☆LAIRIL LUAHTU☆ - 14 By Dingdi Pachuau

 ☆LAIRIL LUAHTU☆ - 14 By Dingdi Pachuau

Ni a sa ngar ngar bawk a, a lum ve khawp mai. Haulawng kan thleng a, kawngah chuan min lo tiding a, Haulawng piah lawkah chuan kawng an lo siam avàngin kawng veilama kawng awm zuiah chuan tlân tùrin min lo ti a, ka hre thiam lo kher mai. Zorina erawh a tlãn nghâl  mai bawk a.

"Hei hi eng kawng nge ni? Lunglei kan thleng thei dâwn em ni?" tiin ka zâwt vat a, ani lah chuan," Kan thlen theih tâk loh leh Aizawlah kan lût leh dâwn tihna a ni mai a," a lo ti mai a, a hnungah chuan ka sik hlak a.

"Min hrilh țha teh, kan tlãn char char ang a, khawnge kan tlàn thlen ang?" ka ti leh a, ani pawh chuan țha deuh hian," Zotuitlâng kan thleng ang a, Chêngpui, Râlvàwng, Dâwn, Zobâwk... Chuan, Lunglei kan lût mai ang chu," tiin min chhâng ve mai bawk a.

"Ka la kal ngai hlawm lo, an hming erawh chu ka hre ve tawh țhìn chuan ka hria," ka lo ti a, ani chuan," Hria ang, Ropuiliani kha in zir tiraw, college-ah khân?" a lo ti a, rang zet hian," Aw, zir e, drama kha," ka lo ti ve vat a.

"Dènlung leh Râlvàwng hian a thlàn an inchuh tih kha i hria em?" a rawn tih leh chuan," Aw, hre deuh, i hre ve zâwk elo?" ka ti ta hâw a, mak ka ti alawm. E, a mak leh si lo, a mak lo, lehkhabu a chhiar tam viau tak alawm, kei aiin a hre daih zâwk ang.

"Chuti, Râlvàwngah chuan a thlàn chu en ve chhin ila, a remchâng sia?" tiin ka sâwm ta zaih a, ani chuan," I hmanhmawh viau emaw ka ti?" a lo ti thung a, a kâwnga kuah ngheh sauh pah hian," Kan kal leh kher tawh àwm si lo va, hun remchâng zawn a ngai alawm, thlàn chu tlawh lawk ang aw?" ka ti leh a.

Râlvàwng kan thlen chuan kan mi hmuh hmasak ber hnênah chuan Thlàn awmna chu kan zâwt a, ani chuan Thlàn awmna chu min kawhhmuh ve mai bawk a, chutah, Zorina chu ka va en a, ka nui ta ringawt a!

Kan tlàn leh hnu chuan,"Ka hre sa reng a, ka hrilh duh lo che a nih kha," a ti lawi a, a hnungah chuan chumsakin," I va sual tak! Khatiangin kein kal a ngai tih chu hria ila chuan 'Tlawh ang' pawh ka ti hauh lo ang maw le," ka ti nang nang a.

"Lungawi viau phawt mai teh, a ruh i hmu ta tho alawm," a lo tih chuan," Nia, ka lungawi mai ang. Nih leh, Dènlungah chuan kan kal ve chhin dâwn em niang?" ka ti leh zat a. A ruh nia an sawi Râlvàwnga mi kha chu kan en ve ngei a, a mal ruh niin an sawi nghe nghe a, thlàn chu han hmuh ve hrim hrim chu ka châk viau tho a; mahse, tûn atân chuan a rem rih si lo.

"Kan tlànna tùr lam a ni dâwn lo va, hun remchâng kan neih hunah kan la tlawh ve zâwk dâwn nia," a tih chuan," A țha viau mai, Mizo History-a mi hmingthang ruh ka han hmu thei a nia, Mamiteho bulah chuan ka insawi thei tawh viau ang chu, hun remchângah a thlàn pahnih hnihin kan la tlawh dâwn zui," ka lo ti ve zat bawk a.

Lunglei kan thlen chuan a tlai ve deuh ruai tawh a, Serkawn lamah kan tlãn chho ta zêl a, Dintei pasal neihna lam kha a nih vàngin ka hmu ang tih ka hlau ru khawp mai, kan inru tih chu an la hre kher lo pawh a ni ang a; mahse, inhmuhtîr chu ka duh chuang lo.

Dintei pasalte in ațang chuan kan awmna tùr chu a hnai vak lo, kan pènna a la dang zui bawk a, ka tân a hlauhawm pha lo ang chu maw. Pâwna ka chhuah loh chuan a hlauhawm pha lo ang, kan lêng chhuak dâwn pawh a ni chuang lo va.

Zorinate in chu a foundation concrete a ni a, a chhãwngin an lo sa ve ngei a, a zau bawk a ni ang, in hnuai chu chhûng hnihin an luah a, in chung lam pawh chhûng hnih luah theih tùr tho a ni a; mahse, in hnuai lam ai chuan a zîm deuh ang, chhûngkaw member tlêm deuh tak luah theih chi a ni ang chu. Keini pahnih chu in chunga in pakhat zâwkah chuan kan lût ta a.

Luah khàt a ni tih hriat tak hian a lo rimtui lutuk lo va, balh erawh a bàl lêm lo. Tukverh chu a hawng zung zung a, boruak thianghlim a rawn luh tâkah chuan a rim pawh a zia chho mai. Kei pawh awm mai mai bîk lovin chhuat ka lo phiat ve bawk a, tukverh a hawn zawh chuan," I ril a țâm ang, thingpui ka'n chhuang ang e," a ti nghâl a.

Ka mal kham țhûm mai chu ka chùm awk awk a, scooty-ah chuan ka chuang fo a; mahse, hetianga thui hi ka la chuang ngai lo a ni, bâkah ka pa min vuakna kha ka taksa a la dam chiang lo deuh nèn, chu chuan min tina zual niin ka hria.

"I lo awm hreh em? I hreh loh chuan chawhmeh ilo lei tùra chhuah a ngai a," a tih chuan," Hreh lo ve; mahse, ka chhuahpui ve lo mai ang che aw, Dintei, tlêm lai deuha pasal nei kha, kha kha ka hmu fuh ang tih ka hlau sia," ka lo ti vat a. Ani chuan," A ngai lo, i lo awm hreh loh phawt chuan kei ka kal thei alawm," a lo ti ve bawk a.

A chhuah hnu chuan ka inngaihtuah chho țan a, tunah hian tlai dâr 4:50 a ni tawh a, ka nute chu ka haw loh avàngin an buai țan tawh ngei ang chu, min rawn phone an tum nasa tawh viau ang. Ka phone lah ka switch-off daih mai si a, ka chanchin hre tùr ber Mami an zâwt tawh maithei a ni. Inrûka tlàn dun hi ka duh dàn a ni hran lo; mahse, kawng dang ka hre ngang lo a ni. Pasal neih hi ka la duh vak lo bawk a, University chhuah phawta hna neih ve hnuah chauh pasal neih chu ka tum ve alawm; mahse, tum dàn ang hian a lo awm vek theih bîk loh a nih hi.

A rawn haw chuan eirawng a bâwl nghâl a, ka puih a phal tlat loh avàngin a bulah ka lo tawlh ve mai mai a, a thil ti lai lo biak buai chhên ka duh loh avàng erawh chuan ka țawng mang lo thung.

"Ka bàwl zawh hunah i ei țeuh dâwn nia, i ril a țâm tawh em?" tia min zawh chuan," Țâm lo ve; mahse, i thil siam chu ka ei châk tawh khawp mai, a tui dâwn si a," ka lo ti a.

"I chau àwm si a, tuilumin lo inbual la, i harh phah deuh sawtin ka ring," a ti leh a. A țha ngawt tak ang, ni kha a sa țha ve angreng si a, tuiluma ka intleuh phei chuan ka rawl pawh a zia deuh ngei ang.

Tuiluma han inbual sar sar chu a nuam chiang asin, nuam tak a ni. Ka duh aiin ka rei phah lehnghâl a, ka chhuah chuan kan room tùrah chuan a lo awm tawh nghe nghe a.

"I bâwl zo tawh elo? I va'n rang!" tiin ka bag ațang chuan ka thawmhnaw hâk tùr chu ka phawrh nghâl a, tlêm chuan ka zak deuh, towel nèn ringawt ka ni si a, mipa hmaah hetiang hian ka la qwm ngai hauh si lo va, ka nau Tapuia bulah pawh towel nèn ringawt chuan ka awm ngai lo a ni.

""Engati nge i hnung kha?" tiin min rawn hnaih nghâl a, ka hre chhuak nghál zawk, ka hnung chu a hmuh theih loh tùr zâwngin ka her ta nghâl a; mahse, min rawn hnaihchilh ta si a, ka che sawn ngam ta lo.

"Engati nge? A nâ em?" tiin min kuai her a, ka hnung chu a en leh ta a, kei erawh chuan nghet zetin ka towel bih chu ka chelh a, a tla thut mai ang tih ka hlau a ni.

"A na tawh lêm lo," ka ti sap ringawt, ka lo fîmkhur lo lutuk chu ka inhaw kher mai. Hmu rih lo se ka ti asin le, room-a a lo awm ka rin loh vàng vek.

"Engtin nge hetiang thil hi a thlen theih? I taksaa kutthlâkna hnuhma hmuh hi ka inring hauh lo asin! Keimah vàng a ni tiraw? Lalpa leh! Engtin nge ka lo hriat loh zâwk?!!" tiin a phun ta mawlh mawlh a, chutah, thaw hawkin," Tun ațang chuan tu mahin kut an thlâk tawh lo ang che, i taksa hi ka vawn himsak tlat tawh ang che," tiin dìm tak, rem lo zet hian min rawn kuah a. 

"Engah mah ka ngai lo, theihnghilh vek ang, nangmah avànga tawrh mai mai te chu ka huam alawm," ka lo ti ve a, ka nui pah bawk a. Ani thung chuan," Ka nui ve thei miah lo, nâ i tawrh laia i bula nangmah chhan tùra ka awm lo hi ka inhua; mahse, ngawi tak rawh, hlimna zawng zawng pêk che ka tum ngei ang, ka bula i awm hi inchhîr nî hmu miah lo tùrin ka siam ang che," a ti ta dap dap a.

"Ka hria asin, chuvàng alawm ka phatsan theih ngai loh che," ka lo ti ve vat a, rei vak lo min kuah hnuah chuan," Inha rawh, i ril a țâm tawh ang, i hman veleh chaw kan ei nghâl mai dâwn nia," tiin min thlah a, room ațang chuan a chhuak ta nghâl a. Kei pawh ka inha ta sawk sawk a, inhnawih tur lotion takngial pawh ka ken loh avàng chuan eng mah ka inhnawih lo tawp, nakinah kan la lei ve mai ang chu a.

A intleuh ve zawk a, ka ril a la țâm vak lo nain a thil siam rim chuan min ko ëm zâwk a, ei hlàn ka nghâkhlel mai mai a ni. A inpeih rang kher mai, kan pahnihin chaw ei chu kan siam a, an bungrua engkim mai hi a tâwk tiu teu viau mai, pahnih chauh chêng țhìn an ni bawk a, tunah lah pahnih chauh kan ni leh bawk sia, a fuh vêl vek.

Ka va ei tam tak! A thil siam  a tui hlawm êm a ni, ani pawh chuan a ei ve țeuhin ka hria, hmun kan tifel dùn a, chêng dùn ngai lo kha kan han chêng dùn dâwn țan chu a ni mai sia, han ngaihtuah han ngaihtuah chuan a mak ru riau asin.

Zanriah ei kham lamah erawh tih tùr a vâng khawp mai, TV han en mai mai tùr a awm bawk si lo va, han mut ringawt lah chu a la hma ropui bawk si, țhutthlèngsei pakhatah chuan kan țhu dùn a.

"Nakzànah palai an kal ang, i pa a lo awm êm ang chu tiraw?" a tih chuan," Awm ang; mahse, kan inru tih a hriat chuan a thin a rim khawp ang a, a lo ruih viau phei chuan biak a huphurhawm ve viau ang le," ka lo ti a.

"Mi pângngai chunglam pahnih, picnic spot neitute kha palaia ka pa tirh tùrte an ni a, a lo chhâng dang viau lo tùrah ngai ang," a ti leh a, kei ve thung chuan," A ruih chuan a lo zah vak lo ang, a ruih tawh chuan a buai vek zêl a nia, chutah, a duh loh zâwng takin ka awm zui bawk si a, a lo chhâng țha duh lo a nih pawhin an dawhtheih deuh a ngai ngei ang," ka ti a.

"Um, a duhtu zâwk kan ni miau a, zãwldawh tak leh inngaitlâwm taka dàwr tùr zâwk kan nia, kan beidawng thiang lo ang," a ti leh a, ka sam chu a khàl neuh neuh reng a.

"Ni e, a țha lam han beisei phawt ila," ka lo ti ve tak nain ka ring chuang lo. Ka pa hian țha takin a lo dàwr lo ang tih ka hre chiang a ni, tunah pawh hian a thin a rim tawh ngawt ang chu, ka nute leh ka naute ka han ngaihtuah a, keimah vàng pawh hian kut an tuar tawh hial maithei, chu erawh chu thleng lul suh se.

Bike-a kan chuanna ka taksa rawl leh ka taksa ka pain min vuakna nâ inbelhbawm chuan ka rin aiin min tichau daih mai, ka muthilh a rawn chhuak selh selh mai a, Zorina'n ka sam a lo khawih neuh neuh reng bawk nèn, chu chuan min timut chhuak zual a, ka bu ta dârh dârh mai.

"I mut a chhuak tawh a ni maw? Ni e, i chau dâwn lutuk, mu thuai mai ang," tiin a tho a, ka inrin hma chuan min rawn pawm kãng nawlh bawk a.

"Zanin chu tui takin i mu dâwn nia, khawih che pawh ka phal lo, ka zuah rih ang che," tiin a nui pah hak a, kei pawh chu ka nui ve mai a, a rûk tak chuan ka zak deuh a; mahse, zah țît țêt hun a ni lo tih ka hre ve tho.

"Ka ha ka nâwt lawk ang," tiin khuma min nghah chuan ka ti a, ka tho leh zui zat bawk a, ani pawh chuan," Kei pawh," tiin min rawn zui ve nghâl a. Ha kan nawh zawh chuan  khumah ka inthawlh nghâl zat a, ani erawh chu kawngka kalh tùrin a tho leh a, a tho leh chu remchângah lain ka thawmhnaw ka hlîp țhen leh rih bawk a.

Mutnaah chuan min rawn kuah chial a, zàwi sap hian,"I rim a tui châk châk mang e!" tiin ka sam chu a rawn nawr châk châk a, ka mut a tichhuak sauhin ka hria, ka maimichhîng nghâl vat bawk a.

"Muhìl rawh, tui takin, eng mah ngaihtuah lo la aw, ni leh lo, keimah chauh min ngaihtuah chungin i muhìl dáwn nia," a ti leh a, ka nui sak a, chutah, a lam hawia min kuai herin ka hmuiah a fâwp zoh a, ka chalah a fâwp leh a," Mu tawh rawh le, naktûkah chuan i taksa rawl pawh a reh ngei ang," a ti leh sup a. A thu chu ka âwih ngang mai, ka muhìl nghâl thuai a, mumang ka nei pawhin ka hre lo.

Zîng lamah erawh ka mal rawl lutuk avàng chuan ka ke pawh chu dah sawn harsa ka ti deuh hial mai, min lo la khan chual zui a, ka han meng uau uau a; mahse, ka mut a la chhuak lutuk, ka muhìl leh ta nge nge a.

Ka harh chian meuh chuan ka awmna chu ka hai țêp a ni! Mahse, ka ngaihtuah lêt zung zung a, ka tho nghãl vat bawk a; mahse, ka taksa rawl nâ avàng chuan ka țê deuh țhat a, ka rawl chu a reh hauh lo niin, a nuam lêm lo kher mai.

"I lo harh tawh maw? Ka kai tho phal lo che a, i bianga ka ben thek thek pawhin i meng thei miah lo chu a nih kha," tiin room kawngkhàr nghèng chuan min lo en reng a.

"I thawhna a rei tawh em? Ka va tho tlai tak!" tiin țhen ru deuh sak sak chung chuan ka tho ve ta a, ani chuan," Rei vak nâng, i tho tlai hleinem, inrûk tûkah hma takah an tho ngai hleinem," min fiam pah chuan a lo ti a.

"I hre ngawt lo aw, mi dang tu mah i la rûk loh kha," zak duh bîk lo chuan ka ti ve sak a, ani lah chuan," Mi sawi ka hria alawm le aw... Bâkah, tih tùr kan nei lo va, ina awm, eia mut leh tawp a ni mai a, thawh hma viau kha a țangkai lêm lo," a lo ti leh a.

Ka inphih faia choka lama ka phei chuan a lo inpeih fel deuhthaw tawh a, chaw pawh a lo chhùm hmin țêp tawh a lo ni, dâr zât ka en chuan," E khai!!" ka ti hluai a, dâr 8 a lo pèl tawh miau alawm.

"Thingpui i duh em? Nge tuilum zâwk?" tia min zawh chuan," Chaw kan ei țêp tawh àwm si a, tuilum ka'n in záwk ang e," ka ti a, ka inthlit hma chuan amah chuan noa rawn thli chhuakin dawhkànah chuan a rawn dah a.

"Ka bulah chuan eng vak i tih ka phal dâwn lo, ei tùr phei chu keimahin ka siam vek ang ka tih tawh kha, ka àwl char char ang che," tiin a kal sawn leh a, gas-a a chaw chhuanna lam chu a va sim a, chutah, ka bulah rawn lêt lehin," I mu tui bawk tiraw?" a rawn ti leh zat a.

"Aw, ka harh pawhin ka hre lo, mumang pawh ka nei lo, nang i mu tui ve em?" tia ka zawh chuan," Aw, tui tehrêng mai, i bulah ka mu miau a, ka mu tui lo thei lo a ni," tiin min lo chhâng a.

"Chuti, i pa phone la-"a hmêl nûr ka hmuh avàng chuan ka țawng tàwp chat a, ani lah chuan," I pa ti kher lo la, i pa a ni ve tawh tho sia," a lo ti a, nui deuh, lai ru deuh bawk si hian," Nia, ka lo theihnghilh a ni, ka pa chu phone la, nizàn lamah a lo mu țha lo thei a, i awm si lo nèn," ka ti leh a.

"Min rawn phone tawh alawm, a mu țha e, amah zâwkin min rawn ngaihtuah deuh a, lungmuang taka awm tùrin a duh che a," tiin min rawn en a, chutah, rawn kûn hnaiin," Naute siam thuai tùrin min chah bawk a," a rawn ti leh a.

"Chimawm suh!" ka lo ti țhat a, a fiamthu mah ni se ka sen nasa leh ngawt ang chu! A thil sawi awmzia ka hre chiang ve nasa mai si a, hai der ngawt theih a ni bawk si lo.

"Eng nge, a ni alawm, naktûk tlaiah kan țhenawma mi hi a rawn haw thla dàwn zui a, thâwm dìm deuh taka chêt a ngai àwm si a, zanin ãm taka chêt a ngai dâwn a ni," a rawn tih leh phei chuan melh pawh ka melh ngam tawh lo, tuilum chu ka in pawp a, ka rin aiin a lo la sa zui, ka chhâk chhuak leh lo chauh a ni! Ka lem pawp a, âng hlawi hlawiin ka kut chuan ka lei chu ka zâp a.

"Fîmkhur ta che aw...I kâ i tikàng mai dâwn asin," tiin a tho vut a, bawnghnute fridge-a mi va la chhuakin min rawn pe a, tlêm chu ka lo in ve mai bawk a, a dài nghâl huai huai mai.

Nilêng chuan inah kan awm a, chhùn thingpui hmeh tùr leiin a chhuak zawk a, inah kan inawm char char a ni mai. Ka phone chu on chhin ka châk angreng khawp mai a, ka on chuan ka nute'n min rawn bia ang tih ka hlau deuh bawk si a, Mami erawhin min rawn be mah se pawi ka ti hran lêm lo; mahse, min rawn fiam kual nasa dâwn lutuk.

Tlai lamah chuan ka on tak tak a, keimahin Mami chu ka va be zâwk. Min ngaihtuah ve àwm tho si a, ani'n min be thei dâwn miah si lo.

"Eksek...hei, engah nge pasal min ümsan daih a? A nuam em? Nizàn lamte in che țha thei maw? Awii, a zei em?"  Kha maw, thil țûl lo hlîr a ni a rawn sawi hi, zak lo lutuk mai!

"Chutiang sawi a ngai lo, ka nute'n an rawn bia che em? An thin a rim em?" tiin ka zâwt nghâl a, an thin a rim dâwn tih chu ka hria; mahse, ka zâwt ve hrim hrim a ni.

"Rim ve bawk ang chu; mahse, i nu tak chu a pângngai viau mai, nizàn khân i nu chuan min rawn bia a, in inru tih ka hre chiah alawm, min hrilh ve tal tùr hi a nia, i intithei êm mai, kan țhianho zîngah pasal i nei hmasa ber dâwn tak tak e," a rawn ti duah a.

"Mi dang pasal atân ka nei a nih ngawt loh chuan tihngaihna dang ka hre lo a ni, nakinah engkim ka hrilh vek ang che, ka nuin a rawn be leh che a nih chuan min rawn ngaihtuah lo tùrin lo hrilh rawh aw, chuan, ngaihdam min lo dìlsak bawk la, ka ring che a nia," ka ti a.

*HLAWHCHHAM NGUN VIAU MAH SE, BEIDAWNG DUH HAUH LOVA BEI ȚÀNG ȚÁNG ȚHIN MI CHUAN A TÀWPAH HNEHNA A CHANG NGE NGE ȚHIN*