☆A MAK!☆ - 30 - 35 By Dingdi Pachuau

 

☆A MAK!☆ - 30

By Dingdi Pachuau

A thi thei lo, ka remti lo. A thi a nih hlauh chuan keimah vàng a ni dawn, engtin nge a chhûngte hmel pawh ka hmuh ngam tawh ang? Ni lo, Lalpa, lo țanpui rawh aw, dam a la mamawh, ngaihdam ka dìl a la ngai. A nunna hi zuahsak hrâm la, a aiah ka nunna hi la zâwk rawh.

Ka â ruai mai a, damdawi in chhûnga ka awm reng chuan ka thâwk a tàwp mai ang, Muanzuala ngaihdam dìl ka la ba bawk si, tunah tak hi chuan ka la thi thei lo.

Pâwn lam chu engtin nge ka thlen chhuah tak ka hre lo, ka thaw kâwk kâwk. Ka thâwk vak vak loh chuan ka âwm hi eng emawin a rawn hnawh tlat a, ngaihdam ka dìl hmain ka thi mai ang tih ka hlau a ni.

Rilru mumal deuh hlek ka put hnu chuan ka țhu hnawk a, ka rilruin ka țawngțai mawlh mawlh, Muanzuala tân ka tih theih chhun a ni si a. Pathian hnênah a nunna zuahsak ka dîl, chu chauh chu ka dîl, thil pawimawh ber a ni si a.

Zorini'n min rawn kuah ding a, ka en chho hau mai a, ani lah chuan mak tih hmel deuh hian," Engtin nge hetah i lo awm daih a? Ka ngaihtuah lutuk che a," a rawn ti a.

"Ka chhuak lawk a," ka ti ringawt.

"Nia, boruak dang dawn ve pawh a ngai alawm; mahse, lût tawh ila?"

"Ka kal chhuah hlànin eng nge a lo an?"

"A țha, tlêm khân a thâwk kha a buai deuh a, a zia tawh e," thaw deuh huai chung hian a ti a.

Chhìn khat pawh ka chhîng lo, mi dang pawh an ni ve thoin ka ring; mahse, Muanzuala erawh a thâwk  a buai tawh lo va, tlêm chuan ka awm a nuam deuh hlek. Zorini chuan chhîng sek tùrin min ti a; mahse, ka thei lo. Ka lo chhìn sek chuan ka chhìn hlànin min lo kalsan daih ang tih ka hlau.

Zîngah Rose-i a rawn lang ve hlawl mai. Min rawn en kual vek a, min hmu chu mak a ti ve ngawt ang chu. Ka rin aiin ka hmu har a, nizàn lam pawh khân awm ve daih tawh tùrah ka ngai a, a thawhpui kha a ni ve sia, bâkah, an inpawh ve êm kha.

Ka țhu ngawt ngawt a, ka kal sawn ngam tawh lo. Tea chuan ei tùr eng eng emaw min rawn pe, ka ril a țâmin ka hre lo; mahse, ka pum erawh a ri rawih rawih.

"Ei rawh, i ril a țàm kha."

"Ka lâwm e."

"Inphihfai i duh em?"

"Nakin lamah le."

Ei tùr chu ka ei ve hlek; mahse, ka inthiam lo nghâl zat. Muanzuala na tuarin a let reng a, eng mah a ei thei lo, kei lahin ka lo ei mai si. Keimah vàng liau liaua na tuar a ni bawk si a, ka ei tùr pawh chu ka nawr sawn ta nghâl.

Ni a lo tlâng sâng a, Muanzuala erawh a ngai reng. Hma a sâwn chuang lo, doctor-te hmëlah pawh chuan beiseina hmêl hmuh tùr a awmin ka hre lo va; mahse, anni tân erawh rilru hnual deuh min puttîr duh lo pawh a ni ang, a êng zawngin an sawi tho. Ka beidawng a, a tân ka rilruin ka țawngțai mawlh mawlh reng ringawt, chu bâk tih theih nei mawlh hek lo le. Hrehawm ka ti hluah hluah a, tunah hlauh phei hi chuan Zorini hmuh pawh hi nuam lo ka ti țan tawh.

Dam chhuak mawlh teh se, ka thil phût vàng khân ngaihdam ka dîl mawlh mawlh ang. Tunah hian thil pawi chu a thlen tùr a thleng vek tawh, inchhìr vàngin a siam țhat theih tawh loh. A tân tih theih ka neih lohzia mawlh mai hi, hrehawm ka ti.

Nilêngin a pângngai, a tla hniam hran chuang lo va, hma a sâwn pawh ka hre chuang lo. A mu chawrh chawrh ringawt, theih ni se a kut tal saw chu vawn ka châk. A kut vuan chunga ngaihdam dìl ka duh, ka hmangaih thu pawh. Hre hman lova a liam hlauh phei chuan...

Nunoi pawhin min rawn phone ve e. Chanchin hrilh dàn tùr chu ka hre lo khawp mai a; mahse, thu dik tak chu ka hrilh loh chuan, dâwt hrilh ringawt chi pawh a ni lo.

"A nih tak chu, a țha chho ang tih ka ring fan a nia, tunah chuan a la harh chhuak zo lo pawh a ni maithei a, nakinah chuan a la harh chhuak hrim hrim ang, tlangvâl chak țha lai a nia, chutin a harh chhuak lo ringawt lo ang," a rawn ti ve tlat a.

"Mahse, a harh har tawh êm asin, doctor-te pawhin an sawi chhuak lo naa, an beisei sâng tehchiam hlei nem," ka ti sap a.

"Doctor-te pawh mihring ve tho an nia, an beidawng ve thei tho alawm. Nang chu beidawng suh aw, a tân beidawng miah lova awm tùr i ni, mi dang an lo beidawng a nih pawhin nang tal chuan a lo harh chhuah i ring tùr i ni," a rawn ti leh a.

Nunoi anga beidawn ve loh chu ka duh takzet a ni. Doctor-te hian taksa awm dàn leh kawchhûng zawng zawng chanchin an zir a, an hre êm êm ang, a na lai leh a țha lo laite chu keini ai chuan an hre dâwn chiang a ni; mahse, anni meuh pawh an beidawn ve deuh tawh chuan keini eng mah chanchin hre ve hauh lote chu lo ngaihțha viau tùr kan ni lo tlat a ni.

Ka thaw hawk a, beidawng lova beiseina nei tlat thei tùrin ka rilru chuan ka țawngțai ta mawlh mawlh a.

Pathianni a lo ni a, Zorini leh Tea chuan engkim an ngaihtuahin an buaipui a, Rose-i pawh kan bulah a awm ve reng. Kan awmpuia ber lah chu a harh thei chuang si lo, ka mang a ang ru tak tak tawh a ni, a harh har lutuk tawh chuan ka ngaih a ti țha lo.

Muanzuala nu leh a nau pawh chu an rawn kal leh a, a pa pawh a rawn kal a ni àwm e. Toilet-a ka kal hlàn a nia, ka hmu ve hman lo, ka hmu châk asin le. Eng ang hmel pu nge ka hre châk, a mitmeng pawh ka hmu duh khawp mai, Muanzuala hmusit taka en țhìntu mitmeng chu min entu atân duh lo mah ila kei hian chiang taka en ka châk khawp mai.

"I chau tawh ngawt ang?"

Zorini melh pah chuan," Chau lo ve, chauhna tùr a awm hlei nem," ka ti sap a.

"A harh chhuak har tawh ka ti a, ka ngaih a țha lo lek lek tawh. Tea erawh chuan a lo harh leh ang tih a ring tlat thung, min hnèm mai mai nge phei chu ka hre lo va," a ti sep sep a.

Pâwnah boruak tharlâm dawngin kan awm. Ka tum dàn chuan naktûka phei leh mai ka tum a, Muanzuala harh lai hmu miah lova phei leh ringawt chu ka inthiam lo deuh viau nain school chawlh a ngai dâwn si a, ka rilru a hah, heta awm reng lah chu, a harh chhuah hun tùr a hriat bawk si loh, school chawlhsan rei viau pawh naupang tân a fuh si lo.

"A lo harh chhuak ang."

Ka sawi ve mai a, ka rilru tak tak pawh a ni bîk miah lo. A chhan chu ka ka ațanga beidawng ri chhuak a hriat ka duh lo, ka hnemna pawh a ni chiah lo, Nunoi beiseina kha ka sawi chhuak a ni mah.

"I ring maw? I rin ang chuan ni se ka ti takzet, lo harh chhuak se hlim takin pasal pawh ka nei thei ang. Ka u tel lo hi chuan ka hma hun hi eng mah lo mai ni dâwnin ka hria a, a lo harh phawt loh chuan thil thlen dàn dik tak pawh kan hre thei dâwn si lo," a ti leh vang vang a.

"A accident dàn maw?"

Min rawn en zawk a, za lo zet hian a nui a, hmun dang a hawi leh nghâl daih a.

"A, eng mah a ni lo, rinhlelh thil mai mai a nia," a ti sep, a sawi thui duh loh dànah zawh zêl chi niah ka ngai lo. Ka hriat a duh chu ni se min hrilh ngei ang chu.

Eng thil nge ni ang? Accident pângngai lo deuh a ni em ni ang? Rinhlelh thil mai mai maw? Eng laiah nge rinhlelh tùr awm ang le?

Ka rilru a tibuai.

"Mak tih deuh ka nei asin, kum khati chen kan ina rawn kal duh tawh miah lo kha a accident hma khân a rawn kal tlat a nih chu. Chutah, ka pa nèn an la inbe zui a."

Zorini chu ka en tlawk tlawk!

Muanzuala chuan a pa chu a lo va be ngei a nih chiah chu. Ka thil phût vàng kha a ni ngei ang, Muanzuala tehrêng chu aw, a rawn harh chhuah ngei a ngai a ni.

An inbiakna chu ka hre châk, ka hre chhunzawm zêl châk.

Rose-i a rawn lang ta, Zorini hnênah chuan," Bawihi, Tea'n a be duh che a, ka rawn zawng tawp che," a rawn ti a.

Țhutna ațanga tho chhuakin," Aw le, ka'n kal nghâl ang e, pâwn boruak hi lo dawng ve rih rawh, kha, Melo-i nèn khân lo titi ve rawh u, damdawi in chhûnga awm reng pawh rilru a ipik duh êm mai," a ti a, a kal ta nghâl a.

Ka țawng peih vak lo asin, min biak loh chuan ka be lo ang, tuna Zorini thil sawi kha ngaihtuah ka duh zâwk asin, mi dang bula awm lova mahni chauha awm ka duh.

"I chau tawh em? I chau tawh ngawt ang chu, i ti țha takzet a ni. In ințhian țhatna hi a awhawm ngawt mai," tiin ka bulah chuan a rawn țhu thla a.

Țhian țha. A dikna lai a awm tho, țhian mai bâkah thil dang a la awm cheu asin.

"Chau lo ve, i chau ngawt zâwk lo maw?" ka ti ve a.

"Chau lo ve, ani tân chuan zan sàwm pawh tlaivâr mah ila ka chau thei lo ang. A harh har tawh i ti ve em?"

"A na viau ang a, a chau lutuk a ni ngei ang," ka lo ti ringawt a.

"A accident dàn i hria em?"

Ka hre hauh lo, Zorini ka záwt lo va, ani lahin min hrilh miah lo. Motor accident a niang chu ka ti tawp mai.

Ka lu ka thing a.

"A țhat hlauh chu."

"Motor accident a ni nange?"

A nui hak a," Accident tih vàng ringawtin motor accident tihna a ni vek kher lo," a ti leh a.

"A nih chuan?" Ka kâwlhrâwng lui ve tlat, min hrilh nghâl se chuan ka zâwt hauh lo ang.

"I rin dàn dàn le," a ti phawt a," A harh chhuak har mah mah tawh si a, ka bei hi a dawng ve mai ang tih ka hlau. Hmunpui lama phurh thlâk mai tawh a nia ka duh tawh ni," a ti leh a.

"Hetiang chuan a chî loh ang?"

"Hetianga tuar reng tùr hian i duh em ni? Hmasâwnna awm miah lova muttîr reng ringawt, doctor hrang hrang ka be tawh. A harsat dàn turzia an sawi vek, ka hria; mahse, kawng a awm ngei ang, a tân hian ka beidawng ve thei lo ang, ka beidawng thiang lo, a nunna hi ka nunna ang tluk zeta ka hlut a ni si a," a ti leh a.

Muanzuala nunna hluttu chu ka tân pawh a hlû, a țhian țha, a chhûngte ang tho a nih ve hi.

"Khâng kum hnih thum kalta chhûng zawnga ka mipa kawp awmchhun a ni a, ka nun tihlimtu ka nunna a ni. Ani hian thihna ata ka nun min chhan chhuak a, thihna ata nun hlimna min temtîr lehtu a ni, hetianga nikhaw hre lova a awm hmuh hi hrehawm ka ti ngawih ngawih. Chuvàngin, a tâna ka tih theih zawng zawng chu eng anga harsa pawh ni se tih vek ka duh."

Ka thil hriat thar chuan ka rilru a tihbuai belh leh ta.

"Țhian țha tak in ni tho a, kan inkâr thil hi ka hrilh hrehna chhan tùr che ka hre hauh lo. Muanzuala nèn hian kan inhriatna a rei tawh a, mipa țha tak a ni tih ka hria, an chhûngkaw awm dàn pawh a țhian țha i nih angin i hriat vek ka ring. Kei chuan pakhat té mahin ka iai phah lo, hausa lo deuh mah se kei fanu mal ka ni a, kan ei khawp chu kan nei ang, nuamsa ve tâwk chuan ka siam thei tho bawk ang tih ka hria. Ani erawh hi chuan ama thawh chhuah ngei mai hi a duh tlat a, mipa chuan a nupui chu a châwm tùr a ni tih hi a chângvawn ve tlur mai a. Inneih ka duh tawh thu ka hrilh a, ani pawhin a pa a lo sawipui tur thu min hrilh nghe nghe asin, a sawipui a nih ka ring, Bawihi khân an ina a rawn  kal thu kha a sawi a."

Hm, kea thil phût vànga kal niin ka lo ngai a... Ngaihthlâk tawh loh ka duh a; mahse, a sawi zêl si.

"Rei vak lo hnuah kan innei thei tawh ang chu tih laiin, hetiang hi a chungah a rawn thleng leh ta mai si a, a pawi tak tak a ni. Bawihite inneih hnu lamah kan ti ve ang chu ka lo ti rilru a," a tih leh phei chuan ka rilru hi a keh sawm vek maiin ka hria.

"A chhûngte nèn pawh hian kan inpawh viau, an fel ve hrim hrim a."

Muanzuala nu leh a nau mipa nèn pawh an inbiak tak kha, an mo tùr riakah an ngai tawh ang chu. An innèl hmel hlawm viau kha, kei erawh min hre mang lo va, Zorini'n a sawi hnuah min be ve chauh a nih kha. Chu pawh, a mawiah ka ti dâwn nge an fapa/unaupa țhian ka nihna ang chauhin, nge an lungngaih manganna ka lo tuarpui ve vàng chauhin ni zâwk pawh ka hre thiam lo.

"I hming hi chu ka hriat zin ber pawl a ni, a sawi zing che asin, in lo inkàwm ngeih bawk a, hetianga natna khuma a mu, hrehawm tia min tuarpuitu thian țha a nei che hi ka lâwm, ka tân pawh țhian țha tak i ni. Ka ngainat phah êm êm bawk che," a ti leh a.

Muanzuala chungah chuan eng thil pawh lo thleng dâwn se biak ka duh a ni, a kuta chelh chunga biak ka duh. Ngaihdam ka dîl ang, kawng engkimah, làwmthu ka hrilh bawk ang, a țhian ka nihna angin. Dam chhuak tùrin ka duh, a dam chhuah phawt chuan ka lak ațangin a zalèn nghâl ang. Chu chauh chu phalsak ka ni thei ang em le?

"Naktûkah, haw phei ka duh mai dâwn si a, doctor-te hnênah a awmna chhûnga ka luh min phalsak tùrin min dìlpui rawh, khawngaihin? Chu chauh chu ka dîl ang che," tiin ka ngèn ta a.

Min en há tih ka hria, pawi ka ti lo. A kut vuana ngaihdam dìl kha ka duh chu a ni, eng thil pawh ni se  hmuh ka duh ber.

"Engati maw? Engati nge hmuh chu i duh a?"

"Ka haw phei dâwn si a, lo harh chhuak vat tùr leh hlim taka awm tùrin ka duh alawm. A harh chhuah har avànga han hauh hrep pawh ka duh a," ka ti a.

"Haw phei i tum hma e, khulama ka hruai thlâk thleng tal chu awm la? Min en liam ang chu?"

"A țha khawp mai; mahse, school-"

"Aw, ni dâwn tak e! School-ah i thawk tak, a sawi tawh alawm, ka lo theihnghilh țêp alawm le."

Damdawi ina min luhsan hnu chuan ka maimichhîng vang vang a, he ka thluak te reuh têah hian ngaihtuah a va tam tak êm! A tam lutuk a, rilru mumal pawh put a har hial a nih hi.

Thil dang zawng aiin Muanzuala hi dam chhuak se tih ka duh ber. Dam se, hlim se,  a duh duh dànin awm rawh se, a dam chhuah chuan ka lâwm ber ang.

Rose-i chuan min hmuhtîr dàn tùr chu a ngaihtuah chhuah theih hrâm ka beisei. Sawi tùr ka ngah dâwn si, eng nge ka sawi hmasak ber ang le?

*******

Ka mumang a ni lo tiraw?

A kut ka vuan asin, a kut vawt ngiai chu ka vuan a, a lum thar thar tùrah ka lo ngai a. Mitthi kut ni àwm tak a ni, ka rilru a na lutuk a, ka mittui a far ta nghâl a.

"Hei, min hria em? I bulah ka awm a, i kut ka vuan a nia, harh teh. Hetiang hian i awm duh ang tih ka lo hre ngai miah lo, mut reng hi i inhmeh lo a nia."

Ka ngawi leh phawt a," I chhûngte leh i țhiante min timangang tawh, min tihder chu a ni zozai tawh lo tiraw? Țawng tlêm viau mah la min han chhâng teh, eng emaw tal chu sawi tawh teh," tiin a kut chu dìm tê hian ka chûl a.

A awm dàn ngai rengin a awm. A taksa thlunzawmtu khâwl ri tút tút chu ka hua, ka haw takzet.

"Min ngaidam rawh aw, ngaihdam dîl ngam tùr che pawh ka ni lo tiraw? Ka thil phût huatthlala deuh kha, theihnghilh hmiah rawh. I nun ațangin min paih bo hmiah la, nun tharin rawn nung tawh aw. I rawn harh ngei a ngai a nia, rawn harh vat rawh aw. Chu chauh chu ka ngèn ang che, ka duhthusàmah chuan rawn harh la, min theihnghilhin nun tharin nung ang che. Engkimah a țha ber ber ka duhsak che."

"I lo harh har si, ka hawsan daih dâwn che. I natna lah min tuar țhentîr duh si lo, biak che lahin i țawng duh si lo va, ka hawsan che chuan i țawng duh mahna!"

A hmai vûng deuh bûr chu chùlsak ka duh, ka chùl chuan nâ a ti ang tih ka hlau bawk si, ka en tlawk tlawk a.

"Muanzual, ka hmangaih che asin, ka hmangaih che. Nang lo chu hmangaih ka nei miah lo. En teh, pâwn lamah nangmah hmangaihtute'n i lo harh hun kan lo nghâk reng che asin, khawngaihin lo harh tawh teh."

"Ka chungah i thin a rim a ni tiraw? Engkim hi ka thiam loh vek a ni, ka haw phei hunah chuan lo harh tawh rawh aw, i thin a rim vàngin tunah chuan i harh duh rih lo a nih pawhin ka phei hnuah chuan harh hrâm ang che, i harh chhuah chuan khawvêla mi hlim ber ka ni ngei ang. Khawngaih takin, mipa i nih kha, i tuar chhuak thei ang tih ka hria alawm. Tuar fan fan la, hêng natna i tawrhte hi chu rawn hneh vek ang che aw."

"Aw le, ka awm rei ta. I hmel ka hmu a, i kut ka vuan thei a, ka lâwm e. Harh la chuan hetianga i kut ka vawn pawh hi i phal lo maithei a ni tiraw? Ka kalsan hunah che chuan lo harh hrâm tawh rawh aw, chu chauh chu ka ngenna hnuhnung a ni e. Ka hmangaih che, i hmangaihte tân lo harh chhuak hrâm rawh."

Ka mittui chu a luang nguah nguah a, a kut chu kûn hniamin lungchim zetin ka fâwp phawt a, ka mittui chu hru hulin chhuak tùr chuan ka inher ta a.

*INKUNGKAIHNAAH HIAN THÎKTHU CHHIATNA HI A AWM VE CHÂWK A NIA, LÊRH VÀNG A NI KHER LO*

Thîkthu chhiatna chu lêrh vàng an ti țhìn, dik tak maw? Dik lo tak maw?

☆A MAK!☆ - 31

By Dingdi Pachuau

Ka duh lo chung chu Tea'n min hruai haw. Zorini'n min thlah tùrin a lo nawr ve bawk a, ani erawh chuan haw phei lawk a duh ve tho tih a sawi thung.

Ka ngawi reng a, ngawih hi ka thiam ve viau tawh. Tunah phei hi chuan rilruah thil a tam lutuk a, paih thàwl țhen hial ka duh záwk a ni.

"Thil kal dàn hi a mak e tiraw?"

Ka en phei a, min rawn thlêkin a nui deuh sak a, kawng lam a hawi leh nghâl daih.

"Mak vak em ni?"

A aw thian kharhin," Rose-i hi i ngainat zawng a ni lo tiraw?" a ti leh daih a.

"Ka hre lo."

"Thil eng emaw, Zorini nèn kan chungchângte hi min zawh ve ka ring asin, i țawng duh viau țhìn kha a ni sia, i lo danglam tawh ka ti."

Za lo zet hian ka nui a," Min hrilh a nih loh chuan mi chungchâng ka záwt vak ngai lo tih kha i lo theihnghilh tawh a nih dâwn hi," ka ti a, chutah hre chhuak leh thutin," I nupui neih tùr hi ka lawmpui hle che a ni, Zorini hi hmeichhe fel tak niin ka hria a, nupa inkawp rem tak ni ang che u," ka ti leh hnuhnawh a. Zorini pawh kha ka lawmpui thu hrilh kha ka duh; mahse, hunin a zir ta lo êm a, ka theihnghilh chu a ni miah lo.

"Ka lâwm e."

"In chanchin chu min hrilh duh chuan ka lo ngaithla peih reng a nia," tiin ka țhu țha sauh sauh. Ngaihtuah dang neih hi ka mamawh, ka rilrua thil dang ka ngaihtuah chuan tlêmin ka veng deuh mahna.

"A mak khawp mai, nang nèn khân khati chen kha kan inkawp a ni a, nupui atân ka nei chuang miah lo che. Mi dang ka nei daih a, tunah lah mi dang bawk ka nei leh dâwn a; mahse, nang nèn hian kan inhlat chuang hauh si lo. Ka sawi awmzia chu nang nèn hian kan la inkàwm zêl a, kan inhmelma en hauh lo hi a nia ka tih, mi dang chu ni se an inbe țha thei tawh hauh lo ang," a ti a.

A sawi chu ka ngaihtuah a, a dik chiah alawm. Induh ve deuh khân khati chen kha kan inkawp a, kan nih loh hnu thleng pawh hian kan la ințhen tak tak chuang lo chu a nih hi, hei hi Muanzuala vàng liau liau a ni, ani nèn hian inkàwm lo ta ila chuan Tea nèn hian kan inbe tawh ngai lo ang, chu chu ka rin dàn dik tak a ni.

"Chuan, kan hun lo hman dun tawh zawng zawng vàng khân làwmthu ka hrilh che. A chhan chu hmeichhe fel tak i ni a, khati khawpa nâ khân ka siam che a; mahse, min huatna emaw i tilang ngai lo, țha takin min be thei reng a, tunah lah lawmpuina thu min hrilh leh thei a, ka thinlung chhûngril tak ațang hian làwmthu ka hrilh takzet che a ni."

Tlêm chuan ka zak, a chhan chu ina a rawn lèn lai kha ka hre chhuak, ka lo biak țhat peih miah loh kha.

"Zorini pawh hi hmeichhe fel tak a ni, ka phu miah lo; mahse, hmangaihna hi a lo mak khawp a, hetiang ka ni chung pawh hian min duh ve tlat. Ka țhianpa nau a nihna angin ka nêl a, ka duat ve bawk; mahse, kan inhmu tam telh telh a, kan inkârah hmangaihna a lo piang ta tlat. Hmangaih loh duh teh mah ila ka duh thlan theih a ni hauh lo, ka țhianpa nau a nih vàng pawh hian duh miah loh ka duh a; mahse, ka bet nghet telh telh zâwk ni maiin ka hria. Hetia nupuia ka han nei mai tùr hi mak ka inti bawk, 'êm êm a' min ti em?" tiin min zâwt zui a.

"Ti lo ve, nupui nei lai i ni lo va, nupui neih leh kha a sualna a awm hauh lo," ka lo ti ve a.

"A tìrah chuan țhianpa pawh hi ka zah a, ka inthiam lo viau bawk a. A nau hi hmangaih hle lo se chuan min țhen hrang daihin ka ring hial asin, vawi khat chu kan insual phah nghe nghe asin," a tih leh chuan phâwk zet hian ka en phei a.

An țhian dùn an insual maw?!! Ka hre ve hauh lo, Muanzuala'n a sawi lo va, Zorini lahin min hrilh hek lo; mahse, min hrilhna hun a awm lo ve bawk a, a u nèn kan inkawm tâk loh hnuah phei kha chuan a tân chuan min biakna chhan tùr kha a awm lo bawk a, bâkah, ka number pawh a nei hek lo ang.

"A țawng tam lo viau na hian chumi țum chuan a thin a rim ve ngang a niang, i hming lam chung meuhin min hnek a. Ka tihnatzia che kha a lo theihnghilh bîk lo tih ka hriat phah a, ka inthiam lo thar leh khawp nghe nghe asin."

Tea hi chu a țawng duh ka tih tawh kha, a nui duh bawk. Kawng tluanin a titi thei a, ka rilru kal ding viau tùr pawh min vènsak viau rêng a ni. A chângin Zorini a phone leh zauh tih lohah chuan a titi deuh char char a ni mai, khua pawh a har lo ve.

Lunglei kan thlen dâwn hnaih lamah chuan," Ka țhiana hian a duh viau che tih ka hria asin, kan insual ațang khân ka hre thiam ve chiah. A hma zawnga ka lo hre thiam miah lo kha a mak ka ti, in inhmeh viau ka ti bawk a," a ti ta.

"I hre sual a nih chu," ka ti ve tlat.

"Ka ti tak tak, hetiang thil a chunga a lo thleng hi pawi ka ti tak tak a ni. Kan innei dâwn tih kan chian tawh hnu khân eng emaw thil hlimawm tak ruahman a nei tih min hrilh nghe nghe asin, eng lam nge tih ka zawh erawh chuan eng mah a sawi duh lo, lo nghâk tùrin min ti a."

Rose-i neih a tum thu a hrilh dâwn a niang chu. Inneih chu thil hlimawm lam a ni rêng a ni, a sawi dik lo miah lo.

"Zorini bulah erawh eng mah ka sawi lo, a chhan chu thil hlimawm lam a nih chuan ama sawi ngei kha țha ka tia, a hlimna tùr lo sawi chhuahsak kha ka duh lo a ni. An chhûngkuaah hlimna a thlen theih ka beiseipui bawk a; mahse, hetiang thil hi a lo thleng leh ta phut si a," a ti zuai raih a.

"A dam chhuak dâwn alawm," ka lo ti thung.

"Ni e, a dam chhuak ngei tùr a ni. Thil hlimawm tak a ruahman tihlawhtling tùr chuan, a dam chhuah hi a țûl a ni. Bâkah, inneihnaah pawh ka best tùr a nia," a tih leh chuan Muanzuala thil ka zawh kha ka hre chhuak.

Inneihnaah kal a tum dâwn em tih ka zawh kha. Ani lahin a hriat loh thu min hrilh a nih kha.

Mahse, sawi chhuah kher ka tum lo.

"Best a ni dâwn tih i hrilh tawh ang chu tiraw?"

"A, ka hrilh chiah lo. A nau ka neih tùr a ni si a, nuam lo a ti deuh ang em aw tih ka lo ngaihtuah deuh a, Zorini nèn pawh kan sawi dùn nghe nghe tawh a, mumalin thutlûkna pawh kan sawi lo," a ti leh a.

"A nih, dik takin min hrilh la, a accident dàn hi, accident pângngai a ni lo em ni?" tiin ka zâwt ta phawng a.

Min rawn en zawk a, kawng lam a en leh nghâl vat a, a ngawi ta vung vung. Min chhâng dâwn tawh lo emaw ka tih hnuah chuan," A pângngai lo deuh niin Zorini'n a ngai a, chuvàng tak chuan a lo harh chhuah ngei hi a pawimawh êm êm a ni, a hnên ațangin engkim a hriat vek theih ang a," a ti ta sap sap a.

An ina pêng lovin min thlah thla a, ka hnial viau nain a ding duh tlat lo. Zàn a riak ang a, naktûk zîngah phei leh nghâl a tum a ni àwm e, a hna thawhna a nia, a àwm reng mai.

Nunoi a lo la haw hman loh avàngin keimah tê chauh chuan ka awm rak rak a, ka chau nghulh mai. Zàn mu lo, ei tùr ei țha lo leh motor chuang chau bawk si chu chau tùr ka ni rêng a ni, chutah, rilru a lo buai bawk nèn.

Ka țawngțai a, khuma ka bawk mai mai chu ka lo muhìl daih! Zàn dâr 9 vêlah ka zun chhuakin min tiharh a, ka awm dàn chu ka la hre thiam lo zui.

Nunoi pawh a lo la mu lo va, ka tho chhuak chu min lo hmuh chuan," E, i lo harh tawh maw? Ka kai tho duh lo che a nih kha. I mut tui hmel lutuk a," a lo ti vat a.

"Nia, ka chau deuh a niang."

"I ril a țâm em? Chaw ei la? Ka lo tilum ang aw."

"A ngai lo, thingpui ka in zâwk ang," tiin bathroom-ah ka lût ta nghâl a.

Thingpui ka in lai chuan thil awm dàn chu min zâwt a, ka hrilh ve mai. Zêp tùr a awm lo bawk a, keimah vànga accident chu tuarah ka ngaih thu ka hrilh lai chuan ani chuan," Chutiangin ngai miah suh, vànduaina pawh hi kan tân Pathianin a lo ruat lâwk ve tho, a țha lam chauh hi min ruatsak vek lo. U, chutiang chuan ngai tawh miah suh aw, ani pawh a rawn dam chhuak mai ang, kei chu ka beidawng hauh lo, him țha takin a rawn dam leh ang tih ka ring tlat," a ti a.

"I rin tlat avàng khân ka ring ve tawh asin, ka țawngțai nasa bawk a."

"U, a țha lutuk! Pathian hian tum a nei tih hriat kar tùr, U Michael-a'n min hrilh fo țhìn. 'Harsatna, vànduaina kan tihte pawh hi kan tân zirtîrtu an ni fo' a ti țhìn a, he accident-ah hian Pathianin tum fel tak neiin thil eng emaw zir chhuak tùrin a duh che u a nih ka ring tlat. U Muanzuala pawh chu ka țawngțaisak nasa a, a dam chhuak leh ngei ngei ang," a ti leh bawrh bawrh a.

Rose-i thil sawi erawh kha chu ka hrilh lo, a țûl ka ti lêm lo bawk.

Zîng dâr 8:30 vêlah Zorini'n min rawn phone a, Muanzuala chu a rawn harh tawh a nih àwm chu. Ka hlim lutuk a, ka au chûl a, ka mittui a tla, ka zuang tawr tawr mai bawk a, Nunoi pawhin mak min tih hmel lutuk.

Mahse, a la țawng thei lo, a la chau lutuk a; mahse, a harh chhuak hrim hrim chu a làwmawm lutuk. Kan inbiak reng reng lai pawh chuan ka rilruin Pathian hnênah làwmthu ka sawi mawlh mawlh.

Thlalâk a rawn thawn a, thlalâkah chuan a lo meng ve ngei tawh, amah hnaih zetin Rose-i chu nui chung hian a hmai bulah chuan a kûn hniam bawk. Ka thinlung chu na vawng vawng mah se a lo harh chhuak tawh a, min tihlim êm êm tho.

Ka tân a vul dâwn emaw vul dâwn lo emaw pawh ni se a harh chhuak hrim hrim chu a làwmawm, ka lâwm lo thei lo. Ka hmangaih avàngin a tân thil țha ber ka duh a, a hlimna pawh ka duh alawm. A duh lohnaah nawrin min ngeiin min haw dâwn mah se kei chuan a tân thil țha lo ka duhpui hauh lo ang, tunah pawh hian min haw viau maithei asin, a pa hnêna ti tùra ka phût kha, a nasa mah mah si a. A hriata a lam hawi miah lo anga ka lan khân ka thinlung zawng zawng erawh a tân ka hlàn thlap tawh a, ka hriattîr lo mai ni lovin ka thup vek kha a ni zâwk a, ka chapona leh ka induh tâwkna khân tunah hian min vaw lêt ta chiah a ni.

"Min ngaidam suh aw, ka kuang lo ka lo nawr vàng a ni. Min theihnghilh daih la, i thinlung ata min paih bo vang vang ang che. Hriat reng tlâk ka ni lo va, i hlimna tibo thei tùr atân hlauh phei chuan ka hming hi ngaihtuah chhuak ngai miah suh, min hua la, min ngei rawh; mahse, kei chuan ka dem hauh lo ang che, i hlimna ka duh ber, dam takin rawn țha chhuak la tih hi ka țawngțaina a ni," tiin a thlalâk chu ka be mawlh mawlh a.

A țha chak vak lo tih Tea hnên ațangin ka hria. Ani hian a chanchin chu min rawn hrilh zauh zauh, Zorini erawh a buai a, bâkah, min rawn hrilh tùrin ka phût hek lo. A bialnu pawh ka ni lo va, ngaih pawimawh viau tùr ka ni lo alawm.

Hun a ral a, naupang an exam zo a, Muanzuala pawh phai lamah an kalpui tih ka hre leh. Nia, a țhat chak loh chuan chu chu a țha mai, Rose-i a inhawng viau bawk a, ani'n engkim a buaipui thei bawk ang a, a țha lutuk alawm. Dam țha takin lo haw rawh se, a dam țhat hi ka duh ber chu a ni.

December thla a lo ni a, school kan kal rei ta lo. Ni 13 thleng kan kal, kan khuaa haw chhoh ka châk rualin ka châk lo, ka chhûngte bula awm erawh ka châk. Rilru ruak tak si, ipik êm êm tho sia Krismas han hman pawh chu ka phûr hlawl lo, mite hlim tak takin an awm ang a, an lêng ang a, Pathian an fak bawk ang, kei chu ka mal viau ang chu.

Kan haw chho ta ngei a, ka hun hman dan chu ka nu bula tawlh reng a ni mai. A awmna apiangah ka awm a, huana a luh leh ka lût a, a pangpâr chìn pawh an lo mawi tawh khawp mai. Hlim taka țawng chung chuan pangpârin a nun an tihhlimziate chu min hrilh a, ka nu anga pangpâr ngainat ve chu ka châk phah.

"Chîng la, phun la, lei țha leh tui pein châwm la, i ngaina lo thei lo ang."

Kan awm chhûng chuan rose senduk pakhat hi pot-ah ka phun ve a, ka enkawl ta alawm. Tih tùr ka duh avàngin ka nu pangpâr chìnho tui pêk chu ka hna a ni a, ka rose phun pawh chu pangpâr dang tui ka pêk rual chuan ka pe ziah, a thi dâwn lo a ni ang, a la hring reng.

"Tui i pék țhat chuan a thi lo ang."

A chawr hun ka nghâkhlel khawp mai a, a bula kalin a chawr dâwn tawh em tih ka thlîthlai ziah. A zia phian, ka rilru a la pêng nasa a, thil țûl lo ngaihtuah vak vak nân ka rilru ka sêng ta vak lo va, a țha ka ti khawp mai.

"I phone a ri a nia."

Pangpâr tui ka pêk laiin ka pain min rawn ko, ka nu chu buhban chhang tùr hertîrin a chhuak a, Nunoi lah hi khawiah nge a kal hman ka hre miah lo, kan khuaa haw chhoh hi chuan lènna tùr hi a hre khawp.

Ka chho vat a, nakina pêk chhunzawmah ka ti mai.

Number ringawt a nia, min hretu tu emaw a ni ngei ang.

"Hello?"

"Pangpâr i ngaina lo emaw ka ti?"

Ka phu zawk mai!!! Ka hawi kual nghâl ruai a, kan kawt vêlah tu mah hmuh ka nei bawk si lo.

"I dam țha tawh em?" Min la rawn be duh a nia, ka chungah a thinrim lo tihna a ni ngei ang.

Lalpa, ka lâwm e.

"Dam lo."

"A pawi hle mai-"

"Ka chanchin hre tùrin vawi khat tal i rawn phone em?" A awki hniam zet, thûm bul bul bawk si ațang chuan a lungawi lo tih a hriat mai.

"A pawi ka ti-"

"Kha thu kha sawi ziah suh."

Ka ngawi ta. Ka hlim a, ka làwm êm êm rualin ka thinlung a tinâ. Ka ngawih hnuah ani pawh a ngawi leh kur tho sia.

"Eng nge ka sawi ang? I dam țha leh hi-"

"I sawi tùr àwm chu ka hre țeuh."

Nia, ngaihdam ka dìl pawh a ngaih kha. Ka țawng a hriat theih loh lai kha chuan ngaihdam dìl khân awmzia a nei tam lo hle a nih kha, eng mah a hre thei lo miau a.

Mittui tling kuau chung chuan," A pawi ka ti takzet-" ka sawi zo leh hman lo," Sawi...tawh...suh," a rawn tih leh tâk țhawt avàngin ka țawng tàwp chat a, ka phone chu ka hmet tawp ta daih, ka mittui a tla nghâl zâwih bawk.

Mahni inthiam lohna nèn, a thil sawi leh awka chhuak chuan min tinâ a ni, na miah lova hlim taka lo be tùr ka nih vei nèn,  ngaihdam pawh ka dîl hman leh ta lo.

A dam țha deuh tawh a, hlim tùr ka ni. Phone-ah min la rawn be duh a, hlim tùr ka ni. Min vìnin engtin pawhin min bia se țha taka lo dawngsawnga ngaihdam dîl tùr ka ni.

Mahse, ka hlim miah lo a nih hi. Ani dam țha lo pawhin ka rilru a la rawn tina thei a nia, ka va nêp tak!

Lalpa, min pui rawh.

Vui thei tùr ka ni lo va, a damna ka dìl chu a hlawhtling ta a. Min hua pawh ni se ka tawrh tùr a ni, vui thei ka ni lo.

Zanriah ei hma hreta kan ina Nunoi ruala mipa rawn lût ka hmuh chuan mak ka ti lutuk a, ka thidang lo chauh a ni!

*MI DANGTE THAWH ȚHAT LEH ȚHAT LOH I EN CHHÛNG  CHUAN I LA THAWKRIM TÂWK LO TIHNA A NI ANG, THAWK ȚHA LA, THAWK RIM ZÂWK ANG CHE*

☆A MAK!☆ - 32

By Dingdi Pachuau

A hmulin a khuh loh a hmai khem nuan, a hmuihmul leh a lu buk zet te ațang chuan mi sual tlân bo a nih duh hmel lutuk! Bâkah, a bân a awrh a, a ke a la bãi deuh zui. Uiin bauh luai luai pawh ni se a àwm lo miah lo ang.

"Mi sual tlân bo ka rawn hmu a, min rawn zui haw ringawt a nia!" Nunoi chuan nui ar ar pah chuan a rawn ti lût a.

Lo biak nachâng pawh hre lo chuan ka lo en hû reng a, helaia ka hmu ta mai hi mak ka ti a ni, nichîn deuh khân kan inbia a, a thin a rim avàngin phone pawh ka hmet tàwp daih nghe nghe a nih kha.

"Ramhuai hmu ang mai!"

"Eng nge i lo tih dáwn?"

Min en ngur a, min chhàn hma chuan room ațanga ka nu rawn chhuak chuan," E, mikhual kan nei dâwn elo? Lo țhu rawh khai, khawi lam ațangin nge ?" a rawn ti chhuak a.

Nunoi chu a lo nui hawk a.

"Nu, i hre lo maw? U Muanzuala a nih hi," a lo ti vat a.

"Aw..a ni maw? E khai, ka hai țêp che alawm le! Kan inhmuh lohna a rei tawh êm mai a, a àwm ve tho mai. I dam țha deuh tawh em ni?" tiin a be chùl a.

Muanzuala dam loh hi ka chhúngte ka hrilh lo hrim hrim, Nunoi'n a lo hrilh a ni ngei ang, a hriat dànah. Kan ințhen hnuah phei kha chuan a chanchin hi ka sawi chhuak tawh ngai lo.

"Ka țha tawh e, in lo dam țha em?" a tih ve ngei chu!

Ka țawng leh tawh lo, ngawi rengin an titi chu ka lo ngaithla a, a chezia pawh ka lo en ngun pek. A ke chu a la dam țha lutuk lo a nih hmel, a țhut dâwna a țhen deuh sak ka hmuh chuan a na deuh zawk a nih ka ring.

Ka pa leh naute an rawn thleng a, ka pa pawhin a hmuh chuan a țawng hlut mai. A thisen petu kha a ni miau mai a, bâkah, ka țhian lo ni tawh țhìn kha a ni miau bawk si a, an lo be țha viau pawh chu sawisèl chi a ni hauh lo.

A lo kal chhan lam an zâwt lo, a kut leh ke nat dàn te chu an zâwt a, kum thar hmang ve nghâl tùrin an sâwm nghâl hmiah bawk, awihawm loh lutuk! Ani hian hetah kum thar a hmang lul lo ang! Rose-i nèn an chanchin, inneih an tum thu rawn sawi tùra rawn kal pawh a ni maithei asin, bâkah, a țhian hlui kha ka ni ve tho a, Lungleia a haw tùr a rawn pêng kãwi zawk a ni ngei ang.

Naute lah chuan a ke nâ a han hlîm chu hmuhnawm an lo ti khawp mai a, zahthlâk hian! Ka en ve châk viau a; mahse, ka insûm. Kan inbiak hun tùr mawlh mai ka lo ngaihtuah lâwk, sawi tùr lo ngaihtuah char char a ngai, chhàn lêt dàn tùr ka haihchham viau loh nân.

Ngaihdam dìl erawh ka thupui ber tùr a ni ang chu.

Zanriah kan ei a, a ei tam lo khawp mai. A ei a la tui lo pawh a ni mahna, la dam țha si lo hi eng ti tùrin nge maw a rawn kal rêng rêng ni? Amahin awm dâwn se, a la chhe țha thei si lo. A timak tak tak!

Nunoi chu zaikhâwmnaah a kal a, naute pahnih pawh an chhuak ve nghâl. Kei erawh chu ka la zaikhâwm ve miah lo! Ka phûr lo lutuk a, bâkah, zàikhâwm hi ka peih loh chi tak a nia. Ka nu leh pa an kal pawhin inah ka lo awm hmiah, kumin hi chu ka peih thlâwt lo a ni.

"I zaikhâwm ve dâwn nange?"

"Aw, dâwn lo."

Ka nuin thingpui a rawn pe a, pâwnah chhang chhùmin a chhuak leh nghâl daih. Ka pa lah țhenawm putar kanin a chhuak tawh bawk a, kan pahnihin kan awm ta ràn mai.

"Ka rawn kal vàng hi a ni em?"

"Ni lo ve, kumin chu ka phûr lo va."

Kan ngawi leh rih.

"Eng nge i lo tih dâwn?" ka ti ta a.

"Min ngai ve miah lo em ni?"

A zawhna vàng chuan ka en phei a, a kut na lo lam chuan a khabe hmul chu a lo tuai nauh nauh a, min lo en kur bawk a.

"I la dam țha si lo va, inah i awm ka ring asin," ka ti phawt a, chutah," A pawi ka ti takzet, ngawi rih lawk, min sawi zawhtîr phawt rawh. I chunga thil thleng kha pawi ka ti takzet zet a, min ngaidam hrâm tùrin ka ngèn bawk che. Ka kuang lo ka nawr a ni tih ka hria; mahse, thil pawi tùr chu a thleng vek tawh si. Hetia i dam chhuak leh hi a làwmawm takzet a ni," ka ti chhuak a, min lo dan chah a tumna pawh chu engah mah ka ngaihsak duh lo va, ka sawi lui zêl a ni.

"I sawi zo tawh em?"

Thaw huaiin," Ngaihdam harsa min tih pawhin ka hre thiam tho che a nia; mahse, ka sawi i hriat pawh hian a zia ka ti tawh tho tho, a chhan chu ngaihdam ka dìlna i hre tawh si a," ka ti leh a.

"Chuan?"

"Min la rawn tlawh duh hi ka lâwm a, țhian kan lo nih tawhna zawng zawngah khân làwmthu ka hrilh bawk che-"

"Țhian kan nih chuan engati nge min rawn kan miah si loh?"

Sawi mai tùr ka va hre lo ve!

"School lamah ka buai ve êm a," ka ti ta ringawt.

"Ka harh chhuah veleha hmuh hmasak ber atân ka duh i hria em?"

Ka hre lo, Rose-i emaw a chhûngte, a nu emaw Zorini emaw a niang.

"Khua a vawt si a, i kut leh i ke chu a hrehawm viau lo maw?"

"Aw, hrehawm."

Leh hmiah mai a, a zêp lo ve hle mai.

Ka tho chhuak a, tuilum ip charge theih kan neih chu ka va la chhuak a, current-ah chuan ka charge a.

"I hmang dâwn nia, kan in phei hi chu a vawt teh mai a nia."

"Ka rawn phei chhan hi i hria em?"

Ka nu a rawn luh leh tawh avàngin ka huai deuh ringawt. A sawi duh tê chauh a sawi a, zawhna min zâwt char char mai a, chhàn dàn tùr lah hriat a har si.

"I haw phei leh thuai ang chu tiraw?" ka ti ve ta thung a.

"Ka tih tùr ka zawh fel hma theih chuan."

Hm, hna bawk a nih chu, heti chung hi chuan thawk lo se ka duhpui asin le, a taksain a tawrh phah mai mai ang; mahse, lo sawi ve tùr ka nei lo.

"I inuluk viau a ngai asin."

"Min ngaihtuah ve deuh tihna a ni thei em?" A țawng dàn chu a ngeiawm lek lek.

"I la damkawr hle si a, i indim thiam a ngai."

Tuilum ip chu a so tawh avàngin ka off a, va pein," Kha, hei hian i bân emaw i ke emaw kha dep rawh, a lum chuan a nâ kha a ziaawm deuh thei ang," ka tih chuan ka nu chuan," Engtizia nge, a ruh a na zual deuh em ni?" a rawn ti vat a.

"A, a tiziaawm thei deuh ang ka ti a," ka lo ti ringawt, ani lahin chhàn a tum mang si lo va.

"E, sikri ka lo chhèmsak ang che u, chhang ka chhumnaah meiling a tam alawm," tiin a chhuak leh ta nghâl a.

"Nupui neih ka tum a."

A thil sawiin min țhàwnzia chuh! Ka lo rin lâwk tho mah ni se min han den meuh chuan lo rin lâwk tih kha a awm thei lo!

"A țha...ka lawmpui...che u." Thinlung taka lawmpui chu a har khawp mai, Rose-i chu  a vànnei e; mahse, a lo nghâk rei ve tawh a, hetia a lo dam chhuah theih tâkah chuan ti rum rum tùr an ni rêng a ni, ka hre thiam reng mai.

"Min lawmpui tak tak maw?"

"Aw, lâwmte chu inlawmpui tùr alawm," tiin ka nui sak a, ka mangan nuih a ni zâwk mah.

"I inpeih tawh em?"

"Eng?"

"Pasal neih."

Ka nui hak a," Peih leh peih lo tùr pawhin ka hmu zo ve nâng," ka ti a, ka rilru chhûngril chu a rûm vawng vawng.

A ngawi vang vang a, a hnu deuhah chuan," Min nei rawh," a rawn ti chhuak thûm dût a.

A fiamthu thawh duh dàn chuh, nupui a nei dâwn reng a, min han fiam leh kher a.

"Ka pahrawn pawh ka hmu tawh bawk a..."

Kha chu Rose-i nèn inneih an tum vàng a nih kha. Ngaihdam dîl tùra ka tih ve kha chu, ka text a chhiar hnu ațangin kan inbe ta lo char char a nih kha. A thin a rim a, min be duh ta lo char char a ni.

"Rose-i kha hmeichhe lu zo tak leh chhe lo tak a ni a-"

"Ani chuan eng nge lo tel vena a neih a?" a lo ti nghut.

"Engkimah a buaipui che a, in inkâr pawh a țha tih ka hria. A sawi dàn-"

"Ka pahrawn ka hmu tawh, ka tih tùr ka hlen tawh bawk. Hmeichhe mahni thutiama ding țhìn i nih kha," a rawn ti leh ta dût mai.

A pa chu ka thil sawi vàng khân a va hmu tak tak tihna em ni? Chuan, engtin nge a lo tih? An inkâr chu a țhat phah em le? Ka hre châk zek zek, ka thil sawi vànga a va hmu tak tak a nih chuan...ka rei, ka thin a phu dup dup mai.

"Inngaihzàwn ka duh tawh lo, inneih ka duh. Ka nghâk rei tawh che."

Ka nu a rawn luh leh tawh avàngin ka chhâng thei lo, a tihchi phian. Chhàn dàn tùr ka hre dâwn si lo, min en kur reng bawk si a, ka lài leh viau tawh a ni.

"Chhang kan tùr  pawh a awm tak asin, han inai lum dar dar phawt ila kan kang dâwn nia," ka nu chuan a ti a.

"A tui viau ang chu!"

Ka nu chu a țhut ve tâk avàngin thil dang an sawi a, ka pa pawh a rawn ve thuai. A va kan ber chu a muhìl tawh a, a rawn haw ta daih a ni.

Ka pate nèn chuan an titi a, kei chu ka tho ta a, chhang kan tùr chu ka va buatsaih ta daih a. Kan pahnihin kan awm fâl ta lo, rei vak lo hnuah naute an rawn haw leh bawk a, an titi nak nak reng a.

"U Muanzuala chu, kan vêng nulahoin pà an ti râp mai che a nia, i hming pawh min zâwt sup sup," Nunoi chuan a ti leh pek a.

"Mi sual ka ang an ti a nih chu."

"Ang ve thei tho, ti ta daih ila i kut kha a hrehawm viau lo maw?" a ti leh a.

"Hrehawm viau lo ve. Dim a ngai deuh tih a ni mai."

"Inah khân nangmah chauh chuan i awm thei miah lo ang, i in chhohna step-ah pawh khân chhoh pawh i chho thei lo ang a?"

Nunoi tak hi chu aw...

Zàn mut hmunah chuan rilru leh tihtak zetin Pathian hnênah làwmthu ka sawi a, Muanzuala a tihdam vàngin leh ka țawngțaina a chhàn vàngin. Muanzuala chu ka ngaihtuah rilru khawp mai a,  a mu hrehawm viau ang em? Khua a vawt si a, a mu lum thei ang em? A kut leh ke kha a na viau ang em? A lo phei ta hi a inchhîr rum tum tawh ngei ang chu.

*Min lo pui lawk teh*

A message ka hmuh chuan ka tho vat. A che buai a ni ngei mai, lo kal miah lo tùr hi a ni asin.

Ka va luh chuan khumah a lo țhu, a kawr hâk chu a lo hlîp țha thei lo a lo ni a. Ka hlihsak a, a hnuai ber a tàwnzau erawh ka hlihsak lo.

"Ka kekawr pawh hi."

Ka hreh deuh hlek a; mahse, a hlîp thei lo va, ka pui ve ni maiah ka inchan lui tlat a.

"Boxer ka ha alawm, tîm suh."

"A vâwt ang em?"

"A vawt ka tih chuan ka bulah i lo mu dâwn tihna a ni em? A nih chuan, a vâwt viau ang ka ring." A va ngeiawm tak!

"I kut leh ke kha a nâ em?"

"Min riahpui dawn em?"

"Ka zâwt hmasa che."

"Na hran lo. Chuan, zanin chu?" a ti leh a.

Ka en duh lo, a sawi awmzia ka hre khiau. Ka riahpui dâwn teuh lo, fiamthu mah ni se a ti zahthlâk ngeiawm thiam ka ti.

"A hrehawm i tih chuan sawi hreh suh."

Ani thung chuan," Min nei ang tiraw?" a ti leh daih.

"Dam chiang phawt rawh." Hei hi tun atân chuan hnialna atân a ţha rih.

"Ka harh veleh khân hmuh hmasak ber che ka inring a; mahse, ka lo phût sâng mah mah a ni ang. Ka chanchin i rawn ngaihven duh lo erawh kha a mak ka ti, ni tin ka lo ngaichâng reng țhìn che a. I hmel ka hmuh theih loh tal pawhin min rawn call ang tiin; mahse, hmuh tùr i awm si lo, ka tuar thei tawh ngang lo va, nâ leh zah pawh sawi thei lovin ka rawn pan tawp che a."

Rose-i thil sawi vàng kha a nia ani hi ka biak duh tâk loh, ka inthiar fihlìmsan a ni. Bâkah, a accident bulpui ber kha keimah vàngah ka puh tlat a, ka inthiam thei hlawl lo. Bâkah, Tea'n a chanchin hi chu min hrilh zêl bawk a, ka hre vek tho alawm.

"Bawihi phal lo chung ka rawn phei a, ka hmuh châk che avàng leh ka ngaih êm che avàngin-"

Tunah chuan ka insûm thei tawh lo, keimah zâwkin va hnaihchilhin a hmuiah ka va fâwp ta, a thil sawi zawng zawng chuan min hneh êm a, min tituiral vek a ni. Na chung chung leh a hmai khem nuan  pawh zahpui thei lovin min rawn pan a nih chuan țha taka lo dawngsawnga lo duat tùr ka ni lo em ni?

Eng mah kan sawi tawh lo, kan infâwp a, ka hlim êm avàngin ka mittui a lo hnâm leh tawh.

A kut na lo lam chuan ka hmai chu a chûl a, ka mittui pawh chu min tuaisak a.

"Min nei ang tiraw? Min hnial thei lo ang, ka phal hauh lo a nia," tiin duat takin ka sam chu a chûl a.

"Chutiang sawi nân chuan a la hma deuh rih lo maw?"

"Hma lo, ka putar țêp tawh a nia."

Kan nui leh rih. Kan țawng ring ngam tawh bawk si lo va, kan phun sep sep chauh.

"Mu tawh rawh."

"Ka mumang a ni ang tih ka hlau."

Kei pawh a ni ve tho. Inkham lo hle mah ila mut dun chi a ni mang si lo va, ka chhuahsan ta hrâm.

Sawi tùr leh zawh tùr ka va ngah tak! Mahse, rilru hlim takin kan mu thei tawh tal ang chu. Naktûk lamah ka zâwt țeuh ang.

*HMANGAIHNAIN ENGKIM A TUAR CHHUAK ȚHÌN*

☆A MAK!☆ - 33

By Dingdi Pachuau

Ka hlim êm avàngin ka mu țha thei lo, zîngah ka harh hma lutuk bawk. Ka mu deuh reng rèn ráwn phawt a, ka tho ta chauh. Ka thawh chuan ka nu a lo tho tawh, ani hi chu a tho hma thei hrim hrim.

Min lo hmuh chuan mak a tih hmel khawp mai. A àwm ve reng, ka tho hma viau ngai lo rêng a ni; mahse, ka mu peih tawh lo miau a.

"I mu țha thei nange?"

"Mu thei e, ka harh hma ve a nih hi."

"Chuti, țawngțai inkhâwmnaah ka'n kal ang e aw, inah lo awm la?"

Eirawng ka bâwl a, mi dang an lo thawh hnu chuan thingpuite ka lo siam a, rawng ka bàwl pawh chu ka chhunzawm zêl a.

"U Muanzuala hi a la tho lo elo? A va mu rei roh," Nunoi chuan ka beng bulah a rawn ti sar sar a.

Nia, a mu rei tawh phian. Ani hi a tho thei lo zâwk em ni? Nizànah pawh khân a mu tùr pawh puih a ngaih kha, amahin a tho thei lo a ni ngei ang.

Ni a chhuak uar tawh a, a lo la tho chuang lo. Ka ngaih a țhat loh avàngin a room kawngkhàr chu ka va kik ta ringawt.

"Lo lût rawh."

Kawngkhàr ka va hawn chuan khumah chuan a lo awm tawh bîk lo, a kawr hâk a lo tum mêk, kekawr chu a lo ha tawh.

"Morning, i buai em? I rawn tho chhuak thei lo a nih ka ring a," ka tih chuan a lo țhen sak a.

"Buai țêp, kawr hi hâk a har deuh a."

Ka hâktîr zawh chuan min kuah vawng vawngin làwmthu a sawi sup a, nuam ka lo ti leh viau.

"Kum thar chu ka hman ve i phal em?"

"Thawmhnaw hâk thlâk i lo ken hauh loh hi."

"Lungleiah a awm alawm."

Hrehawm a ti ang tih ka hlau, kan in chu a lo chènna leh chêttlatna hmun nèn a inang lo hle si a.

"Hrehawm i tih dâwn loh chuan."

"I bulah hrehawm ka ti ang maw?!"

Ka nui sak, a thil sawi chuan min tilâwm viau bawk. A hman ve duh phawt chuan hmang ve rawh se, a vawi khat hmanna a ni ang a, nuam pawh a lo ti ve phian maithei asin. Kei tak pawh hian nuam ka ti viau bawk ang chu.

Chaw ei khamah muangmarin a kut chu doctor-ten enkawl dàn tùr an hrilh angin ka enkawlsak a, exer ka lâktîr a ni deuh ber, ani lah chuan nuam a lo ti khawp mai.

"Hetianga min tihpui ziah chuan ka dam chak viau ang tih ka hre mai," a ti sup a.

"Hlawh ka neih loh chuan..."

"Eng zât nge i duh? Ka nunna hial pawh ka hlàn mai ang che."

Nui chung hian," Dam thuai thuai la, chu chu ka hlawh atân ka duh ber chu a ni mai," ka ti a.

A bânpuamah chuan khuavàng lian vak lo, dum bial kal mai leh fiah zet hi ka hmu a, chùlsakin," A va mawi reuh!" ka ti sap a.

"Kha lo pawh kha ka la nei nual, e taka, ka khuavàng awmnate chu i hriat vek tak kha."

Hmâna kan inbiakna, Paul-a emaw ka tih tlat laia ka thil sawi kha a lo la hre reng a nih hi!

"Ka hre tak tak teuh lo, Paul-a emaw ka tih vàng che a nih kha."

"Țhuama kha maw?"

Bu nghat pahin," Aw...ani nèn khân kan inhnial peih ve a. Aizawl lam mi ve tho a nia, tihian Lunglei pa a ni ve ta mai sia," ka ti leh a.

"Kei pawh ka ni țêp tawh."

Chulam chu ka la sawipui duh rih lo. Tunah pawh a la dam țha lo a nia, a dam țhat ver vawr hnuah chauh ngaihtuah chi.

A ke lam erawh chu ka tihpui lo, a bân chu ka chai tâwk viau.

Chhùn thingpui kan in a, zochhangban kan leh chhum kan hmeh a, ka ngainat avàngin ka nu hian a ngaihtuah hrâm hrâm țhìn.

"A tui i ti em? I ei ve țhìn tho ang chu tiraw?" tiin ka nu chuan a zâwt a.

"Vawi khat chu ka ei ve tawh, chutih lai chuan tui ka ti lêm lo; mahse, hei chu a tui ka ti khawp mai," a lo ti a.

"Dâwt i sawi chiang," ka lo ti a.

Min rawn en nghâl vat a, kei chuan," Kan ta a nih vàngin tui i tider," ka lo ti a.

"A tui ka ti tak tak, ka ei țeuh tawh hi."

Chawhnu lamah erawh pangpâr tui pêk ka buaipui a, ka rose phun ve pawh kha ka pe ve leh, ka en chiang a, lo chawr a tum ve tawh niin!

"Yes, a chawr dâwn!" tiin ka au vak a.

"Min tihphut țêp chu le!" Ka bul maiah a lo ding tawh niin," En la, hei a chawr tawh dâwn," tiin ka kawhhmuh nghâl vat a.

"Eng pangpâr maw?"

"Rose senduk a nia, mawi deuh mai maw le," ka lo ti a.

"Pangpâr i làwm ta viau chu a làwmawm e," a lo ti duh lek chauh a.

"Nia, rilru a tidang ve thei khawp mai."  Ka ngainat êm êm ka hre lo; mahse, ka rilru kal ding lutuk leh thil ngaihtuah nasa lutuk tùr vèn nân ka buaipui ve mai kha a ni a, tunah chuan ka peih ve ta viau.

Zanriah ei hma deuh hlekin hun thâwl kan nei thei a, ka zawh châk êm êm a accident dàn chu ka zâwt ta a, Zorini'n a accident dànah rinhlelh deuh a neih erawh kha chu ka sawi chhuak lo.

Ani erawh chuan min en vang vang pah hian," Ka bike-in ka che sual. Ka tlân chak ve deuh a," a ti ringawt.

"Ka awih lo."

"I thu thu le."

Lungawi lo deuh chuan ka melh rùn rún a, thu dik chu min hrilh ve mai se.

"Bawihi pawhin min zâwt ve tho asin."

A nih ka ring; mahse, Muanzuala hian a sawi duh hauh lo ang.

"I hrilh em?"

"Ka hrilh che ang tho hi ka hrilh."

Kha maw, a lo ring lo nasa ang chu, rinhlelhna neiin thil felhlel deuh kha a awmin a ring a nih kha.

Chhûngte mitmei vèn a la ngaih miau avàngin ka duh angin ka duat thei lo, bâkah, ka cheziaah pawh lang chhuak lo tùr berin ka awm tlat, mi sawisep nih ka duh lo. Tûn thlengin ka pa ka la hre lo va, chuvàngin mi sawi theiha awm hi chu pumpelh ka tum ve hrâm hrâm țhìn.

Lungleia a inah ka kalpui a, a thawmhnaw țhenkhat la tùrin. A in lo fai reng mai ka hmuh chuan," I awm loh chhûnga lo tifai tùr i chhawr a ni maw?" ka tih chuan a bu nghut a.

Ka seat-ah chuan ka țhu leh phawt a.

"Khati laia țhut kha chu i inhmeh ngawt mai, keimah chauha ka awm pawhin i țhu angin ka mitthla ziah a, ka be ziah bawk che."

 A thil sawi hi mak ka ti țhìn, thui tak tak hi a sawi ve duah ta mai, hmasaâwnna ropui tak niin ka ngai.

"Vawiin chu min duat ka ngai, ka na țhûm mai."

Ka nuih tak nain ka khawngaih, step chhoa a kal kha harsa a ti ngawt ang,  a sawi chhuak hauh lo nain a ke, la khawng deuh tlat tân chuan a harsa dâwn lutuk.

Duat tak chuan mitmei vèn nei hauh lovin ka malis a, ka malis ka ti tak nain kan induat tawn a ni zaw mah. Kan taksa a insi chêt reng a, ka kal sawn a phal lo. A pangchan theih hun lai a nih vàngin ka hnial bîk lo, nuam ka ti ve tho a!

A thawmhnaw la tùr ringawta kal kan ni bawk a, tih tùr dang awm hek lo le, a inah chuan kan awm reng. Khua a vawh avàngin coffee tui tâwk a siam a, keiin ka lo pui bawk a, tu dang mah kan ngai lo.

"Kum thar veleh palai ka lo tîr dâwn aw."

"A hma deuh lo maw? Dam chiang phawt la?"

"Ka dam lo min enkawl i huphurh-"

A hmui ka hupsak vat.

"Chutiang lam chuan sawi lo teh, i dam țhat loh chuan hrehawm ka ti asin. Step-a i kal chho ka hmuh ringawt pawhin hrehawm ka ti a, natna khuma i awm lai ka hmuh phei kha chuan..." ka ti a, ka ngawi ta daih. Ka sawi chhunzawm zêl chuan ka aw a làwi zo chhe vek mai ang, ka mittui pawh a lo hnai leh tawh bawk a, ka hawi sawn ta daih.

A kut na lo lam chuan ka biangah rawn dawmin amah en thei tùr chuan min kuai her a, ka mittui tling pam a hmuh chuan duat zet hian," Hey...shhh..." tiin a biang chuan ka biang a rawn sîktîr a.

"Ka va inhaw tak!" a ti ta sup a.

"Eng vàngin?" ka lo ti țiau thung a.

"I mittui ka tlâktîr a."

"Accident tawh miah suh, a hrehawmzia kha! I thi ang tih ka hlau asin," ka ti a, ka mittui chu ka biangah a luang thla ta zãih a.

"Aw le, ka tiam a che."

Sofa-ah chuan rem lo zetin kan mu a, AC a on vàngin a vawt hran lo. Ka kut chu a kawr chhûngah chuan ka zen lût a, a taksa chu ka chûl, a âwmbâwr laia eng emaw ni ka khawih fuh vàng chuan ka tàwp chawt a, ka en chhoh chuan min lo en kur tawh.

"Eng nge hei hi?"

"En mai la?"

Ka ensak chuan ka phu deuh zawk! Ser tharlâm zet hi a lo ni a, a ser thui phian bawk.

"Engtizia nge? Eng vàng nge ni a?" ka ti vat a.

"Ka accident-na kha."

Dìm têa chùlsak dà dáin," A la na em?" ka ti sap a.

"Na tawh lo."

"A dang a la awm em?"

"Ka hnungzângah."

A awm dàn chu a insiam rem a, a hnungzâng chu ka ensak leh. Hei phei chu a âwmbâwra ser aiin a la thui zâwk daih lehnghál! Ka râp deuh zâwk!

"A na àwm mang e!"

"A na tawh lo."

Dìm têa amah tihnat hlau tak chung si chuan a zangthal tùr chu ka lo pui a, ngun zetin kan inmelh dùn kar a.

Lainat zet hian," A na tawh lo va, a tihzia takzet. Tawrh țhen ve theih ni se chuan ka tawrhsak chiang ngawt ang che," ka ti a.

"I tawrh ve ka phal hauh lo," a lo ti thung a.

Kûn hniamin a hmuiah ka fâwp a, a biang hmul deh chu nuam ka ti tlat pek a! Fawh zawk tum chauh ka ni na a; mahse, lu kàn meuha min rawn chhàn avàngin ka tàwp mai thei ta lo.

Duhthawh takin kan infâwp a, kan rilru kan inhriatsak tawh bawk a, vènthàwn tùr awm lo bawk nèn, kan tàwp hlei thei lo.

"Ka mamawh takzet che a ni," min fawh kârlakah chuan a ti sup a, ka hmai leh nghâwngte chu fâwpin a thâwkkhum lum hak hak bawk a.

Kei pawh 'engtin emaw ni' ka awm, ka sawi fiah thiam chiah lo. A fawh nawmna zùn chuan min chiah a, men pawh ka meng phal lo, ka thinphu a rang a, ka thâ pawh chhûngril lamah a khùr dar dar bawk, ka dang lah chu a la ro êm êm zui.

"Kei...pawh."

Ka aw chu a thâm chhawlh a, a làwi chhe vek bawk. Ka aw a ni lo hial emaw ka ti alawm le! Ami fawhna chuan min tidanglam hneh hle mai!

"Mahse, kan chesual thei lo ang aw."

A nui hawk, a mangan nuih a ang!

"Ka mamawh êm che asin," a ti thâm sup. A kut na lo lam chuan ka taksa a chùl chu a la tàwp duh chuang lo.

Kan insùm a ngai tih ka hria, kan insùm loh hlauh chuan kan chunga thil thleng tùr chu ka hre chiang khawp mai, a kut leh a kein a nat belh ngei bawk ang!

Ka chhia leh țha hriatna a fìm lai tak chuan ka tho ta thuai. Amah pawh ka en ngam lo, ka hmelhmai leh mitmeng leh sam zawng zawngte, ka lang mak khawp ang.

"Min thlahlel ve nange?" a rawn ti chhuak hawk a.

Kal sawnin," Kan chesual thei lo alawm, Pathian duh loh zawng a nia," ka ti sap a, tui ka va in țeuh ringawt.

"Min thlahlel miah lo a nih kha," a la ti fan.

"Inneih zànah le."

"A la rei si," a lo ti leh nghut. Mipa naupang luhlul, tihmawh deuh a ang.

Fiam ve rêng rêng ka châk a."A nih, kan innei lo mai dâwn em niang?" ka tih chuan na tak tuar ang maiin a lo rûm hawk, a kut nâ a lo tina leh palh emaw ni ka ti a, hlautháwng zetin ka en phei nghâl.

*MI DANG THIL TIH DIK LOH HI CHU LO HMUH ZUNG ZUNG A AWLSAM ÊM ÊM A, MAHNI THIL TIH DIK LOH ERAWH HMUH A HAR ÊM ÊM THUNG*

☆A MAK!☆ - 34

By Dingdi Pachuau

"I thil sawi kha...sût leh vat rawh!"

A hmelah chuan a rilru zawng zawng a chhiar theih vekin ka hria. Ka fiamna kha a lo a thu tak hle a nih hmel, a rilru a nat hmel ngawih ngawih.

"Ka fiam che a nih kha, ka ti tak tak lo," ka ti ta vat a.

Ngawi rengin ngun zet, mit khap lêk lo hian min en a, a hnu daihah chuan," Fiamthu pawhin sawi tawh suh!" a ti ta sup a.

"Ka fiamah che i lo ngaih ve tho ka ring a."

"I sawi tawh lo ang tih tiam rawh," a ti leh nghut a.

"Aw le, ka tiam e. Ka fiamthu tawh lo ang, ka ti tawh hauh lo ang," thu tak zet hian ka ti a.

"Lo kal teh!"

*******

Kum thar hlim takin kan hmang zo a, kum thar ka hman tawh azawnga nuam ka la tih ber a nih hial ka ring. Lehlamah Muanzuala taksa la dam chiang vak lo mah se, kan rilru a inhmu dùn a, chhûngte hmuh leh hriatah kan induh tawnna tilang chhuak chiam lo mah ila kan pahnih chuan kan inman dùn khawp a, an hriat lohin kan induat thei tho va, thianghlim lo leh Pathian duh loh zawngin kan awm tihna ni lovin. Țha lo taka hun hman dun ka duh lo tih a hre tawh a, a chêtziaah erawh han duhthawh viau țhìn mah se min tih luih emaw nawr luih emaw a tum bîk lo.

"Engtikah nge i haw phei ang?"

Pangpâr tui ka pe a, ka bulah a rawn tawlh ve hrut hrut. Nimin piah khân kum thar ruai kan țheh a, mi zînga awm nuam a tih loh ka rin vàngin a țheh ve duh ka ring lo a nia; mahse, min sâwm zâwk! A hnua a sawi dàn chuan amah vànga ka chhûngte bula dam leh hlim taka ruai ka țheh ve lo tùr chu a duh lo a ni àwm e.

"Engtikah nge Lungleiah i chhuk ang?" a ti daih thung.

"Ni 11-ah class kan țan dâwn a, chuti a nih chuan ni 9/10 tih vêlah a niang," ka ti a.

"Chumi hma chuan chhuk la?"

"Engah maw?"

"Mahni chauha lo awm chu a zahthlâk duh dâwn êm a," a tih chuan hawi lêt meuhin ka en a, a ina amah chauha lo awm chu a huphurh a nih chu! Min thlahlel ve tih hriat chu nuam duh tak a ni.

"Hetah la awm ve rih la, kan chhuk rual mai dâwn alawm," ka ti a.

A ngawi vung vung a, a ngaihtuah ve pawh a niang, a hnu deuhah chuan," Naktûkah ka chhuk ang," a ti ta daih a.

"I thu thu le!"

Naktûkah a chhuk tawh dâwn sia, kan inhmu lo leh rih dâwn a nih chu. Chhuk har ka lo tum sa chu ka ngei viau a ni, han tihhma leh chûk chûk pawh chu a ni mang meuh si lo.

Zanriah kîl laiin a chhuk dâwn tih chu ka sawi chuan ka pa chuan," I inthlahrung te hi a lo ni ang e, Bawihite chhuk hunah chhuk ve mai la?" a lo ti a.

"Thil chin fel ngai a awm a."

Eng thil tak ni ang maw? A dam lo rei tawh a, a buai viau maithei a ni.

Zànah a thawmhnaw ka siam felsak vek a,  chhuk ve mai tùrin min thlêm char char, hnial hrehawm ka tihzia chu a; mahse, hun rei a ni tawh lo va, ni hnih thum bãkin min dang tawh lo tih ka hrilh chuan a ngawi ve leh mai bawk a.

"Nunoite'n class an țan har deuh hlek dâwn sia, i lo chhuk hunah min rawn pan la?"

Engtin nge chûngte chu a lo hriat ni? Nia, Nunoite chu ni 15-ah daih class an țan dâwn, ani phei chu ni 14 zànah Lungleia chhukna tùr motor awm hlauh se a ti ngawt ang chu! A u Michael-a zùn hian a phuar hneh lutuk a, a training chhuah hmaa ngaihzawng neih tum rih lo mah se an inzui reng tho a, awmzia chu a awm tampui lo ve khawp chuan ka hria, keimah ang deuh chiah khân.

"Nia, ka rawn tlawh hmasa ber ang che."

A chhuk chu ka ngaihtuah takzet. A in pan chhohna step-a a kal chho tùr mawlh chu ka mitthla a, harsa a ti leh dâwn si. A thlan a tla leh țak țak ngei ang chu.

A thleng chho ve thei mai chu a nih hmel, min rawn video-call chuan a in chhûngah a lo awm daih tawh tlat! Ka thaw huai thei.

"Mahni chauha step chho kal kha a harsa viau lo maw?" ka ti a.

"Ka bulah kal angin ka ngai che a, a theih mai."

Ka nui var var a," A tihzia hlauh chu! Ngaihtuah pawh i ngaih loh chu a," ka tih chuan," Ngai," a lo ti nghâl vut a.

Eng eng emaw kan sawi hnu chuan," Zaninah palaite an lo kal dâwn a nia," a rawn ti ta.

Ka phu zawk mai! Ka hlim a, ka lâwm, ka thin a phu nasa bawk, a phu dawt dawt a ni zâwk.

"A va hma ve!"

"Kum thar tìr têah ka tih kha. Bâkah, zaninah lo kal ta se, a rem dâwn pawhin dâwn loh pawhin kâr khat hnuah chauh an rawn lêng leh thei dâwn asin, nghah rei a la ngaihzia chuh!" a ti sup sup a.

"Engati nge kâr khat hnuah chauh an lo lèn leh ang?"

"In chhûngte inràwn khâwm a ngai ve ang chu. 'Kan lo inrâwn ve phawt ang e' an ti țhìn alawm."

Hm, ka fing leh sawt e.

*******

Ka phûr viau a, ka huphurh tho bawk. A rûkin ka helhhawlh lutuk a, ka nute chu hrilh tùr nge hrilh loh tùr pawh ka hre lo, kan inngaizawng angin an ngai àwm si lo va, palai hmel an hmu thut mai dâwn si, mak an ti ngawt ang chu!

"Nu, zaninah lèn chhuah in tum ang em?" tiin ka zâwt a.

"Ka va hre lo ve, engati nge a?"

"A, ka ti deuh mai mai a nia, ka pa pawh a lêng lo ang tiraw?" ka ti leh a.

"Țhenawmte inah a lêng leh maithei..."

Lêng lo hrâm se.

Hrilh ka duh si, ka hreh bawk si. Hreh rilru zet hian ka tàwi ka tàwi phawt a, ka nu chuan min rawn en zawk a, a hawi sawn leh nghâl daih a.

"Eng nge ni a?"

"Nu..." ka ti phawt a, ka ngawi leh rèn ráwn phawt a, thih leh thih tiin," Zaninah Muanzuala palaite an rawn kal dâwn a, ka pa chu lèntîr lo la?" ka ti ta ngê ngê a, ka sawi zo chu ka hmai a sa pup pupin ka hria.

Ka nu chuan inher meuhin min rawn en a, ka zak kher mai.

"A nih tak chu, ka lo hrilh ang e," a tih tâkah chuan chuan ka thaw huai.

 Zanriah kan ei kham deuh chiah tihah chuan zàn danga lo lêng ngai hlei lo Pu Hlîra a rawn lêng ta tlat, ka pa dam loh lai vêl kha chuan a rawn kal ve zauh zauh, kan țhenawm piah piah lehah a awm a, parawl a ni nghe nghe.

Hrehawm ka lo ti khawp mai a; mahse, rei a lêng lo hlauh. Palai tùrte niàwm tak an lo luh hnuah a chhuak ve nghâl mai, ka thaw huai.

An thu sawi chu hriat ka châk a, ka zak bawk si, vànneihthlâk takin Nunoi a chhuak lo hlauh. Aniin thingpuite a lumsak vek a, kei chu room-ah ka tawm thung.

Min rawn kohtîr a, palaite chuan min hmuh ve hrim hrim an duh a lo ni a! Zak rilru tak chuan ka chhuak a, nichîna an lo luh lai khân ka lo en chiang lo va, bâkah, hnunglam leh sîr zawnga hmu ka nih vàngin ka lo hre lo, ka thawhna Principal a lo tel ve niin!

"Min hre duh lo der vêl a," tiin min lo fiam zui.

"Sir, ka hre miah lo che!"

"Nangmah hi i nih ka lo ring pha miah hlei nem! A țha e, school țan tawh a châkawm khawp mai," a tih leh chuan zak takin ka nui, ka lai chhe ngawt bawk ang chu.

An haw leh nghâl dawn a nih chu!

An motor thleng kan thlah a, ina kan luh hnu chuan ka nu chuan," I țhianpa mai mai emaw ka ti a," a ti țan nghâl a.

"Ni deuh tho, kum 5 zet min nghâk tawh a," ka ti sap a.

"Engtia kum 5 maw?" Hei chu ka pa ve thung a ni.

"Ngaihzawng nei tùrin maw le, khâng kum nga liam ta chhûng kha min nghâk char char a."

Ka nute chu an inen a, an ngawih deuh reng hnuah ka pa chuan," A duh viau che a nih dâwn chu, in induh tawn chuan a țha alawm, pasal neih i duh phawt chuan kan dang hauh lo ang che," a ti leh a.

Ka nu thung chuan," Eng nge an chhûngkaw dinhmunte?" a ti a.

"Amahin a awm a..."

"Nu leh pa a la nei em?"

"Nu a la nei, a pa erawh chu a thi tawh a, pahrawn leh nau pahnih a nei."

'Pahrawn' tih ka sawi lai chuan nuam lo ka ti rilru khawp mai; mahse, a ni miau bawk si a.

"Mi tih dàn angin chhûngte kan han inrâwn khâwm ve ang a," ka pa chuan a ti ta ngei a.

Mutnaah min rawn phone.

"I chhûngte chu an thinrim hmel em?"

"Thinrim àwm pawh ka hre lo," ka tih chuan," Mâkpa atân chuan min iai mai ang a?" a ti leh a.

"Engvàngin maw?"

"Sual hmel min tih ka ring tlat," a tih chuan ka nui hak a.

"I sual chuang hlei nem. E taka, ka thawhna Principal kha, a rawn kal ve ka ring pha miah lo va, min la fiam zui, school kal pawh ka huphurh zo vek," ka ti sap sap a.

"Ka lo hau dâwn em niang?"

Palai rawn kal leh hmain Lungleiah ka chhuk ve ta, kan in luaha tlang ka duh viau nain kawngah min lo châng sia, ani ke bâi meuhin min lo hmuak a ni a, ka kalsan thei lo.

Kan han awm dùn rèn ráwn a, nuam kan ti dùn khawp. Zàna ka haw a phal si lo va, ka riak ta ringawt; mahse, kan che sual hauh lo. A bulah pawh ka mu lo.

"Min hlau a ni maw?"

"Aw, hlau deuh."

"Engtin mah ka khawih thei lo che, ka kut leh ke a nat hi," a tih chuan," Aih, engtin tin emaw tih dàn a awm ziah an ti," ka tih chuan a nui huk a.

"An ti ve mai mai a nih chu."

Khumah mu lovin sofa-ah kan mu ve ve, kan mutna chu inhnaih têin kan hûng rem a, inhma tawnin kan mu.

"Ih maw, thil ka zâwt che ang a, dik takin min chhâng rawh aw?" ka tih chuan min en rùn rún phawt a, a mit chuan 'aw' tih nân vawi khat a khap suk a.

"I pa hnêna ngaihdam i dìl chuan engtin nge a lo tih che?" ka ti a.

Mit khap hauh lo hian min en reng phawt a, a thin a rim ang a min chhâng dâwn tawh lo a niang ka tih hnuah chuan," A nui," a ti bung nghut a.

"Chu chauh chu maw?"

"A tel lo pawhin kan hlim thei chiang tiraw?" a ti leh daih a.

Chiang lehzuala hriat ka duh vàngin,"A nih, in inkâr chu a țha chuang lo tihna em ni?" ka la ti țâlh.

"I pa ang hi a ni ve lo, ka tân chuan pa a ni ve ngai lo ang."

A chiang ta kelh kawlh e.

School chu ka huphurh ang êm chu a lo ni lo. Principal chu staff room-ah a rawn kal lo va, ka chanchin chu tu mahin an hre lo ang,  ka thaw huai e.

Nunoi lo chhuk hma chu kan inah ka riak ta lo. A phal lo ve bawk sia, ka țang duh lo a ni. Amahin a che thei tak tak dâwn bawk si lo va, awmpui a lâk kha a ngai leh dâwn tho si a, ka awmpui ta mai. Zorini pawhin a rawn phone ãwl lo va, a u chu a ngaihtuah lo thei bîk nâng. A la dam țha chiangkuang si lo va, a àwm viau.

Palaite pawh ka nute chuan an lo chhâng țha khawp mai, Muanzuala'n inneih thuai a duh vàngin a hma thei ang berin a hun chu an ruat a, Feb 7-ah an ti a nih chu.

Zorini'n min rawn phone, a u hnênah ka number a dîl a nih ka ring. Min lawmpui thu a rawn sawi a, a aw chhuakah erawh a hlim hmel viau loha ka hriat ve ringawt chu a.

"Melo, ka u hi țha takin i enkawl ang tiraw? Ka ring tlat che a ni, hlim hi a phû ve tawh a, nang hian i tihlim thei ber tih pawh ka hria a ni," a rawn ti sap sap a.

"Min ring chu ka lâwm e. I u hi ka duh a, ani pawhin min thlahlel a, hlim taka siam ka lo tum ang," ka ti ve a.

"Nangmah chauh hi innghahna a neih i ni si a, Melo, kan chhûngkaw awm dàn chu i hriat kha, nang chauh hi ka u dinhmun chiang taka hretu i ni bawk. A dawhtheih loh deuh châng leh a thin a chhiat deuh châng pawhin lo dawh hrâm hrâm rawh la, a  rilru chhûngril khawharna leh natna hi tuam damsak tum hrâm ang che aw," a rawn ti leh malh malh a.

"Nang pawh i awm reng alawm, Zorin. I u a nia, i hmangaih a, ani pawhin a hmangaih êm che hi," ka tih chuan ani chuan," Ni lo, kei chuan pasal ka nei mai dâwn. Bâkah, pasal neih tawh chuan a hma ang khân ka buaipui thei tawh lo ang, tûn ațang chuan ka u hi ka hlàn tawh che. Ka ngaihtuah tho ang, ka hmangaih reng bawk ang," a lo ti leh a.

Ka birthday lawm nân zanriah chu a inah kan ei khâwm. Tea chu Aizawl lama a awm avàngin a lo kal thei lo. Chhùn lamah erawh school ka kal tho a, thawhpuite'n ka birthday a ni tih an lo hria a, gift min pe a, Principal pawhin min pe ve ngei bawk.

A kut leh ke pawh a zia sâwt khawp, amah pawhin a tum ve bawk a, motor pawh a khalh thei țêp tawh. A kut na lam chuan thil rit lo tê tê chu a chawi ngam ve tawh a, a la dìm a, a la hmang rim duh lo mai a ni. A ke pawh a bâi nasa tawh lo ve. Inneih hma ngeia dam a tum bawk a, a dam hman ngeiin ka ring.

"Kan inneihnaah chuan chhûngte dinpui tùr ka nei dâwnlo va, hrehawm i ti ang em?"

Makti tak hian ka en a, a pa leh a unaupa an lo lan theih loh pawhin a nu leh Zorini tal pawh an lo lang thei chuang lo ang maw?

"I nu leh Zorini pawh maw?"

"Ka sâwm lo hrim hrim, Bawihi erawh a rawn lang ngei ang."

An chhûngkaw awm dàn hi a va buaithlâk tak êm!

*MI DANG CHUNGAH THIL ȚHA TI LA, I NGAIHTUAH PHÂK LOHIN I HNÊNAH A LO LÊT LEH ANG*

☆A MAK!☆ - 35

By Dingdi Pachuau

"I nu a nihna angin hrilh ve tal la?"

"Bawihi'n a sawi ngei ang, chu chu a tâwk viau ka ti," a ti phawt a, chutah, ka kut rawn chelhin ka mitah chiang zet hian min en leh vang vang phawt a.

"Keimah chauh ka ni si a, i inchhîr em? Min la nei duh tho em?"

Ka en lêt kar a.

"Min chhâng la? Mawh.. I inchhîr tih chu sawi lul suh aw-"

A hmui chu ka hupsak ta vat a,"I chhûngte vànga neih tum che ka ni hlei nem, nangmah i nih vàng chiah a ni, sawi tawh miah suh, ka inchhîr hauh lo," ka ti ta kalh kalh a.

Nghet zetin min kuah a, min thlah phal tawh lo ang a tih tùr khawpa nghetin min kuah.

"Ka lâwm e, inchhîr ngai miah lo tùrin ka siam hlim ang che, ka tiam a che," a ti a, a thil sawi chuan mi tawk kher mai, rilru hlimnaa khatin min siam nghâl dêr tawh.

"Ka hlim sa daih tawh!"

He pa hi ka hmangaih a ni. Tea nèn khân kan inzui rei ve viau a, ka duh viau emaw ka ti; mahse, Muanzuala hi chu a dang hlak. Ka duh a, ka nihna ang angin min pawm a, ka harsatna hre thiamin min nghâk thei bawk, tunah phei chuan hei a nupui ka ni dâwn ta mai a nih hi, thil kal dàn hi a mak asin. Tea nèn kan nih lai khân a țhianpa țawngmawh zet leh min en rùn rún țhin Muanzuala nen hian kan innei ang tih ka ngaihtuah chhin eih lo chiang!

Ka duh a, ka hmangaih a, kan innei dâwn a ni.

Kan inneihniah a chhûngte (Zorini tih loh) an rawn lang dâwn lo chu a ni àwm si a, ka chhûngte'n engtin nge an ngaih ang? Mi dangte pawhin eng angin nge an ngaih ang? Ka ngai pawimawh ang em le?

A chhûngte ka nei dâwn lo va, amah hi ka nei dâwn, chu chu a pawimawh ber chu a ni. Ropui taka inneih kher pawh ka duh lo, ani pawhin a duh bîk lo. Kan tân ni pawimawh tak a ni ve ve dâwn a; mahse, ropui kher a ngai lo, kan rilru leh thinlung nghet taka a inzawma kan thutiamte kan vawn ngheh kha a pawimawh zâwk dâwn a ni.

Muanzualate chhûngkaw chanchin chu ka nu ka hrilh vek, a tìrah chuan a hre thiam lo khawp mai. A nu leh pa hmingte min zâwt thar leh, palaite khan an sawi tho chu ka ring a, a pa hming chu ka lo la hre miah lo zui! A chêt màwl theih viau mai.

Ka nu chu a rilru a hah a, a chhan chu upa ber ka ni a, a fate zînga kawppui nei hmasa ber tùr ka ni, a duhthusàm zâna min kaltîr a duh a ni. Sum leh pai kan nei tam lo va, mite chhawm angte min chhawmtîr a duh ve tho si a, keiin țûl lo ti ringawt mah ila ani ngaihah chuan a țûl miau si.

Muanzuala nèn kan sawi dùn tawh a, thil țûl lo keng lo tùrin min chah sa vek. Ka thawmhnaw hâkthlâk bâk a ngai lo tih min hrilh a; mahse, ka nu ngaihah chuan chutiang ringawt chu a ni thei lo, ka hrilh sateh a, awmzia a awm chuang lo.

Aizâwlah inneihna hun hman a ni. Ka chhûngte zawng zawng kalna tùrin bus 2 a hire a, ka thawhpuite erawh chuan ke an keng thung. Min țàwiawm țha khawp mai. An zârah ka mawi, Muanzuala pawhin țhiante chu a lo nei ve nual tho nia, bâkah, chhûngte pawh a nei țeuh. A nu leh pa leh unaupa kha an rawn tel ta em tih ka lo ngaihven ru deuh reng a, ka hmu miah lo; mahse, hawi vak vak ka hreh vàngin ka hmu lo pawh a ni thei tho bawk.

Kan inneihna chu a ropui lêm lo. Tea chu a țhianah a ding a, kei chu Nunoi'n min dinpui thung. Țhian kawm bîk tak ka nei si lo va, zawn kual ai chuan țha ka ti mai.

Inneih zànah a țhiante'n rei lo tê tak tak party an buatsaih a, țûl ti lo viau mah se a sawi chhuak lo. Ka rin aiin ka hmang nuam ve a, ka hlim bawk a, hah pawh ka hre lo.

Thlasik a la nih vàngin a la vawt a, zàn dâr 9-ah chuan inah awm leh tawhin làwițhat zàn kan hmang dâwn a ni. Ka huphurh a, ka nghâkhlel tho si, htehawm tihna ka neih rualin ka phûr ru tho bawk si.

Mu thei tùra kan inpeih hnuah chuan kawng a kalh a, keiin light ka lo off ve mêk bawk a, ka inrin hmain min rawn pawm nawlh, ka lo țê țhat a. A kut kha a nat kha..

"Zanin hi ka nghâkhlel hle a ni," tiin a room ni țhìn, a hma pawha min riahtîr tawhna lam chu min panpui a.

"I kut nâ kha..."

"Zanin atân chuan a dam tawh."

Ka hlauhthàwnpui tehrêng nèn, a zia hlauh. Ka nuih sak a, a nghâwngah ka kut pahnihin ka kuah ve nghâl bawk a.

"A mak e tiraw? Ka pasal niin i nupui ka ni ta a nia!"

Kawngkhàr chu a dàrin a nêk hawng a, min luhpui hnuah a kein a tlawh khâr leh chiah bawk a.

"Mak lo, Țhianpa nèn in nih lai ațang tawh khân neih che hi ka lo tum daih tawh."

Makti zetin ka en a, khatih lai khân min lo duh tawh tihna em ni? Min melh rùn ringawt zêl a nih kha.

"Min tiphu zawk a nia!"

Dìm zetin khumah chuan min nghat a, a nghâwnga ka kuah tlat avàngin ani pawh chu a rawn kûn hniam ve zêl a.

"Zàn chhinchhiah tlâk, kan pahniha kan theihnghilh theih ngai loh tùr a nih hi."

Ka hmuiah min fâwp a, kei pawhin rang zetin ka chhâng lêt. Chutah, ka tàwp leh thut, thil ka hre chhuak zawk a. Ka nuin thil min chah kha, inneih zànah țawngțai ngei ngei tùrin min chah lawm lawm a ni.

"Bathroom-ah ka'n kal leh lawk," tiin ka tho chhuak ta nghâl a. Amah pawh ka en ngam lo, mak min ti dâwn si.

Rei ka țawngțai lo, làwmthu sawina ka nei a, kan hun leh keimahni A kutah ka inkawltîr. Rilru leh tih takzeta țawngțai erawh ka tum nasa, a har ngang mai; mahse, ka thei hrâm.

Kawngka a rawn ri, ka meng chhuak chiah bawk.

Ka chhuak chu mitmeng hriat thiam har zet hian min lo en reng a, ka nuih sak a," Ka țawngțai lawk a," ka ti sap a.

"I ti țha e."

Kan innei a, nupa kan ni tawh, Pathian hmaah leh kan chhûngte, țhen leh rualte hmaah thu pawh kan tiam thlap, nupa nun pawh kan chèn thei tawh alawm.

Ka huphurh ang êm chu a ni ta lo ve.

Che lova ngawi renga min kuah hle hle hnuah chuan," Ka lâwm e aw, ka pasal i ni hi ka lâwm hle a ni," ka ti thâm chhalh a, ka hrawk lah chu a ro viau mai.

"Kei pawh le."

Tho leh rihin tui in tùr noin min rawn pe a, ka in khalh khalh, ka dang a ro êm a ni, ka tui a hãl bawk a.

Kan mut leh hnuah chuan a hnung ser chu ka chùlsak riak riak a, light kan off loh avàngin a hmel pawh chiang takin ka la hmu thei.

"Helai hliam i neih lai hian a na viau ang tiraw?"

Ka chal chu a fâwp zauh phawt a, chutah, a chil lem leh khalhin," Nâ e, ka harh chhuah leh pawha a nâ ka hriat hmasak ber pawh a ni," a ti sup a.

"I accident-na kha tiraw? Engtiang chiahin nge i tauh nat a?"

"Vuakna a ni zâwk."

A taksa țang khawng at avàng chuan a hnung ka chùlna chu ka tawp chat a, ngaihțha lo zet hian ka en chho nghâl bawk a.

"Eng vuakna? Tuin nge vua che a?"

Min rawn en chhuk a, ngun zeta min en vang vang hnuah chuan a taksa țang khawng tlat pawh chuan a thlah dul ta deuh hret hretin ka hria.

"Nakinah ka la hrilh vek ang che," tiin a kut lian zet chuan ka hmai a rawn chûl a.

"Vawiin khân i chhiat lohzia kha, ka la hrilh miah lo che tiraw? Vawiin ai mah khân zanina khuma i mut hian i chhe lo zâwkin ka hria," a ti ve ngei.

Min fak, chhe lo min ti!

"Nang pawh i chhe lo tho, ka mumang emaw ka ti rum rum asin," ka lo ti ve a.

"Mumang atân chuan ka phal hauh lo, thil dang zawng aiin ka duh ber che," tiin a rawn kûn hniam a. A hmui zei zet chuan chin lêm nei lo ni áwm fahran hian min rawn fâwp tàwn táwn a.

Kan boruak chu a hma ang bawka 'hot' a ni leh ta.

A hnu deuhah chuan ka chau, ka mut a chhuak lutuk, men pawh ka meng lui thei tawh lo.

Kâr khat chhûng chu chawlh ka la. Rei lo a ti viau nain min sawisêl lo. Bâkah, matric exam a hnai tawh a, chawlh lâk rei pawh naupangin an tawrh phah thei a, chu chu ka duh lo.

Kâr khat nuam ber hun kan hmang. Min duat a, ka duat bawk a, kan induhna kan lantîr a, kan inning lo va, mamawh kan inpe tawn reng bawk. Hlim tak chuan min siam chiang alawm, pâwn lam miin min rawn tibuai lo viau bawk. Phone call erawh a chhàn loh theih bîk loh a, kan pahnih chauhin kan inawm heuh heuh a ni ber mai.

"Nau pai nghâl la tiraw?"

Naute a awt a nih ka ring. Naute a'n pawma a han chhaih vêl tùr chu ka mitthla chhin a, a inhmeh dâwn lo riauin ka hre tlat pek a!

"I va duh hma."

"Hma hlei nem. Kum 30 i tling tawh a nia, kei lah ka upa tâwk tawh bawk a. Fa neih chu a hun nghâl viau a ni, kan pahniha fa chu ka hmangaih dâwn asin, nangmah ang deuh hmeichhe naupang ni nghe nghe se," a ti duah a.

"Mipa i awt lo maw?!!!"

Mipa chuan mipa fa an awt vek tùrah ka lo ngai a!

"Awt ve ve, ka duh ve ve ang."

Eirawng ka bâwl chu min lo pui ve a, ka kal sawn hlekin min lo zui ve nghâl zêl, min si deuh chêt reng a ni mai.

"Kan bâwl sâwt àwm lo mang e!" Nui chung hian ka ti a, min thlahlel êm êma min zui chawt chu nuam ka ti êm êm tho.

"Bàwl ai chuan mut ka duh mah."

A bânah chuan ka sik sawk a.

"Chaw ei lova mut i duh maw?"

"I lo mut ve dâwn chuan."

Ka nui hak a," Phakar ve siah!" ka ti zauh a.

"Thawmhnaw chhah deuh hi chu inbel tawh lo la?"

"A vâwt alawm."

"Min hrem i tum a nih ka ring zâwk!"

"Eng vàng ngawtin maw?"

"Ka hnê thei si lo che a."

Ka thil ken lai chu dahin làwmthu sawi nân a biangah ka fawhsak a.

"Ka lâwm e, siam thuai thuai zâwk ila? Chuan, min kuah lum thei zâwk ang a, thawmhnaw chhah pawh inbel a ngai lo mai dâwn alawm," ka tih chuan nui suk hian," Fing reuh!" a ti sup a.

"Mihring dam chhan chu ei hi a nia, ei tùr țha taka ei loh chuan kan chaurau mai dâwn asin, nang phei chu i mamawh nasa," ka ti a.

"Țantu ka nih ziah vàng maw?"

Ka sen țâwn țâwnin ka ring. A thil sawi chu ka sawi chhuah chhan a ni lo, chutiang lama a ngaih ka lo ring pha hauh lo.

Lunglei kan phei dâwn zànah chuan zanriah kan ei kham chu sitting room-a sofa-ah chuan innghèng rialin kan țhu dùn a, thei kan ei a.

"Thei i ngaina țan riau."

"Ka period țêp tawh vàng a niang."

"Chu, kan la siam hlawhtling lo tihna a ni maw?" a tih chuan a kuta sik hlawkin," A la rei lo lutuk! Chutin a insiam nghâl chûk chûk thei bîk lo," ka ti a.

"Țan lâk nasat a la ngai a nih chu!"

Meng sawr sawr pah hian a nui suk a, ka kut chu lain a fâwp zauh a.

"Kan țan leh tawh mai dàwn em niang?"

A fiamthu tih ka hre ve tho. Ka rilruah erawh thil dang a rawn lût thut, a beka ser ka hmuh vàng a nia.

"Min hrilh tùr kha min hrilh tawh la?" Tiin a biang chu ka chùlsak a, ser awm deuh thliah thliah chu ka chûl bawk a.

"Ser chungchâng kha maw?"

"Aw, vuakna chungchâng kha," tiin ngun zet hian ka melh chho kar a.

A thaw huai phawt a, chutah," Ka accident chhan kha ka chêtsual vàng a ni lo, bike-a chesual ang thei ber tùra chêtsualtîr ka ni zâwk," a ti chhuak ta sup a.

A ngaihna ka hre lo lutuk a, ka meng kàw káwin ka ring!

"Engati?!!"

"Sawisak ka nih hnuah ka bike nèn kawng thlangah min nawr liam a ni."

"Tuin?"

"Min sawisatute'n maw le. Tuma bulah ka la sawi chhuak lo a nia, ka chhui chhuak vek lo nain anmahni chu ka hre vek tawh e."

Mit khap lovin ka en kar, dâwt a sawi ka ring si lo; mahse, engati nge an sawisak le? An pawi a sawi em ni? A țawng tlêm sia, ngêng an tih vàngin an intithinrim a ni maithei.

"I hriat zawng an ni em?"

"Ni lo; mahse, ka hre vek tawh."

"Engati nge an sawisak ringawt che le?" ka tih chuan," Pawisa vàng maw le, tîrtu an awm a," a ti leh mai a.

Chûngte thleng chuan a hre chhuak vek tawh maw? A va mak leh zêl ve!

*HLAWHTLINNA HI BEIH FAT FATNA CHHUNZAWM ZÊL RAH CHHUAK A NI*

SHARE

Comments



Sangtei Colney15 November 2019 at 23:40

Laklawh thei😢😢😢

REPLYDELETE

Post a Comment

Archive

Report Abuse

 Powered by Blogger