☆LAIRIL LUAHTU☆ - (Bonus) By Dingdi Pachuau

 ☆LAIRIL LUAHTU☆ - (Bonus) By Dingdi Pachuau

Mut hmunah Tatei thil min hrilh kha ka ngaihtuah vang vang a, che lovin ka lo ngawi rei deuh a niang,"Thil dik lo a awm lo tiraw?" tiin dìm tê hian ka bânah chuan a rawn tawk a.

A mit taka lo en pah chuan," Min phatsanin min kalsan miah lo ang tiraw?" tiin ka lo zâwt lêt thung a, ani hian min kalsan emaw min kaltîr emaw ta se, kei hi engtin nge ka awm ang? Kan in ka pan ngam tawh dáwn dèr lo va, pan lah ka duh tawh hek lo bawk ang, a chhan chu ka hmachhawn tùr ka hmu lâwk ve thiam vek tlat si a ni.

"Engati nge chutiang thil chu i ngaihtuah a? Thil țha lo leh țangkai lo ngaihtuah miah suh," tiin ngun zet hian min en a, chutah, thutak leh ngaihla zet hian," Ka hmangaih i ni a, ka hnên ata hi kaltîr che ka tum hauh lo, phatsana kalsan che lam phei kha chuan i ngaihtuahna kha tibuai lul suh se, ka dam chhûnga ka tih ngai loh tùr a ni," a ti ta charh charh a.

Ka thil hriat chuan min tinuam huai huai mai, ka rin dàn chu a ni sa tho a; mahse, ngaihtuahna țha lo ka neih avàngin hlauhthàwnna ka nei thut a ni, kei hi chuan ka kalsan thei ngai dâwn si lo va. 

"I hlauthâwng hmel, i nui hmel, i hlim hmel, i makti hmel  leh a ngaihna hre lo taka i han meng țhìnte, zah hmel taka i nui sak țhìnte zawng zawng hi hmuhnawm ka tiin hêng hian ka hmangaihna che a tizual tulh tulh a, nang hmangaih leh duh theia ka lo piang chhuak hi ka lâwm êm êm bawk a ni. En renga hmuh theih reng che hi ka duh țhin, ka bulah chêngin ka nupui i ni tih pawh hi rin harsa ka la ti fan, zàn ka mut dâwna ka kuah che leh zîng ka harha ka bula min si chêta i mu țhìn ka hmuh hian ka mumang mai a ni lo tih ka hre thar leh țhìn zâwk a," a ti leh dap dap a.

A hmuiah chuan làwmthu sawi nân ka fawhsak zoh phawt a, nui sen sen chunga enin," Ka lâwm e," ka ti leh sap a, ani chuan," Kei pawh le, naute pai thuai thuai phei la chuh, làwmna a thuah hnih ngawt ang! Kan la bei nasa tâwk lo deuh a niang tiraw?" a rawn ti thung a, a nui sâng hmel avàng chuan thinrim derin a bân bulah ka chumsak a.

"Nangman pai la a nih chu a!" ka ti hlak a, ani lah chuan," Theih ni se ka duh mai asin, nau i neih hunah nâ i ti dâwn si a, ka khawngaih lâwk viau che a ni; mahse, ka khawngaih vàng ringawt che chuan naute neih loh chu ka duh chuang miah si lo, i pai hunah phei chuan ka va duat nasa lehzual dâwn chiang che êm!" uar zet hian a ti leh a, fiamthuah pawh ka lâksak duh ta bîk lo va.

*******

Kan dam tlâng a, hun a liam ve zêl bawk a, kan in ka chhuahsanna (pasal ka ûmna) pawh thla thum zet a liam ve ta. Krismas hunpui a lo thleng a, hrehawm ka tih a hlauh vàngin ka ti mai, Lunglei lama Krismas hman a rawt a; mahse, kei chuan ka lo hnial ve thung a. Ka pa kalsan chu rem ka ti lo a ni, ani hi motor chuan ngeih lo lutuk chi a ni ve a, a chhuah ve ngai loh chhan pawh a ni nghe nghe. Chuvàng chuan, Lunglei lama Krismas hman chu ka hnial ta tlat a, ani pawhin min tilui bîk lo. 

Aizawlah mamawh engkim kan pahnihin kan lam dùn a, ka pafa thumin Urlâwk zàn pawh chu pâwnah kan hmang ve a, sa kan hem hmin a, a vawi khat nân zochhangban ka chhùm ve ta bawk. Bonfire kan buatsaih a, Krismas hla play-in kan lo zàwm ve dal dal a, ka pa pawh a zai ring ve khawp mai. Zorina nèn chuan kan țhu hman meuh lo va, sa kan hem hmin hnu lamah coffee tui takin ka siam bawk a, ka chhûngte leh țhiante ka hrechang bîk teuh lo.

Mei chhèm bula kan țhut khâwm tal lai chuan phone la chhuakin thla ka la mawlh mawlh a, nakinah kan en lêt duh leh ang a, a ngaihawm dâwn êm asin. Pathian zâra kan dama nakkum Krismas kan hmang leh thei a nih ngai chuan kei pawhin naute ka lo pawm tawh maithei a, a nih loh tal pawhin ka rai ùl ve thei tawh tlat si a, chhangchhe nun kan hman hunah chuan tûn ang hian hun kan hmang dal dal thei tawh dâwn miah lo.

A tûk Krismas ni tak chuan kan pafa thum chuan kan inah chuan inkhâwm tawi kan nei ve a, làwmthu sawi nân hun kan hmang a ni ber. Tateite pawhin min rawn bia a, rei erawh kan inbe hman lo, an bulah ka pa a awm a nih ka ring. Chawhnu lamah ka țhiante felzia a takin ka hmu leh ta, inkhâwm zawhah min rawn tlawhin an rawn kal vek a, Helen-i leh Maruati pawh tiamin, Krismas present atân tiin  an pawisa thawh khâwm ațangin thilpêk min rawn ken bawk, pawisa fai tam vak lo nèn, ka hlim lutuk chu ka țap lo chauh a ni! Ka beisei phâk loh lutuk thil a ni si a, ka țhiante min ngaihsakzia leh min hmangaihzia ka hriat thar phah hle a ni.

Kan hlim chu țawng inchuhin kan rãk vak vak hlawm a, Helen-i leh Maruati chuan min fiam nasa, a chhan chu ţhianho zînga tih duh loh hmel berin pasal ka ûm hmasa ta ber si a, fiamthuin min kâp reng mai. Pâwn lamah țhu chhuakin Melorie pawh a che nasa leh viau mai a, Krismas hla play-in Hruaii pawh a lâm leh viau bawk; mahse, mi dangin kan làmpui ve vek a, a tân pawh a zahthlâk hran lo. 

Ka pa chuan zanriah ei lova an haw a phal loh thu a rawn sawi chuan hlim hmel tak hian an ei theih loh thuin an lo chhàwn a, a chhan chu zàn lamah inkhâwm an duh a, a țhen an kohhran zaipawla tel niin zàn lamah an zai dâwn a ni àwm e. Ka pa sàwmna avàng chuan an lâwm ve viau mai a, an haw dâwnah an lo kal leh huna chaw ei ngei tùra intiamin hlim tak, inngai tak siin kan inthlah liam leh ta a, an liam meuh chuan boruak a reh dak mai. Min rawn tihlimin min rawn ching phùl viau a; mahse, an haw meuh chuan thehmeh ang maiin a reh tlawk tlawk mai a ni.

Krismas a zo va, dam takin Kumthar kan chuang kai leh a, picnic awm loh hun lai a nih vàngin keini chuan swimming pool bul vêl leh a compound hrim hrim tihfai nân hun kan hmang a, Zorina thil tih apiang chu ka lo pui ve zêl a, hrehawm ka ti hauh lo, hrehawm tih ahnêkin nuam ka ti viau zâwk; ani erawh chuan ka thawh chu a phal ve țhin lo va, ka zui luih zêl hnuah erawh tihngaihna a hre lo mai chauh a ni.

Ka la rai miah lo, kan rin aiin ka rai har ta si a, a rûk chuan nuam lo ka ti ve deuh. Anni pafa lah chuan sawi chhuak dawt lo mah se naute an awt nasa tih ka hre reng si a, hlim viau țhìn mah ila kim lo a awm tlat a ni; mahse, ka sawi chhuak ngai bîk hauh lo. 

Ni khat chu Aizawlah Zorina chu a kal a, min sâwm ve nain in lama ka pa bula awm ka duh zâwk thu chu ka hrilh a, ani pawh chuan min sáwm nawn ta bîk lo. Aizawla han chuan chhuah ka peih lohzia a hre ve tho a, min sâwm lui deuh kher țhìn bawk a ni. A kal hlàn chuan kawr bula thlai kan chìnna lamah chuan ka kal a, ka pa chuan eng nge ka tih dáwn tih min zawh chuan thlaiho en mai mai ka tum thu chu ka hrilh ve mai a, hnim tihfai tùr awm lo mah se  hmuh nuam ka tih țhin avàngin ka kal fo rêng a ni.

"Thawk duh suh aw, Bawiha pawh a awm loh hi. Tûnlai phei chu hna i thawk nasa mah mah, i hmel pawh hi a lang chêr tlat a ni," a ti a, min ngaihtuah vànga sawi a ni tih ka hria a, chuvàng chuan nui  chung hian," Ka pa, ka thawk dâwn hleinem, ka en mai mai dâwn alawm, bâkah, exer lâk ve zauh zauh pawh hi a țha ve a," ka ti a, ka kal ta tho a.

Thlai chuan tui an hmu țha a, an duah hluah mai a, tui bula awm hi an ngeih ve êm bawk a ni. Ni êng an hmu țha bawk si a, an țhanna dâl tùrin hnim a la awm mang bawk si lo nèn, an tãn chuan țhan zawt zawt mai loh chu tih tùr an nei lo a ni e. Hnim te tak tê tê chu ka han pawt leh zauh zauh bawk a, helai vêl hi kan tihfai bâk kha a la ni ve hrim hrim a, Zorina awm loh laia lo tihfai zawh veka a hmuh huna mak tihtîr ka duh, chuvàngin, hnim lian deuh ka hmuh apiang chu awm ka pawt fai a.

Ka rin aiin ka pawt zo har daih mai a, thlai ka duat bawk si a, ka dìm bawk si nèn, chu chuan min tisâwt thei lo a ni. Ka zawh meuh chuan a lo tlai ve deuh ruih tawh mai, Zorina a lo haw tawh ang em aw? Phone ka ken loh avàng chuan dâr zât ka hre bawk si lo va, ka zawh veleh chuan anțam chhum tùr ka la leh hlek a, in lam pan chuan ka kal ta nghâl a.

Ina ka luh dâwn chuan an pafa țawng ri chuan min tiding deuh chat a, a lo haw tawh reng a nih chu. Ka tàwi deuh a, an thu sawi han ngaihthlâk rûk êm chu niin ka hre thei meuh si lo, chutah, Zorina rawn țawng chuan ka beng a verh ta zar a.

"..Ka ti lêm lo; mahse, mahni chauha ina khawhar taka a lo awm tùr hi ka khawngaih a, bâkah, kei lahin ka bula a lo thawh ve bek bek hian nuam ka lo ti ve a," a ti a, ka pa chuan," A che hah ve hle a ni. Tûnlai phei chu a hmai hi a lang chêr deuh tlatin ka hre lehnghâl a, i duat viau a ngai a ni. A chhûngte kalsanin a vuan che a nia, hna thawhtîr lova duat taka enkawl tùr i ni asin," a lo ti ve thung a.

Ka chungchâng an sawi a nih chu. Zahawm lo ti viau mah ila an thil sawi hriat chhunzawm zêl ka châk avàng chuan ka lût duh lo va. Zorina țawng chu ka hre chiang ta lo deuh, room-a lût pahin a sawi a ni ngei mai, ka pa chuan," Thawmhnawte hi leisak ziah ta che, hmeichhiate hi chuan an ngaihlu bîkin nuam te hi an ti ve a. Nupui i neih țhat tehlul nèn hian ka rin aiin i duat thiam lo tlat. Nangin i duat viau loh chuan tuin nge duat ang? Kan pahniha kan duat viau hi a ngai a ni, ka duh ai hian i ring mah mah țhin, eng mah thawk ngai lo a nih hi hria la, ani anga duhtu che  hi chu i hmu tawh kher lo ang, chuvàngin, a rilru hi tihhlim tum viau rawh, hnathawh lamah pawh àwl thiam viau la, chuti a nih loh chuan a awm rei peih lo ang tih pawh a hlauhawm alawm," a ti leh charh charh a.

Ka chunga an rilru put dàn chu ka hre ta uar uar mai, chutih rualin ka pa chu ka zah thar ta riau bawk. Chutianga min lo en leh ka chunga chutiang rilru a pu chu zahawm ka ti a, a rilru chhiat lohzia hre chiang tharin a rûk tak chuan ka hlim veng veng mai. Din reng pawh chu duh tawh lo chuan thleng hlim hlawt angin, eng mah hre lo ang mai chuan inah chuan ka pên lût ta nghâl a.

Ka pain min lo hmuh chuan," E, i lo haw tawh a ni maw? I hah em? I ril a țâm tawh ngawt ang chu, thingpui ka'n siam ang e, Bawiha pawh a lo haw tawh kha, a lo thlenna pawh a la rei bîk lo a nia," tiin thingpui no hnih lain flask kan dahna lam chu a pan ta nghâl a.

"Ka pa, ka lo insiam ve thei reng alawm, chuan, ka hah miah lo bawk. Hahna tùr lah a awm hek lo," tiin Anțam chu dawhkànah chuan ka dah a, Zorina pawh room ațangin a lo chhuak ve chiah a. Min rawn hmuh chuan," Rawn kala rawn koh che ka lo tum ve chiah a, engati nge i lo thawh duh rêng rêng a? I hah ngawt ang ka ti," a rawn ti nghâl a, kei ve thung chuan," Hah lo ve, exer lâk pahin ka tia, hnim pawh tùr pawh a la awm mang hleinem," ka lo ti a.

Thawmhnaw min rawn lei ve ngei a, mawi ka tih zâwng tak ni lêm lo mah se min leisak a nih vàng chuan ka lâwm hrim hrim. Amah lah chuan ka hák chhin chuan inhmeh min ti êm êm zui a," I inhmeh dâwn tih ka hriat avàngin nangmah mitthla reng chungin ka lei a ni," a la ti tak deuh deuh a. Ka vun a ngo ve hlauh a, ka vànnei khawp mai.

"Vawiin chu vànneihna ka tawng bua a ni ringawt mai, phone call ka dawng nawlh a, hmãn deuha Shillong ka kal țuma tui tla ka chhanchhuahpa Dinesh-a hnën ațangin a nia, ka duh aiin ka rei phah zâwk a," a tih chuan," A ni maw? Chuan, eng nge vànneihna i tawng buak chu?" ka lo ti var a.

"Ka address chiang takin a hria a, ka phone number nèn lam a lo hre vek a ni, chhui chhuah chu ka harsa tehchiam lo bawk a; mahse, ani min rawn zawn chhuah duh chhante chu làwmthu sawi a duh vàng a lo nia," a ti leh a, kei chuan," Chuan, a hrilh ta che a?" ka lo ti leh a, ka thawmhnaw hâk chhin chu hlîpin inbual ka duh avàngin towel ka ban nghâl a.

"Aw, ka chhanchhuah lai kha chuan eng hna mah a la thawk bîk lo va, tunah chuan Engineer ni tawhin a hna thilah Mizorama a rawn kal remchàn lai a lo ni bawk a, a tui tla ka chhanchhuah làwmthu sawi nân chuan cheque min pe a ni," a tih chuan makti zet hian ka en hau a, țawng pawh ka țawng lo. Amah vék chuan," A tih tùr chu a tizo tawh a, naktûk tlai lamah hian a thlâwk haw leh tawh dâwn a, vawiin lama min rawn zawn chhuah tum kha a nia; mahse, kan inhmu thei ta hlauh sia, zanriah hotute'n kilpui an tum avàngin a hun a tight deuh hlek nèn, helaiah chuan a rawn kal thei ta lo a ni," a ti leh a. Thovin cheque a pêk chu min rawn entîr a, number-a pawisa inziak zât ka hmuh chuan ka meng bial deuh kâwk a.

"Ka la duh lo va; mahse, ţhingțhi meuha la hrâm tùra min ngen tâkah chuan ka la lo thei ta lo a ni, a pawi lo ang chu tiraw? A țhingțhi lai meuh han hmuh kha chuan nuam ka ti lo a," a ti leh niah niah a, cheque a lâk vàng chuan a inthiam lovin a rilru pawh a nuam fahran lo tih chu a țawng dàn ațang chuan a hriat theih viau a ni.

"Pawi lo ve, i rûk pawh a ni hleinem. Rilru dam deuhin awm rawh, lawmthu a sawina a ni ve mai a; mahse, a tam deuh mah mah chu ka ti ve tho, ka pa i hrilh tawh em?" ka tih chuan a lu a thing nâ nâ a.

"Hrilh hmasak che ka duh a; mahse, ka inthiam lo leh bawk si a, i ngaih dàn hriat hmasak phawt ka duh ta a," a ti leh a, a rilru nuam lo tihnawm tum chuan kei chuan," Rilru nawm loh phah nân hmang suh, a nunna i chhhan a nia, ropui deuh mai asin, a làwm êm avàngin a  rawn zawng chhuak che a, pawisa aia nunna hlutzia a hre chiang viau a ni ngei ang," ka ti leh a. 

*SER HNUTCHHIAHTU NI LOVIN, A ȚHA LAMA CHHINCHHIAHNA HNUTCHHIAHTU NIH TUM ZÃWK ANG CHE*