☆LAIRIL LUAHTU☆ - 15 By Dingdi Pachuau

 ☆LAIRIL LUAHTU☆ - 15 By Dingdi Pachuau

Zanriah ei lai chuan,"Zanin kha palai kal hun kha a nia, i pa a lo awm êm ang chu maw?" a ti a, kei chuan," Awm ang," ti ringawtin ka lo chhâng a, a awm a nih pawhin a lo rui leh ngei ang a, țha takin a lo chhâng kherin ka ring lo; mahse, sawi chhuah kher ka tum chuang lo.

"Țha takin an indàwr thei ang chu maw?" a tih leh chuan nuih sak chuang hian," Han beisei phawt ila," ka lo ti a, ani pawh chuan," Beiseina hi han tilian êm êm phawt mai ila, a êng lama thil thlìr thiam a pawimawh êm hi," a ti leh a.

Chaw ei khama kan țhut dun lai chuan," Tunah hian an kal tawh ngei ang a, an sawi țan tawh hialin ka ring," a ti chhuak leh sap a, a vei ngang a ni ang, a àwm ve tho mai. Kei chuan ka vei êm êm lo, a lo remti dâwn lo tih ka hre chiang a; mahse, Zorina tihlunghnùr ka duh loh avàngin sawi chhuah kher ngai ka ti lo thung.

Kan ngawi leh vang vang a, rilru tihzalèn nân," Hawh, games khèl ang," tiin ka han sâwm a, ani chuan," Eng games maw?" a lo ti ve mai bawk a, kei chuan," Ih, carrom i khèl ngai em?" ka ti leh a, ka khèl ngai hauh lo; mahse, hun hnawh khah nân ka ti a ni.

"Card a awm ang, i duh zâwk em?" a tih chuan tihzia ti ru zet hian," Um, lo khèl ila? Inhrem ang aw?" ka lo ti vat a, card hi chu ka khèl ve thiam chiang alawm. Bonus, inhrem leh indãwl chuh tih vêl ka thiam ve vek.

Kan 'inhrem' ta a, a țantìrah chuan ka chak phawt a, a chalah ka pensak a, a vawi hnihnaah erawh chuan a chak ve thung. Ka chal chu ka dawh a, a nâ ang tih hlauin ka maimichhíng nghâl vat bawk a; mahse, na lo tê hian a rawn pen kerh a.

"A fair lo, min pen na ve rawh, nakinah chuan min pen na tawh ang che," ka ti a, amah kha ka pen na angreng si a, a inrùl tâwk chiah lo ka ti a ni.

"Ka pen nat che chuan nâ i ti dáwn asin," a lo ti mai a, a card chu a pharh malh malh a, kei pawh chuan ka card chu enin," Na ve bawk ang chu, nang pawh ka pen nat êm che kha," ka ti a.

Kan inchak chhâwk a, kan inchak loh chhâwk bawk a, min hrem ve apiangin min pen na lo thei lutuk a, ka pen na duh tawh bîk lo. A hnu lamah phei chuan," Card hmang hian i hun kal tawh ka hre vek  thei ang," a tih avàngin ka entîr a, a tìrah chuan ka âwih lo khawp mai a; mahse, a tih vél dàn chu a tipuithû ta riau mai a, a rawn sawi dik vei chat chat lehnghâl a, mak ka ti ru khawp mai. A hnuah hmalam hun tùr min ensak leh a, kan hlimpui phian a ni ang, kan bànsan meuh chuan dâr 9 a lo ri tawh a.

"E, a lo tlai tawh phian mai, ka pa hian min rawn phone dáwn lo em maw ni aw?" tiin a phone chu a en vang vang a, kei chuan nuih hak pah hian," I nghâkhlel lutuk a nih kha, a rawn be êm êm ang che," ka lo ti thung a, ka sawi zo chiah tihah chuan a phone chu a ri ta chiah a, a chhâng ta vat a, loudspeaker a on bawk a.

"I pa Zawmate'n min rawn be zo chiah a," a rawn tih chuan Zorina chuan," Engtin nge an lo chhàn?" a lo ti vat a.

"A pa kha a thin a lo rim deuh hlek a, țawngkam țha pawhin a dàwr hleih theih loh a ni àwm e; mahse, lo beidawng lo la, a vawi khatna chauh a nia, an kal leh tho dâwn a, a sârhù deuh lai a nih vàng pawh a ni ang, ngaihțhat loh phah nân lo hmang chuang lo la aw," a rawn ti charh charh a.

Mutnaah chuan min rawn kuah a, ka beng bul chêtah chuan," Ka beidawng dâwn miah lo, ka beidawnsan ngai dâwn lo che, palai chu duh leh vawi 10 pawh kal mai rawh se," a rawn ti sar sar a, a rûk tak chuan ka khawngaih roh khawp mai, ka pain a lo chhàn dàn chu kimchang takin hre lêm lo mah ila hre tlukah ka inngai thuak tho. A  remti ngai lo ang tih pawh ka hnâr hi ka mit a ni lo tih ka chian tluk zetin ka chiang, a thin ka tirim nasa mai si a.

"A nih, remna lo sawipui duh miah lo ta se?" ka lo ti sap a, a kut chu ka chelhsak a, ani chuan," Inah i haw tawh chuang lo ang, ka bulah chauh i awm ang a, i haw ka phal dâwn chuang lo," a lo ti thung a.

"A nih, ka pa chuan min rawn zawng hmu ta si se?" ka tih leh chuan," A pawi lo, min chhuhsak che a tum chuan kâwlkil tàwp thleng pawhin ka tlànpui zêl ang che, keimah vànga a kut i tawrh leh kha ka phal thei tawh ngai lo ang, ka dam ve țêk țêk chhung hi chuan tu mahin kut an thlãk che ka phal tawh lo ang," tiin duat zet hian min kuah a.

Ka ngaih a va'n țha tak!!! Kei pawh hian haw leh ka duh tawh hauh lo, a bulah ka dam chhûng hun hman ka duh. Ka pa zu rui bula awma a kut tawrh leh kha ka duh tawh hauh lo, ka la duh lo chung pasal min neihtîr a la tum zui, ka haw tawh hauh lo ang.

"A remti emaw remti lo emaw kan innei tho ang, ka hàwtîr tawh loh phawt che chuan ka nupui i ni dáwn tho a, tiraw?" a tih chuan," Um, tihian i nupui ka ni chu a ni tawh mai a," ka lo ti a.

"Zanin chu i chau tawh lo tiraw?"

Ka rawl pawh a zia tawh lutuk. Vawiin chawhma khân artui hel hípin damdawi min eitîr tawh a, ka zia lutuk tawh.

"Aw, damdawi leh artui kha ka ngeih khawp mai," ka tih chuan min kuahna kut chu la sawnin ka taksa lamah chuan a rawn chûl thla ta riak riak a, a tih tum ka man nghâl chiang. Ni ve ang chu maw le, kan inru ve a, a bulah muin min kuah thei a, han zah tùr leh min dangtu tùr lah an awm hauh lo, tu mipa nge a nupui rûk bula mua che miah lova awm reng thei ang ni?

*******

Ka pa chuan a remti lo, palai vawi hnih an kalnaah chu thu tàwp a lo sawi a, a țawngkam tak chu min hrilh duh lo; mahse, palaite meuh pawhin kal leh țûl an ti ta bîk lo tih chiah min hrilh. Engtin tak lo chhâng ang maw? Ka nute chuan hrehawm an lo ti ngawt ang, mi hmaizah tina chi a ni ve bawk si a, keimah vàngin zahna a tuar mawlh mawlh tihna a ni si a, a rûk tak chuan ka nu chungah ka inthiam lo, keimah vàngin kutthlâk hial pawh a tawrh ka ring a ni.

Ni e, tihian kan innei ang a, an inah kan awm mai ang chu. Pa zu rui min hau thâwm hriat tùr ka nei tawh lo ang a, a kut pawh ka tuar tawh lo bawk ang. Ka duh tak bulah awmin, mitmei vêng leh hun remchâng melh a ngai tawh lo ang a, ni tin zan tin inhmuin kan induat thei tawh ang chu. 

Lungleia kan awm chhûng chuan in luahtute nèn chuan kan inhmuin kan inbe nêl ve deuh hman a, in chung lehlam luahtu Pu Dika nèn phei chuan kan innêlin chawhmeh pawh kan va suah nual hman nghe nghe, thingtlâng lam ațanga lo kal a ni a, a fapa lehkha zir a rawn awmpui a, chutih rual chuan ani mistiri a ni bawk a, inhlawhin ni tin deuhthaw a chhuak țhìn a ni àwm e; mahse, tunah erawh a fapa chu an chawlh lai a nih avàngin an khaw lamah a haw rih a, a rawn chhuk leh țêp tawh bawk.

Palai kalin awmzia a neih loh hnuah chuan Zorina pa(ka pa) chuan," Rawn haw phei tawh mai ula, in awm rei ve tawh bawk alawm, fanu thar bula hun hman pawh ka châk ve tawh a," a rawn ti a, kan lo tum ve rilrûk tho a nia, haw phei tùrin kan inbuatsaih nghâl a.

Kan phei hma tlai lamah erawh chuan lèn chhuah ka rawt pek a, ka kal leh khât tawh maithei si a, han fan kual vêl ka châk ve a ni, Dintei pasal neih khân an inah deuh ngawr ngawr kan awm a, hun a rei lo bawk nèn. Tunah erawh Lunglàwn, Ramthar, AOC lamah tlàn kual ve rih ka duh, ka têt lai deuha ka hmuh bâk kha ka hmu tawh hauh si lo.

Kan lêng chhuak ta ngei a, kan tlân par par a ni mai. Ani'n kawng a hre bawk a, kan tlàn lai chuan," Helai hi chumi khami vêng chu a nia," tiin min hrilh zêl a, nuam ka ti viau mai. 

A tûk tûkțhuan ei khamah muangchâng lutuk lovin kan chhuak a, Zotlângah petrol kan la chho bawk a, khua a duai ve deuh hlek bawk a, kawnga tlàn par par chu nuam ka ti viau mai. Ruih aawm ve tawh bawk si lo va, ka duh tak hnung pharh dârh maiah chuan ka duh chângin ka bei chial a, a chângin a kâwngah nghet zeta kuahin motor kan tawh loh kârah," Tunah hian ka pasal duh tak nèn Aizawl panin kan tlãn mêk, ka pasal a ni tawh, tu nula mah khân min lo chuhpui suh ang che u, kan innei tawh," tiin ka au nghek mai ţhìn a, a nuih a za thei êm êm zui. A chângin ka zâi bawk a, a thiam zâwng a nih chuan min lo zàwm ve bawk a; mahse, motor kan tawh dâwn leh kan bula motor rawn tlân a awm lai chuan chèngkawl ang maiin ka ngawi reng thung.

Aizawl kan luh chuan ka inthup ta deuh, ka țhiante'n emaw ka hmel hriatte'n emaw min hmu ang tih ka hlau, min hmuh ka duh lo hrim hrim. Zarkawt phei kan tlàn lai phei chuan ka hmai chu a lang mang lo ang, ka mit erawh a lang țâwk thei ang tih chauh a ni.

Gate chu ka pain min lo hawn a, gate chhûnga kan luh chiah chuan ka rilru a hlim nghâl sárh mai. Nuam ka tih êm êm țhin hmunah ngei mai chuan ka chêng ve tawh dâwn chu a ni si a, motor bengchheng leh khâwl bengchheng ri a awm lo ang a, sava leh rannung hrãm riin min awi mu thei tawh bawk ang. Boruak thianghlim tak hnuaiah muin kan tho tawh ang a, kan hrisêl zual khawpin ka ring.

Zanriah chawhmehah chuan ka pa chuan dîl sangha a lo chhùm a, a rim a tui khawp mai. Sangha ka ngaina fahran lo a nia; mahse, ka pain," In lo phei dâwn sia ka ti a, sangha ka lo man a. Bawihi, ei țeuh rawh aw, a hrisêl a nia," a tih avàngin ka ei ve țeuh mai, min duhsakna leh min koh duatnate chuan ka thinlung a dek hle a, an pafa innêl leh induat tawn lutuk mai te, Zorina'n zah tak leh hmangaih tih hriat taka a pa a han bia te chuan an bula chèn a nawm dàn tùr min ngaihtuah chhohtîr a, ka vànnei dâwn khawpin ka hria.

Ka phone ka on tawh avàngin zanriah ei kham hnu lawkah chuan Tatei'n min rawn bia a, mak ka ti rilru kher mai, ka on tih pawh a hre àwm tawp si lo va, a rawn rin tih vêl a nih ka ring.

"Ka va lãwm tak! Ka be thei hlauh che a, i dam țha em?" a rawn ti hliai a, kâr hnih chuang kan inbe ta lo va, kan inbe lo mai ni lovin chanchin pawh kan inhre tawn lo a ni a, kan inbe leh thei chu kei pawh ka lâwm a ni.

"Aw, dam e, in țha maw? Lehkhate i zir țha em? Tapuia pawh a zir țha em?" tiin ka zâwt nghâl zung zung a,  ani pawh chuan," Aw, keini chu min ngaihtuah suh, kan țha lutuk, nangmah ber kha a nia kan ngaihtuah che," a rawn ti ve a, kei ve thung chuan," Min lo ngaihtuah miah suh u, ka hlim alawm. Nu eng nge a an?" ka tih leh chuan,"Be ve rawh aw, ka'n pe ang e," tiin ka nu chu a ko lang lang a, ka lo maimichhîng vang vang a.

"Hello? Bawihi, i țha maw? Khawiah nge in awm? Ka rawn ngaihtuah-" a țawng lai chuan," Mi hurnu chuan a la rawn be ngam che u a ni maw? Tenawm hurherh lutuk! In phone lâktlâk loh zet kha, ani biak nân khân ka leisak lo che u," tia a țawng lùng lûng ri chu ka hria a, ka nu chuan a hmet tàwp nghâl a ni ngei ang, a reh ta hmak mai.

A thin a lo la rim reng a nih chu. A rui leh pek bawk a ni chiang, ka nute chu ka ngaihtuah ru kher mai, engtin tak ãngin thinrim leh ang maw? A kut thak hnawihna ber kei ka awm ta si lo va, ka nu chungah hian a țuan leh mai ang em? Tatei leh Tapuia chuan an hlau leh ngawt ang chu.

"Ngaihtuah nasa ve?" tih pah chuan ka bulah chuan a rawn țhu thla ve nghâl a, kei chuan ka lo en lêm lo, ka phone chu ka melh reng a.

"I chhûngte i bia em ni a?" a tih leh chuan," Aw, min rawn bia a; mahse...  " ka ti a, sawi zawm duh lo chuan ka ngawi ta daih a. Ka kutah chuan rawn vuanin," An dam țha ang chu tiraw?  An ngaihtuahawm loh hrâm ka beisei," a ti leh sap a.

"Aw... mahse, ka pa kha a rui leh a nih ka ring, a țawng ka hria a," ka tih chuan,"An dam chuan a țhat chu. Off leh daih teh, i rilru tihhrehawm nân i hman ka duh miah lo a nia," a ti a, hnial lo chuan kei pawh chuan ka phone chu ka switch-off leh ta nghâl a.

"Tûn boruakah hi chuan phone hman tam rih loh hi a țha ber ang, hun han liam deuh se, an dam ţhat leh țhat loh pawh mamawh lama ka han kal hunah ka rawn hre thei mai ang, ngaihtuah duh miah suh," tiin min kai ding a," Mut hma a țha, vawiinah bike-ah i chuang thui si a, i chauin i rawl leh viau dâwn a nia," ti lehin bathroom lamah chuan min nawr phei ta nghâl a.

Duat chikimin min duat pafa ni maiin ka hria, zîngah ka pa a tho hma thei viau a, keini pahnih pawh kan tho tlai vak lo nain chêt ngaihna tùrah hi chuan a lo che vek hman tawh ziah. Zorina lah chuan ka chêt ve phal lovin amah chuan eirawng a bâwl a, in chhûng chêt tùr lah chu bàl leh hnawk a vâng bawk si, ka thawh ve ber chu insûk a ni mai. Chu pawh, Insûkna khâwl an la nei zui a, ka hahdam takzet a ni; mahse, Zorina hna thawk chhuak tùr hi chu ka zui chhuak ve ziah thung, ani lahin ka thawh ve a remti si lo, hna thawk tih lêmah in bul hnaiah chuan thlai chìnna tùr hmun a siam țhìn a, thlai chi hrang hrang bâkah pangpâr a kui țhìn bawk a, chu chu a phun sawn leh țhìn a ni.

"Pangpâr tui pêk leh phun sawn tih vêl tal kha chu min tihtîr ve la?" tia ka ngen tak chiam hnuah erawh chuan a phal ve ta mai a, nuam ka ti teh asin. A hna thawhna bulah ka awm tam phahin mawng zãng taka hna a han thawk kual vêl chu hmuhnawm ka ti a, ka lo en leh vung vung țhìn.  

"Ka hmuhnawm viau a ni maw?" a rawn tih tâkah chuan harh chhuakin," I thil ti kha i zei thlarh thlarh lutuk a, a nawm hmel ka lo tia," ka lo ti vat a, chu chuan a tihlim ve a niang, a nui ta hak hak a.

"Ka lâwm e, ka ni tin hna a nia, ka bula i lo awm phei hi chuan hna ka thawk tih pawh ka hre meuh lo țhìn, duhberte kiangah chuan engkim mai hi a lo dik thlup mai a, hna thawh pawh a lo nuam êm êm mai a lo ni," nui sâng hian a ti a.

"A hma chuan i bula awm pawh i phal țhat loh kha aw," ka tih chuan," Ni a sain khua a lum si a, i dam loh phah ang tih ka hlau alawm. I dam loh ka phal hauh si lo va," ti lehin ka lam pan chuan a rawn kal a, ka rin loh deuha chëin min pawm kãng nawlh mai.

"Kan thawk zo tawh bawk a, kan haw thei tawh," tiin min kalpui ta nghâl a, kei erawh chuan," Ni lo, pangpâr phun sawn tùr ka la nei," ka ti chûl a; mahse, ka thil sawi ve chuan awmzia a nei lêm lo a nih hmel, min kalpui zêl tho.

"Pangpâr phun sawn chu a hmanhmawhthlâk loh," tiin a kal zêl a, chimawm chhuah ka châk ta deuh thut chuan," Nih, eng nge hmanhmawhthlâk a?" tiin ka han zâwt a, cho zet hian ka en pah bawk a.

"Naute siam," a rawn tih tâk supah chuan a hmui chu hupsak vatin," Het, ka pa hriatah sawi miah suh, a zahthlâk bâkah,...sawi ri miah lo la a ni mai," ka ti a, a mitmenga nuihzatna chu ka hmu reng.

"Sawi suh aw, ka pa hmaa zak deuha awm hi ka duh miah lo a nia," ka ti leh a, a hmui ka hupsakna kut ka lâk sawn veleh chuan," Zahna tùr a awm hleinem, ani phei chuan naute nei thuai thuai tùrin min duh zâwk a, chuvàngin,  țan kan lâk sauh sauh a ngai," a ti leh a.

Kan inrûk ațangin thla khat a liam tawh a, ni tin zan tin inhmua chêng dùn kan  ni bawk a, min tihlim hneh teh e. Kan awm dun loh țum chu rawn picnic-te buaipui an ngaih lawk  hun lai leh Aizawla mamawh a han lam chauhin a ni, chu pawh vawi khat chauh a ni a, chuti chung chung pawh chuan ka ngaihtuah lutuk ringawt. Ka pain a lo hmu fuh ang a, a lo khawih hrep ang tih hlauhna rilru ka pu a, a lo haw hma chu ka ngaih a țha thei lo nia, inngaihtuah chu a lo na dâwn khawp mai.

Ni khat chu picnic tùra rawn kal an rawn kal țhahnem deuh a niang, kan in ațang pawh chuan an hlim thãwm  țê ruai ruai chu a hriat theih a, kan țhianho kal ve lai kha ka ngaihtuah chhuak a, anniho khân pasal ka ûm a ni tih an hre vek tawh ngei ang a, engtin nge min ngaih ang aw tih te chu ka ngaihtuah kai a, ka ngai hlawm veng veng maiin ka hria. Tûn hi ka vawi khat ngaihtuah chhuahna an ni hial ta ve ang, mak min ti viauin ka ring, a sawi ngai lo ber kha ka ni ve si a.

"Honey, i lo muthlu lo maw? En teh, tute nge ka rawn hruaite hi?" tia Zorina țawng ka hriat chuan ka ngaihtuahna ațanga harh chhuakin ka en vat a, chutah, ka au ta chùl mai.

"Ekseki hi, hawh u, piai liam liam ang u, kan inrin loh lai leh kan hriat loh laiin pasal min neihsan daih si a," Mami ngei mai chuan a rawn ti hmasa ber a, min rawn kuah thuak thuak a, chutiang chuan a indawtin min tawn kuah zêl a, a tàwp berah Melorie chuan min rawn kuah a.

"E khai! Nang hi, in lo che nasa hman viau a ni maw? A hma aiin i chêr deuh tlat, bâkah, ka pumah pawh hian eng emaw ni puar deuh hlek min dotu a awm tawh tlat, in lo pûk lâwk chiang mai," a rawn ti chhuak ta hluai mai!

"A ni maw? Ka lo hre miah lo, khawi maw, ka lo kuah leh chhin teh ang," Rci chuan a lo ti var a, kei chuan rang zet hian," Daw peih viau suh aw,  thingpui pawh ka lumsak ve lo mai ang che, bâkah, dâwt i sawi leh chuan i rawn picnic ve ka phsl tawh lo ang," ka lo ti ve vat a.

"Awi, ka zo lo, a intithu tawh lutuk!" a tih chuan mi dang chu an nui dar dar a, Zorina chuan," Thu ve bawk ang chu, a nghâktupi a ni tawh tlat a," a lo ti ve var a.

*MI KAN HRIAT NAZAWNGTE HIAN MIN RAWN HRE VE VEK KHER LO*😊