☆LAIRIL LUAHTU☆ - 17 By Dingdi Pachuau

 ☆LAIRIL LUAHTU☆ - 17 By Dingdi Pachuau

Ka pa a hrilh ve chuan ani pawh chuan," E, a pawi miah lo, rawn hruai ve thei nghe nghe la țha tùr a nia, hmuh ve pawh a châkawm a nia, làwmthu pawh keimah ngei hian hrilh ka duh asin," a lo ti a, Zorina chuan," Hun a nei lo miau si a, han tihluih theih pawh a ni lo, phone number kan inpe alawm, nakinah làwmthu chu i hrilh dâwn nia," a lo ti a, ani lah chuan," Mizo țawng a thiam dâwn ve dâwn em ni?" a lo ti leh a, ani chuan," A har lo êm mai, i sawi ang a, an țawngin kan let mai dâwn alawm," a lo ti awlsam ve mai bawk a.

Hun a neih veleh cheque keng chuan Aizawlah a han kal leh a, a rawn haw meuh chuan ka pa nèn kawr thar pahnih ve ve min rawn lei ve zân a, amah erawh chuan a inlei ve lêm lo a nih hmel. Pawisa dang zawng chu bank-ah a rawn dah nghâl vek a,"Kan mamawh chu tuna pawisa tel lo pawh khân kan indaih tho, Lunglei lama in luah man pawh kan khawih che ngai lo a nia," a tih chuan ka pa chuan," Naute kan neih hunah erawh chuan thil țha ber ber kan lei ngei chu a ngai tawh ang," nui chung hian a lo ti a.

Zorina chuan min rawn en zawk a, chutah, ka pa en leh nghâlin," Tehrêng mai, kan neih hunah chuan a țha ber berin le; mahse, han hmanhmawh viau theih pawh a ni lo, bâkah, hetiang lamah kher hi chuan thu kan nei lo êm a, a hun takah naute chu duhawm tâwk tâwk kan la nei țeuh mai ang," tiin nui pah hian ka rilru tihdam nân ka ti mai, a lo ti ta vat a.

Naute hi an awt ve tawh a ni. Kei lah hian chanchin thar ka la nei thei si lo va, hrehawm ka ti ru viau tawh a ni. Dik lohna ka nei em ni ang? Amah lamah hi chuan dik lohna a awm kher àwm si lo va, keimah hi ka ni ngei ang. Inentîr lah chu thih hrehin ka hreh a ni, ka lo chiangkuan loh vaih chuan...Bâkah, Aizawla kal chu ka hreh a ni tawp mai. 

Ni tinin kan hun hman dàn chu a ngai a ni mai. Zorina chuan naute lam rêng rêng a sawi chhuak ngai lo, a sawi ang chiahin thu kan neih lohzia kei pawhin ka hre chiang a, ka rilru tihnawm loh nân a sawi chhuak duh lo a ni ngei mai. Ni tin mai hian hun hlimawm tak tak min hmanpui a, min duat zual sauh sauh bawk; mahse, hna ka thawh ve a phal lo thar leh ta chuan min tilunghnûr deuh țhìn a, ngen tak têin a bula hna thawh chu ka ngèn chiam țhìn, a tàwpah erawh ka zui leh nge nge ziah bawk.

Zirtàwpni zîng a ni a, kan inrûk ațangin ni pawh a lo ral tam ve ta. Ka chhûngte'n min rawn tlawh ngai lo mah se Zorina hian min tihlim tâwk a, ka pa lahin a theih ang tâwkin min duat bawk a, ka chhûngte pawh ka ngai hran lo, ka pa phei chu, ngaihtuah pawh ka ngaihtuah duh lo, ka hlimna tichhetu atân hman ka phal lo bur.

Zorina'n min thawhsan leh tawh a nih hi. Tûnlai hi mut ka duh thar nge ni, a thawh ruala min kai tho ve tùr hian ka ti ve ziah a nia; mahse, tukin pawh min kai tho leh ta lo. Ka zawh lah hian min kaih thawh theih loh thu min hrilh ziah lehnghâl a, a zia lo thei tak tak. Hna thawkin min lo chhuahsan leh daih tawh ang chu, a châng chuan min kaih thawh theih loh thu hi chhuanlam a siam mai a nih ka ring țhìn.

Ka lu chu a rit deuh lûkin ka hria, nizàna ka muthilh theih lawk loh vàng kha a ni ngei ang chu, games kha ka khèl rei pawh a ni si lo va, zan dangah pawh nizàna ka khelh chen kha chu ka khèl ve zauh zauh tho si a.

Zîng kâr tluan chuan ka awm a nuam lo, ka khua a sik ka tih chuan a ni meuh lovin ka hre bawk si, ka awm erawh a nuam fahran lo; mahse, an hria ang tih ka hlauh avàngin zîng dang ang thovin ka pa chu ka be bawrh bawrh tho a. Chawhnu lamah erawh a reh leh tawh a, insûk tùr țûl țûl pawh ka thawh zawhah in bul hnaia thlai tui ka pe leh bawk a. Ka pa hian ni tlâk hnuah tui hi chu pe tùr hian min ti țhìn a; mahse, ni tlâk hma hian ka pe ziah tho. Ni tlâk hnua pêk chu ka khawngaih țhìn, ni sat laia tui an hmuh hian nuam an ti zâwk ang tih ka ring zâwk tlat si a ni.

Zîng a nih apiangin chutiang chuan ka awm chho ta ziah, khawsik tih dâwna chutiang êm ni pha meuh si lo hian ka khua chu a rûk deuh hian a sik ser ser chho a, ni a tlângsàn hnu lamah erawh ka pângngai zui chho ve zêl bawk a, kei hi ka malaria em ni aw ka ti ru deuh hial a ni; mahse, Zorina erawh ka hrilh duh chuang lo.

Zîng khat ka tho chhuak chu Zorina chuan hna thawka chhuak lovin eirawng a lo bâwl niin, a hmuha hlim hmel pu lui hrâm hrâmin a eirawng bâwl puih tum chuan ka pan phei a; mahse, a thil kan rim na zet chuan ka pên lai chu min tiding chiang khawp mai. Ka âwm a rawn hnawh up up a, ka hnar hup vatin tui dehna lam chu ka pan ta vat a, ka pum lam ațanga rawn pump-tu a nat êm avàng chuan insùm theih miah lohin ka uak ta tuar tuar a.

"Engati nge?!!" tiin min rawn pan vat a, ka hnung a rawn chûl a, kei lah chu luak chhuah tùr nei mang si lo chuan ka uak tuar tuar reng mai a, a mangang chuan ka hnung chül reng pah chuan ka pa a ko chûl a.

"I dam lo em ni? Nge, thil ei sual i nei zâwk? Min timangang a nia, i hmel pawh a dik miah lo, mu hahdam leh rih mai rawh aw," tiin ka bânah chuan min vuan a, a awka chhuaka manganna chu ka hre chiang khawp mai.

"Ka țha, i thil kan rim khân ka luak a ti chhuak mai alawm, eng nge ni i kan rêng rêng a?" ka ti sap a, min hnawh up uptu avàng chuan ka uak leh nghâl a.

"Alu a nia, a hma pawhin i ei duh theih êm kha, bàwlhlo eng eng emaw ka telh vàng kha a ni ngei ang, rimchhia i ti tih ka lo hre miah lo va," inthiam lo tih hriat tak hian a ti leh a, nghet tak hian ka bânah chuan a vuan bawk a.

Ka pa lo lûtin," Engtizia nge ni?" a rawn tih chuan Zorina chuan," A rawn thawh veleh a rawn uak vak vak ringawt a, ka ngaih a tițha lo a ni," a lo ti vat a.

Kei chuan," Ka țha ka tih kha, a reh leh mai ang. Zîng lamah hian ka ni deuh a, chawhnu lamah chuan a reh leh vek dâwn alawm," ka lo ti vat a, ka pa chuan," Engtik ațangin nge chutiang chuan i awm a?" a lo ti leh a, ka hmui hru pah chuan," Kâr chu a tling tawh, a Alu kana bàwlhlo a telh rim khân ka pum a rawn tilet but a, chuvàng mai mai chu a ni," ka ti leh a.

Ka pa chu a ngawi ta vang vang a, Zorina erawh chuan inthiam loh hmel deuh hian," Ka paih vek mai ang aw, ka thil kan vàng vek a ni," tiin min thlah a, gas stove awmna a pan lai chuan ka pa chuan,"Kan chhûngkua kan pung dâwn niin ka hria," a ti ta charh a.

*******

Kan chhûngkaw hlimzia chu, tu dang mah kan ngai bîk lo rêng rêng. Ka rai ngei a ni tih kan hre chiang tawh bawk a, duat chikimin min duat ni berin ka hria. Hna ka thawh ve hlek pawh an phal tawh lo va, insûk takngial pawh an phal tawh lo. Ka ei châk apiang leh naupai ei atâna țha tùr nia an hriat apiang Zorina'n a lei a, Aizawl pawh a kal zin phah khawp mai. 

Ka nute pawh ka hrilh ve a, min lawmpui khawp mai. Kan inbiak lai chuan ka nu mittui chu a tlâk ngei ka ring, a aw ațang chuan ka hre thei tlat a ni. Engtikah emaw an hman remchàn veleh min rawn tlawh an tum thu a sawi chuan," Nu, a ngai kher hleinem, buaina a thlen phah mai mai zâwk ang," ka lo ti a. A chhan chu an lo kal chuan ka pain a hre ngei ang a, zu a ruih nasat leh deuh hunah buaina zakhua thlentu leh mai a ni ang tih ka hlau, keimah avànga kan chhûngkuaa buaina thlen leh chu ka duh tawh lo a ni.

"Kei ka lo kal thei kher lo a nih pawhin i naute pahnih hi chu an rawn kal tho ang, Aizawl ațanga hmun hla taka awm pawh i ni lo va, rawn tlawh che chu kan bâ alawm, ngaihtuah loh che chan kan chang tlat a, Zorinate pafa lakah pawh a inthlahrunawm zozai tawh e," a rawn tih chuan ka hnial tawh bîk lo. Ka naute pahnih pawh hmuh an châkawm ve tawh bawk alawm, Tapuia phei chu ka hmuhna a rei ve ta, rawn kal hlauh tak teh se.

Kan inbiak ațangin ni tam pawh a ral lo, Inrinniah Tatei leh Tapuia chuan min rawn tlawh ta chiah. Picnic an rawn awm avàngin Zorina erawh a chhuak rih a, kan in chhûnga an rawn luh chuan Tapuia chu a hawi kual nasa mai a.

"U, in in va'n nei nuam reuh ve! Kan in aiin a nuam daih zâwk a nih hi," a tih chuan Tatei chuan," Chutia nuam i tih viau chuan awm ve daih la ti nia," a lo ti vat a, ani lah chuan,"Ka awm lohin pa zu rui lak ațangin tuin nge chhan ang che u?" thutak zet hian a lo ti thung a.

Ka lo inrawlh ta vat a," Engin nge in rawn kal?" tiin, Tapuia chuan," Scooty kan lei ve tawh a, Tatei hian rawn khalh phêt a tum a, a khalhah ka chuang ngam si lo va, a rawn titau bûr maw le," nui chung hian a lo ti vat a.

"Daw kher suh aw, i khalha chuan a hrehawm tehrêng nèn, la inla khalh thiam êm êm zui, ka rui lo chauh a ni," tiin Tatei chuan a âwm chu a'n dawm fiam a, ka naute pahnih infiam tawn chu hlim rilru deuh hian ka en tawn sek a.

"Khawiah nge in pa leh a pa chu?" Tapuia'n a rawn tih tâkah chuan," An chhuak lawk a nih kha, Zorina chu a lo lët țêp ang, in lo be bawrh bawrh dâwn nia," ka lo ti vat a, Tapuia vêk chuan," Ka hre chiang ve mang miah lo va, i chungah an fel rêng rêng em? An fel a nih chu ka ring deuh tho, i mitmengah hlimna ka chhiar thei tlat a ni," a ti leh a.

"Aw, fel e, an fel lutuk. Min duat êm êm a, kan ina in bula ka hlim ang tluk zet khân ka hlim a ni," ka tih lai chuan Zorina chu a rawn lût a, Tateite a hmuh chuan," In lo thlen lai ka lo hre hauh lo, in lo thlenna a rei tawh em?" a ti nghâl vat a.

"Rei vak lo ve," Tatei'n a tih chuan Zorina chuan," A nih tak chu, in dam țha maw? Thingpuite in lo in tawh em? Ka'n thlit nghâl ang che u aw," tiin flask awmna lam chu a pan ta nghâl a.

"Nautepa tùr chu a phûr àwm sûrh sûrh hle mai," Tapuia'n a tih sap chuan Tatei nèn chuan kan en rual chiah a, ani lah chu a lo nui var var a. Tatei chuan mitmeia hau pah hian,"Hei, a hriatah chutiang chuan ti miah suh," hmui phun hian a ti sap a, ani lah chuan," Eng nge pawi? Kan u pasal a nia, naute an nei mai dâwn a, keini pawh kan phûr alawm, 'phûr sûrh sûrh' tih chu eng nge a mawi lohna?" a ti leh a.

Thingpui kan in lai chuan Zorina chuan," Tapui, sangha man i châk em?" tiin a zâwt a, ani chuan phûr tih hriat zet hian," Tehrêng mai, kan man dâwn em ni?" a lo ti var a, a phùrzia a aw chhuak ațang chian a hriat theih vek si a, Tatei nèn chuan kan lo nui a.

"Aw, in hawn tùr kan man dâwn nia, chawhmeh anhnah leh rah lam pawh in hàwn țeuh dáwn nia, keini chuan kan ei sêng chuang lo va," Zorina chuan a ti a, Tapuia pek chuan," Ka va man châk tawh! Thingpui in zawh veleh hian man nghâl ila?" a ti a, Zorina chuan nui var var chung hian," Tehrêng mai," a lo ti ve bawk a, Tapuia phûr lutuk chuan thingpui chu a'n thâwk khat piap mai a, Tatei chuan," A mak thei! Insûm ve deuh la," a lo ti ve vat a.

An liam hnu chuan," I ei tùr leh thawmhnaw tùr kan rawn keng a, ei tùr hi chu ka nuin i ei châk a rin kan lei a nia, thawmhnaw hi i rai len deuh huna i hâk tùr a ni thung," tiin bag ațang chuan ei tùr leh thawmhnaw chu Tatei chuan a rawn phawrh chhuak a, ei tùr chu dah sawn rihin thawmhnaw chu ka ban a,  kawrfual pahnih leh kawr chhîng pahnih dang, a bân bùl ve ve a lo ni a.

"Ka inhmeh ngawt ang chu!" nui chung hian ka ti a, chutah," A làwmawm lutuk e; mahse, Zorina hian min ngaihsak a, min lei ve reng reng a nia, ka thawmhnaw tùr lei lo hian college-a i thawmhnaw hâk tùr i lei zâwk lo a ni tiraw? " ka ti a, ani erawh chuan," Ka nei alawm, kei chuan ka lei fo bawk. Naute i pai tawh a, ngaihtuah i ngai daih tawh zâwk a ni. Nakinah naute thawmhnaw tùrte kan la enho ang chu tiraw? Aizawlah in-checkup tùrin in rawn kal țhin ang chu?" a ti a.

Kan chhûngkaw chanchin chu ka zâwt a, ani pawh chuan zêp nei lo chuan min hrilh ve zêl bawk a, ka pa pawhin zu a la in tluang zêl a, buaina erawh a siam ngai hran tawh lo va; mahse, kan in chhûngah erawh ka hming lam a phal hauh lo a ni àwm e. Kei chu a fanu ka ni tawh lo va, kan chhûngkaw zîngah pawh ka tel tawh lo, kan chhûngkaw hming ațangin ka hming chu thai chhiat a ni tawh a, paih bo ka ni tawh a nih chu.

Chawhma chhûng deuhthaw kan pahnih chuan kan titi a, chawhnu lamah erawh kan in bul vêla kan thlai chìn chu ka enpui a, pangpar kan chìnte pawh chu enpuiin a pàr dànte chu ka hrilh ve a, ani pawh chuan," Kan inah hmun chu awm se chuan ka hàwn ve ngei ngei ang, a pâr mawi hlawm dâwn si a," a ti a, chutia kan țawng lai chuan Zorinate pahnih pawh chu an rawn haw a, bucket hian an sangha man chu an rawn khai haw a, Tapuia hlim hmel chu hmuh a nuam teh e, hlawhtling a inti dâwn bawk si.

"Rawn kal zeuh zeuh tùr a ni, sangha man tùr ringawt pawhin, in in hmun lah a nuam bawk si, nuam ka tih zâwng tak a ni," a ti lar lar reng a, Zorina nèn chuan an lo inbe nêl hman viau a ni ngei ang chu, a làwmawm e.

Chhùn thingpui in hnuah anhnah lam la tùrin mipa pahnih bawk chu an chhuak leh a, Zorina kal liam tùr thlìr vang vang pah chuan,"Sawmzuala ai chuan dah hniam deuh hlek mah ila a fel chu ka ti tho," a ti sap a.

"Tu Sawmzuala maw?" ka tih chuan," Insomnia neitupa kha maw le, i theihnghilh tih sawi miah suh, a fel êm kha, hmãnniah pawh kan chàwl a; mahse, ka hmu lo hlauh thung," a ti vat a.

Pasal ka neih hnu hian ka ngaihtuah chhuak miah lo a lo nih dâwn hi, tunah a hming a sawi a, ka hre chhuak chiah, chutiangin Super Max pawh. Ka hlim ve tâwk a lo nih chiah hi, ka star êm êm țhin pawh vawi khat tê mah ka ngaihtuah chhuak lo thei a nia, mipa dang hrim hrim pawh maw le.

"Sawmzuala nèn chuan khaikhin hauh suh, Zorina hi chu ka tâna Pathian min ruatsak liau liau a nih hi, Sawmzuala chu nei rawh, ani ang kha chu ka ngainat zâwng a ni lo," ka lo ti vat a, ka nui pah deuh bawk a. Ani pawh chuan," A, ka ti ve mai mai alawm, U Zorina hi a fel ka ti lutuk, ani aia mâkpa țha tùr ka hre chuang lo," a lo ti ve mai a, kei lah chuan," Ka pa erawh chuan a ti ve hauh lo ang," ka ti ve thung a.

"Anite chuan U Tluanga a duh ber alawm, ani lah chu a lo lang ngai tawh dèr mai si lo va, khawiah nge maw a lèn tâk țhin ni?" Tatei chuan a ti vang vang a, min rawn en a, chutah," A va ho tak! A duh duhnaah a lêng ve ang chu maw le, duh lotu ngai chuan a kûr a kûr bîk tawp nâng!" a ti leh a, a nui zui hak hak a.

Rawn picnic-ho haw hnuah chuan Tateite pawh chuan hàwn zai an rêl ve ta a, an haw hmain ka pa a rawn haw ve chiah bawk a, ka naute an ni tih a hriat chuan zanriah ei tùrin a'n sâwm nghâl zat a; mahse, inkhâwm zàn a nih chhuanlama hmangin an hnar thei ta hrâm a, rawn kal leh vat an intiam hnuah chuan an tlãn liam ve ta nghâl a.

Ka rai tih hriain țhiante pawhin lawmpuina min rawn hlàn tliar tliar a, chuti maia rawn kalna hun remchâng an neih theih tawh loh avàng erawh chuan ngaihdamte min rawn dîl a, naute pian hunah erawh min rawn chîm huk an tum thu an rawn sawi erawh chuan ka nuih a tiza viau.

Hun a ral a, ka pum pawh a rawn lian ve sâwt ta viau, hmeichhia a ni thei ang em aw ka ti, a chhan chu rai chu ka haw mang hauh si lo va. Ka thil ei a tuiin ka thau a, vun ngo lam ka ni bawk nèn, ka no sur maiin ka hria. Inentîra Zorina nèn Aizawl khawlaia kan kal te chu mi pawhin min en duh thei viau a, hmel hriatin min hmu ang tih erawh ka hlau, a chhan chu ka chanchin an hre nual dâwn si a, ka duh lo a ni. Zorina lah chuan min han duatin a intineitu thei lailêng khawp a, ka bânah a vuan tlat a, a nih loh pawhin ka kokiah min kuah tlat țhìn, a nupui ka ni tih miin an hriat loh a hlau a niang, ka tân lah a lo huattthlala lo bawk nèn, Aizawla han kal vêl pawh chu ka phùr phah ve sawt țhìn.

Thla sarih a vei meuh chuan ka inzo tawh lo viau mai a, ka pum a puar lian tawh bawk nèn, ka ke lah a lo vûng deuh bawk a, ka peih lo chung chung chu Zorina chuan kan in bulah chuan exer min lâkpui țhìn a, exer la tih lêmah muangchângin  thui vak lo chu min kalpui țhìn. Ka hrisêl țha a, insawisèlna ka nei lêm lo. 

Tatei leh Tapuia'n min rawn tlawh zauh zauh a, an rawn kal azâtin ei tùr leh naute thawmhnaw tùr min rawn kensak ziah bawk. Ka nuin min rawn biakin," Naute i neih hunah chuan keima'n ka awmpui dâwn che nia, damdawi inah i nei ngei ang a, Zorinate pafa buai chûk ngai lovin kei leh i naute pahnihin kan buaipui thei ang che," a rawn tih chuan rilru chu a nuam ve sawng sawng mai, nu nge nge chuan min lo ngaihtuah deuh chu a  lo ni.

Zàn mutnaah chuan ka pum puar zet chu chûl hoh hohin," I lo chhuah hunah chuan țha takin lo chhuak rawh aw, ânu tân na lutuk tawrhtîr lo bawk la, ânu leh âpa hian kan hmu châk tawh bawk si che a, kan hmangaih dâwn bawk si che nèn, lo chhuak thuai thuai rawh aw," tiin a be pah sap sap bawk a.

"Naute, âpa hian kei aiin a nghâkhlel lo zâwk chein ka hria, chuvàngin-" ka sawi zawh hma chuan ka hmui a rawn hup vat a," Naute hriatah thu dik lo sawi miah loh tùr. Naute, lo chhuak thuai thuai rawh, i lo pian chhuah hun ka nghahhlelhzia hi chu hria la, tunah pawh khân ânu pum chhûng ațang khân lo chhuah nghâl i duh ang; mahse, a hun taka i lo chhuah hun ka nghâk thei a nia; mahse, tlêm chuan rawn hmanhmawh tho la aw, i hmelțha dâwn si, kan hmu châk tawh lutuk che," a ti leh sap sap a.

Damdawi inah chuan nau nei tùr chuan ka lût ta ngei a, ka nuin min buaipui char char mai. Ka pa pawhin a sawisêl bîk lêm lo a niang, eng mah sawi a awm lo tlat. Ka nei har khawp mai lehnghâl a, ka neih vawi khatna tùr a ni nèn, har kha chu ka inring sa ve rêng a. Ka luh ațanga ni thumna zîng lam dâr 2:16 -ah ka nei ve ta hlawl mai, ka chàu bawk a niang, naute țap ngâk ngâk ri chuan 

min kai harh zo mang lo a ni, hmeichhia a ni tih an sawi erawh ka hre riai riai, ka mut a chhuak lutuk a, tui zetin ka muhìl ta nghâl a.

*FAKNA LEH SÈLNA HI PAWM THIAM VE VE A NGAI, PANGPÂR PAWH HIAN RAWN PÀR CHHUAH THEIH NÂN RUAHTUI LEH NI SA A MAMAWH VE THO A NIA*