh lo, a rawn lan ve leh zawk avàng khân beiseina ka neih tawh loh hnu kha tlêm têin a lo êng leh sêt sêt a ni a; mahse, kâr hnih zet a ral hnu hian chu ka beiseina êng sêt sêt pawh chu a thim zo leh ta.

Kan vênga kan in extend pawh an ti zo tawh a, ka haw chho châk khawp mai. Mahni chauha awm loha ka nu bula thlamuang taka awm deng deng ka châk!

Ka han phone ta nge nge.

"Nu, lo haw chhoh ka châk e!"

"Bawihte, rawn phone che ka tum mêk a, hei lehkha mawi i dawng a nia!"

"Nu, eng lehkha mawi maw?!!!"

"Interview tùra kohna che a nia, tûn thla ni 25 hian interview i nei dâwn a nih chu!"

Ka chhûngte chuan an lo tifel tak tak a nih chu! Yes, ka interview ang, tlin ngei pawh ka tum ang, chhûngte bul leh mahni in ngei ațanga school kai theih chu a nuamin a manhlã dáwn em asin.

Angaihi ka hrilh ve chuan a lo phûr khawp mai.

"I tling sa, in vêngah nangmah chauhin i qualified ngat a nih chuan vêng chhúng mi chu an duhsak țhìn alawm, miss i ni leh dáwn bîk a nih chu."

"Aha, interview hma hawtin chutiang sawi suh, tling ila chu ka ti khawp mai."

"Lungngai suh, i tling chiang ngawt ang; mahse, ka ngai dáwn sa che."

*******

"Puii, min ring thei tawh miah lo em ni?"

Thil zawh tùr tam tak ka nei a, khâng ka rinhlelhna zawng zawng thilte kha zawh chhuah a min hrilh fiah ka duh, ka lungawina khawp min la hrilh fiah lo.

"Thlalâk chungchâng kha sawi fiah phawt rawh." A chunga ka rilru put ka thlâk danglam tawhzia hi a hria ang tih ka hlau zâwk, zan tin a lo lèn ringin ka lo nghâk ru țhìn tih hre phei se chuan...

"Eng thlalâk maw?!"

"A IG check la?"

A phone chu a khawih mial mial a, chutah, thlalâk chu min hmuhin," Hei hi maw?!" a ti phawt a," Hei hi chu a rei tawh, nang nèna kan inhriat hma thil daih a ni tawh. Ka'n check mah ang e," tiin. A phone chu a khawih leh mial mial a," Hei, en la, a date kha en ang che," tiin a phone chu min pe a.

5/2/2010-ah a lo post daih tawh!!! Chu chu a rawn post nawn leh tihna maw? An thlalâk chu ka en tawn ta chhên a, a lo inang chiah chiah, pakhat tê mahin a danglam lo.

"A mak hle mai!"

"Thlalâk a lo post ațangin min lo ringhlel ţhìn tihna a ni a, lo hre daih tawh tùr hi ka ni asin le, a hma pawhin min ringhlel tawh kha a ni a."

"Cindy ka thîk tih hre reng chung hian a bulah i awm lui tlat zêl tho," ka ti ve ngat a.

"Delhi-a kan inhmuh bâk kha ka hmu lo vang vang, a pasal thih khân kan kal ve leh țâwk. Bâkah, Delhi-a ka awm lai khân ka damlo vak a, ka rawn phone pawh khân ka damlo țan tawh a ni. Ka chau hluah hluah a, ka ngai ém ém bawk che, i bula awm ka châk hle asin, nang lah khân engmah hre si lo khân ințhen kha i rawn rawt a..."

Kan ngawih vang vang hunah chuan," Ka nuin i chêr tih min hrilh a," ka ti ta sap a.

"Chêr e, ka damlo nasa ka tih tawh kha. Ka rawn haw thei lawk lo alawm. Nang lah chuan i number leh i in luah i lo thlâk a. Phone-ah kha chuan ka chauh ém vàngin engmah ka rawn hrilh fiah peih lo che a, ka rawn haw hunah chiang takin ka hrilh fiah mai ang che ka ti rilru a; mahse, ka rin ang rêng rêngin hmuh tùr i awm loh bâkah biak theihna tùr che ka hre thei ta lo va."

"Ka nute pawh i zâwt thei reng a."

A lu bu nghat pahin," A dik; mahse, chu ai chuan zawn hmuh chea hmaichhan ngeia biak che kha ka duh a ni," a ti sup a.

"Ka biru lo ka tih kha."

A nui suk a," I biru ka ti miah lo; mahse, hmuh i harsa a ni. Ka beidawn duh lohnain min hmuhtîr che a ni, thil țhaah hi chuan ka bei hi a dawng mai mai ngai lo," a ti leh kher a.

"Ka rilru a dam tawh tih ka la sawi miah lo."

"Puii, i sawi a ngai lo, a dam famkim theihna tùrin ka bei zel dáwn alawm, nghah pawh ngai mah la ka beidawng thiang lo."

"I upat tawh ém hi," ka ti ta zoh a.

"Het sala! Upa te tih mai mai, i laka ka rilru hi chu ràwlthar chhuak ang hlauh a la ni!"

Ka nuih a za bawk sia, ka nui duh chiah bawk si lo, ka insûm nasa hle.

"I lungawi hma chu upat zêl pawh ka pawi ti lo!"

"I inla zei a nih chu a!"

Ka rilru chu a thâwl deuh hawk tawh, ka țawngkam hman pawh ka uluk lo sâwt ta viau a nih hi.

Hemi zàn ațang hian tlaia ka haw apiangin kawngka bulah hian ka hmuh ngei tùrin pangpâr leh card a lo dah ziah, a tìrah chuan mak ka ti khawp mai a, card ka en hnuah erawh ka hre thiam chiah. Ka thinlung a dek tak zet a ni, pangpâr ka duh tih kha a la theihnghilh lo a nih hi. Tlai tin ka hmu ziah, thla khat a tlin zànah chiah a rawn lêng leh!

"Eng nge i lo tih dáwn a?" tiin ka lo zâwt há a, pangpâr chu ka hnìm vang vang pah a.

"Ka ngai tawh che a."

A thil tih dàn hi a maksak ve rêng rêng. A reh vang vang a, thla khatna chiahah a rawn lang leh a, chutah, a sawi hmasak ber chu ' Ka ngai tawh che a' tih a ni. Min ngai a nih chuan lo lènna hun tam tak a nei si a.

"Zan tin hun i nei reng alawm."

"Puii, inrem tawh ang, lungawi tawh la, aw?"

A hmel chu a khawngaihthlâk zâwk. A dam țha lo nge niang, a chêr leh zualin ka hria. A biang chu a lang kî deuh nghe nghein ka hria, a hmulte chu a ziat hnai lo a niang, a rawn țo leh țan ser ser tawh a, chùlsak ka châk tak zet.

"Puii, mawh, ka ngèn tak meuh che a ni. Inrem tawh ang, thla khat chhûng zawng khân min rawn call ve mial te ka ring ve asin."

"I number ka nei hlei nem." Ka nei hauh lo; mahse, ka thluak hian a vawng hneh lutuk thung.

"I number ka hriat chian teh lul nèn! I hmang lo tih hre reng chung pawhin ka la delete lo, ka call chhên a. Message za chuang ka thawn tawh bawk."

Hei kher chu ka awih lo, dâwt a ni ém ém ang.

"Hei, en la, i bulah chuan a proof-na nèn thlap tihlan loh chuan min ring lo țhìn si a," tiin a phone chu min pe a. Ka en a, a date chu a indawt zut mai. Message zât chu ka chhiar ru zawk zawk a, zà ai chuan a tam chiang!

A message țhenkhat chu ka chhiar a.

*Puii, ka damlo a nia, ka ngai tak zet che a ni..*

*I reh hle mai, message reply ve la, i buai viau em ni?*

*Puii, ka hmangaih che*

Phone chu ka pe lêt nghal vat a, ka chhiar zawm zel duh tawh lo.

"Puii, ka beidawng lo, ka beidawng thiang lo ka tih tawh kha, ka nghâk thei reng che a ni."

"LS...?"

Ngun zet hian min en rùn a, kan ințhen hnu ațangin ka koh leh vawi khatna!

"Yes?"

"Ka ti lutuk tawhin i hria em?"

"Ti lo ve, 'Ka nghâk thei che' ka tih tawh kha, kei chuan i lungàwi zân thleng ka nghâk thei che."

"Pàngpâr min pêk zawng zawngah khân làwmthu ka sawi a, thil awm dàn min hrilh fiah vek vàngin làwmthu ka sawi bawk."

"Welcome. Chuan...?"

Ka thil sawi tùr chu ka huphurh viau; mahse, ka zawh ngei a ngai a ni.

"LS, min la duh reng em?" ka ti ta sap a.

Mit khap miah lo hian min en a, kei erawh chuan ka mit chu ka la zàl zál. Min la duh leh la duh loh hi hriat a ngai, chuti lo chuan ka beiseina hi awmze nei lovin a thâmral leh mai ang.

"I laka ka rilru a danglam lo ka tih tawh kha. Chuan, thil pakhat hriat chhuah thar ka nei bawk a."

"Eng nge chu chu?" Ka hre châk zek zek.

A thaw huai phawt a, chutah," Ka hmangaih che tih ka hria a ni," a ti ta sup a.

Awih lo zet hian ka en a.

"Ka duh che tih chu ka phâ ngai lo; mahse, ka hmangaih che tih chu i hriatah ka la sawi miah lo, a chhan chu ka hmangaih che tih ka hriat loh miau avàngin. Min țhenna thu i rawn sawi zàn ațang khán ka hmangaih che tih ka hre chhuak a, mak pawh ka ti hle a ni."

"Min hmangaih maw?!!"

"Aw, ka hmangaih che, Puii. Ka thinlung zawng zawngin ka hmangaih che, dawhthei taka ka nghah che hi a ngai tih ka hria a, chumi avàng chuan ka beidawng duh lo rêng a ni."

"Bialpa dang pawh ka lo nei tawh maithei a?"

"I nei lo, a dik tiraw? A chhan chu min hmangaih tih ka hre miau a."

"Engtin nge i hriat?!" Makti deuh hian ka en a.

"Sava tê țha deuhin min hrilh a."

Ka tih dàn ang chiah! Ka nu, Sangpuia, Angaihi...Tuin nge hrilh ang le? A, tu pawhin lo hrilh se a dik tho si a.

"Nia..."

Min rawn hnaih nghal kuar a," Puii, min hmangaih ve tho tiraw?" a ti sup a, ka kut chu a rawn dek zuau a; mahse, a la lêt leh nghal vat a. Nghâkhlel, hlauthàwn hmel deuh si hian min en rùn a, kan inmelh hnai khawp mai.

"Aw...ka hmangaih țhìn che alawm, ka hmangaih thìn che..."

"Puii??!!" A aw chhuakah chuan hlauhthàwnna a lang chiang lutuk ringawt, ka nuih sak a.

"Ka hmangaih țhìn che a..." Harsa tih hmel deuh hian a chil a lem a, a hrawk bâwk a kal ralh mai.

"...ka la hmangaih reng che a ni, vawiin, zanin thleng pawh hian," ka ti chhuak ta a.

"Puii..." tih leh min kuah a rual nghal a, nghet zetin min kuah. Ka thaw thei lo lek lek, min kuah nghet lutuk a.

"Ka lâwm e, Puii. Ka lâwm e, min hmangaih reng avàngin. Min hmangaih tih ka hriatna khân chakna min pêk belh țhìn a, beidawng duh lo pawh ka ni rêng a."

"Min hmangaih vàng leh i beidawn duh loh vàngin ka lâwm e, LS."

Kan inkuah a, inkuah mai duhtâwk lovin kan infâwp bawk a. Kan infawh lohna a rei tawh bawk a, thu kan sawi tawh lo, kan inngaihzia leh kan induhtawnzia chu cheziain kan inhrilh mawlh mawlh mai.

"LS..?"

"Shhhh, engmah sawi rih lo ang."

A awm nghèngin ka bei tlân a, tunah chuan ka thla a muang leh ta. Beiseina êng sêt sêt thâmral tawh kha chhèm alh hluai a ni ta. A lung phu dat dat ri pawh chu ka tân chuan rimawi a ni, kan inchhàwn dat dat ang chu.

Rei zet chu țawng lovin kan awm. A chângin kan infâwp leh vawng vawng a, a chângin kan inkuah leh rih bawk.

"Chàn che ka duh tawh lo!"

"Kei pawh."

"Innei ang!"

Ka en chho vat, ani pawhin min rawn en chhukin," A hma pawhin kan sawi vek tawh kha, min nei rawh, Puii," thu tak zet hian a ti sup a.

"Zaninah kan sawi fel chauh a, inneih sawi nghal chu!"

"Ni lo, kan sawi fel hnu chuan nghah a ngai tawh hlei nem. Nghah hian engmah, thil țha a rawn thlen lo, buaina a awm loh lai ngei hian a țha. Puii, min nei ang tiraw?" a ti ta sek sek a.

"Ka nei lo ang che tih ka sawi miah lo a nia."

"Puii, inngaihtuah rei suh aw, kei chu ka inpeih thlap tawh a nia."

Ka nuih sak a," Zanin chauh chu hun min pe ve tal la?" ka ti a.

Ka hnâra fâwp zohin," Aw le, zanin chauh aw, naktûk zîngah i thu tlûkna ka hre duh nghal ang, khawi maw, i phone chu?" a ti nghal zat a.

A number a type chu a call ta nghal a, phone dawhkàna dahin," Naktûk zîngah ka rawn call ang che," tiin min kuah leh nghal a.

Kan inngaih vàng leh kan hlim ém avàng chuan hun kan lo ngaihtuah vak lo va, dâr 11 a ri țép a lo ni.

"Puii, ka haw dáwn em?"

"Haw mai la?" A haw leh teh ang chu!

"I bula mut ka châk!"

"Rei tawh lo tùrah ngai ang."

A mitko a sàn âk a, a nui suk bawk. Hlim hmel zet hian," Yessss...ka nghâk chhuak dáwn ta. Ka nghah rei tawh loh hrâm erawh ka beisei, beisei sual lo tùrah ngai ang," a ti leh sar sar a, nghet zeta min kuahin ka chalah a fâwp leh vawng vawng a.

*******

Kum 1 hnuah chuan...

"Lalduhawm, Honey?"

Bathroom kawngkhàr chu a rawn bêng dat dat a, kei lah chu ka uak tuar tuar reng a, nichin lawka ka thi ei pawh ka luak chhuak leh vek tawh.

"I țha em, Honey, kawng lo hawng teh?"

Min ngaihtuah thei a nia. Ni tin a chhuak lo thei si lo va, a rawn haw veleh min zawng nghal a, min ko hmasa ngei ngei. 'Puii',' Lalduhawm' tih leh 'Honey' tih hi a țawngkam chhuak hmasa ber a ni ziah.

Ka uak zawh veleh ka hmai chu ka tuai fai puat a, kawngka chu ka va hawng a.

"Honey, i țap elo? I luak leh tawh em ni zâwk? I damdawi ei khân hna a thawk chuan nange?"

"Aw, ka luak leh tho. Ka hre thiam tawh lo."

Thla sariha upa naute ka pai mêk. Ka dul chu a lian kawh tawh hle a, ina awm mai mai ni mah ila thil ka ei theih țhin loh avàngin ka chau hluah hluah. LSa bulah erawh chuan a hlim thei ang ber leh chau lo ang maiin ka awm țhìn. Naupai hi a nawm hmel ka lo ti țhìn a nia, tunah zet zawng a nuam ka ti ta mang miah lo.

"Damdawi inah kan kal leh mai dáwn em niang? A nih loh pawhin, mi dang ka'n râwn chhin ang e," a ti sawk sawk a, a phone phawrhin tu emaw a call ta nghal a.

Dârthlalanga ka hmêl chu ka en reng a, ka lang chêr ve riam reuh. Naupai hi ka haw ve hrim hrim a nih dáwn hi, mipa ni thut mai se ka ti, ka huat dànah hian mipa a nih ka ring ru deuh tlat.

Nimin piah lawkah ka nu (LSa nu) a haw phei a, ani hian min awmpui reng thei bîk lo. Aizawl leh Lunglei a kàr tawn reng mai. Min ngaihsak em em a, kan inneih hnu lawk ațanga nau ka pai nghal mai avàngin min duat leh zual a, ei tùr țha tinrêng min lei a ni mai.

In chhûnga ka chêt a phal lo va, che tùr Aizawl ațangin a rawn hruai nghe nghe. Min àwl hneh leh lutuk a, chêt tùr awm lo chu hrehawm ka ti zâwk. Liansanga lahin engmah ka tih a phal lo va, ka tih a phal ber chu exer lâk a ni. Tlaia a school bàn hian kein min kalpui țhìn a, thui vak lo bâk min kalpui ngai chuang lo.

Tlêm lai ațang khân damdawi ka ei țha thei lo va, ka luak zel a. Chaw leh thil dang ka ei ve pawhin a hnu lawkah ka luak zêl. Ka pum chhûng eng emaw dik lo a awm a nih ka ring țhìn, ka hlauthawng thei khawp.

"Puii, luak danna kha chaw ei hmain ei tawh la, a zia mai ang."

Zanriah ei hma deuh dârkâr chanve la awm vêlah damdawi chu ka ei a, chaw chu ka ei ve leh mai, minute 10 hnuah pawh ka luak ta miah lo, a țha dáwn a niang.

Mutnaah chuan min kuah a, lum ti viau mah ila min duatin min thlahlel a ni tih ka hria a, ka sawisêl lo. Mutnaah min kuah ngei ngei ziah, ngaiah ka neih tawh a, min kuah loh chuan ka ruak hiaiin ka hre tlat tawh.

"Puii, mipa a niang tiraw?"

"Ka hre lo le, mipa ni se tiraw?"

"Ka duhthusàmah chuan a ni alawm; mahse, hmeichhia pawh ni se ka duh, ka duat dáwn chiang si a."

Ka nghâwngah chuan a fâwp pah zoh a, chumi rual chiah chuan ka mutkawr hâk chu a rawn zen ruk ruk a.

"Naute lo pian hunah chuan ka chang tawh dáwn si lo," tih sup pah chuan ka âwmbâwr, ka naupai vànga lian ta viau chu a rawn khawih dè dé a.

Ka nui hak a, inthlahrun hmèl deuh si, intineitu zet tho si a chêt hi a thiam a, a inla khawngaihthlâk thiam a nia.

"Zanin chu...?"

"Eng nge?" Ka hai der lui tlat, min mamawhna hi tihlan a hreh ngai lo. Kei pawhin ka tilang hreh chuang lo, a nupui ka ni a, ka pasal a ni bawk.

"Puii..!!" a ti fân ruih a, ka nuih a tizâ. Ka hai der luih hian hrehawm a ti thei lutuk a, min ko ruai zêl.

"Ka mamawh reng mai che a nih hi."

Sawi kher lo mah se, a boxer chhana ka hnung rawn do ràntu chu hai der rual a ni lo. Rai mah ila, min hnualsuat chuang miah lo, mawi min ti thei ém ém zui.

"Kei pawh; mahse, ka chétpui thei lo che tih i hriat kha aw."

"Chêtpui ka ngai lo, ka tân i lo awma i lo inpeih hian a tâwk chiah."

Hmangaihna chen hi a ning thei lul lo, intitatu zeta ka âwmbâwr khàl chung ngei hian a muhìl ziah bawk. Kan inneih zàn phei chuan kan mu mang lo a tih theih, kan pahniha duhthusàm ang ngeiin kan hriat reng tùr, theihnghilh phal miah loh tùrin hmangaihna kan chèn a, min chenpui a, ka chenpui bawk. Zahna hun a ni tawh lo bawk a, zîngah pawh ka tho țha hlei thei lo chu a nih kha.

*******

"U Pui, Kimkimi'n a pa drawer ațangin lehkha a la chhuak a, a pawt chhe vek a nia!"

E khai! Kimkimi țhìn hi chu aw! Kum hnih a ni ve ta, a harh țha chiang a nia, a u Danny nèn chuan an nungchang hi chhim leh hmàr ang chiah a ni. Pakhat a ngawi reng a, thil pakhat a khawih tawh chuan thil dang a tawk ngai lo, pakhat zâwk, hmeichhia zâwk erawh harh chikimin a harh thung. Min awmpuitu Mawitei pawh hian a hah phah thei a nia, tlàn kual reng a ngai.

"A pawimawh viau ang em aw?!!!" ka ti vawng vawng a.

"Ka hre lo, U LSa chu a thinrim ngawtin ka ring a ni."

"Lungngai lo phawt teh ang, keima'n ka lo hrilh dáwn nia."

Kimkimi chu a inbual duh lo tlân kual vêlin a pa drawer chu a hawng tih hriat reng, inbual hi a duh lo lutuk a, ka mangang thei tawp. Lehkha pawimawh ni lo hrâm teh se.

A inbual zo chu Mawitei chuan a paw muhìl a, a muthilh hnu chuan ka thaw huai. Kimkimi enkawl tùr hi chuan chak țhat a ngai lutuk a, a buaithlak tawp. Thil tihchhiat tùr zawng hian a tlân kual ruai ka ti mai, toys a neih ve pawh a tichhe zung zung zêl. A u Danny-a car pawh a vawm chhhiatsak vek. Pâwna pangpâr pot kan dah pawh a lo namthlu ziah, a pâr a suasam vak bawk țhìn.

"Hey, Honey? I va chau àwm ve!"

Țhutthlènga țhuin ka nghâwng ka lo tuai nauh nauh a, LSa lo luh lai pawh ka lo hmu lo.

"In va bâng hma ve!"

"Nia, vawiin chu today a ni tlat a," nui suk chung hian min rawn pan a, ka chalah a fâwp zoh a," Khawiah nge ka duat ém émte hi? An va reh ve!" a ti leh a.

"Kimkimi a muhìl a, Danny erawh room-ah thil lem a diam leh tawh a nih kha. En teh, Honey, i drawer-a lehkha pakhat Kimkimi'n a pawt chhia a nia, a pawimawh viau em check teh."

"Pawimawh viau tùr drawer-ah ka dah lo ang, a pawimawhho chu naupang khawih phãkah ka dah ngai lo."

"Tak tak maw? Kan lo mangang lutuk a, a zia hlauh chu!" Ka thaw a veng huai mai.

"I chauh hmel, ka lo hmehsak dáwn che em ni?"

"Zànah ni zâwk rawh se, i ril a țâm em?"

Meng sawr sawr chung hian," I bula ka awm hi chuan țâm reng mai," mei nei zet hian a ti sup a.

"Hah, i rilru a sisé lo ém mai aw!"

"Sêl lutuk zâwk," tiin ka hmuiah a fâwp vang vang phawt a, chumi hnuah chuan Danny room lam chu kan pan ta nghal a.

Kawngkhàr kik karh karh pah chuan," Knock, knock.." a ti zâng vah a.

"Yes, come in."

"Hey, Danny ka fapa duat, eng lem nge i lo siam a?"

"Âpa, i lo haw tawh maw? En teh, a mawi asin, ka siam thiam tiraw?" tiin sava thlâwk lai lem a siam chu chhuang zetin a pa chu a hmuh nghal vat a.

"Ka fapa duat hian a va siam thiam tawh em!!! Ânu, a mawi tiraw?"

"A va mawi ém!! Duata, i siam thiam lutuk ringawt. Âpa, Duata hi school kal ve tawh se, a ziak thiam tawh bawk sia?"

"Yes, Âpa, school ka kal duh tawh."

Zànah toilet-a ka luh hlanin khumah chuan a lo awm diam tawh a, mu thei mai tùrin a lo inpeih tawh. Ka chhuak chu," Honey, vawiin hi eng nî nge i hria em?" a lo ti sup a.

"Hre dáwn lo'm ni?" ka ti tê tê phawt a, wardrobe hawngin a birthday gift tùr ka dah țhat khiau chu la chhuakin ka pe a," Happiest Birthday, ka pasal duh tak," ti pahin a hmuiah chuan ka fawhsak zoh a, ka awm sawn leh nghal vat a.

Ani lah chuan a lo duhkhawp lo nasa, min pawt bet a, duhthawh zet hian min fâwp leh țâwk a, ka thaw a tichham lek lek.

"Honey, ka lâwm e. Birthday gift vàng leh ka nupui, ka fate nu i nih vàng hian ka lâwm tak meuh a ni."

Khuma ka mut ve hnu chuan pangchang zet hian," Ka lam lo hawi la," a ti sup a, a lam hawia mut loh ka tum miah lo, ka la insiam rem loh vàng a ni.

"Ka lo hawi dáwn chiang," tiin ka inlet nghal a.

"I lang sexy tawp a!"

"Kei chu ka sexy reng alawm."

"Dik chiah, hei vàng chiah hian alâwm ka hnè theih ngai loh che, fa țha tak tak pahnih min hrinsak hnuah pawh ka la hmu sexy reng mai che a nia," tiin a kut hrawl zet chuan ka mal a rawn zût zai zai a.

"Zanin chu ka àwl ve tawh ang che, ka che ve tawh ang," tiin a hmuiah ka fâwp a, chumi pah chuan ka kut chuan a taksa pawimawh lai chu ka dapsak rak rak a.

Kan innei rei ve tawh a, chêt ka la hmasa ngai lo. Makti zetin min en há a, ka hai der lui tlat. Ka kut chuan ka theih ang angin chêt ka la a, a thâwk hawk tâkah chuan ka tum chu ka hlawhtling hle tih ka hria.

"Puii..." a awka chhuak chu a thâm tuak a, a khùr deuh dut dut bawk. A kuta min chûl tùr chu ka dang tlat a, min mamawh over tùra siam ka tum a ni. Ka kut mai duh tâwk lovin ka kut sùlhnu chu ka hmui chuan ka chhunzawmtîr zat a.

A insûm rei thei lo, a kut pahniha ka bianga dawmin min fâwp a, min keih mawlh mawlh a, chutah, insiam remin min mut ta zar a, ka mal inkârah chuan țanhmun a insiam nghal a.

"Birthday gift țha ber a ni, theihnghilh phal rual a ni lo!" ti supin a taksa leh ka taksa chu a rawn inzawmtîr ta nghal a.

Chau hnêpin hmangaihna chu kan chèn a, kan tàwp hlei thei lo. Vawi hnih vawi thum lai hnuah chuan," A tlai dáwn ta, i chàu lutuk ang, ka muttîr tawh ang che," a ti sar sar a.

Ka chau, ka zêp lo. A infit lutuk bîk hi mak ka ti fo.

"Tui deuhin mu rawh, ka duhtak."

"Ka hmangaih che, LS."

"Kei pawhin ka hmangaih che, Puii."

"May ni 13 hi ka dam chhûngin ka theihnghilh thei ngai tawh lo ang, a chhan chu he khawvela ka hmangaih ber, ka fate pa ni bawk lo pian chhuah ni a ni miau si a."

******* F I N *******

[☆13TH MAY☆ chuan zàn 32 hmêl a hmuh hnuah a lo tàwp ta. Chhiartu zawng zawng hnênah lawmthu ka sawi tak meuh meuh a, nangmahni vang chauha he thawnthu tlâwm tak hi ziaka titàwp thei ka ni tih ka inhria e. In fel ngawih ngawih ka ti che u, story thar nèn inhmuh leh thuai kan tum dáwn nia, LOVE YOU ALL]

*NGAIHDAMNA TEL LO CHUAN NUN HI A NUAM THEI LO, NGAIHDAM NGAI, THIL TISUAL THEI VEK KAN NI SI A. NGAIHDAM HI PATHIAN ZIA A NI*