☆LAIRIL LUAHTU☆ - 13 By Dingdi Pachuau

 ☆LAIRIL LUAHTU☆ - 13 By Dingdi Pachuau

Ka inkhâwm lo chiang khawp mai. Ka taksa hmun tin mai chu a na sup sup a, a vûng țan deuh bawk nèn, ka mawnga min vuakna avàng chuan ka țhu țha ngam lo va, ka mutin ka hnung a na bawk si, awm ngaihna ka hre lo a ni ber. Ka nu pawhin inkhâwm lovin min awmpui a, tihngaihna tak a hre bîk lo, a thiam ang tâwkin min zilh a ni mai, kei erawh ka ngawi reng thung. Țawng chhuak lo mah ila ka rilruin thil tam tak ka sawi țeuh thung.

Min vuakna hi nâ ka ti lo a ni lo, pâwn lama ka nat aiin chhûngril lamah nâ ka ti zâwk daih. Ka țah loh avàngin nâ ka ti lo tihna a ni lo va, ka mittui tla khân ka chhûngril natna chu a hril ber àwm e. Zorina vànga vuak ka tawrhna hmasa ber hi ka theihnghilh thei tawh ngai lo ang, amah vànga ka tuar thei hi ka lâwm bawk, ka phatsan ngai dâwn si lo.

Nula ka ni ve tawh a, vuak rual ka ni tawh bîk lo. Mihring kan lo pian chhuaha mi ang pângngai kan nih chuan hmel duh zâwng pawh kan nei ang, rilru lama rualban chiah lote pawhin duh zâwng an nei țhìn a nia. Min duhpui ka duh bîk lo a ni ve mai a, kut êm han inthlãk nân chuan ho ka ti ve tlat a ni.

Zànah Zorina'n min rawn text chuan ka chunga thil thleng chu a them pawhin ka hrilh lo hrim hrim, video call erawh ka hnial thei hrâm. Ka fîmkhur a ngai rih si a, chuti lo chu ka pain min man chhuak a nih leh hlauh chuan engtiangin nge min sawisak ang tih ka hre si lo, amah vànga tawrh chu ka huam; mahse, țûl lêm lova kut tawrh ringawt chu ka duh bîk lo.

Ka pa erawh a lung a awi thei ngang lo a nih ka ring, kan awm tlàn tawh chuan min khak reng mai a, a rui ve țhin bawk nèn, min zilh a, min hau reng mai. Ka chhâng lêt ngai lo va, chhûngril lamah erawh min zilhna chuan hna a thawk tam lo viau. Hlimni hmel kan hmu khât ta, U Tluanga a rawn lèn erawh chuan a insûm ve deuh a, a mâkpa hual a lo ni bawk nèn, a inthup ve deuh chu a ngai bawk a ni.

Zan khat chu ka nu nèn an inbauh deuh a, chu pawh keima chungchângah bawk a ni. An inbauh ţan dàn hre kher lo mah ila ka pa rawn vîn chho țawng chuan," Nang hian hetiang hian lo țan ziah suh, a tâna țha tùr a nih hi, kha a bialpa ve kha, sawi lo teh ang, Tluanga hi a țha ber. Pain thu ka sawi a nih chuan  eng mah lo sawi ve suh ang che, mi țha hria ka nih hi, i inchhûnga tûnhnaia bungraw thar tam zâwk hi Tluanga lei vek a nih hi, an inneih hma hauh ațangin kan chhawr tawh tih hre ta che, ani aia țha hi chu i hmu tawh dâwn lo,"a tih khur khur chuan thil awmzia ka hre fiah ta kuar kuar mai.

Ka pa lei emaw kan tih țhinho kha U Tluanga lo lei vek a lo nih chu! Ka pa lah khân 'Ka lei' kha a ti mai bawk si a, zanin zet chu a puang ta vek mai, han âwih lo ngawt dàwn ila,  zu an ruih chiah hian thu dik tak an sawi chhuak țhìn si a. U Tluanga hmuh leh pawh chu a va zahthlâk duh dâwn tak êm! A sumin min lo lei țan tawh a lo nih chiah chu, ka pa lahin a lo pawm êm êm mai si.

"Chu, kan fanu chu inchhûng bungraw hmangin i lo hralh țan dèr tawh tihna a ni maw?" ka nuin a tih ve chuan ka lo îp zawr mai. Ni dangah ka nu hian a chhâng lêt ngam ngai lo, ka pa a thinrim tawh phei chuan a ngawi mai zêl a, ngawi thei ka lo ti viau țhìn a nih kha; mahse, zanin chu a ni ta tlat lo.

"Ka hralh lo, a pasal tùrin a nupui tùr leh a chhûngkaw tân thil a tihsak a ni ve mai," ka pain a tih leh chuan

ka nu chuan," A va zahthlâk tak! Tluanga chuan min va hmu hniam tawh dâwn rua êm!" a lo ti leh tlawk tlawk a.

"Zanin hi eng i hria nge ni, min va chhâng lêt ngam ve...! Ngawi tawh rawh, ka chàwm in nih hi, in zavai hian, ka thu thua awm tùr in ni. I fanu pawh chu lo zilh țha hle rawh, ka thu anga a awm loha ka zilh leh hlauh chuan ka thinin a tuar lo leh mai ang," ka pa chuan a ti leh kûk kûk a.

Ka thinrim chu ka insehruh nasa mai a. Pa ber a ni a, a nupui fanau min chàwm lohin tuin nge min châwm se a tih? Pa ber a nih chuan min chãwm tùr a ni ang chu, patling chuan a nupui fanaute a chãwm ngei tùr a ni, 'Ka chàwm' tih reng mai.  A dik lo chu ka ti lo, min chãwm miau a; mahse, pa berin a nupui leh fate a thinrim châng apianga 'Ka chàwm' tih ziah chu a pângngai lo lam deuh chu a ni.

Ka pa ka hlauh êm vàng pawh ni chuang lovin Inrinniah chuan ka chhuak lo va, Zorina pawh rawn kal rih lo mai tùrin ka ti, ka chhuanlam siam erawh a âwih kher ang em chu ka hre lo va, a rawn kal ta bîk lo. Zànah ka inkhâwm loh avàngin Mami'n min rawn bia a, ka dam țha lo em ni tih min rawn zâwt a.

"Ka dam alawm, ka rawn inkhâwm lo mai mai a nih kha, lo lêng la," tiin ka sâwm pah zaih a, U Tluanga a rawn kal leh țêp tawh àwm si a, Mami a awm ve chuan boruak ninawm pawh a zia deuh mahna ka ti a ni.

Ani pawh chuan," Nia, ka lo kal khât tawh tawp, scooty a remchàn chuan aw," ka rin loh deuh chuan a rawn ti ve a, rilru hlim loh kârah ani a rawn lèn  theih hlauh chuan ka hlim ve deuh thei ang chu.

A rawn lêng ta ngei a, ka pa erawh chaw ei khama a chhuah nghâl vut avàngin a awm lo va, a awm loh avàngin rilru thawveng deuh mah se U Tluanga a rawn lèn ka rin avàngin a thawveng kim lo deuh a, Mami hmel ka hmuh erawh chuan ka zãng huai maiin ka hria.

"Kan exam lah chu a hnai ve tawh sia, ka zir nasa mang si lo va, ka tichhe ngawt ang," Mami chuan ati ham ham a, thingpui hâng ka pêk chu a in pah a. A rawn thlen țan tirhin ka nuin a lo be ve thuai a, rei vak lo hnuah chuan room lamah min kalsan a, ka naute pahnih pawh in hnuai ațanga rawn chhovin lehkha an zir leh tawh a. 

Kei chuan," Lehkha zir lam chu sawi lo teh ang, rilru hahna hlîr mai," ka ti sap a, thâwk ka la pah hap bawk a. Mitko sàn ãk pah chuan," Eng thil nge ni ta? In inbauh deuh em ni a?" ka lama rawn thle hnaiin a rawn ti sar sar a.

"Bauh nang, kan țha," ka lo ti thung a. Mami hian U Tluanga a lo lëng țhìn tih hi chu a hria, ka hrilh ve tawh miau a; mahse, a la hmu lo va, ka pain min duhpuiin Zorina a duh lo tih hi chu ka hrilh lêm lo, kan chhûngkaw buaina hrilh chiam ka duh hran lo a ni, hrilhin awmzia a awm tam àwm bawk si lo va.

U Tluanga chu a rawn kal ta ngei a, chutia inlêng ka neih tâkah chuan Mami chu haw a tum nghâl pang mai; mahse, keiin ka phal tlat lo thung a, ka mitmeiin ka khap nasa, ani pawh chu bet lo tih hriat zet hian a țhu ve leh ta reng a. Kan titi chho a, U Tluanga pawh chuan kan chhûngkaw boruak a hre lêm lo bawk a, a titi suah suah mai a, tlangvâl fel tak ni lo se ka ti rilru țhìn. Ka pa vànga tlêma ka ngei deuh hlek tih lohah chuan sawisèlna tùr ka hre hran lo, mi fel tak a lo ni kher kher hi ka haw zâwk, ngei viau mai ila ka duh asin.

U Tluanga haw hma chu haw ka phal loh avàngin a lêng ve ta reng a, U Tluanga haw rualin a haw ve ta nghe nghe a, in a thlen hnu àwm vêlah message a rawn thleng nghâl zat.

*Zorina nge i duh Tluanga?*  tiin. Ka țhen sak a, ka nuih erawh a za miah lo. Anni pahnih hi khaikhin ka duh miah lo, ka pa khaikhin țhin pawh duh loh tawh nâklaia, aniin a rawn ti ve hi ka duh bau lo!

*Pakhat tê pawhin khaikhin chhin suh, engkimah Zorina 100%*  tiin ka chhâng lêt ta vat a, a nuih a za leh khawp ang chu. Nui mah se a pawi lo, ka dinna hi a nghet ve êm asin, an sawichhiat poh leh ka duhna a zual, ka pain a han sawisèl phei hi chuan, va pan dàwr dáwr hial ka duh țhìn.

*Inlêng i nei rei a ni maw?*  Hei chu Zorina message ve thung. Nia, ka online tih a hmu a ni ngei ang chu, inlêng ka neih chuan ka online thei ngai si lo va, a rawn sawi pawh hi a dik reng, a tlai ve tawh rêng bawk a ni.

*Nei leh pek e maw le, ka țhiannu Mami kha a lo lêng a*  tia ka chhàn chuan  *Mami lo deuh pawh?* a rawn ti leh a. He pa hi min lo enthla te hi a lo ni lo maw le?! Nge min rawn dâwp kual leh zâwk?

Dâwt hrilh duh lovin *Lêng ve bawk e; mahse, i dinhmun a pângngai reng aw*  tiin ka chhâng leh a. Inlêng ka nei țhìn tih a hre ve tho a, dâwt hrilh kher ka duh lo a ni. Ka thinlung erawh amah chauhin a nei tih hria se, ani lo hi beisei, innghahna ka nei lo tih hria se ka duh, ka hrilh zak lo bawk.

*Ka ngai che a nia aw...!!! Ni tin i hmel hmuh châkin hun ka hmang a, ka hmuh loh che hian ka thlâkhlelhna che a zual a, ka hmuh che lah hian ka duhna leh ka hmangaihna che a zual sauh bawk a; mahse, hmuh loh che ai chuan hmuh che chu ka duh êm êm a ni*  a rawn ti duah a, a thu ziak mal tin mai chu ka chhiar nawn sek a, ani pawh hian min thlahlelin, min duhin min hmangaih a ni tih hi chu a zêp thei bîk lo chu a ni.

*******

"U, vawiin chu min chhuahpui lawk rawh aw?" Tatei'n a tih chuan," Khawiah maw?" ka lo ti vat a. Ka chhuak a nih chuan ka pa a thinrim leh ngei àwm si a, Zorina hmu tùr pawh ni lo mah ila ka chhuah hrim hrim a phal lo a ni; mahse, Tatei hi hnial ka tum hran lo.

"Kan rei lo ang, kal zawk a ni mai, pa lo haw hmain kan lêt leh hman daih ang," ani chuan a ti leh a. Min hlauhthàwnpui ve tho; mahse, ka pa chhuak lo haw hmaa kan thlen hman tho dâwn chuan a pawi hleinem.

Ka nu bulah pawh chuan kan hrilh thlap a, scooty kan neih ve loh avàngin kein kan kal dàwr dáwr a, kan hmanhmawh ve viau a ni. Hauh tuar ka duh lo va, ani lahin hauh ka tuar min duhpui bîk lo bawk, ka pa rawn haw hmaa in thlen leh hman ngei tum chuan hmanhmawh phelêngin kan kal dàwr dáwr a.

A pheikhawk a țhiannuin a lo hawhsak a ni àwm e, chu chu ka lampui a ni. Haw kawngah chuan," Eng atân nge a hawh rêng rêng a?" tia ka zawh chuan," A rei tawh mai, kha, 'Zo Ni' kan hman kha i la hria em? Khami ni khân a hàwn a, a rawn ken theihnghilh zêl sia, ka lam ta tawp a ni," tiin min chhâng a.

"A nih tak chu, i țhian hnai tak a ni ang maw?" ka tih leh chuan," Hnai lêm lo, kan section erawh a inang a. En teh, class-ah pawh a rawn bun ka hmu asin, mak ka ti ru khawp mai a, ka pe mai dâwn em niang aw ka ti deuh nain ka birthday-a Nu min pêk kha a ni ve bawk sia, ka ui ve a," a lo ti leh mai a. Chutia a țhian hnai pawh ni lém lovin a pheikhawk ni hauh lo a han hàwn daih mai chu mak ka ti ru deuh khawp mai a, chutah, class-ah pawh a lo la bunsak zêl a nih phei chuan mi pângngai vak lo chu a ni ngei ang chu.

"I pheikhawk ang chiah a lo nei ve pawh a ni maithei asin, i hre chiang lo a niang?" tia ka sawi chuan," Teuh lo mai! Ka pheikhawk ngei a ni, lo nei ve ta tehrêng pawh ni se, ka chhinchhiah rûkna zawng zawng nen chuan a inang vek kher lo ang," a lo ti leh țâlh a, ka hnial tawh lo. A hre chiang ve thawkhat êm mai si a, mahni pheikhawk ni lo, țhian țhate pheikhawk pawh ni chuang lo class kal nân han bun chhuah duh chu a mak danglam ve êm asin. Ka tih ngai loh thil a nih vàng pawh a ni mahna le. 

In kan thlen hma chuan ka pa țawng kan hre tawh, a lo haw tawh a nih chiah chu, kan hmanhmawh ve hle kha a ni sia. Kan luh hma chuan Tatei chuan hlauthâwng tih hriat tak hian min en a, kei erawh chuan," Ho lutuk! Kan chhuah chhan kan hrilh mai dâwn alawm," tiin ka thlamuan a, ka nuih sak a, in chhûng luh erawh ka phûr fahran lo kher mai.

Kan lût ta ngei a, ka pa chuan thinrim hmaisen țûn hian," Kan mihurnu chu, khawiah nge i va chhuah leh dâw dâw a? Ka thu i âwih lo kher mai!" tih tuarh pah chuan hmunphiah bawk chu a chuh leh a, ka bânah min rawn hlap nghâl țhuai a, ka nu leh Tatei hlau chu an lo țê tuar bawk a.

"Pa, ka țhiannute inah ka inkalpuitîr lawk a nih kha, rei pawh kan rei lo," hlauh vànga tha khùr hlawk hlawk leh țawng khùr dawt dawt chung chuan Tatei chuan a lo ti țâwk țâwk a.

"Lo țan suh, a hur man ka'n hmuhtîr ang e, lêrh lutuk mai! Mi sual awm țha duh lo, pate thu âwih lo ka duh lo," tiin a rem lai laiah chuan min rawn vaw leh ta zawt zawt a, ka nu chuan a theih angin a lo dawm ve ngei a, Tatei pawhin a lo pui ve a; mahse, eng ruai an ang lo. Kei erawh chu ka dinna hmunah ngawi rengin ka ding a, țap lo tùr leh nâ tih vànga țê chhuak lo tùrin ka insehruh sauh sauh a.

"Engati nge ka thu i âwih loh êm êm a? Hetiang fanu ka nei che hi ka âwih thei lo zâwk a ni, Tluanga ka bia ang a, tûn kâr chhûng ngei hian i palai tùr hmel kan hmu ang, duh aia hmaa pasal i neih mai a ngai dàwn a nih hi, i awm dànin zir mawlh hek lo le," a ti leh tùn tún a, chumi pah chuan ka hnungzângah er zawk khawpa na chuan min han hlap leh ta țhuai a, nâ ka ti kher mai, ka au chhuak țhelh a ni.

Ka nu a țap a, Tatei lah chuti bawk. Kei erawh ka țap lo, țap lo tùrin ka infuih a ni, ka pa hian țhenawm khawvêngte pawh zah miah lova a fanu nula tawh kut min han thlâk duh mai hi zahthlâk ka ti a, ka thin a rim a, chu chuan tawrhchhelna min siamsak tlat, ka mittui pawh a tla hek lo, ka insehruh nasa êm êm thung a ni.

"Ka thu i âwih duh loh chuan he inah hian i awm thei lo ang, ka thu âwih lo rêng rêng chu he ina chèn ve hi ka phal hek lo, ka in a nih hi, ka in," ti tùn túnin a vei thuak thuak a, thinrim meng sen rûm hian min melh kul reng bawk a.

"Ni lo, i chhuak lo ang, pasal i neih dàwnah chauh i chhuak thei ang, i room-ah kal nghâl rawh," tiin hmunphiah chuan min nawr a, ka room-a min nawr luh hnu chuan pâwnlam ațangin a kalh ta khap a," Tu mahin chhuahtîr suh ang che u, vawiin leh naktûk thlengin, a chhuak tawh tùr hi a ni lo tawp mai," a tih khur khur chu ka hre thei. Ka room kawngkhàr bulah chuan ka ding reng a, heti êm êma ka pain ka chunga a duh chhe ta mai hi eng thilin nge mawlh ang aw ka ti rilru a, zu hi chu a bulpui ber chu a ni ngei mai a, a kawchhûngah tulûm a lût a nih ka ring bawk.

Hetiang reng chuan kan hlim thei dâwn chuang lo, ka pa a hlim lo va, min hmuh apiangin a thin a rim ziah bawk si a, awm lo ta ila a zia mahna! Kei hian ka tithinrim zual a ni, a lakah chuan mi sual ka ni miau mai si a, ni leh lo, mi hur zâwk maw le! Ka mittui a rawn far ta koh mai, mi hur chu ka ni bîk lo asin, ka hur avànga tlangvâl pakhat chauh pawh ka mutpui tawh sawi tùr a hre àwm tawp si lo, chuti chung pawh chuan ka pa tân chuan mi hur chauh mai ka lo ni si. Ka awm dàn tùr ngaihtuahin rilru chu ka siam sauh sauh a, thil țha ber erawh ngaihtuah chhuah a har ka ti.

Ka chhuak miah lo tak tak! Inthiar tùr bãkin ka chhuak lo, chaw ei tùrin ka nuin min rawn ko a; mahse, ka ei thei dâwn chuang lo tih ka hria a ni, ka rilru a nat êm avàngin ei tùr thil  eng chi mah ka lêm thei lo ang tih ka hria a, ei pawh ka tum buai lo law law. Thingpui leh a hmeh pawh min rawn pe ve reng; mahse, ka ei chuang lo, tui erawh ka in thung.

Thawhțanniah erawh chuan class kal tùrin ka chhuak a, ka pa pawhin class kala chhuah chu a phal alawm; mahse, class kal ka tum hauh lo, Zorina ka phone lâwk thlap a, ka thawmhnaw tlêm, a pawimawh zual tùr ka ak ru chhuak bawk a, min lo nghahna lam pan chuan ka kal nghâl sawk sawk a, ka phone ka off daih bawk a.

Min lo hmuh chuan hlim hmel tak hian min lo nuih var var a," Min hmuh i duh thu i sawi khân mak ka lo ti khawp a; mahse, mak tihna kha làwmnain a thlâk rang teh asin," a lo ti var a.

Thu dang sawi kual hmasa lo chuan a bula țhut pah chuan," Zorin, nupui neih i duh tawh em? Pehhêl hauh lovin min han hrilh teh," ka ti nghãl tâwng a. Hei hi ka hriat a pawimawh lutuk, ka dinhmun hrehawm zet ațanga min la chhuak tùr hian amah bãk hi beisei dang ka nei si lo.

A mitko a sàn ãk a, chutah," Ka nupui tùr i nih phawt chuan engtik hunah pawh, tunah pawh hian nupui neih chu ka inpeih reng," a lo ti ta chiah mai. Hei hi ka hriat duh chu a ni, a thu sawi chuan min tihlàwmzia a hre pha kher lo bawk ang.

"Chuti, innei ang, nang lo mi dang pasala ka neih luih a ngaih dâwn tho chuan," ka tih chuan hriat thiam loh hmel deuh, mit khap miah lo hian min en kar a, kei erawh chu ka awm hle hle thei lo, ka rilru a hmanhmawh a, inneih chu a duh lo mai ang tih ka hlau bawk a ni.

"I ti tak tak em?" a rawn tih sap tâkah chuan thaw huai chung hian," Aw, ka ti tak tak! Inru mai ang, min ru mai rawh," ka ti chhuak ta hlawl a.

"Aw le, chuti chu, hun khawhral lovin kan kal nghâl mai dâwn em niang?" a tih chuan ka ding nghâl vat a, chutih rual chuan ka taksa na awt avàng chuan ka țhen sak bawk a, ka pa min vuakna ka hnungzâng a la dam chiang lo deuh a ni.

A bike-ah chuangin nghet zet hian a kâwngah ka kuah a, a hnungah chuan bei tlãnin ka maimichhîng vang vang bawk a, țawng ka peih lo, eng thil dang mah ngaihtuah ka duh lo bawk. Tuna ka awm dàn hi nuam ka ti lutuk, ka thlâ a muang ngawih ngawih lutuk tlat.

An in pêng kan thlena gate-a kan luh dâwn chuan,"I haw leh duh a nih pawhin sawi hreh-" a la sawi zawh hma chuan," Engkim huamin ka pan che a, khawi hmunah pawh ka zui zêl ang che; mahse, kan ina haw leh chu ka duh tawh lo," ka lo tih khalh vat a.

Nghet zeta ka kut chu hmerin," Ka âwih thei lo hial zâwk a ni," a ti sap a, chutah, in kai rial chuan an in lam chu kan pan a, inah chuan a pa a lo awm a, thil awmzia chu a hrilh ve a.

A pain," Aw, a ni maw? Chuti chu, Lunglei lamah in phei nghãl mai dâwn em niang? Hetah chuan Maria-i pain a rawn zawng hmu hma àwm che u si a," a tih chuan Zorina chuan," Pawi miah lo! Sawtah chuan min rawn zawn nachâng an hre miah lo ang, vawiin là láa phei hi a țha nghe nghe ang," a ti ve a.

"In mamawh tùr chu a la awm vek ang, phei thuai kha a țha, kei chu min ngaihtuah miah suh ang che u, ka dam țha a, ka lo awm thei lutuk a nia," a pa chuan a ti leh sauh sauh a.

Thawmhnaw tlêm a siam ve a, inah chuan rei pawh awm lovin kan chhuak ta thuai a, Lunglei lam panin kan tlân ta vang vang a, bike chuan kan thleng har lutuk lo ang; mahse, ka rawl dâwn lutuk, ka taksa la dam chiang lo bawk nèn; mahse, rilru a hlim tawh tho chuan a ho êm mai, a dam vat dâwn asin.

Kan chàwl lo, Thenzawlah erawh minute 10 vêl chauh tak tak kan chàwl zawk. Keimah zâwkin chawlh ka duh lo a ni, thlen thuai thuai ka duh si a, kan thlen phawt loh chuan rilruah hlauhthàwnna a awm ve tlat si a, rilru a hahdam thei lo a ni.

Tihian, kan inru ve ta chu a ni mai si a, chu pawh ani phei chuan eng mah a hre lâwk lo zui a. Kei erawh chuan Inrinnia ka pain min vuaka room-a min khung ațang khân ka lo ruahman vek tawh a ni, min hnial ka ring lo rêng bawk a, a chhan chu min hmangaih a, harsatna ka nei tih a hre ve tho bawk si a, ka pain amah vàng hian min vaw țhìn a ni tih ka la hrilh lo mah mah!

*HMANGAIH NIH KAN DUH VIAU LAIIN MI VA HMANGAIH CHU HARSA KAN TI VIAU LAWI SI*