☆LAIRIL LUAHTU☆ - 3 By Dingdi Pachuau

 ☆LAIRIL LUAHTU☆ - 3 By Dingdi Pachuau

Ka en deuh reng  a, ani erawh chu kan bul ațanga kal sawnin noa tui va suakin a rawn keng phei a, dawhkàn têah chuan dahin lapaw țhenkhat chu tuiah chuan a chiah ta nghâl a. Ka pem hi min tihfaisak a tum a ni ngei ang.

"Ka ti thei alawm, a harsa lo-" ka la tih lai mêk chuan ka bulah chuan rawn țhu hniamin," A na em?" tiin lapua a chiah chu la chhuakin a hmet sâwr a.

"A na lo, a thì ser ser avàng hian a nat hmel ringawt a nih hi," ka ti leh a, ani erawh chuan ka khûp thî chu rawn hru fai nghâlin ka chàwn pilh nian, ka lumna avànga bàl paw deuh hriah bawk pawh chu a hru fai ta nghâl a. Tuiin ka tisa pilh lai a rawn deh chuan a thïp deuh vang vang mai.

"Damdawi hnawih hmain tihfai ngei ngei tùr," tia phun sapin ka hliam a hrûk fai chu a thlêk deuh vang vang a, chutah," Engtiin nge hmun dangah i kal daih a? I țhiante lahin tui an chêng vek si a," a ti leh a, min en chuang hauh lo.

Dik tak chuan 'aw mawi deuh hi an hmel a chhe duh' tih hi ka ngaih dàn a ni țhìn; mahse, he pa hi chu a ni miah lo, a aw a mawi a, a hmel pawh a chhe lo bawk, chuan, a mitmeng pawh a nalh.

"A nuam êm a, a hmunhma hi en kual vêl ka châk záwk a," tia ka chhàn lai chuan damdawi chu a rawn hnawih ta a, a thîp reuh kher mai. Ka kut ka hûm ruh a, ka ha ka seh ruh ngar ngar bawk.

"Hmun rualrem lo lamah i kal fuh palh hlauh a nih dáwn chu," a tih leh chuan a pa pawh chu rawn kal hnai vein," Kàngțhai hmunah khân maw le, a phihrît deuh laiah khân a ni lehnghâl a," a lo ti ve charh charh a.

Damdawi a hnawih zawh hnu chuan làwmthu ka han hrilh ve ngial a, kal tumin ka ding nghâl bawk a. Chu chu min hmuh chuan putar chuan," Hei, chhùn thingpui in a hun tawh reng mai a, in ve rih la? Bâkah, i hming pawh kan la hre miah lo," tia min sáwmin ka hming min zâwt pah a.

Nuih sak pah hian,"Lalrintluangi ka nia; mahse,'Maria' tiin min ko țhin. Ka kal thuai zâwk ang e, chuti lo chu,  țhiante'n ka awmna an hre àwm si lo va, an lo buai palh ang. Ka láwm lutuk aw," ka ti a, kekawr ka tawm chhoh chelh țãt țãt chung chuan ka chhuak ta a, min en zui ka hlauh avàngin a pângngai thei ang berin, insehruhin ka kal lui a, min hmuh theih tawh lohna hmun nia ka rin ka thlen hnuah erawh chuan ka ding deuh dat a, ka khûp ka tawm avànga thîp hlur lam chu ka melh thla a.

A va luck loh theih ţhìn êm! Kha pa kha hmelțhain a aw mawi viau mah se, a kut kha chu a dam bîk lo ve khawp mai. A damdawi hnawih lah kha a thîp ropui bawk si, ka nûr deuh nang nang a, hetiang tùr tih hriata tuiah khán peih lo chung chung pawha lo chèn mai tùr kha a nia...

Kan innghahna in ka thlen chuan ei tùr an lo ei nual tawh a, ka kekawr ka tawm chhoh ka tihthlâk leh tawh avàngin tu mahin ka lum a ni, pem hliam ka nei a ni tih an hre hauh lo ang.

"Khawnge i kal a?" tiin Mami chuan min lo zâwt var a, chutah," Ka ko vak vak che a, khawiah emaw i lo muhìl leh palh a nih ka ring deuh a," nui chung hian a lo ti a.

"A hmun hi a nuam ém a, ka han fang kual e ka tia," tiin dawhkàna ei  leh in tùr an lo dah sa chu ka ban ve nghâl a, Mami bulah chuan fîmkhur taka țhuthmun rem ve nghâlin mi dang lo titi barh barhte lam chu ka hawi a.

"Nakinah chuan Melorie leh  Lalhruaii'n dance battle an nei ang, chu pawh swimming pool kotlâng zai zaiah," Rci chuan kan zavaia hriat theih tùr chuan a ti làwng láwng a.

"Mi dang pawh lo lâm ve tho ula?" Melorie-i'n a lo tih chuan țhiante chuan pàwr, ring zet hian,"Yesss," an lo ti dual a, ka nuih a za khawp mai.

Chawhnu lam zet zawng, mit a tlai teh e. Mit mai a ni lo, beng pawh a tlai, music an play ring si, làm mai duh tâwk lovin rap battle an ti leh, kan va han nui nasa tak! Ka nui nasa lutuk a, ka khûp nâ pawh ka theihnghilh deuh hial thei nia! A hnuah tui an chêng leh bârh bârh hlawm a, kei erawh chu an hmuh loh tùrin ka inthiar fihlîm ta daih a, chumi hma chuan  Mami hnênah erawh ka khûp ka tihpilh palh thu chu ka hrilh ve luam tho a.

Chawhnu dâr 3:30 vêlah chaw ei kan siam a, U Zamate chawhmeh siam chu a tui kher mai, ka duh zâwng tak a ni. Ka ei tamin ka puar kher mai bawk a, kan ei kham hnuah ka pum ka chûl ka chûl ringawt mai.

Chaw leh chawhmeh kan ei bãng nual a, U Zamate'n paih an tum deuh thut thut a; mahse, ka lo inrawlh ta vat a. Kan têt lai ațang tawhin ka nu hian chaw leh chawhmeh ei bàn leh paih a phal ngai lo va,"Khawvêl hmun hrang hrangah ei tùr nei lo tam tak an awm laiin keini'n ei tùr kan paih mai mai tùr a ni lo, kan ei kham tâwk chiah kan lain kan suak tùr a ni," a ti țhìn. Chuvànga kan chaw leh chawhmeh ei bãng chu paih phal lo ka ni rêng a ni.

"Ih, Gatekeeper-te pafa khân an ei duh ngei ang, paih ngawt ai chuan pe ang chu," ka tih chuan makti hmêl deuha hian min rawn en deuh hû hlawm a.

"Engtin nge chúngte chu i lo hriat a? Gatekeeper-te pafa maw? Wow..!! Va hre ril bîk ve!" Melorie chuan a ti lawng láwng a.

"A ho êm mai, va pe thuai zâwk teh ang u, a tlai mai dâwn," tiin Mami chu ka mitmei zauh a, ani pawh chu lo kal nghâl vatin kan ei bãng bëla kan suah chhuah chu a rawn ban nghâl a.

An in bul kan thlen chuan pãngngai thei ang berin ka kal lui leh ta a, kawngka a lo inhawn sa avàng chuan kik kher lovin," In awm em?" Mami chuan a ti nghâl a.

Putar chuan min lo chhàwn vat a, min hmuh veleh chuan," Maria, eng nge ni ta? I ke kha a zia deuh tawh em? Uai! Eng nge ni in rawn chàwi tâk vû vû a?!" a lo ti vat a. Kei chuan thil awm dàn chu ka sawi ta thuai a, Mami pawhin min lo tuihnih ve a.

"In fel hle mai, a tam hlê bawk si a, in zârah chawhmeh tui tak kan hmeh dâwn zuk nia. Keini pafa ringawt phei chuan kan ring rei ngawt ang chu,"a ti duah a, chawhmeh leh chaw dahna tùr dekchi a rawn lâkah chuan kan thil ken chu kan chhûng a. 

Mami dïlchhût pek chuan," Ka pu, in pafa chauhin maw in awm a? A va khawharthlâk duh àwm ve..?!" a lo ti hmanhmawh a. Ka melh deuh ralh nain a záwt tawh tho a, awmzia a awm tawh chuang lo, zâwt vêl mai mai teh se, a lo haw bîk nâng.

"Nia, kawng lehlam zâwnga ngaihtuah chuan a khawharthlâk a; mahse, kan awmna a rei ve deuh tawh nèn, khawhar pawh kan hre tawh meuh lo," nui deuh chung hian putar chuan a lo ti a.

An inbiak rei ka hlauh avàngin ka lo inrawlh ta vat a," Ka pu, kan kal tawh mai ang? Tui ti deuhin in lo ei dâwn nia," tiin. Mami hi chu, a titi tui ve thei si a, kan awm rei hlauh zawngin țhiante an zahawm, a hma tehchiam tawh si lo.

"Aw le, kan lo ei țeuh ang e, in fel, nula fel tak in ni," a lo ti ve a, Mami chu melhin ka chhuak ta nghâl a, ani pawhin min rawn zui ve nghâl mai bawk a.

Min rawn hnaihchilhin,"I hming a hria a, i ke nâ pawh a hria, engtin nge in inhriat a?!!" tiin dîlchhût leh hriat châk hmel zet hian  zawhna min zâwt nghâl a. Kei pawh chuan ka chunga thil thleng chu tâwi fel takin ka hrilh ve mai bawk a.

"A nih, a fapa chu i hmu a, eng nge a an? A hmel a țha em? A aw a mawi em? Aw mawi i ngaina ve si a," a ti lehpek a, a rin loh deuh tùrin,"Mawi lutuk! A hmel pawh a țha; mahse, a beng a ngawng a, a mit a kalh bawk," tiin ka chhâng ta daih a, ka chhànna avàng chuan ka kut veilamah sih hlawk ka hlawh zui zat bawk. A star hi a mit a kalh ralh țhin a, chu chu sawisak nân an hmang a, a duh lo ve thei êm êm a ni.

Thil engkim kan tihfel vek hnu chuan haw turin Bus dahna lam pan chuan kan kal ta thliai thliai a, thla han lâk chuai chuai pawh a châkawm tehlul nèn, phone ka nei ve tlat lo, ka nuin neih a la phal tlat lo va, "College i kal hunah chauh i nei ang, school naupang nih lai chuan a ngai lo, in la mamawh tak tak lo," a ti tlat a, ka ngèn lui ngam lo a ni. Ţhiante erawh chuan an nei deuh vek a, min mamawh a niha min be duh a nih chuan ka nu phone-ah min rawn be ve mai țhin; mahse, hemi ni ber kher hian phone rawn keng abar an awm meuh lo, Lbi leh Hruaii erawh chuan an rawn keng chiang mai a, Lbi phone-in vawi khat kan vaiin thla chu kan la ve ngei a, hetiang lam hi an ngaihsak lêm lo ni berin ka hria.

Haw kawngah zâi an play a, kan zàwm ve dual dual mai. Kei pawh ka zâi ve nasa a ni, zài hi chu nuam ka ti ve alawm, mite angin thiam sé sû lo mah ila, a nuam ve hrim hrim.

*******

Zan khat chu ka mumangah kan lo picnic leh a, Gatekeeper fapa kha chiang lutukin ka lo hmu zui, kan lo inngaizâwng  deuh lehnghâl a, ka harh chuan mak ka ti kher asin! Ka ngaihtuah ngai azeng pawh a ni hauh si lo va, a hmel lah chu chiang zetin ka hmu bawk si; mahse, ka han ngaihtuah lêt chuan ka mumang chu ka ngai deuh vawng vawng thei nia. Kei hian ka lo ngaizâwng ru deuh em maw ni le?

Ruah a sùr tawh ngai loh avàngin Sir Manuna motor-ah pawh kan chuang tawh ngai lo va, min hmuh hi chuan kan bulah a rawn ding ve ziah tho nain kan lo hnial ve ziah tawh. A phurhpa lah kha a la rawn phur zauh zauh tho a, kan hnial ţhin chhan pawh a ni. A nèlawm loh lulai lutuk a, khatiang bula chuan ai kha chuan kea kal mai hi a nuam záwk, ruah lah a súr tawh bawk si lo va. 

Kea muangchânga kal chung chuan Mami chuan," Kumin Krismas chu ka va peih lo tak! Nuin Champhai lama hman a rawt a, ka pi a dam țha vak lo bawk nèn, ka huphurh tawp," a ti sap sap a.

"Champhai chu a nuam ngawt zâwk ang chu, a boruak vêl khi a Krismas ruih bîkin ka ring asin," ka lo ti a, a rûk tak chuan Mami hi ka awt zâwk. An chhúngkuain an kal dial ang a, a pain zu a in ve si lo, a pi pawh lo dam țha lo mah se, a pa zu in lohna chu ka awt hrim hrim. 

"Nuin a dam rei tawh loh a ring deuh a niang, bâkah, min lo chah ve hrim hrim bawk a, a tar ve tawh bawk sia, min lo hre lo lehpek tawh hialin a nia ka rin ni," Mami chuan a ti leh a.

"Nang chu i la vànnei a nih chu, kei chu ka pite pahnih leh ka pute pahnih an thi vek tawh, pi leh pute neiha an hnêna pangchang taka la awm ve theihte hi ka châk asin, chuvàngin, huphurh miah suh, i piin a la dampui bîk che a nia," ka ti ve thung a.

A dik a ni. Ka pi emaw ka pu emaw chu la dam se chuan ka pa zu in thu hi ka hrilh ang a, ka zilhtîr hrim hrim ang. A duh zâwng ngawt mai ngaihtuah lova keini a chhüngte'n hrehawm kan tih leh tih loh tùrte hi ngaihtuah tel tùrin ka zilhtîr ngei ang.

Class-a țhiante zînga ka awm hian kan in chhûng ka ngaihtuah rùn lo va, ka hlim ve thei mai țhìn. Ina ka haw thlen apiang hian hlim loh rûkna hian min rawn tuam nghâl ziah a, ka hlim lohna belhchhah tùrin ka pa lah a rawn nam haw ziah bawk. A fapa tlangvâl chu ni ila chuan ka zilh ve ngam ngei ang, ka nu pawhin hrehawm a ti tih ka hre reng si a, ka khawngaih a ni.

Pathianni tlai khat chu a rui lo teh tlat a, ka nu nèn kan pathumin kan awm a, naute an awm rih loh avàng chuan sawi chhuahna hun țha tak niin ka hria, a rui lo bawk a, a harhfìm lai ngeia sawi hi a țha. Duh leh min hau mai rawh se, a zu in ryih laia zilh ai chuan a sâwt deuh tho tho ang. 

"Pa, zu hi rawn in haw tawh lo la?" ka ti chhuak ta phawng a, ka nu nèn an titi lai a ni a, hun a remchâng si a, ka bawhpelh duh lo.

"Mai mai a, Bawihte, ka rui ngai hleinem maw le," a rawn ti nêm duai a, ka rin aia ranga min rawn chhàn avàng chuan ka láwm khawp mai. Min hau ang a, min vìn lêt hrep ang tih ka lo hlau ru zâwk a nia.

"A zahthlâk alawm, hrehawm ka ti a nia, Nu pawhin hrehawm a ti ve tho bawk a. Bâkah, zu in chu a hlâwk lo e, a zahthlâk bâkah pawisa țûl lo taka hman ralnaa nia," ka ti leh a, min chhànna khân min tihuaisen tlat. A huat ka ring kha a nia, haw àwmin a awm si lo.

"Nia, Bawihtei sawi chu a dik chiah. A hma pawhin i in ngai lo va, kan chhûngkua pawhin nuam kan ti, zu i in hian buaina i siam chu ka ti miah lo; mahse, chhûngril hi a nuam lo țhin a, sim daih rawh, a lo pawhin i awm thei tih ka hria a ni," ka nu pawh chuan a lo ti ve a.

"Buaina ka siam loh ahnu, bâwnghnute ka in angah ngai mai rawh u. Mite in angin ka in lo va, ka rui buai ve ngai lo. Ka in avàng hian sum ka la hmang miah lo a nia, ţhiante min khilai char char a ni ka in ni," ka pa chuan a ti leh a.

"Nakinah chuan an khilai reng thei lo ang che, a tìrah an khilai che a, a hnuah i taksain a mamawh tâk hnuah chuan sum sèn ralna țha tak a ni ang, tunah hi chuan  i la sim thei 

chiang a ni," ka nuin a tih lehchuan kei pawh chuan," Nia, zuin a in lêt hunah che chuan sim i tum ang a, i sim thei tawh si lo ang," ka lo ti ve a.

"A ngawl ka vei dâwn lo, lo hlauthâwng duh suh u, ka duh hun takah ka nghei chat mai ang," ka pa chuan awlsam zet hian a lo ti mai a, a tho zui nghâl ta daih a.

Ka nu chuan en zui vang vang pah chuan," Khati kha a ni tak si a, kan pahnih hian bâng lova kan țawngțaipui a ngai a ni, beidawng miah lova kan dìl char char chuan hlawhtlinni hmel kan hmu ngei ang," a ti sap sap a, ka nu chu ka han en a, ka khawngaih reuh lutuk! Tih theih vak a awm si lo va, ka ngawi ta daih a, ka rilru erawh chu a hrehawm ru khawp mai. Ka pa ka ngei a, ka nu ka khawngaih, ka naute nèn. Pa zu in mi neih hi a zahthlâk hrim hrim, a hmaiuanthlâk loh ve chiang êm mai.

*******

Zirtawpni zîng khat chu Sir Manuna motor-ah kan chuang leh ta nge nge, a ding tlat si a, Mami'n chuan a ti leh tlat a ni.

Kha pa kha a lo țhu ve leh reng tawh. Dik tak chuan seat hmaah hian țhut ve mai țhin tùr hi a nia, engtizia a hnunga țhu ve ziah nge maw a nih ni? A inti lal ka ti lo thei lo.

Sir Manuna leh Mami an titi malh malh a, kei erawh chu ngawi rengin ka bula țhu sîk hlau chuan ka taksa ka țang mar at reng thung a. Nakin deuhah chuan Sir Manuna chuan kan picnic chungchâng chu a rawn sawi chhuak ta nawlh a, mak ka lo ti rilru khawp mai a, țhiantehoin an lo hrilh a ni ngei ang chu.

"A nuam reuh asin, kei pawh vawi khat ka kal tawh alawm, an hawn hlim tê khân a nia, tunah phei chuan a nuam tawh ngawt ang chu," Sir Manuna'n a tih chuan Mami chuan rang zet hian," Umm, nuam lutuk! A hmun a nuam bawk si, Maria-i phei chuan a fang kual nasa deuh a, a hawi nasa deuh a niang, a accident phah a," a lo ti vat a, a nui pah bawk a.

"A, accident pawh a ni lo, ka thing vawn a tliak a nih kha," ka lo ti thung a, chutia a sawi chhuak chu ka duh vak lo, ka bula țhu kiai deuh suk  ka hmuh phei chuan ka thin a tirim deuh ringawt thei nia!

"Mahse maw, Sir, a vànnei lutuk! Gatekeeper putar khân a hmu hlauh a, an inah hruaiin tlangválin a khûp hliam chu damdawi a hnawihsak a," Mami chuan a ti leh zat zat a, ka ngei reuh lutuk avàng leh chutiang thleng thleng a sawi chhuah avàng chuan a malah chuan ka sik hlawk a.

"A naaa...! Min sik kher suh, a dik reng alawm. Sir, kan chhuah hma ngeiin picnic leh ang u, i ho ngeiin," Mami chuan a la ti deuh deuh! Ka lo zak ru vawng vawng mai. Nêl viau mah ila kan sir a ni si, heti lutuka nèla ngam hi chu ka duh zâwng a ni ve lo.

Nui hak hak chung hian Sir Manuna chuan," Nia, kan la ngaihtuah țha dáwn nia, hun remchâng erawh chu a vâng tawh àwm mang e!" a lo ti ve a.

School kan thlen chuan motor ațangin kan chhuk a, kan classroom kan thlen hma deuh chiah chuan," Maria?" tia min ko ri ka hriat avàngin Mami nèn chuan kan hawi lêt dùn vat a.

A lo țawng ve thei a nih hi!!

Hre thiam lo zet hian ka en deuh há a, chutah, rawmawl a ken lan chu ka

hmu ta chiah, ka rawmawl ang chiah a ni. Ni lo, ka rawmawl a ni, ka țhutnaah khân ka lo dah leh ringawt a ni chiang. Haihawt lutuk hi chu aw...! A zahthlâk thei chiang a ni. Ka haihawt vàng hian zahna ka la tawng zeuh zeuh fo dâwn a nih hi.

Kan hmuh chian theih deuh tùr hian rawmawl chu a rawn keng sâng leh a, a hmel leh mitmeng ațang chuan a nuihzat hmel riauin ka hre zui.

"Ka rawmawl!" A lam chu ka pan phei ta vat a, a bul ka thlen leh a kuta rawmawl a ken ka han ban chiah chuan a sànzia ka hre ta chiah!

"Kalsan ringawt tawh suh," tiin a rawmawl ken chu a thlah a, inherin motor lam pan chuan a kal ta nghâl a.

Ka insehruh nasa kher asin.

*KAN HARSATNA LEH KAN HREHAWMNA  SAWI SAWI HIAN AWMZIA A  NEI LO, CHÌN ȚHANAH KAN NEIH PHEI CHUAN THIL ȚHA LO LEH SÂWT LO TAK A NI. CHU AI CHUAN HLIMNA LAM THU SAWI CHÌN HI A ȚHA ZÂWK*