☆LAIRIL LUAHTU☆ - 10 By Dingdi Pachuau

 ☆LAIRIL LUAHTU☆ - 10 By Dingdi Pachuau

A hnuah phei chuan ka nu pawhin a hre thawi leh ta a, a hriat ka duh rih loh avàngin Tatei chu ka'n vau ve nasa thei khawp mai a; mahse, ani lah chuan min hlau lo nasa, min vau lët khar khar zâwk țhin! 

Zan khat chu ka room-ah rawn lûtin," U, Zorina kha i duh ve tak tak em? A aw a nalh vàng ringawt khân em ni i duh?" tiin min rawn zâwt khauh mai a.

"I țawng ring lutuk!" tiin ka lo khap vat a, kawng khãr nghâlin," Chumi min zâwt tùr chuan maw i rawn luh a?" tiin ka zâwt lët a, ani chuan," Aw, ni tho e, i duh tak tak ka ring thei lo a," a ti leh a.

"Engah nge ka duh loh ang?" tiin ka en lët kal a, ani pawh chuan chiang zeta min en vein," A aw avàng ringawt chuan i kawp rei thei dâwn chuang si lo va, in inkawp rei hma hian ințhen daih r'u ka lo tia, in inkawp rei theih pawh ka ring lo bawk a," a ti duah a.

"A aw avàng ringawtin ka ngaizâwng lo aw, kan pahnihin kan induh tawn," ka lo ti vat a. A ni rêng a, a aw avàng ringawt chuan ka duh a ni bîk lo, amah pawh ka duh tel miau a ni.

"I sawi dànin chhûngkaw mumal pawh a nei si lo va, lo innei dâwn ta ula ka pate'n an phal pawh ka ring lo," a tih leh chuan ka nuih a za ngang mai, inneih lam hi chu ka la ngaihtuah phâk tlat lo!

"I sawi hla lutuk!" ka ti leh a, ani lah chuan," Chutiang a ni ngawt lo, i ngaihzâwng lo chu pasalah neih i duh nâng, pasala i duh ngei tùr ngaihzâwng nei ang che," a ti leh a, he nu të hi min zilh ve deuh tihna em maw ni le? A sawi dik phian bawk si a, min tidang țëp a ni.

Kan exam a, ka tițha ve thawkhat chuan ka hria. Krismas boruakin min chiah tawh nain ka thêngthãwngah a thawk ve meuh lo va, a vànneihthlâk thei țhin. Ka rin loh deuhin Zorina pawhin țha taka ti tùrin min rawn fuih ve nasa mai a, tlawh pawh min rawn tlawh duh lo, min rawn tlawh chuan amah hmu tùrin lehkha zir lova ka chhuah a ngai dâwn si a, chu chu a duh lo a ni.

Exam zawh hnu lamah erawh chuan a rawn lang rang khawp mai. Kei pawh ka free tawh a, hmun danga inhmuh ai chuan tiin kan ina lo kal mai tùrin ka ti a, ani erawh chuan a hreh hmel kher mai.

"Hreh mah ta che, Tatei phei chuan a hmuh tawh che kha, tunah phei chuan inah awm pawh an awm lo, hreh miah suh," ka ti ve ngial a.

A rawn kal ve ta ngei a, vawiin phei chu ka hmu hmelțha viau a ni, ka lo ngaih tawh viau vàng pawh a ni maithei, kei pawh ina awm mai mai ni mah ila a lo kal dâwn tih ka hriat khân hmuh nuam deuh tùrin ka lo inthlâk ve a, hmuh ka hrehawm bîk miah lo ang.

A awm rei vak lo, mamawh lama rawn kal a ni pah bawk si a, kei pawhin ka chelh rei duh bîk lo. Nakinah hun thâwl zâwk kan la nei ang a, duhtáwkin kan la inkàwm leh ang chu.

Krismas leh Kumthar tluang takin kan hmang a, inkhâwm leh ruaițheh tùr bâkin ka chhuak lo va, inah kan awm deuh ngawt ngawt mai. Ka naute pahnih pawh an chhuak tam lo, nakin lawkah final exam an hmachhawn dâwn si a, an țang ve nasa a ni. Tatei phei chu Matric exam hmachhawn tùr a ni a, nasa taka a zir a ngai, ka fuihin ka zilh ve nasa a, an pass țhat phawt chuan restaurant nuam tâwkah ka treat ve ve ang a, an duh duh ei tùr an lam thei ang tiin ka tiam a, an phùr phah ve nasa. Ka chawlhpui hunah chuan nuam an ti ve ngei ang tih ka ring a ni, Tatei phei chuan nuam a ti zual ngei ang, a chhan chu kan hmun nuam tih zâwng a inang țhìn miau a.

Mahse, Krismas/Kumthar ka nin deuh hlekna chu ka pa țhiante kan inah an rawn lêng țhìn a, ka pa ang thoa rui ve țhìnte an ni si a, ka ningin hrehawm ka ti țhìn. Engtin min ti lo mah se, a boruak hrim hrim chu hrehawm ka ti. An rawn rui bual chuang lo; mahse, an awm dàn ațangin zu an in tih a hriat vek tho si a, ka pa lah rui țhìn a lo ni bawk nèn, sawisèl ringawt theih pawh a ni lo, ning takin kan tuar tlawk tlawk a ni ber mai.

February thla laihâwlah ka naute chu an exam ta ngei a, ka theihtâwpin ka ngaihtuah a, an hriat thiam loh laite chu ka hrilh ve bawk a, zàna rei tak an men phal lovin zîng lamah ka thawhpui hma a, an ei tùrte ka lo siamsak ve bawk, matric ka exam laia ka nu min enkawl dàn ang chiah khân ka ti ve a ni, tunah chuan ka nu ka àwl ve thei tawh a, a lo buai ve ka duh tawh lo a ni.

Ka result a țhat avàngin ka naute pawh chu țha ve se ka ti hle mai a, ka duhsak êm êm bawk a ni, an hnêna ka lo tiam ve tawh avàngin pocket money ka nuin min pêk țhin pawh chu ka khâwl sauh sauh a, an pass ngei àwm si a, thutiam hlen loh ka duh bîk lo a ni.

Rin ang ngeiin an result a țha. Tapuia erawh kan tluk leh thei chuang lo, Distinction-ah a pass a, mathematics-ah phei chuan mark 99 lai a hmu nia! Tatei pawh first-ah a pass a, subject hnihah Letter a hmu nghe nghe, an result vàng chuan kan chhûngkua chu kan hlimin kan lâwm hle a, ka pa phûr fâl phei chuan an pass manah chêng 1000 ve ve a pe a; mahse, a hnuah ka nu hnênah an pe lût daih.

An hnêna ka thutiam hlenin an pahnih chuan Sawmzuala dàwr 'Insomnia' -ah chuan ka chawlhpui a, ka rin ang ngeiin Tatei chuan a hmun chu nuam a ti khawp mai, a lo la hre ngai miah lo nghe nghe niin.

"A va'n nuam, ka lo la hre ngai miah lo lehnghâl a," tiin a hawi kual vat vat a, Tapuia ve thung chuan,"An ei siam chu ka ei châk tawh e," a lo ti ve thung a. Ei tùr chu an duh zâwng ka thlantîr a, vawiin na na na chu an duhtâwkin eitîr teh ang, anmahni vàng hian Krismas-ah pawh kawr ka lei loh phah, kawr aiin pawisa kha ka duh zâwk sia, tihian, ka naute ei tùr ka leisak thei phah a ni.

"U, kawngkhàr leh kawngkhàr inkára an thlalâk tàr saw, hemi neitupa hi tihna mi?" tiin Tatei chuan min zâwt a, en mang hlei lo chuan," Um, a nih saw," tiin ka chhâng a, Zorina message ka chhâng lawk a ni.

"A chhiat loh hmel tawp maw le," a ti leh a, Tapuia chuan," U, Tatei hian hetiang hi a sawi a sawi tawh maw le, college a kal hmain bialpa a nei hman ngei ngei ang," a lo ti vat a.

"Teuh lo êm mai a! Ka nei dâwn lo hrim hrim, college ka chhuah hunah chauh ka nei ang," ani chuan a lo ti thung a, ka phone chu dahin," Tak tak maw?" tiin mitko sàn ãk hian ka en a, ani lah chuan uar zet hian," Tak tak e, lo ngai reng mah rawh u, ka nei miah lo ang, hmelțha tih záwng leh chhe lo tih erawh chu ka nei ve thei tho a," a ti leh duah a.

Ei tùr chu a rawn thleng ta, Tapuia chu a ngawi ta hmak mai. Ei tùr tui hmel zet chuan chil a tipût viau a ni, a rim lah a tui si.

"Ummm...ei țeuh rawh u le, in pass țhat man liau liau a nih kha," tiin nui sâng hian an pahnih chuan ka en a, Tatei chuan," Hawh u, kan ei tak tak hmain thla la phawt ang u, kan ei tùr lang tel hian," a ti pek a, ka phone ațang chuan camera hmet chhuakin thla chu kan la ta nghâl a.

"In ei tui ka beisei."

Chu thu rawn sawitu lam chu kan en ta țhap mai, kan lo hmu miah lo a lo nih hi, kan bul lawkah a lo ding reng tawh a, tray hian coffee no thum a lo chawi bawk a, ka naute pahnih chu nui sak chung hian a en a.

E khai, a nui ve leh tlat mai! Ka mitvài chu a ni si lo maw...

"Maria-i naute in ni maw? In pass țhat manah hei hi ka free ang che u," tiin coffee no thum chu kan dawhkànah chuan a rawn dah ta nghâl a.

"Kan lâwm lutuk e," tiin Tatei chuan nui sâng hian melh chhovin làwmthu a han sawi a, ani chuan bûk khum nghat pah chuan," Welcome," tiin a tawlh sawn ta nghâl a.

"Awii, a chhiat loh bâkah a la fel polite êm êm zui!" tiin Tatei chu phûr tih hriat zet hian a phun zui nghâl sar sar a, Tapuia chuan coffee chu a in zauh a, chutah," A tui lutuk!" a rawn ti chhuak nghâl chûl a.

"A ni maw?!" tiin Tatei chuan a han in ve leh a, chutah, min rawn enin," U, kha pa nèn khân in inhria, engtin nge in inhriat a? Engati nge kha pa kha i duh zâwk loh a?" a rawn ti ta mai!

"Țawng zawi deuh teh," tiin ka lo khap vat a, ani lah chuan," Zorina ai chuan a chhe lo daih zâwk! Restaurant nuam zet a la nei zui, i nihlawh daih zâwk awm sia," a ti leh a.

"Tei, duhtâwk teh," tiin ka khap leh a, ani pawh chu a ngawi ve ta mai a, chutah," Kan inhmel hriat hran lo a nia, Sir Manuna car-ah kan chuang tlâng țhìn a, chu zawng chu a ni mai," ka ti leh a.

"A hriat tho che kha," a la rawn ti țâlh a, kei chuan," Hria e, kei pawhin ka hre ve tho alawm," ka lo ti a.

"Hriat satliah inkàwm ngai lêm lo in ni tihna a ni maw?" Tapuia'n a rawn tih chuan nui chung hian," Ni chiah e, kan inbe ngai lo bawk," ka lo ti leh a.

"A fel tehlul nèn, engati nge in inbiak ngai loh a? Zorina vàngin maw?" Tatei'n a tih leh chuan," Khatin ko lawl lawl suh, u rawh," ka lo ti vat a.

Sawmzuala a rawn lang leh tawh si lo va, làwmthu han sawi ve pawh ka duh tehlul nèn, ni dangah kan chawlh leh hunah a ni mai. Haw kawngah chuan ka naute pahnih chuan ei tùr tui an tihzia mawlh chu an sawi a,  Tapuia'n ei tùr chungchâng a sawi deuh a, Tatei'n a neitupa felzia leh polite a tihzia chu a sawi ve thung a, keiin an thil sawi ka lo ngaithla. In kan thlen hnuah pawh Tatei chuan ka nu bulah chuan Sawmzuala felzia leh a thil siam tuizia chu hahîpin a sawi mawlh mawlh a, a hnuah phei chuan," Nu, a fel bâkah a hmel pawh a țha asin, U Zorina ai chuan ţha ka ti daih zâwk," a ti chhuak ta nge nge a.

"Tu nge u Zorina chu?" ka nu chuan a lo ti vat a, Tatei chu ka melh zauh a, warning ka pe a ni; mahse, ka rin loh lam daihin, Tapuia chuan," Nu, u Zorina chu tu emaw bialpa a nia," nui țha chung hian a lo ti a.

Ka nu chuan," Tapui, tu bialpa maw?!! Tatei maw? Nge i u?" a lo ti vat a, rang zet hian Tatei chuan,"Kei chuan bialpa ka nei ve teuh lo mai!" a lo ti var a. Tum loh deuhin min puang ta vek mai, Insomnia-a ka chawlhpui vàng vek, ka tifuh vak lo chu a ni.

Zànah chuan mut hmunah chuan Zorina chu ka ngaihtuah vang vang a, eng nge ka duh êm êm chhan ni ang tih ka ngaihtuah a ni. Tatei sawi ang deuhin, a aw hi ka duh chi, mawi ka tih chi a ni a, chuvàng chauha  duh erawh chu niin ka inhre lo, amah hrim hrim pawh hi ka duh chi a ni ve hrim hrim. Ka duh dàn takin a vun a ngo lêm lo va, a nèlawmin a țawng duh a, a nui duh bawk. Kei țawng duh tak ka nih loh vàngin țawng duh lam deuh ka duh a, Zorina hi a țawng duh a, fiamthu pawh a duh ve viau bawk. Min tihlim a, a fel a, min ngaihtuah ve êm êm bawk. Chubâkah, min duh a, kei pawhin ka duh a, kan induh tawn a, chu chu thil hlu tak a ni.

Ni khat chu chhùn chawlh kan neih laiin Melorie pek chuan," Lalrina hi chu ka ning tak tak a ni, pà lo lutuk mai!" a ti chhuak nang nang a, a phone chu titau tih hriat tak hian a hmet nawk nawk a.

"Engtizia nge ni? A pà viau emaw kan lo ti asin," Rci'n a lo tih chuan," Teuh lo mai! A nu thu a âwih hlur ringawt mai a ni, pa lo lutuk! Pu Gatekeeper-a fapa chu a tluk lo ve chiang a ni, ka țhen daih dáwn," a ti leh a.

"Ani chu tu mahin an tluk thei lo hrim hrim alawm," ka lo ti zauh a, chu chuan țhiante chu a tiphûr zual ta, min fiam rawn ta vek, Melorie a phûr zual.

"I phone-ah Zorina, Gatekeeper tih kha a lam tàwiin 'GK' tiin i save a, a hnuah i hre thiam leh si lo va, 'Tu nge Zorina, Goalkeeper hi ni ang?' i tih i tih kha aw," a rawn ti chhuak ta, mi dang chu an nui chhuak nghâl vek a, kei chuan zah loh chhuah zêlin," Chutiangin ka save lo, 'Kan pa' ti ngatin asin aw ka save ni," ka lo ti ve thung a, an nui nasa sauh a.

Lbi chuan," Maria-i Romeo hi zawng, tu mahin an tluk thei lo, Swimming-pool-bula kha a ni tlat a," tiin a nui khuh bawrh bawrh zui a, mi dang pawh nuih nasat avàng chuan ei tur pawh an ei thei lo.

"Mama's boy ai chuan a țha tho tho, Melorie chuan tluk lo tak a ni, an inpà hleih lutuk! A ni lo'm ni, Melo? In pa chuan Swimming pool bulah pawh a kiss ve ngam che pawhin ka ring lo, a nu hnêna phalna a lâk hmasak zet loh chuan," Rpi chuan a lo ti ve a, ani lah chuan," Dik chiah, inneih zànah pawh a nupui bula mu lovin a nu bulah a mu kûk ang chu," a lo tih belh a, mittui tla phungin kan nui, a za ve ngar ngar êm a ni.

"E, ka theihnghilh țêp, Sir Manuna'n nupui a nei dâwn, min sâwm vek dáwn bawk, min hrilh thuak tawh a," Avèni'n a rawn tih chuan kan nui tàwp chiang kher mai, Aveni chu kan en ta țhap a.

"Tu?" tiin kan zâwt rual țhap a, kan rilrua awm a lo inang hlawm kher mai.

"Lunglei lam mi a nia, zirtîrtu tho a ni àwm e, 'a naupang chhia tawh vak bîk lo' an ti nghe nghe," Aveni chuan a ti leh a.

"Awiii... ka rilru a va na dâwn tak! Min râl vek ang che u," Rci chuan a áwm dawm vang vang chuan a'n ti a, Rpi chuan," Dam dam," tiin a hnungah chuan a lo chùlsak a.

"Ka làwmpui viau nain a nupui tur chu ka hmelma a ni nghâl," a tih leh chuan Rpi chuan," Tenawm viau lo teh!" tiin a hnung chu a chumsak zawt a.

Sir Manuna kan uizia leh a nupui nei tùr kan lawmpui sizia thu chu kan sawi sap sap a, an inneih hun atân thlaleh ni 21 daih a la nih vàng chuan lawmpuina thilpêk eng emaw tal tihsak ve țhain kan hre bawk a.

"Tih ngei a ngai ang, min sàwm vek phei chuan kal kan tum vek ang a, ani tân pawh a làwmawm dâwn êm asin," Ahmai chuan a ti a. Kei pawh chuan," Nia, lawmpuina thu ziak kan pe ve ang a, a nih loh pawhin a pawisa fai ang záwng pawhin a țha tho ang chu," ka lo ti ve a.

Mami chuan,"Nia, a țha ang, a mipa lam kan kal chhan tak a nih dâwn avàngin keini ţhianho chuan kawr rawng inang vek hâk ti ila?" a lo ti ve a. Inneih sàwmna kan hmuh hma  hauhin kan lo phûrin kan lo sêprawtui chu a nih àwm hi.

Rci chu kan râl sap sap a, pawisa thîr pêk pah chuan fiamthu hian kan tawrhpuina thu sawiin kan mittui kan hru der pah a, ani pawh chuan fiamthu vêk hian," Kan pa nupui neihnaah chuan hêng min ràlnate hi ka vâwr dâwn nia; mahse, moin pangpâr a vâwr hlauh a nih chuan tu mahin lo dawng suh ang che u, keimah ngeiin ka dawng ang," tiin min chah lâwk a.

Zànah group-ah kan sawiho leh a, lawmpuina thu ziak dàn tùrah kan buai deuh a, mawi ve tak, thui si lo kan duh a, kan sawiho nak nak a, chutih lai chuan Zorina pawhin min rawn text ve bawk a.

*Lehkha i zir lo a ni maw? Chuti, inkàwm ang aw*  a rawn ti a.

*Ok, Boss. Kan sir-in nupui a nei dâwn a, lawmpuina thilpêk tùrte kan sawiho a, thu ziah dàn tùr mawi deuhte hi i hre mial lo maw?*    tiin ka zâwt pah ta daih a.

*Hre țeuh mai, engtiangin nge in duh a?*  a rawn ti leh a.

Zorina min hrilh ang chu group-ah chuan ka hrilh ve leh chhâwng a, țha an lo ti viau a, a rang thei ang bera pawisa thawh khâwma tih vat vat chu kan rêl leh a.

*Zanin chu i hmel ka hmu châk e, ka rawn video-call dâwn che aw?*  arawn tih chuan ka nui var var a, ka sam chu ka hui țha nghâl bawk a.

Khumah a mu a, tàwnzau dum a ha a, kekawrbùl buang lam deuh a ha bawk a, a inbual zawhna a la rei lutuk lo a niang, a sam chu fai sar tih hriat tak hian a dry hmel riau a.

"Mut i va tum hma ve a?" ka tih chuan," Tum pawh a ni chiah lo, khumah awmin lehkhabu ka chhiar țhìn a, i online tih ka hmuh khân ka be châk thut che a," a aw mawi zet chuan a rawn ti țãlh țãlh a.

"Zanin chu ka online ta reng a nih hi, vawiin lam in buai em?" tiin ka zâwt ve a, kan in-text khân ka lo zâwt miah lo va.

"Buai lo ve, rawn picnic hi naupang chumchiap an ni tawh hlawm lo va, ka han thlîthlai ve deuh țhìn nain harsatna a awm ngai lo, lo kal ve leh tawh ula?" nui deuh chung hian a rawn ti a.

"Kan lo kal zing êm mai a... a zahthlâk!" ka ti hlak a, ani chu a nui chhuak hak a.

"Zahthlâk nâng aw!" a ti vang vang phawt a, chutah," I hmel han hmuh chuan ka pa sawi ang deuhin, hah a dam sawng sawng mai ka ti, ka tân damdawi dik tak chu i lo nih dâwn hi," a rawn ti leh a.

"Țawngkam i thiam si," ka tih chuan a lo chek hlak a," Ka hmuh loh rei che hian ka ngai thei ëm che asin, video call hian ka ngaihna che chu tireh hlek mah se ka khawih thei chuang si lo che a, ka thlâkhlelhna che a zual sauhin ka hre thung a ni," a rawn ti leh a.

Min ngai a, min thlahlel ve êm êm a ni tih hriat hian nuam ka ti. Kei pawhin ka ngaiin ka thlahlel, hmuh leh thuai thuai ka châk bawk. Ani hi ka rilru a hrehawm châng leh ka pa avànga hrehawm ka tih châng pawha ka hlimna neih chhun a ni a, a bula ka awm chuan hêng hi ka theihnghilh vek țhìn tlat a ni.

*THINRIMNA LAK AȚANGIN INTHIAR FIHLÎM ȚHIN RAWH, A CHHAN CHU THINRIMNA HIAN NATNA BÂK A THLEN SI LO CHE A*