☆LAIRIL LUAHTU☆ - 4 By Dingdi Pachuau

 ☆LAIRIL LUAHTU☆ - 4 By Dingdi Pachuau

Lungawi lo zetin ka inher hmak a, ka thin a rim țûn mai. Lâwm tùr zâwk ka nih laiin, a țawngkam leh a hmel lan dàn khân min tithinrim tlat si a ni. A țawng loh lai khân a nèlawm loh hle a nih kha; mahse, a țawng chhuah ve chiah khân a nèlawm lo lehzual a ni. Bâkah, min la nuihzat zui a...

"Awiii, a chhiat loh sizia kha..!! Kan school-a lût  ve angin kan la ngai zui, zahthlâk lutuk!!!" Mami chuan a lo ti sawk sawk a, he nu tak hi chu aw, ka thinrimzia hi hre na se chuan hetiang hi a sawi lo tawp ang.

"En reng suh, vûr tlang a nih kha vûr tlang," ka ti nghat a, classroom lam chu ka pansan ta nghâl a.

First period-ah Sir Manuna subject a ni a, a lo lût a, kan zir tùr chu hla a ni a, min chhiartîrin a hla thu har deuh lai nia a hriatte min zâwt nghâl bawk a. Afaki zawhna a zawh lai chuan Mami chuan," En teh, Sir Manuna leh a rawn phurh ziah pa kha, an inang riauin i hre ve lo maw? Sir Manuna hi ka en cheuh cheuh a, kha pa nèn khân an inang ka ti thar ta riau," a rawn ti sar sar a.

A hmel kha ka hre chiang ve vak tlat lo, ka lo chîk lutuk bawk si lo va, ka sawi ve mai thei lo. Chutih lai chuan amah vêk chuan," En teh, a thawmhnaw hâk țhin leh kan uniform hi a lo inang ve deuh reuh a, chuvàngin kan lo hai mai mai țhin a lo ni chiang. Kan school-a lût chu a ni thei lo chiang alawm, school naupang ni rual lah a ni tawh hek lo bawk," a ti leh sar sar a.

Engtin nge chûngte chu a lo ngaihtuah chhuah bïk le? Keiin ka ngaihtuah phâk miah si lo va, kan school-a lût veah ka lo ngai char char mai asin. A lo upat hmel viau tawh tihna em maw ni le?  A thil sawi avàng chuan ka tum miah lohvin chutiang thil chu ka ngaihtuah kual ta daih a, kan zirlai pawh chu ka ngaihtuah ta miah lo.

Chhùn chawlha tiffin kan ei lai chuan Rci chuan," Sir Manuna hi chu aw, nupui nei lawk rih lo se ka ti êm mai," a rawn ti chhuak phawng mai a. A thil sawi dàn chuan ka nuih a tihzat êm avàngin ka nui lo thei lo, a star ve sia, kan sir a ni bawk si nèn, mi dang kan sir ni lêm lo chu ni se chuan a pawi lo thei deuh ang a.

"Ngawi tak rawh, nakkuma kan pass chhuah hnuah kan bêm dâwn nia," thawveng zet hian Melorie chuan a lo ti pek a, kan nui ta vek lo thei lo. Ka thil ei pawh ka hâk țép a ni. A thaw hi a veng ve bawk sia, han zah țît țêt leh sawi chhuah hreh deuh lah hi a nei ngai si lo va, kan nui nasa țhìn rêng a ni.

Rpi chuan,"Nia, bialnu a nei lovin ka hria, bâkah, nupui pawh mamawh lo a ni tawh bîk lo, i vànnei ngawt ang!" tiin Rci chu a fiam ve nghâl zat a, chutah,"In lah an nei nuam si, a zau țha bawk a nia," a tihzawm leh zat bawk a.

"Awi, ka châk tawh!" tiin Rci lah chuan fiamthu vêk hian a lo thutak bàwl bawk a, nuih hi an tiza thei a nia. Hetiang hian star an neih hi an indem kual a, ni àwm tak hian an sawi kual a, kan hlimpui ve êm êm mai a ni.

Reuben-a, kan class mipa zînga ngawichawi ber pâwl, fiamthu erawh duh ve phian si, kan tiffin eina bula lo kal  chuan kan thil sawi chu a rawn hre ve a niang chu," Pathlawi a nih hi, star viau duh suh u" a rawn ti ta tlat mai, phâwk deuh hrûin, âwih lo deuh tak tih hriat tak hian kan en nghâl țhap a.

"I hre chiang chiah maw?" inla detective zet hian Helen-i chuan a ti vat a, ani lah chuan," Engah nge ka hriat loh ang? Kan vêng a inang alawm le," a ti leh a, âwih loh hmel deuha kan en deuh țhap avàng chuan nuam a ti lo a niang, classroom ațang chuan a chhuak nghâl ta daih a.

Kan ngawih deuh țhap lai chuan Aveni chuan," A rawn sawi chhuah tâkah chuan a nih ka ring ta deuh, an sawi deuh tawhin ka hre tlat," a rawn ti ve leh a, chuti a nih chuan, pathlawi a ni an tih si chuan a motor-a  kan chuanpui ve ziah kha a fa chu a ni thei mai ang em? Mami pawhin inang a tih kha; mahse, a ni thei êm dâwn em ni? A tlangvâl tawh a, Sir Manuna lah a la upa over bawk si lo.  Chutiang ngaihtuah chuan Mami chu ka en a, ani pawhin min lo en ve chiah, kan ngaihtuah a inan duh hmel ka ti.

"A ni thei ngei ngei ang," a rawn ti sap a, awmze nei deuh hian a'n meng tãl deuh tap a. Ani pawh hian ka ngaihtuah ang chu a lo ngaihtuah ve tho a nih chu; mahse, a, a ni thei ngût dâwn em ni le? Keimahni ang rual fapa a nei thei dâwn em ni? 

Thaw deuh hak hian," Ni lo ang," ka ti ve thung a, chutih lai chuan Rci chuan," Pathlawi pawh ni se ka duh tho tho, a zei viau dâwn tihna a ni mai a," nui ar ar chung hian a rawn ti chhuak a,  mi dang chuan an rawn sawisa chhunzawm nghãl zat a, a pathlawi nihna chu kan hlimpui zâwk ta phian a.

*******

Ka pa pawh a la rawn in tluang zêl e. Ka nu nèna kan zilhna khân awmzia chu a la nei rih lo phawt chu a ni a, a sawi dàn takah, in chhûngkhurah buaina a siam lêm lo a, tlêm chuan a zia deuh; mahse, zu in mi hi ka ngai thei lo hrim hrim, chuvàngin, wine, beer tih vêlte pawh hi tem chhin ka tum ngai lo, zu nèn hian ka en hrang lo va, a hming a dang ni maiah ka ngai hmiah. In a țhatna leh a țûlna ka hre lo, ka hua a ni tawp mai.

Ka nu nèn erawh chuan kan sawi dùn zauh zauh a, ka bulah chuan ka pa chu a chhe zâwngin a sawi ngai lo, kei erawh chuan ka pa ka dem thu leh hrehawm ka tih thu chu ka sawi  ziah a, ka zah thu pawh ka sawi ve ziah. Ka pa bulah ka sawi ngam mang si lo va, ka nu bulah hian ka inhrithla ve ni maiah ka ngai. Ani erawh hi chuan ka pa chak lohna chu zu a nih miau avàngin țawngțaipui ziah tùrin min hrilh chàmchí a, ka zàn mut dâwn leh ka țawngțai apiang chuan ka telh ve tho; mahse, a in loh chu ka ring chuang lo. 

Zan khat chu a rawn in tam deuh hlek a niang, a țawng deuh lùng lúng a, ka naute pahnih, Tapuia leh Tatei chuan an en duh khawp mai a, zan dangah chutiang chuan a awm ngai si lo va, mak an tiin an hre thiam lo ve deuh a ni ngei ang.

Ka nuin ka room lama lehkha zirpui tùra min hrilh avàngin ka room-ah ka luhpui a, kum 14   lah kum 13 lai an nih ve tawh avàngin thil awmzia an hre ve deuh a niang, ka chhang chiah Tatei chuan,"U, pa kha a rui a ni tiraw?" a rawn ti ta chat a. Chhàn dàn tùr ka hre lo kher mai, thu dik han hrilh dawt lah chu ka hreh deuh bawk si, chhuanlam dang han siam tùr lah chu a vâng bawk si.

"A hah deuh a niang, a rui lo ang," ka ti ta ringawt a, an lehkhabu chu phawrh tùrin ka hrilh zui nghâl bawk a.

Tapuia chuan," Zu rui țhìn awm dàn a ni chiang alawm, a țawng dàn pawh kha," a ti leh a, kei erawh chuan," Le, lehkha zir ang u aw, a tam thei ang ber thiam tum ila, țha taka pass vek kan tum dâwn u nia, tu ti țha țha kan ti ang chu," tiin an rilru chu kawih hersak ka tum ve a.

Tatei chuan,"Kan zínga ti țha ber chu a phâk lo pahnihin eng emaw tihsak ti ila, a nih loh tal pawhin pocket money kan neih ațangin thil leisak ti tal ila?" a lo ti a, Tapuia pawh chuan," Yes; mahse, ka ti țha ber dâwn sia, ka khawngaih lâwk che u," a lo ti ve a, chu chu pakhati chuan a lo ngai thei lo," I ti țha ber tawh hauh lo ang, kan hria ang," a lo ti nghauh a, a zirlaibu chu a kêu ta nghâl a.

Tunah chuan an rilru ka lâk pènsak thei ta rih e. Zàn dangah ka ti leh thei ang em chu ka hre tawh lo, ka pa hi rawn rui haw tawh lo hrám se ka ti a ni. An la naupang ve bawk si a, pa zu rui mai mai uapna hnuaia awm atán chuan ka khawngaih lâwk a ni, an rawn lian ve zêl ang a, thil awmzia an rawn hre chho ang a, pa zu in țhin neih a zahthlâkzia leh hrehawmzia an hre ve tùr chu ka duh lo takzet a ni. 

Ka pa zu in țanna hi a la rei fahran lo, nge kan hriat lohin a lo in reng tawh țhìn zâwk ka hre lo; mahse, kan hriatah chuan a la rei vak lo. Chuti chung chuan  ka nu hlim lohzia leh kei ngei pawh ka hlim lohzia ka hre chiang tawh khawp mai. Ina ka awm ve chuan ka pa rawn haw hun tùr hi ka lo huphurh lâwk êm êm tawh a, kan in ațanga awm bo daih ka châk ut ut țhìn; mahse, chûng ka ngaihtuah chhuah châng chuan ka nu ka khawngaih leh țhìn. Amah chauha ka pa rui a hmachhawn tùr chu ka khawngaih lo thei lo, hrehawm a ti ve êm êm si a.

Hun a kal duak duak a, Krismas pawh kan lo hnaih ve ta. Mamite chhûngkua Champhai lama Krismas leh Kumthar an hman daih dâwn avàng chuan ka huphurh lâwk khawp mai a, kan kohhranah ani lo, țhian kawm dang êm êm ka nei lo tlat si a, chuvàngin, a tel lova  Krismas leh Kumthar hun hman chu a huphurhawm ve êm bawk a ni.

Bazârpui lamah kan bazâr ve ngei a, mi an tam ve tawh bawk si a, kan innêk tâwlh tâwlh mai. Mami chuan nuam a ti leh tlat pek a, nui uar uarin mi a nêk lui ta țhìn a ni, a naupang chhia ka ti tak tak!

"Helama kal hi i ti ve ziah a, ka ning a nia," ka ti sap a, mi tamnaah hian kei chuan boruak țha hìp tùr tlachhamin ka inhre tlat țhìn a, mi tamna hi ka ngaina thei lo a ni.

"A ti-krismas bazâr ve alawm le, kum tinin ka la kal ziah, nikuma ka sàwm che khân i peih lo va, chuan, kum hmasa lehah pawh," ti charh charhin, pheikhawk a lei tùr ni miah lo chu a en lâwr dan dan pah a. 

He nu tak hi chuh, thil a hre rei thei si, ka peih lo a ni ve mai a. Tunah pawh hian min sàwm ngawrh êm avàngin helamah hian ka kalpui ta hrâm a ni, Champhaiah min kalsan daih dáwn lo se chuan ka kalpui tawp nâng. A thil lei duh loh tùr tih ka hriatpui ve rengte lah hi a en kual peih si, a man  zâwtin a bun chhin kual nasa thei a nia.

"Duh tâwk teh, hawh, khilamah kal tawh ang, ka ril pawh a țâm tawh nghe nghe, kan chàwl nghâl daih dáwn nia," ka ti a, a bánah chuan ka chelhsak a. Ani lah chuan," Ngawi lawk, ka'n en kual leh lawk aw, ka duh tak ka hmu fuh hlauh thei asin," tiin a bân ka chelhna chu phelhin a kal kual leh ta rih a, beidawng rilru tak hian ka en zui ta ringawt a.

Restaurant-ah chuan kan chàwl ta ngei a, kan ei tùr order kan nghah lai chuan ka hawi kual vêl a, kan hma chiah dawhkàn kîla țhu ve chuan ka mit a la ta deuh tlat, a chhan chu ka hmuh tawh hnu ni tlata ka hriat vàng a ni! Ka en nawn leh a, min hnungchhawn ang deuhin țhu mah se sîr lam a hawi deuh pah tho avàng chuan ka hre thei deuh tlat, khawiah nge ka hmuh tawh kha aw...?

A bula țhu nèn chuan an titi ve ngei a ni, a lam a hawi zauh zauh avàng chuan a sîr zâwngin ka hmu thei a, ka ngaihtuahna sâwr bingin khawiah nge ka hmuh tawh tih chu ka ngaihtuah a, ka hre chhuak thei mai tlat lo.

"Eng nge i ngaihtuah a?" Mami'n a rawn tih tâkah chuan ka harh chhuak ta deuh zawk a, zêp lêm lo chuan," En nghâl chuang lo la, kan hmaa țhu pakhat zâwk saw ka hriat tawh hnu ang ka tia, ka hre chhuak thei mai lo va," ka ti ta duah a.

En nghâl vatin," A tu zâwk saw maw?   Jumper dum ha saw maw? Hm, tlangvâl chhiat loh hmel deuh hi chu i lo hmu fuh thei mang e," min ti ta zêk a. A bâna sihsak hlawkin," I țawng ring lutuk! En nghâl lo la ka ti mawlh mawlh bawk a," ka ti nghat a.

"Ngawi teh, a hnung ațang ringawt chuan hriat a har êm mai, ka hre thei mai bîk lo," a tih lai chuan kan ei tùr chu a rawn thleng ve ta chawpchilh a, kan thil sawi pawh chu kan ngaihtuah zui ta lêm lo va.

"Maria...?"

Ka thil eina fork hmuam chung chuan ka hawi chhuak chiang kher mai! A aw chu ka hre chiang lutuk tlat. Ka la hre tam lo; mahse, a aw mawi zet hi khawiah mah ka hai tawh ngai lo ang.

Min rawn en chhukin min nuih sak a, a nui hmel chuan engtin emaw ni tak min awmtîr tlat. 

"Ka hmu thut che a," a rawn ti leh a, chutah chiah chuan ka inngaihtuah harh ta thut a, ka fork hmuam lai chu ka thla ta vat bawk a. Ka zak hnuhnawh kher mai, a mawi dáwn lo hle si a, nula ve pui si, a va chêt mawi loh theih ve le.

"Eng nge i lo tih a?" biak dàn tùr ka hriat hmasak ber a ni tlat; mahse, ka sawi zo chiah a, ka hre chhuak leh nghâl tho. Mamawh lamin a lo kal ve a niang chu, Krismas a hnai tawh a, thawmhnawte pawh a rawn en ve ang chu.

"Ka pa damdawi tùr ka rawn la lawk a," a tih chuan," E, a nih chu, a dam țha maw?" ka ti zat a, ka rilru chhûngrilah inthiam lohna ka nei zui, ka hawihhawm ve hmel lutuk a, ka zak deuh zâwk.

"Aw, dam e," a ti phawt a, chutah," I khûp pawh kha a dam țha vek tawh ang chu maw?" a rawn ti ve leh a, a aw mawi tak avàng chuan ka tui ral lek lekin ka hria, mawi ka tih chi lutuk a ni si a.

"Aw, dam vek tawh," ka tih chuan bu deuh nghatin," A țhat chu," tiin a mit chu a lèn kual a, chutah,"In thil ei ka tibuai rei tawh che u, ka kal tawh ang e," tiin a nui leh sak a, kei pawh chuan ka nuih ve a.

A hnua Mami lam ka va hawi chuan ngawi reng leh che miah lo hian min lo en reng a, a mit chu han meng deuh sawr sawr luiin zawhna mitmeng tih hriat zet hian țawng chhuak miah bawk si lo chuan min en reng a.

"Khati khân min en kher suh, ka hrilh dáwn che. Kan picnic-naa gatekeeper fapa kha a nia, ka khûp damdawi min hnawihtu kha," ka ti nghâl vat a.

"I hming a hria a, a aw a mawi a, a polite hmel viau bawk a," tiin a han meng zîm lui deuh sawr sawr a, chutah," In inkârah eng emaw a awm em?" a rawn ti zawm zat a, a mit lah chuan khaw dang a melh sawn lo rêng rêng.

"Teuh lo mai! Engtin nge chutiang chu i rin theih a?" tiin ka nui hak a, chutah," Ei mai mai teh, a dai zo dâwn, eng thil mah a awm lo, awm se chuan ka hrilh loh che i ring em ni?" ka ti ta zék a, ka thil ei lai chu ka ei chhunzawm ta nghâl a.

"A awm lo chiang chiah maw?" min rinhlelh hmel tak chuan a ti leh hrâm a, kei lah chuan," Awm lo, a hming pawh ka hre lo," ka ti leh a, dâwt ka hrilh chuang lo va, ka zêp lo bawk a ni.

"Mahse, a aw kha chu i duh chi tiraw?" a rawn ti leh hrâm a, chu erawh chu ka phâ bîk lo, mawi ka tih chi a nia, bâkah, a hmel hrim hrim pawh kha a chhia ka ti miah lo! Mahse, sawi chhuah kher ka tum lo, min rawn nuih sak laia ka awm dàn phei kha chu, sawi chhuah chi pawh a ni lo.

A thil ei țhial pah chuan," Ih, Super Max-a ai chuan a țha ka tihpui  daih zàwk che," a rawn ti leh ringawt a, makti rilru deuh hlek hian ka en deuh hâ a, a chhan chu kan star-te chanchin hi kan pahnih hian kan sawi dùn ngai tlat lo va, tûn hi a vawi khatna chiah a ni. Chutia Super Max-a a rawn sawi chhuah tâkah chuan ka mitthlaah pawh chuan Super Max-a hmel chu ka hmu vang vang a. Ani hi ka star a nia, a hming takin kan sawi ngai lo, a star hming pawh hi Perfect ti bâkin kan sawi ngai lo.

Ka mitthla ațanga Super Max-a hmel nawh reh pah chuan, "Theihnghilh ang, ei zo thuai ila, bazâr thuai thuai zâwk teh ang, en kual tùr i la ngah leh dâwn si," ka ti ta zàwk a, ka hmaa ei tùr chu ka ei chhunzawm leh ta a. Ani pawh chuan sawi chhunzawm ta bîk lo chuan a ei tùr chu a ei ve leh ta a.

MC-ah chuan Sir Manunate pawh kan han hmu ve nawlh mai a, hmel hlim tak hian min lo be hmasa zâwk lehnghâl a, a zahthlâk zâwk a nia.

"In lei nalh àwm mang e!" a tih chuan Mami chuan," Kan la lei lo, kan la en kual dâwn chauh a. Sir, i inlei zo tawh em ni?" a ti ve zat a, kei erawh chu nui hmel pu ve deuhin an bulah chuan ka lo ding ve mai mai a. 

"Um, lei zo a ni mai ang chu, Sawmzuala ka nghâk lawk a," a ti a, chutih lai chuan," Kan kal thei tawh e," tih ri rawn awm avàng chuan chu lam chu kan en ta țhap a.

Sir Manuna motor-a lo chuang ve ziah pa kha a lo ni, a fapa nia kan hriat kha, Mami nèn chuan awmze nei tak hian kan inen zawk a; mahse, kan inen rei lo.

"E, i va rei lo si ve...! Maria, Mami, mawi deuh in lei dâwn nia aw," tiin nui sâng hian min en tawn a, chutah, a fapa chu en lehin," Kal ila, khaipui i ngai em?" a ti nghàl zat a.

Chu pa chuan vawi khat tê pawhin kan țhian dùn chuan min melh lo, a awm dàn hi ka ngei zâwng tak a ni ve tlat mai a nih chu. A inla ka ti, a ngêng khawpin ka ring. A pa a fel mai mai nèn, hemi kawngah kher hi chuan a chhùn lo ve thláwt a nih dâwn hi.

*MITE FAKNA HI A HLÛ; MAHSE, HLOBET PÂR ANGA CHUAI HMA A NI A, THLAMUAN PHAH NÂN LEH RILRU TIHLÀWM NÁN HMAN LUAT A HLAUHAWM*