☆A MAK!☆ - 11 - 20 By Dingdi Pachuau

 ☆A MAK!☆ - 11 By Dingdi Pachuau

Garage ațanga car a la chhuak chu ka lo nghâk reng a, ka hnial duh lo. A chhan chu nichin lawka ka thil hriat kha, kha ngei kha zawh fiah ka duh. A bialnu emaw ka ti char char a, ani lahin a nau a ni tih min hrilh duh hauh lo. Ka chhuahchhàl dâwn.

Car-a kan luha kan tlàn chhuah hnu deuh thleng pawhin ka țawng duh lo, ka titau deuh, a chhan chu a nau a ni tih min hrilh duh miah lo chu ka ngei deuh a ni.

"Țawng rawh," tiin min rawn en zauh a.

Ka en duh miah lo nain ka mit sîrin ka hmu thei tho. Ding takin kawng chu ka en tlat a, ka țawng rih lo ang, țawng lo tùrin ka insûm țàng țáng, ka tân chuan har tak a ni.

"Insùm a ngai lo, i duh i sawi thei a nia," a hnu deuhah chuan a ti leh.

Hm, ani pawh hian ka ngaihtuahna chu a lo hre thiam vek a nih hi, a nau a ni tih ka hre chhuak a, ka rilruah hian thil tam tak a awm a ni tih a man thiam mai tih ka hria, ani chu  a fing êm a, ka hmel leh awm dànah min man chhuak zêlin ka ring.

"Min bum," ka ti ta nge nge a.

"Tak tak?"

"Aw, i nau a nih reng kha," ka ti nghat a.

"Ni e?"

Hre thiam lo tak chuan ka en phei ta a, ani erawh chuan kawng lam chauh a lo en thung.

"I bialnu ni miah lo chu i bialnu niah min ngaihtîr char char a," ka ti leh a.

"Ngaihtuah țha teh."

"Eng chu?"

Kawng zau lai, kawng sîrah a ding phawt a, thil lei duh a nei a nih ka lo ring hman; mahse, ka lam a rawn hawi tâkah chuan ka lo en hû a.

"Ka bialnu ka ti lo, ka nau pawh ka ti chuang lo, a dik em?"

"A ni lo pawh i ti lo," ka lo ti vat a.

"Chuan?"

"Min hrilh țhat ve mai tùr a nia, i bialnuah char char ka ngaih phah a," tiin ka vui nung nung a.

"Min zâwt mai la?" a tih chuan rang zet hian," I chhungte chanchin i sawi ngai lo êm alawm, nau i nei tih pawh ka hre lo," ka lo ti vat a; mahse, ka inchhîr leh nghâl zat.

A chhûngte chanchin min hrilh tùrin a eng nge ka nih? Chutiang sawipui tùr chuan kan inkàwm ngeih tâwk lo va, inngaizawng lah kan ni bawk hek lo. Ka phût sâng mah mah, mak min ti ngawt ang!

"Ka tih palh, ih, ka ti ve mai mai a nih kha," ka ti leh hnuhnawh.

Steering nghet zeta hûm ràn pah chuan," A țha e," a ti sup a, chutah," Ka chhang chhang leh Zorinpuii a nih kha," a ti ve ta a.

Min hrilh avàng chuan ka lâwm tho, min hrilh har deuh mah se tunah chuan a nau a ni tih ka hre tawh si a. A bialnu a nih ringin ka lo be țha ngam lo deuh vêl kha a nia, lo be bawrh bawrh tùr asin ka nih le.

Kan tlàn leh hnu chuan," I nau chu, in inang pawh ka ti lo," ka ti leh a.

"Ka pa ka chhùn a."

A nau kha chuan a nu a chhùn a nih chiah chu. A nu pawh a chhe lo ngawt ang chu, Muanzuala pawh hi a chhe chuang lo, an pa pawh a chhe chuang lo a nih dâwn hi.

Ka lêng leh ta lo vang vang. A dam țha tawh tho a, bâkah, a nau a awm tho bawk a, ka lèn zut chuan inngaizawng emaw te min ti palh mai mai ang.

Zan khat min rawn call erawh min tizak, ka sen leh țâwn țâwn! Nunoi'n min hmu thei lo hlauh a, room-ah a awm tawh a , a zia tak tak!

Ho zet zeta ka biak laiin," Mipa kawp lai deuh i nei em?" a rawn ti thut.

"Nei lo." Min tihamhaih chiang lutuk a!! Ka ngaihtuah chian chuan ka lo sawi zo vek tawh, Tea vànga kawp nei thei ta loah min ngai ngei ngei ang chu!

"Duh deuhtu che ka hria."

Ka nui hak a," A va lawmawm ve!" ka ti duh chauh. Hetiang lam hi chu, ka muthilhsan rih a ngai. Ka chhûngte ka ngaihtuah hmasak ber an ngai alawm.

"Ka bialnu ni rawh?"

Ka phone chu ka thlauh lo chauh! He pa mai mai chuh, min va tiphu nasa ve! Ka kut dinglamin ka âwmah ka dawm vawng vawng. Lungphu chàwlin ka thi lo chauh alawm!

"Bialpa neih ka duh lo."

"Ka bialnu tal ni la?"

A va inhmeh lo tak! A rui deuh a ni mai lo'ng maw?

"Bialpa neih ka tum tawh lo, ka bànsan," ka tih chuan," Eng vàngin maw?" a ti leh a.

"Ka duh tawh lo a ni tawp mai."

"A chhan tal chu?"

"Chhan a awm lo, tun ațanga kum nga hnuah chuan ka nei ve mahna!" ka ti duh lekfang a.

"Ka lo nghâk ang che."

Leh zêl chuan. A mâwl a nih hi, a fiamthu thawh duh dàn hi a mak si!

"Mâwl suh!" ka ti leh ringawt bawk.

"Ka mâwl, tûn ațanga kum nga, ka chhinchhiah a nia," a ti leh sup a.

A tih tak tak loh ka beisei. A țhianpa ve ber Tea a ni a, ani'n min țhenin kan inkawp laia a lo kawp belh nupuiah a nei tawh a, fa pawh an nei tawh. Min khawngaih vàng a ni ang em?

Ni lo, ani hian min duh thei lo, a theih loh! Engtiziaa rawn sawi chhuak ve ringawt nge a nih le? Min duh lo, duhna mitmeng pawhin min la melh hauh lo, kei lahin chutiangin ka en ka hre bawk lo.

Huiha! Amah pawh hmuh ka hreh zo vek ang. A țhianpa Tea nèn kan ni reng țhìn a, nupui min neihsan vàngin min khawngaih ve a ni zâwk ang.

Aw, chu ngei chu a ni thei ang, min khawngaih vàngin min kawp a tum. Duhna pawh awm hauh lova min khawngaih vàng chauha inkawp chu, a râpthlâk ngawt ang! A țhianpain a ruahmansak te hi a ni lo maw le?

A hnua kan inhmuh leh hnuah chuan min rawn phone laia a thil sawi kha a sawi chhuak tawh hauh lo, kha maw, fiamthu a nih chiah kha, a sawi tih pawh a hre tawh kher lo ang. A ti vél mai mai a ni, khatih lai khan a rui a nih ka ring ta.

Tea ka tum loh deuhnaah ka hmu nawlh mai!  Serkawn damdawi inah kan thawhpui a awm ve a, chu chu kan kan e kan tia, kan principal ngeiin min kalpui a, chutah chuan a ni Tea ka hmuh tâk ni!

Damdawi inah chuan a lo awm ve tho niin! A lo chêr kuam mai a, tu mahin an lo awmpui lo zui. An nu hlui pawh kha a buai ve ngawt ang a, naute la tê tak a pawm àwm sia, damdawi inah a pasal hlui chu awmpui chu a duh ve ngawt ang. A chan chu ka chanah ka dah lo thei lo, ka pasal hlui mah ni se, innei tawh lo mah ila ka khawngaih tho àwm si a. Mahse, ani remchâng lo mah se, chhûngte pawh a nei reng alawm.

Min hmuh ve tho avàngin a hmuh loh der theih loh, a mutna bulah chuan ka kal phei ve a, a chanchin chu ka zâwt a. Rei erawh ka awm hman lo, mi dang kan tùra kal ka ni miau a.

Ka haw hnuah ka ngaihtuah lêt vang vang. Kan nih lai kha chu ni se ka buai ngawt ang chu! Awmpui ka duh emaw a ni ang a, ka phar buai dâwn lutuk.

A chungah thil țha lo thleng lo hrâm se ka ti, damdawiin hna a thawh țhat chuan a dam țha leh mai ang, min bumtu ni mah se, a chungah rilru chhia put ka thei lo, a khawngaihthlâk roh êm kha.

Zànah Muanzuala'n min rawn text.

*Vawiinah țhianpa i kan tih ka lo hria a*

A țhianpa damdawi in awm chu a lo hre reng a nih hi , ka bulah chuan a sawi hauh lo.

Engtin nge ka kal tih a lo hriat le? Min hmu em ni? Damdawi inah khân kan awm lai kha chuan a awm hauh si lo.

*I lo kal ve elo?* ka ti hé hâw.

*Eng nge in sawi a?*

Ka thil sawi ve hi chu, a hai der hmak thiam.

*Eng vak mah, a natna chungchâng ka zâwt alawm, ka lo kal fuh kher bawk sia* ka ti leh a.

*A nih chu*

A thinrim em ni? Nge a titau? Thinrimna a nei em ni? Ka chungah maw? Engvàng ngawtin maw?

A rawn call ta.

"Ka rawn lêng dáwn."

Ka maimichhïng vang vang, he pa hian eng nge a hriat ni hetia a awm? Țawng dàn tùr pawh min tihre lo.

"I țha em?" ka ti ta ringawt.

A nui hawk a.

"Ka țha lo ngai lo."

A confi thei a nia.

"A țhat chu."

"Ei châk i nei em?" a ti leh daih! A mak thei e, a thil sawi inpèrsan thei lutuk hi.

"Nei lo ve."

"Sawi ve mai la?"

"Ka hre lo alawm," ka tih chuan," Kum nga hnu lama thil thleng tùr ka practice mêk a nih hi," a ti leh a.

Ka rei leh! He pa hi, a ti tak tak hauh lo ang!!!

Ka thil sawi kha a lo la hre reng, a thil sawi pawh kha, a theihnghilh hauh lo!

Ka bialpa anga rawn lèn a tum a nih chu!

*I BENGA I HRIAT HMASAK APIANG KHA AWIH NGHÂL NGAWT SUH, A CHHAN CHU  THU DIK AIIN DÂWT THU HI A DARH CHAK ZÂWK A NIA*

☆A MAK!☆ - 12  By Dingdi Pachuau

Hetia awm a tum tlat hi a țha ka ti lo. Tea țhianpa a nia, fiamthu pawh lo ni ta tehréng se, miin fiamthuah an lo ngai lo thei, 'a bialpa hlui țhianpa nèn an inzui a, zah pawh a zak lo em ni le? Hei vàng hi a ni ngei ang, a bialpa hlui nèn pawh khân an ințhen?' an tih hlauh phei chuan a tihchi loh ngawt ang. Tunah phei chuan Teate an ințhen tawh lehnghâl a, țawng duh fe fe an tam si. Mi buainaa inrawlh ve chhén leh lo sawi ve phêt nuam an tam bawk si.

Bâkah, Muanzuala hi bialpa en pawhin ka en lo hrim hrim. Khati khawpa țawng duh lo leh nèlawm lo kha a ni a, tuna taka ngaizawng thar thut tùr phei chuan ka thei teuh lo. Bialpa neih pawh ka tum tawh rih lo, a bulah pawh ka sawi tawh kha, ka ti tak tak, ka chhûngte hi ka dah pawimawh rih zâwk e. Nunoi college chhuah hunah chauh ka nei ang, chutah chuan ka chiang khawp mai. Ka lo duh ve țhin ber ka nei thei ta lo rau rau, ka nei tawh rih lo ang a, min hmangaihtu leh ka hmangaih, ka harsatna leh ka nun dàn hre chiangtu ka la tawng ve a nih ngai chuan chu ngei chu neih ka tum ang.

A rawn lêng ta ngei. Tlangvâl lènin a lo lêng ve ngéi si a, ka nuih a za tlat a nih chu.

Thingpui sen hâng chu ka thlit a, a piah deuhah chuan ka țhu a.

"Ka tibuai che em?"

Ka en phei vat a.

"Engati maw?"

"Tih tùr țúl i neih chuan ti rawh."

"Ka nei lo," ka ti phawt a, chutah," Taka, i bialnu chu a haw phei tawh em?" nui chung hian ka ti a.

Min chhâng lo chuan min en ta rûn a, kei chuan," Eng nge, i bialnu angin a nih kha i sawi char char, a haw tawh em?" ka ti leh a.

"Ka bialnu angin nangmahin a nih kha sawi," a ti ta nghut a.

"Sawi tho e, 'A ni lo' pawh i tih bík loh kha aw, khami thuah kha chuan kan in-draw chiah," ka ti a.

A ngawih rùn avàng chuan titipui dàn tùr ka ngaihtuah a, kan ngawih reng lai chuan Nunoi chu room ațangin a lo chhuak a.

"E, i lo lêng a ni maw? I dam chiangkuang tawh em?" a rawn ti nghâl a.

Ani hi kei ang chuan a țawng tam ve lo, tawng chu a țawng duh ve tho. A hmel hriatte zîngah chuan a  nèlawm ve reng, Muanzuala hi chu a hre ve tawh a, biak pawh a hreh bîk lo a nih hi.

"Aw... I va zir nasa àwm ve?" a lo ti ve ngial a.

"Nasa lo ve...," tiin a nui a, bottle-a tui thun pah chuan," I lo lêng khât sia, léng reng rawh aw, hmai hup pawh an rawn kal lo ang tih a sawi theih miah loh a nia," tiin min rawn en a, a nui pût pût a.

"Eng hmai hup maw?" Muanzuala chuan a lo ti sup a.

Nunoi en reng pah chuan,"Ngawi mai mai teh, nangmah zâwk kha ka lo hup mai tùr che a nia," nui chung hian ka ti ve a.

Room-a a luh hnu chuan min enin," Kha thil min hrilh ang kha, i tawng leh tawh em?" a ti sup a.

"Aih, a bo tawh a niang."

"Hmun dangah a kal rih a niang, a lo la lêt leh tho chu ka ring," a tih chuan," I va sual tak! Min hnèm zâwnga i sawi ve ka ring a nia! Min la sawi țhaih zui," ka ti nang nang a.

"Thil awm thei a ni si alawm."

"Chu pawh ni se?"

"Ka hruai țhin che chuan hun remchâng a hmu lo tawp ang," a ti ta sup a.

"A ngai teuh lo mai, rawn kal leh mah se ka hlau tawh lo ang, ka au vak tawh ang," ka ti thung a.

"A phu zawk ang chu!"

A thil ngaihtuah ber kher chuh! 'Min rawn call vat ang a' emaw ' A țha viau ang, inring rengin i awm ang a, amah chu i mantîr hlauh thei dâwn asin' te a tih ve ka ring a nia...

Kan titi chu a ho lutuk a, a nuihzatthlâk ru riau bawk si. A thil sawi ve lah hi, thupui a fûn lo ve hlawm bawk si, a zângkhâi phian. Tea chanchin zawh ka duh viau nain han zawh dûk dûk ka hreh ve si a, a dam țha chho ve ta zêl tùrah ngai mai ang.

Inrinnia ka chhuahna lamah Micheal-a nèn kan hmu hlawl mai! Tlêmin a lo chér deuh hlek tawh a, a vun erawh a ngo thungin ka hria!

Ka remti vak lo chung restaurant-ah min hruai lût a, kan inhmu khât ve bawk a, hnial luih țùng ka duh ta bîk lo a ni. A bialnu erawhin min hmuh loh hrâm ka beisei, mi inkâr tichhetu nih ka duh loh kha.

"Eng nge i lo tih dâwn? Chuan, engtikah nge i haw leh ang?" ka tih chuan," Thawhlehni zíngah a niang, ka cousin-in Thawhțan khian nupui a nei dâwn a," a ti a.

"A nih tak chu. A va lawmpuiawm ve!" A cousin chu ka hre hauh lo; mahse, nupui a neih dâwn chuan thil țha a hmu tihna a ni a, a lawmpuiawm alawm!

"Nakin zànah lo lèn i phal ang em?"

Ka nui a," Lo lêng lo ang," ka tih chuan a'n meng khawngaihthlâk vêl a.

"Ka va khawngaihthlâk tak!"

Kan khaw chanchinte chu ka zâwt a, dam zet zeta țawngin a sawi  siam siama. A bula awm hi a hahdam a, a fel bawk si a, nupui țha tak a hmuh ngei ka ring tlat a ni. Mi fel chhûngkua an ni hrim hrim bawk a, a nupui chu a vànnei khawp ang.

"Inneihnaah chuan lo kal ve la?"

"Tih chi nâng!"

"Engah maw?"

"Buaina thlentu ka ni ringawt dâwn asin," ka tih chuan a hre thiam lo tih ka hre thei a; mahse, ka nuih tâk avàngin a hre thiam leh ta a niang.

"Kan ni tawh lo," a ti ta a.

Zawh chîk viau ka châk a; mahse, thil tih chi a ni hauh lo, a bialnu nèn an ințhen chhan lo zawh ve chiamte chu a, a chi loh rêng rêng!

Ei man a pe, ka tilui duh bîk lo. Mipa a nia, a pe lui dâwn tho tih ka hriat avàngin  leh mi hmuha inhnial vél a ngaih dâwn vàngin ka hnial duh lo a ni.

"A nih aw, nakin zàn chu, ka rawn call ang che," a ti a, kan ințhen ta a.

Chaw ei laiin Michael-a nèn kan inhmuh thu chu ka sawi a, Nunoi chuan," E! A tih chi dâwn lutuk! Lo lêng se ka ti, ka hmu châk," a lo ti a.

"Lo lèn chu a tum kha, a cousin-in nupui a nei dâwn a Thawhțanni khian. Min sâwm ve a," ka ti a, Nunoi chu ka melh ralh a.

"I kal ve ang tiraw?" Phûr zet hian a lo ti a.

"Nauvi, mâwl viau mah ta che, a thuphungin min sâwm ve mai a nih chu, min sâwm mawihnai ve tihna a nih chu," ka ti a.

"Kal ve tho la?"

Mâwl chhah ve sia aw...

"Chuan, a bialnu nèn an ințhen niin a sawi a-"

A khèk tuarh avàngin ka phu chiang lutuk!! Ka thil sawi pawh sawi zo hman lovin ka tàwp, chawhmeh ka suah lai ni phei se chuan ka thlauh baw vek hial ang chu!

"Mâwl-lu-lian leh!!"

"Țha lutuk!! A va tih chi tehlul em!!" ani chuan a lo ti thung a.

"Ngaihzawng ka nei dáwn lo ka tih tawh kha," ka ti ve thung a.

Nui var var chung hian," A lo hual lâwk theih alawm, mâkpa sawrkâr zêm zen neih chu a hlû asin. Bâkah, a duh tàwp thei lo che a nia, i vánnei tak tak," a ti leh a.

"Ngawi mai mai teh, ngaihzawng leh nupui pasal tùr phei chu a dang daih. I la dai tlém ém mai," ka tih chuan," U Tea hi ka haw tak tak a ni. I tawh a khirh phah vek," a ti nang nang a.

"Ka mit min mentîr alawm."

"Chu pawh ni se, a ngaizâwng tê tê che a, mi dang a nei leh daih sia, a ngeiawm ka ti tho tho," a ti leh a.

"An ințhen leh tawh asin," ka tih chuan," Hmm, an va daih rei lo ve! U, a lo beisei leh che pawhin  lo induhsan daih rawh aw, duh tawh miah suh, a ngeiawm êm mai.  U Michael-a hi a țha, pasal atân phei chuan..." a ti vang vang a.

A mak reuh tak tak!

Zànah chuan a rawn léng ta ngei a, tlangvâl lian lam a ni a, a thawmhnaw hâk a inhmeh khawp mai, ka hmuh chhunah pawh hian ka lo chîk vak ngai lo va, zanin erawh ka lo chík ve ta. A chhe lo, a hmel țha bawk e, hman ațanga chhe lo ka tih kha a ni hrim hrim a.

Nunoi pawhin lehkha a zir loh avàngin a lo be ve bawrh bawrh a, keimah tak aiin a lo be nasa zâwk.

"U Michael, engtikah nge nupui i neih ve ang?" tiin a zâwt ta pek a nih chu, hàu ngaihna a awm si lo, ka mitmei dâwn a, min en bawk si lo.

Ani chuan nui chung hian," Ka hmuh hunah a ni mai ang chu," a lo ti a, ani lah chuan," Zirtîrtu i nia, i hmu țeuh àwm sia," a lo ti leh.

Ka va bêng châk tak! Hetiang lam hi a sawi chhuah ka ring miah lo a nia.

"Min duhtu pawh ka hmu zo lo a nih hi," Michael-a'n a tih leh chuan," Pathianin a ruatsak che chuan i hmu hrim hrum ang; mahse, chutiang chu nei thei tùr pawhin beih ve a ngai a," a lo ti leh.

Awii!! He nu hi, hetiang hi khawi ațanga a zir chhuah nge ni le?! Mak ka ti reuh lutuk ringawt. Sawi ve tur pawh min tihre lo.

Thingpui ka pe a, ka țhu leh chiah tihah chuan kawngkhàr a rawn ri a, Muanzuala a rawn lang ve leh ta.

"Lo lêng rawh."

Ka țhutna ep chiahah a rawn țhu a, Michael-a nèn țhutthlèng pakhatah inhnaih lutuk lovin kan țhu a, Nunoi țhutna lamah a țhu a nih chu.

"I va fel, i rawn lêng a," Nunoi chuan Muanzuala hnênah chuan a ti var a.

"Nia, in in piahah sâwn ka rawn kal a."

"A nih tak chu, kan ina rawn lèn tum tak pawh  ni lo mah la i lo léng tho a, a làwmawm."

Zanin hi eng nge he nu tê hian a hriat ni!!! Ka țawng ve ngai hlek lovin a lo chhàwn char char a nia. Ka nuin hria se mak a ti ngawt ang chu, zanin hian a nula thut ni berin ka hria, a nau ni àwm zâwk tak ka ni.

Thingpui thlit tùra ka thawh lai chuan Nunoi chuan Michael-a bawk chu a lo be leh tawh a, hmm, a luangliam ve a nih hi. 'Nula a ni ve tawh tho alawm le' tiin ka inhnèm ringawt.

Eng eng emaw kan sawi a, Muanzuala erawh a dàn ngai têin a țawng tam lo leh pek khawp mai. Țawng tam hi a hlau a ni ang, Nunoi a țawng barh barh reng a, Michael-a'n a chhâng ve zauh zauh bawk a, kei lah chuti bawk. Nunoi titi kan ngaithla tlâng a ni deuh ber, an haw hunah ka zilh deuh hlak ang.

An lêng rei dùn ve tho, haw hmasa zâwk nih an hreh a ni ang, Muanzuala lah chuan 'Tlàwm ka tum lo' ti ni ang hrimin a țhu nghet churh mai.

Nunoi mut hnu rei vak lo hnuah chuan Michael-a a ding hmasa ta," Ka'n haw tawh ang e, naktûk lamah kan la inkàwm leh hman ang chu maw," nui chung hian a ti a.

"A la hma e."

Mahse, a haw ta tho, kawngka thleng ka thlah.

Nunoi a mu tawh bawk sia, sawi tùr a vâng ka ti. Min en rùn reng a, țawng a tum bawk si lo.

"Kan khuaa mi a nia, Michael-a kha i hria tiraw?" ka ti ringawt a.

"Ka hre lo nain ka hmu tawh."

Hmu tawh e, kan ina a rawn riah zànah tak Michael-a a lo lèn kha, Inrinni zàn tho a nih kha.

"Tea te chu eng vànga ințhen nge an nih a?" tiin thil dang daih ka zâwt.

A ngawih deuh reng hnuah chuan," An inning a niang," a ti sup a, awih lo zet hian ka en a.

"A va mak àwm ve!"

"Min hrilh bîk lo."

Hm, Tea'n a hrilh loh chuan ani hian a zâwt lul lo ang, ka hre ve tawh êm!!

"I mut a chhuak tawh em?"

Ka nui a," A chhuak ka tih chuan i haw dâwn em ni?" ka ti a.

"Um."

"A la hma e, ka meng rei ve thei lutuk."

"Dâwt sawi kher suh," tiin a ding a," Ka'n haw tawh ang e, naktûkah chuan i léng chhuak dâwn  em?" a ti leh a.

"Ka hre lo le."

"Lèn i duh em? Nge kha pa nèn khán in léng dâwn?"

A awmzia hi, Michael-a thu sawi kha a hre ve tak, kan lêng dùn tùrah a ngai a ni ngei ang.

"Ka lêng khât khawp asin," ka ti ringawt.

"A țha."

Mut hmunah min rawn text leh hrâm.

*Ka rawn kal ve kha, ka tibuai lo che u tiraw?*

A rawn inla-inthlahrung vêl.

*Buai lo ve, buaina tùr a awm em ni?*

*I bialpa a ni lo tiraw?*

Hm, a buainaah a lût țan e.

*Bialpa ka nei lo*

*A ngaizawng che tiraw?*

*Ka hre nâng* Ka sual ve tlat.

*Kum nga hnuah chauh ngaihzâwng neih i tum kha aw*

Ka nui sak, a lawmawm roh tlat.

*IN INLAICHÌNNAH KHÂN INHNIAL DEUH LEH INTIHTAUH KHUM BAR BAR CHÂNG A AWM VE ȚHÌN ANG, CHUTIANG A NIH LOH CHUAN IN INKÂRAH THURÛK IN NGAH DÛN HLE TIHNA A NI ANG*

☆A MAK!☆ - 13  By Dingdi Pachuau

*Kha thu ka sawi ațang khân ni tam a liam leh tawh, kum 5 a tling tawh lo*

*Kum 4 leh ni 342 a la awm*

WOW!!! A lo chhinchhiah thlap tihna em ni? Kei ngei pawhin a ni zât kher chu ka hre lo asin!

"A dik lo aw, ni zât kha a la dik lo* ka ti, ka hre miah lo; mahse, ka tihder ve a ni.

*A dik*

A dik ka ring, a confi êm mai.

*Zanin kha khawiah maw i kal a?*

*Nula ka rîm*

Kan in piahah a kal, tute inah tak ni ang maw? Nula an awm chu a ni ve ngei ang a, ka chhuak vâk lo lutuk a, kan in bul vêlah pawh hian nula an awm leh awm loh pawh ka lo hre lo!

*A chhe lo em?*

*Um*

Nia, rîm ve rawh se, kei hi chu min beisei lo se, bâkah, bialpa ka nei har dâwn asin, kum 5 leh ni 342 lai nghah ka la ngai a nia. Mipa lam hi melh ka duh tawh rih lo, an lo lêng a nih chuan ka lo be țha tho ang, min bia a nih pawhin țha takin; mahse, ngaihzâwng erawh ka nei rih lo ang.

Sunday-ah chuan ka lêng chhuak lo,  Michael-a pawh a lo lêng lo, call erawh min rawn call a, an buai vàngin thuphá a rawn chawi.

Thawhțan zànah Michael-a chu rei vak lo a lo lêng a, ka phone a lo ri ve chhên. Muanzuala a la ni zui, a phone a chiangkuang lo emaw ni, a țawng ka hre thei hauh lo, message ka thawn erawh a seen reng si, min reply bawk si lo.

Nunoi room lamah a awm daih a, Michael-a pawh tlêm chuan a ngampa deuhin ka hria, min rawn țhut hnaih tlat.

"Melo, engtikah nge in lo haw chhoh leh ang?"

"Ka hre rih lo le, Dec 20 bàwr vêlah daih a ni leh ang."

"A nih tak chu, ka hmu har leh deuh dâwn che a ni maw?" tiin a nui deuh a.

"Dam chuan hun a kal chak e, a lo thleng vat mai ang," ka lo ti thung a.

"Nia, dam hi han hauh phawt mai ila."

Eng eng emaw a sawi a, thil ho mai mai a ni a sawi ni. Chutiangin inngaihzàwn lam chungchâng a sawi miah lo, ka lâwm zâwk. A chhan chu hnial ngei a ngai dâwn si a, ka huphurh a ni. Ka duh lo pawh a ni chuang lo; mahse, ka hnial ngei dâwn.

Ruah sùr tlâwrh tlâwrh hun a pèl a, favàng khaw thiang mawi tak mai a inher chhuak a, chutah khua a'n rawn vâwt leh țan ta deuh a, inchei pawh a nuam leh deuh tawh e.

Dam țhat hi chuan hun hi chu a kal chak teh e, kan hriat lêm loh leh kan ngaihtuah lêm loh hian a lo ral duak duak mai a, a lo rei ve deuh ta a niang, Tea pawhin min rawn text leh ta zeuh zeuh; mahse, ka rilruah a tla na lo. Khati khawpa ka lo duh ve tawh kha a nia, ka rilru a tikîr viau thei hi mak ka ti zâwk.

Tûk khat chu kawr lum lam deuh hâk tùr ka zawnna lamah birthday gift ka dawn kawrlum deh nuam zet mai kha ka hmu chhuak leh nawlh mai a, Tea min pêk a nih nghe nghe kha. A mawiin a zângkhai tho bawk sia, ka duh chi tak a ni a, ani min pêk vàng ni lovin ka ngainat leh duh chi a nih vàng chauh chuan ka la chhuak a.

Ka hâk chhuah khàt vàngin School-ah pawh chuan Paul-a chuan min lo fiam phah.

"I inhmeh tehlul nèn, i ha chhuak khât e! I roh viau a niang, petu che rin ka nei mai a nia," a lo ti a.

"I ring dik chuang lo ang," ka ti a.

"Hmâna mi kha a ni ngei ang."

"I hre lo chiang."

"I roh dàn ațang hian in ințhen tawh tih hriat reng reng," a ti leh ta zêl a.

"Risk mai mai teh!" chu ka ti tak nain a ring dik roh ka ti.

Bàn dâwnah Muanzuala'n min rawn call. He pa hian tûnlai hian min rawn call khât sia, eng thu tak sawi ang maw? Min lo la hre reng chu a nih hi.

"Hello?"

"Tuition class i la kalpui em?"

"Kalpui tawh lo ve, engtizia nge ni?" ka tih chuan," Yes!" a tih sup chu ka hre thei.

"Min lo nghâk rawh, ka lo kal."

Leh ringawt țhìn hian. A duh a sawi zawh hian sawi tùr ka nei ve em tih a ngaihtuah lo rêng rêng, a duh a sawi zawh hi chuan min tihawihai ziah. Tunah pawh khân hnialna hun ka nei miah lo

A rawn lêng khât a, text erawh min rawn text deuh zut, tûn hnai tak hian a reh leh deuh a, call phei chu a hnên ațangin ka dawng ngai lo.

Kan bâng a, thawhpuite haw tùrin an insiam sap sap a, eng eng emaw sawiin an nui ham ham reng a, kei pawh nui sûng pahin ka insiam ve tho, Muanzuala chu ka ngaichâng pah deuh a, ka beng ka chhi ru pah kar.

Thawhpuite haw sap sap laiin a rawn thleng ve mai.

Mahse, mak deuh mai chu, a car ka hmuh chuan thil ka hre chhuak tlat! Tlêm lai deuha ka hnunga motor horn min rawn petu, hlauhlawpa min siamtu kha ka hre chhuak zawk. Muanzuala car nèn hian kha car kha a inang lutuk!

Motor-a ka luh chuan a back-seat lama bungrua ni àwm tak eng eng emaw awm nual chu ka hmu thei a, he pa hi eng thil fakau nge a lei ni? A inah lah bungrua a tam ve tawh nèn, a la lei belh tak sauh sauh a; mahse, ka zâwt duh chuang lo.

Kawnga kan tlàn lai chuan a lamah hawi hê hâwin," I motor ka hmuh hian thil ka hre chhuak a," ka ti a.

"Eng?"

"Hmai hup kha. Ka hrilh tawh che kha. I motor nèn hian a inang lutuk tih nichina i lo thlen khán ka hre ve chiah!" ka ti a.

A nui hawk ringawt.

Chutah, min rawn en zawkin," I kawr chu i inhmeh hle mai!" a rawn ti daih.

"Ka lâwm e. I inah ka thil tùr a awm tih min hrilh a ka rawn lam kha a nia, birthday gift a nih hi," ka lo ti a.

"I inhmeh," a ti nawn leh a.

"Ka lâwm nawn leh e," ka ti phawt a, chutah melh zauh pah chuan," Khawi emawah i kal em ni? I bâwr si," ka ti a, min rawn melh zauh a, kei chuan hnung lam chu ka kâwk zauh thung a.

"Aizâwl ațangin ka lo phei."

A ni maw? A reh chhan pawh Aizawla a awm vàng a nih chiah chu. A chhûngte bulah nuam ti takin hun a va hmang ve a ni ngei ang.

"I bialnu kha a dam țha maw?"

"Um, amah vàngin ka bâwr."

Hnunglama bungrua hi a nau rawn thawn a nih ngei dâwn chu, a nau chuan a ngaihsak hle a ni. A dam loh laiin a rawn awmpui reng tawh lehnghâl a, unau inngaina tak chu an nih àwm kha.

A in luah lamah kan tlân, min thlah haw hmasa dâwn lo phawt tihna a nia, a inah ka kal leh ngei dâwn a nih hi.

"Zanin chu...zanriah ei dùn ila?"

Awi!! Ka thî!

Ka rin loh lam daih! A dang a la âwk zui.

"Nunoi pawh kan lam thei tho a."

Kan unau hniha a ina chaw ei ringawt mai chu, a birthday-te hi a lo ni hial lo maw?

"I birthday em ni?"

"Chaw eia ka sàwm vàng che maw?!"

Ka hmui ka khawih neuh neuh. Nia, a àwm ang viau lo em ni? Kan unaua chaw eia min sàwm chuan eng emaw tak a niang chu, nge kan ina zanriah a ei kha, min rulh a tum zâwk?

"Ni ve tho e."

"Ka birthday a ni lo."

Kan ei thei lo ang. Hun pawimawh eng emaw chu ni se chuan ei mai pawh pawi ka ti lo a nia; mahse, chutiang pawh a ni si lo.

"Coffee ka'n lum ang e."

A tui leh ngawt ang chu, ka in châk tawh.

A tui lehpek khawp mai! Coffee hi chu a siam tui thiam thlâwt ka ti.  Bialnu a neih pawhin tui tâwk tâwkin a siamsak țhìn ngei ngei ang.

"Zanriah chu, ei rawh aw."

"Engati nge min sàwm tlat a?" ka ti leh hû mai.

"I ei ve ang chu."

Mak deuh mai chu, amahin eirawng a bâwl vek! Tihpui ka tumin a phal miah lo! Ka lo țhu vêl mai mai, Nunoi ka phone a, zanriah ka ei chhuak dâwn tih ka hrilh chuan mak a ti viau mai.

"Khawiah maw?!"

"A, hriat ve kher a ngai hlei nem," ka tih chuan a rûm deuh nghat chu ka hre reng.

"U Tea nén a nih loh hrâm ka beisei a nia," a ti zàwi raih a.

"Ni nâng."

"A nih, tu nén nge?" phûr zet hian a rawn ti leh a.

"Naupang hriat chi loh." A haw leh teh ang chu!

"U Tea nèn a nih loh chuan a țha a ni mai," a la ti zui. Tea kha chu a ngei ve tlat, min rinawm lohsan kha a hua a ni.

Rawng a bàwl zawh chuan a car-a bungrua la awm, lâk zawh loh chu a remti lo chung ka zu lâkpui a.

"I car ka hmuh hian ka hre chhuak leh tlat!"  Ka tih chuan," A ni maithei asin," a ti ta sup mai.

"Tak tak a ni em?"

"I hmuh a nia."

Ka mitthla lët a, a ni thei tlat a ni. Lu ka thing nar nar a, kha ni bâk kha ka hmu leh tawh hauh lo a nih kha, tûn thlengin. Mi lahin car leh hmai tuam, hup chungchâng an sawi lang bawk si lo, ka hriat sual a ni zâwk a niang. He pa pui roh pawh hi a lo ni tak tak maithei a ni.

"I ni tak tak em?"

"Ni maithei ka tih tawh kha."

A ni a ni ngei ang. Khatih laia ka hahzia leh ka hlauhzia kha ka ngaihtuah chhuak a.

"I va sual ve a!!! Min han tihțhaih kual vêl a niah. Ka hlauhzia kha," ka tih chuan a nui huk a.

"Engah nge min hlauh ngawt ni?" a ti thûm dût a.

"Kawng ka kian che a, i kal duh lo a nih kha," mitthla lët uar uar chung chuan ka ti a.

"Chhaih che ka duh alawm."

Min chhaih hlau chiang teh e!

"I bula ka rawn sawi khân min lo nuihzat ngawt ang chu!" Ka titau leh deuh.

"Ka nuih loh che kha."

"Chu pawh ni se, nangmah i ni tih tal min hrilh tùr alawm, ka hlauh ve nèn!" ka ti nang nang a.

"Rawn hruai che ka duh vàng a nia."

Hmmm, a lo ngai serious viau a nih kha. A car-a min hruai duh vàng chauhin maw min lo tihder a?!!

"Ka fiam che a, min lo hlau ringawt a."

Car chhûnga bungrua kan lâk chu in chhûngah kan pawm chho a, kan rem fel nghâl bawk a.

"Hlauh loh chi pawh i ni lo, hmai hup chanchin a lâr êm vei a nih kha," ka ti leh a.

Tui ti takin zanriah chu kan ei a, a ei tùr siam pawh a tui, min tihlauhlawp viau pawh kha, a thil siam ei chuan ka theihnghilh, ka titau deuh tih pawh ka theihnghilh vek!.

"I siam tui takzet a ni!"

"Kan inneih hunah pawh ka siampui vek zêl ang che."

Engtianga nasain nge ka sen nasat ang! Amah lah chu a nui hauh si lo, a țawng tam lo viau na hian min tihzahna leh min tihhlauhna chu a hre takzet a ni.

"Kum nghah tùr i la ngah lutuk!"

"Kum 4 leh ni 300 chuang hlek chauh!"

"Ni khat, ni leh lo, minute khat lek chhûng pawhin thil tam tak a thleng thei," tiin ka chhâng a.

Min en vung vung a," A nih chuan, i thil sawi kha i sût leh ang em?" a ti a.

"Eng chu?"

"Kum chungchâng kha."

"Kha chu a dik, ka sût lo ang. Mipa hi rin tawh loh rih ka duh-" ka tih lai chuan rang vut hian," Keimah tiamin maw?" a ti sup a.

"Aw, mipa zawng zawng. Break neih ka duh, ka chhûngte chauh ka ngaihven theih nân, hun ka mamawh rih a ni."

Dâwt ka hrilh thei lo. Ani hi tunah chuan ka țhian ve ber a ni ve tlat tawh, Tea țhianpa mah ni se kawm a nuam ve tawh a, a bula thil sawi lah hi, a nuam tlat.

"Ka nghâk thei che."

Ni lo, ni lul lo mai. Min nghâk tùrin ka duh lo, ka duh hauh lo.

"Ni lo ve, hun khawh ral mai mai loh tùr."

Muanzuala leh Michael-a hi ka kawm dàn a inang miah lo. Ani hi chu ka be bawrh bawrh thei tawh a, a chângin ka tihtauh khum deuh thùl, ka hriat loh kârin a lo reh leh a. Țawng duh viau lo mah se kei ka țawng duh thung a, ka ri bawrh bawrh țhìn rêng a ni.

Michael-a thung hi chu amah hi a țawng duh a, kan inang viau; mahse, a bulah hian ka inthlahrung tlat a nih chu. Min beisei ve tlattu a ni tih hre mah ila ani pawh hi 'Yes' ka pawh thei chuang lo ang, ka thutiamah din ngheh tlat ka tum. Nunoi college chhuak fel phawt rawh se, chuan, kei pawh ka lo upa ve tawh ang a, pasal nei rual pawh ka lo ni ve tawh ang a...

"Chu chu ka thu thu."

Ka ngaihtuahna ram ațangin ka harh chhuak zawk mai. Veng veng tak chuan leh!

"Ka țhianpa i nia, Tea țhianpa pawh-"

"Ani chuan tel vena a nei lo," a lo ti sup a.

"A țhianpa i ni alawm, ka bialpa hlui a ni bawk a, chuti chuan ngaihtuah la?"

A țawng ta miah lo.

Min thlah haw hnuah leh kan ina a lo luha Nunoi'n a biak țawng tih loh chu kei chuan ka be țawng lo achha a ni e. Ka thil sawi eng ber kha nge a duh loh ni?

Zànah chuan Tea'n min rawn text hlawl mai!  Ka number ka lo thlâk daih lo hi chu aw...ka ti rilru vawng vawng. Nupui a țhen tawh a, a rawn kal leh khurh ang tih te hi ka hlau a nia.

*A pa thihcham a nih vàngin țhianpa inah ka lêng a, kan pahnih khân kan kal ngun ve sia, ka rawn hre chhuak vawng vawng che a*

Aw, Muanzuala pa thihcham maw lo ni a? A pa a lo thi tawh tih pawh ka hre lo!! Chuvàng em ni chaw eia min sàwm tlat ni? Tea hi a sâwm ve bawk ngei ang chu, eng emaw vàngin a thei lo a ni ngei ang, thei ta se, inhmu khâwm țhâm ta ila, engtin tak awm ang maw?

A lo ei ve lo chu a tihzia hle mai.

A message chu reply ka tum hran lo; mahse, Muanzuala erawh chuan a pa thihcham a ni tihte min hrilh ve àwm? Mahse, min hrilh chu ka ring chiah lo, ani ang țawng tlêm leh thil sawi tam hlau tân chuan, ka lo beisei sâng deuh a ni.

Muanzuala ka va text ve ta thung.

*I pa thihcham a ni tih chu min hrilh ve tal tùr a nia* ka va ti. Ka rilru tak chuan ka thiam lo, ka va chhuahchhàl a ni mah.

Rei deuh tak hnuah chuan min rawn reply ve.

*Tea ațanga i hriat a nih ka ring*  tih tê mai hi.

*Ni e, sawi lo se ka hre nâng, min hrilh mang si lo* ka ti leh.

*Zanin hi ka pa thihcham a ni.  A țha em? In-text leh tawh r'u*

Leh mai mai hian aw. A țhianpa hi a thîk a ni hial lo maw?!

Ni lo tawp ang, thîkna chhan tùr eng nge awm? Ka bialpa lah a ni lo va, Tea nèn lah kan in-text țhìn pawh a ni hek lo.

A pa thihcham tih chu hria ila chuan a pa chanchinte chu ka zâwt ve ang a, țhian nihna ang pawhin ka han hnèm ang a...

Engtia thi nge a nih? A rei tawh em? An unau chu a nu chuan a châwm ta vek em ni tihte pawh ka zâwt ve duh maithei asin.

Mahse, hetah Lungleiah hian hna mumal tak neiin a rawn awm pawh a ni si lo va, nge ka hre chiang lo zâwk? Dik tak chuan a hna thawh hi ka hre chiang lo rêng a ni. Tea nèn kan nih laia kan lèn ve țhin lah khân a țawng ngai lêm lo bawk sia, Tea lahin a chanchin a sawi ngai tehchiam bawk si lo, hriat chu a har ve êm asin.

*A pawi ka ti hle mai*  ka va ti ringawt.

*Eng chu?* a rawn ti leh.

*I pa chungchâng chu maw le, a pawi ka ti*

A hnu daihah chuan *Kan thi vek dâwn alawm*  a rawn ti.

A dik khawp mai, thi tùr vek kan nia, a hma kha chuan tar, kum upa lamte'n țhalai leh naupang zâwkte min kalsan țhìn kha a ni ngai a; mahse, tunah chuan a ni tawh lo, țhalaiin tar leh naupangte kan kalsan tawh zâwk, thihna hi kan cho chhuah liau liau niin ka ngai tawh.

*Zanin chu nula i rîm lo a ni maw? Kan inah pawh i rawn pêng lo tlat*  tiin ka va fiam leh, thu dang daih zeh loh chuan a țha lo.

*Inlêng ka nei miau a*

Min reply zêl dànah a lung a awi lo tawh lo a ni ngei ang, tlai zanriah ei khamah kha chuan a țawng thei tawh lo kha a nia, tunah erawh a zia ta e.

*DIKNA HMUHTÎR THEI LOTU CHE HNÊN AȚANG CHUAN RINAWMNA PAWH BEISEI NGAI SUH*

☆A MAK!☆ -  14

By Dingdi Pachuau

Class ka lâk hlànin Nunoi'n min rawn call a; mahse, ka chhàn theih loh avàngin mesage a rawn thawn leh.

*U, ka țhutpuinu nikhaw hre lovin a tlu thut a, damdawi inah ka kalpui a nia, a chhûngte ka nghâk mêk, ka lo haw har deuh maithei*

A va zia lo țhìn tak êm! A mang a ang dâwn êm mai, a chhûngte chu an rawn thlen vat ka beisei, a thiannu pawh chu harh chhuak vat teh se.

Rawng ka bâwl a, ka bàwl zawhah chuan Nunoi chu a lo la haw loh avàngin ka phone a, a rawn haw thei țép tih a rawn sawi a; mahse, chaw eisan tùrin min hrilh thung.

Zanriah ei khamah Tea a rawn lang hlawl mai, kawm dàn tùr ka thiam lo hle a; mahse, amah zâwk chu a titi a, an nupa chanchinte leh an ințhen chhante chu a sawi hlauh a, ka tân chuan lo sawi ve vak tùr a awm lo va, a tihzia viau.

Ngaihdam min dîl bawk!

A chhan chu min rinawm lohsan a.  Kan nih lai reng khân hmeichhe dang a mutpui a, a ruih vàngin. A hmeichhia nèn hian hmân ațanga lo inngaizawng ve hrep tawh an lo ni a, hmeichhia hi hmun dangah Tea remti lo chung a kal bo a, thil zirin. A lo haw hnuah kei nèn kan lo nih tawh avàngin pawh țhen tumin a rawn zar leh a, min rinawm lohsan pawh a tum bîk lo; mahse, an inhmuhnaah zu an in a, a zu in tùrah damdawi a lo telh a, an mu dùn ta a ni àwm e.

A sawi dàn a nia, a dik nge dik lo ka hre lo; mahse, rilru lamlêt ka tum chuang lo.

Hmeichhia chu a lo rai tâk avàngin a pain nei tùrin a ti. Kei lah pasal neih ka lo remchâng lo bawk si, a rilru hah mangang, tihtheih nei bawk si lo leh mipa a nihna anga mawhphurhna lâk ngai chuan a nei ta a ni; țha taka neih a tum; mahse, a nupui zâwk chuan an inneih hma ațang tawhin ngaihzawng dang a lo nei niin. A buai nuai a nih ber chu.

"Ka thiltih khân min vaw lêt ka ti lo thei lo."

A dik ang; mahse, nupui pasal inkâra inrinawm lohsan kher hi chu a râpthlâk ngawt ang, kârah fa a awm tawh phei chuan. Keini kha chu inngaizawng kha kan ni mai a, innei pawh kan la ni hek lo, lo inrinawm lohsan pawh ni ila rilru na tak chung pawhin hriat thiam theihna chin a la awm ka ti ve tlat.

"A pawi hle mai," tih bâk sawi tùr ka nei lo.

"Naute pawh kan la, a nuin a ngaihsak miau si lo va, a buai ve theih reuh lutuk. Nu buai theih tùrzia leh an mawhphurhna sànzia ka hriat phah; mahse, tunah chuan a lian ve tawh a, khawngaihthlâk viau mah se kan chhûngkaw hlimna ber a ni ve tawh asin."

Ka khawngaih phâk ni lo mah se ka khawngaih roh tlat a nih chu. A thiam loh chu a ni teh meuh mai; mahse, a pawm thlap tawh, a tisual chhiava tih a inhre bawk.

"Hmeichhia in lo inan lohzia hi ka ngaihtuah neuh neuh țhìn, ka nupui kha ka ngaihsak viauin ka hria a; mahse, keimahah khân hlimna a lo nei rêng rêng si lo, ka sum leh pai chiah a duh ka ti mai. Khatiang kha a lo ni ang tih ka ngaihtuah phâk lo rêng réng. Ka rinawm lohsanna che chuan min rawn ûm zui a, min man a, min sual hrep hnuah min phihthlu ta chawrh a, nâ ti viau mah ila tlûk hlen ka tum bîk lo. Enkawl tùr fa ka nei a, a tân nu leh pa niin tha taka enkawl chhoh ka tum."

"Nula fel tak i ni a, min haw ngawih ngawih tùr i ni tih ka hria; mahse, i lak ațang hian țawngkam mawi lo leh hriat nuam lo, thinrim țawngkam pawh ka hre miah lo, i lak ațang hian zir tùr ka hmu chhuak țeuh a ni," a ti leh a.

Ka zak zâwk! A chunga ka thinrim ve zia kha, a hriatah ka sawi chhuak lo mai mai a ni reng si a.

Nunoi a rawn haw tâk avàngin kan titi a tàwp ta rih a, a țhiannu ni khaw hre lova tlu chanchin chu lo zawh ve a ngai tlat bawk sia, ani pawh a lêng rei ta lo.

"Eng nge a lo tih a?"

"A lo lêng a nih kha. I țhiannu chu eng nge a an tawh a? Tuin nge lo thlah che?"

"A la zia lo, ICU-ah a awm. Ka ngaihtuah che sia, a pain min lo thlah tawp alawm."

"Chanchin rawn ngaihven chu ka duh ve reng a; mahse a lo lang ve thut bawk sia.."

"A zak lo ka ti," a ti teh thlâwt a nih chu.

Thil awmzia chu ka hrilh ve thuak thuak, a demawm ve tho nain Nunoi  hriatah chuan ka dem duh lo. Demna thu hlîr mai inhrilh hi chu a fuh lo, rilru a hruai kâwi thei tlat si a, kan demate chungah khân rilru dik lo an put phah thei tlat a ni.

A tûk zànah Nunoi chu damdawi inah a riak ve, a țhiannu chu ICU ațangin a chhuak tawh a, ward pângngaiah a awm tawh a. Ka hlau hran lo, mut hma zàn a ni mai.

Muanzuala a reh vang vang si a, a ngaihawm roh mai mai. Thúm zet zet khân min hnial leh se, țawng ngaihna a hriat loh thlenga hnial leh kha a châkawm.

Ka ngaihtuah hria ni àwm takin min rawn call ta hlauh mai!

"Hello?" pawh ti lo chuan "I va reh êm êm!" ka ti vat a.

"Aizawlah... ka awm a."

A aw thâm zet avàng chuan ka phâwk kher mai. Khum ațang chuan ka țhu chhuak nghâl vat bawk a.

"I țha em? Engtizia nge i aw chu?"

"Ka...accident a."

Lalpa leh! A nat viau loh hrâm ka beisei, ka rilru chu a phâwklêk kher mai. A țawng lah chu, a tàwp chut chut a, hriat a harin a zawih bâkah a thâm êm êm bawk si, a insawh khawlo chu a ni êm lo ang chu maw...

"A va pawi ve!! I nat viau loh hrâm ka beisei, i reh ka ti lutuk a, ka lo ngaihtuah lai tak chein i rawn call a," ka tih chuan a rûm nghut a.

"Min rawn...call i tum...chuang hlei nem," a tih chuan ka dang dèr!

"Nia...ka tihpalh, hetah i awm reng emaw ka ti char char a," te ka ti kual ta vêl mai mai, tlêm têin ka inthiam lo ve deuh hlek.

Hmeichhe awin," A mak thei! Doctor-in țawng rih lo tùra-" a tih lang lang lai chuan," Doctor...a lo kal...dâwn, ka dah...rih ang," a ti a, a tàwp nghâl hmak bawk.

Aw ka hriat kha a nau aw kha a ni chiang mai. A thil sawi kha, Muanzuala chu a insawh na phian a nih ka ring deuh ta tlat, ka awm a tinuam miah lo.

Ka meng kar a, dâr 9 chauh a la ni. Pathian zârah ka dam țhat theih êm avàngin damdawi in lama an hun hman dàn hi ka hre lo takzet a, zànah doctor-in ward a fang țhìn em tih pawh ka hre lo; mahse, Muanzuala ni lo a nau kha biak ngei ka duh, call back ta ila ani khân min lo chhâng ang em? Muanzuala kha chu a nau sawi dànin doctor khân țawng a la phal lo a nih kha.

A hnuah ka huaisenna sâwm khâwmin a number chu ka hmet chhuak a, ka call chhin, ka duhthusàm ang ngeiin a nau chuan min  lo chhâng.

"Aw, Melo? Muanzuala nau Zorini ka nia..."

Fel thlap thlap mang tak e.

"I u chanchin kha nichin khân ka hre ve chauh a, a pawi ka ti lutuk! A țha lo viau em?" ka ti ta chawt a.

"A zia ve tawh lutuk! Ngaihtuahawm a ni tawh lo, tunah chuan thil pawh a ei thei țan tawh, min vìn tùr erawhin aw a la nei chau rih a," tiin a nui kar kar a.

"A zia lo tak tak a ni, engtin nge a accident a?" tiin ka zâwt leh a.

Bike-ah a chuang a, kawng sîra a din lawk laiin zurui khalh bolero-in a rawn su bur a nih chu. A bul thîrbanah a lu a sawh bur a, helmet khum lo phei se chuan a thi hial ang chu. A malpui ruh a tliak a, hliam dang pawh a nei nual, thisen pawh a chhuak nasa a nih chu. Nikhua a hre lo nghâl a, Bolero-a chuang vete pawh chu an rui bawk nèn, anni erawh an na lutuk lo hlauh, an motor erawh a chhe ve nasa ni àwm a ni. Motor dang rawn tlânin an rawn hmu a, bâwihsâwmin damdawi lamah an tlànpui nghâl.

"Kâr khat zet kan awm ta a, a rawn harh chhuah hnuah hian a buaipuiawm tak tak a ni, țawng pawh țawng țha thei lo leh kal thei hawt si lo hian rawn phei zu tum a! Ngaihtuah ngai miah lo hian awm ve se chuan ka rawn thawn phei tawh ang," tiin a nui a, chutah," Hei tunah pawh min melh rum nasa a nia, doctor-in țawng a la phal loh vàng hian a hmuhah phone pawh ka dah duh lo va; mahse, hei a lo hmu chhuak a nih hi.  A țawng țha thei lo pawh hi a zia viau mai, chuti ni lo se chuan min àn khum nasa ngawt ang chu! A damloh buai laia i hming lama a țawng chhuah rinzia chuh! A zahthlâk lek lek záwk mawle. Tunah lah a aw hi heti hi a ni leh tlat bawk sia, a mak tak tak a ni!" a ti leh bawrh bawrh a.

"A mumangah min hmu ang a, kan lo inhnial leh a niang," nui chung hian ka ti ve a.

"A niang, inhnial hi a hrât a nia."

Muanzuala mizia ka ngaihtuah a, a nau thil sawi chuan ka nuih a tiza lutuk ringawt, a inhmeh lo hle si a.

"A chanchin ka hriat chu làwmawm viau lo mah se, a làwmawm tho e. Lo dam vat vat rawh se, inhnialpui tùr ka nei lo va, a khawharthlâk," ka tih chuan a nui kar kar a.

"Nia, a thi lo hlauh a, a làwmawm. A dam vat mai ang, a dam deuh huna min vìn phar nasa lutuk tùr erawh a tawrhhlelhawm thlâwt."

Fiamthu chu a duh ve reuh hle mai.

Engtin nge ka hriat loh le? News velah an tilang lo a ni ngei ang, tihlan àwm tak chu a nih tehlul nèn, TV-ah chuan an tilang pawh a ni maithei a; mahse, whatsapp lamah chuan ka dawng miah lo. Tea pawh khân a hre lo a nih hmel, a sawi lo êm mai.

Keimah zâwkin ka va call ta. A chanchin, a changkàn chhoh zél dàn hriat ka duh, bâkah ngaihtuah loh lutuk chuan a dam hunah a tawrhhlelhawm lutuk ang.

Krismas rim a lo nam leh țan ta. Hmun hrang hrangah Krismas hla an play leh dup dup tawh a, Boney M music hriat chuan rilruin Bethlehem lam a hawi lo thei lo. Mi tin mai chu Krismas lo thleng tùr inbuatsaihna tùrin an hmanhlel vek emaw tih mai tùr a ni.

Muanzuala a lo phei tawh a, a ke erawh a la bãi. A nau bawk chuan a rawn pheipui a, kei pawh a rawn thlen tlaiah ka lêng nghâl. A hmél chu a dâng deuh a, bâkah, a dinglam bekah chuan ser a nei dâwn chiang, a kak tih hriat tak hian a la sen deuh a, a mit pawh tlêmin a tilang bui deuh.

A in chhohna step a ni si a, ka huphurhpui viau; mahse, engtin tin emaw an indawm chho a niang, țhuthlêngah a lo țhu vùng a, min lo en vung vung, a na rei ve deuh a, tlêm chuan a chèr phah vein ka hria.

Ka țhutna bîkah chuan ka țhu leh a, a  lam hawiin," A na viau ang tiraw? Mahse, hei dam takin kan inhmu leh thei a, a làwmawm, ka hmu țha khawp lehnghâl che a, a làwmawm ka ti tak tak a ni," ka ti a.

"Ka chhe ngai lo aw," a lo ti nghut a, Zorini ve thung chuan," Nia, hei a làwmawm lutuk, lo phei theih loh hi a hlau lutuk a, doctor pawhin a nuih nasa alawm, dam a inti tawh teh a nia," room ațanga lo chhuah pah chuan a ti a.

"I khawi lai nge la na?"

"A na vek!"

"Chuti, ngati nge i lo phei a? Damdawi inah la awm tùr alawm," ka ti hlak hlak a.

Min en ngur pah chuan," Min rawn kan duh hlei nem," a ti leh nghut a, Zorini a lo nui hak a.

"Naupang chhia chiah chiah! Chhuah ngènin a țap lo chauh maw le," a tih chuan kei pawh ka nui ve tho.

"A nuar deuh tihna a ni maw?"

"A ke kha dam țha deuh phei se chuan a leng nasa ngawt ang chu, a tawrhhlelhawm a nia, Lunglei ngaiin a kûr nasa alawm."

Zanriah ei tùrin min sâwm nasa a; mahse, ka hnial. Ka lêng tawh a, a tâwk rih viau e.

Zànah message min rawn thawn a.

*Lungni lo miah suh aw* a rawn ti phawt, eng vàngin nge maw ka lungnih loh ngawt lém ang?

*Thil ka lo hawn che*

Hm, a thlàwna thil dawn ka duh loh kha a hre ve a ni ngei ang chu.

*A thlàwnin maw?*

*Aih, i duh loh kha*

A dik chiah.

*A thlàwn dâwn miah lo* a rawn ti leh a.

Ka hre châk, eng thil tak ni ang maw? Min rawn hawn ve ngat a ni àwm si a, a thuhrimah Aizawlah khân eng thil nge a va tih rêng rêng ni? Zawh pawh ka lo zâwt miah lo va, a chhûngte a va kan ve a niang, a chhûngte chanchin hi ka la zâwt ve chhin ang, Zorini bâk hi ka la hre lo, bâkah, mi dang a sawi ngai lo va, a pa ka hriat ve deuh chhun lah a boral tawh bawk a.

*******

Krismas bazâr tùrin ka nauteho an lo kal a, an duhzâwngte an lei ve a, Taia pawh  a fin ve deuh tawh avàngin leh ka nuin a zilh nasat vàng a nih ka ring, a naute anga ît zawng ringawt lei lovin a mamawh chauh a lei, ka fak reuh a nia. Kan harsatna a hre thiam ve tawh hi ka lâwm a ni, rilru pawh a nei ve deuh thei tawh ang a, zirnaah pawh țan a lâk phah viau ka ring bawk.

Kan haw chhoh hmain Muanzuala chuan chaw ei khâwm a rawt a, a țha ka ti ve reng, Zorini pawh a la haw phei thei bîk lo va, ani pawh chu a lo phûr khawp mai.

Tea, Nunoi nèn kan pangain Muanzuala inah chuan kan ri ve laih laih. Amah ber chhuak tùrin a la in-fit lo va, kan pan chilh a nih ber chu.

Tea a awm ve vàngin nuam lo ka tih phah hran lo, Zorini'n a be bawrh bawrh reng a, kei pawhin ka be tho a, Nunoi erawh chuan Muanzuala chauh a biain ka hria.

Ka Birthday-a Tea kawrlum min pêk kha ka ha a, a lo hriat chhuah loh hrâm ka beisei. Ka hâk chhan chu kan chhuah dâwnah ka hmanhmawh lutuk a, ka hmuh hmasak ber ka ban tawp vàng a ni.

"I kawr chu i inhmeh ka ti hle mai."

Zorini a nia, min en vang vang a.

"Nia, inhmeh tùr a thlang thiam khawp mai."

Tea ve thung a ni, ka en phei a, ama min pêk a ni sia, thup a tum a ni ngei ang, a'n hre lo der vêl a nia.

"Ka lâwm e," ka ti ringawt.

Zorini nèn ei tùr kan buaipui lai chuan ka beng bulah rawn thle phei deuhin," I inhmeh ka ti tak tak. Ka leipui lai khân hetiang tak hian i inhmehpui ang tih ka lo hre miah lo va," a ti sar sar a.

Hre thiam lo tak hian ka en deuh há a.

"Hmeichhe kawr a lei vawi khatna a ni hial ang chu, leipui tùra min sâwm phei chu mak ka ti lutuk a!"

He kawr hi Tea min pêk emaw ka lo ti char char asin!! Muanzuala min pêk maw lo ni a! He pa hi, mak ka ti kher mai!

*I LO CHÎK LÊM LOH, I NUNPHUNGA ENG ENG EMAW, HO TÊA I NGAIH LAI A LO CHÎK VIAU A NI TIH HRIAT HI A NUAM VE MAI MAI*

☆A MAK!☆ - 15

By Dingdi Pachuau

Muanzuala chu ka enthla ta deuh a, min en duh miah lo a nih chu! Min en duh miah lo va, Tea che vêl leh hawiher erawh chu a en ngun nasa. A mit chu Tea chungah chauh a fù ni maiin ka hria.

A Aizawl rawn hawin ei tùr  tuihnai hmel tak tak siam tùr min rawn hawn a, 'a thlàwn dâwn lo' a tih chhan chu min siamtîr a tum vàng a lo ni. Ka lèn apiangin ka siam ziah, a tui hlawm khawp mai nghe nghe a, ka hnial duh loh chhan chu a la damkawr a, ei tùr țha ei tam se ka duh vàng a ni.

"U, kan haw tawh mai dâwn em niang?"

Zorini chuan," A la hma alawm," a lo ti vat a. Tea pawh a bet vak tawh lovin ka hria, a țhu nghet vak tawh lo.

Dâr 9:30 a nih tawh vàng a nih chiah hi, Nunoi'n haw a lo duh tawh ni. Lehkha a zir loh chuan hma taka mut a duh ziah, a mut a hun leh tawh tlat.

"Nia, a pawi lêm lo."

"Bawihi, Melo-ite chu va thlah la, chahbi chu ka dahna i hriat kha," Muanzuala chuan a lo ti sup a.

Tea chuan," Bike ka lo keng khanglâng alawm le, thlah pah che u a rem dâwn nèn," a lo ti vang vang a.

"Bawihi'n a thlah dâwn alawm."

Haw kawngah chuan Zorini chu a titi barh barh a, Nunoi'n chhàwn zauh zauhin kei erawh keimah ang lo takin ka lo ngawi kar thung, ka inhmeh lo lutuk.

Muanzuala chuan engati nge kawrlum hi min pêk ve ngawt le? Khatih lai khân Tea nèn kan ințhen tawh a, min lo beisei nghâl tihna em ni le? Kei lahin Tea min pêk emaw tiin birthday gift a nih vàng chauha hnar duh lo kha ka ni ve sia...

A lo inbum chian theih khawp mai.

Thlen veleh ka va text nghâl.

*Min lo bum chiang hle mai* tiin, teh ringawt chuan a.

*Tu mah ka bum ngai lo* a rawn ti.

*Zanina ka kawr hâk kha, nangma min pêk a nih reng kha* ti fuh inti tak hian ka ti a, hetia min tikual vêl mai mai hi ka duh lo, min bum hneh si.

*Ni e*

*Engati nge i zêp tlat a?*

*Min zâwt hlei nem* Leh khauh mai a. Nia, ka zâwt hauh lo a nih kha, Tea min pêkah ka ngai tawp a, zawh fiah pawh ka tum chhin miah lo a nih kha, ka rilru ka lo kalpui tawp a ni.

*Eng vànga ti nge i nih?*

Min reply har ta deuh.

A hnu daihah chuan *Țhianpain a țhen che tih ka hria, i birthday-ah thil a pe țhìn che a, in ințhenna la rei lo bawk nèn, i birthday-a thilpêk i dawng tawh lo tùr kha ka ngaingam lo a ni. Ka hming ka tilang kher lo a nih kha, kha vàng khân ka bum che niah ka inngai lo, tu hnên ațanga i dawn nge tih chu min zâwt la chuan ka hrilh ngei ang che* a rawn ti duah.

Ka ngaihtuah a, ni e, ka lo zâwt bîk lo. Țawng tlêm tak a ni a, mi, thil a zâwt ve mai mai lo, anmahniin an zâwt a nih chuan a chhâng mai, zâwt ila min hrilh ve mai àwm si a, ka thiam loh a ni ta zaw mahin ka hria.

"Ka tihpalh, chuan ka lâwm e* tiin ka chhâng. Min lo ngaihtuah vàng vek a lo ni si a, ka rilru ka lo kalpui lutuk a, ka inthiam lo.

*A thlàwna thilpêk dawn kha i duh lo țhin tih ka hria; mahse, kha kha chu i birthday-a mi a nia, i lungawi lo thei lo ang*  a rawn ti deuh tlat.

*Awi e, ka inhmeh êm kha*

*******

Krismas-ah chhûngkua dam takin kan inkhâwm thei a, ruai kan țheh vek thei bawk. Dam tlàn hi a hlu a, inhmangaih phei chuan dam man hi a awm hliah hliah mai bikin ka hre țhìn.

Michael-a a rawn lêng zauh zauh; mahse, Krismas lai ngang a nia, kohhran lamah leh zaikhâwmna lamah ka theih tâwpin ka inhmang ve a, a chhan chu Lungleiah chuan ka hman ve tawh țhìn si lo va, mahni khua haw lai tal hi chuan a theih anga inhman hi ka duh a ni. Chuvàngin, Michael-a pawh ka kàwm hman lo a ni ber.

Hun thâwl kan neih ve lai pawhin inngaihzàwnna lam a sawi ngai lo, ngaihbel theih tùr ang chuan a țawng leh zauh a, chu chu a duh tâwk a ni maithei. Sawi mah se ka hnial dáwn tho si a, a lo hre ru te hi a ni hial ang ka ti.

Muanzuala pawhin min rawn call zauh zauh. Chhuak lovin inah a tawm tlawk tlawk tih min hrilh chuan ka khawngaih roh, dam țhat chuan ina awm chu a zia thei mai; dam țhat loh phei chuan a ninawm dâwn lutuk.

Kan inbe tam telh telh a, ka ngaina telh telh. A mize luhlul leh țawng tam lo zet, kan mize inpèrsan lutuk leh inkáwm ve reng si hi ka ngaihtuah chian chuan mak ka ti. Țawng duh vak lo pawh hi an lo nèlawm thei tho a lo nih dâwn hi, ani pawh hi a ngaihawm ve tho.

Ka birthday zîngah message min rawn thawn a, min duhsakna thu thlum zet mai hi a ni a, birthday gift-ah pawh clutch mawi zet leh pheikhawk ka dawng, birthday thilpêk a nih miau avàngin ka hnial thei hauh si lo.

Tûn țum chu Nunoi hnên ațangin dawn ka nei, Zorin hnên ațang pawhin. A làwmawm ka ti lutuk.

Heta țang hian zîng tin morning wish ka dawng ta ziah, chu pawh dâr zât inang thlapin!

*******

Kan chhûngkaw chanchin min zawh avàngin Zorini chu ka hrilh sap sap a, ngun tak hian a lo ngaithla a.

"Unau in tam sia,a nuam ngawt ang!" a ti vang vang a.

"Aw, nuam e. Bâkah, upa ber ka nia, ka thu an awih ve thiam tawh a, mipa mah ni se kîlkawi an harsa lo va, a zia lutuk," ka ti a.

"A nih tak chu, in vànnei hle mai. Nu leh pain an la dampui che a, duat takin enkawl rawh," a ti eh sap sap a.

Kei chuan a lam hawiin," Ka lâwm e, zawh mawi leh mawi lo ka hre lo va, chhàn a nuam lo a nih chuan min chhâng lo  mai dâwn nia," ka ti té té  a, chutah," I nuin a la dampui ngei che uin ka ring a," ka ti ve

 a.

"Min la dampui ve ve e."

Muanzuala pa kha chu a thi tawh bawk sia, a awmzia ka va man lo tak!

"Nangni angin unau kan tam lo va, pathum chauh niin kei hi hmeichhe awmchhun ka nia, chhûngte duat rawn ka ni a nih chu," tiin a nui deuh sak a, chutah rawn kûn hniam deuhin,"  Mahse, hmeichhe kawm tùr ka awt ve thei lutuk," a ti leh sap a.

Kei chuan ka nei, mipa kawm tùr pawh ka nei, nu leh pa nèn, ka vànnei asin.

"Ka hriat sual a ni loin ka hria, i u hian a pa a boral tawh ni khân a sawi sia?"

A u lam chu a hawi zauh a, ani erawh chu tui takin țhutthlèngah a mu thung, kan titi chu a hre hauh lo ang.

"Aw, a boral tawh. Tuna ka u chiah nèna kan pa hi a pa tak a ni ve lo va," a ti zawi sap a.

A lo nih mai mai chu a. Kan inang chiah a nih chu, kei erawhin ka pa tak chu a la dam nge a thi tawh tih erawh ka hre lo thung.

"Ih, sawi tùr a tam lutuk. A țhian țha tak i nia, a chanchin hi a la hrilh lo che a nih ka ring. Mak ti duh suh, a chanchin hi mi a hrilh ngai ka ring lo, amahin a tuar ngawt ngawt zêl," a tih chuan makti zet hian ka lo en reng a.

"Ka nu leh a pa tak tak hi an innei lo va, an inhmangaih viau nain a pa hi a rethei a ni àwm e, ka pute (ka nu pate)lam hian an duhpui thei tlat lo va, a rai țantirh laiin an dah bo ta daih a. Kum 5 vel zet a ral hnuah chuan, ka nu chu a fapa nèn an rawn lêt ve leh ta a; mahse, an rawn lêt meuh chuan ka u pa chuan nupui a lo nei tawh a, chanchin pawh an inhre ta lo vang vang a."

"Kum khat hnu vêlah ka pa hi ka pute'n ka nu nèn chuan an inneihtîr ve ta a, chuan keini hi kan lo piang ta a."

"U Mama (Muanzuala) hian a len deuh hnuah a pa chu a zawng chhuak a; an inhmuh ațanga kum 2 -naah a pa chuan a boralsan leh ta daih a. U Mama hi chu ka ngainat êm avàng hian ka khawngaih țhìn, hna avàngin Lungleiah a rawn awm ta daih a. A damloh theih lohah chauh ka rawn pui thei ta a; mahse, hei pawh hi ka lâwm tâwk viau a ni," a ti barh barh a.

A chanchin țhenkhat chu ka hre ta a, a khawngaihthlâk roh ka ti.

"Ka sawi ta țeuh a nih chu, a țawng tam lo si a, a țawng tlèm avànga ngêng ti tlat pawh an awm, vawi khat pawh an sual phah nghe nghe, a mizia a ni ve a, a inlâk ngèn vàng a ni lo," a ti leh a.

"E, chuan thurûk ka hrilh ang che. U Mama hian bialnu a nei ve tawh ngei a, kan inah pawh a rawn hruai ve thlap, ka pain a duhpui lo va, an inhau a, U Mama ka khawngaihzia chu, awmhmunah ka lo țap ve pûr mai maw le. Khata țang khân a hlim hmel hmuh tùr a awm tawh lo, tunah erawh a zia ve leh ta a," a ti leh sap sap a.

Ngawi rengin mak ti si, ngaihnawm ti bawk siin ka lo ngaithla reng. Kan awm dàn a inan avàng chuan a nun dàn tùr chu ka hre thiam pha lo nain tlêm chu ka hmu thiam ve deuh. Kei chu tuna ka pa hian fanu ang chiah, a thisen zawmpui ang chiahin min en a, min hmangaih a, ka pa tak tak khân hei ai hian min hmangaih bîkin ka ring lo. Chuvàngin ka pa hi ka hmangaih a, a fanu nih reng ka duh.

"U Mama hi Aizawla a rawn phei pawhin kan inah a lo kal tawh ngai lo, ka pa khân a hau na deuh bawk a nih ka ring, kan chhûngkuaah chuan keimah hian ka um zui peih a, min ngainat ve tho avàng hian min hnial thei bîk lo va, a bulah pawh hian ka awm thei mai mai niin ka hria."

Hei vàng hi a ni ngei ang a chhûngte chanchin a sawi ngai loh. A pa nèn chuan engtin tak inhau ang maw? An inah pawh a awm duh tâk loh chhan chu, chhan țha tak a awm ngei ang.

Ka khawngaih a, a hma aiin ka kàwm tam ta sauh bawk. A pa chungchâng mawlh chu ka zâwt châk, a pahrawn chungchâng ni lovin a pa tak tak a nia ka tih.

Valentine's day-ah Chocolate tui tâwk min pe ngei a nia! Sawi chhuak kher lo mah se min ngaihsak a, țawngkam chuan min ngaihsakin min duh a ni tih a sawi lo; mahse, a thiltih leh chêtziaah a lantîr thung. Ka kawm tam tâk vàng nge phei chu ka hre lo, eng emaw hlekah a hma aia nasain kan inhnial ziah bawk. Min hnial dàn tùr a hriat loh tàwpah  erawh ka nui chhuak vak țhìn, kan thinrim ngai lo thung.

Ka rilru ka lo pe hle tawh a ni tih ka hriat chhuahna chu Zorini a haw tawh hnu, a in luaha ka kalin a ni. Pickle a duh zawng tak ka siam a, chu chu pêk ka tum a, inah chuan tlângnél zet hian kawngkhàr pawh kik lovin ka lût thâwng mai a, inlêng a lo nei ang tih ka ngaihtuah pha miah lo!

Nula lian vak lo, ngo var, sam tawi deuh mãt hi a dawhkànah chuan lo țhuin a ke erawh chhuatah a nghat thung a, aniin thil a ziak malh malh a, ka lût erawh chu min lo en ve ve.

Chu nu chuan a hnaih mah mah ka ti!

"Pickle ka lo keng a," tiin pickle bûr chu ka lek lang a.

"Lo dah mai rawh aw, ka laklawh deuh a."

An titi a laklawh a niang, pickle chu a dahna tùr ka zawng a, bowl lian lo takah ka bun chhuak ta vek a, ka beng erawh an lamah ka chhi kar.

Chu nu chu eng emaw sawiin a nui har har a nih chu!

Engtin emaw ka thinlung hi a awm! Ka sawi fiah thiam chiah lo, eng emaw thil hian ka âwm chu a rawn hnawh ni berin ka hria!

He nu hi ka thîk em ni? Engah nge ka thîk ringawt ang? A bula a țhut vàngin maw? Nge an inhnaih viau vàngin? Nge min ngaihven tâwk lova ka hriat vàngin?

A hriat loha haw leh daih chu ka duh bîk chiah loh vàngin," Ka haw leh nghâl mai ang, i buai si a," ka ti a.

A rawn hawi chhuak a, chutah rawn thovin," I va hmanhmawh àwm ve?" a rawn ti a.

"A, hmawh ve tho mai," tiin dâwt ka sawi ta ringawt.

"I ril a țâm em?"

"Țâm lo ve, ka hmanhmawh sia, ka chhuk mai ang. Ziah chhunzawm leh tawh rawh," tiin ka nuih deuh sak a, kawngka lam ka pan ta nghâl a.

"Um, ka rawn bia ang che."

In ka thlen hnu thleng pawhin ka awm dàn a dik lo. Ka thîk tihna a nih ka ring deuh, a chhan chu an lo inawm hnaih lutuk a, min tithaw țha thei lo. Kha nu kha tu nge niang? Ka hmuh vawi khatna a ni, a bialnu chu ni lo hrâm se...

Min rawn phone loh avàngin a la buai a nih ka ring. Ka thinlung erawh a phâwklêk tak zet, min rawn phone thuai thuai se ka ti, sawi tùr ka han ngaihtuah a, a bo duak niin ka hre bawk si, a ngaihna ka hre thiam lo.

Ka ngaihtuahnaah chutiang hlîr mai chu a awm, Muanzuala hi ka lo ngaizawng reng tawh zâwk em ni? Kha nu kha ka thîk a nih chuan, a ni mai lo'm ni? Nge kan ințhianna inkârah hian a rawn inrawlh ka hlau zawk? Kei aiin a ngaihsak zâwk hlauh chuan... min ngaihsakna hi mi dangin an chang daih ang, min chhuhsak daih ang tih ka hlau a ni chiang.

Mahni hma ka va sial tak! Mi sual tak ka lo ni.

Nunoi mut tawh hnuah pawh ka muhìl thei lo, khumah ka mu meng kar mai. Dâr zât ka en a, dâr 10 a ni tawh, tûn ang tlaiah chuan hman pawh ni se min rawn phone tawh lo ang, a tlai tawh ém mai.

Ka phone chu a rawn nghawr dat. Phone call chu a nih hi.

Nunoi tihharh hlau zet chuan zàwi sap hian ka chhâng a, a rawn țawng velehah erawh ka thîkna kha a rawn lian thar leh.

"I mu tawh a ni maw?"

Mut loh hun pawh a ni tawh lo. Ani angin zàn ka meng rei ve ngai lo tih a hre tawh reng sia.

"Aw."

Kha nu khân a țhut hnaih êm avángin ka lung a awi lo tih hriattîr erawh ka tum bîk lo.

"Ka rawn tiharh che em?

"Aih..."

Tûn țum chu a țawng tlêm zâwkah țang teh ang, ani hi țawng ve thung rawh se.

"Ka hman ve chiah."

Chhuanlam a nih chu. Ka âwihsak duh ang em?

"E..."

Ka va sual tak! Ka bialpa pawh a ni tawp si lo va.

"Lungawi lohna," a ti sup a, chutah," Han sawi teh," a ti leh a.

"Eng?"

A nui hawk.

Ka va ngei tak! Tunah tak kha chuan a nui kha ka ngei, nuam pawh ka ti lo. Ka lunghnûr sawtin ka hria.

"Kum 4 leh ni 240 hi ral tawh se ka ti hle mai!"

Teh daih chuan. A duhthusàm a nih hi.

"Duh hun hunah a ral thei ringawt lo."

"Nawr luih che ka duh si lo alawm le!"

Ka hre thiam țép.

*MI DANGTE AVÀNGIN I NIHNA KHA HLOH MIAH SUH, NANGMAH ANG KHA TU MAH AN AWM LO A NIA*

☆A MAK!☆ - 17

By Dingdi Pachuau

School chawlh chhûngin ka haw zawk. Ka nuin kan in bula huan kha a siam țha leh a, pangpar tam zâwk dah a tum a ni àwm e. Pawisa tlêm tlêma a lâk luh theihna a nih vàng leh a tui zawng tak a nih vàngin sawisèlsak ka tum lo, thlai țhenkhat a chîng tel tho țhin bawk a, a chângin keini pawh min rawn thawn țhìn a nih kha.

Nunoi pawh rawn haw a châk ve lutuk; mahse, ani zawng class kal a la ngai. Ina mahnia awm a hlau chuang lo va, bâkah, in chungte an awm reng a, țawng kan inhre pawh țha thei tho bawk a, a hlauhawm tùrah ka ngai lo.

Ka pa pawh a dam țha. Ka nu chu a lo pui ve a, naktûk lamah erawh in sakna lamah a kal ang, vawiin chu a thawhpui tùr mi dangte an hman lo hlawm a, a kal lo ve ta ringawt a ni.

Ka nu chuan," Hemi lane-ah hian pangpar ka chîng ang a, a thlang lane-ah khuan thlai. In ațangin tui a pêk theih dâwn a, zu kalchilh kher a ngai lo bawk ang a, a zia dâwn riau asin," a ti barh barh a.

Ka pa chuan," In ațang chuan kan pêk chuan i thil chìn a tlu duh àwm, a force a na dãwn asin," a lo ti a.

"Ni lo, ka sawi awmzia chu kan tui chhe paih mai mai, luang ral tùrte pawh kha kan pipe tâwi tê hmang khân hetah hian kan luantîr ang a, zu kalchilh lovin tui kan pe nghâl a ni thei dâwn ka ti alawm," a lo ti a.

"I idea hi a țha thei ngawt mai!"

"Nu hi chu, a thluakah hian bâwng êk khawro mai mai hi chu a awm lo ve chiang a ni," nui chung hian ka lo ti a.

Ka nu chuan," Duhthusàmah phei chuan poly-pot tam deuh tak nei ila, chutah chuan ti vek thei ila, hralh pawh a awlsam deuh ang a," a lo ti a.

"A țiak ang chîte pawhin a hralh theih tho ang chu," ka pa chuan a lo ti a.

"Theih tho e, poly-pot te reuh tê têah an ti țhìn alawm."

Lei chu kan chêk phut vek a, thlai emaw pangpár emaw chu a țha duh ngawt ang, bâwng êk lei țha lâk tùr lah kan hual țha si.

"Nu, hetiang hian kan kawmthlang pawh hi lài vek ila?"

"Nakinah, tunah chuan tui a hek dáwn lutuk a, ruahtui awm dâwn hunah kan ti vek dâwn nia, in bulah thlai kan thar țeuh mai ang," phûr zet hian a lo ti a.

Ka pa thung chuan," I nu hi a thawk nasa lutuk ţhìn a, țha pawh ka lo tihpui chiah hlei nèm, a kâwng hi a sawisêl deuh lehnghãl a, a intina mai mai ang tih ka hlau a ni," a lo ti a.

"A, eng ëm a ti bîk lo ang chu, nuam a ti ve bawk si a, a buaithlâk a nih hi," ka lo ti ve a.

"Thlai tharlâm sar mai ei hi a manhla bîk êm asin," ka nu chuan a lo ti thung a.

Thingpui lumin ka chho a, naktip lamah chuan ka chhukthla leh tawh dâwn si a, ka châk viau nain chhûngte bula awm chu nuam ka ti, ka kham lo.

Muanzuala'n min rawn call ãwl lo, ka awm lo tih a hria a, a lunglèn thu a rawn sawi sup sup.

Ka awih hran lo, ka awm leh awm lohin ani mood a tidanglam àwm lo êm mai, bâkah a lung a lêng ve ngai pawhin ka ring lo.

"Kha pa kha a rawn lêng leh em?"

A hming kha a hre àwm reng sia, a'n sawi lang duh lo vêl ah!

"Aw; mahse, rei vak lo chauh a ni." Rawn lêng miau hek, ka thinlungah erawh a tla na fahran tawh lo, a bula lài zeta ka awm țhìn ang khân tunah chuan awm pawh ka awm tawh miah lo, mak ve tak chu a ni.

"Minute eng zât?"

"A minute ang zawng chuan ka lo chhinchhiah hauh lo," nui chung hian ka ti a.

"A nih, i rawn chhuk hun tùr?"

"Naktipah a niang."

"Ka rawn hruai ang che?"

Ka duh lutuk! Min rawn hruai se, kan pahnih chauha car-a chuan vang vang chu ka chãk, sumo-a tâwt zeta inhnawh aiin.

"I buai ang, bâkah, hun leh petrol a hek," ka ti ve tlat.

"I tân hian ui ka nei lo asin."

A ţawngkam pakhat tê pawhin min tihlimin ka thin a tiphu dat dat chu a ni si a.

"Inla țawngkam thiam vêl viau suh, eng nge ka lo hawn ang che?"

"Kum 4 leh a chanve ral hnua nangmah."

Kan inbiak dàn hi inngaizawng kan ang ka ti, min duh ve tak tak a nih pawh ka ring deuh țhìn bawk. Duh lêm loh hnêna zîng tin maia morning wish thawn peih zat zat an awm dâwn em ni? Min ngaihsak êm êm a, țawngkam erawhin a tilang lo, thiltihin a tilang zâwk țhìn. Țawngkam ti duam duam leh thu nalh zet zet phuh chhuak mi a ni lo ve hrim hrim, a lawmawm daih záwk.

Min rawn hruai tak tak!!!

Tlaiah a rawn thleng a,  a rawn kal a, min rawn hruai dâwn tih a sawi nawn tawh lo, a lo kal tawp mai.

"I lo kal tak tak!"

"Ka sawi tawh kha."

Ka nute'n an lo hmel hriat tawh avàngin an lo be thei nghâl a, kan mangan ber laia min țanpuitu kha a ni bawk a, an lo be țha khawp mai.

Ka nute chuan eng nge a lo tih dâwn tih an zawh pawh chuan chhuanlam dang a siam miah lo, naktûka min hruai haw tum a lo kal a nih thu a sawi hmiah!

Ka nu chuan min rawn en zauh a, a mitmenga zawhna chu ka hmu thiam; mahse, engtin vak nge ka tih chuan ang? Ka bialpa a la ni tlat lo, ka țhianpa tih bâka sawi dàn tùr a la awm lo.

Zanriah kan kîl lai chuan Taia chhang chiah Valpuia chuan," U, naktûkah i chhuk leh tawh dâwn sia, kan sir thlahna tur pawisa thawh a ngai a, min pe la?" a ti a.

"Eng zât nge ngai a?"

"Bobo-a nèn kan pahnihin chêng sawmhnih ve ve, sawmli a nih chu."

"Aw le."

"Chuan, pocket money pawh," Bobo-a, kan tê ber chuan a lo ti bawk a.

"Bobo.." Taia chuan a lo ti vat a, a lo khap ve a ni. Ani hi chuan thil a hre thiam tawh a, pawisa hlutna leh ho mai maia hman a uiawmzia leh thawh chhuah harsatzia a hre thiam ve ruai ruai tawh.

"Naktûk zîngah tih tùr ka hrilh ang che u a, chuta in tih țhat phawt chuan ka pe ang che u," ka lo ti a.

"Yess..."

Zànah chuan Michael-a a lo lêng leh vang vang, Michael-a hi chu a fel ve êm a, a rilru a lo puitling viau ka ti bawk.  A bialnu nèn khân engtin nge an ințhen theih zâwk le, a bialnu khân a țhen phal hi ka ti hliah hliah, kei hian nihpui ta ngat ila ka țhen hauh lo ang.

Muanzuala pawh a lo țhu ve kur, a țawng ve lo. Phone a khawih pah a, biak erawh chuan a rùl tâwk chiahin min chhãng. Michael-a lo lêng hi a run a ni tih ka hre thiam mai, tlangvâl a nia, a duh phawt chuan a lo lêng thei tih hi hriat thiam tùr asin, bâkah, ani nèn hian kan la inngaizawng lo, Michael-a lahin min duh thu leh min chhai thu pawh a la sawi hauh lo, thîkna tùr leh thinrimna tùr a la awm lo hrim hrim.

Mutnaah chuan message sei tâwk min rawn thawn. Ka chhiar chhuak dap, ka nuih a za bawk si a, a lawmawm ka ti tho bawk si.

*Bialpa ka nei lo* tih tê ka va thawn.

*I thutiamah ding nghet tlat ang che, i thutiam ral hnuah erawh kei ka hmasa ber dâwn tih theihnghilh lo la* a rawn ti leh.

Ka nui hak a, chu te chu ka thuneihna piah lam daih a ni.

*Ka lo hre reng ang e*

*Theihnghilh miah suh, mipa dang rêng rêng lakah pawh i thutiam i vawng nge vawng lo ka lo thlithlai reng dâwn che*

Hmmm, a inla strict tawp.

*I va thu tehlul em!!!*

*I thutiam vàng vek, eng mah ka ti thei lo😞*

A emoji hman chu ka nuih nasa, amah nèn a inhmeh lutuk! Zanin pawh khân hetiang hmel hi a put reng kha.

*Thu tiam ta lo ila, eng thil nge tih i tum chiam chuan a?*

A reh vang vang a, muthilh ka tum lai takin a message a rawn thleng leh.

*Ka tâ i ni tawh ang*

Ka hmui ka hup a, ka meng nasa mai!

'A tâ' tih chu eng tihna nge ni ang? Min mutpui dâwn tihna nge nupuia min neih a tum?

A ropui râpthlâk ve ve. Ka ngaihtuah chhunzawm duh lo.

*Naktûk chu chaw ei khamah aw?* ka ti daih.

*Boss i ni rih e*

A tûkah chuan Bobo-a leh Valpuia chu kan huana thlai tui leih tùr leh kan kawt, compound chu phiat tùrin ka ti a, phûr takin an ti sauh sauh mai. Pawisa kha an hre ve kar a, hna thawh hmasak phawta hlawh chhuahtîr kha ka duh, a chhan chu pawisa hlutna an hriat ka duh bawk.

Chaw ei khamah Lunglei lam panin kan chhuak ta a, chawhmeh hawn tùr erawh a vâng, thlai rêp kan neih țhenkhat chauh kan hàwn.

"In chhûngkaw bula awm hi a nuam ngawt mai," kawng en ding ngur pah chuan a ti sup a.

"Kan ţawng duh hlawm bawrh bawrh sia tiraw?"

"In inngeih hlawm a."

An chhûngkaw chanchin a sawi hlek kha ka ngaihtuah chhuak vat a, a pa nèn an inngeih lo va, bâkah, Zorini kha chuan unau enin a en tih a sawi bawk a, chuti a nih chuan a nau pakhat chuan unau enin a en ve lo tihna a ni thei ang. A hrehawm viau ang chu, ani lahin a pa tak a ni lo tih a hre kar ang a, a pahrawn lahin a fa tak angin a en ve lo tih a hriat hle bawk si.

"Nia, hausa lo mah ila kan hlim tlâng a, a zia khawp mai. Nangni pawh Zorini nèn in ingeih êm tho kha," ka ti ve a.

"In inang ka ti asin. In țawng duh a, in hlim thei bawk a."

Țawng duh lo min ti hi chu an vâng ve viau ang chu. Mi pawhin min nêl awlsam rêng; mahse, țawng duh viau erawh mi pawi sawi a hlauhawm deuh.

"Min ning țhìn em? Ka țawng peih sia?" tiin a lam chu ka hawi a.

"I țawng duh, i țawng peih ni lovin."

"Chuan...min ning a ni maw?"

Min rawn en a, kawng lam en leh nghâlin," I ring thei em?" a ti ve thung.

"Ring deuh tho."

Motor chu kawng sîrah dintîrin ka lam a rawn hawi sauh sauh a, kei chuan makti angreng deuh hian ka lo en deuh hâ a, chiang zetin ka mitah chuan min en ngur a.

"Ring tawh ngai suh. Ka ning ngai lo che."

"Tak tak?"

A thaw hawk a.

"Min chhaih suh, min chhaih hauh suh," a ti ta hrâwk a, a aw rawn chhuak chu thil hrehawm tak tuar ang mai a ni. A sam chu a tuai puat a, rang zet hian ka kut chu a rawn chelh zawm zat bawk a, chelh tihah a hmer ni zâwkin ka hria, a nghet țha khawp mai.

"Ka bialnu ni rawh," a ti leh sup a.

"Ka thutiam-"

"I thutiam tei vet kha! Kha thil kha ka hua!" tiin ka kut chu a'n sâwi deuh a, min hmer nghet sauh bawk a.

"A nih loh tal pawhin ka fâwp ang che," tiin ka mit ațangin ka hmuiah a en thla a, a rûkin ka lo zâm kher mai. Hnial ka duh a, ka duh lo bawk.

Dik tak chuan ka châk asin, he pa hi ka thinlung hian ka duh ve êm êm tawh a, chêt la hmasa nih leh thutiam tihlawhtling lo nih ka duh lo mai a ni. Min fâwp se, engtiang taka nuam nge ka hre châk, a zei ngawt ang!

"Min en teh!"

Ka thil ngaihtuah avàngin ka lo maimichhîng niin! Ka meng chiang kher mai, kan hmai chu a lo inhnaih tawh khawp mai.

"Min en tùrin ka duh che, ka duhna che nasatzia hi  hre mawlh teh."

Min rawn fâwp ta, min fâwp dè dé phawt, ka lo thle sawn bîk hauh lo. Ka hnial lo tih a hriat chuan uar deuh zâwkin min fâwp leh a, chutah keiin ka lo chhan lêt ve tâkah phei chuan a duhthawh ta sawt a, min fâwp bawrh bawrh mai; mahse, a hrehawm ka ti  hauh lo!

*THIL TÊ THAM TAK NIA I NGAIHAH KHÂN  LUNGAWI CHÎNG TEH, MI LUNGAWI THEITE HI MI AWHAWM AN NI NGAI*

☆A MAK!☆ - 18

By Dingdi Pachuau

Kan tlàn leh hnuah chuan a lam hawi pawh ka ngam țha tawh lo, ka zak deuh tlat a nih chu. A inah lût lovin kan inah zâwk kan lût a, kan hahchawlh deuh hnu, chawhmeh tùr eng rêp rêp emaw ni kan inpêk fel hnuah chuan haw tùrin a chhuak ta. Dik tak chuan tleirâwl tê bialpa nei thar ang mai ka ni a, ka zah deuh țût tlat, tûn ang kum tawhah lehnghâl, a chi vak loh.

Tlai lam a lo nih chuan ka nuin baibîng rêp min hawntir chu buh nèn ka bai a, Nunoi lo haw chuan a hnâr lèn vat vatin," Aaa, ka va ei châk tawh tak! A tui dawn lutuk!" a ti vang vang. Baibîng hi a duh lutuk a, ka nu hian a rèp phah ziah.

"U Michael-a nèn in han inhmu bîk sia, a nuam àwm," a ti leh. Michael-a hi chu âtchilh ve bawk a ni.

"Nuam bîk e, ka hlêp țeuh che. A sam kir chiat pawh ka han hmu bîk."

A ner nâng a.

"Min han âtchilh ve na se chuan ka âwn mai pawh ni lovin ka tlu nghâl ang," a tih chuan râpthlâk ti zet hian ka melh hrâ a.

"Râpthlâk! Insúm vat rawh, miin an hre rêu rêu ang e."

"Kan mâkpa a nih hunah phei chuan min duat viau tùr hi a ni ringawt, ka pangchang thei ngawt ang," a ti leh a.

"Ngawi mai teh, inthlâk la, i duh chuan thingpui ka lo siam ang che," ka ti ta daih a.

Zànah Muanzuala a rawn lêng a, Nunoi chuan a dàn ngai têin a lo be leh bawrh bawrh a, ani pawhin a lo chhâng ve zauh zauh, kei erawh chu ka țawng ve vak lo.

Room-a  Nunoi a luh hnuah erawh  chuan min en vung vung a, eng vàng nge niang aw ka tih lai chuan," I puan ven kha i inhmeh khawp mai," a ti sup a.

Eirawng bàwl hma khân ka inbual zawk a, kekawr lum ni lo ka hmuh mai loh avàngin puan pâr, ka chhehchhawl chu ka veng ta ringawt a, a puan deh a nuam a, Nipuiah chuan ka ngaina thìn rêng a ni.

"Ka lâwm e."

"Hmeichhia a tihmeichhia bîk."

Thingpui ka pe a, làwmthu sawi supin," Mautuai min pêk kha ka siam a, a tui reuh lutuk asin," a lo ti boh a.

"Engtin nge i siam?"

"Ka kang."

Ka nuih a za viau nain ka nui lang lo, thil siam kha a thiam viau a, mautuai freezer-a dah țhat kan erawh chu a mak viau maithei a ni.

"Kei pawh Baibîng kha ka bai a, Nunoi'n tui a ti râp mai."

A nui huk a.

"Engati nge min nuih a?"

"A zâ."

Kei pawh nichin khân ka nuih a tiza ve tho a, ka nuih duh lo a nia, tunah min nuih leh tho si.

"Ka nuih i tiza ve tho a, ka nuih duh lo che a," lungawi lo ru zet hian ka ti nang nang a.

Ka lungawi lo tih chu a hriat viau a nih ka ring, min en rùn rún hnuah chuan," Ka nui tak tak lo," a ti ta sup a.

Chu chuan ka nuih a tiza ta tlat, ka nui ta tlâwrh tlâwrh a.

Inngaihzàwnna lam, kawng laka kan thil tihte pawh kha chu a sawi chhuak miah lo, ka lâwm khawp mai.

"Naktûk chu, lo lêng la?"

Meng phar ãk hian," Engah maw?" ka ti hâ a.

"I lo lêng ang."

"Thil pawimawh deuh a awm em ni?"

"I lo kal loh chuan i hre nâng."

Hm, a pa thihcham kha chu a ni êm rih lo chuan ka hria, eng emaw 'cham' a ni leh maithei asin, hnial chu ka duh tawh lo. Amah chauhin a awm si a, a bulah tu mah an awm ve si lo.

"Um, tum ila, min lo hruai la?" Ka fiam chhin châk tlat a.

"Tehrêng, kan lêng chhuak ang a."

Lêng tùr mai mai chuan min sàwm loh hrâm ka beisei, inah insûk tùrte a awm ang a, in tihfel pawh a ngai ang a, Inrinni a nih hi chuan hmeichhia hi chu kan buai ve thei teh a nia, inchhûngkhurah hian kan pawimawh ve êm!

A lêng rei lo, a haw dâwnah chuan min tawh kher pawh a tum chuang lo, Nunoi a zah deuh pawh a ni mahna, a lo chhuah thut a hlau pawh a ni maithei a ni.

Ka mut dâwn chuan Nunoi chu a rawn chhuak a, min en zauh pah chuan," U, U Muanzuala hian a ngaizawng ve deuh che a ni lo maw?" a rawn ti a.

Ka phu deuh zawk.

"Engah ngawt maw?"

"A, a care viau chein ka hria a."

"Ka țhianpa a ni tlat alawm."

"Ni lo, chutiang lam a ni lo, a care dàn che hi inţhian țhatna lam ni lovin nulât tlangvàlna lam a ni zâwk," a la ti fan a.

He nu lah hi, thil hi a hre thei reuh lutuk a! Kei ai hian a lo man thiam leh tlat zêl, fing reuh lutuk. Hetiang lamah hian a țhangharh hma tlat, țha ka ti lo tawp.

"Intihre lutuk lo mai teh!" ka ti hlak a.

Nui har har pah chuan," A ni chiang mai! Yes, U Michael-a chu ka chang ve thei thung dâwn tihna-"

Ka hmai hrûkna towel chuan ka vawm awk a," Ngawi mai mai teh, lehkha hi țha takin zir la, pass vat mai rawh," ka ti. A pass chhuah hma chu ngaihzawng neih loh ka tum tawh kha, ani lah hi sawi hreh leh zêp nei hauh lo hian a sawi duh hi a sawi zar zar zêl si, ka duh duh ka sawi ve thei si lo.

"Eng nge, U Michael-a chu nih leh, nei leh mai rawh."

A la nui țhû mai, ka thu sawi chuan amahah eng mah a thawk lo a ni ang.

A tûkah chuan min lo hruai tùrin a rawn kal ta ngei, a lo thlen veleh Nunoi chuan awmze nei fe hian Muanzuala hmuh loh laiin min rawn melh zauh. Ka chhuak dâwn tih ka lo la sawi lo tih ka hre chhuak chiah lehnghâl.

"Ka chhuak lawk dâwn a nia, ka rei vak lo ang," ka tih chuan Muanzuala chuan," Nuno, i u hi vawiin chu ka lo hruai chhuak ang e aw, ka rawn thlah leh thlap ang," a ti a nih chu!

Bu ngat nghat hian," E, hruai chhuak mawlh teh, chuan, min duat deuh tùrin i lo hrilh bawk dâwn nia," nui chung hian a lo ti a.

A va ngeiawm thiam tak!

A in kan thlen chuan," Eng nge kan tih dâwn?" ka ti a, ani chuan," Țhu ve phawt ila," a lo ti thung a.

Ka seat-ah chuan ka țhu leh a, tukverh lamah chuan ka dâk leh a, ani erawh chuan fridge a hawng zui nghâl thung.

"In rawh."

Ka lo ban ve nghâl mai.

"I țhutna chuamah khân mi dang țhut ve ka phal ngai miah lo asin."

Tui chu in ta lo chuan amah chu ka en hau a.

"Ka ina in lo kal hmasak ber nî khân khatah khân i țhu nghâl chat a, tukverh  lam kha i hawi a. Chumi hnuah tui i in leh bawk, ka chhinchhiah chiang hle a ni, i kawr hâk, kekawr leh pheikhawk bun rawng thlengin ka la hria."

Mak ka ti lutuk ringawt!

"Chuan?"

"Tlereuh inbel i nei hauh lo va, makeup i hmang lo viau bawk. Min melh vawi khatna ațangin i mi nèl zawng tak ka ni lo tih ka hre thei nghâl bawk a."

"Chu, a lo hriat viau elo?"

A nui suk a," Pawi ka ti miah lo, khatih lai khân. Hmeichhia hi melh ka tum tawh lo va, Zorini leh ka nu bâk hi innèltïr ka tum bawk hek lo," a ti leh a.

"A nih tunah?"

"Min hmuh hi," tiin a bân chu a'n phar deuh a," Hmeichhe pakhat, thutiamin a phuar tlat, kum 4 chuang nghah ngai ka nghâk ta mêk a nih hi," a ti leh a.

"Kum 4 chu hun rei tak mai a niah," ka lo ti leh a.

"A nghãktu tân chuan rei duh viau mah se a hlutna a hriat tlat si chuan..."

Ka zak deuh, ka lâwm bawk si.

"Kum 4 chhûng chuan thil tam tak a thleng thei asin, bâkah, thutiam hlen lo mi nih ka duh lo va," ka ti leh sap a.

"Hlauthâwng suh, i  thutiam kha ka vawn himpui ang che, tunah hian kan inngaizawng miah lo, kan awm dùn, kan inkàwm mai mai a nih hi," a ti leh lawi a.

Tui chu ka in a, ani erawh thoin a TV, lian țha zet chu a on a.

"Vawiin chu hahchawlh nân Movie en ang aw."

Parda chu a'n zâr thim deuh a, a che vêl chu ka lo thlîr tawp. TV-ah film/movie hlauh phei chu ka en khàtzia ka ngaihtuah chhuak, football khèl en ka peih ve viau a, chu zawng chu.

Cassette play tùr a lo ruahman vek niin, a kut rawn phar chhuakin min kai tho a, a țhutna sofa-ah chuan min țhutpui ta nghâl a.

"Eng movie nge?"

"Shh..."

Kan țhu dùn ral a, a bân veilamin min rawn kuah bawk a, lum ka ti viau dâwn emaw ka ti a; mahse, nuam ka ti, a lum hran miah lo.

Kan movie en chu romantic comedy a lo ni a, a changtute erawh ka hriat mi an ni pek lo. Hmuhnawm chu ka ti ve khawp mai, ka nui nasa bawk. TV ka en khât lutuk a, hetiang hian film hmuhnawm tak tak hi a lo awm thei ngai a ni maw ka ti hial. Kan têt deuh laia ka en ve țhin kha chu vai film deuh hlîr kha a nia, sap film ka en khât ëm bawk a ni.

"A changtunu chan thiamzia khi tiraw?"

"A changtupa pawh a thiam tho."

"Mi dang pawh kha."

Keimah chu ka inchhâng zung zung mai a, mi â ka ang ngawt ang chu.

"I țawng barh barh hian nun hi hlimawm ta riau bîk hian ka hre ziah, țawng tam hi ka ngaina lo va; mahse, nang leh Bawihi bula ka awm hi chuan țawng tam ka ti phal lo che u, țawng duh ka ti țhìn che u."

Min faknaah ka ngai mai. Nia, ka lo țawng leh barh barh țhìn a, mi duh loh zawng a ni ang em, an lo ning viau ang em tih hi ka lo ngaihtuah lo leh țhìn.

"A châng chuan tlêma insùm deuh ka ngai țhin, a chhan chu ka lo țawng duh leh lutuk țhìn a."

"I lawmawm thung alawm, i titi barh barh kha ngaihthlâk a nuam, nun a tihlim," a lo ti thung a, ka beksam lo tla deuh chu min huih kiansak a.

Nuih sakin," Ka lâwm e," ka ti sap a.

"Kei pawh."

"Eng vàng maw?"

Hnai zetah chuan kan inen a, kan infâwp leh dâwn ngei tih ka hria, ka lo maimichhîng dâwn nge niang, nge ka lo en kar dâwn? Nge ka lo hawi sawn daih dâwn? Ka thutiam mawlh kha.

A kut dinglam chuan ka khabeah a rawn dawm a," Ka fâwp dâwn che," a ti sup. Min sâwm nge thu min pe pawh ka hre thiam lo, a mitmeng râwp zet chuan min aikaih tlat a, hnial tumna pawh ka nei lo, bâkah, a fawh kha nuam ka ti viau asin.

Ka phone a rawn ri țawng țawng ta a nih chu, ka thin a rim lutuk.

Kan thil tih tum pawh kan chàwl lo thei ta lo, ka ringtone lah chu a ring bawk si a, ngaihthah theih pawh a ni lo. Phone chu ka'n en a, Nunoi lek, a țangkai àwm tawp si lo.

Haw hun chu, ka hau chiang khawp ang.

Ka chhàn hmain a la tàwp zui a. A chêt dàn ngeiawm thiamzia hi, tu tak chhùn ang maw? Bialpa a neih ve hunah a châk lo ngawt ang.

"Nunoi."

"Call back la?"

"A, a țangkai lo ang," tiin phone chu ka silent a, ka ipteah ka khung ta nghâl a.

"Kan hmabâk kha chhunzawm ang."

Ka hnial hauh lo.

Nilêngin kan awm, chhuah a sawi nawn ta miah lo. Chhùnah kan pahniha ei tùr kan siam dùn a, hmanrua bàwlhlo tùr a nei vek a, a harsa lo. Flour leh bread crumps erawh kan heh khawp mai, flour a hmaia tahsak kha ka châk tlat a, ka tahsak ta ngei, ani lah a lo tlâwm duh bîk si lo, kan inûm kâwi, kan thawmhnaw leh kan lu, hmai a vâr luai mai. Kan inkâwk a, kan innuih kiah kiah mai. Pum dawm meuhin a tàwp lamah pbei chuan kan nui, ka pu a na vek mai.

"Ka T-shirt hâk tùr a awm ang, i inbual chhûngin ka lo lâk ang che."

Hetianga haw tum chu, a ngaihna a awm lo, ka inbual ta ringawt. A t-shirt tê ber nia a ngaih chu ka ha a, ka inhmeh phian, a lian ve tho nain a bân ka thlep a, a fual zâwng lah ka kâwngah ka bâwk daih bawk a, a lian tih a hriat vak loh.

"Kei aiin i inhmeh."

"Ka lâwm e, va inbual ve tawh rawh."

Ka inbual hlànin chhuat pawh a lo nâwt fai vek a niang, a lo fai vek tawh. Ka thawmhnaw leh samah a kai tam vàngin ka inbual hnuah chhuat chu ka nâwt fai ang ka ti rilru a nia, a lo tifai hman chu zia lo ka ti, ka inthiam lo ru khawp mai.

A rawn chhuah chuan," Shampoo tih inziahna bûra mi sâwn em ni i lu i sûk?" tiin min zâwt a.

"Aw."

A nui ta hawk a.

"Aftershave lotion a nih kha," a ti ta.

Chuvàng a nih chiah chu, shampoo ang lo ka tih, a mak ka ti rêng a ni.

"Ka hmang tawh tho."

*LEI HIAN RUH A NEI LO NÀNGIN THINLUNG TIKEH SAWM VEK THEI TÙR KHAWPIN A CHAK TÂWK A NI, CHUVÀNGIN, I THIL SAWIAH FÎMKHUR RAWH*

☆A MAK! - 19

By Dingdi Pachuau

Inngaizâwng hming pu si lovin inngaizâwng ang chiahin kan khawsa a, kan awm dan hi tu mahin țhian țha awm dàn an ti ngai lo ang, Mizo zîngah țhian țha nia lungchim leh induh taka infâwp ka hre ngai lo!

Ka thutiam vàngin ngaihzawng hming pu lovin kan inngaizâwng tho chu a nih hi. Ka dik loh vek, ani hi chu ka thiam lo thei lo ang.

Mahniah inthiam lohna nei deuh rùn mah ila tuna ka hlimna erawh hi chu tihchhiat ka phal chuang lo. Tea nèn hlim taka kan awm laiin ka hlimna lâk bosak ka ni a, tunah mipa vàngin ka hlim ve leh țan dâwn chauh a, tihchhiat ka phal rih lo.

"Tlaiah Bawihi a rawn thleng dâwn a."

Zorini kha a rawn phei leh dâwn a nih chu, eng nge a lo tih dâwn le?

"A lo phei mai mai dawn maw?" ka lo ti vat a.

"Aw..."

"Eng nge, a ni chiah lo deuh em ni? I dam țha a, harsatna i neih hmel loh bawk a," a țawng ban deuh lek lek vàng chuan ka lo ti leh a.

"Min ngai ve a."

A dik ka ring, Zorini khân a unaupa dik tak angin a enin ka hria, an induat thiam hmel viau bawk kha.

"A nih, i nau pakhat ve thung hi? A chanchin i sawi ngai pawhin ka hre lo," ka ti. A sawi àwm ka la hre tlat lo alawm, Zorini hi chu, hei tunah pawh a sawi leh mai a.

A ngawih  deuh vung vung avàng chuan," A ngai lo mai, tu pawh hian sawi duh loh-" ka tih lai chuan min lo pawt chat a.

"Ani chu ka pahrawn fapa a nia," a ti ta sup a.

A pahrawn fapa. A awmzia ka hre thiam nghâlin ka hria. A pahrawn ang chiah a ni tihna a nih dâwn chu, an tawrhhlelhawm duh ngawt ang chu.

"A nih tak chu."

Thaw huaiin," Hetah zanriah ei ve la?" a ti leh daih a.

"Ka lâwm; mahse, ka ei lo ang, inah Nunoi chauh a awm sia, bâkah ka rawn chhuk leh chauh a, chaw eia chhuahsan leh daih pawh chu a țha lo."

"Ani pawh a lo ei ve ang a?"

"Ni dangah ti zâwk mai ang hmiang,hun remchâng a awm leh tho ang chu."

"A țha alawm."

Aizawlah kal ka ngai thut maithei. Ka thil exam tùrah hian college ka chhuak ngei tih hriatna certificate thil tel a ngai, ka huphurh tak tak a ni. Marksheet chiah kha ka la a, a țùl chu ka ring reng țhìn a, ka kal ve chhunah office an lo khâr bawk si, ka lam ngei chu a ngai tawh a ni.

Zànah Muanzuala a lo lêng a, ka thawmhnaw sûk ka thleh fel lai a nih vàngin ka lo chiauau hman rih lo, in lêngte en hauh lova titipui hi ka duh vâk loh avangin ka be lo rih mai. Nunoi a awm tho, ka thleh zawha ka va pawh ve meuh chuan Nunoi chuan a lo titipui leh barh barh.

"Naktûk holiday a lo ni leh ta! Kan țhianho kan picnic thei dâwn ta, chawlh hi chu a nuam ve ngawt mai tiraw? Nang eng nge i tih ve ang?" tiin Nunoi chuan Muanzuala chu a zâwt a.

Dik tak chuan ina a rawn lèn laia Nunoi'n lehkha a la zir loh chuan a lo titipui ta țhìn a, mi dang bula țawng vak ngai si lo hi Muanzuala leh Michael-a bulah chuan a țawng țeuh ziah, tunah pawh a țawng leh lar lar tawh hi.

"Holiday hian keimahah chuan awmzia a nei lo."

Mak ti takin ka en a, Nunoi pawh chuan mak tih hmel deuh hian Muanzuala a en zawhah min rawn en a.

"A va mak! Hna thawh i nei ve ngei àwm si a, eng hna nge i thawh a? Company-ah maw? Țhahnem i ngai over a niang chu, indim thiam tùr asin, i taksa leh rilru pawhin a tuar thei a," a ti leh bawrh bawrh a.

"A dik viau mai."

A hna thawh pawh chu a sawi chuang miah lo, ka la zâwt ve tho ang.

"A haw phei leh ta maw?" tiin Nunoi room-a a luh hnu chuan ka zâwt a.

"Um."

"Engtikah nge a lo phei leh ang?"

"Ka hre rih lo."

"Naktûkah chuan eng maw i tih dâwn?"

"Nang?"

Min han zâwt lêt zat ah...

"Zin ang hmiang?" tiin ka sâwm der chhin a.

"Khawiah?" A thutak nasa.

"In khua Aizawlah."

"Eng nge i tih dâwn?"

"Engtikah?"

"Nangmahin maw?"

Zawhna hlîr.

Ka hrilh hnuah chuan," Kal ila, tih tùr ka nei ve tho alawm," a lo ti.

"Engah maw?"

"Hna lam thil a nia."

A hna lah hi sawi a duh loh hmel sia, zawh pawh ka hreh phah vek, sawi hreh na na na zawh chu nuam lo duh ve deuh mai asin.

"Eng nge i hna hi ni chiah?" Leh țâlh țâlh chuan. Ka ner ru sawk, a chhan chu mâwl ka inti lutuk a.

"Liando Real Estate hi i hria em?"

Hre chiang e, a lâr alawm, anni bâk hi Mizoramah hetiang lam khawih hi an awm em ni? An awm a nih pawhin an lian lo hlawm tihna, an lâr lo hlawm tihna a ni ngei ang.

"Aw..."

"Hetiang lam hi ka buaipui a."

A nih tak chu, eng emaw tak hna chu a neiin ka hre rëng a; mahse, office lamah zâwk a thawk emaw ka ti.

"A nih tak chu, ka zâwt lui che sia, min ngei em?"

A nui hawk a.

"Eng nge?"

"Hetia i țawng phawng phawng hian ka làwm țhìn che."

Leh ta daih mai a!

School chawlh chhûng chuan ka va zin phei hman lo, school țan leh hnuah chauh ka hman. Muanzuala lahin min zâwt sek, a phûr lutuk a niang ka ti mai, ka hman leh lawk si lo va, ka inthlahrung zâwk.

Chhûngte chu kan nei ve tho a; mahse, Țhuampui lamah daih a nia, a hla vawng vawng lutuk a, Muanzuala bulah ka awm ve tawp. Miin ka chanchin lo hre ta se mak min ti ngawt ang chu, kei pawh a rûkin mak ka inti tho.

An in kha a chhuahsan tawh avàngin amahin in a lo luah hrang tho a lo nia. College vêngah, an chhûngte building tho kaw khat hi a lo luah ve niin, a tinuam phian lehnghâl a.

"I in luah man hi i châwi tam àwm mang e! Lungleiah i luah bawk a, i chawi double tihna a nia, in luah man ringawtah pawh hian i insêng nasa tawh àwm..."

Ka ka hi chu aw, a lo kaw leh hret țhìn. Chûng chu hriatsa, zawh pawh ngai lova chiang a ni, mâwl leh lutuk!

"Hemi luah man hi chu chawi lo ve."

A nih chuan tlêmin a zia tihna. In luah man a to thei si a, Aizawlah hlauh phei chuan. He a in luah phei hi chu a zau tho a, bâkah vêng tlabirh pawh a ni si lo va, chawi dâwn ta se a to ve viau ang chu.

Eirawng bâwl lovin hotel-ah kan ei chhuak. Ei chhuah a ti tlat a, ei man lah a to angreng si a, ka inthlahrung ru khawp mai. Mipa a nih vàng nge ei man ka tum sem ve dâwn lah chuan a phal țhak lo.

Nilêng deuhthawa tlân kan nih vàngin ka chauh a ring a, kan haw thuai.

"Ka khumah i mu dâwn nia."

"Nang?"

"Khumah tho."

Ka en hrâ a, a nui suk ka hmuh chuan," Kan mu dùn lo ang chu tiraw?" ka ti leh a.

"I duh em?"

Râpthlâk ti zet hian ka en a.

"Room dangah ka mu mai dâwn alawm, khatiang mitmeng khân min en suh."

"Eng nge, i sawi rãpthlâk êm a nih kha."

"A hlimawmin a nuam viau zâwk lo ang maw?"

Throw-pillow chuan ka vawm hrâm.

A tûkah College-ah min kalpui thlap a, MZU lama kal tùrin min lo la ti zui, an lo thawn thla vek tawh a ni ngei ang.

"A va tihchi loh tak!"

"Kal nghâl ila?"

"Tih tùr i neih ve tho kha."

"Ho mai mai."

Kan zu tlân vang vang, keimahin eng mah ka buaipui lo, kalna tùr a hre chat chat hle mai. Dept hrang hrang a tam si, kal kualna tùr office building lah a tam bawk si, keimah chuan kal ila ka buai chiang viau ang chu!

"Ka lâwm e, awm lo la chuan ka va buai dâwn tak!" Kan haw lam chuan kan ti a.

"Ka awm chuan engah mah lungngai miah suh."

A inrintâwkna hi ka awt.

A tlai tawh avàngin a lakah ka inthlahrung khawp mai, a hna thil avànga kal phei a ni ve tho si a, nuam lo ka ti tak tak.

"I hna ka tikhaihhlak vek che a nih hi."

"Ka phone thei alawm."

Chuti a nih chuan naktûkah kan haw phei thei leh nghâl dâwn tihna a ni a, a zia ka ti khawp mai, a chhan chu school chawlh rei ka duh lo va, ka kal chhan ber lah kan tihlawhtling tawh si. Ani lah a phei ve chhan ber, phone call-in a sawi fiah thei dâwn a nih hmel bawk si.

"Chawhmeh lei ila, zanin chu kan pahnihin ruai țheh ang aw."

Chawhmeh lei a la ngai lo asin, tukina kan ei bãng pawh kha a la tam a nih kha.

Mahse, a thu thu.

Bâwngsa, vawksa rêp leh sangha grill tùr a lei a, keiin a hnungah ka lo zui dat dat bawk, a wallet min kentîr avàngin thil leina man chu ka pe zêl a, nupa kan nih duh hmel ka ti.

Ka thil ngaihtuah mai mai chu leh!

Inah chuan amah chauhin a siam tawh lo, ka pui ve a; mahse, aman engkim a buaipui vek, ka lo vil a ni deuh mah zâwk.

Tawnzau dum leh shorts hring duk a inbel a, ke lâwngin choka chhuata a vei thauh thauh hmuh chuan a pà ka ti hliah hliah. Khua a lum avàngin kei pawh T-shirt leh cotton kekawr pâr deuh chhiai ka inbel a, kei erawh chuan slipper ka bun thung. Ke lâwnga ka awm chuan ka ke hnuai a na țhìn a, chuvàngin ka bun hrâm hrâm.

"I ril a țâm tawh em?"

"Aih..." tiin a lak ațang chuan ka mit ka la sawn vat a, vawksa rêp chu zahzèlah ka en a.

"Lo țhu mai mai tawh rawh."

"Aih, lo check mai mai-"

Min rawn pawm kàn nawlh avàng chuan ka țawng tàwp chiang lutuk! Tlâk ka hlauh avàng chuan ka țê țhat a, ani erawh chuan kan bul lawka stool sâng zetah chuan min țhuttîr a.

"Ka thu âwih rawh, chuti lo chu..." a sawi zo duh lo, sawi zawm duh lo mah se ka hre thiam ruak tho maithei a ni.

Fianpui ka la ken avàng chuan ka fianpui ken lai chu ka lek valh valh a.

"Ti khân, lo țhu la, lo țawng mai mai rawh."

Sawi tùr ka va hre rih lo tak!

"Eng lam nge ka sawi ang?"

"I duh duh."

Ka ngawi vang vang phawt a, chutah, thaw huai pah chuan," In hi i luahna a rei tawh em? Nangmah chauhin em ni i awm țhin? Nge nula i lo khâwi ve țhìn zâwk?" tiin fianpui chu a lamah chuan ka dawh phei a, mic-ah ka hmang a ni.

A rin loh deuhin ka țawng a ni maithei, min en ngur ngur ringawt.

Fianpui chu ka hmui bulah dah lehin," Ka pu, ka zawhna che chu chhàn a har deuh em ni? Thu dik taka min chhàn a har leh, thu dik chanve pawhin a theih tho," ka ti leh a.

"Rei ve tawh. Ka in a nia, tlangvâl ka ni bawk, chu chuan a chhâng kimin ka hria," a ti ve ta sup a.

"A ni maw? Chuti a nih chuan, nula chu i lo khawi ve zauh zauh tihna a ni maw? A țha e, chûng zîngah chuan han thinlài deuhte i nei em?" ka ti leh a, fianpui chu a lamah ka dawh phei leh a.

"Ka ring," ti tê chauhin min chhâng.

"Wow! ...Chuti chu, khawhar takin i awm melh melh emaw tih laiin i lo khawhar lo tawp tihna a ni maw?"

"Ka khua a har ngai lo."

Thu dik tak vekin min chhàn ka ring tlat a nih chu. A dik ngei ang, khawhar hman hian a awm ka ring lo, hmeichhe duh chî tak nungchang a nei tlat a, bâkah mahni chauhin a la awm zui, hmeichhe zak lo deuh chuan an lènchilh rap rap ngam dâwn asin.

"A nih leh, eng hna nge i thawh chiah tunah hian?" tiin ka zâwt leh, thil dang ka zawh kual loh chuan a fuh dâwn lo, kan pahnih chauhin kan awm si a.

"Reporter chhe lo deuhin min interview mêk."

Ka ka ho ringawt nia! Min chhàn dàn chu ka rin loh dàn daih a ni si a.

"A chhe lo mah mah-"

"Khatiang kha chu phal loh thil a nia, ka pu. Inzah lohna lam a pâwl mah nghe nghe lo maw?" ka lo ti vat a.

"Zah loh lam ni lovin duhna lam a ni zâwk."

Ka sen tâwn tâwn ang chu.

"Tunah pawh hian ka rilrua thil tih ka châk chu thil hlimawm tak a nia."

Leh ta deuh deuh chuan.

Tunah hi chuan a fuh miah lo. A inah kan pahnih chauhin kan awm a, tu mahin min chîm buai hauh lo, kan free lutuk.

"Sangha kha ka'n check lawk ang e," tiin Stool sâng zet ațang chuan ka chhuk a, ani erawh chuan min lo dang vat.

"Ka thu âwih la?"

En chho ngam lo chuan a âwm chu ka melh ding ngar a, kan inkâr hi ka invêng lo a nih chuan a pâr chhuai chhuai ang tih ka hlau.

Ka khabeah dawmin amah en thei tùr chuan min kuai dâk a, ka dâk ta vah mai. Ani pawh chuan ngun zet hian min rawn en chhuk rùn a.

"Ka fâwp lo che a nih chuan hmeichhia ka ni tihna a ni ang."

A rawn kûn hniam nghâl, hmeichhia nihtîr ka phal teuh lo mai. Hmeichhia a nih dâwn ai chuan keimah zâwk hian ka fâwp hmasa mai ang.

Duhâm taka kan infawh hlawih hlaeih a, nia, kan infawh hian kan duhâm ziah. Duhàm dàn min zirtîr thiam lutuk a, kei lahin ka lo man chak bawk si a, ka thiam theih zawng tak a ni bawk.

Ka kawr hâk tlâng ațang chuan a kut a rawn zen lût zàl ál a, ka lo thaw hap mai. Tunah tak hi chuan kan infâwp tawh lo va, chal insi chialin kan hnâr pawh a insì, a kut chuan ka hnungzâng chu kut lâwngin a rawn zût kual, ka thâwk a tàwp dâwnin ka hria!

Chutih lai tak chuan doorbell a rawn rì ta vawl vawl! Kan ințhen phawk mai.

Eng emaw sawiin a phun sup a, a sawi erawh ka hre lo, ka thin a phuin ka taksa erawh a khùr nasa lutuk a, ka hmêl a mak ngawt ang!

Kawngkhàr lam pana a kal chuan kei pawh ka sam chu ka huih țha a, ka hmai ka tuai puat puat bawk. Tûn lawk khân tisa takin kan induh tawnin kan inmamawh a ni tih lo lût tùr chuan hre lul suh se, chuvàng tak chuan ka intuai țha a ni.

Zorini rawn țawng lût chu ka hria, ka thaw deuh huai. Ani hi chu Muanzuala nau a nia, lo hre deuh pawh ni se a pawi lo thei deuh ang.

Mahse, amah chauhin a ni miah lo.

Rose-i ka hmu tel chiah chu, ka thinlungah thîkna meisî a rawn țêk nghâl chhak mai!

*I TÂNA KAWNG ȚHA ZÂWK LEH DIK ZÂWK KHA CHU MITE'N SAWICHHE MAH SE HUAISEN TAKIN ZAWH NGAM ANG CHE*

☆A MAK!☆ - 20

By Dingdi Pachuau

Zorini'n min rawn hmuh chuan a rawn au țhat a.

"I lo phei ve elo? Hm, U Mama hi min hrilh ve tùr a nia, chaw rawn ei kan tum nghe nghe asin. Rose, Mama țhiannu Melo-i a nih hi," a ti nghâl bawrh bawrh a.

Rose-i nèn chuan inenin kan innuih sak a, a kut a rawn phar chhuah avàngin kan inchibai a, kan inchibai lai chuan," Ka hmu leh thei che chu a lawmawm hle mai, helaiah hian hmuh che ka inring miah lo va," a ti sap a.

Engtin mah ka chhâng lo, chhàn ngaihna pawh ka hre lo.

"Ka hmu che hi ka lâwm ê, hmuh che ka ring phâk hauh si lo va," Zorini chuan a ti a.

Nuih sakin," Nia tiraw? Rawn phei ve a remchâng ém a," ka ti ringawt.

Muanzuala chuan ka phei ve tih a lo sawi hauh lo a nih chu, bâkah, zanin tlaiah zanriah an rawn ei dâwn tih pawh a sawi hek lo, he a țhiannu Rose-i a tih nèn hian a nau hi an rawn kal dâwn tih pawh min hrilh miah lo.

Rose-i chuan," Choka lam rim chu a tui hle mai, ka ril a tițâm vawng vawng thei nia," a ti a, Muanzuala chu nui chung hian a en bawk a.

"Kan lo bàwl kêp che u, in ei țeuh dâwn nia."

"Ei țeuh ang, i thil siam chu a tui tih ka hre chiang tawh alawm."

Nichin lawka kan thil tih kha chu paih bo hmak ang a ni. Tuna he nu thil sawi pawh kha, an lo inhre rei tawhin an lo inhre chiang viau tawh a nih hi, a thil siam pawh a ei fo țhìn tihna a ni a, an inpawh 'thûk' viau tawh bawk ang chu!

"School in chàwl em ni?" Zorini'n a rawn tih chuan ka ngaihtuahna 'ril' tak ațang chuan ka harh chhuak ta vat a.

"Chàwl lo ve, keiman chawlh ka la tawp a."

"Lâk ve zauh zauh a ngai alawm. A mak e! Hetah ka hmu che tih hi âwih a har ka la ti fan a nih chu," hlim nui sâng hian a ti leh a.

Zorini hi chu a hmel hi a țha reuh ngawt mai, a nui sâng phei hi chu hmuh a nuam tak zet, hmel țha si, fel bawk si, mipa țha tak a neih ngei ka ring.

Hma deuh takah zanriah chu kan ei a, Zorini a titi barh barh reng a, Rose-i'n a lo pui zauh zauh a, kei pawh ka țawng ve tho. Muanzuala erawh zawhna zawh a niha biak a nih loh chuan a țawng ve lo.

Zanriah eina chu hmeichhia zawngin kan tifai a, ani erawh chu a inthiar fihlîm ta hmak, a àwm viau a ni, a lo chét ve ngai lovin hmeichhe pathum kan che tlat a.

"Fridge-ah dessert a awm kha aw, Bawihi," tiin a rawn lût phei zawk a, sitting room lamah a kal leh nghâl a.

A tui khawp, kan pahniha kan siam a ni a, ka chhuang khawp mai.

"A tui hle mai, ka ei țeuh dâwn emaw ni," nui chung hian Rose-i chuan a ti a.

"Melo-i siam a nih kha, a thiam teh asin," a ti ve ta boh.

"A ni maw? Melo-i chu, i siam tui hle mai," tiin min rawn en zauh a,chutah," I siam emaw ka ti char char a," tiin Muanzuala chu a  en leh nghâl zat a.

"Ka pui ve hlek chauh."

Kan țhut hnu rei vak loah chuan Muanzuala chuan," Melo, Bawihi, min lo hre thiam ula, Rose-i hi ka'n be lawk ang e," tiin min rawn en a, ka lo en reng avàngin chutia min rawn en chuan ka mit ka la sawn ta daih a.

"Inbe r'u. Melo-i nèn kan lo titi mai mai ang, tiraw Melo?"

"Nia, sawi tùr ka hre țeuh a nia," nui sâng chungin ka lo ti ve a, ka rilru chhûngril tak erawh a nuih a za miah lo.

An pahniha an kal sawn hnu chuan Zorini chuan," Hna lam an sawi leh tawh dâwn a niang, Rose-i hi ka u nèn hian an thawk tlâng a, a tírah chuan a pa nèna thawk tlâng an ni zâwk a; mahse, a hrisèlna a tlâk hniam tâk hnuah chuan Rose-i hi a aiah a dah a, a taima a, an thawk dùn thei hle. An inah pawh ka kal ve fo tawh a, an felin an zau teh asin. Ka uin a thawhpui thei hi a làwmawm tak tak a ni,"a ti bawrh bawrh a.

"A nih tak chu, inkawp rem mawlh rawh se," ka lo ti ve sap a.

"Ka u bulah pawh hian ka sawi chhin tawh a, ani hi chu, țawng tam lo ngang hi a ni a, a ngawi reng ringawt a nih chu. Nupui neih pawh a hun ve tawh tho si a," a ti leh barh barh.

A u țhian tak tak angin min en a ni bawk a, sawi hreh a nei lovin thuhnu dâwn deuhin thu a sawi lo ni berin ka hria, a rilru hi a tlang viau a ni.

"A țhian i ni bawk a, han sawi ta mai mai ila, hetia a awm hnu phei hi chuan ka ngaihtuah ve thei si a, Rose-i hi nei se, ka ngaihtuah lo deuh ang a te ka ti țhìn. Ani lah hian 'chu e kha e' pawh a ti ngai chuang lo; mahse, ka thu hrilh che hi hrilh miah suh aw, ka thurûk a nih chu," a ti sar sar a.

Ka hmui chu hupin ka lu ka bu nghat a.

"Ti leh ta daih ila, naktûkah tiraw in phei ang?" a tih chuan,"I u tih dàn dàn a ni mai, zanina hna an sawi fel theih chuan," ka lo ti.

A rûk tak chuan an awmna room-ah chuan luh ve ka châk, an thu sawi ka hre châk a, an chêt dàn ka hmu duh bawk. An lo awm 'țha lo' ang tih ka hlau, ka rilru a na viau ang, nat leh rih hi ka duh tawh lo asin.

"Sawi fel thei ang, a harsa lo tawp ang. In phei leh hunah pawh Mama inah khân lêng zauh zauh rawh aw, a khua a har lutuk palh ang, kei lah a bula awm reng thei ka ni si lo," a ti leh sap sap a.

Ani pawh hian hna thawh a nei a ni ngei ang, nei lutuk ang, eng hna ber nge niang aw?

"La awm rih dâwn ula chu, ka dàwrah Mama nèn in lo kal ve mai tùr."

Dàwr lampang maw? A țha alawm, a hlâwk hlauh phei chuan...nula hausa tak a ni ngei ang.

"Mahse, hun a la awm tùrah ngai ang, Aizawla i lo zin leh hunah chuan kan inah pawh i lo thleng thei ang chu, ka u awm lo mah se, kan inah chuan welcome i ni reng ang. Ka u ka ngaihtuah tluk zeta ngaihtuah vetu i nih miau avàngin i lo kan țhin ka ring tho, i lo kan țhin ang chu tiraw?"

"Ka hman phawt chuan le."

"Chuti a nih chuan a làwmawm a nih chu."

A riahna room ațanga an pahniha an lo chhuah dun meuh chuan zàn dâr 9 a pèl tawh! An sawi fel vek ang chu maw, Muanzuala tân pawh a zia hawk ang chu. Hmaichhanah ngei an inhmuin  sawi pawh a fel duh ang chu. Ka rilruah an pahnih hlîr awm mah se Zorini a țawng duh a, a titi peih a, lo ngaithla viau lo pawh ni ila a zia viau.

Rei vak lo an awm leh hnu chuan an haw ve ta a, an haw hnuah erawh chuan a reh raih mai.

"Hmaichhana hmuh kher ngai lovin 'phone-ah ka hrilh fiah mai ang chu' ka tih laiin an rawn kal hlauh a, a zia êm mai," a ti sup sup a.

"An rawn kal dâwn tih i hria em?" tiin ka chhuahchàl țan titih a.

"Ka ring chiah lo va."

Hm, hetah kan awm tih an hriat theih chhan chu a hrilh vàng a ni chiang, a hrilh a, an rawn kal peih a ring lo tihna a nih chu.

Engtik lai khân nge phone a lo hman ni? Kan awm tlâng reng emaw ka ti a, message-in a hrilh pawh a ni thei tho mai.

Hrilh pawh ni se eng nge pawi viau? A in a nia, a duh duh a kovin a sâwm thei, ka thu lo chiang êm mai.

Ka ngaihtuahna avàng chuan ka lu a na deuh ngut ngutin ka hria.

"Kan mu tawh mai dâwn em ni ang?"

"A tihchi viau ang chu!"

Mut thuai ka duh ta mai, vawiin lamah kan kal kual nasa si a, naktûkah kan phei leh tawh mai dâwn si, mut hahchawlh a châkawm alawm.

"I chauh hmel êm mai, ka lo mutpui dâwn che em niang?"

Ka melh vak ringawt. Zanin kher hi chu a bulah ka awm rei a nih chuan zawhna chhàn tùr a ngah lutuk palh ang, awm rei loh a him, nula in lêng a nei chhe lo bawk si. Ka thîkna erawh a hria ang tih ka hlau, a them pawhin ka hriattîr tùr a ni lo.

"I men chhûng tal chu ka lo awm thei ang tiraw?"

Thei lo, room khatah, chu pawh bed room-ah lehnghâl, kan awm dùn thei lo ang, thlèmna a hnai lutuk.

"Mut nghâl ka duh dâwn sia, awm lo mai ta che," tiin ka nuih a.

"Min khawngaih lo hle mai, tlaia kan thil tih pawh kha chhunzawm ka duh asin!"

Sawi chhuak lo teh se. Ka zak, min chùl pawhin nuam ka lo tih hiam hiam zia kha, ka tân ka hlauthâwng, ka tlu ruai ruai mai ang.

"Mumang lamah chhunzawm mai rawh."

Ka ngeiawm àwm teh e; mahse, ka mutnaa lo awm ve rih pawh chu a tum lui ta bîk lo.

A tûkah chuan chaw ei khamah kan chhuak. Ka biak dàn ngai rengin ka bia, ka rilru suangtuahna țha lo tak takte chu paih bo vang vang ka duh, a thawhpuinu ka lo thîk ve ringawt chu ka ti dik lo nasa a ni. Kan inkâr hi inngaihzawnna ang ni mah se mi hmuhah chuan a ni si lo, chu pawh keima thutiam vàng liau liau.

"Nizànah ka mumangah ka hmu che," a ti sup.

"I ngaihtuah chhunzawm tak tak elo?"

"Loh theih nâng."

Ka muthilh har avàngin mumang ka neih ve pawh a buaichuar tak zet a nih kha, Sakei min ûmtu hlau êm êmin ka tlânchhe reng a nih kha, a nuam hlawl lo.

Thu dang sawipui ka duh vàngin," Zorini khân dàwr a nei a ni maw? Eng dàwr nge?" ka ti ta daih a.

"Thawmhnaw."

"A nih tak chu, khawi laiah nge?"

"MC-ah."

Eng eng emaw ka zâwt pah a, Rose-i chungchâng lam erawh ka dah țha hmak. Hriat duh tam tak nei mah ila zawh ka tum lo, amahin min hrilh a nih loh chuan ka zâwt hauh lo ang.

Ka lo chhîng sek a niang chu, ka harh chuan motor chu kawng sîrah a lo dintîr tawh a, keimah chauhin ka lo chuang tawh!

Hlauthâwng ru deuh hlekin ka hawi kual a, ka hmalam chawhmeh dàwr niàwm takah chuan ka hmu, an lo țawng deuh niai niai a, ani pawhin phone-in mi a bia niin a lang.

Ka muhìl rei em le? Ka lo muthilhsan chu zia lo ka ti ngawt mai, nizàn vàng vek.

Motor bula a rawn lêt chuan ka lo harh tawh tih a rawn hre nghâl a, a chawhmeh lei khài sàn zauh pah chuan,"I mut tui hmel lutuk a, ka tiharh duh lo che a nih kha," a ti a.

"A zia lo hle mai. Ka muhìl rei em?"

"I muthilh laia i lan duhawmzia chuh! Ka tiharh phal lo rêng che a ni."

Ka zak leh tawh, duhawm min ti chu ka lâwm tho bawk si.

"Mahse, i thlalák ka neih pakhat hi chu, ka la duh ber tho."

Eng thlalâk nge ni ang? Ka naupan lai, tleirawl lai nge ka lan chhiat deuhna niang?

"Min hmuh ve tawh la?"

"Duhawm takin min dîl phawt rawh."

Leh mauh mai a. Duhawm taka dìl dàn tùr pawh chu ka va hre si lo ve.

"Min hmuh tawp mai rawh, chutiang ka thiam lo."

"Min dîl chiangkuang phawt rawh."

Ka rûm nghat a, rum deuha melhin," Min entîr mai rawh," muang fân ruih, awki hniam chhek chhawk leh thûm lam deuhin, a awphawi ang deuhin ka ti a.

 Mitko san âkin a nui suk a, a phone chu hmetin a thai zung zung a, min rawn hmuh ta a.

Paul-a nupui neih nî a min hmehsak niàwm tak a ni, ka la hmu miah lo! Zat hmel taka ka nui lai a ni nghe nghe a, camera a țha tih a hriat ngawih ngawih, ka lang chiang kelh kawlh hle a, ka bul vêla awmte erawh chu an blur vek thung a.

"Khawi ațanga i neih nge a?" tiin phone chu ka pe lêt a.

"Malsawm photography ațangin, a neitupa hi ka țhian a nia."

A lo nih chiah chu, a tak aiin ka lang țha daih alâwm le!

"Chhe lo tak i ni!"

"A takah ka chhe tho."

Min en vung vung a," A takah pawh i chhe lo, thlalâkah pawh i chhe lo," a ti ta nghut a, chutah, "I chawhmeh duh zawng i en ve duh em?" a tih leh chuan," Aih," ka lo ti vat. Hetiang hi chu ka nute'n min lo thawn thei a, lei buai a ngai lo.

"A lum tiraw? Fu tui vawt i in châk em?"

Fu tui, vawt tui zet chuan min tiharh sawng sawngin ka hria, ka in tui viau bawk a ni, hetiang tak hian fu tui hi a lo tui thei tih pawh ka lo hre ngai lo! Rilruah min kam țûntu awm lo phei se chuan a tui leh zual ngawt ang chu!

*THAHRUI NGAH VÀNG NI LOVIN, BEI HRÂM HRÂMA TI ȚÀNG ȚÁNGTE HIAN A TÀWPAH HLAWHTLINNI HMEL AN HMU CHÂWK ȚHÌN*

SHARE

Comments

Archive

Report Abuse

 Powered by Blogger

TOSODIP