☆LAIRIL LUAHTU☆ - 7 By Dingdi Pachuau

 ☆LAIRIL LUAHTU☆ - 7  By Dingdi Pachuau

Mipaah lo piang ila aw ka ti vawng vawng a ni. Mipa ni ta ila chuan tlangvâl pângngai ka ni ve tawh ngei ang a, ka pa rui lakah pawh ka nu thlavâng ka hauh ngamin ka pa chu ka chhâng ngam ngei ang; mahse, tunah  hi chuan hmeichhe âwmnêm mai ka ni si, bâkah, ka pa hi a ruih hian ka hlau zui ve khanglâng bawk si a, kan nufa tân chuan khua hi chu a vâr lo deuh chu a ni. Ka nu hian a chhâng ngam lo ang tih ka hre bawk, hei tak hian ka thinlung a tinâ a ni. Ka nu anga mi zaidam, dam dap reng leh rilru dâwih hi ka ni ve ang em? A rilru hi a dâwih ka ti mai, ka pa hi a la thinrim khum ngam miah lo a nia, hetianga a zu ruiin a tih khum pawh hian ngawih a chuh thei a nia, kei chuan ka thei ve pawhin ka ring ve hauh lo.

Zîngah ka nuin nizàn lam boruak a sawi chhuak hauh lo va, ka pa harhfìm lai hian sawi chhuak se, lo pui ve vat ila ka tih tehlul nèn, ka nu hi zawng, inhnial buai leh inhauhna thlen thei thil lamah hi chuan a hmui hi a chîp thei a nia.

Ka pa zâwkin chaw kan ei lai chuan," Vawiinah inentîr ang che, khatin khawsik nuam lo tuar ringawt tawh suh," a ti ta zâwk a, a lo hre ve reng a nih dâwn hi, tûn hnai têa a thil sawia ka làwm ve ber țum a ni hial ang chu!

"Bawihi pawh hi inkalpuitîr mai la, nangmaha i hreh deuh chuan," a la ti deuh deuh a, makti angreng deuh chuan ka pa chu ka en a,  ka nu ka en leh vat a. Ani erawh chuan," Hreh lo ve, ka lo inentîr dâwn nia, Bawihi chu class kal a ngai alawm," a lo ti thung a.

"Nu, ka hruai thei reng che alawm, ni khat class kal loh mai maite chu a pawi hleinem," ka lo tih ve chuan," Keimahin ka kal thei alawm, huphurhna ka nei lo, țha takin class kal zâwk rawh," a ti leh tlat a.

Class neih loh laiin ka nu chu ka be chhin a, khawsik satliah deuh mai mai a lo ni àwm e; mahse, damdawi erawh doctor-in a chawh tho a, result țha lo a awm lo, a làwmawm khawp mai.

Ka nu vàng chuan ka pa pawh tlêm chuan a zia deuhin ka hria, zu chu a la rawn in haw ziah tho a; mahse, a rui buai ta rih lo, chu ringawt pawh chu nuam ka ti khawp mai; mahse, a daih rei leh àwm si lo va, a ruih buai leh deuh hun ka huphurh lâwk khawp mai.

Super Max-a pawh ka hmu zauh zauh. Kan College-ah hian a lût ve lo nain kan college opposite chiahah hian dàwr an nei a, chuta a kal chu ka hmu ta ţhìn a ni, ka lo hmuh loh palh châng pawh hian Mami'n min rawn kheuh zawk mai țhìn a, a hmuh loh theih loh.

Mahse, ani ai hi chuan tunah hian Zorina'n ka ngaihtuahna a luah nasa tawh zâwk. Super Max-a hi chu ka hmuh châng hian ka hre chhuak a ni deuh mai a, Zorina erawh zàn ka mut dâwn hian ka ngaihtuah chhuak ziah thung, a nui hmel ngainatawm tak mawlh kha, 'A nuih laiin a bihrûksan theih ngei ngei ang' tih ang tùr chia nui kha a nia; mahse, a inhmeh êm êm tho si. Hetiang hian ka ngaihtuah țhin a ni tih hre ta se, ka zak ngawt ang, lêrh min ti dâwn lutuk. Ani kha chu tlangvâl dik tak ang a ni tawh a, a țawngkam leh mi a chhaih vêl dàn pawh kha a zei êm kha, min duh ve teuh lo, hmeichhia ka nihna angin min chhaih ve mai mai a ni, ka ngaihtuah ang hian ngaihtuah pawh min ngaihtuah ve teuh lo ang.

Ka nu u fanu, Lungleia miin pasal a nei dâwn a, ka nuin man a ei ve dâwn bawk sia, buaithlâk ka ti khawp mai. Ka nu leh pa an kal thei dâwn si lo va, ka nu hi chuan kal duh viau mah se a dam a pan êm avàng hian motor chuan a peih dàwn lo tih hriat sa a ni a, kei hi ka kal duh hmel ber ta a ni.

Ka class bâng ina ka haw chuan ka nu chuan," I nu Puii'n min rawn be zo chiah a, kan chhûngkuaa phei vek ngei tùrin min duh nain kan hman vek theih loh tùr thu ka hrilh tho a, min phût viau a; mahse, ka dinhmun ka hrilh chuan nangmah tal i kal a phût leh a," a lo ti ta ngei a. A hma pawhin kan sawi thuak tawh kha a ni a; mahse, khâng lai kha chuan ka nu pawh a la dam țha a, kal ve ngei a duh thu pawh kha a sawi nghe nghe a nih kha.

"Engtik nge kha?" ka tih chuan," Chhuanlam siam theih miah loh tùrin Aug  ni 15 an ti a nih kha, va kal chu i huphurh viau em ni? Bâkah, Dintei pawhin a phût ve êm che kha, Lunglei pawh i hmu khât leh tawh alawm, va kal la?" a ti ta duah a.

Alu kan tùr vel pah chuan," Nia, i theih loh miau si chuan ka kal mai a ngai a nih hmel, kan lan miah loh chuan an lungawi loh pawh a hlauhawm ve a, ka huphurh êm êm chuang lo,"tiin ka nu chu ka chhâng a. Dik tak chuan ka huphurh ve tho, ka peih lo, keimah chauh phei chuan; mahse, ka nu rilru tùr ka ngaihtuah ve a ngai, ka huphurh tih a hriat chuan a rilru a hrehawm lutuk ang.

"A țhat hlauh chu, class pawh ni khat bâk i țhulh dâwn chuang lo va, a zia hlauh e," ka nu chuan a ti leh a. 

Kan banga kan tàr Calendar chu ka han en zawk a, Aug ni 15 chu Zirtàwpni a ni. Ningàniah Lungleiah chuan phei ta ila, Zirtawpni inneih hun, a tûk Inrinnia haw phei leh. A rei dâwn loh chu, ka lung pawh a va lêng hman bîk tawp nâng.

Lungleia ka phei zawk tùr thu ka hrilh chuan Mami chuan," Hmm, a va peihawm loh! I awm loh chuan a reh ruai dâwn asin, kei pawh class kal lo ve ila, a țhat dâwn chu," a lo ti a.

Kei chuan," Âihawm loh lutuk! Kei ka kal hman loh vàng tak chuan i lo kal ang a, note leh thil pawimawh pawh an lo sawi maithei asin, i kal ngei ngei a ngai, ka lo haw veleh ka zâwt ang che," ka ti ve thung a.

Lungleiah chuan sumo-in ka phei a, Nu Puiite hi Bazâr vëngah awmin an in hi motor kawng bul mai a nih avàngin eng mah buaina tùr a awm lo, an in kawtah chuan min drop mai a, thawmhnaw ka nei lêm lo bawk a, naktûka ka hâk tùr leh Dintei pêk tùr mutpuan set chu a ni mai.

Chhûngteho pawh an lo thleng khâwm nasa tawh a, an kawt zâwl zau pui maiah chuan naupangho pawh an lo zi niai niai mai, a lunglènthlâk loh tawp dâwn hi.

Dintei chhang chiah Mahlimi'n min lo hmu a, a au chûl mai. Ka bag leh ka thil khai chu min lâksakin in chhûngah min hruai lût nghâl a, a nute a ko nghâl vat bawk a.

Engkim an lo peih vek tawh a, vawiin tlai pawh ruai angreng deuh kan țheh dàwn a nih hmel, pâwn lamah mei an nun vut vut tlat, chhûngte thleng khâwm kan țhahnem deuh a ni ang e.

Dintei ber chu a buai a, kan titi vak hman lo, Mahlimi nèn chuan kan inzui ta chawt a, ani nèn hian kan inrual deuh chiah zâwk  nghe nghe a; mahse, Dintei hi chu a fel ber ka tia, an unau thum zîngah hian ka nêl ber bawk a ni. Aizawla a rawn pheiin kan inah a rawn kal ziah, min rawn tlawh ve ziah tihna a nih chu, a țawng duh bawk a, chuvàngin, a nèl loh theih loh.

Zànah Mahlimi bulah, a khumah chuan ka mu ve a, kan chêp angreng; mahse, mikhual an nei țhahnem ve si a, ka complain lo hrim hrim, khum min chantîr phâk chu ka lâwm viau zâwk.

Inneihni chuan uluk takin ka inchei ve a; mahse, a mit ka tlung chiah lo nge ni, a vawi khat nân Mahlimi'n min chei a, ka mitah eye shadow ka thawmhnaw hâk mil thei tùrin chhah lo têin min hnawihsak ve a, ka vun rawng a ngo avàngin lipstick hmuh nuam leh dal deuh raih min hnawihsak bawk a, dárthlalangaka inen ve chuan ka inhai lek lek a ni, ka rin ai daihin makeup hman ka lo inhmeh ve a!

"I mawi lutuk! Tireh miah suh ang che, chuan, ka'n inhnawih ve tawh ang e," a ti a, dárthlalang hmaah chuan a rawn ding ve nghâl zat a, kei pawh chu mawi inti-ru ve tak chuan ka inen ka inen ve a, Mami'n min hmu ve ta se mak min ti ngawt ang chu tih mawlh ka ngaihtuah a.

Khua a țha a, a tihzia tak tak a ni. Mipui kal khâwm biak in chhûngah kan leng mang lo a ni, pâwnah pawh an awm țeuh; mahse, keini chu kan kal hma deuh bawk a, kan țhu hma khawp mai.

Dintei chu an chei nalh ngang mai, a thawmhnaw hâk pawh a mawi, a inhmeh; mahse, a pasal tùr chu a hmelțha ka ti hauh lo mai, a upat hmel deuh tawh bâkah Dintei nèn an inchen deuh tlat a, ka duh zâwng a ni lo; mahse, keia lo duh leh duh lohin awmzia a nei lo chiang,  an induh a, an innei a, a tâwk dèr.

Nilêng chuan hrehawm tiin hun ka hmang bîk lo. Mahlimite an fel a, min ngaihsak bawk a, ka mal hman lo. Thla pawh kan la chuai chuai reng a, nalh ka inti ve bawk sia, nuam ka ti ru ve hle zâwk a ni.

Tlaiah moneitu in, Serkawn lamah ruai kan țheh a, an awmthei thawkhat bawk a niang, in an nei lianin a ropui viau a, an compound pawh a zau khawp mai. Ruai ei tùr pawh chu hmun thumah kan in-line pût mai a, țhenrual an ngah thawkhat bawk a nih hi.

Fatu zîngah Zorina ka hmu! 

Makti zet hian ka en deuh reng a! Zorina a ni ngei si, ka mit ka khap thùl, a bo miah si lo.  Helaiah hian hmuh ka inring miah hleinem, Aizawl lamah khân an awm reng ni tùrah ka ngai asin, eng nge hetah a tih ve rêng rêng ni? Amah chu a ni ngei bawk si a.

Ani pawhin min rawn hmu ve ta, a inhmuh loh theih loh, kan inhmachhawn miau si a, min en vang vang a, kei erawh ka lài deuh a, kan chaw lâk tùr lam chu ka melh thla leh rih a.

Chutah, rawn țawng chhuakin," Maria, hetah ka hmu che maw!!" a ti phawt a, chutah," Inneihna hmang tùr hian i rawn phei tihna em ni? In chhûngte maw?" a ti leh zat a.

"Aw, hmeichhia hi ka cousin a nia, ka first cousin," ka ti duah leh pek! Țûl lo thei e.

"A ni maw? I sawi tâkah chuan an pawh inang deuhin ka hria," tiin a nui deuh sak a. He pa hi nuih a peih tak tak a ni, ka hmuh apiang hian a la nui ziahin ka hria.

"Eng nge i tih ve rêng rêng a?" tia ka zawh chuan,"Kan in ka tlawh ve lawk a, nimin piah khân ka phei tawh," a ti leh mai a.

Lungleiah hian in an lo nei reng tihna a ni maw? An khua dik tak pawh a ni ngei ang chu, an in awmna a nih chuan.

"Engtikah nge i haw phei leh dâwn?" tia min zawh chuan," Naktûkah a niang," ka lo ti vat a, chawhmeh chu ka suak pah a, ka hnungah mi an la awm tam si a, chàwl meuhin ka be  ringawt thei lo a ni.

"Kei pawh ka phei dâwn asin."

Thingbuk hnuaiah chaw chu kan ei a, Mahlimi chuan," Tu nge ni a?" tiin Zorinate lam chu a melh zauh a.

"Ka hmel hriat a nia, Lungleiah hian an awm tih ka lo hre miah lo a," ka ti a, ka hre lo tak tak a ni. A pa a kalsan tihna a ni ngei mai a, a ngaihtuahawm lo tihna em maw ni le? A tar ve tawh tho sia, amah chauha a kalsan chu a khawngaihthlâk ka ti.

"Eng emaw a awm em?" tia mit min rawn siai chuan ka nui hak a," Teuh lo e, hmel hriat satliah mai mai a nih kha," chu ka ti ve tak a, hmel hriat satliah lekah chuan ka ngai teuh lo mai, a rûk chuan ka lài ngawih ngawih, ka ngaihtuahna luah zing bertu a ni miau mai si a.

"A chhe vak lo," awlsam zet hian a rawn ti leh a. Nia, a chhe lo, kei pawhin ka ti alawm, min lo be hmasa nawlh pawh kha ka lâwm viau a ni.

Ka melh ru deuh reng nain ka hmu tawh lo, a kal sawn tawh a ni ngei mai. Khawiah nge in chu an neih le? Serkawnah hi chuan a nih ngei ka ring, helai bul hnaiah pawh hian a ni ngei ang, Mipa lam hian fatu atân an sâwm tlat, an inchhûng a nih ngawt loh chuan an inhnaih viau tihna a ni ngei bawk ang.

Ka haw phei lehnghâl tùr chu min ui der ve khawp mai a, haw rih lo tùrin min ti ve lawm lawm hlawm a; mahse, class kal chhuanlamah ka hmang a, min chelh lui ngam bîk lo, ni khat ka chàwl ringawt tawh tih an hre ve tho si a.

A chhuak hmasa ber pâwl kan ni ngei mai, hetiang a nih chuan kan tlân tluang a nih phawt chuan kan thleng har lo viau ang; mahse, kan vànduai ka ti dâwn nge ni, ka ngaihtuahna chu duh loh a ni zâwk, kan chuanna sumo chu Haulawng thlen hmain a chhe ta ringawt mai! Driver chuan mi a be kual nghâl zung zung a, ka rilru a lo hah ru khawp mai a. Kan siam țha har si ang a, tlai zetah kan thleng ang tih ka hlau a ni.

"Lunglei lama ka lêtpui leh rih mai a ngai tlat mai, min lo hre thiam mai teh u. Buai chuang lo ula, țhiante motor dang thâwl deuhah in inzep phei mai dâwn nia, ka be vek tawh e,"driver chuan a ti a.

Sumo pawh an rawn tlân ve țan ta a, kan bulah chuan an rawn ding phei zêl a, keini lam pawh a thâwl deuhah chuan pahnih/ khat angin kan inhnawh zêl bawk a, kei leh patling deuh pakhat chiah kan bãng tawh a, ka la chuan ve loh chhan chu mi dang chuang kha chu a pair ang deuh zêlin an lo chuang sia, motor hrana chuan kha a rem chiah lo țhìn sia, chuvàngin, pair nei lo ve ve ka pu nèn chuan kan la chuang ta rih a ni.

Mahse'n kan nghâk rei bík lo, sumo lo tlân leh hmasa berah chuan kan inhnawh ve ta a, ka hawi vak lêm lo bawk a, tu tute nge chiang tih pawh ka lo thlêk pek lo va. Ka hnung lama ka hminga min rawn ko sap an awm avàng chuan ka hawi lêt ta vat a.

Engtin nge a nih theih?!! A chuanna sumo-ah tak ka chuang fuh chat a nia, a va mak êm êm! Ka lo hawi loh vàngin ka lo hmu lo mai mai a ni. Hmeichhia ka nih vànga a țhutna min kiana a hnunga țhu chho ta kha Zorina hi maw lo ni?!! Kan inhmuh leh dàn hi a mak, kha kan sumo chuanna chhia pawh kha, ka tân chuan vànneihna a lo nih dâwn hi.

"Ka lâwm e, nangmah i ni tih ka lo hre miah lo," ka ti țha leh rih a. Inbiak a rem êm êm loh avàng leh mi dang ka țhutpuite chu patling lam deuh vek an nih avàng chuan han țawng vak pawh ka inthlahrung, a naupang lam ber han țawng luar luar chu thil mawi ber pawh a ni lo.

Kawngah kan chàwl phei zauh zauh, chawhmeh lei an duh țhìn a, kei erawh chuan eng mah ka lei lo, ka bula țhute an chhuk duh țhin avàngin ka chhuk lo thei lo va, chuti chu ni lo phei se chuan ka chhuk ngai lo ang.

Kan chawlh lai chuan,"Lo țhu chho ve daih la, i bula țhute an puitling khup khup hlawm sia?" nui deuh sâng chunga a tih chuan ka châk khawp mai. Ka bula țhu phei chu a lianin a thau angreng si a, a bula țhut ka inthlahrung ru tawp maw le.

"Pawi lo, ih, ka bula țhu kha a lian riau a, chêp pawh an inti ru ngawtin ka ring," ka ti ve ta nge nge a, a bula țhut ka châk vàng chu ni tho mah se, thâwl deuh hleka țhut chu ka châk ve alawm, kan la chuang thui dâwn bawk si.

"Chawhmeh i lei dâwn em?" a tih chuan ka lu ka thing mai a, chutah," Chuti chu, lo han țhu lût daih rawh, ka'n en kual ve lawk ang e," a ti a, a kal sawn ta nghâl a.

Ka en zui deuh reng a, he pa hi tlangvâl hleitling tak chu a ni hran lo; mahse, chutia ka sawi avàng chuan a tawi tihna pawh a ni chuang lo. A vàntlâng tâwk roh hi ka tia, hei aia sâng tùr hian ka duh chuang miah lo, tuna a sàn dàn hi a táwk chiah, kan inhmeh vêl chiah ang.

Ka thil ngaihtuah avàng chuan ka lu ka thing nak nak a, hawi sawn nghâlin motor lam chu ka pan ta daih a.

Rawn chuan belh pahnih an awm a, kan khat ta țhap e. Kan tlàn leh tâk hnu chuan țhu dùn mah ila kan titi chuang lo, khua a rawn dur deuh khup khup a, ruah a rawn sûr leh ngei dâwn chiang, ka inthuamna a lum hran lo nain vâwt ka ti lo tùrah ngai ang. A sîr ber tukverh bulah ka țhu a, a hnung bera țhu kan ni bawk a, kan insawh leh dat țhìn.

Ruah chu a rawn sûr ta buan buan mai a, a dur nasa bawk a, sùr pawh a sûr tam. Ka inkuangkuah hlãn mai a, pâwn lam ka thlìr lai chuan," Vâwt i ti em?" ka beng bul deuh maiah chuan a rawn ti ta sap a.

Ka mûr chiai chiai thei hial nia!

"Vâwt vak lo," thu dik chanvein ka chhâng. A vâwt ka ti tho a; mahse, a bulah a taksa nghèng deuhthawa ka țhut miau avàngin a taksa lumna ka hre thei a, chu chuan min tilum thei tho bawk.

"Min rawn nghèng rawh, jacket ka bag-ah ka lo dah daih alawm le," a ti leh a. Chutah, a bân dah dàn siam remin min rawn kuah titih deuh a, ka mi huat zâwng chu ni se  chutia a rawn ti chu ka ngai thei lo leh pek khawp ang chu; mahse, ani hi chu ka mi huat zâwng a ni tlat lo.

A va lum nuam bîk tak! Ka bân vawt thlar pawh chu a rawn tilum nghâl vek theiin ka hria, thlasikah a bula mut a nuam ngawt ang, a lum dâwn si a.

Ka thil ngaihtuah avàng chuan ka sen awp awp ngei ngei ang, ka ngaihtuah thui êm alawm, hetianga thui hi ka la ngaihtuah ngai hauh si lo va, keimah ngei pawh mak ka inti alawm le.

Ka lo muthlu a ni chiang, engtianga rei nge ka lo muthilh ni, ka harh chuan ka lo nghèng dar dar mai a, ani pawhin min lo kuah tawh bawk a, ka zah avàng chuan ka insiam rem deuh vat a, en erawh ka en lo, a muthlu ve tho a ni maithei, hre turin ka melh chho ngam tlat si lo va.

Ka muhìl tawh lo, a hnu deuhah chuan," I muhìl thei tawh nange?" a rawn ti ta a, ka melh chho vat a.

"Ka muthlu rei em?" tiin ka zâwt sap a, ruah a la sûr reng a; mahse, a tam lutuk tawh lo. Mi dang pawh an lo muthlu deuh vek a, a hma bera țhu pahnih leh driver erawh an harh thung.

"Rei lo ve, kei pawh ka muthlu sekin ka hria."

Muhil tawh lo chuan eng eng emaw kan sawi a; mahse, kan țawng ring lêm lo, mi tân a lo ninawm thei a, bâkah, an muhìl tui lai tihharh a hlauhawm.

Kan titi ațang chuan tlangvâl fel ve tak a ni tih ka hre thei mai. A chanchin chu over ni miah lo hian a sawi malh malh a, a chângin zawhna min zâwt bawk a. Lungleia an awm țhin laite leh a naupan deuh lai chanchinte chu min hrilh sap sap a. Kei pawh chuan ngaihnawm ti takin ka lo ngaithla a, a chângin zawhna ka zâwt a, a chângin azawhna ka chhâng ve bawk a, zin kawng hrehawm tak chu a ni lo chiang e. Ka vànduaina kha vànneihnaah ka chhiar lo thei lo, motor kha chhe lo ta se, heti hian kan titi lo ang a, a chanchin țhenkhat lah ka hre hauh lo bawk ang. Kan titi a inhmu deuh pawh a niang chu, Aizawl kan luh hma deuhin phone number pawh kan inpe tawn ta hial mai.

*A CHÁNG CHUAN KAN DIKNAAH NGEI PAWH MAWH INPHURHTÎRA, MI DANG THIAM LOHNA THUP BOSAKA, A ȚÙL PHEI CHUAN TAWRH HIAL HUAM TÙRA HUAISENNA KAN NEIH PAWH A ȚÛL ȚHÌN*