☆LAIRIL LUAHTU☆ - 11 By Dingdi Pachuau

 ☆LAIRIL LUAHTU☆ - 11 By Dingdi Pachuau

Inrinniah Zorina a rawn kal a, ka nu awm ve mah se chhuah dìl ai chuan inah țha țakin inhmuin lo lêng ve mai se ka tih vàngin kan inah chuan lo kal mai tùrin ka ti a, a rawn kal ta ngei bawk a, ka nu a awm vàng erawh chuan a tïm ve deuhin ka hria.

Ka nu chuan a lo be bawrh bawrh a, a zah a hlau deuh a nih ka ring, Zorina pawhin țha takin, a châng chuan fiamthu deuhtein a chhâng ve bawk a. Zorina chanchin hi ka hrilh lêm lo nain Tateite khân an sawi chhuak nual tawh a, a hre tho tho tawh tùrah ka ngai. 'Ka țhianpa' ti bâkin ka sawi lo va; mahse, ka bialpaah a ngaih tho ka ring. 

A lêng ve deuh reng a, ka nu pawh a fel viauin ka hria, a hnu deuhah phei chuan room lamah min luhsan ta daih a, Zorina'n nuam a ti lo ang tih a hlau ve pawh a ni maithei, a luh hnuah pawh chuan ka awm dàn ngai rengin ka awm tho; ani erawh chu a dang deuh maithei; mahse, min rawn țhut hnaih bîk chuang lo. Kan titi a, hmun dang hawi lêk lo hian min en leh vang vang țhìn, min en reng hian nuam ka ti vak lo, hawi ngaihna ka hre lo țhìn miau mai si a. A hnuah phei chuan nui deuh, lài deuh hû chung hian," Min en tawh suh," ka ti ta ringawt a, ani lah chu a nuih a lo za êm êm thung. Hlim takin tu dang mah ngai lo chuan kan țhu dùn a, țawng êm êm lo chuan kan inen a, kan nui leh ringawt țhìn, kan thinlung a inhmu tawn a, țawng chhuah vak kher a ngai kan ti lo a niang.

Chawhnu dâr 2 -ah a haw a, a liam chiah tihah ka pa leh a țhiante an rawn lang ve leh ta thung. An normal lo leh tawh tih hriat tak hian an țawng lùng lúng mai a, nui hmel pu pawhin ka lo chhàwn țha peih lo, ka inlêng hmasa zâwk nèn an inang lo hlawm lutuk a, ninawm lamah an kal zâwk mah mah.

Min la fiamin min la chhaih zûrh zûrh zui a! Ngeiawm deuh deuhin min fiam pawh a ni chuang lo; mahse, zu nam deuh chunga min fiam hi ka làwm dàn a dang, ka hlim phah lo. Rui lo hai lovin rawn lêng ve se țha tak taka ka lo biak tùr hlîr an ni, ka pa țhiante, a thawhpuite an ni lehnghâl a, zahawm tak tùr an ni hlawm asin le.

Zanriah ei kham lehkha ka zir hma deuh si hian ka nu chuan," I țhianpa kha a fel hmel roh riau kha, a țawng duh bawk a," a ti zauh a, hlauthâwng ru deuh tak chuan a țawng hria an awm em tiin ka hawi kual nghâl a ka pa a chhuak hman hlauh chu a zia e.

"Chuti maw?" ka ti ringawt a, ka nu meuhin a han sawi chhuak ve chu ka zak ve deuh lo thei lo.

"A bula awm kha a nuam ve tlat, a hmel pawh a chhiat loh kha, a aw lah chu a ngainatawm viau bawk si," a tih phei chuan nuam ka ti tawp, amah fakna lam hlîr a ni si a.

"Aw mawi deuh hi an hmelchhe duh an ti țhìn sia, ani kha chu a hmel a chhe miah lo tiraw, Nu?" tia ka zawh chuan,"Hmelchhe nâng aw, Pathian malsàwmna a dawng fuh bîk a nih dâwn kha," tiin ka nu chu a nui phawt a, chutah,"Aw mawi deuh an hmelchhe duh tihte chu tih mai mai alawm, sâpho pawh hi an aw a mawi theih viau hi maw, an hmel pawh a țha êm êm zêl bawk a," a ti leh a.

"A...nu, annite chu sâp alawm an nih le," ka ti a, ani lah chuan," An hmelchhiain an hmelţha ve thei tho a nia," a lo ti a, kan inen a, kan nui dùn a.

Zorina'n min rawn text chuan ka nuin a chungchâng a sawi dànte chu ka hrilh ve a, a rawn lãwm nasa mai.

*Yes, mâkpa atân min iai lo țan tihna...a va nuam tak!!!* a rawn ti! Chhiar pah chuan ka nui var var a, a hlimna chu a va ho tak, ami chhànna lah chuan kei min tihlim bawk a.

*I aw ka hriat reng theih a ngai tihna a nih chu*  tiin ka fiam lêt a, ani lah chu a rawn diau duh bîk țhak lo.

*Tunah pawh hian ka rawn ko che, hre phâka i awm a ngai ve dâwn tihna a nih chu*  a rawn ti! He pa inlâk țawngkam thiamzia hi chu aw..

*I nu lakah chuan mark 100-ah 30 vêl ka hmu tawh a, i pa bulah hian eng nge maw ka an ve ang le? 100-ah 100 hmuh ngei ka duh si a, țan lâk erawh ka la ngai nasa dâwn a ni*  a rawn tih leh chuan ka ngaihtuahna a kal thui khawp mai.

Ka bialpa mai a ni; mahse, hmalam hun ka han ngaihtuah a, ani hi ka pa hian min duhpui ve ang em? Ka nu kha chuan mitmei hmuh nuam lo a hmuh loh mai bâkah min la fiam zui a, min duhpui lo hran lo tihna a ni thei ang a, ka pa ve thung hi chuan min duhpui ka ring lo lam deuh chu a ni!

*******

Sir Manuna nupui neih ni chuan kan țhianho chuan kan kal ve a, hmel hriat, chhûngkhat an nei tam a niang, mipui an tam êm mai. Biak in chhûng erawh kan chang ve ngei mai a, kan țhianho chuan kawr rawng inang kan ha vek a, a țhenin puan kan bih a, kei pawh ka nuin puan min leisak thar ber ka bih a, ka confi vak lo, ka bih zei lo lutuk a.

Inkhâwm a zo a, pâwnah kan chhuak a, tu'n ka ui ka âr min ti lo mah se kan țhianho chuan thla lâkpui kan tum ve bur. Mo leh moneitu leh a țhiante pawh kan chibai ve ang chu maw le, inkhâwmpui ringawta hawsan leh daih chu kan tum bîk bau lo.

Kan chibai ta ngei a, Sir Manuna pawh chuan keini țhianho min hmuh  chuan mak a ti deuh a niang, a mitko a sàn ã ãk a, a hnuah erawh a nui ta var var a. Rci'n a chibai lai chu kan lo en ru deuh reng a, a lai ringawt nia maw le, kan țhianho chu kan insik ru kan insik ru mai, kan nui chhuak ngam meuh si lo. Mo pawh a hmel a țha khawp e, an chei nalh bawk a, a meng dum țha ve khawp mai.

Melorie chuan," Sir, thil pêk che kan duh a, khawiah nge, engtik hunah nge ni ang?" a ti pek a, mi dang chu kan lo inen kual ralh ralh a, ka han dem mai dâwn a; mahse, a zawh hi zawh àwm lo a ni miah lo.

"Sawmzuala hnênah in lo dah mai dâwn em niang?" a tih tâkah chuan Sawmzuala ka lo hrechang tawh hauh lo tih ka hre chhuak, a awm ve ngei tak ang chu maw le, a inchei nalh ngawt ang chu!

"Hei, a lo kal alawm," a tih chuan kan hawi chhuak ta hlawm a, ka rin dàn a dik chiah. A lo 'inti-nalh' khawp mai, amah a sâng ve bawk a, pheikhawk sâng kan bun ve chung pawh chuan min en 'hnuaichhiah' rùn thei alawm.

Kalpui pawh a nei, an chhe lo dùn khawp mai. A bialnu a nih ngei pawh ka ring nghâl, inti-neitu zet hian chu nu pawh chuan a bânah a rawn chelhsak tlat bawk a, an inàwm khawpin ka hria. A nei hleitling roh phian lehnghâl a, pheikhawk sâng kan bun chung pawhin ani, flat mai mai bun pawh chu kan chen țha lo țêp ang chu maw le!

Thla pawh chu kan lâkpui ve a, Rci chu kan dah lal ber a, a duhna berah a ding ngei bawk.  Kei leh Melorie a sîr ve veah kan ding thung a, keini hi chuan kan star ve tho nain kan ti ve vak lo a ni, kan chhe lo hlawm khawp ang chu. 

Zorina nèn kan nih hmaa ka star ţhin Super Max-a ka hmu nawlh mai, Sir Manunate nèn an awmna vêng a lo inang tehrêng em maw ni, a inla chhe lo khawp mai; mahse, ka engah vak a thawk tawh miah lo a nih chu, ka hmuh pawh chuan ka thinphû a rang tawh lêm lo.  Mi dang pawh chuan an rawn hmu ve nghâl mai a, min rawn melh ralh ralhin an phun deuh sap sap tih ka hria; mahse, ka ûksàk duh hran lo.

"Engah nge in phì deuh chûk kher a? Ani aia duh a nei daih tawh," Melorie pek chuan a ti leh thâwr mai a, kei pawh ka nui ringawt.

Sir Manuna'n refreshment kan ei loh a hlauh êm avàng chuan kan ei ve a, an chhang sem lah chu a tui êm êm zui a, min pêk belh hial se ka ti ru vawng vawng mai ka ti, ţhiante pawh chuan tui an tihzia chu an sawi sap sap a.

"A tui in ti em?" 

Kan lo en vat a, Sir Manuna ngei a lo nia, a nui sâng mai a, an buai viau kan rin laiin, keini ve mai mai min rawn bia chu kan làwm tâwk a tling leh pek khawp mai.

"A tui lutuk!" kan lo ti dial a, kan inen a, kan nui ta dar dar a.

"A làwmawm nasat chu, in fel hi ka tia, in rawn lang kim țhap thei zui a," Sir Manuna chuan a ti leh a, Rci chuan," Sir, in nu pawh a hmelțha khawp mai," a lo ti zauh a, Melorie ve thung chuan," Sir chu, i tlangvàl hun tàwp rawn hmuhpui hrâm che ka duh alawm, min duat thei tawh dâwn si lo va, ui viau che mah ila kan lawmpui tho che a nia," a rawn ti ve thung a, kan nui leh dar dar a, a inla țawngkam thiam thei si a, thil zêp a nei lo bawk nèn, a lawmawm țhin a nia.

Sir chu a nui hak hak a," Ka duatte kha in la ni reng dâwn alawm, pasal in neih hunah pawh min rawn hrilh vek ang che u, in man pawh ka rawn ei vek ang," a ti a, kan Yes sap sap a.

"I hnung rawn zui hmasa ber tùra kan rin chu Maria-i hi a nia," Melorie-i'n a rawn tih chuan phâwk zet hian ka en phei a, ani lah chuan min lo en duh miah lo va, a thil ei chu tui tih hmel zet hian a lo ei a.

"A ni maw?! Chu, man ei tùr kanei nghâl dâwn tihna a ni maw? Tuin nge lo chhãi thlu a?" Sir Manuna'n a tih chuan," A ti ve mai mai a nih kha," ka lo ti vat a, mi dang lah chuan," Nia, Sir, kan nghâk rei lo ang, swimming pool bulah pawh an ti thut maithei a ni," an lo ti a, an nui nghâlvak bawk a, ka zahzia chu an hre kher lo ang.

"A nih chu, senior tak tak hmain pasal in nei vek dáwn nia. Maria-i chu, fiam tawh teh suh u, kha a sen vek a nia," a rawn ti a, chutih lai chuan Sawmzuala rawn kalin a rawn ko ta a, eng emaw hi a rawn hrilh sap a, chutah Sir Manuna chuan," A nih leh rih mai u aw, in fel, in rawn kal avàngin ka lâwm lutuk a nia, ka kal phawt ang e," tiin min rawn en kual dan dan a, nui sak sak chung chuan an kal kiang ta nghâl a.

"A fapa em ni kha, kha pa nèlawm lohzia kha, a intithei niin ka hria," Rpi chuan ner nâwng chung chuan a ti sap a, Mami chuan," A u fapa zâwk, Sawmzuala a nih kha," a lo ti vat a.

"A u fapa pawh ni se, a awmzia kha ka mil loh chi, ka ei thlâwt lo," Melorie chuan a lo ti pek a, chutah," Sir kan pêk tùr pawh kha ka pe lo țêp a ni, a inla ngêng vêl kha, Lalrina ka ngei ai pawhin ka ngei zâwk," a ti leh hmarh hmarh a.

Kan ei zawh chuan haw turin kan chhuak ta hlawm a, kan chhang ei tuizia chu sawi chhuakin kan infiam a, Rci pek chuan," A rûka mittui tla chungin ka ei, ka lem hlei thei lo nghe nghe asin," a rawn tih chuan kan nui chhuak hawk hlawm a.

"Ngawi mai mai teh, i lem duak duak kha aw," Rpi'n a tih chuan kan nui nasa sauh a, ka inpal deuh nawk mai a, ka pheikhawk ka rap lek deuh niin, Rpi chu ka bulah kal lo se chuan ka tlu chiang ngawt ang chu! Kan piaha keimahni tâwk zâwnga rawn pheite chu an rawn nui chhuak hawk nghe nghe a, min nuih a ni chiang mai.

Ka din fel hnuah chuan zak tak chuan ka hawi chhuak a, ka mi va hmuh ber kher chuh! Sawmzuala leh mi dang pathum an lo ni a, mi dang chuan min rawn en tawh lo, ani erawh chuan nui deuh chung hian min lo la en a, min en dàn chu min la nuihzat hmel êm avàng chuan rei pawh ka en duh lo, ka hawi sawn deuh hmak. Zah ve nâklaia, min lo la nuih zui, a inchei nalh tehlul nèn, a inhmeh lo êm mai. Thinrim deuh țûnin ka haw phah lehnghâl.

In ka thlen chuan ka ke a kham viau mai, chauh pawh ka chau ve hnawk thei hial, pheikhawk sâng hi ka ngaina lêm lo va, ka bun rei deuh phei chuan ka khûp ruh hian a tuar țhìn, chuvàngin, sâng tak phei chu ka lei ve ngai lo.

Zanah ka pa țhiante an rawn lêng leh a; mahse, zan dang ang lo takin tuna lo lêngte hi chu ka la hmu ngai lo, an titi dàn ațangin thawk tláng an ni tih erawh chu a hriat theih a, ruih pawh an rui lo em maw ni ka ti hial. Ka pa pawh a nui huau huau a, zu rim an nam pawhin ka hre lo.

Ka nute nèn an titi a, thingpui pein ka room lamah ka luhsan leh daih a, lehkha zir hmain Zorina text lo awm vang tawh chu ka chhâng a, inneihnaa kan thlalâkte chu ka thawn ve a. Rei vak lo chu kan in-text leh rih a, Sawmzuala laka ka thinrimna chu ka hrilh ve bawk a, ani lah chuan min lo thinrimpui nasa.

*A lo nuihzat che maw! Hmuh ka va châk ve le! A hmaiah tak a nia ka hnek sawk dâwn ni*  tiin milem thinrim hmai sen țeuh lai hi a rawn dah tlar dal a, chu chuan ka nuih a tiza leh si a, ka nui ta var var a.

*Ka thinrim laia damdawi țha ber chu i lo nih hi, ka nui leh var var tawh a nia* tiin ka chhâng a, ka type lai pawh chuan ka nui var var reng a.

*I thinrim hi ka duh miah lo, tihnuih che ka tum zêl ang*  a rawn tih phei chuan  a hmel ka mitthla a, ani hian min tithinrim ve thei ngût ang em maw le ka ti, nuih a duh si a, min tinui reng mai dâwn asin.

*******

Zànah ka pa țhiante zînga mi U Tluanga chu a rawn lêng ta zauh zauh, a rui ngai miah lo va, a in ve ngai lo em maw ni chu aw ka ti nghe nghe. A tîrah chuan keimah min rawn lèn chhan tih ka hre miah lo va,  kâr tàwp lama a rawn lan tâk zauh zauhah erawh chuan ka pain mn ko chhuak ta țhìn a, min rîmin a rawn lêng a ni tih ka hre ve chauh.

Tlangvâl a ni a, a la upa vak lo bawk. Tlangvâl fel ve pângngai tak a niin ka hria, a țawng duh a, a polite viau bawk. Ka tân pawh ngeiawm tùrin a awm ngai lo va, a țawng duh dàn pawh chu a lutuk lo; mahse, ngaihzâwng ka neih tawh avàng chuan kawm dàn tâwk ka thiam a ngai ka ti, sawi chhuak rih lo mah se, min beisei lo chuan a rawn lêng awm tawp si lo va.

Ka pa pawh chuan U Tluanga felzia leh an chhûngkaw chanchin chu a sawi ta zauh zauh a, hlawh nei tlangvâl fel tak, hotute pawhin an duhsak leh chhûngkaw ro khâwm tùr a nihzia leh a nupui vànneih tùrzia chu a sawi uar thei khawp mai, min sawi chhan a nih loh hrâm ka beisei, kei chuan bialpa ka nei tawh tlat. Ka duh taka ka neih a nia, min phatsan a nih loh chuan phatsan ka tum teuh lo mai.

U Tluanga bula sawi tawp mai chu ka duh țhin; mahse, amah hian min beisei thu leh min duh thu pawh a sawi chhuak ngai si lo va, chutih laia keimah zâwkin han sawi chhuah kha ni theiin ka hre bawk si lo, bâkah, han sawi tawp mai kha ka zak ve bawk a, amah hian sawi chhuak hmasa se chuan ka hrilh hreh lo tawp dâwn asin.

*******

"Khati khân min en reng țhìn suh, ka zak a nia," tiin a hmai chu va khawihsakin, ka kut chuan a mit chu ka hupsak bawk a.

"I zakzum e!" a ti phawt a, chutah," En reng mai che hi ka duh alawm, ka hmuh theih lai che hi chuan. Ka haw hunah chuan ka hmu leh thei tawh dâwn lo che a," a lo ti thung a.

"A, min en reng chuan ka zak ve alawm," tiin ka kut chu ka la a,"Ka lem ziah tuma min chhinchhiah i tum a nih ngawt loh chuan," ka ti leh a.

"Ka tum maithei asin, bâkah, i mit te, i hnár te, i hmui zawng zawngte hi zàna ka mut dáwna ka mit ka chhìn hunah pawh ka hmuh reng theihna tùr chein chiang taka en reng zël che hi ka duh a ni," ani chuan a lo ti leh a.

"I hre reng thei lo tawp ang," nui hak hak paha ka tih chuan," Ka hriat theih nân ka en țhin rêng che alawm. Mihring chuan kan hma hun kan hre miah si lo va, ka mit pawh a lo del thut thei, i hmel hi ka mitthlaa chàmtîr reng ka duh dáwn a ni," thutak zet hian a lo ti thung a.

Ka âwm dawmin," I sawi hlauhawm êm mai aw, chutiang chu thleng lul suh se," ka lo ti a, chiang taka en lêtin," Pathianin thlentîr lul suh se," ka ti leh a.

A nui sak a," A thlentîr phal lo tùrah ngai ang," a ti a, chutah, sawi zawm leh zatin," Min rawn tlawh khât sia, ka rawn hmuh chhunah che hi chuan ka thlír reng țhìn che a nih pawhin min haider tawp mai rawh, thlìr reng che hi ka duh dáwn si a, i zaha i hmai a sen nasat poh leh i hmuhnawmna a nasa ting bawk si," a ti leh a.

A thil sawi chuan min tilai sauh, ka sen tâwn tâwn ang chu maw le, a sawi tak ve bawk si a, fiamthuah pawh ka la ngam tawh lo. Amah chu ka en lo tawp, ka thil ei lai chu enin ka kun ngar ngar a, amah ka en chuan ka zak leh dâwn si a.

Ei tùr kan ei zawh chuan," Zànah tlangvâl an rawn lêng ngai em?" a rawn ti ta zauh a, en vatin," Lëng...lo, ka luck lêm lo va," nui chung hian ka ti a, U Tluanga lo lèn thu kha chu hrilh ka tum lêm lo. Awmzia a awm dáwn chuang lo va, a hriat kher pawh ngai ka ti lém lo.

"Rawn lêng an awm deuh chiang mai, tiraw?" tia chiang deuha min rawn en chuan," A, lêng pawh a ni chiah lo, engah mah ka ngai lo, ho lutuk," ka ti teh ringawt a.

"Sawi țha ve mai la?" a tih leh tâkah chuan," Ka pa țhianpa a lo lêng zauh zauh; mahse, min beisei vàng a ni lêm lo a nia, a lo lêng mai mai," tiin ka chhâng ve ta a, thu dik lo a ni lêm lo bawk, min beisei ni se a sawi ve daih tawh ang chu.

Ei man pein kan chhuak a, a ngqwih deuh tâk avàng chuan nuam lo ka ti deuh hlek a, a bâna chelh pah chuan," Ka ti tak tak aw, engah mah ka ngai lo a nia, min beisei pawh a ni lo," ka ti țha leh a.

"Dâwp chhuah i va awl tak! I rilru hi chu a thianghlim a ni tiraw?" a rawn ti ta daih a.

"Hei...!" tiin ka ding dat a, he pa hi, min dâwp chhin vêl a maw? Ka va ngei tak! Ka la inpuang vek zui.

"I va sual tak!" tiin a hnungah chuan ka chùm ak a, ani erawh chu a lo nui hawk hawk thung a.

"Ka lakah hian thil zêp nei lo tùra ka duh vàng che a nih kha, mi dang lakah min phatsan dâwn lo tih hi chu, ka hre ve reng a ni," confi zet hian a ti a.

"Chuti, ka phatsan dâwn che," ka tih chuan," Ka phal dâwn hauh lo, mi dang i melh dáwn chuan ka ru bo daih mai ang che," a lo la ti ti deuh deuh!

*MI DUHÃMTE'N  CHIN LÊM AN NEIH LOH LAIIN MI NIHLAWHTE CHU AN CHANTÁWKAH AN LUNGAWIIN AN HLIM MAI ȚHIN*