Direct Download copy code here: ☆LAIRIL LUAHTU☆ - 18 By Dingdi Pachuau Skip to main content

☆MIN EN LA☆ - 27 By Dingdi Pachuau

 ☆MIN EN LA☆ - 27 By Dingdi Pachuau "Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla  a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt. A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng at...

☆LAIRIL LUAHTU☆ - 18 By Dingdi Pachuau


 ☆LAIRIL LUAHTU☆ - 18 By Dingdi Pachuau




Chiang lo riai hian ka harh a, chhùn nge zàn ni ang tih pawh ka hre hrang thiam chiah lo, a êng deuh uau chuan ka hria. Ka mumang zâwk em ni? Ka mumangah pawh hetah chiah hian a nih kha Zorina nèn kan awm ni, men ka han tum viau a, ka theih tâwp takmeuha ka han țan chuan tlêm chuan ka meng fiah deuh chuan ka hria.




"Zorin?" tiin ka han ko a, kei pawhin ka aw ri chu ka hre chang chang chauh mai! Engati nge ka aw chu a va chhuak ring lo ve le!  Mahse, ka bula Zorina țhu reng chuan a lo hria a ni chiang, ka kutah a rawn vuan nghâl vat a, a kut chu a lum țha hle mai. Ko ring lo viauin inhre mah ila, ani zawng ka pasal, ka khing phel a ni miau a, a lo hre lo thei lo.




"Ka mumang a ni lo tiraw? Khawiah nge ka awm?" tiin ka zâwt leh a, a hmel chu hmu chiang thei lo mah ila a kut lian leh lum zeta min chelhna chuan thlamuanna mak tak min pe a, ka mumang pawh lo ni se, ani nèn hian khawi hmunah pawh lo awm ni mah ila ka bula a awma ka kut a vawn tlat chuan ka him a ni mai.




"Damdawi inah i awm a-" dam dapa a rawn tih chuan ka han ngaihtuah lêt a, ni dâwn tak e! Naute ka nei tak alawm, ka mumang a nih loh nasat chu. Naute hmeichhia ka nei a nih kha, engtin nge ka theihnghilh theih záwk a?




"I hmu tawh em? A hmelțha em? Nangmah nge a chhun che keimah?" tiin phun sep sep chuan ka zâwt mawlh mawlh a, naute ka nei tih kha ka hria a, a hmel pawh hmu lovin ka muthilhsan daih a nih kha, tunah chuan ka hmu thei tawh ngei ang, ka harh tawh si a; mahse, ka va chau si êm! Men pawh ka la meng  chiang hlei thei lo achha chu a nih hi.




Ani pawh chuan ka dinhmun min hriatpui ni àwm tak hian, "I la hmu ve êm êm mai, muhìl leh rih phawt rawh, i harh chian var hunah naute chu i pawm dâwn nia," a lo ti ve a, a thu áwih mai loh chu tih theih pawh ka nei lo, ka meng leh thei tawh lo.




"Ka bulah awm reng rawh aw, min kalsan suh, ka harh veleha ka hmuh hmasak ber atân ka duh che a nia," ka ti leh sep sep a, naute ka neihna lamah thisen ka hloh hnem deuh a ni ngei ang, heti êm êma ka chauh ni. 




Ka awm dàn chu ka ning tak zet. Hetiang hmunah engtin nge Zorina hian min hruai theih? Min duat viau țhìn kha a ni si a, naute ka pua a, Zorina chu hmuh theih si loh, a aw erawh hriat theih si hian a țawng zauh zauh reng a, min nghâk tùra ka tih lahin a ngawi leh tlat bawk si a, ka hah lutuk tawh. Naute erawh a nungchang a țha viau thung, a țap miah lo va, ka puak ang ang chuan a muhìl mai a, kan kalna hmun chu a thim deuh e tih mai lohah chuan kal a harsa lutuk lo; mahse, ka hah a ni, ka hah tawh ngawih ngawih. Chawlh awm miah lovin kan kal char char reng a, țhut chawlh ve lawk pawh kan nei lo.




Chutah, kan hmaa hmun lo êng deuh uau mai ka hmuh chuan ka thaw hak a, helai chu a nuam deuh tawh ang chu tiin hlim rilru deuh hian ka pên chak sauh a, ka thlen hnaih deuh erawh chuan ka beidawng lutuk chu ka țap lo chauh a ni! 




Khàm làwn chhoh ngai a lo ni a, kei, naute paw chung phei chuan ka lâwn chhuak thei hauh lo ang, ka chau tawh bawk si nèn, Zorina chu ka ko chùl mai a, ani lah chuan," I thei ang, i theih ngei a ngai, i thei tih ka hria a ni," a ti tlat mai a, amah hmuh tum chuan ka mit ka han lèn kual a; mahse, ka hmu mai lo, ngun leh zuala ka han en chuan khàm ka làwn chhoh tùr chanve vêl chu a  lo láwn thleng tawh niin.




"Min lo nghâk ve teh," tiin ka lâwn țan ve ta nghâl a, tha ka neih tawh lohzia ngaihtuah chuan ka rin ai chuan ka lâwn awlsamin ka hria; mahse, rei ka daih ngût ang em? Ka hawi chho a, ka làwn chhoh tùr la thuizia lah chu, mit tlin táwk chu khàm inchhawrdawh chho zui mai a la ni vek.




Ka hah lutuk chu ka thaw kâwk kâwk phawt a, chutih lai chuan ka puak ka naute chu a lo țap  ve nghâl chiah bawk a, naute ka ngaihven tùr sîrlam ka hawi chuan ka kut veilam vawnna a pial palh ta hlauh mai a, khàmah chuan ka tla thla ta vawn vawn mai.




"Ka thi dâwn, ka thi dâwn chiang lutuk! A pawi lo, ka hah êm a ni, ka chau zo ta, ka thi, ka thi," tiin ka au vak vak a, ka au ri a zàwi telh telh a, ka mit pawh ka chhîng ta riai riai  a. Ka thi ta a ni tih hriat tak  hian țap insût tliar tliar ri ka hria a, ka thi tih hriain min țah ve a nih chiah hi.




"Maria, i thi thei lo a nia, naute hnute i pêk a ngai, nautein a mamawh lutuk tawh che," tia mipa țawng ri ka hriat tâkah chuan makti tak hian ka han meng chhuak a. A èn êm avàngin eng mah ka hmu thei lo, ka maimichhîng leh rih a.  Hei chu vàn ram a ni tawh ngei ang, ka bul vêlah țawng ri deuh sep sep pawh ka hria. Chutah, ka'n meng leh a, ka'n khap deuh sak sak a, in chung lam vâr vo chu ka hmu chiang thei ta deuh, vàn ram chu a nih ngei dâwn hi.




"I harh em? I hmu chiang thei maw?" Chu pa rawn țawng rual chiah chuan in chung vâr voa hmel lo lang chu ka hmu, min rawn en chhuk a, min rawn nuih deuh sak lehnghâl, ka hmuh hnu a ang chu ka ti, Zorina chu a ni chiah lo a nih hmel.




"I harh chiang tawh maw? E khai, I mu rei char char hle mai! Mumang i nei țeuh lo maw?" A aw chu Zorina a ni lo, tu nge ni? Ka pa a ni lo va, Tapuia pawh a ni chuang lo; mahse, a aw hi chu ka hriat tawh hnu chu a ni chiang a ni.




E, ka hria, Sawmzuala a nih hi, Sir Manuna u fapa kha, eng nge a lo tih ve a? Ani pawh hi a thi ve tawh tho tihna em ni?!




"Sawmzual, ka thi tiraw? Hei hi vàn ram a ni em? A va mak ve! Kan inhmu tlat sia, i thi ve tawh tho tihna a ni maw?" tiin ka zâwt ta ngawt a, ka aw chhuak thâm chhàl avàng erawh chuan ka țawng a ring lo kher mai.




"Ni lo deuh, hei tuna kan awmna hi chu damdawi in a nia. Han hawi kual deuh la, mi dang pawh i hmu mai ang," ani chuan a lo ti dam thlap a. A thu chu âwihin ka lu chu ka'n her kual a, Tatei meng phelh deuh phang  ka hmu hmasa ber a, min lo nuih pah deuh a, ka nu, Rci, Rpi leh ka țhian dang dang ka hmu ta zêl mai.




"Ka thi lo maw!!! Khàmah khân ka tlain ka hre sia, ka mumang vek em ni a lo nih?" ka tih chuan an lo nui dar dar a, Rci chuan," I thih kan phal miah hleinem, mangchhia mai mai a nih kha, i dam țha a nia, i muhìl rei mai mai a ni. I harh chiang tawh bawk a, hei hi han en chhin teh, eng zât nge a nih?" tiin a kut chu ka hmuh theih tùrin a rawn pharh kâk a.




He nu lehpek chuh! Nui chung hian," Min chhaih suh, ka harh ka țha alawm, ka ril erawh a țâm deuh a nih hmel," ka pum ri deuh raih raih avàng chuan ka ti a, chutah, ka awm dàn chu ngaihtuah chhuak leh thutin," Damdawi inah hian engati nge ka awm? Khawnge Zorina hi?" ka ti leh ta a.




Tu mahin min chhàn loh avàng chuan ka'n thlêk kual a, Tatei hmanhmawh taka kawngkaa a tlân chhuak ta daih ka hmuh chuan Zorina a ko dâwn anih ringin," Zorina a ko dâwn a ni maw? Ka bula awm reng tùrin ka hrilh mawlh mawlh khân ka hre si a," ka ti sap sap a.




Sawmzuala chuan aw thian kharh pah hian," Maria, i pachan viau a ngai dâwn a ni," tiin a han chàwl leh phawt a, chutah," Nimin piaha a haw kha Sipai motor nèn an insu palh hlauh mai a, vànduaiah a țang ta a ni, a pawi ka ti tak zet," sawi chhuah harsa tih hmel tak hian a ti ta charh charh a!




Ka mumang a ni chiang. Makti takin Sawmzuala chu ka en reng a, he pa hian dâwt min hrilh chiang a ni. A âwihawm loh lutuk, hetiang thu-ah dâwt inhrilh chi pawh a ni lo. Zorina chu ka hmuh reng kha, ka kutah pawh min vawnsak reng alawm, a sawi dik lo hulhual.




"Ka ning lutuk! Mumang râpthlâk deuh deuh hi ka mang peih tawh lo, min kai harh teh u," ti tuarin ka tãl pah a, thawh ka tum chu min rawn chelh ta vat a, ka kutah chuan drip an lo khai reng niin, ka vai per ţhelh a ni!




"Zorina chu han ko teh u, min kohsak hrâm teh u, a thi tih kha chu min hrilh hauh suh u, min kalsan ringawt thei lo, ani pawhin a duh hek lo ang, kei pawhin ka phal hek lo," ka ti tuar tuar a, ka lung a chhe lo va, ka mittui pawh a tla hek lo, dâwt min hrilh miau hek le. 




Ka nu chuan mittui tla zawih zawih chung hian," Bawihte, a pawi ka ti êm mai, hetiang tùr hi chu a ni lo asin. Aw, i tuar ai hi tuar thei ila ka va ti tak êm!" a ti vawng vawng a, mi dang inhnît hlawp hlawp ri ka hre chhunzawm nghâl bawk a.




Sawmzuala chu en hâ chung hian," A dik lo tiraw? I thil sawi kha dâwt vek a ni tiraw, Sawmzual? Hetiang thilah hi chuan fiamthu thawh chi a ni miah lo a nia, a kutah pawh ka vuan a, ka bula awm tùrin ka hrilh reng alawm, a lo kal vat mai ang," tiin ka hawi kual a, ka țhianteho țap ka hmuh chuan," Engah nge in țah ngawt a? Ka thih loh hi, tu mah thi an awm lo. Sawmzual, ka dam tiraw? Ka thi lo, Zorina pawh a thi lo, a thi miah lo tiraw?" tiin Sawmzuala bawk chu ka zâwt leh a, mi dang an țah avàngin ani bâk hi biak theih awm hek lo le.




Ani chuan pachang tak hian," Maria, a pawi ka ti tak zet a ni; mahse, dâwt a ni si lo. Zorina chu nimin khân vui liam a ni tawh a ni, pachang takin tuar hrâm hrâm rawh aw, naute enkawl tùr i nei bawk si," a ti leh charh charh a.




Ka en reng ringawt! A thih miah loh hi, dâwt min hrilh a ni. Ka mit ka'n khap sak sak a; mahse, Zorina hmel chu Sawmzuala hmelah a chang leh ta daih! Ani lah chuan khawngaih hmel tak hian min en chhuk ràn a, a mitmenga lainatna leh khawngaihna lo lang chuan dâwt a sawi lohzia a tifiah chiangin ka hria, ka thil hmuh chu a chiang lo telh telh a, chutah, ka han khap deuh sak a, ka biang rawn lum thla deuh pap pap avàng chuan ka mittui a tla a ni tih ka hre ve chiah!




Ka rilru bîng mup mup zualpui a reh hnu chuan chhuak êm êm hian ka țap ta hawm hawm a, Zorina ka hmuh miah lohin a liam maw? A va râpthlãk êm! Hei hi ka chan tùrah ka la dah chhin ngai lo. Fanu kan nei thar a, a hlim dâwn tehlul nèn, a nunna chu lâksakin a awm ta si. Mami chuan țap zawih zawih chung chuan min rawn kuah thlawp a, mi dang pawh an țap vek, room chhûng chu țap hawm hawm riin a khat a ni ber.




"Engati nge ka hmuh miah loha in kaltîr theih? A hmel chu hmuh ve ka duh asin. Zorin, engtin nge ni ang? Kan fanu hi engtin nge keimah chauhin ka chawi tlei ang? Pa a nei dâwn lo asin, a lo pian hun i nghahhhlelh êm kha, engati nge eng mah sawi lova i kal ringawt?" tiin ka țap vawng vawng a.




Ka țap nasa lutuk a, ka chàu zo, a hnuah phei chuan ka aw pawh a chhuak țha thei tawh lo. Ka mittui lah chu dan rual lohin a dîr zung zung a, ka kutin ka hru thei si lo, ka țahna lamah ka pum pawh a na zo ta.




Doctor-in min jection chu ka hre ruai ruai a, ka harh leh meuh chuan khua a lo thim deuh ruai tawh a, ka harh tih hriain ka bula awmte chu an rawn che nghâl zat bawk a, Tatei ka hmu hmasa ber a, a dawtah Sawmzuala niin ka nu pawh ka hmu.




"U, i lo harh tawh maw? I ril a țâm tawh ngawt ang, ei châk zâwng te i nei em?" tiin Tatei chuan min lo be nghâl sawk sawk a, ka mit thial ûrh chu khap deuh sak sak pah hian," Tui ka in châk," ka ti sap a, ka aw ri chu a chhuak miah lo, mak ka ti viau mai.




Sawmzuala chu rawn țhu hnaiin," Ei châk i neih chuan sawi hmiah hmiah rawh, ei tùr țha i mamawh a, i chak chhuah thuai a ngai a nia," a lo ti ve a, hlim hmel pu hian min en reng bawk a.




Tui tlêm min tulh hnu chuan ka kuta drip khai lai chu melhin," He thil hi ka ning tawh lutuk! A phawi theih tawh em?" tiin ka zâwt a, damdawi a lo far zo thàwthâwng tawh bawk a, Tatei chuan min phawisak ta nghâl a. Ka kut chu zawi muangin ka hûm a, zawi muangin ka pharh leh a, chutianga vawi nga vêl zet ka tih hnu chuan," Ka fanu ka hmu thei ang em?"ka ti leh a, Zorina nèna kan fanu chu hmuh ka duh a ni, ka la hmu miah lo a ni tih ka hre chhuak chiah bawk.




A tûkah chauh ka hmu. Ka hmuh veleh chuan ka mittui bawk chu dan rual lohin a lo tla leh ta zawih zawih mai. Zorina khân a lo pian chhuah hun kha a nghâkhlel êm êm a, ka puma a awm laiin a be ziah țhìn a nih kha, a duhthusàmah pawh fanu a awt hle a, a duat tùr thu leh țha taka a enkawl tùr thu pawh a sawi fo a nih kha; mahse, tunah chuan chutiang ngaihtuah hauh lo chuan a kal ta si, rilru nat vànga mittui tla zawih zawih chung chuan a nuin a fanu a pawm chu a thlîr reng a.




A nu chuan," Bawihte, intipachang hrâm hrâm rawh aw, i fanu hian a mamawh êm êm che a, thil thleng tawh leh hnunglam hian rilru tibuai lovin kan hun hman chhoh zêlah hian rilru pêk a țha zâwk a nia. A pain boralsan mah se țha taka enkawlin nu leh pa chan i chang tùr a ni. A pain țha taka enkawl chhoh a tum ang chiah khân i tum ve tùr a ni," a ti dap dap a.




Inhnît hlawp hlawp chung hian," Mahse, a pa tel lo chuan a khingbai dâwn êm asin, ka rilru hi a ipik ngawih ngawih a ni, a tel lova keimah chauha ka han enkawl chho tùr chu...," ka ti a, ka țap leh ta tlawk tlawk mai. Ka insûm thei lo, ka thinlung hi a na êm a ni.




Ina kan haw theih hnu pawh chuan Zorina nèn kan sùlhnu hlîr mai ka hmuh leh țhin avàng chuan ka țap ziah, intihpachan chu ka tum ve chiang alawm; mahse, ka pa a lo țap ve zêl bawk nèn, kan invèl tawn hi a ni ringawt. Kan in piah lawkah chuan Zorina thlàn chu a awm a, ni tin kan kal ziah a, kan țap ziah bawk. Ka nuin min awmpui lo phei se chuan engtin nge ka awm ang aw ka ti, ka nikhua lo nasa mai si a, țah tlawk tlawk bâk chu thil dang vak ka ti thei lo. Ka nu chuan naute min awmsakin a țûl ang apiang a thawk a, kei chu ka awm tawp a ni deuh mai.




Naute chuan ka hnute a hne lo, ka neih țantirha ka chiangkuan loh avàngin leh nikhaw hre lova ka awm deuh char char avàng leh ka taksaa damdawi kah luh reng a nih vàngin ka hnute hnêk an phal lo a lo ni. A zia phian mai; mahse, ka fanu chu ka khawngaihin ka lainat tak zet a ni, a nu hnute hne miah lovin a lo țhang lian dâwn chu a ni si a.




Thla khat vêl deuhthaw ka nuin min awmpui hnu chuan zan khat chu ina haw mai tùra min sàwm chuan ka harh phah kâwk mai! Mangchhiaah ka lo la chêng reng a lo ni, tuna ka awm ang hian awm reng thei ka ni lo, fanu enkawl tùr ka nei a, chutiangin ka pa pawh. Engkim ka koah nghah a ni tawh, Zorina a awm tawh lo va, a mawhphurhna kha ka ko a ni tawh, țha taka ka enkawl pawh a duh ngei ang, a duh ang takin ka pa leh ka fanu hi ka enkawl ngei ang.




Thla thum a liam leh meuh chuan ka ţap reng tawh bîk lo, ka intipachang a, țah ringawt mai chu a sâwt lohzia leh eng thil mah a siam țhat lohzia chu ka inhrilh reng a, chu chuan keimahah pawh nasa takin hna a thawk a ni. Zorina awm loh ațangin ka pa lah hi a tla hniam nasa a, a chiang lo deuh riai tawh bawk a; mahse, duat takin ka enkawl a, ka fanu Chimchimtei (Ka pa koh dàn) nèn kan pathum tê chuan khawhar takin kan inah chuan kan chêng ve rak rak a, an pahnih vàng tal pawh chuan ka chak a ngai a ni tih hriain ei tùr pawh châk lo teh mah ila ka ei hrâm hrâm țhin.




Ka țhiante leh ka unaute an fel êm êm a, min rawn tlawh ãwl lo a ni, Sawmzuala pawhin vawi hnih lai chu min rawn tlawh ve. Ka ngaihtuah lêt hian mak ka ti, damdawi ina a lo awm ve ringawt theih dàn kha; mahse, Tatei'n min hrilh hnuah ka hre ve ta chauh, a chhûngte damdawi ina awm kha an awm ve a, a kan țumin Tatei nèn an inhmu fuh hlauh mai a, ka chanchin chu a lo hre ve ta a ni. Inbe țhin leh inkàwm nêl kan ni si lo va, ka chunga a țha viau mai chu mak ka ti, inah pawh min la rawn kan zui zël a nia.




Chimchimtei pawh a felin a nungchang a țha khawp mai. Min chhùn a, a ngo reuh khawp mai a, a sam a buang thêng a, a la kir bap zui, a hmel a bial reuh bawk nèn, a lawmawm lutuk ringawt, a pa khân hetiang hmel hian han hmu ve phei se chuan a va làwm dâwn tak! Mahse, chutiang lam chu ka ngaihtuah thui duh lo va.




Tatei leh Tapuia'n min rawn riahpui fo avàngin ka khawhar pawh min hnèm viau a ni. Chimchimtei chu an làwmin an lo thlen tawh chuan ka paw chang ngai lo, Tapuia pawhin a paw reng peih a, mak ka ti viau zâwk a ni. Vawi khat chu ka pa chungchâng an sawi chhuak a, zu a in ta lo hmak a ni àwm e, thla khat chuang zet a ni tawh an la ti zui, mak ka ti a, ka chhûngte chu ka lawmpui khawp mai, ani zu rui âng reng hnuaia kùn kha a hrehawm tak zet si a.




Ka nuin min rawn bia a," Tihian i awm reng dâwn em ni? Rawn haw tawh mai la," tiin; mahse, ka tum bau lo. Ka pa(Zorina pa) hi kalsan tumna ka nei lo va, kan ina lêt leh phei chu ka tum lo hrim hrim. Ka pa hi ka chàwm tùr a ni, fapa a chân tawh, ka kut liau liau a ni. Ka fanu nèn hian ka châwm ang.




"Ka pa hi kalsan ka tum hauh lo, a dam chhûng chuan. Ka kalsan a nih chuan mi sual ber ka ni dâwn asin, fapa chãwmtu tùr a nei tawh lo, fanu erawh a la nei, a dam chhûng chuan kalsan ka tum lo," ka nu hnênah chuan ka ti hmiah a. Ka nu min sàwmna hi a dik lo pawh ka ti lo, a fanu ka ni a, min ngaihtuah vàngin a ti a ni ve mai; mahse, anni chu ka tel lovin khati chen kha an lo awm tawh, ka tel lovin ka pa hi chu a awm ve thei hauh lo ang, tunah phei chuan a tlâk hniam nasat tawh êm hi, min mamawh lutuk ringawt.




"I pa vàngin i hreh te hi a ni ang e, a rùi ngai tawh hleinem," a tih leh chuan," Ka lawmpui che u," ka ti sap a, chubâk sawi țûl ka ti lo. Ka pa khân U Tluanga min neihtîr kha tum lo se tûn dinhmunah hian ka ding ang em? Tuna harsatna ka hmachhawn zawng zawng hi ka hmachhawn kher lo maithei, țha takin Zorina nèn khân kan inneih kha lo phal ta se la, tûn ang a a pa chunga rilru sehhel lutuk a put ang hi a pu kher ang em?  Ni lo, chutiang a ngaihtuah tùr a ni lo, tunah chuan Zorina pawh a awm tawh lo, a boral tawh, a hmangaih leh a duh tak chu lâk bo a ni tawh, an in hluiah chuan a haw tawh ngai lo ang a, Zorina leh ama chunga a pa rilru put dàn avàng chuan a pa chu a ngaidam thei tawh bawk lo ang.




Min khawngaihtu an tam a, Zorina ràlna pawisa pawh ka hmu tam khawp mai. Ka dah țha zêl a, nakîna Zorina thlàn lung tùr mawi tak ka siamna atân ka ti a ni, Picnic Spot neitute lahin min rawn ngaihtuah êm êm bawk a, kan mamawh tùr nia an hriat hi min rawn pe khâwl țeuh mai a, pawisa lam ni se min pe țeuh bawk a, mite lo țhatzia hi ni tinin ka hriat chhuah phah a ni.




Engkim ka kuta a awm avàngin ka buai ve zak zak khawp mai a, picnic an rawn awm phei chuan nau paw chung hian ka buaipui țhìn a, ka pa a tirh tlâk tawh mang si lo va, ina Chimchimtei pawma awm mai mai hi chu a ti thei mai a; mahse, a hah ka hlauh avàng leh a taksa derdêp zet avàng chuan a kutah Chimchimtei ka dah ngam lo, ani lah hi a lo chum chho ve tawhin a chak reuh si a, a pu hi a tikhaw lo vek ang tih ka hlau a ni.




Chimchimtei'n thla ruk a tlin chuan Inrinni a nih vàngin a nutei leh a putea an rawn kal a, thla ruk a tlin cham chu an rawn lawmsak dâwn a ni. Kei chuan chutiang lam ka lo ngaihtuah lêm loh avàng chuan inbuaisaihna pawh ka nei lêm lo va, lawmna tùr thil eng eng emaw leina tùr pawisa Tapuia pêk ka tum a, ani lah chuan," Kan rawn ngaihtuah vek alawm," a lo ti mai a, pawisa chu a la duh dêr lo.




Mak deuh maiin chumi ni chuan Sawmzuala a rawn lang ve hlawl bawk a, a rawn hre sa emaw ni ka ti hial a ni; mahse, hre sa lo angin a insawi tlat a, a hman ve lai tak a nih vànga rawn kal a ni tih a sawi ve tlat. Chimchimtei tân chuan thawmhnaw leh a ei tùr damdawi țha ber ber chi leh a hnêk tùr Nestrogen bûr thum lai a lo kensak bawk a, a làwmawm viau laiin a zahthlâk ka ti viau bawk.






*HUN HIAN KAN NUNA HLIAM KAN TAWRH ZAWNG ZAWNG HI A TIDAM VEK THEI MIAH LO*

Comments

Post a Comment

Popular posts from this blog

☆LUHLULPA☆ - 1 & 2 By Dingdi Pachuau

☆LUHLULPA☆ - 1 By Dingdi Pachuau Ka fanu tui taka a muhìl sâk sâk chu ka thlîr reng a, ani lah chuan hmangaih takin ka thlîr a ni tih hre hauh lo hian kàwi sàwi zeta a teddy bear kuaha mu hian a thaw sâk sâk a, a biang tài deuh têkin a hmêl a han tihțhatzia chuh..ka thlîr ning thei mawlh lo. Mahni rîla rah fate hi chu mi fâte ai chuan kan duatin kan lo hmangaih deuh chu a ni, hmangaihna mita kan thlìr vàng pawh a ni ang chu, mi fate aia an chhiatna kan hriat theih miah loh ni. Rei tâwk fang ka thlìr hnuah chuan kûn hniamin a biang tài têkah chuan ka fawhsak zauh a, thàwm dìm takin room ațang chuan ka chhuak ta țhem țhem a, kawng erawh ka khâr lo. A lo harh veleh min ko leh vak emaw a ni ang a, ka hriat thuai loh chuan a lo țap leh palh thei si a, chuvàngin ka khâr duh lo. Choka zîm zetah chuan lût pheiin kan nufa ei tùr chu siam tùrin ka buatsaih țan ta nghâl a. Kan in chhûngah hian bungraw changkâng tak tak awm lêm lo mah se kan mamawh hi chu a awm kim ve viau, mamawh ...

☆MIN EN LA☆ - 27 By Dingdi Pachuau

 ☆MIN EN LA☆ - 27 By Dingdi Pachuau "Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla  a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt. A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng at...

RUATSANGA - 13

RUATSANGA - 13 By Dingdi Pachuau Min fawh kârlakah chuan min duh thu leh duhawm min tih thu a sawi sap sap tih ka hre ruai ruai. Ka thluak a buai a, ka chhia leh țha hriatna a buai vek tawh tlat a ni. Engtin pawh min ti se, hnial thei dinhmunah ka ding tawh lo hrim hrim. Tunah chuan a kuta min chúl mai duhtâwk lovin a hmui,zei zeta min fawhna ngei chuan a kut hnu a chhui ta zai zai mai. Ka nghawngah fâwpin,ka âwmbâwrah a tâwp chat a, ka hnute khuhtu awm tawh hauh lo chu a fawp ta chat mai. Kei lah nuamtiin ka lo er, ka la tawn ngai loh a ni bawk si a,lo dawnsawn dan pawh ka hre chiah lo. A nuam ka tih em avang chuan awmngaihna hre lovin ka lo tâl ve sek a. Fawh mai duhtâwk lo chuan a hmúr chu a'n seh pah nar nar a,a kut lehlamin a fawh loh lam chu a khâl pah bawk a. Awm ngaihna reng ka hre lo, ka lu ka thle tawn chhén mai. Chutah, tâwp thutin, châknaa khat mitmeng sexy zet chuan min melh ta rún a. Hrethiam lo zetin meng dâ vâ riaiin ka melh chho vat bawk a. "D, i d...