☆A MAK!☆ - 21 - 29 By Dingdi Pachuau

 

☆A MAK!☆ - 21

By Dingdi Pachuau

Kan nunphung ngaiin kan nung leh ta. Ni tin school ka kal leh a, țhiante nèn pawh kan nuiho leh dar dar tawh, Paul-a pawh nupui nei tawh mah se kan infiam dàn a la ngai tho, kan tân chuan nupui nei a ni tih pawh a hriat loh. A nupui pa chanchin erawh a țha vak lo, 'A hniam chak lutuk, kumin pawh a daih kher lo ang' a ti. A khawngaihthlâk reuh khawp mai, tih theih lah chu kan nei dèr si lo, cancer natna hi chu a ngeiawm tak tak a ni.

Pawisa thawh khâwmin kan va kan ve bawk, hmuh kher ka tum lo a nia; mahse, a mutna room-ah kan lût vek. A nupuiin a lo țhutchilh ràn mai a, a lo muhìl niin ka hria.

A chêr lutuk ringawt! A hmel han hmuh meuh chuan ka khawngaih zual a, ka mittui pawh a tla lek lek a ni.

Zànah Muanzuala chu a lo lêng zauh zauh, a lo lêng zan tin bîk lo. Bâkah, chhuahvah peih tak a ni lo tih ka hre tawh a, a hna lam a nih erawh chuan a chhuak ziah, nula lam hi chu a ngaihtuah lutuk lo a nih hmel ka tia, a thawhpui nula nèna ka hmuh bâk hmeichhe dang bula a awm tâk hrut hrut pawh ka la hmu lo.

Mahse, ka hmu ngun viau lo va, a lo lènin ka hmu a ni deuh mai a, tu tlangvalin nge nula rìmnaah nula dang hruai ngai? Kei lah school kala ka chhuak a nih loh chuan khawlaiah ka chhuak khât si, hriat loh ve theih deuh tùr chu a ni.

Rose-i erawh ka thîk viau nain ka hmuh chhunzawm loh avàng erawh chuan tlêmin ka thîkna a reh ta deuh, Muanzuala nèn hian a langin inngaizawng angin kan awm si lo va, hmeichhe dang a langa han thîk viau chu ni theiin ka hre lo a ni. Thîkthu chhia min ti ang tih ka hlau bawk, ka duh miah lo; mahse, ka thîk tho bawk si.

Zan khat a rawn lèn laiin Rose-i chuan a rawn call ta. Amah a ni tih ka hriat theihna chhan pawh amah phone-tute an hmingin a ko hmasa ziah tih ka hre ve tlat, kei pawhin ka call hmasak zâwk chuan," Melo?" a rawn ti ziah, tunah pawh hian Rose-i chu a hming ngeiin a ko a ni.

An thil sawi chu ka hre châk, ka ngaithla châk lutuk; mahse, thil mawi a ni lo tih ka hria, ngaihtuah lo leh ngaithla lo ang deuhin ka awm lui ve ringawt.

An thil sawi chu ka hre lo, Muanzuala zâwk a țawng tlêm em a, eng lam nge an sawi pawh ka hre thei lo.

An inbiak zawh hnuah pawh ka en duh lo lui tlat a, kan ngawih deuh vang vang hnuah chuan," Naktukah Aizawla ka phei a ngai thut dâwn a ni," a ti ta sup a.

"Engati maw?"

"Hna lam thil a nia."

A hna chungchâng leh a hna kaihhnawih lam thil hi min hrilh khât khawp, in hmun leh ram lei leh hralh chungchâng lam a ni tih chauh ka hria. Min hrilh ngai a ti lo niah ka ngai, min hrilh loh chuan ka zâwt bîk lo ang, pawi lo, min hrilh loh leh a țha a ni mai alawm.

"Rose-i nèn hian in inhriatna a rei tawh em?" tiin ka zâwt a, zawh ve rêng rêng ka duh, ka thîk ve ang tihte hi ngaihtuah ve se ka ti hluah hluah.

"Um."

Tâwi thei si.

"Kum eng zât vél nge ni tawh ang?"

"Kum 4 chuang."

"Thawhpui a nuam em?"

"Aw."

A ti leh ta.

"A chhe lo e tiraw?" A chhànna ka hre châk, ka hre ngam chiah bawk si lo. Ka thîk phâk lo tih chu ka hria a; mahse, ka thîk tho si.

"A nu a chhùn a nih hi," a ti ta daih!

"A nu maw?! I hmu tawh elo?" Mâwli leh! Kum 4 chuang an thawk dùn tawh, hmu lutuk ang chu!

"Nu hmel țha leh fel tak a ni. Rose-i hi an fanu neihchhun a nia, an ngaihtuah thei viau bawk," amah ang lo tak chuan a tlak ve duah mai.

Rose-i hi a chhe lo hle a, nu leh pa hausa tak neiin fanu neihchhun a ni bawk. Chuti a nih phei chuan, mipa tam zâwk duhthusâm a ni chiang mai,  a chhiat lohna hi chu thuhran, a neih ît ringawt pawhin an ûm chiang ang.

"Innei daih ula?" ka ti a.

"Engah ngawt maw?"

"A, in inhmeh dâwn êm a," ka ti ta ringawt.

A nui ta huk a.

"I lawmawm reuh e!"

'Lawmawm' nih hi ka duh tawh lo, duh leh hmangaih ngawih ngawih nih ka duh tawh zâwk!

*******

A rawn haw phei leh thuai mai ang chu tih laiin a a rawn phei leh ta mai lo, a buai rih tih min hrilh tho a; mahse, kâr khat a ral a, kâr hnih a ral leh mai dâwn, va phone ve sek ka duh bawk si lo, buai ti na nâ nâ, ringhlel ang ziazâng a chêt chu.

Mahse, ka ngai ve tawh tlat alawm.

Paul-a puzawn pawh a thi ta nge nge, a thawhpuite kan nih avàngin zànah kan va lang ve țhâm țhâm, tlaivàr erawh kan tum lo.

Tea pawh ka hmu, min rawn hmu ve nghâl, kan lam pana a rawn kal nghâl avàngin pehhêl theih pawh a ni lo.

"In va fel ve!" tiin a rawn nui sâng a.

"Fel vàng pawh a ni chiah lo, Paul-a hi kan thawhpui a ni miau a," tiin ka nui ve.

Țhiante chuan min en hrek hrek pah chuan awmze nei zet hian mitko an sàn a, Tea hi an hre ve tho a, nupui min neihsan tih pawh an hre vek tho, an tân chuan a mak ve bawk a ni.

"In awm rei ang em? In tlaivâr lo ang tiraw?"

"Aw, tlaivàr êm chu kan tlaivâr lo ang, dâr 12 thleng vél chu kan meng ve ang," tiin ka chhâng a.

"A zia hlauh chu, hmel hriat in lo awm hlauh a, a zia khawp mai."

Kan titi zêl a, a sawi dàn chuan tuna thi hi a pa țhianpa a ni àwm e. A pa pawh a rawn lang zawk a; mahse, a haw leh thuai, a dam țha lo lutuk a. A titi siam siam leh a nungchang nèlawm takte chu a la ngai reng, a țawng duh dàn leh țawng paha a nui leh sak sak țhìn pawh a la ngai vek.

Mahse, tunah chuan ka engah mah a thawk tawh lo, mipa dang ka titipui ang chauh a ni tawh. Chhûngril lamah thawk a awm tawh lo, ani pawhin nula angin min en tawh pawhin ka ring lo.

A hnu deuhah chuan in chhûngah kan lût ve ta a, hmel hriat nei lém lo mah ila thawhpuite nèn kan nia, a zia viau.

Dâr 12:30 vêlah chuan kan haw, Principal-hova kal kan ni bawk a, min thlah kual leh vek, a fel thei a nia. Naktûkah school-ah kan kal leh vek ang a, chuta țang chuan mitthi in kan pan ang.

In ka thlena mu tùra ka inpeih chuan dâr 1 a pèl tawh, ka phone chu ka'n on chhin a, message a rawn lût nghâl char char. Muanzuala message 3 awmin min rawn call pawh a tum ve bawk a nih hi. Ka kal dâwn khân ka phone hi ka charge a, ka switch off daih nghe nghe a nih kha.

*Engati nge min chhàn theih loh?"

*I phone a chhia em ni?*

*Min chhâng teh*

A message hnuhnung ber chu dâr 9:12-a mi a ni. Message chu reply ka'n tum ûk ûk a; mahse, tunah chuan a tlai tawh lutuk! A muhìl daih tawh ang.

Naktûk lama a lo en atân tal tiin ka reply ta hrâm.

*Mitthi inah kan kal daih a*

A la muhìl awkawng lo niin, a lo seen nghâl, min rawn reply vat bawk.

*Tu nèn?'Ngah nge phone i ken loh?*

*I va meng rei ve?* ka ti daih.

*Tu nèn nge in kal? Tuin nge thlah che?*

Țàng țàng mai a.

*Principal-te nèn kan kal a, min thlah vek bawk*

*Principal chu tlangvâl nge pa?*

Hmmm, thîkthu a pe chhe ve hle mai, kei chuan ka tilang ngam lo kha a nia, ani ve thung hi, kan va inang lo tak!

*Nupui fanau nei a ni*

*A țhat hlauh chu, naktûkah ka lo phei dâwn, ka inah khân min lo hmuak rawh aw*

Mitthi inah kan kal ang a, vuinaah awm ngei ngei a ngai dâwn. Ani hi a rawn thlen hma chuan ka hmuak hman dâwn hauh lo.

*Dâr engtikah nge i lo thlen ang?*

*Dâr 1: 30 vêlah a niang*

Ka hman thei êm ang chu maw. Ka ngai ve tawh tho a, lo hmuah pawh chu ka châk ve tho bawk alawm le.

*Aw le*

A tûkah chuan thawmhnaw dum leh puan dum inbelin ka chhuak a, vawiin chu incheina a dang ta zak mai.

Mitthi inah lah chuan pâwnah, silpauline zàr hnuaiah kan țhu a, a vawt lo kher mai. Lehkha ka lo keng hlauh a, ka inzâp char char, mi dang  pawh an inzâp ve nasa tho. Ka sana ka en deuh sek, nghah ka nei miau mai a, ka phûr tawh viau a ni.

Vui a zo a, thla pawh kan lâkpui ve zân mai. Hun an hmang rei reuh phian, Principal chuan min thlah kual leh a tum nain kei chuan ka lo hnial tawh. Duh leh rickshaw-in a in chu ka pan mai ang, thawmhnaw thlâka ina haw leh chu a peihawm loh em mai.

A in luah hnuai garage ka thlen chuan dâr 1:20 a ni chiah, ka tlai lo va, ka hma hret zâwk chu a pawi lo, a lo thlen laia lo awm kha a hlû ka ti a ni.

Dâr 1: 37-ah chiah chiah a rawn thleng, ka nghâk rei lo ve, bâkah, ani pawh a rawn thleng dik khawp mai ka ti.

Car a dah fel hnu chuan a inah chuan kan chho a, ka kutah min kài tlat bawk a.

"Min lo hmuak a, ka lâwm e."

"Ka hnial phal lo che alawm."

"Hmuh hmasak ber che ka duh a."

In kan luh veleh fan a on a, ka seat-a ka țhut hma chuan hnung lam ațang chuan min rawn kuah a.

Țawng lovin min kuah reng a, kei lah chu ka che ngam miah lo, a chêt dàn chuan min tihamhaih bâkah min ti dik lo.

"Ka ngai lutuk che," a ti ta sup a.

Thaw huaiin," Kei pawh..." ka lo ti ve sep a, min ngai tih a sawi hi ka ring thlap a nih chu.

"I sam a rimtui."

Ka nui ta hak a.

"Naupang chhia roh e a!"

"Nge, ka ngai che alawm, i sam rim ka hre leh thei a, ka awm loh chhûng khân ka ngaihtuah reng ziah."

Sam rim ber kher.

"I thawmhnaw hi i inhmeh bawk."

A làwmawm rêng rêng e, a ka ațanga chhuak a ni ve miau si a.

"Ka lâwm e."

A lam hawia min kuai herin kan infâwp ta vang vang. Kan inhmu lo rei ta deuh bawk a, tu nge duhthawh zâwk ti niawm fahranin kan inkeih mial mial mai.

Kan inthlah hnuah chuan," A va lum tak!" ka ti chhuak hliai a.

A nui hawk a.

"Intihdaih i duh em?"

A thil sawi dàn chu ka hre thiam nghâl vat, lei sei zeta chhuah khumin," Ngawi mai mai teh," ka ti hlak a.

"I lo ngai dàm a ni maw?"

Ka sen țâwn țâwn ang chu, a lum bawk si.

Ka seat-a min țhuttîrin table fan chu ka hnaihah a rawn sawn bawk. Nuam heuh heuh tak a ni.

"I dài deuh em?"

"Tehrêng mai!"

Polythene ațangin chhang leh thei a rawn phawrh a," Nakinah kan ei dâwn nia, tunah chuan intihdaih phawt a ngai si a," a ti leh sup a.

"Vawiinah pâwnah silpauline hnuaiah kan țhu char char a nia, a lum ve êm asin, ka tui ral lo chauh tak tak a ni," uar zet hian ka lo ti a.

"In va khawngaihthlâk!"

"I sawi dàn ki ațang khân min nuihzat tih ka hre chiang, i sual hle mai."

Min rawn en a," Engtin nge ka sawi?" a ti ta nghut a.

"Nuihzat awkâ a nih kha," ka lo ti fan a.

"I hre sual, ka khawngaih che; mahse, i biang tài deuh hlek kha i hmeh chu ka ti tho."

Ka biang a lo tài maw? Thil ni thei ve tho chu a ni, kan sen char hlawm a nih kha.

"A lum êm a ni."

"In tițha lutuk e."

A hnuah erawh ka dài ta deuh bawk a, sofa-ah innghèng rialin kan țhu leh tawh.

"In tifel thei maw?"

"Eng chu?"

"Aw...in hna chu maw le, i phei chhan kha," ka tih chuan," Tihfel mai theih a ni lo," a lo ti thung a.

"A harsa viau a niang maw?"

"A khirh reuh khawp," a ti leh sup ringawt. Țawng-tlêma hi a, min hrilh tam ve deuh tùr a nia.

"Zanriah hetah ei rawh aw."

Leh ringawt.

"A, ka hre lo, i ti leh-"

"I ei ang, Nunoi chu keiman ka phone dâwn nia," a ti, ka hnialna hi chu engah mah a ngai ve lo.

*MI  RINCHHAN LUTUK LO LA, MI-AH INNGHAT LUTUK BAWK SUH, THIM ZÎNGAH CHUAN I HLIMTHLÂ NGEI PAWH HIAN A KALSAN ȚHÌN CHE A NIA*

☆A MAK!☆ - 22

By Dingdi Pachuau

Ka thawmhnaw erawh ka thlâk ta, puan leh pheikhawk sâng ve deuh hlek nèna awm reng chu nuam lo tak a ni, a T-shirt min pe a, Zorini kekawr dah nèn, ka duh ai chuan a tight deuh na a, ka sawisêl lo.

"I inhmeh reuh lutuk!"

Lâwm êm êm tùr ka ni ringawt, a ka ațanga fakna a ri chhuak ringawt pawh hi lâwm hliah hliahna tham a ni.

"Thil ka lo hawn che a... khatiang khân min en suh, thil hlu tham a ni hran lo," lungawi lo mitmenga ka lo en a hmuh chuan a ti nghâl vut a.

"Ka duh lo țhin tih kha i hre reng sia," ka tih chuan," Hei hi chu a dang daih alawm," a ti leh tlat a.

"Eng nge a danna? A thlàwn tho alawm."

"Pawm ve mai la?" tiin mitmeng khawngaihthlâk thei ang bera meng chung hian a ti leh sup a.

Hm, tûn chauh ni rawh se.

"Min hmuh chhin la?"

Couple zungbun niàwm tak, design simple zet a rawn phawrh tâkah chuan ka lo meng phâwk nasa mai! Kan pahniha bun atân a rawn lei a ni ang maw!?

"I duh zawng a ni em?"

Duh lutuk! A simple viau nain a to reuh ngawt ang chu. Rs 10 man pawh ni se, ani min pék a nih phawt chuan a hlu tho tho ang.

"A mawi hle mai."

A tê zawk chu lain ka kut veilam zungtêah min buntîr a, min buntîr zawh chuan muangchânga la kângin ka kut chu a fâwp zauh a.

"Ka thu lo chuan la chhuak miah suh," a ti pah sup a.

Pakhat chu lain ka buntîr ve a, min tih dàn ang chiah chuan ka ti ve a, ka tih zawhah chuan a nemnghehna tùr niàwm takin min pawm chial a, ril reih rawih muangchâng hian min fâwp bawk a.

Ka hlim a ni, ka hlim takzet. Tunah tak hi chuan eng thil dang mah ngaihtuah ka nei lo va, kan boruak mêk hian min chiah hneh êm êm a ni.

Zanriah ei hma chuan a inbual a, kei pawh inbual ve tùr chuan min ti nain ina haw hunah ka ti ta záwk.

Kan pahniha eirawng bàwl a ni bawk a, ka ei tui viau. Tui ti taka ka ei chu min en leh vung vung țhìn a, ei tam min ti deuh pawh a ni maithei a ni.

"Min en ziah suh, ka ril a țâm a ni ve mai a," ka ti hlak nghe nghe.

"I hmuhnawm êm a."

"Chaw ei laia inen chhên hi ka duh vak lo a nia," ka ti leh a.

"Ngaia neih i zir a ngai dâwn a nih chu."

Hmun min tihfelpui a, ka bulah zêl a awm. Hmun ka phiat a, min zui a, thlèng ka sil laiin ka bulah a lo ding ve bawk. Min thlahlel tih a tilang a, a zak lo va, a nêp vàngah ka ngai hek lo, min ngaihna leh min thlâkhlelhna a tilang a ni ve mai.

Zàn dâr 8-ah min thlah haw a, a lêng zui nghâl nain a awm rei lo. Vawiinah a rawn phei a, a chau ve ang, mu hma ve rawh se.

Kan boruak chu a nuam leh ta khawp  mai, kan inhmu lo rei tawh a, kan lo inthlahlel tawn bawk a niang, kan inhmu zut mai bawk.

Tea pawhin min rawn text zauh zauh; mahse, kan inkârah eng mah a awm tawh lo. Țhian in-text-na ang bâkin kan in-text ngai lo, naute awm dàn tùr, zànah engtia enkawl tùr nge tih te min rawn hrilh mai mai, a țha viau tho e, nakinah mamawh hun ka la nei ve maithei asin, pasal ka nei hlauh a nih chuan...

Nunoi pawhin min ringhlel tawn țhìn, eng mah min zâwt duh chuang lo va, chhuah ka duh pawhin min hnial chuang lo. Muanzuala hian chaw eiah min sâwm chhuak zauh zauh a, hnial ka hreh bâkah ka châk ve tho si a, min sàwm apiangin ka chhuak ziah.

Zan khat erawh chu zanriah kan ei laiin," U, U Muanzuala nèn hian in ni tiraw?" a ti chhuak ta phawng mai a.

Kei ve thung chu ka chaw țhial lai ka tàwp chiang lutuk! Chutiang chu min zawh ka ring țhìn a; mahse, min han zawh chuan mak ka ti tho si.

"Ngaihzawng neih rih loh kha i tum ni khân ka hre sia?"

Ngaihven loh hmel deuh hian," Kan inkàwm alawm, kan inngaizawng lo," ka ti sap a.

"Mahse, in awm dàn hi?"

"Engtin nge kan awm?"

"Inngaizawng chu in ang alawm. In induh pawhin, in induh loh pawhin a țha vek tho mai, U Tea vànga i kun reng loh hi a țha ber ka ti a, hmalam pan zêl tùr chuan ka duh che a ni," a ti barh barh a.

Ka ngawi ta reng. Nia, kan induh tawn a, kan inngaizawng alawm; mahse, keimahin ngaihzawng neih ka la duh loh vàngin Muanzuala nèn hian kan inngaizawng lang lo rih mai mai. Keimah zâwk hian ka thutiam chu ka bawhchhe zo chu a nih hi.

Tlangvâl ka biak hlek chu a thîk ve thei khawp mai! Michael-a hming phei chu a bulah sawi rîk ngam pawh a ni lo, a țhianpa Tea ngei pawh ka sawi chuan a thîk tho, min rawn text țhìn tih phei chu, sawi lan chi-ah ka  ruat lo.

Zorini a rawn phei a, ani tê hian min ngaina ve tlat a, lêng tùrin min sâwm a, ka va lêng ngei bawk.  Tea pawh a bãng bîk lo. A chhan chu Muanzuala țhian ve ber a nia, an inbe reng reng tho a, kan nih tâk loh avàngin an inkawm loh phah chuang lo. Tea a rawn lan ve avàng chuan tlemin nuam lo ka ti, a chhan chu Muanzuala mitmeng ka hmu miau si a.

Tea erawh chuan a hma ang chiahin min be bawrh bawrh. Zorini lah chuan," Melo, i lo kal thei a, ka lâwm tak tak a ni, i lo kal duh lo ang tih ka hlau lutuk a. Inngaihzawn loh hnuah pawh hian inbiak duh loh hi a țha lo, țha taka inbiak hi a țha ber," te chu a la ti tak bawrh bawrh a, ka tâwt up upin ka hria, ka sen nasa ngawt ang.

Tea pawh chuan," Ni e, inbiak bawrh bawrh tùr, a chhan chu mihring hian hmalam hun tùr kan hre hauh lo, renew duh hun pawh a lo awm leh thut thei," nui hawk hawk chung hian a ti a, min rawn en a, ka nui ve ringawt, tih dàn tùr ka hre lo miau a.

Muanzuala mitmeng chuan min en zui zêl ni berin ka hria, Tea ka be țha em, ka nuih em, amah beisei angin ka awm em tih thlengin a en pawh a ni mahna. Ka dem lutuk bîk lo, ka bialpa hlui kha a ni ve miau, bâkah, kan inzui rei ve si a.

Ani hian a u nèn hian kan induh tawn tih hi a hre miah lo a ni. Min ringhlel chhin eih lo a nih ka ring, a àwm ve tho, a u hian min duh a ring pha lo a niang.

Mut hmunah chuan min rawn text.

*Zanin kha chu nuam i ti hle mai*

*Ti e, a hlimawm alawm*

*I lài viau bawk*

Engah nge ka laih ang? Laihna chhan tùr ka nei em ni? Zorini thil sawi vàng khân maw?

*Eng vàngin maw?*

*I hriat reng kha*

*I hre sual a niang?*

*A lam hawiin i nuih kha*

Hm, khati chung pawh khân Tea thîkna tùr chu a lo la hmu tho a nih àwm kha.

*I thîk a ni maw?*

*Thîk tùrin i awm a niang chu*

Hm, thîkthu a pe chhe ve sia, ka ngaihzàwn tawh lohzia hi hre chiang se chuan aw...a thîk lo tawp ang.

*Renew in tum thei lo ang*

A va buaithlâk tak! A thîkna hian a rilru a tibuaiin a luah khat tlat a nih hmel.

*Ngaihzawng neih i tum rih loh kha aw, ka hre reng a nia*

Aw, ka hria, nei lo ang.

*Nei dâwn nâng*

*I chiang chiah maw?*

Amah hian min tichiang lo zâwk a ni. Neih loh ka tum a; mahse, ani nèna kan inkâr hi eng nge ni ta ang? Min tibuai zo vek.

*A nih, nangmah nèna kan inkâr hi eng nge ni ta?*

*Kan induh tawn*

A fîmkhur thiam ve khawp mai.

*Aw, a țha e, ka muhìl tawh dâwn*  ka ti ta daih a.

Rei vak lo hnuah a message a lo thleng leh.

*I thutiam kha hre reng rawh* 

A la rawn ti leh hrâm hrâm. Ka hria, ka hre lutuk!  A bulah hian ka hrechang tawh lo țhìn zâwk a, min hriat thartîr leh avàng chuan lâwm viau tùr ka ni.

*Ka lâwm e* tih ka thawn a, data ka off ta rih. Zanin atân chuan duh tâwk teh ang, a thîkthu vàngin eng thil țha mah kan sawi chhuak dâwn lo ve.

Zanin ataka thîk êm êm mai chu, mak ka ti. Engtin vak min bia pawh a ni lo va, kan awm duna kan titi deuh reng chu ni se ka hre thiam lutuk. Naktûk lamah a thîkna rilru hi reh hrâm se ka ti.

Mi dang a thîk a nih chuan min duh viau tihna a ni mai, chutiang chuan ka ngaihtuah a, ka rilru a nuam deuh huai mai.

Min duh hle tihna.

Zîngah message pawh min rawn thawn miah lo, zîng tin deuhthaw a message ka hmu ziah tawh țhìn kha a ni a, a thîkna a la reh lo tawp a ni tih ka hre thiam mai. Keimah zâwk chuan ka va thawn a, tu emaw zâwk kan tlàwm a ngai tih ka hria, kan inkâr tițha tùr chuan pakhat zâwk tlàwm a ngai țhìn miau a ni.

Tlai lamah erawh a zia ta deuh a niang, min rawn bia. Ka thaw huai,  Tea a thîk khân a hrehawm a, buai lohna tùrah kan buai a, kan pahnih inkâr pawh a tinghîng pha tlat a ni.

Hlim leh dam chuan hun a liam chak. Krismas kan lo hnaih leh ta, tuition class ka kalpui tawh loh vàngin ka naute pawh an duh ang ka leisak thei tawh dâwn lo, min tihnual deuh hlek a; mahse, ka pawisa khâwla mi ka la chhuak țhen mai a niang chu.

Michael-a Lunglei rawn chhuk lawk chu zànah a rawn lêng a, Nunoi chuan a lo chhàwn var. Eng nge a lo tih dâwn tihte a lo zâwt a, kei erawh nizàn lamah kan in-text tawh miau avàngin ka hre sa vek tawh a, ka lo nui vêl mai mai. Nunoi lah chuan mahni khua leh tui ngang a nih vàng nge, a lo be chhe lo nasa.

"I lo chhuk dâwnte chuan lo sawi la, hetah chawte pawh i ei ang a?" a ti.

"I uin a hrilh lo che a ni maw? Nizànah ka text a, ka hrilh reng kha."

Thil a ti pawi thei ang tih rêng a hre si lo. A(Michael-a) lo lèn vànga ngawi ta deuh hmak Muanzuala mitmenga rinhlelhna chu ka hmu chiang ngang mai, pawi ka lo ti vawng vawng. Inhrilh fiah nasat a ngai leh dâwn si a, ka huphurh lâwk.

A haw hma ta ngang mai.

A lungawi lo, thîkthu vànga haw hma tih ka hre chiang si a, nuam lo duh tak chu a ni.

Ka rin ang a ni miah lo, min rawn text miah lo! Min rawn text ang a, a thîkthu a rawn pêk chhiat leh viau ka ring a nia, zanin chu a reh hmak.

Min tihrilhhai letling hlauh.

Ka va text dâwn em niang? A lungawi lo tih ka hre reng si a, va text miah loh chu a dik thei lo deuhin ka hre si. Va text ila min lo chhâng si lo se...a va buaithlâk  tak!

Mahse, hrilh fiah chu ka tih tùr a ni bawk si...

Ka call a, a ring rei lo ngang mai, ka dah leh daih, bãkah, zàn a rei tawh a, min chhâng duh kher pawhin ka ring lo. A hnu deuhah erawh ka v text ta tho.

*A rawn chhuk dâwn tih chu min rawn hrilh ngei; eng mah thil dang a sawi lo, min ring rawh*

A phone chu a off lo tih ka hria; mahse, min reply duh hauh lo, a seen hek lo.

*Ka bialpa a ni lo, țhian ang chauhin alawm ka en, mipa tawh phawt chu thîk zél lo la*

Mahse, ka delete leh nghâl, a tàwp thu khian a tihthinrim belh ka hlau a.

*Min ring em? Ka thutiam kha ka hre reng alawm*

Ka han nghâk deuh ren rawn a, min reply chuan si lohah chuan ka text ta lo, hun a ral ang a, a reh mai ang chu maw.

Keimah pawh ka fîmkhur deuh a ngai a ni. Ani hi ka duh a nih chuan a thîk zawngte biak loh mai pawh hi ka tih tùr ni ta maiin ka hria. Mipa dang ka bia a thîk a nih chuan mipa dang chu  biak loh mai kha a țha a ni mai.

*******

*Insawi fiah a țùl chinah chuan thil dik lo a awm tihna a ni țhìn*

A message ka dawn chu ka chhiar ka chhiar a, a dik ka ti a; mahse, dik lo ka ti tho bawk.

Thil hriat sual palh a awm ve thei a, thil ni miah lo pawh ni anga ngaih tlat a awm ve thei, chuvàngin a nih lohzia zawi fiah a ngai ve țhìn.

Rose-i laka ka thîkthu ka tihlan loh vàng maiin ani pawh insawi fiah a ngai lo a ni mai a, ka thîkna kha lo tilang ta ila a insawi fiah ve tho a ngai lovang em ni?

A ngai ve tho ang. Buai ka duh loh vàng leh thîkthu chhia min tih ka hlauh vàngin ka tilang duh lo va, ka tilang ve tawh chiang ngawt ang, insawi fiah ve rawh se.

Krismas dâwn téah kan inrem leh thei, mi hriat lohin kan buai a, mi hriat loh vêkin kan inrem leh a, kawng țhenkhatah chuan a țha riau. A nuam dangdai ve tlat ka ti.

Krismas gift pawh kan inpe a; Krismas Aizawla a hman a ngaih vàng erawh chuan ka ngai dâwn lutuk; mahse, a ngai miau si. Hna thilah a chàwl ve veng veng thei ringawt lo va, bâkah Aizawl chu hmunpui a ni bawk a, buaipui tùr a tam tlat a ni.

Urlâwk zànah min rawn phone a, rei zet kan inbia. Ani erawh chu Țhalai thil tihah pawh a tel ve thei lo va, hna lam bawk a buaipui tih a sawi, ka khawngaih roh lutuk.

Krismas chibai bûk hmasak ber ka duh vàngin zàn dâr 12:02 vélah ka va phone a, hmeichhiain a phone chu a lo chhâng.

Rose-i a ni tih ka hre nghâl.

"Muanzuala ka lo be thei ang em aw?"

Lehlam ațang chuan," Thil leiin an chhuak lawk a nih hmel, a phone a keng lo tih a hre lo a ni ngei ang, nakinah lo ti leh la?" a ti lar lar a.

"An lo thleng har ang em?"

"Har lo ang."

A phone chu a keng lo a ni phawt, chutah Rose-i'n a lo chhâng zui, an awm tlâng ngei a nih chu.

Hna lam a buaipui a tih kha, a sawi dik a nih hmel.

Minute 10 hnuah ka va phone leh a, Rose-i bawk chuan min lo chhâng leh.

"A muhìl tawh a."

An chhuahna kha a la rei si lo va, a va mak àwm ve!

"A nih tak chu, a chau hle a ni maw?"

A rawn nui ar ar a," A ni ngei ang," a ti a, mipa phun deuh sur sur ri ang deuh ka hria, Muanzuala aw a ang ka ti viau lehnghâl a.

"A nih leh mai aw."

Phone chu a thi hmak mai, ka melh ngai ka melh reng ringawt!

*A NGHAWNG TÙR THLÎR HMASA LOVIN THIL TI PHUT PHUT SUH, PAWI A THLEN HNUAH CHUAN INCHHÌR A SÂWT TAWH DÂWN SI LO*

☆A MAK!☆ - 23

By Dingdi Pachuau

Nichin deuh lawkah dàwrah thil leiin an chhuak a, a phone mi dang a kawltîr a, minute tam pawh a ral hmaa ka va phone-in a lo muhìl hman leh tawh a maw? A va awihawm loh tak! Bâkah, lo muhìl ta pawh ni se, a bulah he nu hi a lo la awm ve reng bawk a, a bulah a mu ve tihna em ni? Chuvàng chuan em ni a phone pawh a lo chhàn ziah?  Ka ngaih dàn a ni lo chiang khawp.

A insawi fiah ve ngei chu a ngai ang.

Tui lo zetin ka mu a, ka muhìl thei lo, ngaihtuah ka ngah lutuk. Ka ngaihtuah thil erawh nichin lawka thil thleng hlîr kha a ni thung.

Ka thin a rim chuan ka hria. Khati khawp khân ani pawhin mipa dang lakah a thîkthu a pe chhia a, thîk miah loh tùr pawh a thîk a, hre thiam leh zãwldawh takin ka hrilh fiah a, mipa min biakna tùr pawh ka hêl ve hrâm hrâm a nih kha. Ani pawh hmeichhe bulah a awm a, a la muhìl zui, a phone pawh mi dangin an lo chhànsak a nih hi.

Ka thîk lohna chhan tùr ka hre bîk lo, ka thin pawh a rim bawk ang.

Min rawn call ka châng reng, min rawn call loh chuan ka call hmasa hek lo ang, kha nu min lo chhàn zêl tùr atân chuan ka call tawh miah lo ang.

A buai a niang, min rawn call miah lo. Krismas a zo a, ruai hlim takin kan țheh a, hlim takin ka ti tak nain ka rilru chhûngril erawh a hlim lo khawp mai. Ka chhûngte hmuh leh hriat ka duh loh vàngin a langah chuan ka hlim der ve alawm, thinlung erawh a hlim hlawl lo.

Michael-a pawh a rawn lêng leh ta, Muanzuala'n a thîk tih ka hriat avàngin ka be țha tho nain a àwm tâwk ka hria, Nunoi hian a lo be nasa țhìn. Ka lâwm daih zâwk, nula a ni ve deuh tawh tho a, a mawi loh viauna pawh a awm chuang hlei nem.

Ka tuar thei tawh thlâwt lo, ka va be ta nge nge.

Amah ngeiin phone a lo chhâng ta.

"I reh hle mai."

"Ka buai êm a ni, buai laiin ka'n dam țha lo pah bawk a," a tih chuan ka ner deuh sak. Nun a chèn nasa deuh a niang chu.

"Min rawn call-na hun nei lêk lovin i buai bawk sia, ka be rei lo ang che," ka ti ve ta sak a.

"I lung a awi lo a ni maw?"

"Awi lo..." dâwt ka hrilh thei hlei nem.

"Ka buai zo țêp, kei ngei pawhin ka hna hi ka ning a nia."

A hna a nin chuan a fuh lo viau ang, keimah vàng chuan ning lul suh se, ka lungawi loh vàng chu a ni lo ang chu maw...

"Mâwli, mâwl chhunzawm zêl suh," tiin ka inhau mawlh mawlh a.

"Krismas chibai pawh min rawn bûk lo," la lungawi lo tih hriat tak hian ka ti a.

"A pawi ka ti, ka phone ka tihbo vàng a nia."

A ruih vàng a niang chu! Urlâwk zàn khân kan inbiak lai kha chuan a ruih àwm ka hre lo, a hnuah erawh a rui thei tho, a rui viau ang a, a phone pawh kha Rose-i'n a lâksak a niang, ani lah hian tibo angin a insawi bawk si. A ruih viau ngai lah ka hre bawk si lo.

"Rose-i'n min lo chhâng a."

"Ka phone-ah maw?"

"Aw, in awm dùn char char a nih ka ring a?"

"Teuh nâng. Hna kan thawh chauhin."

Hmeichhe aw ka hria, a rawn ko lang lang, Rose-i a ni. A rawn koh dàn pawh chuh, a ko duat hle mai," Darling," ti ngatin a nia a rawn koh ni! An lo awm dùn leh reng tawh a nih chu!

"Rose-i a ni maw? Dâwt min hrilh chiang, a hmaa ka rawn call che pawhin i muthilh tawh avàngin amah thoin min lo chhâng, in mu dùn bawk. Ka rin i lo ang lo hle mai, nia, kan inngaizâwng lo bawk a, i duh duh chu kawp rawh, eng mah ka sawi lo ang," ka ti a, ka phone chu ka hmet tàwp hmak.

Rei lo tê hnuah a rawn ri nghâl, amah a ni tih ka hriat veleh ka hmet tàwp hmak, a number chu ka block zui ta nghâl bawk.

Ka tihsual liau liau a ni. A rûk pawha lo ngaizawng miah lo tùr kha ka nia, tunah keimahin ka tuar leh a, thutiam pawh hlen thei lo mihring han nih chu, ka va nêp tak!

"I nêp lutuk, i thil tih sual liau liau i tuar a nih kha, tuar tùr i ni," tiin mittui tla zawih zawihin ka inhau leh rih bawk a.

Zaikhâwm tùr ka nia, ka lu nat chhuanlamin ka zaikhâwm ta lo, ka hmai ka phih a, ka nu chuan damdawi ei tùr min rawn pe. A awm lai chuan ei ang deuhin tui ka in a, a chhuah hnuah erawh ka mittui chu ka sûm peih lo.

Mi hi chuan ka pâwn lam lan dànah min teh fo a, pachang thei tak leh rilru pawh na ve ngai lo angah min ngai țhìn; mahse, min hre chiang lo. Ka rilru hi a noin a na hma êm êm a; mahse, ka thup thiam êm êm thung. A langah erawh pângngai takin ka awm țhin, ka rilru natna hi ka tilang chhuak ngai lo, ka pâi reng mai zâwk țhìn.

Rilru khingbâi deuhin kum thar ka hmang a, ka rilru ațanga Muanzuala paih chhuah chu ka tum nasa khawp mai; mahse, theihnghilh ahnêkin biak ka châk thei lutuk ringawt. A number ka block pawh chu ka en leh rûn rûn țhìn a, biak ka châk zek zek. Min rawn biak a tum țhin ang em le? Hm, ka ring lo, a duh tak nèn an awm dùn ang a, min hrechang tawh lo ang.

Peih lo chung chungin Jan 6-ah kan chhuk a, rilru hlim lo nèn, chhûngte bul lova han awm leh chu țah a chhuak ngawih ngawih maiin ka hria. Ka rilru chhûngril hi a hlim lo tak zet a, keima tih dik loh vek a ni tih hre mah ila thil thleng tùr a thleng zo vek tawh si.

Ka school bâng tlaia rawng ka bàwl laiin Muanzuala a rawn lût hlawl mai! Mak ti deuh hian ka lo en hû, lo biak nachâng pawh ka hre lo.

A khabe hmul leh biang hmul a lo zuah deuh hman emaw ni, a lang bawrchhawr khawp mai. A mitkhur pawh a tla deuhin ka hria, zàn lamah a mu țha thei lo ang a, a in nasa deuh pawh a ni mahna, a mit hnuai inrîn pawh ka hmu.

"I phone min lo pe teh," țhut pawh țhu lo chuan a ti sup. Țhu tùr pawhin ka sâwm lo réng réng!

"Eng atân?" Ka mit ka la sawn ta chauh, ka lo en nasa lutuk chu zahpuiawm ka inti hnuhnawh kher mai.

"Ka en duh."

Ka block leh block loh kha en a tum a ni ngei ang.

"A ngai lo, ka block che, i hriat duh chuan," ka ti ta thung a.

"A chhan ka hre duh."

"Eng chhan?" ka ti lui ve ngat a.

"Min block chhan."

"Ka block che chuan min be tùrin ka duh lo che tihna a ni mai," ka ti khauh a.

"Ka biak i duh loh chhan chu?" a la ti ta zêl.

Ka chawhmeh siam, hmarchapui rêp buh nèna ka bai chu ka chawk nawk nawk a, gas chu ka off ta nghâl.

"I hre reng alawm."

Min en kur a, a kut chu a kuangkuah thûn mai a, a lang hlauhawm thei lek lekin ka hria

"Ka hriat reng ni se ka zâwt lo ang che," a ti ta nghut a.

Ka tum lâwk miah lovin, insùmkarna pawh nei lovin ka sawi chhuak ta phiar phiar mai, ka âng char char a ni ber, ka sawi chhûng chuan vawi khat mah a lo țawng ve lo. A inkuangkuah a, ngun zetin hawi sawn hauh lo leh che hauh lovin min en kur reng.

Ka àn zawh hnu chuan ka thaw ipik deuh kha a zia huai huai. Mak ka inti zâwk! Hetiang hian tu bulah mah ka la âng ngai lo, țawng thei min ti ngawt ang chu! Pawi pawh ka ti chuang lo, kan inngaizâwng chuang lo va!

A hnua thil thleng chu a mak ka ti. A insawi fiah ni pawhin ka hre lo, thil nih dàn phung dik tak min hrilh ni zâwkin ka hria.

Rose-i nèn chuan hna an thawk dùn deuh reng a, bâkah, ani hi chuan a hming pângngaiin a ko vak ngai lo a ni àwm e, a sawi dànin. 'Duhtak', 'Honey', 'Darling' tih leh 'Dear' tih a uar a, chutiang chuan a ko fo tih a sawi bawk, chutianga a koh avàng chuan an inkârah thil a awm tihna a ni lo.

"Min ring em?"

Thil nih dàn a sawi chu a tak tak a ni ang em? Tunah lo ring ta se, an buai leh tho ang em? Hei aia nasa rinhlelhna tùr a hmuin a hre leh ang em?

Duhtakte lakah hi chuan nèm hi a lo awl a nih hi. Ka rilru chu a nêm leh hle tawh, a langah erawh ka inti paukhauh a, 'aw' ka la pawh duh lo.

"Min ring em?" a ti leh sup a.

"Ka ngaihtuahna i tibuai," ka ti daih a.

Thaw hawkin,"Phone kha, siam țha rawh aw," a ti leh sup a, in ațang chuan a chhuak nghâl vut bawk a.

Ka rilru tibuai mah se ka thutlûkna zawng ka hre chiang ngang mai. Hloh ka duh lo va, a mai maia kawp lah ka duh hek lo, a mai maia kawp tùr chuan ka duh lutuk tawh, a zùnin min phuar nghet lutuk tawh si a.

Kan han inkawp chho leh ta a, kan thîkthu a chhiat dun avàngin kan invêng tawn viau. Thîk tùr mi dang ka melh vak lo, ani pawh chuti tho.

Ka birthday-ah chuan perfume man to zet leh rimtui zet min pe a, ka lâwm kher mai. Chu chauh a la ni lo, school-a pheikhawk bun tùr min pe bawk, a mawiin bun a nuam a, a to viau pawh ka ring.

Chubâkah, zanriah min ei chhuahpui a tum a, ka duh lo va, a ina hman dun ka rawt ta zawk a, a lo hnial bîk lo. Hlim taka kan ei tâk kha, min chîm buaitu leh mitmei vèn tùr a awm lo bawk a, kan free teh asin! Free tih lêmah kan infâwp mai mai chauh!

Tea leh Michael-a hnên ațang pawhin birthday wish-na ka dawng. Ka lâwm khawp mai, Tea chuan gift erawh min pe ta lo. Ani lo min petu ka nei tawh tlat, ka lâwm tâwk viau bawk.

Zanriah ei khamah a veranda ațangin khawpui pe un mai, lang thei chin êng ve tuar mai chu kan thlîr a, a blanket kan la chhuak a, kan invûr thûr mai.

"A vawt i la ti tho em?" Min kuah hlûn a, hmai lam a lan avàngin vawt deuh mah se a dang chu a vawt lo.

"Min kuah chuan ti lo ve."

"Ka thlah phal nâng che le!"

Ka nui hak hak a, kan thâwk zawng leh țawng zawng chuan a khu hlat hlat mai.

"Bawihi pawh min chhùn zo tawh, rawn phei a châk leh tawh a, min rawn phone sek mai," a ti sup sup a.

"A chhun kher che chu ka ring lo, nang chuan Aizawl nuam i ti zâwk emaw ka ti asin? Chuan, nuam tih chhante pawh-"

Ka hmui a rawn hup a.

"Fiamthu pawhin sawi lo teh!"

Ka beng a rawn thâwk khum a, a lum ham ham nain ka ni chiai chiai, ka mûr iai iai a ni ber.

"Zanin hi ka theihnghilh thei tawh lo ang, a hlu hle si a," ka ti sep sep a.

"I tân chuan ka ti zêl ang."

"Tûn ațanga kum 5-ah pawh maw?"

A bu nghat a, a kut chuan ka nghâwng a tuai neuh neuh a.

*******

Zorini a rawn phei a, kei chu ka lêng leh ta rih lo. School lam kan duhthawh a, cl-x phei chu board exam tùr an ni si a, kan țang zual. Chuvàngin, Muanzuala pawh ka hmu khât deuh, text erawh kan in-text reng.

Zan khat a rawn lènin ka phone a khawih a, keiin a phone. Kan games neih hi kan inneih thleng a ni ber mai.

Tea nèna kan in-text-na ka clear vek tawhin ka hria a, chu chu a chhiar niin, min en ta rùn rùn mai.

"In lo la inbe țhìn a ni maw?"

"A chângin, țhian ang chauh a ni tawh."

A lung a awi vak lo tih ka hria, a țawng tlèm tawh naklaiin, Tea nèna kan in-text duh loh vàng chuan a ngawichawi lehzual.

"In-text mai mai, kan inkârah eng mah a awm lo."

Thlèm chikim leh ka thiamna hrang hrangin Tea nèn kan inkârah engmah a awm tawh lo tih ka sawi bawk a, a tàwpah lungsi zân lovin a haw tâk kha. E, a haw hmain Tea number chu block tùrin min la ti zui.

A thikthu chhiat vàngin mipa ka be ngai lo va, Tea pawh ka block tâk kha, Muanzuala tân pawh thîk kha a àwm viau, ka bialpa hlui kha a ni miau a, hriat thiamna chen ka nei zél.

Ka bazâr a, ka haw țêp tihah Tea chu ka hmu nawlh mai.

"Eng nge i tih?"

"Ka bazâr lawk a."

"Nula mahni chauha bazàr te chu, an ru bo mai ang che," nui var var hian a ti a.

"Kei chu ka senior tawh lutuk!"

Kan nui dùn a,"I bazar zawh tawh chuan ka lo thlah dâwn che em niang?" a ti a.

"A ngai lo, ka bazar vak bawk lo."

Mahse, min thlah ta tho.

Zànah message ka dawng leh ta nawlh.

*Dâwt min hrilh hauh suh* tih tê hi. Eng dâwt nge ni a sawi ni?

*Ka hrilh lo che*

*Vawiin khân țhianpa nèn ka hmu dùn che u.*

A lo lungawi lo leh tawh a nih hi.

*Min thlah ringawt alawm*

*Dâwt hi ka hua*

*Kei pawh*

Kan inchhâng tâwk khawp mai.

*A nih tak chu!*

*Tea hi thîk ziah lo la, kan inkârah eng mah a awm lo ka tih tawh kha, ani aiin i țha feeee* uar min ti leh ngawt ang.

*Text tawh suh, block nghâl ang che*

Hm, inhmu tùra text tùrah min ngai a ni ngei ang.

Kan thikthu chhe dùn lutuk hi chu aw...

Ka block lo, țûl ka ti lo, bâkah Muanzuala țhian ber a ni ve a, block daih chu, a sualthlâk em mai; mahse, ka fîmkhur sawt. A hmuh loh tùrin awm tawh ang, thil ni lo lo a suangtuah leh palh ang.

AOC-ah petrol a awm loh vàngin thawhpuinu pakhatin Zotlanga petrol  lâkpuiah min sâwm a, chawlh lai a nia, ka kalpui ve mai.

Kan hnung chiahah Tea petrol la tùr chu a rawn kal ve niin, min rawn ko a, biak loh theih pawh a ni lo.

"Ka hmuh tum lohnaah ka hmuh daih che chu!" a ti a.

"Nia, AOC-ah a awm lo va, diesel chiah a awm a."

"A nih tak chu, helamah in rawn kal phah a, in rawn intithawveng pah tihna a ni mai alâwm, i țhiannu hi tu nge kha, ka hre chiang ngam ta chiah lo," tiin Rpi chu a melh a.

Ka han hrilh hnuhnawh a, nui hawk hawk chungin petrol lâk theih hma chu kan titi a, Muanzuala thil sawi erawh ka hre kar, min hmu ém lo ang chu maw.

"Rawn lêng lawk hman ula ka ti hle mai, ka fapa pawh i la hmu si lo," a tih chuan," Nia tiraw? Hmuh a châkawm khawp mai," ka lo ti ve a.

"E, taka, a thlalâk ka nei," tiin a phone chu a phawrh a, a'n hmet zat zat a, kei pawhin hmuh tumin ka din hnaih a.

Thlalâk ka hmuh chuan ka nui var var, a hmel țha reuh lutuk ringawt!

"A va hmel țha reuh ve!"

"A pa min chhùn a," tiin a nui var var a.

"Nia, a ang tho che, a nu pawh a an tho ka ring bawk."

Zanriah kan ei kham hnu lawkah Muanzuala' n min rawn call, a hming ka hmuh chuan ka nui var var.

Thawveng zet hian," Hello?" tiin ka aw chu a tipuam lui a.

" Kum nga chhûng ngaihzawng neih loh i tum thu i sawi kha, vawng reng ang che," a rawn ti nghâl ringawt a.

"Kum nga a tlin tawh loh kha."

"I tân hian ka lo hnawksak hle a ni tiraw?"

"Engtin maw?!!!"

"Tunah chuan kan inkârah eng mah a awm tawh lo, i duh duh, i bialpa hlui chenin i pan theiin i hmu thei bawk."

A fiamthu emaw ni le?

"Fiamthu thawh lo teh."

"Ka fiamthu loh ber țum a ni.  Kan inkâr a tàwp, tûn dârkâr ațang hian."

A tàwp ta hmak mai.

A thil sawiin min tihrilhhai lutuk a, ka ka ho ringawt!

Tunah khân min țhen tihna a ni em? Engati maw? A chhan tal hriat ka phû lo em ni?

A number chu ka hmet chhuak a, call ka tum cuan switch off a ti ta tlat.

A ngaihna ka hre hlawl lo! Mak ka ti lutuk a, ka mumang a ang a ti!

*INȚHENNA HREHAWM BER LEH HRILHHAITHLÂK BER CHU A CHHAN SAWI FIAH MIAH LOVA INȚHENNA HI A NI*

☆A MAK!☆ - 25

By Dingdi Pachuau

Za lo zet hian ka nui a.

Eng ang nulaah nge min ngaih? A duh duha a chhaih kual theihah maw? Khatih lai khân ka la naupang deuh a ni maithei, bâkah, rilru na hma leh dâwt hrilh pawh awih zung zung thei mi ka lo ni a ni mahna, tunah chuan nula senior an tih theih tùr ka lo hnaih ve tawh a, ka rilru pawh a naupang tawh bîk lo.

Ni e, a duh phawt chuan, ka thutiam lak ațang chuan ka free  tawh alawm, bâkah, thil a chhinchhiah thei lutuk rêng rêng, khâng kha chu hmanlai thil tawh a nih kha.

Tunah chuan nun tharin ka nung tawh tih a hre lo em ni? A duh duha koh kual theih kha ka ni tawh lo, nula luhlul, thinlung khauh leh sak ka ni tawh.

Ka rilru ka siam ve nasa a, ka tum tlat chuan ka thei tih ka hre chiang tlat a ni, a hunlai kha chuan a harsa ve; mahse, ka thih phah chuang lo. Ka rilru nasa takin a khauh phah ta a, ka tum miah lohin ka lo țawng tlêm tain ka lo nui khât ta deuh bawk a niang, Nunoi leh ka thawhpuite'n min hrilh zauh zauh tlat, danglamna ka lo nei tam riau a nih chu.

Message chuan min tidanglam lo, amah erawh ka ngaihtuah chhuah phah ta thung. Ka ngaihtuahnaa a awm chu phû lo ka ti viau nain a lo beisei anga ka lo awm lo tùr a hmuh hun ngaihtuahin ka nui sak.

Tlaia Nunoi rawn haw chu a rawn hlim khawp mai, a țawng barh barh reng a, vawiin lama an hna thawhte chu sawiin hah hre lêk lo hian a titi char char a.

Michael-a pawh hian a awm dàn ațang hian a lo man thiam a nih ka ring, thup thiam mawlh hek lo le. Number an lo innei tawn a, an in-text zauh zauh ațangin Michael-a chuan a fiam ta zauh zauh a, Nunoi lah a lo lâwm thei ropui, zàwi záwiin an induh chho ve ta a; mahse, Nunoi ka fak ve deuhna chu a training chhuah hma chu ngaihzawng neih a tum loh thu a hrilh ngam chu a ni. A zir theihna tùra chhûngte thawhrimzia a hre ve a ni ang e, Michael-a lahin mi dang a lo buaipui bîk lo, a training chhûng chu a nghah tùr thu a lo hrilh ve hmiah bawk.

"I hlim hle mai maw? I thawk nasa lo hle tihna a nih ka ring, i țawng ring thei êm mai," ka tih chuan nui chung hian," Hmeichhia chu kan hah lêm lo, bâkah, U Michael-a'n ka tih tùr min tihkêp vek a," a ti leh a.

"U Michael-a tih reng mai!"

"A fel êm a ni," thu tak zet hian a ti leh. Hei hi chu a dik alawm, mi fel a ni tlat. Mi fel tak a nih bâkah a tlàwmngai tel bawk. Mâkpa atân chuan ka iai loh ber páwl a ni ang, kan lo hriat chian a ni bawk a. Ani ang tlangvâl felin Nunoi a lo duh ve phawt chuan ka duhpui reng mai.

Zànah Michael-a a lo lêng a, ka ke na chanchin chu min zâwt a, kei pawhin ka hrilh ve mai bawk. Nunoi, room lama a la awm avàngin ka lo be rih a ni, an induh avàng hian ka lo biak țhat phah chuang lo va, ka be chhe hek lo. Ani pawhin a hma ang thovin min be peih reng a, a fel ngai rengin a la fel.

Nunoi rawn chhuah hnuah erawh ka țawng vak lo, ka nu bulah țhuin, a vaihlo zial chu ka lo pui a, ka zial thiam ve lo nain ka lo țàwnpui a.

"Zu tlêm ve deuh tawh la?" ka tih chuan," Ka zu tlêm tawh alawm, ka la nghei thei lo deuh chauh mai a nia, i pa pawhin nghei tùrin min ti fo va, ka la inpeih rih lo a ni," a ti a.

"Inpeih kher a ngai hlei nem, nghei tum pawh a ngai lo, nghei tawp zâwk la?" ka ti leh a.

Nunoi chuan," A duh hleuh hleuh êm mai, a nghei lo tawp ang," a lo ti ve a.

"Ka la nghei ve ang chu, tûn hnaiah erawh hi chuan nghei tumna ka la nei rih lo a ni," a tih chuan ner nâng hian ka en a.

"Nutling i nia, a țha zâwk i hria alawm le!"

Kawngkhàr a rawn rì a, ka nu chuan," Lo lût rawh u," tiin a lo chhàwn a.

Muanzuala a rawn lût, tu tih ka lo hre lo țêp a ni. A hmai leh a khabe hmul a zuah a, a khabe hmul lam phei chu a zuah buk viau, vai film-a mi sualpa ni àwm tak a ni!

Ka nu chuan a lo hre nghâl vat.

"E khai! Inhmuh a va khât ve! Lo țhu rawh, i dam maw?" a lo ti nghâl vat a.

"Nia, inhmuh a khât khawp mai, in lo dam țha zâwk maw?"

Nunoi pawh chuan a lo be vat, ani hi chu a fel ve hrim hrim. Kan inan lohna chu ani chuan tu pawh țha takin a be thei, kei erawh chuan ka thei hauh lo, ka fel lohna tak pawh a ni, insiam țhat erawh ka tum lo a nih hi, he pa lakah hlauh phei hi chuan.

Kei chuan ka lo be ve mang lo, ka nuin a be mawlh mawlh reng a, chutiangin Nunoi pawhin a be ve zauh zauh; kei erawh chuan vaihlo zial chu ka lo țâwn mawlh mawlh thung, ka biak vak ngai lovin ka nute'n an bia a, a làwmawm khawp mai. Biak ka châk hran lo bawk a, a tihzia viau e.

"Melo, engati nge i ke kha?"

A hriat ve kher a ngai lo asin le.

"Ka bilh palh a."

"A, nula senior tawh pui e ti lo hian naupang ang mai hian a kalna tùr hi a en țha lo țhìn a," ka nuin a lo tih chuan ka nu chu ka ngei rilru khawp mai.

"A nih tak chu, a zia lo hle mai."

Zia lo a tih tak tak pawh ka ring nek lo ve!

Engtikin nge a lo thlen, khawiah nge a thlen, a riak dâwn em tihte pawh zawh ka tum lo, ka hriat a țùlna ka hre lo. Țhian pawh kan ni tawh lo va, chanchin inhre tawn lovin kan awm rei ve tawh êm! A chanchin hre lo pawh hian ka lo nung thei lutuk tlat a.

Mahse, ka chhûngte hriat laia lo biak loh viau ringawt chu a dikin ka hre lo leh deuh a.

"Zanin i riak dâwn em?" ka ti sap a.

"Riak lo ang."

A hàwna tùr a hla vang vang si a, a lo va lêng peih tak! Țhian rawn lènpui nei se chuan a zia deuh mahna, mahni chauh phei chuan...

Eng thil nge maw ka ngaihtuah ni? Ka ngaihtuah a phû lo, a duh duh dànin a awm thei, ka lo buaina tùr a awm miah lo.

Ka be ve zauh zauh, a mawiah. Ka biak loh chuan ka thinrim khum emaw a ti ang a, amah vànga thinlung nâ angah min ngai palh ang, chu thil chu ka duh loh ber a ni si a.

Ka pa a rawn haw chuan ani pawh chuan a rawn be hlut, an thingpui tùr ka nuin a siam leh rih, haw tawh se ka ti asin le.

"Zanin chu hetah riak la?"

Ka nu ka ngeizia chuh, ka thâwk a tihrehawm nghâlin ka hria, ka âwm a tâwt  nghâl țûn.

Ka vànneih asiamin a lo hnial ta hlauh mai, ka thaw nghâl huai huai. A riak thei lo ang, ka țhian hlui chu a ni ngei mai, a rûka ka bialpa hlui pawh a ni; mahse, tunah chuan engkim a danglam tawh. Khâng kha chu hmanlai thil a ni tawh, ka phûm bo vek tawh bawk.

Michael-a haw hma hretin a haw, ka thlah theih loh avàngin ka nuin a thlah a, kawngka thleng.

Mutnaah min rawn text.

*Zan khatna* tih tê chauh hi.

A number chu ka block nghâl, a duh duh huna a text tùr ka ni lo, ka phone a tihnawk.

*******

Zirtàwpni a ni a, School ka la kal theih loh vàngin inah ka awm, ni hnih lai ka kal tawh lo, kárleh lamah erawh chuan ka bâi thleng tho tawh ang,.ka kal ngei a ngai tawh.

"In awm em?"

Inah ka awm tih engtin nge a lo hriat ni? Inlêng neih ka peih lo asin, ani hlauh phei hi chu.

"Aw," ka ti ringawt, kawngka hawnsaa ka lo dah kher kher chu keimah ka inngei a nia aw.

"I awm ka ring rêng a."

Ka chhâng lo, ka mood a off tlat.

"Ka lo lût thei ang em?" Deuh kher chuan, a ngeiawm thiam hi ka tia. A țawngkam leh chezia hi ka run tâwk a tling viau a ni.

"Lo lût rawh."

Ka awah chuan phûrna rêng a awm lo tih hria se ka duh ngawih ngawih, a hma kha chuan hmuh hlàn ka nghâkhlelin ka phûr hle țhìn a nih kha.

Țawng leh ta lo chuan kan ngawi dùn reng, inep deuhin kan țhu a, en miah lo mah ila min en char char thung tih ka hria, ka en duh lo tlat.

"I thin a rim tiraw?" Minute nga vêl zet kan ngawih hnuah chuan a rawn ti ta sup a.

"Rimna tùr a awm em ni?"

"I țawng duh lo sia?"

"Țawng châkna ka nei lo."

A chek hluk a, ka en loh miau avàngin a hmel lan dàn tùr ka hre lo va, ka mitthlaah erawh chuan thinrim deuhin min melh kul reng mai.

"I lo dang tawh takzet a ni," a ti thûm leh ta dût a.

"Kan pângngai reng thei hlei nem."

Min ngei ngawt ang chu, pawi ka ti țhak lo, ani tihlàwm hi ka hna a ni lo, lo lêng tùr pawh hian ka phût hek lo.

"A dik e."

Kan ngawih leh vang vang hnu chuan," Michael-a kha a lo la lêng țhìn a ni maw?" a ti teh daih a!

"Aw."

"A la beisei reng che a ni maw?"

"Tlangvâl a ni alawm."

"Engati nge hetiang hian i awm tlat a?" aw sehchilh nak hian a ti sup a, a zawhna ka chhàn dàn hian a lung a tiawi lo tih ka hre thei mai, a rûkin ka nui var var.

"Ka tih dàn pângngai."

"A ni lo!"

A țawng chu a vîn hauh lo; mahse, dawhtheihna a neih tlèm tawh hmel khawp mai. A duh duhin awm se, ka ngaihtuah ve tùr pawh a ni lo ve.

"Keimah vàng a ni tiraw?"

A va inngai ropui tak! Amah vànga hetia awm hi ni tho mah ila ka hriattîr tawp lo ang, a inngai ropui lutuk hi ka ngai thei lo.

"Hetia i awm chhan hi keimah vàng a ni tiraw?" a ti leh dût a.

"I inngai ropui hle mai maw," ka ti ta sak.

A thinrim ka ring a nia, ka rin loh deuhin a nui ta hawk mai!

"A ngaih châng a awm ve țhìn a nia, i ke chu i entîr rêng rêng em?" a ti teh daih a.

"Aw."

A nui leh hawk a, tûn țumah erawh hi chuan ka en lo thei lo, a mitmenga nuihzatna pawh chu ka hmu chiang khawp mai, ka thin a rim deuh ringawt, min nuihzat a nih hi.

"Thil ka ngaihtuah chhuak; mahse, i la lawmawm reng tho," a ti a nih chu.

Nula senior lam nih tawh hnua 'lawmawm' intih hi chu a làwmawm fahran lo. Tunah tak phei hi chuan min la nuihzat zui, thil làwmawm tak chu a ni lo chiang.

"I thutiamah khân i ding nghet tiraw? Bialpa i nei miah lo tiraw?"

A intihre hle mai maw. Bialpa ka neih loh chhan chu ka duh loh vàng a ni mai, ani hriatah erawh sawi lan kher ka tum lo.

"I hriat kher a ngaiin ka hre lo."

A ngawi ta hmak mai, khatianga ka chhàn kha a ring lo a ni ngei ang, a rûkin ka nui var var. Ani hian bialpa ka neih leh neih loh a hriat hi a țûl lêm lo, mi nun va hriat vek tum tùr a ni bawk lo mi pângngai chin nia inngaite tân chuan.

"I luhlul dàn hi ka duh zawng tak!"

Chhûngril lama ka thinrim dàn chu nasa tak a ni, ani hi a insûm theiin ka huat zawng tùr a hre hle a ni, a hmaia ham nawk nawk ka châk! Min tihthinrim theih dàn chu a mak ka ti hial zâwk!

"Hetianga i awm nasat poh leh ka thinlung hi i hneh telh telh-"

"Ngawi rawh!"

Ka insùm theihna chu a keh chhe zo vekin ka hria. Ka kut ka hûm ruh char char a, ka țhutna ațangin ka ding zawk, ka ke a nat țhawt avàng chuan ka țhen sawk bawk, ka ke a nâ tih ka lo theihnghilh vàng vek.

A haw hnu lawkah Nunoi a rawn thleng. Ka awm dàn a lo dik hman tawh a, nui sângin ka lo be thei tawh.

"U, naktûk chu U Michael-a a rawn chhuk dâwn a, ka chhuak lawk thei ang tiraw?"

"Eng nge a lo tih dâwn?" ka lo ti thung a.

"Mamawh a lam dâwn a niang."

"A haw lehnghal dâwn em?"

"Ih, riah a duh a, rem i tih chuan?"

Ka nuih a tiza reuh mang tak e.

"Hetah maw?"

"Aw."

"A țha alawm, in chêtsual dâwn loh phawt chuan-"

Min rawn chùm awk.

"Ka lâwm e, ka'n hrilh nghal teh ang," tiin room lamah chuan a lût ta nghâl a. Ka nuih zui a.

An inthlahlel ve a, a àwm ve alawm. Kan tih loh dàn pawh a nih bîk loh kha, infuh tawn chuan ni khat lek inhmuh loh pawh a hrehawm duh êm kha maw.

Kei ve thung hi, engtikah nge bialpa ka neih leh tâk ang le? Tuna ka rilruah hi chuan neih tumna pawh ka nei tawh lo, min hmangaihtu nia ka hriatte lahin min kalsan ve ve tawh a, rin ngam tùr mipa hi ka hmu mai mai pawhin ka ring tawh lo.

*I NUNAH  KHÂN TUARTU NI LOVIN HNEHTU NIH TUM RAWH*

☆A MAK!☆ - 26

By Dingdi Pachuau

A rawn lèn apiangin a haw hnuah message ka dawng ziah, a number chu ka block ziah bawk; mahse, sim card a ngah àwm hi ka tia, ka block ve tak na hian number hran ațangin min rawn thawn thei zêl tho!

*Ni sàwmna*

Vawi sàwm a rawn lêng tawh tihna a nih chu. Ka lo chhinchhiah lêm lo va, a  lo chhinchhiah thlap a, a ti țha e. A peih chhûng chu rawn lêng se, nula inah tlangvâl a lêng a ni ve mai a, lo phal loh thu a awm hlei nem.

A lo lèn laia Nunoi'n lehkha a lo la zir hman loh chuan a lo chhàwn hmasa ziah. Ani hi chu a fel ka tih tawh kha, kan awm dàn a hriat zawng zawng pawh kha a theihnghilh bîkin ka ring lo nain khatiang boruak kha hria angin a awm tawh hauh lo. Hmel hlim takin a lo be zêl, fel ka ti khawp mai.

Ka ke pawh a zia viau tawh, school pawh ka kal tawh, a harsa khawp mai a; mahse, rickshaw ka hmang zêl mai, school kal theih loh ringawt mai chu, hrehawm tak a ni, khua a har, a reh vawng vawng.

"Rickshaw hman ziah ngai lo hian in pa inthlahtîr mai ta che."

Ner sawk hian Paul-a chu ka en a," Ka bialpain min bàn leh tawh sia, nangmah hian min rawn lam kâwi ziah mai la?" ka ti a, ka nui pah bawk a.

"Mi pâ ka ni tawh, no vacancy," a lo ti leh a.

"No vacancy pawh ni se, i bike hnung chu a âwl tho alawm," ka tih chuan mi dang chu an lo nui dar dar a.

"I ke na mah se i la chimawm reng tho a nih hi, i țawng duh a chhuak leh țan dâwn tawh niin a lang bawk, a làwmawm e," a lo ti deuh hmak thung.

Tlaia kan bàn chuan school kawtah chuan car ka hmuh țhan deuh lo ding chu class ațanga ka chhuah pah chuan ka hmu a, eng thil nge maw a rawn tih ni? Min rawn hruai a tum em ni le? Ka ke a nâ tih a hriat ve reng tak kha, a ni ngei ang.

Ka chuang hauh lo ang.

Haw thei tùrin an insiam sap sap a, kei ve thung chu ka rickshaw hman țhin kha ka lo nghâk leh rih ang.

Paul-a chuan," Lo chuang la, vawiin tlai chu mi pâ ka nih ka theihnghilh rih mai ang," a lo ti a.

"Ka lâwm e, ka chuan hlauh chuan min beisei palh reu reu ang."

"Ngawi mai mak teh!"

Principal room ațangin Principal leh Muanzuala ngei mai chu an rawn inzui chhuak a, kan lo en deuh hâ a.

"Ka rawn tibuai zauh zauh maithei che a ni," tiin Principal chu a bia a, a țawng thûm dût mai leh a inthuamna leh a hmai hmul chu a inhmeh khawp, tunah hi chuan a biang hmul, hmui hmul leh khabe hmul hian a tilang pà zual tawh lehnghâl a, a aw thûm dût hi a rawn chhuahna tùr dik takah a tawn chhuak ni mai hian a hriat, a inhmeh bîk ngawih ngawih.

"Țhian kârah chuan, buaina a awm hlei nem, lo lêng zauh zauh rawh," tiin pâwnah chuan an chhuak a.

Ka zak deuh chem chem, min rawn hruai tum ni anga ka lo ngai kha, ka ring sual chhiava a ni.

Min hre lo leh min hmu lo angin a'n awm vêl a nia, a thei ve khawp mai. Mi zîngah chuan a tân chuan hmel hriat loh ka ni, chutiang lek chu ka ni.

Pawi chai lo. Engah nge a pawi ka tih ngawt ang? A eng mah ka ni hlei nem, ka eng mah a ni lo ang bawk hian.

Pâwnah chuan rickshaw rawn thlen hun nghâkin ka ding a, mi dang chu scooty an nei a, haw tùrin an ke an tinung dat dat hlawm a.

"Lo kal mai rawh."

"Ka hlau che."

Lei se fê min chhuah khum a, ka chuang duh dâwn chuang lo tih a hre ve tho a ni.

"I lo chuang duh em?"

Min lo en kur tawh niin, mi dang chu ka melh kual deuh hlawm a, an lìrtheiah an lo beh far tawh hlawm avàngin a țawng chu an hre ve lo tùrah ka ngai.

"Ka lâwm e, ka lo chuang lo mai ang."

A lût a, a tlân chhuak nghâl. Min sàwm nawn chu khawi lam, kha pawh kha a mawiah min sâwm mai mai a nih kha.

Zànah a rawn lêng, tlai lam thil kha a sawi chhuak miah lo, 'engati nge i lo chuan mai loh?' tia min zawh ka ring ve deuh a nia.

*******

Zan tin deuhthaw a lo lêng ta, a zia erawh a thlâk ve deuh hlek bawk. Min be êm êm hran lo mah se zàn dâr 9 thleng chu a lêng ziah a, chumi aia rei erawh a lêng ngai lo, ka meng rei ngai lo tih kha a la hre ve reng a ni mahna.

Inrinniah Nunoi nèn kan chhuak a, zîng kârah kan bazàr peih loh avàngin ani'n chawhmeh a lei a, a khâi bawk a, ka khai ve a phal lo, ka ke ka tihnat belh a hlau.

Kan duh tâwk kan lei hnu chuan hmeichhe mamawh enin dàwr dangah kan kal leh a, lotion kan lei a, eng eng emaw kan lei leh hnu chuan kan chhuak chho ta a.

Kawngpui kan chhuak chho chiah tihah chuan Tea nèn kan intâwk thut mai, a rawn nui nghâl var var a, biak loh pawh hi tum țhìn mah ila a loh theih țhìn loh.

"E khai, engtizia nge ni i ke chu?"

"Ka bilh palh a."

"A va zia lo ve aw!" a ti phawt a, chutah," In hmuh a khât  hle mai!" a ti leh a.

"Nia tiraw? A inhmuh loh theih khawp mai, in dam țha maw?" tiin ka zâwt lêt ve a.

"Dam alawm, kan dam țhat lai tak a ni e. Nunoi chu, eng nge i zir tâk zêl?"

"B.Ed ka training mêk a."

"A va țha ve! Hawh u, sawlai restaurant-ah khân va chàwl ang u, kan inhmu khât sia, in ngaihawm ve hrim hrim," a ti leh sauh sauh a.

Kan ril a lo țâm ve tawh tho a, kan hnial lo.

Kan chawlh chhûng chuan Aizawl lama a chêt tlat tâk dàn chu a sawi pah bawk a, Aizawlah hna a lo hmu a, a lo va awm daih a nih chu.

"A làwmawm alawm; mahse, naute i ngai àwm!" ka lo ti a.

"Ngai khawp mai, pheipui chi a ni si lo va; mahse, a tlangvâl ve tawh a, a pi leh puin an ngai bawk sia, min ngai ve vak lo," a ti a.

"Nia, a lian ve viau tawh tak ang, kum a lo vei tam ve ta deuh bawk a."

Kan ei zawh hnu chuan kan ei man chu a pe vek a, zia lo chu ka ti khawp mai. Pêk luih ka tumin a phal dèr lo.

"Kan inhmu khât êm mai a, hna thar neih lawmna ni pah fâwmin treat ve hrim hrim che u kha ka duh alawm," a tih hnuah erawh chuan pêk luih ka tum tawh lo.

"Ka lawmpui hle che a nia."

Nui deuh hlek hian," Thu thar làwmawm dang deuh pawh i hre thuai maithei a nia," a ti zauh a, chutah," A nih leh u aw, kan la inhmu leh dâwn u nia," tiin a kal ta nghâl a.

A thil sawi kha, zawh chian ka duh asin le. Eng nge thu thar làwmawm dang deuh tùr chu ni ang?

"U, a thil sawi kha eng nge a awmzia?"

"Ka hre bîk lo, zawh chian hman pawh a nih loh kha," Tea kal liamna lam en chuan ka ti a.

Zànah ka inkhâwm lo va, Nunoi inkhâwm hlànin a rawn lêng leh a, lo biak loh theih pawh a ni lo.

Ka zawh châk êm êm chu ka zâwt ta.

"Engati nge i hmul kha i meh miah loh?"

"Mawi i ti lo em ni?" tiin min zâwt lêt khauh.

"Ka hre lo."

A nui ta suk a.

"Thu ka tiam vàng a nia, i tih ka thîk a ni miah lo a nia."

A thîk chiang lutuk.

"Michael-a nèn khân in ni miah lo," a ti thûm ta dût a.

A thil sawi vang chuan ka en lo thei lo, a mak êm alawm, engtin nge a hriat chhuah le? A hriat chhuah dàn ka hre châk.

"Kan ni ka ti ngai lo."

"Mahse, engati nge min rintîr tlat si?"

Engati nge thiam loh min pêk ringawt a? Ka rintîr a ni em ni? A rin dàn a ni zâwk lo maw?

"I hre sual a nih chu."

"Chutiang bawkin țhianpa pawh."

Ka sawi peih lo, ani pawhin Rose-i a biain a chhuahpui fo, kei ve chuan Tea ka hmuh chângin ka bia a ni chauh, kan inkârah eng mah a awm bawk hek lo.

"Ka lo rinhlelhnaah che khân ka thiam lo a ni, tunah chuan thu dik ka hre vek tawh."

"Kan inkâr hi siam țhat ka tum lo, a thar hlaka bul țan ka duh, ka ti ngei bawk ang."

*Zan sawm thum pahnihna* a haw hnu lawka message ka dawn. Vawi sawm thum pahnih a lo lêng leh tawh a nih chu, a la tam lo e.

Mut hmunah chuan a thil sawi 'Ka rinhlelhnaah che khân ka thiam lo a ni' tih chu ka bengah a ri nawn tluk tluk, a thiam lo tih a pawm ve ta. Kha khân thil a sawi kim êm êm a ni.

Mahse, thil pawi tùr a pawi zo tawh. Kan inkârah lei kak thûk tak a awm tawh tlat, a thiam lo tih inhriain sawi chhuak mah se hmeichhe dang lakah engtin nge a awm kei hian ka hre hauh lo. A duh tâwk hnuah kalsanin min rawn hèl a tum pawh a ni thei, hlim taka lo pawm tùrin min ngai a ni ang e, teuh lo mai.

Thawhțanniah school ka kal a, ka rickshaw hire țhin kha ka hmang leh rih, kal thui a ngai ve si a, bâkah, hmanhmawh deuh a ngai țhìn bawk nèn, kea kal vâwk vâwk chu ka la zuam lo deuh a ni.

Tlai lamah school tualah chuan car ka hmuh țhan deuh kha ka hmu leh, ka hawi kual a, amah ka va hmu nghâl bawk. Ka hmuh  veleha ka thin lo phu rang deuh dat dat chu ka duh lo kher mai.

Office chhûngah a nia ka hmuh ni, ni dang zawng aiin ka hmu chhe lo lehnghâl, luh ka hreh phah lek lek; mahse, ka luh ngei a ngai si.

Ka lût chu," Hei hi miss Melo-i chu maw? Ka hmu che chu ka lâwm e, Muanzuala ka nia," tiin a kut a rawn phar chhuak a nih chu!

Mak ti zetin ka en chho a, ka kut pawh phar lo chuan ka thawhpuite chu ka melh kual phawt a, min lo en țhap vek a nih chu.

A hmel chu ka en chho leh a, tihderna emaw nuihzatna emaw a hmelah chuan ka hmu hauh lo.

"Miss Melo, chibai la, ka țhianpa a nih kha. Mi dang nèn chuan inhmel hriatna an lo nei vek tawh a," Principal aw ngei maiin a rawn tih chuan ka harh chhuak zawk mai.

Ka kut chu nghet zetin a lo hmer a, engtizia tehrêng nge maw ni, ka lai thar ta deuh tlat nia maw le!

"Ani hian kan hostel sakna tùrah pawisa tam tham tak a rawn thawh dâwn a ni," a ti leh a.

"Eng tham a nih loh kha."

Principal chu chhâng mah se keimah min en tlat tho. Ka kut chu ka la lét ta vat a, a nui deuh suk tih ka hmuh phei chuan ka awm dàn chu naupang chhia a ti tih ka hre mai.

Ka phone a rawn ri, ka lâwm kher mai. Kan boruak 'mak' zet chu theihnghilh rihin ka phone chu ka chhâng, rickshaw driver kha a nia.

"Aw, Kima, eng nge ni ta?"

"Ka rickshaw kha workshop-ah ka luhpui daih a."

"Chuan?"

"An siam țhat theih hun tùr ka hre thei mai si lo va, min lo nghâk ang tih ka hlau a," a rawn tih chuan," A pawi hle mai tiraw? Lo siam țha vat rawh se, kei chu min ngaihtuah suh, a dang ka lo melh rih mai ang," ka ti a.

"A pawi ka ti tak zet a ni."

"A ho em mai a, rilru hrehawm nân hmang miah suh, a țhat hunah kan chuang leh mai dâwn alawm," ka ti a, ka hnèm ve a.

"Engtizia nge? I rickshaw hman țhin kha em ni a?" Paul-a chuan a lo ti a.

"Aw, workshop-ah a awm a nih chu."

Principal chuan," Hei țhianpa rual hian i haw thei ang chu?" tiin Muanzuala chu a thlêk zauh a.

"Miss Melo, ka rualin i haw thei ang, tu mah ka phur hlei nem," Muanzuala chuan a lo ti vat a.

"A ngai chuang lo."

"Kea haw ai chuan chuang ve mai teh, i ke pawh a la dam țhat loh kha, i tihnat belh mai ang," Paul-a'n a lo tih chuan ka melh vak a.

"I hman chuan kan kal dâwn em ni ang?"

Thawhpuite zînga hnial țùng țúng chu mawi ka tih loh avàngin ka hnial ta lo, bâkah, rickshaw dang nghah leh phone buai vêl kha ka huphurh ru ve tho.

A hnunga ka țhu lût chu min en zui reng, a hmaa țhu tùrin min duh tih ka hria; mahse, ka duh bîk lo.

"I thil tih dàn kher kher chuh!" a tlàn chhuah hnu chuan ka ti sap a.

"A thar hlaka bul țan ka duh ka tih kha."

"Theihnghilh teh, ka tui zawng a ni ve lo ve!" ka tihsak a.

A țawng zawm lo, kan kn pêng thleng min thlah a, ka chhuah dâwnah chuan làwmthu hrilh țha ka ti viau nain ka induh tâwkna a lo lian leh thut a, eng mah sawi lovin ka kalsan, tlêm têin nuam lo chu ka ti ve.

A tûk ațangin kan in pêngah chuan a car chu lo dahin ka school kal tùr chu min lo nghâk țan a, ka chuang duh lo phawt a, rickshaw lo tlân chu ka pharsan daih.

Tlai bànah pawh school gate pâwnah min lo nghâk leh tho nia. Ka chuang duh lo leh phawt a, beiseina siamsak hi ka duh lo a ni, kei pawh kha beiseina nei hauh lovin hnâwl ka nih kha.

Mahse, a beidawng duh hauh lo. A dàn ngai tein a tûkah pawh chutiang zêl chuan a ti leh tho, ka chuang duh chuang lo. Zàna lo lèn lah a țhulh phah lo va, lungawi lohna thu emaw khalam kaihhnawih thu emaw kha a sawi chhuak ngai lo. Chuang ngai lo mah ila, min lo nghah chu a bànsan chuang lo.

*Zàn sawm li pangana*

A beidawng duh hauh lo hian min tibuai țan, car-a min lo nghâk țhin hi tlànsan fo mah ila a rûkin ka hawi lêt fo, hrilhhai hmel pawh a pu chuang ngai lo va, thinrim hmel pawh a pu ngai chuang lo. A ngai tein a rawn lang leh ziah a, min bànsan a tum hmel pawh a pu ngai hek lo.

".....i la buai ve khawp ang."

Ka hre chhuak zawk. Ka thutiam lak ațanga ka zalèn hnuah(kum nga hnuah) hnuah ka buai tùr thu min hrilh a nih kha, khatih lai khan ka buaina tùr àwm kha ka hre hauh lo, tunah hian ka hre thiam deuh țan ta, hei hi a ni thei ngei ang.

"Thil-hre-rei-theia mai mai chuh, min tihbuai a lo tum ve hrim hrim a nih hi," tiin ka phun sap a.

*CHAPONA A LO AWMIN MUALPHONA A LO AWM ȚHÌN*

☆A MAK!☆ - 27

By Dingdi Pachuau

Vawiin pawh a rawn lang leh ta. Tûn țum erawh chu office-ah a lo lût leh a, Principal pawh a bulah a lo țhu.

A lo thlenna a rei tawh a niang, an lo titi nasa tawh êm mai. Ka luh lai pawh chuan an lo titi mar mar a, ka țhut deuh hnuah chuan an titi lam hawi chu ka hre ve thei chauh, nupui pasal chungchâng an lo sawi!

"Miss Melo-ite chuan an la hre ve tawp nâng, tihian hre ve deuh angin an la lêng hãwih hãwih chu a nih hi," Paul-a chuan a lo ti leh kher a.

Melh rumin," Min hmusit kher suh," ka ti a, ka melh rum chu engah mah ngai lo tih hriat deuh hian ka kekawr chu a lo melh daih.

"Kha i tlawhtlang tlâng kha a pãw a nia, nula senior ve si..."

An lo nui hak hlawm a, 'tlawhtlang' tih mawlh chu an lo nuih tih ka hre nghâl.

Rawmawlin ka hru thuak thuak a, a fai ve mai. Chutih lai chuan Principal chuan," Kan nulate hi han bèl chiang deuh teh aw, an fel hlawm a nia, nupui atân pawh an tlâk vek," a lo ti a.

"Nia, a dik ka ring."

A chhàn dàn mai mai chu leh!

Last period class nei tùr chu an kal ta sang sang a, kei erawh ka neih loh ni a ni hlauh, a pawi zâwk nge pawi lo zâwk pawh ka hre thiam lo.

"A bîk takin Miss Melo-i, nupui ka lo nei hman tawh hi a vànnei ka ti dâwn nge, ka vànduai ka ti zâwk dâwn pawh ka hre thiam lo, la tlangvâl ila chuan a buai ve nak maithei a ni," Principal chuan nui chung hian a ti leh a nih chu!

"Sir..." ka lo ti vat a, fiamthu mah ni se Muanzuala bulah kher chuan hetianga tih hi chu ka duh lo, a zahthlâk êm mai.

"Lunglei nula chu an țha lo, tuizêm pawh țâwpah an chhuah zêl mai a nia,  nupuia i neih hlauh chuan i kekawr hâk lai pawh kha a rawn tlawh tlang ve hmiah mai ang," Paul-a chuan a rawn ti leh kher a.

"Nang pawhin Lunglei nula a nih kha nupuiah i neih," ka lo ti vat a.

"Anite chu Aizawlah ka la pheipui daih mai dáwn asin," a tih leh chuan ner nûng chung hian ka lo melh rum leh a.

"A lo nih tak chu, Țhuama," tihngaihna ka hriat loh hnuah chuan ka ti a.

A lo nui țhû. Muanzuala leh Principal chu awm lo na se chuan ka la hnial chiang viau ang chu, a vànnei rih khawp mai.

Ka ril a țâm, chhùn chawlh lai khân eng vak ka ei lo tlat a,a àwm ve tho. Bàn thuai thuaia ina duh tâwka thil ei ka châk, a nih loh pawhin restaurant-ah puar el euha ei tùr tuihnai ei ka châk.

School bànah chuan ka hnial thei ta lo, hnial kha a mawi dâwn si lo a ni.  Ani lah a polite ropui mai si, inhre sa kan ni tih an hria ang tih ka hlau a, an hriat laia hnial phei chu ka duh hauh lo; ani lah hi beidawn a tum lo bawk nèn, a car-ah ka chuang ta poh.

"A tàwp a tàwpah chuan..." a sawi zo duh lo vêl, kan tlân chhuak tawh a, thawhpui dangte chuan min tlànsan vek tawh a ni.

"Rawn kal tawh suh," ka ti ta thlâwt.

Min rawn melh chuang lo hian," Mahse, hruai che ka duh si alawm," a lo ti thûm bul thung.

"Hna thawk ve ta che," ka ti leh hlak.

"Ka thawk ziah."

"Thawk ni la, hmuh tùr i awm lo ang e," ka la ti fan fan, a dawngtu tân chuan a làwmawm fahran lo maithei; mahse, thu dik a ni ve tho alawm.

"Thawh hun laiin ka thawk nasa thung a."

Kan in lamah min tlànpui mai dâwn emaw ka tih lai chuan min tlànpui ta miah lo, khawiah nge min kalpui a tum ni!!

"Ding rawh, ka chhuk duh," ka ti țhat.

"I ril a țâm lo em ni?" A tih zawh chiahah chuan ka pum a rawn ri raih raih a, a hria ang tih ka hlau kher mai.

"Haw ka duh."

"Thil ei phawt rawh. Hun rei a ngai nâng."

Ka ril a țâm si a, ka hnial peih tawh lo. Ei nghek ila a ni mai.

Ka ei tamzia chuh! Ka ril kha a lo țâm takzet a ni, ka puar lutuk a, hrehawm ka ti zâwk hial!

"I puar maw?"

Ka en vat a, min lo en kur reng a nih chu. A thlèng ka en leh a, eng mah a lo la ei ve lo a nih hmel, eina hnuhma pawh a lang lo.

"I ei ve nange?"

A nui suk ringawt.

"I thil ei kha a hmuhnawm lutuk a," a tih tâkah chuan ka zak hnuhnawh kher mai, ka thil ei lai kha min lo en reng a ni ngei ang.

"Ka thil ei lai min en tawh lo tùr khân ka hrilh tawh che em kha?" ka ti khauh mai.

"Aw; mahse, insùm a har phian a."

A dik maithei, ka ei tam si a, ka lo hmuhnawm phian a ni maithei asin. Ka ei bian bian mai si a, mak min ti viauin ka ring.

Ei man chu ka pêk hmain a lo pe a, duh lo zet hian ka hnial a, motor kan luh thlengin ka la hnial.

"Ka duh lo, ka nei ve reng alawm."

"Khawi?" tiin a kut lian zet chu a rawn dawh a.

A ngaihna hre lo zet hian," Eng?" ka lo ti hû a.

"Pawisa chu."

Ka bag chu hawngin ka purse ka phawrh a, a man zât nia ka hriat chu a kutah chuan ka dah a.

A en vung vung a, a zât a chhiar ru a nih ka ring, chutah," A la kim lo," a rawn ti dût.

"Eng zât man nge ka ei a?" Ka awih chiah lo deuh a, ka ei tam viau nain za man aia tam ka eiin ka hre lo a ni.

"I ei man zât i hre lo maw?"

Ka hre hauh lo, ka hriat loh avàng chuan ka chhâng duh lo va.

"Kha, la lêt rawh," tiin ka kutah min rawn hmehbel a," Mipain kan pêk chuan hnial loh hi a mawi," a ti leh sup a, motor chu start-in  kan tlàn chhuak ta nghâl a.

In pêng kan thlen thlengin ka țawng tawh lo, ka chhuk dâwn chuan,"Ka lâwm e," ka ti ve ta sep, a chhan chu ka thil ei man min tumsak a, in thleng min thlah bawk a, mi ang pângngai ka nih miau avàngin làwmthu hrilh ka ba tlat a ni.

Min thlîr zui reng a nih ka ring, ka tukkhum hi a za mep mep reng a, min thlîr nge thlîr lo hre tùrin ka hawi lêt ngam hauh si lo.

*******

"Taia rawn pèn a tum kha aw, chaw pawh a rawn bâr maithei bawk, lo chhum kêp ula?" Ka nuin a rawn tih lar lar chuan," A rawn phei dâwn maw? A țhat hlauh chu, khawiah nge kal a tum a?" ka ti zat a.

"Lawngtlai lamah a ni àwm e."

"Aw le, a number a thlâk daih sia, ka be thei tawh lo alawm," ka ti a.

Taia hian bus a zui daih a, tunah chuan a khalh ve tawh. A chhawrtupa hian a duhsak thiam hle mai a, ani Taia lah mi ti zawk zawk lo chi a lo ni a, țawng tam vak lo hian a  hna hi a tlin hle mai  a, hei tak hi a puin a duh êm êm chhan  chu a ni. Ruih theih thil a ti lo va, zànah a lêng chhuak ngai hek lo, hei vàng hian keini pawhin kan ngaihtuah vak lo va, mipa upa ber a lo ni bawk nèn, a rilru a puitling roh viau a, a hlawh pawh ka nute a rawn thawn zat zat țhìn.

Ka pain a zilh nasa țhìn a, mipa a lo ni bawk a, duat pawh a duat. Tunah phei chuan a hminga hlawh nei a lo ni ve tawh a, a zia khawp mai. Nunoi nakin lawkah a training chhuak bawk ang a, tlêm chuan kan chhûngkaw dinhmun pawh a zia ve tawh ang chu.

A number chu ka nu chuan min pe a, ka hmuh lohna pawh a rei ve tawh a, hmuh pawh a châkawm viau tawh e.

Taia'n chaw a lo ei dâwn chuan tiin a chawhmeh duh ber vawksa rêp ka lei leh rih a, ka chhùm a, anthûr rêp ka thlâk bawk a, tui a ti leh ngawt ang chu.

Nunoi lo haw chuan a hnâr lèn vut vutin," A va rimtui! Vawksa rêp kan hmeh dâwn chiang, engtizia nge ni? Tu nge chaw lo ei dâwn a?" a rawn ti nghâl bawrh bawrh a.

"Taia a lo pêng dâwn a."

Taia kan nghah avàngin zanriah kan ei tlai viau, Muanzuala'n min rawn nangchîng nghe nghe a.

"In ei tlai ve a ni maw?" chu a rawn ti ve luam, nia, kan tlai khawp. Taia kan lo nghâk ve laklawh tawh si a, dâr 7:30 dâwnah a lo thleng si a, kan tlai lo thei lo.

Taia bathroom ațanga rawn chhuak  chuan," E khai, Boss nang i ni maw? I aw kha ka hriat hnu ang ka ti rêng a ni," a rawn tih chuan Nunoi nèn makti zet hian kan inen há a.

"Boss, helamah eng nge i rawn tih dâwn? E taka Lawngtlaiah i kal dâwn tak e, naktûk zîngah em ni in chhuah ang?"

An inhre nêl lutuk chu mak tih loh rual a ni lo! Taia, țawng tam lo zet leh ani, țawng tam lo zet bawk, engtin nge an lo inhriat ni?

"Naktûkah pawh zîng tâwkah a niang, lo kal ve la?" Taia'n a tih phei chuan mak ka ti lutuk a, chaw bàr nachâng pawh ka hre lo hial!

"Lo kal ve a chakawm khawp mai, nupui tùr pawh zawng pah nghâl ila tiraw?" a tih chuan an nui dùn hawk hawk a.

Engtin nge an lo inhriat le? Kan ina a rawn riah kha chu a rei tawh viau mai a, khatih lai kha chuan Taia pawh a la naupang deuh a, an inbe lo hrim hrim a nih kha. Tunah lêm, an innêl hle si, Aizawlah an va inhria a ni ngei ang.

A lèn chhûng chu Taia nèn chuan an titi a ni mai, ka lo inrawlh lo va, an titi chu ka lo ngaithla zâwk!

A haw har lo, zan dang ai chuan a rei hret chauh.

"Engtia inhria nge in nih a?" A haw hnuah chuan Taia hnênah chuan ka ti a.

"Aizawlah, Bus neitu ka pu hi a țhianpa a nia."

A lo nih hrep chu a! Chu pawh chu lo ni ta tehrêng se, engtia innêl viau nge an nih le ka la ti tho tho.

"Kawng engkima min buaipuitu a nia," a la ti deuh deuh! Engtin nge a lo buaipui ni?

A, a țha vek e, min țhen man kha lo buaipui pawh ni se, a tih tùr ve alawm le!

*Zan 59-na*

Ka awih êm êm lo nain a dik chu ka ring tho, zàna a lo lèn leh chhùna a lo kal pawh hi a chhiar tel vek ang, bâkah, kan ina a la kal hrim hrim hi a chhiar tel vek hialin ka ring. Chuti ni lo se heti zât zât hi a lo kal thei lo.

*Engtin nge Taia nèn hian in inhriat?*

A sawi ngei hi ka hre châk,  Taia khân a sawi ngei a; mahse, ka duhkhawp lo.

*I nau tih ka hria alawm*

A lo hriat vàng a nih chiah chu, lo hre sa lo se an innêl tho ang em le? Ka nau a ni tih hriain inlâk mark țhat nân a chungah a lo țha a ni ang em?

*Mark score ka tum vàngah i ngai leh lo maw?*

Ka rilru hi a va hre thei tak! Ka rilru put dàn tho chu ni mah se min puh chhia ka ti tho.

*Rilru min put chhiattîr hle mai*

*Naktûk chu ka inah pêng haw ang aw*

A sawi duh bâk hi chu, thil dang hi sawi mah ila a ngaihven duh ngai lo.

*Min lo hruai tawh suh*

*I thil tùr a awm a nia*

Eng thil nge ni leh ta? Thil theihnghilh ka nei lo tih ka chiang a, bâkah, a in ka kalna pawh a rei tawh lutuk, kum thum chuang a ni tawh!

*Eng thil mah ka theihnghilh lo va, ka dah bawk hek lo, eng thkl mah i lak ațang hian ka duh bawk hek lo*

Ka thin a rawn rim leh deuh țan ringawt a nih chu, a duh ang anga min tih a tum leh min hruai ziah te hi, ka tân pawisa save-na țha tak ni mah se ka hmu ngun tawh lutuk a, ka rilru pawh a tinêm tawh lutuk tlat a ni. A hmaa ka rilru put ang kha put leh ka duh.

*Naktûkah kan inhmu dâwn nia, mut tui le*

Ngeiawm-thiama a nih hi. Ka thin a rim dâwn tih a hria a, min han 'mut tui' nghâl daih a.

Taia a thawh hma êm avàngin ka harh lo thei lo, thawhpuiin thingpui ka lumsak a, thingpui in lovin tuilum chu a in daih lehnghâl a!

"I pute hian thingpui an in ngai lo a ni maw?"

"Aw..."

A zia hlauh chu, thingpui hi kei pawhin in loh ka duh a, zîng ka thawha ka in lo a nih chuan kim lo tlat leh dik lo tlata ka inhriat avàngin ka la in lui zél a ni, thei ila chuan in loh hmiah ka duh.

"Tluang deuhin in kal dâwn nia, fîmkhur takin, chak lovin khalh la, i kutah nunna tam tak a innghat tih i hre dáwn nia," ka tih chuan a nui deuh a.

"Ka nu chiah chiah!"

"Eng nge, kan ngaihtuah che tihna a ni mai alawm, motor khalh chu ngaohtuah in na bîk alawm," ka lo ti vat a.

"A dik alawm."

*******

Pêngah a lo awm leh vung tawh. Ka thil hrilh ve kha chuan a engah mah hian hna a thawk ve lo, a hman hma thei sia, chaw pawh hi a ei hman ngaiin ka ring lo, a nghei ringawt țhìn a nih ka ring.

"Chaw i ei hman em?" tia ka zawh chuan,"Ka ei ngai lo," a lo ti mai a.

"Rawn kal ziah tawh suh, chaw i ei hman loh phei chuan..."

A tlàn chhuah hma chuan min rawn en phawt a," Ka ei hman lo ka ti lo, ka ei ngai lo ka ti a nih kha," a ti nghut a.

"Engah nge i ei ngai loh? I ei loh chuan i pum a țha lo thuai mai ang, chutiang tùr a ni ngai lo," ka ti leh bawrh bawrh a.

Țawng lo chuan motor chu a khalh a, kei pawh ka lo țawng tam leh ta tih hre chhuakin ka ngawi leh ta rih.

"Min ngaihtuah ve deuh hlek tihna a ni thei ang em?" A hnu daihah chuan a rawn ti thûm dût a.

"I ngaih dàn dán le."

School kan thlen dâwn chuan," Nakkum Valentine's day khian Bawihi'n pasal a nei dâwn a," a ti sup a, min hrilh nge a sawi lang ve hrim hrim ka hre lo ve.

"A va lawmpuiawm ve!!! Ka lawmpui tawp, la hla deuh mah se. Tu nge a neih dâwn a?"

Min chhâng dâwn tawh lo nia ngaiin motor ațang chuan ka chhuak a, ka khâr dâwn chiah tihah chuan," Țhianpa nèn a nia," a ti a.

'Țhianpa' a ti.

Tea nèn maw?!!! E khai! Hei zet chuh, ka rin loh lam daih a ni.

*I HLIM VIAU LAIIN THU TIAM NGAI SUH*

☆A MAK!☆ - 28

By Dingdi Pachuau

Hei hi em ni Tea'n 'thu làwmawm' ka hriat thuai tùr a sawi kha ni ang le?

A thil min hrilh chuan nilêngin ka rilru a luah. Engtin nge Tea leh Zorini chu an lo inngaihzàwn ve ni le? Induhin inngaizawng lo se inneih an tum àwm tawp si lo va, a mak e! A mak ka ti tawp, Zorini chuan engtin nge ani pathlawi chu ani ang nula chhe lo lutuk leh mahni intodelh chuan a duh theih le? Tuin nge sawi hmasa le? Ka hre châk tawp.

Tlaiah min rawn lam leh ta ngei, zawh tùr chu ka ngah viau, zawh hmasak ber tùr pawh ka hre lo. Zawh țeuh ka duh a, han zawh țeuh lah chu dik theiin ka hre meuh bawk si lo. Duh aiin ka țawng tam leh ang tih ka hlau.

"I hmel kha, thil min zawh tùr i nei țeuh a ni tiraw?"

Kha maw, a hre leh ta. Ka hmelah hian engkim hi a hre thei a nih tak tak hi, ka awm dàn leh ka rilru hi a hre tlang vek tawh hial ang a!!

"I hre sual a nih chu!" Leh tlat mai a.

A khabe hmul chu a tuai hauh hauh phawt a, a dàr a chhìn ûk a, a tlân chhuak ta nghâl a.

Kan ngawi deuh reng a, a hnuah erawh ka insûm thei ta ngang lo va," Zorini chuan engtin nge a duh theih a?" ka ti ta hlawl a.

"Engati maw?"

"Anite chu nula fel leh țha a nia, a intodelh thlap bawk. Tea chu...a, a țha tho mai," tiin ka riat nawi ta ringawt.

"Sawi chiang la?"

A hnu deuh hlekah chuan,"A mipain a phû lo ka ti a nia," ka ti leh ta a.

"An induh tawn chuan an inphû a ni mai alawm."

"Mahse..." sawi tùr pawh ka hre leh chuang lo," Nia, an induh chuan a țha e, sawi theih ka nei hauh lo," ka ti leh a.

"I rilru chu...a na lo tiraw?"

Ka melh chiang ngang mai.

Tea hi ka la duh rengah a ngai em ni? A ni chiang mai, rilru natna chhan tùr ka nei lo rêng rêng, lo hmangaih viau ila chuan a na ve mahna.

"Ka lawmpui e," ka ti ta a, a rin loh dàn deuhin ka chhângin ka ring.

A hnu deuhah chuan," An inneihnaah chuan i kal ve ang tiraw?" ka ti a, ka inchhîr leh zat. A nau leh a țhianpa inneihnaah a kal loh te'n, ka mâwl leh ta; mahse...an in hluiah khân  a kal ngei a ngai dâwn asin, a pahrawn leh a unaupa te pawh a hmuh a ngai ang a...

"Ka la ngaihtuah lo."

Kha maw, a luhlulzia hi, a nau a hmangaih ngawih ngawih, amah thlahlel êm êmtu pasal neihnaah pawh a pahrawn leh a unaupa vàngin kal a tum loh hi,' ka la ngaihtuah lo' tih mai mai, a chhuanlam a nih hi.

"Engtikah nge kan tih ve ang?"

Ka phu deuh zawk, ka meng hrû ang chu; mahse, a lam ka hawi lo hlauh a, a zia. Bâkah, en pawh ka duh lo.

"Mawh?"

"Eng thil mah tih ve tùr kan nei lo," ka ti ta hlawl a.

A ngawi leh ta, kei pawhin sawi tur chu nei țeuh mah ila sawi chhuah ka tum lo, sawi chhuah țùlna pawh ka hre lo.

"Thil i lo lam dâwn kha aw," tiin a in lam pan chuan kan tlân leh ta nghâl a.

Garage-a motor a dah luh dâwn chuan a ina kal ka tum lai kha ka mitthlaah a lo lang nghâl uar uar a, rilru na taka ka kalsan bâk kha ka kal leh tawh lo a nih kha. Tunah hei, a inah chuan ka kal leh mêk chu a nih hi.

A in chu a lo tidang deuh hlek, sofa hùn dàn pawh a tidanglam, ka țhutna țhìn erawh kha chu a la ngai thlap.

"Lo țhu rawh, ka'n la ang e," tiin tui bottle leh no min rawn lâksak nghâl vat a, chumi hnuah room-ah a lût ta nghâl a.

Ka seat-ah chuan țhûin tui chu ka in khalh khalh a, he in chhûnga ka han awm leh ta mai hi a mak a ni! Luh leh kha ka inring tawh lo hrim hrim, a neitupa biak leh pawh hi ka inting chuang lo.

Paper bag lian angreng deuh pathum leh parcel lian vak lo pakhat hi a rawn chawi chhuak a, mak ti takin ka lo en. Khawi ațanga min lo thawn nge ni ang? Tuin nge min lo thawn? Engati nge ani inah hian a awm theih?

Ka țhutna bul dawhkànah chuan dahin," I tâ vek tùr," a ti sup a.

"Khawi ațangin nge?"

"I hre mai ang."

Paper bag chu ka keu dan dan a, a chhûngah chuan lehkha ni awm tak hi envelope-ah a lo awm vek a, gift ni àwm tak, lehkha mawi taka tuam a awm vek bawk.

"Eng thil nge ni a?"

"A hmanhmawhthlâk loh, coffee in lawk ang aw."

A coffee siam tui tak kha, ka in lohna a rei tawh lutuk a, ka hnial duh lo, ka in leh châk tawh zâwk.

Coffee kan in lai chuan," I thil dawnho chu han phawrh la?" tiin dawhkàn chu a melh zauh a.

A thu chu ka awih ve mai, envelope chhûnga card chu ka phawrh hmasa ber a, birthday card a lo ni!

Card chu ka en vek. A tàwpah hming inziak a awm lo va, pentuia ziah lah chu mi pakhat kut chhuak vek a ni chiang, mi thil chîk mi kher lo pawhin mi pakhat kut chhuak a ni tih an hre thei ngei ang.

"Hengho hi khawi ațanga i hmuh nge? Tuin nge pe che?" tiin ka zâwt a.

"Ka pêk che a nih kha. I birthday vawi thum lai kha i kiangah ka hmang thei si lo va, ka lo dah țha tawp ringawt a."

Hm, kum thum zet kan inhmu lo tlat a, ka birthday a lo theihnghilh  ngai miah lo a nih chu.

"Ka lâwm e."

Coffee in zawh chuan ka tho vat a, no chu ka va sil ve ta rawk rawk.

"I duh zawng an ni hlawm em?"

Ka hre thiam lo țêp a; mahse, gift lam hlir a melh avangin gift chu ka duh zawng a nih leh nih loh min zâwt a nih ka ring ta.

"Ka la hawng lo, ina thlen huna hawnah ka lo ti mai asin."

"A țha alawm"

Haw ka tum rilrûk tawh lai chuan," Kan inkâr hi tifel tawh ang," a rawn ti chhuak ta sup a.

Kan 'Inkâr'tih sawi tùr pawh kan nei tawh hlei nem. A awm chhun chu lei kak thûk tak a ni mai, chu lah chu kal kài a har ngawt ang!

"Theihnghilh daih ang."

"Melo, ka thiam lo ka tih tawh kha. Tunah hian siam țhat ka tum lo, din thar ka tum zâwk a ni," a ti nghet churh a.

Ngun zetin ka lo ngaithla.

"Engkim ka hrilh fiah vek ang che, din thar erawh chu i phal a ngai a ni," a ti leh a.

Nia, min hrilh fiah hi a bâ. Hun kal tawh kha chu hunin a liampui tawh; sawi fiah mah se awmzia chu a awm tampui tawh lo ang; mahse, a sawi fiah dâwn chuan hriat pawh a pawi ka ti lo.

"Sawi fiah ngai a awm chuan thil dik tâwk lo a awm tawh tihna."

A thil sawi ang deuh chiahin ka sawi ve.

A ner suk a," Thil dik tâwk lo a awm avàngin tunah pawh kan inkâr din thar ka tum leh mêk a nih hi," a ti leh sup a.

"A dik."

Kan ngawi leh rih a.

"Zotlâng petrol pump-ah khân Țhianpa nèn khân ka hmu che u a, phone pawh in inensak nghe nghe kha."

AOC-ah petrol a awm loh vàng a nih kha. Ka ngaihtuah lêt a, Tea nèn kan inhmuh lai kha. A phone-ah a fa thlalâk min entîr tak em kha, a lo rei ve tawh hle mai a.

"Thîkna mita lo entu tân chuan kha tluk kha chu a awm tawh bîk lo ang, Țhianpa ka thîk êm êm chung pawhin nang chuan i be zêl a, i bialpa hlui a ni tih kha ka theihnghilh thei ngai lo bawk," a ti sup sup a.

Thîkna. Thîkna hi chu aw...

"Phone in inentîr lai khan inhnaih deuhin in awm a, in infâwp bawk a."

A teuh lo mai! Hei chu a hre sual chhiava. Ni lo, a hmu sual a ni zâwk ang.

Kan infâwp lo.

"Khatih lai khân ka thinlung kha chhun angin a nâ, ka mit ngeiin ka hmu si che u a, dâwt min hrilhin min lo kawp dùn niin ka ngai bawk a," a ti leh a.

Ka phatsan ngai miah si lo.

"Khatih lai khân eng thil dang mah ka ngaihtuah thei lo va, ka thluak kha thîkna avàngin a nu phût mai a ni. Rilru fîm ka pu thei lo, a rûka min kawp reng tho ai chuan tiin ka chhuah zalèn ta che a, chhuah zalèn ta che e ti lo chuan kei ve thung chu ka thinlung  a tâwt vek thung, hrehawm tak a ni," a ti leh a.

"Mahse, thîkna avàngin ka puh sual che tih ka hre chhuak leh a, thil pawi tùr chu a thleng vek tawh si a. I thutiam kha, kha kha nghah chhuah a țan lâk ka tum leh ta chauh. I rilru chu eng anga sak pawh lo ni se chhuah che ka tum lo bur a ni," a ti leh sup sup a.

"Eng chena rei pawh nghah ngai mah la, ka nghâk thei che. Eng thil pawh tih ngai se nang ka neihna tùr a nih dâwn phawt chuan ka ti zêl ang," a tih chuan ngaihtuah dang ka lo nei zauh.

"Eng thil pawh maw?"

"Aw, nang kalsan tùr che erawh chuan min hrilh miah suh."

"I ti tak tak maw?"

"Aw, chuan mipa dang pawh melh suh."

A rûkin ka nui, nia, ka thil ngaihtuah hian min tinui lo thei lo. Ka ti lutuk ang em tih phei chu ka hre lo; mahse, thil pawimawh tak a ni dâwn tlat si a ni. A tân hian a pawimawh dâwn, thil țha tak pawh a lo ni maithei asin.

"Aw le, min thlah haw phawt rawh, ka la hrilh ang che," ka ti. Tuna hrilh chu ka duh rih lo, nakinah le.

Ka birthday-a thil min pêkho chu a khai a, keiin a hnungah ka zui, ka zui dat dat lai chuan uitê leh a pu inzui ka intehkhin, a hma kha chuan a puin a duh tâwka a uitê a chhaih kawi leh uité, a pu zui dat dattu kan ni.

Mahse, hetiang hi ka ni lo ang, kan hria ang chu, min duh a nih phawt chuan, kan inkâr din thar a tum a, ka rilru hmin a tum a, thil harsa tak a pal tlang ve a ngai alawm.

"I khabe hmul hi engtikah nge i meh ang?" kan tlàn chhuah hnuah chuan ka ti a.

"Ka neih lêt che hunah."

A inring tâwk hle a ni. Nia, mipa inring tâwk tak, chapo miah si lo hi ka duh țhìn.

"A lum i ti țhìn em?"

"Ka tuar thei, thu ka tiam ka tih tawh kha."

Min neih lêt hunah chauh a mêt ang, chu chu a thutiam a nih ngei dâwn chu.

A țha e.

Zànah a rawn lêng leh a, vawiin lam chungchâng kan sawi lang hauh lo. Kan țawng tam lo viau bawk, kei chuan a tih tùr ka hrilh huna min chhàn dàn tùr ka hre châk a, ka thil hrulh tùrin amahah nghawng a neih ka hre châk viau tawh bawk.

*Zan sawmrukna*

*Ka tih tùr chu?*

A message ka hmuh hmain a message tùr chu ka type nuap nuap tawh a; mahse, ka delete leh a, chhiar nuam deuh zâwk tùr leh amah tithinur lo deuh tùr thumal ka ngaihtuah.

*I pahrawn hnênah ngaihdam dîl rawh, inngeih taka in awm theih nân, i nau pawhin pasal a nei thuai dâwn a, chhûngkua hlim taka in awm ka duh*

Ka thawn ta.

Double tick.

Ani inla pà leh tlàwm hreh tak chuan a ti duh kher lo ang, hei ai chuan min țhen vang vang pawh a duh maithei. Nia, a thu a nia, kei chuan he khawvél a dam chhûnga a chhûngte nèn an hrang tùr hi ka duhpui lo, ka lo inrawlhna tùr leh tel vena tùr chu a ni lo tawp ang. Ka huang lo chin ka dai pawh a ni mahna.

Mahse, min neih lêt nân chuan eng pawh tih a huam kha. Kei pawhin amah chàn huamin ka ti ve tho, he thil hian a hawi lêttîr hlauh thei. Ka ngaihtuah thleng vek tho, a tâna țha ka ngaihtuah.

A reh ta vang vang, min rawn chhâng tawh hauh lo.

*NUN ULUK NACHÂNG HRIAT LOH HI INCHHÌRNA ZAKHUA THLENTU A NI*

☆A MAK!☆ - 29

By Dingdi Pachuau

Ka ti mah mah a nih ka ring ta. A thin a rim a ni ngei ang, min ring ngam a, a chanchin min hrilh ve vek a, hetia ka tih hi a ring miah lo ang chu.

Mahse, chhûngkaw pawimawhzia hi hte tùrin ka duh si a ni. A pa lamin lo ngaidam lovin lo hmusit mah se ani hi chuan a sual lam zawngin en ve lo se ka duh vàng a nia. Bâkah, a nau duh takin pasal a nei dâwn a, a nau hlimna țâwmpuiin, inneihnaah chuan kal ngei se hun hlimawm a nih ang ngeia an chhûngkua hlim taka an inhmuh khâwm ka duhpui a ni.

Chhûngkua chu chhiat ber lai, hun harsa leh hun hrehawm ber ber kan tawh lai pawha min dawm dingtu leh kan innghahna lungpui nghet a ni si a. Chu chu nei tùrin ka duh, a pahrawn leh a nau mipa pawh chu an lo inhmu chhuak ve tawh maithei bawk asin, pakhat tlâwm ta se, boruak țha lo zawng zawng kha a țha duak thei si a. Chu tak chu ka beisei chu a ni, a lo siam țha thei ta lo a a nih pawhin a thiam loh a awm tawh dâwn si lo va, siam țhat tuma a beih kha ka duh ber chu a ni.

Mahse, a reh tâk hlauhah chuan hrehawm ka ti leh hnuhnawh, ti tùra ka tih erawh kha chu sût leh ka tum chuang lo. A thei ta ngang lova ka hnêna a rawn sawi a nih chuan ka pawmsak êm êm ang, thil dang zawng aiin bei ve phawt se ka duh chauh a ni.

A tûkah chuan a hmel hmuh tùr a awm miah lo, car pawhin min thlah tùrin a rawn kal hek lo. A țha e, a thei lo ve pawh a niang, a harsa ve dâwn lutuk tih ka hria, thei lo mah se ka hre thiam lutuk tlat.

A rawn lêng ta lo, a hmel hmuh tùr a awm loh tâkah chuan lung a tilêng tlat; a hmel hmuh tùr a awm reng a, a han reh leh ta thut mai chuan min tikim lo tlat, eng emaw kim lo a awm tlat tawh. A lo lènin țawng ngai vak lo mah se, lo be vak lêm lo mah ila a lo lèn khân ka kim a, khua a tihar lo va, ka dik thlap maiin ka hre thar ta.

Zàna a text chhiar tùr awm lo ringawt pawh chu a khawharthlâk ka ti ngawih ngawih, ka ngai ru vawng vawng bawk. Kum thum vêl zet kha amahah beisei bovin awm tawh mah ila tûn hnaiah a rawn lang leh thut a, a theihna kawng hrang hrang hmangin min lâk lêt a tum a, engah vak lo ngai lovin lo 'chu e kha e' țha duh lo mah ila tunah zet chuan(hetia a reh tâk hnu hian)ka nun tikimtu, tihlimtu leh tifamkimtu a ni tih ka hre chiang ta, ka hriat chhuah chian êm êm pakhat pawh chu beisei ka lo nei leh tawh tih hi.  Amah kha lo beisei lo anga awmin leh beisei nei tùrin awm duh lo mah ila beiseina êng ka nei si a, tuna a reh ta hmak mai hian min tihrehawm ta si a nih hi.

Nunoi chuan," U, U Muanzuala hi a va reh ta ve! Zan thum lai a hmel kan hmu ta lo, Aizawl lamah a awm leh ta em ni?" zanriah ei lai chuan a ti a.

"A nih duh hmel riau," ka ti ringawt.

"In inbe lo em ni? U, tûn țum hi a tih tak tak hmel ka ti, dik taka sawi chuan ka duhpui che asin. I lo be țha lo viau țhìnte hi ka lo khawngaih tlat a nih chu, a tìrah kha chuan kei pawhin lo biak kha ka phûr fahran lo; mahse, a luhlulna hi ka làwm tlat, i be țha duh lo chung pawhin lo lèn a țhulh miah lo a nia, mipa pà leh induh tâwk ve tak a nih dâwn vei nèn!" a ti barh barh a.

Ka ngawi reng, a sawi zawm zêl a.

"U Tea țhianpa a nia, in inkawp lai zawng zawng hretu a ni, chuti chung pawh chuan heti khawp hian a duh thei tho che a nia. I vànnei ka ti phian, heti taka duhtu che an awm hi. A rawn țhen chhan che kha a sawi fiah tawh ngeiin ka ring a, kha chu eng thil pawh lo ni se, inchhîrin a rawn beisei leh che a, nang pawh hian i duh ve viau niin ka hre bawk a, inkawp țha leh ula ka ti tak tak a ni, hlim pawh hi i hlimin ka hria, țawng pawh i țawng duh ve leh tawh bawk," a ti leh a.

Nia, a dikin ka ring. A hmaa ka țawng tam ang bawk khân ka țawng tam leh țan tawh alawm, Muanzuala bulah hian insûm deuh țhìn mah ila khâng kum thum liam ta ai khân tunah hi chuan ka țawng leh duh tawh a, hlimin nuih pawh ka nui tam leh tawh viau a ni.

Mahse, hei tunah chuan chance ka neih kha ka paih bo ta a nih hmel. Thil ka lo inti-ngaihtuah thui lutuk a, ka tih miah loh tùr leh ka inrawlh miah lohna tùrah ka inrawlh a, intifel zetin mi nunah inrawlh ka tum a. Chu chu ka tuar țan leh ta chu a nih ber hi.

Mutnaah chuan a message hlui chu ka chhiar a, ka delete phal tawh rih lo a ni. Ka inhnemna tùr hmanrua atân a țha viau maithei asin, tunah hei a chanchin pawh pakhat mah ka hre tawh rih lo a nia, thehhmeh ang vang vang a nih tâk hi.

School kal pawh ka phûr lo takzet, ni eng emaw zât chu min thlahin min hruai a nih kha. Tunah chuan a ngai têin, kein ka kal leh tawh. Ka ke a zia tawh a, rickshaw hman leh țhin kha chu pawisa a hek, ka dam tawh tho.

Mahse, amah kha ka ngai a ni, car khân min hruai leh se, han àn khum leh barh barh ila; mahse, min lo ning ngawt tak ang, ani lah a țawng tlêm si.

Zirtàwp chawhnu bànah muangchângin ka haw a, in thlen hma leh khawhar a zual mai mai a, ka hmanhmawh peih lo. Nunoi lah an semester-in chaw an ei khâwm dâwn a, a lo haw tlai dâwn si. Ina mahni chauha awm rek rek ka peih lo.

Ka phone a rawn rì a, Muanzuala a ni maithei asin, ani hi, a pa chu a va hmu ang a, ngaihdam a va dîl ta tih min rawn hrilh dâwn pawh a ni thei asin.

Ka thil ngaihtuah avàng chuan ka nui var var a, ka phone la chhuaka ka en chuan a hming lang kalh  ka hmuh chuan ka rilru chu hlimnain a khat.

Zângkhai zet hian," Hello?" ka ti zãng vah a.

"Melo, Zorini ka nia. Melo, ka țawng i hria tiraw?"

A aw chhuak hmanhmawh hmel zet leh khùr deuh han hriat chu, mak ka ti, a u phone hi eng vànga rawn hmang nge a nih? An awm dùn em ni ang? Ani hi, a va che nâwi viau em ni? A pate nèn chuan an intithiam lo em niang?

Ka hlauthâwng thut. Ka kal lai chu ka ding chawt bawk.

"Zorin, Aizawlah em ni i awm? I u pawh hi a awm  ve tiraw? Engkim a țha vek em?" ka ti ta nghâl a.

"Melo, khawngaihin, ka u hi i rawn hmu thei ang em? Ka ngèn takmeuh che, i rawn hmu ang tiraw? A thil sawi hnuhnung ber pawh i hming a ni asin, tunah hian hliam na tak tuarin dam khaw chhuah tumin a bei mêk a ni. Melo, khawngaihin vawi khat chauh, vawi khat chauh rawn hmu rawh aw," tikn a rawn țap ta hlawp hlawp a.

Ka bîng mup mup mai, ka tlûk mai loh nân ka taksa chu ka theih tàwpin ka thunun a, harsa tak a ni.

"Eng..engtin nge...a awm?"

"Accident a tâwk a, doctor-te pawh an beidawng niin ka hria."

Ni lo, Lalpa, a ni thei lo. Engtiang taka nâ nge a tawrh a? Engtin nge a accident theih? A fîmkhur ve theih viau kha, tlangvâl hawklak ang maiin a tlân chak ngai lo asin, engtin nge a chungah chutiang chu a thlen theih?

"A ni thei lo ang!"

Zorini thil sawi tam tak chu ka hre chiang lo, ka rilru a buai a, a mang chhuih a, eng thil mah ka ngaihtuah thui thei lo.

Engtin nge in ka thlen theih pawh chiangkuang takin ka hre lo, ka harh chian deuh hnu chuan țhutthlèngah ka țhu tawp a, ka mittui a dîr zawih zawih. Chhuak êm êmin ka țap a, ka insûm thei lo. Ka mangang a, ka ngaihtuahnaah chuan Muanzuala chauh a awm, a nâ chu a tuar chhuak thei ang em? Doctor-te pawh an beidawng tawh maw?

Ka thaw hawk hawk, a thi thei lo ang, a thi tùr a ni lo.  A theih loh, Lalpa, i thihtîr thei lo ang, Aizawla a phei chhan hi keimah vàng a ni ngei ang, chuvàngin, a nunna i lâksak thei lo ang, ka nunna hi la zâwk mai rawh.

Ka țap a, ka țawngțai a, ka buai nuai nuai. Mangan tàwpin ka mangang, ka țah loh laiin ka țawngțai a, ka țawngțai loh leh ka țap a, a damna tùr ngawr ngawr ka dîl. Chubâk chu ka rilruah a awm lo.

Ka phone a rawn ri leh a, Zorini hian a u chu a boral ta tih min rawn hrilh dâwn a ni ngei ang, phone chu ka la duh lo, ka en reng ringawt.

Ka rilruah a țha lo lam hlîr a awm avàngin ka chhâng ngam lo, a ring ral țhak a, a tàwp deuh chiah tihah a rawn ri zawm leh zat.

Ka chhâng lo thei ta lo. Eng pawh ni rawh se, chanchin chu ka hriat tho tho a ngai si.

Tea a lo ni, a țhianpa chanchin hi a hre ve tawh ang em? Hre tawh ngei ang, Zorini hian chanchin țha lo chu min rawn hrilh ngam lo ang a, Tea hi a rawn tîr a niang.

"Tea, i țhianpa kha a thi tih min hrilh miah suh," ka ti nghâl țuau ringawt a.

"Melo, a thi lo, a thi lo. A chunga thil thleng hi a pawi ka ti lutuk, nichîn deuh khân ka hre ve chiah a, phei nghâl ka tum asin," a tih chuan," Ka phei ve duh," ka ti nghâl vat.

Hmuh ka duh, eng thil pawh thleng dâwn se hmuh ka duh a ni tawp. A hnênah ngaihdam dìl ka duh, a chhnga thil thleng pawh hi keimah vàng a ni si a, thil dik lo titu ka nk. A ngaihdamna ka dìl ngei a ngai.

Nunoi chu ka rin aiin a rawn haw hma hlauh a, a tihzia khawp mai. A rawn thlen lai chuan ka pângngai ve viau tawh a, Tea min lo lam hun nghâkin ka lo inpeih at tawh.

Thil awm dàn min zâwt, ka awm dàn, ka hmel leh thawmhnaw inbel ațang chuan mi pângngai tân chuan zawhna zawh awm rêng ka ni ngei ang.

Min kuah vang vang a, ka mittui hul tawh pawh a tla leh tawh, Tea a lo thleng țêp tawh àwm si a, hetiang țap hmêl pua min hmuh hi chu ka duh lo asin, tlêm chuan ka insûm thei ta deuh.

Tea pawh a lo thleng har lo, Nunoi chuan," U, engkim a țha vek mai ang, ka lo țawngțaipui reng dâwn nia, tluang takin in va thleng ang a, ani pawhin eng êm a lo ti lo ang," tiin min hnèm a.

Tea pawh chuan," Nia, a țha chhuak vat mai ang," a lo ti ve a, min hnem nân mai mai an sawi tih ka hria, Tea pawh hian a dam chhuah a rin ka ring bîk hauh lo.

Lunglei ațanga kan chhuah chu a dâr zât tak ka hre lo va, Aizawl kan thlen chuan dâr 12:30 vêl niin ka hria. Tea nèn chuan kan titi tam lo va, a sawi ber erawh chu Muanzuala chu a chhelin a luhlul a, thih a duh lo ang, hmachhawp tam tak a la neih avàngin thi hman a la ni lo tih lampang a sawi.

Nia, a luhlul ve alawm. Kei lahin a luhlulna chu hmanruaah hmansakin ka tilui a, tunah thihna kawngah ka barh lût ta a nih hi. Hetia a awm chhan hi keimah vàng a ni, a thi a nih hlauh phei chuan ka dam chhûngin ka inthiam thei tawh ngai lo ang.

Khawi lai damdawi inah nge an awm tih lam ka ngaihtuah lo, hmuh thuai thuai ka duh ber. Tea chuan a awmna damdawi in chu a hre vek tawh ngei ang, ka ring tawp.

Zorini nèn kan inhmu chu kan inkuah a, kan țap dùn a, kan insûm ve ve tho si, mittui luang zawih zawihin kan inbia a, țawng pawh kan țawng țha thei lo.

ICU-ah a awm a lo ni. Pâwn lam dârthlalang ațangin khuma a mu chu ka hmuh chuan ka mittui ka dang zo lo, ka hmu phê vek. A tawrh chu a na viau a ni ngei ang maw, na lo se he pindan chhûngah hian a awm dâwn si lo, ka âwm chu a tâwt ngawih ngawih, a tân hian tih theih nei teh hlauh ila aw...

A nu leh a nau mipa ni àwm tak pawh an lo awm ve reng a nih hi, ka lo hmu miah lo; mahse, a àwm ve tho, a chhan chu kan rilru put hmang a inang hlawm dâwn si a, tuna na tak tuara khuma mu mêkah chauh hian kan rilru a awm hlawm ngei ang.

Ka thlîr reng a, a hmel pawh a hmuh țhat theih loh nain ka kal sawn phal lo. Nikhua a hre lo ngei ang a, nâ a hre thei lo pawh a niang, pâwnah amah thlîrin ka ding reng tih pawh a hre kher lo ang; mahse, hetia ka thlîr reng lai hi a mumangah tal emaw engtin emaw tala min hmuh ka beisei tlat, chu chuan a taksaah sâwn engtin emaw tala hnà a thawh țhat theih ka beisei nia maw le!

Ka en reng, a awm dàn ngai rengin a awm. A ning tawh viau ang em le? A taksa pawh a kham tawh viau ang, tlangval țhalai sawtia mut reng mai chuh, a inhmeh lo takzet a ni.

"Hei, ka lo kal a nia, min lo chhàwn la? Heti ringawt chuan a lungawi loh thlâk êm mai, men han tum teh. I țhiante leh i chhûngte kan mangang a nia, lo harh hrâm teh, khati khân che lova i mut reng chuan hmuh i nuam lo a nia."

"Lo harh hrâm la, aw? I lo harh loh chuan ngaihdam pawh ka dîl lo ang che, ka hmangaihna thu pawh ka hrilh lo ang che. Khatia i mut reng chuan i taksate kha a kham viau mai tùr asin, lo harh la, i pang kham laite han sawi la, kan hmet dâwn nia."

Ka rilruin ka be reng a, a kut chu vawnsak a, engkim a țhat vek tùr thu hrilh pawh ka châk; mahse, engtin nge ni ang? A kut vawnsak chu sawi loh, a hmel pawh ka hmu țha thei lo chu a ni si a.

"Thi suh ang che, i thi thei lo, kan pahnih hian thil sawi fel tùr kan la nei a nia, sawi fel lo chuan i kal ka remti miah lo a nia, i hria maw, luhlulpa? Tûn hi luhlul hun pawh a nih tawh loh hi, inchhuan leh induh hun pawh a ni lo, lo meng rawh."

"Muanzual, mi luhlulpa, lo meng rawh, àn khum leh che ka la duh a nia, inhnialpui leh che pawh ka la duh, rawn tho vat rawh, i rawn thawh vat loh chuan Lungleiah ka pheisan leh dâwn che," tiin ka rilru chuan ka vau chiam a.

Ka pum a ri raih raih nain eng thil mah ka ei châk lo. Ka mit pawh chu mittui vangin a phê ruai a, mi dang hmuh laia mittui tih tlâk chhên chu ka duh bîk lo, ka insûm ve; mahse, a har ka ti a ni. A awm dan hian ka lung a tiawi thei lo va, a mit lah men a tum si lo, maimichhîng reng ringawt mai, sâwi nawk nawk ka duh mai, sâwi harh ila a dik vek mai ang.

Doctor leh nurse hmanhmawh taka tlân chu ka hmu ruai ruai, ka mit a thîp a, mittui nèn ka hmu chiang thei lo. Chutah, kutin min rawn chelh tâkah chuan ka hawi chhuak a, Zorini, mittui far zawih zawih chunga insût hlawp hlawp chu chiang lo ruai chuan ka hmu a.

"A țha vek dâwn alawm, ka hau tawh a."

A țap chhuak ta hawk a, a ngaihna hre lo zet hian ka kuah a.

"A thi dâwn lo, a thi thei lo, sawi fel tùr kan la ngah lutuk! Mipa a nih ngai chuan a sawi fel ngei tùr a ni," ka ti leh a.

"Melo, a na êm mai tiraw? Ka u hian a tuar chhuak thei ta ngang lo a nih pawhin dem suh aw, a tawrh hi a na êm a ni," tiin nghet zetin min kuah a, a țap leh ta a.

Tawrh țhensak theih dàn awm se.

"Doctor, engtin nge a awm?"

"A thâwk a buai."

"A mar phû pawh hmuh tùr a awm tawh lo."

Vàn mite u, lo țanpui ta che u.

*LUNGÀWINA NUN NEIH HI HLAWHTLINNA NUN NEIH AIIN A ȚHA ZÂWK*

SHARE

Comments



Mawitey Khuptawng6 November 2019 at 08:51

Laklawh ve 😢😢

REPLYDELETE

Post a Comment

Archive

Report Abuse

 Powered by Blogger