☆ LAIRIL LUAHTU☆ - 8 By Dingdi Pachuau

 ☆LAIRIL LUAHTU☆ - 8 By Dingdi Pachuau

Ka phone number a nei ta chu ka ngaih a țha veng veng mai a, min rawn biak thuai ringin ka phone chu ka bulah ka dah deuh reng mai a; mahse, ka rin angin min rawn be hauh lo.

Ni a liam a, kâr khat a liam a, kâr hnih a liam leh mai dâwn ta, he pa hi ka lo ngaih dàn kha a ni dáwn hauh lo mai, eng emaw awmin min chhaih nia ka rinna kha a lo dik lo hualhual a nih chiah hi. Kei hian beiseina ka lo nei sâng mah mah a ni, tlangvâl pângngai a ni a, hmeichhia ka nihna angin min chhaih ve mai a ni.

Lunghnûr ru zet hian lehkha zir tùrin ka țhu a, min lo phone tùr ni hlei lova phone number min dìl lai khân lo hrilh duh loh lêk tùr hi a nia, kei lah khân phùr zetin ka hrilh kha a ni si a, khatih lai pawh khân mak min lo ti ru ngawtin ka ring ta.

Ka thil ngaihtuah chu phone riin a rawn tibuai ta a, maichhíng vang vangin ka phone chu ka han dap a, Mami a ni leh ngei ang chu. En hlei lo chuan," Aw, min ngai leh hman tawh a ni maw?" pèr zet, meng chuang miah lo hian ka ti a.

"Maria..?" 

Ka meng chiang khawp mai! A aw mawi zet ațang lah chuan tu nge tih ka hai hauh bawk si lo, ka ngaihtuahna rawn hriain min rawn bia a ni hial lo maw? Ka âwm chu ka dawm vang vang a.

Min rawn be ta ngei a ni; mahse, ka va nghâk rei si ve! Phùr lutuk vàngin ka chhâng buai nuai ang tih ka hlau zâwk, tháwk ka la vang vang a, chutih lai tak chuan ka rilruah sualin hna a rawn thawk ta tlat, sual chhuah ka châk ta thut a nih chu. Eng nge, min nghah reitîr viau vei a nih kha.

"Tu nge aw?" ka sawi pah chuan ka țhen sak nghe nghe a.

"Zorinsanga, sumo-a i chuanpui kha," a rawn tih chuan ka nuih a tiza viau a ni. A hmingpum a la rawn sawi thlap zui, ka hre reng tih a hre miah lo tihna.

"E, a ni maw?" tih bâk han sawi zui tùr ka hre ta chuang hauh lo, min rawn bia se ka tih țhin lai, ka chàn țhin lai kha chuan thil sawi tùr ka hre țeuh kha a nia; mahse, tunah chuan a bo vek tawh. A aw mawi lutuk hian a tibo zo a niang, tunah tak hi chuan ka sual ka chhuah tawh miah lo bawk.

"Ka rawn tibuai che em?" a rawn tih leh chuan," Aih, buai lo ve," ka lo ti vat a, a rawn nui ta hak a.

"Inlêng i nei a ni maw?" Ka rin loh deuh zawhna min rawn zawh leh tâk thutah chuan a hma aia rang mah hian," Teuh lo lutuk! Inlêng ka nei ngai lo," ka ti leh vat a.

Ka chhâng rang mah mah a ni, ka tàwp chiang thei bawk si.  Ka chhàn dàn aţang chuan a laka ka rilru put dànte hi a hriat theih ka ring ta hial mai, a hria a nih teh chuan aw...

Min hmu miah lo mah se, ka beng bul chêt maia a aw ka hriat avàng chuan ka lài êm êm ringawt, ka hma takah țhuin min be ta se, hei aia ka laih lohna tùr chuang hi ka hre lo. A mak teh mang e!

Zawhna min zâwt a ni deuh ber, keiin ka chhâng a, chu pawh a rùl tâwk ang chauhin. Chhàn thui dàn ka hre lo miau a ni, bâkah, ka lài lutuk chuan min tibuai, a nui leh hak țhìn rî chuan engtin emaw tak min awmtîr a, lài viau e ti lo chuan nuam ka tiin ka phûr viau bawk si.

Zànah muhìl thei lovin mut hmunah ka mu meng kar mai, kan inbiakna kha ka ngaihtuah lêt a, ka chhàn lêt dàn kha chu ka duhkhawp lo thlâwt alawm; mahse, khatih hun lai kha chuan dik tak chuan ka lài a, ka țawng dàn tùr zawng zawng kha a bo vek tlat si a ni,   min be duh tawh lo mai ang em le? Ka chhàn dànah khán a lungawi lo ang em?  Tunah hian a mu ve tawh ang em? A tlai ve tawh a, a mu daih tawh chuan ka ring a, a mut hmain min ngaihtuah chhuak ve ang em? Ngei ru tak chungin nge duh ve deuh tak rilru puin min ngaihtuah ang? Nge keimah ang tho hian a la meng zâwk ang? Min ngaihtuah ru ve deuh tho ang em le aw?

*******

"Kan inhmu leh ta hlawl mai!" 

Ka hmu ru reng tawh a, biak hmasak ka duh loh avàngin ka hmu lo der ngar ngar a nia, min rawn be ta sia, hmuh loh der chu sawi loh, biak loh tum pawhin a theih tawh loh.

"Eng nge i tih ve a?" hmu thut ang mai hian ka han meng phâwk vêl a, ka va zak lo tak! Mami ka melh zawk a, ani lah chuan min rawn hmu ve dêr lo, dàwr nghâktu nèn chuan an lo titi tui leh pek lutuk tawh niin!

"Ka lehkhabu chah ka en chhin a," a tih chuan makti rilru deuh hian ka en a, lehkhabu a lo chhiar ve țhìn a nih chu. Kei pawhin hun âwl ka neih chuan ka chhiar ziah țhìn a nih kha, tunah erawh hun ka nei ta lo êm a, ka chhiar thei tawh rih lo mai a ni.

"Lehkhabu chhiar i ngaina ve a ni maw?" ka tih chuan a nui sak a," Ka țhian țha ber a ni alawm, zirna chhunzawm ve theih tâk lohah chuan  lehkhabu chhiar lamah hian ka ramțang ta a, a țha ka ti riau asin," a ti leh a, a lehkhabu ken lai chu ka thlêk thuak chuan encyclopaedia a ni tih ka hria.

Kei chuan hun âwl  hnawh khah nân ka chhiar a, ani hi chuan a țhian țha bera ngaiin hun âwl nei lovin thiamna puak chhuah nân a chhiar zâwk țhìn tihna, kan inang lo hle mai.

"I lei tùr i en fel tawh em?" tiin min rawn en țha leh a, eng mah ka keng lo tih a hmuh chuan," Eng lam nge i en deuh a?" a ti leh a.

"A, ka en kual mai mai, Mami saw ka kalpui mah a," tiin Mami chu ka chhuanlam ta daih. Ka lehkhabu chhiar ve chu sawi lan pawh ka duh vak lo, love story lam hawi hlîr a ni sia, ho a ti àwm êm mai.

"A nih tak chu."

Mami hian thil hi a man rang ka tia, a rawn hmuh chuan Zorina chu a titipui nghâl bawrh bawrh a, lehkhabu lei tùr kan lâk fel hnu chuan Zorina hnênah  chuan," I ril a țâm tawh em?" tiin Sawmzuala restaurant-a chawlh a rawt nghâl zat bawk a.

Pawisa a remchâng lo thut thei tih hriain," A ngai hleinem, hmun dangah pawh a chawlh theih tho," ka lo ti vat a. Zorinate hian Picnic Spot an enkawlna bâk kha sum hmuhna an nei kher lo ang, Sawmzuala dàwrah phei kha chuan an thil siam kha tui viau mah se, duh aiin a to mah mah ka ti. Mipa a nia, kan chawlhpui si chuan kan ei man pêk a tum ang a, a nei daih lo ang tih ka hlauhpui, a zak ve dâwn asin.

"Ei tùr a tui alawm, Zorina pawh a la kal ngai bîk nâng, kan chàwl ang chu le," ka hnialna hre thiam duh lo lêk chuan a lo ti leh a, ka va ngei reuh tak! Hmm, a pawi lo, kan chàwl ta a nih leh ei tùr tlâwm tlâwm ka thlang nghâl chat mai a niang chu, rilru hman ve a ngai.

Kan chàwl ta ngei a, Mami leh pek chu keini pahnih chu min țhut duntîrin min hmachhawn zâwngin amah chauh chuan a țhu kher pek a, a nui duh bawk si lo va, ka zak tak tak!

Ei tùr kan order pawh chuan a tlâwm ber ber ka thlang ta dan dan a, chu chu a hriatin Mami chuan," Eu, nupui atân i tlâk dâwn riau mai ka ti. Zorin, ţhiani hi chu a che 'eco' râih zêl a nia aw, i tisual miah lo ang," tiin min fiam tawn ta, zah nâklaiin, Zorina chu melh pawh ka melh ngam lo.

"Ngawi mai mai teh," ka ti ta ringawt a, ani lah chuan,"Zorin, bialpa a nei miah lo a nia, ka hre chiang a ni," a lo ti leh a, a keah ka va rahsak vak ringawt.

Zorina chuan," A làwmawm hlauh, vacancy a awm tawh loh hi ka hlauh ber a nia, ka bei nghâl chat thei tihna a nih chu," a lo ti ve a.

Ei tùr a lo thlen chuan kan ei nghâl mial mial a, Mami leh Zorina chu an țawng zauh zauh a, kei chu ka țawng tawh lo hrim hrim. 

"Lo picnic leh tawh ula? In lo kal leh har tawh e," Zorina chuan a ti a, Mami chhàn tùrah ka dah hmiah. Ani pawh chuan," Nia, a châkawm, khaw lum lai tak hian a nuam leh zual a tiraw? Țhianhoin kan ti thei rih lo a nih pawhin semester ang zâwng pawhin kan la rawn kal thuai ang,"tiin a chhâng ve mai a.

"Ka pa pawhin a sawi țhìn che u a," Zorina'n a tih leh chuan Mami chuan," Keini tak chu min sawi ka va ring lo, Maria-i hi a ni lo maw a sawi ţhin chu?" nui deuh sâng hian a ti a, min rawn en bawk a.

"Ei mai mai teh," ka lo ti hlak a, rum deuh hian ka melh a, Xorina erawh ka en ngam lo.

"Sawi e, a sawi vek che u alawm, chawhmeh min pêk lah kha a sawi chhuak ziah bawk a, Maria-i hming phei hi chu a lâr khawp mai," tiin a nui deuh hak a. Ka zak chu ka hmui ka pet fan fan ringawt, min fiamna mah ni se ka zak a, chutih rualin nuam ka ti ru tho bawk si.

Ei tùr ka ei zo tukverha ka hawi chhuak chuan kan piah maia Sawmzuala lo ding reng chu ka va hmu ta chiah a, ani pawh chuan min rawn hmu ve chiah a niang, mit khap miah lo chuan min rawn en ta ràn a.

Ei siama choka lama a awm ka ring a nia, eng nge hetah a tih? A inthuamna lah chu ei siamtu thawmhnaw a ni miah si lo, a smart zeih zawih hle a, inkhâwm tùrte pawh a ang lek lek zâwkin ka hria.

Chutah, a rawn nui ta deuh, ni lo, a nui a ni lo, a kiai suk a ni zâwk ang chu, nui a tling ka ti lo. He pa hi a nui ve ngai pawhin ka ring lo, ka lehkhabu chhiarah mipa puitling hi ni khatah vawi riat an nui tlângpui tiin a inziak kha a ni a, he pa hi chu mipa puitling ni lovin mipa 'ngêng' a ni, vawi khat mah nui hmel pu lova ni a hman liam țum a tam tawh ngawt ang chu. A, ni tin mai hian nui lovin ni a hmang ral țhin zâwk ngei ang, a hrisêl lo ru ngawtin a nia ka rin ni.

Kan ei man chu pêk ka tum ve ràn rán a nia; mahse, mipa nge nge chu kan pêk khalh hman lo chiang, ka inthiam lo ru viau a ni, keimahni vàngin a tum aia tam pawisa a hmang àwm si a, ka khawngaih.

Kan chhuah hnu chuan Mami chuan," Nih, tikhân, i haw nghâl dâwn em tihna em ni? Engtin nge i hàwn ang?" tiin a zâwt a, ani chuan awlsam fe hian," Aw, Bike ka rawn keng a," a lo ti ve mai a.

Bike a lo nei a nih chu, ngaihtuah vak a lo ngaih loh tawp chu a. Ani hi, ka ngaih ang ai hian pawisate hi a lo ngah ru zêk ang ka ti, bike a nei thei a nih chuan a lo inkhâwl ve țên tawh tihna a ni ngei ang a...Heiha! Ka buai lohna tùrah ka lo buai mai mai chu a lo nih kha, a va ho mai mai tak!

Zànah min rawn be ve leh tlat mai. Lehkha zir tuma room-a awm chu ka ni, ka pa a rawn rui haw leh pek a, a țawng bual bual hnuah an room lamah ka nuin a hruai lût thei țâwk a, engtin nge an intih zui ka ngaihven peih lo, ka ning ngawih ngawih a ni.

"Ka rawn tibuai che em?"a rawn ti leh a, kei chuan," Buai lo ve, i thleng tluang a ni maw?" tiin ka zâwt lêt ve ta thung a, ka lài lutuk lo deuh tawh bawk nèn, ka țawng thui ve viau.

"Aw, tluang e, ka lâwm e. Thil ka zâwt lawk thei che ang em?"

A polite dàn vêl chu, over pawh kati phal lo, mi dang chu ni se chuan ka ngei ang a, 'over lutuk' ka ti ngei ang chu; mahse, ani hi chu a over lo.

"Umm, eng thil nge ni ta?" ka ti a.

"Mami khân bialpa i nei lo tih a sawi kha, a dik tak tak em?" a rawn ti ta. Ka thin a rawn phu rang ta deuh thut, engtin nge niang? Ka âwm chu ka dawm pah a. Thudik hrilh ila, min ngaihzàwn a tum ang em? Min zawh dànah min ngaihzàwn a tum tihna em ni?

"Aw..."

"A va ban deuh ve? Single chiah lo tihna em ni?" a rawn tih leh chuan," I ngaih dàn dán le," ka ti ta daih a. 'Ka single' tih chu ka tum bîk lo, min ngai hniam lutuk palh ang, a luck loh thlâk ve dáwn ém asin.

"Min hrilh țha ve mai la?" Engtin nge sawi se min tih ni? Bialpa ka neih loh thu Mami'n a sawi a, chu chu a dik em tiin min rawn zâwt a, 'Aw' tiin ka chhâng a, chubâk bâka hrilh țhat dàn tùr ka hre lo.

"Ka sawi tawh kha," ka ti ta ringawt a, dâwt pawh ka sawi chuang hleinem maw le, a hriat duh tak tak chuan a hre tawh alawm.

"Chuti, bialpa i neih loh chuan ka rawn bêm nghâl che, engtin nge min chhàn dâwn?" a rawn ti ta mai! Chhàn ngaihna hre lo chuan ka phone chu nghet zet hian ka hûm ràn mai a, tunah tak hi chuan sawi tùr mai ka hre lo, a thil rawn sawi chuan min țhâwng ëm a ni, thu a pehhêl miah bawk si lo va, engtin nge ka chhàn ang?

"Bialnu i neih kha," ka ti ta ringawt! A nei tih pawh ka hre tawp si lo va, a neih erawh ka ring deuh tho, tlangvâl a ni a, a nei ngei ang.

"Nangin min chhàn phawt chuan nei dâwn chiang e, nangmahah ka innghat a nih chu," a rawn ti a, chutah," Bialnu chu ka nei thei dâwn

em?" a rawn ti leh nghâl zat a.

Ka rilru chuan chhànna a pe nghâl zut zut a, țawngka erawh chuan ka sawi chhuak hauh lo, chhàn dàn tùr ka hre lo a ni. 

"Maria, ka bialnu chu i ni dâwn em?" a rawn ti leh a.

"I ho êm mai a!" ka'n tih tâk ringawt chu! Ani lah chuan,"Ho min ti a ni maithei; mahse, kei chuan ho ka inti miah lo a nia, ka thutak viau bawk a ni," a rawn ti leh a.

Chhàn dàn tùr ka hre lo... 

"Ka nawr mah mah che em? Nge bialpa nei lai hi ka lo chhai ve reng zâwk che? I neih chuan sawi hreh suh, ka inrawlh lo ang; mahse...i nei lo tiraw?" a rawn ti leh a.

"Um..." ka ti sap a, ani chuan," Um...tih chu nei lo tihna," tiin a rawn nui hak a, chutah," Ka rawn text ang che, min lo chhâng la aw?" tiin phone chu a titàwp ta daih a!

Hrilhhai zetin phone chu ka en reng ringawt a! Chutia ka en reng lai chuan whatsapp message tone a rawn ri dat a, amah a ni ngei ang,

Phûr avàng leh zàm avànga tha khùr deuh dar dar hian ka en ta vat a, Mami a lo ni. He nu vàng vek hi, ka phùr nèn, amah a la ni lo zui.

*A rawn bia che em?*  a rawn ti.

Ka type ve nghâl zat a, amah vàng vek hian phone call chhàn dàn tùr ka hriat loh phah a, hrilhhai ru takin tunah ka awm phah mêk a ni.

*Lehkha zir rawh* tiin ka chhâng, a ngei ngawt ang chu.

Nichina min biak kha chuan țawngkaa chhàn kha ka hreh ve êm a ni, a bialnu nih chu ka duh lutuk ringawt; mahse, ka chhâng ngam mai si lo a ni. Hun buaithlâk lai ber niin ka hria, ka chhàn vat chuan 'min lo duh àwm hle mai' a ti ang tih ka hlau ve deuh bawk a nih kha.

Message a rawn thleng leh ta; mahse, hei chu Zorina hnên ațangin a ni ta thung, chhiar ka huphurh, ka chhiar châk bawk si, ka en duh lawk lo nghe nghe a; mahse, ka online tih a hmu ve reng àwm bawk sia, ka chhiar ta nge nge a.

*Ka nghâk thei che, min chhàn nghâl mai harsa i ti a nih chuan i inpeih hun thleng ka nghâk mai ang, rei tak pawh ka nghâk thei ang che*  tiin.

Ka nui sak, a va nuam tak! Țawngka kha chuan a zahthlâk ve êm a ni, chhut keuh keuh chuan ka zak bîk lo ang, sawi chhuah leh chhut keuh keuh hi chu a dang ve êm asin.

*Ka lâwm e*  ka ti ve ngial a.

A message rawn thleng ka chhiar chuan mak ka tiin ka zak ru deuh chem chem bawk.

*Min hmuh loh der erawh kha chu tum tawh lo hrâm la aw, kei chuan engtiklai pawha hmuh reng theih che ka duh si a*  a rawn ti leh. Thu pawh a lo thiam roh hi le, min tihlimin ka nui ver ver mai.

Innghahtîr reng pawh a ni ringawt lo, ka duh ve reng a, ani pawhin min duh a, ka zah avàngin ka innghahtîr ang maw? A ni thei lo ang, hmeichhe dang pawhin an lo bêm ru ve maithei asin, a chhe lo si, a aw a la mawi êm êm zui, min duh a nih chuan ka vànnei zâwk ngawt alawm le, eng mah ka nih loh hi, induh thei pawh ka ni hek lo.

*Ka nghâk ang che; mahse, ka lo nawr deuh che a nih pawhin min hre thiam hrâm ang che aw, ka duhna chein min tur nasa tawh lutuk tihna a ni ang*  a rawn ti leh a.

Kei pawhin ka duh, eng nge zêp rih a țûlna? Hlim ka duh ve alawm, rilru ipik taka awm hi a ninawm. 

*Kei pawhin ka duh che*  tiin ka thawn ve ta pawp mai, ka thih phah lo ang chu maw...

*******

Kan chanchin Mami ka hrilh chuan min en vang vang pah hian," Palai hna ka thawk țha viau a ni, sawi chhuak lo ila chuan tunah pawh hian in la ni tawp lo ang, ka lawmpui che, min treat thei," a'n ti zui zat a.

"Innghahtîr kha ka duh bîk lo a ni, ka duh a, ka chân ve thei tho si a," ka ti sap a, ani pawh chuan," A dik chiah, duh leh duh chu sawi hmiah tùr, a fel alawm, a nèlawmin a nui duh bawk a, a duat thiam phian roh ang che ka ti," a ti ve ngial a.

Kan inhmu leh tawh rih lo, Aizawlah a rawn kal lo va, keini lah kan picnic rih bawk si lo. Tûnlai phei chu a buai ve viau rih a, chuvàngin, Aizawlah pawh a rawn chuang chhuak hman lo, zàn lamah min biak loh chuan min rawn text ziah țhìn thung. Min theihnghilh lo va, min ngaihvenna a rawn tilang a, ka lâwm tho tho.

Zan khat erawh," Rawn kal leh tawh teh u, ka hmu châk tawh lutuk che, ka pa a dam chiang chiah lo deuh a, rawn kalsan ka ngam meuh si lo va," a rawn ti sap sap a.

"A, rawn kalsan miah suh, enkawl dam var phawt rawh, keini pawhin kan sawi ri ve nasa tawh a nia, kan rawn kal țêp tawh ang," chu ka ti ve a, kal ve thuai chu ka châk khawp mai, kei pawhin ka hmu châk ve tho si a. A pa damlo kalsana min hmu tùra rawn kal tùra tih lah chu a tihchi hauh loh.

"Naktûk hian ka rawn kal thut zâwk dâwn em maw ni le?" a rawn tih chuan," I pa a dam loh kha," ka lo ti vat a, ani lah chuan," A dam hman tawh maithei asin, ka hmu châk tawh che alawm," a lo ti thung a.

"Ngaihsak viau phawt rawh," ka tih chuan," Min ngai ve miah lo a ni maw? Min hmuh châk ve ka ring a nia," a ti nang nang a, chutah, ka chhàn hma chuan," Ka lo kal thut a nih chuan inhmu ngei ngei ang aw," a rawn ti leh a.

Class kal ka ngai a, a rawn kal a nih chuan class off a ngai tihna.

"Tehrêng mai," phûr zet si, ka phùrna tihlan hlau ru zet si chuan ka ti a.

*MI I TEHNA KHÂN AN NIHNA DIK TAK A PHO LANG LO, I NIHNA DIK TAK I HAI LANG A NI ZÂWK*