☆A MAK!☆ - 1 - 10 By Dingdi Pachuau

 ☆A MAK!☆ - 1 By Dingdi Pachuau

A mak! A mak ém asin, heti taka ka han duh ta mai hi, thil 'mak' tih loh rual ni mawlh hek lo maw le! Amah hmu lova awm hrehawm ka ti a, ka ngai ngawih ngawih, a bula ka awm lai reng pawhin ka ngai tho!

*******

*Vawiin chu min bazàrpui la? I chawlh ve nî a nih tho kha*

Ka bialpa Tea hnên ațanga ka message dawn a ni. Ka meng phar ãk a, mak ka ti viau nain ka hlim, ka nui sak tho, min sâwm chhuak khât ve alawm, ka chhuahpui ngei ang. Ni dangah ka hman ngai si lo va, vawiin chu ka tihhlawhtlinsak ngei tawh ang.

Inrinni a ni a, sikul ka chawlh ve nî a ni bawk. Ka nau hmeichhia nèn Ramtharah in kan luah a, Lunglei khaw mi dik tak kan ni lo. Haulawngah kan awm a, ka nau College a kal ve țan tawh vàngin ka chhûngte in ațangin ka insawn chhuak, in kan luah ve ta ràn. High school din thar ti mai ila, kum hnih lai chu a ni ve ta, chutah chuan ka thawk ve a, Mathematics subject ka zirtír țhìn. Ka hlawh tam vak lo chuan kan inchâwm a, a châng phei chuan ka nute pawh ka thawn ve țhìn tho, chhûngkaw hausa ni ve lo mah ila mi dang ta awt ngawih ngawiha ka naute an awm hi ka hlau țhìn, ka theih anga nasain pawisa thawh chhuah ka tum a, mathematics-ah pawh tuition ka pe ve hial țhìn, a zia reuh khawp mai.

Tea nèn hian a hming chuan kum 3 deuhthaw kan inzui ve ta. Phone-ah kan inbe zeuh zeuh a, ngaihzâwng angin ka en ngai lo. Min duh thu min hrilh a, a tìrah  chuan ka duh lo, an hausa sia, bâkah fapa mal a la ni zui, a luck bawk si nèn, kei ve mai hi min duh tak tak ka ring lo, hna ka la neih hma a la ni zui. Ka chhâng duh lawk lo va; mahse, min bànsan duh lo va, chutia min hêl ta reng mai chu, duhna ka lo nei chho a, ka tân sâng viau mah se ka hnar phal ta bîk lo, ka duh ve tawh miau a ni. Min zar min zar a, min care viau bawk si a, lo induh khum ve ringawt chi pawh a ni lo.

Min duh ve viau hi mak ka ti zâwk asin. Kan inkawp chhoh ve tâkah chuan min duh ve tlat chhan ka zâwt ta ziah. Ani lah chuan," Naupang chhia nghâl lo; nula i nia, tlangval ka ni ve bawk," a ti deuh tlat zêl. Min chhàn dàn chuan a kawh tum ka hre thiam chiah lo nain min duhna avàng chuan ka hlim viau țhìn a ni.

Bazàrpui tùr ber kher a min sâwm chu mak ka ti lo thei lo, a chhan chu tûnlaiah chuan kan duhzawng chu online-in kan chah vek tawh si a, ani pawh hian a chah ve țhìn chiang si a, mak tih loh chi pawh a ni lo.

Min rawn sâwm turin a rawn tlân vang vang, Ramzotlânga awm an nia, min rawn lam kual ve êm a, min dah lal ve riaute hi nuam ka ti.

Ka nau Nunoi hnênah chuan kan chhuah tùr thu ka sawi tawh a, a rawn thleng chiah a, ka tlân chhuak nghâl.

"Eng nge lei i tum deuh a?" ka ti a.

"Thil țha deuh," tiin a nui vur vur a.

"Min hrilh ve mai la?"

"I hre dâwn alawm," a ti deuh tlat.

A nutei dàwr hawn tharah min kalpui duh niin!! Dàwr thar na na na chu, mi pawhin an lo bàwr nasa, a thil zawrh chu a țhat hmel hlawm hle mai.

"Hei hi han ha chhin teh."

Kawr mawi zet hi min rawn pe a, a mawi lutuk; mahse, han en ngawt pawhin a nghâwng a zàu hmel ka ti; mawi chu a mawi lutuk.

"Ka birthday a la thleng dâwn hlei nem," ka lo ti thung a, birthday-ah hi chuan thil pêk hi ka hnar duh bîk lo va, a pâwng apuia thil inleisak leh inpêk erawh ka rilrem zawng a ni lêm lo.

"Ha chhin phawt teh."

Mi an awm ve nual sia, hnial zui zêl ka duh bîk lo.

A nghâwng chu a zâu khawp mai, hetiang chu ka ha chhuak ngam dâwn lo hrim hrim, bâkah, ka thawmhnaw ngainat zawng a ni lo bawk.

"I inhmeh hle mai," ka chhuak min lo hmuh veleh chuan a lo ti a.

"Mawi khawp mai; mahse, a nghâwng hi a zâu deuh mah mah a ni," ka ti sap a.

"I inhmeh alawm, a zîm lam ai chuan a mawi zâwk."

A langah ka hnial lo; mahse, ka duh lêm lo tih chu ka sawi dàn ațang khân a hre maiin ka ring, bâkah thawmhnaw inleisak tih vêl ka duh lo tih a hre tawh tho bawk a, a lâk luih bîk ka ring lo.

"Țhianpa inah pêng lawk teh ang," tiin Chanmari lamah kan lêt leh a, kan kal ve fona a nih vàngin ka hnial hran lo.

Mahse, a țhianpa hi ka nêl lo khawp mai. A țawng mawh ka ti a, biak lahin a rùl tâwk bâkin min chhâng ngai lo. A nui hmel ka la hmu miah lo bawk! A inla ngêng hi ka ti lutuk a, ka mil lo thlâwt, hetiang mi, nèlawm loh lutuk leh hlimna nei ngai lo hi ka ngaina thei lo.

A lo awm ve ngei, hna a thawk lo a ni ngei ang, hnà thawk ni se tunah dâr 12:30 chauh a la ni a, a la bâng lo tawp ang.

Ka țhutna țhinah chuan ka țhu leh chat a, khua a țha vawl vawl lutuk a, a lum lek lek. Ka thàw pawh a sa hat, ka kutin ka inzâp hauh hauh a. Fridge tui vâwt ka in châk lutuk, min tidài huai huaiin ka ring a ni.

"Vawiin chu i off a?" Tea'n a tih chuan ani chuan a lu a bu nghut ringawt. A țhianpa bulah takngial pawh hian a țawng tam ngai chuang lo, hetiang hi a ni tih hre sa lo phei ila chuan min ngei emaw min hua emaw nia ngaiin a ina kal hi ka duh ngai lo ang.

"Tui vawt zet in a châkawm hle mai."

Ka tho vat a; mahse, min lo kal khalh daih! Ka ke pên pawh min tilài hû mai. Tui bottle a lâk chhuah chu min rawn pe a, làwmthu ka hrilh sap a, Tea chu ka pe phawt, ka in châk viau nain ani hian in hmasa phawt teh se.

"A vawt tui kher mai!"

Tea chuan eng eng emaw sawiin a titipui a, kei chu ka țhutnaah țhu lehin tukverh ațang chuan thlang lam hla tak hring dup lam chu ka thlîr leh veng veng a. Khûng lai ramhnuaiahte khuan awm ta mai mai ila a lum lo deuh zâwkin ka ring, Building hnuai ai chuan thing hlim hnuaiah awm mai mai ila...

"Hon, Thingpui in ila?"

Ka la phu zawk zui! Zia lo thei ngei mai.

Kan kal ngun ve tawh avàngin chêt dàn tùr chu ka hre ve tawh lutuk; mahse, thingpui ka chhuang tùr pawh chu min rawn chêt khalh leh ta tlat.

"Ka lo ti ang," a ti thûm dût.

Tea bulah chuan ka țhu phei a, ani chuan," Nakin zànah ka cousin Lizzy birthday kan làwm dâwn a, vawiina kawr kan lei kha i rawn ha dâwn nia, an in chu i hriat kha, ka rawn lam ang che," a ti a.

"A mak thei e, min hrilh hre hmasa ve țhìn la?"

"Eng nge tih i tum a?"

"Inkhâwm bànah kan unauin damlo kan kan tum a."

"Naktûk chawhnu lamah kan mai ula?"

"Kan khuaa mi a ni lehnghál a, damdawi ina a awm laiin ka kan ve hman si lo va, kan ve ngei ka duh alawm," ka tih chuan," Naktûk chawhnuah ti mai rawh, zanin chu ka partner tùr i ni," a ti deuh tlat a.

Ka ngawi ta.

Birthday party hi ka ngaina hran lo va, ka hriat chian deuh takah lo phei chuan ka kal ngai lo. Tuna min sàwmna Lizzy pawh hi ka la hmu lo, a hming erawh ka hre ve tawh, Tea sawi dàn hmangin Lungleiah a awm ngai tlat lo a ni.

A cousin birthday party-naa ka hâk tùr kawr min leisak a, ka thin a rim lo; mahse, ka lung a awi chiah lo. A chhan chu, min hre chiang ve tawh viau tùr a ni si a, a thlàwna thil leisak ka duh lohzia a hre tawh chiang, chutah birthday party-na mai mai a hâk tùr lehnghâl, damlo kan tùrin ruahmanna kan lo siam vek tawh bawk si.

"I va ngawi ve! Nuam i ti viau ang, i mikhual bîk bawk lo ang, i bulah ka awm dâwn alawm."

Ka chhâng chuang lo.

"Ka sàwm chhuah khàtzia che hi ngaihtuah la, min tibeidawng lo hrâm rawh. Kawr lei chungchângah kha chuan, ka tihpalh."

A tidik. Min sâwm khât ve a, min sàwm ve chhun han hnial chu ka hreh ve bawk si, ka kal ve ta poh.

Nuam erawh ka va ti lo tak!

Mi an tam lutuk lo, an changkâng hlawm khawp mai. A pair tê têin an ni hlawm a, Tea pawhin a insawi ang takin, min kalsan lo ve. Chuti ni lo se hmel hriat ka nei bawk si lo va, ka hawihài ngawt ang chu.

An lám hut hut a, Tea hmuh laia nuam ti lo hmel put ka duh loh vàngin ka nui lui sáng reng a, ka biangki chu a kham vekin ka hria. A boruak ka ning lutuk chu wash room-ah ka kal chhên ringawt, boruak a zia deuh ber tlat a ni.

Zàn dâr 10-ah min thlah haw. Zaninah ka inkhâwm loh phah a, a lung tiàwi loh ka hlau ve tho si a, dárkâr 3 vêl zet hrehawm ti rêng rênga hun hman chu thil nuam tak chu a ni lo. In chî chi hrang hrang rim leh music ring lutuk khân min tichàu zual, meizial khû a nasa bawk si. Chuan, zanin ațang hian Tea pawh hian a lo in ve thei hle a ni tih ka hre chiang ta bawk, a rui chuang lo nain a rim chu hrehawm ka ti.

"Ka lâwm e aw, a nuam lo viau lo tiraw?"

Tihlunghnùr ka duh bîk lo," Um," ka ti sap a.

In chhûngah a rawn lût ve lo, inthlah nân min fâwp a, chhàn lêt harsa ka ti lutuk. Ka lu a na bûr si a, a rim chu ka ngaithei lo a ni ber.

A tûkah chuan chawhnu lamah Nunoi nèn U Sangite inah chuan Pa Dênga chu kan va kan a, a lo tlangvâl khawp mai. Damdawi inah a awm rei vak lo a nia, a na ve viau bawk a ni ang, a lo chêr ve kuam mai.

An lo lâwm thiam khawp mai, Haulawngah an in leh kan in a inhnaih fahran lo nain vêng khat na na na chu kan inhre chiang lo thei lo. Bâkah, Whatsapp group lamah an rawn post peih bawk a, Lunglei damdawi in lama rawn awm hi chu ka hre ve thei viau mai, 'kan' ni lova 'kantu' ka ni thei hi ka lâwm țhìn.

"Zanin chu kan pâwlte an chak ngei ang chu maw," U Sangi pasal U Mawia chuan a ti dût dût a.

"U Mawi, eng nge i țan ve a?" Nunoi chuan a lo ti vat a.

"Liverpool maw le, ka ning a nia," U Sangi chuan a lo ti vat a, U Mawia chu a melh pah ralh a.

"Kan inang a nih chu, kei pawhin ka țan ber," ka lo ti ve vat a.

"A ho ka tihzâwng tak!"

"In ninawm! Inkhêl lam hi chu sawi lo teh u."

"Man City an țha ber!"

"Juventus fé..."

Inkhêl lam hlïr mai chu kan sawi chho ta, kei pawhin sawi tùr ka lo ngah ve phian. Nakin zàn chu en ve ngei tùr a ni, inkhâwm bàn lamah daih a ni dâwn tho si.

Zànah Tea a rawn lêng a, inkhèl chu kan en a, ani hi chuan Chelsea a țan daih thung; mahse, Liverpool ka țan vang hian ka bulah hi chuan a țan der ve tho țhìn. A lêng rei lutuk lo, a haw hnu rei vak loah chuan ka mu ve nghâl mai, Nunoi phei chu a mutna a rei tawh.

Message tone a ri dat a, ka lo mute lo a nih hi, ka mute ta vat. Tea a ni tih ka hmuh chuan ka nui sak.

*Ka thluak i tichawmawlh tlat, ka ngaihtuahnaah i awm reng mai*

Ka hmui ka tipawrh nasa. He pa tak hi chu aw...

*Mu ve mai mai teh, zàn a rei tawh hi* tiin ka reply ve ta ringawt.

Hun a kal zêl a, kum tàwp pawh a lo hnai ta, ka naute pathum Krismas-a an bazarna tùr pawisa ka khâwlsak tawh a, ka thaw pawh a veng ve ta. Nunoi hi chu a fel tawh a, krismas-ah kawr thar neih kher a tum tawh bîk lo. Kei phei chu ka neih ngai lohna a rei tawh lutuk. Upa ber ka ni a, Nunoi nèn hian kan kum a inthlau viau bawk, chuvang chuan kan rilru pawh a inpuitlin hleih ve viau bawkin ka hria.

Zan khat Tea lo lêng chuan December thlaa inneih a rawt ta tlat mai a nih chu! Ka lo la ngaihtuah ngai lo va, pasal nei thei tùrah ka la indah ngai miah lo bawk.

"Kan inzui rei ve tawh e. Bâkah, nupui neih ka hun ve tawh viau bawk alawm le!"

Chhàn dàn tùr ka hre lo kher mai. A thil sawi hi a dik vek ka tihsak bawk si, keima lam ka inen a, ani meuhin nupui atân min han duh a nia...

"Ka chhûngte pawhin nei tùrin min duh tawh a, nang pawh pasal nei rual i ni ve tawh tho a."

A dik chiah alawm. Tunah hian kum 25 ka tling țêp, nakkum Jan thlaah ka tling dâwn.

Mahse, ka chhûngte hi? Ka ngaihtuah lo thei lo. Keimahah an innghat ve rih lo thei si lo, ka pa a hrisêlna a ţha lo va, ka nu thawh chhuah ang chauh kan ring a, tunah keiin tlêm tlêm ka lo thawk chhuak ve thei ta a, pasal han neihsan ringawt mai chu, min châwm țàng țáng a, a hlawhtlinna an hmu ve țan chauh a ni si a.

"Te, ka rilru a buai. Ka duh lo che a ni miah lo; mahse, ka chhûngte hi ka ngaihtuah an ngai rih si a ni, keimah chauh inngaihtuah thei ka ni rih lo, ka sawi chu i hre thiam tiraw?" tiin min hriat thiam beisei zet hian ka en kar a.

"I chhûngte chu, kan inneih hnuah pawh kan châwm thei tho alawm."

Ni lo ve. In dang ațang chuan a harsa, mawi pawh a mawi lo. Pasalte in ațanga nu leh pa leh chhûngte chàwm chu, pasal bâkah an chhûngte mitmei vèn a na duh àwm êm mai, a tihchi miah loh ang.

"Te, min nghâk lawk la, hun min pe hrâm rih ta che? Ka dinhmun hi min han ngaihtuahpui ve la, a harsat dàn-"

"Min lo duh tak tak lo a nih dâwn hi," a ti ta nghut mai.

"Ni lo, i hre sual a nih kha."

Hrehawm ka va ti tak! A tih lohna lamah hi chuan a rilru sawhsawntîr hi a har thei si, min timangang tak tak.

"Min duh tak tak lo, kan inzui rei tawh viau a nia, tihnat che ka duh loh vàng leh i duh loh zâwnga awm ka duh loh vàngin vawi khat pawh ka la mutpui miah lo che, hmeichhe dang chu ni la, hetiang hi i ni lo ang, nupui atân ka duh vàng che a ni."

Ka tân chuan thu làwmawm tak a ni. Kohhranah inhmang lêm lo mah se sex chungchângah kher hi chuan kan thianghlim dùn ve chiang alawm, min tihluih chu a tum ve tawh; mahse, kan puitlin lo, ka duh lo tih a hria a, min tilui tawh lo.

"I chungah hian ka lâwm rêng a ni. Min duh a, kei pawhin ka duh che; mahse, ka chhûngte hi ka ngaihtuah rih lo thei lo a ni, kan chhûngkaw chanchin chu i hriat vek tawh kha, lo innei ta ila i thlahthlam hauh lo ang tih ka hre tho; mahse, chu chu rem ka ti thei lo, ka zak lutuk ang," ka thiam ang tâwk chuan ka ti ve koh koh a.

Ka hmin ve viau chuan ka hria.

Pasalte in chhûnga awm tawh chuan ka chhûngte ka châwm thei tawh lo ang, a mawi loh bâkah thil tihchi a ni lo bawk. Ka chhûngte châwm tùr pasal neih lah ka duh lo, ka harsatna hi min hriat thiampui hrâm ka ring ve tlat a ni.

Kan khuaa Krismas hmanga ka haw lai chuan min rawn phone a, ințhen a rawn rawt ta ringawt nia!

"Inneih i duh si lo va, ințhen mai ang," tiin.

Mak ka ti lutuk a, chhàn ngaihna pawh ka hre lo!

"Kei aia chhûngte i dah pawimawh chhûng chuan kan innei thei ngai lo ang, chuvàngin i chhûngte chu enkawl rawh, ka lo inrawlh lo ang."

"Te, kan sawi fel tawh emaw ka ti a-"

"Nangmah chauhin i sawi fel a nih kha."

Ka ngawi ta reng.

Zanriah kîl lai chuan ka chhûngte chu ka en kual a, anni ka ngaihtuah rih vàng hian ka duh ber chuan min rawn țhen ta a ni a, ka dinhmun min hriat thiampui ve emaw ka tih lai khân a rilru chu a lo sawhsawn miah lo a lo nih kha.

Zàn ka mutnaah chuan ka insûm thei lo. Kha leh chen kan lo inzui ve tawh a, kei pawhin ka duh ve tak zet tawh asin, pasal atân pawh ka duh; mahse, pasal nei thei dinhmunah ka la ding si lo.

Chuvàng tak chuan min țhen tihna a ni a, nupui a neih thuai a rinawm hle bawk. Nupui a neih duh tawh vàng a ni si a, tu tak nge a neih ang? Duh rûk dang a lo nei khiau tawh tihna a ni thei ang em?

Ka țah chhuah ka hlauh vàngin ka rizai sin hmâwr chu ka kaah ka hnawh lût țeuh a, bang kil lam hawiin ka mu tlat, ka lukham case erawh a huh ve khawp.

Lungleia chhuk leh pawh ka peih ta lo kher mai. Ka chhûngte hmuhah chuan hlim tak angin ka lang tho; mahse, ka nu erawh chuan min lo chîk deuh a niang, min zâwt ta chat.

"Mambawih, chhuk i peih loh hmel hle mai, nge i nuamsam vak lo zâwk? Kârleh lamah pawh a chhuk theih tho alawm."

Ka nu chu ka nuih sak a," Ni lo ve, nu. Kan awm rei pawhin chhuk tho a ngai alawm, chhuk hma kha a țha zâwk, in bula awm rei chuan chhuk a peihawm loh leh sauh zâwk ang," ka ti a.

Ka pa pawh chuan," Awm rih ula chu kan duh a; mahse, in chhuk tho a ngai dâwn a, bâkah Nunoi class țan  a ngai leh tawh bawk si a, class kal loh ringawt lah chu a tihchi miah si loh," a lo ti ve chuar chuar a.

Phûr lo zet chuan ka hnathawhna school chu ka pan hnak hnak a, Tea nèn kan ințhen ațang hian phûr sârha thil tih ka nei tawh lo. Ka ti hrâm hrâm a ni ber, ka chhûngte ka ngaihtuah chhuak a, chu chuan chakna min pe ber. Anni vàng hian ka duh berin min ţhen a, chuvàngin bialpa nei tawh lo hian ka châwm ang a, Nunoi'n college a chhuah hnu lamah ka la hmu ve ngai a nih chuan bialpa ka nei ve chauh tawh zâwk ang. Ka chhûngte ka dah pawimawh hmasa ta sa sa, a tàwp thleng rakin ka dah pawimawh ang.

Ka birthday-ah pawh gift ka dawng ta lo, min lawmsaktu pawh ka nei lo, Nunoi leh ka nu hnên ațangin duhsakna thu ka dawng a, ka nu chuan min rawn phone ve thlap asin, ka birthday apiangin hmun hrana ka awm chuan min phone ziah. Thu țha tak tak a sawi hnuah lawmpuina thu a sawi chauh țhìn.

Zànriah hmeh atân Nunoi'n ka chawhmeh duhzáwng tak Baibîng rêp buh nèna bai min siamsak a, ka puar khawp mai. Ani hian thil awmzia min záwt hauh lo nain zàna Tea a rawn lèn ngai tawh loh vàngin kan inkâr a hre thiam ve niin ka hria, a fel reuh tawh asin.

Zànah erawh ka muhìl har khawp mai. Phone-ah Tea number chu ka hmet chhuak țhìn a, a online reng si a; mahse, a message ka dawng hauh si lo. Bâkah, birthday wish pawh ka dawng lo a nih kha, ka rilru a na thar leh vawng vawng a.

A number chu block ka duh deuh thut thut a; mahse, ho ka ti leh thut. Kan ni tawh lo va, a duh duh a be thei alawm. Keia block hian amahah awmzia a nei tawp nâng, inneih a duh tawh laiin keiin nei thei ka la inti si lo va, a chunga thinrim viau tùr pawh hi ka ni lo hrim hrim. Khati chen dawhthei tak leh duh takin kan lo inzui tawh a, a chungah hian lâwm viau tùr zâwk ka niin ka hria, thil tam tak a hnên ațang hian ka zir chhuak ve tho asin.

Nunoi pawh a pass țha viau e, ka lâwm lutuk. A chhan chu Tea nèn kan ințhen chhanah khân ani pawh hi a tel ve tlat si a, țha takin pass se, zir chhuak se, hna țha tak nei tùrin ka duh.

Tea pawh vawi thum lai ka hmu tawh. Amah maiin a ni ngai lo, vawi khat phei chu a țhianpa Țawng-duh-lova nèn khân an ni a, min rawn hmu ve ang tih ka hlau lutuk a, ka hnaih ber dàwrah ka lût ringawt, hahthlâk hian a. Min hmu ang tih hlauin ka thin lah chu a phu nasa, a va ho tak!

Mahse, a ho miah lo! Hetianga min awmtîr theitu hi amah chauh hi a ni si, eng vàng nge a hmuh chu ka hlauh em em ni, a chungah ka inthiam lo em ni? Nge thil tisualtu ang maia hmuh ka hreh êm êm? Ka țhen hmasak pawh a ni lo va tiin ka inngaihtuah a, ka âwm chu ka dawm vawng vawng a.

*******

Tunah hi chuan ka zia ve tawh lutuk. Hun hian rilru hrehawmna leh natna pawh hi a lo her liampui ve zêl a lo ni, ka tân Pathianin Tea kha a lo ruat lo a ni ang, ruat ni se chuan kan ințhen tawp lo ang, ka chunga thleng apiang hi a ruatah pawm thiam ila a lo nuam ber mai.

"Melo?"

Ka phu zawk! Ka inher vat a, Țawng-duh-lova kha niin! Min be ve tlat nia!

Makti zeta enin," Min ko em ni?" ka ti há a, mak ka ti lo thei lo a ni.

"Ka inah i thil tùr a awm," a ti leh dût.

Eng thil nge ni ang? Thil ka theihnghilh lo chiang a, a ina ka thil tùr a awmna chhan tùr ka ngaihtuah a, ka hre lo kher mai.

"I hre sual a niang? Eng mah ka theihnghilh lo," ka ti a.

Min en rùn chung chuan," Engtikah nge i lo lam dâwn?" a ti leh sup a.

"A, ka va hre mai lo ve, eng thil nge ni a?" ka ti leh a.

"I lo lam hunah i hre mai ang."

A țawng ve duah mai chu mak ka ti a ni, a inhmeh lo ka ti a, chutiangin thu tam a lo pai ve tih hriat phei chu, a mak a ni ringawt!

"Min zui rawh."

Leh ringawt hian. Ka hman vak hlei nem, haw hma ka duh ve asin. Nunoi a lo haw har dâwn a, vawiin chu ka haw hma ve nî a nia, ina awm deng deng ka duh.

"Ngawi lawk-"

Koh din hman pawh a ni lo, rickshaw-ah a lo țhu fel dèr tawh!

*HMANGAIHNA HIAN A TINA NGAI LO CHE, MI TU EMAW, HMANGAIH DÀN CHE HRE LOVIN A NI TINA ȚHIN CHE NI*

☆A MAK!☆ - 2  By Dingdi Pachuau

Rickshaw-ah chuan ka țhu lût ve ta ringawt. Eng thil tak ni ang maw? Khawi ațanga ka dawn ve ni ang? Tu min pêk nge? Ani ina lo awm daih, a mak e!

Tea birthday gift min pêk a ni thei ang em? Kan ințhen hnua gift min pêk chu ka ring ngam meuh si lo, chutah amah zâwkin ințhen a la rawt zui.

A ni thei lo ang.

Kan tlàn chhûng chuan kan țawng lo, min be lo va, ka be hek lo. A ina ka thil tùr lo awm daih chu ka ngaihtuah lo thei lo, a mak ka ti êm a ni.

A in luah chu kan thleng thuai a, fare a pe a, min melh tawh lo chuan step-ah chuan a chho ta nghâl a. Thaw huai pah chuan kei pawh chuan muangchângin ka zui chho ve ta nghâl a, a kal chak êm êm zui, a mawng phê pawh ka hmu hman tawh lo.

Ka țhutna țhinah chuan ka țhu leh chat a, khua țha mah se a la vawt ve angreng a; mahse, step-a ka chhohna vàng chuan ka thisen erawh a lum ve tho.

Room ațanga rawn chhuakin parcel lian vak lo hi a rawn keng chhuak a, a pâwn lam chu a intuam mawi ve thlap.

Min rawn pein," Coffee in lawk ang," a ti leh sup a, kei lah chuan làwmthu sawi pawh ka tum lo, chu thil chu tu min pêk nge, khawi ațanga ka dawn nge ni ang tih mawlh ka lo ngaihtuah thung.

A hnu deuhah chuan ka insûm thei thlâwt lo," Khawi ațanga ka dawn nge?" tiin ka zâwt ta nge nge a.

"En mai la."

Ka let kual a, thil inziak hmuh tùr pakhat mah a awm lo. Ka va en phei a, min lo en kur zui, ka hawi sawn daih. A hmu châk ve a ni maithei a ni; mahse, a hmuh laiin ka hawng àwm lo êm mai. Ka tâ tùr a ni a, a lo kawl a ni ve mai. Ka haw hunah, in ka thlen hnuah chauh ka hawng ang.

"Ka lâwm e," tiin ka ding hluai a, ding hluai tih lêmah ka sâng fahran si lo va, ka ding thut a ni zâwk mah.

"Thu rawh, Coffee hi," tiin no a ban a, a siam ta nghâl a.

A siam tui kher mai, tui ka ti lutuk!

"A tui lutuk!"

Min en rùn chung chuan a kiai ve suk nia!! Tunah khân a nui!! A nui ka hmu!!

In ka thlen hnuah chuan ka thil hawn chu ka hawng ta a, birthday gift chu a lo ni tak tak!

Note te tak tê hi a lo awm tel bawk a.

*Tlai deuh tawh mah se birthday gift inpêk nân chuan tlai lua a awm chuang lo ve* tih hi a lo ni a.

Hming inziak a awm lo va; mahse, Tea bâk a ni thei lo, ka birthday chu a lo la hre reng tho a nih hi, min pêk loh chu nuam lo a ti ve a ni ngei ang.

Ka thil dawn chu ka duh tawp, kawrlum phiar, puan deh nuam leh hâk nuam zet mai hi a ni a, ka inhmeh viau bawkin ka hria.

Pen 'cial' zet hi a awm tel bawk, zirtîrtu nih chuan pen neih țhat hi a ngai ve êm asin, a ngaihtuah chhuak țha ka ti lutuk.

Làwmthu hrilhin ka va text dâwn em ni ang ka ti a, ka inkhâp ka inkhâp a; mahse, a tàwpah chuan text loh țha ka ti ta zâwk. Va text hmasak dû dû chu hmeichhe tân hlauh phei chuan a mawi lo, ka chapona rilru a lo tho ve rih tlat.

Nunoi a lo haw chuan eirawng ka lo bâwl zo diam tawh a, ka pheikhai zãng tak chu a hriat thiam loh hrâm ka beisei. Ka rilru a hlim a, Tea ka va beisei leh ta tih lam ni lovin birthday gift min pe leh hrim hrim chu ka lâwm a ni, a tân chuan eng mah ni tawh lo mah ila min theihnghilh ţhak bîk lo tih hriat chu a nuam ve tlat tho. Ka hlimna ve mai mai hohzia chu...

"U, vawiinah U Michael-a ka hmu a, i chanchin min zâwt a."

Za vak lo hian ka nui ringawt.

"A la beisei reng tho che niin ka hria."

"Sawi lo teh, bialnu a neih reng kha. A chhe lo êm êm zui," ka lo ti a.

"A hmeichhia khân a zar ve êm alawm, a duh hlum lo chauh a nih kha. Kan khuaah pawh a rawn kalchilh rap rap ngam kha a nia," ei loh hmel zet hian ner nâng chung hian a ti a.

Michael-a hi kan khuaa mi tho a ni a; mahse, Lalvêngah daih an awm. An unau mipa hlîr an ni nain an taima hlawm a, an in chhûng pawh nula awm lohna tih a hriat miah loh. A fai êm êm a, an che fel tih a hriat ngawih ngawih.

Hman ațang tawhin min beisei tih ka hria, a zêp bîk lo; mahse, khâng hun lai kha chuan ka la mâwl a, ka zah tlat zêl a nih kha. Min biak pawhin ka chhâng țha ngam ngai lo, ka hmuh dâwn pawhin ka pêng sawn daih ziah. Vawi hnih khat chu khawhar inah kan țhu dùn ve, ka zak a, ka en ngam mang lo. Zai pawh ka zai ri ngam lo a nih kha, ka la tleirawl ve êm bawk a ni. Kan khuaa ka awm ngai loh hnuah erawh hmuh ngaihna a awm ta lo va, Tea khân min hêl ve ta tlat bawk si nèn, ani kha chu kan inhmu ngun bawk a, ka chhâng ta nge nge a nih kha.

Mahse, heti mai hi kan ni leh ta si.

"U Tea nèn hian in ni tawh chuang si lo va, U Michael-a chu nihpui daih la?" a ti leh a.

"Ni lo ve, Nuno. Bialpa neih tawh rih loh hi ka duh tawh zâwk, tihian awm mai mai ila, nang pawhin lehkha țha taka zirin hlawhtlin ngei i tum ang a, chu chu ka duh ber a ni. Mipa chu nakin lamah le," ka ti a.

"A nih, engati nge in ințhen a?"

Ka chhâng lawk lo. Min țhen chhan kha chu hrilh chi a ni nâng, ka chhûngte hian an hriat ka duh lo, tuma hriat ka duh lo.

A hnu deuhah chuan," Ka tâna ruat a ni lo a niang," ka ti ta ringawt.

Min en reng tih ka hria; mahse, ka en ve duh lo. Ka mitmenga natna chu a hmu thiam ang tih ka hlau.

"U, lungngai miah suh, Pathianin țha tâwk a pe mai ang che, U Michael-ate pawh an ințhen leh thut thei ve tho a nia, an ințhen thut chuan kan bawh nghâl chat dâwn nia," a ti sârh sârh a.

Ka nuih a tiza reuh lutuk a, ka nui hawk hawk.

"U Michael-a pawh chu i va duh àwm ve a? Eng nge a țhat viauna?" tiin nui chung hian ka zâwt a.

"A fel êm alawm, kan khaw tlangvâlah chuan a fel ber ang, a hmel pawh a chhe lo, chutah, a sam a la kir zui a nia," a tih phei chuan ka nui nasa lutuk.

Ka nui nasa lutuk a, ka pum a na vekin ka hria.

Nunoi hi chuan sam kir hi a duh tlat a, mawi a tiin sexy a ti tlat zêl. Kei chuan mipaah kher chuan mawi ka ti hran lo, sam a dum viau phei chuan mawi ka ti lo zual.

"Ngawi tak rawh, a bialnu nèn an ințhen hlauh chuan ka tihpui ang che," ka ti a, kan nui dùn vak vak a.

Khua a la vawh avàngin gift ka dawn chu school-ah ka ha a, ka thawhpui hmeichhiate chuan an lo hre thei khawp mai.

"Kawr thar a ni maw? A va mawi êm êm!! I inhmeh lutuk!" an lo ti sap sap a, a rûk chuan nuam ka ti. Ka inhmeh ve viauin ka inhre bawk a, ka confi ve viau bawk.

Sir Paul-a chuan," A ho êm mai, vacancy pawh awm tawh mang hlei lo," a lo ti nuah nuah a.

"Awm maithei asin."

"Awm loh kha, a intitatu thei ropui si che a," a ti leh a, a țawngkam chu a inhmeh lutuk a, amah a lo pà hrêk hrâwk lo bawk nèn, kan nui dar dar a.

Inrinniah ka bazár a, kan unau ei hi chu a tam lo ve hrim hrim a, ka nuin min rawn thawn țhin mah se tunlai hi chuan chawhmeh a vâng tawh a, min rawn thawn thei tawh mang lo. Chuvàngin, ka bazâr ve zauh zauh tawh.

"I inlei zo tawh em?"

Țawng-duh-lova bawk.

Mahse, tunah chuan a țawng duh ve ta deuh, Țawng-duh-ve-deuh-tawha a ni tawh zâwk.

"Zo a ni mai, i bazâr ve elo?!" Mak ka ti alawm, helaiah hian hmuh ka inring bawk hek lo.

"Aw."

Polythene hringah hian vawksa niàwm tak hi a khâi ve leu leu a, chumi tê chu a lei a niang, thlai hring lam chu a tel lo ve chiang khawp mai, a ngaina lo a niang.

"Thlai hnah lam i lei dâwn nange?"

A lu a thing zauh ringawt.

"I lei zo tawh maw?" Hei chu Tea a ni ve thung. A țhianpa vawksa lei chu a lo nghâk a ni ngei ang.

Tea chu hmuh ka duh lo asin; mahse, hmuh loh der theih pawh a ni tawh lo, kan inhmu chiang tawh lutuk a.

Biak dàn tùr ka hre lo lutuk a," I dam maw?" ka ti ringawt, ka inthiam lo nghâl zat. Ka rilrua rawn lang hmasa ber ka sawi tawp a nia, ka thin a rawn phu nasa a, ka chhûngrilah ka khùr dar dar țan bawk.

Chhe hiau! Min hriat chhuah loh hrâm ka beisei.

"Dam e, i inlei zo tawh em?"

"Aw..," ka ti ban chat a.

"Ka lo thlah haw ang che."

"Aih, a ngai lo, a ngai miah lo," ka ti sawk sawk a, chutah," Ka kal nghâl mai ang, a nih u," tiin ka kal nghâk dàwr dàwr a.

"Mâwl lutuk, mâwl lutuk!!" tiin ka ke pên tin mil chuan ka inhau mawlh mawlh a, kei hi, kha paah khân beisei ka la nei reng em ni le? Chi loh lutuk. 'Beiseina neih loh tùr, min tinatu mai a ni, eng mah beisei neih loh tùr' tiin ka inzilh mawlh mawlh a.

Min nuihzat viau ang chu, ka awm dànte kha, Tea pawh khân a man thiam ngawt ang chu, a va zahthlâk tak! Ka lu ka thing nar nar a.

Bialnu a nei bîk rih lo em ni le? Kan ințhen chhan, ni lo, ințhen a rawt chhan, min țhen chhan kha nupui neih a duh tawh vàng kha a ni sia, tunah lah hian nupui neih tum hmel a pu mang bawk si lo. Kei ni lo, mi dang a nei bík lo a niang.

Nge a lo nei tawh reng zâwk?

*******

Zan khat chu Teate chu an rawn lang tlat a nih chu. Kei lah chu naupang test paper check-in ka lo inzam hnawk êm êm zui, fuh lo tak a ni.

Nula che țawp tak ka nih duh hmel tlat.

Ka awm dàn chu a lài hú mai. Ka bialpa țhìn kha a nia, tunah chuan a ni tawh si lo. Lo chhawn dàn tùr pawh ka hre lo, min tibuai zo vek.

Min beiseia lo lêng a ni ang em?

Mâwli leh! Mâwl muk lutuk lo teh.

Ka indah fel hnuah chuan thingpui ka lumsak a, Nunoi lah chuan room lamah lehkha a zir daih si a, keimah chauh ka ni.

Biak loh theih an ni si lo va, chhûngril lama țang țùngin ka titi ve, a nuam fahran lo.

Gift chungchâng kha ka sawi chhuak duh ang em aw? Làwmthu sawi pawh ka duh a; mahse, a dik chiah ang em?

"Thlaleh ni 15 khian nupui ka nei dâwn a."

Ka khawng awtin ka hria!

Nupui min neihsan a lo tum vàng hi a ni maw gift pawh kha min lo pêk? Nupui a neih tawh chuan gift min pe thei tawh dâwn lo, a tàwp nân a ti a ni ngei ang.

Ka muhìl lo chiang kher mai, khumah chuan ka awm; mahse, ka țhu reng, ka meng kar a, muthilh ka tum lo law law.

Kan titina kha ka ngaihtuah lêt a.

"Nang chuan i chhûngte i dah pawimawh hmasa miau si a(Nunoi'n a lo hriat ka hlau lutuk a, ka lo îp zawr zawr) chuvàngin, min dem thei bîk lo ang. Tihian, țhian angin in en ila, țhian anga ka en vàng chein a nia kan inneih tùr thu pawh ka rawn hrilh che ni. I lo kal ve ang chu tiraw? Holiday a ni tho bawk a, min lawmpui tùr talin i rawn kal ve a niang chu tiraw?"

Ka mittui chu a tla zawih zawih, ka thinlung hi a na tak zet a ni. Beiseina 'tlêm' ka neih kha(ka nei lo ka ti thei lo, nei lo angah pawh inngai mah ila gift ka dawn ațang khân 'tlêm' ka nei tlat alaw) tunah chuan a thâm ral zo vek ta, ka keh chhe zual ni berin ka hria.

Heti tak hian a nupui neih tùr chu ka lo tuar a ni si a; mahse, a phû alawm. Ka mittui hi a phû e, khati chen kan lo inzui tawh a, kan ințhen thut a, nupui mun neihsan dâwn bawk.

A na êm a ni.

Kaltîr hi ka phal lo asin.

Mahse, ka tâ a ni tawh si lo, ka tâ ni lo chu ka ui bet thei lo.

Mahse, 'mangțha' tih sawi chu a va har dâwn êm!

*BEISEINA NEI MIAH LO TÙR KA NI A, AWMZE NEI LO BEISEINA KA INSIAMSAK HI KA THIAM LOH EM NI? NGE BEISEINA NEI TÙRIN BEISEI THEIH TÙRIN A AWM ZÂWK?*

☆A MAK!☆ - 3 By Dingdi Pachuau

Ka vànneih asiamin ka ti dâwn nge,  inneih ni hma ni thum ațangin ka damlo ta tlat mai, class pawh ka kal peih lo, inah ka mu reng ringawt. Inneih ni hma chiah(Valentine's day-ah) ka inentîr, luck loh theih khawp mai. Valentine's day pawh ka tân chuan awmze nei lo nî a ni ta. Ka natna an lo hre lo zui, kei chuan ka hre kar. Damdawi ei tùr chi hnih min chawh ringawt a, ka dam thei lo a nih chuan kal țha leh tùrin min ti. Ho ka ti a nia aw, ka natna ang hi chu khatiang damdawi mûma tihdam mai mai theih a ni lo tih kha doctor khân a hre miah si lo.

Mahse, ka zia chho ve hret hret, kâr khat chhûng chu a awh ve a nih chu. Dam pawh ni ila inneihnaah chuan kal ka tum lo hrim hrim, mak min lo ti lutuk zâwk dawn asin. Lawmpuina thilpêk erawh ka thawn ve tho, thilpêk ka pêk tàwpna a ni tawh àwm si a.

Ka nun hman chhoh dàn chu ho riaua hriatna ka nei ta tlat a nih chu. Khawvêlah kan lo piang a, nawmsak duhin hna kan thawk a, ngaihzawng kan nei a, kan duh ve êm êm a, kalsan emaw phatsan emaw kan nihin nâ kan ti a, rilru lamah hna thawkin kan hlim thei lo va, min kalsantu ngaiin hrehawm ti takin hun kan hmang chu a ni si a. Ngaihtuah chian cheuh cheuh chuan ho ka ti a; mahse, thinlung chhûngrilah hian a ho lo tlat si a ni.

Mahse, Pathian min ruatsak a ni lo a ni tiin ka inhnèm a, min ruatsak ni se chuan ka dinhmun kha min hriat thiampui chu ka ring. Min hmangaih tak taktu chuan ka chhûngte tâna ka pawimawhzia leh kalsan thei ka la nih lohzia kha a hriat chian ngei ka ring tlat a ni. Kei mai ni lovin ka chhûngte dinhmun hria leh min hmangaih tak taktu Pathianin min la pe ve ngei ang chu, chutih hunah chuan kei pawh ka inpeih ve thei tawh ang a, ka chhûngte ngaihtuah ngai miah lovin lungmuang takin ka kalsan ve thei tawh ang.

Chu hun chu engtikah tak thleng ang maw?

Ka indem leh rih bawk a, mite pawh inpeih lo chungin an innei ve tho a, mihring dam na na na chuan harsatnain kiansan chin a lo nei a, chutiang chuan mi pawh an lo khawsa ve fo tih ka ngaihtuah phei chuan ka tidik lo niin ka inhre hial. A chhan chu tunah hian nâ ti zâwk leh a tuartu chu keimah ka ni si a. Ani chuan hlim takin nupui a nei tawh a, min hrechang lovin hmalam panin a kal mêk a ni.

Ka inngaihtuah harh chhuak thut.

Engah nge hmalam chu ka pan ve mai loh ang? Engin nge min dâl? Ani pawhin hmalam a pan theih laiin kei hian ka pan thei lo bîk ang maw? Nunhlui ngai leh inchhîrin ka bawksawp reng bîk dâwn em ni?

Ni lul lo mai.

Hmalam ka pan ang, ka tân ni lovin ka chhûngte tán.

*******

Tu ber sawi nge ka hre ta lo, Tea nupui chu a lo rai sa a lo ni a, chutah, thla hnih thum tih vêl lek pawh a lo ni tawh lo, thla ruk vêl lai a lo ni tawh!

He pa hian kan nih lai reng khân min lo bum a lo nih chu! Min lo kawp reng a, kei lah chuan ka lo hre miah si lo. Kumin Krismas hmaa inneihpui atâna min sàwm lai khân ka lo inpeih ang tih ka hlau ta. A chhan chu ka pasal chuan mi dang lakah fa a lo siam daih tawh reng àwm si a, kan inneih hnuah ka hre chhuak ngei ang a, ka zak dâwn lutuk. Ka zak ang a, ka chhúngte an zak ang a, hremhmun tenau ka lo temlâwk a ni dâwn asin.

Ka tisual lo ve.

Chhan leh vàng awm lovin thil rêng rêng hi a lo thleng lo an tih kha, hei pawh hi a ni ngei ang. Ka ngaihtuah ka ngaihtuah hian ka chhûngte ka lo dah pawimawh hmasa kha ka inchhîr lo ta telh telh mai.

Hmalam pan tumin țan ka la nasa ve bawk a, mahni chauha awma inngaihtuah kual vak vak ka duh loh avàngin school-ah pawh ka theih chinah chuan ka țawng nasa.Kan thawhpui Mala, Kulikàwn, Aizawla mi nèn hian kan inhnial fiam țhin a, Aizawl mi tih takah Chhim lam nèn tlêma kan țawng hman inang lo lai chu a rawn sawi chhuak țhìn a, College ka kal lai ațanga class-a  sawisak rawn ka nih țhin vàngin ka phûr thei khawp mai.

Tengtere sweet ka ei hrât viau a, chumi hmang chuan min chhaih țhìn.

"Țengțere i ti țhìn lo maw?"

Țhian dangte hi an lo nui nasa thei viau mai a, kan titi laia Mala a rawn țawng ve tawh hi chuan ka bitum tùrah an ngai hmiah.

"I tih dàn a nih chu," ner nâng chung hian ka ti phawt a, chutah," Keini chuan Tengtere kan ti țhìn," ka ti leh a.

"Isua pawh Țhuama in tih țhin kha."

Mi dang chu an lo nui hak a, melh kualin," Zâwt ta che, Isua ni na na na Țhuama kan ti ngai lo, i ti țhìn zâwk a nih chiah kha. Isua ti ve mai la, 'Țhuama' han tih tlat chu," ka ti a, ka nui vak vak a.

Chutah," Vawktê pawh hi Vawkțe i ti lo maw?" ka ti ve ta thung a, țhiante an lo țê nasa lutuk a, mittui tla phungin kan nuih tâk kha.

Mipa na na na chuan min hnial hneh lo țhìn a, bâkah, a bulah hi chuan ka țawng thei viau bawk. 'Țawng thei sa bawp chang rawh' min ti ni deuh hian ka hre țhìn, a tûk lamah erawh a ngai tê bawkin kan inhnial leh țhìn.

Zan khat chu message ka dawng nawlh.

*Engtin nge Chhim lam hian kezungpui hi in sawi țhin kha?*

Lalmala mai mai chuh! A number ka neih loh ațang ngei maiin min rawn bàwl a tum chiang, ka nui sak a.

*Kezungpui kan ti, engtin nge in tih ve zâwk a, Țhuama?* tiin ka reply zat a.

A nuih a za ngawt ang chu!

*Kezungțang Kepțen (captain) in ti țhìn lo maw?* tiin min rawn chhâng.

Ka chhiar zo chiah chu ka nui chhuak hawk hawk. Ka tân chuan damdawi țha tak a ni, hetiang zâwng hian kan inhnial lo ang tih ka hlau zâwk ta hial.

"Mi â ang mai!" Nunoi chuan a lo ti hû a.

"Kezungțang kepțen," ka ti a, ka nui ta vak vak a. Ka sawi nawn leh a, ka làwm lutuk ringawt!

Ka type leh vat vat a.

*Nghâwng hi lu ban in ti tiraw?* tiin, min fiamna țhin a ni zâwk reng si a, ka ti hmasa ta zâwk a ni.

Message tone a ri dat.

*Nghâwng/ring a ni mai, kekawr pawh tlawhtlang in tih kha* a rawn ti leh.

Ka nuih a za thei chiang. Tlawhtlang leh kezungpui kepțen chu ka làwm fâl ta ber a nih chu.

*Tlengtlê pawh hi țângțial in tih dâwn chu😃😃😃* tih ka thawn a, keimahin ka nui vur vur reng mai.

School-ah ka chhuahchhàl a.

"I number pakhat ațangin mi rawn bàwl i tum vêl a, ka hre tho che," ka ti nghâl a.

"Eng maw!?" a ti hû a, a hre thiam lo der vêl a, ka hre thiam reng sia.

"Kezungpui leh kekawr chungchâng kha, ka nui nasa lutuk!" ka ti leh a.

"Tuna ka number hman lai bâk hi ka nei lo."

Min bum chu a la tum ve fan. Ngawi tak rawh se, ka va tibuai ve khawp ang, ka number dang ațangin ka call chhin ang a, ka bâwl kual ang. Ka thil ngaihtuah chhuah avàng chuan ka nui var var a.

Hun âwl ka neih veleh zànah ka number hran ațang chuan ka va call ta a.

A phone chu a pick-up duh lawk lo roh lehnghâl a, min chhàn hun chu a châk lo ngawt ang chu.

 A hnu deuhah chuan min rawn chhâng ta, a aw chuh, tho hlim ni àwm tak a ni.

"Hello?"

"I mu a ni maw? Tlai lam hun i zo lo em ni a?"  tiin ka nui har har a. Tlai lamah a lem ve zeuh zeuh tih ka hre ve tho, a chhan chu Paul-a nèn an titi ka hre ru kar miau a. Ka aw chu ka thiam ang tâwkin ka tidanglam ve, hmeichhia tu emaw, amah ngaizâwngtu angin ka insawi dâwn a ni.

"Chutiang a awm lo."

A mu tho aw chu a pe chhe ve hle mai.

"Hmuh i va khât ve! Hmuh che ka inring ve țhìn a nia, ka star thei bawn tawp che." A rûk chuan ka nui vur vur, a riin ka nui ngam nâng, min man chhuak palh hlauh ang.

"Min hre sual a niang?"

Ka nui leh har har a," Hre sual nâng, i hnathawh nèn lam ka sawi dâwn em ni? I khuavàng awmna pawh," tiin intihre chiang zet hian a hnâr bula khuavàng dum lian lutuk lo chu ka mitthla rauh rauh a.

"Ka hre ve lo che."

"Min hre lo der vêl a. Ka rilru a nâ, bazâr vênga i rawn lèn ngun tehlul nèn, ka hmu ziah che," ka ti leh a, bazâr vêngah bialnu a nei tih ka hre ve kar tlat.

"Min hre sual a nih chu," a ti nghut.

Ka nui var var a," Min theihnghilh hma hle mai, bazâr vênga i lo lèn leh hunah ka lo ko vak tawh ang che, i induh thei ropui siah. Kei lahin mit tla dâwnin ka lo thlîr ziah che a, min chhâng ve tal la, i lo hawi ang tih tal min hrilh rawh?" ka ti a, ka sawi zo chiah chu ka hmui chu ka hup a, nui chhuak lo tùrin ka insûm nasa ngat ngat hle mai.

A ngawih vang vang hnuah chuan,"Tu nge i nih?" a rawn ti ta.

Ka phone chu ka hmet hlum ta hmak. Ka biak rei chuan min hre chhuak ang tih ka hlau, ka nuih dàn ka tidanglam thiam vak si lo.

Ka nui kar kar a, a rilru chu a buai ve viau maithei a ni, dik tak chuan mi bum hi ka thiam vak lo va, phone-ah ni lo phei se chuan ka thei miah lo ang.

March thla a lo thleng a, khua a lum chho leh țan ta. Nipui hun hi ka huphurh ber hun a ni a, khawlum lutuk hian min tibuai țhìn a ni, thlan lah hi mi ai hian ka ngah bîk a niang tih tùr khawpin a tla dup dup ziah, inchei ka huphurh viau țhìn rêng a ni.

Chau zet hian ka haw hnang hnang a, kea kal tam hi ka duh țhìn, a chhan chu exer lâk hranpa ngai lovin ni tin deuhthaw exer la angah ka inngai mai. Chêr lam ka ni ngai si lo va, tlêma in-fit deuh hi ka mamawh a ni. Hrisèlna atân pawh a țha a, thlan a chhuah tam hian ka vun pawhin a mawi phah ve deuhin ka hria.

Țawng-duh-ve-deuh-tawha chu min tâwk zâwng takin a rawn tlân, tracksuit maroon rawnga inthuamin inthazo tih hriat tak hian a rawn tlân zêl. He pa hi a lo tlân ve țhìn a ni maw? Hna thawk tawp, eia ina mu leh tawp a nih duh hmel tehlul nèn, mak ka ti ru khawp mai.

Min rawn hmu ve nghâl, a tlân muang ta nghâl bawk.

Ka bul a rawn thlen chuan kei lehpek chuan,"I tlân ve țhin elo?" ka lo ti vat a, inhmeh lo ka ti tlat alawm.

"I number mi dang i hmantîr em?"

Teh daih chuan!

"Ka number ni na na na, mi dangin an hman daih thu va awm suh," ka ti vat a, chutiang min zâwt chu ka hre thiam lo lek lek.

"A nih, i phone mi dangin an hmang em?"

"Hmang lo, eng thil nge ni a?"

"Nangmah i ni maw?"

Leh ringawt mai a!

"Eng chu?" A sawi awmzia chu ka hre thiam lo telh telh.

"I tlawhtlang chu i inhmeh hle mai," ka beng bul chêtah chuan a rawn ti sup a, chutah, dâk vah hian," Bazâr vêngah ka lêng ngai lo bawk," a ti leh nghut a, a tlân țan leh ta nghâl bawk a.

Ka hre thiam lo lutuk a, inher meuhin ka en zui a, ani lah chu rawn hawi lêt map lo hian ka en zui tih a hria a ni chiang, a kut dinglam zungțang pahnih chu chunglamah tipirin a tlân chak ta sauh a.

Tlawhtlang kha engtin nge a lo hriat ve ni? Chutah, bazâr vêngah a lèn ngai loh thu a sawi ringawt bawk a.

Ka va hre thiam lo tak!!!

Kawng tluanin ka ngaihtuah a, in ka luh dâwnah erawh ka ding chawt! Ka hmui ka hup a, ka au chhuak vak țhelh a ni.

Mala number thar emaw ka tih kha he pa number hi maw lo ni a!! Ka kut ka hûm ruh vak vak ringawt.

A va zahthlâk tak! Ani lah chuan min lo hre reng si, țhutthlêngah pawh ka țhu thei lo, ka vei kual sek.

Ka zak ngawih ngawih.

"Awii! Awii! Zahthlâk lutuk!! Ka zak êm mai," ka ti chhuak nawk nawk. Awmzia lah chu a nei tlêm khawp mai.

Mala ka chhuahchhàl kha a ni a, a lo hre thiam lo viau pawh kha thil àwm tak a lo ni, amah a lo ni hauh si lo. Engtin nge he pa hian ka number a lo neih ni?!!

Ka thaw leh huai ringawt țhìn, awmzia a awm dèr si lo.

"Awmzia a awm tawh lo, ho êm mai," ka ti leh ringawt thùl, ka thinlunga ka zahna a kiam chuang hauh lo.

"A, engah vak a ngai bîk lo ang, mi dangah ka ngai tih a ring tho ang," ka ti leh ringawt.

Zànah phone call ka dawng. Kha number, Mala number thar emaw ka tih ațang ngei khân a ni!

"Melo, Țhuama ka ni lo a nia," a rawn ti dût phawt.

Ka țhen sak sak a, ka hmel min hmutu awm se chuan mak min ti ngawt ang!

"Ka khuavàng awmna hmun khat tal chu han sawi la?"

Au vak ka va châk tak!

Ka rûm nghat, ka insehruh nghâl char char.

*MI THINLUNG I TIHNAT/HLIAM HNU PAWHA A HMA ANG CHIAHA PHÛR TAKA A LA BIAK RENG THEIH CHE CHUAN A HMANGAIH HLE CHE TIHNA A NI*

☆A MAK!☆ - 4  By Dingdi Pachuau

Min hmu thei lo chu ka lâwm hle a ni.

"Țawng ta che."

Sawi tùr pawh ka nei lo, ka hre țeuh nain tunah hi chuan a tihchi loh, sawi loh a țha zâwk.

"Nangmah i ni tih ka hre miah lo a," ka ti ve ta zâwk. A awih leh awih loh phei chu ka hre lo, hrilh ve hrim hrim kha ka duh a ni mai.

"Tu emaw, Țhuama maw?" tiin a nui hawk.

He pa hi a nui leh tawh a nia!

"Aih...E, nang pawh hi Aizawl lam mi i ni tak! Isua hi Țhuama i ti ve țhìn em?" ka ti a.

"Ti lo."

Ka ngawi leh phawt a, chutah," A nih, țingțang hi?" ka tih chuan a thaw hawk a.

"Tunah chuan Lungleiah ka awm," a ti ta daih a!

He pa ngeiawm thiamzia hi aw...

"Ka hre ve bawk," tiin ka phun sap a, a hriat phei chu ka ring lo.

"I hriat chuan a țha."

A lo hre pek a nih chu! Bengvâr leh lutuk mai!

"Țhuama ka ni lo va, Lungleiah chuan Lunglei mite angin ka awm bawk. Kâwlthei pawh kawiâm ka ti," a ti leh boh a.

"I va fel!"

"'Rome-ah chuan Rome-mi angin awm ve mai tùr' an ti em kha?"

"Ti mah se nang chu i awm loh kha. Thil pawh min rawn zawh chiam kha aw," ka lo ti vat a, tifuh ka inti khawp mai.

"Ka hre duh a."

"A, i mi rawn zawh dàn kha hriat duh vàng a nih loh kha."

A thil rawn sawi ve chu ka hnial a ni deuh zêl mai, rei tak pawh kan inbe lo; mahse, kan inbiak zawh hnuah erawh ka veng deuh hawk. A chhan chu kan inhre chhuak ta a, zia ka ti lutuk. Hmaichhanah erawh ka hmu huphurh deuh tho, min man chhuak chiang hle si a.

Ka nu leh ka pa Lungleiah an rawn kal ve a, ka pa entîr an tum a ni àwm e. Ka naute chu sikul kal a ngaih vàngin an rawn kalsan a, zàn riah an ngaih dâwn vangin ka nuteite ina riak phei mai tùrin an ti bawk.

School chawlh ka tum deuh nain ka nuin a phal lo va, lo buaipui ka duh a nia; mahse, special-a an inentîr dâwn avàngin ka buaipui hman thei thoin ka ring.

School bàn hma deuhin ka nuin min rawn phone a, buaipui an ngaih loh tùr thu leh in lama eirawng lo báwl zâwk tùrin min ti, a chhan chu Nunoi class kal hi a bâng har țhìn a, last a nei deuh ziah ni berin ka hria.

Bàn veleh muangchâng lovin ka haw thuai thuai, ka nute hi an rawn kal khât si a, kan chawhmeh neih tui tui siamsak ka duh a ni. Ka pa lo dam ţha lo nèn, ani phei chu ei tùr țha ei tam a ngai dâwn, damdawi an chawh leh țeuh emaw a ni ang a, a taksa a chak țhat a ngai.

Ka bàwl zawh meuh chuan a la hma viau. Nunoi erawh a class bâng ka nute inentîrna lamah a kal ve nghâl daih bawk, an rawn haw ve țêp tawh ang chu maw.

Kan in luahna neitu pitar a rawn kal ve khauh mai. A rawn lêng ve zauh zauh a, tunlai tak hi chuan a rawn lang khât deuh.

"Mami, in dam țha em? In reh lutuk a, in awm lo emaw ka ti hial asin," a rawn ti lau lau a.

"Aw, ka pi, kan dam țha e. Lo lêng rawh, nang pawh i reh khawp mai. I rawn lêng khât lutuk a, i rawn lèn manah, thingpui tui deuhin ka lo siam ang che," ka lo ti sawk sawk a.

"Ka lâwm e; mahse, a sen hâng kha ka duh ber zâwk." Thingpui ka siam dâwn chuan a sen hâng hi a lam ziah, a sen bâk hi a in ngai lo a nih ka ring.

"Ka nute an rawn zin a, zanin chu an riak dâwn a," ka ti sârh sârh a.

"Aw a ni maw? Eng nge an rawn tih dâwn?" A dîlchhût ve thei a nia.

"Ka pa a dam țha lo va, chu chu an rawn entîr a."

A khuh kharh kharh phawt a," A nih tak chu, a zia lo hle mai. I nu leh pa pawh chu hmuh an châkawm hle mai, an la upa vak lo ang a," a ti chuar chuar a, chutah," Haulawngah tiraw in awm kha?" a ti leh a.

A titi lar lar reng a, Haulawnga a hmel hriatte chu ka hriat leh hriat lohte min zâwt a, a lo lèn apiang hian min zâwt ve ziah. Min zâwt tawh tih a theihnghilh țhìn a nih ka ring, a tar ve tawh a, a àwm ve tho.

A haw hnu rei lo teah ka nute chu an rawn thleng a, ka pa chu ka hmuh tum ai chuan ka hmu thau, a chèr hman leh viau ka ring a nia; mahse, a dawldâng ve thung.

Damlo rawn inentîr e ti lo chuan kan ri laih laih, ka pa pawh a zia viau a, a țawng peih ve lutuk. Chaw ei hmain ka nu chu a intleuh zawk a, ka pa erawh tui sa ver vawrin kan hru thung.

Chaw pawh a ei ve țeuh mai, chutia a ei ve țeuh thei chu ka lâwm khawp mai. A pumpui lam leh bawk a nia, a tlangvàl laiin zu a in nasa ve a, chu chuan a nghawng chho zêl a ni.

Zanriah ei khamah chuan țhutthlènga a mu chu a chàwn leh bânte chu ka zùtsak a, țûl lo a ti nain ka duat khât si a, a dam loh lai tal leh heta an rawn kal ve chhunah chuan nuam thei ang bera awm tùrin ka duh.

Tihhlim ka duh vàngin fiamthu eng eng emaw ka sawi a, ka nuihpui vak vak a, ka pa pawh chu a țhen ve sak sak mai.

Kawngka a rawn rì a, Nunoi'n a lo chhâng vat a.

Tea ka hmu phut mai chuh, ka meng bial kâwk kâwkin ka ring! Eng nge lo tih a tum ni? Nupui a nei tawh sia, eng thil nge a hriat a zanin kher khera a lo kal ni?

Lo biak loh chu a tihchi bawk si lo.

"Lo țhu rawh," ka ti ban chat.

Ani pawh chuan mi dang lo awm chu a beisei vak bîk lo a niang, mak a ti ve a nih ka ring.

"Zanin chu nuam in ti hle mai."

"Ka nu leh pate an nih hi, tukin khân kan khua ațangin an rawn zin a," ka ti a.

"Aw a ni maw? I nu leh pate an nih vàng a nih chu in inang riau ka lo tih. In dam țha maw?" tiin a be luam a.

Ka nu chuan a lo chhâng a, ka pa erawh chu a țawng ve vak lo, titi ve vak tùr pawhin ka duh lo, mu thuai se hahdam takin awm se ka duh.

Ka nu lah chu țawng duh tih takah Tea nèn chuan an titi hlut mai a, kei chu ka lo inrawlh ve lo. Thingpui ka siam a, no ruak ka sil leh a, chu zawng chu.

Mi â a ni bîk lo va, a haw thuai.

A hàw hnuah ka nute chu ka khuma mu tùr chuan ka ti a, ka pa chuan," A ngai hlei nem, chhuatah hian phah ila, a nuam zâwk ang," a lo ti a.

"Ni lo ve, ka khum saw a zau ve tho a nia, in pahnihin in leng alawm. Kei chu țhutthlèngah hian ka mu tâwk chiah, țhalai tân chuan a nuam daih zâwk, bawk," ka lo ti a.

Ka nu chuan," A dik ang, zanina a inlêngpa lah chu keimahni vàngin a haw hma daih bawk si," a lo ti zauh a.

"Hmel hriat satliah a nih kha, nupui a nei daih tawh," ka lo ti thung a.

"Bawihi, chuti chu fîmkhur viau rawh aw, nupui nei tawh a nih chuan hmingchhiat a awl duh a nia; nang tê hi, mî pate hi i lo ngaizawng reuh ang ka ti," a tih chuan," A mak e, nu. Ka duh bîk hauh lo, chutiang tùr khawp chuan ka inzah lo bîk lo a nia," ka lo ti a.

Ka pa chuan," I nu țhìn hi chu aw...chutiang tùr khawp chuan kan fanu hi dah hniam lo la," tiin a lo khak ve a, ka nu lah chuan," A țha a ni mai alawm, a lo ngaihzawn palh ka hlau ve a ni mai a," a lo ti awlsam êt a.

Mu chung chuan whatsapp group pakhatah ka nâwi chiam a, ka hmel hriat an awm loh vàngin ka nâwi țhìn. Hmel hriat chu awm se ka nâwi ngam hauh lo ang. Bákah, he group hi chu a nuam ve a, chhùn lamah a reh vang vang a, zàn lamah hi chuan a lùn thei viau, hman hun a inang thei viau a niang.

Group noti hi chu ka mute vek a, a chhan chu group-ah hian ka awm tam ve a, lo ri chhên hi ka ning, active an tam si.

*Nâwi nasa pek a ni maw?*

*Zanin khân thil hriat chhuah ka nei*

A hmasa zâwk hi Muanzuala aka Țawng-duh-ve-deuh-tawha message a ni a, a hnuhnung zâwk hi Tea. Tea number ka lo la nei reng tih ka hre leh chiah!

Ka chhâng lo ve ve.

Eng thil ti tùra rawn lêng nge a nih le? A ngam pawh ka ti khawp mai. Nge kei hian ka la beisei rengin a ring em ni zâwk? Nupui nei tawh a ni a, ka la beisei a la ring ang maw? Hmeichhe leplêrh leh mi pasal la duh rengah chuan min ngai lul suh se. Chutiang khawp chu ka ni bîk lo asin, ka bialpa ni ţhìn mah se min țhen ațang khân kan inkâr a tàwp tawh a, hmalam ka pan ve mêk a ni.

*I chhûngte i lo dah pawimawh viau kha ka hre thiam ta*

Tea leh bawk. Ka block mai dâwn em niang? Hetia min lo text tùr pawh hian ka duh lo asin, a nupuiin lo hmu ta se? An inkâr tițha lotu a ni thei, keiin reply lo mah ila a hmuh hlauh chuan a zêldin thei ang.

Data ka off ta daih.

*******

Ka pa chuan thisen a neih loh vàngin thisen unit 2 pêk a ngai. Kan unau hnihin kan pe thei si lo, ka rilru a buai tak tak. Ka thawhpuite zîngah lah chuan a blood group milpui an lo awm bawk si lo, ka dap kual nasa, zah pawh ka sawi thei lo.

Whatsapp status-ah ka hmang, ka mang a ang êm asin, ka pa damna hi a hlû ka ti ber.

Ka țhianteho chuan min rawn zâwt fiah sap sap a, a mil chhun awm vete lah chu an awmna a hla lutuk si, ram pâwn lamahte a ni thùl.

Tea'n a rawn call, chhàn loh ka tum zet a; mahse, a pawimawh mial thei asin, ka status lah a lo view ve tho si.

"I pa chu a zia lo hle mai, ka rawn kal chhin tho ang e, ka pêk theih mial tâkin," a ti a.

Ka hnar thei lo, a lo pêk theih hlauh chuan a làwmawm dâwn êm asin.

Kan inbe zo chiah tihah chuan Muanzuala'n a rawn call ve nghâl zat.

"Khawiah nge in awm?" a rawn ti nghâl táwng.

Ka hrilh ve mai bawk, ka lo hre chhuak lo hi mak ka ti zâwk. Țhiante a lo nei ve nual thei tho a, a țhiante zîngah ka pa thisen pe thei an lo awm mial chuan...

Kan inbiak ațangin minute nga pawh a la liam hman lo ang tihah chuan kan bulah a rawn ding vùng tawh!

"I va ti țha ve! I buai àwm tehlul nèn," ka lo ti a.

"Phone ka en har a," a ti sup a, chutah," Thisen pe tùr chuan ka rawn kal a," a tih tâkah chuan makti zet hian ka en chho hau a.

"Tak tak?!! In blood group a inang maw?!! Ka va lâwm!" tiin ka ding thut a, ka kuah chûk chûk. Ka thinlung chu a lâwm lutuk a, a zuang chhuak mai ang tih a hlauhawm zâwk a ni.

Ka pa mutna lamah chuan kalin," Pa, i mamawh chu i dawng thei țêp a nia aw, ka țhianpa a lo kal a, a thisen chu a pe dâwn che a ni," mittui tling puau chung chuan ka ti a, a kut chu ka chelhsak a.

"Mambawih, ka lâwm lutuk e, nang ang fanu ka nei che hi ka lâwm tak zet a ni," a lo ti ve a.

Pâwna kan awm tawh hnuah chuan Tea a rawn kal ve tih ka hre chauh. Ni dâwn tak, min rawn biak tak kha. Ka pa thisen rawn pêk ve a tum tak alawm, Muanzuala'n a pêk theih tâk vangin ka lo mangnghilh daih a ni.

"In hmu tawh em?" a ti a.

"Aw," ka ti sap a, a țhianpain a pe tih hria se mak a ti viau maithei a ni.

"A va làwmawm ve!"

"Nia..."

Hetiang harsatna kan tawh hun laia min țanpui tuma a lo lang ve hrim hrim hi ka lâwm, tunah ka mangannate kha a kiang tawh zâwk a, chuti ni lo phei se chuan nupui a nei tawh a ni tih pawh ka ngaihtuah phâk tawh nâng.

"A pawi ka ti hle a ni."

Eng nge pawi a tih ber chu ka hre si lo va, chhàn ngaihna pawh ka hre lo, ka ngawi reng ringawt.

Ka pa chu na tak a ni lo va, thisen pêk ngai kha a ni deuh mai a, damdawi inah pawh chuan kan awm rei lo.

Muanzuala hnênah chuan làwmthu ka sawi mawlh mawlh a, chutiangin ka nu pawhin. Tunah tak hi chuan Țhuama hmuh pawhin ka hmu tawh lo, ka pa tâna angel thla nei lo, khawvêla chêng ve ni maiin ka hria.

Ka nute haw dâwn zànah zanriah eiah ka sâwm a, a chhan chu làwmthu sawi a phû a, ka pa tâna a thil tih kha ka theihnghilh thei tawh ngai lo ang tih ka hria a ni.

A țawng tam lo khawp mai a, nuam a ti lo emaw ni chu aw ka ti hial. Min en duh khawp mai a, ka pa leh ka nute nén chuan min entawn chhên ni maiin ka hria.

Mutnaah a message ka dawn ka en chuan ka nuih a za kher mai.

*I period a ni maw?*

Nui vur vur chung chuan ka chhâng a.

*I risk huai hle mai, vanduaithlâk takin i risk fuh lo hlauh thung a* tiin.

*I pa fanu kha i ni lo tiraw?*

Hei zet erawh hi chuan ka nui lai chu a titàwp chiang kher thung!

Ramhuai a pai a ni hial lo maw!!? Nge magic a thiam? A thil hriat theih dàn hi, a hlauhawm dâwn tlat.

Kan thurûk hi tuin nge hrilh?

*Ka pa fanu ka nih lohin tu fanu nge ka nih ang?* ka ti lêt thung.

*Engati nge thisen kha i pêk theih loh?*

Ka lu ka thing nar nar. Ka lo chhût chhuak ve hauh lo asin, mi ang pángngai chuan a lo hre thei mai a nia. Ka nau nèn kan hrisêl a, mangan tàwpah pawh kan pa thisen mamawh kan pe thei lo a nia.

Engah nge ka lo ngaihtuah chhuah loh le?

*Ka pa thisen ka pêk loh avàng ringawtin a fanu ka ni lo tihna a ni lo* ka ti ve hmak.

Ka hrilh àwm lo.

*Ka tihpalh*

A reh ta vang vang.

Ka inngaihtuah a, engah nge thu dik chu hrilh ka hreh viau? Ka pa thisen hi ka thisenah a luang ve hauh si lo. A fanu ni mah ila thisen inzawmna pakhat mah kan nei lo, chu chu amah chhanhimtu, kan mangan êm êm laia thisen petu hnênah khân ka hrilh thei lo maw?

Engati maw? Hmuhsit ka hlauh vàng maw? Ka pa dik tak hriat a nih loh vànga enhniam ka hlauh vangin em ni zâwk? Nge min nuihzat ka hlauh vang zâwk?

Sawi lo mah ila ka nihna chu a ngai reng. Ka pa fanu ni mah ila a fanu ka ni chuang lo, chu chu thu dik a ni.

Muanzuala chungah chuan ka inthiam lo telh telh mai. Ani khân hria se eng nge pawi? Thu dik chu thu dik a ni tho tho, a hriat avàngin a dik loh phah dâwn em ni? Ka zêp reng thei teuh lo, ka pa thisen zawm ka ni lo miau si a.

Ka inthiam thei ngang lo, ka va text leh hrâm.

*I tidik e, ka pa fanu ni mah ila thisenah kan inzawm lo a ni*

Ka pa fanu nih loh erawh ka duh hauh lo, ka pa fanu hi ka ni ang a, ka thih thlengin, ka thlànkhur thlengin ka pa fanu hi ka ni reng ang.

*MI DANGIN AN NGAIH DÀNAH CHE BUAI SUH, I LO BUAI VENA TÙR A AWM LO. I NGAIH DÀN NI LOVIN AN NGAIH DÀN A NI, BUAI VENA TÙR I NEI MIAH LO*

SHARE

Comments

Popular posts from this blog

☆A MAK!!!☆ - 11 By Dingdi Pachuau

October 16, 2019

☆A MAK!☆ - 11

By Dingdi Pachuau

Garage ațanga car a la chhuak chu ka lo nghâk reng a, ka hnial duh lo. A chhan chu nichin lawka ka thil hriat kha, kha ngei kha zawh fiah ka duh. A bialnu emaw ka ti char char a, ani lahin a nau a ni tih min hrilh duh hauh lo. Ka chhuahchhàl dâwn.

Car-a kan luha kan tlàn chhuah hnu deuh thleng pawhin ka țawng duh lo, ka titau deuh, a chhan chu a nau a ni tih min hrilh duh miah lo chu ka ngei deuh a ni.

"Țawng rawh," tiin min rawn en zauh a.

Ka en duh miah lo nain ka mit sîrin ka hmu thei tho. Ding takin kawng chu ka en tlat a, ka țawng rih lo ang, țawng lo tùrin ka insûm țàng țáng, ka tân chuan har tak a ni.

"Insùm a ngai lo, i duh i sawi thei a nia," a hnu deuhah chuan a ti leh.

Hm, ani pawh hian ka ngaihtuahna chu a lo hre thiam vek a nih hi, a nau a ni tih ka hre chhuak a, ka rilruah hian thil tam tak a awm a ni tih a man thiam mai tih ka hria, ani chu  a fing êm a, ka hmel leh awm dànah min man chhuak zêlin ka ring.

☆A MAK!☆ - 5 By Dingdi Pachuau

"U, kârleh zirtàwpni khi chawlh a ni sia, haw ve lawk ila, father-a pawh kan kan a ni ve pah ang a," Nunoi chuan a ti a.

"Eng chawlh maw?"

"Holiday."

Calendar chu ka'n thlêk a, chawlh chu a lo ni. Pawi vak lo ang, phone chuan inbe thei reng mah ila inhmuh ngei hi a nuam bîk.

"A tihchi viau ang chu."

"Ka haw chák tawh! Kârleh zirtàwp ni vat vat se ka va ti tak êm!!!"

"U Michael-a i hmuh châk tawh vàng a nih chu," ka lo ti zauh a.

A nui chhuak hak a," Anite chuan hmelţha min ti ve teuh lo mai! Nangmah hlîr alawm a ngaihven che le, bialnu nei reng chung pawhin a la ngaizawng duh che a nia," a ti hlap hlap a.

"Mahse, kei chu ngaihzawng neih ka tum tawh rih hlei nem," ka lo ti thung a.

"U Tea vàngin maw?"

"Ni chuang lo ve, neih loh rih ka tum ve tawp."

"A nih, U Tea hi i hua em?" a ti leh khauh a.

Ka ngawi vang vang phawt a, min en kar si avàngin dâwta chhàn ka tum bîk lo.

"Huatna tùr a awm hlei nem, Pathianin min ruatsak a ni lo tihna a ni ve mai a, nakinah ani aia țha min la pe mai ang; mahse, tûn dinhmunah hi chuan 'no boyfriends' a ni tawp mai," ka ti a.

"Chuti chu, U Michael-a chuh, a va khawngaihthlâk tak !!!" a ti vang vang a.

Kei min khawngaih lova ani khawngaih tâk daih chu! Ka unaunu chu a ni ve si a, a buaithlâk thei țhìn teh e.

"U Michael-a hi chu i va duh ve chiang tak! A sam kir tak hi i duh chhan pawh niin ka hria," ka tih chuan," A inhmeh êm asin, han mitthla chhin la, a sam kir kha ngil ta thut se, a mak viau ang! Mahse, ani kher hi chuan a inhmeh leh thei tho ang," a ti zat zat a.

"I duh a nih kha, nei vek rawh."

Kan nui vak vak a.

Paul-a, kan ina lo lèn a duh vàngin kan inzui haw hnak hnak a, a ngeiawm thiam leh mai mai a nia, kawnga kan kal lai chuan kan țawngkam hman inang lo bawk kha a rawn sawi chhuak leh!

"Tukverh hi rehpawh in ti bawk tiraw?" tiin a nui huk huk a.

"I thaw ve a nih chu! Tukverh chu tukverh a ni mai, sawina dang a awm hran em ni?" ka lo ti thung a.

"Awm a niang chu, rehpawh in ti miau a."

"Chu, nang pawhin i tih ve reng chu," tifuh inti zet hian ka ti a.

"Mawza pawh chàwn ip in ti leh bawk."

Ka nuih a za bawk sia, ka thin a rim pah bawk si a, a bânah chuan ka chumsak awk a.

"In tih dàn a nih chiah chu, ka hre ve ngai lo ve! A nih, țingțang hi engtin nge in tih ve ?" tiin ka záwt ve thung.

"Guitar kan ti mai."

"E, in va sâp țâlh țâlh bîk ve!"

"Tuizêm pawh Țâwp in ti daih a, tuizêm a ni reng sia, Țâwp chu eng nge a awmzia ni ngai?" tifuh inti zet hian a ti ve thung.

"Țâwp chu tuizêm sawina tho. A, ngawi teh, i la nau deuh a, mizo țawng hausakzia hi i la man chiang lo deuh a nih kha," ka ti ta zêk a.

"Ve a che! Ka pianin i la piang lo, maian hnahah pawh i la zâm hek lo."

Chu kher chuan ka nuih a tiza hle a, ka nui hawk hawk a, ani pawh chu a thil sawi avàng chuan a nui ve tho.

Muanzuala, keimahni tâwk zawnga rawn tlân ka hmuh chuan," Saw, i Aizawler-pui tho a nih saw," ka ti sap a.

"Tu maw?"

A rawn tlân hnai zêl a; mahse, min en zawk bâk min be lo, min hre lo ang hmiahin min tlàn pèl fua mai!

"Chu pa mai mai chuh!"

"Ka Aizawler-pui chu tu maw?" hriat châk hmel deuh hian min zâwt leh a.

"Hre lo mai teh! I intithei lutuk ang, min rêl reng ang a, a fuh lo ang," tiin ka nuih sûng a, ka rilru takah erawh chuan kha pain min han hre duh lo der kha ka ngei, rum táwka melh tumin ka hawi lêt hrâm; mahse, hmuh tùr a lo awm tawh miah lo nia!

Tea țhianpa kha a ni ve mai a, kan inkawm ngeih ngai loh kha. Țawng duh lo si, nèlawm loh ropui si, nui khât bawk si, duh leh min hre lo der tlat rawh se, eng nge pawi, a pawi ka sawi lo tih ka hre chiang a, pawi ka ti lo chisng êm mai, ani hriat loh der mai mai, a na lo lutuk! Ka pa mamawh ber thisen a pe tawh a, a țha a ni mai alawm. Kha vàng erawh kha chuan a chungah ka lâwm reng fo ang.

In kan thlen chuan Paul-a chuan," In in hi in luah nuam thiam reuh ngawt mai, hmeichhia hi chuan in enkawl nuam thei bîk e," a ti a.

"A va làwmawm ve! Lo țhu rawh, thingpui tui tâwk kan in dâwn nia."

Paul-a hi chu kawm a nuam ve a, han inhnial bap bap țhìn mah ila kan innèl vàng a nia, kan thin a rim ngai lo. Mahni chawr chhuahna nge nge chu kan țan lo thei lo ve ve a, bâkah, hetia inhnial kual chiam hi a nuam ve hrim hrim bawk.

"In pa nèn khân in lo ințhen daih a, mak ka ti lutuk asin."

Ka nui mai a," I sawi 'purana' êm mai a, a thar ka nei daih tawh," ka lo ti a.

Ani lah chuan thu tak zet hian," Min hrilh lo miau a, ka hre ve hlei nem," a lo ti vat a.

"Min zâwt hek lo che!"

"Engati nge in ințhen a?"

"Kan nih tawh loh vàngin maw le."

Min rawn melh rum a, ka chhàn dàn chu a ngei dâwn tih ka hre chiang lutuk. A bulah hi chuan țawng theih viau hi nuam ka ti ţhìn, min hnial hneh hi ka hlau viau țhìn bawk.

"A nih, nang bazâr vêngah khân i la lêng reng țhìn em?" tiin ka zâwt ve ta daih a.

"Um."

"Engtikah nge kan hmui a mawm dâwn? Kuminah ti ve tawh ula?" ka tih chuan a nui hawk a.

"Sawrkar hna nghet ka neih hnuah chauh nupui chu ka nei ang, tuna kan hna angahte hi chuan nupui fanau neih ngam pawh a la ni lo, mahni pawh kan inchâwm zo lo lek lek a nia," a ti nung nung a.

"I va puitling bîk tak!"

A haw hma deuhin Nunoi a rawn thleng a, mipa ka lo awmpui tih a hmuh chuan mak a ti tih ka hre reng.

Ka thawhpui Paul-a a ni tih ka hrilh hnu leh Paul-a țawng ri a hriat hnuah chuan room lamah a kal ta daih a, ka bialpa a ni lo tak zet tih a ring pawh a ni mahna.

Zanriah kîl laiin," U, a tuai deuh em ni?" tiin min zâwt a.

"A, tuai lo ve, a țawng erawh a pà hrâk lo deuh a ni mai, bialnu pawh a nei reng reng alawm," ka tih chuan a bu nghat a.

"A țhat hlauh chu."

"Engah chuan?"

"I bialpa a ni lo a."

"I duh deuh em ni?"

"Awi, râpthlâk..!!"

Kan nui kar kar a.

Nuih hi kan heh ve a nia, ho tê tê pawh kan nuihpui bâwk bâwk thei, chuvàng a nih ka ring, kan chêr thei miah lo, nui ngai lo ila kan chêr thei zâwkin ka ring!

*******

Haw chhoh kan tum zàn chuan thawmhnaw ken tùr ka siam a, ka nu leh pa ei tùr ka leisakte chu ka dah lût bawk a.

Ka phone a rawn nghawr dat.

Ka en lawk lo. A pawimawh a nih chuan call kher hi ka phût țhin, call a rawn kal lo êm a, a pawimawh teh chiam lo a nih ka ring.

Mut dâwnah chauh ka phone ka khawih. Message a lo awm nual, ka chhâng duat duat a.

A tàwp berah chuan Muanzuala message chu ka chhiar ve.

*Ka be duh che a nia*

Dâr 7:36-a mi daih tawh a ni, tunah dâr 9:30 a pèl tawh! Chhàn a va hun tawh lo tak! A va tihchi loh tak! Ka inthiam lo deuh rum rum.

Mahse, ka text lêt ta tho. A tlai tawh viau nain chhàn loh ai chhàn a țha ve tho.

*Eng thil nge ni ta?*

Min reply har ve tho, ka inthiam loh viauna pawh a kiang sawt.

Dârkâr chanve hnuah min rawn chhâng lêt.

*Naktûkah chhuak ila?*

*A va pawi! Ķan haw lawk dâwn a."

"In khuaah maw?"

"Aw."

Engah nge maw ka hrilh rêng rêng ni? Kalkawnga kan tawh ķhân ani pawhin min hre lo der a nih kha, min hre lo der hmak theitu hi ngaih pawimawh viau ka tum bîk lo.

Chutiang chu ka rilruah a rawn thar avàngin a message pawh ka reply duh ta lo.

A rawn call, ka phu zawk!!

"Eng nge?" ka țawng ring ngam tawh hlei nem, Nunoi a muhil tawh si a, a harh ka hlau.

"Message reply duh loh man."

A va zak lo ê!! Ka boss pawh a ni lo va, a message apiang reply zat zat tùr pawh ka ni lo. Ka bialpa chu ni se thuhran, ka bialpa hlui țhianpa ve mai a ni.

"Ka reply zêl che chhan tùr ka hre lo!"

"I thin a rim a ni maw?"

"Maithei."

"Eng thilah?"

Hriat ve zêl a țûl lo.

Kan inbe rei lo, kan inbiak zawhah chuan ka thinrimna chu ka ngaihtuah lêt a, ho ka ti leh viau mai. Min biak loh avàng maiin min hre lo der ta tihna pawh a ni lo thei tho a, kei pawhin biak ka tum hauh loh kha.

*******

In kan thleng chu kan ri nak nak mai, kan nauteho chu ei tùr kan hawnsak a, an hlim an țê chèl chúl mai. Kan tê ber pawh hi kum 10 a ni tawh a, kan chhangchhe viau tawh bîk lo; mahse, kan awm khâwm hi chuan kan la bengchhengin kan chiar nasa thei viau, chhûngkaw boruak hriat leh chu a nuam hliah hliah.

Ka pa pawh a zia lutuk tawh, hna a thawk lo va; mahse, in lamah a theih ang angin a lo che ve, eirawng bàwl pawh a kutah a awm ţhìn. A kut pawh a lo no niak mai, hna hrâm thawhpui loh leh dam țha lo, ina awm reng reng a ni bawk a, a àwm ve viau tho

Kan thlen zànah chuan Paul-a'n min rawn call. A bialnu nèn an intithiam lo deuh a ni àwm e, buaithlâk! Ka țhianteho hi chuan ka tawn ang kha tawng ve lo se ka duh, Paul-a pawh hi ka țhian a ni a, a theih hrâm chuan tlâwm záwka țang tùrin ka ti, an inkâr a țhat theih nân. Pakhat zâwk zâwk an inphah hniam loh chuan inngaizawng inkâr chu buaina a awm țhìn.

"Eng chungchângah nge ni rêng rêng a?"

 "A ho lutuk!"

"A ho lo tawp a nih chu, buaina in neih chu," ka ti ve thung.

"A buaina kha alawm ho ka tih."

"A ho lo, inngaizâwng inkâr tih chhiat nân second tam a ngai lo. Ințhen duh loh chuan siam țhatna tùr zawn char char a ngai," ka ti leh a.

 "A thîkthu a tichhe deuh a."

"A duh hle che a nih chu, a tân a hauh hle che tihna a ni mai a," ka ti leh a.

"Hmanni tlai, in in ka rawn kal dâwn a kan pahniha kan inzui kha min lo hmu emaw ni, a thîk che a."

E, a ni maw?!!! Thil awm thei ve tho alawm a nih le; mahse, thík ka ngai lo asin le. Ka chuhpui dâwn hauh si lo.

"Thil awmzia i hrilh lo em ni?"

"Hrilh e."

"Chuan?"

"Min ring lo."

A va buaithlâk ve! A rinna a tihchhiatsak hlauh chuan a pawi ngawt ang.

"Ka lo be ve chhin dâwn em niang?" ka tih chuan," A ngai lo ang, ka tihder lohzia a hre chhuak mai ang. Tunah chuan rinhlelhna mitin min en rih a, thu dik a hre chhuak vat tùrah ngai ang. Min duh a kan inkâr a țhat zel a duh chuan ka thu sawi min ring ve tùr a ni alawm," a ti charh charh a.

Kan inbe rei phian.

A bialnu mai mai chu aw, Paul-a ka ngaihzawn lohzia, ngaihzawng ena ka en lohzia hi hria se mak a ti zâwk ang! A inchhîr ang a, an inkâr pawh a hma ang tho kha a ni leh mai thei ang.

A la naupang ve a niang.

*VÀNNEIHNAAH INNGHAT SUH LA, NEI THEI TÙR CHUAN RIM TAKIN HNA THAWK ZÂWK RAWH*

☆A MAK!☆ - 6

By Dingdi Pachuau

Kan haw tûkah kan in piah deuh dàwra ka kal chuan Michael-a a lo awm ve tlat! Ka hmu thut chu, ka lài deuh ringawt a nih chu! A zia lo tak tak. Nunoi thil min hrilh vàng vek! Ka haw ve chhunah pawh hian ka hmu khât ve tawh a, Tea nèn kan inngaihzàwn aţang phei kha chuan mipa dang hi ka melh ngai lo hrim hrim, tuna ka han lài deuh ringawt hi a mak lutuk pawh ka ti lo.

"Melo-i chu, i lo haw elo? Inhmuh a va khât ve le!"

Ka nui deuh sak a," Nia tiraw? I lo dam maw?" ka ti ve luam a.

"Dam alawm, engtikah nge i kal leh dâwn?"

"Thawhțanah a niang."

Ka lei tùr ka lei fel hnu chuan ka chhuak a, min lo zui chhuak ve niin, ka lo hre miah lo.

"Melo, zaninah lo lèn i phal ang em?"

A tizahthlâk asin, lèn min han dîl deuh thlap a nia.

"Phal e a, lo lêng rawh," ka ti a.

Chhùn chhùnah eng nge maw dàwrah a tih ni? Hna thawkin a chhuak lo tihna a ni phawt mai a, Inrinni a nih vàng a ni ngei ang, chu pawh lo ni se, chawhma lam tal kha a chhuak ve ziah țhìn kha a ni sia.

Kan in hi hlui ve tawh viau mah se ka nu hian a enkawl hnûm viau a, bungraw țha tak tak nei ve lêm lo mah ila in kan tifai țhìn tal a, a zia. Ka nauteho lah hian ka nu chauh tifaitu hmeichhia a awm tih hriain an pui ve vek zêl a, a tihzia tak tak.

In bulah pangpâr kan dah nasa a, ka nu hian a ti peih hrim hrim bawk. In chhe ve tê ni mah ila pangpâr pàr vul lai hi chuan a nuam kan ti viau țhìn, mi pawhin mawi an ti ve viau țhìn. Nunoi hian Rose rawng chi hrang hrang a la khâwm peih a, ka nu lah hian a tinung thei phian a, pot man tlâwm tê têah dahin a țhente phei chu miin an leisak țhìn nghe nghe. Pawisa tlêm azâwng a lo la lût ve thei hi țha ka ti a, ka sawisêl ngai lo.

Vawiinah pawh hian an pahnihin pangpâr an buaipui a, kei chuan thawmhnaw țet ka lo țhui thung. Nunoi tih loh ka naute hi mipa an ni a, pathum lai an nih vàngin an hautak ve tawh a, thawhnaw hi chu an heh vak lo nain chapal hi an heh lutuk a, a buaithlâk thei khawp mai.

"Nu, kha kha a mawi reuh lutuk!"

Nunoi pangpâr kawh chu ka en ve thuai a, rose senduk, pâr lian vak lo hi a lo ni a, pâr thum lai a lo pâr nghe nghe.

"Mawi reuh e, mi pawhin leiah min dîl nghe nghe asin, a la pun loh avàngin ka phal rih lo va," ka nu chuan a ti a.

"A nih kha, tipung thuai thuai rawh, i bank a nih kha," nui chung hian ka lo ti a.

Thingpui kan in lai chuan ka pa chuan," Taiate chu rawn hlawhtling tak ang maw?" a ti vang vang a.

Ka nu chuan," Hlawhtling tùrah ngai ang, an hlawhtlin ziah kha," a lo ti a, dawhkàna ka phone dah chu a rawn ri țât țât a.

Ka en chuan Muanzuala hming a lo lang vah a.

"Hello?"

"Khawi laiah nge in awm?"

He pa hi, a rawn lêng tawh reng sia! A'n hre lo leh der vêl ah...

"I hriat reng kha, tunah chuan kan awm lo, kan haw daih alawm, kan khuaah."

A thaw hawk a.

"Haulawnga in in awmna chu alawm ka zawh che."

Kan inhrilh fiah nasa. Eng thil nge maw a rawn tih rêng rêng ni? A haw phei dâwn a ni lo ang maw? Hmel hriat awm ve ta chu, min rawn tlawh ve zawk a tum a niang.

He pa hi, motor pawh a lo khalh thiam reng a nih hi. Motor hi a lo nei rêng em ni? Nge a țhiante tâ a khalhsak mai mai le?

Ka chhûngte chuan an lo hriat ve tawh avàngin a lo luh chuan an lo be nghâl bawrh bawrh a, ani pawh chuan ka pa chu a dam țha zel em tih chu a záwt ve ngei, kei erawh chuan thingpui ka lo siam nghâl vat a.

"I haw phei dâwn em ni?" tiin thingpui pêk pah chuan ka zâwt a.

"Dâwn lo."

"Khawiah nge i kal a?"

"Ka lo kal."

Min chhàn dàn mai mai chuh, a ngeiawm thiam zêk roh mai ka ti.

Ka nu chuan," Kan in i lo kal vawi khatna a ni bawk a, chaw eipui ngei che kan duh a ni. I chungah hian kan lâwm hlê kan tih tawh kha, zanriah hmeh atân arpui tui lai kan talh ang a, i ei ngei dâwn nia," a lo ti a.

Ka pa pawh chuan," Ei ang, Taia'n dîl sangha a rawn hàwn ngei bawk ang a, i lo kal remchàn lai a ni bawk nèn, zanriah chu min kîlpui ngei ang chu, ei lova i kal kan remti miah lo," a lo ti ve bawk a.

Ka duh zawng a va ni lo tak! Hnial zawnga lo sawi ve lah chu a chi miah si loh, ani lah chuan a hnial der chhin eih bawk si lo. Arpui tui lai ei chu a lo châk àwm hle mai!

Ar chu ka pain a talh a, Muanzuala chuan a lo pui ve bawk a, ka pa chu a țawng ve leh zauh zauh a, âr talh dan leh a hmul puah awlsam dàn chu a hrilh ni berin ka hria, ar talh ngai lo ang ziazâng a, ka pa țhìn tak hi chu aw...

In bul huan têah chuan thlai hrang hrang ka nuin a dah ve a, tui pêk a awlsam vàngin thlai chu an țha reuh hlawm khawp, eng eng emaw hi chu dàwra lei leh an rawn zawrh chhuah lei ngai lovin huan têa mi chu kan la mai țhìn.

Arpui tui lai buh nèna chhum hi chu anthûr hnah thlâk nèn a inrem êm avàngin kan thlâk ziah țhìn. Anthûr chu fridge-ah ka zawng a, ka hmu miah lo.

"Nu, anthûr hi kan nei tawh nange?"

"Lâksa a zo tawh a niang, huan têah Nuhnùn kûng bulah a awm kha," a lo ti a.

A sawi ring ve angreng si a, Muanzuala'n min rawn en paha a mitko a tisâng zauh chu ka hmu, ka nu thil sawia 'Nuhnùn' tih vàng kha a ni ngei ang.

"Nuhnùn bulah maw?" ka ti ve ngat a, ka va en pah kher a.

"Aw, zu kal la, i hmu mai ang."

Nauteho an rawn haw khâwm a, Taia bulah an lo kal ve vek niin, sangha chuan man tam lutuk lo, a lian chauh pali chauh an man a; mahse, a lian hlawm êm a, pakhat chauh pawh kan ei khawp a niang chu.

Sangha chu ka nuin a siam ve thung a, sangha lam hi chu ka ei ngai loh vàngin ka khawih ngai lo, a rim thâng lutuk hi ka ngai thei lo țhìn; mahse, ka nu hi chuan a siam thiam riau a, a rim thâng ka hre ngai lo.

Khaw thim hmain chaw chu kan ei a, kan ei lai chuan ka pa chuan," Zanin chu riak rawh aw, zàna tlàn hi chu inngaihtuah a na duh êm mai. I duh leh naktûk zîng kârah i haw mai ang a, zaninah ngei ngeiin haw i ngai chuang em ni?" tiin Muanzuala chu a sâwm a nih chu.

A va buaithlâk thei țhìn tak! Kan inah hian a rei lo thei ang ber awm tùrin ka duh asin. Min chhaih nawmnah leh dâwn asin, ka nute an țawng duh ropui si. Zanriah a ei chu ka duh tâwk viau asin le, zàn riahtîr tum leh kher chu...

"Ngai chuang lo ve."

"Chuti chu, riak rawh, nakin zàn phei chu inkhèl en tùr a awm dâwn asin, i en ve ngai em?" ka pa chuan a ti leh a.

"Aw, en țhìn e."

"Pa, dâr eng zâtah nge kan inkhelh dâwn a?" Taia chuan a lo ti vat a.

"Nangni kha chu dâr 6:30-ah a nia, keini chu dâr 9:30-ah niin ka hria," a ti leh a.

"Ni lo, dâr 8:30-ah zâwk," ka lo ti a.

Ka pa vêk chuan," Kan chhûngkua hi chu inkhèl hi kan en peih a, kan țan zawng erawh a inang lo hlawm thung a," nui chung hian a ti leh a.

"A nawm dâwn chu," a lo ti dût a.

Ka nu chuan," Eng pawh ni se, zanin chu riak phawt la, naktûk lamte i awm dàn tùr chu rêl ta zâwk la a țha ang, a theih phei chuan haw lovin i awm leh rih ang a," a lo ti ve a.

Hmm, a va buaithlâk thei tak êm!!!

"Nia, riah pawh a pawi chuang lo."

Chaw ei pawh an titui nek lo ve. Ka kham hma ta daih, inkhâwm ka duh bawk si a, inkhâwmsan chu a pawi lo ang chu maw.

Chaw kan ei kham vek hnu, hmun kan tih fel hnuah chuan a thuphungin," Inkhâwm ka tum a, inah ka pate nen inkhèl chu lo en ula?" ka ti. Hrilh ve hrim hrim chu mawi ka tih vàng mai a nia.

"Umm."

Țawng thui hi a va hlau ve tak! A thatchhia nge sawi duah ngai a ti lo zâwk le?

Nunoi nèn kan inkhâwm. Mipaho chuan inkhèl an en ang chu, ka nu erawh chuan inkhâwm chu duh viau mah se hmeichhe pahnih kan chhuak tawh si a, lo awm a duh.

Kan inkhâwm rei lutuk lo, țhiante nèn kan inhmu a, kan inbe khawtlai rei ta deuh zâwk a. In kan luh chuan inkhèl an lo en țhap, Michael-a pawh a lo lêng tawh niin!

Lo lèn a tum tih ka lo mangnghilh leh tawh! A lo lèn duh tak tak pawh ka ring lo asin le.

"I lo lêng tak tak elo?" Ka va mâwl thei tak!

Nui sâng hian," Ka hrilh che kha," a lo ti a, kei pawh lài angreng tak chuan ka nui ve a, inthlâk tùrin room lamah ka lût ta rih a.

Ka chhuah hnuah chuan inkhèl chu ka thlêk ve zawk a, ka pâwlte an ni tlat lo va, ka en peih rih lo.

"I fel hle mai, i rawn haw zawk pawhin i inkhâwm hrâm hrâm a," Michael-a chuan a lo ti a.

"Fel vàng a ni lo."

"Kei chu ka inkhâwm miah lo asin, rawn lèn ka duh sia, tlai deuha rawn lèn lah chu a inthlahrunawm bawk si a," a ti sar sar a.

"Inkhâwm zat zat hi chu a har ve alawm," ka lo ti thung a.

Taia pâwl Arsenal chuan an mikhual Aston Villa lakah chuan goal an khung thei bîk lo, Taia chu a lo țang khawp mai a, a lo inhûm ruh nasa thei khawp mai.

"Tute nge i țan ve?"

"Liverpool ngat le," nui chung hian ka ti a.

"Kan inang a nih chu, an khèl hi ka en ve ziah alawm," a ti leh a.

"An tlân peih lutuk hi an țanawm ka ti țhìn."

Sawi tùr hriat loh a awm lo hlauh, a chhan chu inkhèl chungchâng leh club hrang hrang chanchin kan sawi si a, ka hriat ve nual avàng leh ka tuina tak a nih vàngin sawi nuam ka ti ve tho a, zanin zet chu kan titi pawh lo ngaihthla se, sawisèl tùr hria an awm hauh lo ang.

A lêng rei lo ve. A țawng chhuak dam leh fel lutuk avàng chuan a bula awm a hahdam ka ti a, chutah a nui sâng thei reng bawk a, 'mi fate hi chu an va fel tak êm aw' ka ti rilru vawng vawng.

Muanzuala chu ka room ni țhìn, tuna Taia room ni taah chuan a riak dâwn. Kei leh Nunoi kan mu tlâng ang a, Taia pawh chu kan te ber Rina bulah a mu rih ang.

"A mut theih reng a nia," tiin ka hrilh a.

A bu nghut ringawt.

Mu thuai thuai se a pawi loh tehrêng nèn, mut chu a la tum hmel loh hle mai. A mut hma hmaa mut daih lah chu a tihchi miah si loh a, inkhèl chu rilru bet fahran lo chuan ka thlîr a.

Michael-a hi, bialnu a nei tih hre lo ta ila chuan ka duh ve thei maithei a ni. Tunah chuan bialnu a nei tih ka hre kar tawh a, chutah Tea vàngin ngaihzawng neih rih loh ka lo ti tawh bawk a, tu mah inngaihzàwntîr ka tum lo. Rilru tina mai mai atân chuan neih loh hmiah ka duh tawh.

"I mut a chhuak tawh a nih kha?"

"Chhuak lo, thil ka ngaihtuah kual mai mai a," ka ti ve thung. Ka rilru takah chuan mu tawh mah ila a pawi ka ti tawh lo.

Inkhèl chu kan en tluan ta lo. Ka mitmei a vêng deuh nge ka hre lo, ka room chu ka kawhhmuh a.

"Long chair-ah mut ka lo tum asin."

"A ngai lo, nang chu kan duat che alawm, kan chhûngkaw tân i pawimawh êm asin," ka tih chuan min en rùn a.

"I bialpa a ni maw?"

Leh thut thut hian.

"Ni mai mai lo."

A nui leh hawk," Dâwt pawh va ni suh," a ti leh sup a.

"Ni lo rêng e," ka lo ti hmak thung.

"Nuhnùn hmin in nei em?"

Kha maw, a rawn sawi chhuak ta chiah e.

"Min hmusit thei hle mai maw? Nangni lamah chuan Thingfanghma, helamah Nuhnùn. Eng nge dik zâwk ni ta ang? Hming pahnih a nei a ni mai a, pahnih aia tam pawh a nei ang chu, Mizo țawng hausak nân a ni mai,' ka ti hmarh hmarh a.

"Zahngai!"

"Ngai lo ang," ka la ti țâlh.

Chutah, khumah chuan țhu thlain a kawr chu a phelh titih nghâl deuh mai, ka hawi sawn ta vat a.

"Tui deuhin i mu dâwn nia."

Kan inah chuan riak lo se chuan țawngkam țha pawhin ka thlah lo ang!

Nunoi chu a lo muhìl leh tawh. Mut a duh lutuk hi chu aw, a awhawm phian. Zàn mut theih loh tih lam a hre ve miah lo ang, a nuam dâwn ém mai.

*Naute thar i hmu tawh em?*

Muanzuala message. Khawi lam naute thar nge a sawi ni?

*Tu naute?*

*In pa hlui*

E, Teate'n fa an nei tawh tak ang chu maw le! Ti ila, a la hma deuh lawng maw? A lo rai hma hle  mai, nge thla kim lovin a piang záwk?

*A țhat chu*

A hnu deuhah *A nuam khawp mai* a rawn ti leh daih a.

*Eng chu?*

"In hi."

Hmm, he pa hi chu, a va sual thiam tak! Min hre chiang telh telh ang a, min hlatsan tawlh tawlh mai ang, a țhianpa ve ber Tea nèn kan ni tawh lo va, kan inhmuh zen zen loh hnuah phei chuan min hriat chhuah theih pawh ka ring lo.

*A làwmawm nasa a ni*

*I room hlui a ni maw?*  A thil sawi inkahpah theihzia hi chu aw...

*Engtin nge i hriat a?*

*Thlâlâk hlui niàwm tak ka hmu*

Eng thlalâk nge ni ang? Thlalâk ka tár chhuak ngai si lo, engtin nge a lo hmuh bîk ni? Ka tàr àwm ka hre lo.

  

*ȚHENKHAT CHUAN NGHAH NEIH HI HREHAWM AN TI ȚHÌN A, ȚHENKHAT LAHIN MI THEIHNGHILH TUM HI HREHAWM AN TI BAWK A, HREHAWM BER CHU NGHAH TÙR NGE THEIHNGHILH ZÂWK TÙR TIH HRIAT LOH HI A NI*

☆A MAK!☆ - 7

By Dingdi Pachuau

Ka muhìl țêp tihah chuan ka phone chu a rawn êng leh vât a, ka en leh rih.

*Ka muhìl thei lo a nia*

Tlangvâl puitling ve tawh si, mutna sawna muthilh theih loh tlat mai chuh! Naupang chhia pawh a ni tawh lo a nia, muthilh theih loh thu sawi mai mai a min rawn tihharh leh ni, ngaihsak a va phût tak! Ka bialpa pawh ni hlei lo...

*Engtizia nge, khum a nuam vak nange?* tiin a thuphungin ka zâwt ve.

*Pum nâ damdawi i nei em? Avil pawh a pawi lo*

Ka mu chu ka tho ta thut, he pa hi a pum a nâ a ni ngei ngei ang, chuti ni lo se min ko tho lo tawp ang. 

Damdawi kan dahna ka pan phawt a, tui bottle nèn a mutna chu ka pan ta nghâl a.

Room chu a kalh ve bawk sia, thâwm dìm deuh tak chuan ka  kik a, min rawn hawnsak har angreng. Kawng min rawn hawnsak chuan light a lo on tawh a, êngah chuan a thlan a tla nasa hle tih ka hre thei mai, a hmai pawh a sen vek.

Ka hlauthâwng lutuk!

Rang zetin khumah chuan ka dawm phei vat a, a thlan avàng chuan a ban chup mai lehnghâl a!

"Engtin nge i awm? Damdawi ei rawh aw," ka ti vat a, khumah chuan ka țhuttîr a, damdawi leh tui bottle chu ka pe nghâl a.

A pum chu a na hle a nih ka ring, a maimaichhîng tlat a, a hmelah lantîr tum lo viau mah se a awm dàn leh a taksa awm dànah a hriat reng mai. A rûkin ka mangang khawp mai a, ka nute chu kaihthawh mai ka duh nghe nghe a.

Mahse, ka kut nghet lutuk tak maia a țhàm tâkah chuan ka ngaihtuahna ațangin ka harh chhuak nghâl a, insehruh țeuh hian," Mi dang tihbuai ka duh lo a nia,"  a ti sup, a aw pawh a thâm sup tawh, a pumnâ vàng a ni tih ka hre thei mai.

"Mahse, heti ringawt chuan a dik lo, ka nute hrilhin damdawi inah kal ila?" ka tih chuan rawn mengin min en hrâwk a, ka kut chu a hmer nat leh sauh avàngin a na leh ngawr ngawr a nih ka ring, tihngaihna lah chu ka hre dèr lo mai.

"Damdawi ka ei...tawh kha. A reh mai ang."

Ka rilruin ka țawngțai mawlh mawlh, a chhan chu mi dang hriat a duh si lo va, a damdawi ei chuan hna a thawh ngei ngei a ngai tlat. Chumi tùr chuan ka țawngțai a ni, chubâk tih tùr ka hre lo.

Ka kut a hmer leh vak apiang chuan a pum chu a rawn na zél a nih ka ring; mahse, na reng chu a ni lo a niang, a chhan chu a chângin ka kut chu a hmer zàwi leh țhìn tlat a ni.

"Ulgel in vak ta che, ka lâk dâwn che em niang?"

A reh ve țan deuh chu a nih ka ring tho, a hmel pawh a insehruh lo deuh tawh a, men pawh a meng peih ve țan bawk. A mitmeng a dul raih mai a, a pum chu a na takzet a ni tih a rinhlelh theih loh.

Chhuara Ulgel kan dah chu lain ka kal vat a, ka intîr pawp pawp. Kei pawh ka pum a nat chuan ka in țeuh țhìn a, zia hun a awm ve mai țhìn a nih kha, ani pawh hian a ngeih ve tho ka ring.

Towel lain a thlan chu ka theih chin chin ka hrûksak a.

"Tlêm chuan i zia tawh tiraw? I damdawi ei kha a thawk ve țan tawh tihna a ni ngei ang," ka ti. A chhan chu tunah chuan mi hmer tawh lo va, a kut pawh dah pângngaiin a dah ve tawh bawk.

"Um, a reh țan." A aw pawh a zia deuh ta e.

"A va làwmawm tak!" tiin ka thaw huai a," Eng vàng nge ni ang le? Kan chawhmeh zîngah khân huat deuh leh ei sual deuh i nei emaw ni le?" ka ti leh a.

A ngawih reng avàng chuan," Keini pawhin kan ei vek a, pumna kan awm mang si lo va, a mak e," ka ti leh a.

A la țawng chuang lo, nuam ka ti vak lo deuh. Ani hi a pumnâ a reh țan tawh a, a chau ngawt tak ang, kei lah hi, thil ngaihtuah lo hian ka lo phûl leh hlut țhìn. Mut a duh ang, a chau viau dâwn asin.

"Muhìl rawh, i chau ngawt ang."

Min rawn en a," Ka lâwm e," a ti sup a, a maimichhîng leh nghâl daih bawk.

A chau a nih hi, a pumnâ a reh chuan muhìl vang vang rawh se, a hrehawm dâwn ém asin, a chhûngte a bulah an  awm bawk si lo.

Towel chuan ka zâp a, boruak nuam a tih deuh nân leh a muthilh thuai nân. Boruak lum lutuk chuan a zia phah ve dâwn asin, a thlan pawh a tlâk chhunzawm tawh loh ka beisei bawk.

A hmel chu chiang takin ka en, chiang tak hian ka lo la en ngai hauh lo tih ka hre chhuak zat bawk. A mithmul dum buk zet chuan mi luhlul tak a nih min rintîr thei mai a, a mithmul er deuh sung, sei fahran mai pawh chuan mi zaidam lam aiin mi thinchhe lam deuh a nih min rintîr bawk.

Mahse, a thinchhe viau lo chuan ka hria. Nia, kan inkàwm tam lo ve êm a, ka bialpa hlui țhianpa mai a ni a, a inah kan kal a nih loh chuan kan inah a rawn lêng ve vak ngai si lo va, ka hre chiang viau lo pawh hi a àwm ve tho, a mizia hriat thiam a har êm asin.

A muthilh chian hnuah pawh room-ah chuan ka la awm deuh reng a, a hnu deuhah erawh chuan a pum nâ chu a reh fel ta nia ka hriat vàngin ka tho chhuak ve ta a, ka chhuahsan hmain a pang chu dìm têin ka han dek a, a thlan pawh a tla chhunzawm ta lo tih ka hriat chuan ka thaw huai, ka rilruin làwmthu ka sawi a.

Ka harh laklawh avàngin ka mut a chhuak lawk lo, phone-ah games ka download a, mut a chhuak thei deuh ang tiin ka khèl duh a ni.

Ka mut hnuah pawh chuan thâwm ka ngaichâng deuh reng a, ka mu har khawp, chuvàng chu a nia, zînga ka thawh tlài ni.

Ka thawh chuan an lo tho vek tawh a, min lo kai tho duh lo niin, chaw ei a lo hun țêp tawh alawm le!

"Nizàn khân i tho leh niin ka hria a," Nunoi chuan a lo ti a.

"Aw, tho leh e."

"I mu țha thei lo a niang ka tia, ka kai tho duh lo che a nih kha," a ti leh a.

Ka nu chuan," I țhianpa lah chu nichîn deuh khân a haw ta daih a, a inthlahrung deuh a niang ka ti, làwmthute kha a sawi ve luam a," a lo ti ve bawk a.

A pum kha dam țha chiang tawh a niang maw? A haw theih chuan a țha a nih chu, khatianga pum nâ tawrh chu a râpthlâk dâwn êm mai.

"Nizàn khân a pum a nâ a, damdawi ka pe alawm; mahse, a haw thei a nih chuan a dam chiang tawh a niang," ka ti a.

"A nih mai mai chu, a va zia lo tehlul êm! Tukin lamah erawh chuan na nei hmel a put àwm ka hre miah lo, kawng lakah erawh a nâ a chhuah loh hrâm ka beisei," ka nu chuan a ti vang vang a.

Ka ngaihtuah deuh reng a, a nâ chu chhuak tawh suh se, khatiang na tuar hrehawm lutuk hmel pua hmuh leh kha ka duh tawh lo, dam hrâm rawh se.

Chaw ei khamah chuan ka room hluiah chuan ka lût a, ka thawmhnaw tlêm a la awm ve tho a, ka haw chhoh châng pawhin ka luah ve țhìn tho.

Ka thawmhnaw dahna bang sîr lam, hmuh awlsam lo lamah chuan ka thlalâk, hmân deuh tawha mi chu ka lo la târ niin, lang țha ka intih theihzia kha. Hei hi nizàn khân ani khân a lo hmu a ni ngei ang chu, a va zahthlâk tak! Ka thlalâk hun kha a rei ve tawh si a, ka chalsam lah a la rual hmaih zui, țhing min ti khawp ang chu!

Nilêngin Muanzuala chu ka ngaihtuah a, a pum kha a na leh ang em? Chanchin min hrilh ve hauh si lo, ka zâwt dâwn em ni ang?

Mahse, ngaihtuah viau tùrin ka 'eng nge' a nih chiah le? Ka bialpa hlui țhianpa ve mai a ni a, kan inkàwm ngeih ve viau lo. Bâkah, kan inbe viau țhìn pawh a ni lo va, ngaih loh lamahte hian a lo ngai rêu rêu palh ang.

Michael-a pawh a rawn lêng leh. Kei aiin a upa daih a, min kawm dàn a thiam ka ti. A bula awm a nuam a, ruihtheih thilah a buai bawk si lo. Kohhranah a mawi tâwkin a inhmang a, chubâkah, hna thawh a lo nei zui tawh lehnghál! Ka lo hre miah lo va, Chêngpui primary school-ah a lo thawk tawh, 'sir' a ni tawh tihna a nih chu!

Lawmpuina thu ka hrilh hnuhnawh, hna hmuh a har sia, a lawmpuiawm êm a ni. Amah ka beisei vàng a ni lo, bialnu a nei tawh tih ka hre ve tho, mi inkâr tihbuai ka tum hek lo, a lo lêng a, țha takin ka lo be ve a ni mai.

Ka phone number min dìl avàngin ka pe ve mai bawk a. Kan chhuk hnuah pawh chuan min rawn be ve luam, biak dàn chintâwk ka hriat a ngai. A chhan chu bialnu a nei tawh a, kei lahin ngaihzawng neih leh chu ka duh tawh rih hek lo. Ngaihzawnga buai ka duh tawh lo, hlim takin eng dang mah ngaihtuah lova awm ka duh rih.

School-ah țhiante nèn kan inhmu leh ta, Paul-a lehpek chuan," In khua ațang chuan Kawiâm leh Nuhnùn min lo hawn lo em ni?" a lo ti a.

Ngeiawm thei a nia.

"Țengțere sweet chiah ka lo hawn che."

"E, chuan, in inah ka lo kal a, kawta in țâwp-a tui kha a lo hnâm thei a, ka siam phui tâk kha!"

"I va tilàwmawm tak aw!! Ka haw leh veleh Laui ka lo hawn tawh ang che."

Hei hi kan ni tin infiam dàn a ni, min fiam a, kei lah ka lo diau duh bîk si lo, țhiante hi an nui dar dar ziah.

Chhùn chawlh laiin Paul-a chuan Aquarium thar a siamtîr chungchâng chu a sawi chhuak a, chutah, min en hâ chung leh intithei zet hian," A nih leh, Aquarium hi engtin nge in tih ve?" tiin hawi sâng vah hian min zâwt a.

Hei chu ka hre lo tlat, aquarium tih bâkin engtin nge kan lo sawi ni? Engtin emaw tak a sawi leh dâwn tih ka hre chiang si a, a va intithei dâwn tak!

Mahse, ka hre si lo!

"Aquarium a ni mai alawm, chhim lamah pawh Aquarium tho a ni," ka ti a.

"I daw ve a nih chu!"

"I daw zâwk a nih chiah chu!"

Ka dang duh bîk teuh lo.

"'Sangha țîn' in ti a nih kha."

Ka nui chhuak ta vak a, ka rin loh daih a ni bawk sia, mi dang lah chu an lo nui ve nasa bawk sia, dul thuar na ûrhin ka nui, ka mittui a tla phung bawk.

"Paul-a hi, hmar lam mi ni lovin chhim lam mi i nih chiah hi, keini aiin i hre daih zâwk! Chhim lam mi nupuiah nei ngei ang che," ka tih chuan," Nei mah ila hmar lamah ka awmpui dâwn sia, a rethei viau dâwn asin," a ti a, a nui duh miah lo lehnghâl a.

"Sangha țîn chu i tihfaitîr ni tin àwm sia," tiin mi dang chu an lo nui leh dar dar a, a thil rawn sawi chhuah chu ka làwm lutuk a, a làwm ber berah ka țang a, titi dang kan vawrh pawhin 'sangha țîn' bawk chu ka sawi chhuak leh țhìn.

Eirawng ka bàwl laiin Muanzuala'n min rawn call! He pa hi kan khuaa kan haw laia a rawn kal ka hmuh bâk kha ka hmu leh tawh lo, text pawh ka text lo.

"Min rawn kan rawh."

A lo damlo reng em ni le? A chanchin ka hre zui ta miah si lo.

"I damlo elo?"

A chek hluk a.

"Țhian nih i tlin lo hle mai," a ti nghut a, phone  chu a titàwp zui ta daih a.

Lalpa leh! He pa hi mi thinchhe tak chu a lo nih dâwn hi, a mit hmul er dàn ațang rêng khân, tunah a tilang ta chiah e.

Țhian angin maw min lo en a? Hmel hriat satliah mai mai a min lo en ka rin zâwk nèn, kei chuan ka țhian ang pawhin ka ngai lo, ka bialpa hlui țhianpa angah ka ngai.

A hnuah ka va call leh chhin, a damlo tak tak a nih chuan ka kan ve ang chu, ka hmelma a ni hlei nem.

"I lo thleng tawh em?"

"Aih...i damlo tak tak em ni? Ih, ka tih awmzia chu, i pum kha a na leh ta em? Kha vàng kha em ni?" ka ti buh deuh nuai a.

"Rawn kal la, i hre mai ang chu."

Tunah chuan ka hman lo. Chuan, zànah pawh ka hman lo, naktûkah school kal a ngai bawk.

"Ka hman lo, eirawng ka bâwl a..."

"A nih tak chu."

Nuam lo ka ti ru ta khawp mai.

"Naktûk tlai lamah lo kal ka tum dâwn nia aw."

"A ngai leh lo, i buai kha."

A țawng bung nghut nghut mai chuan ka awm a tinuam lo tak zet a ni. A damlo tak tak a nih chuan ka kan ve ngei ang chu, ani damlo kan mai mai, thil harsa a nih loh chu.

*MIIN ENG HARSATNA NGE AN TAWH A, ENG THIL NGE AN LO PAL TLANG TAWH TIH I HRIAT HMA CHU AN CHANCHIN HUAI TAK TAKIN LO SAWI VE RINGAWT SUH, THUTLÛKNA PAWH SIAM NGAWT SUH*

☆A MAK!☆ - 8

By Dingdi Pachuau

Tûnlaiah mihring dam reng buai lo tu nge awm le? Kan thil duh neih tumin kan hmanhlel vek a, buai kan inti em em a, kan inngaihsak hman lo chu a nih ber tawh hi. Thil țûl kalsana hun kan inpêk hi thil hlu ber chu a ni mai lo'm ni? Hun inpêk hi thil hlu tak, a hlutzia teh chhuah theih loh a ni.

Ka mangan lai berin, buai chung chungin ka pa thisen a rawn pe a nih kha. Ani pawh kha a buai, hun inpein damdawi inah a rawn kal.

Ka inngaihtuah chhuak thut, ka bai chhuan chu ka off sawk sawk a, pâwnah chhuakin rickshaw lo tlân hmasa ber chu ka lo ko vat. Nunoi ka call bawk, ka kalna tùr chu ka hrilh nghâl.

Muanzuala inah chuan ka va kal ve ta ngei. Ani hi, a lo damloh tak taka a lo nat viau phei chuan nuam ka ti lo ngawt ang, a chhan chu ka mangan viau lai khân a rawn lang vat a, buai thu a sawi lo, a buai ve dâwn chiang lutuk; mahse, a rawn kal tho.

Kawngkhàr chu ka kik a, vawi thum ka kik hnuah chuan," Lo lût rawh," tiin hmeichhe aw hian min lo chhàwn a.

Tu nge le? Tîm deuh hlek hian ka lût a.

Nula, ti ila tleirawl a ni mah zâwk ang chu, chuan min hmuh veleh chuan," Lo lêng rawh," a lo ti a.

Ka la hmu ngai lo tih ka hria, tu tak ni ang maw?

Chu lam chu ka ngaihven rei hman lo, ka kal chhan ber damlo inti chu Sitting room ve deuha țhutthlèng sei berah chuan a lo mu ngût a, ani hi a lo damlo tak tak a nih hmel. Min hnungchhawn zawnga a mut vàngin min hmu lo ang, a bul lawka dawhkàn lian lo têah chuan table fan a lo vir char char bawk a.

Ka țhutna țhinah chuan ka țhu leh chat a, a hmel chu chiang takin ka hmu thei, a dawldâng deuh a nih hi.

"Thingpui in rawh aw, ka lo siam ang che," tleirawl chuan a ti leh a.

Nuih sakin," Ka lâwm e," ka ti phawt a, chutah," A muthilhna a rei tawh em? Engtin nge a awm?" tiin Muanzuala chu ka kâwk zauh a.

"A lo muhìl tih pawh ka lo hre hlei nem, a lo muhìl elo?" a ti mai mai a.

Nia, min rawn biak kha a la rei lo khawp mai, chuah, a hnu deuhah keimah zâwk pawhin ka be leh a nia; mahse, a mut a chhuah miau chuan a muhìl hman thei tho. Muhìl der ni chuan ka ring chiah si lo, a mut tui hmel viau tho chuan ka hre si a.

Thingpui chu min rawn pe a, he nu te reuh hi tu nge maw ni chiah le? A awmpui nge a bialnu? Nge a nau? Awmpui chu a neih ngai àwm ka hre lo deuh si.

"Ka lâwm e."

"I buai ni khân ka hre si a."

A muhìl ni khân ka hre sia, a lo muhìl lo tawp a nih hi, ngun zet hian min lo en tawh. A mit meng en chuan muhìl rawn harh hlawl meng a ang lo, a lo muhìl der mai mai a nih hi.

"Engtin nge i awm a?"

"Ka damlo."

"Engtik ațangin?"

"In khua ațanga ka haw hnu lawk khân."

A va rei tawh ve!! A hmel dawldâng pawh hi a lo àwm a nih chu, a va na rei tawh, damdawi inah a kal lo em ni le?

"I inentîr lo em ni? Damdawi inah kal tùr alawm, hetia tuar ngawt ngawt tùr a ni ngai lo asin, a rei tawh bawk si," ka ti bawrh bawrh a.

Ngawi rengin min en kur a, chutah chauh hmel taka a mit a khap tâkah chuan ka inhre chhuak thut, damlo ka àn khum bawrh bawrh a ni tih chu.

"Ka tihpalh!"

Chutah," Mahse, dammdawiah chuan kal i ngai alawm, hetia tuar ri-"

"Ka awm reng tawh a, ka ning!"

"Engtin maw?!! I inentîr tawh maw?"

"Min zai a."

Makti zet hian ka en reng a!

Damdawi inah a lo awm reng tawh a nih chu! Engtia rei nge a awm? Engati nge an zai? Khawi lai maw? Zai ngai khawp chu, a țha lo viau tihna.

"An zai che maw?" ka ti ta țâwk. Ka zak hnuhnawh, eng mah ka hre lo chu. A chanchin ka ngaihven duh lo kha a ni a, ani lah chuan zai tâwkin damdawi inah hial a awm a ni a...

"Ka rîlphîr an paih a."

Sawi tùr ka hre țeuh; mahse, tunah tak hi chuan țawng leh pawh ka zak tawh. Damdawi inah hial a awm a, zai a tâwk a, kei ve hian eng mah ka hre si lo, ka ngaihven duh lo lui tlat a, ka ring ka tikhawng lui tlat a nih kha. Ka ngawi ta reng a.

"Sawi leh rawh."

Melh hâ hian," Eng maw?" ka ti sap a.

"Min àn khum leh rawh."

A fiamthu thawh ve dàn hi, ka nuih pawh a tiza lo!

"Zâpi, i haw thei tawh ang, ka mamawh chuan ka rawn ko leh mai ang che aw," tiin tleirâwl té kha a bia a, a awm ve a ni tih pawh ka lo hre leh tawh lo.

"Aw, engkim ka peih fel vek tawh a nia," tiin tui bottle hi dawhkànah chuan a rawn chhawp a, a chhuak zui ta nghâl a.

"In rawh," tiin ka thingpui no chu a melh rulh a.

Ka in ve hlek, rilrua inthiam lohna nasa tak ka neih vàng chuan țawng pawh ka hreh tawh, nuam ka ti lo.

"I țawng loh hian a nuam miah lo," a ti leh sup a.

"A na viau ang tiraw?"

"Nâ e."

"A zia lo tak tak a ni," ka ti leh ringawt a.

"I lo kal phah tal a."

Hm, a chimawm leh ta. Ka kal ngai lo tih chu ka hria, kalna chhan tùr ka nei tawh lo miau a.

"Tunah pawh hian a la na reng ang tiraw?"

"A zia tawh."

Damdawi ina a awm lai chuan tuin nge awmpui le? Hetah nge Aizawl lamah? E, chhûngte a nei ve ang chu, Aizawlah a niang, helai aiin khawpui nge ngeah chuan thiam pawh an thiam zâwk ang a...

"Aizawlah a niang maw an zai che?"

"Hetah."

"Engati...engtin nge hetah a nih theih?!!"

A dàr a sàn ûk a," A ni miau sia," a ti leh sup bawk a.

"A nih, tuin nge awmpui che? I chhûngte Aizawlah an awm vek àwm sia?"

A kut chuan a mit a nuai nak nak a," Tu mah," tiin a hmai chu a tuai leh a, a chauh hmel viaua ka hriat chu le!

Tu mahin an awmpui lo maw?!! Engati nge a chhûngte? A hrilh lo em ni? Ni lo ve, thil ni thei pawh va ni suh.

"Dâwt pawh va ni suh."

"A ni lo."

Thingpui ka in zo a, no chu ka sil nghâl bawk. Kha nu tê khân eirawng pawh a lo bâwl felsak diam tawh a nih hi. A la naupan hmel ai khân a fel hmel reuh, a chêtna hnu pawh chhui tùr a vàn hmel khawp hi.

A bula ka va țhut phei leh hnu chuan,"A nih, kha nu kha tu nge?"tiin ka zâwt a.

"Zâpi maw?"

"Aw, chu chu a hming a nih chuan, i awmpui a ni em?"

"Engati nge? I thîk a ni maw?"

Lalpa leh! Eng thil nge a sawi hi, a teuh lo lutuk!!!

Thil tak tak a sawipui hleih theih loh a nih hi, a damdawi eiin a tibuai a niang, a rùi pawh a ni thei tho bawk a.

"Engati nge i chhûngte an rawn kal loh a?"

Min chhâng lo, a ngawih tâk reng avàng chuan ka en ta vat a, ani erawh chu a lo maimichhîng daih.

"Engtizia nge? A nâ a chhuak leh em ni?" mangang rilru zet chuan ka ti vat a.

"A tlai tawh, haw tawh rawh," a ti ta daih.

Nia, ka țawng ka țawng a, a lo tlai ve ruai tawh mai. Bâkah, min ning tawh pawh a ni thei, ka țawng tam tawh hle si a, ka țawng lahin min lo chhàn ve zêl a ngai bawk sia, a hah phah viau maithei; mahse, ka kan zung zung hman lo ang a, ka kan chhunah erawh țangkai ka duh ve alawm.

"Ka țawng tawh lo ang; mahse, rei lo tê ka awm leh rih ang, i ril a țàm chuan chaw ei pawh ka siamsak thei tho che a nia," ka ti a.

"Haw rawh, naktûkah i lo kal leh zâwk dâwn nia."

Min ning tawh a nih hi. Ka țawng leh duah țhìn bawk sia, ani dam ţha lo tân chuan ka ninawm ngawt ang!

Ka tho ta vat a, ka bag chu ka ak a, ka chhuah dâwn chuan," A nih, chaw ei tui le," chu ka ti hrâm, țawng miah lova han chhuahsan chu fuhin ka hre lo.

A che thei ang, a chêt țhat theih loh pawha puitu tùr Zâpi a awm bawk alawm, ka kan ve ta tho a, a țha e.

Nunoi a lo haw daih tawh a, min lo ngaihtuah hran lo, ka kalna tùr kha ka hrilh miau a.

A tûk tlaia ka kal leh chuan ka țawng tam tawh lo, a ei theih tùr ka kensak ve bawk a; mahse, ei tùr hrim hrim chu a ngah. Ka hma chiahah Tea'n a lo kan a, ei tùr chu a kensak țeuh a ni àwm e, ka hmu hman lo chu ka lâwm khawp mai.

Zâpi pawhin eirawng a lo bàwlsak leh a, Zâpi hnênah chuan thil awmzia chu ka zâwt a, a damloh chhûng hian awmpui angin a lo chhawr a ni àwm e. Chêt vak phal a la ni si lo va, in chhûngah chuan a duhtâwk chuan a kal kual thei ve tawh a; mahse, doctor thu âwihin a indìm rih, a indim thiam leh a tân a țha a ni mai.

A tûk tlaiah ka kan hman ngang lo, ka hrilh hran lêm lo. School-ah thil țûl tiin kan awm hnufual rei lutuk a, kei aiin Nunoi a haw hma zâwk!

Zànah Michael-a'n min rawn call a, fiamthu sawiin kan nui pah a, Nunoi chuan min rawn en leh hâ hâ țhìn tih ka hria, ka biak hi a star U Michael-a a ni tih a hria a ni mahna.

"I ngaihawm reuh lutuk a."

Ka nui mai, țawngkam hi a thiam lutuk bîk lo va; mahse, dâwt erawh a sawi ngai bîk lo.

"Nui ringawt lo la?"

"A nuihzatthlâk a ni mai alawm."

"I ngaihawm ka tih chuan i nuih a tizâ maw?" a rawn ti leh a.

"Aw, ka ngaihawm lo ve êm a, chu chu ka hre ve kar a ni," ka ti a.

Ka ngainatawm vak loh ang, ka țawng peih si, mi damloh lai phei chuan an bula awmah pawh min duh lo ang, min ning ang, ka lo phûl leh hlut zêl sia.

"Nula fel tak i ni alawm."

Ka nui hak hak a, hetiang fakna dawn hi a nuam pawh ka ti lo, ka fel lo miau si a.

A thil sawi chu ka duh loh lam thil a nih vàngin thil dang ka zâwt ta daih a, a school thawhna chanchin leh khaw chanchin ka zâwt daih, nulát tlangvàl lama inbiak hi chu tunah chuan ka hnâwl rih.

Kan inbiak zawhah chuan," U Michael-a a ni chiang mai," a lo ti vat a.

"Ni e."

"In inngaizâwng ta tihna a ni em?"

"Teuh lo mai! Ngaihzawng ka nei tawh dâwn rih lo ka tih kha, ka nei dâwn rih lo ka tih chuan ka nei dâwn rih lo a ni tawp mai," uar zet hian ka ti a.

"Mahse...?"

"Mipa tu pawhin min be thei alawm; mahse, biak dan chintâwk ka hria alawm, tu mah ka ngaizawng dâwn lo," ka ti leh a.

"A nih, hmangaih tawng ta la?"

A va dîlchhût reuh e.

"Tawng lo ang."

"I hre ngawt lo aw, ka țhiannu pawhin hmangaih a nei alawm le, college a chhuah veleh an innei dâwn asin," a ti leh a.

"Induhna kha hmangaihna emaw an ti a nih chu," ka lo ti thung a.

Muanzuala ka va kan leh meuh chuan mu lovin a lo țhu ve luau tawh, a changkáng sâwt khawp e. A hmel dawldâng deuh pawh kha a zia deuh, ei tùr ţha a ei nada a niang.

"Hmuh i nuam tawh e, dam pângngai i ang tawh bawk," ka tih chuan," Hmuh ka lo hrehawm viau a ni maw?" a ti sup a.

"A, ni chuang lo ve, tunah chuan i hmel a dawldâng tawh lo va."

A mut pindan ațang chuan nula pakhat hi a rawn chhuak hlawl mai. Ka hmu thut chuh, ka meng phâwk nasa ngawt ang chu!!

He pa hian, a bialnu a lo tawmpui reng tihna a ni maw? Ka va lût ve thut bawk sia, ka va țhâwng a ni chiang.

"Ka tihpalh chiang hle mai," ka ti sap a, ani rêng rêng pawh, a room-a tawmtîr kher, a bulahte lo țhuttîr mai àwm, awm dàn tùr min tihre lo, min tilai hûih zâwk alawm le!

"Engah maw?"

A hre reng sia, a va ngeiawm tak!!!

Chu nu chu, a lo kal fo țhìn a niang a chêt dàn a bo hû lo êm mai, Zâpi kha a ni lo va, ani kha chu awmpui a ni a, bo lo ni se ka hre thiam lutuk. Nge tuna mi hi awmpui thar a lâk leh zâwk ni ang? Room ațangin a rawn chhuak a, a inthlahrun loh hmel riau bawk si.

"Bawihi, thingpui no hnih lo siam la?"

A koh vêl dàn chuh, inhre țhang leh innêl tak an nih dâwn hi. A lo inthup thei hle mai, Tea nèn kan nih laia a ina kan kal ve țhin lai pawh khân ka hmu ngai lo, a them pawhin ka hre ngai lo! Tea khân a sawi ngai lo, ani pawhin a hriat bîk ka ring lo.

A hmel lah chu a chhe lo khawp, a ngo viau lo nain a vun chu a mawi khawp mai. Ramhnuaiah hna thawk chuan a chhuak ngai lo tawp ang le, a sam pawh a sei mawi, a rawng lah a dik bawk, a nung sar mai.

Thingpui chu min rawn pêk chuan," Ka lâwm e," ka lo ti sap a, he nu ka hmuh achin chu sawi tùr ka hre mang tlat lo, ka hul tlat a nih chu.

"Lo awm r'u, artui ka zu lei lawk ang e, ka rei lo ang," chu nu chuan a ti a, a aw chhuak chu a mah a len phû lohin a sîn reuh!

"Pawisa la la?"

"Ka nei alawm," tiin a rawn nuih sãih a, a biangsum chiang taka lang chuan a tihmel țha sawtin ka hria.

A chhuah fel hnu chuan, "Nei chhe lo hle mai," tiin ka fiam zauh a.

"Nia."

"I inzêp thei viau a ni," ka ti leh a.

"Chuti maw?" a ti duh chauh.

"Ka va hmu ngai lo, hetah a awm ngai lo a ni maw?"

A lu a bu nghut.

"Lunglei nge Aizawl?"

Ka zawhna chu a hre thiam lo a niang, min rawn en a.

"I bialnu kha Lungleia mi nge hmun danga mi ka ti."

"Aizawl a nia."

Hmu ngai lo pawh ni ila a àwm a nih chu. An inhmu zut thei bîk lo tawp ang, nimin lamah ka kan lo va, a hmaa ka kal kha chuan ka la hmu hauh lo, a awm miah lo tih ka hre bawk, a rawn pheina a la rei lo tih hriat reng reng.

"I dam sawng sawng em?"

Meng sawr sawr chuan," Maithei," ti chauhin min chhâng, țawng thui hi chu a va hlau tak êm! Kan inang lo teh e.

"Vawiin chu ka haw hma ang e, ngaihtuah i ngai lo bawk a, ka dîp mai mai zâwk ang che u," thingpui no seng pah chuan ka ti a.

"I thu thu."

Min ui der pawh a tum eih lo a nia, min ning leh tawh a niang, țawng tam lo tân chuan ka ninawm duh viau ta ve ang.

*NANGMAH RING ÊM ÊMTU HNÊNAH CHUAN DÂWT HRILH NGAI SUH, DÂWT HRILHTU CHE CHU RING NGAI BAWK SUH*

☆A MAK!☆ - 9

By Dingdi Pachuau

Haw kawngah chuan ka ngaihtuah pah zêl a, tunah chuan a dam țha deuh tawh a, chutah a bialnuin a rawn awmchilh ta bawk nèn, kan a ngai tawh lo niin ka hria. Nichin pawh khân tlêma tlêmah ka phâwk lo chauh a nih kha, ka kan zing ve tawh bawk a, kan tawh lo pawh ni ila min dem tawh lo ang chu.

A bialnu chhiat lohzia kha, Aizawl lam nge nge, an lo chhe lo deuh chu a ni. Muanzuala a țawng tlém ropui sia, engtin tak inchhar ve ni ang maw? Tuin nge sawi hmasa le? Muanzuala ni ta se, a sawi țan dàn hriat a châkawm ka ti.

Ka thil ngaihtuah mai mai chu leh.

Zànah ruah a sûr ve leh țan ta, khua pawh a lum dàn a zia ta e. Fùr hi ka ning țhìn, ruah a sûr duhin thawmhnaw phona hun a vâng thei si a, hrehawm ka ti thlâwt. Heater kan hman chuan electric man kan châwi nasa dâwn si a, thawmhnaw hem ro ka duh bawk si, ka nuin meihawl kan neihsa min rawn thawn a, a zia deuh. Kan meihawl chhèm chuan kan in luah pawh a ur rimtui ve a, in hnuai a nih vàngin fùr hunah hi chuan tlêmin a nuam lo țhìn.

Chawhnu bànah naupangho mathematics-ah tuition class dârkâr khat ka kalpui tâk avangin ka haw hma thei ta lo, kan school naupang chu an awm mang lo, school dang naupang an ni zâwk mah. Dik tak chuan ka peih bîk vàng a ni lo; mahse, harsatna an sawi a, chu chu an țhiante'n an lo hre chho zêl a, an harsatna chu ka hai der thei lo va, class ka kalpui lo thei lo a ni. Bâkah, ti hian ka hlawh bâkah pawisa ka la lût belh ve hlek bawk a, a zia riau chu ka ti; mahse, insan mar erawh a ngai khawp mai. Ina ka haw hi chuan ka chau ve thei khawp, hrawk a thîp duh si.

Bàn laia ruah a sùr phei hi chuan a hrehawm tawp, a sûr tam thei si a, kea kalin kawng a thui lo va, short cut-a kalin kan thleng thuai mai.  Rickshaw chuan kawng a kual a, chuan man a to, pawisa  a uiawm thei si, ruah sùr bàn ka nghâk tawp țhìn. Nihliap nei tho mah ila pheikhawk leh kekawr tlâng lam zawng a huh ziah a, pho rona khua a awm thei si lo.

Tunah pawh ruah bàn ka nghâk leh tawh. A sùr dàn chu a ngeiawm chi, a ãwn lutuk a, nihliap khum pawhin ka huh leh vek tho ang, rickshaw-a chuang mai tùr pawhin a tlân hmuh tùr a vâng kher mai.

Ka hawi ka hawi a, naupang țhenkhat tuition class ka pêkte pawh chu an haw thei bîk lo; mahse, kei chu ka hmanhmawh, eirawng bàwl ka ngai.

Ka sana chu ka'n en a, dâr 4 a pèl vah tawh, ka awm hle hle thei tawh lo, haw tawp mai ang.

Kawngpuia ka kal lai chuan ka kalna tùr tak ka hma chiahah chuan car a rawn ding dat, ka hre chiang khawp mai. He car hi chu ka hre chiang ve tâwk tawh alawm, ka chuang zing ve a.

Kal pelh ka tum lai chuan car chhûng ațang chuan aw, ka hriat țhan ém ém hian," Lo lût rawh," a rawn ti a.

Ka lût ang nge lût lo ang tih ka ngaihtuah phawt a, en pawh ka en duh rih lo.

"I huh vek ang, lo lût thuai rawh, in vêng lamah ka tlân dâwn tho alawm," a rawn ti leh.

'Ka' tih a hman dànah amah chauh a ni ngei ang, chuan ka tum deuh thut hman tawh a; mahse, ka inngaihtuah harh thut.

"Ka lâwm e, ka lo chuang lo mai ang."

En chuang lo chuan chak zetin ka kal ta sawk sawk. Kha pa car-ah khân ka chuang thei tawh lo ang, nupui a nei tawh a, fa pawh a nei tawh. Kei a bialnu hlui ni tawh hi ka chuang leh a nih hlauh chuan ka beisei leh emaw a ti palh ang, chutiang ngaih dàn a eih chu ka duh lo hulhual.

In ka thlen chuan ka kekawr hâk chu a huh nasa lutuk a, tui a dîr tluk tluk mai. Ka pheikhawk pawh a huh zawp lutuk, ka ui tak tak!

Kha pa car-ah khân chuang ta ila chuan hetiang hi ka ni lo tawp ang, ka han hnial vei a, ka chuang duh lo vêl a...a tuartu chu keimah, ka luhlul man hei tunah ka ding dîr tluk tluk mai alawm.

Mahse, a țha e. Hnial kha a phú ve tlat a ni, a thlàwn rêng rêng ka duh loh țhin kha, ka la vawng nung reng tùr a ni. Ani phei hi chu ka hnaih tùr pawh a ni tawh lo, kan inkawp lai renga hmeichhe dang lo mutpui thei a nih kha, ka theihnghilh tùr a ni lo a ni tawp mai a ni.

Ka din dìr tluk tluk lai chuan ka bag chhûnga ka phone a lo la ri zui! Kha pa kha a nih lek phei chuan, ka chhâng lo chiang khawp ang. Min rawn diriam dâwn a niang, ka huh vek bawk sia, min rawn diriam viau pawh ni se a àwm ka ti tho mai.

Mahse, a lo ni lo hlauh. Michael-a zâwk a lo nia.

"A va sûr duh ve!" a rawn ti a.

"Nia."

"Inah em ni i awm?"

"Aw, hei ka ding dîr tlawk tlawk mai," ka tih chuan," Uai, ruah sùr laiin i haw em ni a? Chu, ka lo be buai che a ni maw?" a ti leh a.

"Buai chuang lo ve," ka ti ringawt.

"Kei pawh ruah bàn hun hi ka nghâk a, ka la tlân haw thei bîk lo," a tih chuan ka mitthlaah chuan ka hmu thiam mai. Mi in veranda-ah a ding lai ka mitthla a, rain coat a ha țap ang ang a, a ning ve viau tawh ang chu.

"A nih chu, a zia lo hle mai. A hàn ve țêp tawh ang chu maw," tiin ka pheikhawk chu ka hlîp a, kawngka chu hawngin bathroom-ah ka lût tlang ta nghâl a.

"Nia, hàn țêp tawh ang, tunah chuan intihul tawh rawh, i dam loh phah ang e, kei pawh ka tlai lutuk hmain ka tlân tawp mai ang," a ti a.

Thawmhnaw ka inthlâk fel hnuah Nunoi pawh a lo haw ve chiah. Ani erawh chu Ramthar ațanga an college-a kal ve tho bike neiin a phur thei a, a zia lutuk; mahse, a huh ve tho.

Zanriah ei kham lamah erawh ruah chu a bâng ve ta. Sikri ka chhêm a, thawmhnaw țhenkhat inbâng huhil ve deuh tawh chu ka hem leh.

"U, U Tea kha ka hmu asin, kan college-ah a rawn kal a."

Vawiinah kei pawhin ka hmuh kha. A kal haw lam a ni ngei ang.

"Eng nge a lo tih a?" tiin a thuphungin ka zâwt a.

"A nau nula ni hmiang ka ti mai, chu chu a rawn lam a."

A niang, ka ngaihtuah peih lo ve.

"Inla chhe lo thei deuh hi a nia, a chhe lo viau ka ti kei pawhin; mahse, mi dang chuan an ei fahran lo a," a ti leh zêl a.

"An phâk loh vàng a nih chu. Mi kan phâk loh leh kan chunga awmte hi a nia kan er țhin ni, a chhiat loh vàng a nih chiah chu. A pâwng apuiin mi an ngei ringawt ngai hlei nem, an pawi an sawi pawh a nih loh chuan," țawng duh tih takah, ka ti leh bawrh bawrh a.

"A chapo hmel an ti zêl a."

"Chapo hmel tih mai mai, a nungchang tak hriat chian fak loh chuan sawi mai mai loh tùr, chu chu hriat reng tùr aw," tiin ka'n zilh pah zaih a.

"Nih, U Tea kha i ngei em?"

Min zâwt leh ta.

"Ngei ve deuh tho, min lo bum reng khân ka rilru a tinâ a ni," tiin dik takin ka chhâng a.

"A inchhìr ka ring viau asin, tunah pawh hian a inchhîr tawh ngei ang, nang chu i fel sia," a tih chuan ka nui hawk a.

"Engah nge maw a inchhìr ang? A duh a nei alawm, a hlim ang."

Mutnaah ka ngaihtuah zui ta zêl a, a inchhìr chu ka ring hran lo. Tunah phei chuan fa a nei tawh lehnghál a, an pahniha phuar nghettu túr fa. A hlim viau ang, nupui neiha fa neih a nih kha a duh ni. A inchhîr lo ang.

Phone a rawn nghawr dat a.

*Min rawn kan leh tawh la?*

Hm, a bialnu kha a haw tawh tihna em ni? A hma zawng pawha min rawn text lova tuna taka min rawn text leh tâk, a lung a lêng a ni sa.

*I dam tawh kha* ka ti ve ringawt.

*I reh rêng rêng*  Bialpa titau pawh a ang e a.

Chhuanlam siam tùr ka duh.

*Ruah hi alawm, a sûr duh lutuk a* ka ti ve zaih, ngaihtuah chhuak țha ka inti lutuk a, ka nui sak a.

*A tih tùr dik tak a ti alawm* tiin min rawn chhâng thung.

*Eng nge chu chu a awmzia?*

*Sùr bâk tih theih eng nge a neih?*

A tidik leh viau bawk si.

*A thuhrimah, i va meng rei ve! Dam țha lo tân phei chuan men rei hi a țha lo asin* ka ti leh a.

A ni alawm, tunah dâr 10 a pèl tawh a, kei pawh naupang test tùr question ka buaipui a, ka meng rei mai mai a nia.

*Dâr 10 chauh a la nih hi*

Ka meng phar ãwk mai.

*Inlêng i nei a ni maw?*

A teuh lo lutuk chu ka nuih a zâ!

*Nei țeuh mai* ka ti ve ngat a.

*Țeuh tih kher chu, ka awih loh phah* a rawn tih chuan ka nui var var.

*I hre ngawt lo, i hmu hlei nem*

*Țhuama kha maw?*

*Ni maithei*

*Mutsan rawh*

Leh ngawt ngawt a.

*Meng rei min tih kha, mutsan rawh* a rawn tih leh chuan  *Inlêng ka mutsan thei ngawt lo* ka ti leh a.

*A nih, hnar haw rawh* a rawn ti leh.

*A polite loh thlâk e a*

*Mut kham lova class kal i duh em ni?*

*Duh lo ve*

*Chuti...?*

*Mut hma i mamawh zâwk*

Min rawn reply har ta deuh hlek. Ka muhìl țêp tihah chuan ka phone a rawn rîk leh vàng chuan ka meng chhuak leh a.

*A nih, mut hma chu ka'n zir poh ang e; mahse, kan inneih hunah erawh men rei ve deuh i zir a ngai ang*

A message vàng chuan zan rei tawh lam lamah, ka sen țâwn țâwn ang chu!

He pa mai mai chuh!!!

Min rawn fiamna mah ni se min tilum up up thei. Tea vànga inhria kan ni a, inhre mai mai chauh. Kan nih tawh loh hnuah erawh kan inbe thei ta phian a, mi nèlawm loh over kha chu a lo ni bïk lo tih ka hre tawh a, țawng duh lo over pawh a ni lo tih ka hre tawh bawk.

Hei, a fiamthu pakhat lek pawhin min tilum up upin min tisen țâwn țâwn thei a nih hi.

Ka mut chhuakin min thlawh bosan leh tâk avàngin ka meng ta reng, ka ngei tak tak a ni. A tûk lamah mit na ûrha school ka kal a ngaih phah.

A message-a min fiamna lah chu ka rilruah a awm reng lehnghâl a, ka duh lo tak tak a ni.

*******

Tlaiah ruah a sûr lo teh tlat! Tihzia lutuk.

Kawnga ka kal lai chuan ka hnung lama horn ri pât chu ka hria a, kawng chu zau deuh zâwkin ka kian a.

Mahse, ka hnungah tak zêl a rawn tlân!

Ka hawi lêt a, chu motor chhûnga chuang chu ka hmu thei lo. Ka din chuan ka bul maiah a rawn ding ve ta zêl si a, a tìrah chuan ka ngai pawimawh lo khawp kha a nia, tunah erawh chuan ka hlauthâwng țan ta deuh!

Chak zetin ka kal ta sawk sawk a, a rawn tlân ve ta nghâl. Ka bul vélah chuan mi an awm lêm lo va, ka piah deuhah erawh dàwr a awm phei thliai a, mi pawh an ri deuh liai liai, chu lam chu chak zetin ka pan phei, ka tlân deuhthaw a ni mai.

Tûnlaiah 'kal rûk' tih țawngkam a lâr si a, chutiang chu ka hlau lém lo nain nuam lo tihna, hlauhthàwnna rilru ka pu tlat tawh a, ka thlâ a muang lo.

Dàwr bul chu thaw deuh hlap hlapin ka thleng, ka lût lo, mi an awm hnaih tawh avàng leh dàwr a awm phei thliah thliah tawh avàngin hlauhthàwnna ka nei nasa tawh lo deuh.

Ka hawi lêt a, kha car kha, ka lamah rawn tlân tawh lovin kawng pêng dânga a tlan liam chiah tur chu ka hmu hman chiah.

Thinphu dêp dêp chuan 'Tu tak ni ang maw? Min hretu nge min chhaih tumtu ni ang? Nge min tihțhaih tuma hlauhlawpa min siam tumtu ni ang?' tih chu ka ngaihtuah nasa.

Hetiang chuan mahni chauh chuan ka haw ngam tawh dâwn em ni? Tuition class kalpui lo ila chuan thawhpuite rualin ka haw thei a; mahse, tunah chuan ka thei tawh si lo, ka rilru a tinuam lo zo vek mai.

In ka thlen hnu thleng pawhin ka rilru a nuam lo, ka tirîlah hlauhna ka la nei tlat nia, Tea a ni thei mai ang em? A ni àwm lo e, engah nge khatianga min tih ringawt ang? A ni lo, ani chu a ni thei lo.

Muanzuala a ni mai ang em? Ni lo, ani chu a la dam chiang lo va, motor a khalh lo tawp ang, bâkah, a hmaa a motor khalh nèn khân a inang lo hrim hrim bawk, min chhaih fiam tùr pawhin ani chu a theih loh.

Nunoi hnênah chuan ka sawi a, ani lah chuan min nuih nasa mai.

"U, i dâwih e! Chutiang hmun reh leh fâl pawh ni loah te chuan eng nge i hlauh le? Chhe lo a ti chein  aphur duh che pawh a ni maithei a, a fiam che a niang chu," te a ti vêl mai mai a, leiin ka lâk thutak tehlul nèn, engah mah min ngai lo khawp mai.

Zànah Muanzuala'n min rawn call pawhin ka rilru a nuam thei lo va, ka hrilh leh ta nge nge a. Ani chuan min nuih ve miah lo!

A ngawih deuh reng hnuah chuan," A khalhtu i hmu thei lo maw?" tiin min zâwt a.

"Aw, a thim vek a."

"A va him lo tak ve! A hre sa che a ni lo ang maw?"

"Ka hre bîk lo, ka hmu thei si lo va, ka hlauhzia chuh!  Ka tlân deuhthaw alawm."

A ngawi leh deuh vang vang a.

"A motor number i chhinchhiah em?"

"Aih, chhinchhiah ngaihna ka lo hre miah lo! A colour chiah ka hria, a dumpâwl lam deuh a nia, a la thar khawp mai," kha car mitthla rauh rauh pah chuan ka ti a.

A thaw huai a," A nih tak chu," a ti phawt a, chutah," Naktûk tlai chu ka lo hruai dâwn che em niang? A lo châng leh thut thei che a," a rawn ti dût dût a.

☆A MAK!☆ - 10 By Dingdi Pachuau

"Ngawi mai mai teh, i la dam loh kha," ka ti a.

"Ka dam tawh."

A message min rawn thawn kha ka hre chhuak zawk a, ka ngawih deuh vang vang  lai chuan," Min rawn kan khât lutuk a, eng mah i hre lo a nih kha," a ti leh a.

Nia, ka kan khât. A bialnu a awm ve reng tawh a, kan kha țûl ka ti tawh lo a ni. Bâkah, a dam chho ve zêl tawh bawk a, kei lah ka buai bawk si.

"I dam tawh chuan a làwmawm a nih chu. In nu kha a la awm em? Nge a haw tawh zâwk?" ka ti a.

"Haw lo."

"I dam chak phah a, a zia hle mai. Mumal deuh tak pawhin min la hmel hriattîr lo a nia aw," vui lek lek awka hian ka ti a.

"I lo lêng duh lo alawm."

"Duh loh a awm lo."

"Dâr eng zâtah nge in bàn țhin?" a rawn ti daih.

Ngaihtuah lo zet chuan ka hrilh ve mai a, țawng duh tih takah naupang tuition class ka kalpui thute chu ka la hrilh tak deuh deuh a.

"I va ti țha ve!"

Min fak ve tihna chu a nia, a làwmawm dangdai hranpa e.

"Min mamawhna a sâng ve êm a ni, ka khawngaih ve hlawm bawk sia, bâkah, board exam hmachhawn tùr an ni hlawm a, ka khawngaih hlawm a ni," ka ti a.

Kan inbiak zawh hnuah chuan, a bulah a bialnu kha a lo awm ve ngei ang a, kan țawng zawng zawng kha a hre vek ngei ang, a țhian ka nih a hrilh ve tawh ngei ang a, kan inbiak avàng mai mai khân an inkâr a nawm loh phah lo ang chu maw. Chubâkah, thil ngaih kawih tùr sawi kan neiin ka hre lo.

Tea'n min rawn text.

*I va reh ve!*

Awi, a zak lo chiang e, engah nge ka reh loh ang? A bialnu pawh ka ni tawh lo va, a duh hun huna a text tùr pawh ka ni lo. A nupuiin a hriat hlauh phei chuan min ringhlel thei, an inkár tichhetu ka ni thei, tihchi loh lutuk!

Ka chhâng lo, a number hi delete mai te a nia ka duh ni.

Mahse, delete pawh ni ila aniin a delete ve si loh chuan, awmzia a awm lo. Ka block daih dâwn zâwk emaw ni, thil dik ber a niin ka hre bawk si lo. Ka block chuan ka rilru a na lutuk a, ka hmangaih hle emaw a inti ang tih chu ka hlau bawk si, number dang hman ringawt lah chu, he ka number hi thil pawi.awh engkimah ka hmang vek tawh bawk si, a buaithlâk ka va ti tak!

Ka chhàn loh vàng chu a niang, a reh ve leh mai bawk a.

Chhùn chawlh laiin țhiante nèn chuan kan infiam nak nak a, Paul-a pek chuan," Nang hi i money reuh ngawt ang ka ti, rilru hi i nei tlat," a ti a.

"Rilru i nei ve lo em ni?" ka tih chuan țhiante chu an lo nui dar dar a.

"I va chhe zawt zawt tak!"

A aw sîn deuh leh a thil sawi chu a inhmeh lutuk a, kan nuihpui vak vak a.

Paul-a hi chu nuihpui hi a nuam, pà hrâk lo mah se tuai a ni tihna a ni lo va, bialnu pawh a nei thlap, a aw hi a sîn deuh tlat a; mahse, hei tak hian min tihlim, a bulah chuan thin a rim tak tak thei lo.

"In nu chu sangha țîn tihfaitîr leh tawh la a nih mai chu," ka ti leh a, sangha țîn ka sawi chhuah leh tâkah chuan kan nui vak vak a.

"Ka sawi chhuak lo ang tih i hlau ngawtin ka ring ta, i lawm dàn rêng mai hi!" a tih chuan pan hnaiin a kutah ka la a, ka chibai a.

"I sawi chhuah avàngin kan lâwm e."

Chu ringawt pawh chu kan nuih nasa.

Tlaia tuition class bàn hma chuan kan awmna classroom tukverh ațang chuan school kawta car dum in-park chu ka hmu vuai. Ka thin a rawn phu deuh dawt dawt a, nimin lama ka bula rawn tlân zêl, horn rawn petu kha a ni thei ang em? Naupang tih tùr ka pêk lai tak a nia, a tihchi khawp, chuti ni lo se chuan ka țawng tàwp chiang dâwn si a, mak min ti lutuk ang.

Ka en chiang leh ngat, driver seat-a Muanzuala ka hmuh tâkah erawh chuan mak ka ti; mahse, ka lâwm. Ka âwm ka dawm a, ka thaw huai mai, hlauh tùr a awm ta lo ve.

Mahse, a lo kal tak tak hi mak ka ti, a la dam țha àwm si lo, a nat phah vaih chuan aw... a fuh lo viau ang. A inzaina a la rei lo hle si, indim a ngai asin, ani phei chu amah chauh a nia, a bialnu hialin a rawn awmpui a ngai a nia, hetiang mai maia awm thei a ni hlei nem, hau deuh hlek a ngai a nih hi, indìm lo leh lutuk mai.

Mahse, ka àn khum thei lo ang, min ngaihtuah vànga rawn kal ve vang vang a nih hi, a chungah lâwm viau tùr ka ni zâwk lo em ni? A eng a mah hmaa lo thinrim rûk êm êm ringawt chu a fuh ber lo ang.

Naupangho bàn lai chuan car nghèngin a lo ding tawh, an en deuh hâ hâ a, an inhrilhru leh deuh bawk a, an awm dan ka hmuh chuan ka nui deuh sak ringawt. Dik tak chuan an tleirâwl chho ve tawh a, hetiang boruak neih hun hi a ni ve tawh alawm.

Classroom ațanga ka chhuak chu țawng lo chuan min lo en reng a, kei ve thung chu țawng ka châk lutuk ka insûm rih zâwk, naupangho hriata hau ka duh loh vàngin ka la ngawi rih.

Ka mitmeng leh hmel ațangin ka rilru a hre thiam a nih pawhin a tilang hauh lo," Ruah a sûr lo va, a zia hle mai," a ti daih.

Naupangho an liam hnuah chauh chuan,"Eng nge i lo tih dâwn?" ka ti ve thung.

 "Ka bialnu ka rawn hruai dâwn che," tiin ka luhna tùr chuan kawngkhàr chu a hawng a.

"Mâwl suh!"

A nui hawk.

"Lût mai teh, i duhtâwkin min àn khum thei ang."

"Hruai ka ngai lo, ka hlau hlei nem."

"A ropui! Lût phawt mai teh."

Ka lût nge nge.

A chezia chu ka en deuh reng a, a khawr hmel vak loh, a dam țha ve tawh tihna a ni ngei ang, a hmelah phei chuan dam lohna hnuhma àwm ka hmu lo.

"I ril a țâm em?"

"I dam țha tawh tak tak tiraw?"

Kan țawng rual ve ve, muangchângin min rawn en a, a kut pahnih erawh steering-ah a nghat ve ve.

"I khalh thei tak tak tawh maw?" ka ti leh a.

"Ka rawn inkhalh thleng chu a nia."

A va ngeiawm thiam tak! Kei lahin ringhlel rilru puin ka zâwt a, ani lah chuan eng thamah vak min ngaih hmel loh ropui mai si.

A khalh chak lo va, a khalh dam khawp mai. Khalh pawh a thiam, motor pawh a dìm thiam e.

"I ril a țâm em?"

Min zâwt leh ta, nichînah pawh khân min zâwt tawh.

"Țam ve țêp."

Kan ina min hruai haw ta mai lo chuan restaurant awm hnai berah min luhpui ta.

"A ngai hlei nem, ka ril a țâm vak chuang lo asin," ka tih chuan," Kei a țâm alawm," a ti sup a, menu banin a en kual a.

"Eng nge i ei ang?"

"I duh duh."

Puar takin ka ei, ani pawhin a ei ve țeuh. Ei man lah chu ka pêk hmain a lo pe thën.

"Ka lâwm e aw."

"I hman veleh lo lèn i bâ."

Leh mauh mai a.

Naktûk Zirtàwp a nia, chawhnu lam chu ka lêng ve hman ang chu a. Ani pawhin min rawn hruai ngar ngar a, kei pawh lèn chu ka bâ niin ka inhre ve tho.

*******

Min hruai vàng liau liauin lèn bâ ka inti ve tho a, chuvàngin, ka lêng. Ruah a la rawn sûr zui, a sûr tam lutuk lo chu a zia.

Ka țhutna ngaiah bawk ka țhu leh.

"I seat a ni tiraw?"

Ka nui ringawt.

"I lo kal apiangin tah khân i țhu ziah."

He pa hi, ka rin ai daihin thil a lo hria, a chîk ka ti. Ka țhutna chuamah ka țhu leh tawh a, ani pawh a dàn ngai têin thil ei tùr min siamsak!

"In nu ka va hmu lo? A awm leh tawh nange?"

"Ka tîr bo lawk."

A, chu kher chu ka awih lo. A haw phei tihna nge ni ang, a chhuak lawk zâwk?

Coffee min rawn chhawp a, a tui leh ngawt ang chu! Coffee no min pêk pah chuan," Teate an ințhen a," a ti sup, a țawng zawih êm avàngin ka hre pha lo lek lek! Mahse, ka hre thei tho, mak pawh ka ti! Dâwt a ni thei ang em? Ni lo ang a...

"A va țha lo ve!"

"Nia."

"Eng vàng nge ni a?"

"Ka zâwt lo."

A zâwt lo ang, Tea'n a hrilh ang a, a ngaithla tawp ringawt ang chu, ani hian an ințhen chhan chu a zâwt lul lo ang, Tea'n a hrilh nghâl a nih ngawt loh chuan.

"Țha ka ti lo tak tak a ni," ka ti leh tingawt a.

A thaw huai ringawt.

Coffee kan in zo țêp tihah chuan a bialnu kha a rawn lût ta zán zán mai. A inthuamna lah chu a inhmeh zaih, a pian a nalh tâwk êm a, a inchei dàn chuan mit a la zarin ka hria.

"Coffee in lo in tawh elo?" a rawn ti a.

"Aw, ka lo siam ang che," tiin Muanzuala chu a tho vut, a bialnu chu a ngaihsak ve hle mai maw. Hetiang a nih chuan an inneih hnuah phei chuan a thaibawih dâwn chiang lutuk! A khawngaihthlâk roh ngawt ang!

A siamsak zawh hnuah chuan a pe a," Ka'n inbual lawk ang," tiin bathroom-ah chuan a lût a.

"Ani hi chu a dam a la țhat loh vàng hian ni a sat lai hian inbual se, a țha ber. A dam loh chuan ràl khat ațanga inbuaipui a harsa si a, min tibuai vek," a ti sârh sárh a.

"Nia, Aizawl ațangin i rawn phei vang vang a nia, i ti țha hle a ni," ka ti ve a.

"Rawn phei loh theih pawh a ni lo."

Nia, a ni ngei ang, a ngaihtuah ngawt ang chu!

"Mahni chauha a khawsa lah hi ngaihtuah a na sia, chutah zai a la tâwk zui a nia," tiin a chek tlak tlak a.

"Mahse, a dam tawh êm hi," ka tih chuan," Dam a la inti lo teh a nia, hawsan ka tumin a la phal tlat lo," a lo ti a.

Hmmm, a lo pangchang ve thei nasa a nih chu! A bialnu bulah chuan naupang chhia a lo nih chu!

"Awmpui rih rawh, a khawngaihthlâk ve alawm," ka lo ti a.

"Nia, dàwr pawh ka ngaihsak hman rih lo a nih hi, hawsan a la phal tlat si lo va, a duh chuan a intina der thiam a nia. Hawsan ka tum chuan na a inti êm êm zêl," tiin a nui var var a, a biangsum lang kalh chu a mawi tak zet ka ti.

"Kei lahin ka kan zut hman si lo va, ka lo buai ve bawk nèn, i awmpui hman hi a làwmawm ka ti asin," ka ti a.

"Nia; mahse, ka pheisan țêp. A țhian țha tak i lo awm remchâng a, ka ngaihtuah lo deuh sawt a ni, mi chanchin hi a sawi khât viau nain i chanchin hi chu min hrilh ve nasa thei a nia," a ti sarh sarh a.

Engtin tak min lo sawi ve ang maw? A inhmeh lo e.

"Ka pheisan hunah pawh lo tlawh reng reng tho țhìn rawh aw, chuan ka ngaihtuah nêp deuh bawk ang. A țawng duh bawrh bawrh sia, mi pawite hi a lo sawi ang tih ka hlauhpui țhìn," nui chung hian a ti leh bawrh bawrh a.

Amah ang lo takin a bialnu chu a țawng duh ve hle mai, ani pawh hi keimah ang deuh tho a nih ve dâwn hi, țawng bawrh bawrh chi ve tho.

A hming erawh ka la hre lo chu a nih hi. Muanzuala khân 'Bawihi' ti khân a ko a, a hming tak a ni àwm si lo va, koh ve dàn tùr ka hre lo. 'Bawihi' tia koh ve lah chu, a cial riauin ka hre bawk si.

"Bâkah, mi bulah hian a nèlawm lo thei si a, mi hian an lo ngei ngawt ang tih ka lo hlau țhìn. A mizia ve ngang hi a ni a, 'ngêng lutuk' an ti ang tih pawh ka hlauhpui țhìn."

A bialpa chu a hre chiang ve hle mai maw.

"Bâkah, Aizawl lam nèn chuan țawng leh thil sawi dàn a dang hret hret sia, ka ngaihtuah țhìn. Ho tê têah hian ka ngaihtuah leh tlat zél, ngaihtuah loh ka tum pawhin ka thei țhìn lo."

Kei chuan," Chutiangah chuan ngaihtuah duh suh, buaina tur eng mah a awm lo," ka lo ti a, ka ngaihtuahnaah erawh kan inhnial țhin lai kha a lo lang a, ka nui țêp.

Bathroom ațangin a rawn chhuak a, kekawr bùl hain towel a rawn bât chhuak a, ka hawi sawn vat.

"Darling, ka kawr hâk tùr chu?"

An inkoh dàn vêl chuh, ka lo zak lek lek. Tea khân 'Hon' tiin min ko ve țhìn a, Muanzuala kan bula a awm lai ngei pawhin min ko tho, ka zak lêm lo kha a nia; mahse, tuna an inkoh dan ka hriat hian ka lo zak tlat!

"Ka'n la ang e."

Room-a a luh hlàn chuan," A tlai deuh tawh sia, ka haw tawh mai ang," ka ti a.

"A la hma."

Sana enin," Dâr 3 a ri dáwn, eirawng bàwl ka ngai a," ka ti a.

Room ațangin a 'darling-i' chu a rawn chhuak a," Kha, hei hi ka leisak che kha a nia, i la ha miah lo," a rawn ti chhuak lar lar a.

"Hâkna hun a la awm lo alawm," a lo ti a.

"Tunah khân ha nghâl rawh," nui chung hian ani chuan a lo ti a.

Ka ding uaih a, haw mai loh chuan ka hnawksak palh ang.

"Melo, haw i tum elo? La haw lo la, a la hma alawm," tiin ka hmingin min ko ve tlat!

"Eirawng bàwl ka ngai a."

"A la hma alawm, i lo lêng khât si, i lo lèn chhunah chuan rei deuh lèn tùr a nia," a ti leh bawrh bawrh a.

"Nia, ka lo lèn leh hunah le," ka ti ve a.

"Ka'n thlah ang e," tiin Muanzuala chuan a kawr hâk chu siam țhain min hmakhalh a, a chhuak tùr chu a darling-i chuan," U, sausage rawn lei haw nghâl teh aw, dàwr rawn en kual vak mai rawh," tiin a au zui a.

Tunah khân 'U' tiin a ko!!!

Muanzuala hi a u maw ni a?!! Chuan, a bialnu emaw ka ti char char a nia! A ni tak tak em?

"I u maw?" ka ti hâ a.

"Aw, kan upa ber a nia."

Chu pa chu leh!!

A va châk lo dâwn tak!!

*MIIN AN NGAIH DÀN CHEA I BUAI CHHÛNG CHUAN  HLIMNI HMEL I HMU NGAI LO ANG*

*LUI TUI HI A LÊT ZÂWNGIN A LUANG NGAI LO, CHUTIANG CHIAH CHUAN NUN TUM RAWH. I NUNHLUI THEIHNGHILH LA, I HMALAM HUN TÙRAH CHAUH I NGAIHTUAHNA SÊNG  RAWH*