☆13TH MAY☆ - 9 - 16 By Dingdi Pachuau

 

☆13TH MAY☆ - 9 By Dingdi Pachuau

Ei tùr chah a rawn thleng a, ka ril a țâm ve tawh bawk a, ka ei țeuh mai. Liansanga chuan min lo en reng a niang," I ril a țâm viau tawh a ni maw? Hei hi ei belh rawh, kei chu ka ril a țâm lo va," tiin a ei tùr, piece khat chiah a la ei chu ka hmaah a rawn nawr a.

"I ei peih tawh lo maw?"

"Aw, ei rawh."

Kan têt laiin ka nu leh pain ei tùr chungchângah dàn khauh tak an siam țhìn a, ei tùr ei zo lova kalsan leh paih an phal ngai lo. Chu chu tûn thleng hian kan la chhawm chho zêl a, dàwra ka chawlh pawhin ka ei zo ngei ngei țhìn.

A nu chuan," Kan chah leh thei reng alawm, puar takin kan ei ang chu," tiin a chah belh ta nghal a.

Ka puar ta lutuk a, hrehawm ka ti leh si. Ka pum ka zût ka zût mai, Liansanga chuan nimbu tui lei tùr a zawng ta chûk a, car-a kan luh hnuah min intîr leh rih a.

"Nula puitling ve uaih tawh si, mahni puarna tâwk ei chin pawh hre lo."

A nu chuan a lo khap vat a," I ril a țàm tawh lutuk vàng a nih kha, kan chàwl har ém a ni," a lo ti vat a.

"Nangma'n ei tùr ka hmaa i rawn chhawp leh vàng a nih kha, hnial che ka hreh ve alawm."

"Chu pawh ni se?"

"Ei tùr ei zawh loha kalsan ka duh hlei nem."

Anu chuan," A dik chiah. Tete, i sawi dik lutuk, ei tùr nei lo khawvêlah mi tam tak an awm laia ei tùr ei zawh duh loh leh paih tih vèl chu a țha miah lo, a malsâwm lo ve," a lo ti ve a.

A hnu deuhah chuan ka zia deuh ta. Ka ina pèn ka duh viau nain kawt vélah mi an lo awm nial a, ka țhulh leh. Miin an nufa nèna min hmuh ka duh lo, min sawi palh ang.

Eirawng kan bàwl laiin a phone a rawn ri a, a screen-a hming a save chu ka hmu hman; mahse, a chhâng duh miah lo, a off daih.

"Tete, zanin chu kàwn cheite en i duh em? Bawiha nèn hian in duh chuan in chhuak thei reng a nia. Zàna chhuah ve pawh hi a nuam ve a, va hehêu ta viaua inngaih tùr pawh a ni chuang lo."

"Kan tum lâwk alawm," Liansanga chuan a lo ti thuai a.

Ka melh a, he pa dâwt sawi peihzia hi. Kan tum lâwk lo hrim hrim, a nu bulah hi chuan fapa țha tak hi chu a ni ve chiang a ni.

"A țhat hlauh chu. In rei lutuk lo ang a, zàn men rei hi a țûl lêm lo."

Zanriah chu tam deuh ka ei ta lo. Kan ei lai chuan a nu chu a țawng siam siam reng a, Liansanga erawh a țawng lo khawp, keiin a nu chu ka lo chhàwn zauh zauh thung a.

"Kum a lo thar ang a, chawlh in neih hunah Aizâwl  lamah i lo phei ve ang chu tiraw? Kan in leh a pi leh pu sumdàwnna lamte pawh in en dùn ang a."

Chhàn ngaihna ka hre lo lutuk a," Nia," ka ti ve ringawt. Liansanga lah a ngawi rùn ringawt bawk si.

"A pi leh pute khân hmu ve hman che se la ka ti mang e!"

Chaw ei kham hma deuh hlekah chuan kàwn chei fang tùrin kan chhuak leh ta a, inah ka pêng haw. Vawiina kan thil leite ka dah leh rih a, zàna ka mamawh tùr toothbrush leh thawmhnaw thlâkna tùr ka keng bawk a.

Bazâr vêng lam pana kan tlàn chhuk lai chuan," Hrehawm i tih loh hrâm ka beisei. Ka nu hian a duh duh hi a sawi țhìn si a, lo la thutak viau lo mai rawh aw," a ti a.

"Ka hre thiam alawm. Ka ngai thutak lo ve."

Kan pahniha kan awm hi chuan lemchan a ngai hran lo bawk a, nihna ang anga lan mai hi a țha rêng a ni. Ani hian min duh lo va, a bialnu lem chang atân chauh min duh tih ka hre chiang hle a ni. Tûn lawka a thil sawi ațang pawh khân a hriat vek.

Ka phone a rawn ri a, Zaktheilova bawk! Ka va ning tak! Eng vanga min la rawn phone ngam nge a nih pawh ka hre lo ve. Duh over a, min kalsan hnua ka lam a lo hawi leh huna lo pawm leh mai tùrin min ngai a niang, teuh lo mai.

"Chhâng ta che!"

"A pawimawh lo."

"I bialpa kha a ni maw?"

"Ni maithei!"

"A nih chuan, chhâng ta che, ka lo ngawi reng ang."

"A ngai lo."

Khawi hmunah pawh chuan mihring an lo tam êm êm zel mai a, nizan ai pawhin an lo tam zêl.

"Khalaiah khân ding rawh, thla ka lo lâk ang che."

Min hmehsak a, kei pawhin ka hmehsak ve bawk. Kan pahnih pawhin kan la dùn, kan biang a insi lo chauh zêl. Ka'n țang deuh nain min pawt hnai sauh zêl. Kan la dùn nasa, a chhan chu hàwn hunah a nuin thla kan la dùn lo a nih chuan mak a ti ang tih kan hlau a.

"Kan kal tawh chinah khawi nge mawi i la tih ber?"

Ka ngaihtuah vang vang a," Chanmari," ka ti sap a.

"I tih ka ring rêng ah!"

"Eng vàng ngawtin maw?"

"Hmeichhe duh chiin an chei miau a."

Sèrkâwn chu vawiin lamah an lo tidanglam leh deuh hlek a, nizàn aiin a mawi zâwk.

Liansanga phone a rawn ri ve thung a, piah deuhah a kal sawn deuh a, chutih chhûng chuan kei pawh thla ka lo la chuai chuai a, amah Liansanga ngei pawh chu ka hmehsak ve a.

"Tete?"

En lo mah ila, min kotu chu ka hre chiang ngang mai.

"Tete, engati nge ka call min chhàn duh loh a?"

A va zak lo tak. Ka duh leh ka chhâng lo ang, a sawi tùr a awm lo ve e.

"Duhtâwk rawh."

"I thin a rim rih a nih kha, ka hre thiam alawm. Ka beidawng lo ang."

"Min lo call tawh suh, i bialnu kha lâwm takin pawm rawh."

"Nang aiin ka duh lo zâwk."

Duh lo  zâwk mah se, kei pawhin amah hi ka duh lo daih zâwk, Liansanga aiin.

"Kan kal tawh dáwn em ni ang?"

Liansanga chu engtik laiin nge kan bulah a lo awm tih ka hre miah lo, kan thu sawi kha a hria ang em? Hre lo hrâm teh se.

Haw kawngah engmah min zawh loh avàngin Rinawmlova nèna kan inbiakna kha a hre lo a nih ka ring deuh ringawt a, ka ngaih a țha deuh huai.

An in kan thlen chuan a nu chu a lo la mêng a, dâr zât ka en vat a, dârkâr khat vêl âwrh chauh kan lêng.

"In lêng rei lo hle mai. Tete, a mawi bawk em?"

"Aw, mawi lutuk, thla pawh kan la chuai chuai reng mai."

Liansanga chuan a phone-a a lâk chu a entîr a, en vang vang pah chuan," A nuam ve duh reuh khawp ang, kan nulât laite kha chuan hetiang hian chei a la awm ngai lo va, țhiante phûr fâl deuhte nèn in kan chei a, balloon leh thlàn cheina ang chi hian kan chei ve chuai țhìn. A hun lai chuan mawi kan ti ve lutuk asin," a ti sap sap a.

"A hun lai azir zêl alawm, tuna kàwn an cheite pawh hi kan fate hunah meuh chuan a lo țhing ve leh tawh ang a, thil rêng rêng hi a hun lai azir zêl hian a lo mawi mai mai a lo ni."

Mut nân a la hma deuh avàngin chinese checker kan khèl a, Liansanga nu chu a lo thiam reuh lutuk a, keimah ka thiam lo ber. Ka zo har ber zel a, vawi khat erawh ka zo hma ve ber.

"Ka room-ah khum pakhat dang a awm a, tah chuan i mu dáwn nia. I huphurh em? Mutna i sawnin i muhìl thei lo țhìn em?"

"A chângin."

"Zanin chu vawiin lam i chàu dáwn bawk si a, i muhìl thei ang. Mut i duh tawh em?"

Nui chungin," Nangmah zâwk kha i chàu tawh a ni chiang. Um, mut pawh a pawi tawh lo khawp mai," ka ti a.

Khumah chuan ka mu meng kar a, a țantìrah ka muhìl sek a, eng vàng nge ka hre lo, ka harh hlawl mai a, ka muhìl leh tawh lo.

Thâwm hriat tùr a vâng kher mai. A reh tlawk tlawk nain ka lungphû a dik lo tlat, ka hlau em ni le?

Ka hlau a nih ka ring, ka zun a chhuak tlat. A mak e, ka in luahah khân hlauhna ka nei ngai lo. Ka vawi khat riahna a nih vàng a ni ngei ang.

Ka tho țham țham a, toilet-ah ka lût a, ka chhuah leh chuan thâwm ka hre tlat, choka lamah a ni.

Ka ding chat a, ka âwm chu ka dawm vang vang phawt a, zawi téin thâwk ka la. Ka au vak mai dáwn em niang? Nge current ka on thut ang? Hmanraw chuh tùr ka hmu mai si lo va, ka hmuh chhun apron chu ka ban a, hei hian a nghâwngah ka vêt mai ang.

Hlau chung chung chuan thâwm rîkna chu ka hnaih phei a, light on a nih loh vàngin a thim ruai a, thla êng ringa hmu thei chauh ka nih vàngin a chiang lo hle a.

Ri deuh riap riap ka hria a, ka hnaih phei zêl. Hlàu viau mah ila, ani pawhin min hlau ve tho ang tih rilru ka pu tlat a, ho tê chuan ka chhuah bîk lo ang.

Fridge bulah thâwm chu a rì e.

A thim.avàngin ka hmu thei bawk si lo va, a rîk dàn chu a hniam deuh avàngin mihring a ni thei dáwn em ni? Rûl, ui, zawhte, sazu, chutiang chu a ni maithei.

Current ka on thut a, ka zuang pah bawk a. Phêngphehlep lian pui hian a thla a lo zâp hluau hluau lo niin, thlawh kàn a tum a, a lo thlâwk kâng thei tawh lo ni ngei tùr a ni.

Ka thaw huai a, ka nuih a za ru viau bawk. Phêngphehlep thla zâp rî hlaua nula pumpa han awm chuh, a nuihzatthlâk e.

Kawta ui a rawn bauh thut erawh ka phu nasa lutuk a, ka țê țhat mai. Ka boruak tawn nèn a inkaihhnawih lutuk a, ka khùr zawih zawih mai.

"Puii?!!! Engtizia nge?"

Ka pan vat a, ka pawm châwih ringawt. Ka khùr nasa lutuk a, ka thin a phu zawih zawih mai.

Nghet zetin min kuah a, ka hnung a chûl a, ka  khurh nasat lutuk avàngin ka khûp chu a sài dar dar a.

"Eng thil nge thleng?"

"Ka muhìl lai ka harh thut a, thâwm ka hria a, ui a lo bauh thut bawk nèn, ka phu nasa lutuk a ni."

Min kuah nghet leh sauh sauh a," Titi i duh em? A nih loh leh, ka nu bulah mu mai ta che. Ui bauh kha chu rannung eng emaw a hmu a niang," a ti sup a.

Kan titi rei lo, ka thinphu a pângngai hnuah chuan mu tùrin ka lût a. Liansanga a meng ve reng rih dáwn tih ka hriatna chuan min thlamuan a, ka hlau tawh bîk lo.

Zîngah thawh ka hai lehnghal, a zahthlâk lutuk. Ni a chhuak ar a, tukverh ațangin ni zung a lo lût sung tawh.

Ka hmaite phih a, ka intihfai hnu chuan ka chhuak a, dâr 7  a pêl tawh.

"Good morning, nizànah i mu țha thei lo niin ka lo hria a, a zia lo tak zet a ni," a nu chuan a lo ti a.

"A, ka mutna ka sawn vàng a nih kha, ka  mut theih hnuah erawh ka mu tui leh lutuk a, thawh ka hai leh daih."

"A nih chuan, tûkțhuan ei la, inkhâwm i duh chuan Bawiha'n a thlah ang che, a țha em?"

Ka ei leh ta poh. Inkhâwm ka duh vàngin ei kham veleh ka haw a, kawt ni lovah ka dintîr a, ka chhuak nghal.

*******

Krismas hmang tùr chuan kan vêngah chuan ka haw a, in ka thlena kan chhúngkaw boruak chu a nuam tawp. Thil kan leisakte chu ka phawrh a; mahse, ka bialpa lemchang nu leisak tih ka sawi ngam teuh lo. Ka leisakah an ngai a, an lãwm thiam hle a ni.

Hlim takin Krismas hun kan hmang a, zaikhâwmnaah ka kal zat zat. Kan zai tui viau lehnghal a, Krismas ruai pawh kan nawn nghe nghe, a nuam reuh lutuk.

31 ni-ah YMA-in kumthara hruaitu tùrte kan thlang a, chawhnu lamah infiam hlimna kan nei. Kei pawh volleyball-ah ka tel a, ka thiam lo lutuk a, kan nui nasa hle a ni. Zàn lamah erawh țhalaiin Biak inah hun kan hmang ang.

Tlaiah chuan zai rât rât chungin inah chuan ka lût a, ka nu leh tlangval pakhat lo țhu dùn ka hmuh thut chuan ka zai tàwp chiang lutuk. He pa hian hetah eng nge a lo tih dáwn?!!!

*I THIL TUMAH RÊNG RÊNG, BEIDAWNG MAI LO LA, KHAMI TI THEI TÙR KHÂN I ȚHA TÃWK TIH INHRIA ANG CHE*

.

☆13TH MAY☆ - 10 By Dingdi Pachuau

Zak lo ve tak chu a ni, eng vànga rawn kal nge a nih? Ngam pawh a ngam zâwk khawp mai.

"Tete,  min hre thiam rawh."

En pawh ka en lo, ka ngei lutuk a, ka hmêl ațangin chuan an man thiam ve ve ang. Ka nu ka va en phei chuan a mitmeiin min lo khap vat a, ka hmêl ațangin ka rilru a hre nghâl a ni chiang.

"Eng nge i rawn tih dáwn?" Ka aw chu a vîn lo nain ngaihno erawh a bei lo khawp, a pal mai mai tùr ka ni lo. Eng emaw tak a rùi a niang, helai thleng thlenga lo kal ngam te chu.

"Ka ngai tawh che a."

Kan in hi vêng tawntìr lama awm a ni hlauh a, a zia e. Chuti lo zawng, mi dangin an lo hria ang a, 'a bialpa a lo kal a, chuti khati' an ti leh mai ang, thingtlâng khaw tê a ni si a.

"Min ngaih ka ngai lo!"

"Mahse, ka ngai miau si che a, i hmel ka hmuh hrim hrim pawh hi ka châk a."

A va zak thei lo tak chiang.

"Nu, tui lum a awm em? Sangpuia lo haw hmain inbual ka duh, inbual a rawn duh ngei dáwn si a."

"Aw, a awm țeuh mai, inbual rawh."

Room-a ka luh hlàn chuan a scooty nung rî chu ka hria a, he pa hi khaw chhûng lama a tlàn loh hrâm ka beisei. Mi min sawi ka duh lo, amah vàng hlauh phei chuan.

"Khawiah nge a kal dáwn a?"

"A haw dáwn maw le. I be țha lo ém a."

"Pawi lo!"

"Kha kha maw i bialpa hlui chu? A insawi fiah kha chuan a khawngaihthlâk ve hluam hluam reuh lutuk. A tihdik loh a nih thu pawh a phâ bîk miah lo asun," ka nu chuan a ti leh a.

"A pha ngam tawp nâng, min țhentu a ni miau a."

"A inchhìr hmel viau kha!"

"A ti ve mai mai a nih kha, a zak lo tak tak. Hêng hêngah te lo kal ngam rêng rêng!"

Zanriah kîl laiin ka nuin min la fiam zui. Sangpuia pawh chuan nui chungin hmuh ve a châk thu chu a sawi a, ka nu nèn chuan an nui țhâ a, kei ve thung chu ka nuih pawh a za lo, ka thin a tirim țûng mai. Kum thar huna chhuk thlâk leh pawh min tiphûr lo zo vek.

*******

Peih lo chung leh phûr lo zetin school țan tùrin ka chhuk a, ka peih loh lutuk vàng chuan ka nuin min chhukpui a, a chhan chu Rinawma khân min rawn text reng a, min rawn call thùl. Ka chhâng ngai lo, ka ning ngawih ngawih, zàna a rawn lèn ka hlau ber.

Kan chhuk thlâk zànah erawh a rawn kal lo, a zin leh tawh a nih ka ring, a zia hlauh e. Ka hmu peih lo, zu rim namin  a lo kal lui ang tih ka hlau, a mualphothlâk dáwn ém asin.

Ka nu chu ni khat a châm a, a bâk ka phût ngam lo. Ka nu haw hnuah chuan zànah kawngka ka kalh nghal zêl a, pawn light leh kawngka lam hnaih light ka on ngam lo.

School naupang leh zirtîrtu pawh kan kim leh ta, kum kalta chhûngin boral kan awm lo va, kum tharah dam takin kan inhmu khâwm leh thei bawk sia, a làwmawm khawp mai.

Liansanga pawhin hairstyle thar a rawn nei, a inhmeh khawp mai. A hmel a tilangsàrin a hrisèl hmel, a infit hmel khawp mai!

Krismas gift-ah a nu hriat lai ngeiin țhi nalh deuh mai min pe a nih kha. Min awrhtîr a, a nalh ka tih ém vàngin ka phelh phal tawh lo. Chhîng tê a nih vàngin chêtna a tibuai lo va, ka duh reuh tak tak a ni. Hmeichhe mawi tihzawng chu a hre ngawtin ka ring.

February thla tàwp lama exam kan neih dáwn vàngin zirtîrtu leh naupangte kan țang khawp mai a, school discipline mai bâkah TLM, library leh environment hrim hrim leh zirtîrtute hi an țha țheh țhawh viau. Session thar lamah phei chuan school naupang an pung viauin ka ring, Liansanga hian mamawh tùr a hriain a supply hneh bawk a, kum khat ém la enkawl tling lo mah se, school nih dàn tùr leh kalhmang a hre khawp mai.

Thla tin staff meeting neiin harsatnate min zâwt țhìn. Naupang dinhmun leh harsatna an neih kan hriatte min zâwtin, zirtîrtu pawhin harsatna kawng hrang hranga kan neih dànte kan sawiho țhìn. Hei hi chu a rawn enkawl hma khân kan ti ngai vak lo va, thla 4 dan vêlah chuan meeting chu kan nei ve țhìn, principal kha mi țha tak a ni ve tawp a, school an enkawl dàn chu a inang lo deuh chu a ni.

*******

Zirtàwp zàn a ni a, naupang question tùr en pahin zai ka ngaithla a, kawngka a rawn ri ta dat dat mai.

Ka en vat a, kei hi Rinawma lo lèn ngai loh vangin ka lo inthlahdah leh tawh a ni, ka lo kalh miah lo.

"Tete, i awm tih ka hria a nia, khawngaihin, lo hawng teh."

Rinawma a nih chu. Zai ka play bawk sia, ka awm tih chu a hre ngei ang chu, màwlthlâk lutuk mai.

"Lo lût rawh."

A rawn lût a, a inzum ve deuh emaw ni chu aw ka ti, a rawn ngampa sârh lo tlat.

"Ka lo kal hian ka tibuai che em?"

Hawihhàwmna ka nei ve rih e." Tibuai lo ve, țhu rawh."

"Tete, a hrehawm ka ti tawh a nia, engkim kha ka thiam loh vek a ni."

"Thuam lohna i nei hlei nem. Kan inkâr tihtàwp kha kan tân a țha ve ve alawm."

"Ni lo, chutiang a ni lo. I tel lo chuan ka tlei tak tak lo."

"Sawi tawh lo ang, sawi chhuah pawh ka duh tawh lo."

"Khawngaih takin, Tete, hun min pe leh hrám rawh."

"Rinawm, bialpa dang ka nei tawh!"

Heta țang hian a reh ve ta deuh; mahse, a hnu rei vak lovah a țhianpa Rema nèn an rawn lêng leh a.

"Tete, i bialpa ka hmuh hma chu ka awih thei lo a ni. Chuti taka rangin bialpa min neihsan ka ring thei lo."

"Nang pawhin i neih theih chuan engah nge ka neih loh bîk ang?" Dâwt ka hrilh chu ka inthiam lutuk lo nàngin a zak lo lutuk hi ka ning.

*******

Zara a hria, kan inngaizawng lo tih a hre bawk. Mipa dang ka han ngaihtuah a, tu mah kawm ngeih fàl deuh leh min țanpuitu tùr ka hre lo.

Liansanga. Ani hi chu a dang daih, bialnu nei lai a ni. A hnuaia thawk ka ni a, pawisa ka bat vàngin a bialnu lemah ka țang mék. Ani hi a tihchi mai lo ang maw? Min țanpui thei maithei asin, a bialnu lem ka ni tho va, ka bialpa lem ni ve mai se.

Mahse, a bialnu lema ka țan pawh hian ka buai ve tâwk ém ém mai si a, ka bialpa lema a țan ve kherna chhan tùr a awm lo, duh pawh a duh kher lo ang, ka lu ka thing nak nak a.

*******

Vawiin chu chawhma chauh exam an nei a, an zo hma hlawm riau. Naktûk chawhnuah Mathematics subj-in an zo hlawm ang. Naupang tam zâwkin exam an zo tawh a, thaw a veng țan.

Kan haw dáwnah Liansanga'n min rawn call a, office-a hmu tùrin. Hm, kan inngaihzàwn a hun leh tawh a nih hmel.

"Naktûk tlaiah zanriah i rawn ei a ngai dáwn sia, chawhmeh min bazàrpui la ka ti deuh a."

"Naktûkah ti ila?"

"Chawhnuah an exam dáwn chauh sia?"

Ni dáwn tak. Nichînah pawh Zarate bulah ka sawi ve lar lar reng sia, ka lo mangnghilh leh hman tawh.

"Ka lo theihnghilh leh hman tawh."

"I senior tawh a nih kha."

"Nia, pasal neih vat ka ngai."

Kan chhuak a, bazârpuiah kan kal a, kan lei nual. Thingtlângah chuan chawhmeh a vâng tawh viau nain khawpui nge ngeah chuan pawisa neih hi chuan lei tùr a tam tho mai.

Kan duhtâwk kan lei hnu chuan kan chhuak leh nghal a, chawhmeh kan leite car-a kan dah fel hnu chuan," E, lawk, thil pakhat ka theihnghilh țêp, ka'n en lawk aw, min lo nghâk lawk mai," tiin step-ah chuan a chhuk lehnghal a.

Car bulah chuan dingin phone ka khawih a, "Tete?" tih rî ka hriat chuan ka hawi chhuak nghal a.

Rinawma leh a bialnu chhe lo deuh kha lo niin. A bialnu chuan a kutah a lo chelhsak ràn a, Rinawma lah chuan min hmu chu mak a tih hmel khawp mai.

"Eng nge i tih a?"

"Kan bazâr lawk a."

"Kal ang?" A bialnu chuan ning tih hriat fé hian a ti no hnâp a. Rinawma bialnu hlui ka ni tih a hria nge min melh dàn chu, a nuam miah lo.

"Min kalsan rih la? Tetei hi ka be lawk duh alawm."

"A ngai bawk lo!" a ti hlar a. Intitâtu tak hian a kutah chuan a chelh nghet sauh a, min melh râm bawk a.

"I bialnu hlui bulah hian ka kalsan dáwn lo che."

Hm, tûn hi hun țha tak a nih dáwn hi. Liansanga chu ka text a, a hmuh  loh leh en loh ka hlauh ém vangin ka miss-call bawk a.

"Tetei biak lawk ka duh ka tih chu!"

"Tikhân inbia ula ni mai alawm!"

Kan bul vêlah chuan mi an awm ve tho a; mahse, kan boruak chu engmah an rawn hre ve lo ang.

"Hey, Darling, ka rei ta zêk a. Min nghah rei avàngin pawi ka ti; mahse, i thil duh ber chi kha ka hmuh vàng a nia," tiin ka kâwngah chuan min rawn kuah nghal a, ka en chho a, ani chuan min lo nuih sak a, ka chalah a fâwp pah zoh. Ka message thawn kha a lo chhiar chiang e.

"Duhtak, hei i țhiante em ni? Ka va hre ngai lo ve!"

"Hmel hriat hluite an nih hi. Rinawma leh a țhiannu an nia, chuan, hei hi ka țhianpa LSa a nih hi."

"A nih chu, ka lo hre lo che u pawh chu a mak hran loh chu a."

Rinawma chuan Liansanga nèn chuan min en tawn sek mai a, a țawng miah lo. A bialnu lah chuan Liansanga chu chhe lo tih hmel fahran hian a en char char a.

"Tete, kan kal rih mai ang."

"Chuti mai tùr em ni? Darling, i hmel hriat hluite an nih bawk si chuan in inhmu khât àwm sia, thil eiho tùrin sâwm la?"

Rinawma chuan țhen sak  chung hian," A ngai lo ve, kan lâwm e, a nih leh mai u," tiin a kal ta nghal a, a bialnu chu a zui ta dat dat a, an inbauh ve hlek maithei a ni.

An kal hnu chuan," I bialpa hlui a ni maw? Um, i hmel ațangin a hriat nghal vek mai," a ti sup a, nichina a țawng chhuak nèn chuan a inang tawh lo kher mai.

"Tihngaihna ka hriat chhun a ni tlat a."

"I bialpa lem ka chansak vàng che khân ka bialnu lem i chang zël rih tùr a ni ang."

"Hei, tunah pawh ka la chan zêl hi."

"Țûl ka tih hunah maw le." Tifuh intih hmel zet hian a bu nghat nghat a, eng tak chu ngaihtuah ang maw?

*******

LIANSANGA

~~~~~~~~~~

Ka sana chu ka melh zauh a, dâr 7 a ri tawh. Nichin lawk khân ka nu ka phone a, Rinpuii chu a lo dârkâr chanve vêl kalta khân a lo chhuak tawh tih min hrilh, keimah ngeiin hruai kha ka duh viau a, kan tlai ka hlau deuh si.

A number-ah ka call a, a ring nain min chhâng lo. A silent leh tawh a niang, a thlen chin tal min rawn hrilh ve tùr a nia.

Exam zawhah ka nuin a sàwm tlat avangin Aizawlah zinkhawthawng leh school thil chhuanlamin a lo phei a, kan inah a awm. Zîng kâr ațangin kei chu ka pi leh pu sumdàwnna ka rochun buaipuiin Khatlaah ka awm daih a, inah ka haw miah lo. Zanriah pawh ka in pakhat zâwkah ka ei ta mai, chuta țang chuan ka cousin Neneihi birthday làwm tùrin ka kal tlang nghal.

Dâr zât ka en leh, dâr 7:10 a ni leh tawh. Ka awm hle hle thei tawh lo, dawhkanah chuan ka kut ka tlir dar dar a, ka ke ka phût bawk. Ka mit chuan Hall lianpui kan luhna kawngka lam chu ka melh reng a, mi an awm nual tawh a, a țhen chu ka hriat pawh an ni lo.

Kima chuan," A la rawn thleng nange?" a ti a, dâr zât chu en lehin," A lo thleng țêpin ka ring," ka ti ringawt a, ka ngaih a țha lo lek lek tawh.

"Ka hmu châk tawh asin le!"

"I hmu mawlh ang."

Ka tho nghal. Ka țhu thei tawh lo, ka zawn a ngai a ni, ka nu khân he birthday party kan neihna tùr hi a hre chiang viauin ka ring si, ka hrilh chiang hle bawk.

Sam dum, ngil seng sawng, pheikhawk dum flat bun, kawr sen ha ka zawng tawp. A inthuam tum dàn a ni miau a, ka hmuh hma theih dan tùr ber a ni.

Mipa leh hmeichhia a kawp tê têin ka hmu a, mipa rual ding pawh ka hmu nual. Ka hmeichhe zawn hmel chu a vàn hmel khawp mai ka ti. Ka phone call tal chhâng thei se chuan a zia ni mai tùr.

Hmeichhe sam uk kherh khawrh, a mawi tâwk chauha kir hian kawr sen chu a ha ve ngei mai, hnung lam chauh ka hmu, mipa pathum nèn an ding. A sexy hmel khawp mai, mipa marphu tirang nghal dat dat thei chu a ni chiang mai, a chhan chu hnung lam ațang pawhin sexy ka ti. A chàwn ngo, nalh zet leh a pheikhawk tlêma sâng deuh bun chu a inhmeh khawp mai. Ani chu a ni thei lo ang; mahse, ka en tho ang, kawr sen a ha tlat.

Ka hawi kual a, Rinpuii àwm ang ka hmu lo. Kawng a bo nge ni ang, a rawn thleng daih tawh? Rawn thleng daih tawh ni se hmuh àwm tak.

Chu nu chu a rawn inher a, a sam, lian pui puia a tihkàwi deuh ngiat chu a kokiah a țhen chu a inbâng liam a, a hmui chu a sen mawi kher mai, a sam a huih paha a kuttina nail polish sen lâr leh a kawr leh hmui hnawih chu a inhmeh vek. A thawmhnaw hâk chuan a pian fuh tak chu a tilang chiang kher bawk a, a bula mipa chu a nuih deuh tih ka hmu. Chu pa chu a bialpa em ni le? A va vànnei kher ém!

Ka pan hnai telh telh a, a hmel chu ka hriat hnu a ang deuh telh telhin ka hria, khawiah emaw ka hmu tawh em ni le? Mahse, hetianga chhe lo chu hmu tawh ni ila, ka theihnghilh ka ring miah si lo.

Min hmu ve ta a niang," Hey, ka lo thleng dik chiah e, ka hmu lawk lo che a," a lo ti chûl.

Ngun zetin ka en a, ka thil hmuh hi ka awih thei lo hial. Ka mit chu ka khap nawn sak sak reng a; mahse, a ngai reng si.

"Puii?"

"Aw, keimah. Ka nalh lutuk a, min hai a ni maw? Ka ring rêng a ni," tiin za zet hian min nuih hak hak a.

"I lang nalh ....dang lutuk a!" Ka sawi chhuak hlei thei lo țêp. A mak ka ti lutuk ringawt. A sam rawng a lo tidanglam hman a, makeup hmang vak ngai lo khân inhmeh zetin a rawn inhnawih bawk a, a chhe lo tak zet.

Hetiang hian a inchei ngai lo. Heti tak hian a lo nalh thei ang tih pawh ka ngaihtuah pha miah lo bawk. A awmbâwr lian mawi tâwk chiah, a kâwng fêk leh rât si leh a mawngbáwr lian laih chu a kawr hâk chuan a tilang chiang bawk a, mit a la thlâwt.

"Nalh min ti chu ka lâwm e."

"Nalh chungchuang tak i ni!"

*VAWIIN LO THLEN VÀNG HIAN LÂWMTHU SAWI RAWH, I NUN LO DANGLAM THEIHNA PAWH VAWIIN HI A NI*

.

☆13TH MAY☆ - 11 By Dingdi Pachuau

Haw kawngah chuan car khalh pah chuan min melh leh zoh zoh țhìn a, nuam lo ka ti angreng. Hetiang hian ka inchei ngai bîk lo va, ka confi fahran lo asin.

"Maktih hmel deuh khân min melh ziah suh, nuam ka ti lo a nia."

A nui suk a," I chhe lo lutuk a, mak ka ti alawm. I sam lah kha i inhmeh si, model chhe lo zet i ang," a lo ti sup a.

"I tizahthlâk e a!"

"Khati khân i sam ti ziah tawh rawh. I thawmhnaw pawh loose hnek hnuk ha lovin tuna i hâk ang chi, i taksa phuar lam deuh kha ha ve rawh."

"Ka pain a phal lo țhìn a, kekawr pawh hi a țûl tàwpah lo chuan ka ha ngai lo. 'Hmeichhia chuan hmeichhe thawmhnaw inbel tùr' a ti țhìn a, ka zàwm țha khawp asin."

"Zàwm țha tak zet!"

Ka ngawi vang vang phawt. Zîng kâr ațangin Liansanga nuin min buaipui țan tawh a, neinung tak tak kal khâwm tùr an nih chu ka ring nghal ringawt a, Liansanga tân zahpuiawm nih ka duh bîk lo.

"Ka sam rawng ka thlâk vawi khatna a nih hi, a rawng hi a mawi i ti em? I nu hian thlang thiam ka ti lutuk a."

"Ka nu hi zawng, mawi a hre teh a nia. A mit hia lêrh va tlat a."

"A duh dàn thlapa chei ka nia, ka inhmeh ka ti ve tho. Ka chhûngte chuan min hmu ve se chuan min hai nasa ngawt ang chu!"

"Kei pawhin ka hai che alawm."

Car tape a play a, Eric Clapton hla ' Wonderful tonight' tih hla chu a rawn ri chhuak riai riai a.

"Um, chu hla chu a mawi!" tiin a zai chu ka lo zàwm ve rât rât a, ani pawh chuan a eng eng emaw lai chu a lo zàwm ve a.

"Zanin atân chuan i hla ni teh se!"

In kan thlen chuan a nu chu a lo meng tawh lo va, a tlai ve tawh bawk a ni.

"Ei tùr emaw in tùr emaw i duh em?"

"Duh lo ve, birthday lawmnaah khân ka ei nasa leh bîk alawm, ka la puar e."

"I pum puar kha a lo nuam leh lo ang e?"

A awki aţang chuan min chhaih pah tih ka hre reng; mahse, ka hre lo der.

"Ei tâwk ka hre tawh alawm."

Ka kawr phelh tùrin a hnung lamah zipper sei deuh tak a awm vàngin keimah mai chuan ka phelh thei miah lo, ka pawt chhia ang tih ka hlau bawk si, inthlahrung deuh tak chuan ka pan phei leh a.

"LS, khawngaihin min lo pui lawk mai teh?" tiin ka hnung chu ka chhawn nghal a.

A kutin ka nghâwng a rawn deh chuan ka mûr ar ar mai, eng emaw tak chhûngril lamah thil thleng a awm!

"Zanin zet kha chu birthday girl ai pawhin i mawi zâwk!"

"Ka lâwm e."

Ka nghâwng chu a fâwp zauh  a, ka phu chiang hle mai. Hei zet chu ka rin loh thil a ni, ka tawlh sawn ta nghal a, chiang zetin kan inmelh ta rân mai.

"Puii...?"

"Ti suh."

"Eng thil maw ka tih loh ang?"

Min fâwp ngei ang, ka dang tùr a ni; mahse, ka hawi sawn thei miah lo. Ka che sawn thei hek lo, a mitmeng chuan min aikaih bur ni berin ka hria.

"Practice zeuh zeuh kan ngaih kha."

Ka hma lama sam  chu lain hnung lamah min huihsak a, min rawn hnaih pah sauh bawk a. Kan inhnaih tak zet ta.

"LS..."

"Shhhh..." tiin a rawn kûn hniam a, ka hmuiah a fâwp dáwn emaw ka tih lai chuan ka nghâwngah bawk chuan a rawn fâwp leh a, ka tîm deuh nain ka hmuiah a ni lo va, a zia e; mahse, ka nghâwng mah ni se, a mi nghawng dàn  a ril râih tho.

"Mut tui le."

A inher vut a, choka lam panin a kal ta nghal a, teh thut chuan! Min tihrilhhai zâwk alawm le.

*******

LIANSANGA

~~~~~~~~~~

Ka kalsan thuai lo a nih chuan a duh loh zawng ka ti ngei dáwn.  A remtihna tel lova a hmuia fawh vawng vawng kha ka duh asin; mahse, fâwp ta ila eng thil nge thleng ang? Fawh-ah khân ka tàwp mai thei dáwn lo, a dang ka duh belh zêl ang, khum hial thlengin maw le.  Ka insùm theih laiin ka kalsan.

Zankhuain ka ngaihtuah. Zanin zet kha chu a chhe lo a ni, khatiang khân inthuam ziah ta se, tu mipa mah hian an nêp phal lo sa. A bialpa hlui khân hmu phei se, a inchhîr nasa khawp ang.

A sexy. Aw, hei hian a sawi fiah khawp mai. Zanin kha chu a lang sexy thlâwt, a kawr sen, a nail polish sen hlar leh a hmui inhnawih sen mawi takte, a inhmeh kual vêl vek. A sam, a mawi tâwk chiaha herh kir leh a mit meng tilang chiang tâwk tùra a hnawih dum deuh hlek khân a ti-sexy tak zet.  A hmui sen hlar, 'thlêmtu hmui' dik tak mai kha han fâwp ila, duhtâwkin a nghâwng no sar mai leh khuavâng chiang zeta lang laiah khân han fâwp bawrh bawrh ila...

Ka dik dáwn miah lo mai,  thil dang ka ngaihtuah a ngai. Hetiang thil hi ka ngaihtuah tih hre phei se, min hlâu ngawt ang.

Zàn rei lam mah ni se, ka inchiah daih a ngai. Hetiang hian ka awm ngai lo, Cindy khân min tiphûr thei hle a, a mit meng leh a taksa hmang khân min tihphùr a thiam tak zet.

He nu ve thung hi? A thawmhnaw hâk thâwl hnek hnawk leh pawnfèn fual hnalh kha chuan min tiphûr lo chiang alawm. A sam lah a ngil zún a, chubâkah, a zei lo. A inchei duh dàn ațang ringawt hi chuan mipa mit lâk a tum lo ngawih ngawih ni berin ka hria; mahse, zanin kha chu...

Tui vâwt chuan ka inphuhtîr sang sang a, tlêm chuan ka zia e. Ngaihtuah chhunzawm tawh lo ang, ka inchiah dài peih tawh lo.

*******

Aizawla ka awm chhûng chuan Liansanga nu chuan an in bul parlour-ah min kalpui zut mai. Manicure, pedicure,  mithmul pawh, etc etc a hming pawh ka hre sêng lo, kei ngei pawh ka inhmu țha sawt mai.

Liansanga chu ni tin deuhthaw a chhuak. A pite sumdàwnna a rochun lamah a kal țhìn a nih ka ring, tlai takah a rawn haw ziah, a chàu thei ngawt ang.

Naktûkah ka haw phei ang, sumo ticket ka la tawh a. Chawlh a la rei deuh avàngin kan vêngah ka haw chho ve rih ang.

Vawiin chu Liansanga'n a nupuii (a nu u hmeichhia) te inah min lènpui a, Tuikhuahtlângah an awm a, in an nei nuam khawp mai.

A nupuii chuan Neneihi birthday zàn khân min hre tawh a, tunah pawh min lo la hre chat mai.

"Tete, i la châm rei dáwn em? Naktûk zànah chaw lo ei ula, Kima nupui tùr pawhin chaw a lo ei dáwn asin. "

"A châkawm viau mai; mahse, naktûkah ka haw phei tawh dáwn a."

"A ni maw? Ticket i la vek tawh àwm sia tiraw? A pawi hle mai, remchàn hunah a ni mai tiraw? Kimate inneih hunah chuan i lo phei ngei ngei chu a ngai ang?"

Neneihi chuan,"Au Kima nupui neih hnua ti leh hmasa ber tùr chu au LSa a ni dáwn sia, lo inzir lâwk a ngai alawm. A lo phei ngei ngei a ngai," a lo ti ve a.

Liansânga chu ka en a, hre lo ang maiin a phone a lo khawih a, ka chhàn a ngai a nih hmel.

Nui chungin," School-ah chawlh ka la thei a nih chuan ka lo phei ngei ngei ang," ka ti ve ringawt a, ka kal chu ka ring lo.

"Au LSa school-ah i thawk tho sia, ani a lo phei ngei àwm si a, chawlh a pe tùr che a ni ringawt. A phal lo a nih chuan ka lung a awi lo ngawt ang."

Liansanga chuan," Ka phal lo thut maithei, kei aiin a lâr tlat sia, ka lung a awi vak lo," a lo ti sup a, a rawn hawi chhuak chuang lo.

"I intithei a nih chu a!"

Kan nui dar dar a, thingpui leh a hmeh tui zet kan hmeh bawk a, LSa erawh thingpui sen hâng an rawn chhawp thung.

Zànah Liansanga nu chuan ka thil hawn tùr min buaipui a, ka nu puan tùr leh pheikhawk tùrte min pack-pui a, kawr eng emaw zât min hawntîr bawk. Ka hnial ve țhìn; mahse, ka hnialna hi a ngaithla duh miah lo.

Ka helhhawlh nge ka hre thiam chiah lo, haw chu ka châk rualin ka châk lo tho bawk. Zanriah ei laiin Liansanga chuan haw rih lo mai tùrin min ti a, a nu hriatah min ui der tih ka hria, ka lâwm tho. A nu hriatah min ui der tal a.

"Ka meng rei lo ang, hun neih fàl in duh àwm sia, ka hnawk in ti palh ang."

A nu room-a a kal hnu chuan," Haw chu i tum tak tak maw?" a ti leh a.

"Ka haw loh te'n, ticket pawh kan lâk vek tawh kha."

"Ticket mai mai!"

"Hey, i nu a awm tawh loh hi," ka ti sar sar a.

"Haw i châk viau tawh si a, kan in chu hrehawm i lo ti àwm hle mai."

Chutiang lam ka lo ngaihtuah miah lo. Ka chhûngte pawh dâwt deuh reuh hrilhin a nu vàng liau liauin Aizawlah ka zin a nia, nuam ka tih teh lul nen.

"Chutiang rilru ka pu lo."

"A nih, eng nge i haw châk viau chhan?"

"Ka awm rei tawh e!"

A tho thut a," In chungah thla êng thlîr mai mai ang hmiang, mut hahdam vat vat duh mah la, kan awm dun loh chuan ka nu ngaih a țha lo ang tih a hlauhawm bawk sia," a ti sup a, kawngkaa a chhuak chu ka zui ve ta a.

In chung chu a nuam reuh tawp. Vawi khat chu ka chho ve tawh a, pangpâr chi hrang hrang, a pâr chi leh a hnah lam chite an awm țeuh a, rose pâr rim nam veng veng chuan boruak a ti-fresh ngawih ngawih.

"In in nei nuam ka ti, a hmun lah duhthusâm," tiin ka hawi kual a, thla êng hnuaiah chuan pangpâr  pawh chu an lang chiangin an mawi tak zet.

"Ka nu hian a enkawl peih ém a, chubâkah, in sak lai khân a duh uluk ve bawk a."

"A nih chiah chu, sak laia uluk hi a pawimawh ém asin, a hnu lamah chuan a tih tak tak theih tawh țhìn lo va."

"I bialpa hlui kha i la duh reng em?"

A zawhna avàng chuan ka en vat. Thla êng hnungchhawn zawnga a din avàng chuan a hmel ka hmu chiang thei lo va, min en nge en lo pawh ka hre thei lo.

"Eng vànga min zâwt nge i nih?"

"'Aw' nge 'Aih'? Chhàn a har loh chu?"

"A ho e.""

"Rawn lêt leh tùrin i duh em?"

"A ho ka tih chu, thil dang sawi ang."

*******

LIANSANGA

~~~~~~~~~~

A bialpa hlui kha a la duh reng a nih dáwn hi, duh lo ni se min chhàn a har lo lutuk. A rilru chhûngrilah chuan duhna leh hmangaihna chu a la awm chiang, a chaponain a la chiah hneh a, duh lo angin a la awm mai mai tihna. A bialpa khân hmeichhe dang a kalpui vàng khân a rilru nain a bialpa lema chang tùr leh min thîk theih nân min pun mai niin ka hria.

"Lo kal teh."

Maktih hmel deuh hlekin a tàwi deuh hrat hrat a; mahse, min rawn pan tho.

"I kut kha min lo pe teh."

Tîm deuh hlekin min rawn pe a, a marphu chu ka check-sak a," Um, i bialpa ka sawi chhuah vàng khân tunah hian i ngaihtuah mêk a, haw phei thuai pawh i châk a nih hi," tiin a rilrua awm tùr àwm chu ka han sawi chhuak a.

"Ka awih lo chiang!"

"Hria min tih vàng a nih kha. E, chuan, a bialnu i hmuh khân a sama keh buan buan i châk bawk a nih hi."

A nuih a za hle a niang, a nui hak hak a, a lan duhawmzia chu a inhre tawp nâng.

"Nih leh, hetia i kut ka khawih hian eng nge i feel le?"

A nui hmel chu a reh riai riai a, hmel thutak deuh thutin," Hei, helaia i kut chang deuh lai hi ka feel thei," a ti ta daih a, kei ve thung chuan electric current țêk sak sak ka feel thung.

"Nih, nang ve thung?"

Ka rilru chhûngril chu hre na se chuan hlauvin min tlànsan dàwr dáwr ang chu.

"I kut nêm thep hi deh a nuam hle tih ka hria."

Ka kuta 'a chang deuh lai' a tih chu a tuai neuh neuh a," Helai chang deuh lai bîk hi eng vàng nge a? A nghamit em ni?" tiin min zâwt a.

"Nghamit lo, ser a nih kha."

"Eng vànga ser maw?"

"Kima nèn kan infiam a, ka tlûkna lamah ka bawh ât a."

"In têt laiin maw?"

"Kan tleirawl tawh, ramhnuaia kan kalnaah a nia, a thî nasa sia, Kima chu a țap pûr a."

"In inkàwmngeih hle a ni maw?"

"Aw, ka unaupa neihchhun a nia, țhian ka neihchhun a ni bawk. A tân chuan eng pawh tih ka huam ang chu."

"Tak tak maw?"

A hmui leh a țawng zawnga a lei leh hmui che vêl chu ka thlîr reng a, tunah hian fâwpin a ka chhûngah hian a lei leh ka leite hi inbuan let tap tap ta se, a nuam dangdai ngawt ang. A thlum tui ngawt ang.

Min rawn en ve chiah a, a zawhna kha ka chhàn a nghâk a ni ngei ang.

"Aw."

"Nupui a neih hunah chuan a best-ah i țang ngeiin ka ring!"

"I ring dik chiah."

"A nupui tùr chu hmuh a châkawm reuh khawp mai."

"An inneih hunah kan phei ang chu."

A hmel chu a buai deuh nak.

"Ka phei ve kher a ngai nâng. I bialnu tak tak pawh ka ni lo va."

"Tel ve ngei tùra beisei i ni ngei ang."

Ka kut ser awmna lai chu a khàl neuh neuh a, ka la sawn duh bîk lo.

Thla êng hnuaiah chuan a lang sexy ka ti, dik tak chuan he nuin chhûngril lama min thlèmna hi ka do zo thlâwt lo.

Muangchângin ka pawt hnai a, ani pawh a lo țang miah lo. Kan inen dùn reng a, hnai set sawta pawtin," Puii, ka duh tak zet che a ni," ka ti sap a. Ani pawh chuan min hnial lo tih hriat zetin ka khabe hnuaiah chuan a rawn dâk chho hau mai a.

Muangchângin ka fâwp dè dé phawt a, rang zeta min lo chhàn lêt avàngin ka duhthawh ta sauh a, a ka chhûngah chuan ka lei chu a thûk thei ang bera  luhtîrin ka duhthawh a, ka lo ngaihtuah ang chiahin a lo thlum tui vawng vawng e, a lip gloss inhnawih lah a rimtui si.

"Puii, ka insûm thei tawh lo, helai in chungah hian nawmna chenpui che ka duh hial a ni."

A nui hak hak a," LS, i duh ang apiang ti rawh, ka inpeih e," a ti sap a.

A nghâwngah fâwpin, a bengkâwmte chu ka fâwp a, a rim a tui veng veng mai. A thaw ri hak leh hak ri chuan min tiphûrin a tàwp thlenpuitîr min tichâk hliah hliah. A mal sei, zên thlarh mai chu ka kut chuan a pawnfèn chhanah chuan ka zûtsak a, a thaw ri hawk chuan min tiphûr sauh.

"Puii...Puii...Puii..."

"LS, eng thil nge i ngaihtuah a?"

Ka suangtuahna ram ațanga harh chhuakin Rinpuii'n ngun zeta min lo en leh a kut veilam ka hmai bula a lo vai lap lap chu ka hmu ta nghal a.

"I inngaihtuah nasa lutuk a, ka biakna che pawh i hre thei hlei nem."

Het! Ka thil ngaihtuah zet chuh! A va tihchi loh ve!

"Kan chhuk tawh dáwn em ni?"

"A pawi lo."

A kut dinglam leh ka kut veilam chu a la inchelh reng, phelh pawh kan tum chuang lo.

*DAWIHZEPNA LEH INRINTÂWK LOHNA HIAN KAN NIH TÙR MIN NIHTÎR PHÂK LO FO, PAIH BO DAIH ANG CHE*

.

☆13TH MAY☆ - 12 By Dingdi Pachuau

Ka mutna room-a ka lût tùr min pawt ding ta tlat mai a, makti zetin ka melh chho a, ani pawh chuan min melh chhuk rân a.

Mitmeiin ka kut chu thlah tùrin ka hrilh a, ani erawh chuan a vuan nghet sauh. A lamah min pawt hnai salh bawk.

"LS..."

Ka țawng ring ngam tawh lo, a nu a mu tawh si a, kan tiharh ang tih ka hlau. He pa hian eng emaw tak tih a tum chiang; mahse, zanin hi kan hun tàwp ber a ni, min fawh duh pawh ni se, ka hnial lo ang, a mood-ah ka awm tlat, a rûkin ka ngai vawng vawng dáwn si.

"Shhhh..." tiin ka hmui chu a kutzungchal chuan a rawn tawk a, ani pawh hi zanin chu a thinlung tiche deuhtu a awm a nih ka ring deuh hlek ringawt.

Kan indin hnaih ta kher mai. Ka lungphu a rawn dik lo țan, a kut veilamin ka kâwngah a kuah a, dinglam erawh chuan ka hmui chu a la kalsan lo.

Ka hmui chu a kutțang chuan a tuai kual a, ka dang a ro halh nghal. A mit chu a meng deuh sar sar a, ka hmui chauh a en. Ka zâm deuh hlek a, ka hmui chu a khùr deuh dar darin ka ring.

Ka mitah tak a rawn en leh ta siah. A kuta ka hmui a tuai pawh chu a tàwp ta rih, ngun zetin min en a, ka rilru chhûngril ber hriat a tum a nih ka ring.

Ka hnial bîk lo tih a hria a ni ngei ang, a kut chuan ka khabeah a dawm kâng a, ani a rawn kûn hniam nghal zat.

A mit mengin min aikaih tawh avàngin ka che sawn thei lo, duh pawh ka duh hek lo. Zanin na na na chu, a pawi lo tùrah ka ngai.

Ka lo maimichhîng a, a chhan chu a mit menga min mamawhna nasa tak lang chu ka en rei ngam tawh lo, bâkah a duh duhin min khawih thei ngei ang, dàwi ât ka ni tlat.

A che lai a chawlh tâk dat avàngin ka meng a, kan hnar a lo insi lo chauh tawh, ngun em emin min lo en a, min fawh mai loh avàng chuan ka zak țêp.

"L..." ka țawng chu a hmui chuan a rawn titàwp ta hmak mai. Ka lo hnial miah lo, hnial ahnêkin ka bân pahnihin a nghâwngah, min fawh rem leh zualin tùrin ka han kuah a, ka fâwp lêt tàwn táwn mai.

Kan inkâr boruak chu mak tak a ni mak tak. Min fawhna chuan ka thluak a fan a, ka lu chu a nuam zâwngin a hai chiai chiai mai, amah nghenchhan lo phei chuan ka ding thei lo ang.

Kan duhthawh dùn a, ka hnung bang chu ka nghèng rawk rawk. A tu zawk nge duhthawh tih pawh a hriat theih loh, tàwp kan tum lo ve ve.

A lei thiltithei zet chu ka kaah rawn hreuh luhtîrin a lei leh ka lei chu an inbuan let tap tap a, min ti â vek. Insùm theihna ka nei tawh lo, a duh ang anga awm chu ka inpeih at tawh.

Kan duhthawh ém avàngin kan thaw huam huam tawh mai a, kan inkeih bawrh bawrh mai. Fîmkhurna leh zahna ka nei tawh lo, ka taksaa a thil tih hian nghawng a nei nasa khawp mai.

"Puii...ka...ma..mawh takkk..zet..che..." a ti thâm țuak a.

Ka țawng ve thei lo; mahse, ka mamawh ve tho a ni, 'ka mamawh ve tho' lo, ka mamawh tak zet. Ka taksa pum mai hi amah mamawhnain a khat a, ka mamawh lutuk vàngin din pawh ka ding țha thei lo chu a nih hi.

Min pawm nawlh a, kei pawhin rang zetin a kâwngah ka ke pahnihin ka kherh nghal. Tlâk ka hlauh vàng a ni lo, a taksa lum ham ham dek renga awm hi ka duh, a nuam dangdai tawp.

"Puii, min ti â..." ka fâwp leh chawt a, țawng ka duh lo, cheziaa kan inmamawhna lan chhuahtîr hi ka duh.

Chin tâwk awm lovin kan inkeih leh mial mial a, thil dang engmah ka ngaihtuah theih loh avàngin  kan awmna takngial pawh hi khawi lai nge tih ka hre lo, hriat pawh ka mamawh hek lo. Ka mamawh ber chu tunah ka bulah a awm mêk.

Min țhutpui a, chutah chuan ka mawng rawn dotu pâwng àl chu ka feel thei, heti khawp hian a taksaah hnathawh ka nei ve nasa chu a ni sia, thil mak tak a ni!

Ka hmui ațangin ka biangah, ka khabeah a fâwp thla a, ka nghâwngah fâwp zêlin kei pawhin duhthawh taka min fawh theih nân ka hnung lamah ka lo er ve ngàn ngán a. A kut pawhin ka hnung a chûl riak riak reng a, ka sam ka țâwn khâwm loh avàngin ka thlêkna lam apiangah a lo thle kàwi ve zel a.

Ka âwmah a hmai chu a phûm vang vang a, kei ka lo thaw hak thung. A hmui lum ham hamin a deh chin chu a hriat khawp mai, min tiphûr tak zet.  Ka taksa chu a za chiai chiai a, a hmui ringawt pawh chuan nawmna mak tak min thlen reng tawh.

Ka kawr chhanah chuan ka âwmbâwr chu a hmui chuan a nawr nâ nâ a, ka kawrhnuai hâk chhah deuh mah se, a nawra chuan a lo hre rang khawp mai, a lo țang kawh nghal lah mai. Heti khawp hian ka chungah thil mak danglam a thlen thei a nia, lo dan chu khawi lam, ka lo welcome em em zâwk, zahthlâk hian.

Eng thil dang mah ka ngaihtuah thei lo, amah leh ka chunga a thil tih bâk chu. A tih dàn ang angin ka awm, amah ka mamawh tawh lutuk avàng chuan ka taksa pawh a khùr dar dar tawh. Ka kut chuan a tukhum samah țhâmin a hmuiah chuan ka fâwp leh tàwn táwn, ani pawhin min hnê bîk lo.

A kekawr iptêa a phone ah chu a rawn nghawr ta dat dat, ka malin a delh avàng chuan ka hre chiang khawp mai. Kan thil tih lai pawh chu kan tàwp nghal ve ve a, mit meng phî chiaiin kan inmelh ta reng a.

"Puii.." A aw zet chuh, a va sexy tak!! A aw leh a mit meng phî chiai, châknaa khat tlat chu a inhmeh lutuk. Ka thil hmuh tawha ka en nin theih loh tùr a ni; mahse, ka en reng chuan kan tàwpna tùr ka hria, min aikaih tlat, kan inmamawh tawn nasa si a.

A mit meng en loh theih dàn awm chhun ber chu fawh a ni. Rang zetin ka fâwp leh thut a, min chhâng lêt leh nghal zat a; mahse, ka insûm ta vat. Ka thlah thut a, khùr dar darin a mal chung aţanga thovin a room ațang chuan ka chhuak ta nghal a.

Ka mutna room ka luh a kawngka ka khar chiah chuan ka thaw hawk hawk mai, kawngkhàr nghèng chuan ka ding khùr dar dar, ka taksa khùr nasa lutuk chu ka va haw tak ém! A khurh chhan ka hre reng mai si. Ka taksa hian a va mamawh teh lul ém!

A phone kha rawn ri lo ta se, tunah hian a khumah ka mu tawh ngei ang. Ka taksa a khurh chhan, ka mamawhna nasa tak mai chu chhàn lêtin ka awm ngei ang. A hmui zei zet khân min han fâwp leh ang a, a kut lian zet, lum ham ham khân ka taksa lâwng a han chûl ang a...

Ni lo, ka ngaihtuah chhunzawm tùr a ni lo, thil țha lo a ni, a țha lo tak zet. Ka thianghlimna ka hloh țêp a nih kha, a thiam loh a ni lo, kan inmamawh tawnna kha a sâng ém a ni, tàwp mai thei kha kan ni tawh lo, phone kha rawn ri lo se chuan.

*******

LIANSANGA

~~~~~~~~~~

Phone call zet chuh! Phone call dawn hun lo ber a va ni ém! Tu pawh ni raw sek sek, ka vìn hrep khawp ang.

A mit meng phelh deuh phang, phî deuh chiai mai tluka mit meng sexy chu ka la hmu lo! A va sexy teh rêng! Hetiang hian zan tin ka bulah muin min han en țhìn ta se...

Min rawn fâwp leh ta chat, rang zetin ka lo chhâng lêt. A tàwp mai ka rin teh lul nèn, ka va lâwm tak. Ka phone chu ring ral țhâk rawh se, ka lo silent lo erawh ka inhaw khawp.

A tho thut, ka rin loh lutuka a chêt vàngin chêt nachâng ka hre lo, han chelh emaw a kal tùr dan emaw tal pawh, ka â tlat.

Ka taksa hnuai lam țang mar lutuk tlat chu ka tihtàwp a ngai, zanin zet chuh, ka taksa pêng pakhat hi ka thunun thei lo. A mamawh tak chu ka room piah chiahah a awm mêk, ka va panpui dáwn em ni? Ni lo, a tihchi loh. Tunah pawh hian a inngaihtuah ang a, a inchhîr tawh viau ang chu.

Ka rilru ațangin ka paih bo thei tlat lo. Khatiang khawpa phûr khân min siam thei a nia, a tàwp thlenpui phei ila, a va 'cial' dáwn em!

Shower hnuaiah ka ding dîr tlak tlak a, tui vawt tak ka mamawh. Hei aia vâwt chu a awm si lo, fridge tui la tùrin ka chhuak duh lo. Tuna ka taksa dinhmun nèn hlauh phei chuan kal chhuah chi a ni lo, a room ka pan mai dáwn asin.

Ka mitthla suangtuahnaah thil dang ka ngaihtuah lui hrâm hrâm, chuti lo zawng, duh aia rei shower hnuaia ka din a ngai dáwn asin.

Zàn chu ka mu țha lo, naktûkah min hawsan tawh dáwn. Ka ngai dáwn tih ka hria, ka bialnu lem ni lo hian ka bialnu tak tak ni mai se.

Zîng hma takah ka tho a, ka mu thei tak tak chuang lo. Chaw ei kham dâr 10-ah a chhuak ang, ka nu a hman dáwn loh avàngin ka thlah a ngai ang.

Ka nu thawh hmain Rinpuii a rawn tho, min hmuh chuan mak a tih hmel khawp. Ka lo en lêt ve reng avàng chuan a hmai a sen ap ap, a lang sexy  tak zet tih hre na se zawng, min en ngam miah lo ang.

"Morning, tui lum i in duh em?"

A nui sek a, a va duhawm tak! Ka marphu a tirang nghal zaih zaih mai!

"Ka lâwm e," a ti sap a.

"Tukin chu ka eirawng bàwl i ei dáwn nia."

"A va tui dáwn ve! Ka lo pui dáwn che em niang?"

Min tihphùrzia hre na se zawng, a sawi duh kher lo maithei a ni.

"I peih phawt chuan le!"

Ka nu a rawn thawh meuh chuan kan bâwl zo titih deuhthaw tawh! Nui var var chungin," Nizàn lamah in mu țha thei lo a ni maw? In tho hma ém mai, in inhmu leh thuai dáwn tho alawm, vei lutuk suh u," a rawn ti bawrh bawrh a.

"Nu, bawnghnute ka lo thlit ang che aw?"

"Morning, ka nu. I mu tui em?"

Rinpuii nèn chuan kan sawi rual chiah, kan inen a, a nui leh sek.

Nizàn lam boruak kha chu a them pawhin kan sawi chhuak lo rêng rêng. A rûk erawh chuan ka melh zoh zoh reng, a țawng paha sexy zeta a hmui pawrh leh târh târh țhìn chu nizàna duhthawh zeta ka fawh kha a ni. Tunah pawh hian ka fâwp leh châk tawh, ka insûm hrâm hrâm.

"Bawiha, dâr eng zâtah maw Tetei chu a kal dáwn a?"

Ka lu thing nak pahin," Dâr 10-ah. I lo thlah ve hman dáwn ta em ni?" ka ti a.

"Hman dáwn lo, a pawi ka ti lutuk, Tete. Mahse, hei kei aia pawimawh zâwk Bawiha a hman tho a, a zia tal alawm. Dâr 10-ah hian bank lama thawkte inhmuhkhâwmna kan nei dáwn si a."

"Thlah ka ngai lo, ka nu. LSa pawh a buai viau chuan thlah ka phût lo, taxi ka hmang thei reng a."

Thlah lova room-a inkhungpui reng a nia ka duh ni! Dâr 10 hi ri thei lo se, lo thleng thei lo se ka ti.

Ka nu kal hnuah ani pawh a inpeih deuh nghal mai a, vawiin chu kekawr a ha ve leh e. A mal sei thlarh chu a mûm nalhin mit a la zar mai, duhtâwka chùl ka châk.

Ni lo, ka lu ka thing nawk nawk. Engtizia nge he nu ka en hian ka suangtuahna a dik loh nghal zel le? Heti lutuk chuan min hlau mai dáwn asin, ka mamawh nasatzia hi hre na se zawng...

"Kan kal tawh dáwn em niang?"

A airbag chu ka lâksak a, car chahbi nèn, kan chhuak ta nghal a. Kawng ka kalh lo, pâwnah in tifaitu tùr lo thleng tawh ka hmu miau a.

Sumo lo dinna hmun kan thlen thlengin kan țawng miah lo. Pâwn lam a hawi char char a, min biak a tum bawk si lo va, țawng tùr ka hre lo. Sawi tùr chu ka hre țeuh a, a duh loh zâwng a ni ang tih ka hlau si.

"I rùi hlauh ang e."

"Ka rùi ngai lo bawk."

"A tihzia chu!"

"Ka lût nghal mai dáwn?"

"I châk tawh hle mai, min kalsan thuai thuai chu i lo nghãkhlel hle mai maw?"

"Ni lo, chutiang lam a ni lo."

"Eng lam nge?"

"LS, i hman lo chung chung min thlah a nih hi, i buai teh lul nèn."

Tuna ka buaina ber hi chu amah hi a ni zâwk. Sumdàwnna lam hi chu engah mah ka ngai lo, ka tui bawk hek lo.

"Hman lo ni ila ka thlah dáwn che em ni?"

"Lem chan buai i ngai tawh lo bawk ang a?"

"Lemchan mai mai!"

Driver leh passengers an rawn kal kim ta, an lût ta diah diah a, ani erawh a hmaah a chuang dáwn, driver bulah.

Driver chu ka en a, Rinpuii nui paha a fiam zoh zoh ka hmuh phei chuan hnek sawk ka châk, kawng tluanin a bulah a la țhu dáwn zui.

"A nih ka lût e aw."

"Aw, i bula mite nêk vak lo la."

Driver-in a kuta a han tawk palh lui tùr ka ngaihtuah a, ka thîk ngawih ngawih. Mi dang nèna seat thleng tak ka nâp e a!

An tlàn chhuah thleng ka awm, ka en zui reng a, a liam ta, ka taksa chuan zui lo mah se, ka rilru chuan a zui haw ve daih. Ka ruak huai mai!

*MI PANGNGAIIN MI DANG NUN TIHCHHIAT AN TUM NGAI LO*

.

.☆13TH MAY☆ - 13 By Dingdi Pachuau

Ka rùi hauh lo nain ka nguai khawp mai. Haw nân ticket ka la kha ka inchhîr leh hnuhnawh, la châm ila chuan zaninah Kima nupui tùr ka hmu ngei dáwn si, Liansanga nèn kan kal dùn leh emaw kha a ni ang a...

Liansanga khân min ngaihtuah zui ve tho ang em le? Dàwr lamah a kal nghal daih àwm sia, min theihnghilh nghal daih ang ka ring. Nula lam chu a ngaihven lua lo chu a ni; mahse, Cindy ve thung hi, ani hi chu a theihnghilh thei tak tak lo chu a nih hi, nizàna rawn phone-tu pawh kha Cindy a nih ngei ka ring.

Liansanga hi ka khawngaih tlat tawh, a duh leh a hmangaih ngawih ngawih kha a pa fanu; mahse, thisena inzawmna nei miah lo a ni a, a nu rilru nat lohna tùrin a hmel hriattîr duh ta lo va, a nu leh pa vàng liau liauin a hmangaih leh duh ber a țhen, chu chuan tûn thleng hian nghawng a la nei, hmeichhe dang a melh thei lo a nih hi.

Nizàn thil thleng kha chu in-îtna a ni. Hmangaihna leh duhna vàng a ni lo, opposite sex ta na na na chu, eng emaw inhîp a lo awm ve mai a ni. Ka tân erawh chutiang a ni lo, he pa hi ka duh phâk loh leh ka chhài rual loh ni mah se, ka duh a ni. Ka duhna hi ka pawm tawh a; mahse, ka tihlan erawh a thiang lo. Ani zawngin, a tisa ang zâwng chuan hmeichhia ka nihnaah min ît ve a ni maithei; mahse, duhna leh hmangaihna zawng, vàna rah ang a ni.

In ka thlen chuan dâr 6 a ri deuhthaw tawh, kan tluang over lo va, kan ke a chhia. Kan tlân chak vak ngam lo va, a pawi chuang lo, dam takin kan thleng tal alawm.

Eirawng ka bâwl peih lo, thingpui lumin chhang tui ve tâwk ka hmeh a, ka ril pawh a țâm lutuk chuang lo.

Ka phone a rawn rì a, Liansanga aw ril ruih mai ka han hria chu ka lung a tilêng nghal vang vang mai.

"I thleng tluang maw?"

"Aw, tluang e." Min rawn phone ka ring lo rêng rêng. Ih, a nu a bulah a awm ang a, ka chanchin a hre duh a ni ngei ngei ang. A nih loh tal pawhin, bialpa mi ngaihsak zet angin lem a chang leh tawh a ni ang.

"Ka nuin a hre duh a."  Kha maw, ka tih rêng kha, a nuin ka chanchin a hriat duh vàng a lo nih chiah chu.

"A nih tak chu!" A rûk tak chuan ka rilru a na vawng vawng, na tùr ka ni miah lo asin, lemchanna thil a nih hi; mahse, a na miau si.

"Chaw i ei tawh em?"

"Ka ei peih lo va, thingpui ka in mai."

"A țha lo asin."

"Zanin chauh chu pawi lo tùrah ngai ang."

A ngawih deuh vang vang hnuah,"Kan in chu a reh ruai mai," a rawn ti sup a.

Maimichhîngin an in chu ka mitthla vang vang a. A ni ve maithei, an in kha ka va chingphùl ve ém a, a reh ve sawt maithei a ni.

"Ka ngai che a!"

A bula a nu a awm vàng a ni chiang alawm, kei chuan ka rilru tak takin ka ngai vawng vawng.

"Kei pawh."

"Ka nu nge i ngaih kei?" tiin a rawn nui hawk a, a nui rî chuan min hneh kher mai. Ka beng a tiza chiai chiai thei alawm le.

"In pahnihin."

"I phakar!"

A thil sawi vàng chuan ka nui sak a, a naupangchhia tih chu ka hria; mahse, ka làwm tawp thung.

"Kimate inah chuan zanriah chu in ei ta em?"

"Ei lo; mahse, hei tunah lêng tùrin kan insiam mêk."

"Hlim deuhin hun va hmang rawh u."

"Ka phûr hlawl lo!"

"Engati?"

"I awm lo va."

Naupang pangchang thil sawi ka tehkhin ber. Ka tel lova kal peih lo ni tak tak se aw; mahse, a nu hriata sawi mai chauh a ni si.

Mut hmunah chuan nizàn boruak kha ka ngaihtuah chhuak leh a, khatiang boruak kha ka tawn vawi hnihna a ni ta. A hmasa zâwk chu ka bialpa hlui Rinawma nèn a ni a, a vawi hnihna chu ka bialpa pawh ni lo, ka bialpa lem nèn a ni. Ngaihzâwng nei tawh chuan an tawng ve țhup tawh maithei a, hmelțha leh luck deuh phei chuan an tawng zing ngawt ang. Chûng zînga invawng thianghlim thei tlatte chu an va fakawm teh lul ém ka ti. Ngaihzawng nei lêm lo tân chuan invawn thianghlim chu a harsa vak lo ang, hmelțha leh luck tân a lo harsat dàn tùr ka hre thiam ve ta deuh, luck-in hmelțha ve lo mah ila.

A tûkah kan vêngah ka haw chho nghal. Kâr hnih chuang chawlhna hun ka la nei a, ka chhûngte hna thawhpui ka duh.

Rinawma'n min la rawn phone ve țàng țáng ziah. A chângin ka chhâng ve a, ka chhàn loh a tam zâwk, bâkah chhùn lamah phei chuan chêtna tùr a tam a, phone ka khawih hman lo.

Ram lama kal loh kârin ka nu puan țhui ka pui a, Sangpuia lahin thil a siam ve tlut tlut bawk a. Pawisa tam deuh hlek neiha changtlung deuh hleka thil siamna tùr in sak pawh a châkawm, a thil tihah a tui ve si a. La naupang deuh hlek mah se, a kuthnu a mâm țha a, an fak ve nasa thei khawp mai.

Kan ina furniture țhenkhat pawh hi a siam a ni ve ta, ka pa khân a siam nasa ve a; mahse, an lo hlui ve tawh a, a țhing ve țan tlat tawh.

"Nu, thawmhnaw min țhuisak leh hunah lian lutuk lovin țhui ve tawh la, puan pawh a hek lo deuh zâwk ang. Ka kawr tùr 3 i țhui naah hian 4 vêl lai a chhuak thei dáwn asin."

"Mahse, Bawihi, a fân thei si lo va, chêtpui a har duh àwm ém mai."

"Har lo ve, Nu. A fel thlarh zâwk ang."

"A țha alawm. I pa khân chêtpui a har a ring țhìn a, chuvàng chu alawm."

Kan vêng tlâng hi a hniam avàngin  khua a lum thei hle a, nipuiah a lum thei hle a, thlasikah a vâwt leh viau si. Nipuia khaw lum leh thlasika khaw vawt hi insem ţhen thei se ka ti țhìn, țhâlah tui a la vâng zui.

Mahse, ka pa khân ngaihtuahna thui tak a lo nei a, kan in bulah pawisa kan neih ang ang khân tanky țha tak a lo siam a, chu chu kan hmang țhìn. Țhâlah kan tla tâwk ém ém a, tuikhurah erawh kan insu ve țhìn tho.

Liansanga'n min rawn phone ve zauh zauh. Chu pawh, a nuin min biak duh vàngin, a ma thu chuan min lo phone ngai lo tluk a ni. A àwm ve tho, a bialnu tak tak ka ni lo miau a.

*******

LIANSANGA

~~~~~~~~~~

*Zaninah i bialnu chu rawn hruai ang che aw, hmuh a châkawm alawm*

Cindy message chu ka en vang vang a, ka hruai ang nge hruai lo vang tih ka bùk. Ka hruai loh chuan Cindy hian min thlêm leh emaw a niang a, kei lah Rinpuii kan ina a rawn zin ațang khân ka dik lo țûn tawh mai a, thlèm ka awlsam viau maithei a ni. A taksa lah ka hriat chian lutuk, a khuavàng awmna zawng zawng nèn lama ka hriat bel a ni a, ani lahin ka chak lohna point a hre hneh bawk si.

Rinpuii ka phone ta nghal a.

"Zanin dâr 7:30-ah chhuahna tùr pawimawh lutuk kan nei a nia."

"Khawiah maw? I nu a tel dáwn em?"

"Ka nu tel leh tel lohin eng nge pawimawhna a neih?"

"Ani ber a tel loh chuan lemchan a ngai dáwn lo va."

Ve leh tlat mai a!

"I bialpa hlui lakah lem ka chan ve tho kha, zanin chu ka nu tel ve dáwn lo mah se, ka bialnu i nih a ngai tho."

Min hnial lo hrâm teh se, ka tilui thei tawh lo tih chu ka hria. A pawisa bat remchânga hmangin ka nu lakah lem ka chantîr tawh a, hei bâk hi chu tihtîr tawh loh ka duh; mahse, Cindy lakah hian inthiarfihlim ka duh tawh. Ka chak lohna zawng zawng hretu hian a uitê ang lekah min chhuah a nih kha, a uitê ka ni duh lo, ka ni ngai hek lo ang. Rinpuii puih ka ngai ta chiah, ani hian ka harsatna ațang hian min khai chhuak thei tih a haw dáwn zàna kan awm dàn ațang khân ka hria.

"A țha alawm."

"Mawi takin aw," ka ti leh hrâm. Zanpuiawm takin a inchei ka hlau a ni lo, chu ai chuan hmeichhe kal zawng zawng zîngah chhe lo lâwt lak se ka duh a ni.

Nilêngin engtiangin nge a inchei ang tih mawlh ka ngaihtuah, Cindy aiin mi mut fûkna ni se ka ti a ni tawp.

Hmm, eng thawmhnaw pawh chu lo ha se, a bâna a bun tùr silver bracelet, ka nuin pe tùra min tih kha ka kensak ngei ang. A inhmeh ngawt ang, to pawh a to phian asin. Hmeichhe tlereuh lam hi ka ngaihven lo nain ngaihven ve deuh hlek chu a ngai tawh a nih hi, an làwmna a ho thei si a.

*******

Eng thil tihnaah nge kan kal dáwn a sawi si lo va, inchei dàn tùr ka bo tawp. Ka thawmhnaw neihchhun chu ka hâi ka hâi a, Liansanga nu min leisak zînga mi kha ka hâk mai loh chuan, ka thawmhnaw neih vete chu mawi tak a awm lo hrim hrim.

Inrinni a ni hlauh a, a zia. Ka inbual fai a, ka sam uluk taka ka sûk chu ka herh kàwi deuh ngal a, ka hmai chu uluk takin ka chei ve. Inhnawih viau ka duh lo nain ka mit chu ka hnawih dum ve deuh hlek a, mascara ka hnawih bawk. Ka hmui hnawih leh ka tin rawng hnawih chu a inang chiah a, ka thawmhnaw hâk tùr erawh a dum niin ka bân bul a lang thei hlek  a, ka kiu thleng bân neiin a baggy deuh hlek bawk. A hma lam chhîng deuh, a hnung lam erawh fual deuh a ni thung. Pheikhawk sâng ve deuh dum bunin, hand bag dum, stone de neuh neuha chei ka keng thung ang.

Ka helhawlh deuh tlat avàngin chaw pawh ka ei mang lo. Ka inchei dàn chu mawi lo atih loh hrâm ka beisei, darthlalang hmaah vawi tam tak ka ding a, dik lo lai hmuh ka tum a,; mahse, kei ngei pawhin nalh ka inti ve tho.

Ina a rawn luh chuan ka lo inpeih at at tawh viau a ni. Min en vang vang a, ka lo thaw dèp dép; mahse," Țha lutuk, i mawi lutuk e," a tih tâkah chuan ka thaw ta huai mai.

"Ka lâwm e, nang pawh i mawi."

"Mahse, hei hi bun tel la," tiin a jacket ipte ațang chuan silver bracelet nalh zet hi a rawn phawrh a, ka kut veilam chu lain min buntîr nghal a.

"I ta tùr ni àwm renga mawi a ni."

"A va mawi teh lul ém!" A mawi ka ti tak zet, light eng hnuaiah chuan a stone chu a de neuh neuh mai.

Car-a kan luh hnu chuan," Khawiah tak nge kan kal dáwn?" tiin ka dîlchhût leh a.

"Heritage hall-ah."

"Eng function-ah nge?"

"Chu chu a pawimawh ber lo. A pawimawh ber chu ka bialnu i ni, ka bialnu ang takin awm tlat ang che."

"Thil harsa a ni hlei nem." Ka rilru chhûngril takah chuan hrehawm ka ti, a bialnu lem ni lova a bialnu tak tak nih ka duh; mahse, ka duhna ringawt hi a tâwk zo si lo.

"A țha e. Inringtâwk la, nang tluka nalh an awm dáwn lo tih hria ang che. Chuan, ka bialnu i ni tih inhre tlat bawk ang che."

Car ațanga kan chhuah chuan ka kutah min chelh tlat a, a hmel țha tak ațang chuan eng rilru nge a put tih ka hre thei lo.

Kan thlen chuan mi an lo awm nual tawh a, keini pawh kan țhutna tùrah kan țhu ve nghal a. Banner intàr ațang chuan tu emaw, a hna ațanga chàwl thlahna hun kan hmang dáwn a nih hmèl.

Dâr 7:30 chiahah programme țan a ni. Mi kan tam lo nain, mi awm thei tak tak kal khâwm an ni tih an inthuamna ațangin ka hre mai, hmel hriat pakhat mah ka nei lo. Hall chu a  zau lutuk lo nain a nuam tâwk chiah ka ti, an chei nalh viau bawk.

Host an awm ve thlap. Hmeichhiain programme duan lâwk a puang dap dap a, ka bengrawngah ka thun thei lo. Ka kutah Liansanga'n min chelh tlat a,  chu chuan  ka rilru a la pêng tlat a ni.

Hna ațanga chàwl tùr a rawn ding a, ka pa nèn khân an inrual vélin ka ring. Pa hmelchhe tak a ni miah lo, a aw lah a ring țha a, kum 60 hmel pawh a la pu lo ka ti, a hna a chawlhsan tùr chu a ui ve ngawtin ka ring.

"Hrehawm i ti em?" Ka beng bulah chuan a rawn thaw lum ham ham a, ka taksa a za chiai chiai mai.

"Aih."

"I țha ber a nia."

Țha ber lo mah ila, a nuam ve hranpa rêng rêng.

Tuna hna ațang chawl tùr hi Liansanga hmel hriat chu a ni phawt ang a, ni lo se, a kal lo tawp ang. Zawh ka tum deuh thut thut a; mahse, ka mi hmuh avàng chuan ka zawh tum chu ka țhulh chiang khawp mai.

Cindy.  Cindy ka hmu! Mak ka ti lutuk ringawt. Stage-ah chuan lâwn chhovin thu sawitupa bulah chuan a han ding a, a biangah a fawhsak zoh a, nui sâng chungin a rawn hawi kual bawk a. Liansanga chu a rawn en deuh chat a; mahse, a inhre chhuak thut a niang, a hawi sawn leh ta a.

A va chhe lo teh lul ém!! A kawr hâk, bân bùl zet chuan a vun vâr sar chu a tilang chiangin light êng nalh tak hnuaiah chuan a vun chu a mawi leh zual. A kawr chu a fual niin a nghâwng a zau viau a, a hnung lam pawh a inhawng zau viau. A kerek thlenga fual niin a veilam sîrah a kak raih a, a mal no hmuh theih tâwkin a kak, a inhmeh tak zet. A chhe lovin a sexy tawp, mipa mit chu a la ve tâwk a ni. Chhe lo satliah a ni lo va, a fing tel bawk ang, mipa duh chi takin. Hetianga hmeichhe chhe lo hi Liansanga hian a nu leh pa vàngin a kalsan thei a nia, a harsat dàn tùrzia hi, ka hre thiam ta uar uar mai. Liansanga chu ka en vat a, Cindy chu a lo en miah lo, kan kut inchelh chial chu a lo en ngar ngar.

"A chhe lo tak zet a ni!"

Min chhâng lo, a ngawi reng a, ding zetin kan kut chu a melh ngar ngar.

"I dinhmun tùr ka hre thiam ta uar uar a nia."

"Ka bialnu i nih kha, theihnghilh miah suh!"

Ka lo theihnghilh dêr tawh zâwk!Cindy chhe lo lutuk chu a hmuhnawm ka ti a, a tluk tùr hmeichhia ka la hmu lo a niang, hmuhnawm ka ti.

Hun kan hmang rei hran miah lo, a nawm leh nawm loh pawh ka hre lo, Cindy chu hmuhnawm ka ti ém ém a ni ber. A kal zawnga a mawngbâwr nalh zet, sàwi lâih lâih leh a âwmbâwr lian laih, kawh lah mai chu mipa tân chuan thlèmna do har tak tùr a nih ka ring, Liansanga tân phei chuan a ni lehzualin ka ring.

Mi dang chuan an chibai a, thil pêkte an pe a. Kei chuan engkimah Liansanga ka ring tawp, thil pêk tùr ka nei ve hek lo. Min hrilh bawk si lo va, hetiangah hian kan kal ang tih rin ngaihna pawh ka hre lo.

"Eng nge kan pêk ve dáwn?"

"Min ring rawh."

Kan tho a, ka kutah nghet zetin a la chelh tho, min thlah duh miah lo. Chu chuan inrintâwkna nasa tak min pe a, Cindy-te nupa pana kan kal pawh chuan zàmna ka nei miah lo.

Cindy chuan a pasal bulah chuan Liansanga chu a hmel hriattîr a, kei erawh a mitmeng lian zet, zahawm kul si chuan min melh reng a, ka chhîp ațanga ke lèr thleng chuan chîk zetin min en chhuak dap.

"Hei hi Rinpuii a nia, ka bialnu a nih hi."

A thil sawi chuan min țhâwng kher mai, chutianga mi bula min sawi duh chu ka ring miah lo. Cindy hmel, makti hmél phar deuh âk ka hmuh chuan thil ka hre thiam deuh hlek țanin ka hria.

"A nih chu, lo inchibai ila."

Kan inchibai a, a polite ém ém tho si. A nui sâng mai a, a hmel chu a țha thlâwt, a pian pawh a chhe lo, a chhe lo vêl vek.

Music an play a, a țhen an lâm a, kei chu hetiangah hian ka tel ve ngai lo va, làm dàn pawh ka thiam hek lo.

Cindy-te nupa pawh chu mi dangin kaiin an lâm ve a, keini chu kan kal sawn a. Bang nghèngin kan ding daih. Liansanga chuan insehruh țeuh hian Cindy-te lâm chu a thlîr a, a rilru a hrehawm ngawtin ka ring.

"LS, min en teh."

Ka ţawng chu a hre miah lo ang, a en ngai chu a la en reng tho.

"Cindy..."

"LS...?" tiin a thil en hliah chuan ka ding a, ka kutin a biangah ka dawmsak a, min en thei tùr chuan ka kuai a.

"LS, i bialnu ka ni, theihnghilh lo la?"

"Puii..." Tunah chuan keimah ngei ka ni tih min hre ta, Cindy țhatnain a bual â zo va, a àwm tho ve.

"LS, min fâwp teh!" Hetia ka tih mai loh chuan a buai vek dáwn tlat, ka tih theih awmchhun a ni.

"Puii?!" Maktih hmel deuh hian min melh hau mai a.

"LS, khawngaihin?"

Keimah zâwkin ka fâwp ta zauh a, min chhàn loh avàngin ka àwmah ka pawm bet a, a duh ber leh a hmangaih berin mi dang a fâwp lai leh a làmpui lai a hmu a, a tân a hrehawm dáwn lutuk tlat. Hei hi a tân ka tih theih chhun a ni,  a rilrem zâwng a nih chiah loh leh a thu thu.

Ka âwm chu a fâwp ta zauh. A hmuiin ka taksa a deh leh chiah chuan ka danglam leh nghal. A lu chu chêtin ka nghâwngah a rawn fâwp chho leh a, min  thâwk khum lum ham ham bawk.

"LS..?"

"I rim a tui hle mai, ka duh chi tak a ni."

"Eng rim nge?"

"Hmeichhia ka duh chi rim."

Ka nui hak a," Tak tak?" tiin ka chhaih pah a, a rilru lâk pèn hi ka duh ber a ni si a.

"Teh rêng mai, i inhmeh ngawih ngawih."

"Tu nge ka nih?"

"Ka hria che."

"Tu?"

"Ka rilru a fîm vek tawh."

"Tu nge ka nih chiah sawi tal la?"

"Ka bialnu Puii."

Ka nui hak hak a, ani thung chuan ka nghâwng chu a rawn nawr châk châk a. Tàwptîr pawh ka tum chuang lo, a nuam danglam ka ti ve tlat.

Kan awm dàn chu ka duhthusàm a ni.

Kan haw kawngah chuan ka kut a chelh leh tlat a, a gear a thlâk dáwnah erawh ka kut chu a mal chungah a dah zêl thung, ka la sawn duh bîk lo.

In bul kan thlen chuan a ding ta dat a.

"Zanin avàng khân ka lâwm e."

"Kei pawh le."

"Puii?"

"Um..."

Eng tik laiin nge min rawn hnaih hman pawh ka hre lo, ka hriat meuh chuan min lo fâwp hman tawh. Dîm deuh taka min fâwp chu duhthawh takin ka lo chhâng lêt nghal thung a.

"Puii, ka bialnu i ni, theihnghilh miah suh."

Ka hria; mahse, zanin atân chauh a nih kha. A nu bulah erawh eng chena rei nge a bialnu ka nih ang ka hre lo thung.

"Ka ni reng alawm."

"Zanin ațang hian ka bialnu dik tak i ni."

"Ka hria alawm."

A bialnu. Țanpui a ngaih hun apiangah a bialnu chu ka ni mai ang, ka phatsan thei lo, phatsana kalsan tùrin ka duh lutuk tawh.

"Ka lo pêng lo mai ang."

"I thu thu."

Kan infâwp leh vang vang phawt. Zanin zet zawng, a thil duh engkim hi ka hnial thei lo a nih hi, zanin chu zanin atân chauh ni mai teh se.

"Kal tawh rawh, min thlêm suh."

"Aw le, mangțha le."

Nia, rawn kal ve suh se, kan inkâr hi ka duh aiin a țang tlat. Hun fâl kan neih hlauh zawngin thil țha lo kan ti reu reu palh ang, ka dang thei dáwn si lo.

*INNGAINÊP NGAI SUH LA, INNGAITLÂWM ZÂWK ANG CHE*

(In comments chhiar a nuam ka ti. Ka nui var var zêl, ka chak loh lai pawha min fuih phûrtu, chakna min petu a ni, ka lâwm vek e)

☆13TH MAY☆ - 14 By Dingdi Pachuau

Angaihite in chungah kan awm a, thla a êng lo nain an in thlang high-mast eng chuan a èn pha vek a, a êng nuam. Rannung an awm lo va, khua a vawt lo bawk nèn, boruak chu a nuam khawp mai.

"Ih maw, Chhana kha i hria tiraw? I chanchin min zâwt a."

"Tu Chhana maw?"

"Kha, College kan kalpui țhin kha, a nau pawh model lâr ve deuh Siamsiami kha, kha hei a pic," tiin a phone chu min pe a, ka en a.

Ka va hre mai lo ém! Chhana, kan college kalpui țhin. A hmel chu ka hre chhuak thei tlat lo.

"Ngawi teh, hetiang tlangvâl hmelțha ka hre lo tlat. Chhana ka hriat ve chu Champhai lam mi a nia, a hmel pawh a țha hran lo."

A phone ka pêk chu enin," College kan luh chhûng zawnga week kan neih apianga news reader-a pakhatna hauhtu kha a ni mai, tichuan i hre thei em?" a ti leh a.

Um, ka hria. Aw nalh deuh, țawng zaidam leh fel zet kha. 'Chhana' tiin ka hre lo alawm, 'Chhantea' tiin kan ko țhìn.

"Chhantea kha maw?"

"Aw, Chhantea kha. A rawn haw a, a felzia chu, min lo la hria a, i chanchinte min zâwt a."

"Kan inkawm vak ngai loh kha."

"Nia; mahse, min la hre reng kha a mak ém alawm."

"A star che a nih chu."

A nui ta hawk hawk a.

"Teuh lo, i chanchin hlîr min zâwt, zia ka lo ti reuh lutuk a, Rinawmlova bàn hnuah che ngaihzawng i la nei leh ta si lo va, a țha dáwn khawp ka lo ti. Naktûk zànah ka lo lènpui dáwn em niang?"

"I tizahthlâk e a."

"Eng chu maw zahthlâk?"

"Lo lènpui chu."

"Zahthlâk nâng, a fuh dáwn lutuk. Bangalore-ah eng university berah nge ka hre tawh lo, Asst, professor hna a thawk mêk. I tân a nih chu aw ka sawi, tûnlaiah mi fel an vâng tawh a nia."

Ka nuih hak hak a," I tinuihzatthlâk e. Min duh a, min ngaizawng pawh ni lo, bialnu pawh a nei kuh țul ang chu," ka ti thung a.

"A lêrh hlei nem."

A tûk Thawhțanni chawhma ațangin PTA meeting kan nei a, nilêngin school-ah kan awm. Liansanga chuan a hna a tlin khawp mai, kâr kalta Inrinni zàna ka bialpa kha a ni tih a hriat miah loh. A inringtâwkin a tih tùr chu a hre hle mai a, nuih erawh a nui zing lo ve hle, a nui mai mai lo ve khawp mai.

Zànah Angaihi chuan a rawn lènpui tak tak. A takah chuan thlalâk ai khan a lo țha daih zâwk lehnghal. Hmana college kan kalpui țhin kha a ang tawh lo, a chhe lo lutuk. A hma pawh khân a chhe hran lo nain tunah chuan a lo puitling lehzual tawh a, a fai veng vawngin a sàr vah mai.

A aw zaidam zet chu a la ngai reng, a nui duh viau bawk. A nui sâng reng a, a bula awm a nuam tawp. A titi hriat a nuam a, zir sâng leh nihna sâng tak nei ni mah se, a bula awm a hrehawm miah lo.

"Sir Chhante, engtikah nge i chhuk leh ang?"

"'Sir' ti chuan min ko tel kher lo la, kei pawhin 'Miss Tete' tiin ka ko kher lo che," nui chung hian a ti a.

"A nih leh, Chhante?"

"Um, thu i âwih theih viau dáwn hi."

Angaihi a lo nui hawk a," Ka awm ve reng hi, in pahnih chauh khân inbe bîk lo ula?" a lo ti a.

Chhantea chuan," College kan kal lai khân Angaihi star țhin kan sir kha tu nge a hming kha?" a ti a.

"Sir Țanpuia," Angaihi chuan a lo ti vat a, Chhantea nèn kan lo nui ve thung.

*******

LIANSANGA

~~~~~~~~~~

Rinpuii ka hmuh ngun poh leh ka duh telh telh, min hîp chiang alawm. Kum 1 a tling țêp ta, a bula awm ka ning ngai lo va, a bulah chuan lemchang kher pawh ngai lovin thil ni ve sa rêng angin hun ka hmang thei țhìn. A kuta vawn, inkaih, kuah leh a chala fawhte hi nuam ka ti a, a hnaiha awm hi a nuam hrim hrim.

Ka nu duh chi a nih vàng chauha ka bialnu lemchang tùra sâwm kha ka ni; mahse, ka bèl chiang telh telh a, a nun tlâwm tak, ngaihawm zet si chu ka ngaina mah mah tawh.  Min ring se, a innghah ngamna nih ka duh. Kan inkâr hi ka tichhia ang tih ka hlau, a chhan chu a bula ka awm hian a duh loh angin ka awm ang tih ka hlau, ka tihlau ang a, min kalsan daih ang tih ka hlau.

Hmeichhe hlim thei tak a ni tih ka hria, a bulah chuan thinlung tak takin ka nui ve thei țhìn. Cindy ka kaltîr ațang khân hlimna tak tak ka nei ngai lo va, ka nui khât viau bawk. Tunah erawh Rinpuii bula ka awm chuan ka hlim a, a thil sawi ho tê tê pawhin thinlung takin min tinui thei țhìn, min thlâk danglam mêk chu a nih hi.

Kâr kalta Inrinni zàna kan haw kawngah khân a titi siam siam a, thil ho tê tê min zâwt pah a.

"Artui nge upa arpui?"

"Artui hi khàmah a lum a, lungpuiah a insawh a, a keh miah lo va, engati nge a keh loh?"

"Lapua kg 1 nge rit ang thîr kg 1?"

"Chocolate tui chhan ber hi eng nge ni?"

"I hahchhiau dáwn hian engtizia nge ni lam i hawi ziah?"

"Mihring hi engati nge a thih dáwn hian a hnuk a chah kher?"

Ka ngaihtuah lêt zâwng ringawt pawhin ka nuih a la zâ. Nui sêng chung khân ka lam a rawn hawi a, min zâwt kha a ni a, kei lah khân a chhànna dik ber tùr nia ka rin khân ka chhâng zêl a ni a, ka chhànna khân a nuih a tiza thei ém ém lehnghal.

"A nih leh, eng ang movies nge i en țhin?"

"Knights lanna, action movies."

"I va duh pà rem rem ve! Kei chu animation lam ka en peih, chuan, romantic comedy pawh. Nih, pangpâr hi mawi i ti ve em?"

Ka nuih a za khawp mai a, pangpâr chu mawi ka ti ve tho alawm, a hming ka hre bar lo nain.

"Mawi ti ve e, Rose vâr hi mawi ka ti."

Min nuih a," Mawi i tih ve pawh ka lo ring chiah hlei nem," a ti a, ka țhutna seat chu a rawn chûl zai zai a.

"Rose pâr vâr nèn in inang ka ti."

A nui hak hak a, nia, Rose vâr nèn an inang. An thianghlim, ani pawh hi a rilru a thianghlim a, Rose vâr thianghlim ser sawr nèn an inang chiah.

"Nang ve thung chu maw, sakeibaknei nèn in inang. I hmel a țha a; mahse, i hlauhawm ru riau tho. Hlauhawm ru riauin lang mah la, i nèlawm tho sia."

Ka thil ngaihtuah avàng chuan ka nui suk a, he nu hi chuan min tihhlim bâkah ka nun a tidanglam viau a ni. Nun hi ka ning deuh thut țhìn a ni a;mahse, tunah erawh nun hi thil hlimawm leh làwmawm tak niin ka hre thar leh țan tawh a, hei pawh hi amah vàng a ni tih ka hria.

A bialpa duhna rilru a la nei tlat erawh hi a buaithlak ka ti. A rilru put dan tùr ka hriat thiampui deuh nain kei erawh chuan Cindy lam hawi hi ka tum tawh lo hrim hrim a, a hunlaia hrehawm ka tihzia kha. Chu chu ani hian a la paltlang zo tak tak si lo va, ka nawr lui thei si lo. Ka tân liau liau, ka chanpual liau liau ni se ka ti, a rilru ka neih si loh chuan awmzia a awm dáwn bawk si lo.

Ni tin deuhthaw school-ah kan inhmu nain kan inbe ngai lo, mi dang hriat kha a hlau si a, biak duh țhìn mah ila, a duh loh zawnga awm ka duh bík lo a ni. Call zut lah ka inthlahrung a, inah lesson plan bâkah naupang tih tùr an pêk leh test neuh neuh an neih papar check a ngai thùl, a buai ang a, bâkah, inlêng pawh a nei thei a,etc,etc... Ka inngaihtuah nasa țhìn, a tàwpah ka call lo leh nge nge thìn.

Nimin lama chocolate ka lei chu nui var varin ka la a, car-ah dahin in ka kalh țha a, ka tlân chhuak ka nghal a. Hmeichhia chuan chocolate an ngaina tlângpui a, ani pawhin a ngaina ngei ang, ka surprise dáwn.

Phûr zetin a in panna step-ah ka chhuk a, kawngka ka kik hmain ka ding phawt a, mipa țawng ri ka hre ta tlat mai. Ngaihthlâk ka duh lo viau asin, thil mawi a ni lo. Rinpuii nui ri ka hre leh a, chutah zet chuan lènna chi a ni lo tih ka hria, thâwm nei lo berin ka pên chho leh ta vat a.

In ka thlen chuan ka rilru a tâwt tak zet. Ka tih tawh ngai loh, kum 10 deuhthaw ka lo in tawh ngai loh chu ka la chhuak a, rùi hnâp, engmah ngaihtuah theih loh ka duh.

Zanlaiah ka lu na lutuk vàng leh ka tuihàl lutuk vàngin ka harh hlawl mai a, ka harh chu ka buai deuh nuai lehnghal. A va nuam lo teh lul ém!!!

*******

Naktûkah Chhantea chhuk tùra Aizawla a phei tawh dáwn avàngin school bàn veleh ka haw vat a, inah min rawn lam a. Angaihi nèn kan pathumin chaw kan ei khâwm dáwn.

Angaihi a hman loh avàngin Chhantea nèn kan bazar a, chawhmeh kan lei a, ani'n a lo khai zel a, kan kal kual nasa bawk sia, a lum duh kher mai.

"Pasal thaibawih deuh ka ang ngawt ang!"

Ka nuih a tiza lutuk. Ka nuih var var a, a inkhaibâwr bawk sia, ka khawngaih zawk.

"I ril a țâm em?"

"Țam lo ve, nangmah kha a țâm tawh a ni maw? Chàwl ila?"

Kan ei puar ta peng pawng bawk a, ka in luah lamah kan inkhalh chho ta vang vang a.

A fel ang bawkin eirawng bàwl pawh a lo thiam, a mak tawp. Kan inpui tawn a, eng eng emaw sawiin fiamthu a thawh pah a, kan nui nasa mai.

Zànriah ei tùrin Angaihi a lo chho a, kan ri nghal chûl mai. Hlim takin zanriah kan kîlho a, kan boruak a zângkhai bawk sia, a nuam tawp. Chhantea hi min beisei leh min duh ang pawhin ka hmu lo, țhian țha leh kawm nuam tak, fel takin ka hmu.

*******

LIANSANGA

~~~~~~~~~~

Ka rilru ka siam fel tawh. Eng pawh ni se, Rinpuii hi ka duh thu ka hrilh ngei ngei a ngai.

Vawiin chu ni dang zawng aiin ka inchei uluk, a chhan chu vawiin chawhnu hian Rinpuii ka duh thu ka hrilh dáwn.

Ka tih ngai miah loh, ka thawmhnaw hâk chu vawi hnih lai ka thlâk, ka duhthu a sâm tâwk tlat lo.

School ka thlen chuan tumah an lo la thleng lo, Rinpuii chu dâr 8:20-ah a lo thleng leh ang, a lo thlen hun hi ka hre chiang lutuk tawh tlat.

Chawhnu ka nghâkhlel zek zek, ka huphurh ru riau bawk.

Chawhnu bàn hma deuhin ka office-a min hmu tùrin ka hrilh a, thâwk ka la hawk hawk, eng rilru tak pu ve ang maw?

A rawn lût ta ngei e. A thawmhnaw hâk lah chu a inhmeh khawp mai, a tâwk chiah a ni, a pawnfèn a khûp hnuai thleng chu ka duh tâwk khawp. A chàwn sei thlarh miin an lo hmu ve tùr erawh ka thîk, ka phal lo.

Chocolate chu a box-a pein," Țhu la, ei rawh," ka ti a, chocolate box a ni tih a hriat a a hmel hlim hmuh nawmzia chu, ka pe dik hle a ni, ka inchhîr lo khawp mai.

"Ka lâwm e," nui sen sen hian a ti phawt a, chutah, box chu hawngin a ei ta a.

"Hmmmm, a va tui tak! I ei ve duh em?"

"Duh lo ve, nangman ei rawh."

A thil ei chu ka lo en reng a, a duhawmzia mai chuh. A thil ei tui ti hmel leh a kut a'n liak leh zoh țhin te, a hmui a liak leh hlap țhinte chu thil hmuhnawm tàwp a ni.

"Ei țeuh suh."

"A tui alawm."

"Duhtâwk teh, kha, hei hi in țeuh la," tiin tui bottle chu hawn sain ka pe a.

"Ka la ei duh asin!"

"Nakinah le."

Tui chu a in khalh khalh a, a in zawh chuan," Khawi maw, helaiah hian thil a kai," tiin a khabe bul chu ka tuai faisak a.

"Ka lâwm e."

"Puii, ka bialnu tak tak ni rawh!"

Inngaihtuahna hman ka nei lo, ka huphurh hmain ka sawi chhuak tawp.

"Ka ni reng alawm, ka la phatsan miah lo che."

Ni lo, chutiang zawngin ka sawi lo. Ka nu hmaah ni lo, Cindy hmaah pawh ni lovin mi zawng zawng hmaah ka bialnu tak tak ni tùrin ka duh.

"Puii, ka duh che!"

*SHARING AND CARING IS IMPORTANT IN A RELATIONSHIP*

☆13TH MAY☆ - 15 By Dingdi Pachuau

Makti zetin ka en hau ringawt!!

"Puii, ka duh che!"

Ka beng chhe rî em ni? Nge ka suangtuahna vâk vêl? Nge min tihfiam mai mai zâwk? Thu dik atân chuan a hlu lutuk.

He pa hian ka puihna a mamawh leh tawh a ni ngei ngei ang, a ni chiang mai. Țha tê têin sawi mai se aw.

"Puih theihna che ka nei em?"

Ka țhutna chair bân chu a kut pahnih chuan a rawn chelh a, a rawn kûn hniam bawk a, ka lo îp châwih mai.

"Ka duh che phal rawh!"

Ka phal leh phal loh theih em ni dáwn? 'Min duh suh, ka phal lo' ti ringawt ila, awmzia a awm chuang dáwn em ni?

"LS..."

"Puii, ka duh che min phalsak hrâm rawh."

A va mak ngawih ngawih ve! Duh palsak tùra inthlêm ngawih ngawih ka hre ngai lo. A ti maksak ve ngawt mai.

"Tuna mi hi chu lemchanna tel tawh miah lo a ni."

Lemchanna tel tawh miah lova duhna. Duhna lem ni lo, duhna tak tak!! A ni thei ang em? Awih a va har si ém! Ka mumang ni lovin a tak tak a ni si.

Ngun zetin min en reng a, kei pawhin chutiang bawk chuan, kan inmelh hnai khawp mai.

"LS... mahse,.."

Ka hmui a rawn hup chat a.

"'Mahse' tih thu hi chu ka hre duh lo."

Ka hmai chu a țawng pah chuan a rawn thâwk khum lum ham ham a, ka mûr iai iai mai. Chutah, rawn kûn hnai lehzualin, ka chalah a fâwp a, ka mit lehlam lehlamah, ka hnarah. A tàwpna berah chuan ka hmuiah dam têin min rawn fâwp a, a thil tih dàn chu a cute reuh lutuk a, ka nui sak a.

"Min nuih?"

"Ka duh reuh lutuk a."

"Eng chu?"

"I thil tih dàn kha."

"Khatiang lo pawh kha ka la hre țeuh."

Tunah chuan ka hmaah a rawn țhu hniam tawh. A kut pahnihin ka biangah a dawm a, a mitmenga min duhna lang chhuak chu ka hmu ve chiang khawp mai; mahse, ka rilrua lo awm hi ka zawh ngei a ngai.

"LS, mi dang i theihnghilh theih nân leh mi dang thîk nân min duh mai mai a ni em? Chu chu ka hre duh a ni."

"Teuh lo mai!"

"I bialnu lemchang mai thei ka nih vàng leh i pawisa ka bat vàng te, tu emaw laka rilru lâkpèn nân mai mai min hman i duh vàng a ni tiraw? Chutiang a nih chuan ka duh miah lo a nia."

"Puii, Pathian hmingin, sawi tawh suh. Khatiang rilru kha ka pu lo, nangmah i nih vàngin ka duh che a ni. Tu emaw thlâk nân, theihnghilh nân emaw pawisa bat vàng emaw a ni lo. Khatiang kha chu sawi tawh miah suh." A hmelah chuan hrehawm ti hmel a pu a, nia, khatiang zawhna kha zawh hun chu a ni lo maithei; mahse, ka zâwt lo thei lo.

"A țha alawm."

"Ka duh che i phal tihna a ni em?"

"Ni mai ang chu," nui chungin ka ti a.

"Chuti, ka fâwp dáwn che."

"Teh rêng mai!"

Zah-ah ka la tawh bîk lo. Dik tak chuan ka duh ve tho a, ka sawi chhuah a ni chuang lo bawk nèn, ka zak duh tawh bîk lo.

Ka hmui chu a hmui chuan a rawn tawk de de phawt a, ka hmui hnuai lam chu a'n pet leh deuh dàr dár a, kan la inmelh reng avàngin a nui suk a, chutah, duhthawh zetin min fâwp ta vawng vawng a.

Rilțâm taka min fâwp a ni bawk a, a duhthawh thiam hle. Chhàn lêt loh theih pawh a ni lo, a ka lum ham ham chuan ka taksa chhûngah current siamin ka taksa pum mai chu a tilum ham ham maiin ka hria. A nghâwngah kuahin ka lo insiamrem a, a samah chuan ka țhâm nawk nawk, a fawh nawmzia lah ka hre chiang tawh a, lo awm mai mai ka tum bîk teuh lo.

Ka thluak a buai leh vek tawh, thil dang ka ngaihtuah leh thei tawh lo. Min kuah ding a, keiin nghet ém émin a nghâwngah ka kuah thung. Kan hmui chu a inthlah lo reng reng, kan bûr dùn ngar ngar mai.

A dawhkànah dìm têin min nghat a, ka mal kârah a ding. Ka mal chu a chûl riak riak a, ka mûr leh ar ar tawh. Ka lu ka thing deuh nak, ka rilru tlêm têin a la fîm deuh, ka inngaihtuah harh a ngai.

"LS, engtin mah awm lo ang aw."

'Engtin mah awm lo ang' titu zâwk chuan ka fâwp mawlh mawlh reng chu a ni si a, a hmuiah mai ni lo a hmai hmun hrang hrangah chuan ka fâwp kual dan dan a.

A nui hawk a, chu chuan amah ka fâwp lai chu min chawlhtîr țâwk. Engtizia nge he pa bula ka awma min tawh apiang hian ka thluak hi a buai ziah ni le? Thil dang ka ngaihtuah thei miah si lo.

"Eng nge i nuih?" Amah en chuang lo chuan ka ti sap a.

"I duhawm reuh lutuk a!"

"Het sala!"

Uar zetin a full papin min rawn fâwp leh a, ka chhàn lêt hmain a tàwp nghal daih. Makti zetin ka en há a.

"Engmah kan tih loh i duh chuan kan tàwp a ngai."

"Engati maw?"

"Het sala!"

"Ka tih dàn zir kher lo la."

"Lalduhawm, min thlah tawh rawh le! Kha dawhkàn chunga hmangaihna chen i duh loh chuan."

Min koh dàn reuh chu. Lalduhawm. Ka duh lutuk. Dawhkàn chunga hmangaihna chen chu ka duh em? Thlah ka la phal lo asin le.

"A têt êm hi."

A nui leh hawk a," Ka insùm theih lai hian min thlah mai teh, i duh loh zâwng tih ka duh lo a nia," a ti leh sup a.

Ka thlah ta vat. Ka pawnfèn, ka mal thlenga inhlîm chho huai mai chu ka pawtthla vat bawk a, ka țawng chhuak leh ka chezia inpèrsan lutuk chu ka zak ru chem chem. Ka che vêl chu ngun zetin min lo en reng a.

"Dawhkàn hman dàn thar zirtîr che kha ka châk phian asin."

"Tihchi loh lutuk!"

"Het sala!"

Kan nui ve ve. Dawhkàn ațang chuan min pawmthla a, min fâwp leh zawk.

"Mi dang hi an haw vek tawh a nih ka ring."

Ni dáwn tak. A office-ah min ko lût a, mi dang rêng rêng ka lo hrechang tawh lo, eng hun nge tih pawh ka lo ngaihtuah tawh hek lo. Banga sana chu ka en a, dâr 3 a lo pèl titih tawh!

"Dâr 3 a pèl tawh!"

"A pawi viau em?"

"Ka hre lo."

"Zanin chu?"

"Eng nge?"

"Ei dùn ila?"

"Khawiah?"

"I inah."

Tihchi loh. Khaw èn laia ka ina a lo kal tùr miin an hmuh ka duh rih lo. A in a fâl deuh a, mi pawhin min hmu lo zâwk ang.

"I inah ti zâwk ila?"

"Pawi miah lo. Kan kal nghal mai dáwn em niang?"

Ka thawmhnaw chu ka en vang vang a, buaina a awm lo ang chu maw. Han chêtpui vêl a rem lo hran lo ang chu.

"Umm."

"Ka thawmhnaw i ha mai dáwn nia."

A thawmhnaw hâk maw? Hmm, ka châk. Bialpate thawmhnaw hâk chhin pawh a châkawm alawm le, TV-ah ka enin lehkhabuah pawh ka lo chhiar ve fo tawh a. A changtunuin a changtupa kamis emaw T-shirt emaw a hâksak hian nuam ka lo ti thei tawp. 'Hun' ka nei ve dáwn chiah e, ka phûr ru kher mai.

"Oh, chocolate ka theihnghilh dáwn," tiin a dawhkàn chunga chocolate box chu ka ban nghal a.

Kawnga kan tlàn lai chuan min en zauhin," Thil ka zâwt thei che ang em?" a ti sup a.

"Absolutely yes, sir."

A nui suk a, a chhiat lohzia hi aw. A inhre ve ang em le? Um, hre ngei ang, loh theih loh.

"Artui, khàma lum, lunga insawh, keh miah si lo kha. A keh loh chhan kha eng nge?"

Ka nuih a za lutuk.

"A chhànna ka hre duh."

Ka nuih hak hak a, a thil min zawh hi ka rin loh lutuk a ni bawk sia, a ho ka ti bawk si, ani lahin a la thutak phian roh bawk si a.

"Kha kha chu maw, artui kha a vannei bawn tawp a nih kha."

A nui hawk hawk a.

"I thil hriat chu a țha hle mai."

"Ka zawhna reng reng hi chu a chhànna hriat hma hi chuan a har thei asin."

"A nih, ka zâwt ve ang che aw?"

"Um, har deuh lo aw?"

"Har lo tawp ang, i hre sa vek ang."

"Aw le, ka inring e."

"Q.1. Te amo hi eng nge a awmzia? Chuan 2. Ka kuta vuan chung leh ka mita en chungin q.1 chhànna khi min hrilh ang."

Hmm, a fing phakar tawp. A awmzia ka hre ve chiang khawp mai.

"Naahhhh, i phakar."

"Inah min hrilh thei ang. Chuan, q.3. Engtikah nge in vêngah ka lo kal ve theih ang? Hei hi chu min chhâng nghal thei ang."

"Exam zawh chawlh hunah."

"Q.4. Engtin nge i phone-ah ka hming i save?"

"Big Boss."

"Ka awih lo."

Ka lo nui a," Tak tak chuan maw, 'LSa' tiin ka save che," ka ti a.

"I thlâk a ngai dáwn a nih chu."

"Mr. Chocos ka ti ang, Chocolate min pe bawk sia."

In kan thleng ta thuai a, a in hi a fel fai thei sia, a awm loh hlàn hian enkawltu an awm em ni aw ka ti hial țhìn.

"Lo țhu rawh, ei tùr chu keima'n ka siam ang. E, i inthlâk ve duh tak em?"

"A ngai lo ang."

"Lo kal mai teh." Ka kutah chuan a rawn kai a, a room-ah min kai lût ta nghal a.

A kawr chu a hlîp țan ta nghal mai si a, ka hawi sawn ta daih.

"Min en mah la, pawi ka ti lo."

"En loh hi a țha."

A boxer nèn chauha dingin towel a bât a," I hâk tùr chu i inzawn dáwn nge ka pe dáwn che?" a ti a, kei chuan," Ka lo inzawn mai ang," ka ti a.

"Um, ka intleuh chhûngin i lo hmu hman ém ang chu maw?" nui chung hian a ti a.

"Lût thuai mai teh!"

A luh fel hnuah ka hâk tùr chu ka zawng ta nghal a, a sawi ang tak takin kawr rawng dang a vâng kher mai. A dum khup mai a, a vâr chu a awm ve bawk nain a tam lo khawp mai.

T-shirt dum pakhat ka la chhuak a, a la hâk loh ber tùra ka rin ve a ni. Hawi zak zak chungin ka kawr ka hlîp a, ka han inthawlh chu, ka thâwl khawp mai. A fual zâwng lah chu ka khûp thleng deuhthaw a ni, ka nui ka nui mai.

Ka pawnfèn thlâkna tùr chu avâng khawpin ka ring, a lo chhuah hunah a ni mai.

"Kha, i inhmeh khawp kha. I tâwk chiah lehnghal!"

Ka melh zawk nain ka hawi sawn leh nghal daih. Boxer nèn chauh a ni si a, ka en rei ngam lo, a pian nalh zet chu a lang chiang si a.

"Ka tâwk lutuk zâwk a ni," nui chung hian ka ti a," Kekawr erawh ka tâwk i neiin ka ring lo va," ka ti leh a.

"Boxer i duh em? A thar ka nei nual alawm," tiin a khum bula drawer lian zet chu a pan ta nghal a. A hawng rak rak a, ka kutah boxer pakhat chu a rawn hmehbel a.

"A tê deuh ber a niang, ha rawh."

"Chhuak phawt la?"

"Min zah em ni? Hmm, bialnu zakzum zet i ni tih ka lo theihnghilh a ni."

A chapal lian zet ka bun bawk a, ka nuihzatthlâk khawp ang. Lawnglêng tenâu-ah ka chuang a ni ringawt.

Ei tùr chu kan pahnihin kan siam a, a awlsam thei ang berin kan siam a, a tàwp berah meatballs kan siam a.

"I hnarah thil a kai a nia," tiin a kuta flour kai chung chuan ka hnar chu a rawn tuai a.

"Min tât elo?"

"Teuh lo, bawlhhlawh ka lâksak che. Kha, a dang pawh a la awm a nia," tiin a rawn ban leh a, engmah ka hmu ve mang si lo.

"Ka awih lo!"

"I biangah pawh a kai," tih leh ka bianga rawn piai a rual a, ka hmaiah chuan flour chu a kai tuar tawhin ka ring.

"Harh suh aw."

"Ka harh lo."

"Min tât tawh suh, ka duh tawh lo," tiin, ka tlânchhe tùr chu min man bet a, ka hmaiah bawk min tât leh ta.

Bowl-a mi chu ka țhâm țâwk a, a hmaiah chuan ka vawm ve ta. Ani pawhin bowl-a mi chu a țhâm ve leh, kan invawm ta zak zak, kan inûm kual nasa mai a, chhuat lah a paw vâr nguai mai. Ka nui nasa lutuk a, ka pum a na vek.

"Ramhuai i anzia kha!"

"Nang pawh i ang ve tho."

"Hawh, thla la ang, ka nu kan thawn dáwn nia."

Kan sam leh kan hmai, kan thawmhnaw hâk zawng zawng a vâr luai mai; mahse, a hlimawm dangdai ve tlat.

"A nuam tiraw?"

"I naupangchhia ém mai a."

"Nangma țan hmasak a nih kha aw."

"Ka nuin a zilh hlak dáwn che a nih kha. Flour manto tak tak infiam nân i hman vàngin."

"A hmang hmasatu ka hrilh mai ang."

Kan inûm kualna zawng zawng tihfai a ngai a, kan taksa pumpui tihfai a ngai bawk. Kan intihfai zawh meuh chuan hun a lo liam duai tawh mai.

"Le!"

"Eng nge? Min tiphu zawk alawm. Eng thil nge?"

"Ka zawhna che kha min la chhâng lo."

A va ho tak!

"Tlangval senior tihchi loh lutuk!"

Ka kutah manin," Le, zawhna pakhatna leh pahnihna kha, min chhâng tawh rawh le," a ti a.

"A awmzia ka hre lo."

"Google rawh."

"Phone ka ken loh hi."

"Chuti, min fâwp rawh!"

A hmuiah chuan ka fâwp zoh a.

"Eng nge kha kha?"

"Ka fâwp che."

"Khatiang kha em ni fâwp i tih chu?"

"Aw."

Min man thut a, ka che hman lo. Uar zet hian min fâwp tàwn táwn a, ka thaw a chham țhelh, a tàwp lamah ka hmui hnuai lam chu a seh zauh a, ka țê țhat a.

"A na!"

"Khatiang kha alawm, 'fâwp' ka hriat ve dàn chu."

"A na ve tho asin!"

"Ka tidam thiam."

"A thî hial lo maw?" Ka hmui chu dìm tê hian ka chûl hoh hoh a.

Ka haw meuh chuan dâr 9 a ri tawh. Min thlah tùrin ka ngen ngar ngar a, a phal lo zêl a, 'Dâr 9-ah' a ti tlat a, dâr 9 -ah chuan min thlah ve ta țâwk.

"Lesson plan siam loh ka la nei a."

"Naktûk chu ka hre thiam mai ang che."

"Hmmm, vêl a che. Inla boss viau suh."

Ka chhuk dáwnah inmangțha nân kan inpedâk leh vang vang a, kham ni rêng ka nei dáwn lo a nih hi.

"Lo lût ve rih la?"

"Ka haw thei lo palh ang."

Ka sâwm lui lo.

Mut dáwnah "Mut tui," tih ringawt sawi tùrin min rawn call a, a ho viau nain a țha ka ti reuh phian. Ka mu tui sawtin ka ring.

*A CHÂNG CHUAN THIL HARSA BER LEH THIL DIK HI THIL THUHMUN A NI ȚHÌN*

☆13TH MAY☆ - 16 By Dingdi Pachuau

Ka mumangah Liansanga ka lo hmu a, khàma artui lum, keh si lo vànnei a tihzia mawlh chu min lo hrilh a, ka nuih a za lutuk. Zînga ka harh chuan ka phone ka en vat a, message a lo awm ka ring tlat nia.

A hnên ațangin message ka dawng lo hrim hrim, ka hnual deuh rawih ringawt. Zîng thawh veleha  morning wish chhiarte hi a nuam ve asin le. Romantic lo lutuk mai. Hmeichhia zawkin va tih hmasak âwt âwt lah a mawi lo si.

Dâr 7-ah min rawn phone ta thung. Mr. Chocos, ka nui var var a.

"Morning, Mr. Chocos," zângkhai vah hian ka ti a.

"Good morning, Lalduhawm, i thawhna a rei tawh em?"

"Rei tawh mai!"

"Morning walk ka neih lai chuan i la tho lo."

"I lo kal maw?!!"

"Kal e."

"I lo kal hma leh lutuk a niang chu."

A nui hawk hawk a, zîng kâra a nui ri hriat chu a nuam teh e.

"Nizàn ka mumangah ka hmu che a, ka nuih nasa che."

"Colour-in nge black& white-in?"

"Colour ngatin le. Artui khàma lum kha vànnei i tih thu i lo sawi mawlh mawlh a."

A nui leh hawk hawk a, kei pawh ka nui ve tho.

"Tunah tak hi chuan artui ai khân ka vànnei zâwkin ka hria."

Nuam ka ti ngawih ngawih. Ka thawh tirh a ka rilru a hnual teh rêng nèn, tunah chuan rilru a hlim ta veng veng mai.

Phûr zeta insiamin school panin ka chhuak, ni dang zawng aiin ka phûr. Ka kal tùr pawh ni dang aiin ka insiam rei, kawr pawh ka inthlâk kual nasa, mawi loh ka hlau.

Assembly-ah kan inhmu leh ngei dáwn tih chu ka hre tho  nain kan inbe leh dáwn si lo va, chumi hma chuan biak ka châk viau asin le.

A car a lo awm leh vang tawh. He pa hi chu a tlai ngai miah lo, tumahin kan thlen khalh ngai lo bawk.

Office-a ka lût chiah chu ka phone a rawn ri a, amah a ni!

"Ka hmu reng che!"

"Tunah maw?!!!"

"Office i lût tùr kha. Ka lo thlîr ziah che alawm."

A va zahthlâk tak. Ka lang chhe thei ngawt ang. Ani chuan min hmu ziah bîk sia, ka hmu ve duh asin le.

"Tinge i ngawih daih a?"

"Ka hmu ve châk che alawm."

"Ka rawn kal dáwn em ni?"

"Tihchi loh, mi dang an rawn thleng dáwn tawh ang."

"Assembly-ah kan inhmu dáwn tho a."

"Kan inbe thei lo alawm."

"A rûkin i phone-a ka thlalâk lo en mai rawh," tiin a nui hawk a.

Ka ti duh mai tak tak ang ka ti!

Building khatah awm mah ila, staff office-a a rawn luh loh chuan inhmuh ngaihna a awm lo, a office-ah min ko lût a nih ngawt loh chuan.

Assembly-ah chuan kan inhmu ngei, inbiakna chhan tùr a awm lo. Mi dang hmuh lai phei chuan a tihchi miah loh, min ringhlel ang tih ka hlau.

Tlai bàn hnuah gate pâwna amah lo nghâk tùrin min ti, ka nghâk, hmuh ka duh ve miau bawk si a.

"I in luah hi sawn la ka ti."

Makti rilru deuh chuan ka thlêk phei a, ani chuan," Ka ti tak tak," a ti leh sup a.

"In luah mai tùr vànzia hi. Tuna ka luah phei hi chu a tlâwm a, a zau ve tho bawk si. Chubâkah, hmeichhia mahni chauh pawh tân pawh luah  a hlauhawm lo va."

"Rawn lèn duhin a buaithlâk, mi mitmei i véng zel si a."

A tidik chiah. Khaw èn laia a lo kal hi ka duh lo, kàwn lùn lai a ni bawk si a, mi kan țawng peih bawk si.

"Zànah lo lêng la, a țha mai lo'm ni?"

"I ina chaw eite pawh ka duh ang a, khaw thim hnua lo kal zêl chu a buaithlâk dáwn asin."

"Aw le, aw le, i insawi khawngaihthlâk thiam bawk sia, i duh hun hunah i lo kal thei ang."

A nui suk a.

"Zanin erawh ka inah kan ei leh phawt ang."

Eirawng kan bàwl laiin a phone a rawn ri a, ka melh duh miah lo nain ka ngaihven ru tho.

A nu a lo ni a, an inbe rei lo. Amah zâwkin a call leh a, video call ngatin.

"Nu, kha inbe r'u."

Ka hnung ațanga min rawn kuahin ka hmaah a phone chu a dah a, ka hnung  thlâwp zaih chuan a rawn țhu nghal a.

"Tete, i dam țha tiraw? Kha, i hmel pawh a dik ta deuhin ka hria. Ka fapa chuan a enkawl țha che maw?" tiin a rawn nui sãng a.

"Aw, dam țha e. Ka lâwm e, hei min enkawl țha khawp mai, lo phei leh tawh la?"

"Min mamawh loh hmel ém kha maw."

"Nia, mamawh hran lo, i lo phei chuan chêt a buaithlâk mai mai," Liansanga chuan a lo ti sup a, ka melh rum vak a.

"Khati khân lo ti suh."

"Lo phei chu ka châk khawp mai; mahse, kumin chu ka buai a chhuak a, chawlh ka nei thei lo tlat. Lo zin phei leh zâwk la, thil leisak tùr che țha deuh ka hual leh tawh a nia."

"A ni maw? Chuti, keimahin ka lo phei mai dawn em niang?"

"A tihchi viau ang, i free dáwn bawk si."

"Tihchi lutuk!"

"Heyyy, chutiang thu lawi lo sawi s'u," Liansanga chuan a lo ti hmuk a.

A nu nèn chuan kan nui var var a.

"Tak tak chuan, i thil tùr ka rawn thawn mai dáwn nia. Ka hman hmasak berah rawn phei chu ka tum tho ang, in ngaihawm tawh alawm le."

"Nang pawh i ngaihawm lutuk tlat."

Kan inbiak zawh hnu chuan," Ka nu a lo phei chuan nang nên hun fâl kan nei țha thei nâng," a ti sup a.

"Hey, i nu a nih kha. A ngaih ve dawn teh lul che nén, a khawngaihthlâk alawm. A țha thei ang bera biak tùr asin, ka inah pawh i lo lêng thei reng a, hun chu kan la nei dáwn chauh."

"Ka biak țhat reng kha."

"Um, i fel. Chuan, chawhmeh lam kan buaipui leh țan tawh dáwn em ni ang?"

"Ka thawmhnaw i hâk hian nuam ka ti veng veng."

Ka nui sak a," Ka inhmeh ve tho tiraw?" ka ti a, ani chuan," Teh reng; mahse, thawmhnaw ha lovin i inhmeh zâwkin ka ring," a ti leh sup a.

"Hmmmm, chimawm suh!"

"Nge? I mawi ngawt ang."

"Ninhlei suh," tiin a kut, ka âwm lama a rawn tawlhtîr zàl zál chu ka mansak chat a, ka chelhsak ta reng a.

"Ui viau lo la."

"Chawhmeh siam ang."

"Kan siam zawhah chuan..."

"Chaw kan ei ang," tiin ka nuih sak a.

Ka bengah chuan a fâwp zoh a," Tunah tak hian ka rîl a țâm," a ti sup a, a khabe hmul chuan ka nghâwng a rawn nùltîr thuak thuak a.

"Bawnghnute ka'n thlit ang che aw."

"Bawnghnute ka in châk lo."

"Nih, eng nge i duh?"

"Nangmah."

Zanriah ei khamah chuan hmun min tihfelpui vek a, ka thleng sil lah a lo rem ve a, min kalsan miah lo.

"Zanin chu ka haw hma ve tawh ang aw?"

"Engati maw?"

"Inbual ka duh a, bâkah, lesson plan pawh siam tùr ka la nei a."

"I haw hma ang a, kei ka lo lêng ve thung anga ni mai."

"A țha alawm."

"Lesson plan chu ka lo siamsak dáwn che em niang?"

"A țha viau tak ang, i thiam dáwn si."

Ka in kan thlen chuan dâr 8:30 vel a ni a, a la tlai lutuk lo ve.

Ka intleuh ve zawk a, ka zo a bula ka va țhut chuan lesson plan chu a lo siam tak tak tih ka va hmu a, a lo zo dèr tawh lehnghal.

"I lo ti tak tak elo?!! Ka tifiam mai mai a nih kha."

"Hun kan neih tam theih nân ka tia."

A bianga fawh zoh pahin," I va fel tak!" ka ti sap a, "ka'n en ve chhin ang e," tiin a plan siam chu ka ban nghal a.

"Biang ni lova fawh chu ka phú ve asin le," a ti nang nang a, kei chu ka nui hak hak a.

"A full-in em ni i duh?"

"Thil reng reng hi a full hian a țha ber zel."

Ka kuai hnai sauh sauh a, tih tak zetin a hmuiah chuan ka fawhsak ta vawng vawng a. Ani pawh chuan min lo fâwp lêt chiang khawp mai, kan indût ngar ngar mai.

"Ka kham thei lo che."

"Kei pawh."

"I lip-gloss hman țhin nèn lam hian a tui ka ti che."

Ka nui sak a, Rinawma kha chuan a ti thei bau lo, a lo lèn dáwn hi chuan ka hmang ngai lo.

"I rim hi a tui ve hrim hrim. Nizàna ka t-shirt i hâk pawh kha ka mutna bulah ka dah reng a."

"Naktûkah kan su dáwn nia."

"A rim kha ka hnim khân ka bula awm angah ka ngai che a, sûk ka phal teuh lo."

"Ahhh, kan su dáwn nia."

"Plan ka siam kha en tawh la."

"Hetia min kuah beh tlat chuan engtin nge ka en theih ang?"

"Tak tak chuan, ka haw hunah i en dâwn nia."

A hnu lamah chuan kan țawng tawh lo, țawng kher a ngai lo; mahse, ka invèn a ngai. Ka thluak a la fìm lai hian ka duh miah loh thil ti lo tùra ka chêt a ngai, mipa chu an insûm thei si lo.

"Thil țha lo ti lo ang aw."

Ka sawi ve tak na a, tunah pawh hian ka tàwp thei chuang lo. A khawih ang angin ka awm leh tho, ka thluak a fan leh tawh tlat.

"I va duhawm tak!"

Ka nghâwngah a fâwp a, a fâwp tih lêmah a seh pah deuh a, min tițim iai iai mai. Uar zâwka min tawh theih nân ka lo er ve zel a, ka thaw hak hak mai.

"I duh loh zawnga awm ka tum miah lo," chu a ti ve tak nain ani pawh hian min tàwpsan chu a tum chuang miah lo.

Ka taksa a fawhna hnu chu a kut chuan a rawn chhui zel a, ka kawr hâk pawh chu ka dàrah a nawr liam leh tawh, ka koki chu a fâwp zoh a, a lei lum zetin a tawh chin lah chu a hriat khawp mai.

"LS, ..ka..ti...tak..takkkk..."

Ka buh niai mai, ka taksaa thawk hi a thawk nasa tawh ém a ni, ka rilru ka hmang thei tawh teuh lo, min fâwp se, min hrâwm nawk nawk se tih chu ka duh dàn a ni.

"Puii, i duh loh tih ka duh lo."

A aw thâm țuak mai chu a sexy ngawih ngawih, ka duh chi, ka mipa duh ber țawng a nih vàng nge  a mawi ka ti hluah hluah.

Ka kawrhnuai pawh ka kokiah a liam leh ta. Ka invêng thei tawh lo, chu ai chuan tuna boruak ka tawn mêk hi tibuai lova a tàwp thlen ka duh ngawih ngawih.

"I vun màmzia hi, ka duh chi tak a ni."

Ka nui sak nain a thil sawi ai chuan ka taksa a khawihna chuan min tiphûr zawk. Ka hrawk a ro avàngin ka chil ka lem dak dak a, ka meng phal lo.

"Pui, ka duh tak zet che!"

"LS..."

"Ka mamawh che a ni."

"Kei.....pawh."

Ka thâwk dàn a dik loh miau avàngin ka thil sawi pawh ka tàwp chut lo thei lo.

Ka hmuiah duhthawh zeta rawn fáwpin ka biangah, ka bengkâwmah a fâwp thla zêl a, ka nghâwngah fâwp lehin ka âwmbâwr bulah a fâwp thla leh a, ka lo thaw hawk hawk mai. A samah ka țhâm a, a hmabâka tih tùr ti tùr chuan ka rilruin ka ngèn mawlh mawlh a, ka awm dàn pawhin a sàwm ngei ka ring bawk.

"Kan chesual dáwn lo," a la ti ve fan nia.

Ka awmbâwr khuhtu la awm chhun chu ka kawrhnuai chauh a ni ta. Chu pawh lace pan tê chauhin a tuam tawh si.

"Ka va duh tak che ém!"

*TU PAWH HIAN DANGLAM BÎKNA KAN NEI VEK. DANGLAM BÎKNA NEI VEK HIAN KHAWVÊL HI KAN SIAM NUAM A LO NI, PATHIANIN MI DANGLAM BÎKAH A SIAM CHE TIH THEIHNGHILH NGAI SUH*