☆LAIRIL LUAHTU☆ - 12 By Dingdi Pachuau

 ☆LAIRIL LUAHTU☆ - 12 By Dingdi Pachuau

Thla a ral a, kum a ral a, Zorina nèn pawh hlim takin hun kan hmang tluang ve zêl a, inhnial leh inhauh pawh kan nei lëm lo. Buaina tùr ber a lakah hmeichhe dang thîk tùr ka hmu lo va, ani pawhin mipa dang han thîk tùr a hmu chuang lo ang. Amah ngei pawhin ka phatsan dâwn lo tih confi takin a sawi kha, min hre chiang ve thawkhat tawh a ni. A hun ve tawh viau bawk e, kan inzui rei ve tawh êm a, amah ka duhzia pawh a hre chiang tawh viau e.

College ka chhuak tawh a, MZU lamah ni tin hun ka hmang chho ve leh tawh a, Tatei pawhin college a rawn rap ve tawh bawk. Tapuia pawh police officer nih a tum leh tawh lo va, College lecturer nih a tum leh tawh zâwk. Kan nuihpui nasa thei a nia, Tatei nèn hian an inel nasa thei viau a, ani Tatei pawhin hna zahawm tak eng emaw tak thawh a tum ve a, tu nge ti țha zâwk zâwk tiin an inel ziah țhìn.

U Tluanga pawh a lo la lêng tluang ve zêl e. Tunah phei chuan kan inhre chiang ve tawh a, tlangvâl fel tak a ni tih ka hre ve tawh bawk. A rawn lèn azát hian ei tùr eng eng emaw a rawn lei ziah a, sawrkâr zêm zen a ni bawk a, sum lamah chuan a buai hmel lêm loh viau, zu a in lo chuan ka hria. A in a nih pawhin kan ina a rawn lèn dâwn hi chuan a in ngai lo a ni tal ang, a rim a nam ngai lo va, rui hmel pawh a pu ngai hek lo.

Ka pa lah hian a fak thei mai si a, a rük tak chuan hrehawm ka ti țhìn asin. Ka pa rui țhìn pawh tlêm chuan a zia ve deuh tawh a, Tluanga a lo lèn phei hi chuan a inthlahrung ve deuh pawh a ni maithei, room lamah a inthiarfihlîm daih țhìn.

Inrinni chhùna Zorina lo lèn laiin ka pa chhuak chu a rawn haw thut mai a, Zorina nèn kan ințhut hnaih lai a ni lo hlauh chu a zia viau e. Chuti ni lo se chuan kei ka zak ang a, Zorina a zak bawk ang a, ka pa chu a thinrim loh pawhin Zorina haw hnuah min zilh nek ang.

Tlêm chuan a rawn nam haw leh ngei a, kan bulah chuan rawn kalin," Kha, Bawihi, tu nge ni a?" a rawn ti a.

"Ka țhianpa Zorina a nih hi, Zorin, ka pa a nia," tiin ka hrilh ve a, kan bulah chuan a rawn țhu a, a irh deuh uk uk a.

"Ka va hmu ngai lo che ve? Bawihite nèn hian College in zir tlâng em ni?" tiin ka thil hlauhthàwn chu a rawn zâwt ta chiah e.

Chuta țang chuan a chanchin chu a zâwt chho ta zêl a, hrehawm ti zet hian an inchhàn dàn chu ka lo ngaithla a. Zorina chuan hrehawm a ti ngawt ang chu, ka pa lah a phûr tâwk lekin a in bawk si nèn, a duh aia rei mah a lêng ta ngei e.

Zanriah kan kîl laiin ka pa chuan,"Lehkha thiam in ni a, lehkha thiam mang hlei lo, chhawr tlâk miah lote hi ngaihzâwng atân nei miah suh ang che u, tûnlaiah inchei nalh zer zuar, bike-a chak zet zeta tlãn chiam chiam țhìn, thawh chhuah nei miah si lo an tam tawh lutuk! In hmalam hun ngaihtuah rànin in kawppui tùr pawh in zawng tùr a ni, khawilai daikil kâra mi tute emaw mai mai ngaihzàwn loh tùr," a ti ta chuar chuar a.

Ka nu chuan," In la naupang a, zirlaite in la ni bawk a, ngaihzawng neih hi chu a la hun vak lo, in zirlai tihchhiat phah nân phei chuan nei miah suh ang che u," a lo ti ve thung a.

Ka pa vêk chuan," Tluanga hi tlangvâl fel a ni ka tih tawh kha, a nupui chu mi vànnei tàwpkhâwk tùr a ni. Bawihi pawhin țha takin lo bia ang che, tûnlaiah hlawh nei an hlut tawh êm hi, kan fanu i ni a, kan duatin kan chhuang lutuk che, pasal țha tak nei ngei la kan duh bawk a ni," a ti leh a.

"A, a la hma êm mai, pasal neih ka la ngaihtuah ngai lo hrim hrim, ka zirlaite hi han zo vek phawt ila, ka la ngaihtuah ve chauh ang chu," ka lo ti a.

"Hmeichhia chu in vul lai a rei lo, in upat hnua pasal in neih phei chuan fa pakhat in han nei ang a, in pasalte'n an iai ringawt ang che u. In țhat lai hian neih a pawi rêng rêng lo, in hmu a nih phawt chuan," ka pa chuan a ti leh a, ka nu ve thung chuan," Induh tawn leh inhmangaih tawn hi a hlu ber a, hlawh nei tih vàng ringawta duh leh hmangaih miah loh neih hi a țha lêm lo, nakina hrehawmna tùr a nia, nupui pasal inneih dáwn chuan inhmangaih tawn a hlu," a lo ti a.

"I nu mai mai hi chu aw...tûnlaiah chuan sumin thil a ti thei ber tawh. Duh vak lêm loh pawh a hnuah a duh chawp theih vek tawh, retheih lutuk chuan inhmangaihna pawh a dal telh telh a, sum a awm miau loh chuan ei tùr duh țheuh țheuh, inkhikkhakna a thleng duh châwk," ka pa chuan a ti leh a.

An thu sawi chu a dik ve ve ang, an thlìrna lam ațang chuan; mahse, ka tûn dinhmunah hi chuan ka nu thu sawi chuan min hneh zâwk, Zorina nèn hian kan induh tawn a, sum a nei lêm lo pawh a ni ang; mahse, kan hlim dùn ve êm asin, hlim hi alawm hlû le. 

Zàn mut dãwna Zorina text ka chhiar chuan thupha ka'n chawi luam a, vawiin lama kan pa nèn an inbiakna chungchângah hrehawm a ti ang tih chu ka hre sa a, thupha ka chawi chhan tak chu a message ka chhàn lawk loh vàng a ni ber zâwk.

*Hrehawm  ka ti hleinem, kha te kha chu ka la hmachhawn tùr tho tho a nia, ka thâw a veng huai tawh zâwk asin*  tiin min rawn chhâng a.

*Zu a nam hlek phei hi chuan a țawng hi a kal thei țhìn si a, i lo hre thiam hrâm dâwn nia* tiin ka text leh a.

Min rawn be ta zâwk a, zawi tê têin kan țawng a, kan inbiak rei hnu deuhah phei chuan fiamthu a thawh a, ka nui ring ngam si lo, ka puan sin lai chu ka seh tlawk tlawk ringawt mai. A rilru a hrehawm lo chu ka lâwm, ka pa hian ani aia duh mâkpa hual a nei a ni tih hrilh kher erawh ka tum teuh lo, țûl lova a rilru tihhrehawm ka phal hauh si lo va.

*******

"En teh, U, vawiinah Insomnia-ah khân kan chàwl a, i țhianpa khân min lo la hria a nih chu! Mak ka ti râp maw le!" 

Tatei chu ka en vat a, kei pawhin mak ka ti! Engtin nge a lo la hriat ni? An inhmuhna kha a rei tawh êm asin, bâkah, ani phei chuan mi a hmu tam tawh dâwn lutuk! Kei chu min lo la hria chu ni se ka hre thiam  ang; mahse, Tatei tak chu, a mak êm a ni.

"Țhiante'n chhe lo an ti bawk sia, nuam ka ti râp maw le! A restaurant pawh kha an lo tidanglam leh deuh tawh a, a nuam leh zual tawh a nia aw..." a ti leh vang vang a.

"A lo hriat che chuan, a lo bia che tihna maw?" tia ka zawh chuan,"Aw, bia e, 'I lo kal khât hlê mai' min lo tia, engtin nge min lo la hriat ni ka ti rilru zâwk a, nangmah nèn hian min hriat pawlh em niang le aw ka ti nghe nghe asin," a ti leh barh barh a. 

Hriat pawlh êm dâwn em ni? Tatei sam chu a dum laiin kei chu a sen uk deuh a, a kir zui bawk a, kan hmel erawh a inang ve thawkhat a niang, inang min ti ve fo. Kan pian erawh a inang lo, tunah phei chuan Tatei hi kei aiin a sâng lek lek tawh, kei chu chêr lam deuh ka nih laiin ani erawh a khal tâwk viau thung. Min lo hriat pawlh a nih tâk leh a pawi lo, na vung vung tih pawh ni mang hlei lo.

Ka nu rawn kal phei chuan," Eng chu ni ni in lo sawi a?" a rawn ti ve a, Tatei chuan phûr zet hian," U țhianpa chhe lo deuh dàwrah kan chàwl a, min lo la hria a, mak ka ti deuh a maw le," a lo ti vat a.

"Ka țhianpa pawh a ni chiah lo, Sir Manuna u fapa a nia, class xii kan zir lai khân Sir Manuna motor-ah kan chuangho țhìn a," ka lo ti ve a, ka nu chuan," Zorina ni lo maw?" a lo ti boh a, Tatei chuan," Zorina ni teh nâng! Ani ai chuan a țha daih zâwk! A chhiat loh bâkah restaurant nuam zet a la nei zui a, coffee siam lah chu a la thiam êm êm bawk nèn, Zorina nèn chuan tehkhin chi pawh a ni lo," a lo ti zung zung a.

"Khati khân ti vak kher suh, tehkhin chiam pawh a ngai lo," ka lo ti hlar a, ka nu leh Tatei chu an nui nghâl hak hak a, kei erawh chu ka nui ve duh miah lo va.

"Zorina chu-" Tatei'n a tih lai chuan," U rawh, 'Zorina' ti lawl lawl tawh suh," ka lo tih khalh leh vat a.

A rûm nghat a, chutah, hmui tipawrh târh chung hian,"I țan si, U Tluanga i nei daih mai ang aw, ka pa lahin a duh hlarh hlarh bawk si a," a ti ta daih a, chutia Tluanga hming a rawn lam rîk tâkah chuan ka nui ve ta thung a.

"Nangmah hian nei mai la? Kei chuan duh ka nei tawh sia," ka lo ti ve a, ka nu pawh chuan nui chung hian," Nia, in inneih hnuah class chu i kal chhunzawm leh mai ang a?"a lo ti ve a.

"In mãwl mai mai e a. Kei beiseia lo lêng pawh ni lo, bâkah, U Tluanga hi chu ka duh zâwng mi a ni ve lo hrim hrim, a fel ka ti reng, a hmel pawh a chhe chuang lo; mahse, ka duh chi a ni lo ve tawp," a ti leh bawrh bawrh a.

Kei chu ka hre mai lo. Zorina hi lo tawng hmasa lo ila chuan duh pawh ka duh ve thei maithei; mahse, chu chu 'maithei' a ni, Zorina hi ka duh hneh ve êm mai a, mipa dang lakah ka mit pawh hi a tidel zo vek ni maiin ka hria, mipa dang melh ka tum lo.

Mahse, chu chu ka pa hian a hre ve hauh si lo. Tûn hnai deuh ațang phei hi chuan 'Tluanga' tih hi kan hre reng mai a, ani lah chu a rawn lêng ãwl lo nèn, han ngei viau dâwn ila, ngeiawm tùrin a awm ngai bawk si lo va, hrehawm ka ti țhìn. 

Inrinni zan khat a rawn lêng chu," U Tluang, nupui nei ve tawh la, nang phei chu hlawh nei i ni bawk sia, i hmu țeuh ang chu tiraw?" Tatei chuan a lo ti ta pek a, ka lo melh nasa mai.

Ani erawh a nui sak a, min rawn enin," Hmu țeuh nâng aw, Tate, min zawnpui teh, nang i hre țha deuh ang, i u ang hi min zawnpui la aw," a rawn ti a, ka lo nui ve ringawt a.

"Ka u ang zawnpui kher i ngai hleinem, amah hi nei tawp la ni mai alawm," Tatei'n a tih chuan," I phal chiah maw?" U Tluanga chuan a lo ti vat a.

"Phal e a, pasal nei thuai thuai se kan ti tawh tawh alawm, a senior țan tawh a, a intithu ropui bawk sia, kan ning tawh," a ti leh zawt zawt a.

"A dak theihzia hi..." tiin ka lo chek tlak tlak a, a rûk tak chuan ka ngei, chutiang lam a sawi chhuak kher chu. Mi dang erawh chu an nui dar dar a, Tatei phei chu mi dang zawng aiin  a nui uar zual a.

Chuta țang chuan tih takzetin a rawn lêng ta, zàn àwl pawh a nei ta mang lo, ka hawihhàwmna pawhin a tlin lo țêp tawh a ni. Amah hi ngeiawm deuhin han țawng zeuh phei se chuan...

Tlaia ka pa rawn hawin inchhûngkhur bungrua eng eng emaw ni a rawn hàwn nual a, khawia mi nge tih ka nuin a lo zawh chuan 'Ka lei' a ti mai a, a changkângin a mawi hlawm sia, ţha kan lo ti khawp mai a, Tatei nèn phúr takin kan phawrh a, kan dah fel zung zung a. Ni dangah a rawn lei haw ngai si lo va, a rawn rui haw tawp zêl kha a ni a, tunah chuan chhúngkhur mamawh a rawn lei haw ve ta a, a làwmawm viau a ni.

A rawn khai haw ta zauh zauh mai, instalment-in a la a niang kan ti mai a, ni danga uikawm thei viau si a thil phal thar ta thut mai chu ka làwmah a tla a, ka nu bungbêl lei țhin kha a sawisêl nasa thei viau kha a ni si a, làwm loh theih pawh a ni lo.

Inrinni bâk hi inhmuhna hun kan neih loh avàngin Inrinni hi chuan chhuanlam siamin ka chhuak ziah, ina lo kal mai tùrin ka ti ngam tawh lo. Ka pain a hmuh leh hlauh chuan a buaithlâk, a hmuh loh tùra ka hmuh zêl mai a ngai, a hnua min zilhna ni pah fàwma Zorina chungchâng sawi lang dawt lova ani ang ngaihzáwng nei lo tùra a sawi leh tùr kha ka ngaithla duh tawh lo. 

Vawiin pawh Zorina hmu tùrin ka chhuak a, min lo nghahna tùr hmunah chuan a lo țhu vang tawh a, min lo nuih var var a, ka rilru pawh a hlim sawt e.

"A pawi ka ti, ka hman veleh ka lo kal vat chu a nih ve si hi," tiin a bulah chuan ka țhu thla nghâl a. Thawmhnaw sûk tùr neuh neuh a awm a, ka chhuah dâwn avànga ka inthlahrung deuhin chhuat ka nâwt chhuak leh vek a, chu chuan min titlãi deuh ta a ni.

"Kan inhmuh tawh tho a, a pawi lo, a fel vek e," tiin ka kut chu a hmer chat a, a hûm vang vang a. Min ngaih chuan hetiang hian a ti ziah, ka hre chiang ve tawh êm!

Kan inhmuhna hi restaurant lãr lo zet leh ualau lo deuhah a ni a, helai hmun hi kan tân chuan a pawimawh lutuk tlat, kan inhmuhna hmun a ni a, kan inngaih thu kan inhrilhna, kan inthlâkhlelhna kan lantîrna hmun a ni ve tlat a ni. A neitunu pawh hian min hre ve tawh khawp mai, Inrinni hi chuan kan tân a lo hauh tawp ang a ni.

"Nizàn khân a va lêng rei àwm ve a?" Tluanga chanchin a rawn sawi chhuak ta chiah e, a thin chu ka tirim lo tih ka hria.

"Aw, rei ve tho, ka rawn text che khân i lo mu hman tawh a," ka tih chuan," Nia, nimin lamah lei ka lai nasa a, ni a sa bawk nèn, ka chàu deuh a nih ka ring, ka lo muhìl daih a," a lo ti ve a.

"Thawk nasa lutuk lo la," tiin khawngaih deuh hian ka en a, ani erawh chuan nui sak chung hian," Ka thawh nasat a ngai alawm, kan tân vek a ni si a, nang phû zo ngei tùra ka thawh a ngai a ni," a ti leh a.

"Hmmm, chutin ti kher lo la, kan induh tawn chuan kan inphû ve ve tihna, khatiang kha chu sawi tawh miah suh," ka lo ti vat a.

"Aw le; mahse, sawrkâr zêm zen ngat elpui ka nei a ni tih hriat chuan awm mai mai a theih miah loh, chu chu ka ngaihtuah chhuak ziah," a ti ve leh thung a.

"Hna chu thawh tùr, nasa lutuka thawh erawh taksain a tuar a, chhiat rupna a thlen thei a ni, chu chu vawng reng la aw," tiin a kut chu ka chùlsak hoh hoh a, nimin lama a lei laihna chu a ni ngei ang, a kut pawh a durh pheuh pheuh mai, a na ngawt ang chu!

Chawhnu dâr 2 vêlah kan chhuak chiah a, a mamawh kan lei fel hnuah chuan min thlah a, kan in pêng chho thlengin. In thlenga min thlah tùrin ka duh lo tih a hre ve tho a, in bul hnai tak thleng pawhin min thlah lo rêng a ni.

Rilru hlim taka ka awm lai chuan tlaia ka pa rawn haw chuan ka vawiin boruak hlimawm tak chu a rawn tichhe leh ta vek mai!

"Kha pa kha i bialpa a ni maw? Țhen vang vang ang che, hmuh lah ka duh tawh hek lo, ka hmu dùn leh che u a nih chuan mi zîngah pawh ni se ka hnûk haw tawh ang che," rui phual chung chuan a ti țèng chhuai chhuai a, min en rùn mai a, ka hlauh êm avàng chuan țawng pawh ka țawng ngam lo hrim hrim, ka nu leh ka naute pawh an ngawi dâk mai.

"I hria maw? Inrinniah pawh i chhuak tawh lo ang, Tluanga hi i pasal tùr a nih hi, ka sawi fel vek tawh. I nei ngei ngei ang, kha pa kha hmuh pawh tum tawh suh ang che," a ti leh tuar tuar a, ka ngawi ngal mai.

"Hei, in u hi vêng ngun ang che u, chhuahtîr tawh suh u, in hria maw?" tiin  Tatei, Tapuia leh ka nu chu a vìn leh khur khur mai a, keimah avànga ka naute leh ka nu hlau hmel hmuh chu hrehawm ka ti kher mai.

Chaw pawh kan ei hlei thei lo, ka pa lungawi lo thinrim chu a ãng reng mai a, min àn khum pahin min vau bawk a, rui chhe over a ni lo bawk nèn, kan chhâng ngam miah lo. Ni dangah chuan hetiang hian a awm ngai tawh lo asin le, vawiin lamah Zorina nèn min lo hmuh dun vàng vek.

Chutiang boruak nuai a nih avàng chuan Tluanga lo lêng pawh chu ka chhàwn țha lo khawp mai a, ka nu erawh a fing a, hmel hlim takin a lo chhàwn a, ka pa pawh a insüm ve thei tawh bawk nain boruak erawh a nuam chuang dêr lo.

Zàn mutnaah chuan Zorina min rawn text-na chu ka en ka en a, ka pain min hau bawk nèn, ka mittui chu a luang ngiai ngiai reng a. Ka pa thil sawite kha han hre ve ta se, engtin nge a tih ang le? Tluanga a duh avàng maia Zorina țhen tùra min ti ringawt hi, ka ngaih dàn pawh min zâwt ve tùr a ni asin. 

A tûk zînga chaw kan ei lai chuan," Ka sawi kha hre reng ang che, kha pa kha țhen vang vang rawh, engtin nge a chàwm ang che? In mawngah êk a chhuak lo ang," ka pa chuan a ti leh a. Zu rim a nam leh vung vung tawh, a in leh hman tawh a ni ngei ang.

Ka nu chuan," A, duh tâwk rih teh, an la naupang a, an tâna țha tùr pawh an la hre thiam rih lo ve a nih hi, chaw tui takin ei rih zâwk teh ang u," a lo ti a, chu chuan a thinrimna a kai tho leh zak a niang chu," Lo inrawlh ziah suh, ka chàwm vek in nih hi, min hnial ngam tùr pawh in ni lo," a ti leh ta tùn tún mai a.

"Pathianni zîng a nih hi, inkhâwm te kan duh dâwn a, ei thuai zâwk ila?" ka nuin a tih leh chuan," I fate țan zàwngin thu lo nei tawh miah suh, in zavai hian ka vaw kãwrh kãwrh mai ang che u. Thu țha ka hrilh che u aw, zàwm mai rawh u, in tâna țha lo ka sawi lo," a ti leh a.

Ka chaw ei a tui loh avàng chuan ka tho ta thuai a, chu chu min hmuh chuan," 'Ka titau e, ka thin a rim e' te i ti ngam a ni maw? Khawnge, ka'n vaw teh ang che," tiin kawngka bula hmunphiah kan khai chu banin min rawn vaw zui nghâl zat a, ka phu nasa teh asin!

"Bawihi pa, duhtâwk teh," tiin ka nu chu rawn thovin a rawn chelh a, ka pa lah chu, chu chuan a thinrimna a belhchhah sauh emaw tih tùrin vuak rem lai laiah chuan min vaw zawt zawt a, ka nu chu ka naute pahnih chuan an rawn pui vat bawk a.

Ka lu-ah chuan min vaw lo, ka lo indanna ka kut erawh a thî țhet țhet a, ka hnung leh ka mawng pawh na lo lai a awm mang lo. Ka țap miah lo va, ka mittui erawh a tla zawih zawih thung, ka taksa nâ chuan min tina hran lo, ka rilru erawh na tak a ni. 

"Ka thu âwih lo chu ka vaw zêl ang, in hria maw? Tu mah ka dìm dâwn lo che u," tiin hmai sen țûnin, hmunphiah chelh ràn chung chuan a ding ngur a, vuak erawh min vaw tawh lo.

Ka nu chuan," Duh tâwk tawh teh, awm ngaihna min tihre lo a ni, a hrehawm êm mai," a lo ti sap a, a aw khùr dar dar ațang chuan a hlauthâwng hle a ni tih ka hre thei mai a.

"Lalrintluang, ka thu âwih tawh ang che, i pa ka nih hi, i tihtauh khuma i thinrim khum tùr ka ni hek lo. Hei hi hriaang che, kumin chhûng ngei hian pasal i nei ang, chutiang rilru chu pu ang che," tiin hmunphiah chu a dah a, a kut a sil nawk nawk a, a chhuak zui vut a.

*MI ȚHA NI TÙR HIAN PAWISA SÈN A NGAI HAUH LO NIA*