☆LAIRIL LUAHTU☆ - 6 By Dingdi Pachuau

 ☆LAIRIL LUAHTU☆ - 6  By Dingdi Pachuau

Chumi ni ațang chuan chu pa chuan ka ngaihtuahna a luah ta zauh zauh mai, ka mumang lamah ka lo hmu zauh tawh bawk a, a àwm lo miah lo. Ka star rûk ve Super Max-a nèn pawh an inang viau a, an aw mawi dàn leh an pianzia pawh a inang khawp, chen pawh an inchen viau ang; mahse, Super Max-a erawh a ngo zâwk deuh thung. Mipa ngo lam hi ka duh vak ngai lo a nia, Super Max-a erawh hi chu a aw a mawi tlat a, chu chu ka star chhan pakhat a ni. 

Aw-mawia erawh kha chu a ngo miah lo, nisa hnuaiah hna a thawk nasa pawh a ni maithei, inuluk taka intuai hliau hliau chi a ni lo tih a hmel leh a chezia ațang khân a lang reng bawk a, a ngo lêm lo pawh kha a àwm reng.   Restaurant-a Mami nèn kan chawlha ka hmuh kha chuan ina a awm mai mai ang kha chu a ni bîk lo, a chhiat loh ém kha.

Ka naute pahnih an pass ve ve si a, ka result hriat hlàn ka nghâkhlel ve tawh kher mai. Rin ang ngeiin Tatei aiin Tapuia a ti țha leh ngei a, keini a unaute pahnih hian kan thil lo tiam tawh kha kan châwi ngeiin ka ring. 

Kan result a chhuak ve ta ngei a, kan class chu kan pass deuh vek mai, mipa lamah pahnih an compartment a, mi dang zawng chu kan pass vek. Ka rin aia ka tih țhat avàngin ka hlim kher asin, ka chhûngte leh ka naute pawh an hlim ve khawp mai; mahse, Tapuia a ti țha ber a, Tatei nèn pawisa kan châwi ta. Pawisa châwi si-ah chuan ka la hlim ber mai àwm e, kan unauin pâwl kan sawn vek si a, chubâkah, ka rin ai daihin ka percent a sâng bawk si a.

Hrângbana college-ah kan kal ve ta țhâm țhâm a, kan in ațangin a hnai ve thei deuh ber a, chuvàngin ka duh a ni. Mi dang nèna kan lo sawiho pawha kan duh ber kha a ni hrim hrim bawk. Uniform hâk ngai tawh lo tùr kha kan phûr angreng viau kha a ni a, a hun a lo thlen meuh erawh chuan uniform kha ka ngai ru ngawih ngawih mai. Inchei ngaina tak leh uar tak ka ni si lo va, thawmhnaw ka nei tehchiam lo nèn, a ngai ka ha deuh tlut tlut mai chu ka nuin min khawngaih ve deuh a niang, thawmhnaw leina min pe ve ngei a, ka pa a lo dîl pawh a ni maithei a ni, ngai ka ti tehchiam lo nain chutia min pêk tâkah chuan ka lei ve ta tho. 

Kan pass khân Sir Manuna khân eng mah min pe ta miah lo va, inhmuhna remchâng kha a awm thei ta lo a ni, kan țhianho pawh chuan kan sawi chhuak leh țhìn, a hoin kan picnic hman lo va, thil min lei tùr lah min leisak hlawm ta hek lo. 

College zawng, a boruak a lo dang deuh bawk a, țhianteho pawh an inchei nalh theiin makeup pawh an hmang uar ve ta, an mit pawh an hnawih dum ve ta khawp mai. Mami nèn erawh chuan kan hmang ve vak lêm lo, lotion leh face cream a ni deuh mai; mahse, engtiklai pawhin lip gloss erawh kan pai reng thung.

Inrinni a ni a, nimin lamah Mami'n," Naktûk chu thil min enpui lawk rawh aw, min chhuahpui lawk ang che," a tih avàngin zîng kâr ațangin ka tih tùr ka ti zung zung a, chawhma dâr 11-ah chuan ka ti zo vek hman rêng a, ka tih zawh hnuah Mami chuan min rawn be ta chiah a.

A scooty a rawn ken tho avàng leh a inchei lêm loh avàng chuan kei pawh ka inchei bik lo, ka slipper pan chhe zet erawh ka thlâk ve a, Chaltlâng lamah chuan kan tlân chho ta vang vang a.

A nutei dàwrah secondhand pheikhawk an hawng thar lo niin, mi dang pawh an lo awm ve țeuh mai a, Mami chuan," A mawi i tih kha lo chuh nghâl vat rawh aw," tiin min hrilh ru sap a.

Mawi tih chu ka ngah mai, Mami duh tùr nia ka hriat chu a lamah ka theh phei zel a, mi dang pawhin an lo ban ve nasa sia, a țhen chuan anmahni tân an lo la daih thùl, ka nuih a za angreng.

A la to deuh bawk nèn, pakhat chauh a la ta rih. Mami bun duh chi hi ka pheikhawk bun duh chi a ni ve lo hrim hrim a, a duh tùr nia ka rin, a lama ka theh ve țhinte pawh kha ka bun duh zâwng chi hlîr a nia, a duh zâwng a ni lo hrim hrim; mahse, ka enpui ve a ni sia, ka en ve mai mai a ni.

College-a kan ţhiante pawh kan hmu, hostel ațangin dàwrkàwna chàwl tùrin an rawn kal vang vang a lo nia, an peih ka ti rilru khawp mai.

"Lo chàwl ve ula, keini pawh kan chàwl dâwn chiah a," Ma-i chuan min hmuh chuan a ti var a.

Mami chuan," A châkawm khawp mai; mahse, haw kan lo tum chiah tawh a, kan hmanhnawh deuh bawk sia," a lo ti thung a. Mak ka lo ti ru deuh khawp mai, hmanhmawh thu kan la sawi dùn miah si lo va, an bulah chàwl ve mai mai ila pawi ka tih lêm loh nèn.

"In induh e! Lo chàwl ve mai mai teh u," Muani'n a lo tih leh chuan," Min lo hre thiam mai teh u, kan haw thuai zâwk ang e, tih tùr kan la nei bawk sia," Mami chuan a ti leh a.

Kawnga kan tlàn lai chuan Mami chuan," Restaurant tharlâm deuh ka hria a, tah chuan chawlhpui che ka tum vàng a nia ka hnial hlawm ni," a ti chhuak ta a. A hnial chhan kha ka zâwt duh lêm lo kha a ni a, chumi vàng a lo nih chuan a țhat hlauh chu.

"Min chhuahpui bawk sia, treat che ka duh a," a ti leh a, kei chuan," A ho mai mai, han chhuah ve zauh zauh pawh hi a țha ve alawm," ka lo ti thung a.

Kan in awmna kan tlàn pèl a, an inah scooty dahin kein kan kal ta zâwk a, ka rin aiin kan kal thui ta phian mai, Israel point kan thleng hial alawm le!

Restaurant thar a hriat chu in chungah a lo awm a, kan han thleng chho chu a thengthaw nuam ka ti kher mai. A zau lutuk lo nain a hmun an ruahman dàn chu a fuh ka ti lutuk ringawt.

Chàwl pawh an lo awm ve nual e, keini țhian dùn pawh chuan ei tùr chah tùr chu kan en kual a, Mami chuan," I ei châk tak kha order la aw, ka treat dâwn che ka tih kha," menu ka bih vang vang lai chuan a rawn ti a.

"Ka pe ve thei alawm le aw, i inthlahrung duh mai mai a nih kha," ka lo ti mai a, ani lah chuan," Ni lo, ka tum sa hrim hrim, kan ei țeuh dâwn nia, ril pawh a țâm ve tawh bawk alawm," a lo ti leh a.

Ei tùr kan nghah lai chuan,"Nangni țhian dùn chu, in lo chàwl ve a ni maw?" Sir Manuna aw ngei maiin a rawn tih chuan a lam kan hawi dùn nghâl vat a.

"E, sir, i lo chàwl ve elo?" Mami chuan a ti vat a, kei erawh chuan nui deuh sâng chung hian ka en chho ve ringawt a.

Kan dawhkàn chu rawn kïl ve nghâlin," Um..." a ti phawt a, chutah,"In bazâr em ni?" a ti leh a.

"Aih...kan chhuak lawk ringawt a. Chuan, Maria-i hi helaia an ei siam tuizia hi hre ve se ka duh vàngin ka rawn hruai a," nui deuh sak sak chung hian Mami chuan a ti leh a.

"I vawi khat rawn chawlhna a ni tihna a ni maw?" tiin min rawn en a.

"Umm..." tiin ka lu ka bu nghat a.

"Vawiin chu ka treat ang che u aw, in pass man thil tihsak che u pawh kha ka la ba rêng rêng bawk a. In order tawh em?" a tih chuan kan lu kan bu nghat a, kan țhian dùn chuan kan inen a, kan nui dùn sak a.

Kan thil chah a rawn thleng chawpchilh nghâl a, Sir Manuna chu a kal sawn leh rih bawk a, keini pahnih pawh chu titi lovin kan ei tùrah chuan kan bùr nghâl chat a.

A hnuah Sir Manuna chu a rawn kal leh a, coffee no hnih hi a rawn chawi pah a. Kan dawhkàna rawn dahin," In tân liau liau Sawmzuala'n ice coffee a  siamsak che u a nih hi, Sawmzuala, ka u fapa kha in hria tiraw? Motor-a ka phurh ve ziah kha," a tih chuan Mami nèn chuan phâwk zet hian kan inmelh ta hau mai!

"A nèlawm loh in tih pawhin coffee siam kher kher hi chu a hnehsawh a nia, a nèlawm lohna hi a thil siam hian a khuh bo vek thei a ni," nui sâng chuan Sir Manuna chuan a ti leh a.

Sawmzuala, a motor-a chuang ve ziah, nèlawm loh leh ngêng zet kha, a fapa ni lovin a u fapa maw lo ni a?! Chuan, ice coffee hi a siam maw ni a? Hetah hian a thawk tihna em ni? 

"Sir, hetah hian a thawk ve tihna a ni maw?!!" Mami chuan Sir lam hawi pah chuan makti hmel la pu reng chung chuan a ti a. Ani chuan," Aw, a sumdàwn bul țan nân a han ti ve țan chu a nia, eng tak ang chho ve ang maw? Chuan, vawiin chu Maria-i rawn chawlh vawi khatna a ni bawk sia, a free vekin in eiin in in thei ang," a lo ti leh a.

Kan chah belh lo hrim hrim. A free-a min tihsak avàngin kan chah belh duh lo bawk, bâkah, kan thil order leh ice coffee min rawn pêk khân min tipuar takzet a ni. 

Kan chhuah dâwn chuan Sir Manuna hnênah chuan làwmthu kan sawi a, kawngkhàr pahnih inkâr banga thlalâk lian angreng tak intâr chu enin kan ding leh rih a.

Sawmzuala thlalâk niin, a ei siamna  thuam inbelin a ei siamho chu dawhkànah a hûng tlar dal a, a tui hmel hlawm takzet, amah pawh chu hlim hmel takin a nui deuh sâng bawk.

He pa hi hlim hmel takin a lo nui ve thei a nih dâwn hi. Khawi laiah tak ei siam chu zir ni maw? A inthuam dàn chu a la inhmeh phian zui, thla a lâkna hmun pawh chu a mawiin a nawm hmel, a inchawih nalh kual vêl vek!

"A inhmeh kher mai! A nèlawm loh nèn, a coffee siam lah kha a tui lungrun bawk si a, star daih mai ka duh!" Mami'n ka beng bula a rawn tih sar sar chuan ka ngaihtuahna ațangin ka harh chhuak ta vat a.

"A lo nui ve thei a, a làwmawm khawp mai," tiin ka kal chhuak ta nghâl a.

*******

Kan chhûngkua chuan hma kan sâwn lo khawp mai. Ka pa chuan a zu in chu bànsan tum lovin a in chho zêl a, chhûngkuaah buaina siam lo ti mah se, kan hlim lohna chu kan buaina a ni reng tawh tih rêng a hre si lo. Tlai lama a rawn haw hi zilh hleih theih a nih loh avàngin tûkțhuan ei lai hun hi kan inzilh theih hun chu a ni mai a, ka nu hian kan hriata zilh a duh lêm loh vàng a niang, a sawi chhuak khât viau a, kei hian ka sawi chhuak leh khauh thung. Chutiang a nih loh phei chuan kan ngawi deuh țhap reng mai a, hlim nui ri leh infiam ri hriat tùr a vâng pharh tawh.

"Pa, țha takin lo haw rawh aw, chhûngkaw pa ber i nih kha," tiin emaw," Hmâna kan chaw ei laia kan nuih bâwk bâwk țhin laite kha ka ngai e,"emaw ka ti ţhìn, ka naute pahnih hi chu chaw ei lai hian an țawng vak ngai lo hrim hrim a, kei hi ka țawng peih deuh ber țhìn a; mahse, tunah chuan ka țawng tam tawh bîk lo, ka nu hi a țawng zauh zauh a, ka pa pawh hi a țawng zen zen lo, zànriah kîlna lamah erawh chuan a țawng nasa thei lutuk a, azawhna ka nuin a chhâng zeuh zeuh tih lohah hi chuan mi dang kan țawng ve ngai lo.

Tlai khat chu a rawn rui sual deuh nge ni, a rawn thinchhe haw khawp mai a, chaw kan ei lai chuan kan chawhmeh chu a sawisêl țan a. Ka nu chuan zaidam tak hian vawiin lam a nawmsam loh deuh avànga chawhmeh lei tùr pawha a chhuah peih loh thu chu a sawi sep sep a. Chawhmeh chu kan nei lo viau pawh a ni lo, zan danga kan hmeh ang tho a ni.

A ipte a zen ruk ruk a, pawisa rawn phawrhin," Kha, sa va lei nghâl rawh," tiin ka nu chu a pe a, a pe pawh a ni chiah lo, a vawm a ni mah záwk ang chu. Ka nu chuan,"Bawihi pa, tûn angah chuan lei tùr pawh a awm tawh lo ang a,..naktûk lamah lei zâwk ila?" dam dap tho hian a ti leh a.

"Ka ei peih lo, sa lo siam ziah tawh ang che u," tiin a tho chhur chhur a, a kut sil tùr chuan a kal sawn ta a. Ka naute hlau hmel chu ka hmu ru reng, kei pawhin ka hlau ru ve tho; mahse, ka hlauhna ai mah chuan ka zahna leh ka thinrimna chu a nasa zâwk, ka nu chu ka khawngaih lutuk, tlaia ka class bâng ka haw lai pawhin a nawmsam loh avàngin a lo la mu thân a nia, eng mah hre chiang lova ka pa zu ri thinrim chu ka haw hluah hluah, tu mahin chaw pawh kan bâr  chhunzawm lo.

"Ei r'u, puar deuhin ei r'u," ka nu chuan a ti sap sap a, amah chuan a bâr ta nghâl a, kan ei chhunzawm duh nân a bâr lui a ni tih ka hre reng, a upa ber ka nih vàngin ka naute ka ngaihtuah ve tho si a, ka bâr ve nghâl a, lem erawh a har țalh tawh mai.

A hnu deuhah chuan sitting room-ah chuan a hnâr bur bur a, ka nu chuan a sin tur puan kensakin a pheikhawkte chu a phelhsak a, ngawi rengin, rilru na zet hian ka thlîr reng a. Ka ngaihtuahna chuan 'Zu in mi rêng rêng pasalah ka nei hauh lo ang' tiin ka intiam mawlh mawlh a.

Kan hma hun lah chu kan hre dèr mai si lo. Ka pa pawh hi a hma chuan zu a in miah hleinem, zu in ngai lo, a in deuh tâk hnu pawha ngawl vei tum miah lo kha a nia; mahse,  tunah chuan a ngawl a vei chu a nih tâk ber hi, buaina lah a lo la thleng dâwn chauhin ka ring bawk.

A tûk zànah erawh sa kan hmeh tâk avàng chuan eng mah a sawisêl lo va, a in nasa vak lo pawh a ni maithei. Thu țhain ka zilh e min ti hlawm a, keini unau chu kan ngawi kar mai a, a thu sawi țha viau mah se a thinlung, a nupui fanaute aia zu in a duh tlatna hi ka ngei, a fate leh a nupui awm nuamin min ti-awm thei si lo.

*******

"I dam maw? Ka hmu chêr riau chea ka hriat chu."

Ka en vang vang a, he pa hi ka zàn mutnaah ka ngaihtuah ru fo a nih kha. Ka mumanga ka hmuh ațang khân keimahah hian eng emaw tak thawk a awm țan tawh a, ngaihtuah loh ka tum pawhin ka ngaihtuah fo a nih kha, tunah hei kan inhmu leh ta a, a hlim hmel nui deuh sâng reng mai hian ka thinlung ipik churh chu a rawn chhêm kiang deuh tlat thei nia!

"Dam alawm, in dam zâwk maw?" ka ti lêt ve a, ka lài ru nain ka thup ve hrâm hrâm a, engtin emaw ka awm a ni tih hi hriattîr ka tum lo ve bur a ni.

"Dam alawm. In hmel hmuh a khât lutuk a, ka pa hian  a sawi chhuak  ziah țhìn che u a," a rawn tih leh chuan nui deuh sak hian," E, kan rawn lang leh țêp tawh ang, an sawi leh vuai vuai tawh a nia," ka ti ve a.

"Lo kal leh ngei ngei rawh u, rawn kal hi an awm ve deuh reng nain ka pa hian nangni tih loh chu a sawi chhuak ngai miah lo, in hlim thãwm kha ngaihthlâk nuam a ti deuh a niang," a ti leh a.

"Kan rawn chingphùl vek ang che u," nui chunga ka tih chuan," Nangni hlim nui thãwm ang kha hlim thâwm hriat tùr a awm khât êm asin, mahni chauh pawhin kan lo nui kan lo nui thei a," a ti leh a.

He pa hian kan thâwm kha a lo hre ve vek tihna em maw ni le? An in ațang kha chuan a hriat vak mang si lo va, min lo ngaithla ru chu a ni êm lo maw?

"Chuan, thil theihnghilh i nei a nia aw, i lo kal leh chu a ngai hrim hrim tihna a nih chu," a ti leh a.

Theihnghilh ka lo nei leh pek maw?! Eng thil nge ni? Engtik laiin nge ka lo theihnghilh pek a?! A mak thei e...

"Eng thil nge ni a?" ka tih chuan," I lo kal hunah le," tiin a nui var var a, a nui hmel maimichhîng lek lek chu a lawmawm ka va ti tak! A tulang naupang sawtin a tihmelțha sawt bawkin ka hria!

Mahse, he pa hming hi ka la hre tlat lo, koh dàn tùr pawh ka la hre lo tihna. Kan inbe ve ta fo a, ani chuan ka hming a hria, kei chuan ka la hre ve pek lo!

"I hmanhmawh hmel sia, ka chelh ding rei tawh lo ang che," a tih lai chuan," Zorin, i hman dâwn tawh em?" tiin mipa pakhat hian a rawn be ta a.

"Aw, hman țêp, ka lo kal dâwn e," tiin chu pa lam hawi chuan a chhâng phawt a, chutah," A nih, Maria, ka kal tawh ang aw, kan inhmuh leh thuai ka beisei a nia," tiin min en vang vang a.

"Aw le, tluang deuhin i haw dâwn nia, i pa kha min lo biak dâwn nia," ka ti ve ringawt a! Ani pawh chuan," Tehrêng mai, a lâwm ngawt ang chu; mahse, ka thîk maithei a ni," nui chung hian a rawn ti a.

Engtin nge khatiang thu kha ka sawi chhuah rêng rêng ni? Ka va zak lo tak! Kei hian ka beisei deuh a ni lo maw? Ani pawh khân a hria a ni ngei ngei ang chu, khatiang khân min fiam ngam a nia.

Zorina. A hming ka hriat tâk avàng khân ka dik lo zo vekin ka hria, ka phûr lutuk nge ni, a ni ngei ang, ka țawng duh ngai muah loh dànin ka țawng tlat alawm. Amah hope-ah min ngai ngei ang chu, hmuh leh pawh a huphurhawm zo vek tawh. 'I pa kha min lo biak dâwn nia' tih ve ringawt, kan inhre țha azeng pawh a ni si lo va, zak lo reuh chu min ti ngawt ang chu!

Rilru hlim ru deuh, hrehawm ti deuh ru tak chuan inah chuan ka lût a, ka nu ka hmuh loh avàngin an room lam chu ka pan a, khumah a lo mu thãn a.

"Nu, hei damdawi chu aw, ei nghâl la?" ka tih chuan a rawn tho ve mai a, nizàn ațangin a khua a sik tawh a, vawiin lamah a mu deuh reng a, damdawi a ei miah lo bawk a. Engpawh nise, naktûk lamah chuan inentîr se a țha ang, hetia tawrh ringawt chu a țha lo.

Zanriah ei hma hretin ka pa chu ryi deuhin a rawn haw a, tûn țum phei chu a chiauhiar zual deuh lehnghâl a. Ka nu chuan, a nawmsam loh deuh avàngin a lo chiauau vak lo deuh, tlai dang ai chuan.

"In pa ka nih hi, min en hrek hrek lo khân min lo chiauau ta che u, ka thil lo hawnte hi phawrh ula?" a ti khur khur a, ka naute chu an kimkit tlat avàngin kei chuan upa ber nih manah a ipte chu ka lo ban vat a.

"Thil lo hawn man awm lo lutuk!" a ti leh nuah nuah a, dawhkànah chuan a thil lo hawn chawhmeh chhe të tê chu ka phawrh chhuak a.

Ka nu chuan, hlim hmel pu lui hrâm hrâm hian," I va rawn lei tam ve! I ril a țâm tawh em? Chaw ei kan siam nghâl dáwn em niang?" dam dap hian a ti a.

"I lo dam țha lo leh pek tawh a ni maw? Hrisêl lo lutuk nupuia neih chu a buaithlâk a nih àwm hi," a ti leh nuah nuah mai.

Ngam ila chuan ka pa chu vin lêt țhawt ka châk ngei mai, a nupui dam țhat lohna pawh khawngaih ahnêkin buaithlâk a ti chu a ni si a le! Ka thin a rim tut tut mai.

"Nupui dang neih mai a ngai a ni, hrisêl lo lutuk mai!"

Ka meng rum nasa lutuk chu ka nu chuan a hlauthãwng a niang, ka kutah min rawn vawnsak a, chumi pah chuan a lu a thing pah deuh a.

"I pa a nia, a rui sual deuh a nih hi, naktûkahte chuan eng mah a hre tawh nâng," a ti sap a.

Rui sual pawh ni se, ka haw tho tho.

*MI KAMTAM DEUH HI CHUAN AN THU SAWIAH HIAN DÂWT AN TELH HLEK DUH TLÂNGPUI*